བརྩམ་པར་དམ་བཅའ་དངོས།
གཉིས་པ་བརྩམ་པར་དམ་བཅའ་དངོས་ནི།
ཚུལ་དེས་ཆགས་སྡང་འདུ་ཤེས་རབ་བསྐྱུངས་ཏེ། །
གསར་རྙིང་ལྟ་གྲུབ་ཁྱད་པར་གནས་ཚུལ་ཙམ། །
སོ་སོའི་ལུགས་བཞིན་མ་འདྲེས་སྣང་བའི་གཟུགས། །
རབ་གསལ་ཤན་འབྱེད་སྒྲོན་མེ་མདོ་ཙམ་སྤྲོ། །
ཞེས་སོགས་ཏེ། ཚུལ་དེས་ན་སྤྱིར་རྣམ་འདྲེན་ཐུབ་པའི་བསྟན་པ་རིན་པོ་ཆེ་ས་དགེ་བཀའ་རྙིང་གིས་བསྡུས་པའི་ཆོས་དང་གང་ཟག་སུ་ཡང་རུང་སྟེ་སྦྲང་རྩི་དང་བུ་རམ་རོ་གཅིག་པ་བཞིན་དུ། འདི་དང་ཕྱི་མའི་སྐྱབས་ཀྱི་དམ་པར་གྱུར་གཤིས་ཕྱོགས་དང་རིས་སུ་བཅད་དེ་རང་ཕྱོགས་བསྒྲུབ་འདོད་ཀྱི་ཆགས་ཞེན་དང་གཞན་ཕྱོགས་དགག་འདོད་སོགས་སྡང་ཞུགས་ཀྱི་སྒོ་ནས་ཕྱི་མ་རྣམ་སྨིན་མི་ཟད་པའི་རྒྱུར་གྱུར་པ་ཆགས་སྡང་སོགས་ཀུན་རྟོག་ངན་པའི་འདུ་ཤེས་རབ་ཏུ་བསྐྱུངས་ཏེ། གསར་རྙིང་གི་ལྟ་གྲུབ་ཀྱི་ཁྱད་པར་གནས་ཚུལ་ཙམ་ཞིག་སྒྲོ་སྐུར་དང་བྲལ་བར་མཁས་དབང་སོ་སོའི་གཞུང་ལུགས་བཞིན་དུ་མ་འདྲེས་པར་རབ་ཏུ་སྣང་བའི་གཟུགས་ཀྱི་ཁྱད་པར་རྣམས་རབ་ཏུ་གསལ་བར་བྱེད་པའི་ཤན་འབྱེད་ཀྱི་སྒྲོན་མེ་མདོར་བསྡུས་ཙམ་དུ་འཆད་པར་སྤྲོས་སོ། །ཞེས་བརྩམ་པར་དམ་བཅས་པའོ། །