བརྩམ་བྱ་གཞུང་གི་དོན་ལ་ཕྱི་ནང་གྲུབ་མཐའི་ཁྱད་པར། །
གཉིས་པ་བརྩམ་བྱ་གཞུང་ལ་ལྟ་གྲུབ་ཐེག་པའི་ཁྱད་པར་དང༌། །ཁྱད་པར་ཅན་གྱི་ལྟ་གྲུབ་ཤན་འབྱེད་གཉིས། །དང་པོར་ཕྱི་ནང་གྲུབ་མཐའི་ཁྱད་པར་དང༌། །ཁྱད་པར་ཐེག་པ་གོང་འོག་ཤན་འབྱེད་གཉིས། །དང་པོ་ནི།
གངས་ལྗོངས་མཁས་དབང་སྔ་ཕྱི་ཡི། །
བཞེད་སྲོལ་ཁྱད་པར་བརྗོད་ལས་འདས། །
དེ་ལ་ཕྱི་ནང་ཁྱད་པར་ཙམ། །
དབྱེ་བའི་ཚུལ་ལ་མི་མཐུན་ཡོད། །
མཉམ་མེད་ཇོ་བོའི་བཞེད་སྲོལ་བཞིན། །
ཕྱི་འགྱུར་མཁས་དབང་ཕལ་མོ་ཆེས། །
ཕྱི་ནང་ཁྱད་པར་སྐྱབས་འགྲོས་འབྱེད། །
དེ་ཙམ་རྟེན་གྱི་དབྱེ་བར་ཟད། །
མདོ་རྒྱུད་ལུང་གི་དགོངས་དོན་བཞིན། །
སྔ་འགྱུར་པ་རྣམས་ཕྱི་ནང་གི།
ཁྱད་པར་རྟེན་དང་ལྟ་སྒོམ་དང༌། །
སྤྱོད་འབྲས་ཁྱད་པར་དཔག་ཡས་བཞེད། །
ཅེས་སོགས་ཏེ། དེ་ལ་སྤྱིར་གངས་ལྗོངས་མཁས་པའི་དབང་པོ་སྔ་ཕྱིར་བྱོན་པའི་བཞེད་སྲོལ་གྱི་ཁྱད་པར་རེ་རེ་ནས་བརྗོད་ལས་འདས་པ་ཞིག་ཡོད་མོད། དེ་ལ་སྐབས་འདིར་རེ་ཞིག་ཕྱི་ནང་གི་ཁྱད་པར་ཙམ་དབྱེ་བའི་ཚུལ་ལའང་བཞེད་པ་མི་མཐུན་པའི་ཁྱད་པར་དུ་མ་ཡོད་དེ། དེ་ལ་ཕྱི་འགྱུར་གྱི་མཁས་དབང་འགའ་ཞིག་གིས་ནི། གྲུབ་མཐའི་འཁྲུལ་སྤོང་གདོང་ལྔའི་སྒྲ་དབྱངས་ལས་བསྟན་པ་དང་སྟོན་པ་ལྟ་བའི་ཁྱད་པར་ཕྱི་ནང་གཉིས་ཞེས་སོགས་གསུངས་པ་ལྟར། བསྟན་པའི་ཁྱད་པར་ཕྱག་རྒྱ་བཞི་ལས་འདའ་མི་འདའ་དང༌། ལམ་བསླབ་པ་གསུམ་དང་ལྡན་མི་ལྡན་དང༌། སྟོན་པའི་ཁྱད་པར་ཐུབ་པ་ཆེན་པོ་སྟོན་པར་འཛིན་མི་འཛིན་དང༌། ལྟ་བའི་ཁྱད་པར་དབང་ཕྱུག་སོགས་བྱེད་པ་པོར་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་དང༌། ཡང་ཁ་ཅིག་བྱང་ཆུབ་སེམས་དཔའི་སྡེ་སྣོད་ལས་བྱུང་བ་ལྟར་ལྟ་བ་བཀའ་རྟགས་ཀྱི་ཕྱག་རྒྱ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་སོགས་ཀྱང་ཡོད་མོད། ལུགས་དེ་དག་ནི་རང་ལུགས་དང་ཡང་དོན་གྱི་མཐུན་པས་ཤན་འབྱེད་ཀྱི་ཁྱད་པར་དུ་མ་སྨྲོས་ལ། ཡང་ཁ་ཅིག་མཉམ་མེད་ཇོ་བོ་རྗེས་བྱང་ཆུབ་ལམ་སྒྲོན་དུ། ཕྱི་པ་ནང་པ་སྐྱབས་འགྲོའི་ཁྱད་ཅེས་གསུངས་པར་མཛད་དེ། སྤྱིར་ཕྱི་ནང་གི་ཁྱད་པར་སྐྱབས་འགྲོའི་སྒོ་ནས་ཀྱང་འབྱེད་དགོས་པར་གསུངས་པའི་བཞེད་སྲོལ་བཞིན་དུ། ཕྱི་འགྱུར་མཁས་པའི་དབང་པོ་ཕལ་མོ་ཆེས་ནི། ཕྱི་ནང་གི་ཁྱད་པར་སྐྱབས་འགྲོ་ཙམ་གྱིས་འབྱེད་པར་མཛད་དེ། ལྟ་གྲུབ་ཆེན་མོ་སོགས་གྲུབ་མཐའི་ཡིག་ཆ་རྣམས་སུ། དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་ཞིང་དེ་ལས་གཞན་པའི་སྐྱབས་གཞན་མི་འཚོལ་བ་ནང་པ་སངས་རྒྱས་པའི་མཚན་ཉིད་དེ་ལས་བཟློག་པ་ཕྱི་རོལ་པའི་མཚན་ཉིད་ཅེས་སྐྱབས་འགྲོའི་སྒོ་ནས་ཕྱི་ནང་གི་ཁྱད་པར་འབྱེད་པར་མཛད་མོད་ཚུལ་དེ་ནི་མི་ལྡན་རྣམ་གཅོད་ཀྱི་ཚུལ་དུ་ཁྱད་པར་བྱེ་བྲག་པ་གཞི་རྟེན་སྐྱབས་ཀྱི་སྒོ་ནས་ཁྱད་འབྱེད་པར་མཛད་པ་ཙམ་མོ། །འོན་ཀྱང་ཁ་ཅིག་ཕྱི་ནང་གི་ཁྱད་པར་ལྟ་བ་བཀའ་རྟགས་ཀྱི་ཕྱག་རྒྱ་བཞིའི་སྒོ་ནས་འབྱེད་པ་མི་འཐད་དེ། ཞེས་བཀག་ནས་དེ་གཉིས་ཀྱི་ཁྱད་པར་སྐྱབས་འགྲོ་ཙམ་ཁོ་ནས་འབྱེད་དགོས་སོ་ཞེས་གསར་རྙིང་ཕལ་མོ་ཆེ་ཞིག་མགྲིན་པ་བསྒྲིགས་ཏེ་སྨྲ་བར་བྱེད་མོད། ཕྱོགས་རིའི་མིག་ཅན་དེ་དག་གིས་མདོ་དང་བསྟན་བཅོས་ཆེན་པོ་རྣམས་སུ་གསུངས་པའི་ཕྱི་ནང་གི་ཁྱད་པར་ཟབ་ཅིང་ཕྲ་བ་ཇི་སྙེད་བསྟན་པ་རྣམས་ཕྱོགས་གར་ཡོད་ཙམ་ཡང་མ་མཐོང་བར་རྟེན་པ་སྐྱབས་ཀྱི་སྒོ་ནས་དབྱེ་བར་མཛད་པའི་གཞུང་ཆེན་པོའི་ཚིག་ཙམ་ཁ་ལ་ཁྱེར་ཤེས་པར་ཟད་དོ། །
ཚུལ་དེས་ན་མདོ་རྒྱུད་རྒྱ་མཚོ་ལྟ་བུའི་ལུང་གི་དགོངས་དོན་ཇི་ལྟ་བ་བཞིན་དུ་སྔ་འགྱུར་རྙིང་མར་སྨྲ་བ་རྣམས་ནི། ཡིད་བཞིན་རིན་པོ་ཆེའི་མཛོད་སོགས་ལས་གསུངས་པ་བཞིན་དུ་ཕྱི་ནང་གི་གྲུབ་མཐའི་ཁྱད་པར་ལ། རྟེན་པ་སྐྱབས་ཀྱི་ཁྱད་པར། གནས་ལུགས་ལྟ་བའི་ཁྱད་པར། སྒོམ་པ་གོམས་པའི་ཁྱད་པར། བྱ་བ་སྤྱོད་པའི་ཁྱད་པར། ཐོབ་བྱ་འབྲས་བུའི་ཁྱད་པར་རྣམ་པ་ལྔའི་སྒོ་ནས་ཁྱད་པར་དཔག་ཡས་ཡོད་པར་བཞེད་དོ། །དེ་དག་གི་ཚུལ་རྒྱས་པར་བྱང་ཆུབ་སེམས་དཔའི་སྡེ་སྣོད་སོགས་མདོ་དང་བསྟན་བཅོས་ཆེན་པོ་སྤྱི་དང༌། ཁྱད་པར་ཀུན་མཁྱེན་ཆོས་རྗེའི་འགྲེལ་ཆེན་པདྨ་དཀར་པོ་སོགས་ལས་ད་གཟོད་རྟོགས་པར་འཚལ་ལོ། །དེ་ལ་ཁ་ཅིག་ཕྱི་ནང་གི་ཁྱད་པར་སྐྱབས་འགྲོའི་སྒོ་ནས་འབྱེད་དགོས་ཀྱི། ལྟ་བ་བཀའ་རྟགས་ཀྱི་ཕྱག་རྒྱ་བཞིའི་སྒོ་ནས་དེ་གཉིས་ཀྱི་ཁྱད་པར་འབྱེད་མི་རིགས་ཏེ། ལུང་དང་རིགས་པ་གཉིས་དང་འགལ་བའི་ཕྱིར་ཏེ།
དང་པོ་ལུང་དང་འགལ་ཏེ། ཇོ་བོའི་ལམ་སྒྲོན་སོགས་དང་འགལ་བའི་ཕྱིར་ཞེས་སྨྲ་བ་ནི་གནད་མ་གོ་བ་སྟེ། ལུང་དེའི་དགོངས་པ་སྐབས་དེའི་ཁྱད་ཆོས་ལྔའི་དང་པོ་རྟེན་པ་སྐྱབས་ཀྱི་ཁྱད་པར་གྱི་སྒྲུབ་བྱེད་ཡང་དག་ཏུ་སོང་གི་སྐྱབས་འགྲོ་ཙམ་ལས་ཁྱད་པར་གཞན་མེད་ཅེས་གཞན་ལྡན་རྣམ་གཅོད་དུ་མ་མཛད་པས་ལུང་དེ་དག་དང་ག་ལ་འགལ། ཚུལ་འདི་དང་རྗེས་སུ་མཐུན་པར་འགའ་ཞིག་ན་རེ། དེ་གཉིས་ཀྱི་ཁྱད་པར་སྐྱབས་འགྲོའི་སྒོ་ནས་འབྱེད་དགོས་པར་ཨ་ཏི་བཀོད་པ་ཆེན་པོའི་ལུང་གིས་བསྒྲུབ་ཁུལ་བྱེད་པ་ནི་གྲུབ་ཟིན་སྒྲུབ་པའི་སྨྲ་བ་ཙམ་དུ་ཟད་དོ། །
གཉིས་པ་རིགས་པ་དང་འགལ་ཏེ་ལྟ་བ་བཀའ་རྟགས་ཀྱི་ཕྱག་རྒྱ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་དགོས་ན་མཚན་གཞི་ནང་པའི་ཡོན་བདག་དེ་ལ་མ་ཁྱབ་པའི་ཕྱིར་ཏེ། ནང་པའི་ཡོན་བདག་དེ་ནང་པ་ཡིན་དགོས་ཀྱང་དེས་ཕྱག་རྒྱ་བཞི་ཁས་ལེན་མི་ཤེས་པའི་ཕྱིར་ཟེར། འོ་ན་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་མི་ལེན་གྱི་སྒོ་ནས་ཕྱི་ནང་གི་ཁྱད་པར་འབྱེད་པ་དེ་ཡང་མི་འཐད་པར་ཐལ། མཚན་གཞི་ནང་པའི་ཡོན་བདག་དེ་ལ་མ་ཁྱབ་པའི་ཕྱིར་ཏེ། མཚན་གཞི་དེ་ཡིན་ན་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་ཚུལ་དེ་ཡང་མི་ཤེས་པའི་ཕྱིར། རྗེའི་ལམ་རིམ་ཆེན་མོ་ལས། སྐྱབས་སུ་ཁས་ལེན་ཚུལ་དེ་ཡང༌། དཀོན་མཆོག་གསུམ་གྱི་ཡོན་ཏན་ཤེས་པ་དང༌། ཁྱད་པར་ཤེས་པ་དང༌། ཁས་བླང་བ་དང༌། གཞན་དུ་མི་སྨྲ་བ་སྟེ། ཆོས་བཞི་དང་ལྡན་དགོས་པར་གསུངས་པས་ཕྱག་རྒྱ་བཞི་ཁས་ལེན་ཚུལ་ཙམ་ཡང་མི་ཤེས་པའི་ནང་པའི་ཡོན་བདག་དེས་དཀོན་མཆོག་གསུམ་གྱི་ཡོན་ཏན་ཤེས་པ་སོགས་ཀྱི་སྒོ་ནས་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པ་ཡང་དཀའ་བར་གནས་ཏེ། མདོ་ལས་ཀྱང༌།
འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང༌། །
ལྗོན་ཤིང་ཆེ་ལ་སྐྱབས་སུ་འགྲོ། །སྐྱབས་དེ་གཙོ་བོ་མ་ཡིན་ཏེ། །སོགས་ཀྱིས་ཟག་བཅས་སྡུག་བསྔལ་དུ་ཤེས་པ་སོགས་བདེན་བཞིའི་གནས་ལུགས་ཟབ་མོའི་རང་བཞིན་ཕྱག་རྒྱ་བཞིའི་དགོངས་དོན་ལས་མི་འདའ་བར་ཁས་ལེན་པའི་སྒོ་ནས་སྐྱབས་སུ་འགྲོ་དགོས་པར་བསྟན་གྱི། དེ་ལས་བཟློག་པའི་སྐྱབས་འགྲོ་དེ་འདྲས་ཀྱང་ཕྱི་ནང་གི་ཁྱད་པར་འབྱེད་ཆོས་སུ་ག་ལ་འགྱུར། ཡང་ཁ་ཅིག་ཕྱག་རྒྱ་བཞི་ཁས་ལེན་པ་ནང་པ་དང༌། དེ་ལས་བཟློག་པ་ཕྱི་རོལ་པར་འཇོག་ན། མང་བཀུར་སྡེ་ལྔ་དེ་ནང་པ་མ་ཡིན་པར་ཐལ་ཏེ། དེས་ཕྱག་རྒྱ་བཞི་ཁས་མི་ལེན་པའི་ཕྱིར་ཏེ། གང་ཟག་གི་བདག་རྫས་གྲུབ་ཏུ་འདོད་པའི་ཕྱིར་ཟེར། འོ་ན་ནང་པའི་དངོས་སྨྲ་བ་དེ་ཆོས་ཅན། ཁྱོད་ཡིན་ན་ཕྱག་རྒྱ་བཞི་ཁས་མི་ལེན་པའི་གྲུབ་མཐའ་ཡིན་པས་ཁྱབ་པར་ཐལ་ཏེ། ཆོས་ཐམས་ཅད་སྟོང་པར་མི་འདོད་པའི་ཕྱིར་ཏེ། ཆོས་བདག་ཕྲ་བ་ཆ་མེད་གཉིས་སོགས་རྫས་གྲུབ་ཏུ་འདོད་པའི་ཕྱིར། དེས་ན་བཀའ་བསྡུ་རིམ་པ་གསུམ་པའི་སྐབས་སུ་རྒྱལ་པོ་ཀྲི་ཀྲིའི་རྨི་ལམ་ལུང་བསྟན་པའི་མདོ་སོགས་ཀྱི་རྗེས་སུ་འབྲངས་ཏེ་ཉན་ཐོས་སྡེ་པ་བཅོ་བརྒྱད་པོ་མཐའ་དག་ནང་པ་སངས་རྒྱས་པའི་ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པར་མཚུངས་པའི་སྒོ་ནས་ཐར་ལམ་རྣམ་དག་ཏུ་གྱུར་པའི་གྲུབ་མཐར་གྲུབ་ཟིན་པ་ལྟར་མང་བཀུར་སྡེ་ལྔ་པོས་ཀྱང༌། གང་ཟག་གི་བདག་མེད་ཇི་བཞིན་གཏན་ལ་ཕབ་སྟེ། ཕྱག་རྒྱ་བཞི་ཁས་ལེན་ཀྱང་བདག་ལྟའི་དམིགས་པ་བཏགས་ཡོད་དུ་འཇོག་མ་ཤེས་པར་རྫས་ཡོད་ཀྱི་ཐ་སྙད་སྦྱར་རུང་ཕྱི་རོལ་པའི་རྟག་དངོས་ཀྱི་བདག་དང་ག་ལ་འདྲ། དེ་བཞིན་དུ་ཐེག་ཆེན་སེམས་ཙམ་པས་ཀྱང་ཆོས་ཀྱི་བདག་མེད་ཕྲ་བ་ནས་རྫོགས་པར་བཞེད་ཅིང་སྣང་གཞི་གཞན་དབང་བདེན་པར་འདོད་རུང་བྱེ་སྨྲ་སོགས་དང་མི་འདྲ་བའི་ཁྱད་པར་དག་ཀྱང་མཁྱེན་པར་འཚལ་ལོ། །བརྗོད་དགོས་པ་མང་ཡང་རེ་ཞིག་དེ་ཙམ་མོ། །དེས་ན་ཕྱི་ནང་ཙམ་གྱི་ཁྱད་པར་སྐྱབས་འགྲོའི་སྒོ་ནས་ཀྱང་འབྱེད་པར་མཁས་འཇུག་ལས་གསུངས་མོད། འོན་ཀྱང་ཕྱི་ནང་གི་གྲུབ་མཐའི་ཁྱད་པར་ནི་གོང་དུ་བཤད་མ་ཐག་པ་བཞིན་མི་ཕམ་ཆོས་རྗེའི་གྲུབ་བསྡུས་སོགས་ལས་གསུངས་པ་ལྟར་རོ། །