ཉམས་སུ་མྱོང་བ་འོད་གསལ་གྱི་ངོ་སྤྲོད་གང་ཡིན་པ།
བདེན་གཉིས་འབྱེད་དགོས་པའི་རྒྱུ་མཚན།
གསུམ་པ། ཉམས་སུ་མྱོང་བ་འོད་གསལ་གྱི་ངོ་སྤྲོད་གང་ཡིན་པ་ལ་གསུམ་སྟེ། །བདེན་གཉིས་འབྱེད་དགོས་པའི་རྒྱུ་མཚན་དང་། །ཕྱེ་བ་བདེན་གཉིས་ཀྱི་རང་བཞིན་དང་། །ཕྱེ་ནས་སོ་སོར་ངོ་སྤྲད་པའོ། །
དང་པོ་བདེན་གཉིས་འབྱེད་དགོས་པའི་རྒྱུ་ནི། དུས་འཁོར་རྩ་རྒྱུད་དང་། དབུ་མ་རྩ་ཤེས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་རྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །གང་དག་བདེན་པ་འདི་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་མི་ཤེས། །ཞེས་པའི་དོན་དུས་གསུམ་གྱི་སངས་རྒྱས་རྣམས་ཀྱིས་ཆོས་ཇི་སྙེད་བསྟན་པ་དེ་སྙེད་བདེན་པ་གཉིས་ལ་རྟེན་པ་བསྟན་པ་ཡིན་ལ། དེ་ཡང་ཀུན་རྫོབ་ལ་རྟེན་ནས་ཀུན་རྫོབ་ཀྱི་ཆོས་ཇི་སྙེད་པ་སྟན་ཅིང་། དོན་དམ་ལ་རྟེན་ནས་དོན་དམ་གྱི་ཆོས་ཇི་སྙེད་པ་བསྟན་པའོ། །དེ་ལ་ཀུན་རྫོབ་བདེན་པའི་མཚན་ཉིད་ནི་ཀུན་རྫོབ་ཏུ་མི་བསླུ་བའི་ཆོས་དང་། དོན་དམ་བདེན་པའི་མཚན་ཉིད་ནི་དོན་དམ་དུ་མི་བསླུ་བའི་ཆོས་ཉིད་དོ། །གང་དག་བདེན་པ་འདི་གཉིས་ཀྱི་དབྱེ་བ་འདི་ལྟར་མི་ཤེས་པ་དེ་དག་གི་སངས་རྒྱས་ཀྱི་བསྟན་པའི་གསུང་རབས་ཟབ་མོའི་དྲང་དོན་ངེས་དོན་མི་ཤེས་སོ། །ཞེས་པའོ། །བདེན་གཉིས་ཀྱི་དབྱེ་བ་ཤེས་པའི་དགོས་པ་ནི། དབུ་མ་བདེན་གཉིས་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། དགེ་༼བ༽མ་ལུས་ཚོགས་བསགས་ནས། ཕུན་ཚོགས་ཕ་རོལ་འགྲོ་བ་ཉིད། ཞེས་པའི་དོན། བདེན་གཉིས་ཀྱི་དབྱེ་བ་ཤེས་ན། གནས་སྐབས་སུ་སངས་རྒྱས་ཀྱི་བཀའ་ལ་མི་རྨོངས་ཤིང་། ཚོགས་གཉིས་མ་ལུས་པར་བསགས་ནས་མཐར་ཐུག་ཕོུཾཌ་༼ཕུན་སུམ་ཚོགས་༽པ་ཐམས་ཅད་ཀྱི་ཕ་རོལ་རྫོགས་པའི་སངས་རྒྱས་ཐོབ། ཅེས་པའོ། །དེ་ལྟར་བདེན་གཉིས་ཀྱི་རྣམ་དབྱེ་བྱས་ནས༴ ལས་དང་པོ་པ་ལ་ཀུན་རྫོབ་ཀྱི་ཐ་སྙད་དགོས་ཏེ། དབུ་མ་རྩ་ཤེས་ལས༴ ཐ་སྙད་ལ་ནི་མ་རྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ནི་མ་རྟོགས་ན། །མྱ་ངན་འདས་པ་ཐོབ་མི་འགྱུར། ཞེས་ཞེབ་༼གསུངས་པ་༽སྟེ། མཐར་ཐུག་གི་ཆེད་དུ་གཉེར་བྱ་དོན་དམ་བདེན་པ་ཀུན་གཞི་ཡེ་ཤེས་ཡིན་པའི་ཕྱིར། དོན་དམ་པར་ཆོས་དབྱིངས་ཡེ་ཤེས་འདི་ཡོད་པར་ཡིད་ཆེས་པར་བྱའོ། །སྤྱིར་ཆོས་ཐམས་ཅད་བདེན་གཉིས་སུ་དབྱེ་ཞིང༴ ཁྱད་པར་རྣམས་རྒྱུད་སྡེ་རྣམས་བསྐྱེད་རིམ་དང་རྫོགས་རིམ་དུ་ཕྱེ་ནས་ཤེས་དགོས་ཏེ༴ དུས་འཁོར་རྩ་རྒྱུད་ལས༴ རྡོ་རྗེ་ཅན་དག་བསྟན་པ་ནི། །རིམ་པ་གཉིས་ལ་ཡང་དག་རྟེན། །ཅིག་ནི་བསྐྱེད་པའི་རིམ་པ་སྟེ། །གཞན་ནི་རྫོགས་པའི་རིམ་པའོ། །ཞེས་པ་དང༴ བརྟག་གཉིས་ལས༴ རིམ་གཉིས་མཉམ་པར་གནས་ནས་ནི། །རྡོ་རྗེ་ཅན་གྱི་ཆོས་འཆད་དོ། །ཞེས་པའི་དོན་ཏོ།
ཕྱེ་བ་བདེན་གཉིས་ཀྱི་རང་བཞིན།
༈ གཉིས་པ་ཕྱེ་བ། བདེན་གཉིས་ཀྱི་རང་བཞིན་ནི༴ ཐོག་མར་ཆོས་ཐམས་ཅད་སེམས་སུ་ཐག་ཆོད་དགོས་ཏེ༴ ལང་ཀར་གཤེགས་པ་ལས༴ ཇི་ལྟར་བྱིས་པས་བཏགས་པ་ལྟར། ཕྱི་རོལ་གྱི་ནི་དོན་མེད་དོ། །བག་ཆགས་ཀྱིས་ནི་དཀྲུགས་པའི་སེམས༴ དོན་དུ་སྣང་བ་རབ་ཏུ་བྱུང་། དོན་ཡོད་མ་ཡིན་སེམས་ཉིད་དེ། །ཕྱི་རོལ་དོན་མཐོང་ལོག་པ་ཡིན། ཞེས་པ་དང༴ ཕལ་ཆེན་ལས༴ སེམས་ནི་རི་མོ་མཁན་དང་འདྲ། །སེམས་ཀྱི་ཕུང་པོ་བྱས་པ་སྟེ། །འཇིག་རྟེན་ཁམས་ནི་ཇི་སྙེད་པ༴ དེ་སྙེད་ཐམས་ཅད་སེམས་ཀྱིས་བྲིས། ཞེས་པ་དང་༴ སྤྱན་རས་གཟིགས་རྣམ་པར་རོལ་པའི་མདོ་ལས། སྤྱན་རས་གཟིགས་ཀྱིས་གསོལ་བ། འོ་ན་སངས་རྒྱས་དང་སེམས་ཅན་ཐམས་ཅད་སེམས་ཀྱི་ལམ་ནས་འགྲོ་བ་ལགས་སམ། བཀའ་བསྩལ་པ། ལམ་སྲོལ་ཆེན་པོར་རྒྱལ་པོ་དང་། །སྤྲང་པོ་ལ་སོགས་ཀུན་འགྲོ་ལྟར། །སེམས་ཀྱི་རྒྱ་ལམ་ཆེན་པོ་ནས། །སེམས་ཅན་དང་ནི་སངས་རྒྱས་ཀུན། །རྒྱ་ལམ་དེ་ནས་འགྲོ་བ་ཡིན། །དེས་ན་རྣལ་འབྱོར་སྤྱོད་པ་ཡིས། །སེམས་ཀྱི་ལམ་ལ་ནན་ཏན་བྱ། ཞེས་པ་དང་། ཏིང་འཛིན་རྒྱལ་པོའི་མདོ་ལས། ཇི་ལྟར་བུ་མོའི་གཞོན་ནུའི་རྨི་ལམ་ན། །བུ་ཕོ་བྱུང་ཞིང་ཤི་བ་དེ་མཐོང་ནས། །བྱུང་ན་དགའ་ཞིང་ཤི་ན་མི་དགའ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། ཞེས་པ་དང་། དྲི་མེད་འོད་དང་། རྡོར་སྙིང་འགྲེལ་པར་མདོ་དྲངས་པ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ། །ཞེས་པ་དང་། གུར་ལས། རིན་ཆེན་སེམས་ལས་ཕྱིར་གྱུར་པའི། །སེམས་ཅན་མེད་ཅིང་སངས་རྒྱས་མེད། ཞེས་པ་དང་། འཕགས་པ་ཀླུ་གྲུབ་ཀྱིས། བྱང་ཆུབ་སེམས་འགྲེལ་དུ། བཟུང་དང་འཛིན་པའི་ངོ་བོ་ཡིས། །རྣམ་ཤེས་སྣང་པ་གང་ཡིན་པ། །རྣམ་ཤེས་ལས་ནི་ཐ་དད་པར། །ཕྱི་རོལ་དོན་ནི་འགའ་ཡང་མེད། །དེ་ཕྱིར་དངོས་པོའི་ངོ་བོར་ནི། །རྣམ་ཤེས་སོ་སོར་སྣང་པ་འདི། །གཟུགས་ཀྱི་རྣམ་པར་སྣང་བར་འགྱུར། །ཇི་ལྟར་སྐྱེ་བོ་སེམས་རྨོངས་པས། །སྒྱུ་མ་དམིག་རྒྱུ་དྲི་ཟ་ཡི། །གྲོང་ཁྱེར་ལ་སོགས་མཐོང་པ་ལྟར། །དེ་བཞིན་གཟུགས་སོགས་སྣང་པ་ཡིན། །བདག་ཏུ་འཛིན་པ་ཟློག་པའི་ཕྱིར། །ཕུང་པོ་ཁམས་སོགས་སྟན་པ་ཡིན། །སེམས་ཙམ་པོ་ལ་གནས་ནས་ནི། །སྐལ་ཆེན་རྣམས་ཀྱིས་དེ་ཡང་སྤངས། ཞེས་པ་སྣང་པ་ཐམས་ཅད་སེམས་ཙམ་ཡིན་པ་ལ་གནས་ནས་ཕུང་སོགས་ཕྱི་རོལ་གྱི་དོན་ཡིན་པ་དེ་ཡང་སྤངས་ཞེས་པའི་དོན་ཏོ། །སྤྱོད་འཇུག་ལས། ལྕགས་བསྲེགས་ས་གཞི་སུ་ཡིས་བྱས། །མོ་ཚོགས་དེ་དག་ཅི་ལས་བྱུང་། །དེ་འདྲ་དེ་དག་ཐམས་ཅད་ཀྱང་། །སྡིག་སེམས་ཡིན་པར་ཐུབ་པས་གསུངས། ཞེས་པ་དང་། གཞོན་ནུ་མ་བདུན་གྱི་རྟོགས་པ་བརྗོད་པ་ལས། སྣ་ཚོགས་སེམས་ཀྱི་སྒྱུ་མ་མཁན། ཞེས་པ་ལ་སོགས་པ་ཆོས་ཐམས་ཅད་སེམས་སུ་སྟོན་པའི་ལུང་དཔག་ཏུ་མེད་དེ། ཡི་གེ་མང་བར་གྱུར་པས་སྤྲོས་པས་ཆོག་གོ །དེ་ལྟར་ཆོས་སྲིད་དོ་ཅོག་ཐམས་ཅད་སེམས་ཡིན་པར་ངེས་ནས། དོན་དམ་གྱི་བདེན་པ་ནི་ཀུན་གཞིའམ་ཡེ་ཤེས་སོ། །ཀུན་རྫོབ་ཀྱི་བདེན་པ་ནི་ཀུན་གཞིའི་རྣམ་ཤེས་སོ། །ཀུན་གཞིའི་རྣམ་ཤེས་ནི་འཁོར་བ་ཐམས་ཅད་དོ། །ཀུན་གཞིའི་ཡེ་ཤེས་ནི་མྱང་འདས་ཐམས་ཅད་དོ། །ཀུན་གཞིའི་རྣམ་ཤེས་ནི་ཆོས་ཅན་ནོ། །ཀུན་གཞིའི་ཡེ་ཤེས་ནི་ཆོས་ཉིད་དོ། །ཀུན་གཞིའི་རྣམ་ཤེས་ནི་མཐའ་མའོ། །ཀུན་གཞིའི་ཡེ་ཤེས་ནི་དབུ་མའོ། །ཀུན་གཞིའི་རྣམ་ཤེས་ནི་མ་རིག་པའོ། །ཀུན་གཞིའི་ཡེ་ཤེས་ནི་རིག་པའོ། །ཀུན་གཞིའི་རྣམ་ཤེས་ནི་མ་དག་པའོ། །ཀུན་གཞིའི་ཡེ་ཤེས་ནི་དག་པའོ། །ཀུན་གཞིའི་རྣམ་ཤེས་ནི་གཏི་མུག་གོ །ཀུན་གཞིའི་ཡེ་ཤེས་ནི་ཤེར་ཕྱིན་ནོ། །ཀུན་གཞིའི་རྣམ་ཤེས་ནི་འདུས་བྱས་སོ། །ཀུན་གཞིའི་ཡེ་ཤེས་ནི་འདས་མ་བྱས་སོ། །ཀུན་གཞིའི་རྣམ་ཤེས་ནི་བཅོས་མའོ། །ཀུན་གཞིའི་ཡེ་ཤེས་ནི་རང་བཞིན་ནོ། །ཀུན་གཞིའི་རྣམ་ཤེས་ནི་མི་རྟོག་པའོ། །ཀུན་གཞིའི་ཡེ་ཤེས་ནི་རྟག་པའོ། །ཀུན་གཞིའི་རྣམ་ཤེས་ནི་བློ་བུར་བའོ། །ཀུན་གཞིའི་ཡེ་ཤེས་ནི་གཉུག་མའོ། །ཀུན་གཞིའི་རྣམ་ཤེས་ནི་ཉོན་མོངས་པའོ། །ཀུན་གཞིའི་ཡེ་ཤེས་ནི་རྣམ་བྱང་ངོ་། །ཀུན་གཞིའི་རྣམ་ཤེས་ནི་རྣམ་པར་རྟོག་པའོ། །ཀུན་གཞིའི་ཡེ་ཤེས་ནི་རྣམ་པར་མི་རྟོག་པའོ། །ཀུན་གཞིའི་རྣམ་ཤེས་ནི་ལོག་པའོ། །ཀུན་གཞིའི་ཡེ་ཤེས་ནི་ཡང་དག་གོ །ཀུན་གཞིའི་རྣམ་ཤེས་ནི་བརྫུན་ནོ། །ཀུན་གཞིའི་ཡེ་ཤེས་ནི་བདེན་པའོ། །ཀུན་གཞིའི་རྣམ་ཤེས་ནི་སྡུག་བསྔལ་ལོ། །ཀུན་གཞིའི་ཡེ་ཤེས་ནི་བདེ་བའོ། །ཀུན་གཞིའི་རྣམ་ཤེས་ནི་སྐྱོན་ནོ། །ཀུན་གཞིའི་ཡེ་ཤེས་ནི་ཡོན་ཏན་ནོ། །ཀུན་གཞིའི་རྣམ་ཤེས་ནི་སེམས་ཅན་གྱི་ལས་སྣང་ངོ་། །ཀུན་གཞིའི་ཡེ་ཤེས་ནི་འཕགས་པའི་དག་སྣང་ངོ་། །ཀུན་གཞིའི་རྣམ་ཤེས་ནི་ཟག་པའོ། །ཀུན་གཞིའི་ཡེ་ཤེས་ནི་ཟག་མེད་དོ། །ཀུན་གཞིའི་རྣམ་ཤེས་ནི་སྤྲོས་པའོ། །ཀུན་གཞིའི་ཡེ་ཤེས་ནི་སྤྲོས་མེད་དོ། །ཀུན་གཞིའི་རྣམ་ཤེས་ནི་ཤུན་པའོ། །ཀུན་གཞིའི་ཡེ་ཤེས་ནི་སྙིང་པོའོ། །ཀུན་གཞིའི་རྣམ་ཤེས་ནི་སྡོས་བཅས་སོ། །ཀུན་གཞིའི་ཡེ་ཤེས་ནི་འོད་གསལ་ལོ། །ཀུན་གཞིའི་རྣམ་ཤེས་ནི་བྱུར་ངན་ནོ། །ཀུན་གཞིའི་ཡེ་ཤེས་ནི་བཀྲ་ཤིས་སོ། །ཀུན་གཞིའི་རྣམ་ཤེས་ནི་རྒུད་པའོ། །ཀུན་གཞིའི་ཡེ་ཤེས་ནི་དར་པ་ཆེན་པའོ། །ཀུན་གཞིའི་རྣམ་ཤེས་ནི་དབུལ་བའོ། །ཀུན་གཞིའི་ཡེ་ཤེས་ནི་དཔལ་ལྡན་འབྱོར་པ་ཀུན་བྱེད་པའོ། །ཀུན་གཞིའི་རྣམ་ཤེས་ནི་ཀུན་བཏགས་དང་གཞན་དབང་ངོ་། །ཀུན་གཞིའི་ཡེ་ཤེས་ནི་ཡོངས་སུ་གྲུབ་པའོ། །ཀུན་གཞིའི་རྣམ་ཤེས་ནི་སྡུག་བསྔལ་དང་ཀུན་འབྱུང་ངོ་། །ཀུན་གཞིའི་ཡེ་ཤེས་ནི་འགོག་པ་དང་ལམ་མོ། །ཀུན་གཞིའི་རྣམ་ཤེས་ནི་མིང་དང་རྒྱུ་མཚན་དང་རྣམ་པར་རྟོག་པའོ། །ཀུན་གཞིའི་ཡེ་ཤེས་ནི་ཡང་དག་ཡེ་ཤེས་དང་དེ་བཞིན་ཉིད་དོ། །ཀུན་གཞིའི་རྣམ་ཤེས་ནི་གང་ཟག་དང་ཆོས་ཀྱི་བདག་ཉིད་དོ། །ཀུན་གཞིའི་ཡེ་ཤེས་ནི་དེ་བཞིན་ཉིད་བདག་དག་པའི་བདག་གོ །ཀུན་གཞིའི་རྣམ་ཤེས་ནི་ལུང་མ་སྟོན་ནོ། །ཀུན་གཞིའི་ཡེ་ཤེས་ནི་དོན་དམ་པའི་དགེ་བའོ། །ཀུན་གཞིའི་རྣམ་ཤེས་ནི་འཁོར་བའི་ས་བོན་ཐམས་ཅད་པའོ། །ཀུན་གཞིའི་ཡེ་ཤེས་ནི་མྱང་འདས་ཀྱི་ས་བོན་ཐམས་ཅད་པའོ། །ཀུན་གཞིའི་རྣམ་ཤེས་ཐམས་ཅད་ནི་འཁོར་བའི་རྣམ་སྨིན་ཐམས་ཅད་པའོ། །ཀུན་གཞིའི་ཡེ་ཤེས་ནི་མྱང་འདས་ཀྱི་རྣམ་སྨིན་ཐམས་ཅད་པའོ། །ཀུན་གཞིའི་རྣམ་ཤེས་ནི་སོ་སོ་སྐྱེ་བོའི་རིགས་སོ། །ཀུན་གཞིའི་ཡེ་ཤེས་ནི་འཕགས་པའི་རིགས་སོ། །ཀུན་གཞིའི་རྣམ་ཤེས་ནི་འཁྲུལ་སྣང་ཐམས་ཅད་དོ། །ཀུན་གཞིའི་ཡེ་ཤེས་ནི་མ་འཁྲུལ་བའི་སྣང་པའོ། །ཀུན་གཞིའི་རྣམ་ཤེས་ནི་ཁམས་གསུམ་འཁོར་བའི་ས་སྣ་ཚོགས་སོ། །ཀུན་གཞིའི་ཡེ་ཤེས་ནི་མྱང་འདས་འཕགས་པའི་ས་སྣ་ཚོགས་ཡིན་ཏེ། །རྒྱན་གཏུག་པོའི་མདོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །སྙིང་པོ་ཀུན་གཞིར་བསྒྲགས་པ་ཡང་། །བློ་ཞན་རྣམས་ཀྱིས་མི་ཤེས་སོ། །ཞེས་པ་དང་། ཀུན་གཞི་ངང་ལུགས་དགེ་བ་ནི། ཞེས་པ་དང་། མངོན་པ་ཀུན་ལས་བཏུས་སུ། དོན་དམ་པའི་དགེ་བ་གང་ཞེ་ན། དེ་བཞིན་ཉིད་དོ། ཞེས་པ་དང་། ལང་ཀར་གཤེགས་པ་ལས། དེ་བཞིན་གཤེགས་པའི་སྙིང་པོ་དགེ །རྟོག་གེ་ཅན་གྱི་སྤྱོད་ཡུལ་མིན། ཞེས་པ་དང་། རྒྱུད་བླ་མ་ལས། རང་གཞན་འགྱུར་བ་མེད་པ་དང་། དགེ་དང་རྣམ་པར་དག་པའི་ཕྱིར། །དེ་བཞིན་ཉིད་འདི་གསེར་གྱི་ནི། །གཟུགས་དང་མཚུངས་པར་བརྗོད་པ་ཡིན། ཞེས་པ་དང་། འཕགས་པ་ཀླུ་སྒྲུབ་ཀྱིས་བྱང་ཆུབ་སེམས་འགྲེལ་དུ། དེ་ཕྱིར་ཆོས་རྣམས་ཀུན་གྱི་གཞི། །ཞི་ཞིང་མ་དང་མཚུངས་པ་ཡིན། །གཞི་མེད་སྲིད་པ་འཇིག་བྱེད་པ། །སྟོང་ཉིད་འདི་ནི་རྟག་ཏུ་བསྒོམ། ཞེས་པ་སྟེ། ཀུན་གཞི་ཡེ་ཤེས་དེ་ཉིད་དོན་དམ་གྱི་པ་དང་། བདེ་གཤེགས་སྙིང་པོ་དང་། དེ་བཞིན་ཉིད། དོན་དམ་གྱི་དགེ་བ་དང་། ཟབ་ཞི་སྤྲོས་བྲལ་འོད་གསལ་དང་། སྒོམ་བྱའི་སྟོང་ཉིད་ཟབ་མོ་ཡིན་པར་གསལ་བར་གསུངས་སོ། །
ཀུན་གཞི་རྣམ་ཤེས 
་ནི་ས་བོན་ཐམས་ཅད་པ་དང་། རྣམ་སྨིན་ཐམས་ཅད་པ་དང་། མ་སྒྲིབས་ལུང་མ་སྟན་དང་། རྩ་བའི་རྣམ་ཤེས་དང་། ལེན་པའི་རྣམ་ཤེས་ལ་སོགས་པར་དེང་སང་ཡོངས་སུ་གྲགས་ཏེ། མདོ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། བྱིས་པ་རྣམས་ལ་ངས་ནི་དེ་མ་སྟན། ཞེས་པ་དང་། དྲི་མེད་འོད་དང་། རྡོར་སྙིང་འགྲེལ་པར། ཀུན་གཞིའི་རྣམ་པར་ཤེས་པ་དྲི་ཟའི་སེམས་ཅན་ནོ། །ཞེས་པ་དང་། འཕགས་པ་ཀླུ་སྒྲུབ་ཀྱིས་བྱང་ཆུབ་སེམས་འགྲེལ་དུ། དེ་བཞིན་ཀུན་གཞིའི་རྣམ་ཤེས་ནི། །བདེན་མིན་བདེན་པ་གཞན་དུ་ནི། །གང་ཚེ་འགྲོ་འོང་གཡོའ་བར་འགྱུར། །དེ་ཚེ་སྲིད་པའང་འཛིན་པར་འགྱུར། །ཞེས་པའོ། །དེ་ལྟར་འཁོར་འདས་ཀྱི་ཀུན་གཞི་གཉིས་སུ་ཕྱེ་བ་ལ། མདོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། ཞེས་པ་དང་། རབ་ཏུ་མི་གནས་པའི་རྒྱུད་ལས། ཀུན་གཞི་ཀུན་གྱི་གཞི་ཡིན་ཏེ། རྣམ་པར་བྱང་པའི་གཞི་ལའང་ཡིན། ཞེས་པ་འདི་འདྲ་བས་གནོད་སྙམ་དུ་མི་བཟུང་སྟེ། དེ་དག་གི་དོན་དྲི་བཅས་ཀྱི་སེམས་ཉིད་གཅིག་པུ་འཁོར་འདས་ཀུན་གྱི་ས་བོན་ཏེ། དྲི་མའམ་ཆ་རྣམ་ཤེས་གང་ལ་སྲིད་པ་འཕྲོ་བ་དང་དག་པའི་ཆ་ཡེ་ཤེས་གང་ལ་མྱང་འདས་འཕྲོ་བ། ཞེས་པ་དང་། ཀུན་གཞིའི་རྣམ་ཤེས་ཉོན་མོངས་པ་ ཀུན་གྱི་གཞི་ཡིན་ཏེ། རྣམ་པར་བྱང་བའི་གཞི་མའང་ཀུན་གཞི་ཡེ་ཤེས ་ཡིན་ཞེས་པ་ཡིན་ནོ། །དེ་ལྟ་མ་ཡིན་ན་གསུང་རབས་དུ་མ་ནང་འགལ་བར་འགྱུར་ཏེ། བསྡུས་པ་ལས། སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། ཞེས་འཁོར་བའི་སེམས་ཅན་རབ་འབྲིང་ཐ་མ་ཇི་སྙེད་ཡོད་པ་ཀུན་མ་རིག་པ་ཀུན་གཞིའི་རྣམ་ཤེས་ལས་བྱུང་། ཞེས་པ་དང་། ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། ཞེས་པ་ཡེ་ཤེས་ཇི་སྙེད་པ་དང་། ཡེ་ཤེས་ཀྱི་ཚུལ་ཇི་སྙེད་པ་དང་། ཡེ་ཤེས་ཀྱི་སྒོ་ཇི་སྙེད་པ་དང་། ཡེ་ཤེས་ཀྱི་རྩ་བ་ཇི་སྙེད་པ་ཤེར་ཕྱིན་མཆོག་ཀུན་གཞི་ཡེ་ཤེས་ལས་བྱུང་། ཞེས་པའོ།། །།
ཕྱེ་ནས་སོ་སོར་ངོ་སྤྲད་པ།
བདེན་གཉིས་ཀུན་གཞིའི་གནས་ལུགས།
༈ གསུམ་པ་ཕྱེ་ནས་སོ་སོར་ངོ་སྤྲོད་པ་ལས་བཞི་སྟེ། བདེན་གཉིས་ཀུན་གཞིའི་གནས་ལུགས་དང་། གཉིས་པོའི་སྣང་ལུགས་ཕྱེ་བ་དང་། ཀུན་གཞིའི་རྣམ་ཤེས་ངོ་སྤྲད་པ་དང་། ཀུན་གཞིའི་ཡེ་ཤེས་ངོ་སྤྲད་པའོ། །
དང་པོ་བདེན་གཉིས་ཀུན་གཞིའི་གནས་ལུགས་ནི། བདེན་གཉིས་མཚན་ཉིད་ངོ་བོ་གཅིག་པ་ཡང་མ་ཡིན། ངོ་བོ་ཐ་དད་པ་ཡང་མ་ཡིན་ཞིང་ངོ་བོ་གཅིག་པ་བཀག་པའི་ཐ་དད་ཡིན་ཏེ། དགོངས་པ་ངེས་འགྲེལ་གྱི་མདོ་ལས། འདུ་བྱེད་ཁམས་དང་དོན་དམ་མཚན་ཉིད་དག །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་བཞིན་མ་ཡིན་༼ཁྱབ་༽པ་ཡིན། ཞེས་པ་དང་། ཆོས་དང་ཆོས་ཉིད་རྣམ་འབྱེད་ལས། གཉིས་པོ་དེ་དག་ནི་གཅིག་ཉིད་དང་། །སོ་སོ་བ་ཡང་མ་ཡིན་ཏེ། །ཡོད་པ་དང་ནི་མེད་པ་ཡི། །ཁྱད་པར་ཡོད་དང་མེད་ཕྱིར་རོ། །ཞེས་པའམ་དོན། བདེན་གཉིས་གཅིག་པ་མ་ཡིན་ཏེ། །དོན་དམ་པར་དོན་དམ་ཡོད་པ་དང་། ཀུན་རྫོབ་མེད་པའི་ཁྱད་པར་ཡོད་པའི་ཕྱིར་དང་། །སོ་སོ་བ་ཡང་མ་ཡིན་ཏེ། དོན་དམ་པར་དོན་དམ་ཉིད་ཀུན་རྫོབ་ཁྱད་པར་བཟུང་འཛིན་མེད་པའི་ཕྱིར། ཞེས་པའོ། །དེ་ལྟར་ཡིན་པར་ཡང་བདེན་གཉིས་འདྲེས་ནས་གནས་ཚུལ་ནི། འོ་མ་དང་མར་འདྲེས་པ་དང་། ས་རྙོག་དང་ཆུ་འདྲེས་པ་དང་། ཆུ་དང་ཆུའི་གྲང་དྲོ་འདྲེས་པ་དང་། ཆུ་དང་འོ་མ་འདྲེས་པ་བཞིན་དུ་གནས་ཏེ། ཆོས་དབྱིངས་བསྟོད་པ་ལས། ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་པ། །དེ་བཞིན་ཉོན་མོངས་དང་འདྲེས་པས། །ཆོས་ཀྱི་དབྱིངས་ཀྱང་མི་མཐོང་ངོ་། །ཇི་ལྟར་འོ་མ་རྣམ་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམ་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཞེས་པ་དང་། ས་ཡི་ནང་ན་གནས་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། ཞེས་པ་དང་། ཇི་ལྟར་སོས་ཀའི་དུས་སུ་ཆུ། །དྲོ་བོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲ་བས་གཡོགས་པ་ན། །སེམས་ཅན་ཞེས་ནི་བརྗོད་པར་བྱ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། ཞེས་པ་དང་། ཇི་ལྟར་འོ་མ་དང་འདྲེས་ཆུ། །སྣོད་གཅིག་ལ་ནི་གནས་པ་ན། །ངང་པས་འོ་མ་འཐུང་བྱེད་ཅིང་། །ཆུ་ནི་མ་ཡིན་དེ་བཞིན་གནས། །དེ་བཞིན་ཉོན་མོངས་ཀྱིས་གཡོགས་ནས། །ཡེ་ཤེས་ལུས་འདིར་གཅིག་གནས་ཀྱང་། །རྣལ་འབྱོར་པ་ཡིས་ཡེ་ཤེས་ལེན། །མི་ཤེས་པས་ནི་འདོར་བར་བྱེད། ཞེས་པ་ད་ལྟར་གྱི་ལུས་འདིར་ཡེ་ཤེས་དང་མི་ཤེས་པ་ལྷན་གཅིག་ཏུ་གནས་ཞེས་པའོ། །རྣམ་ཤེས་ཀྱིས་ཡེ་ཤེས་སྒྲིབས་ནས་གནས་པའི་ཚུལ་ཡང་། ས་རྡོས་གཏེར་སྒྲིབས་པ་དང་། བུམ་པས་བུམ་ནང་གི་མར་མེ་སྒྲིབས་པ་ལྟར་སྒྲིབས་ཞེས་པ་སོགས་སྙིང་པོའི་མདོ་དང་། རྒྱུད་བླ་མ་དང་། ཆོས་དབྱིངས་བསྟོད་པ་ལ་སོགས་པར་དཔེ་དུ་མའི་སྒོ་ནས་གསུངས་སོ།། །།
གཉིས་པོའི་སྣང་ལུགས་ཕྱེ་བ།
གཉིས་པ་གཉིས་པའི་སྣང་ལུགས་ཕྱེ་བ་ནི། །རྣམ་ཤེས་ལ་ཡེ་ཤེས་ཀྱི་སྣང་པ་མི་འཆར་ཞིང་། ཡེ་ཤེས་ལ་རྣམ་ཤེས་ཀྱི་སྣང་པ་མི་འཆར་བས། དེ་གཉིས་ཀྱི་སྣང་པ་གཅིག་པ་མི་སྲིད་དེ། རྣམ་ཤེས་ཀྱི་སྣང་པ་ནི་འཁྲུལ་སྣང་དང་། མ་དག་པའི་སྣང་པ་དང་། ཕྱིན་ཅི་ལོག་གི་སྣང་པ་དང་། མ་རིག་པའི་སྣང་པ་དང་། བཟུང་འཛིན་གྱི་སྣང་པ་དང་། སྤྲོས་པའི་སྣང་པ་དང་། ཆགས་སྡང་གི་སྣང་པ་དང་། བརྫུན་པའི་སྣང་པ་དང་། སྡུག་བསྔལ་གྱི་སྣང་པ་དང་། བཀྲེ་སྐོམ་དབུལ་ཕོངས་སྣ་ཚོགས་པའི་སྣང་པ་ཡིན་ལ། ཡེ་ཤེས་ཀྱི་སྣང་པ་ནི་མ་འཁྲུལ་བའི་སྣང་པ་དང་། དག་པའི་སྣང་པ་དང་། བདེན་པ་ཆེན་པོའི་སྣང་པ་དང་། ཕུན་སུམ་ཚོགས་པའི་སྣང་པ་ལ་སོགས་པ་རྣམ་ཤེས་ཀྱི་སྣང་པ་ལས་ཟློག་པའི་སྣང་པའོ། །དེ་ལ་རྣམ་ཤེས་ཀྱི་སྣང་པ་ནི། འཕགས་པ་ལས། ཡོད་ལ་མེད་པར་འཁྲུལ་དང་མི་རྟག་ཉིད་ལ་འཁྲུལ། མེད་ལ་ཡོད་པར་འཁྲུལ་དང་རྟག་པ་ཉིད་དུ་འཁྲུལ། འཁྲུལ་པས་འཁྲུལ་པ་བསླུ་ཞིང་བསླུས་པས་འཁྲུལ་པ་འགྲུབ། འཁྲུལ་པའི་དབང་གིས་ཡང་དག་དོན་ལ་སེམས་ཅན་འཁྲུལ། རྒྱུ་ལ་འཁྲུལ་ཏེ་འབྲས་བུ་ངན་སོང་གསུམ་དུ་འཁྲུལ། ཞེས་པ་དང་། རྣམ་ཤེས་ཀུན་རྫོབ་ཀྱི་སྣང་པ་ཡེ་ཤེས་ལ་མི་སྣང་པ་ཡང་། འབུམ་གྱི་རྒྱ་ཆེར་འགྲེལ་དུ། དེ་ལ་རྨི་ལམ་ལྟ་བུ་ཞེས་བྱ་བ་ནི་རྨི་ལམ་ན་མཐོང་བའི་ཆོས་རྣམས་གཉིད་སངས་པའི་ཚེ་དེ་ལྟར་མི་སྣང་བ་བཞིན་དུ། ཉེ་བར་ལེན་པའི་ཕུང་པོ་ལྔ་ལ་སོགས་པ་ཀུན་བཏགས་པའི་ཆོས་རྣམས་ཀྱང་མ་རིག་པའི་གཉིད་ཀྱིས་ལོག་པའི་ཚེ་སྣང་བ་རྣམས་མ་རིག་པ་སངས་ཏེ། འཕགས་པའི་ཤེས་རབ་ཐོབ་པའི་ཚེ་དེ་ལྟར་མི་སྣང་བའི་ཕྱེར་རོ། །ཞེས་པ་དང་། མ་རིག་པའི་གཉིད་སད་པའི་ཡེ་ཤེས་ལ། མ་རིག་པ་རྣམ་ཤེས་ཀྱི་སྣང་བ་ཅི་ཡང་མི་སྣང་བ་ནི། འཕགས་པ་ལྷས། འཕགས་པ་ཀླུ་སྒྲུབ་ཀྱི་ལུང་དྲངས་པ་ལས། རབ་རིབ་བྲལ་བར་གྱུར་པའི་མིག །རྣམ་དག་དྲི་མ་མེད་པ་ལགས། །སྐྲ་དང་སྦྲང་བུ་ཟླ་ཉམ་དང་། །རྨ་བྱའི་མདོངས་དག་མི་སྣང་ལྟར། །མཁས་པ་ཉོན་མོངས་ཤེས་བྱ་ཡི། །སྒྲིབ་མུན་རབ་རིབ་བྲལ་གྱུར་ཅིང་། །ཡང་དག་མཁྱེན་ཅན་དྲི་མེད་ལའང་། །དེ་བཞིན་ཅི་ཡང་སྣང་བ་མེད། །དཔེར་ན་གཉིད་ལོག་གཉིད་དབང་གིས། །བུ་དང་བུད་མེད་གཞལ་ཡས་ཁང་། །གནས་ལ་སོགས་པ་མཐོང་གྱུར་པ། །སད་ནས་དེ་ཡིས་མི་མཐོང་ལྟར། །དེ་བཞིན་ཀུན་རྫོབ་ཤེས་པ་དག །བློ་གྲོས་མིག་ནི་བྱེ་གྱུར་ཞིང་། །མི་ཤེས་གཉིད་དང་བྲལ་གྱུར་ནས། །སད་པའི་ཚེ་ན་མི་གཟིགས་སོ། །ཞེས་པ་དང་། ཆོས་ཅན་སྣང་བའི་རྣམ་ཤེས་ལའང་ཆོས་ཉིད་མི་སྣང་བ་དང་། ཆོས་ཉིད་སྣང་པའི་ཡེ་ཤེས་ལ་ཆོས་ཅན་མི་སྣང་བ་ཡང་། ཆོས་དང་ཆོས་ཉིད་རྣམ་བྱེད་ལས། དེ་སྣང་ཆོས་ཉིད་མི་སྣང་ཞིང་། དེ་མི་སྣང་བས་ཆོས་ཉིད་སྣང་། ཞེས་པ་དང་། སོ་སྐྱེས་ལ་སྣང་བ་འཕགས་པ་ལ་མི་སྣང་བ་དང་། འཕགས་པ་ལ་སྣང་པ་སོ་སྐྱེས་ལ་མི་སྣང་བ་ཡང་། མདོ་སྡེ་རྒྱན་ལས། བྱིས་པ་ཡང་དག་ཉིད་སྒྲིབས་ནས། །ཡང་དག་མིན་པ་ཀུན་དུ་སྣང་། །བྱང་ཆུབ་སེམས་དཔའ་དེ་བསལ་ནས། ཡང་དག་ཉིད་ནི་ཀུན་ཏུ་སྣང་། ཞེས་པ་དང་། དོན་མེད་པ་དང་དོན་ཡོད་དག །མི་སྣང་སྣང་པ་ཉིད་ཤེས་བྱ། ཞེས་པ་དང་། འཕགས་པ་ཀླུ་སྒྲུབ་ཀྱིས། དབུ་མ་སྒོམ་རིམ་དུ། ཇི་ལྟར་གནས་པའི་དངོས་པོ་ནི། །དེ་ལྟར་འཕགས་པའི་སྤྱོད་ཡུལ་ཡིན། །ཇི་ལྟར་བྱིས་ལ་མི་སྣང་པ། །དེ་ལྟར་མཁས་མ་སྣང་པ་ཡིན། ཞེས་པ་དང་། དཔལ་ཆེན་བིར་ཝ་པས་ཀྱང་། སེམས་ཅན་ལ་ཉོན་མོངས་པ་མ་དག་པ་དང་། །རྣལ་འབྱོར་པ་ལ་ཏིང་ངེ་འཛིན་ཉམས་ཀྱི་སྣང་པ་དང་། བདེ་བར་གཤེགས་པ་ལ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དག་པའི་སྣང་བའོ། །ཞེས་གཞི་ལམ་འབྲས་བུའི་སྣང་པ་མི་འདྲ་བ་གསུམ་གསུངས་པའི་ཕྱིར་སེམས་ངོ་སྤྲོད་པ་ལ་འཁྲུལ་པའི་ལས་སྣང་དང་། འོད་གསལ་གྱི་སྣང་པ་སོ་སོར་ཕྱེད་པ་ཤིན་ཏུ་གཅེས་སོ། །བྱང་ཆུབ་སེམས་དཔའ་ ཀུན་གཞི་རྣམ་ཤེས ་ཀྱི་ཕུང་པོ་ལྔ་མ་མཐོང་པ་ཉིད་ ཀུན་གཞི་ཡེ་ཤེས་ཀྱི་ཆོས་ཀུན་མཐོང་པ་དང་། རྣམ་ཤེས ་ཀྱིས་གང་ལ་ཡང་མི་གནས་པ་ཉིད་ཡེ་ཤེས་ཀྱི་ཆོས་ཉིད་ལ་གནས་པ་ཡིན་ཞེས་བསྡུད་པ་ལ་སོགས་པའི་གསུང་རབས་ཡིད་ཆེས་སུ་རུང་པ་རྣམས་སུ་གསུངས་པ་ཡང་དེ་ལྟར་ཤེས་པར་བྱའོ། །དེ་ཕྱིར་ ཀུན་གཞི་རྣམ་ཤེས ་ཀྱི་སྣང་པ་ཆོས་དང་ཆོས་ཉིད་རྣམ་འབྱེད་ལས། མེད་པ་སྣང་ཕྱིར་འཁྲུལ་པ་ནི། །ཀུན་ནས་ཉོན་མོངས་རྒྱུ་ཡིན་ཏེ། །སྒྱུ་མའི་གླང་ཆེན་སོགས་སྣང་བཞིན། །ཡོད་པའང་སྣང་པ་མིན་ཕྱིར་རོ། །ཀུན་གཞི་ཡེ་ཤེས་ཀྱི་སྣང་ལུགས་མཚན་བརྗོད་ལས། སྣང་བ་ཆེན་པོ་གསལ་བ་ཆེ། །འོད་ཆེན་རྣམ་པར་སྣང་བར་བྱེད། །ཡི་ཤེས་སྣང་པ་ལམ་མེ་བ། །གཟུགས་རྣམས་ཐམས་ཅད་སྣང་པའི་དཔལ། །ལག་ན་འོད་འབར་སྣང་བ་པོ། ཞེས་སོགས་དང་། འཕགས་པ་ཀླུ་སྒྲུབ་ཀྱིས་རང་བཞིན་གསུམ་བསྟན་པར། ཆོས་ཀྱི་དབྱིངས་ལ་དམིགས་པ་ཡིས། །ཕུན་སུམ་ཚོགས་པ་ཉེར་དམིགས་འགྱུར། །ཕུན་སུམ་ཚོགས་པ་ཉེར་དམིགས་པས། །སྐུ་གསུམ་བདགིད་བླ་མེད་པའི། །བྱང་ཆུབ་བློ་ལྡན་གྱིས་ཐོབ་ནས། །བདག་གཞན་དོན་ནི་རབ་སྒྲུབས་འགྱུར། ཞེས་པའོ།། །།
ཀུན་གཞིའི་རྣམ་ཤེས་ངོ་སྤྲད་པ།
གསུམ་པ་ཀུན་གཞིའི་རྣམ་ཤེས་ངོ་སྤྲོད་པ་ནི། །ལང་ཀར་གཤེགས་པའི་མདོ་ལས། ཇི་ལྟར་རྒྱ་མཚོའི་བརླབས་རྣམས་ནི། །རླུང་གི་རྐྱེན་གྱིས་བྱུང་པ་དག །གར་བྱེད་རབ་ཏུ་འཇུག་པར་འགྱུར། །རྒྱུན་ཡང་ཆད་པར་མི་འགྱུར་རོ། །དེ་བཞིན་ཀུན་གཞིའི་ཆུ་བོ་ཡང་། །རྟག་ཏུ་ཡུལ་གྱི་རྐྱེན་གྱིས་བྱུང་། །རྣམ་ཤེས་རྦ་བརླབས་སྣ་ཚོགས་ཀྱིས། །གར་བྱེད་རབ་ཏུ་འཇུག་པར་འགྱུར། །བཟུང་དང་འཛིན་པའི་དངོས་པོར་ནི། །ལུས་ཅན་རྣམས་ཀྱི་སེམས་འཇུག་གོ །ཞེས་པའི་དོན། ཀུན་གཞི་རྣམ་ཤེས ་རྒྱ་མཚོ་དང་འདྲ་ལ། །འཇུག་པའི་རྣམ་ཤེས་བདུན་པོ་རྒྱ་མཚོའི་བརླབས་དང་འདྲ་ཞིང་གཟུགས་སོགས་ཡུལ་རྣམས་རྒྱ་མཚོའི་བརླབས་འབྱུང་པའི་རྐྱེན་རླུང་དང་འདྲ་བ་དང་། ཀུན་གཞི་རྣམ་ཤེས ་གཅིག་པུ་བཟུང་པ་ཡུལ་གྱི་དངོས་པོ་སྣ་ཚོགས་དང་། འཛིན་པ་དབང་པོའི་དངོས་པོ་སྣ་ཚོགས་སུ་འཇུག་ཞེས་པའོ། །རྒྱ་མཚོའི་བརླབས་ཐམས་ཅད་རྒྱ་མཚོའི་རང་བཞིན་དང་། རྒྱ་མཚོའི་རྣམ་འགྱུར་ཡིན་པ་ལྟར་འགྲོ་བ་རིགས་དྲུག་གི་འཁོར་བ་ཐམས་ཅད་རང་རང་གི་ ཀུན་གཞི་རྣམ་ཤེས ་ཀྱི་རང་བཞིན་དང་། རྣམ་འགྱུར་ཡིན་ལ། དེའང་ ཀུན་གཞི་རྣམ་ཤེས ་ཉིད་མ་རིག་པའི་བག་ཆགས་ཀྱི་དབང་གིས་སྣོད་བཅུད་དང་། ལུས་ལོངས་སྤྱོད་བདེ་སྡུག་སྣ་ཚོགས་པའི་རྣམ་པར་ཤར་བ་ཡིན་ནོ། །དེ་ལ་ཀུན་གཞིའི་རྣམ་ཤེས་ཉིད་རང་གི་ཕུང་པོའི་རྒྱུན་ལ་བདག་ཏུ་འཛིན་པའི་ཆ་ནས་ཉོན་ཡིད་དང་། མིག་གི་ལམ་ནས་གཟུགས་སྣ་ཚོགས་འཇུག་པའི་ཆ་ནས་མིག་གི་རྣམ་ཤེས་དང་། རྣ་བའི་ལམ་ནས་སྒྲ་སྣ་ཚོགས་ལ་འཇུག་པའི་ཆ་ནས་རྣ་བའི་རྣམ་ཤེས་དང་། སྣའི་ལམ་ནས་དྲི་སྣ་ཚོགས་ལ་འཇུག་པའི་ཆ་ནས་སྣའི་རྣམ་ཤེས་དང་། ལྕེའི་ལམ་ནས་རོ་སྣ་ཚོགས་ལ་འཇུག་པའམ་ཆ་ནས་ལྕེའི་རྣམ་ཤེས་དང་། ལུས་ཀྱི་ལམ་ནས་རེག་བྱ་སྣ་ཚོགས་ལ་འཇུག་པའི་ཆ་ནས་ལུས་ཀྱི་རྣམ་ཤེས་དང་། ཡིད་ཀྱི་ལམ་ནས་ཆོས་སྣ་ཚོགས་ལ་འཇུག་པའི་ཆ་ནས་ཡིད་ཀྱི་རྣམ་ཤེས་ཡིན་པ་དེའི་ཕྱིར་ ཀུན་གཞི་རྣམ་ཤེས ་མ་ཡིན་པའི་ཁམས་གསུམ་འཁོར་བ་ཞེས་བྱ་བ་ནི་སྡུག་བསྔལ་ཕྲ་རབ་ཙམ་ཡང་མེད་དོ། ། ཀུན་གཞི་རྣམ་པར་ཤེས ་པ་ཉིད་འཁོར་བའི་བག་ཆགས་ཐམས་ཅད་དང་། ས་བོན་ཐམས་ཅད་དང་། ལས་ཐམས་ཅད་དང་། རྣམ་སྨིན་ཐམས་ཅད་ཡིན་པའི་ཕྱིར་རོ། །དཔེར་ན་རྒྱ་མཚོ་མ་ཡིན་པའི་རྒྱ་མཚོའི་བརླབས་ནི་མི་སྲིད་པ་བཞིན་ནོ། །དེས་ན་ ཀུན་གཞི་རྣམ་ཤེས ་ཉིད་སྲིད་པའི་འཁོར་ལོ་རྟེན་འབྲེལ་ཡན་ལག་བཅུ་གཉིས་སུ་འབྱུང་པ་ནི་མ་རིག་པའི་རྐྱེན་གྱིས་འདུ་བྱེད་དང་། དེའི་རྐྱེན་གྱིས་རྣམ་པར་ཤེས་པ་དང་། དེའི་རྐྱེན་གྱིས་མིང་དང་གཟུགས་དང་། དེའི་རྐྱེན་གྱིས་སྐྱེད་མཆེད་དྲུག་དང་། དེའི་རྐྱེན་གྱིས་རེག་པ་དང་། དེའི་རྐྱེན་གྱིས་ཚོར་བ་དང་། དེའི་རྐྱེན་གྱིས་སྲེད་པ་དང་། དེའི་རྐྱེན་གྱིས་ལེན་པ་དང་། དེའི་རྐྱེན་གྱིས་སྲིད་པ་དང་། དེའི་རྐྱེན་གྱིས་སྐྱེ་བ་དང་། དེའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པསྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བ་སྟེ། བདེ་བ་དང་མ་འདྲེས་པས་སྡུག་བསྔལ་གྱི་ཕུང་པོ་འབའ་ཞིག་པ་དང་། ཡོན་ཏན་དང་མ་འདྲེས་པས་སྐྱོན་གྱི་ཕུང་པོ་འབའ་ཞིག་པ་འདི་འབྱུང་ལ། དེ་ཉིད་ཇི་ལྟར་ཤེས་ཤིང་ངོ་སྤྲད་པར་བྱ་ན། མི་རྟག་པར་ཤེས་པར་བྱ་བ་དང་། སྡུག་བསྔལ་དང་། རང་དབང་ཐོབ་པའི་བདག་མེད་པ་དང་། སྙིང་པོས་སྟོང་བ་དང་། ནད་ལྟ་བུ་དང་། འབྲས་ལྟ་བུ་དང་། ཟུག་རྔུ་ལྟ་བུ་དང་། སྡིག་པ་ལྟ་བུ་དང་། གཞན་ལ་རག་ལས་པ་དང་། འཇིག་པའི་ཆོས་ཅན་དང་། མི་བརྟན་པ་དང་། རབ་ཏུ་འཇིག་པའི་ངང་ཅན་དང་། འཇིགས་པ་སྣ་ཚོགས་དང་། འཚེ་བ་སྣ་ཚོགས་དང་། འགོ་བའི་ནད་ལྟ་བུར་ཤེས་ཤིང་ངོ་སྤྲད་པར་བྱའོ། །མི་རྟོག་ཏིང་ངེ་འཛིན་གྱི་གཉན་པོ་མ་སྐྱེས་ན་ཡན་ལག་བཅུ་གཉིས་ཀྱི་མ་རིག་པའི་འཁྲུལ་འཁོར་འདི་ཟད་པ་མེད་ཅིང་འཕེལ་བ་མེད་པར་རྒྱུན་དུ་འཁོར་ཏེ། བསྡུད་པ་ལས། རྐྱེན་རྣམས་འཚོགས་ནས་སྡུག་བསྔལ་འཁྲུལ་འཁོར་རབ་ཏུ་བྱུང་། མ་རིག་འཁྲུལ་འཁོར་འདི་ནི་ཟད་མེད་འཕེལ་བ་མེད། ཞེས་པའི་དོན་ཏོ། །མི་རྟོག་ཏིང་ངེ་འཛིན་གྱི་གཉན་པོ་སྒོམས་ན་འཁོར་བ་སྙིང་པོ་མེད་པ་སྡུག་བསྔལ་གྱི་ཕུང་པོ་འབའ་ཞིག་པ་དེ་ཟད་ནས་སངས་རྒྱས་ཐོབ་པར་འགྱུར་ཏེ། དྲི་མེད་འོད་ལས། འཁོར་བ་སྙིང་པོ་མེད་དེ་ཟད་གྱུར་པ། དེ་ལས་སྐྱེས་བུའི་སངས་རྒྱས་ཉིད་འབྲས་ཏེ། ཞེས་པ་དང་། དབུས་མཐའ་རྣམ་འབྱེད་ལས། ཡང་དག་མ་ཡིན་ཀུན་རྟོག་ནི། །དེ་བཞིན་མ་ཡིན་ཡེ་མེད་མིན། །དེ་ཟད་ནས་ནི་གྲོལ་བར་འདོད། ཞེས་པའི་དོན་ཏོ། །དེ་ལྟར་ ཀུན་གཞི་རྣམ་ཤེས ་ཀྱི་སྐྱོན་དང་ཉེས་དམིགས་ཐམས་ཅད་ཤེས་ཤིང་ངོ་འཕྲོད་པར་བྱའོ།། །།
ཀུན་གཞིའི་ཡེ་ཤེས་ངོ་སྤྲད་པ།
ཡེ་ཤེས་ཀྱི་ཡུལ་དྲུག་ངོ་སྤྲད་པ།
ཡེ་ཤེས་ཀྱི་ཡུལ་དྲུག་སྤྱིར་ངོ་སྤྲད་པ།
བཞི་པ་ཀུན་གཞིའི་ཡེ་ཤེས་ངོ་སྤྲད་པ་ལ་གསུམ་སྟེ། །ཡེ་ཤེས་ཀྱི་ཡུལ་དྲུག་ངོ་སྤྲད་པ་དང་། སྒོ་གསུམ་གྱི་ཉམས་མྱོང་ངོ་སྤྲད་པ་དང་། འོད་གསལ་ལ་སོགས་པར་ངོ་སྤྲད་པའོ། །
དང་པོ་ཡེ་ཤེས་ཀྱི་ཡུལ་དྲུག་ངོ་སྤྲད་པ་ལ་གཉིས་ཏེ། ཡེ་ཤེས་ཀྱི་ཡུལ་དྲུག་སྤྱིར་ངོ་སྤྲད་པ་དང་། ཡེ་ཤེས་ཀྱི་ཡུལ་དྲུག་སོ་སོར་ངོ་སྤྲད་པའོ། །
དང་པོ་ཡེ་ཤེས་ཀྱི་ཡུལ་དྲུག་སྤྱིར་ངོ་སྤྲད་པ་ནི། ཀུན་གཞི་ཡེ་ཤེས་ཀྱི་མིག་པའི་སྙིང་པོས་ཀུན་གཞི་ཡེ་ཤེས་ཀྱི་ཡུལ་གཟུགས་རྡོ་རྗེ་མ་བལྟ་བ་དང་། དེ་བཞིན་དུ་རྣ་བ་ཕྱག་ན་རྡོ་རྗེས་སྒྲ་རྡོ་རྗེ་མ་ཐོས་པ་དང་། སྣ་ནམ་མཁའ་སྙིང་པོས་དྲི་རྡོ་རྗེ་མ་འཛིན་པ་དང་། ལྕེ་འཇིག་རྟེན་དབང་པོས་རོ་རྡོ་རྗེ་མ་མྱང་པ་དང་། ལུས་སྒྲིབ་པ་རྣམ་སེལ་གྱིས་རེག་བྱ་རྡོ་རྗེ་མ་ཡིད་ཀུན་ནས་འཕྲོག་པ་ལ་རེག་པ་དང་། ཡིད་ཀུན་ཏུ་བཟང་པོས་ཐབས་ཤེས་འདུས་པའི་ཆོས་ཁམས་རྡོ་རྗེ་མའི་བདེ་བ་མཉམ་པ་ཉིད་ལ་འཇུག་པ་ཡིན་ཏེ། །དཔལ་ལྡན་རྒྱུད་ལས། མཐོང་དང་མ་མཐོང་གཟུགས་ནི་ཡིད་དང་ནམ་མཁའ་ལ་ཡང་བལྟ་བར་བྱེད་པ་གང་ཡིན་དེ་ནི་མིག །རིང་ནས་རབ་ཏུ་གསལ་བ་གཞན་དུ་སྒྲ་ནི་ཐོས་པ་འདི་ནི་རྒྱལ་བའི་རྣ་བ་ཆེན་པོའོ། །མཆོག་གི་བདེ་བ་བྱེད་པའི་དྲི་རྣམས་ཐམས་ཅད་འཛིན་པ་དེ་ནི་ཁྱབ་བདག་གི་ནི་སྣ་བཟང་པོ། །རང་གི་ཟླ་བའི་བདུད་རྩི་བདེ་སྟེར་དག་ཀྱང་རྟག་ཏུ་མྱང་བར་བྱེད་པ་གང་ཡང་ཡིན་དེ་ནི་ལྕེ། རྡོ་རྗེའི་རེག་བྱ་ཀུན་ནས་འཕྲོག་པ་གང་ཡིན་དེ་ནི་རྟག་ཏུ་རྡོ་རྗེའི་ལུས་ཀྱི་དབང་པོ་སྟེ། ཐབས་དང་ཤེས་རབ་འདུས་པ་འདི་ཡི་ཆོས་ཏེ་བདེ་ཉམས་ལ་འཇུག་གང་ཡིན་དེ་ནི་ཡིད། དབྱེ་བ་དྲུག་གིས་ཕྱེ་བའི་ཡུལ་དང་ཡུལ་ཅན་འདི་དག་བྱང་ཆུབ་སེམས་དཔའ་བཙུན་མོར་བཅས་པ་རྣམས། སྣ་ཚོགས་གཟུགས་ལ་སུགས་པ་འདི་རྣམས་རྒྱལ་བ་མཆོག་གི་ཡུལ་རྣམས་རྣམ་པ་དྲུག་སྟེ་ཀུན་ནས་ནི། དང་ཞིང་མ་སྐྱེས་མ་འགགས་མཆོག་གི་བདེ་བྱེད་དགོས་པ་མེད་ཅིང་ཡེ་ཤེས་ཀྱིས་ནི་རྟོགས་བྱ་སྟེ། ཞེས་པ་དང་། དེ་བཞིན་དུ་རྒྱུད་བླ་མ་ལས། དེ་བཞིན་གཤེགས་པ་མཁའ་བཞིན་དམ་པ་ཡི། །དབང་པོ་དྲུག་དོན་ཉམས་སུ་མྱོང་བའི་རྒྱུད། །འབྱུང་མེད་གཟུགས་དོན་བལྟ་དང་གཏམ་བཟང་ནི། །གཙང་མ་ཉན་དང་བདེ་གཤེགས་ཚུལ་ཁྲིམས་ཀྱི། །དྲི་གཙང་སྣོཾ་དང་འཕགས་ཆེན་དམ་ཆོས་རོ། །མྱོང་དང་ཏིང་ངེ་འཛིན་རེག་བདེ་ཉམས་མྱོང་དང་། །རང་གི་ངོ་བོ་ཉིད་ཀྱིས་ཟབ་པའི་ཚུལ། །རྟོགས་པའི་རྒྱུར་འགྱུར་ཞིབ་མོར་བསམས་པ་ན། །དོན་དམ་བདེ་མཛད་དེ་བཞིན་གཤེགས་པ་ནི། །ནམ་མཁའ་བཞིན་དུ་རྒྱུ་མཚན་རྣམས་དང་བྲལ། ཞེས་པ་དང་། དེ་བཞིན་དུ། འཕགས་པ་ཀུན་ནས་སྒོའི་མདོ་ལས། འཇམ་དཔལ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ཏིང་ངེ་འཛིན་དུ་རྟོགས་པར་བྱའོ། །སྒྲ་ཏིང་ངེ་འཛིན་དུ་རྟོགས་པར་བྱའོ། །དྲི་ཏིང་ངེ་འཛིན་དུ་རྟོགས་པར་བྱའོ། །རོ་ཏིང་ངེ་འཛིན་དུ་རྟོགས་པར་བྱའོ། །རེག་བྱ་ཏིང་ངེ་འཛིན་དུ་རྟོགས་པར་བྱའོ། །ཆོས་ཀྱི་ཁམས་ཏིང་ངེ་འཛིན་དུ་རྟོགས་པར་བྱའོ། །དེ་བཞིན་དུ་སྦྱར་ཏེ། བུད་མེད་དང་༴ སྐྱེས་པ་དང་༴ ཁྱེའུ་དང་༴ བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ལྷ་དང༴ ཀླུ་དང་༴ གནོད་སྦྱིན་དང་༴ དྲི་ཟ་དང་༴ ལྷ་མ་ཡིན་དང་༴ ནམ་མཁའ་ལྡིང་དང་༴ མིའམ་ཅི་དང་༴ ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །སེམས་ཅན་དམྱལ་བའི་གཟུགས་དང་། དུད་འགྲོའི་སྐྱེ་གནས་ཀྱི་གཟུགས་དང་། གཤིན་རྗེའི་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །ཞེས་པ་དང་། དེ་བཞིན་དུ་བརྟག་གཉིས་ལས། གཟུགས་སྒྲ་དེ་བཞིན་དྲི་དང་ནི། རོ་དང་དེ་བཞིན་རེག་བྱ་ཉིད། ཆོས་ཀྱི་དབྱིངས་ཀྱི་རང་བཞིན་ཡང་། ཤེས་རབ་ཀྱིས་ནི་སྤྱད་པར་བྱ། དེདི་ལྷན་གཅིག་སྐྱེས་པའི་གཟུགས། ཞེས་པ་འདི་ཐམས་ཅད་རྣལ་འབྱོར་པའི་སོ་སོ་རང་རིག་ཡེ་ཤེས་སྤྱོད་ཡུལ་དུ་གྱུར་པ་ཀུན་གཞི་ཡེ་ཤེས་ཤེར་ཕྱིན་ཟབ་མོ་རྫོགས་རིམ་དེ་ཁོ་ན་ཉིད་ཀྱི་ཉམས་མྱོང་དུ་གྱུར་བའི་ཡུལ་དང་། དབང་པོ་འབའ་ཞིག་ཡིན་ནོ། །རྫོགས་རིམ་གྱི་དོན་ནི། ཡན་ལག་དྲུག་གིས་འཁོར་འདས་ཀྱི་རྣམ་པའི་འོད་གསལ་སྣ་ཚང་པ་རྫོགས་པར་མངོན་དུ་གྱུར་བཞིན་པའི་ངང་ནས་ཀུན་གཞི་ཡེ་ཤེས་ཆོས་སྐུའི་ངོ་བོར་གྱུར་པའི་དུ་བ་ལ་སོགས་པའི་མཚན་མ་དང་། རྣམ་པར་མི་རྟོག་པའི་སེམས་དང་། གཟུགས་རིམས་ཀྱིས་རྫོགས་པ་ཡིན་ཏེ། དྲི་མེད་འོད་ལས། འཇིག་རྟེན་ལས་འདས་པའི་བདེན་པ་ནི་དུ་བ་ལ་སོགས་པའི་མཚན་མ་དང་། རྣམ་པར་མི་རྟོག་པའི་སེམས་རྫོགས་པའི་རིམ་པས་ཕྱག་རྒྱ་ཆེན་པོའི་དངོས་གྲུབ་སྒྲུབ་པར་བྱེད་པའོ། །ཞེས་པ་དང་། དུ་བ་ལ་སོགས་པ་གཟུགས་རྫོགས་པ་རྫོགས་པའི་རིམ་པས་སོ། །ཞེས་པའོ། །མཚན་མ་ཡང་ལམ་དང་འབྲས་བུའི་གནས་སྐབས་ཀྱི་ཀུན་གཞི་ཡེ་ཤེས་ཆོས་སྐུའི་ངོ་བོ་ཕྱག་རྒྱ་ཆེན་པོ་ཁོ་ན་ཡིན་ཏེ། དྲི་མེད་འོད་ལས། མཚན་མ་ཡང་རྣམ་པ་གསུམ་ཏེ། དང་པོའི་མཚན་མ་དང་། བར་པའི་མཚན་མ་དང་། ཐ་མའི་མཚན་མའོ། །དང་པོའི་མཚན་མ་ནི་དུ་བ་ལ་སོགས་པའི་ལམ་སྦྱོར་བ་ཡན་ལག་དྲག་གིས་གཟུགས་རྫོགས་ནས་འགྱུར་བ་མེད་པའི་སྐད་ཅིག་ཐོབ་པའོ། །བར་པའི་མཚན་མ་ནི་མཆོག་ཏུ་མི་འགྱུར་བའི་སྐད་ཅིག་བརྒྱ་ཕྲག་བཅོ་བརྒྱད་ཀྱིས་ས་དང་པོ་ཐོབ་པ་དང་། མངོན་པར་ཤེས་པ་ལྔ་དང་མ་མཐོང་པའི་དོན་ཡང་དག་པར་མཐོང་པ་དང་། འཇིག་རྟེན་པའི་དངོས་གྲུབ་ཐོབ་པའོ། །ཐ་མའི་མཚན་མ་ནི། སངས་རྒྱས་ཉིད་དང་རྡོ་རྗེ་འཆང་ཉིད་དེ་མཆོག་ཏུ་མི་འགྱུར་བའི་སྐད་ཅིག་དྲུག་བརྒྱ་ལྷག་པའི་སྟོང་ཕྲག་ཉི་ཤུ་རྩ་གཅིག་གིས་ས་བཅུ་གཉིས་པ་ཐོབ་ནས་ཕྱག་རྒྱ་ཆེན་པོའི་དངོས་གྲུབ་ཐོབ་པར་རོ། །ཞེས་གསུངས་པའི་དོན་ཏོ།། །།
ཡེ་ཤེས་ཀྱི་ཡུལ་དྲུག་སོ་སོར་ངོ་སྤྲད་པ།
ཡེ་ཤེས་ཀྱི་གཟུགས་སྣ་ཚོགས་ངོ་སྤྲད་པ།
གཉིས་པ་ཡེ་ཤེས་ཀྱི་ཡུལ་དྲུག་སོ་སོར་ངོ་སྤྲད་པ་ལ་དྲུག་སྟེ། ཡེ་ཤེས་ཀྱི་གཟུགས་སྣ་ཚོགས་ངོ་སྤྲད་པ་དང་། ཡེ་ཤེས་ཀྱི་སྒྲ་སྣ་ཚོགས་ངོ་སྤྲད་པ་དང་། ཡེ་ཤེས་ཀྱི་དྲི་སྣ་ཚོགས་ངོ་སྤྲད་པ་དང་། ཡེ་ཤེས་ཀྱི་རོ་སྣ་ཚོགས་ངོ་སྤྲད་པ་དང་། ཡེ་ཤེས་ཀྱི་རེག་བྱ་སྣ་ཚོགས་ངོ་སྤྲད་པ་དང་། ཡེ་ཤེས་ཀྱི་ཆོས་སྣ་ཚོགས་ངོ་སྤྲད་པའོ། །
དང་པོ་ཡེ་ཤེས་ཀྱི་གཟུགས་སྣ་ཚོགས་ངོ་སྤྲད་པ་ནི། གཟུགས་ཏིང་ངེ་འཛིན་དུ་རྟོགས་པར་བྱའོ་ཞེས་པ་དང་། གཟུགས་རྣམས་ཐམས་ཅད་སྣང་པའི་དཔལ། །གཟུགས་རྣམས་སྣ་ཚོགས་ཀུན་ཏུ་སྟོན། །གཟུགས་བརྙན་མ་ལུས་འཆང་བ་སོགས། །ཁམས་གསུམ་མ་ལུས་པའི་སངས་རྒྱས་ཀྱི་གཟུགས་ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེས་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིང་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། མཚན་མ་བཅུ་ནས་བཟུང་སྟེ། འཁོར་འདས་ཀྱི་སྣོད་བཅུད་མ་ལུས་པའི་གཟླན་བན་གྱི་མེ་ལོང་ལྟ་བུའི་ཡེ་ཤེས་ཏེ། དེ་དང་པོ་མཚན་མ་བཅུ་རུ་འཆར་བ་དྲི་མེད་འོད་ལས། དེ་ཡང་མཚན་མའི་དབྱེ་བས་རྣམ་པ་བཅུ་རུ་འགྱུར་ཏེ། དུ་བ་དང་། སྨིག་རྒྱུ་དང་། མེ་ཁྱེར་དང་། མར་མེ་དང་། འབར་བ་དང་། ཟླ་བ་དང་། ཉི་མ་དང་། སྒྲ་གཅན་དང་། ཆ་ཤས་དང་། ཐིག་ལེ་མཐོང་པའི་དབྱེ་བས་མ་རྟགས་པ་ཡེ་ཤེས་ཀྱི་ཕུང་པོའོ། །ཞེས་པ་དེ་ལས་མཚན་མོའི་རྣལ་འབྱོར་གྱི་གཞི་དང་། ཉིན་མོའི་རྣལ་འབྱོར་གྱིས་དྲུག་མཐོང་པའོ། །མཚན་མའི་རྟགས་བཅུ་པོ་འདི་ཆོས་ཀྱི་སྐུ་གདོད་ནས་རང་ལ་ཡོད་པར་ཡིད་ཆེས་པའི་རྒྱུ་མཚན་ཡིན་ཏེ། རང་གི་ཆོས་སྐུ་དེ་ཉིད་བཅུ་པོ་འདིའི་ངོ་བོར་མངོན་སུམ་དུ་ཤར་བའི་ཕྱིར་རོ། །བསམ་པ་ཐམས་ཅད་ཡོངས་སྤངས་ནས། སྟོང་པར་རྩེ་གཅིག་ཡིད་བྱས་ཏེ། ཉི་མ་གཅིག་ཏུ་ཡོངས་སུ་བརྟག །གལ་ཏེ་ཡིད་ཆེས་མ་བྱུང་ན། དེ་ཚེ་ངའི་བརྫུན་ཚིག་ཡིན། ཞེས་རྩ་རྒྱུད་ནས་གསུངས་པའི་དོན་ཏོ། །བཅུ་པོ་འདི་ཉིད་རྣལ་འབྱོར་པ་ལ་ཉམས་མྱོང་གི་འོད་གསལ་བཅུ་དང་། བྱང་ཆུབ་སེམས་དཔའི་རྒྱུད་ལ་ཕར་ཕྱིན་བཅུ་དང་། དཀྱིལ་འཁོར་ལ་ལྷ་མོ་བཅུ་དང་། སངས་རྒྱས་ལ་སྟོབས་བཅུ་ཡིན་པའི་ཕྱིར་ཆོས་ཀྱི་སྐུ་ཁོ་ན་ཡིན་ནོ། །དང་པོ་རྣལ་འབྱོར་པས་འོད་གསལ་དེ་ཉིད་བུད་ཤིང་སྐམ་པོ་དང་། རློན་པ་དང་། སྤོས་རིང་གི་དུ་བ་ལ་སོགས་པར་མཐོང་པའོ། །ཡང་འོད་གསལ་དེ་ཉིད་ཁ་དོག་སྣ་ཚོགས་པ་འདར་བ་དང་། འཕྲིག་པ་སྨིག་རྒྱུ་བཞིན་དུ་མཐོང་པའོ། །ཡང་འོད་གསལ་དེ་ཉིད་སྐར་མ་དང་། མེ་སྟག་མང་པོ་འཕྲོ་བའི་རྣམ་པ་སྲིན་བུ་མེ་ཁྱེར་བཞིན་དུ་མཐོང་པའོ། །ཡང་འོད་གསལ་དེ་ཉིད་བློ་སྟོང་དང་དཀྱིལ་སྟོང་གི་མར་མེ་གཅིག་དང་གཉིས་ནས་བརྒྱ་སྟོང་ཚད་མེད་པའི་རྣམ་པར་མཐོང་པ་སྟེ། རྒྱུད་ལས། འགྲོ་བའི་མར་མེ་ཡེ་ཤེས་སྒྲོན། ཞེས་པ་དང་། འབུམ་དང་ཉི་ཁྲི་སོགས་ལས། དྲི་མ་མེད་པའི་སྒྲོན་མ་ཞེས་བྱ་བའི་ཏིང་ངེ་འཛིན་དང་། ཤེས་རབ་སྒྲོན་མ་ཞེས་བྱ་བའི་ཏིང་ངེ་འཛིན་དང་། སྒྲོན་མ་འབར་བ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་རྣམ་པར་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་མྱུར་དུ་མངོར་པར་རྫོགས་པར་འཚང་རྒྱ་བར་འགྱུར་རོ། །ཞེས་གསུངས་སོ། །ཡང་འོད་གསལ་དེ་ཉིད་འབར་བར་མཐོང་པ་ནི། ནཱ་རོ་པཎ་ཆེན་གྱིས། རིན་པོ་ཆེ་འབར་བ་ལྟ་བུར་གསུངས། དྲི་མེད་འོད་ལས། ནག་པོ་འབར་བ་དང་། དམར་པོ་འབར་བ་དང་། དཀར་པོ་འབར་བ་དང་། སེར་པོ་འབར་བ་དང་། ལྗང་ཁུ་འབར་བ་དང་། སྔོན་པོ་འབར་བ་ཞེས་སོགས་དང་། ནག་མོ་འབར་མ་ཞེས་སོགས་དང་། ཡེ་ཤེས་དམར་པོའི་འོད་ཟེར་ཞེས་སོགས་གསུངས་པས། འོད་གསལ་ཁ་དོག་སྣ་ཚོགས་མེ་འབར་བ་ལྟར་མཐོང་བའོ། །ཡང་འོད་གསལ་དེ་ཉིད་ཚེས་གཅིག་ནས་བཅོ་ལྔའི་བར་གྱི་ཟླ་བའི་ཆ་ཆེ་ཆུང་དུ་མ་དང་། ཉ་གང་པ་དང་། ཉིན་མཚན་གྱི་དུས་ཀྱི་ཟླ་བར་མཐོང་པ་དེ། རྒྱུད་ལས། རྡོ་རྗེ་ཟླ་བ་དྲི་མེད་འོད། ཅེས་པ་དང་། མྱང་འདས་ཀྱི་མདོ་ལས། ཟླ་བའི་འོད་ཟེར་གྱི་ཏིང་ངེ་འཛིན་ཐོབ། ཅེས་པ་དང་། འབུམ་དང་ཉི་ཁྲི་སོགས་ལས། ཟླ་བ་བཟང་པོ་ཞེས་བྱ་བའི་ཏིང་ངེ་འཛིན་དང་། ཟླ་བའི་རྒྱལ་མཚན་དཔལ་ཞེས་བྱ་བའི་ཏིང་ངེ་འཛིན་དང་། ཟླ་བ་དྲི་མ་མེད་པ་ཞེས་བྱ་བའི་ཏིང་ངེ་འཛིན་དང་། ཟླ་བ་དྲི་མ་མེད་པར་རྒྱས་པའི་འོད་ཅེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་པ་སྔར་གྱི་དེས་འདྲེའོ། །ཡང་འོད་གསལ་དེ་ཉིད་སྔ་དགོངས་ཉིན་དགུང་སྤྲིན་ཡོད་མེད་ཀྱི་ཉི་མར་མཐོང་པ་སྟེ། རྒྱུད་ལས། རྡོ་རྗེ་ཉི་མ་སྣང་བ་ཆེ། ཞེས་པ་དང་། མྱང་འདས་ཀྱི་མདོ་ལས། ཉི་མའི་འོད་ཟེར་གྱི་ཏིང་ངེ་འཛིན་ཐོབ། ཅེས་པ་དང་། འབུམ་དང་ཉི་ཁྲི་སོགས་ལས། ཉི་མའི་སྒྲོལ་མ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །ཡང་འོད་གསལ་དེ་ཉིད་སྒྲ་གཅན་དུ་མཐོང་པ་ནི། མཐིང་ནག་སྦྲུལ་གྱི་རྣམ་པ་དང་། ཉི་ཟླ་བཟུང་པའི་རྣམ་པ་དང་། ལུས་ཐམས་ཅད་མིག་གིས་གང་པའི་གཟའ་བདུད་དུ་མཐོང་པའོ། །ཡང་འོད་གསལ་དེ་ཉིད་ཆ་ཤས་ཞེས་པ་གློག་སྟེ་གློག་གཅིག་དང་གཉིས་ནས་འཇིག་རྟེན་གྱི་ཁམས་གང་བར་མཐོང་བ་སྟེ། འབུམ་དང་ཉི་ཁྲི་སོགས་ནས། གློག་གི་སྒྲོན་མ་ཞེས་བྱ་བའི་ཏིང་ངེ་འཛིན་དང་། གློག་གི་འོད་ཅེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །ཡང་འོད་གསལ་དེ་ཉིད་ཐིག་ལེ་སྔོན་པོ་ཟླ་བའི་དཀྱིལ་འཁོར་གྱི་རྣམ་པའོ། །ཞེས་སྟོད་འགྲེལ་དང་། ནཱ་རོ་འགྲེལ་པར་གསུངས་སོ། །དེ་ནས་ཐིག་ལེ་དེའི་དབུས་སུ་རེ་ཁ་ནག་པོ་སྐྲའི་ཚད་ཙམ་དྲི་མེད་འོད་ཟེར་འཕྲོ་བའི་ནང་དུ་བརྟན་པ་དང་གཡོ་བ་ཁམས་གསུམ་པ་མ་ལུས་པའི་གཟུགས་ཅན་མཐོང་པ་ནི་འོད་གསལ་སྣ་ཚོགས་པ་མཐོང་པ་ཡིན་ཏེ། དྲི་མེད་འོད་ལས། ཐིག་ལེའི་དབུས་སུ་རེ་ཁ་ནག་པོ་སྐྲའི་ཚད་ཙམ་དྲི་མེད་འོད་ཟེར་འཕྲོ་བ་དུས་ཀྱི་རྩ་ཞེས་པ་ཨ་བ་དྷུ་ཏཱི་ལ་མཐོང་བར་གྱུར་གྱི་བར་དུའོ། །ནང་དུ་འདུས་པ་སྐུན་གཟུགས་ནི་ཁམས་གསུམ་པོ་མ་ལུས་པ་ཆུ་ལ་ཉི་མ་ལྟ་བུ་གོས་པ་མེད་པ་ཁ་དོག་སྣ་ཚོགས་པ་ཞེས་པ་དང་། རྗེ་ཤཱ་ཝ་རིས་པ། རྟགས་བཅུ་རྫོགས་པར་གྱུར་པ་ན། ཐིག་ལེ་ཆེན་པོའི་སྣང་བ་འབྱུང་། །སྣ་ཚོགས་ཐིག་ལེ་ཆེན་པོ་ལ། །རེ་ལ་ནག་པོའི་རི་མོ་འབྱུང་། །དེ་ནང་འགྲོ་དྲུག་ལ་སོགས་དང་། །ཤིན་ཏུ་ཕྲ་བའི་སྤྲུལ་སྐུ་དང་། །ལོངས་སྐུ་དུ་མ་མཐོང་གྱུར་པ། །སྣ་ཚོགས་གཟུགས་ཅན་འོད་གསལ་ཡིན། །ཞེས་པའོ། །སྔར་གྱི་མཚན་མ་བཅུ་འོད་གསལ་དང་བཅས་པ་ཡང་དབང་མདོར་སྟན་དུ། དུ་བ་སྨིག་རྒྱུ་མེ་ཁྱེར་དང་། །མར་མེ་འབར་དང་ཟླ་ཉི་དང་། །མུན་ཅན་ཆ་ཤས་ཐིག་ལེ་ཆེ། །སྣ་ཚོགས་གཟུགས་ཅན་འོད་གསལ་བའོ། །ཞེས་པ་དང་། རྗེ་དུས་ཞབས་པས། དེ་ལྟར་བསྒོམས་པས་ཡུལ་སོགས་འགག །ནང་དུ་ཤའི་མིག་སོགས་ཀྱིས། །སྟོང་ཉིད་གཟུགས་ཏེ་དམིགས་བཅས་མཐོང་། །ཆོས་ལ་ཕར་ཕྱིན་བཅུ་གནས་པ། །ལྷ་ལ་ལྷ་མོ་བཅུར་ཤིས་བྱ། །རྟགས་སུ་ལམ་ལ་བཅུ་མཐོང་འགྱུར། །དུ་བ་སྨིག་རྒྱུ་མཁའ་སྣང་དང་། །མར་མེ་འབྱུང་སྟེ་འབྱུང་རླུང་ཐིམ། །ཐ་མ་སྤྲིན་མེད་ནམ་མཁའ་ནི། །རྟགས་ཅན་ཤེས་རབ་ཕ་རོལ་ཕྱིན། །འབར་བ་ཟླ་ཉི་གློག་སྒྲ་གཅན། །ཐིག་ལེ་དྲུག་སྟེ་ཐ་མ་ནི། །ཐམས་ཅད་རྡུར་མཐོང་རྟགས་ཅན་ཏེ། །འབྱུང་ལྔ་ཡེ་ཤེས་ཕུང་པོ་དྲུག །གསང་འདུས་མཚན་བརྗོད་ནས་ཕྱེད་ཕྱེད། ཅེས་པ་དང་། དུས་འཁོར་ལྟ་བུ་མ་སྦས་པའི་རྒྱུད་དང་། །སེམས་འགྲེལ་ཁྱད་འཕགས་ལས། །མཚན་མ་བཅུ་འོད་གསལ་དང་བཅས་པ་རྫོགས་པར་གསུངས་ཤིང་། སྦས་པའི་རྒྱུད་ལས་མཚན་རྟགས་བཞི་ཙམ་དང་། ཉིན་རྟགས་དྲུག་ཙམ་ལས་མ་གསུངས་སོ། །ཉིན་མཚན་གྱི་རྟགས་དྲུག་དང་བཞི་ཡང་དྲི་མེད་འོད་ལས། མཚན་མོའི་རྣལ་འབྱོར་གྱིས་རྣམ་པ་བཞི་དང་། ཉིན་མོའི་རྣལ་འབྱོར་གྱི་རྣམ་པ་དྲུག་སྟེ། དེ་ནས་གཟུགས་སོ། །ཞེས་པ་དང་། མཚན་མོའི་རྟགས་ལས་འདུས་ཀྱི་རྒྱུད་ཕྱི་མ་ལས། གསུམ་པ་མཁའ་སྣང་མེ་ཁྱེར་བཞིན། བཞི་པ་མར་མེ་ལྟ་བུ་ཉིད། ལྔ་པ་རྟག་ཏུ་སྣང་བ་ནི། སྤྲིན་མེད་ནམ་མཁའ་ལྟ་བུ་ཉིད། ཞེས་པ་དང་། རྡོ་རྗེ་གུར་ལས་ཀྱང་། དང་པོ་སྤྲིན་གྱི་རྣམ་པ་སྟེ། གཉིས་པ་དུ་བ་ལྟ་བུ་དང་། གསུམ་པ་མེ་ཁྱེར་རྣམ་པ་འདྲ། སྤྲིན་མེད་ནམ་མཁའ་འདྲ་བ་ཉིད། ཞེས་པ་དང་། ཉིན་མོའི་རྟགས་། མཚན་བརྗོད་ཀྱི་ལུང་དྲངས་ནས་བཤད་པ་བྱས་པ་ནི། སྟོད་འགྲེལ་ལས། བཅོམ་ལྡན་འདས་ཀྱི་སྒྱུ་འཕྲུལ་དྲ་བའི་ཏིང་ངེ་འཛིན་དྲ་བའི་ལེའུར་གསུངས་པ་འདི་ལྟ་སྟེ། ནམ་མཁའ་ལས་བྱུང་རང་བྱུང་པ། །ཤེས་རབ་ཡེ་ཤེས་མེའོ་ཆེ། །འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཆེན་པོ་འོད་གསལ་བ། །རིག་པའི་རྒྱལ་མཆོག་སྔགས་དབང་པོ། །གསང་སྔགས་རྒྱལ་པོ་དོན་ཆེན་བྱེད། ཅེས་ཚིགས་སུ་བཅད་པ་གཉིས་ཀྱིས་སྒྱུ་འཕྲུལ་དྲ་བར་མཚན་མ་གཞན། བཅོམ་ལྡན་འདས་ཀྱི་དགོངས་པའི་སྐད་གཞན་གྱིས་གསུངས་སོ། །སྔར་བརྗོད་པའི་སྤྲིན་མེད་པའི་ནམ་མཁའ་ལས་བྱུང་པའི་སྣང་བ་གང་ཡིན་པ་དེ་ནི་རྣམ་པར་རྟོག་པ་ཐམས་ཅད་དང་བྲལ་བའི་སེམས་ཏེ། ནམ་མཁའ་ལས་བྱུང་རང་བྱུང་བའོ། །འདིར་ཤེས་རབ་ཡེ་ཤེས་མེའོ་ཆེ་ཞེས་པ་འབར་བ་ལྟར་སྣང་པའོ། །འོད་ཆེན་རྣམ་པར་སྣང་བར་བྱེད། ཅེས་པ་ཟླ་བ་ལྟར་སྣང་པའོ། །དེ་ཉིད་ཡེ་ཤེས་སྣང་བ་ལམ་མེ་བ། ཞེས་པའོ། །འགྲོ་བའི་མར་མེ་ཞེས་པ་ཉི་མ་ལྟར་སྣང་པའོ། །ཡེ་ཤེས་སྒྲོན་ཞེས་པ་སྒྲ་གཅན་ལྟར་སྣང་པའོ། །གཟི་བརྗིད་ཆེན་པོ་འོད་གསལ་བ། ཞེས་པ་གློག་ལྟར་སྣང་པའོ། །རིག་པའི་རྒྱལ་མཆོག་སྔགས་དབང་པོ། ཞེས་པ། ཐིག་ལེ་ལྟར་སྣང་པ་སྟེ་ཁ་དོག་སྔོན་པོ་ཟླ་བའི་དཀྱིལ་འཁོར་གྱི་རྣམ་པའོ། །གསང་སྔགས་རྒྱལ་པོ་དོན་ཆེན་བྱེད། ཅེས་པ་ཁམས་གསུམ་པོའི་སྣང་བ་རྣམ་པ་ཐམས་ཅད་པ་སྒྱུ་མ་དང་། རྨི་ལམ་གྱི་སྣང་པ་ལྟ་བུར་སོ་སོར་སྡུད་པའི་རྣལ་འབྱོར་པ་རྣམས་ཀྱི་མིག་གི་དབང་པོའི་བྱེད་པས་མཐོང་པར་འགྱུར་རོ། །ཞེས་གསུངས་པ་དེ་ལྟར་མཚན་མ་བཅུ་དང་། དེ་ནས་ཁམས་གསུམ་པ་མ་ལུས་པའི་ཡེ་ཤེས་ཀྱི་གཟུགས་ཏེ། གུར་ལས། འཇིག་རྟེན་ཁམས་ནི་ཐམས་ཅད་དུ། །ཇི་སྲིད་རྡོ་རྗེའི་ལུས་ལྡན་པར། །ཁམས་གསུམ་རྒྱུ་བཅས་མི་རྒྱུ་བ། །མ་ལུས་ལུས་པ་མེད་པར་འགྲུབ། ཞེས་པ་དང་། བརྟག་གཉིས་ལས། ང་ལས་འགྲོ་བ་ཐམས་ཅད་བྱུང་། ང་ལས་གནས་གསུམ་པོ་ཡང་བྱུང་། །ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། ཞེས་པ་དང་། བརྟན་དང་གཡོ་བའི་དངོས་པོ་གང་། །ཙ་ལྕུག་འཁྲིལ་ཤིང་ལ་སོགས་པ། །བདག་གི་དངོས་པོའི་རང་བཞིན་ལས། །དམ་པའི་དེ་ཉིད་ངེས་བསྒོམ་བྱ། ཞེས་པ་དང་། འཕགས་པ་ཀུན་ནས་སྒོའི་མདོ་ལས། །བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ཁྱེའུ་གཟུགས། བུ་མོའི་གཟུགས། ལྷའི་གཟུགས། ཀླུའི་གཟུགས། གནོད་སྦྱིན་གྱི་གཟུགས། དྲི་ཟའི་གཟུགས། ལྷ་མ་ཡིན་གྱི་གཟུགས། མིའམ་ཅིའི་གཟུགས། ལྟོ་འཕྱེ་ཆེན་པོའི་གཟུགས། སེམས་ཅན་དམྱལ་བའི་གཟུགས། དུད་འགྲོ་མངལ་སྐྱེས་ཀྱི་གཟུགས། དུད་འགྲོ་སྒོང་སྐྱེས་ཀྱི། དུད་འགྲོ་རྫུས་སྐྱེས་ཀྱི་གཟུགས། དུད་འགྲོ་དྲོད་གཤེར་སྐྱེས་ཀྱི་གཟུགས། གཤིན་རྗེའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ཞེས་པ་དང་། དེ་བཞིན་དུ་མཁའ་འགྲོ་རྒྱ་མཚོའི་རྒྱུད་ལས། ཀུན་གཞི་ཡེ་ཤེས་ལྔའི་ངོ་བོ་དོན་དམ་གྱི་ཆོས་ཉིད་ཀྱི་ཁམས་གསུམ་པོ་ཐམས་ཅད་འོད་གསལ་གྱི་སྣང་པ་དང་། ཡེ་ཤེས་ཀྱི་ལྷར་གསུངས་པ་འདི་ལྟ་སྟེ། ཡང་སོས་མ་དང་། ཐིག་ནག་མ་དང་། སྡུལ་འཇོམས་མ་དང་། ངུ་འབོད་མ་དང་། ངུ་འབོད་ཆེན་པོ་མ་དང་། ཚ་བ་མ་དང་། རབ་ཏུ་ཚ་བ་མ་དང་། བཏུང་པ་མོ་དང་། བར་མེ་མ་དང་། བུམ་མོ་དང་། གཤིན་རྗེ་མོ་དང་། མེ་འདག་མོ་དང་། མར་ནག་ཏུ་འཚོད་མ་དང་། རི་གཉིས་ཀྱི་བར་དུ་འཚིར་མ་དང་། སྡང་མ་དང་། རྨོངས་མ་དང་། ཕྲག་དོག་མ་དང་། ཆགས་མྱོས་མ་དང་། སེར་སྣ་མ་དང་། རྐུད་བ་མ་དང་། གྲང་བ་མ་དང་། རལ་གྲིའི་ནགས་མ་དང་། དུ་བ་མ་དང་། མུ་གེ་མ་དང་། ནད་དགོན་མ་དང་། མཚོན་དགོན་མ་དང་། ཆུའི་དགོན་མ་དང་། སེམས་ཅན་མོམ་དང་། རབ་མེད་མ་དང་། སྤུ་གྲིའི་སོ་མ་དང་། འཁོར་ལོ་མ་དང་། གྲུལ་བུམ་མ་དང་། ལྷ་མོ་ཆེ་དང་། མཆོད་མ་དང་། ཟ་མ་དང་། གཉིད་མ་དང་། ལེ་ལོ་མ་དང་། ཆོས་སེམས་མ་དང་། སྒོམ་པ་མོ་དང་། ཁྱིམ་སེམས་མ་དང་། བུད་མེད་སེམས་མ་དང་། དོན་སེམས་མ་དང་། སྦྱོར་བྲལ་མ་དང་། བུ་སེམས་མ་དང་། མྱ་ངན་མ་དང་། བསམ་གཏན་མ་དང་། སྔགས་ཟློས་མ་དང་། ངོ་ཚ་མ་དང་། ང་རྒྱལ་མ་དང་། གདུང་པ་མོ་དང་། སེམས་ཅན་དོན་བྱེད་མ་དང་། བརྩོན་པ་མོ་དང་། རྒྱལ་པོ་སེམས་མ་དང་། གཞན་གནོད་མ་དང་། ཡེ་ཤེས་ཐོབ་མ་དང་། དཀའ་ཐུབ་མ་དང་། རྒས་མ་དང་། འཆི་བའི་བསམ་ཅན་མ་དང་། བདེ་མ་དང་། སྡུག་མ་དང་། མི་དགེ་མ་དང་། ཡོད་པ་མ་དང་། མེད་པ་མ་དང་། བླ་མ་སེམས་མ་དང་། འགྲོ་བ་མོ་དང་། བཟོད་མ་དང་། མི་བཟོད་མ་དང་། ངལ་མ་དང་། ངལ་སོས་མ་དང་། བཀྲེས་མ་དང་། མཆོག་མ་དང་། ལས་ཐམས་ཅད་བྱེད་པ་མ་དང་། རྒྱལ་ཆེན་བཞིའི་རིས་མ་དང་། སུམ་བཅུ་རྩ་གསུམ་མ་དང་། འཐབ་བྲལ་མ་དང་། དགའ་ལྡན་མ་དང་། འཕྲུལ་དགའ་མ་དང་། གཞན་འཕྲུལ་དབང་བྱེད་མ་དང་། ཚངས་རིས་མ་དང་། ཚངས་པ་འདུན་ན་འདོན་མ་དང་། ཚངས་ཆེན་མ་དང་། འོད་ཆུང་མ་དང་། ཚད་མེད་འོད་མ་དང་། འོད་གསལ་མ་དང་། དགེ་ཆུང་མ་དང་། ཚད་མེད་དགེ་མ་དང་། དགེ་རྒྱས་མ་དང་། སྤྲིན་མེད་མ་དང་། བསོད་ནམས་སྐྱེས་མ་དང་། འབྲས་བུ་ཆེ་མ་དང་། མི་ཆེ་མ་དང་། མི་གདུང་མ་དང་། ཤིན་ཏུ་མཐོང་མ་དང་། བཟང་སྣང་མ་དང་། འོག་མིན་མ་དང་། ནམ་མཁའ་མཐའ་ཡས་སྐྱེད་མཆེད་མ་དང་། རྣམ་ཤེས་མཐའ་ཡས་སྐྱེད་མཆེད་མ་དང་། ཅི་ཡང་མེད་པའི་སྐྱེད་མཆེད་མ་དང་། འདུ་ཤེས་མེད་འདུ་ཤེས་མེད་མིན་མ་དང་། དམྱལ་མོ་དང་། ཡི་དྭགས་མོ་དང་། དུད་འགྲོ་མ་དང་། མི་མོ་དང་། ལྷ་མོ་དང་། གཞལ་མེད་ཁང་སྤྱོད་མ་དང་། ཟླ་བ་མ་དང་། ཉི་མ་མ་དང་། གཤིན་རྗེ་མོ་དང་། དབང་མོ་དང་། འཁོར་ལོས་སྒྱུར་མ་དང་། ངང་མོ་དང་། བྱ་དཀར་མོ་དང་། སྲེག་མོ་དང་། རྨ་བྱ་མོ་དང་། ཕུ་རོན་མོ་དང་། བྱ་རོག་མོ་ཆེན་མོ་དང་། ཁྲ་མོ་དང་། ཧོར་པ་མོ་དང་། བྱི་ལ་མོ་དང་། སེངྒེ་མོ་དང་། སྟག་མོ་དང་། དོམ་མོ་དང་། རི་བོང་མ་དང་། གླང་ཆེན་མོ་དང་། རི་དྭགས་མོ་དང་། ལྕེ་སྤྱང་མོ་དང་། བསེ་མོ་དང་། འབྲི་མོ་དང་། རྔ་མོ་དང་། སྲེ་མོ་དང་། རྩངས་པ་མོ་དང་། བྱི་བ་མོ་དང་། བོང་མོ་དང་། རུ་སྦལ་མོ་དང་། ཆུ་སྲམ་མོ་དང་། སྡིག་ནག་མོ་དང་། སྲིན་པོའི་གདོང་མ་དང་། ཆ་ག་མོ་དང་། ཆུ་བྱི་མོ་དང་། གྲོག་མོའི་གདོང་མ་དང་། ཆུ་སྦྲུལ་མ་དང་། དུང་མོ་དང་། མགྲོན་བུ་མོ་དང་། ཉ་ཕྱིས་མོ་དང་། ཤ་སྦྲང་མོ་དང་། ཉ་བ་མོ་དང་། སྡིག་དཀར་མོ་དང་། དུང་མཁན་མོ་དང་། ཐགས་མཁན་མོ་དང་། ཁུར་མཁན་མོ་དང་། ཤིང་གཟོ་མ་དང་། ཕྲེང་བ་མཁན་མོ་དང་། ཚོས་མཁན་མོ་དང་། སྲིན་བལ་བྱེད་མ་དང་། ཕོ་ཉ་མོ་དང་། གཤང་བ་འཕྱག་མ་དང་། རྩིས་མཁན་མ་དང་། ལྡུམ་རའི་གཉེར་པ་མོ་དང་། རྒྱལ་པོས་བཀྲབས་མ་དང་། ཤན་པ་མོ་དང་། སོ་རྩི་འཚོང་བར་བྱེད་མ་དང་། གསེར་མགར་མ་དང་། ནོར་བུ་རྒྱུད་མ་དང་། ནགས་པ་མོ་དང་། ཀླ་ཀློ་མ་དང་། ཚོང་པ་མོ་དང་། རྡོ་བཟོ་མ་དང་། ཞིང་ལས་མ་དང་། ཀོ་ལྤགས་མཁན་མ་དང་ཞེས་པ་ལ་སོགས་པ་མཁའ་འགྲོ་རྒྱ་མཚོའི་རྒྱུད་དུ་ ཀུན་གཞི་ཡེ་ཤེས་འོད་གསལ་གྱི་སྣང་པ་ཁམས་གསུམ་པོའི་རྣམ་པ་ཐམས་ཅད་ཡེ་ཤེས ་ཀྱི་ལྷར་གསུངས་ཤིང་། དེ་ཡང་རང་འདྲའི་ཐབས་དང་བཅས་པར་གསུངས་པ་ནི་རྣལ་འབྱོར་ཡན་ལག་དྲུག་བསྒོམས་པའི་ཉམས་མྱོང་། ཁམས་གསུམ་པོ་ནི་མ་ལུས་པའི། སངས་རྒྱས་གཟུགས་ནི་བསྒོམས་པར་བྱ། ཞེས་ཡང་དང་ཡང་དུ་གསུངས་པ་དེ་ཉིད་ཡིན་ནོ། །རྗེ་མི་ལ་རས་པའི་གསུང་ནས། དབྱར་ཁའི་ས་ལ་ཅི་ཡང་སྐྱེ། །སྟོན་པའི་ཁ་ནས་ཅི་ཡང་འབྱུང་། །རྣལ་འབྱོར་ཉམས་ལ་ཅི་ཡང་འཆར། ཞེས་གསུངས་པའི་དོན་ཏོ། །གཞན་ཡང་དེ་ཉིད་རོ་རྣམ་པར་བམ་པ་དང་། རྣམ་པར་རྔོས་པ་དང་། རུལ་པ་དང་། འབུས་བཞིགས་པ་དང་། དམར་བ་དང་། ཟོས་པ་དང་། ནང་གྲོལ་དང་། ཡན་ལག་དང་། ཉིང་ལག་དང་། རུས་པ་རྣམས་ཕྱོགས་ཕྱོགས་སུ་འཐོར་བ་དང་། ཚིགས་པ་དང་། ཡན་ལག་གི་རུས་པ་རྒྱུ་པས་བྲང་བྲེང་དུ་འབྲེལ་བ་དང་། ཤ་ར་རི་དང་། ཁྲག་ར་རི་ཆགས་པ་དང་། མགོ་བམ་རིལ་དང་། ཡ་ཐོད་མ་ཐོད་བྲལ་ཞིང་འཐོར་བ་དང་། ཞག་དང་ཟླ་བ་དང་། ལོ་དུ་མ་སོང་པའི་ཤ་ཁྲག་དང་རྒྱུས་པ་དང་། རུས་པ་མང་པོས་སྙོགས་པ་དང་། ཁ་ནས་མེ་འབར་བ་ལ་སོགས་པའི་གདོན་དང་རོ་ལངས་གནོད་སྦྱིན་མང་པོ་དང་། ལྕེ་སྤྱང་དང་། བྱ་རྒོད་ལ་སོགས་པ་ཤ་ཟ་མང་པོས་གཟིངས་ཤིང་གང་བ་དང་། རོ་རིལ་པོ་དང་། ཕྱེད་མ་དང་། དུམ་བུ་དང་། ནང་གྲོལ་དང་། ཡན་ལག་དང་རུས་པ་འཐོར་བ་དང་། རོ་བམ་རུལ་དང་། ཡ་ཐོད་མ་ཐོད་བྱེ་བ་ལ་སོགས་པ་ཐམས་ཅད་རྒྱུག་པ་དང་། འཆོང་པ་དང་། གར་བྱེད་པ་དང་། བྲོ་བརྡུང་བ་དང་། རྒོད་པ་དང་། ངུ་བ་དང་། གླུ་ལེན་པ་ལ་སོགས་པ་འཇིགས་ཤིང་བག་ཚ་བ་བཟོད་པར་དཀའ་བའི་དུར་ཁྲོད་ཀྱི་རྣམ་པ་ཚད་མེད་པའི་འོད་གསལ་མཐའ་ཡས་པ་སྟེ། མཁའ་འགྲོ་རྒྱ་མཚོའི་རྒྱུད་ལས། མགོ་མེད་རྒྱུག་དང་གཞན་ཡང་ནི། མགོ་བོ་མེད་པ་གར་བྱེད་པ། ཉལ་བ་དང་ནི་རྐང་མེད་དང་། མགོ་དང་ལག་སོགས་སྟུབས་པ་སྟེ། ཏིང་འཛིན་ཆེན་པོའི་རྒྱུ་ཡིས་ནི། དེ་རྣམས་དགའ་བཅས་གར་བྱེད་དོ། །ཞེས་གསུངས་པའི་དོན་ཏོ། །ཏིང་ངེ་འཛིན་ཆེན་པོ་ནི་སྤྲོས་པ་དང་བྲལ་བའི་ཡན་ལག་དྲུག་གི་རྫོགས་རིམ་བསྒོམས་པའི་ཏིང་ངེ་འཛིན་མངོན་དུ་གྱུར་པའི་རྒྱུ་མཚན་གྱིས་དེ་ལྟར་སྣང་ཞེས་པའོ། །བརྟག་གཉིས་ལས་ཀྱང་། དང་པོར་རོ་ནི་རྣམ་བསྒོམས་པ། ཆོས་ཀྱི་དབྱིངས་ཀྱི་བདགིད་བརྗོད། ཞེས་པ་དང་། རྣལ་འབྱོར་མ་བརྒྱད་ཡོངས་སྐོར་ནས། །དུར་ཁྲོད་དུ་ནི་མགོན་པོ་རོལ། །དབུགས་སོང་ཞེས་བྱའི་རིག་པ་འདིས། །དུར་ཁྲོད་ཞེས་ནི་མངོན་པར་བརྗོད། ཞེས་པ་འོད་གསལ་གྱི་རོ་དང་དུར་ཁྲོད་ཀྱི་ རྣམ་འགྱུར་ཐམས་ཅད་ཆོས་དབྱིངས་ཡེ་ཤེས་ཡིན་ནོ། །དེ་བཞིན་དུ་ཀུན་གཞི ་ཡེ་ཤེས་ཀྱི་སྣང་པ་ལྷ་དང་ལྷ་མིན་མི་ལ་སོགས་པའི་དམག་དཔུང་གི་རྣམ་འགྱུར་འཇིགས་སུ་རུང་པ་དུ་མ་བཤས་པ་དང་། གཡུལ་འགྱེད་པ་དང་། འཁྲུགས་ཅིང་ཤི་གསད་ཀྱི་རྣམ་པ་ལྟ་བུར་མི་བཟོད་ཅིང་ཀྱི་ཡ་ང་བ་དུ་མ་དང་། ཁྲིམས་ར་ཆེན་པོ་བཙོན་དང་ཁྲིམས་གཅོད་པ་དུ་མས་གང་པ་ཆད་པ་གཅོད་ལུགས་སྣ་ཚོགས་པ་བཅིངས་པ་ལྔས་བཅིངས། མགོ་གཅོད་པ་སྣ་གཅོད་པ་རྣ་བ་གཅོད་པ་ལག་པ་གཅོད་པ་རྐང་པ་གཅོད་པ། མིག་འབྲུ་བ་སྙིང་འབྱིན་པ་ནང་གྲོལ་འདོན་པ་པགས་པ་བཤུ་བ་སོག་ལེས་འདྲ་བ་ལྕགས་སྲེག་གིས་བརྡར་བ། ཟངས་ཞུན་ལུས་ལ་སྟུགས་པ། ཆུ་ཚན་དང་མེ་ཚན་དུ་སྐྱུར་བ་དོང་དུ་འཇུག་པ་ཁྲིམས་ཤིང་ལ་བཏགས་པ། གསལ་ཤིང་ལ་བཙུགས་པ་ལ་སོགས་པ་ཉམ་ང་ཞིང་ཡིད་འབྱུང་བ། བགྱིད་ལུག་ཅིང་སེམས་སྐྱོ་བ་སྙིང་ཀློང་ཀློང་བོར་བྱེད་ཅིང་། མིག་བསྒྱུར་བའི་རྣམ་འགྱུར་སྣ་ཚོགས་ཚད་མེད་པ་མགོའི་ཕུང་པོ་མིག་གི་ཕུང་པོ་རྣ་བ་དང་སྣ་དང་རྐང་ལག་དང་སྙིང་གི་ཕུང་པོ་སྟེ་ཡན་ལག་གི་ཕུང་པོ་དུ་མ་དང་། ཁྲག་གི་མཚོ་ལ་སོགས་པ་དཔའ་གོང་ཞིང་བག་འཁུམས་པར་བྱེད་པའི་རྣམ་པ་སྟེ། བསྡུད་པ་ལས། དཔེར་ན་སྒྱུ་མ་མཁན་གྱིས་གཞི་མདོར་སྤྲུལ་བྱས་ཏེ། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་པའི། བསད་བྱ་དེ་དག་ཅི་འདྲར་དེ་འདྲར་བྱང་ཆུབ་སེམས། འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། ཞེས་གསུངས་པའི་དོན་ཏོ། །མདོར་ན་ཡེ་ཤེས་ཀྱི་སྣང་པ་འཁོར་བ་དང་མྱང་འདས་ཀྱི་གཟུགས་སྣ་ཚོགས་པ་ལས་འཁོར་བའི་སྣོད་བཅུད་དུ་མ་ནི་དམྱལ་བའི་སྣོད་ཀྱི་རྣམ་འགྱུར་དུ་མ་དང་། དེའི་བཅུད་ཀྱི་རྣམ་འགྱུར་དུ་མ་དང་། ཡི་དྭགས་སྣོད་ཀྱི་རྣམ་འགྱུར་དུ་མ་དང་། དེའི་བཅུད་ཀྱི་རྣམ་འགྱུར་དུ་མ་དང་། དུད་འགྲོའི་སྣོད་ཀྱི་རྣམ་འགྱུར་དུ་མ་དང་། དེའི་བཅུད་ཀྱི་རྣམ་འགྱུར་དུ་མ་དང་། ལྷ་དང་ལྷ་མིན་གྱི་སྣོད་ཀྱི་རྣམ་འགྱུར་དུ་མ་དང་། དེའི་བཅུད་ཀྱི་རྣམ་འགྱུར་དུ་མ་དང་། མིའི་སྣོད་ཀྱི་རྣམ་འགྱུར་དུ་མ་དང་། ས་དང་ཆུ་དང་མེ་དང་རླུང་དང་ནམ་མཁའ་དང་སྤྲིན་དང་ཉི་ཟླ་གཟའ་སྐར་དང་། ཉིན་མཚན་དང་། ནམ་ཟླ་དུས་བཞི་དང་། ས་རྡོ་རི་བྲག་རྩི་ཤིང་ནགས་ཚལ་མེ་ཏོག་ཡུལ་ཁམས་གྲོང་ཁྱེར་ཁང་པ་སྦྲ་ཁྱིམ་ལ་སོགས་པ་དང་། དེའི་བཅུད་ཀྱི་རྣམ་པ་དུ་མ་ནི། རྒྱལ་པོ་བཙུན་མོ་བློན་པོ་རྒྱལ་ཕྲན་སྐྱེས་པ་བུད་མེད་ཁྱེའུ་བུ་མོ་མ་ནིང་། བྲམ་ཟེ་རྒྱལ་རིགས་རྗེ་རིགས་དམང་རིགས་གདོལ་པའི་རིགས་ལ་སོགས་པ་དང་། མིས་བདག་ཏུ་བཟུང་པའི་རྟ་ནོར་ར་ལུག་བོང་བུ་དྲེའུ་མ་ཧེ་ལ་སོགས་པའོ། །མྱང་འདས་ཀྱི་སྣོད་བཅུད་ཀྱི་དུ་མ་ནི། ཆོས་སྐུའི་སྲིད་གསུམ་ཀུན་ནས་དང་བ་འོག་མིན་གྱི་གནས་ཉམས་དགའ་བ་དེར་འོག་མིན་ཆོས་ཀྱི་དབྱིངས་ཀྱི་ཕོ་བྲང་ཚེ་དང་སེམས་དང་ཡོ་བྱད་ལ་དབང་བ་ལ་སོགས་པ་རྒྱལ་བའི་ཤིན་ཏུ་ལོངས་སྤྱོད་རྫོགས་པའི་འཁོར་ལོ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ། །བཀྲ་ཤིས་ཀུན་གྱི་བཀྲ་ཤིས་པ། དར་བ་ཆེན་པོ་ཆོས་ཀྱི་ཏོག །དཔལ་ལྡན་འབྱོར་པ་ཀུན་བྱེད་པ། །སྐུར་སྟི་རིམ་གྲོ་ཕུན་སུམ་ཚོགས་པ། །དགའ་ཆེན་རོལ་མོ་ཆེན་པོ་འཆང་བ་བརྒྱན། །སྟུག་པོ་བཀོད་པའི་ཞིང་ཁམས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གནས་ནམ་མཁའ་གང་བ་དང་། ཆོས་སྐུའི་བཅུད་ཀྱི་རྣམ་འགྱུར་དོན་དམ་གྱི་རྡུལ་གཅིག་གི་སྟེང་ན་རྡུལ་སྙེད་སངས་རྒྱས་རྣམས། སངས་རྒྱས་སྲས་ཀྱི་དབུས་ན་བཞུགས་པ་དག །རྡུལ་གཅིག་གི་སྟེང་ན་རྒྱལ་བ་སྲས་བཅས་ཐམས་ཅད་བཞུགས་པ་དེ་ལྟར་རྡུལ་ཐམས་ཅད་ཀྱི་སྟེང་ན་ཆོས་ཀྱི་དབྱིངས་རྣམས་མ་ལུས་པར་རྒྱལ་བ་སྲས་བཅས་ཀྱིས་བཀང་བའོ། །དྲི་མེད་འོད་ལས། སྟོབས་བཅུ་དང་ནི་མི་འཇིགས་པ་ལ་སོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རྣམས་སོ། །དེ་རྣམས་འབྱུང་པར་གྱུར་པ་ནི་ཆོས་འབྱུང་སྟེ་སངས་རྒྱས་ཀྱི་ཞིང་ངོ་། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་གནས་ཏེ་བདེ་བའི་གནས་དང་སྐྱེ་བའི་གནས་སོ། །ཞེས་པ་དང་། བརྟག་གཉིས་ལས་ཀྱང་། ཨེ་ཝཾ་རྣམ་པའི་རང་བཞིན་དུ། བདེ་བ་བསྲུང་པ་ཉིད་ཀྱི་ཕྱིར། །བདེ་བ་ཅན་ཞེས་རབ་ཏུ་སྒྲགས། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་འཛིན་པ་རྣམས་ཀྱི་གནས། ཞེས་པའོ། །དེ་འདྲའི་གནས་དེར་སྣོད་བཅུད་ཐམས་ཅད་ཆོས་སྐུའི་རོལ་པ་མིན་པ་མཻད་༼དབྱེར་མེད༽། བརྟག་གཉིས་ལས། སྟོན་པ་པོ་ང་ཆོས་ཀྱང་ང་། རང་གི་ཚོགས་ལྡན་ཉན་པ་ང་། །འཇིག་རྟེན་འཇིག་རྟེན་འདས་པ་ང་། །འཇིག་རྟེན་སྟོན་པ་བསྒྲུབ་བྱ་ང་། །ལྷན་ཅིག་སྐྱེས་དགའི་རང་བཞིན་ང་། །ཞེས་གསུངས་པའི་དོན་ནོ། །གཟུགས་སྐུའི་སྣོད་ཀྱི་སྣང་བ་བདེ་བ་ཅན་དང་མངོན་དགའ་ལྟ་བུ་དག་པའི་ཞིང་ཁམས་རིན་པོ་ཆེ་ལས་གྲུབ་པ་དང་། གཞལ་ཡས་ཁང་དང་། འབྱོར་པ་ཕུན་སུམ་ཚོགས་པ་དང་། གཟུགས་སྐུའི་བཅུད་ཀྱི་རྣམ་པ་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་སློབ་པ་དང་མི་སློབ་པ་དང་། གྲུབ་ཐོབ་དང་། དཔའ་བོ་དང་། རྣལ་འབྱོར་མ་དང་། མཁའ་འགྲོ་དང་ཆོས་སྐྱོང་ལ་སོགས་པའོ། །དེ་ལྟར་ཀུན་གཞི་ཡེ་ཤེས་ཆོས་ཀྱི་སྐུ་འཁོར་འདས་གཉིས་ཀའི་སྣོད་བཅུད་ཀྱི་གཟུགས་ཅན། མུ་སྟེགས་པ་ཐམས་ཅད་དང་། དེའི་གྲུབ་མཐའ་ཐམས་ཅད་ཀྱི་རྣམ་པར་སྒྱུ་མ་མཁན་དུ་སྣང་བ་ནི། བརྟག་གཉིས་ལས། སྐྱེས་བུ་མངོན་རབས་དབང་ཕྱུག་དང་། བདག་དང་གསོ་བ་སེམས་ཅན་དང་། དུས་དང་གང་ཟག་ཉིད་ནི། དངོས་པོ་ཀུན་གྱི་རང་བཞིན་འདི། སྒྱུ་མའི་གཟུགས་ཀྱི་རྣམ་པར་གནས། ཞེས་གསུངས་པའི་དོན་ཏོ། །འདི་དག་ཐམས་ཅད་ལ་སྡོས་བཅས་ཀྱི་དངོས་པོར་ཞེན་དུ་མི་རུང་སྟེ། །བརྒྱན་སྟུག་པོར། ཉི་མ་དང་ནི་ཟླ་བའི་དབྱིབས། པད་མོ་དང་ནི་འོད་འདྲ་ཞིང་། ནམ་མཁའ་རི་མོ་མེ་འདྲ་བ། །རྣལ་འབྱོར་ཞུགས་པས་རབ་ཏུ་མཐོང་། །འདི་དག་ཐམས་ཅད་སྤངས་ནས་སུ། །སྣང་པ་མེད་པར་རབ་ཏུ་གནས། །གང་ཚེ་མཚན་མེད་རྣལ་འབྱོར་ཅན། །རྣམ་པར་མི་རྟོག་ཆགས་མེད་ན། །སངས་རྒྱས་བྱེ་བ་རྣམས་ཀྱང་མཐོང་། །ཞིང་དང་ཞིང་གཞན་མཉམ་བཞག་པ། །དེ་དག་ཕྱག་གིས་དབང་བསྐུར་པ། །དེའི་སྤྱི་བོར་དབང་བསྐུར་ཏེ། །སངས་རྒྱས་ས་ལ་བཞུགས་པ་དང་། །སྣ་ཚོགས་གཟུགས་ནི་རབ་ཏུ་འབྱུང་། །སྣ་ཚོགས་ཚུལ་གྱི་དངོས་ཐོབ་ནས། །ཀུན་མཁྱེན་ཐམས་ཅད་རིག་པར་འགྱུར། ཞེས་གསུངས་པའི་དོན་ནོ། །ལང་ཀར་གཤེགས་པའི་མདོར་ཡང་འདི་བཞིན་གསུངས་པ་འདི་དང་དོན་ཅིག་གོ །འཕགས་པ་མ་ཐོབ་ཀྱི་གོང་དུ་ཡན་ལག་བསྒོམས་པས་མངོན་དུ་གྱུར་པའི་འོད་གསལ་དེ་ཉིད་ ཀུན་གཞི་ཡེ་ཤེས་དོན་དམ་གྱི་དགེ་བའི་རྣམ ་འགྱུར་རམ་མཚན་མ་ཡིན་པ་ནི། གཙུག་ཏོར་ཆེན་པོའི་མདོ་ལས། དེའི་སེམས་སྐད་ཅིག་ཙམ་ཞིག་ཕྱོགས་བཅུའི་ནམ་མཁའ་ལ་རིན་པོ་ཆེ་སྣ་བདུན་གྱི་ཁ་དོག་ཏུ་འགྱུར་རོ། །བར་བར་ནི་ཁ་དོག་སྣ་བརྒྱར་ཡང་འགྱུར་རོ། །ཡང་ཁྱབ་པར་གང་པ་ནི་སྔོན་པོ་སེར་པོ་དམར་པོ་དཀར་པོ་རྣམས་སོ་སོར་མ་འདྲེས་པ་ལྟ་བུར་སྣང་སྟེ། དེ་ཡང་ཐངས་གཅིག་ཏུ་ཟད་པས་འཕགས་པར་གྱུར་པ་ནི་མ་ཡིན་ནོ། །དེ་རྣམས་དགེ་བའི་མཚན་མར་ནི་རུང་གི །དེ་ལ་འཕགས་པའོ་སྙམ་དུ་བསམས་ན་ལམ་ལོག་པའི་ཁམས་སུ་ལྷུང་ངོ་། །ཡང་སེམས་དེ་སྐད་ཅིག་ཙམ་ཞིག་མཚན་མོ་མུན་ནག་གི་ནང་ནས་རྫས་སྣ་ཚོགས་མཐོང་སྟེ་ཉིན་མོ་མཐོང་པ་དང་མཚུངས་སོ། །ཡང་སེམས་དེ་ཉིད་ལུས་ཀྱི་ནང་དང་ཞིང་གསལ་བ་དེ་ཡུད་ཙམ་ཞིག་གསལ་བ་ལས་རང་གི་ལུས་ཀྱི་ནང་ནས་སྲིན་གྲོལ་མ་བློ་བུར་དུ་བྱུང་ཡང་། ལུས་ཀྱི་རང་བཞིན་ཇི་ལྟ་བ་བཞིན་དུ་སྨས་ཤིང་ཉམས་པ་མེད་པར་ཡང་མཐོང་ངོ་། །ཡང་སེམས་དེ་གསལ་ཞིང་སལ་ལེ་བའི་ངང་ནས་སྐད་ཅིག་ཙམ་ཞིག་འོད་བྱུང་སྟེ་ཕྱོགས་བཅུ་ཁྱབ་པ་འཛམ་བུ་གསེར་གྱི་ཁ་དོག་ཏུ་གྱུར་ཏེ་རྣམ་པ་སྣ་ཚོགས་ཐམས་ཅད་ཀྱང་དེ་བཞིན་གཤེགས་པའི་སྐུར་གྱུར་ནས་རྣམ་པར་སྣང་མཛད་དེ་བཞིན་གཤེགས་པ་ལྷའི་འོད་བརྩེགས་པའི་ཁང་པ་ན་བཞུགས་ཏེ་སངས་རྒྱས་བཅུའི་འཁོར་གྱིས་བསྐོར་ཞིང་། ས་ཡ་ཕྲག་རྒྱའི་ཞིང་དང་པད་མོར་བཅས་པ་ལྟ་བུར་བྱུང་པ་སྣང་ངོ་། །ཡང་བསྒོམས་པ་ལས་སེམས་སྐད་ཅིག་ཙམ་ཞིག་ཁམས་བཞི་ཡང་རྩྭ་ཞིང་དང་འདྲ་བར་མཐོང་སྟེ། མེས་བསྲེགས་མཚོན་ཆས་སྟུབས་ཀྱང་མི་ཚོར་ཞིང་མེའི་འོད་ཀྱིས་མཆེད་ཀྱང་ཚིག་པར་མི་འགྱུར་ལ། ཤ་བཅད་ན་ཡང་ཤིང་བཞོགས་པ་དང་མཚུངས་སོ། །ཡང་སེམས་དེ་སྐད་ཅིག་ཙམ་ཞིག་ཕྱོགས་བཅུའི་ས་ཆེན་པོ་དང་རི་དང་ཆུ་ཀླུང་མཐོང་སྟེ་དེ་ཉིད་སངས་རྒྱས་ཀྱི་ཞིང་དུ་གྱུར་ནས་རིན་པོ་ཆེ་སྣ་བདུན་དང་ལྡན་ཞིང་འོད་སྣང་པས་ཁྱབ་ཅིང་གང་པ་དང་། ཡང་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པའི་སངས་རྒྱས་ཐམས་ཅད་ཁང་པ་བརྩེགས་པ་བརྒྱན་པ་ན་བཞུགས་ཏེ་ནམ་མཁའ་གང་བར་མཐོང་ངོ་། །ཡང་འོག་གི་ཕྱོགས་སུ་སེམས་ཅན་དམྱལ་བ་མཐོང་། སྟེང་གི་ཕྱོགས་སུ་ཡང་ལྷའི་གནས་གཞལ་མེད་ཁང་རྣམས་སྒྲིབས་པ་མེད་པ་ལྟ་བུར་མཐོང་ངོ་། །ཡང་སེམས་དེ་ཡུན་རིང་སུ་བསྒོམས་པ་ལས་སྐད་ཅིག་ཙམ་ཞིག་ནམ་གྱི་གུང་ལ་རྒྱང་རིང་པོ་ནས་ཚོང་འདུས་དང་གྲོང་ཁྱེར་དང་གཉེན་བཤེས་ཀྱང་མཐོང་ངོ་། །བར་བར་ནི་གཏམ་ཟེར་བའི་སྒྲ་ཡང་ཐོས་ཤིང་བར་ཆོད་ཀྱིས་ཕྱི་རོལ་ན་འདུག་པ་ལྟ་བུར་ཡང་མཐོང་ངོ་། །དེ་རྣམས་དགེ་བའི་ལྟས་ནི་ཡིན་གྱི་འཕགས་པར་གྱུར་པ་ནི་མ་ཡིན་ནོ། །དེ་ལ་འཕགས་པའོ་སྙམ་དུ་བསམས་ན་ལམ་ལོག་པའི་ཁམས་སུ་ལྷུང་ངོ་། །ཞེས་གསུངས་སོ། །སྐབས་འདི་ནས་ལུས་གནད་ལྟ་སྟངས་དང་རྟགས་བཅུ་དང་འོད་གསལ་འདི་ལྟ་བུ་དང་གཞན་ལ་ཤར་ཅེས་གཞན་ལ་ཤིན་ཏུ་གསང་བར་གདམས་པའི་བཀའ་རྒྱས་འདེབས་པ་གལ་ཆེའོ། །དེ་ལྟར་ ཀུན་གཞི་ཡེ་ཤེས་ཀྱི་རྣམ ་འགྱུར་ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། ཤེར་ཕྱིན་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་གྱིས་གཟུགས་སྣ་ཚོགས་པ་རྣམས་དོན་དམ་པའི་སེམས་སུ་ངོ་སྤྲད་པར་བྱའོ།། །།
ཡེ་ཤེས་ཀྱི་སྒྲ་སྣ་ཚོགས་ངོ་སྤྲད་པ།
གཉིས་པ་ཡེ་ཤེས་ཀྱི་གསུམ་སྣ་ཚོགས་ངོ་སྤྲད་པ་ནི། སྒྲ་ཏིང་ངེ་འཛིན་དུ་རྟོགས་པར་བྱའོ། །ཞེས་པ་དང་། སྤྱོད་འཇུག་ལས། ལུས་ཅན་ཀུན་གྱི་བྱ་དང་ནི། །ཤིང་དང་འོད་ཟེར་ཐམས་ཅད་དང་། །ནམ་མཁའ་ལས་ཀྱང་ཆོས་ཀྱི་སྒྲ། །རྒྱུན་མི་ཆད་པར་ཐོས་པར་ཤོག །ཅེས་པ་དང་། གཙུག་ཏོག་ཆེན་པོའི་མདོ་ལས། སེམས་དེ་ཡུན་རིང་དུ་རྣམ་པར་བཞག་པ་ལས་སྐད་ཅིག་ཙམ་ཞིག་ནམ་མཁའ་སྟོང་པ་ལས་གཅིག་ཆར་དུ་ཕྱོགས་བཅུ་ནས་ཆོས་ཟབ་མོ་འཆད་པ་ལྟ་བུའི་སྒྲ་ཐོས་སོ། །ཞེས་པ་དང་། རྟག་གཉིས་ལ། ངང་པ་དང་ནི་བུང་པའི་སྒྲ། །གླུའི་མཐའ་ནས་མཉན་པར་བྱ། །བ་ལང་འཚེའི་སྒྲ་ཡང་ནི། །ཕྱི་རོལ་ཚལ་དུ་མཚོན་བྱ་བ། ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིང་པའི་སྦྱོར་བ་ཡིས། །ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ངང་པའི་སྒྲ་དང་། བུང་པའི་སྒྲ་དང་། བ་ལང་ཚེ་ལྕེ་སྤྱང་གི་སྒྲ་དང་ཁྱི་ཕག་དང་ར་ལུག་དང་སྟག་གཟིག་དང་། དུང་དང་འབྲུག་ལ་སོགས་པ་དུད་འགྲོ་ཇི་སྙེད་པ་དེ་སྙེད་ཀྱི་སྒྲའི་རྣམ་པ་ཐོས་སོ། །མྱང་འདས་ཀྱི་མདོ་ལས། འབྲུག་སྒྲའི་ཏིང་ངེ་འཛིན་ཐོབ་པ་དང་། ཞེས་པ་དང་། འབུམ་དང་ཉི་ཁྲི་སོགས་ལས། བརྡའ་དང་སྒྲ་ལ་འཇུག་པ་ཞེས་བྱ་བའི་ཏིང་ངེ་འཛིན་ཡོད་དེ་ཏིང་ངེ་འཛིན་དེས་སྤྱོད་པའི་ཞེས་པ་སྔར་གྱིས་འགྲེའོ། །ཞེས་གསུངས་པའི་དོན་ནོ། །ས་སྒྲ་ཆུ་སྒྲ་མེ་སྒྲ་རླུང་སྒྲ་བྲག་ཆ་ས་གཡོས་པའི་སྒྲ་དང་གླིང་བུ་པི་ཝང་ཆ་ལང་དུང་ཏིང་ལ་སོགས་པ་རོལ་མོའི་སྒྲ་སྟེ། བེམས་པོའི་སྒྲ་ཇི་སྙེད་པའི་རྣམ་པ་ཐོས་ཏེ། འབུམ་དང་ཉི་ཁྲི་སོགས་ལས་སྒྲ་དབྱངས་ཀྱི་ཡི་གེ་དང་བྲལ་བ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །དམྱལ་བའི་ཚིག་དང་མིང་སྣ་ཚོགས་པ་ཇི་སྙེད་པ་དང་། ཡི་དྭགས་ཀྱི་ཚིག་དང་། མིང་སྣ་ཚོགས་པ་ཇི་སྙེད་པ་དང་། དུད་འགྲོའི་ཚིག་དང་མིང་སྣ་ཚོགས་པ་ཇི་སྙེད་པ་དང་། ལྷ་དང་མིའི་ཚིག་དང་མིང་སྣ་ཚོགས་པ་ཇི་སྙེད་པ་དང་། སངས་རྒྱས་བྱང་ཆུབ་སེམས་དཔའ་ཉན་རང་དུས་གསུམ་གྱི་སེམས་ཡོད་སེམས་མེད་སྣ་ཚོགས་ལ་བཏགས་པའི་ཚིག་དང་མིང་ཇི་སྙེད་པའི་རྣམ་པ་རྣམས་དང་། རང་གཞན་ལ་བསྟོད་པ་དང་སྨོད་པ་དང་སླབ་པ་དང་སྣ་ཚོགས་སྟོན་པ་དང་། བརྫུན་པ་དང་བདེན་པ་ཅི་རིགས་པའི་ཚིག་དང་། མིང་དུ་བཏགས་པའི་སྒྲ་སྣ་ཚོགས་ཐོས་ཏེ། འབུམ་དང་ཉི་ཁྲི་སོགས་ལས། ཚིག་དགས་ལ་ཡང་དག་པར་འཇུག་པ་ཞེས་བྱ་བའི་ཏིང་ངེ་འཛིན་དང་། མིང་ངེས་པར་འཇུག་པ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །རིགས་དྲུག་སོ་སོའི་གནས་སུ་གང་དུ་སེམས་ཡོད་སེམས་མེད་ཀྱི་དོན་གང་ལ་མཚན་མོ་གསལ་བྱེད་ཞེས་པ་ལྟ་བུ་རྒྱུ་མཚན་ཅན་དུ་བརྡའ་སྦྱར་བའི་ངེས་པའི་ཚིག་སྣ་ཚོགས་པ་རྣམས་ཀྱང་ཐོས་ཏེ། འབུམ་དང་ཉི་ཁྲི་སོགས་ལས། ངེས་པའི་ཚིག་ལ་གདོན་མི་ཟ་བར་འཇུག་པ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་སྔར་གྱི་དེས་འགྲེའོ། །བླ་མ་ཡི་དམ་སངས་རྒྱས་བྱང་སེམས་ཉན་ཐོས་རང་རྒྱལ་ཆོས་སྐྱོང་གི་གཟུགས་སྣ་ཚོགས་ཀྱིས་ཆོས་སྟོན་པ་དང་། རིགས་དྲུག་སོ་སོའི་གཟུགས་སྣ་ཚོགས་ཀྱིས་ཆོས་སྟོན་པ་དང་། ས་ཆུ་མེ་རླུང་རི་བྲག་རྩི་ཤིང་མེ་ཏོག་ནགས་ཚལ་རི་ཕུག་བྲག་ཕུག་ས་ཕུག་ཉི་ཟླ་གཟའ་སྐར་འོད་ཟེར་སྣ་ཚོགས་པའི་གཟུགས་ཀྱིས་ཆོས་སྟོན་པ་དང་། ནང་ན་ཕྱི་ནས་ཕྱོགས་བཅུའི་ནམ་མཁའ་ལས་ཆོས་སྣ་ཚོགས་ཀྱི་དོན་དང་ཚིག་རབ་ཏུ་འབྱེད་པའི་ཆོས་སྟོན་པ་ཐོས་ཏེ། འབུམ་དང་ཉི་ཁྲི་སོགས་ལས། ཆོས་ཐམས་ཅད་ཀྱི་ཚིག་རབ་ཏུ་འབྱེད་པ་ཞེས་བྱ་བའི་ཏིང་ངེ་འཛིན་ཡོད་དོ་ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་མ་ཐོབ་ཀྱི་བར་དུ་བེམས་པོའི་སྒྲ་ཐམས་ཅད་ཡི་གེ་དང་བྲལ་བ་དང་སེམས་ཡོད་ཀྱི་ཚིག་དང་ཕྱི་ནང་གི་ནམ་མཁས་སྟོང་པའི་སྒྲ་ལ་བདེན་བརྫུན་སྣ་ཚོགས་དང་། སྙན་མི་སྙན་སྣ་ཚོགས་སུ་འབྱུང་ལ། སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་ཏིང་ངེ་འཛིན་ཐོབ་ནས་རིམ་གྱིས་ལྷ་བདེ་གཤེགས་སྙིང་པོ་ཀུན་གཞི་ཡེ་ཤེས་ཀྱི་ལྷའི་རྣ་བ་ཐོབ་ཅིང་། དག་པའི་ཤས་ཇེ་ཆེར་འཕེལ་བས་སྒྲ་ཐམས་ཅད་གོ་རྒྱུ་ཅན་དང་། བདེན་པ་ཡིད་དུ་འོང་པ་ཁོ་ན་འབྱུང་ལ། ལྷའི་སྐད་ལ་སོགས་འགྲོ་བ་ཀུན་གྱི་སྐད་རྣམས་ཇི་སྙེད་པ་ཐོས་ཤིང་གོ་ལ། ཕར་ལའང་འགྲོ་བ་རིགས་མི་གཅིག་པ་ཇི་སྙེད་པ་དེ་སྙེད་ཀྱི་སོ་སོའི་སྐད་དུ་སྨྲ་ཤེས་པ་ཡིན་ནོ། །ཏིང་ངེ་འཛིན་གྱི་ངང་ནས་ཐེག་པ་མཐོ་དམན་དང་སྤངས་རྟོགས་དང་། ས་ལམ་གྱི་ཆོས་སྣ་ཚོགས་པ་ཕུན་སུམ་ཚོགས་ཤིང་གྱ་ནོམ་པ་ནམ་མཁའ་སྟོང་པ་ལ་སོགས་ལས་ཐོས་པ་འདི་ནི་ཕྱི་དྲང་དོན་གྱི་བླ་མ་མེད་ཀྱང་ནང་ངེས་དོན་གྱི་བླ་མ་གཅིག་ནང་ནས་འཆར་རོ། །ཞེས་སྔར་གྱི་སྐྱེས་མཆོག་གོང་མ་རྣམས་ཀྱི་གསུང་སྒྲོས་ལས་བྱུང་བ་འདི་ཉིད་ཡིན་ནོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ནས་རང་ཉིད་ཀྱིས་ཀྱང་འགྲོ་བ་མི་གཅིག་པ་སྣ་ཚོགས་ལ་སྐད་རིགས་མི་གཅིག་པ་སྣ་ཚོགས་ཀྱིས་ཆོས་སྣ་ཚོགས་སྟོན་པར་ནུས་པ་ནི། ལྷའི་སྐད་ཀླུའི་སྐད་རྣམས་དང་། གྲུ་བུམ་དག་དང་མིའི་སྐད་རྣམས་དང་། །འགྲོ་བ་ཀུན་གྱི་སྐད་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་སྟན་ཏོ་ཞེས་གསུངས་པའི་དོན་ཏོ། །
ཡེ་ཤེས་ཀྱི་དྲི་སྣ་ཚོགས་ངོ་སྤྲད་པ།
གསུམ་པ་ཡེ་ཤེས་ཀྱི་དྲི་སྣ་ཚོགས་ངོ་སྤྲད་པ་ནི། དྲི་ཏིང་ངེ་འཛིན་དུ་རྟོགས་པར་བྱའོ། །ཞེས་པ་དང་། བརྟག་གཉིས་ལས། དེ་ལ་དྲི་ནི་མཚོན་པར་བྱ། །སྒོག་པའི་དྲི་ནི་དང་པོ་ཉིད། །དེ་ནས་ཡང་ནི་བྱ་རྒོད་དྲི། །ག་བུར་མ་ལ་ཡའི་དྲི། ཞེས་པའི་དོན། ཀུན་གཞི་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད། བྱེད་པ་བཅིང་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྒོག་པའི་དྲི་དང་བྱ་རྒོད་ཀྱི་དྲི་དང་། ག་བུར་གྱི་དྲི་དང་། ཙནྡ་མ་ལ་ཡའི་དྲི་དང་། སྤོས་ཀར་དང་། སིནཥ་ཀ་དང་། སོག་པོ་སྤོས་ཀར་དང་། སྦྱར་སྤོས་དང་། རྒྱ་སྤོས་ལ་སོགས་པ་སྤོས་སྣ་ཚོགས་པའི་དྲི་ཇི་སྙེད་པ་དང་། བཤང་བ་དང་། གཅི་བ་དང་། རྣག་དང་། ཁྲག་དང་། ཤ་རུལ་པ་དང་། ལུད་ཁུང་རྡུལ་པ་ལ་སོགས་པའི་དྲི་མི་ཞིམ་པ་ཇི་སྙེད་པ་དང་། ཆང་ལངས་མ་ཐག་པ་དང་། ནས་རྔོད་པ་དང་། བསུར་སྣ་ཚོགས་པའི་དྲི་དང་། སྤེན་མ་དང་། བུར་ཤིང་དང་། ཤུག་པ་ལ་སོགས་པའི་ཤིང་སྣ་ཚོགས་པའི་དྲི་ཇི་སྙེད་པ་དང་། གཞན་ཡང་ལྷའི་སྤོས་དང་། ཀླུའི་སྤོས་དང་། འཕགས་པ་ཉན་རང་དང་རྒྱལ་བ་སྲས་བཅས་ལ་འོས་པའི་སྤོས་དྲི་ཞིམ་པ་གྱ་ནོམ་པ་བསམ་གྱིས་མི་ཁྱབ་པ་མིང་མི་ཐོགས་པ་སྣ་ཚོགས་པ་འཆར་ཏེ། རྣལ་འབྱོར་གྱི་ཉམས་ལ་ཅི་ཡང་འཆར་བའི་ཕྱིར་རོ། །གཞན་ཡང་སྣང་སྲིད་ཐམས་ཅད་དྲི་ཞིམ་པ་ཕུན་སུམ་ཚོགས་པ་ནད་དང་སྡུག་བསྔལ་ཐམས་ཅད་སེལ་ཞིང་། ལུས་སེམས་དང་དབང་པོ་ཐམས་ཅད་སིམ་པར་བྱེད་པ་ཏིང་ངེ་འཛིན་དང་། ཤེས་རབ་ཀྱི་སྣང་པ་རྒྱས་པར་བྱེད་པ། ཟས་གོས་ཐམས་ཅད་ཀྱི་གོ་ཆོད་པ་ནམ་མཁའ་གང་པ་འཆར་རོ། །ཡང་སྒྲིབ་པའི་ས་བོན་སྲོག་ཁུག་པ་གཅིག་མ་འགགས་ཀྱི་བར་དུ་དྲི་ཞིམ་མི་ཞིམ་དང་། ཡིད་དུ་འོང་མི་འོང་དང་། ནད་གཞི་ལ་ཕན་མི་ཕན་ལ་སོགས་པ་སྣ་ཚོགས་སུ་འཆར་ཏེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་སྲོག་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་དྲི་ཐམས་ཅད་ཞིམ་པ་དང་། །ཡིད་དུ་འོང་པ་དང་། བདེ་བ་ཆེན་པོར་རོ་གཅིག་པ་ཁོ་ན་རྒྱུན་མི་འཆད་པ་ནམ་མཁའ་གང་བར་འཆར་རོ།། །།
ཡེ་ཤེས་ཀྱི་རོ་སྣ་ཚོགས་ངོ་སྤྲད་པ།
བཞི་པ་ཡེ་ཤེས་ཀྱི་རོ་སྣ་ཚོགས་ངོ་སྤྲད་པ་ནི། རོ་ཏིང་ངེ་འཛིན་དུ་རྟོགས་པར་བྱའོ། །ཞེས་པའི་དོན་ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། རོ་ཕྱོགས་སུ་ལྷུང་པ་དྲུག་ལ། ཚྭའི་རོ་དང་མངར་བའི་རོ་དང་། ཚ་བའི་རོ་དང་། ཁ་བའི་རོ་དང་། ཀ་བའི་རོ་དང་སྐྱུར་བའི་རོའོ། །དེ་ལ་ཚྭའི་རོ་ནི། ལན་ཚྭ་དང་རྒྱ་ཚྭ་དང་རྒྱམ་ཚྭ་དང་ཁ་རུ་ཚྭ་དང་ཟེ་ཚྭ་དང་བུལ་ཚྭ་དང་བ་ཚྭ་དང་ཤིང་ཚའི་རོ་ལྟ་བུའོ། །མངར་བའི་རོ་ནི། ཀ་ར་དང་བུ་རམ་དང་སྦྲང་རྩི་དང་འོ་མ་དང་ཤིང་སྔར་གྱི་རོ་ལྟ་བུའོ། །ཚ་བའི་རོ་ནི་དྲོས་སྨན་དང་ལྕ་སྒ་དང་སྒོག་པའི་རོ་ལྟ་བུའོ། །ཁ་བའི་རོ་ནི། ཁྲིས་པ་དང་ཏིག་ཏའི་རོ་ལྟ་བུའོ། །ཀ་བའི་རོ་ནི། ཨ་རུ་ར་དང་འོམ་བུའི་རོ་ལྟ་བུའོ། །སྐྱུར་བའི་རོ་ནི། ཆང་སྐྱུར་དང་ཆུ་ཀྱུར་དང་ལྕིན་དང་ཆུ་རྩ་ལས་སྐྱེས་པའི་སྡོང་བུའི་རོ་ལྟ་བུའོ། །དེ་ལྟར་རོ་དྲུག་གི་བཟའ་བ་དང་བཏུང་པ་གཉིས་ཀ་ལ་དྲུག་དྲུག་ཏུ་ངེས་ལ། རོ་ཕྱོགས་སུ་ལྷུང་པ་མི་ཞིམ་ཞིང་རོ་ཆ་མཉམ་པ་ཞིམ་པའོ། །རོ་དྲུག་པོ་རྣམས་ཀྱི་བཟའ་བཏུང་གཉིས་ལ་རོ་རེ་རེ་ལ་ཡང་ཤས་ཆེ་བ་དང་ཆུང་པ་དང་། ཆ་མཉམ་པ་གསུམ་གསུམ་སྟེ། ཚྭའི་རོ་ཤས་ཆེ་བ་དང་ཆུང་པ་དང་། མཉམ་པ་ལྟ་བུའོ། །སྒྲིབ་པའི་ས་བོན་རླུང་ཁུག་པ་གཅིག་མ་འགགས་བར་དུ་རོ་ཞིམ་པ་དང་ཡིད་དུ་འོང་པ་དང་མི་འོང་པ་དང་ནད་གཞི་ལ་ཕན་པ་དང་མི་ཕན་པ་སྣ་ཚོགས་སུ་འཆར་ཏེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་ཟག་མེད་ཆོས་སྐུའི་སྣང་བ་ཤས་ཆེར་མངོན་དུ་གྱུར་པའི་ཕྱིར། སྣང་སྲིད་ཐམས་ཅད་རོ་མཆོག་ཞིམ་པ་རྒྱ་ནོམ་པ་ཕུན་སུམ་ཚོགས་པ་སངས་རྒྱས་དང་བྱང་ཆུབ་སེམས་དཔའ་ལ་འོས་པའི་རོ་ཟས་གོས་ཐམས་ཅད་ཀྱི་གོ་ཆོད་པ་ལུས་སེམས་དང་དབང་པོ་ཐམས་ཅད་སིམ་པར་ལྟས་པའི་བདེ་ཆེན་གྱི་ཏིང་ངེ་འཛིན་ནམ་མཁའ་གང་བར་འཆར་རོ། །དེདི་བསམ་གཏན་ཟས་ཀྱི་ཀྱིས་འཚོ་བར་ཤོག་ཅེས་པ་དང་། ཟུས་སུ་ཏིང་ངེ་འཛིན་ཟ། ཞེས་པའི་དོན་ཏོ།། །།
ཡེ་ཤེས་ཀྱི་རེག་བྱ་སྣ་ཚོགས་ངོ་སྤྲད་པ།
ལྔ་པ་ཡེ་ཤེས་ཀྱི་རེག་བྱ་སྣ་ཚོགས་ངོ་སྤྲད་པ་ནི། རེག་བྱ་ཏིང་ངེ་འཛིན་ཏུ་རྟོགས་པར་བྱའོ། །ཞེས་པའི་དོན་ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད། བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། རེག་བྱ་དྲུག་འབྱུང་པ་འདི་ལྟ་སྟེ། མིག་གི་འདུས་ཏེ་རེག་པ་དང་། རྣ་བའི་འདུས་ཏེ་རེག་པ་དང་། སྣའི་འདུས་ཏེ་རེག་པ་དང་། ལྕེའི་འདུས་ཏེ་རེག་པ་དང་། ལུས་ཀྱི་འདུས་ཏེ་རེག་པ་དང་། ཡིད་ཀྱི་འདུས་ཏེ་རེག་པའོ། །དྲག་པོ་རེ་རེ་ལ་ཡང་རེག་བྱ་འཇམ་པ་དང་རྩུབ་པ་དང་མཉམ་པ་གསུམ་གསུམ་མོ། །དེ་ལ་མིག་ཧ་ཅང་འཇམ་པ་དང་རྩུབ་པ་དང་ཆ་མཉམ་པ་དང་ཆེ་བ་དང་ཆུང་པ་དང་འཁྲེགས་པ་དང་སོབ་པ་དང་ཡངས་པ་དང་དོག་པ་དང་མིག་མང་པོའི་སྣང་པ་དང་། མིག་ཕྱེད་ཙམ་ལས་མེད་པ་དང་། མིག་མེད་པའི་སྣང་པའང་རེག་བྱའོ། །རྣ་བ་ཧ་ཅང་འཇམ་པ་ལ་སོགས་པ་ཡང་སྔར་གྱིས་འདྲེའོ། །སྣ་་ཧ་ཅང་འཇམ་པ་ལ་སོགས་པ་ཡང་སྔར་གྱིས་འདྲེའོ། །ལྕེ་ཧ་ཅང་འཇམ་པ་ལ་སོགས་པ་ཡང་སྔར་གྱིས་འདྲེའོ། །ལུས་ཧ་ཅང་འཇམ་པ་ལ་སོགས་པ་ཡང་སྔར་གྱིས་འདྲེའོ། །ཡིད་ཀྱི་རེག་བྱའི་སྣང་བ་ཧ་ཅང་འཇམ་པ་ལ་སོགས་པ་ཡང་སྔར་གྱི་འདྲེའོ། །ལུས་ཀྱི་རེག་བྱ་ལ་ཁྱད་པར་དུ་རྒྱབ་བདུན་འཆུས་པ་དང་། མགོ་འཇུག་ལོག་པ་དང་། ཕྱོགས་འཛོལ་བ་དང་། ཡན་ལག་རེ་རེ་ཧ་ཅང་ཆེ་བ་དང་ཆུང་བ་དང་། འཁྲེགས་པ་དང་སོབ་པ་དང་། ལྷག་པར་མང་པ་དང་། ཕྱེད་ཙམ་ལས་ཕྱེད་པ་དང་། སྟན་ནས་མེད་པའང་རེག་བྱའི་སྣང་པའོ། །ནང་གི་གློ་མཆིན་རྩ་ལ་སོགས་པ་རེ་རེའང་ཧ་ཅང་འཇམ་པ་ལ་སོགས་པ་སྔར་གྱིས་འདྲེ་ལ། ནང་གྲོལ་གཏན་ནས་མེད་པའི་སྣང་པ་ཡང་རེག་བྱའི་སྣང་པའོ། །ཡིད་ཀྱི་རེག་བྱ་ལ་ཁྱད་པར་དུ་སྒོམ་ཁང་ཧ་ཅང་ཆེར་སོང་པ་དང་། ཆུང་དུ་སོང་པ་དང་། མགོ་འཇུག་ལོག་པ་དང་། ཕྱོགས་འཆུས་པ་དང་། ཐོག་མེད་པ་དང་། ཕྱོགས་རལ་བ་དང་། སྒོ་འཛོལ་བ་དང་། འོག་ན་མར་བྱིང་བ་དང་། སྟེང་དང་ཕྱོགས་གཞན་དུ་རྒྱུག་པའི་སྣང་བ་དང་། སྒོམ་ཁང་གཏན་ནས་མེད་པའི་སྣང་པ་ཡང་རེག་བྱའི་རྣམ་པའོ། །ཏིང་ངེ་འཛིན་གྱི་སྤྱོད་ཡུལ་སྒྲ་དང་དྲི་ལ་སོགས་པ་ཡུལ་དྲུག་པོ་ཐམས་ཅད་ཀྱང་ཏིང་ངེ་འཛིན་གྱི་སྣང་པ་ལ་གཅན་གཟན་གྱི་རྣམ་པར་འཆར་ཏེ། ཆོས་དང་ཆོས་ཉིད་རྣམ་འབྱེད་ལས། མཉམ་པར་བཞག་པ་དག་ལ་ནི། །ཏིང་ངེ་འཛིན་དེའི་སྤྱོད་ཡུལ་དེའི། གཅན་གཟན་རབ་ཏུ་སྣང་ཕྱིར་རོ། །ཞེས་གསུངས་པའི་དོན་ཏོ། །དེས་ན་རེག་བྱའི་ཉམས་མྱོང་ལ་ཡུལ་དྲག་གི་རྣམ་པ་ཡང་འཇམ་པ་ལག་ཐིལ་ལྟར་མཉམ་པ་དང་། རྩུབ་པ་དང་གཡང་ས་དང་ངམ་གྲོག་དང་གཅོང་རོང་དང་ལམ་འཕྲང་དང་མཐོ་དམན་སྣ་ཚོགས་སུ་འཆར་བའོ། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་སྒྲིབ་པའི་ས་བོན་མ་འགགས་པས་ཟག་མེད་ཀྱི་རེག་བྱ་ཅུང་ཟད་ཀྱང་མ་ཐོབ་ཅིང་ཟག་བཅས་ཟག་མེད་རེས་འཇོག་ཏུ་སོང་པ་རེག་བྱ་བདེ་བ་དང་ཡིད་དུ་འོང་པ་དང་མི་འོང་པ་དང་དགའ་ལོད་སྣ་ཚོགས་སུ་འཆར་ཏེ་རྣལ་འབྱོར་གྱི་ཉམས་ལ་ཅི་ཡང་འཆར་བའོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་སྣང་སྲིད་ཐམས་ཅད་རེག་བྱ་བདེ་བའི་སྣང་པ་དགའ་བ་སྐྱིད་པ་ཡིད་དུ་འོང་པ་གྱ་ནོམ་པ་ཕུན་སུམ་ཚོགས་པ་དབང་པོ་ཐམས་ཅད་ཀྱིས་སེམ་པར་ཉམས་སུ་མྱོང་པ། ཡེ་ཤེས་ཀྱི་བདེ་དྲོད་འབར་བས་གོས་མི་དགོས་ཤིང་། རི་བྲག་རྩིག་པ་ལ་སོགས་ལ་ཐོགས་པ་མེད་པ་ཆུ་ལ་མི་འབྱིང་ཞིང་ས་ལ་ཆུ་བཞིན་དུ་འཇུལ་བར་བྱེད་པ། སྣང་པའི་མོད་ལ་མི་སྣང་བར་སྟོན་ཅིང་མི་སྣང་པའི་མོད་ལ་སྣ་ཚོགས་སུ་སྟོན་ལ། བར་སྣང་སྟོང་པ་ལ་ཡང་འགྲོ་འཆག་ཉལ་མཉེས་ལ་སོགས་པའི་སྤྱོད་ལམ་སྣ་ཚོགས་བྱེད་པ་ལུས་སྤྲུལ་བསྒྱུར་སྣ་ཚོགས་པའི་སྒོ་ནས་བྱ་དང་གློག་བཞིན་དུ་ནམ་མཁའ་ལ་ཕྱོགས་བཅུར་རྒྱུ་བ། རྣམ་འགྱུར་དཔག་ཏུ་མེད་པའི་རྣམ་པ་འཆར་རོ།། །།
ཡེ་ཤེས་ཀྱི་ཆོས་སྣ་ཚོགས་ངོ་སྤྲད་པ།
ཆོས་ཀྱི་ཁམས་ངོ་སྤྲད་པ།
དྲུག་པ་ཡེ་ཤེས་ཀྱི་ཆོས་སྣ་ཚོགས་ངོ་སྤྲད་པ་ནི། ཆོས་ཀྱི་ཁམས་ངོ་སྤྲད་པ་དང་། རྨི་ལམ་གྱི་ཉམས་ངོ་སྤྲད་པ་དང་། ཡུལ་དྲུག་སྤྱིའི་འཇུག་བསྡུས་ཏེ་བསྟན་པའོ། །
དང་པོ་ཆོས་ཀྱི་ཁམས་ངོ་སྤྲད་པ་དངོས་ནི། ཆོས་ཀྱི་ཁམས་ཏིང་ངེ་འཛིན་དུ་རྟོགས་པར་བྱའོ་ཞེས་པའི་དོན། ཀུན་གཞི་ཡེ་ཤེས་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ཡིད་ཡུལ་དུ་སྐད་ཅིག་རེ་ཙམ་གཟུགས་སྒྲ་ལ་སོགས་པའི་ཆོས་སྣ་ཚོགས་པ་འཆར་ཞིང་དེ་ཡང་སྔར་རྒྱུས་མེད་པའི་གྲོང་དང་ཡུལ་དང་མི་ལ་སོགས་པའི་འགྲོ་བ་སྣ་ཚོགས་དང་སྤྱོད་ལམ་སྣ་ཚོགས་པ་སྐད་ཅིག་ཐང་ཅིག་ཡུད་ཙམ་རེ་གསལ་བར་མངོན་སུམ་དུ་ཝལ་ཝལ་འཆར་ཏེ། ལས་དང་པོ་པས་རྣམ་རྟོག་ཡིན་སྙམ་ནས་རྣམ་རྟོག་དང་ཕྱེད་པར་དཀའ་འོ། །འདི་ནི་ཡིད་ཡུལ་དུ་ཡུལ་དྲུག་གི་དོན་དོན་གསལ་བར་སྣང་པ་མངོན་སུམ་བཞིན་དུ་འཆར་ལ། རྣམ་རྟོག་ལ་ནི་དོན་སྤྱིའི་ཚུལ་དུ་དྲན་པ་ཙམ་མ་རྟོགས་པ་གསལ་སྣང་མི་འབྱུང་སྟེ། ཚད་མ་རྣམ་འགྲེལ་ལས། རྣམ་རྟོག་རྗེས་སུ་འབྲེལ་བ་ལ་དོན་གསལ་སྣང་པ་ཡོད་མ་ཡིན། ཞེས་པའོ། །སེམས་ཀྱི་གནས་ཆ་ཆེ་ན་ལུས་གནད་ལ་སོགས་པའི་རྣམ་འགྱུར་རྗེད་ནས་གཉིད་སོང་པའི་རྨི་ལམ་བཞིན་དུ་རིགས་དྲུག་གིས་གསལ་སྣང་སྣ་ཚོགས་དང་བདེ་བ་ཅན་ལ་སོགས་པ་དག་པའི་སྣོད་བཅུད་ཀྱི་གསལ་སྣང་སྣ་ཚོགས་འཆར་བ་ལ་གཉིད་དུ་སོང་པའི་རྨི་ལམ་ཡིན་ནམ་ཅི་ཡིན་ནམ་སྙམ་པ་འབྱུང་སྟེ། བརྟག་གཉིས་ལས། གཉིད་ལོག་སད་པ་མི་ཕྱེད་པ། །རྟག་ཏུ་རྨི་ལམ་འདྲ་བར་འགྱུར། ཞེས་པའི་དོན་ནོ། །དྲན་པས་ཟིན་པས་ཚེ་ལུས་གནད་ལ་སོགས་མ་ཞིག་ཅིང་གཉིད་དུ་ནི་མ་སོང་པར་འདུག་པ་ལ་ཡུན་རིང་པོར་རྣམ་རྟོག་ལ་འབྱམས་འདུག་སྙམ་པ་འབྱུང་་ངོ་། །དེ་ཡང་བསྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་ཡིད་ཀྱི་ཡུལ་དྲུག་གི་སྣང་པ་སྣ་ཚོགས་འཇིགས་པ་དང་། ཡིད་མི་བདེ་བ་དང་། སྡུག་བསྔལ་གྱི་རྐྱེན་དུ་འགྱུར་བ་སྣ་ཚོགས་འཆར་ལ། བསྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་ཡིད་ཡུལ་དུ་ཤར་བའི་ཚེ། ཆོས་སྣ་ཚོགས་པ་ཐམས་ཅད་དགའ་བ་སྐྱིད་པ་གྱ་ནོམ་པ་ཕུན་སུམ་ཚོགས་པ་བཀྲ་ཤིས་པ་ཀུན་གྱི་བཀྲ་ཤིས་པ། དཔལ་ལྡན་འབྱོར་པ་ཀུན་བྱེད་པ། སྣ་ཚོགས་གཟུགས་ཅན་ཡིད་ལས་སྐྱེས་པ་ནམ་མཁའ་གང་བར་འཆར་རོ།། །།
རྨི་ལམ་གྱི་ཉམས་ངོ་སྤྲད་པ།
གཉིས་པ་རྨི་ལམ་གྱི་ཉམས་ངོ་སྤྲད་པ་ནི། ནཱ་རོ་པཎ་ཆེན་གྱིས། གཉིད་དང་རྨི་ལམ་གྱི་བར་ཤེད་ན། །གཏི་མུག་ཆོས་སྐུའི་ངོ་བོ་ཅན། །བརྗོད་མེད་འོད་གསལ་བདེ་བའི་ཉམས། །མིང་ཡང་འོད་གསལ་གྱི་གདམས་ངག་ཟེར། ཞེས་གསུངས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ། ཐེག་པ་ཆེན་པོ། ཤེར་ཕྱིར་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིང་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། རྨི་ལམ་དུ་ཡུལ་དྲག་གི་འོད་གསལ་སྣ་ཚོགས་ཤར་བའི་འོད་གསལ་དུ་ངོ་ཤེས་ཤིང་རྨི་ལམ་འོད་གསལ་དུ་ཟིན་པ་འབྱུང་ལ། དེ་ཡང་སྐབས་གང་དུ་ཟིན་ན་གཉིད་གཏུག་པོ་རྨི་ལམ་ཡང་མེད་པའི་ངང་ནས་གཉིད་སྲབ་པོར་སོང་སྟེ་རྨི་ལམ་རྨི་ཁའི་དུས་དང་། གཉིད་སད་ཁའི་དུས་དང་། གཉིད་དང་གཉིད་ཡུར་གྱི་མཚམས་གཉིད་འགྲོ་ཁའི་དུས་སུ་གཏི་མུག་ཆོས་ཉིད་ཀྱི་སྐུའི་ངོ་བོ་ཅན་འོད་གསལ་གྱི་ཡུལ་དྲུག་གི་སྣང་པ་དང་སྒོ་གསུམ་གྱི་ཉམས་མྱོང་སྣ་ཚོགས་འཆར་ཞིང་། དེ་ལྟར་ཤར་བ་ལ་ངོ་ཅུང་ཟད་འཕྲོད་པའི་རྣལ་འབྱོར་པས་འོད་གསལ་གྱི་རྣམ་འགྱུར་དུ་ཤེས་པ་ནི་འོད་གསལ་ཟིན་པ་ཡིན་ལ། དེ་ཉིད་ཀྱི་ངང་ལ་དགག་སྒྲུབ་མེད་པར་སྐྱོང་པ་ཡིན་ཏེ། བརྟག་གཉིས་ལས། གཉིད་ནི་སྤང་པར་མི་བྱ་སྟེ། དབང་པོ་རྣམས་ནི་མི་དག་གོ །ཞེས་པ་དང་། རྗེ་ཏཻ་ལོ་པས། སྣང་པ་དགག་སྒྲུབ་མི་བྱ་རང་སོར་ཞོག །སྤང་བླང་མེད་ན་ཕྱག་རྒྱ་ཆེན་པོར་གྲོལ། ཞེས་གསུངས་པའི་དོན་ནོ། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་བདེ་སྡུག་དང་དགའ་མི་དགའ་དང་། འཐད་མི་འཐད་ཐུག་མ་ཧྲེམ་སྣ་ཚོགས་སུ་འཆར་བ་སྟེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་རྨི་ལམ་གྱི་སྣང་པ་མཐད་པ་དགའ་བ་སྐྱིད་པ་བཀྲ་ཤིས་པ་གྱ་ནོམ་པ་ཕུན་སུམ་ཚོགས་པ། དགའ་ཆེན་རོལ་མོ་ཆེན་པོ་འཆང་བ། སྐུར་སྟི་རིམ་འགྲོ་ཕུན་སུམ་ཚོགས་པ། མཆོག་ཏུ་དགའ་བའི་གྲགས་བདག་དཔལ་ནམ་མཁའ་གང་བར་འཆར་ཏེ། མངོན་རྟོགས་བརྒྱན་ལས། རྨི་ལམ་ན་ཡང་ཆོས་རྣམས་ཀུན། རྨི་ལམ་ལྟ་བུར་ལྟ་ལ་སོགས། ཞེས་པ་དང་། རྣལ་འབྱོར་གྱི་དབང་ཕྱུག་ལ་ཝ་པའི་གཉིད་རྨི་ལམ་བཞིན་ནོ། །དེ་ལྟར་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ་ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་གྱི་ཡུལ་དྲུག་གི་རྨི་ལམ་དང་བཅས་པ་རྣམས་དོན་དམ་པའི་སེམས་སུ་ངོ་སྤྲད་པར་བྱའོ།། །།
ཡུལ་དྲུག་སྤྱིའི་འཇུག་བསྡུས་ཏེ་བསྟན་པ།
གསུམ་པ་ཡུལ་དྲུག་སྤྱིའི་འཇུག་བསྡུས་ཏེ་སྟན་པ་ནི། འབུམ་དང་ཉི་ཁྲི་སོགས་ལས། བཅོམ་ལྡན་འདས་ནི་གང་ནི་ཅི་ཡང་རུང་སྟེ། དེ་ཁོ་ན་ཉིད་གཞོལ་བ། དེ་ཁོ་ན་ཉིད་ལ་འབབ་པ། དེ་ཁོ་ན་ཉིད་ལ་མངོན་དུ་ཕྱོགས་པ། དེ་ཁོ་ན་ཉིད་སྟོན་པ། དེ་ཁོ་ན་ཉིད་གསལ་བར་བྱེད་པ་སྟེ། ཞེས་པ་དང་། རྗེ་བཙུན་དམ་པས། ཆོས་ཉིད་སྟོང་གསལ་སྐྱེ་འགག་མེད། །རིག་པ་དྲི་མ་མེད་པ་ཡིན། །ཆོས་ཐམས་ཅད་འདིའི་སྟེང་དུ་བྲུབས་པ་བཞིན་སྟོན་པ་ཡིན། གཅིག་ཤེས་ཀུན་ལ་མཁས་པ་ཡིན། ཀུན་ཤེས་འདི་ལ་སྡུག་པ་མང་། མི་གཅིག་པོའི་ཆོས་གཅིག་པོ། ཆོས་གཅིག་པུའི་གོ་ཆོད་པོ། ཞེས་བྱ་བ་ཡིན། ཞེས་པ་དང་། ཏིང་ངེ་འཛིན་གྱི་རྒྱལ་པོའི་མདོ་ལས། འཇིག་རྟེན་ཁམས་ནི་སྟོང་དག་ཏུ། །ངས་ནི་མདོ་སྡེ་མང་བཤད་པ། །ཚིག་འབྲུ་ཐ་དད་དོན་གཅིག་ཏེ། ཚིག་གཅིག་བསྒོམས་པར་བྱས་པས་ནི། །མདོ་སྡེ་མཐའ་དག་སྒོམ་དང་འདྲ། ཞེས་དང་། རྒྱལ་མཚན་དམ་པའི་མདོ་ལས། ཏིང་ངེ་འཛིན་བསམ་གྱིས་མི་ཁྱབ་པ། རྣལ་འབྱོར་སྤྱོད་པ་རྣམས་ལ་བཤད། དེ་དག་ཐམས་ཅད་དོན་གཅིག་སྟེ། སེམས་ཉིད་སྟོང་པར་འདུས་པར་བཤད། ཞེས་པ་དང་། གསང་བ་མཛོད་ཀྱི་མདོ་ལས། ཆུ་རྣམས་ཐམས་ཅད་རྒྱ་མཚོར་གཅིག །ཏིང་ངེ་འཛིན་སྣ་ཚོགས་ཐ་དད་པ། །ཆོས་ཀྱི་དབྱིངས་སུ་རོ་གཅིག་གོ །ཏིང་ངེ་འཛིན་དེ་ལྟར་ཤེས་པར་གྱིས། ཞེས་པ་དང་། རྗེ་ས་ར་ཧས། ས་དང་ལམ་དང་སངས་རྒྱས་ཐམས་ཅད་རོ་གཅིག་པའི་གཉུག་མའི་ཡེ་ཤེས་དེ་ཉིད་ཡིད་ཀྱིས་ཡིད་ལ་དྲིས། ཞེས་པ་དང་། རྗེ་ཏཻ་ལོ་པས། དེ་ལྟར་སེམས་ཀྱི་རང་བཞིན་ནམ་མཁའ་འདྲ། ཆོས་རྣམས་མ་ལུས་དེ་རུ་མ་འདུས་མེད། ཞེས་པ་དང་། བརྟག་གཉིས་ལས། དེ་ནི་སྔགས་ཟླས་དེ་ནི་དཀའ་ཐུབ་དེ་སྦྱིན་བསྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། མདོར་སྡུས་ན་ནི་སེམས་ནི་འདུས་པའི་གཟུགས་ཅན་ནོ། །ཞེས་སོགས་གསུངས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྤྲོས་བྲལ་དབུ་མའི་མིག་པའི་སྙིང་པོ་ལ་སོགས་པའི་དབང་པོ་དྲུག་དང་། མཐར་ཐུགས་ཐེག་པ་ཆེན་པོའི་གཟུགས་རྡོ་རྗེ་མ་ལ་སོགས་པའི་ཡུལ་དྲུག་དང་། སེམས་ཉིད་ཕྱག་རྒྱ་ཆེན་པོའི་མིག་གི་རྣམ་པར་ཤེས་པ་ལ་སོགས་པ་དྲུག་སྟེ། བདེ་གཤེགས་སྙིང་པོའི་ཁམས་བཅོ་བརྒྱད་མངོན་དུ་གྱུར་པ་ནི། ཆོས་དབྱིངས་བསྟོད་པ་ལས། མིག་དང་གཟུགས་ལ་རྗེན་ནས་ནི། །དྲི་མ་མེད་པའི་སྣང་བ་འབྱུང་། །སྐྱེ་མེད་འགག་པ་མེད་ཉིད་ལས། །ཆོས་ཀྱི་དབྱིངས་ནི་རབ་ཏུ་ཤེས། །སྒྲ་དང་རྣ་བ་ལ་རྟེན་ནས། །རྣམ་པར་དག་པའི་ཤེས་པ་གསུམ། །མཚན་ཉིད་མེད་པ་ཆོས་ཀྱི་དབྱིངས། །རྟོག་དང་བཅས་པ་ཐོས་པར་འགྱུར། །སྣ་དང་དྲི་ལ་རྟེན་ནས་སྣ་ཚོགས། །དེ་ནི་གཟུགས་སུ་མེད་པའི་དཔེ། །དེ་བཞིན་སྣ་ཡི་རྣམ་ཤེས་ཀྱི། །ཆོས་ཀྱི་དབྱིངས་ལ་རྟོག་པར་བྱེད། །ལྕེའི་རང་བཞིན་སྟོང་པ་ཉིད། །རོའི་ཁམས་ཀྱང་དབེན་པ་སྟེ། །ཆོས་ཀྱི་དབྱིངས་ཀྱི་ངོ་བོ་ཡིས། །རྣམ་པར་ཤེས་པ་གནས་མེད་པ། །དག་པའི་ལུས་ཀྱི་ངོ་བོ་དང་། །རེག་བྱའི་རྐྱེན་གྱི་མཚན་ཉིད་དག །རྐྱེན་དག་ལས་ནི་གྲོལ་གྱུར་པ། །ཆོས་ཀྱི་དབྱིངས་ཞེས་བརྗོད་པར་བྱ། །ཡིད་གཙོར་གྱུར་པའི་ཆོས་རྣམས་ལ། །རྟོག་དང་རྟག་པ་རྣམ་སྤངས་ནས། །ཆོས་རྣམས་རང་བཞིན་མེད་པ་ཉིད། །ཆོས་ཀྱི་དབྱིངས་སུ་བསྒོམས་པར་བྱ། །མཐོང་དང་ཐོས་དང་སྦོམ་པ་དང་། །མྱང་འདས་དང་རེག་པར་གྱུར་པ་དང་། །ཆོས་རྣམས་དེ་ལྟར་རྣལ་འབྱོར་པས། །ཤེས་ནས་མཚན་ཉིད་རྫོགས་པ་ཡིན། །མིག་དང་རྣ་བ་སྣ་དག་དང་། །ལྕེ་དང་ལུས་དང་དེ་བཞིན་ཡིད། །སྐྱེ་མཆེད་དྲུག་པོ་རྣམ་དག་པ། །འདི་ཉིད་དེ་ཉིད་མཚན་ཉིད་དོ། །ཞེས་པ་དང་། མེ་དང་འདྲ་བའི་རྣམ་རྟོག་གི་འགྱུ་བ་བསད་ན། དུ་བ་དང་འདྲ་བའི་ཆགས་སྡང་གི་འཁྲུལ་སྣང་རྒྱུན་ཆད་ནས། རྣལ་འབྱོར་པའི་ཉམས་མྱོང་འོད་གསལ་གྱི་ཡུལ་དྲུག་ལ་སྡོས་བཅས་ཀྱི་ཡུལ་དྲུག་གི་སྟོང་པར་སོ་སོ་རང་རིག་ལ་སྣང་པ་དང་། བསམ་པ་རྣམ་པར་དག་པའི་མདོ་ལས། འཇམ་དཔལ་གྱིས་གསོལ་པ། དགེ་སློང་རྣལ་འབྱོར་སྤྱོད་པའི་ཏིང་ངེ་འཛིན་སྒོམ་པའི་ཉམས་ཇི་ལྟར་ལེགས། བཀའ་སྩལ་པ། དཔེར་ན་ཐབ་ཀྱི་ནང་གི་མེ་བསད་ན་སྐར་ཁུང་གི་དུད་པ་འཆད་པ་བཞིན་དུ། སེམས་རིག་པ་སྟོང་པར་ཤེས་ན་གཟུགས་སྣང་སྟོང་དང་། སྒྲ་གྲགས་སྟོང་དང་། དྲི་ཚོར་སྟོང་དང་། རོ་མྱོང་སྟོང་དང་། རེག་བྱ་ཚོར་སྟོང་གི་ཉམས་འབྱུང་སྟེ། ནམ་མཁའ་མ་སྒྲིབས་ན་གསལ་ལོ། །ཆུ་མ་རྙོགས་དྭངས་སོ། །སེམས་མ་བཅོས་ན་བདེའོ། །དེ་ལ་འདི་སྐད་ཅེས་བྱ་སྟེ། སེམས་ངོ་ཤེས་པའི་རྣལ་འབྱོར་པས། ཇི་ལྟར་བྱས་ཀྱང་བསྒོམས་པའི་ངང་། །གཉུག་མའི་དོན་ལ་གནས་པ་ཡིན། ཏིང་ངེ་འཛིན་གྱི་ཉམས་སུ་བཤད། །ཅེས་པ་དང་། ཆོས་དབྱིངས་ཡེ་ཤེས་ཀྱི་ས་ལ་སོགས་པའི་འབྱུང་བ་དང་། མིག་ལ་སོགས་པའི་དབང་པོ་དང་། མིག་གི་རྣམ་པར་ཤེས་པ་ལ་སོགས་པའི་ཤེས་པ་དང་། གཟུགས་ལ་སོགས་པའི་ཡུལ་ཐམས་ཅད་དོན་དམ་ཆོས་ཀྱི་དབྱིངས་ཀྱི་འབྱུང་པ་དང་ཁམས་བཅོ་བརྒྱད་ཡིན་མོད་ཀྱིས་ཀྱང་། ཀུན་རྫོབ་སྡོས་བཅས་ཀྱི་འབྱུང་པ་དང་ཁམས་བཅོ་བརྒྱད་མ་ཡིན་ཏེ། ཀུན་རྫོབ་ཀྱི་སའི་མཚན་ཉིད་སྲ་བ་སོགས་དང་མིག་གི་མཚན་ཉིད་ཀུན་རྫོབ་ཀྱི་གཟུགས་ལ་ལྟ་བ་མ་ཡིན་ཞེས་པ་ལ་སོགས་པ་ཀུན་རྫོབ་ཀྱི་ཁམས་བཅོ་བརྒྱད་ཀྱི་མཚན་ཉིད་མ་ཡིན་པ་ཡང་། འཕགས་པ་བློ་གྲོས་མི་བཟད་པས་སྟན་པའི་མདོ་ལས། ཆོས་ཀྱི་དབྱིངས་སའི་ཁམས་ཡིན་མོད་ཀྱི། ཆོས་ཀྱི་དབྱིངས་སྲ་བའི་མཚན་ཉིད་ནི་མ་ཡིན་ནོ། ཆོས་ཀྱི་དབྱིངས་ཆུའི་ཁམས་ཡིན་མོད་ཀྱི། ཆོས་ཀྱི་དབྱིངས་བརླན་པའི་མཚན་ཉིད་ནི་མ་ཡིན་ནོ། །ཆོས་ཀྱི་དབྱིངས་མེའི་ཁམས་ཡིན་མོད་ཀྱི། ཆོས་ཀྱི་དབྱིངས་སྨིན་པར་བྱེད་པའི་མཚན་ཉིད་ནི་མ་ཡིན་ནོ། །ཆོས་ཀྱི་དབྱིངས་རླུང་གི་ཁམས་ཡིན་མོད་ཀྱི། ཆོས་ཀྱི་དབྱིངས་གཡོ་བར་བྱེད་པའི་མཚན་ཉིད་ནི་མ་ཡིན་ནོ། །ཆོས་ཀྱི་དབྱིངས་མིག་གི་ཁམས་ཡིན་མོད་ཀྱི། ཆོས་ཀྱི་དབྱིངས་ལྟ་བར་བྱེད་པའི་མཚན་ཉིད་ནི་མ་ཡིན་ནོ། །ཆོས་ཀྱི་དབྱིངས་རྣ་བ་དང་སྣ་དང་ལྕེ་དང་ལུས་དང་ཡིད་དང་མིག་གི་རྣམ་པར་ཤེས་པ།་སྣའི་རྣམ་པར་ཤེས་པ། ལྕེའི་རྣམ་པར་ཤེས་པ། ལོས་ཀྱི་རྣམ་པར་ཤེས་པ། ཡིད་ཀྱི་རྣམ་པར་ཤེས་པ་ཁམས་ཡིན་མོད་ཀྱི། ཆོས་ཀྱི་དབྱིངས་ཉན་པ་དང་སྣོོམ་པ་དང་། མྱང་བར་བྱེད་པ་དང་། ནོམ་པ་དང་། རྣམ་པར་རིག་པ་དང་། གཟུགས་རྣམ་པར་རིག་པ་དང་། སྒྲ་རྣམ་པར་རིག་པ་དང་། དྲི་རྣམ་པར་རིག་པ་དང་། རོ་རྣམ་པར་རིག་པ་དང་། རེག་བྱ་རྣམ་པར་རིག་པ་དང་། ཆོས་རྣམ་པར་རིག་པ་ཙམ་གྱི་མཚན་ཉིད་ནི་མ་ཡིན་ནོ། །ཆོས་ཀྱི་དབྱིངས་གཟུགས་ཀྱི་ཁམས་དང་། སྒྲ་དང་དྲི་དང་རོ་དང་རེག་བྱ་དང་ཆོས་ཀྱི་ཁམས་ཡིན་མོད་ཀྱི། མིག་གི་རྣམ་པར་ཤེས་པ་དང་། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པས་རྣམ་པར་རིག་པར་བྱ་བའི་མཚན་ཉིད་ནི་མ་ཡིན་ནོ། །ཞེས་པ་དང་། དེ་བཞིན་དུ་དོན་དམ་གྱི་ས་ཡིན་ཡང་ཀུན་རྫོབ་ཀྱི་སའི་མཚན་ཉིད་སྲ་བ་མེད་པའི་ཕྱིར། ཀུན་རྫོབ་ཀྱི་ས་མ་ཡིན་པ་དང་། དེ་བཞིན་དུ་དོན་དམ་གྱི་ཆུ་དང་མེ་དང་རླུང་ཡིན་ཀྱང་ཀུན་རྫོབ་ཀྱི་ཆུ་མེ་རླུང་གི་མཚན་ཉིད་བཤེར་བ་སྲེག་པ་གཡོ་བ་མེད་པའི་ཕྱིར། ཀུན་རྫོབ་ཀྱི་ཆུ་དང་མེ་དང་རླུང་མ་ཡིན་པ་དང་། དེ་བཞིན་དུ་དབང་པོ་ཡུལ་དང་བཅས་པའི་ཁམས་བཅོ་བརྒྱད་དོན་དམ་གྱི་ཆོས་ཀྱི་དབྱིངས་ཡེ་ཤེས་ཡིན་ཡང་། ཀུན་རྫོབ་ཀྱི་དབང་པོ་ཡུལ་དང་བཅས་པའི་ཁམས་བཅོ་བརྒྱད་ཀྱི་མཚན་ཉིད་རྫས་མེད་པའི་ཕྱིར། ཀུན་རྫོབ་ཀྱི་དབང་པོ་ཡུལ་དང་བཅས་པའི་ཁམས་བཅོ་བརྒྱད་མ་ཡིན་ཏེ། དཔལ་ལྡན་རྒྱུད་ལས། ས་ཡི་རྣམ་པ་སྲ་བ་མིན་ཞིང་ཞུ་བ་ཆུ་ལུས་ཁུ་བ་མིན་ཏེ་གཤེར་བ་ཉིད་མིན་ཕྱིར། མེའི་རྣམ་པ་མེ་མིན་གཡོ་བ་རླུང་གི་ལུས་ནི་གང་ཞིག་གཡོ་བ་མིན་པས་རླུང་མ་ཡིན། སྟོང་པའི་རྣམ་པ་ཡིན་ཡང་བལྟ་བྱ་དཀར་དང་ལྗང་དང་ཁ་དོག་སྣ་ཚོགས་ཆེན་པོ་ཁ་དོག་མིན། རྣམ་པ་ཀུན་ལྡན་ཡིན་ཡང་མཐོང་བ་མིན་ཏེ་རང་སྙིང་དྲི་མ་ཉོན་མོངས་བདུད་ཀྱི་མཐུ་ལས་སོ། །ཞེས་པ་དང་། དེའི་བཤད་པ་དྲི་མེད་འོད་ལས། ད་ནི་ས་ཞེས་པ་ལ་སོགས་པས་གཟུགས་ཀྱི་མཚན་ཉིད་གསུངས་ཏེ། འདིར་སྟོང་པར་རབ་ཏུ་སྣང་པས་རྫས་མེད་པ་སའི་རྣམ་པར་མཐོང་བ་སྟེ་སྲ་བ་མ་ཡིན་ནོ། །ཞུ་བ་ཆུའི་རྣམ་པ་ནི་སྨིག་རྒྱུའི་ཆུ་བཞིན་དུ་ཆུ་ཡང་མ་ཡིན་ཏེ་བཤེར་བ་ཉིད་མེད་པའི་ཕྱིར་རོ། །དེ་བཞིན་དུ་མེའི་རྣམ་པ་ནི་མ་ཡིན་ནོ། །གཡོ་བ་རླུང་གི་ལུས་ནི་རྫས་མེད་པའི་ཕྱིར་གང་ཞིག་གཡོ་བ་མེད་པ་དེ་ནི་རླུང་གི་མ་ཡིན་ནོ། །རྫས་མེད་པའི་ཕྱིར་སྟོང་པའི་རྣམ་པ་ཡིན་པ་དེ་ལྟ་ན་ཡང་མཐོང་དོ་། །སྒྱུ་མའི་གྲོང་ཁྱེར་བཞིན་དུ་དཀར་པོ་ལ་སོགས་པའི་ཁ་དོག་དང་ལྡན་ཡང་རྫས་མེད་པའི་ཕྱིར་ཁ་དོག་མ་ཡིན་ནོ། །རྣམ་པ་ཀུན་ལྡན་ཡིན་ཡང་དུས་ཐམས་ཅད་དུ་བྱིས་པ་རྣམས་ཀྱིས་མཐོང་བ་མིན་ནོ། །དེ་ཅིའི་ཕྱིར་ཞེ་ན། ཉོན་མོངས་བདུད་ཀྱི་མཐུ་ལས་སོ། །གཡོན་པ་དང་གཡས་པའི་རྩ་ལ་སྲོག་རབ་ཏུ་རྒྱུ་བ་ལས་སོ། །ཞེས་པ་ངེས་པའོ། །ཞེས་པ་དང་། དེ་བཞིན་དུ་རྡོར་སྙིང་འགྲེལ་པར་ཡང་། ངོ་བོ་ནི་རང་རིག་པར་བྱེད་པ་དེ་བཞིན་གཤེགས་པའི་ཡེ་ཤེས་ངོ་བོ་དེས་འཛིན་པར་བྱེད་པ་དང་བཟུང་བ་དང་འཛིན་པ་ཁམས་བཅོ་བརྒྱད་ཀྱི་རྣམ་འགྱུར་དང་བྲལ་བ་ཡིས་རྣལ་འབྱོར་པ་རྣམས་ཀྱི་ཕྱི་རོལ་གྱི་གཟུགས་མེད་མཐོང་བ་པོ་མེད་མིག་མེད་མིག་གི་རྣམ་པར་ཤེས་པ་མེད་དོ། །དེ་བཞིན་དུ་ཉན་པ་པོ་མེད་སྒྲ་མེད་རྣ་བའི་རྣམ་པར་ཤེས་པ་མེད་དོ། །དེ་བཞིན་དུ་དྲི་མེད་སྣོམ་པ་པོ་མེད་སྣའི་རྣམ་པར་ཤེས་པ་མེད་དོ། །དེ་བཞིན་དུ་རོ་མེད་མྱོང་པ་བོ་མེད་ལྕེའི་རྣམ་པར་ཤེས་པ་མེད་དོ། །དེ་བཞིན་དུ་རེག་བྱ་མེད་རེག་པ་བོ་མེད་ལུས་ཀྱི་རྣམ་པར་ཤེས་པ་མེད་དོ། །དེ་བཞིན་དུ་ཆོས་ཀྱི་ཁམས་མེད་འཛིན་པ་བོ་མེད་ཡིད་ཀྱི་རྣམ་པར་ཤེས་པ་མེད་དོ། །དེ་ལྟར་མིག་ལ་སོགས་པ་རྣམས་ཀྱང་ཡོད་པ་མ་ཡིན་ཏེ། དེ་ལྟར་ཁམས་བཅོ་བརྒྱད་བྲལ་བའི་དེ་ཁོ་ན་ཉིད་རིན་པོ་ཆེ་རྣལ་འབྱོར་པས་བསྒོམས་པར་བྱ་སྟེ། མ་རིག་པ་འགོག་པས་སོ། །ཞེས་པའོ། །དེ་ལྟར་ ཀུན་གཞི་རྣམ་ཤེས ་ཀྱི་རྣམ་པ་ཡུལ་དྲུག་གི་རང་བཞིན་ཁམས་བཅོ་བརྒྱད་འགགས་ཤིང་། ཀུན་གཞི་ཡེ་ཤེས་ཀྱི་སྣང་པ་ཡུལ་དྲུག་གི་རང་བཞིན་ཁམས་བཅོ་བརྒྱད་ཡེ་ནས་རང་ལ་བཞུགས་པ་མངོན་དུ་གྱུར་པ་དེ་དག་གི་ ཀུན་གཞི་ཡེ་ཤེས་ཀྱི་རྣམ ་འགྱུར་ཕྱག་རྒྱ་ཆེན་པོའི་རང་སྣང་ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་གྱི་ཡུལ་དྲུག་པ་ཐམས་ཅད་དོན་དམ་གྱི་སེམས་སུ་ངོ་སྤྲོད་པར་བྱའོ།། །།
སྒོ་གསུམ་གྱི་ཉམས་མྱོང་ངོ་སྤྲད་པ་ལ་གསུམ།
ལུས་ཀྱི་ཉམས་མྱོང་ངོ་སྤྲད་པ།
གཉིས་པ་སྒོ་གསུམ་གྱི་ཉམས་མྱོང་ངོ་སྤྲད་པ་ལ་གསུམ། ལུས་ཀྱི་ཉམས་མྱོང་ངོ་སྤྲད་པ་དང་། ངག་གི་ཉམས་མྱོང་ངོ་སྤྲད་པ་དང་། སེམས་ཀྱི་ཉམས་མྱོང་ངོ་སྤྲད་པའོ། །
དང་པོ་ལུས་ཀྱི་ཉམས་མྱོང་ངོ་སྤྲད་པ་ནི། རྣལ་འབྱོར་གྱི་ཉམས་ལ་ཅི་ཡང་འཆར་ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་དག་གི་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ལུས་ལ་སྔར་མེད་པའི་རྣམ་འགྱུར་ཟ་བ་དང་གཡའ་བ་དང་ཚ་བ་དང་ཤ་འཕྲིག་པ་མང་པོ་དང་བེར་བ་ལངས་པ་དང་སྤྱི་གཙུག་ལ་སོགས་པར་པགས་པ་འུབ་འདུས་པ་དང་། ཟས་བྲབས་པ་བཞིན་དུ་ཚ་བེར་དང་། ལུས་ཧ་ཅང་དྲང་པ་དང་། ཧ་ཅང་དྲོ་བ་དང་། ཧ་ཅང་འཇམ་པ་དང་། ཧ་ཅང་རྩུབ་དང་། ཧ་ཅང་ཡང་པ་དང་། ཧ་ཅང་ལྕི་བ་དང་། འདར་བ་དང་འཕར་བ་དང་། སྤྲུག་པ་དང་འཁྲབ་པ་དང་འཕྱོང་པ་དང་རྒྱུག་པ་དང་ཡན་ལག་ཕལ་ཆེར་སྐྱོད་པ་དང་། མགོ་དང་རྐང་ལག་རེ་རེ་སྐྱོད་པ་དང་འདར་བ་དང་མིག་དང་རྣ་བ་དང་སྣ་དང་ལྕེ་དང་ནང་རོལ་གློ་སྙིང་ལྟ་བུ་ཅི་རིགས་པ་འདར་བ་དང་འཕྲིག་པ་དང་། འགུལ་བ་དང་སྐྱོད་པ་དང་སྡེབས་པའི་ཉམས་མྱོང་ངང་གིས་འབྱུང་ཞིང་ལུས་གཡོ་འགུལ་མེད་པའི་ཉམས་ཀྱང་འབྱུང་སྟེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །དུས་འཁོར་རྒྱུད་འགྲེལ་ལས། རྒྱུག་པར་འདོད་མ། ཡན་ལག་སྐྱོད་པར་འདོད་མ། ཞེས་པ་དང་། བྲམ་ཟེ་ཆེན་པོ་ས་ར་ཧས། སྒྲུབ་ཐབས་རྒྱ་མཚོར། དེ་བཞིན་དུ་བསྒོམས་པས་འདར་བ་དང་གཡོ་བ་ལ་སོགས་པའི་ཡོན་ཏན་སྐྱེ་བར་འགྱུར་རོ། །ཞེས་པ་དང་། འདི་ལ་གོམ་པའི་སྦྱོར་བས་འདར་བ་དང་གཡོ་བ་དབབ་པར་བྱས་པས་གཉིས་སུ་མེད་པའི་ཡེ་ཤེས་སྐྱེ་བར་འགྱུར་རོ། །དེ་ལྟར་བུའི་རྣལ་འབྱོར་པ་དེ་གླང་པོ་ཆེ་སྙོན་པ་མྱོས་བྱེད་ཀྱི་ཆུས་མྱོས་པ་བཞིན་དུ་གྱུར་པ་སྟེ་དེའི་ཚེ་རིགས་ལྔ་ལ་ལོངས་སྤྱོད་པར་བྱའོ། །དེས་འགྲུབ་པར་འགྱུར་རོ། །གྲུབ་པར་གྱུར་ན་གཞན་གྱི་ལུས་ལ་ཡང་འདར་བ་དང་གཡོ་བ་དབབ་པར་བྱས་ངས་འདོད་ཆགས་དང་ཞེ་སྡང་ལ་སོགས་པ་འགག་པར་འགྱུར་རོ། །ཇི་ལྟར་གྲུབ་པའི་དངུལ་ཆུས་ཕུག་པས་ཟངས་མའི་ནག་པོ་སྤངས་པ་བཞིན་དུ་ལུས་པོ་ཉིད་ཀྱང་གཉིས་སུ་མེད་པའི་རོས་ཕུག་ནས། འདོད་ཆགས་དང་ཞེ་སྡང་ལ་སོགས་པ་སྤོང་བར་འགྱུར་རོ། །ཞེས་གསུངས་པའི་དོན་ཏེ། སྒོམ་པའི་སྟོབས་སྟོབས་ཀྱིས་དབང་བསྐུར་བའི་དུས་སུ་ཀུན་དུ་ཡེ་ཤེས་ཀྱི་ལྷ་ཞི་ཁྲོ་སྣ་ཚོགས་པ་ཕེབས་ཤིང་མངོན་དུ་གྱུར་པའི་སྒོ་གསུམ་གྱི་ཉམས་མྱོང་ནི། དྲི་མེད་འོད་ལས། ཁྲོ་བོའི་རྒྱལ་པོ་ཕེབས་ན་མཚོན་ཆས་མཛེས་པའི་ལག་པ་དག་གིས་བདུད་ཀྱི་ཚོགས་ལ་སྡིག་བྱེད་ཅིང་། ཞེས་པ་ནི་འདིར་སློབ་མ་ལ་ཁྲོ་བོའི་རྒྱལ་པོ་ཕེབས་པར་གྱུར་ན་མཚོན་ཆས་མཛེས་པར་བྱས་པའི་ལག་པ་དག་གིས་བརྟན་པ་དང་གཡོ་བ་གང་ལ་བསྣུན་པ་དེ་ཕྱེ་མ་བརྒྱར་བྱེད་དོ། །བདུད་ཀྱི་ཚོགས་ཆོས་ལ་འཚེ་བར་བྱེད་པ་གང་ལ་སྡིགས་འཛུབ་ཀྱིས་སྡིགས་པ་དེ་ས་ལ་འགྱེལ་བར་བྱེད་ཅིང་སེམས་པར་བྱཻད། དེ་བཞིན་དུ་གཡོན་བརྐྱང་ལ་སོགས་པ་སྟོབས་རྣམས་དང་ནི་རྣམ་མང་བྱེད་པ་རྣམས་ཀྱིས་རྡོ་རྗེའི་གར་བྱཻད། འདིར་སློབ་མ་གང་ཞིག་སྔར་གར་གྱི་མཚན་ཉིད་ཅུང་ཟད་ཀྱང་མི་ཤེས་པ་དེ་ཉིད་ཁྲོ་བོ་ཕེབས་པར་གྱུར་པ་ན་རྡོ་རྗེའི་གར་བྱེད་དོ། །བར་སྣང་ལ་ཡང་རྣམ་མང་བྱེད་པ་རྣམས་ཀྱིས་ཞེས་པ་གར་བྱེད་དོ། །ཅི་སྟེ་བཞད་པར་བྱེད་ན་དེའི་ཚེ་ཧཱུྃ་གི་ཡི་གེ་འདྲེས་པས་དགྲ་དེ་བདུད་ཀྱི་ཚོགས་ལ་འཇིགས་པ་སྟེར་བ་དང་ནི་དེ་བཞིན་སློབ་མ་གང་ཞིག་སྔར་མི་ཤེས་པ་དེ་ཁྲོ་བོ་ཕེབས་པ་ནི་མི་ལ་སོགས་པ་རྣམས་ཀྱིས་རྟོགས་པར་བྱ་བ་མ་ཡིན་པའི་སྒྲས་རྒྱུད་གཞན་དུ་མ་ལ་སོགས་གང་གསུངས་པའི་གླུ་བྱེད་དོ། །དེའི་ཕྱིར་ཁྲོ་བོའི་རྒྱལ་པོ་ཕེབས་པ་ནི་ངོ་ཚ་མེད་ཅིང་དོགས་པ་མེད་པར་འགྱུར་ཏེ་ཡོན་ཏན་དབང་གིས་ཞེས་པ་ཁྲོ་བོའི་རང་བཞིན་གྱིས་སོ། །ལྷ་གཞན་རྣམས་ཀྱང་ཞི་བའོ་ཞེས་པ་ནི་ཅི་སྟེ་སྤྱན་མ་ལ་སོགས་པའི་ལྷ་ཡིན་ན་ཞི་བའོ་ཞེས་པ་སྟེ་ཁྲོ་བོ་དབབ་པའི་ངེས་པའོ། །འདིར་ཡང་རྒྱ་ཆེར་གཞན་ཁྲོ་བོ་བཅུ་པོ་རྣམས་ཀྱི་རང་བཞིན་བཅུ་པོ་རྣམས་ནི་ཕྱག་རྒྱ་བཅིང་པས་རིག་པར་བྱས་སོ། །མཚན་མ་གང་གིས་གང་སྐྱེད་པ་དེ་ཡང་དེའི་ཕྱག་རྒྱར་འགྱུར་ཏེ་དེ་ནི་དེས་ཤེས་པར་བྱའོ། །ཞེས་པ་ངེས་པའོ། །ད་ནི་སྐུ་ཞེས་པ་ལ་སོགས་པས་ཁྲོ་བོའི་རྒྱལ་པོའམ་བྱང་ཆུབ་སེམས་དཔའི་སྐུ་ལ་སོགས་པས་བྱིན་གྱིས་བརླབས་པར་གསུངས་པ། འདིར་སྐུ་ཕེབས་པས་ནི་རྣལ་འབྱོར་ལྡན་པ་ཞེས་པ་ལྷའི་སྐུ་རྡོ་རྗེས་བྱིན་གྱིས་བརླགས་པར་གྱུར་ན་རང་བཞིན་ཡོན་ཏན་དབང་གིས་ཞེས་པ་དྲག་པོ་དང་ཞི་བའི་རང་བཞིན་གྱིས་སློབ་མ་སྐུའི་བྱ་བ་བྱེད་པ་སྟེ། ཇི་ལྟར་ཁྲོ་བོ་དང་བྱང་ཆུབ་སེམས་དཔའ་ནི་ནམ་མཁའ་ལ་འགྲོ་བ་དང་ས་འོག་ཏུ་འགྲོ་བར་མཛད་པ་དེ་བཞིན་དུ་སློབ་མས་བྱེད་ཅིང་དཀྱིལ་འཁོར་ལ་སོགས་པ་མ་མཐོང་པ་སྐྱེད་པར་བྱཻད་མཆོག་གི་ལྷའི་སྐུ་རྡོ་རྗེས་བྱིན་གྱིས་བརླབས་པར་གྱུར་པས་རི་བོ་འབྱིན་པ་ལ་སོགས་པ་སྐུའི་བྱ་བ་བྱེད་དོ། །དེ་བཞིན་དུ་གསུང་ཕེབས་པས་ནི་སྲིད་གསུམ་ལྷ་དང་ཀླུ་དང་ལྷ་མིན་རྣམས་ལས་རྣམ་པར་རྒྱལ་བའི་སྨྲ་བ་པོར་འགྱུར་ཏེ། ལྷའི་གསུང་རྡོ་རྗེས་བྱིན་གྱིས་བརླབས་པའི་སློབ་མ་རྨོངས་པ་ཡང་འཇམ་དཔལ་ཇི་ལྟ་བ་དེ་བཞིན་དུ་འགྱུར་རོ། །ཞེས་པ་ངེས་སོ། །དེ་བཞིན་དུ་མཆོག་གི་ལྷའི་ཐུགས་ཕེབས་པས་ནི་གཞན་གྱི་སྙིང་ལ་གནས་པ་ཐམས་ཅད་དང་། འདས་པ་དང་མ་འོངས་པ་དང་ད་ལྟར་བྱུང་བ་མ་ཐོང་པ་ཐམས་ཅད་སློབ་མས་ཤེས་པར་འགྱུར་ཞེས་པ་ཐུགས་ཕེབས་པའི་ངེས་པའོ། །ཅི་སྟེ་སྐྱེ་བ་སྔ་མའི་བག་ཆགས་ཀྱིས་ཁ་གཅིག་ལ་ཡེ་ཤེས་ཕེབས་པར་འགྱུར་ཏེ། དེའི་ཚེ་དཀྱིལ་འཁོར་ལ་འགྲུབ་པར་འགྱུར་ཞིང་སངས་རྒྱས་སུ་འགྱུར་རོ། །བླ་མ་ཡིན་ཡང་བླ་མ་ཞེས་པ་མངོན་པར་ཤེས་པ་ལྔ་ཐོབ་པ་དང་ས་བཅུའི་དབང་ཕྱུག་ཏུ་འགྱུར་རོ། །སངས་རྒྱས་ཞེས་པ་ནི་ཉེ་བར་བཏགས་པའི་ཚིག་སྟེ་རྫུ་འཕྲུལ་ལྡན་པའི་སྟོན་པ་གཅིག་པུ་ཞེས་པ་ཡང་དེ་བཞིན་ནོ། །སྐུ་དང་གསུང་དང་ཐུགས་དང་ཡེ་ཤེས་ཀྱིས་བྱིན་གྱིས་བརླབས་པའི་མཚན་ཉིད་ངེས་པའོ། །ད་ནི་ས་ཞེས་པ་ལ་སོགས་པས་བརྒྱན་ལ་སོགས་པ་རྣམས་ཀྱི་བྱིན་གྱིས་བརླབས་པ་གསུངས་པ་འདིར་གང་གི་ཚེ་ས་ཕེབས་པས་ནི་རྣལ་འབྱོར་པ་སྟེ་སློབ་མ་བྱིན་གྱིས་བརླབས་པར་གྱུར་པ་ན་རི་དང་མཚུངས་པར་འགྱུར་ཏེ་མི་བརྒྱ་ཕྲག་དུ་མས་ཀྱང་སྐྱོད་པར་མི་ནུས་སོ། །ཆུས་ཀྱང་བསིལ་བར་རབ་ཏུ་འགྱུར་ཏེ་འདིར་མཱ་མ་ཀཱིས་བྱིན་གྱིས་བརླབས་པའི་རྣལ་འབྱོར་པས་གང་ཞིག་བསྲེག་པའི་རིམས་ཀྱིས་བཟུང་པ་ལ་འཁྱུད་ན་ཡང་དེ་རིམས་དང་བྲལ་བར་འགྱུར་རོ། །མི་ཕེབས་པས་ནི་བསྲེག་པར་འགྱུར་ཏེ་འདིར་གང་གི་ཚེ་གོས་དཀར་མོས་བྱིན་གྱིས་བརླབས་པར་གྱུར་ན་དེའི་ཚེ་གང་ལ་རེག་པ་དེ་བསྲེག་པར་བྱེད་དོ། །ཅི་སྟེ་རླུང་ཕེབས་པས་བྱིན་གྱིས་བརླབས་ན་དེ་བཞིན་སྐམ་པ་དག་ཏུ་རབ་ཏུ་འགྱུར་ཏེ་གང་ལ་འཁྱུད་པ་དེ། དཔག་ཚད་དུ་མ་རྣམས་སུ་སྐྲོད་པར་བྱེད་དོ། །དེ་བཞིན་དུ་སྟོང་པ་ཕེབས་པས་མི་སྣང་པར་འགྱུར་ཏེ་གང་ལ་རེག་པ་དེ་དག་གི་མི་སྣང་པར་འགྱུར་ཏེ་ས་སྟེང་དུ་ནི་མཁའ་ལ་སྤྱོད་པ་ཉིད་དུ་རབ་ཏུ་འགྱུར། ཞེས་པ་ངེས་པའོ། །དེ་བཞིན་དུ་ཐམས་ཅད་རང་གཞན་ཡོན་ཏན་དབང་གིས་རིག་པར་བྱ་སྟེ་འདིར་གང་གི་ཚེ་ལྷའི་མིག་ཕེབས་པར་གྱུར་ན་དེའི་ཚེ་མཆོག་གི་གཟུགས་དང་མ་མཐོང་བའི་རྫས་ཀྱང་མཐོང་བར་འགྱུར་རོ། །གང་གི་ཚེ་ལྷའི་རྣ་བ་ཕེབས་པར་གྱུར་ན་དེའི་ཚེ་སེམས་ཅན་རྣམས་ཀྱི་སྒྲ་གང་གིས་མ་ཐོས་པ་དེ་དག་ཐོས་པར་འགྱུར་རོ། །གང་གི་ཚེ་ལྷའི་ཡིད་ཕེབས་པར་གྱུར་ན་དེའི་ཚེ་གཞན་གྱི་སེམས་ཤེས་པར་འགྱུར་རོ། །གང་གི་ཚེ་ལྷའི་ལུས་ཀྱི་དབང་པོ་ཕེབས་པར་གྱུར་ན་དེའི་ཚེ་ལྷའི་རེག་བྱ་འཛིན་པར་འགྱུར་ཞིང་སྔོན་གྱི་གནས་ཤེས་པར་འགྱུར་རོ། །གང་གི་ཚེ་ལྷའི་ལྕེ་ཕེབས་པར་གྱུར་ན་དེའི་ཚེ་ལྷའི་རོ་མྱོང་བར་འགྱུར་ཞིང་དེས་ནམ་མཁའི་རྫུ་འཕྲུལ་དུ་འགྱུར་རོ། །གང་གི་ཚེ་ལྷའི་སྣ་ཕེབས་པར་གྱུར་ན་དེའི་ཚེ་ལྷའི་དྲི་འཛིན་པར་འགྱུར་ཏེ་དེ་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །ཞེས་པ་ནི་ངེས་པའོ། །ཞེས་པའོ། །ལུས་ལ་འཁོར་ལོ་དྲུག་ནི་གཙུག་ཏོར། དཔྲལ་བ། མགྲིན་པ། ལྟེ་བ། གསང་གནས་ཀྱི་འཁོར་ལོའོ། །རྩ་དྲུག་ནི་ལྟེ་བ་ཡན་ལག་ཆད་ལ་གཡས་གཡོན་དབུ་མ་གསུམ་དང་། ལྟེ་བ་མན་ཆད་ལ་གཡས་གཡོན་དབུ་མ་གསུམ་སྟེ་དྲུག་གོ །རྩ་དྲུག་པོ་དེ་ལས་གྱེས་པ་ཡུལ་ཉི་ཤུ་རྩ་བཞི་དང་། དེ་ལས་གྱེས་པ་འཁོར་ལོ་དྲུག་གི་རྩ་བརྒྱ་ལྔ་བཅུ་རྩ་དྲུག་དང་། དེ་ལས་གྱེས་པ་རུས་པའི་ཚིགས་སུམ་བརྒྱ་དྲུག་ཅུའི་རྩ་བདུན་ཁྲི་ཉིས་སྟོང་ངོ་། དེ་ལ་རྩ་མདུད་པ་དང་རྩ་ཆད་པ་དང་རྩ་འཆུས་པ་རྣམས་ཀྱི་ནང་དུ་ཡེ་ཤེས་ཀྱི་རླུང་ཞུགས་པ་ན་རྩ་མདུད་གྲོལ་བ་དང་། ཆད་པ་སོས་པ་དང་། འཆུས་པ་སྲོངས་པའི་རྩ་ཟུག་དང་རླུང་གི་ཉམས་མྱོང་སྣ་ཚོགས་འཆར་རོ། །དཔྲལ་བ་ན་ལུས་ཀྱི་ཐིག་ལེ་སད་པས་དུས་ཀྱི་རྣམ་རྟོག་སྐྱེད་པར་བྱེད་པ་དང་། མགྲིན་པ་ན་ངག་གི་ཐིག་ལེ་རྨི་ལམ་གྱི་རྣམ་རྟོག་སྐྱེད་པར་བྱེད་པ་དང་། སྙིང་ཁ་ན་སེམས་ཀྱི་ཐིག་ལེ་གཉིད་སྟུག་གི་རྣམ་རྟོག་སྐྱེད་པར་བྱེད་པ་དང་། །ལྟེ་བ་ན་ཡེ་ཤེས་ཀྱི་ཐིག་ལེ་ཆགས་པའི་རྣམ་རྟོག་སྐྱེད་པར་བྱེད་པ་བཞི་ནི་བཅུ་དྲུག་ཕྱེད་ཕྱེད་ཐིག་ལེའོ། །དེ་ལས་ཕྱེ་བ་དགའ་བ་བཅུ་དྲུག་གི་རྟེན་དུ་གྱུར་པའི་ཐིག་ལེ་བཅུ་དྲུག་ནི། ལུས་ཀྱི་ལུས་ཀྱི་ཐིག་ལེ། ངག་གི་ལུས་ཀྱི་ཐིག་ལེ། སེམས་ཀྱི་ལུས་ཀྱི་ཐིག་ལེ། ཡེ་ཤེས་ཀྱི་ལུས་ཀྱི་ཐིག་ལེ་སྟེ་ལུས་ཀྱི་ཐིག་ལེ་བཞི་དང་། ལུས་ཀྱི་ངག་གི་ཐིག་ལེ། ངག་གི་ངག་གི་ཐིག་ལེ། སེམས་ཀྱི་ངག་གི་ཐིག་ལེ། ཡེ་ཤེས་ཀྱི་ངག་གི་ཐིག་ལེ་བཞི་དང་། ལུས་ཀྱི་སེམས་ཀྱི་ཐིག་ལེ། ངག་གི་སེམས་ཀྱི་ཐིག་ལེ། སེམས་ཀྱི་སེམས་ཀྱི་ཐིག་ལེ། །ཡེ་ཤེས་ཀྱི་སེམས་ཀྱི་ཐིག་ལེ་སྟེ་སེམས་ཀྱི་ཐིག་ལེ་བཞི་དང་། ལུས་ཀྱི་ཡེ་ཤེས་ཀྱི་ཐིག་ལེ། ངག་གི་ཡེ་ཤེས་ཀྱི་ཐིག་ལེ། སེམས་ཀྱི་ཡེ་ཤེས་ཀྱི་ཐིག་ལེ། ཡེ་ཤེས་ཀྱི་ཡེ་ཤེས་ཀྱི་ཐིག་ལེ་སྟེ་ཡེ་ཤེས་ཀྱི་ཐིག་ལེ་བཞིའོ། །དེ་ལྟར་ཐིག་ལེ་བཅུ་དྲུག་གོ །བཅུ་དྲུག་ཕྱེད་ཕྱེད་ཐིག་ལེ་དེ་ཉིད་ཡུལ་ཉི་ཤུ་རྩ་བཞིའི་རྩ་ལ་འཇུག་པའི་དབྱེ་བས་ཐིག་ལེ་ཉི་ཤུ་རྩ་བཞི་བ་ཚན་པ་བཞི་དང་། བཅུ་དྲུག་ཕྱེད་ཕྱེད་ཀྱི་ཐིག་ལེ་དེ་དག་གི་འཁོར་ལོ་དྲུག་གི་རྩ་བརྒྱ་ལྔ་བཅུ་རྩ་དྲུག་ལ་འཇུག་པའི་དབྱེ་བས་ཐིག་ལེ་བརྒྱ་ལྔ་བཅུ་རྩ་དྲུག་གི་ཚན་པ་བཞི་དང་། བཅུ་དྲུག་ཕྱེད་ཕྱེད་ཀྱི་ཐིག་ལེ་དེ་ཉིད་ཚིགས་སུམ་བརྒྱ་དྲུག་ཅུའི་རྩ་འཁོར་སུམ་བརྒྱ་དྲུག་ཅུའི་རྩ་བདུན་ཁྲི་ཉིས་སྟོང་ལ་འཇུག་པའི་དབྱེ་བས་ཐིག་ལེ་བདུན་ཁྲི་ཉིས་སྟོང་གི་ཚན་པ་བཞིའོ། །གསང་འདུས་རིམ་ལྔ་ལས། སེམས་ཅན་ཀུན་གྱི་སྲོག་གྱུར་པ། རླུང་ཞེས་བྱ་བས་ལས་ཀུན་བྱེད། ཞེས་པའི་དོན། ཏིང་ངེ་འཛིན་གྱི་སྟོབས་ཀྱིས་རྩ་ཇི་སྙེད་ཡོད་པ་དེ་སྲིད་དུ་རླུང་ཟིན། རླུང་ཟིན་པས་ཐིག་ལེ་ཟིན། ཐིག་ལེ་ཟིན་པས་བདེ་བ་ཟིན་ནས་འཁོར་ལོ་རྣམས་སུ་རིམ་གྱིས་རླུང་དང་ཐིག་ལེ་དང་བདེ་བ་འཕེལ་ཞིང་གང་བས། རླུང་གི་ཉམས་མྱོང་དང་ཐིག་ལེའི་ཉམས་མྱོང་དང་བདེ་བ་འདོད་ཆགས་གཏུམ་མོ་རྗེས་དྲན་གྱི་ཉམས་མྱོང་སྣ་ཚོགས་འཆར་རོ། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་ལུས་ཉམས་བདེ་མི་བདེ་དང་དགའ་མི་དགའ་དང་མཐོ་དམན་ཐུག་མ་ཧྲམ་སྣ་ཚོགས་སུ་འཆར་ཏེ་རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་ལུས་ཀྱི་ཉམས་མྱོང་ཐམས་ཅད་དགའ་བ་དང་བདེ་བ་སྐྱིད་པ་གྱ་ནོམ་པ་ཕུན་སུམ་ཚོགས་པ་རྫུ་འཕྲུལ་སྣ་ཚོགས་པའི་བདག་ཉིད་ནམ་མཁའ་གང་པར་འཆར་རོ། །འབུམ་དང་ཉི་ཁྲི་སོགས་ལས། ལུས་ཀྱི་སྐྱོན་ཡང་དག་པར་སེལ་བས་རབ་ཏུ་འདུལ་བ་ཞེས་བྱ་བའི་ཏིང་ངེ་འཛིན་ཡོད་དོ། །ཏིང་ངེ་འཛིན་དེས་ཞེས་པ་སྔར་གྱི་དེས་འགྲེའོ། །མདོར་ན་རྒྱུད་སྡེ་རྣམས་ནས་གསུངས་པའི་རྣལ་འབྱོར་པའི་ལུས་ཀྱི་བརྟུལ་ཞུགས་ཀྱི་སྤྱོད་པ་ཇི་སྙེད་ལུས་ཀྱི་ཉམས་མྱོང་ཡིན་ནོ།། །།
ངག་གི་ཉམས་མྱོང་ངོ་སྤྲད་པ།
གཉིས་པ་ངག་གི་ཉམས་མྱོང་ངོ་སྤྲད་པ་ནི། རྣལ་འབྱོར་གྱི་ཉམས་ལ་ཅི་ཡང་འཆར། ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཆེན་པོ། ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་དག་གི་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ཉིན་མཚན་ལ་སོགས་པ་སྦྲེལ་མར་སྨྲ་བརྗོད་སྣ་ཚོགས་པ་དང་། རྒོད་པ་ངུ་བ་དང་གླུ་ལེན་པ་དང་གསོལ་འདེབས་སྣ་ཚོགས་བྱེད་པ་དང་། དབྱངས་འཐེན་པ་དང་ཟློས་གར་སྣ་ཚོགས་བྱེད་པ་དང་ལ་སོགས་ཀ་སོགས་ཀྱི་སྔགས་སྣ་ཚོགས་བརྗོད་པ་དང་། རྒྱ་སྐད། ཧོར་སྐད་ཡུ་གུ་སྐད་སོགས་སྐད་འཁམས་སྐད་འབྲོག་སྐད་དབུས་སྐད་རྩང་སྐད་རྒྱ་གར་ཤར་ནུབ་ཀྱི་སྐད་བལ་པོའི་སྐད། ལྷའི་སྐད་ཀླུའི་སྐད་གནོད་སྦྱིན་གྱི་སྐད་ལ་སོགས་པ་སྐད་རིགས་མི་གཅིག་པ་སྣ་ཚོགས་བརྗོད་པ་དང་། མཛོ་དྷི་སྐད་བ་ལང་གི་སྐད་ར་ལུག་གི་སྐད་ཁྱི་ཕག་གི་སྐད་ཤ་བ་ལ་སོགས་པ་རི་དྭགས་ཀྱི་སྐད་ཇི་སྙེད་པ་དང་། སྟག་གཟིག་གི་སྐད་ལ་སོགས་གཅན་གཟན་ཇི་སྙེད་པ་དང་། བྱིའུ་དང་གོང་མོ་ལ་སོགས་པ་བྱ་ཇི་སྙེད་པ་དང་། ཆུ་རྟ་ཆུ་གླང་ལ་སོགས་པ་ཆུ་ལ་གནས་པའི་དུད་འགྲོའི་སྐད་ཀྱི་ལད་མོ་ཟློས་པ་དང་། ཆུ་སྒྲ་མེ་སྒྲ་རླུང་སྒྲ་ཆར་འབབ་པའི་སྒྲ་དང་། རྔ་བསྡུང་པའི་ཝང་རྫ་རྔ་ཕེག་རྡེབ་པ་ལ་སོགས་པ་རོལ་མོའི་སྒྲ་ཇི་སྙེད་པའི་ལད་མོ་ཟློ་བ་དང་། ཧཱུྃ་ཕཊ་྄ལ་སོགས་པ་དྲག་སྔགས་སྣ་ཚོགས་བརྗོད་པ་དང་། ཀོ་ལ་ཨི་རི་ཐི་ལ་སོགས་པ་རྒྱུད་ནས་བྱུང་པ་རྡོ་རྗེའི་གླུ་སྣ་ཚོགས་བརྗོད་པ་དང་། ཉིན་མཚན་མང་པོར་གཉིད་ཡང་མེད་པར་ཆོ་ངེ་དང་འོ་འདོད་དང་ཀུས་འདེབས་པ་མཐོ་དམན་བར་གསུམ་གྱི་འཚང་འབྲུ་བ་དང་། བར་བར་དུ་ངེས་འབྱུང་དང་སྐྱོ་ཤས་དང་སྒྱིད་ལུག་ཅིང་ཡིད་འབྱུང་པའི་ཚིག་སྣ་ཚོགས་དང་གཞན་ལ་སྟོད་ར་སྨད་ར་སྣ་ཚོགས་བྱེད་པ་དང་། ཆོས་ཀྱི་གཏམ་སྣ་ཚོགས་སྣང་བ་སོགས་འབྱུང་སྟེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མི་འགགས་ཀྱི་བར་དུ་ངག་ཉམས་ཀྱི་སྨྲ་བརྗོད་འཚང་འབྲུ་བ་དང་སྨད་ར་གཏོང་པ་དང་སྙིང་ལ་ཕོག་པའི་ཚིག་དང་བདེན་མི་བདེན་དང་སྙན་མི་སྙན་དང་ཐུག་མ་ཧྲེམ་སྣ་ཚོགས་སུ་འབྱུང་སྟེ། རྣལ་འབྱོར་པའི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་ཚིག་ཐམས་ཅད་དགའ་བ་བདེ་བ་ཕན་པ་བདེན་པ་བཀྲ་ཤིས་པ། གྱ་ནོམ་པ། ཕུན་སུམ་ཚོགས་པའི་ཚིག་དང་བརྡའ་དང་སྒྲ་ཐམས་ཅད་ཤེས་པ་ལ་འཇུག་པའི་ཚིག་དང་ངེས་པའི་ཚིག་ཐམས་ཅད་ཤེས་པ་ལ་འཇུག་པའི་ཚིག་དང་། ཚིག་བླ་དགས་ཐམས་ཅད་ཤེས་པ་ལ་འཇུག་པའི་ཚིག་དང་། མིང་ངེས་པར་ཤེས་པའི་ཚིག་དང་ཆོས་ཐམས་ཅད་ཀྱི་ཚིག་རབ་ཏུ་འབྱེད་པའི་ཚིག་དང་ཡེ་གེ་ཐམས་ཅད་རིག་པ་དང་འབྲེལ་བར་མཉམ་པའི་ཚིག་དང་སྒྲ་སྙན་ལྟ་བུ། རྟོག་བཅས་ཀྱི་ཡེ་གེ་དང་བྲལ་བའི་ཚིག་ཁོ་ན་འབྱུང་སྟེ། འབུམ་དང་ཉི་ཁྲི་སོགས་ལས། བརྡ་དང་སྒྲ་ལ་འཇུག་པ་ཞེས་བྱ་བའི་ཏིང་ངེ་འཛིན་དང་། ངེས་པའི་ཚིག་ལ་གདོན་མི་ཟ་བར་འཇུག་པའི་ཏིང་ངེ་འཛིན་དང་། ཚིག་བླ་དགས་ལ་ཡང་དག་པར་འཇུག་པའི་ཏིང་ངེ་འཛིན་དང་། མིང་ངེས་པར་འཇུག་པའི་ཏིང་ངེ་འཛིན་དང་། ཆོས་ཐམས་ཅད་ཀྱི་ཚིག་རབ་ཏུ་འབྱེད་པའི་ཏིང་ངེ་འཛིན་དང་། ཡི་གེ་མཉམ་པར་འགོད་པའི་ཏིང་ངེ་འཛིན་དང་། ཡིག་གེ་དང་བྲལ་བའི་ཏིང་ངེ་འཛིན་དང་། ངག་གི་སྐྱོན་རྣམ་པར་འཇིག་པས་ནམ་མཁའ་ལྟར་འགྱུར་བ་ཞེས་བྱ་བའི་ཏིང་ངེ་འཛིན་ཡོད་དོ། ཏིང་ངེ་འཛིན་དེས་རྣམ་པར་ཞེས་པ་སྔར་གྱི་དེས་འགྲེའོ། །ཞེས་པའི་དོན་ཏོ། །མདོར་ན་རྒྱུད་སྡེ་རྣམས་ལས་གསུངས་པའི་རྣལ་འབྱོར་པའི་ངག་གི་བརྟུལ་ཞུགས་ཀྱི་སྤྱོད་པ་ཇི་སྙེད་པ་དེ་སྙེད་ངག་གི་ཉམས་མྱོང་ཡིན་ནོ།། །།
སེམས་ཀྱི་ཉམས་མྱོང་ངོ་སྤྲད་པ།
གསུམ་པ་སེམས་ཀྱི་ཉམས་མྱོང་ངོ་སྤྲད་པ་ནི། ཀུན་ནས་སྒོའི་མདོ་ལས། འདོད་ཆགས་ཏིང་ངེ་འཛིན་དུ་རྟོགས་པར་བྱའོ། །ཞེ་སྡང་ཏིང་ངེ་འཛིན་དུ་རྟོགས་པར་བྱའོ། །གཏི་མུག་ཏིང་ངེ་འཛིན་དུ་རྟོགས་པར་བྱའོ། །དགེ་བ་ཏིང་ངེ་འཛིན་དུ་རྟོགས་པར་བྱའོ། །མི་དགེ་བ་ཏིང་ངེ་འཛིན་དུ་རྟོགས་པར་བྱའོ། །ཞེས་གསུངས་པའི་དོན་ནོ། །ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ་ཐེག་པ་ཆེན་པོ་ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པའི། དཀོན་མཆོག་ལ་དད་པའི་སེམས་དང་། འཁོར་བ་ལ་སྐྱོ་བའི་སེམས་དང་། སྡུག་བསྔལ་ལ་ཡིད་འབྱུང་བའི་སེམས་དང་། ཆོས་ལ་མོས་གུས་ཀྱི་སེམས་དང་། ཐར་པ་ལ་ཡིད་ཆེས་པའི་སེམས་དང་། འདུས་བྱས་ལ་མི་རྟག་པའི་འདུ་ཤེས་བློ་སྣ་ཐུང་པའི་སེམས་དང་། དག་སྣང་དང་བྱམས་སྙིང་རྗེ་ལ་སོགས་པ་ཡོན་ཏན་གྱི་སེམས་ལྷག་པར་ཤས་ཆེར་སོང་པ་དང་། འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་དང་ཕྲག་དོག་དང་སེར་སྣ་ལ་སོགས་པ་ཉོན་མོངས་པའི་སེམས་སྐྱོན་ཅན་ལྷག་པར་ཤས་ཆེར་སོང་བ་འབྱུང་སྟེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །གལ་ཏེ་མ་སྒོམ་པའི་དུས་སུ་ཆགས་སོགས་ཉོན་མོངས་ཀྱི་སེམས་སྣ་ཚོགས་འཆར་བ་དང་ཁྱད་ཅི་ཡོད་སྙམ་ན། དེ་དག་མི་འདྲ་བའི་ཁྱད་ནི། སྒོམ་པའི་དུས་སུ་སྒོམ་ཡུན་རིང་ཐུང་གི་བྱེ་བྲག་གིས་ཞོག་དང་ཟླ་བ་ལ་སོགས་པར་འདོད་ཆགས་ལ་སོགས་པ་རེ་རེས་སྣང་བ་ཁྱེར་ནས་ཡུན་རིང་སུ་སེམས་རེ་རེའི་ཕྱོགས་སུ་ཡོན་པོར་སོང་པ་འོང་ཞིང་ངོ་མ་འཕྲོད་ན་སྐྱོན་ཚབས་ཅན་དུ་འགྱུར་བ་ཡང་སྲིད་པས་བསྒོམས་པའི་ཉམས་ལ་སེམས་མཐོ་དམན་ཅན་སྐྱོན་ཡོན་གྱི་རྣམ་པ་ཅི་ཡང་འཆར་བ་ཡིན་སྙམ་དུ་ཤེས་པར་བྱས་ནས་ཆགས་སོགས་སྐྱོན་གྱི་དབང་དུ་མི་བཏང་ཞིང་། དད་སོགས་ཡོན་ཏན་གྱི་སེམས་གོང་ནས་གོང་དུ་ཅི་འཕེལ་བྱེད་པ་ཡིན་ནོ། །དེ་ལྟ་བས་ན་བསྒོམས་པའི་ཚེ་ཅི་ཞིག་ལྟར་ལ་ཤིན་ཏུ་ཚིག་པ་ཟ་བ་དང་སེམས་འཁྲུགས་པ་དང་ཡི་མུག་པ་དང་། སྡུག་བསྔལ་བའི་སྣང་བ་ཆེན་པོ་དང་། ཅི་ལའང་མི་དགའ་ཞིང་ཐམས་ཅད་ལ་ཁྲོ་བའི་སེམས་དང་། ཡིད་མི་བདེ་བ་དང་། ག་ཤེད་དུ་འཁྱམ་དུ་འགྲོ་བར་འདོད་པ་དང་། རང་ཉིད་ལ་ཡང་ཤིན་ཏུ་ཚིག་པ་ཟ་བ་དང་། གཉེན་ཚན་ལ་སོགས་པ་གསོད་པར་འདོད་པའི་སེམས་མ་རུངས་པ་སྣ་ཚོགས་པའི་ཉམས་འཆར་ཏེ་སྔར་བཞིན་ཤེས་པར་བྱའོ། །ཡང་ཅི་ཞིག་ལྟར་ལ་ཤིན་ཏུ་དགའ་བ་དང་སྐྱིད་པ་དང་ཡིད་བདེ་བ་དང་ཐམས་ཅད་སྙིང་ལ་འདོད་པ་དང་། ཡིད་དུ་འོང་པ་དང་། བློས་བཏང་མི་ནུས་པས་གར་ཡང་མི་འགྲོ་སྙམ་པ་དང་། གཉེན་ཚན་ལ་སོགས་པའི་སེམས་ཅན་ཐམས་ཅད་ལ་གཅེས་པར་འཛིན་པ་ལ་སོགས་འཐད་པའི་རྣམ་པ་འཆར་རོ། །འདས་མ་འོངས་ད་ལྟར་གྱི་དུས་གསུམ་དང་འབྲེལ་བའི་རང་གི་མདུན་མ་སྣ་ཚོགས་དང་། གཞན་གྱི་མདུན་མ་སྣ་ཚོགས་དང་རང་གཞན་གྱི་འཇིག་རྟེན་གྱི་མདུན་མ་དགྲ་འདུལ་ལུགས་སྣ་ཚོགས་དང་། གཉེན་སྐྱོང་ལུགས་སྣ་ཚོགས་དང་། ནོར་སྒྲུབ་ལུགས་ལ་སོགས་པ་མི་འཆར་བ་ཅི་ཡང་མཻད་རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །རང་གཞན་གྱི་ཆོས་ཕྱོགས་ཀྱི་མདུན་མ་སྣ་ཚོགས་བྱེད་ལུགས་དང་། དུས་རིང་པོས་བར་དུ་ཆོད་པའི་ཆུང་ངུའི་དུས་ནས་རང་གཞན་གྱི་བྱ་བྱེད་མང་པོ་དྲན་པ་དང་། རང་གཞན་གྱི་སྐྱེ་བ་སྣ་ཚོགས་ཐར་ཐོར་དྲན་པ་འབྱུང་ངོ་། །མདོར་ན་དུས་གསུམ་དང་འབྲེལ་བའི་རང་གཞན་གྱི་འཁོར་འདས་ཀྱི་རྣམ་འགྱུར་ལ་མི་དྲན་པ་དང་མི་འཆར་བ་ཅི་ཡང་མཻད། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །དཔལ་དུས་ཀྱི་འཁོར་ལོའི་རྒྱུད་འགྲེལ་ལས། གདོད་མ་སུམ་བཅུ་རྩ་དྲུག་དང་ཕྱིར་གདོད་མ་སུམ་བཅུ་རྩ་དྲུག་གི་ཉམས་མྱོང་འཆར་བར་གསུངས་པ་འདི་ལྟ་སྟེ། དབྱེ་བར་འདོད་པ་དང་། གོས་འདོད་པ་དང་། མཆི་མ་མ་འདོར་བར་འདོད་པ་དང་། རེག་བྱ་འདོད་པ་དང་། ལྷག་མ་ཟ་བར་འདོད་པ་དང་། དགུད་པར་འདོད་པ་དང་། བཀྲོད་པར་འདོད་པ་དང་། ལུས་ལ་འཕྲུག་པར་འདོད་མ་དང་། ཡན་ལག་སྐྱོད་པར་འདོད་པ་སྟེ་དགུ་དང་། དེ་ལས་ལྡོག་པ་ཕྱིར་འདོད་མ་དགུ་ནི་དབྱེ་བར་མི་འདོད་པ་ལ་སོགས་པ་དགུའོ། །དེ་ལྟར་འདོད་པ་དང་ཕྱིར་འདོད་པ་དགུ་གཉིས་བཅོ་བརྒྱད་ནི་ཤར་ཕྱོགས་ཀྱི་ལྷ་མོ་སྒྲོལ་མ་ལ་སོགས་པ་དགུས་བྱིན་གྱིས་བརླབས་པའོ། །བསྐྱེད་པར་འདོད་པ་དང་། ཟས་འདོད་པ་དང་། གར་འདོད་པ་དང་། འགུགས་པར་འདོད་པ་དང་། གཡུལ་འདོད་པ་དང་། རྒྱུག་པར་འདོད་པ་དང་། སྐེམས་པར་འདོད་པ་དང་། ལུས་ཀྱི་དྲི་མ་འདོད་པ་དང་། གཤང་གཅི་ཟ་བར་འདོད་པ་སྟེ་དགུ་དང་། དེ་ལས་ཟློག་པ་ཕྱིར་འདོད་པ་དགུ་ནི་སྐྱོང་པར་མི་འདོད་པ་ལ་སོགས་པ་དགུའོ། །དེ་ལྟར་འདོད་པ་དང་ཕྱིར་འདོད་པ་དགུ་གཉིས་བཅོ་བརྒྱད་ནི་ལྷོ་ཕྱོགས་ཀྱི་ལྷ་མོ་གོས་དཀར་མོ་ལ་སོགས་པ་དགུས་བྱིན་གྱིས་བརླབས་པའོ། །རྒྱས་པར་འདོད་པ་དང་། བརྒྱན་པར་འདོད་པ་དང་། རྒྱལ་སྲིད་འདོད་པ་དང་། འཆིང་པར་འདོད་པ་དང་། བྱིས་པ་སྡིགས་པར་འདོད་པ་དང་། རོལ་མོའི་སྒྲ་འདོད་པ་དང་། འཇམ་པར་འདོད་པ་དང་། མལ་སྟན་འདོད་པ་དང་། རྩོད་པ་མང་པོ་འདོད་པ་སྟེ་དགུ་དང་། དེ་ལས་ཟློག་པ་ཕྱིར་འདོད་པ་དགུ་ནི་རྒྱས་པར་མི་འདོད་པ་ལ་སོགས་པ་དགུའོ། །དེ་ལྟར་འདོད་པ་དང་ཕྱིར་འདོད་པ་དགུ་གཉིས་བཅོ་བརྒྱད་ནི་བྱང་ཕྱོགས་ཀྱི་ལྷ་མོ་མཱ་མ་ཀི་ལ་སོགས་པ་དགུས་བྱིན་གྱིས་བརླབས་པའོ། །རེངས་པར་འདོད་པ་དང་། དྲི་འདོད་པ་དང་། ཆུ་ལ་རྐྱལ་བར་འདོད་པ་དང་། ཕུར་བུས་འདེབས་པར་འདོད་པ་དང་། སྦྲུལ་འཆིང་པར་འདོད་པ་དང་། འཁྲིག་པ་འདོད་པ་དང་། གཉེན་ལ་མདུན་པར་འདོད་མ་དང་། མལ་ལ་གཉེ་བར་འདོད་མ་དང་། སེམས་བསླུ་བར་འདོད་པ་སྟེ་དགུ་དང་། དེ་ལས་ཟློག་པ་ཕྱིར་འདོད་པ་དགུ་ནི་རེངས་པར་མི་འདོད་པ་ལ་སོགས་པ་དགུའོ། །དེ་ལྟར་འདོད་པ་དང་ཕྱིར་འདོད་པ་ལ་སོགས་པ་དགུ་གཉིས་བཅོ་བརྒྱད་ནི་ནུབ་ཕྱོགས་ཀྱི་ལྷ་མོ་སྤྱན་མ་ལ་སོགས་པ་དགུས་བྱིན་གྱིས་བརླབས་པའོ། །དེ་ལྟར་སྲོག་གཅོད་པར་འདོད་པ་ལ་སོགས་པ་མི་དགེ་བ་དང་། སྲོག་གཅོད་སྤོང་བར་འདོད་པ་ལ་སོགས་པ་དགེ་བ་སྣ་ཚོགས་པའི་ཉམས་མྱོང་འཆར་རོ། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་ཟག་མེད་ཀྱི་ཉམས་མྱོང་མ་ཐོབ་པས་ཟག་བཅས་ཟག་མེད་འདྲེས་ཤིང་ཟག་བཅས་ཟག་མེད་རེས་འཇོག་ཏུ་སོང་པས་བདེ་མི་བདེ་དང་སྐྱོན་ཅན་སྐྱོན་མེད་དང་དགེ་མི་དགེ་དང་། ཕོག་ཐུག་ཡོད་མེད་དང་ཐུགས་མ་ཧྲེམ་སྣ་ཚོགས་སུ་འཆར་ཏེ། རྣལ་འབྱོར་གྱི་ཉམས་ལ་ཅི་ཡང་འཆར་བས་སོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་སེམས་ཀྱི་ཉམས་མྱོང་ཐམས་ཅད་དགའ་བ་དང་བདེ་བ་དང་སྐྱིད་པ་དང་། དགེ་བ་དང་བཀྲ་ཤིས་པ་དང་གྱ་ནོམ་པ་དང་། ཕུན་སུམ་ཚོགས་པ་དང་། ཏིང་ངེ་འཛིན་དང་། གཟུངས་ཀྱི་སྒོ་དུ་མ་དང་། སྤྱན་གྱི་མངོན་པར་ཤེས་པ་ལ་སོགས་པ་ཟག་མེད་ཀྱི་འབྱོར་པ་ནམ་མཁའ་གང་བར་འཆར་རོ། །དེ་ལྟར་སྒྲིབ་པའི་ས་བོན་འགགས་མ་འགགས་ཟག་མེད་ཀྱི་ཡོན་ཏན་ཐོབ་མ་ཐོབ་ལེགས་པར་ཕྱེ་ནས་སྒོ་གསུམ་གྱི་ཉམས་མྱོང་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོས་ཡོ་ལང་། འོད་གསལ་ཆོས་སྐུའི་རོལ་པ་ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་གྱི་རྣམ་འགྱུར་ཐམས་ཅད་དོན་དམ་གྱི་སེམས་སུ་ངོ་སྤྲད་པར་བྱའོ།། །།
འོད་གསལ་ལ་སོགས་པར་ངོ་སྤྲད་པ།
དེ་ཉིད་འོད་གསལ་དུ་ངོ་སྤྲད་པ།
གསུམ་པ་འོད་གསལ་ལ་སོགས་པར་ངོ་སྤྲད་པ་ལ་དྲུག་སྟེ། དེ་ཉིད་འོད་གསལ་དུ་ངོ་སྤྲད་པ་དང་། དེ་ཉིད་ཕྱག་ཆེན་དུ་ངོ་སྤྲད་པ་དང་། དེ་ཉིད་ཐེག་ཆེན་དུ་ངོ་སྤྲད་པ་དང་། དེ་ཉིད་དབུ་མར་ངོ་སྤྲད་པ་དང་། དེ་ཉིད་ཤེར་ཕྱིན་དུ་ངོ་སྤྲད་པ་དང་། དེ་ཉིད་ཡོན་ཏན་དུ་ངོ་སྤྲད་པའོ། །
དང་པོ་དེ་ཉིད་འོད་གསལ་དུ་ངོ་སྤྲད་པ་ནི། ཉི་མ་རབ་ཏུ་སྣང་བའི་མདོ་ལས། རྣལ་འབྱོར་ཞེས་བྱ་བ་གང་ཞེ་ན། སེམས་ཀྱི་རང་བཞིན་འོད་གསལ་བ་མ་བྱས་པ་མ་བཅོས་པ་མ་བསླད་པ་རྣལ་མ་དེ་ལ་བྱའོ། །སྤྱོད་པ་ཞེས་བྱ་བ་གང་ཞེ་ན། དེ་མ་ནོར་བར་ཉམས་སུ་ལེན་པ་ལ་བྱའོ། །དེ་ལྟར་ཉམས་སུ་ལེན་པ་དེ་ལ་ནི་དགེ་སློང་རྣལ་འབྱོར་སྤྱོད་པ་ཞེས་བྱའོ། །ཞེས་གསུངས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཆེན་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྣོད་བཅུད་ཀྱི་རྣམ་པ་ས་ཆུ་མེ་རླུང་ས་རྡོ་རི་བྲག །རྩི་ཤིང་ནགས་ཚལ་རིགས་དྲུག་གི་རྣམ་པ་ལུས་ལོངས་སྤྱོད་ཐམས་ཅད་སྡོས་བཅས་ཐོགས་བཅས་ཕན་ཚུན་སྒྲིབ་པར་བྱེད་པ་ནི་མ་ཡིན་གྱི། ཐམས་ཅད་འོད་ཀྱི་རང་བཞིན། འོད་ཀྱི་ངོ་བོ། འོད་ཀྱི་རྣམ་འགྱུར། འོད་ཀྱི་བྱེ་བྲག །འོད་ཀྱི་ཁྱད་པར། འོད་ཀྱི་རྣམ་པ། སྤྲོས་བྲལ་རང་བཞིན་པའི་སེམས། འོད་གསལ་བ་ཁོ་ན་ཡིན་ཏེ་རྒྱ་ཆེར་རོལ་པ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས། བདུད་རྩི་ལྟ་བུའི་ཆོས་གཅིག་ཁོ་བོས་རྙེད། ཞེས་པ་དང་། བརྒྱད་སྟོང་པ་ལས། སེམས་དེ་ནི་སེམས་མ་མཆིས་པ་སྟེ་སེམས་ཀྱི་རང་བཞིན་ནི་འོད་གསལ་བའོ། །ཞེས་པ་དོན་དམ་གྱི་སེམས་དེ་ནི་ཀུན་རྫོབ་ཀྱི་སེམས་མ་མཆིས་པའི་འོད་གསལ་ཡིན་ཞེས་པའི་དོན་ནོ། །འབུམ་དང་ཉི་ཁྲི་སོགས་ལ། འོད་ཟེར་རབ་ཏུ་འགྱེད་པ་ཞེས་བྱ་བའི་ཏིང་ངེ་འཛིན་དང་། དེ་བཞིན་དུ་འོད་མཐའ་ཡས་པའི་ཏིང་ངེ་འཛིན་དང་། འོད་བྱེད་པའི་ཏིང་ངེ་འཛིན་དང་། ཀུན་ཏུ་སྣང་བའི་ཏིང་ངེ་འཛིན་དང་། འོད་དྲི་མ་མེད་པའི་ཏིང་ངེ་འཛིན་དང་། སྣང་པ་གསལ་བའི་ཏིང་ངེ་འཛིན་དང་། སྣང་བ་བྱེད་པའི་ཏིང་ངེ་འཛིན་དང་། རྣམ་པ་ཐམས་ཅད་དུ་འོད་བྱེད་པ་ཞེས་བྱ་བའི་ཏིང་ངེ་འཛིན་ཡོད་ཏིང་ངེ་འཛིན་དེས་ཞེས་པ་སྔར་གྱིས་འགྲེའོ། །མཚན་བརྗོད་ལས། སྣ་བ་ཆེན་པོ་འོད་གསལ་བ། །འོད་ཆེན་སྣམ་པར་སྣང་བར་བྱེད། །ལག་ན་འོད་འབར་སྣང་བ་པོ། །གཟི་བརྗིད་ཆེན་པོ་འོད་གསལ་བ། ཞེས་པ་དང་། དབང་མདོར་སྟན་ལས། སྣ་ཚོགས་གཟུགས་སྙན་འོད་གསལ་བའོ། །ཞེས་པ་དང་། ནམ་མཁའ་ཆེ་རྒྱུད་ལས། འོད་གསལ་ནམ་མཁའ་ཆེན་པོ་ཉིད། །ཆོས་སྐུའི་རང་བཞིན་རྟོགས་གྱུར་ན། །དངོས་གྲུབ་ཡོད་དམ་མེད་ཀྱང་རུང་། །དེ་ཉིད་དངོས་གྲུབ་ཆེན་པོ་ཡིན། ཞེས་པ་དང་། རྒྱུད་རྡོ་རྗེ་ཕྲེང་བ་ལས། འོད་གསལ་གོ་འཕང་གསལ་བ་ནི། །ཤིན་ཏུ་རྣམ་དག་ཆོས་དབྱིངས་ཏེ། །གཉིས་སུ་མེད་པའི་ཡེ་ཤེས་མཆོག །རབ་ཏུ་སད་ཅིང་རབ་ཏུ་འཆར། ཞེས་པ་དང་། མ་ཧཱ་མ་ཡ་ལས། ཆོས་རྣམས་རང་བཞིན་འོད་གསལ་བ། །གདོད་ནས་དང་ཞིང་རྙོག་པ་མེད། ཞེས་པ་དང་། རྣམ་སྣང་མངོན་བྱང་ལས། ཆོས་རྣམས་གཟུགས་སྙན་ལྟ་བུ་སྟེ། །གསལ་ཞིང་དང་ལ་རྙོག་པ་མེད། །བཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །རྡོ་རྗེ་སེམས་དཔའ་མེ་ལོང་བཞིན། །གསལ་ཞིང་དག་ལ་དྲི་མ་མེད། །སངས་རྒྱས་ཀུན་བདག་ངོ་བོ་སྟེ། །བུ་ཁྱོད་ཀྱི་ནི་སྙིང་ལ་ཞུགས། ཞེས་འཁྲུལ་པས་བཟུང་དུ་མེད་པའི་འོད་གསལ་དེ་ཉིད་བཟང་པོ་སྤྱོད་པའི་རྒྱུད་ལས་ལས་མངོན་སུམ་དུ་བྱུང་ཞེས་པའི་དོན་ནོ། །རྒྱུད་བླ་མ་ལས། སེམས་དེའི་རང་བཞིན་འོད་གསལ་བས་ན་ཉོན་མོངས་ངོ་བོ་མེད་གཟིགས་པ། ཞེས་པ་དང་། ཆོས་དབྱིངས་བསྟོད་པ་ལས། དེ་བཞིན་ཉོན་མོངས་ཀྱིས་གཡོགས་པའི། ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། ཞེས་པ་དང་། ཚད་མ་རྣམ་འགྲེལ་ལས། སེམས་འདིའི་རང་བཞིན་འོད་གསལ་ཏེ། །དྲི་མ་རྣམས་ནི་བློ་བུར་བ། ཞེས་པ་དང་། རྗེ་ཏཻ་ལོ་པས། དེ་བཞིན་རང་རིག་འོད་གསལ་སྐད་ཅིག་གིས། བསྐལ་པར་བསགས་པའི་སྡིག་སྒྲིབ་མ་ལུས་སེལ། ཞེས་པ་དང་། དཔའ་བོ་ས་ར་ཧས། འོད་གསལ་པའི་ཆོས་དེ་ཉིད་ནི་དེས་མཐོང་ནས། །བླ་མའི་དུས་ཐབས་རྟེན་པ་དང་ནི་ཕྱིར་རྟོགས་པ། །ཤེས་རབ་ཕ་རོལ་ཕྱིན་འདི་མདོ་གཞན་ལས་རྙེད་ཅིང་། །ཀུན་ལ་སྦྱར་བའི་སེམས་འདི་རབ་ཏུ་སྒོམ་པར་བྱ། ཞེས་མདོ་རྒྱུད་ཀུན་གྱི་ངེས་དོན་འོད་གསལ་འདི་བསྒོམ་པར་བྱ་ཞེས་པའི་དོན་ཏོ། །རྗེ་ཤ་བ་རིས། དེ་ནང་འགྲོ་དྲུག་ལ་སོགས་དང་། །ཤིན་ཏུ་ཕྲ་བའི་སྤྲུལ་སྐུ་དང་། །ལོངས་སྐུ་དུ་མ་མཐོང་གྱུར་པ། །སྣ་ཚོགས་གཟུགས་སྙན་འོད་གསལ་ཡིན། ཞེས་པའོ། །དོན་དམ་ཆོས་སྐུ་དེ་ཉིད་འོད་གསལ་དུ་སྟོན་པའི་ལུང་རྣམ་དག་ནི་ཚད་མེད་པ་སྣང་ངོ་། །དེ་ལྟར་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། །ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན། འོད་གསལ་གྱི་གདངས་ཆེ་པོ། འོད་གསལ་གྱི་ཁྱ་བརྡལ་ཆེན་པོ་ཐམས་ཅད་དོན་དམ་གྱི་སེམས་སུ་ངོ་སྤྲད་པར་བྱའོ།། །།
དེ་ཉིད་ཕྱག་ཆེན་དུ་ངོ་སྤྲད་པ།
གཉིས་པ་དེ་ཉིད་ཕྱག་ཆེན་དུ་ངོ་སྤྲད་པ་ནི། ཕྱག་རྒྱ་ཆེན་པོ་བརྡའི་དོན་ལ་འཆར། ཡི་གེས་གོ་བ་མི་སྐྱེ་དིང་རེ་བ། ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་མན་ངག་ཟབ་མོའི་བརྡ་བྱེད་པ་བཅིང་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ཕྱག་རྒྱ་ཆེན་པོ་དོན་དམ་པའི་རྒྱལ་བ་རིགས་ལྔ་ལ་སོགས་པ་ལྷ་དང་སྔགས་དང་ཕྱག་རྒྱ་དང་མཚན་མ་དང་སྣོད་བཅུད་ལ་སོགས་པ་ཐམས་ཅད་ཡིན་ཏེ། མཚན་བརྗོད་ལས། ཕྱག་རྒྱ་ཆེན་པོའི་རིགས་མཆོག་དང་། ཞེས་པ་འདིའི་བཤད་པ་མགོན་པོ་སྤྱན་རས་གཟིགས་ཀྱིས་མཛད་པ་ནི་ལྷའི་ཚོགས་རྒྱས་གདབ་པའི་སླད་དུ། ཕྱག་རྒྱའི་རིགས་མི་སྐྱོད་པ་ལ་སོགས་པའོ། །ཞེས་གསུངས་པའི་དོན། ཆོས་ཉིད་ཀྱི་སྣོད་བཅུད་ཐམས་ཅད་ལ་ཕྱག་རྒྱ་ཆེན་པོའི་རིགས་ལྔས་རྒྱས་བཏབ་པ་ནི་ཆུ་བརླན་གྱིས་རྒྱས་བཏབ་པས་ཆུ་བརླན་ལས་མི་འདའ་བ་བཞིན་དུ་ཆོས་ཉིད་ཀྱི་སྣོད་བཅུད་ཐམས་ཅད་ཕྱག་རྒྱ་ཆེན་པོའི་རིགས་ལྔས་རྒྱས་བཏབ་པས་ཐམས་ཅད་ཕྱག་རྒྱ་ཆེན་པོའི་རིགས་ལྔ་ཡིན་པ་ལས་མི་འདའ་ཞིང་། ཕྱག་རྒྱ་ཆེན་པོ་རྒྱལ་བ་རིགས་ལྔ་ཡིན་ཞེས་པའོ། །ཕྱག་རྒྱ་ཆེན་པོ་ཐེག་ལེའི་རྒྱུད་ལས། ཕྱག་ནི་གཉིས་མེད་དྲི་མེད་ཡེ་ཤེས་ཏེ། རྒྱ་ནི་འཁོར་བའི་ཆོས་ལས་གྲོལ། ཆེན་པོ་ཟུང་དུ་འཇུག་པའོ། །ཞེས་པའི་དོན། ཆོས་ཀྱི་དབྱིངས་གཅིག་ཉིད་ཤེས་རབ་ཀྱི་ཆ་ནས་ཕྱག་རྒྱ་ཆེན་པོ་དང་། དེ་ཉིད་ཐབས་ཀྱི་ཆ་ནས་ཕྱག་རྒྱ་ཆེན་པོ་སྟེ། དེ་ཉིད་གཅིག་པུ་ཤེར་ཕྱིན་དང་། ཆོས་འབྱུང་དང་། སྣ་ཚོགས་ཡུམ་དང་། དུས་ཀྱི་འཁོར་ལོ་དང་། སྒྲིབ་པ་མེད་པའི་ཕུང་པོ་དང་། ཁམས་དང་སྐྱེ་མཆེད་དང་། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་། ཐམས་ཅད་མཁྱེན་པ་དང་། བཅོམ་ལྡན་འདས་ལ་སོགས་པ་དོན་དམ་འགོག་བདེན་ཟབ་མོའི་ཆོས་ཐམས་ཅད་ཡིན་ཏེ། དྲི་མེད་འོད་ལས། ཕྱག་རྒྱ་ཆེན་པོ་ནམ་ཐོས་ན་ཐམས་ཅད་ཀྱི་རང་བཞིན་མེད་པའི་མཚན་ཉིད་ཅན་རྣམ་པ་ཐམས་ཅད་ཀྱི་མཆོག་དང་ལྡན་པ་ཤེས་རབ་ཀྱི་ཕ་རོལ་དུ་ཕྱིན་མ་སངས་རྒྱས་ཐམས་ཅད་སྐྱེད་པར་མཛད་མའོ། །ཞེས་པ་དང་། དེ་ཕྱིར་ཆོས་འབྱུང་ནི་ཆོས་ཀྱི་དབྱིངས་ཀྱི་རང་བཞིན་ཅན་སྣ་ཚོགས་ཡུམ་བཅོམ་ལྡན་འདས་དུས་ཀྱི་འཁོར་ལོས་འཁྱུར་པ་དུས་ཐམས་ཅད་དུ་སྒྲིབ་པ་ཐམས་ཅད་དང་བྲལ་བའོ། །འདིར་ཆགས་པ་ནི་སྐྱེ་བའི་དུས་དང་འཕོ་བ་ནི་འགོག་པའི་དུས་ཏེ། དེ་དག་སྙོམས་པར་ཞུགས་པ་ནི་མི་འགྱུར་བའི་དུས་སོ། །དེའི་འཁོར་ལོ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྟེ། ཕུང་པོ་དང་ཁམས་དང་སྐྱེ་མཆེད་སྒྲིབ་པ་མེད་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཞེས་བརྗོད་དོ། །མི་འགྱུར་བ་ལས་སྐྱེས་པ་འདིས་མ་སྐྱེས་པའི་ཕྱག་རྒྱ་ཆེན་མོ་ལ་འཁྱུད་པའོ། །གང་ལ་ལ་ཞིག་སྐྱེ་བ་གཞན་གྱི་བག་ཆགས་ཀྱི་དབང་དང་བླ་མ་དམ་པའི་མན་ངག་གིས་དུས་དུ་མར་ཉིན་དང་མཚན་མོར་ཕྱག་རྒྱ་ཆེན་པོ་བཏགས་པའི་ཆོས་ཐམས་ཅད་དང་བྲལ་བ། རང་གི་སེམས་ཀྱི་སྣང་བ་ཙམ་རྣམ་པ་ཐམས་ཅད་ཀྱི་མཆོག་དང་ལྡན་པ་ཆེན་པོ་སྟོང་པ་ཉིད་ལྷན་གཅིག་སྐྱེས་པའི་དགའ་བ་སྐྱེད་པར་བྱེད་པ་འདི་མངོན་སུམ་དུ་བྱས་ནས་འཁྱུད་པར་བྱེད་པ་དེ་ནི་ཕྱག་རྒྱ་ཆེན་པོའི་དངོས་གྲུབ་ཐོབ་པས་ཐམས་ཅད་མཁྱེན་པ་བཅོམ་ལྡན་འདས་སོ། །ཞེས་པ་དང་། དེ་བཞིན་དུ་སྟོད་འགྲེལ་ལས། ཕྱག་རྒྱ་ཆེན་པོའི་བསྒོམ་པ་པྲ་ཕབ་པ་དང་སྒྱུ་མ་དང་མཚུངས་པ་སྤྲིན་མེད་པའི་ནམ་མཁའ་ལ་སྣང་པ་བཅོམ་ལྡན་འདས་ཀྱིས་གསུངས་སོ། །ཞེས་པ་དང་། དེ་བཞིན་དུ་དཔལ་ལྡན་རྒྱུད་ལས། ཕྱག་རྒྱ་སྒྱུ་མའི་རྗེས་སུ་འཐུན་པ་ཡིད་དང་ནམ་མཁའ་ལ་ནི་མེ་ལོང་དག་ལ་གཟུགས་བཞིན་ཏེ། །འཇིག་རྟེན་གསུམ་པོ་སྣང་བར་བྱེད་ཅིང་དྲི་མེད་གློག་དང་མཚུངས་པའི་འོད་ཟེར་དུ་མ་འཕྲོ་བར་བྱེད། ཕྱི་དང་ལུས་ལ་དབྱེར་མེད་ཡུལ་དང་རྣམ་པར་བྲལ་བ་སྣང་བ་སྣང་པ་ཙམ་ནི་མཁའ་ལ་གནས་པ་ཡི། སེམས་ལ་སེམས་ཀྱི་རང་བཞིན་འཁྱུད་པ་གང་ཞིག་འགྲོ་བ་ངུ་མའི་གཟུགས་ཅན་དེ་ནི་གཅིག་པུའོ། །ཞེས་པ་དང་། དེ་བཞིན་དུ་མགོན་པོ་སྤྱན་རས་གཟིགས་ཀྱིས། ཕྱག་རྒྱ་ཆེན་པོ་མི་འགྱུར་བདེ། བཟུང་དང་འཛིན་པ་དབྱིབས་དག་དང་། རྟོག་དང་བརྗོད་པ་རྣམ་པར་སྤངས། དྲི་ཟའི་གྲོང་ཁྱེར་རྣམ་པ་དང་། པྲ་ཕབ་པ་ཡི་རང་བཞིན་ཅན། ཤེས་རབ་ཐབས་ཀྱི་བདག་ཉིད་སྦྱོར། ཨེ་ཝཾ་འགྱུར་མེད་དེ་ལ་འདུད། ཞེས་པ་དང་། ཕྲ་རབ་རྡུལ་གྱི་ཆོས་ཉིད་འདས། པྲ་ཕབ་པ་ཡི་རང་བཞིན་ཅན། རྣམ་པ་ཀུན་གྱི་མཆོག་ལྡན་མ། ཕྱག་རྒྱ་ཆེན་མོ་དེ་ལ་འདུད། ཞེས་པ་དང་། དཔའ་བོ་ས་ར་ཧས། སྣང་པ་སྣ་ཚོགས་ཕྱག་རྒྱ་འདི་ནི་ལྟད་མོ་ཆེ། ཞེས་པ་དང་། རྗེ་ཏཻ་ལོ་པས། ཕྱག་རྒྱ་ཆེན་པོའི་གནད་ཀྱི་མན་ངག་འདི། འགྲོ་བ་སྐལ་ལྡན་སྙིང་ལ་གནས་པར་ཤོག །ཞེས་གསུངས་པ་རྣམས་ཀྱི་དོན། ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོས་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ཡིན་པས། ཕྱག་རྒྱ་ཆེན་པོའི་གདངས་ཆེན་པོ། ཕྱག་རྒྱ་ཆེན་པོའི་ཀློང་ཆེན་པོ། ཕྱག་རྒྱ་ཆེན་པོའི་ཁྱབ་བརྡལ་ཆེན་པོ་ཐམས་ཅད་དོན་དམ་གྱི་སེམས་སུ་ངོ་སྤྲད་པར་བྱའོ།། །།
དེ་ཉིད་ཐེག་ཆེན་དུ་ངོ་སྤྲད་པ།
གསུམ་པ་དེ་ཉིད་ཐེག་ཆེན་དུ་ངོ་སྤྲད་པ་ནི། སློབ་དཔོན་དབྱི་གཉེན་གྱིས་གནོད་འཇོམས་ལས། ཕ་རོལ་དུ་ཕྱིན་པ་ལ་སོགས་པའི་ཆོས་རྣམས་རྣམ་པར་སྨིན་པའི་བདག་ཉིད་དུ་གྱུར་པའི་ཆོས་ཀྱི་སྐུས་བསྡུས་པའི་ཕ་རོལ་དུ་ཕྱིན་པ་དྲུག་ལ་སོགས་པ་དག་ཐེག་པ་ཆེན་པོ་དེ་ཉིད་དུ་བསྟན་ཏོ། །ཞེས་གསུངས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲག་ཉམས་སུ་བླངས་པའི་ཚེ་མངོན་དུ་གྱུར་པ་ནི། ཐེག་པ་ཆེན་པོའི་ངོ་བོ་ཟག་མེད་ཆོས་སྐུའི་ཕུང་པོ་ནི་ཕ་རོལ་དུ་ཕྱིན་པ་ཐམས་ཅད་དང་། གཟུངས་ཀྱི་སྒོ་ཐམས་ཅད་དང་། ཏིང་ངེ་འཛིན་ཐམས་ཅད་དང་། བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་དང་། སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། མཚན་དཔེ་ལ་སོགས་པ་རྣམ་པར་བྱང་པའི་ཆོས་ཐམས་ཅད་ཐེག་པ་ཆེན་པོ་ཡིན་ཞིང་། དེ་ལྟར་བུའི་ཐེག་པ་ཆེན་པོ་དེས་འཇིག་རྟེན་ཟིལ་གྱིས་མནན་ནས་རྣམ་མཁྱེན་དུ་འབྱུང་པ་ཡང་། འབུམ་དང་ཉི་ཁྲི་སོགས་ལས། ཐེག་པ་ཆེན་པོ་འདི་ནི་ལྷ་དང་། མི་དང་ལྷ་མ་ཡིན་དུ་བཅས་པའི་འཇིག་རྟེན་ཟིལ་གྱིས་གནན་ངེས་པར་འབྱུང་བས་དེའི་སླད་དུ་ཐེག་པ་ཆེན་པོ་ཞེས་བགྱི་པ་དང་། ཐེག་པ་ཆེན་པོ་འདི་ནི་ནམ་མཁའ་དང་སྙམ་པ་དང་། ཐེག་པ་ཆེན་པོ་འདི་ནི་སེམས་ཅན་དཔག་ཏུ་མེད་པའི་སྒོ་འབྱེད་པ་དང་། ཐེག་པ་ཆེན་པོ་འདི་ལ་འགྲོ་འོང་གནས་པ་མེད་པ་དང་། ཐེག་པ་ཆེན་པོ་འདི་ལ་སྔོན་དང་ཕྱི་མའི་མཐའ་དང་དབུས་མི་དམིགས་ལེགས་སོ། །ཞེས་པ་དང་། དེ་བཞིན་དུ་བསྡུད་པ་ལས། ཅི་ཕྱིར་འདི་ནི་བྱང་ཆུབ་ཐེག་ཆེན་བྱ་ཞེ་ན། དེ་གང་ཞོནས་སེམས་ཅན་ཐམས་ཅད་མྱ་ངན་ཟློ། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། དགའ་སྐྱིད་བདེ་བ་མངོར་པར་ཐོབ་བྱེད་ཐེག་པའི་མཆོག །ཞེས་པ་དང་། དེ་བཞིན་དུ་མདོ་སྡེ་བརྒྱན་ལས། དམིགས་པ་ཆེ་བ་ཉིད་དང་ནི། དེ་བཞིན་སྒྲུབ་པ་གཉིས་དག་དང་། ཡེ་ཤེས་བརྩོན་གྲུས་རྩོམ་པ་དང་། ཡང་དག་འགྲུབ་པ་ཆེ་བ་དང་། སངས་རྒྱས་ཕྲིན་ལས་ཆེན་པོ་སྟེ། ཆེན་པོ་བདུན་དང་ལྡན་པའི་ཕྱིར། ཐེག་ཆེན་ཞེས་ནི་མངོན་པར་བརྗོད། ཞེས་པའི་དོན། ཆོས་ཐམས་ཅད་ལ་དམིགས་ནི་དམིགས་པ་ཆེ་བ་དང་། དོན་གཉིས་སྒྲུབ་པ་ནི་སྒྲུབ་པ་ཆེ་བ་དང་། ཆོས་ཐམས་ཅད་ལ་བདག་མེད་པར་རྟོགས་པ་ནི་ཡེ་ཤེས་ཆེ་བ་དང་། བསྐལ་པ་གྲངས་མེད་པ་གསུམ་དུ་བརྩོན་གྲུས་རྩོམ་པ་ནི་བརྩོན་གྲུས་ཆེ་བ་དང་། བསམས་བཞིན་སྲིད་པ་ལེན་ཡང་སྲིད་པའི་སྐྱོན་གྱིས་མ་གོས་པ་ནི་ཐབས་ལ་མཁས་པ་ཆེ་བ་དང་། སྟོབས་བཅུ་ལ་སོགས་པ་ཡང་དག་པར་འགྲུབ་པ་ནི་འགྲུབ་པ་ཆེ་བ་དང་། མཛད་པ་བཅུ་གཉིས་ནི། སངས་རྒྱས་ཕྲིན་ལས་ཆེན་པོ་སྟེ། བདུན་པ་དེ་ཆུ་དང་བརླན་བཞིན་དབྱེར་མེད་དུ་ལྡན་པའི་རྒྱུ་མཚན་གྱིས་ཐེག་ཆེན་ཡིན། ཞེས་པའོ། །དཔའ་བོ་ས་ར་ཧས། བསམ་དུ་མེད་པའི་རང་བྱུང་ཡེ་ཤེས་གང་བསྒོམས་པ། དེས་ནི་འབྲས་བུ་མ་ལུས་བསྒོམས་པར་གྱུར་པ་ཡིན། ཐེག་པ་ཆེན་པོ་བླ་མེད་སྙིང་པོའི་ལམ་འདི་ནི། འབྲས་བུ་ལམ་དུ་བྱེད་པས་གདོད་ནས་འབྲས་བུར་གནས། ཞེས་པ་དང་། དེ་བཞིན་དུ་བདུན་ལྡན་གྱི་ཐེག་པ་ཆེན་པོ་དེ་ཉིད། ནི་གུ་ཆོས་དྲུག་ལས་ཀྱང་། གང་ཞིག་བརྗོད་བྲལ་ལྷུན་གྲུབ་འདུས་མ་བྱས། ཁ་སྦྱོར་བདེ་ཆེན་ལོངས་སྐུ་གང་འདུལ་འཆར། སྐུ་གསུམ་བདུན་ལྡན་རྡོ་རྗེ་འཆང་ཆེན་གྱིས། ཐེག་ཆེན་སྐྱེ་མེད་རང་སྒྲ་འདི་སྐད་ཐུས། ཞེས་གསུངས་པ་རྣམས་ཀྱི་དོན་ ཀུན་གཞི་ཡེ་ཤེས་ཀྱི་རྣམ ་འགྱུར་ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་སངས་ཆེན་པོ། དབུ་མ་དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོས་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ཡིན་པས། ཐེག་པ་ཆེན་པོའི་རང་གཟུགས། ཐེག་པ་ཆེན་པོའི་ཀློང་ཆེན། ཐེག་པ་ཆེན་པོའི་ཁྱབ་བརྡལ་ཆེན་པོ། ཐམས་ཅད་དོན་གྱི་སེམས་སུ་ངོ་སྤྲད་པར་བྱའོ།། །།
དེ་ཉིད་དབུ་མར་ངོ་སྤྲད་པ།
བཞི་པ་དེ་ཉིད་དབུ་མར་ངོ་སྤྲད་པ་ནི། འཇམ་དཔལ་གྱི་རང་གི་ལྟ་བའི་འདོད་པ་མདོར་སྟན་པར། དྲི་མེད་འོད་ལས། ཡོད་མིན་མེད་མིན་ཡོད་མེད་མིན། གཉིས་ཀའི་བདག་ཉིད་མིན་པའང་མིན། མཐའ་བྲལ་ལས་ནི་རྣམ་གྲོལ་བའི། དེ་ཉིད་དབུ་མ་པ་ཡིས་རིག །ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ་བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྤྲོས་པའི་མཐའ་ཐམས་ཅད་དང་བྲལ་བའི་དབུ་མ་ཡིན་ལ། དེའང་རྟག་ཆད་གཉིས་ལས་འདས་པའི་རྣམ་པར་དག་པའི་སེམས་ཟབ་ཞི་སྤྲོས་བྲལ་འོད་གསལ་འདུས་མ་བྱས་ཡིན་ཏེ། དུས་འཁོར་གྱི་རྩ་རྒྱུད་ལས། ཡོད་དང་མེད་ལས་རྣམ་པར་འདས། གཉིས་མེད་དངོས་དང་དངོས་མེད་ཟད། སྟོང་ཉིད་སྙིང་རྗེ་དབྱེར་མེད་པ། རྡོ་རྗེའི་རྣལ་འབྱོར་བདེ་བ་ཆེ། ཕྲ་རབ་རྡུལ་གྱི་ཆོས་ཉིད་འདས། སྟོང་པའི་ཆོས་ནི་རྣམ་པར་སྤངས། རྟག་དང་ཆད་ལས་རྣམ་པར་གྲོལ། རྡོ་རྗེའི་རྣལ་འབྱོར་རིགས་མེད་པ། ཞེས་པ་ནི་མཐའ་ཐམས་ཅད་དང་བྲལ་བའི་དབུ་མ་ནི། རྡོ་རྗེ་རྣལ་འབྱོར་བདེ་བ་ཆེན་པོ་དོན་དམ་བདེན་པ་ཁོ་ན་ཡིན་ནོ། །མཐའ་དང་སྤྲོས་པ་ཐམས་ཅད་ནི་ཀུན་རྫོབ་ཁོ་ན་ཡིན་ནོ། །དེ་ལ་མཐའ་གཉིས་ནི། ཡོད་མེད་ཀྱི་མཐའ་དང་དངོས་པོ་དངོས་མེད་ཀྱི་མཐའ་དང་སྟོང་མི་སྟོང་གི་མཐའ་དང་། རྟག་ཆད་ཀྱི་མཐའ་གཉིས་ལ་སོགས་པའོ། །མཐའ་བཞི་ནི། ཡོད་པའི་མཐའ་དང་མེད་པའི་མཐའ་དང་ཡོད་མེད་གཉིས་ཀའི་མཐའ་དང་གཉིས་ཀ་མ་ཡིན་པའི་མཐའ་འོ། །མཐའ་བརྒྱད་ནི། འགག་པའི་མཐའ་དང་སྐྱེ་བའི་མཐའ་དང་ཆད་པའི་མཐའ་དང་། རྟག་པའི་མཐའ་དང་། འོང་བའི་མཐའ་དང་། འགྲོ་བའི་མཐའ་དང་། དོན་ཐ་དད་པའི་མཐའ་དང་། དོན་གཅིག་པའི་མཐའ་འོ། །འཇིག་རྟེན་ཆོས་བརྒྱད་ཀྱང་མཐའ་བརྒྱད་དོ། །མདོར་ན་ ཀུན་གཞི་རྣམ་ཤེས ་ཀྱི་ཡོ་ལང་རྟོག་གེའི་ཐ་སྙད་རྟོག་པའི་སྤྲོ་སྡུ་འཁོར་བའི་རྒྱ་མཚོ་ཀུན་རྫོབ་ཀྱི་གཉིས་ཆོས་ཐམས་ཅད་སྐྱོན་གྱི་ངོ་བོར་གྱུར་པའི་དམིགས་པ་དང་། མཐའ་དང་། སྤྲོས་པ་ཁོ་ན་ཡིན་ནོ། དེང་བྲལ་བའི་དོན་དམ་བདེན་པ་ཀུན་གཞི་ཡེ་ཤེས་ཕྱག་རྒྱ་ཆེན་པོ། ཐེག་པ་ཆེན་པོ། བདེ་གཤེགས་སྙིང་པོ། མྱང་འདས་ཆེན་པོ། ཤེར་ཕྱིན་ཟབ་མོ། དོན་དམ་བྱང་ཆུབ་སེམས་ཆོས་ཀྱི་དབྱིངས། སྐུ་བཞི་ཡེ་ཤེས་ལྔའི་རོལ་པ་ཐམས་ཅད་སྐྱོན་མེད་དབུ་མའི་དམིགས་པ་དང་། སྐྱོན་མེད་དབུ་མའི་ཡང་དག་པའི་མཐའ་དང་། སྐྱོན་མེད་དབུ་མའི་སྤྲོ་སྡུ་ཕུན་སུམ་ཚོགས་པ་ཁོ་ན་ཡིན་ནོ། །དྲི་མེད་འོད་ལས། རྟག་པ་དངོས་པོ་ཆད་པ་དངོས་པོ་མེད་པ་སྟེ་དེ་དག་གང་ལ་མེད་པ་དེ་ནི་རྡོ་རྗེ་ཅན་ཏེ་རྣམ་པར་དག་པའི་སེམས་སོ། །ཞེས་པའི་དོན་ཏོ། །ཞེས་པ་དང་། བཅོམ་ལྡན་འདས་རྣམ་པར་དག་པའི་སེམས་ཀྱི་བདག་ཉིད་ཡོད་མིན་མེད་མིན་ཡོད་མེད་གཉིས་ཀའི་བདག་ཉིད་མིན་པའང་མིན་པ་ཁམས་ཀྱི་སྟོན་པ་གཅིག་པུ་དེ་ནི། ཞེས་པ་དང་། འཕགས་པ་ཀླུ་སྒྲུབ་ཀྱིས། གཞན་ལས་ཤེས་མིན་ཞི་བ་དང་། སྤྲོས་པ་རྣམས་ཀྱིས་མ་སྤྲོས་པ། དོན་གཅིག་མིན་དོན་ཐ་དད་མིན། དེ་ནི་དེ་ཉིད་མཚན་ཉིད་དོ། །ཞེས་པ་དང་། དོན་བཞིན་དུ་དྲི་མེད་འོད་ལས། མི་རྟག་པ་མིན་རྟག་པའང་མིན། གཅིག་མིན་དུ་མའི་མཚན་ཉིད་མིན། དངོས་མིན་དངོས་པོ་མེད་པའང་མིན། འདི་ནི་རྟེན་བྲལ་ཆོས་སྐུའོ། །ཞེས་པ་དང་། ཡོད་མིན་མེད་མིན་ཡོད་མེད་མིན། གཉིས་ཀའི་བདག་ཉིད་མིན་པའང་མིན། །མཐའ་བཞི་ལས་ནི་རྣམ་གྲོལ་བའི། བདེ་ཆེན་སྐུ་ལ་ཕྱག་འཚལ་ལོ་ཞེས་པ་དང་། དེ་བཞིན་དུ་དབུ་མ་རྩ་ཤེ་ལས། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། ཆད་པ་མེད་པ་རྟག་མེད་པ། འོང་པ་མེད་པ་འགྲོ་མེད་པ། ཐ་དད་དོན་མིན་དོན་གཅིག་མིན། སྤྲོས་པ་ཉེར་ཞི་ཞི་སྟན་པ། རྫོགས་པའི་སངས་རྒྱས་སྨྲ་རྣམས་ཀྱི། དམ་པ་དེ་ལ་ཕྱག་འཚལ་ལོ། ཞེས་པའི་དོན། གྲུབ་མཐའ་སྨྲ་བ་རྣམས་ཀྱི་མཆོག་གམ་དམ་པ་སངས་རྒྱས་གང་གིས་དགག་བྱ་སྤྲོས་པ་བརྒྱད་ཉེ་བར་ཞི་ཞིང་། དགག་གཞི་སྤྲོས་པ་ཞི་བར་གྱུར་པའི་ཆོས་དབྱིངས་དབུ་མ་སྟན། ཞེས་པའོ། །དེ་བཞིན་དུ་དྲི་མེད་འོད་ལས། དེ་ནས་ཐིག་ལེ་སྟོང་པ་འགྱུར་མེད་དྲུག །ཅེས་པ་ནི་འདིའི་རྟེན་དུ་གྱུར་པའི་ཆོས་སངས་རྒྱས་ཀྱི་གཟུགས་ཀྱི་མཚན་ཉིད་ཁམས་གསུམ་དང་དུས་གསུམ་པོ་ཐམས་ཅད་དུ་འཇུག་པའོ། །འདིའི་འགོག་པའི་ཕུང་པོ་ལ་སོགས་པ་དྲུག་དང་ཁམས་གསུམ་བཅུ་རྩ་དྲུག་དང་འགྱུར་བའི་ཡེ་ཤེས་སུམ་བཅུ་རྩ་བདུན་པོ་སྟེ། འདི་རྣམས་སྒྲིབ་པ་མེད་པ་ཉིད་ནི་ཆོས་སྐུ་ཆོས་འབྱུང་དུ་བརྗོད་ཅིང་། རྡོ་རྗེ་བཞི་ནི་འགྱུར་མེད་ལྔ་སྟེ་འདི་དག་གི་སྤྲུལ་པའི་སྐུ་རྫུ་འཕྲུལ་སྣ་ཚོགས་སྟོན་པར་བྱེད་པའོ། །ཆོས་སྟོན་པ་པོའི་སྒྲ་ནི་ལོངས་སྤྱོད་རྫོགས་པའོ། །དེའི་ཕྱིར་གཅིག་དང་དུ་མ་དག་ཀྱང་ཅིག་ཅིང་མཉམ་དང་མི་མཉམ་པ་ཞེས་པ་ལ་སོགས་པས་དབུ་མ་པའི་གྲུབ་པའི་མཐའ་འོ། །ཞེས་པ་དང་། དེ་བཞིན་གཤེགས་པ་རྡོ་རྗེ་སེམས། བྱང་ཆུབ་སེམས་དཔའ་སེམས་དཔའ་ཆེ། །དམ་ཚིག་སེདཾར་གསུངས་པ་གང་། །དངོས་པོ་དངོས་མེད་ཟད་པའི་གཙོ། །ཐོག་མཐའ་མེད་ཅིང་ཞི་བ་ཡི། །བྱང་ཆུབ་སེམས་དེ་ལ་ཕྱག་འཚལ། ཞེས་པ་དང་། དེ་བཞིན་དུ། འཕགས་པ་ཀླུ་སྒྲུབ་ཀྱིས། དོན་དམ་བྱང་ཆུབ་སེམས་ཀྱི་བསྟོད་པ་ལས། གཟུངས་རྣམས་དང་ནི་ས་རྣམས་དང་། །སངས་རྒྱས་ཕ་རོལ་ཕྱིན་གང་དག །དེ་དག་བྱང་ཆུབ་སེམས་ཀྱི་ཆར། །ཀུན་མཁྱེན་རྣམས་ཀྱིས་གསུངས་པ་ཡིན། ཞེས་པའི་དོན། སྤྲོས་པ་མཐའ་དག་དང་བྲལ་བའི་དབུ་མའི་དོན་དམ་བྱང་ཆུབ་ཀྱི་སེམས་དེ་ཉིད་ཡོན་ཏན་གང་དང་གང་ཡིན་པའི་ཆ་ནས། ཡོན་ཏན་དེང་དེའི་མིང་གིས་གསུངས་ཞེས་པ་ཡིན་ཏེ། སེམས་དཔའ་བཞི་ཡིན་པའི་ཆ་ནས་རྡོ་རྗེ་སེམས་དཔའ་ཞེས་སོགས་ཀྱི་མིང་དང་། གཟུངས་དང་ས་དང་ཕ་རོལ་དུ་ཕྱིན་པ་ཡིན་པའི་ཆ་ནས་གཟུངས་ཞེས་པའི་མིང་དང་ས་དང་པོ་གཉིས་པ་ཞེས་པའི་མིང་དང་། སྦྱིན་པའི་ཕ་རོལ་དུ་ཕྱིན་པ་ཞེས་སོགས་ཀྱི་མིང་གི་དུས་གསུམ་གྱི་སངས་རྒྱས་ཀུན་མཁྱེན་རྣམས་ཀྱིས་གསུངས་པ་ཡིན་ནོ། །དེས་ན་དབུ་མ་བྱང་ཆུབ་ཀྱི་སེམས་དེ་ཉིད་ཡོན་ཏན་ཚད་མེད་པའི་ངོ་བོ་ཡིན་པའི་ཕྱིར། ཡོན་ཏན་དེང་དེའི་ཆ་ནས་གསུངས་པའི་མིང་ཡང་ཚད་མེད་ཅིང་ཤིས་ལུགས་ལ་དོན་དམ་དབུ་མ་བྱང་ཆུབ་ཀྱི་སེམས་གཅིག་པུ་འདི་ཉིད་ཡིན་ཏེ། མཚན་བརྗོད་ལས། མིང་ཡང་ཆེ་ཞིང་རྒྱ་ཆེ་བ། །དོན་གཅིག་གཉིས་མེད་ཆོས་ཀྱི་དོན། །ཞེས་གསུངས་པ་ཡིན་ནོ། དེ་ལྟར་མཐའ་བྲལ་སྤྲོས་མེད་ཀྱི་དབུ་མ་ནི། ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། དབུ་མ་ཆེན་པོའི་གདངས་ཆེན་པོ། དབུ་མ་ཆེན་པོའི་ཀློང་ཆེན་པོ། དབུ་མ་ཆེན་པོའི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།
དེ་ཉིད་ཤེར་ཕྱིན་དུ་ངོ་སྤྲད་པ།
ལྔ་པ་དེ་ཉིད་ཤེར་ཕྱིན་དུ་ངོ་སྤྲད་པ་ནི། བསྡུད་པ་ལས། ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། ཞེས་པ་དང་། སྤྱོད་འཇུག་ལས། ཡན་ལག་འདི་དག་ཐམས་ཅད་ནི། ཐུབ་པས་ཤེས་རབ་དོན་དུ་གསུངས། དེའི་ཕྱིར་ན་སྡུག་བསྔལ་དག །ཞི་བར་འདོད་པས་ཤེས་རབ་སྐྱེད། ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་པ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། དཔལ་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། ཡེ་ཤེས་དེ་ནི་དེ་བཞིན་གཤེགས། ཞེས་པའི་དོན། ཤེར་ཕྱིན་ནི་གཉིས་སུ་མེད་པའི་ཡེ་ཤེས་དང་། དེ་བཞིན་གཤེགས་པ་དང་། དེ་བཞིན་ཉིད་དང་། ཆོས་ཀྱི་དབྱིངས་ལ་སོགས་པ་རྣམ་པར་བྱང་པའི་ཡེ་ཤེས་ཟག་མེད་ཆོས་སྐུའི་ཕུང་པོ་ནམ་མཁའ་གང་བ་ཡིན་ཏེ། ཉི་ཁྲི་ལས། ཀེའུ་ཤི་ཀ་དེ་ནི་འདི་ལྟར་ཆོས་ཀྱི་དབྱིངས་དང་། ཤེས་རབ་ཀྱི་ཕ་རོལ་དུ་ཕྱིན་པ་ལ་གཉིས་སུ་མཻད་གཉིས་སུ་བྱར་མེད་དོ། །ཞེས་པ་དང་། ཤེར་ཕྱིར་གྱི་མཚན་བརྒྱ་རྩ་བརྒྱད་པར་ཡང་། རྣམ་མཁྱེན་དང་། ཡང་དག་པའི་མཐའ་དང་། དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད། བདེན་པ་དང་། དེ་ཁོ་ན་དང་། ཡང་དག་པའི་མཐའ་དང་། ཕྱིན་ཅི་མ་ལོག་པ་ཉིད་དང་། ཆོས་ཉིད། ཆོས་ཀྱི་དབྱིངས་དང་། ཆོས་ཀྱི་གནས་ཉིད། ཆོས་མི་འགྱུར་བ་ཉིད། ཆོས་སྐྱོན་མེད་པ་ཉིད། ཞེས་པ་ལ་སོགས་པ་ཤེར་ཕྱིན་གྱི་དོན་གཅིག་ཡོན་ཏན་བརྒྱ་རྩ་བརྒྱད་ཀྱི་སྒོ་ནས་མཚན་གྱི་རྣམ་གྲངས་བརྒྱ་རྩ་བརྒྱད་ཀྱིས་སྟན་པ་དང་། དེ་བཞིན་དུ་མཚན་གྱི་རྣམ་གྲངས་བཞན་ཡང་། འཇམ་དཔལ་ཞལ་གྱི་ལུང་ལས། རྣམ་གྲངས་དག་ཀྱང་རབ་ཏུ་བསྟན། དེ་བཞིན་ཉིད་དང་ཡང་དག་མཐའ། བསམ་གྱིས་མི་ཁྱབ་པ་ཡི་དབྱིངས། ཆོས་ཉིད་དང་ནི་ཆོས་སྐྱོན་མེད། སྟོང་པ་ཉི་དང་མཚན་མ་མེད། སྨོན་པ་མེད་པ་ཉིད་དང་ཡང་། ཉོན་མོངས་འཁྲུལ་འཁོར་འབོར་བྱེད་པ། སྐྱེ་བ་མེད་དང་འོད་གསལ་བ། མངོན་པར་བྱང་ནི་ཆུབ་པ་དང་། གཞན་གྱི་སེམས་ཤེས་བྱེད་པ་དང་། ལྷའི་རྣམ་བ་བྱེད་པ་དང་། རང་བཞིན་ལྷའི་མིག་སྟེར་དང་། རྫུ་འཕྲུལ་དཔག་མེད་འཕྲུལ་བྱེད་པ། དངོས་པོ་མཐར་ནི་ཕྱིན་པ་དང་། དོན་དམ་པ་ཡི་བདེན་པ་དང་། རྫོགས་པ་ཡི་ནི་རིམ་པ་དང་། ཡོངས་སུ་དག་པའི་སྐུ་གཙང་ལ། ཀུན་གྱི་རྟེན་པ་ཉིད་དག་དང་། མཁའ་ལྟར་རྣམ་པར་དག་པ་དང་། བློ་བུར་དྲི་མས་མི་གོས་དང་། གདོད་ནས་དག་པ་གསལ་བ་ཉིད། གང་གིས་ཀྱང་ནི་མི་ཤིགས་དང་། དངོས་པོ་མེད་ལ་མདོ་རྒྱུད་རྣམས། དེ་འདྲ་1རྣམས་པ་མཐའ་ཡས་པ། གསུང་ཞིང་ཡང་དག་གསུང་འགྱུར་པ། དེ་ནི་དེ་བཞིན་ཉིད་འདི་ལས། གཞན་ནི་ཅི་ཡང་མ་གསུངས་སོ། །ཞེས་དང་། བདག་པོ་རྡོ་རྗེ་འཆང་བ་མཆོག །རྫོགས་པའི་རིམ་པའི་རྣལ་འབྱོར་པ། བྱ་བ་བྱས་པ་བྱེད་པ་བྱས། དབང་ཕྱུག་ཆེན་པོ་ཁུར་ཆེན་པོར། སེམས་མ་དཀྲུགས་པ་ཐམས་ཅད་མཁྱེན། སྐྱེས་བུ་དཔའ་བོ་ཅང་ཤེས་པ། གླང་པོ་ཆེན་པོ་དུལ་བ་པོ། འཁོར་བའི་མཐའམ་ཕ་རོལ་སོན། དོན་དམ་དང་ནི་ཀུན་རྫོབ་ཀྱི་བདེན་པ་གཉིས་མེད་རྣལ་འབྱོར་ཆེ། ཐ་བ་སྤངས་པ་ལམ་ཀུན་རྫོགས། ཡོན་ཏན་འབྱུང་གནས་ཀུན་ཏུ་བཟང་། ཐམས་ཅད་འདུས་པའི་ཁོ་ན་ཉིད། ལུས་སོགས་ཁམས་ཀུན་འགགས་པའོ། གོང་ན་མེད་པ་ཡང་དག་གནས། དེ་ལ་དེ་སོགས་རབ་གྲགས་པ། མིང་ནི་རྣམ་པ་མཐའ་ཡས་པ། གཉིས་མེད་ཡེ་ཤེས་མཚོན་པ་སྟེ། མདོ་དང་རྒྱུད་རྣམས་ཐམས་ཅད་དུ། བློ་ལྡན་རྣམས་ཀྱིས་རྟོགས་པར་བྱ། ཞེས་པ་དང་། དེ་བཞིན་དུ་འཕགས་པ་ཀླུ་སྒྲུབ་ཀྱིས་རིམ་ལྔར། སྒྲ་གང་སྐྱེ་མེད་ལ་སོགས་པ། །གཉིས་མེད་ཡེ་ཤེས་བསྟོན་པ་རྣམས། །ཐམས་ཅད་འདིའི་ཚིག་ཡིན་ཏེ། །དེར་ནི་གཞན་དག་མེད་པར་བཤད། ཞེས་པ་དང་། དེ་བཞིན་དུ་ཁང་པ་བརྩེགས་པའི་གཟུངས་ལས། དེ་བཞིན་ཉིད་དང་། སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད། ཕྱི་མའི་མཐའ་སྟོང་པ་ཉིད་དང་། ཆོས་ཀྱི་དབྱིངས་རང་གི་ངོ་བོ་གང་ཡིན་པ་འདི་ནི་འདིར་ཤེས་རབ་ཀྱི་ཕ་རོལ་དུ་ཕྱིན་པའོ། །ཞེས་པ་དང་། དེ་བཞིན་དུ། ཤེར་ཕྱིན་སྟོང་པ་ཉིད་ཟབ་མོ་ཡིན་པ་ཡང་། ཁྲི་བརྒྱད་སྟོང་པ་ལས། ནང་སྟོང་པ་ཉིད། ཕྱི་སྟོང་པ་ཉིད། ཕྱི་ནང་སྟོང་པ་ཉིད། ཆེན་པོ་སྟོང་པ་ཉིད། སྟོང་པ་ཉིད་སྟོང་པ་ཉིད། དོན་དམ་སྟོང་པ་ཉིད། འདུས་བྱས་སྟོང་པ་ཉིད། འདུས་མ་བྱས་སྟོང་པ་ཉིད། མཐའ་ལས་འདས་པ་སྟོང་པ་ཉིད། ཐོག་མ་དང་མཐའ་མ་མེད་པ་སྟོང་པ་ཉིད། དོར་བ་མེད་པ་སྟོང་པ་ཉིད། རང་བཞིན་སྟོང་པ་ཉིད། རང་གི་མཚན་ཉིད་སྟོང་པ་ཉིད། ཆོས་ཐམས་ཅད་སྟོང་པ་ཉིད། མི་དམིགས་པ་སྟོང་པ་ཉིད། དངོས་པོ་མེད་པ་སྟོང་པ་ཉིད། ངོ་བོ་ཉིད་སྟོང་པ་ཉིད། དངོས་པོ་མེད་པའི་ངོ་བོ་ཉིད་དོ། །ཞེས་པའོ། །དེའི་དོན། དབུས་མཐའ་རྣམ་འབྱེད་ལས། ཟ་བ་བཟའ་དང་དེའི་ལུས། གནས་ཀྱི་གཞིའི་སྟོང་པ་ཉིད། དེ་ཡང་གང་གིས་ཇི་ལྟར་མཐོང་། གང་ཕྱིར་དེ་ཡང་སྟོང་པ་ཉིད། དེ་དག་གཉིས་ཐོབ་པར་བྱ་བའི་ཕྱིར། རྟག་ཏུ་སེམས་ཅན་ཕན་བྱའི་ཕྱིར། འཁོར་བ་བཏང་པར་མི་བྱའི་ཕྱིར། དགེ་བ་མི་ཟད་བྱ་བའི་ཕྱིར། །རིགས་དང་རྣམ་པར་དག་བྱའི་ཕྱིར། །མཚན་དང་དཔེ་བྱད་ཐོབ་བྱའི་ཕྱིར། །སངས་རྒྱས་ཆོས་རྣམས་དག་བྱའི་ཕྱིར། །བྱང་ཆུབ་སེམས་དཔའ་སྒྲུབ་པར་བྱེད། ཅེས་པ་སྟོང་པ་ཉིད་བཅུ་བཞི་ལས། ཟ་བ་ནང་གི་སྐྱེད་མཆེད་དང་། ཟ་བ་ཕྱི་ཡི་སྐྱེད་མཆེད་དང་། དེའི་རྟེན་ལུས་ཕྱི་ནང་དང་གནས་ཀྱི་གཞི་ཆེན་པོ་སྣོད་ཀྱི་འཇིག་རྟེན་དང་། དེ་ཡང་སྟོང་ཉིད་ཤེས་པ་གང་གིས་སྟོང་པར་མཐོང་པ་དེའི་སྟོང་པ་ཉིད་ནི་སྟོང་པ་ཉིད་སྟོང་པ་ཉིད་དང་། ཇི་ལྟར་དོན་དམ་པའི་རྣམ་པར་མཐོང་པ་དེའི་སྟོང་པ་ཉིད་ནི་དོན་དམ་པ་སྟོང་པ་ཉིད་དང་། གང་གི་ཕྱིར་བྱང་ཆུབ་སེམས་དཔའ་སྟོང་ཉིད་དྲུག་པ་དེ་བསྒྲུབ་པར་བྱེད་པ་དེ་ཡང་སྟོང་པ་ཉིད་དོ། །ཅིའི་ཕྱིར་སྟོང་ཉིད་དྲུག་པོ་བསྒྲུབས་པར་བྱེད་ན་དགེ་གཉིས་ཐོབ་པར་བྱ་བའི་ཕྱིར། བྱང་ཆུབ་སེམས་དཔའ་དྲུག་པོ་བསྒྲུབས་པར་བྱེད་པ་དེའི་སྟོང་པ་ཉིད་ནི་འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། རྟག་ཏུ་སེམས་ཅན་ཕན་བྱའི་ཕྱིར། བྱང་ཆུབ་སེམས་དཔའ་དྲུག་པོ་བསྒྲུབས་པར་བྱེད་པ། དེའི་སྟོང་པ་ཉིད་ནི་མཐའ་ལས་འདས་པ་སྟོང་པ་ཉིད་དང་། འཁོར་བ་བཏང་པར་མི་བྱའི་ཕྱིར། བྱང་ཆུབ་སེམས་དཔའ་སྟོང་ཉིད་དྲག་པོ་བསྒྲུབས་པར་བྱེད་པ་དེའི་སྟོང་པ་ཉིད་ནི་ཐོག་མ་དང་ཐ་མ་མེད་པ་སྟོང་པ་ཉིད་དང་། དགེ་བ་མི་ཟད་བྱ་བའི་ཕྱིར། དྲུག་པོ་དྲུག་པར་བྱེད་པ་དེའི་སྟོང་པ་ཉིད་ནི་དོར་བ་མེད་པ་སྟོང་པ་ཉིད་དང་། རིགས་ཀྱང་རྣམ་པར་དག་བྱའི་ཕྱིར། དྲུག་པོ་བསྒྲུབས་པར་བྱེད་པ་དེའི་སྟོང་པ་ཉིད་ནི་རང་བཞིན་སྟོང་པ་ཉིད། མཚན་དང་དཔེ་བྱད་ཐོབ་བྱའི་ཕྱིར། དྲུག་པོ་བསྒྲུབས་པར་བྱེད་པ་དེའི་སྟོང་པ་ཉིད་ནི་རང་གི་མཚན་ཉིད་སྟོང་པ་ཉིད་དང་། སངས་རྒྱས་ཆོས་རྣམས་དག་བྱའི་ཕྱིར། བྱང་ཆུབ་སེམས་དཔའ་སྟོང་ཉིད་སྔ་མ་དྲུག་པོ་བསྒྲུབས་པར་བྱེད་པ་དེའི་སྟོང་པ་ཉིད་ནི་ཆོས་ཐམས་ཅད་སྟོང་པ་ཉིད་དོ། །མི་དམིགས་པ་སྟོང་པ་ཉིད་དང་། ངོ་བོ་སྟོང་པ་ཉིད་གཉིས་བཅུ་བཞི་པོ་དེར་འདུས་ཤིང་། ཀུན་རྫོབ་ཀྱི་ནང་ལ་སོགས་པ་བཅུ་བཞི་དོན་དམ་པར་རང་སྟོང་དུ་སྟན་པའི་ཕྱིར། དངོས་མེད་པ་སྟོང་པ་ཉིད་དང་དོན་དམ་གྱི་ནང་ལ་སོགས་པ་བཅུ་བཞི་དོན་དམ་པར་གཞན་སྟོང་དུ་སྟན་པའི་ཕྱིར། དངོས་པོ་མེད་པའི་ངོ་བོ་ཉིད་དང་གཉིས་ཀྱི་དོན་ཡང་ཇི་སྐད་དུ། གང་ཟག་དང་ནི་ཆོས་རྣམས་ཀྱི། དངོས་པོ་མེད་འདིར་སྟོང་པ་ཉིད། དེ་དངོས་མེད་པའི་དངོས་ཡོད་པ། དེ་ནི་དེ་ལས་སྟོང་ཉིད་གཞན། ཞེས་པའོ། །དེ་ལྟ་བས་ན་སྟོང་ཉིད་གཉིས་པོ་འདི་རིམ་པ་ལྟར། སྟོང་ཉིད་སྔ་མ་བཅུ་བཞི་པོ་ལ་ཀུན་རྫོབ་ཀྱི་གང་ཟག་དང་ཆོས་ཀྱི་དངོས་པོར་སྒྲོ་འདོགས་པ་དང་། དོན་དམ་གཞན་སྟོང་ཟབ་མོའི་ཤེར་ཕྱིན་ལ་སྐུར་པ་འདེབས་པ་གསལ་བ་ཡིན་ནོ། །དེ་བཞིན་དུ་འཕགས་པ་ཀླུ་སྒྲུབ་ཀྱིས། སྟོང་པ་ཉིད་ནི་སྟོན་པའི་མདོ། རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱིས་ཉོན་མོངས་ཟློག །དབྱིངས་དེ་མེད་པར་སྟོན་མ་ཡིན། ཞེས་ཆོས་དབྱིངས་སྟོད་པར་གསུངས་པ་ནི། སྟོང་པ་ཉིད་སྟོན་པའི་མདོ་ཇི་སྙེད་པ་དངོས་པོར་འཛིན་པའི་ཉོན་མོངས་ཟློག་པར་བྱེད་ཀྱི། ཆོས་དབྱིངས་ཡེ་ཤེས་ཀྱི་ཤེར་ཕྱིན་མེད་པར་སྟོན་པ་ནི་མ་ཡིན་ནོ། །ཞེས་པ་སྟོང་ཉིད་སྟོན་པའི་མདོ་རྒྱུད་ཐམས་ཅད་ཀྱི་དགོངས་པ་ཕྱིན་ཅི་མ་ལོག་པའོ། །དེ་ལྟར་སྟན་པ་རྣམས་ཀྱི་དོན་ནམ། ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། ཤེར་ཕྱིན་ཟབ་མོའི་གདངས་ཆེན་པོ། ཤེས་ཕྱིན་ཟབ་མོའི་ཀློང་ཆེན་པོ། ཤེར་ཕྱིན་ཟབ་མོའི་ཁྱབ་བརྡལ་ཆེན་པོ་ཐམས་ཅད་དོན་དམ་གྱི་སེམས་སུ་ངོ་སྤྲད་པར་བྱའོ།། །།
དེ་ཉིད་ཡོན་ཏན་དུ་ངོ་སྤྲད་པ།
དེ་ཉིད་བདེ་ཆེན་དབང་དོན་དུ་ངོ་སྤྲད་པ།
དྲུག་པ་དེ་ཉིད་ཡོན་ཏན་དུ་ངོ་སྤྲད་པ་ལ་གསུམ་སྟེ། དེ་ཉིད་བདེ་ཆེན་དབང་དོན་དུ་ངོ་སྤྲད་པ་དང་། དེ་ཉིད་སྐུ་དང་ཡེ་ཤེས་ངོ་སྤྲད་པ་དང་། དེ་ཉིད་མཛད་པ་ཕྲིན་ལས་སུ་ངོ་སྤྲད་པའོ། །
དང་པོ་བདེ་ཆེན་དབང་དོན་དུ་ངོ་སྤྲད་པ་ནི། སྤྱོད་འཇུག་ལས། བདེ་བར་གཤེགས་ཀྱི་བདེ་བ་བླ་ན་མེད། ཡིད་ལ་བསམ་པ་མཐའ་དག་རྫོགས་བྱེད་པ། ཞེས་པ་དང་། དཔའ་བོ་ས་ར་ཧས། ནམ་ཞིག་སྦྱོར་བཞི་གནས་གཅིག་ལ་ནི་བཞུགས་པ་ནི། བདེ་ཆེན་མཆོག་ནི་ནམ་མཁའི་ཁམས་སུ་མི་ཤོང་ངོ་། །ཞེས་པའི་དོན། ཀུན་གཞི་ཡེ་ཤེས་ཕྱག་རྒྱ་ཆེན་པོ་དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྣང་སྲིད་འཁོར་འདས་ཐམས་ཅད་བདེ་སྡུག་གཉིས་སུ་མེད་པར་འདོད་ཆགས་ཆེན་པོའི་བདེ་ཆེན་གཅིག་ཏུ་གྱུར་པ་ནི། འཁོར་འདས་བདེ་བ་ཆེན་པོར་མཉམ་པ་ཉིད་གྱུར་པའི་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ལ། དེ་ཉིད་ཀྱི་དུས་གསུམ་གཅིག་ཆར་དུ་མེ་ལོང་ལྟ་བུའི་ཡེ་ཤེས་ལ་གཟུགས་བརྙན་དུ་ཤར་ནས་མངོན་སུམ་དུ་ཤེས་པ་ནི། དུས་གསུམ་མཉམ་ཉིད་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་ཡིན་ཞིང་། བདེ་ཆེན་དེ་རྣལ་འབྱོར་པའི་རྒྱུད་ལ་ཇི་ལྟར་འཆར་ན། སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་ཚེ་སྲོག་རྩོལ་དང་འཛིན་པའི་སྐབས་སུ། སྔ་དྲོ་རེ་ཉིན་རེ་ཞག་རེ་ཙམ་སྒོ་གསུམ་འདོད་ཆགས་ཀྱི་བདེ་བ་ཆེན་པོར་འགྱུར་ཞིང་། ཡང་ཡལ་གྱིན་སོང་པ་འོང་སྟེ། བདེ་བ་ཡོད་མེད་རེས་འཇོག་ཏུ་བྱུང་པའི་ངང་ནས་བདེ་བའི་ཡུན་ཇེ་རིང་ཤས་ཇེ་ཆེར་འཕེལ་ལོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས་མིག་གིས་མཐོང་ཚད། རྣ་བས་ཐོས་ཚད། སྣས་ཚོར་ཚད། ལུས་ཀྱིས་རེག་ཚད། ཡིད་ལ་ཤར་ཚད་ཐམས་ཅད་འདོད་ཆགས་ཆེན་པོའི་བདེ་བ་ཁོ་ནར་འཆར་ཞིང་། དེའི་ཚེ་མེས་བསྲེགས་མཚོན་གྱིས་སྟུབས་ཆུ་ལ་སྐྱུར་ཀྱང་བདེ་ཆེན་འབའ་ཞིག་ཏུ་འཆར་ཏེ། ཡབ་སྲས་འཇལ་བའི་མདོ་ལས། ལྷའི་བུ་རྣམས་ཀྱིས་གསོལ་པ། བཙུན་པ་བཅོམ་ལྡན་འདས་བྱང་ཆུབ་སེམས་དཔའ་ལ་ཆོས་ཐམས་ཅད་བདེ་བར་འགྲོ་བ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་པ་ན། མཚོན་གྱིས་སྟུབས་སམ། མེའི་འོབས་སུ་སྐྱུར་རམ། བྲག་གི་གཡང་ལ་འཕངས་སམ། ཆུ་ལ་སྐྱུར་ཀྱང་བདེ་བ་འབའ་ཞིག་ཏུ་འགྱུར་རོ། །ཞེས་པ་དང་། དཔའ་བོ་ས་ར་ཧས། ཁམས་གསུམ་མ་ལུས་འདི་དག་ཐམས་ཅད་ནི། འདོད་ཆགས་ཆེན་པོ་གཅིག་ཏུ་ཁ་དོག་སྒྱུར་གཅིག་དང་། དེར་ནི་ཐོག་མ་བར་མཐའ་མེད། །སྲིད་མིན་མྱ་ངན་འདས་པའང་མིན། །བདེ་བ་ཆེན་པོའི་མཆོག་འདི་ལ། །བདག་དང་གཞན་དུ་ཡོད་མ་ཡིན། །མདུན་དང་རྒྱབ་དང་ཕྱོགས་བཅུ་རུ། །གང་གང་མཐོང་པ་དེ་དེ་ཉིད། ཞེས་པ་དང་། བརྟག་གཉིས་ལས། དེར་ནི་ཐོག་མ་བར་མཐའ་མེད། །སྲིད་མེད་མྱ་ངན་འདས་པ་མེད། །བདེ་བ་ཆེན་པོ་མཆོག་འདི་ལ། །བདག་དང་གཞན་དུ་ཡོད་མ་ཡིན། ཞེས་པ་དང་། མཚན་བརྗོད་ལས། མཆོད་པ་ཆེན་པོ་འདོད་ཆགས་ཆེ། །འདོད་པ་ཆེན་པོ་བདེ་བ་ཆེ། །དགའ་བ་ཆེན་པོ་མགུ་བ་ཆེ། །དགའ་ཆེན་རོལ་མོ་ཆེན་པོ་འཆང་། །སྒྱུ་འཕྲུལ་ཆེན་པོ་དགའ་བས་དགའ། །མཆོག་ཏུ་དགའ་བའི་གྲགས་བདག་དཔལ། ཞེས་པ་དང་། བདེ་མཆོག་ལས། ལྷ་དང་མིའི་བདེ་བ་ནི། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་པའོ། །སྣང་སྲིད་བདེ་ཆེན་དུ་ཤར་བ་དེའི་ཚེ་གསེར་དང་བོང་པ་སྙམ། དགྲ་དང་གཉེན་དུ་མཉམ། ཙནྡ་དང་སྟེ་འུར་མཉམ། འཁོར་བ་དང་མྱང་འདས་སུ་མཉམ། རྙེད་པ་དང་མ་རྙེད་པར་མཉམ། སྟོང་པ་དང་སྨད་པར་མཉམ། སྟོད་པ་དང་སྨད་པར་མཉམ། གྲགས་པ་དང་མ་གྲགས་པར་མཉམ། བདེ་བ་དང་སྡུག་བསྔལ་བར་མཉམ་ཞིང་། མེས་མི་ཚོགས། ཆུས་མི་ཚུགས། དབྱིག་དུག་གིས་མི་ཚུགས། དུག་སྦྱར་མས་མི་ཚུགས། དུག་གིས་མི་ཚུགས་ཤིང་བཟུང་དུ་མེད། བཅིང་དུ་མེད། ཆད་པས་གཅད་དུ་མེད། མགོ་བྲག་ཏུ་མེད། དགྲའི་དབང་དུ་མི་འགྲོ་སྟེ། དཔའ་བོ་ས་ར་ཧས། སྐྱེས་བུ་རིན་ཆེན་གང་ལ་ལྷ་རྫས་འདི་སྐྱེས་པ། གདུག་པ་མ་ལུས་ཐམས་ཅད་སྐད་ཅིག་ཉེར་ཞི་ཐིམ། སེངྒེ་གླང་ཆེན་སྨྱོན་པ་སྟག་དང་དྲེད་མོ་དང་། གཅན་ཟན་ཁྲོ་བོ་མེ་དང་དུག་སྦྲུལ་གཡང་ས་དང་། རྒྱལ་པོའི་ཆད་པ་དུག་དང་ཐོག་དང་ལྕེ་འབབ་པ། ཐམས་ཅད་ངོ་བོ་དེ་ཉིད་ཡིན་ཕྱིར་གནོད་པ་མེད། རྣམ་རྟོག་དགྲ་འདི་ཆོམས་པས་དགྲ་འདི་ཐམས་ཅད་ཆོམས། བདག་ལྟའི་གདུག་པ་ཐུལ་བས་གདུག་པ་ཐམས་ཅད་ཐུལ། ཞེས་པ་དང་། ནང་གི་དགྲ་རྣམ་རྟོག་དང་བདག་འཛིན་ཆོམས་པས། འཁོར་འདས་ཐམས་ཅད་བདེ་ཆེན་དུ་གྱུར་པའི་སྐད་ཅིག་ལ་སྐད་ཅིག་ལ་ཕྱིའི་དགྲ་ཐམས་ཅད་ཆོམས། ཞེས་པའོ། །དེ་བཞིན་དུ་ཡུལ་སྣང་ཐམས་ཅད་བདེ་བ་ཆེན་པོར་ཤར་བའི་ཡེ་ཤེས་ལ་འཇིག་རྟེན་གྱི་འགལ་པ་ཐམས་ཅད་བདེ་བ་ཆེན་པོར་མཉམ་པ་ནི། འཕགས་པ་ཀླུ་སྒྲུབ་ཀྱི་རིམ་ལྔར། ཇི་ལྟར་བདག་ཉིད་དེ་བཞིན་དགྲ། ཇི་ལྟར་ཆུང་མ་དེ་བཞིན་ཕ། ཇི་ལྟར་སྨད་འཚོང་དེ་བཞིན་མ། ཇི་ལྟར་བྲམ་ཟེ་དེ་བཞིན་གདོལ། ཇི་ལྟར་པགས་པ་དེ་བཞིན་གོས། ཇི་ལྟར་རིན་ཆེན་ཕུབ་མ་དང་། ཇི་ལྟར་ཆང་གང་དེ་བཞིན་གཅིན། ཇི་ལྟར་བཟའ་བ་དེ་བཞིན་བཤང་། ཇི་ལྟར་དྲི་བཟང་ག་བུར་དང་། དེ་བཞིན་བཤང་པ་ལ་སོགས་དྲི། ཇི་ལྟར་བསྟོད་པ་བྱེད་པའི་ཚིག །དེ་བཞིན་དུ་ནི་སྨད་པའི་ཚིག །དྲག་པོ་རྡོ་རྗེ་ཅན་དེ་བཞིན། ཇི་ལྟར་ཉིན་མོ་དེ་བཞིན་མཚན། ཇི་ལྟར་རྨི་ལམ་དེ་བཞིན་སད། ཇི་ལྟར་འཇིག་པ་དེ་བཞིན་གནས། ཇི་ལྟར་བདེ་བ་དེ་བཞིན་སྡུག །ཇི་ལྟར་སྡང་པ་དེ་བཞིན་བུ། མནར་མེད་མཐོ་རིས་དེ་བཞིན་ཏེ། དེ་བཞིན་སྡིག་དང་བསོད་ནམས་སོ། དེ་ལྟར་ཤེས་ན་ཡེ་ཤེས་ཅན། དོགས་པ་མེད་པར་ཐམས་ཅད་བྱེད། ཞེས་པའོ། །དེ་བཞིན་དུ། འཁོར་འདས་བདེ་ཆེན་དུ་མཉམ་དུ་མཉམ་པའི་ཡེ་ཤེས་དེ་ཉིད་བརྟག་གཉིས་ལ། བདེ་བ་ནག་ཅིང་བདེ་བ་སེར། །བདེ་བ་དམར་པོ་བདེ་བ་དཀར། །བདེ་བ་ལྗང་ཁུ་བདེ་བ་སྔོ། །བདེ་བ་རྒྱུ་དང་མི་རྒྱུ་ཀུན། །བདེ་བ་ཤེས་རབ་བདེ་བ་ཐབས། །དེ་བཞིན་ཀུན་ཏུ་རྒྱུ་སྐྱེས་བདེ། །བདེ་བ་དངོས་པོ་དང་དངོས་མེད་བདེ། །རྡོ་རྗེ་སེམས་དཔའ་བདེ་བར་བརྗོད། ཞེས་པའོ། །བདེ་བ་ཆེན་པོའི་ཡེ་ཤེས་དེ་ཉིད་ཀུན་རྫོབ་ཀྱི་དུས་གསུམ་མེད་པ་དང་། དོན་དམ་གྱི་དུས་གསུམ་གཅིག་ཆར་དུ་ཤར་ནས་རྟོགས་པ་དུས་གསུམ་མཉམ་ཉིད་ནི། དུས་གསུམ་དུས་མེད་རྟོགས་པ་པོ། ཞེས་པ་དང་། སེམས་དཔའ་སྲིད་པ་གསུམ་གཅིག་པ། ཞེས་པ་དང་། དུས་འཁོར་གྱི་རྒྱུད་ཕྱི་མ་ལས། སོ་སོར་སྡུད་པའི་རྣལ་འབྱོར་པ་ཡིས་དུས་གསུམ་ནམ་མཁའི་དཀྱིལ་ན་གནས་པ་མཐོང་། ཞེས་པ་དང་། དྲི་མེད་འོད་ལས། དེ་ལྟར་སྲིད་པ་ཡོངས་སུ་ཤེས་པ་ན་མྱ་ངན་ལས་འདས་པ་ཞེས་བརྗོད་དོ། །འདིར་འདས་པ་དང་མ་འོངས་པ་དང་ད་ལྟར་བྱུང་པ་སྟེ། དུས་གསུམ་གྱི་སྲིད་པ་གསུམ་ཇི་ལྟར་བར་གྱུར་པ་གཟིགས་པ་ནི་ཡོངས་སུ་ཤེས་པ་སྟེ། དེ་ཉིད་སྲིད་པ་གསུམ་སྒྲིབ་པ་ཟད་པ་དང་རྒྱུ་དང་འབྲས་བུ་འགགས་པས་རྫོགས་པའི་སངས་རྒྱས་རྣམས་ལ་གཅིག་ཆར་དུ་འགྱུར་ཏེ། ཐམས་ཅད་མཁྱེན་པ་ཉིད། རྣམ་པ་ཐམས་ཅད་མཁྱེན་པ་ཉིད། ལམ་མཁྱེན་པ་ཉིད། ལམ་གྱི་རྣམ་པ་ཐམས་ཅད་མཁྱེན་པ་ཉིད་ཀྱི་སྟོབས་ཀྱིས་སོ། །ཉན་ཐོས་དང་རང་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་ལ་དུས་གསུམ་ཇི་ལྟར་བར་གྱུར་པ་གཅིག་ཆར་ཡོངས་སུ་ཤེས་པར་མི་འགྱུར་ཏེ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ཀྱི་ཕྱིར་དང་། དེ་བཞིན་དུ་བྱང་ཆུབ་སེམས་དཔའ་རྣམས་ལ་སྒྲིབ་པ་ཅུང་ཟད་ཙམ་གྱི་ཕྱིར་རོ། །ཞེས་པ་དང་། དེ་བཞིན་དུ་མདོ་ཕལ་པོ་ཆེ་ལས། བྱང་ཆུབ་སེམས་དཔའ་ནོར་བཟངས་ཀྱིས། བྱང་ཆུབ་སེམས་དཔའ་ཆེན་པོ་ཀུན་ཏུ་བཟང་པོའི་ལུས་ལ་དུས་གསུམ་གཅིག་ཆར་དུ་མཐོང་པ་འདི་ལྟ་སྟེ། བྱང་ཆུབ་སེམས་དཔའ་ཀུན་ཏུ་བཟང་པོ་ཡི། །ལུས་དང་ཡན་ལག་བ་སྤུའི་སྒོ་རེ་དང་། །དེ་དག་ཕྱོགས་ཀྱི་ཆ་ཤས་རེ་ནས་ཀྱང་། །སྟོང་གསུམ་འཇིག་རྟེན་ས་ཆུ་མེ་རླུང་གི། །ཕུང་པོ་དང་བཅས་གླིང་དང་རྒྱ་མཚོར་བཅས། །རིན་ཆེན་རི་དང་རི་རབ་ཁོར་ཡུག་བཅས། །གྲོང་དང་གྲོང་ཁྱེར་ལྗོངས་དང་ཡུལ་ཁམས་བཅས། །རྒྱལ་པོའི་གནས་བཅས་ཁང་ཁྱིམ་ནགས་ཚལ་བཅས། །དམྱལ་བ་ཡི་དྭགས་བྱོལ་སོང་གནས་དང་བཅས། །ལྷ་མིན་ཀླུ་དང་ལྷ་མི་འཇིག་རྟེན་བཅས། །འདོད་ཁམས་གཟུགས་ཁམས་གཟུགས་མེད་ཡུལ་དང་བཅས། །གཞི་བཅས་རྟེན་བཅས་དབྱིབས་བཅས་སྲིན་དང་བཅས། །གློག་བཅས་སྐད་བཅས་ཟླ་ཉི་བཅས། །ལོ་དུས་བསྐལ་པར་བཅས་པ་མ་ལུས་པ། །མེ་ལོང་ནང་གི་གཟུགས་བརྙན་བཞིན་དུ་མཐོང་། །སྟོང་གསུམ་འདི་བཞིན་ཕྱོགས་བཅུའི་འཇིག་རྟེན་མཐོང་། །ཕྱོགས་བཅུའི་འཇིག་རྟེན་ཐོག་མཐའི་མུར་ཐུག་གི །གཅིག་ནས་གཅིག་བརྒྱུད་འཇིག་རྟེན་མ་ལུས་ཀུན། །རྣམ་པ་དང་འདྲེས་མ་འདྲེས་སོ་སོར་གསལ། །ལུས་ཀུན་མཚན་བཟང་རེ་རེ་ལ་ཡང་མཐོང་། །ཀུན་ཏུ་བཟང་པོ་བཅོམ་ལྡན་རྣམ་སྣང་གི །དྲུང་ན་རྫུ་འཕྲུལ་འགེད་པ་ཇི་ལྟ་བར། །ཆོས་དབྱིངས་ཀྱིས་སླས་མཁའ་གཏུགས་འཇིག་རྟེན་གྱི། །སངས་རྒྱས་ཀུན་གྱི་དྲུང་ནའང་དེ་བཞིན་ཏེ། །དེ་དག་ཀུན་གྱི་ལུས་ལའང་དུས་གསུམ་གྱི། །འཇིག་རྟེན་འཇིག་རྟེན་འདས་པ་མ་ལུས་མཐོང་། ཞེས་པ་སྟེ། གཟུགས་བརྙན་མ་ལུས་འཆང་བ་པོ། །གཟུགས་རྣམས་ཐམས་ཅད་སྣང་པའི་དཔལ། ཞེས་པའི་དོན་ནོ། །དེ་ལྟར་སྲིད་ཞི་དང་དུས་གསུམ་མཉམ་ཉིད་ཀྱི་ཤེས་ཕྱིན་བདེ་བ་ཆེན་པོའི་ཡེ་ཤེས་དེ་ཉིད་དོན་དམ་གྱི་ལོངས་སྤྱོད་འབྱོར་པ་ནམ་མཁའ་དང་མཉམ་པ་ནི། འཕགས་པ་ཀླུ་སྒྲུབ་ཀྱིས་རིམ་ལྔ་ལས། གཙོ་བོ་བདེ་བ་ཀུན་རང་བཞིན། །སེམས་དཔའ་ཆེན་པོ་འགྲོ་དང་བཞུགས། །གནས་དང་གོས་དང་ཟས་ལ་སོགས། །མཁའ་ལ་སྐད་ཅིག་ཅིག་གིས་རྙེད། ཞེས་པ་དང་། དེ་བཞིན་དུ་མདོ་ཕལ་པོ་ཆེ་ལས། བྱང་ཆུབ་སེམས་དཔའ་ནོར་བཟངས་ཀྱིས། བྱང་ཆུབ་སེམས་དཔའ་ཆེན་པོ་ཁྱིམ་བདག་མཁས་པའི་དྲུང་དུ་ནམ་མཁའ་མཛོད་ཀྱི་འབྱོར་པ་མཐོང་པ་འདི་ལྟ་སྟེ། དེ་ནས་ཡེ་ཤེས་མཁའ་གཏུགས་ལོངས་སྤྱོད་ལྡན། མཁའ་ལྟར་ཟད་མི་ཤེས་པའི་ནོར་གྱིས་ཕྱུག །ནམ་མཁའི་མཐར་ཐུག་ཁྱབ་པའི་བང་མཛོད་ཅན། ཁྱིམ་བདག་མཁས་པས་ནོར་བཟངས་ལ་སྨྲས་པ། ནོར་བཟངས་ཁོ་བོ་ཡིད་ཀྱི་མཛོད་ནས་བྱུང་བའི་བསོད་ནམས་ཐོབ་པ་སྟེ། དེ་མཐུས་ཁོ་བོ་འགྲོ་རྒྱུད་མི་གཅིག་སྣ་ཚོགས་སྐྱེ་དགུ་རྣམས་ལ་ནི། གང་ལ་ཅི་འདོད་སྦྱིན་བྱའི་འབྱོར་པ་ཐམས་ཅད་ནམ་མཁའི་དབྱིངས་ལས་བྱུང་། ནམ་མཁའ་མ་ཟད་དེ་སྲིད་སྦྱིན་བྱའི་ལོངས་སྤྱོད་ཡོངས་སུ་གཏུགས་མི་འགྱུར། ནོར་བཟངས་ཡུད་ཙམ་སྡོད་གཅིག་དང་། ད་ལྟ་ཁྱོད་ལ་མངོན་སུམ་འགྱུར། ཟེར་མ་ཐག་ལ་ཕྱོགས་བཅུ་ནས། སེམས་ཅན་གྲངས་མེད་མཐའ་ཡས་པ། འགྲོ་རྒྱུད་མི་གཅིག་ཐ་དད་རྣམས། རང་རང་ཟས་སོགས་དོན་གཉེར་བ། འོངས་ནས་དེ་ལ་སློངས་མོ་འདེབས། དེ་ནས་ཁྱིམ་བདག་མཁས་པ་ཡིས། ཡུད་ཙམ་བསམས་ཏེ་མཁའ་ལ་ལྟས། དེ་ཡི་མོད་ལ་ནམ་མཁའ་ནས། བཟའ་དང་བཏུང་དང་རོ་སྣ་ཚོགས། ཁ་དོག་དྲི་རོ་ཕུན་ཚོགས་ལྡན། བཟའ་བ་བཅའ་བ་ལྟག་པ་དང་། གོས་བརྒྱན་ལྷབ་ལྷུབ་ཕྲེང་བ་དང་། མེ་ཏོག་བདུག་སྤོས་ཕྱེ་མ་བྱུག །རིན་ཆེན་གསེར་དངུལ་མུ་ཏིག་དང་། རྟེན་དང་གནས་དང་མལ་ཆ་དང་། སྨན་དང་བཞོན་ཁལ་གླང་པོ་རྟ། ཤིང་རྟ་བ་ལང་བོང་བུ་དང་། མ་ཧེ་ར་ལུག་བྲན་ཕོ་མོ། བུ་ཕོ་བུ་མོ་བུད་མེད་དང་། གདུགས་དང་རྒྱལ་མཚན་བ་དན་སོགས། ཅི་འདོད་སྦྱིན་བྱའི་ཡོ་བྱད་རྣམས། ཁྱིམ་བདག་མཁས་པའི་ལག་ཏུ་བྱུང་། དེ་ཡིས་སློངས་མོ་བ་ཡི་ཚོགས། སྣ་ཚོགས་ཚིམ་ཞིང་དགའ་བར་བྱས། དེ་ནས་དེ་དག་རྣམས་ལ་ཇི་ལྟ་བུ། ཡུན་དང་གནས་སྐབས་ཀུན་ཏུ་ཕན་དང་བདེ་བའི་ཆོས། དེ་ལྟར་ལྟར་བསྟན་པས་སེམས་ཅན་དེ་དག་རྣམས། ཆོས་དང་ཟང་ཟིང་འབྱོར་པས་ཚིམ་པར་བྱེད་པ་མཐོང་། ཞེས་པ་སྟེ། མཚན་བརྗོད་ལས། དཔལ་ལྡན་འབྱོར་པ་ཀུན་བྱེད་པ། ཞེས་པའི་དོན་ནོ། །དེ་བཞིན་དུ་བསྡུས་པ་ལས། འདུས་བྱས་བདེ་དང་འདུས་མ་བྱས་བདེ་གང་ཡིན་པ། བདེ་བ་དེ་ཀུན་འདི་ལས་འབྱུང་པར་རིག་པར་བྱ། ཞེས་པ་དང་། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། ཤེས་རབ་ནམ་ཡང་ཟད་པ་མེད་ཅིང་འཕེལ་བ་མེད། ཞེས་པའི་དོན་ནོ། །དེ་བཞིན་དུ་སྲིད་ཞི་དང་དུས་གསུམ་མཉམ་ཉིད་ཀྱི་ཤེར་ཕྱིན་བདེ་བ་ཆེན་པོ་ཕུན་སུམ་ཚོགས་པ་དེ་ཉིད། མངོན་རྟོགས་བརྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། ཞེས་པའོ། །དེ་ལྟར་འགྱུར་མེད་མཆོག་གི་བདེན་དེ་ཉིད། ཐབས་ཤེས་ཀྱི་རྒྱུད་རྣམས་ཀྱི་དབང་དོན་ཡིན་ཞིང་། འཚམས་མེད་པ་ལྔ་བྱེད་པ་རྣམས་ཀྱང་དབང་དོན་གྱི་བདེ་ཆེན་འདི་ཉིད་ཀྱིས་རྗེས་སུ་བཟུང་པ་ཡིན་ཏེ། དྲི་མེད་འོད་ལས། འཚམས་མེད་ལྔ་པོ་རྣམས་ནི་བྱས་པ་རྣམས། དབང་དོན་བདེ་བ་ཉིད་ནི་གང་ཞིག་གིས། ཐབས་དང་ཤེས་རབ་བདག་ཉིད་རྒྱུད་རྣམས་སུ། རྒྱལ་བའི་དབང་པོས་ཡང་དག་བཟུང་བར་འགྱུར། ཞེས་པ་འགྱུར་མེད་མཆོག་གི་བདེ་བ་ཆེན་པོའི་ཡེ་ཤེས་འདི་ཉིད། རྒྱུད་སྡེ་རྣམས་ཀྱི་དབང་བཞིའི་དོན་དགའ་བ་བཞི་དང་བཅུ་དྲུག་ཡིན་ལ། དེ་ལ་ལུས་བདེ་བ་ཆེན་པོ་ནི། ལུས་ཀྱི་ཐིག་ལེ་བརྟན་པ་བུམ་པའི་དབང་དགའ་བ་ཡིན་ལ། ངག་བདེ་བ་ཆེན་པོ་ནི། ངག་གི་ཐིག་ལེ་བརྟན་པ་གསུང་བའི་དབང་མཆོག་དགའ་ཡིན་ལ། སེམས་བདེ་བ་ཆེན་པོ་ནི་སེམས་ཀྱི་ཐིག་ལེ་བརྟན་པ་ཤེས་རབ་ཡེ་ཤེས་ཀྱི་དབང་ཁྱད་པར་གྱི་དགའ་བ་ཡིན་ཞིང་། ཆགས་པ་བདེ་བ་ཆེན་པོ་ནི། ཆགས་པ་ཐིག་ལེ་བརྟན་པ་བཞི་པ་དེ་ཡང་དེ་བཞིན་གྱི་དབང་ལྷན་ཅིག་སྐྱེས་པའི་དགའ་བའོ། །ཐིག་ལེ་བཞི་དང་དགའ་བ་བཞི་པོ་རེ་རེའང་བཞི་བཞིར་དབྱེ་བས་ཐིག་ལེ་བཅུ་དྲུག་དང་དགའ་བ་བཅུ་དྲུག་སྟེ། །དེ་ཉིད་རྣམ་པ་བཅུ་དྲུག་གོ །རྣལ་འབྱོར་པ་གང་ཞིག་གི་ཚེ། འགྱུར་མེད་མཆོག་གི་བདེ་བ་ཆེན་པོའི་དགའ་བ་བཅུ་དྲུག་པོ་འདི་རང་རིག་གི་ཡེ་ཤེས་ཀྱིས་རིག་པ་དེའི་ཚེ་དེ་ཉིད་རྣམ་པ་བཅུ་དྲུག་རིག །ཞེས་པའི་དོན་ནོ། །རྗེ་བཙུན་མི་ལས། སེམས་ལ་བདེ་བ་ཐོབ་པ་དོན་གྱི་དབང་། ཞེས་པ་དང་། བརྟག་གཉིས་ལས། དབང་ནི་བཞི་ཡི་དྲངས་ཀྱིས་ནི། དགའ་བ་ལ་སོགས་རིམ་ཤེས་བྱ། ཞེས་པ་དང་། བསྟོད་འགྲེལ་ལས། ངེས་པའི་དོན་གྱིས་སླར་ཡང་བུམ་པའི་སྒྲས་ནུ་མ་བརྗོད་དེ་དེ་ལ་རེག་པར་ལས་འགྱུར་བའི་བདེ་བ་གང་ཡིན་པ་དེ་ནི་བུམ་པའི་དབང་བསྐུར་བའོ། །གསང་པར་རྡོ་རྗེ་སྤྲོས་པ་ལས་འགྱུར་བའི་བདེ་བ་གང་ཡིན་པ་དེ་ནི་གསང་པའི་དབང་བསྐུར་བའོ། །དབང་པོ་གཉིས་སྙོམས་པར་ཞུགས་པ་ན་གང་ཞིག་འཛག་པའི་བདེ་བ་དེ་ནི་ཤེས་རབ་ཡེ་ཤེས་ཀྱི་དབང་བསྐུར་བའོ། །ཕྱག་རྒྱ་ཆེན་པོའི་རྗེས་སུ་ཆགས་པ་གང་ཞིག་འགྱུར་བ་མེད་པའི་བདེ་བ་དེ་ནི་བཞི་པ་དེ་ཡང་དེ་བཞིན་གྱི་དབང་བསྐུར་བའོ། །དེ་ལྟར་འགྱུར་བ་དང་འགྱུར་བ་དང་། འཛག་པ་དང་འགྱུར་བ་མེད་པའི་དབྱེ་བས་དབང་བསྐུར་བ་རྣམ་པ་བཞིའོ། །འདིར་དབང་བསྐུར་བར་བྱེད་པ་ནི་དབང་སྟེ་བདེ་བའི་སེམས་དང་ལྡན་པའི་ཕྱིར་ཞེས་པའི་དོན་ནོ། །ཞེས་པ་དང་། འདི་རྣམས་ཀྱི་དབང་བསྐུར་བ་རེ་རེ་ལ་དགའ་བ་བཞིའོ། །དགའ་བ་རེ་རེ་ལ་ལུས་དང་ངག་དང་སེམས་དང་ཡེ་ཤེས་ཀྱི་དབྱིངས་དབྱེ་བས་གནས་སྐབས་བཞི་སྟེ་ཐིག་ལེ་བཞིའི་དབྱེ་བས་སོ། །དེ་ལྟར་ཆ་བཅུ་དྲུག་གི་དབྱེ་བས་དབང་བསྐུར་སོ་སོ་ལ་དགའ་བ་བཅུ་དྲུག་སྟེ། ལུས་དང་ངག་དང་སེམས་དང་ཡེ་ཤེས་ཀྱི་ཐིག་ལེའི་དབྱེ་བ་བཞིའོ། །ཞེས་གསུངས་པ་ནི་དགའ་བ་བཞི་དང་བཅུ་དྲུག་གི་འཁོར་ལོ་འགྱུར་མེད་མཆོག་གི་བདེ་བ་ཆེན་པོ་འདི་ཉིད་རྒྱུད་སྡེ་རྣམས་ཀྱིས་ཀྱི་དབང་གི་དོན་གྱི་བདེ་བ་ཆེན་པོ་ཡིན་ནོ། །དེ་ཡང་རྗེས་དྲན་ནས་བཟུང་ནས་ཕྱག་རྒྱ་གསུམ་གྱི་སྒོ་ནས་ཉམས་སུ་ལེན་པ་ཡིན་ལ། ཕྱག་རྒྱ་ཆེན་པོ་ནི། དཔའ་བོ་ས་ར་ཧས། གང་ཡང་སྔ་ན་མེད་པའི་སྒེག་མོ་དང་ཕྲད་ན། །ཉལ་བའི་སེམས་ནི་གཞི་མེད་པ་ལ་རྟེན། །རང་གི་གཟུགས་དང་ཐ་དད་མ་བལྟ་གཅིག །སངས་རྒྱས་ལག་ཏུ་གཏོད་པར་བྱེད་པ་ཡིན། ཞེས་པ་དང་། བརྟག་གཉིས་ལས། ལྷ་མོ་དགའ་སྟེར་གནས་སྟེར་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། ཞེས་པ་དང་། བདེ་མཆོག་ལས། དབུ་མ་མཆོག་གི་དབུགས་དང་ནི། དྲི་དང་ཆུ་དང་བཅས་པ་ཡི། །རྟག་ཏུ་རིགས་ལྡན་མ་མཆོད་བྱ། །ཁྱད་པར་དུས་ལ་ཕོ་ཉ་མོ། ཞེས་པ་རྣམས་ཉམས་སུ་ལེན་པའི་དོན་ཟབ་པ་ལས་ཀྱང་ཆེས་ཤིན་ཏུ་ཟབ་པས། ཤིན་ཏུ་མཁས་པའི་ཡན་ལག་ལས་ཤེས་དགོས་སོ། །དེ་ལྟར་སྲིད་ཞི་མཉམ་ཉིད་དང་དུས་གསུམ་མཉམ་ཉིད་ཀྱི་ཤེར་ཕྱིན། གཏི་མུག་འཇོམས་པས་ཤེས་རབ་ཀྱི་ཕ་རོལ་དུ་ཕྱིན་པའི་སྔགས། མ་རིག་པ་འཇོམས་པས་རིག་པ་ཆེན་པོའི་སྔགས། འདི་ལས་བཟང་བ་མེད་པས་བླ་ན་མེད་པའི་སྔགས། འདི་དང་མཉམ་པ་འཇིག་རྟེན་ན་མེད་པས་མི་མཉམ་པ་དང་མཉམ་པར་བྱེད་པའི་སྔགས། སྐྱོན་ཐམས་ཅད་སེལ་བས་སྡུག་བསྔལ་ཐམས་ཅད་ཞི་བར་བྱེད་པའི་སྔགས། མི་བརྫུན་པས་ན་བདེན་པའི་སྔགས་བདེ་བ་ཆེན་པོའི་ཡེ་ཤེས་དེ་ཉིད། ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། བདེ་བའི་ཡེ་ཤེས་ཀྱི་གདངས་ཆེན་པོ། བདེ་བའི་ཡེ་ཤེས་ཀྱི་ཀློང་ཆེན་པོ། བདེ་བའི་ཡེ་ཤེས་ཀྱི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།
དེ་ཉིད་སྐུ་དང་ཡེ་ཤེས་ངོ་སྤྲད་པ།
དེ་ཉིད་སྐུ་རྣམས་སུ་ངོ་སྤྲད་པ།
གཉིས་པ་དེ་ཉིད་སྐུ་དང་ཡེ་ཤེས་སུ་ངོ་སྤྲད་པ་ལ་གསུམ་སྟེ། དེ་ཉིད་སྐུ་རྣམས་སུ་ངོ་སྤྲད་པ་དང་། སྤྲུལ་སྐུའི་སྤྲུལ་སྒྱུར་རྣམས་ངོ་སྤྲད་པ་དང་། རང་བྱུང་གི་ཡེ་ཤེས་རྣམས་ངོ་སྤྲད་པའོ། །
དང་པོ་དེ་ཉིད་སྐུ་རྣམས་སུ་ངོ་སྤྲད་པ་ནི། དྲི་མེད་འོད་ལས། དེ་ཉིད་གཅིག་པུ་སྐུའི་རབ་ཏུ་དབྱེ་བས་རྣམ་པ་བཅུ་དྲུག །ཞེས་པའི་དོན། ཀུན་བཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སངས་རྒྱས་ཀུན་གྱི་ཡེ་ཤེས་སྐུ། སེམས་ཅན་ཀུན་གྱི་སེམས་ཆེན་པོ་དེ་ཉིད། སྐུ་གཅིག་དང་གཉིས་ལ་སོགས་པ་སྐུའི་དབྱེ་བ་དུ་མར་འགྱུར་རོ། །དེ་ལ་སྐུ་གཅིག་ནི་ཆོས་ཀྱི་སྐུ་དང་། སྐུ་གཉིས་ནི་ཆོས་སྐུ་དང་གཟུགས་སྐུའོ། །གསུམ་ནི་ཆོས་སྐུ་དང་ལོངས་སྐུ་དང་སྤྲུལ་སྐུའོ། །སྐུ་ལྔ་ནི་ཆོས་སྐུ་དང་ལོངས་སྐུ་དང་སྤྲུལ་སྐུ་དང་ཡེ་ཤེས་ཀྱི་སྐུ་དང་བདེ་བའི་སྐུའོ། །དེ་ལ་སོགས་པ་ཆོས་ཀྱི་ཕུང་པོ་བརྒྱ་ཁྲི་བཞི་སྟོང་ནི་ཆོས་ཀྱི་སྐུ་བརྒྱ་ཁྲི་བཞི་སྟོང་ངོ་། །ཆོས་ཀྱི་སྐུ་དེ་སྙེད་ཀྱི་ལོངས་སྐུ་དང་སྤྲུལ་སྐུ་དང་ཡེ་ཤེས་ཀྱི་སྐུ་དང་བདེ་བའི་སྐུ་ཡང་དེ་སྙེད་དེ། སྐུའི་དབྱེ་བ་དཔག་ཏུ་མེད་དོ། དེ་ལ་སྐུ་གཅིག་ནི་ཤེས་པ་དང་ཤེས་བྱ་གཅིག་པའི་སྐུ་དང་། དོན་གཅིག་གཉིས་མེད་ཆོས་ཀྱི་དོན་དང་། གཅིག་པུ་སྲ་འཁྲེགས་རྡོ་རྗེའི་བདག་དང་། སེམས་ནི་ཆེན་པོ་གཅིག་ཉིད་དང་། སངས་རྒྱས་ཀུན་གྱི་སྐུ་གཅིག་པ་དང་། སེམས་ཅན་ཀུན་གྱི་སེམས་ཆེན་པོ་དང་། མྱ་ངན་འདས་པ་བདེན་གཅིག་པོ་དང་། ཆོས་ཀྱི་དབྱིངས་ལས་མ་གཏོགས་པ། འདི་ལྟར་ཆོས་ཡོད་མ་ཡིན་ཏེ། ཞེས་པ་ལ་སོགས་པ་དོན་དམ་པའི་སྐུ་གཅིག་ཏུ་སྟོན་པའི་ལུང་དཔག་ཏུ་མེད་དོ། །དེ་བཞིན་དུ་སྐུ་གཅིག་དང་གཉིས་དང་གསུམ་དང་། བཞི་དང་། ལྔ་ནི་འཕགས་པ་འཇམ་དཔལ་གྱིས་རང་གི་ལྟ་བའི་འདོད་པ་མདོར་སྟན་པར། སངས་རྒྱས་ཤཱཀྱ་སེངྒེ་ཡིས། །སེམས་ཅན་བསམ་པའི་དབང་དག་གིས། །སྐུ་ནི་གཅིག་གཉིས་གསུམ་དང་ནི། །བཞི་དང་ལྔ་ཏུ་གསུངས་པ་སྟེ། སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རིས་མེད་པ། །ཡེ་ཤེས་མིག་གཅིག་དྲི་མ་མེད། །དེ་བཞིན་གཤེགས་པ་ཡེ་ཤེས་སྐུ། །ཇི་ལྟར་གཟུགས་ཀྱི་སྐུ་དང་ནི། །དེ་ལྟར་སངས་རྒྱས་ཆོས་སྐུ་སྟེ། །སེམས་ཅན་བསམ་པའི་དབང་གི་ཕྱིར། །བསྟན་བཅོས་སྐྱབས་གནས་གསུམ་པོས་གསུངས། །ཐུགས་གསུང་སྐུའི་དབྱེ་བ་ཡིས། །སྐུ་གསུམ་དུ་ནི་རབ་ཏུ་སྒྲགས། །ཆོས་དང་ལོངས་སྤྱོད་སྤྲུལ་པ་རྣམས། །སྔགས་ཀྱི་ཚུལ་ལ་མི་ཡིས་སྒྲུབ། །ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པའི་སྤྲུལ་པ་དང་། །ཆོས་སྐུ་མཛད་པར་བཅས་པ་སྟེ། །རྣམ་པ་བཞིར་ནི་ཡང་དག་བཤད། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔའི་བདག །སངས་རྒྱས་མངའ་བདག་ཅོད་པན་ཅན། །སྤྱན་ལྔ་ཆགས་པ་མེད་པ་འཆང་། ཞེས་པ་དང་། དེ་བཞིན་དུ་ཀུན་གཞི་ཡེ་ཤེས་དེ་ཉིད་གཅིག་པུ་སྐུ་ཡིེ་རབ་ཏུ་དབྱེ་བས་རྣམ་པ་བཅུ་དྲུག་ནི། དྲི་མེད་འོད་ནི། སྤྲུལ་པ་ཡིས་ནི་སྐུ་གསུང་ཐུགས། ཡེ་ཤེས་གཅིག་སྦྱོར་སྡོམ་པ་དང་། ལོངས་སྤྱོད་རྫོགས་པའི་སྐུ་གསུང་ཐུགས། ཡེ་ཤེས་གཅིག་སྦྱོར་སྡོམ་པ་དང་། དཔལ་ལྡན་ཆོས་ཀྱི་སྐུ་གསུང་ཐུགས། ཡེ་ཤེས་གཅིག་སྦྱོར་སྡོམ་པ་དང་། ལྷན་ཅིག་སྐྱེས་པའི་སྐུ་གསུང་ཐུགས། ཡེ་ཤེས་གཅིག་སྦྱོར་སྡོམ་པ་ནི། ཞེས་གསུངས་འདི། སྐུ་བཅུ་དྲུག་དུ་ཇི་ལྟར་དབྱེ་ན། སྐུ་བཞི་པོ་རེ་རེ་ཡང་སྐུ་གསུང་ཐུགས་ཡེ་ཤེས་བཞི་བཞིར་དབྱེའོ། །སྤྲུལ་སྐུའི་སྐུ་ནི་སྤྲུལ་སྐུའི་སྤྲུལ་སྐུ་དང་། སྤྲུལ་སྐུའི་གསུང་ནི་སྤྲུལ་སྐུའི་ལོངས་སྐུ་དང་། སྤྲུལ་སྐུའི་ཐུགས་ནི་སྤྲུལ་སྐུའི་ཆོས་སྐུ་དང་། སྤྲུལ་སྐུའི་ཡེ་ཤེས་ནི་སྤྲུལ་སྐུའི་ངོ་བོ་ཉིད་ཀྱི་སྐུའོ། །དེ་བཞིན་དུ་ལོངས་སྐུའི་སྐུ་ནི་ལོངས་སྐུའི་སྤྲུལ་སྐུ་ལ་སོགས་པ་བཞི་དང་། དེ་བཞིན་དུ་ཆོས་སྐུའི་སྐུ་ནི་ཆོས་སྐུའི་སྤྲུལ་སྐུ་སོགས་པ་བཞི་དང་། དེ་བཞིན་དུ་ལྷན་ཅིག་སྐྱེས་སྐུའི་སྐུ་ནི་ངོ་བོ་ཉིད་སྐུའི་སྤྲུལ་སྐུ་སོགས་པ་བཞིའོ། །དེ་ལྟར་རྡོ་རྗེ་བཞིའི་སྒོ་ནས་སྐུའི་དབྱེ་བ་སྟན་པའོ། །སྐུའི་དབྱེ་ལུགས་གཞན་ཡང་ཀུན་གཞི་ཡེ་ཤེས་དེ་ཉིད་ཆོས་ཉིད་ཆོས་ཉིད་ཀྱི་གཟུགས་མཐའ་ཡས་པ་ཡིན་པའི་ཆ་ནས་སྤྲུལ་པའི་སྐུ་དང་། དེ་ཉིད་ཆོས་ཉིད་ཀྱི་སྒྲ་མཐའ་ཡས་པ་ཡིན་པའི་ཆ་ནས་ལོངས་སྤྱོད་རྫོགས་པའི་སྐུ་དང་། དེ་ཉིད་ཆོས་ཉིད་ཀྱི་ཡོན་ཏན་མཐའ་ཡས་པ་ཡིན་པའི་ཆ་ནས་ཆོས་ཀྱི་སྐུ་དང་། དེ་ཉིད་ཆོས་ཉིད་ཀྱི་ཡེ་ཤེས་མཐའ་ཡས་པ་ཡིན་པའི་ཆ་ནས་ཡེ་ཤེས་ཀྱི་སྐུ་དང་། དེ་ཉིད་ཀྱི་བདེ་བ་མཐའ་ཡས་པ་ཡིན་པའི་ཆ་ནས་བདེ་བའི་སྐུ་ཡིན་ཏེ། འཕགས་པ་འཇམ་དཔལ་གྱིས་རང་གི་ལྟ་བའི་འདོད་པ་མདོར་སྟན་པར། གཟུགས་ཀྱི་ཕུང་པོ་མཐའ་ཡས་པ། །བདག་གི་སྤྲུལ་པའི་སྐུ་མཆོག་གོ །སྒྲའི་ཕུང་པོ་མཐའ་ཡས་པ། །བདག་གི་ལོངས་སྤྱོད་རྫོགས་སྐུ་མཆོག །ཆོས་ཀྱི་ཕུང་པོ་མཐའ་ཡས་པ། །བདག་གི་ཆོས་ཀྱི་སྐུ་རབ་སྒྲགས། ཡེ་ཤེས་ཕུང་པོ་མཐའ་ཡས་པ། བདག་གི་ཡེ་ཤེས་སྐུ་རབ་སྒྲགས། །བདེ་བའི་ཕུང་པོ་མཐའ་ཡས་པ། །བདག་གི་བདེ་འགྱུར་མེད་མཆོག །བསྡུས་པ་ཕུང་པོ་དེ་བཞིན་སྐུ། །ཡང་དག་བསགས་པར་ཡོངས་སུ་སྒྲགས། ཞེས་པ་སྡུད་པ་དང་། ཕུང་པོ་དང་། སྐུ་དང་བསགས་པ་རྣམས་འདིར་དོན་གཅིག་ཞེས་པའོ། །སྐུའི་དབྱེ་ལུགས་གཞན་ཡང་། ཀུན་གཞི་ཡེ་ཤེས་དེ་ཉིད་མ་བཅོས་པའི་ཆ་ནས་ངོ་བོ་ཉིད་ཀྱི་སྐུ་དང་། དེ་ཉིད་དྲན་པ་ཉེར་བཞག་ལ་སོགས་པ་ཡོན་ཏན་གྱི་ཕུང་པོ་ཡིན་པའི་ཆ་ནས་ཆོས་སྐུ་དང་། དེ་ཉིད་མཚན་དཔེའི་བདག་ཉིད་ཡིན་པའི་ཆ་ནས་ལོངས་སྐུ་དང་། དེ་ཉིད་སྲིད་པ་ཇི་སྲིད་བར་གནས་ཤིང་འགྲོ་དོན་མཛད་པའི་ཆ་ནས་སྤྲུལ་སྐུ་ཡིན་ཏེ། མངོན་རྟོགས་བརྒྱན་ལས། ཐུབ་པའི་ངོ་བོ་ཉིད་སྐུ་ནི། ཟག་པ་མེད་པའི་ཆོས་གང་དག །ཟད་པར་བཅུའི་བདག་ཉིད་དང་། ཟིལ་གྱིས་གནོན་པའི་སྐྱེ་མཆེད་ནི། །རབ་ཏུ་དབྱེ་བས་རྣམ་བརྒྱད་དང་། །ཉོན་མོངས་མེད་དང་མངོན་མཁྱེན་དང་། །མངོན་ཤེས་སོ་སོ་རང་དག་རིག །རྣམ་པ་ཐམས་ཅད་དག་གཞི་དང་། །དབང་བཅུ་དང་ནི་སྟོབས་བཅུ་དང་། །མི་འཇིགས་པ་ནི་བཞི་དག་དང་། །བསྲུང་བ་མེད་པ་རྣམ་གསུམ་དང་། །དྲན་པ་ཉེར་བཞག་རྣམ་གསུམ་དང་། །བརྙེལ་བ་མེད་པའི་ཆོས་ཉིད་དང་། །བག་ཆགས་ཡང་དག་བཅོམ་པ་དང་། །སྐྱེ་ལ་ཐུགས་རྗེ་ཆེན་པོ་དང་། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང་། །རྣམ་པ་ཐམས་ཅད་མཁྱེན་ཉིད་དང་། །ཆོས་ཀྱི་སྐུ་ཞེས་བརྗོད་པ་ཡིན། ཞེས་པ་ཆོས་ཀྱི་སྐུ་དང་། མཚན་སུམ་བཅུ་རྩ་གཉིས་དང་། དཔེ་བྱད་བརྒྱད་ཅུའི་བདག་ཉིད་འདི། ཐེག་ཆེན་ཉེ་བར་ལོངས་སྤྱོད་ཕྱིར། ཐུབ་པའི་ལོངས་སྤྱོད་རྫོགས་སྐུར་བཞེད། ཕྱག་ཞབས་འཁོར་ལོའི་མཚན་དང་རུ་སྦལ་ཞབས། ཕྱག་དང་ཞབས་སོར་དྲ་བས་འབྲེལ་བ་དང་། ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། འདིའི་སྐུ་ནི་བདུན་དག་མཐོ་བ་དང་། སོར་མོ་རིང་དང་སྟིང་ཡངས་སྐུ་ཆེ་དྲང་། ཞབས་འབུར་མི་མངོན་སྤུ་ནི་གྱེན་དུ་ཕྱོགས། བྱིན་པ་ཨེ་ན་ཡའི་འདྲ་ཕྱག་རིང་མཛེས། འདོམས་ཀྱི་ལྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། སྤུ་ནི་རེ་རེ་ནས་གཡས་ལེགས་འཁྲུངས་དང་། ཞལ་མཛོད་སྤུས་བརྒྱན་རོ་སྟོད་སེངྒེ་འདྲ། འདི་ཡི་དཔུང་པའི་མགོ་ཟླུམ་ཐོང་ཀ་རྒྱས། འདི་ལ་རོ་མི་ཞིམ་པ་རོ་མཆོག་སྣང་། སྐུ་ནི་ནྱགྲོ་ཏ་ལྟར་ཆུ་ཞེང་གབ། གཙུག་ཏོར་དབུར་ལྡན་ལྗགས་རིང་མཛེས་པ་དང་། ཚངས་དབྱངས་འགྲམ་པ་སེངྒེ་འདྲ་དང་ཚེམས། ཤིན་ཏུ་དཀར་དང་ཚེམས་མཉམ་ཐགས་བཟང་དང་། གྲངས་ནི་བཞི་བཅུ་ཐམ་པ་ཚང་བ་དང་། སྤྱན་ནི་མཐོན་མཐིང་སྤྱན་རྫི་བ་མཆོག་གི ། འདྲ་བ་འདི་དག་སུམ་བཅུ་རྩ་གཉིས་མཚན། ཞེས་པ་དང་། ཐུབ་པའི་སེན་མོ་ཟངས་མདོག་དང་། མདོག་སྣུམ་མཐོན་དང་སོར་མོ་རྣམས། ཟླུམ་རྒྱས་བྱིན་གྱིས་ཕྲ་བ་དང་། རྩ་མི་མངོན་དང་མདུད་པ་མེད། ལོང་བུ་མི་མངོན་ཞབས་མཉམ་དང་། སེངྒེ་གླང་ཆེན་བྱ་དང་ནི། ཁྱུ་མཆོག་སྟབས་གཤེགས་གཡས་ཕྱོགས་དང་། མཛེས་གཤེགས་དྲང་དང་འཁྱིལ་བག་ཆགས། བྱི་དོར་བྱས་འདྲ་རིམ་པར་འཚམ། གཙང་དང་འཇམ་དང་དག་པའི་སྐུ། དཔེ་བྱད་ཡོངས་སུ་རྫོགས་པ་དང་། སྐུའི་ཁོག་ལག་ཡངས་ཤིང་བཟང་། གོམ་སྙོམས་པ་དང་སྤྱན་གཉིས་ནི། དག་དང་བཞོན་ཤ་ཅན་ཉིད་དང་། སྐུ་ཞུམ་མེད་དང་རྒྱས་པ་དང་། ཤིན་ཏུ་འཁྲེགས་པའི་སྐུ་ཉིད། ཡན་ལག་ཤིན་ཏུ་རྣམ་མཛེས་དང་། གཟིགས་པ་སྒྲིབ་མེད་དག་པ་དང་། སྐུ་ཟླུམ་སྐབས་ཕྱིན་མ་སྙོངས་དང་། ཕྱམ་མེ་བ་དང་ལྟེ་བ་ནི། ཟབ་དང་གཡས་ཕྱོགས་འཁྱིལ་པ་དང་། ཀུན་ནས་ལྟ་ན་སྡུག་པ་དང་། ཀུན་སྤྱོད་གཙང་དང་སྐུ་ལ་ནི། སྨེ་བ་ནག་བག་མེད་པ་དང་། ཕྱག་ནི་ཤིང་བལ་ལྟར་འཇམ་དང་། ཕྱག་རིས་མདངས་ཡོད་ཟབ་རི་དང་། ཞལ་ནི་ཧ་ཅང་མི་རིང་དང་། མཆུ་ནི་བིམ་པ་ལྟར་དམར་དང་། ལྗགས་མཉེན་པ་དང་སྲབ་པ་དང་། དམར་དང་འབྲུག་གི་སྒྲ་ཉིད་དང་། གསུང་མཉེན་འཇམ་དང་མཆེ་བ་ཟླུམ། རྣོ་དང་དཀར་དང་མཉམ་པ་དང་། བྱིན་གྱིས་ཕྲ་དང་ཤངས་མཐོ་དང་། མཆོག་ཏུ་དག་པ་དག་དང་ནི། སྤྱན་ཡངས་པ་དང་རྫི་མ་སྟུག །པདྨི་འདབ་མ་འདྲ་བ་དང་། སྨིན་ཚུགས་རིང་དང་འཇམ་པ་དང་། སྣུམ་དང་སྤུ་ནི་འཇམ་པ་དང་། སྙན་རིང་རྒྱས་དང་སྙན་མཉམ་དང་། ཉམས་པ་རྣམ་པར་སྤངས་པ་དང་། དཔྲལ་བ་ལེགས་པར་གྲུབ་པ་དང་། དབྱེས་ཆེ་བ་དང་དབུ་རྒྱས་པ་དང་། དབུ་སྐྲ་བུང་བ་ལྟར་གནག་དང་། སྟུག་དང་འཇམ་དང་མ་འཛིངས་དང་། མི་ཤོར་དྲི་ཞིམ་སྐྱེས་བུ་ཡི། ཡིད་ནི་འཕྲོག་པར་བྱེད་པ་དང་། དཔལ་གྱི་བེའུ་དང་བཀྲ་ཤིས་ནི། གཡུ་རུང་འཁྱིལ་པས་བརྒྱན་པ་སྟེ། སངས་རྒྱས་དཔེ་བྱད་བཟང་པོར་བཞེད། ཞེས་པ་ལོངས་སྐུ་དང་གང་གིས་འཁོར་བ་ཇི་སྲིད་པར། འགྲོ་ལ་ཕན་པ་སྣ་ཚོགས་དང་། ཉམས་སུ་མཛད་པའི་སྐུ་དེ་ནི། ཐུབ་པའི་སྤྲུལ་སྐུ་རྒྱུན་མི་འཆད། ཞེས་པ་སྤྲུལ་སྐུའོ། །སྐུའི་དབྱེ་ལུགས་གཞན་ཡང་། སངས་རྒྱས་སྐུ་ལྔའི་བདག་ཉིད་ཅན། ཁྱབ་བདག་ཡེ་ཤེས་ལྔའི་བདག །ཞེས་ཆོས་ཉིད་ཀྱི་རིགས་ལྔ་དང་། ཡེ་ཤེས་ལྔ་སྐུའི་དབྱེ་བར་གསུངས་པ་ལྟར། བརྟག་གཉིས་ལས། སེམས་ནི་ཆེན་པོ་གཅིག་ཉིད་ལ། །ལྔ་ཡི་གཟུགས་ཀྱིས་རྣམ་པར་མཚོན། །རིགས་ནི་ལྔ་པོ་དེ་ཉིད་ལས། །སྟོང་ཕྲག་དུ་མ་སྐྱེས་པ་ཉིད། །དེ་ཕྱིར་འདི་དག་རང་བཞིན་གཅིག །བདེ་ཆེན་མཆོག་ཏུ་ཕན་པ་ཉིད། །འདོད་ཆགས་ལ་སོགས་སེམས་ལྔ་ཡིན། །དབྱེ་བས་ལྔ་རུ་འགྲོ་བར་འགྱུར། །གང་གཱའི་རླུང་ནི་བཅུ་ཡི་བྱེ་སྙེད་ཉིད། །རིགས་གཅིག་ལ་ནི་དེ་བཞིན་གཤེགས་པའི་ཚོགས། །རིགས་ཀྱི་ཚོགས་ལ་རིགས་ནི་དུ་མ་རྣམས། །དེ་རྣམས་རིགས་ལ་རིགས་ནི་རྣམ་པ་བརྒྱ། །དེ་རྣམས་ལ་ཡང་འབུམ་ཕྲག་རིགས་ཆེན་རྣམས། །བྱེ་བའི་རིགས་ལ་གྲངས་ནི་མེད་པར་འགྱུར། །དེ་ལ་རིགས་ལ་གྲངས་མེད་རིགས་རྣམས་ཉིད། །མཆོག་ཏུ་དགའ་བའི་རིགས་ལས་བྱུང་པ་རྣམས། ཞེས་པ་སེམས་ཆེན་པོ་གཅིག་ཉིད་དང་། བདེ་ཆེན་མཆོག་ཏུ་ཕན་པ་གཅིག་ཉིད། མཆོག་ཏུ་དགའ་བའི་རིགས་གཅིག་ཉིད་ནི་དོན་དམ་པའི་སྐུ་གཅིག་ཡིན་ལ། དེ་ལས་ཕྱེ་བའི་དབྱེ་བ་ཇི་སྙེད་པ་སྐུའི་དབྱེ་བར་འགྱུར་བས་སྐུའི་དབྱེ་ལུགས་གྲངས་མེད་པར་འགྱུར་རོ། །དེ་བཞིན་དུ། གཟུགས་ཀྱི་ཕུང་པོ་མཐའ་ཡས་པ། བདག་གི་སྤྲུལ་པའི་སྐུ་མཆོག་གོ །ཞེས་པའི་དོན་ཡང་། གཟུགས་ཀྱི་ཕུང་པོ་མཐའ་ཡས་པ་དེ་ཉིད་སྤྲུལ་པའི་སྐུ་མཐའ་ཡས་པ་ཡིན་ནོ། །དེ་བཞིན་དུ། སྒྲའི་ཕུང་པོ། ཆོས་ཀྱི་ཕུང་པོ། བདེ་བའི་ཕུང་པོ། ཡེ་ཤེས་ཀྱི་ཕུང་པོ་མཐའ་ཡས་པ་རྣམས་ཀྱང་རིམ་པ་ལྟར། ལོངས་སྐུ། ཆོས་སྐུ། བདེ་བའི་སྐུ། ཡེ་ཤེས་ཀྱི་སྐུ་མཐའ་ཡས་པ་ཡིན་ནོ། །དེ་ལྟར་ན་སྐུའི་གྲངས་མང་ཉུང་ལ་རྩོད་པ་བྱེད་པར་མི་རིགས་སོ། །སངས་རྒྱས་ཀྱིས་ཀུན་རྫོབ་པའི་སྐུར་གསུངས་པ་ནི། མཐོ་ཡོར་ལ་མིར་གསུངས་པ་དང་། ཐག་པ་ལ་སྦྲུལ་དུ་བཟུང་པ་དང་། སྨིག་རྒྱུ་ལ་ཆུར་བཟུང་པ་ལྟར། ཆོས་སྐུའི་རྣམ་འགྱུར་དོན་དམ་གྱི་གཟུགས་སྐུ་སྣང་པ་ལ་གདུལ་བྱ་དངོས་འཛིན་ཅན་གྱིས་དངོས་པོའི་སྐུར་བཟུང་ཞིང་བཏགས་པའི་ཆ་ཡིན་ལ། རྟགས་ཆ་དེ་ལ་ཀུན་རྫོབ་པའི་སྐུ་དང་། བརྡའི་སྐུ་དང་། རྟགས་པ་པའི་སྐུ་ལ་སོགས་པར་གསུངས་སོ། །མཐོ་ཡོར་ལ་མི་མེད་པ་ལྟར་སངས་རྒྱས་རང་ཉིད་ལ་འདུས་བྱས་ཀྱི་དངོས་པོའི་ཆ་རྡུལ་ཕྲ་རབ་ཙམ་ཡང་མཻད། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། ཞེས་པ་དང་། རྡོ་རྗེ་གཅོད་པ་ལས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པར་སོང་ལ་ཞུགས་པ་སྟེ། །སྐུ་བོ་དེ་ཡིས་ང་མི་མཐོང་། །སངས་རྒྱས་རྣམས་ནི་ཆོས་ཀྱི་སྐུ། །འདྲེན་པ་རྣམས་ནི་ཆོས་ཉིད་ལྟ། ཞེས་པའི་དོན། དཔེར་ན་མཐོ་ཡོར་མིར་མཐོང་པ་དེས། མིར་མ་བཏགས་པའི་མཐོ་ཡོར་མི་མཐོང་པ་ལྟར། ཆོས་ཅན་དངོས་པོའི་སྐུ་མཐོང་པ་དེས་ཡིན་ལུགས་ཆོས་ཉིད་ཀྱི་སྐུ་མི་མཐོང་པས། དངོས་པོར་མ་བཏགས་པའི་སངས་རྒྱས་ཡང་དག་མཐོང་པར་འདོད་ན། ཆོས་ཉིད་ཀྱི་སྐུར་བལྟ་བར་བྱའོ། །ཞེས་པ་དང་། ཇི་ལྟར་བྱང་ཆུབ་སེམས་དཔའ་རྟག་ཏུ་ངུས་ཏིང་ངེ་འཛིན་གྱི་ངང་ལས་སངས་རྒྱས་མང་པོ་མཐོང་པ་རྣམས། ཏིང་ངེ་འཛིན་ལས་ལངས་པའི་ཚེ། འདུས་བྱས་དངོས་པོའི་སྐུར་བཟུང་ནས། བྱང་ཆུབ་སེམས་དཔའ་ཆོས་འཕགས་ལ་དྲིས་པའི་ཚེ། སངས་རྒྱས་ཐམས་ཅད་ཆོས་ཉིད་དེ་བཞིན་ཉིད་ཀྱི་སྐུར་ངོ་སྤྲད་པ་བཞིན་ནོ། །རྣལ་འབྱོར་པ་ལ། རང་གི་ཀུན་གཞི་ཡེ་ཤེས་ཆོས་ཀྱི་སྐུ་དེ་གང་གི་ཚེ་ཇི་ལྟར་མངོན་དུ་འགྱུར་ན། མོས་སྤྱོད་ཀྱི་ཚེ། མར་ངོའི་བཅུ་བཞིའི་ཟླ་བ་ཅུང་ཟད་མཐོང་པ་ལྟར་མངོན་སུམ་དུ་འགྱུར་ལ། ས་ལ་ཞུགས་པའི་ཚེ། དེ་ནས་ཚེས་པའི་ཟླ་བ་ལྟར་རིམ་གྱིས་རྒྱས་པར་མཐོང་སྟེ། ཆོས་དབྱིངས་བསྟོད་པ་ལས། ཇི་ལྟར་མར་ངོའི་བཅུ་བཞི་ལ། ཟླ་བ་ཅུང་ཟད་མཐོང་པ་ལྟར། དེ་བཞིན་ཐེག་མཆོག་མོས་རྣམས་ལའང་། སངས་རྒྱས་སྐུ་ནི་ཅུང་ཟད་སྣང་། ཇི་ལྟར་ཚེས་པའི་ཟླ་བ་ལ། སྐད་ཅིག་སྐད་ཅིག་རྒྱས་པར་མཐོང་། དེ་བཞིན་ས་ལ་ཞུགས་རྣམས་ལ། རིམ་གྱིས་རིམ་གྱིས་རྒྱས་པར་མཐོང་། ཇི་ལྟར་ཡར་ངོའི་བཅོ་ལྔ་ལ། ཟླ་བ་རྫོགས་པར་འགྱུར་བ་ལྟར། དེ་བཞིན་ས་ཡི་མཐར་ཐུག་ན། ཆོས་ཀྱི་སྐུ་ཡང་རྫོགས་ཤིང་གསལ། ཞེས་པ་དང་། དེ་བཞིན་དུ། དུས་འཁོར་གྱི་རྩ་རྒྱུད་ལས། ཇི་ལྟར་ཟླ་ཤར་རིམ་པ་ཡིས། །ཆ་རྣམས་ཀྱིས་ནི་རྫོགས་པར་འགྱུར། །གྲིབ་མ་ཉམས་པ་རྫོགས་པ་སྟེ། །ཟླ་བ་ཆད་དང་རྫོགས་པ་མིན། །དེ་བཞིན་ཡེ་ཤེས་ཤར་རིམ་པས། །ས་རྣམས་ཀྱིས་ནི་རྫོགས་པར་འགྱུར། །ཉོན་མོངས་ལ་སོགས་ཉམས་པ་རྫོགས། །ཡེ་ཤེས་ཆད་དང་རྫོགས་པ་མིན། ཞེས་པའོ། །དེ་ལྟར་ཀུན་གཞི་ཡེ་ཤེས་ཆོས་ཀྱི་སྐུ་དེ་ཡོན་ཏན་ཐམས་ཅད་ཡེ་ནས་རྫོགས་པའི་ཚུལ་གྱིས། གཞི་སེམས་ཅན་གྱི་དུས་ན་གནམ་གང་ལ་ཟླ་བ་མ་ཆད་པ་བཞིན་ཡོད། སློབ་པ་ལམ་གྱི་དུས་ན། ཚེས་གཅིག་གཉིས་ལ་སོགས་པའི་ཆ་རིམ་གྱིས་མཐོང་བ་ལྟར་ཡོད། འབྲས་བུ་སངས་རྒྱས་པའི་ཚེ་ཉ་གང་པའི་ཟླ་བ་ལྟར་ཡོད། ཞེས་པའི་དོན་ནོ། །དེ་ཡང་ཇི་ལྟར་གང་གིས་མཐོང་ན། མངོན་ཤེས་མེད་པའི་ལས་དང་པོ་པས་མཐོང་བའི་འོད་གསལ་མཐོང་བྱ་མཐོང་བྱེད་གཉིས་ཀ་ཉའི་སྤྱན་དང་། དེ་ནས་མངོན་ཤེས་ཐོབ་པའི་འོད་གསལ་མཐོང་བྱ་མཐོང་བྱེད་གཉིས་ཀ་ལྷའི་སྤྱན་དང་། དེ་ནས་ས་དང་པོའི་འོད་གསལ་མཐོང་བྱ་མཐོང་བྱེད་གཉིས་ཀ་སངས་རྒྱས་སྤྱན་དང་། ས་གཉིས་པ་ནས་བྱང་ཆུབ་སེམས་དཔའི་འོད་གསལ་མཐོང་བྱ་མཐོང་བྱེད་གཉིས་ཀ་ཤེས་རབ་ཀྱི་སྤྱན་དང་། སངས་རྒྱས་ཀྱི་འོད་གསལ་མཐོང་བྱ་མཐོང་བྱེད་གཉིས་ཀ་ཡེ་ཤེས་ཀྱི་སྤྱན་དང་། དེ་ལྟར་ཀུན་གཞིའི་དེ་བཞིན་གཤེགས་པ་གཅིག་ཉིད་ལམ་གྱི་རིམ་པ་སྤྱན་ལྔར་བཞག་པ་ནི། དྲི་མེད་འོད་ལས། འདིར་དང་པོར་ལས་དང་པོ་པའི་རྣལ་འབྱོར་པས་མངོན་པར་ཤེས་པ་མེད་པར་ཤའི་མིག་གིས་སྣ་ཚོགས་མཐོང་ངོ། །དེ་ནས་མངོན་པར་ཤེས་པའི་མཚམས་ཀྱི་དབང་གིས་ལྷའི་མིག་གིས་མཐོང་ངོ་། །དེ་ནས་ཆགས་པ་དང་བྲལ་བའི་མཚམས་ཀྱི་དབང་གིས་སངས་རྒྱས་ཀྱི་སྤྱན་གྱིས་གཟིགས་སོ། །དེ་ནས་བྱང་ཆུབ་སེམས་དཔའི་འཚམས་ཀྱི་དབང་གིས་ཤེས་རབ་ཀྱི་སྤྱན་གྱིས་གཟིགས་སོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་ཐུགས་ཀྱི་དབང་གིས་ཡེ་ཤེས་ཀྱི་སྤྱན་གྱིས་གཟིགས་སོ། །ལྷག་མ་ཀུན་ལས་རྣམ་གྲོལ་ཞིང་ཞེས་པའོ། །དེ་ལྟར་དེ་བཞིན་གཤེགས་པའི་ཤ་ལ་སོགས་པའི་སྤྱན་ལྔ་པོ་རྣམས་ནི་སྟོང་པ་ཉིད་གཟིགས་པའི་སླད་དུ་སྟེ། སེམས་ཅན་གཞན་རྣམས་ནི་སྟོང་པ་ཉིད་ལྟ་བའི་ཡུལ་ལ་དམུས་ལོང་ངོ་། །ཞེས་པའོ། །འཕགས་པ་རྡོ་རྗེ་སྙིང་པོས་མཛད་པའི་འགྲེལ་པར་ཡང་འདི་རང་མཐུན་པར་འབྱུང་ངོ་། །དེ་ཡང་སྒྲིབ་པའི་ས་བོན་རླུང་ཁུག་པ་གཅིག་མ་འགགས་ཀྱི་བར་དུ་མངོན་ཤེས་ཐར་ཐོར་འབྱུང་ཡང་བསྟན་སོ་མ་ཟིན་པས་གྲུལ་ཐུབ་པ་དཀའོ། །རླུང་ཁུག་པ་གཅིག་འགགས་ནས་མངོན་ཤེས་གྲུལ་ཐུབ་འཆར་རོ། །དེ་ལྟར་ངོ་བོ་ཉིད་ཀྱི་སྐུའི་ཡོ་ལང་ཐམས་ཅད་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། ངོ་བོ་ཉིད་ཀྱི་སྐུ་ཡི་གདངས་ཆེན་པོ། ངོ་བོ་ཉིད་ཀྱི་སྐུའི་ཀློང་ཆེན་པོ། ངོ་བོ་ཉིད་ཀྱི་སྐུའི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།
སྤྲུལ་སྐུའི་སྤྲུལ་སྒྱུར་རྣམས་ངོ་སྤྲད་པ།
གཉིས་པ་སྤྲུལ་སྐུའི་སྤྲུལ་སྒྱུར་རྣམས་ངོ་སྤྲད་པ་ནི། མདོ་སྡེ་བརྒྱན་ལས། །ལེན་དང་གནས་དང་གཏོང་བ་དང་། །སྤྲུལ་དང་ཡོངས་སུ་སྒྱུར་བ་དང་། །ཏིང་ངེ་འཛིན་དང་ཡེ་ཤེས་ལ། །མངའ་བརྙེད་ཁྱོད་ལ་ཕྱག་འཚལ་ལོ། །ཞེས་པའི་དོན་ནི། ཀུན་གཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ནི་བྱེད་པ་བཅིངས་པའི་སྦྱོར་བས་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། སྒྲིབ་པའི་ས་བོན་རླུང་ཁུག་པ་གཅིག་འགགས་ཤིང་འགྱུར་མེད་བདེ་བའི་སྐད་ཅིག་གི་ཏིང་ངེ་འཛིན་ཐོབ་ནས། ཀུན་གཞི་ཡེ་ཤེས་ཆོས་ཀྱི་སྐུའི་སྤྲུལ་སྒྱུར་དཔག་ཏུ་མེད་པ་སྟོན་ཅིང་། དེ་ཡང་ཚོགས་ལམ་ནས་ཆོས་ཀྱི་རྒྱུན་གྱི་ཏིང་ངེ་འཛིན་དང་། སྤྱན་དང་མངོན་ཤེས་ཀྱི་རྣམ་འཕྲུལ་དཔག་ཏུ་མེད་པ་འབྱུང་སྟེ། འབུམ་དང་ཉི་ཁྲི་ལས། དེ་ལ་བྱང་ཆུབ་སེམས་དཔའི་ཤའི་སྤྱན་གྱིས་དཔག་ཚད་བརྒྱ་མཐོང་པ་ཡོད་དོ། །དེ་བཞིན་དུ་དཔག་ཚད་སྟོང་དང་། ལྷོ་འཛམ་བུ་གླིང་དང་། ནུབ་ཀྱི་བ་ལང་སྤྱོད། བྱང་གི་སྒྲ་མི་སྙན་དང་། ཤར་གྱི་ལུས་འཕགས་པོ་དང་། སྟོང་གཅིག་དང་། སྟོང་གཉིས་དང་། སྟོང་གསུམ་གྱི་སྟོང་ཆེན་པོའི་མཐོང་པ་ཡོད་དོ། །ཞེས་པའི་དོན་གསུངས་སོ། །དེ་བཞིན་དུ། བྱང་ཆུབ་སེམས་དཔའི་ལྷའི་མིག་གིས་འདོད་ལྷ་དྲུག་ནས་ཚངས་རིས་ལ་སོགས་པ་ལྷའི་མིག་ཐམས་ཅད་ཤེས་ཤིང་། ལྷ་དེ་རྣམས་ཀྱི་མིག་གིས་བྱང་ཆུབ་སེམས་དཔའི་ལྷའི་མིག་མི་ཤེས་པ་དང་། བྱང་ཆུབ་སེམས་དཔའི་ཤེས་རབ་ཀྱི་མིག་གིས་རིག་པའི་གནས་ལྔ་ལ་མི་ཤེས་པ་དང་། ཁོང་དུ་མ་ཆུད་པ་དང་། མི་མཁྱེན་པ་གཅིག་ཀྱང་མེད་པ་དང་། བྱང་ཆུབ་སེམས་དཔའི་ཆོས་ཀྱི་མིག་གིས་ཐེག་པ་གསུམ་གྱི་ཆོས་དང་། གང་ཟག་གི་རྣམ་བཞག་དང་། རྒྱུད་ཚོད་དང་། མཐོ་དམའ་དང་། སྤངས་རྟོགས་ཀྱི་གོ་རིམས་ཐམས་ཅད་ཤེས་པ་དང་། བྱང་ཆུབ་སེམས་དཔའི་སངས་རྒྱས་ཀྱི་མིག་ནི་རྡོ་རྗེ་ལྟ་བུའི་ཏིང་ངེ་འཛིན་ཏེ། མིག་དེས་མ་མཐོང་པ་དང་། མ་ཐོས་པ་དང་། མི་ཤེས་པ་གང་ཅུང་ཟད་ཙམ་ཡང་མེད་དོ། །བྱང་ཆུབ་སེམས་དཔའི་ས་དང་པོར། འཚོ་བ་མེད་པ་དང་། འཆི་བ་དང་། སྨད་པ་དང་ངན་འགྲོ་འཁོར་གྱི་ས་མི་འཇིགས་པ་ལྔ་ཐོབ་སྟེ། མདོ་ཕལ་པོ་ཆེ་ལས། ས་ཐོབ་གྱུར་མ་ཐག་ཏུ་འཇིགས་པ་ལྔ་དང་བྲལ། འཚོ་བ་མེད་དང་འཆི་དང་མི་སྔགས་ངན་འགྲོ་དང་། འཁོར་གྱི་འཇིགས་བྲལ་དེ་ལ་བག་ཚའི་རྣམ་པ་མེད། ཅི་ཕྱིར་ཞེ་ན་དེ་ལ་བདག་གི་གནས་མེད་དོ། །ཞེས་པ་དང་། མདོ་སྡེ་བརྒྱན་ལས། དབང་པོ་ལྔ་རྣམས་གཞན་གྱུར་ན། དོན་ཀུན་འཇུག་དང་ཐམས་ཅད་ལ། ཡོན་ཏན་བརྒྱ་ཕྲག་བཅུ་གཉིས་འབྱུང་། ཞེས་པའི་དོན། ས་དང་པོར་མིག་སའི་སྙིང་པོ་ལ་སོགས་པ་དབང་པོ་ལྔ། དྲི་བཅས་ཀྱི་གནས་དྲི་མེད་དུ་གྱུར་ནས། དབང་པོ་རེ་རེས་ཡང་ཡུལ་དྲུག་པོ་ཐམས་ཅད་ལ་འཇུག་ཅིང་། ཡུལ་དྲུག་པོ་ཐམས་ཅད་ཤེས་ཏེ། །མིག་གིས་ཡུལ་དྲུག་པོ་ཐམས་ཅད་ལ་དེ་བཞིན་དུ་རྣ་བ་དང་། སྣ་དང་ལྕེ་དང་ལུས་དང་ཡིད་ཀྱི་དབང་པོ་རེ་རེས་ཀྱང་ཡུལ་དྲུག་པོ་ཐམས་ཅད་ཤེས་ཏེ། མདོ་ཕལ་པོ་ཆེ་ལས། བྱང་ཆུབ་སེམས་དཔའི་ནོར་བཟངས་ཀྱིས་བླ་མ་དགཻན་༼དགེ་འདུན་༽མ་བཟང་མོའི་མཆོག་གི་ནོར་བཟངས་ལ་སྨྲས་པ་འདི་ལྟ་སྟེ། སྨྲས་པ། ཁོ་མོས་ཆོས་ཀྱི་རྣམ་གྲངས་ནི། གནས་མེད་དཀྱིལ་འཁོར་ཤེས་ཤིང་སྟོན་པ་སྟེ། ཐོག་མེད་ཞེས་བྱའི་ཏིང་ངེ་འཛིན་ཀྱང་ཐོབ། འདིར་གནས་ཆོས་ཀུན་ཤེས་ལ་ཐོགས་པ་མེད། མིག་གིས་ཐམས་ཅད་ཤེས་ཤིང་རྣ་བས་ཐམས་ཅད་ཤེས། སྣ་ཡིས་ཐམས་ཅད་ཤེས་ཤིང་ལྕེ་ཡི་ཐམས་ཅད་ཤེས། ལུས་ཀྱི་ཐམས་ཅད་ཤེས་ཤིང་ཡིད་ཀྱིས་ཐམས་ཅད་ཤེས། ཐམས་ཅད་ཤེས་པའི་བྱིན་བརླབས་ཐོགས་པ་མེད། ཐམས་ཅད་ཤེས་པའི་སྣང་བ་ཐོགས་པ་མེད། ཐམས་ཅད་ཤེས་པའི་ཤུགས་ལ་ཐོགས་མེད་འཇུག །ཞེས་པའོ། །དབང་པོ་རེ་རེས་ཡུལ་ཐམས་ཅད་ལ་འཇུག་པ་དེ་བཞིན་དུ། ཡུལ་དང་དབང་པོ་གནད་གཅིག་པས་ཡུལ་རེ་རེ་ཡང་ཡུལ་དྲུག་པོ་ཐམས་ཅད་དུ་འཆར་ཞིང་། ཡུལ་གཟུགས་ལྟ་བུ་གཅིག་ཀྱང་སྒྲ་ལ་སོགས་པ་ཡུལ་ཐམས་ཅད་དུ་རུང་ངོ་། །དབུ་མ་རྩ་ཤེས་ལས། གང་ལ་སྟོང་པ་ཉིད་རུང་བ། དེ་ལ་ཐམས་ཅད་རུང་བ་ཡིན། ཞེས་པ་དང་། ཆོས་དབྱིངས་བསྟོད་པ་ལས། གང་ཡང་རུང་ལ་ཕྱག་འཚལ་ལོ། །ཞེས་པའི་དོན་ནོ། །ཀུན་རྫོབ་ཐམས་ཅད་ནི་མཐར་ལྷུང་ཞིང་ཕྱོགས་སུ་ཆད་པས། དབང་པོ་གཅིག་ཡུལ་གཟུགས་ལྟ་བུ་གཅིག་ཁོ་ན་ལ་འཇུག་ཅིང་། ཡུལ་གཅིག་ཀྱང་ཁོ་ནའི་སྤྱོད་ཡུལ་དུ་རུང་པ་དབང་པོ་གཞན་གྱི་སྤྱོད་ཡུལ་དུ་མི་འགྱུར་རོ། །དོན་དམ་པ་ནི་མཐར་མ་ལྷུང་ཞིང་ཕྱོགས་རིས་སུ་མ་ཆད་པ་དབུ་མའི་ཆོས་ཡིན་པས་དོན་དམ་གྱི་ཆོས་ཐམས་ཅད་ཡིན་ཞིང་། དོན་དམ་གྱི་ཆོས་ཐམས་ཅད་དོན་དམ་གྱི་ཆོས་གཅིག་ཡིན་ཏེ། ཕལ་ཕྱིན་གྱི་འགྲེལ་པར་དབུ་མའི་ལུང་དྲངས་པ་ནི། དངོས་པོ་གཅིག་དངོས་པོ་ཀུན་གྱི་ངོ་བོ་ཉིད། དངོས་པོ་ཀུན་དང་དངོས་པོ་གཅིག་གི་ངོ་བོ་ཉིད། གང་གི་དངོས་གཅིག་དེ་བཞིན་ཉིད་མཐོང་བ། དེ་ཡིས་དངོས་ཀུན་དེ་བཞིན་ཉིད་དུ་མཐོང་། ཝཞེས་པའི་དོན་ནོ། །དབང་པོ་རེ་རེ་ལ་ཡང་ཡོན་ཏན་བརྒྱ་ཕྲག་བཅུ་གཉིས་རེ་འབྱུང་བ་ནི། མདོ་ཕལ་པོ་ཆེ་ལས། སྐད་ཅིག་ཡུད་ཙམ་ཐང་གཅིག་ལ་ཏིང་ངེ་འཛིན་བརྒྱ་རབ་ཏུ་ཐོབ་ཅིང་སྙོམ་པར་འཇུག་པ་དང་། སངས་རྒྱས་བརྒྱ་མཐོང་བ་དང་། དེ་དག་གིས་བྱིན་གྱིས་བརླབས་ཀྱང་ཡང་དག་པར་ཤེས་པ་དང་། འཇིག་རྟེན་གྱི་ཁམས་བརྒྱ་སྐྱོད་པ་དང་། སངས་རྒྱས་ཀྱི་ཞིང་བརྒྱར་འགྲོ་བ་དང་། འཇིག་རྟེན་གྱི་ཁམས་བརྒྱ་སྣང་བར་བྱེད་པ་དང་། སེམས་ཅན་བརྒྱ་ཡོངས་སུ་སྨིན་པར་བྱེད་པ་དང་། བསྐལ་པ་བརྒྱར་གནས་པར་བྱེད་པ་དང་། སྔོན་གྱི་མཐའ་དང་ཕྱི་མའི་མཐའི་བསྐལ་པ་བརྒྱ་ལ་རབ་ཏུ་འཇུག་པ་དང་། ཆོས་ཀྱི་སྒོ་བརྒྱ་རྣམ་པར་འབྱེད་པ་དང་། ལུས་བརྒྱ་ཡོངས་སུ་སྟོན་པ་དང་། ལུས་རེ་ལ་ཡང་བྱང་ཆུབ་སེམས་དཔའི་འཁོར་བརྒྱ་ཡང་དག་པར་སྟོན་པར་བྱེད་པའི་བརྩོན་གྲུས་ཀྱི་རྣམ་པ་དེ་ལྟ་བུ་རྩོམ་མོ། །ཞེས་པའོ། །དེ་ལ་མིག་གི་དབང་པོ་གཅིག་གིས་ཏིང་ངེ་འཛིན་མི་འདྲ་བ་བརྒྱ་ཐོབ་ཅིང་། དེ་ལ་སྙོམས་པར་འཇུག་པ་དང་། སངས་རྒྱས་བརྒྱ་མཐོང་བ་དང་། ལུས་བརྒྱ་སྟོན་པ་དང་། ལུས་རེ་རེ་ལ་ཡང་བྱང་ཆུབ་སེམས་དཔའི་འཁོར་བརྒྱ་རེས་བསྐོར་བ་སྟོན་པའི་བར་ཡོན་ཏན་བརྒྱ་ཕྲག་བཅུ་གཉིས་པོ་འབྱུང་པ་དེ་བཞིན་དུ་དབང་པོ་རེ་རེ་ལའང་ཡོན་ཏན་བརྒྱ་ཕྲག་བཅུ་གཉིས་པོ་དེ་རེ་རེ་འབྱུང་ངོ་། །ཆོས་ཉིད་ཀྱི་སྐུ་གཅིག་ཉིད་ལས། མཉམ་བཞག་ཟབ་མོའི་ངང་ནས་དུས་གསུམ་གྱི་སྣང་པ་ཚད་མེད་པའི་སྤྲུལ་པ་དཔག་ཏུ་མེད་པ་སྤྲོ་བ་ཡང་། མདོ་ཕལ་པོ་ཆེ་ལས། བྱང་ཆུབ་སེམས་དཔའ་ནོར་བཟངས་ཀྱིས་དགེ་སློང་རྒྱ་མཚོའི་རྒྱལ་མཚན་མཐོང་པ་འདི་ལྟ་སྟེ། དེ་ནས་ནོར་བཟངས་ཆོས་ཀྱི་ནོར་ལྡན་པ། རྒྱལ་བའི་སྲས་ཀྱི་རྣམ་ཐར་ཡངས་ལ་སེམ། རིམ་གྱིས་མགོ་འགེབས་རྒྱས་པར་འགེངས་པར་ཕྱིན། དགེ་སློང་རྒྱ་མཚོའི་རྒྱལ་མཚན་བཙལ་བ་ལས། ཆོས་སྐུས་ནམ་མཁའི་མཐར་ཐུག་ཁྱབ་པ་ཅན། ཡེ་ཤེས་སྒྱུ་མའི་འཕྲུལ་གྱིས་ཆོས་དབྱིངས་འགེངས། དཔག་མེད་སྤྲུལ་པ་འགྱེད་ལ་མཁས་པ་དེ། འཆག་གནས་ཞིག་གི་འཆག་པའི་པར་འདུག་སྟེ། ལུས་ནི་དྲང་བསེང་དྲན་པ་མངོན་བྱས་ནས། དབུགས་ནི་ཕྱི་ནང་རྒྱུ་མེད་མི་གཡོ་ཞིང་། ཏིང་ངེ་འཛིན་ལ་མཉམ་བཞག་སྤྲོས་མེད་ལས། མཐའ་ཡས་སྤྲུལ་པ་དཔག་མེད་འགྱེད་པ་མཐོང་། རྣམ་ཐར་བསམ་མི་ཁྱབ་པའི་མཐུ་ཡིས་སེམས་ཀྱིས་སྐད་ཅིག་རེ་རེ་ལ། སེམས་ཅན་ཡོངས་སྨིན་བདེ་གཤེགས་ཀུན་མཆོད་སངས་རྒྱས་ཞིང་ཀུན་དག་པ་དང་། འགྲོ་བའི་བདེ་སྡུག་སྒྲུབ་དང་ཟློག་ཅིང་ཐམས་ཅད་མཁྱེན་ལ་དགོད་པའི་ཕྱིར། ཆོས་ཀྱི་སྐུ་ལས་རྣམ་འཕྲུལ་སྣ་ཚོགས་ཆོས་དབྱིངས་རྒྱས་པར་འདི་ལྟར་འགེངས། དེ་ཡི་རྐང་པའི་ཐིལ་དྲ་ལས། གྲངས་མེད་ཞིང་གི་རྡུལ་སྙེད་ཀྱི། ཚོང་དཔོན་འཁོར་མང་འབྱོར་ལྡན་པ། བྱུང་བ་ནོར་བཟངས་འཕགས་པས་མཐོང་། དེའི་བོལ་གོང་གཉིས་དག་ལས། བྲམ་ཟེ་ཁྱིམ་བདག་དེ་སྙེད་བྱུང་། སྣ་ཚོགས་ཟས་གོས་འདོད་ཡོན་གྱིས། ཕྱོགས་བཅུ་བཀང་སྟེ་འགྲོ་བ་མཐོང་། དེའི་སྤུས་མོའི་ལྷ་ང་གཉིས་ནས་ཀྱང་། འགྲོ་བ་ཀུན་གྱི་གཟུགས་འཛིན་མཁས་པའི་གཟུགས། གྲངས་མེད་ཞིང་གི་རྡུལ་སྙེད་རྣམས་བྱུང་ཞིང་། ཕྱོགས་བཅུ་བཀང་སྟེ་གནོད་སེལ་ཕན་སྒྲུབ་མཐོང་། དེ་ཡི་ལྟེ་བའི་དཀྱིལ་འཁོར་ནས། དྲང་སྲོང་འགྲོ་ཀུན་ལུས་དབྱིབས་ཅན། དེ་སྙེད་བྱུང་ནས་དཀོན་མཆོག་གི །སྒྲ་བརྗོད་ཞི་ཕན་བྱེད་པ་མཐོང་། རྩེབས་ལོགས་གཉིས་ནས་ཀླུ་ཡི་བུ་མོ་སེམས་ཅན་དྲངས་དང་མཉམ་པ་བྱུང་། རིན་ཆེན་སྤོས་དང་མེ་ཏོག་ཕྲེང་བ་གདུགས་དང་རྒྱལ་མཚན་བ་དན་དང་། འཕྱང་འཕྲུལ་སྣ་ཚོགས་རྒྱལ་སྲས་ལྷ་དང་ལྷ་མོས་ཆོས་དང་མེ་ཏོག་དང་། རིན་ཆེན་སྤྲིན་གྱི་ཆར་འབེབས་ལེགས་བརྒྱན་ཆོས་དབྱིངས་རྒྱས་པར་འགེངས་པ་མཐོང་། ཐོང་ཀའི་དཔལ་གྱི་བེའུ་ལས་ཀྱང་ལྷ་མིན་དབང་པོ་དེ་སྙེད་བྱུང་། རྒྱབ་གཞུང་ནས་ཀྱང་ཉན་རང་དེ་སྙེད་བྱུང་ནས་སྲིད་ཟློག་ཞི་ཆོས་སྟོན། ཕྲག་པའི་ལྷུ་གཉིས་ནས་ཀྱང་གནོད་སྦྱིན་སྲིན་པོའི་དབང་པོ་དེ་སྙེད་བྱུང་། མདུན་གྱི་ལྟོ་ནས་མིའམ་ཅི་དང་དྲི་ཟའི་དབང་པོ་དེ་སྙེད་བྱུང་། ཁའི་སྒོ་ནས་འཁོར་ལོས་བསྒྱུར་རྒྱལ་དེ་སྙེད་བྱུང་། མིག་གཉིས་ནས་ཀྱང་ཉི་མའི་དཀྱིལ་འཁོར་དེ་སྙེད་བྱུང་། སྨིས་མཚམས་མཛོད་སྤུ་ནས་ཀྱང་ཟླ་བ་དེ་སྙེད་བྱུང་། དཔྲལ་བ་ནས་ཀྱང་ཚངས་པ་ཆེན་པོ་དེ་སྙེད་བྱུང་། །མགོ་ནས་རྒྱལ་སྲས་གྲངས་མེད་ཞིང་གི་རྡུལ། །དེ་སྙེད་དང་མཚུངས་ཕྲག་བཅུ་བྱུང་ནས་ནི། །དུས་གསུམ་གྱིས་བསྡུས་རྒྱལ་དང་རྒྱལ་སྲས་ཀྱི། །ཕ་རོལ་ཕྱིན་བཅུའི་རྣམ་ཐར་རྒྱ་མཚོ་སྟོན། །གཙུག་ཏོར་ནས་ཀྱང་བདེ་གཤེགས་དེ་སྙེད་བྱུང་། །མཚན་དཔེའི་རྣམ་རྒྱན་འོད་ནི་ཕྱོགས་བཅུར་འབར། །ཆོས་དབྱིངས་རྒྱས་འགེངས་གསུང་ལྔ་སངས་རྒྱས་ཀྱི། །རྣམ་འཕྲུལ་མཐའ་དབུས་མེད་པ་ཡོངས་སྟོན་པ། །འགྲོ་བ་ཀུན་ལ་མཚུངས་པར་ཆོས་ཆར་འབེབས། །རྒྱལ་སྲས་ཀུན་ལ་རང་འཚམ་ཆོས་ཆར་དང་། །ལྷ་དང་ལྷ་མིན་གནོད་སྦྱིན་དྲི་ཟ་དང་། །མིའམ་ཅི་དང་ནམ་མཁའ་ལྡིང་དང་ཀླུ། །ལྟོ་འཕྱེ་དམྱལ་བ་ཡི་དྭགས་དུད་འགྲོ་ཡི། །གནས་སུ་ཆོས་སྒོ་ཐ་དད་དུ་མའི་ཆར། །འབེབས་པས་ཆོས་དབྱིངས་རྒྱས་པར་འགེངས་པ་མཐོང་། །དེ་ཡི་བ་སྤུ་ཀུན་ལས་སྤུ་དེའི་སྒོ་ནས་ཀྱང་། །འོད་ཟེར་དྲྭ་བ་གྲངས་མེད་གྲོང་དང་བརྒྱན་གྱིས་གང་། །བྱ་བ་སྣ་ཚོགས་གྲངས་མེད་བྱེད་ལ་ཉེར་གནས་པས། །ཕྱོགས་བཅུའི་ཆོས་དབྱིངས་རྒྱས་པར་འགེངས་པ་མཐོང་། །བ་སྤུ་སོ་སོའི་འོད་ཟེར་དྲྭ་བ་ལས། །ཐ་དད་སོ་སོ་དུས་གསུམ་རྒྱལ་སྲས་ཀྱི། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཐབས་དང་སྨོན་ལམ་དང་། །སྟོབས་དང་ཡེ་ཤེས་ཕ་རོལ་ཕྱིན་པ་ཡི། །སྤྱོད་པ་དཔག་མེད་སྦྱོར་བ་མཐའ་ཡས་པ། །མེ་ལོང་ནང་གི་གཅན་གཟན་ཇི་བཞིན་དུ། །མ་འཆོལ་མ་འདྲེས་མ་སྒྲིབས་སོ་སོར་སྣང་། །གཅན་གཟན་མ་ལུས་འཆང་བའི་ཡེ་ཤེས་ལུས་དངོས་ཅན། །སྒྱུ་མའི་རྣམ་ཐར་རྒྱ་མཚོས་ཆོས་དབྱིངས་རྒྱས་འགེངས་པ། །དགེ་སློང་རྒྱ་མཚོའི་རྒྱལ་མཚན་དེ་ལྟར་མཉམ་བཞག་ལ། །ནོར་བཟངས་སེམས་ཤིང་རྗེས་དྲན་རྣམ་ཐར་དེར་འཇུག་ཕྱིར། །དེའི་མདུན་དུ་ཟླ་དྲུག་ཞག་དྲུག་བར་དུ་ལོན། ཞེས་པ་སྟེ། སངས་རྒྱས་ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །སངས་རྒྱས་སྤྲུལ་པའི་འཁོར་ལོ་འཆང་། །གཟུགས་རྣམས་སྣ་ཚོགས་ཀུན་ཏུ་སྟོན། ཞེས་པའི་དོན་ནོ། །མངོན་ཤེས་དྲུག་ལས། རྫུ་འཕྲུལ་གྱི་མངོན་པར་ཤེས་པ་ནི། སྣང་བའི་མོད་ལ་མི་སྣང་བ། །མི་སྣང་བའི་མོད་ལ་སྣ་ཚོགས་སུ་སྣང་པ་དང་། གཅིག་མང་པོར་སྣང་བ་དང་། མང་པོ་གཅིག་ཏུ་བསྡུད་པ་དང་། དུས་གསུམ་གྱི་བསྐལ་པ་ཚད་མེད་པའི་དུས་སྐད་ཅིག་མ་ཅིག་དུ་བསྡུད་པ་དང་། དུས་སྐད་ཅིག་མ་ཅིག་ཀྱང་དུས་གསུམ་གྱི་བསྐལ་པ་མཐའ་ཡས་པའི་ཡུན་དུ་སྣང་པ་དང་། རྡུལ་ཕྲ་རབ་གཅིག་གི་ཁྱོན་ལ་དུས་གསུམ་གྱི་སྣོད་བཅུད་ཐམས་ཅད་ཡངས་དོག་མེད་པར་སྣང་ཡང་། རྡུལ་ཕྲན་ཆེ་བར་མི་མངོན་ཞིང་། སྣོད་བཅུད་ཀྱི་འཇིག་རྟེན་ཆུང་པར་མི་མངོན་པ་ལ་སོགས་པ་བསམ་གྱིས་མི་ཁྱབ་པའི་རྣམ་པར་འཕྲུལ་པ་རྣམས་ཏེ། ནམ་མཁའ་ལས་བྱུང་རང་བྱུང་པ། ནམ་མཁའི་བདག་པོ་སྣ་ཚོགས་སྟོན། ཞེས་པའི་དོན་དང་། དག་པ་འདི་ནི་བཞེད་པ་འཇུག་པ་ཡིས། རྡུལ་གཅིག་ཡུལ་ལ་མཁའ་སྟུགས་འཇིག་རྟེན་སྟོན། འཇིག་རྟེན་མཐའ་ཡས་ཕྱོགས་ཁྱབ་རྡུལ་སྟོན་མོད། རྡུལ་རགས་མི་འགྱུར་འཇིག་རྟེན་ཕྲ་མི་འགྱུར། ཞེས་པའི་དོན་དང་། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་། ཞེས་པའི་དོན་དང་། དད་པའི་སྟོབས་སྐྱེད་པ་ལ་འཇུག་པ་ཕྱག་རྒྱའི་མདོར། འཇམ་དཔལ་འདི་ལྟེ་སྟེ་དཔེར་ན། མཚོ་དཔག་ཚད་འབུམ་ཕྲག་ལྔ་པ། བྱ་རོག་གིས་བཏུང་དུ་ང་བར་མུ་དང་ཁ་ད་ཆོད་དུ་གྱུར་པ། པདྨི་འདབ་མས་གཡོགས་པ་ཞིག་ཡོད་ལ། དེ་ལ་སྐྱེས་བུ་ལ་ལས་ཞིག་གིས་ལྕགས་ཀྱི་ཤིང་རྟ་འཕང་ལོ་རྩིབ་མ་སྟོང་ཡོད་པ། ནམ་མཁའ་ལྡིང་གིས་འགྱོགས་པ་དབས་ཀྱང་ལྷག་པའི་རྟ་དེ་ལྟ་བུར་ཤིང་རྟ་དྲངས་ཏེ། དེ་ལྟར་འགྱོགས་པའི་ཤིང་རྟ་དྲངས་ནས་འཕང་ལོའང་ཆུས་མི་རེག་རྟའི་རྨིག་པས་ཀྱང་པདྨི་འདབ་མ་མི་སྟོལ་བ་དེ་ལྟ་བུའི་ཤིང་རྟ་དེ་དྲངས་པ་ལས། མཚེ་ཆེན་པོ་དེ་ནས་སྦྲུལ་གདུག་པ་ཞིག་དུ་བྱང་དེ་སྐད་ཅིག་གང་ལ་ཤིང་རྟར་བསྐྱུར་བའི་སྐད་ཅིག་རེ་ལ་སྦྲུལ་གདུག་པ་དེས་ཤིང་རྟ་དེ་ལན་བཅུ་རུ་སྐོར་ཏེ་འཇམ་དཔལ་སྐད་ཅིག་གང་གིས་སྦྲུལ་གདུག་པས་ཤིང་རྟ་དེ་ལན་གཅིག་བསྐོར་བའི་སྐད་ཅིག་དེ་ལ། དགེ་སློང་ཀུན་དགའ་བོས་ཆོས་རྣམ་པ་བཅུ་སྟན་པ་བཤད་དེ་དོན་ཡང་དག་པར་བྱེད་དོ། །དགེ་སློང་ཀུན་དགའ་བོས་ཆོས་གཅིག་སྟོན་པ་བཤད་པའི་སྐད་ཅིག་དེ་ལ། དགེ་སློང་ཤཱ་རིའི་བུས་ཆོས་ཉམ་པ་སྟོང་སྟན་པ་བཤད་ནས་དོན་ཡང་རིག་པར་བྱེད་དོ། །དགེ་སློང་ཤཱ་རིའི་བུས་སྐད་ཅིག་གང་ལ་ཆོས་གཅིག་སྟན་པ་བཤད་པའི་སྐད་ཅིག་དེ་ལ། གནས་བརྟན་མེའུ་མགལ་གྱི་བུས་འཇིག་རྟེན་གྱི་ཁམས་བརྒྱ་ཁྲི་འདའོ། །གནས་བརྟན་མེའུ་མགལ་གྱི་བུས་སྐད་ཅིག་གང་ལ་འཇིག་རྟེན་གྱི་ཁམས་གཅིག་འདས་པའི་སྐད་ཅིག་ལ། དེ་བཞིན་གཤེགས་པས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་ཀྱི་གླིང་རེ་རེ་དགའ་ལྡན་གྱི་གནས་ན་གནས་པ་ལས་འཕོ་བ་དང་སྐྱེ་བ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་བཞུགས་པ་དང་། བདུད་འདུལ་བ་དང་། མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདས་ཆེན་པོ་དང་། ཆོས་གནས་པ་དང་། ཆོས་ནུབ་པ་དུས་གཅིག་སྟོན་ནོ། །མུ་སྟེགས་ཅན་གྱི་གནས་ཀྱི་སྤྱོད་པ་དང་། སྐྱེས་པའི་རབས་ཐམས་ཅད་དུ་ཡང་དུས་གཅིག་ཏུ་སྣང་ངོ་། །ཞེས་སོགས་བསམ་གྱིས་མི་ཁྱབ་པའི་ཚུལ་ཤིན་ཏུ་ངོ་མཚར་ཞིང་རྨད་དུ་གྱུར་པར་གསུངས་སོ། །ལྷའི་རྣ་བའི་མངོན་པར་ཤེས་པ་ནི། འབུ་སྲིན་ལ་སོགས་པ་སེམས་ཅན་ཇི་སྙེད་པའི་སྐད་ཤེས་ཤིང་གོ་བའོ། །གཞན་གྱི་སེམས་ཤེས་པའི་མངོན་པར་ཤེས་པ་ནི། སེམས་ཅན་ཐམས་ཅད་ཀྱི་སེམས་ཀྱི་རྣམ་འགྱུར་ཕྲ་ཞིང་ཕྲ་བ་ཐམས་ཅད་ཇི་ལྟ་བ་བཞིན་དུ་ཤེས་སོ། །སྔོན་གྱི་གནས་རྗེས་སུ་དྲན་པའི་མངོན་པར་ཤེས་པ་ནི། རང་དང་གཞན་གྱི་ཚེ་རབས་མཐའ་ཡས་པའི་རྣམ་འགྱུར་ཤིས་པའོ། །ལྷའི་མིག་གི་མངོན་པར་ཤེས་པ་ནི། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་ཕྲ་ཞིང་ཕྲ་བ་དང་། འཆི་འཕོ་བ་དང་། སྐྱེ་བ་ཐམས་ཅད་རབ་ཏུ་ཤེས་སོ། །ཟག་པ་ཟད་པའི་མངོན་པར་ཤེས་པ་ནི། ས་བཅུ་རྒྱུན་མཐའི་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་གཉིས་བག་ཆགས་དང་བཅས་པ་ཐམས་ཅད་ཟད་པར་བྱས་ཤིང་རྣམ་པ་ཐམས་ཅད་མཁྱེན་པའོ། །དེ་ལྟར་སངས་རྒྱས་དེའི་ལུས་དང་འཇིག་རྟེན་གསུམ་སྣང་བ་དང་། སྐད་དང་སེམས་གང་ཡིན་པ་ཤེས་པ་ནི། དཔལ་ལྡན་རྒྱུད་ལས། ལུས་ནི་དང་ཞིང་རྡུལ་ཕྲན་ཉམས་པ་ནམ་མཁའ་དང་མཚུངས་མཚན་ལ་སོགས་པ་རྣམས་ཀྱིས་རབ་རྫོགས་འགྱུར། སྣ་ཚོགས་འཇིག་རྟེན་གསུམ་པོ་ཉིད་ནི་དང་ཞིང་སྒྲིབ་པ་རྣམ་པར་བྲལ་བ་རྨི་ལམ་བཞིན་དུ་སྣང་། སྐད་ནི་ཀུན་ནས་ཆད་པ་མེད་ཅིང་དུ་མའི་སྐད་གཞན་དག་གིས་གཞན་གྱི་སྙིང་ལ་འཇུག་པ་སྟེ། སེམས་ནི་དམ་པའི་བདེ་བས་གང་ཞིག་མི་གཡོ་ཐམས་ཅད་དུས་སུ་ལྷན་གཅིག་སྐྱེས་པས་འཁྱུད་པའོ། །ཞེས་པས་སོ། །དེ་བཞིན་དུ་ཀུན་གཞིའི་ཡེ་ཤེས་ནི་རྣམ་པར་དག་པའི་ཕུང་པོ་ནམ་མཁའ་གང་པ་ཡིན་ཞིང་། ཀུན་གཞིའི་རྣམ་ཤེས་ནི་མ་དག་པ་བཟུང་འཛིན་གྱི་དངོས་པོ་ནམ་མཁའ་གང་པ་ཡིན་ནོ། །དེ་ལ་དག་པ་དང་གཙང་བ་གཅིག་པས། གཙང་གནས་དམ་པ་གོའུ་ཏ་མ། གསུམ་རིག་གཙང་མ་དག་པ་སྟེ། རྣམ་དག་ཕུང་པོ་ལྔ་འཆང་པ། ཞེས་པའི་དོན། བརྟག་གཉིས་ལས། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། ཞེས་པ་དངོས་པོ་ཐམས་ཅད་ནི་ཚན་པ་གཉིས་ཏེ། ཀུན་རྫོབ་ཀྱི་དངོས་པོ་ཐམས་ཅད་དང་། དོན་དམ་གྱི་དངོས་པོ་ཐམས་ཅད་དོ། ཀུན་རྫོབ་ཀྱི་དངོས་པོ་ཐམས་ཅད་ནི་ཆོས་ཅན་ཡིན་ལ། དེའི་ཆོས་ཉིད་དག་པ་ཉིད་ནི་དེ་བཞིན་ཉིད་དོ་། དོན་དམ་གྱི་དངོས་པོ་ཐམས་ཅད་ནི་ཆོས་ཉིད་ཁོ་ན་ཡིན་ཞིང་། དོན་དམ་གྱི་དངོས་པོ་ཡང་ཡིན། དག་པ་ཡང་ཡིན། དེ་བཞིན་ཉིད་ཀྱང་ཡིན་ནོ། །ཀུན་རྫོབ་ཀྱི་ཆོས་ཅན་རེ་རེའི་ཆོས་ཉིད་ཀྱི་དབྱེ་བ་ནི། གཟུགས་ཀྱི་དེ་བཞིན་ཉིད་དང་། ཚོར་བའི་དེ་བཞིན་ཉིད་དང་། ཞེས་པ་ལ་སོགས་པའི་ཆོས་ཅན་ཇི་སྙེད་པ་དེ་སྙེད་ཀྱི་དེ་བཞིན་ཉིད་ཀྱི་དབྱེ་བའོ། །དོན་དམ་གྱི་ཆོས་རེ་རེའི་དག་པ་དེ་བཞིན་ཉིད་ཀྱི་དབྱེ་བ་ནི། དོན་དམ་གྱི་ཕུང་པོ་དང་། ཁམས་དང་། སྐྱེ་མཆེད་ཇི་སྙེད་པ་དེ་སྙེད་ནི་དག་པ་ཡང་ཡིན། ལྷ་ཡང་ཡིན། དེ་བཞིན་ཉིད་ཀྱང་ཡིན་ནོ། །འབུམ་དང་ཉི་ཁྲི་ལ་སོགས་པའི་མདོ་རྣམས་སུ། རྣམ་པར་དག་པའི་ཕུང་པོ་དང་ཁམས་དང་སྐྱེ་མཆེད་ཇི་སྙེད་པ་གསུངས་པ་ཐམས་ཅད་རྒྱུད་སྡེ་རྣམས་སུ་ལྷའི་ཚོགས་ནམ་མཁའ་གང་པ་ཡིན་པར་གསུངས་སོ། །དེ་ལ་རྣམ་པར་དག་པའི་གཟུགས་ཀྱི་ཕུང་པོ་ལ་སོགས་པ་རྣམས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཡིན་པ་དང་། རྣམ་པར་དག་པའི་ས་ཆུ་ལ་སོགས་པའི་ཁམས་རྣམས་སངས་རྒྱས་སྤྱན་མ་ལ་སོགས་པའི་དེ་བཞིན་གཤེགས་མ་རྣམས་ཡིན་པ་དང་། རྣམ་པར་དག་པའི་མིག་ལ་སོགས་པའི་དབང་པོ་རྣམས་པའི་སྙིང་པོ་ལ་སོགས་པའི་བྱང་ཆུབ་སེམས་དཔའ་རྣམས་ཡིན་པ་དང་། རྣམ་པར་དག་པའི་གཟུགས་སྒྲ་ལ་སོགས་པའི་ཡུལ་རྣམས་གཟུགས་རྡོ་རྗེ་མ་ལ་སོགས་པའི་བྱང་ཆུབ་སེམས་མ་རྣམས་ཡིན་པ་དང་། རྣམ་པར་དག་པའི་ལག་པ་ལ་སོགས་ཀྱི་དབང་པོའི་བྱ་བ་རྨུགས་བྱེད་ལ་སོགས་པའི་ཁྲོ་བོ་རྣམས་ཡིན་པ་དང་། རྣམ་པར་དག་པའི་ལས་ཀྱི་དབང་པོའི་བྱ་བ་རྣམས་རྨུགས་བྱེད་མ་ལ་སོགས་པའི་ཁྲོ་མོ་རྣམས་ཡིན་པར་གསུང་སོ། །རྣམ་པར་དག་པའི་ཕུང་པོ་དང་། དབང་པོ་དང་ལས་ཀྱི་དབང་པོའི་རྣམས་ལྷ་ཕོ་ཡིན་པར་སྟོན་པ་དང་། ཁམས་དང་། ཡུལ་དང་ལས་ཀྱི་དབང་པོའི་བྱ་བ་རྣམས་ལྷ་མོ་ཡིན་པར་སྟོན་པ་ནི། གཉིས་སུ་མེད་པའི་རྒྱུད་དུ་དུས་ཀྱི་འཁོར་ལོ་ལ་སོགས་པ་རྣམས་སུ་བྱུང་ངོ་། །བྱང་ཆུབ་སེམས་དཔའ་ས་རྡོ་རྗེ་དང་ཞེས་པ་ལ་སོགས་པ་རྣམ་པར་དག་པའི་ཁམས་ཀྱང་ལྷ་ཕོར་སྟོན་པ་ནི་ཕ་རྒྱུད་གསང་བ་འདུས་པ་ལ་སོགས་པ་རྣམས་སུ་བྱུང་ངོ་། །རྣམ་པར་དག་པའི་ཕུང་པོ་དང་དབང་པོ་རྣམས་ཀྱང་ལྷ་མོར་སྟོན་པ་ནི་མ་རྒྱུད་ཀྱེའི་རྡོ་རྗེ་ལ་སོགས་པ་རྣམས་སུ་བྱུང་ངོ་། །གནམ་གང་གི་དུས་ཀྱི་ཟླ་བ་དང་། བཅོ་ལྔའི་དུས་ཀྱི་ཟླ་བ་ངོ་བོ་གཅིག་པ་ལྟར། སེམས་ཅན་གྱི་དུས་ཀྱི་རྣམ་པར་དག་པའི་གཟུགས་སོགས་དང་། སངས་རྒྱས་ཀྱི་དུས་ཀྱི་རྣམ་པར་དག་པའི་གཟུགས་སོགས་ངོ་བོ་གཅིག་པ་ནི། མངོན་རྟོགས་བརྒྱན་ལས། འབྲས་བུ་དག་པ་གཟུགས་ལ་སོགས། །དག་པ་ཉིད་དེ་གང་གི་ཕྱིར། །དེ་གཉིས་ཐ་དད་མ་ཡིན་ཞིང་། །གཅད་དུ་མེད་པས་དག་པར་བརྗོད། ཞེས་པ་སྟེ། འདི་ནི་འབུམ་དང་ཉི་ཁྲི་སོགས་ལས། རྣམ་པར་གཟུགས་སོགས་ཇི་སྙེད་གསུངས་པའི་དོན་བསྡུས་པ་ཡིན་ནོ། །རྣམ་པར་དག་པའི་གཟུགས་སོགས་དང་། གཟུགས་སོགས་རྣམ་པར་དག་པ་ལ་ཁྱད་མེད་ཅིང་། ཉོན་མོངས་ཀྱི་ཆོས་ཉིད་དང་། ཆོས་ཉིད་ཀྱི་ཉོན་མོངས་ལ་ཁྱད་མེད། དམྱལ་བའི་ཆོས་ཉིད་དང་། ཆོས་ཉིད་ཀྱི་དམྱལ་བ་ལ་ཡང་ཁྱད་མེད་དོ། །ཆོས་ཉིད་ཀྱི་ཡི་དྭགས་དང་། ཆོས་ཉིད་ཀྱི་དུད་འགྲོ་དང་། ཆོས་ཉིད་ཀྱི་སྡུག་བསྔལ་དང་། ཆོས་ཉིད་ཀྱི་ཀུན་འབྱུང་དང་། ཆོས་ཉིད་ཀྱི་མ་རིག་པ་ལ་སོགས་པ་བློར་མི་ཤོང་པ་རྣམས་ཀྱང་། ཡི་དྭགས་ཀྱི་ཆོས་ཉིད་ལ་སོགས་པ་འགྱུར་དང་། ཁྱད་པར་མེད་པ་དེ་བཞིན་དུ་ཤེས་པར་བྱའོ། །ཕྱི་ནང་གཞན་གསུམ་ནི། ཕྱི་ནང་ ཀུན་གཞི་རྣམ་ཤེས ་ཀྱི་ཡོ་ལང་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ཀུན་རྫོབ་འདི་ཡིན་ལ། ཀུན་རྫོབ་འདི་ལས་གཞན་པ་ནི་དོན་དམ་བདེ་གཤེགས་སྙིང་པོ་ཀུན་གཞི་ཡེ་ཤེས་ཀྱི་ཡོ་ལང་ཡིན་ཏེ། བརྟག་གཉིས་ཀྱི་རྩ་རྒྱུད་ལས། རྒྱལ་བའི་དབང་པོ་སྐུ་གཞན་ནོ། །སྐུ་གསུང་ཐུགས་དང་བདེ་བ་ཡང་། །གཞན་ཏེ་ཕུང་པོའི་ཚོགས་ལའང་གཞན། །ས་སོགས་ཁམས་རྣམས་གཞན་པ་སྟེ། །ཡུལ་དང་དབང་པོ་རྣམས་ཀྱང་ངོ་། །ལས་ཀྱི་དབང་པོའི་བྱ་བའང་གཞན། །དེ་བཞིན་ལས་ཀྱི་དབང་པོ་ཡང་། །ཐམས་ཅད་ནས་ནི་ཕྱག་ཞབས་སོགས། །ཀུན་ནས་སྤྱན་དང་དབུ་དང་ཞལ། །ཀུན་ནས་ཐོས་ལྡན་འཇིག་རྟེན་དུ། །ཐམས་ཅད་ཁྱབ་པར་བྱས་ཏེ་བཞུགས། ཞེས་པའི་དོན་ནོ། །ཕྱི་ནང་གསང་གསུམ་ཡང་། ཕྱི་ནང་ནི་སྔར་དང་འདྲ་ལ། གསང་བ་ནི། ཀུན་རྫོབ་འདི་ལས་གཞན་སྐུ་གསུང་ཐུགས་ཀྱི་གསང་བའོ། །ཀུན་བརྟག་གཞན་དབང་ནི། ཀུན་གཞི་རྣམ་ཤེས ་ཀྱི་ཡོ་ལང་ཀུན་རྫོབ་སོ། །ཡོངས་གྲུབ་ནི། སྐུ་བཞི་ཡེ་ཤེས་ཀྱི་ཡོ་ལང་བདེ་གཤེགས་སྙིང་པོ་དོན་དམ་མོ། །དེ་བཞིན་གཤེགས་པའི་སྙིང་པོ་ཞེས་པའི་དོན། ཀུན་གཞི་ཡེ་ཤེས་དེ་ཉིད། དེ་བཞིན་གཤེགས་པ་ཡང་ཡིན། ཆོས་ཐམས་ཅད་ཀྱི་སྙིང་པོ་ཡང་ཡིན་པ་དེ་ནི་བདེ་གཤེགས་སྙིང་པོའོ། །ཤེས་རབ་སྙིང་པོ་དང་། བྱང་ཆུབ་སྙིང་པོ་དང་། སྙིང་རྗེའི་སྙིང་པོ་དང་། འཇིག་རྟེན་ལས་འདས་པའི་སྙིང་པོ་དང་། སྙིང་པོའི་དོན་ལ་སོགས་པ་ཡང་དེ་བཞིན་ནོ། །དེ་ལྟར་སྤྲུལ་སྐུའི་སྤྲུལ་སྒྱུར་སྣ་ཚོགས་པ་ནི། དཔལ་ལྡན་རྒྱུད་ལས། སངས་རྒྱས་རྣམས་ཀྱི་སའང་རྟོགས་བྱ་ཡིན་པ་དཔག་མེད་ཡོན་ཏན་དང་ལྡན་སངས་རྒྱས་སྤྲུལ་པ་སྒྱུ་མ་ནི། སྲིད་པ་གསུམ་གྱི་གནས་སུ་བདག་ཉིད་སྟོན་པར་བྱཻད་རྒྱལ་བྱིན་འདྲ་བ་ཇི་བཞིན་ཉིད་དུའོ། །སྣ་ཚོགས་དངོས་རྣམས་ཀྱིས་ཕྱེ་རྒྱལ་བ་དང་བཅས་ལྷ་མི་རྣམས་ཀྱི་རང་རང་སེམས་ལ་རབ་ཞུགས་པ། འདི་ནི་མ་སྐྱེས་ཆོས་ཏེ་ཆུ་ལ་ནམ་མཁའ་བཞིན་དུ་འདིར་ནི་སྐྱེ་བར་འཁྲུལ་པ་སྟེར་བའོ། །ཞེས་པ་དང་། ལོངས་སྤྱོད་རྫོགས་སྐུ་ཀུན་གྱི་རྒྱལ། སྤྲུལ་པའི་སྐུ་སྟེ་སྐུའི་མཆོག །ཅེས་པའི་དོན་ནོ། །དེ་ལྟར་དོན་དམ་པའི་སྤྲུལ་པ་ཐམས་ཅད་ནི་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། སྤྲུལ་པའི་གདངས་ཆེན་པོ། སྤྲུལ་པའི་ཀློང་ཆེན་པོ། སྤྲུལ་པའི་ཁྱབ་བརྡལ་ཆེན་པོ་ཐམས་ཅད་དོན་དམ་གྱི་སེམས་སུ་ངོ་སྤྲད་པར་བྱའོ།། །།
རང་བྱུང་གི་ཡེ་ཤེས་རྣམས་ངོ་སྤྲད་པ།
གསུམ་པ་རང་བྱུང་གི་ཡེ་ཤེས་རྣམས་ངོ་སྤྲད་པ་ནི། ཡེ་ཤེས་ལུས་ཅན་དེ་བཞིན་གཤེགས། །ཡེ་ཤེས་སྐུ་སྟེ་རང་བྱུང་པ། །ཡེ་ཤེས་སྐུ་རྣམས་མ་ལུས་འཆང་། །ཡེ་ཤེས་སྣང་བ་ལམ་མེ་བ། ཞེས་པའི་དོན། ཀུན་བཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། དོན་དམ་གྱི་སངས་ཡེ་ཤེས་ལྔ་ཡིན་ལ། དེ་ཡང་དོན་དམ་གྱི་ཕུང་པོ་ལྔ། ཁམས་ལྔ། དབང་པོ་ལྔ་ལ་སོགས་པ་ཡེ་ཤེས་ལྔ་ཡིན་ཞིང་། དེ་ཡང་ཐབས་ཤེས་ཀྱིས་ཕྱེ་བ་ཡེ་ཤེས་བཅུ་ལ་སོགས་པ་ཡེ་ཤེས་ཀྱི་དབྱེ་བ་མཐའ་ཡས་སོ། །སངས་རྒྱས་སའི་མདོ་ལས། བྱང་ཆུབ་སེམས་དཔའ་ཤིན་ཏུ་འདུས་ལ་བཀའ་སྩལ་པ། ཤིན་ཏུ་འདུས། ཆོས་ལྔས་སངས་རྒྱས་ཀྱི་ས་བསྡུས་པ་ཡིན་ཏེ། ལྔ་གང་ཞེ་ན། འདི་ལྟ་སྟེ། ཆོས་ཀྱི་དབྱིངས་རྣམ་པར་དག་པ་དང་། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོགས་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་ཀྱིའོ། །ཞེས་པ་དང་། འཕགས་པ་རྡོ་རྗེ་སྙིང་པོའི་ཞལ་ལྔ་ནས། མེ་ལོང་མཉམ་ཉིད་ཡེ་ཤེས་དང་། །གསུམ་པ་སོ་སོར་རྟོགས་པ་སྟེ། །བྱ་བ་བསྒྲུབས་པར་བྱེད་པ་གཞན། །ཆོས་དབྱིངས་རྣམ་པར་དག་པ་སྟེ། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམ་པར་ཤེས་པ་ཉིད། །ས་དང་ཆུ་དང་མེ་དང་ནི། །རླུང་དང་ལྔ་པ་སྟོང་པ་དེ། །ཡེ་ཤེས་ལྔ་པོ་རྣམ་དག་པ། །མངོན་པར་བྱང་ཆུབ་རྣམ་པ་ལྔ། །ཤེས་བཅུ་རྣམ་དག་བདག་ཉིད་ཅན། ། ཤེས་བཅུ་རྣམ་དག་འཆང་བ་པོ། །ཞེས་གསུངས་པའོ། །ཀུན་གཞི ་ཡེ་ཤེས་ལྔ་པོ་འདི་ཉིད། མདོ་སྔགས་ཐམས་ཅད་ཀྱི་ངེས་པའི་དོན་ཡིན་ལ། ལྔ་པོ་འདི་ཉིད་ཁོ་ན་འཇམ་དཔལ་མཚན་བརྗོད་དུ་སྟན་ཅིང་། དུས་འཁོར་མི་ཤེས་ན་མཚན་བརྗོད་ཀྱི་དོན་མི་ཤེས་པ་ལ་སོགས་པ། དྲི་མེད་འོད་ལས། གང་གིས་སེམས་ཅན་རྣམས་ཐེ་ཚོམ་མེད་པར་འགྱུར་བ་མཚན་ཡང་དག་པར་བརྗོད་པ་ཚད་མར་བྱས་པ་སྟེ། དེ་ནས་སྔགས་ཀྱི་ཚུལ་ཐམས་ཅད་ཀྱི་ངེས་པའི་དོན་མཚན་ཡང་དག་པར་བརྗོད་པ། བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་སྔགས་ཀྱི་ཐེག་པས་ཡང་དག་པར་སྟན་ནོ། །དེའི་ཕྱིར་གང་གིས་མཆོག་གི་དང་པོའི་སངས་རྒྱས་མི་ཤེས་པ་དེས་མཚན་ཡང་དག་པར་བརྗོད་པ་མི་ཤེས་སོ། །གང་གིས་མཚན་ཡང་དག་པར་བརྗོད་པ་མི་ཤེས་པ་དེས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་སོ། །གང་གིས་རྡོ་རྗེ་འཛིན་པའི་ཡེ་ཤེས་ཀྱི་སྐུ་མི་ཤེས་པ་དེས་སྔགས་ཀྱི་ཐེག་པ་མི་ཤེས་སོ། །གང་གིས་སྔགས་ཀྱི་ཐེག་པ་མི་ཤེས་པ་དེ་ཐམས་ཅད་ནི་འཁོར་བ་པ་སྟེ། བཅོམ་ལྡན་འདས་རྡོ་རྗེ་འཛིན་པའི་ལམ་དང་བྲལ་བའོ། །དེ་ལྟ་བས་ན་མཆོག་གི་དང་པོའི་སངས་རྒྱས་ཀྱི་བླ་མ་དམ་པ་རྣམས་ཀྱིས་སྟན་པར་བྱ་ཞིང་། ཐར་པ་དོན་དུ་གཉེར་བའི་སློབ་མ་དམ་པ་རྣམས་ཀྱིས་མཉན་པར་བྱའོ། །ཞེས་པ་དང་། ཉན་ཐོས་དང་ཕ་རོལ་ཕྱིན་པ་དང་། སྔགས་ཀྱི་ཚུལ་འདི་རྣམས་ཀྱི་མཆོག་ཏུ་མི་འགྱུར་བའི་སྙིང་པོ་བཅོམ་ལྡན་འདས་རྡོ་རྗེ་འཛིན་པ་ནི་མཚན་ཡང་དག་པར་བརྗོད་པ་ལས་དེ་བཞིན་གཤེགས་པས་སྟན་ནོ། །འདིའི་དོན་མི་ཤེས་པ་བླ་མ་དམ་པ་མ་ཡིན་པ་ཉམས་པ་མཆོག་ཏུ་མི་འགྱུར་བའི་ཡེ་ཤེས་ཉམས་པ་རྣམས་མ་འོངས་པའི་དུས་སུ་འབྱུང་བར་འགྱུར་ཏེ། །རྣམ་པར་ཉམས་པ་དེ་རྣམས་ཀྱིས་སེམས་ཅན་རྣམས་ཉམས་པར་བྱེད་དོ། །ཞེས་པ་དང་། དེ་བཞིན་དུ་མཚན་ཡང་དག་པར་བརྗོད་པ་ལས་བཅོམ་ལྡན་འདས་རྡོ་རྗེ་འཛིན་པའི་མཆོག་ཏུ་མི་འགྱུར་བའི་ཡེ་ཤེས་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་སྙིང་པོར་གྱུར་པ་ནི་གསོལ་བ་འདེབས་པ་དང་བཅས་པའི་ཚིགས་སུ་བཅད་པ་བརྒྱ་དྲུག་བཅུ་རྩ་གཉིས་ཀྱིས་དེ་བཞིན་གཤེགས་པས་རབ་ཏུ་སྟན་ནོ། །དེ་ལ། དེ་ནས་དཔལ་ལྡན་རྡོ་རྗེ་འཆང་། ཞེས་པ་ལ་སོགས་པ་ནས། ལུས་བཏུད་ནས་ནི་སྤྱན་སྔར་འདུག །ཅེས་པའི་མཐར་ཐུག་པ་ནི་གསོལ་བ་འདེབས་པའི་ཚིག་སུ་བཅད་པ་བཅུ་དྲུག་གོ །དེ་ནས་བཅོམ་ལྡན་ཤཱཀྱ་ཐུབ། ཅེས་པ་ལ་སོགས་པ་ནས། བཅོམ་ལྡན་དེ་ནི་ལེགས་ཞེས་གསོལ། ཞེས་པའི་མཐར་ཐུག་པ་ནི་ལན་གསུངས་པའི་ཚིགས་སུ་བཅད་པ་དྲུག་གོ །སླར་ཡང་། དེ་ནས་བཅོམ་ལྡན་ཞེས་པ་ལ་སོགས་ནས། རིགས་ཆེན་གཙུག་ཏོར་ཆེར་གཟིགས་ནས། ཞེས་པའི་མཐར་ཐུག་པ་ནི་རིགས་དྲུག་ལ་གཟིགས་པའི་ཚིགས་སུ་བཅད་པ་གཉིས་སོ། །གསང་སྔགས་རྒྱལ་པོ་དྲུག་ལྡན་ཞིང་། ཞེས་པ་ལ་སོགས་པ་ནས། ཨ་ར་པ་ཙ་ན་ཡ་ཏེ་ན་མ། ཞེས་པའི་མཐར་ཐུག་པ་ནི་སྒྱུ་འཕྲུལ་དྲྭ་བས་མངོན་རྫོགས་པར་རྫོགས་པར་བྱང་ཆུབ་པའི་ཚིགས་སུ་བཅད་པ་གསུམ་མོ། །འདི་ལྟར་སངས་རྒྱས་བཅོམ་ལྡན་འདས། ཞེས་པ་ལ་སོགས་པ་ནས། ཐེག་པ་ཆེན་པོའི་ཚུལ་གྱི་མཆོག །ཅེས་པའི་མཐར་ཐུག་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་བསྟོད་པ་ཚིགས་སུ་བཅད་པ་བཞིའོ། །སངས་རྒྱས་སྣང་མཛད་ཆེ་ཞེས་པ་ལ་སོགས་པ་ནས། རྡོ་རྗེ་ལྕགས་ཀྱུ་ཞགས་པ་ཆེ། ཞེས་པའི་མཐར་ཐུག་པ་ནི་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ལ་བསྟོད་པ་རྐང་པས་དམན་པའི་ཚིགས་སུ་བཅད་པ་ཉི་ཤུ་རྩ་ལྔའོ། །རྡོ་རྗེ་འཇིགས་བྱེད་འཇིགས་པར་བྱེད། ཅེས་པ་ལ་སོགས་པ་ནས། སྒྲ་དང་ལྡན་པ་རྣམས་ཀྱི་མཆོག་ཅེས་པའི་མཐར་ཐུག་པ་ནི་མེ་ལོང་ལྟ་བུའི་ཡེ་ཤེས་ལ་བསྟོད་པ་རྐང་པས་ལྷག་པའི་ཚིགས་སུ་བཅད་པ་བཅུའོ། །ཡང་དག་བདག་མེད་དེ་བཞིན་ཉིད། ཅེས་པ་ལ་སོགས་པ་ནས། ཡེ་ཤེས་མི་ཅེ་འོད་རབ་གསལ་ཞེས་པའི་མཐར་ཐུག་པ་ནི་སོ་སོར་རྟོགས་པའི་ཡེ་ཤེས་ཀྱི་བསྟོད་པ་ཚིགས་སུ་བཅད་པ་བཞི་བཅུ་རྩ་གཉིས་སོ། །འདོད་པའི་དོན་གྲུབ་དམ་པ་སྟེ། ཞེས་པ་ལ་སོགས་པ་ནས། ནོར་བུ་ཆེན་པོ་རིན་ཆེན་ཏོག་ཅེས་པའི་མཐར་ཐུག་པ་ནི་མཉམ་པ་ཉིད་ཀྱི་ཡེ་ཤེས་ཀྱི་བསྟོད་པ་ཚིགས་སུ་བཅད་པ་ཉི་ཤུ་རྩ་བཞིའོ། །སངས་རྒྱས་ཀུན་གྱིས་རྟོགས་བྱ་བ། ཞེས་པ་ལ་སོགས་པ་ནས། འཇམ་དཔལ་དཔལ་དང་ལྡན་པའི་མཆོག །ཅེས་པའི་མཐར་ཐུག་པ་ནི་བྱ་བ་གྲུབ་པའི་ཡེ་ཤེས་ཀྱི་བསྟོད་པ་ཚིགས་སུ་བཅད་པ་བཅོ་ལྔའོ། །མཆོག་སྦྱིན་རྡོ་རྗེ་མཆོག་ཁྱོད་འདུད། ཅེས་པ་ལ་སོགས་པ་ནས། ཡེ་ཤེས་སྐུ་ཉིད་ཁྱོད་ལ་འདུད་ཅེས་པའི་མཐར་ཐུག་པ་ནི། དེ་བཞིན་གཤེགས་པ་ལྔའི་ཡེ་ཤེས་ཀྱི་བསྟོད་པ་ཚིགས་སུ་བཅད་པ་ལྔ་སྟེ། ཚིགས་སུ་བཅད་པ་བརྒྱ་དྲུག་བཅུ་རྩ་གཉིས་པོ་འདི་རྣམས་ཀྱིས་ཐེག་པ་འདི་རྣམས་ལས་བྱུང་ནས་བཅོམ་ལྡན་འདས་རྡོ་རྗེ་འཛིན་པའི་སྙིང་པོ། ཀུན་ཏུ་བཟང་པོ། མཆོག་ཏུ་བཟང་པོ། མཆོག་ཏུ་མི་འགྱུར་བའི་བདེ་བ་ཆེན་པོ་ནམ་མཁའི་ཁམས་ཀྱི་མཐར་ཐུག་པ། ཀུན་ནས་སྣང་བར་བྱེད་པ། རྣམ་པ་དག་པའི་ཡེ་ཤེས་ཀྱི་ཚོགས་བསགས་པ་ཟབ་ཅིང་རྒྱ་ཆེ་བའི་གཟུགས་འཆང་བ། རང་གཞན་གྱིས་འོད་གསལ་བ། ཐོག་མ་དང་ཐ་མ་མེད་པའི་བདག་དང་། བདག་གི་བཟུང་བ་དང་། འཛིན་པ་ལ་སོགས་པའི་རྣམ་པར་རྟོག་པའི་དྲི་མ་དང་བྲལ་བ། དུས་ཐམས་ཅད་པ། ཀུན་ནས་ཉོན་མོངས་པ་མེད་པ། ཆོས་ཐམས་ཅད་ཀྱི་རང་བཞིན་མཁྱེན་པ་འཁོར་བའི་བག་ཆགས་ལས་རྣམ་པར་གྲོལ་བ། འགྲོ་བ་དང་འོང་བ་དང་བྲལ་བ། སྤྲོས་པ་མེད་པའི་ངོ་བོ། རང་གི་ངང་གིས་འཇུག་ཅིང་འཕེལ་པའི་ཏིང་ངེ་འཛིན་དང་། གཟུངས་སྣ་ཚོགས་པ་རྣམས་ཀྱི་རྟེན་བུམ་པ་བཟང་པོ་དང་དཔག་བསམ་གྱི་ཤིང་དང་། ཡིད་བཞིན་གྱི་ནོར་བུ་བཞིན་དུ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ། ཐུབ་པ་ཆེན་པོ་རྣམས་ཀྱི་ཡང་སྤྱོད་ཡུལ་མ་ཡིན་པ། སེམས་ཅན་ཀྱི་ཕུང་པོ་ཆེན་པོ། མཆོག་ཏུ་ཞི་བར་མཛད་པ། སྒྱུ་མ་ལྟ་བུ། རྨི་ལམ་ལྟ་བུ། གཟུགས་སྙན་ལྟ་བུ། སྒྲ་སྙན་ལྟ་བུས་ཡང་དག་པར་སྡུས་པ་སྟེ། སྲིད་པ་གསུམ་གྱིས་མཆོད་པར་བྱ་བ་རྣལ་འབྱོར་པའི་ཡེ་ཤེས་རང་རིག་པར་བྱ་བ། མཆོག་ཏུ་མི་འགྱུར་བའི་བདེ་བ་འདི་ཉིད་ནི་རྣལ་འབྱོར་པས་འདོར་བར་མི་བྱའོ། །ཞེས་པ་དེ་བཞིན་གཤེགས་པའི་ངེས་པའོ། །ཞེས་མགོན་པོ་སྤྱན་རས་གཟིགས་དབང་ཕྱུག་གིས་གསུངས་སོ། །དེ་ལྟ་བས་ན་མདོ་རྒྱུད་ཐམས་ཅད་ཀྱི་མཐར་ཐུགས་གི་ངེས་དོན། ཀུན་གཞི་ཡེ་ཤེས་ལྔ་པོ་དེ་ཉིད་མཚན་བརྗོད་འདིར། གཙུག་ཏོར་གྱི་རིགས་དྲུག་དང་སྒྱུ་འཕྲུལ་དྲྭ་བ་དང་། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་། ཡེ་ཤེས་དང་། རྒྱལ་བ་ལྔའི་ཡེ་ཤེས་ལ་བསྟོད་པའི་སྒོ་ནས་གླུར་བླངས་པ་ནི། ཐེག་པ་ཐམས་ཅད་ཀྱི་སྙིང་པོ་རྒྱུད་སྡེ་ཐམས་ཅད་ཀྱི་རྩ་བ། མདོ་སྔགས་ཐམས་ཅད་ཀྱི་མཐར་ཐུག་པ། ཐར་པ་འདོད་པ་རྣམས་ཀྱི་དོན་གཉེར་བྱ་ཡང་དག་ཐམས་ཅད་ཕྱོགས་གཅིག་ཏུ་བསྡུས་ནས་སྟན་པ་ཡིན་ནོ། །དེ་ཡང་ལུས་ལ་གནས་པའི་ཡེ་ཤེས་ཆེན་པོ་དེ་ཉིད་ཡོན་ཏན་མཐའ་ཡས་པའི་ངོ་བོ་ཡིན་པའི་ཕྱིར། ཡོན་ཏན་སྣ་ཚོགས་པ་གང་དང་གང་ཡིན་པ་རྒྱུ་མཚན་དུ་བྱས་ནས་དེང་དེའི་ཆ་ནས་མིང་སྣ་ཚོགས་ཀྱིས་སྟན་པ་ནི་དོན་དམ་པ་ཁོ་ནའི་མཚན་ཡང་དག་པར་བརྗོད་པ་ཡིན་ནོ། །ཇི་སྲིད་ ཀུན་གཞི་རྣམ་ཤེས ་ཡོད་པ་དེ་སྲིད་དུ་ ཀུན་གཞི་རྣམ་ཤེས ་ཀྱིས་ཕྱོགས་རིས་སུ་བཅད་པའི་ཕྱིར། སེམས་ཅན་ཐམས་ཅད་ཀྱི་ཀུན་གཞི་ཡེ་ཤེས་ཀྱང་ཐ་དད་སྟེ། དཔེར་ན་ནམ་མཁའ་ལ་བྱེ་བྲག་མེད་ཀྱང་། རྫའི་སྣོད་ཀྱི་ནམ་མཁའ་དང་། ཟངས་ཀྱི་སྣོད་ཀྱི་ནམ་མཁའ་དང་། གསེར་གྱི་སྣོད་ཀྱི་ནམ་མཁའ་ཞེས་པ་བཞིན་ནོ། །གང་གི་ཚེ་སྒྲིབ་གཉིས་ཀྱི་ས་བོན་ ཀུན་གཞི་རྣམ་ཤེས ་འགགས་ནས་སངས་རྒྱས་པ་དེའི་ཚེ་ཆུ་བྲན་ཐམས་ཅད་རྒྱ་མཚོར་སོང་ན་གཅིག་པ་བཞིན་དུ། ཀུན་གཞི་ཡེ་ཤེས་ཐམས་ཅད་གཅིག་ཏུ་འགྱུར་ཏེ། མདོ་སྡེ་བརྒྱན་ལས། ཀླུང་དག་པའི་འོག་ཏུ་མ་སོང་པ། གནས་རྣམས་ཐ་དད་ཆུ་ཡང་ཐ་དད་ལ། ཆུ་ཡང་ཆུང་ཞིང་བྱ་བ་ཐ་དད་བྱེད། ཆུ་གནས་སྲོག་ཆགས་ཕྲ་མོའི་ཉེར་སྤྱད་འགྱུར། རྒྱ་མཚོར་སོང་པར་ཐམས་ཅད་ཀྱང་། གནས་རྣམས་གཅིག་ཅིང་ཆུང་ཡང་ཆེ་ལ་གཅིག །བྱ་བ་གཅིག་ཅིང་ཆུ་ལ་གནས་པ་ཡི། སྲོག་ཆགས་མང་པོའི་རྟག་ཏུ་ཉེར་སྤྱད་ཚེ། སངས་རྒྱས་ཉིད་དུ་མ་བཞུགས་སྟན་པ་རྣམས། རྟེན་ཡང་ཐ་དད་བློ་གྲོས་ཐ་དད་ཅིང་། རྟོགས་ཆུང་རང་གི་བྱ་བ་ཐ་དད་ལ། སེམས་ཅན་ཉུང་དོན་རྟག་ཏུ་ཉེར་སྤྱད་འགྱུར། སངས་རྒྱས་ཉིད་དུ་བཞུགས་ན་དེ་དག་ཀུན། རྟེན་ཡང་ཅིག་ཅིང་རྟོགས་པ་ཆེ་ལ་གཅིིག །མཛད་པ་གཅིག་ཏུ་འདྲེས་ཤིང་རྟག་པར་ཡང་། སེམས་ཅན་ཚོགས་ཆེའི་ཉེ་བར་སྤྱད་པ་ཆེ། ཞེས་གསུངས་པའི་དོན་ནོ། །དེས་ན་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ཀྱང་། ཀུན་གཞི་རྣམ་ཤེས ་ཀྱི་ལྷག་མ་མ་རིག་བག་ཆགས་ཀྱི་སའི་རྐྱེན་དང་། ཟག་པ་མེད་པའི་ལས་ཀྱི་རྒྱུ་ཚོགས་ནས་ཡིད་ཀྱི་རང་བཞན་གྱི་ལུས་མི་གཅིག་པ་སྣ་ཚོགས་པ་བསམས་བཞིན་དུ་སྐྱེ་བ་ལེན་ནོ། །གཅིག་སངས་རྒྱས་པ་དེའི་ཚེ་དེ་ཉིད་དེ་བཞིན་གཤེགས་པ་གཤེགས་མ་ཐམས་ཅད་ཡིན་ཏེ། དངོས་གཅིག་དངོས་ཀུན་གྱི་ངོ་བོ་ཉིད། དངོས་ཀུན་དངོས་པོ་གཅིག་གི་ངོ་བོ་ཉིད། ཞེས་པའི་དོན་ནོ། །དེ་ལྟར་རང་བྱུང་ཡེ་ཤེས་ཆེན་པོའི་རྣམ་པར་འཕྲུལ་པ་ཐམས་ཅད་ནི་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། རང་བྱུང་ཡེ་ཤེས་ཆེན་པོའི་གདངས་ཆེན་པོ། རང་བྱུང་ཡེ་ཤེས་ཆེན་པོའི་ཀློང་ཆེན་པོ། རང་བྱུང་ཡེ་ཤེས་ཆེན་པོའི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།
དེ་ཉིད་མཛད་པ་ཕྲིན་ལས་སུ་ངོ་སྤྲད་པ།
གསུམ་པ་དེ་ཉིད་མཛད་པ་ཕྲིན་ལས་སུ་ངོ་སྤྲད་པ་ནི། མངོན་རྟོགས་བརྒྱན་ལས། དེ་བཞིན་འཁོར་བ་ཇི་སྲིད་འདིའི། ལས་འདི་རྒྱུན་མི་འཆད་པར་འདོད། ཅེས་པའི་དོན། ཀུན་བཞི་ཡེ་ཤེས་ཕྱག་རྒྱ་ཆེན་པོ། དབུ་མ་ཆེན་པོ། ཐེག་པ་ཆེན་པོ། ཤེར་ཕྱིན་ཟབ་མོ། བདེ་གཤེགས་སྙིང་པོ་དེ་ཉིད་བྱེད་པ་བཅིངས་པའི་སྦྱོར་བ་ཡིས་ཡན་ལག་དྲུག་ཉམས་སུ་བླངས་པའི་ཚེ་མངོན་དུ་གྱུར་པ་ནི། གཞན་དོན་གྱི་མཛད་པ་སྣ་ཚོགས་ལྷུན་གྱིས་གྲུབ་པར་འབྱུང་སྟེ། རྒྱུད་བླ་མའི་འགྲིེལ་པ་ལས། བྱང་ཆུབ་སེམས་དཔའ་ལས་རྣམ་པ་སུམ་ཅུ་རྩ་གཉིས་སོ། །ཞེས་པའོ། །དེ་ཡི་དོན་ནི། གཏི་མུག་གི་གཉིད་སད་པར་བྱེད་པའི་ཕྲིན་ལས་དང་། དེ་བཞིན་དུ་མོས་པ་དམན་པ་རྒྱ་ཆེན་པོ་ལ་སྦྱོར་བ་དང་། ཆོས་མི་འདོད་པ་ཆོས་ལ་སྦྱོར་བ་དང་། འཚོ་བ་མ་དག་པ་དག་པ་ལ་འགོད་པ་དང་། ལྟ་བ་ངན་པ་ཡག་དག་པའི་ལྟ་བ་ལ་འགོད་པ་དང་། ཚུལ་བཞིན་མ་ཡིན་པ་ཡིད་ལ་བྱེད་པ་ཚུལ་བཞིན་ཡིད་ལ་བྱེད་པ་ལ་འགོད་པ་དང་། ལོག་པའི་ཆོས་ལ་གནས་པ་ཡང་དག་པའི་ཆོས་ལ་འགོད་པ་དང་། ཕ་རོལ་དུ་ཕྱིན་པ་དྲུག་གི་མི་མཐུན་པའི་ཕྱོགས་དང་ལྡན་པ་ཕར་ཕྱིན་དྲུག་ལ་སྦྱོར་བ་དང་། ཐབས་མི་མཁས་པ་ཐབས་ལ་སྦྱོར་བ་དང་། ཉོན་མོངས་ཅན་དེ་མེད་པ་ལ་སྦྱོར་བ་དང་། དམིགས་པ་ཅན་དེ་མེད་པ་ལ་སྦྱོར་བ་དང་། བྱས་པ་མི་བཟའོ་བ་བཟོ་བ་ལ་སྦྱོར་བ་དང་། ཆུ་བོ་བཞིར་ལྷུང་པ་དེ་ལས་ཐར་པ་ལ་སྦྱོར་བ་དང་། བཀའ་བློ་མི་བདེ་བ་བདེ་བ་ལ་སྦྱོར་བ་དང་། ཞེན་པ་མང་པ་དེ་མེད་པ་ལ་སྦྱོར་བ་དང་། འཕགས་པའི་ནོར་མེད་པ་ནོར་ལ་སྦྱོར་བ་དང་། ནད་པ་ནད་མེད་པ་ལ་སྦྱོར་བ་དང་། ཤེས་པའི་སྣང་མེད་པ་སྣང་པ་ལ་སྦྱོར་བ་དང་། ཁམས་གསུམ་མི་ཤེས་པ་ཤེས་པ་ལ་སྦྱོར་བ་དང་། གཡོན་ཕྱོགས་ཀྱི་ལམ་ལ་ཞུགས་པ་གཡས་ཕྱོགས་ཀྱི་ལམ་ལ་སྦྱོར་བ་དང་། ལུས་དང་སྲོག་ལ་ཆགས་པ་དེ་ལ་མ་ཆགས་པ་ལ་སྦྱོར་བ་དང་། དཀོན་མཆོག་གི་རིགས་རྒྱུན་གཅོད་པ་མི་གཅོད་པ་ལ་སྦྱོར་བ་དང་། ཆོས་ལས་ཉམས་པ་ཆོས་འཛིན་པ་ལ་སྦྱོར་བ་དང་། རྗེས་སུ་དྲན་པ་དྲུག་ལས་ཉམས་པ་དྲན་པ་དྲག་ལ་སྦྱོར་བ་དང་། ཉོན་མོངས་པས་སྒྲིབས་པ་དེ་མེད་པ་ལ་སྦྱོར་བ་དང་། མི་དགེ་བའི་ཆོས་དང་ལྡན་པ་དགེ་བའི་ཆོས་ལ་སྦྱོར་བའི་ཕྲིན་ལས་སོ། །ཡང་དཔེ་རྣམ་པ་དགུའི་སྒོ་ནས་སྐུ་གསུང་ཐུགས་ཀྱི་ཕྲིན་ལས་སྟན་པ་འདི་ལྟ་སྟེ། རྣམ་རྟོག་མེད་པར་སྐུའི་སྣང་པ་སྟོན་པ་བཻཌཱིུ་ས་གཞི་ལ་ལྷའི་དབང་པོའི་གཟུགས་བརྙན་སྣང་པའི་དཔེ་དང་། རྣམ་རྟོག་མེད་པར་གསུང་གིས་ཆོས་སྟོན་པ་ལྷའི་རྔའི་དཔེ་དང་། རྣམ་རྟོག་མེད་པར་ཐུགས་ཀྱིས་ཆོས་ཀྱི་ཆར་འབེབས་པ་སྤྲིན་ཀྱི་དཔེ་དང་། རྣམ་རྟོག་མེད་པར་སྤྲུལ་པ་སྣ་ཚོགས་སྟོན་པ་ཚངས་པའི་དཔེ་དང་། རྣམ་རྟོག་མེད་པར་ཡེ་ཤེས་ཀྱི་སྣང་པ་སྤྲོ་བ་ཉི་མའི་དཔེ་དང་། རྣམ་རྟོག་མེད་པར་ཐུགས་ཀྱི་གསང་པ་དགོས་འདོད་འབྱུང་པ་ཡིད་བཞིན་གྱི་ནོར་བུའི་དཔེ་དང་། རྣམ་རྟོག་མེད་པར་གསུང་གི་གསང་པ་གཞན་གྱིས་ཐོས་པ་སྒྲ་སྙན་གྱི་དཔེ་དང་། རྣམ་རྟོག་མེད་པར་སྐུའི་གསང་པས་ཁྱབ་པ་དང་། ཀུན་རྫོབ་ཀྱི་གཟུགས་མེད་པ་དང་རྟག་པ་ནམ་མཁའི་དཔེ་དང་། ཕུན་སུམ་ཚོགས་པ་ཐམས་ཅད་ཀྱི་གཞིར་གྱུར་པ་ས་གཞིའི་དཔེ་སྟེ་དགུས་སྟན་པ་ནི། རྒྱུད་བླ་མ་ལས། གང་ཞིག་རྒྱལ་བྱིན་རྔ་དང་སྤྲིན་བཞིན་དང་། །ཚངས་ཉི་རིན་ཆེན་ཡིད་བཞིན་ནོར་རྒྱལ་བཞིན། །སྒྲ་སྙན་ནམ་མཁའ་ས་གཞི་སྲིད་པའི་བར། །འབད་མེད་གཞན་དོན་མཛད་དེ་རྣལ་འབྱོར་རིག །སྟོན་པ་རིན་ཆེན་ལྷ་དབང་གཟུགས་བརྙན་བཞིན། །ལེགས་པར་འདོམས་མཛད་ལྷའི་རྔ་དང་འདྲ། །ཁྱབ་བདག་མཁྱེན་དང་བརྩེ་ཆེན་སྤྲིན་ཚོགས་ནི། །མཐའ་ཡས་འགྲོ་བ་སྲིད་རྩེའི་བར་དུ་ཁྱབ། །ཚངས་བཞིན་ཟག་མེད་གནས་ལས་མ་སྐྱོད་པར། །སྤྲུལ་པ་རྣམ་པ་དུ་མ་རབ་ཏུ་སྟོན། །ཉིན་བཞིན་ཡེ་ཤེས་སྣང་པ་རབ་སྤྲོ་གང་། །རྣམ་དག་རིན་ཆེན་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུང་དེ་བྲག་ཆ་བཞིན་དུ་ཡེ་གེ་མེད། །སྐུ་ནི་ནམ་མཁའ་ལྟ་བུར་ཁྱབ་ཀྱང་གཟུགས་མེད་རྟག་པ་ཉིད། །ས་བཞིན་འགྲོ་བའི་དཀར་པོའི་ཆོས་ཀྱི་སྨན་རྣམས་མ་ལུས་པའི། རྣམ་པ་ཀུན་ཏུ་གཞིར་གྱུར་པ་ནི་སངས་རྒྱས་པ་ཡིན་ནོ། །དགེ་བ་བཻཌཱུའདྲ་ཡི། །སེམས་ལ་སངས་རྒྱས་མཐོང་པའི་རྒྱུ། །དེ་དག་ལ་ནི་མི་ཟློག་པའི། །དད་པའི་དབང་པོ་ལྟས་པ་ཉིད། །དགེ་བ་སྐྱེ་དང་འཇིག་པས་ན། །སངས་རྒྱས་གཟུགས་ནི་སྐྱེ་དང་འཇིག །བརྒྱ་བྱིན་བཞིན་དུ་ཐུབ་པ་ནི། །ཆོས་ཀྱི་སྐུ་ཡིས་སྐྱེ་འཇིག་མེད། །དེ་བཞིན་དུ་ནི་འབད་མེད་པར། །སྐྱེ་མེད་འགག་མེད་ཆོས་སྐུ་ལས། །སྲིད་པ་ཇི་སྲིད་གནས་བར་དུ། །སྟོན་པ་ལ་སོགས་མཛད་པར་འཇུག །ཞེས་པའོ། །དེ་བཞིན་དུ་ཁམས་གསུམ་དུ་གཞན་དོན་མཛད་པ་ནི། སྤྲུལ་སྐུ་ཁྲོ་བོ་རྣམས་ཀྱིས་འདོད་ཁམས་ན་གནས་པའི་ལྷ་མིན་དང་། མི་རྣམས་ཀྱི་དོན་མཛད་པ་དང་། ལོངས་སྐུས་གཟུགས་ཁམས་པ་རྣམས་ཀྱི་དོན་མཛད་པ་དང་། ཆོས་སྐུས་ནམ་མཁའ་ལ་གཟུགས་མེད་ཁམས་པའི་དོན་མཛད་པ་དང་། ཆོས་དབྱིངས་ཡེ་ཤེས་ཀྱི་ནམ་མཁའ་ལ་སོགས་པའི་ཁམས་སོ་སོའི་ཆ་ཡིས་ཟད་པར་རྣམས་སྟན་ནས་དོན་མཛད་པ་སྟེ། དཔལ་ལྡན་རྒྱུད་ལས། དེ་དག་རྣམས་ཀྱིས་དུས་ཀྱི་འཁོར་ལོ་རྫུ་འཕྲུལ་རབ་ཏུ་གསལ་བྱེད་ཆེན་པོ་དུ་མ་སྤྲུལ་པའི་སྐུ། རྡོ་རྗེ་འབར་བ་འཕྲོ་བ་རྣམས་ཀྱིས་འདོད་པའི་ཁམས་ན་གནས་པའི་ལྷ་མིན་དང་ནི་མི་རྣམས་དང་། ལོངས་སྤྱོད་རྫོགས་པས་གཟུགས་ཅན་རྣམས་དང་མཁའ་ལ་རྒྱལ་བའི་སྲས་སོགས་དགྲ་བཅོམ་རྣམས་ལ་ཆོས་སྐུ་ཡིས། སྟོང་པའི་ཆ་ཡིས་སྲིད་གསུམ་མཐའ་དག་སྟོང་པའི་ཟད་པར་རླུང་རྣམས་ཀྱིས་ནི་རླུང་གི་ཟད་པར་ཏེ། མེ་ཡི་ཆ་ཤས་རྣམས་ཀྱིས་མེ་ཡི་ཟད་པར་ཆུ་ཡང་འགྲོ་ལ་སྤྲོས་པའི་ཆུ་ཡི་ཆ་རྣམས་ཀྱིས། འཛིན་མའི་ཆ་ཤས་རྣམས་ཀྱིས་ས་ཡི་ཟད་པར་ཚོགས་པའི་ཡུལ་རྣམས་ཀྱིས་ནི་དངོས་པོའི་རང་བཞིན་ཀུན། ཀུན་ནས་ནམ་མཁའ་དག་དང་མཚུངས་པ་གཅིག་གི་བདག་ཉིད་འདི་ནི་དག་པའི་ས་ལ་སྟོན་པར་མཛད། དེ་ལྟར་སངས་རྒྱས་སྐུར་གྱུར་བདེ་བ་གཅིག་པུའི་རང་བཞིན་ཕྱིར་ན་མཆི་བར་ཡང་ནི་མི་འགྱུར་རོ། །ཞེས་པ་དང་། དཔལ་ལྡན་ཟླ་བ་དང་ནི་ཟླ་བ་ཆུ་ཤེལ་རྣམ་རྟོག་མེད་པའི་རང་བཞིན་ལས་ནི་ཆུ་འབྱུང་པ། དེ་བཞིན་འཇིག་རྟེན་དུ་ནི་རྒྱལ་བའི་བདག་པོའི་ཕུང་པོ་ལ་རྟེན་ཐམས་ཅད་མཁྱེན་པའི་ཆོས་འཛག་སྟེ། ཆུ་ནི་ས་བོན་ཁམས་ལ་ཀུན་དུ་རྟེན་ནས་རོ་མཉམ་འགྱུར་བ་དེ་བཞིན་ཉིད་དུ་ཆོས་དག་ནི། སེམས་ཅན་རྣམས་ཀྱི་དག་པའི་སེམས་ཀྱིས་རྣམ་པ་མང་པོར་འགྱུར་ཏེ་མངོན་གྱི་ལས་ཀྱི་མཐུ་ལས་སོ། །ཞེས་པའོ། །དེ་བཞིན་དུ་གསང་བ་བསམ་གྱིས་མི་ཁྱབ་པའི་མདོ་ལས་ཀྱང་། ནམ་མཁའ་ཇི་སྙེད་ཁྱབ་པར་གྱུར་པ་དེ་སྙེད་སྐུ་དང་གསུང་དང་། ཐུགས་དང་ཡེ་ཤེས་དང་འོད་དང་ཕྲིན་ལས་ཀྱིས་ཁྱབ་པར་གསུངས་སོ། །དེ་ལྟར་ནམ་མཁས་གར་ཁྱབ་ན་སངས་རྒྱས་ཡོད་ཀྱང་སེམས་ཅན་ལ་ལས་མི་མཐོང་པ་ནི་རང་གི་སྒྲིབ་པ་གཉིས་ཀྱིས་སྒྲིབས་པས། རང་གི་ཀུན་གཞི་ཡེ་ཤེས་ཀྱི་མཛད་པ་མངོན་དུ་མ་གྱུར་པ་ཡིན་ནོ། །རྒྱུད་བླ་མ་ལས། དེ་བཞིན་སེམས་ཅན་ལ་ཡོད་ཉོན་མོངས་ཀྱི། དྲི་མ་དང་འདྲེས་རྒྱལ་བའང་ཇི་སྲིད་དུ། ཉོན་མོངས་དྲི་མ་འདྲེས་ལས་མ་གྲོལ་བ། དེ་སྲིད་རྒྱལ་མཛད་སྲིད་གསུམ་དུ་མི་བྱེད། ཞེས་པ་དང་། མདོ་སྡེ་བརྒྱན་ལས་ཀྱང་། ཇི་ལྟར་ཉི་མའི་འོད་ཟེར་རྣམས། །སྤྲིན་ལ་སོགས་པས་སྒྲིབ་པར་འདོད། །དེ་བཞིན་སངས་རྒྱས་ཡེ་ཤེས་རྣམས། །སེམས་ཅན་གྱི་ནི་ཉེས་པས་སྒྲིབས། ཞེས་པ་དང་། ཇི་ལྟར་ཆུ་ཡི་སྣོད་ཆག་ན། ཟླ་བའི་གཟུགས་བརྙན་མི་སྣང་བ། །དེ་བཞིན་སེམས་ཅན་ངན་པ་ལ། །སངས་རྒྱས་གཟུགས་ཀྱང་མི་སྣང་ངོ་། །ཞེས་པ་དང་། འཕགས་པ་ཀླུ་སྒྲུབ་ཀྱིས། ཉོན་མོངས་ཅན་གྱི་སེམས་ཅན་གྱིས། །དེ་བཞིན་གཤེགས་པ་མི་མཐོང་སྟེ། །ཇི་ལྟར་ཡི་དྭགས་རྣམས་ཀྱིས་ནི། །རྒྱ་མཚོ་སྐམས་པར་མཐོང་པ་བཞིན། །དེ་བཞིན་མི་ཤེས་པས་བསྒྲིབས་པས། །སངས་རྒྱས་རྣམས་ནི་མེད་པར་བཏགས། །ངན་པ་བསོད་ནམས་དམན་པ་ལ། །བཅོམ་ལྡན་འདས་ཀྱིས་ཅི་བགྱིར་མཆིས། ཞེས་གསུངས་པའི་དོན་ནོ། །ཏིང་ངེ་འཛིན་བསྒོམས་པ་ལ་སོགས་པའི་བསོད་ནམས་བྱས་པ་རྣམས་ལ། སྒྲིབ་པའི་ཆ་ཇི་ཙམ་དང་བྲལ་བ་དེ་ཙམ་གྱི་རང་ལ་བཞུགས་པའི་སངས་རྒྱས་མངོན་དུ་འགྱུར་ཏེ། འཕགས་པ་ཀླུ་སྒྲུབ་ཀྱིས། སེམས་ཅན་བསོད་ནམས་བྱས་རྣམས་ལ། །འོད་ཀྱིས་གསལ་ཞིང་དཔལ་ལྡན་པའི། །སུམ་ཅུ་རྩ་གཉིས་མཚན་འབར་བ། །སངས་རྒྱས་དེའི་མདུན་ན་བཞུགས། ཞེས་གསུངས་པའི་དོན་ནོ། །བྱང་ཆུབ་སེམས་དཔའ་རྟག་ཏུ་ངུ་བཞིན་ནོ། །གང་གི་ཕྱིར་དེ་ལྟར་ཡིན་པ་དེའི་ཕྱིར། འཁྲུལ་པ་སངས་པའི་ཡེ་ཤེས་ལ་འཁྲུལ་སྣང་གི་སྡུག་ཕོངས་སྣ་ཚོགས་མི་འཆར་ཞིང་། འཁྲུལ་པས་མནན་པའི་སེམས་ཅན་ལ་དག་སྣང་གི་ཕུན་སུམ་ཚོགས་པ་མི་འཆར་བར་ངེས་པ་ཡིན་ནོ། །སྣང་སྟོང་དབྱེར་མེད་ཞེས་ཡོངས་སུ་གྲགས་པའི་དོན་ནི། བདེན་པ་གཉིས་ཀ་སྣང་སྟོང་དབྱེར་མེད་དུ་ཁྱད་པར་མེད་ཅིང་། སྣང་ལུགས་དང་སྟོང་ལུགས་མི་ཅིག་གོ །ཀུན་རྫོབ་ནི་རྣམ་ཤེས་ལ་སྣང་པ་ཡིན་ལ། དོན་དམ་ནི་ཡེ་ཤེས་ལ་སྣང་པ་ཡིན་ནོ། །ཀུན་རྫོབ་རྣམ་ཤེས་ལ་སྣ་ཚོགས་སུ་སྣང་ཡང་འཁྲུལ་སྣང་ཡིན་པའི་ཕྱིར། དོན་དམ་བདེན་པ་སྟོང་པ་ཡིན་ནོ། །དོན་དམ་ཡེ་ཤེས་ལ་སྣ་ཚོགས་སུ་སྣང་ཡང་འོད་གསལ་ཙམ་དུ་སྣང་པའི་ཕྱིར། ཀུན་རྫོབ་འཁྲུལ་སྣང་གི་དངོས་པོས་སྟོང་པ་ཡིན་ནོ། །རྨི་ལམ་དང་སྒྱུ་མ་ལ་སོགས་པ་ནི། བདེན་པ་གཉིས་ཀ་སྣང་སྟོང་དབྱེར་མེད་ཡིན་པའི་དཔེར་གསུངས་ཤིང་། དཔེ་སྦྱར་ལུགས་ནི་མི་འདྲ་སྟེ། གང་གི་ཚེ་ཀུན་རྫོབ་ཀྱི་དཔེར་བཀོད་པ་དེའི་ཚེ་གང་དང་གང་དུ་སྣང་པ་དེ་དང་དེའི་དངོས་པོར་བདེན་པ་མཻད། རྨི་ལམ་བཞིན་སྒྱུ་མ་བཞིན་ཞེས་པའོ། །གང་གི་ཚེ་དོན་དམ་གྱི་དཔེར་བཀོད་པའི་དེའི་ཚེ་རང་རིག་ཡེ་ཤེས་ལ་སྣོད་བཅུད་ཀྱི་རྣམ་པ་སྣ་ཚོགས་སུ་སྣང་ཡང་དེ་དང་དེའི་ཀུན་རྫོབ་ཀྱི་དངོས་པོར་མེད་པ་སྟེ། རྨི་ལམ་བཞིན་སྒྱུ་མ་བཞིན་ཞེས་པའོ། །དེ་ལྟར་ཀུན་རྫོབ་ནི་རྣམ་ཤེས་སྣང་སྟོང་སྒྱུ་མ་ལྟ་བུའོ། །དོན་དམ་ནི་ཡེ་ཤེས་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་འཁྲུལ་པ་སྣང་སྟོང་སྒྱུ་མ་ལྟ་བུའོ། །དོན་དམ་ནི་མ་འཁྲུལ་པ་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་སྡུག་བསྔལ་སྣང་སྟོང་སྒྱུ་མ་ལྟ་བུའོ། །དོན་དམ་ནི་བདེ་བ་སྣང་སྟོང་སྒྱུ་མ་ལྟ་བུའོ། །སོགས་གོང་དང་མཐུན། ཀུན་རྫོབ་ནི་སྐྱོན་སྣང་སྟོང་སྒྱུ་མ་ལྟ་བུའོ། །དོན་དམ་ནི་ཡོན་ཏན་སྣང་སྟོང་། ཀུན་རྫོབ་ནི་སྡུག་འཕོངས་སྣང་སྟོང་སྒྱུ་མ་ལྟ་བུའོ། །དོན་དམ་ནི་ཕུན་ཚོགས་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་མ་རིག་པ་སྣང་སྟོང་སྒྱུ་མ་ལྟ་བུའོ། །དོན་དམ་ནི་རིག་པ་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་ཀུན་ནས་ཉོན་མོངས་པ་སྣང་སྟོང་སྒྱུ་མ་ལྟ་བུའོ། །དོན་དམ་ནི་རྣམ་པར་བྱང་པ་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་འཁོར་བ་སྣང་སྟོང་སྒྱུ་མ་ལྟ་བུའོ། །དོན་དམ་ནི་མྱང་འདས་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་བཟུང་འཛིན་སྣང་སྟོང་སྒྱུ་མ་ལྟ་བུའོ། །དོན་དམ་ནི་གཉིས་མེད་ཡེ་ཤེས་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་ཀུན་བཏགས་གཞན་དབང་སྣང་སྟོང་སྒྱུ་མ་ལྟ་བུའོ། །དོན་དམ་ནི་ཡོངས་གྲུབ་སྣང་སྟོང་སྒྱུ་མ་ལྟ་བུའོ། །ཀུན་རྫོབ་ནི་སྡུག་བསྔལ་ཀུན་འབྱུང་སྣང་སྟོང་སྒྱུ་མ་ལྟ་བུའོ། །དོན་དམ་ནི་འགོག་ལམ་སྣང་སྟོང་སྒྱུ་མ་ལྟ་བུའོ། །དེ་བཞིན་དུ་བདེན་པ་གཉིས་ཀ་ཡང་རྨི་ལམ་དང་གཟུགས་བརྙན་ལྟ་བུ་ལ་སོགས་པའང་ཤེས་པར་བྱའོ། །དེའང་དོན་དམ་གྱི་སྣང་སྟོང་ཟུང་འཇུག་སྟོན་པའི་སྐབས་སུ། ཡེ་ཤེས་རྡོ་རྗེ་ཀུན་ལས་སྡུས་པའི་རྒྱུད་ལས། དེ་ནས་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ཀྱི་ཞིང་རྣམས་སྒྱུ་མ་ལྟ་བུ་དང་། ཆུ་ཟླ་ལྟ་བུ་དང་། མིག་ཡོར་ལྟ་བུ་དང་། སྨིག་རྒྱུ་ལྟ་བུ་དང་། རྨི་ལམ་ལྟ་བུ་དང་། སྒྲ་སྙན་ལྟ་བུ་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་གི་གཟུགས་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས་བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །འཕགས་པ་ཀླུ་སྒྲུབ་ཀྱིས། རྣལ་འབྱོར་པས་ནི་གང་དག་དམིགས། །དེ་དེ་སྒྱུ་མ་བཞིན་དུ་བརྟག །མེ་ལོང་གི་ནི་གཟུགས་བརྙན་དང་། །རྨི་ལམ་སྒྱུ་མ་ཆུ་བུར་དང་། །དམིག་འཁྲུལ་མཚུངས་པར་གང་གིས་མཐོང་། །དེ་ནི་གཙོ་བོ་ཡིན་པར་བཤད། །མཐོང་པ་དང་ནི་རེག་པ་ཉིད། །འགྲོ་བ་སྒྱུ་མ་ཇི་བཞིན་ཏེ། །ཀུན་རྫོབ་དམིགས་མེད་དག་དང་ནི། །སྒྱུ་མ་ལྟ་བུར་རབ་ཏུ་བཤད། །ཞེས་པའོ། །དེ་ལྟ་བས་ན་དོན་དམ་སྣང་པ་དང་། ཀུན་རྫོབ་ཀྱི་དངོས་པོ་སྟོང་པ་ཟུང་དུ་འཇུག་པས་དོན་དམ་སྣང་སྟོང་ཟུང་འཇུག་རྨི་ལམ་ལ་སོགས་པའོ། །ཀུན་རྫོབ་སྣང་པ་དང་བདེན་པས་སྟོང་པ་ཟུང་དུ་འཇུག་པས། ཀུན་རྫོབ་སྣང་སྟོང་ཟུང་འཇུག་རྨི་ལམ་ལ་སོགས་པ་ལྟ་བུའོ། །དེ་ནས་རྨི་ལམ་ལ་སོགས་པ་ལྟར་བདེན་པ་གཉིས་ཀ་ཁྱད་མེད་ཀྱང་། ཀུན་རྫོབ་ཀྱི་ཡུལ་སྒྱུ་མ་ལྟ་བུར་མི་འཆར་ཞིང་། ཀུན་རྫོབ་ཀྱི་བློས་ཀྱང་སྒྱུ་མ་ལྟ་བུར་མི་རིག་ལ། མི་བདེན་བཞིན་དུ་བདེན་པར་ཞེན་པས་འཁྲུལ་ཞིང་བསླུས་པ་ཡིན་ནོ། །སྒྲིབ་པའི་ས་བོན་རླུང་ཁུག་པ་གཅིག་འགགས་ནས་དོན་དམ་གྱི་ཡུལ་ནི་སྒྱུ་མ་ལྟ་བུར་འཆར་ཞིང་། དོན་དམ་གྱི་བློས་ཀྱང་སྒྱུ་མ་ལྟ་བུར་རིག་པས་གང་ལ་ཡང་ཞེན་པ་མེད་པའི་ཏིང་ངེ་འཛིན་ཐོབ་ཅིང་། བདེ་སྐྱིད་ཕུན་སུམ་ཚོགས་པས་ནམ་མཁའ་གང་པ་ཡིན་ནོ། །དེ་ལྟར་ཆོས་སྐུའི་མཛད་པ་ཕྲིན་ལས་ཐམས་ཅད་ ཀུན་གཞི་ཡེ་ཤེས་ཀྱི་རྣམ ་འགྱུར། ཕྱག་རྒྱ་ཆེན་པོའི་རང་སྣང་། ཐེག་པ་ཆེན་པོའི་རང་གཟུགས། དབུ་མ་ཆེན་པོའི་ཉམས་མྱོང་། བདེ་གཤེགས་སྙིང་པོའི་རྣམ་འཕྲུལ། གཞན་སྟོང་ཟབ་མོའི་ཡོ་ལང་། འོད་གསལ་ཆོས་སྐུའི་རོལ་པ། ཤེར་ཕྱིན་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་ཡིན་པས། ཕྲིན་ལས་ཀྱི་གདངས་ཆེན་པོ། ཕྲིན་ལས་ཀྱི་ཀློང་ཆེན་པོ། ཕྲིན་ལས་ཀྱི་ཁྱབ་བརྡལ་ཆེན་པོ་ཐམས་ཅད་དོན་དམ་ཀྱི་སེམས་སུ་ངོ་སྤྲད་པར་བྱའོ།། །།