ལམ་གྱི་གཞི་རྟེན་སྐྱབས་འགྲོ།

གཉིས་པ་བརྗོད་བྱ་གཞུང་དོན་ལ་བརྗོད་བྱ་ལམ་གྱི་འཇུག་སྒོ་དང༌། །བརྗོད་བྱའི་རང་བཞིན་གཞུང་དོན་དངོས་དང་གཉིས། །དང་པོར་ལམ་གྱི་གཞི་རྟེན་སྐྱབས་འགྲོ་དང༌། །ཐེག་ཆེན་ལམ་གྱི་འཇུག་སྒོ་སེམས་བསྐྱེད་གཉིས། །དང་པོ་ནི།

སྐྱབས་འགྲོར་མཆོག་གསུམ་མཚན་ཉིད་དང༌། །

མཚན་གཞི་རྒྱུ་འབྲས་སྐྱབས་འགྲོ་དང༌། །

གནས་སྐབས་མཐར་ཐུག་རབ་དབྱེ་སོགས། །

གཞན་དག་རྣམ་གཞག་གཞན་དུ་འཆད། །

རང་བཞེད་སྔ་འགྱུར་ལོ་པཎ་རྣམས། །

མཆོག་གསུམ་སྐྱབས་ཀྱི་ངོ་བོ་དང༌། །

དེ་ཡི་མཚན་གཞིའི་རབ་དབྱེ་སོགས། །

བཀའ་དང་དགོངས་འགྲེལ་གཞུང་བཞིན་བཞེད། །

ཅེས་སོགས་ཏེ། ལམ་གྱི་གཞི་རྟེན་སྐྱབས་འགྲོར་ཡང༌། བཞེད་པའི་ཁྱད་པར་སོ་སོར་སྣང་སྟེ། སྐྱབས་ཡུལ་མཆོག་གསུམ་གྱི་མཚན་ཉིད་འཆད་པ་ན། ཁ་ཅིག་སངས་རྒྱས་དཀོན་མཆོག་གི་མཚན་ཉིད་དག་པ་གཉིས་ལྡན་གྱི་དབྱིངས་མཐར་ཐུག་གང་ཞིག་མཁྱེན་བརྩེ་ནུས་གསུམ་དང་ལྡན་པའི་སྐུ་ཞེས་སོགས་དང༌། ཆོས་དཀོན་མཆོག་གི་མཚན་ཉིད། བསམ་དུ་མེད་པ་ལ་སོགས་པའི་ཡོན་ཏན་བརྒྱད་དང་ལྡན་པའི་འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེས་སོགས་དང༌། ཁ་ཅིག་འགོག་ལམ་གང་རུང་གིས་བསྡུས་པའི་ཟག་མེད་རྣམ་བྱང་གི་བདེན་པ་ཞེས་དང༌། དགེ་འདུན་དཀོན་མཆོག་གི་མཚན་ཉིད་དུ། འགོག་ལམ་གང་རུང་གིས་བསྡུས་པའི་བྱང་འཕགས་ཀྱི་རྒྱུད་ཀྱི་ཟག་མེད་རྣམ་བྱང་གི་བདེན་པ་ཞེས་སོགས་དང༌། རིག་གྲོལ་གྱི་ཡོན་ཏན་བརྒྱད་དང་ལྡན་པའི་རྒྱལ་སྲས་འཕགས་པ་ཞེས་སོགས་སྨྲ་བ་དང༌། མཆོག་གསུམ་གྱི་མཚན་གཞིའི་ངོ་བོ་ཡང༌། ཚུར་མཐོང་གིས་བཞག་པའི་དངོས་མེད་ཙམ་གྱི་རང་བཞིན་དུ་འཇོག་པ་དང༌། རྒྱུ་དང་འབྲས་བུའི་སྐྱབས་འགྲོའི་དབྱེ་བ་ཡང་འཆད་དུ་མེད་པ་དང༌། གནས་སྐབས་སྐྱབས་གསུམ་དུ་འཇོག་སྐབས་སྤྱིར་ཐེག་ཆེན་གྱི་མཆོག་གསུམ་ཙམ་ལ་ངོས་འཛིན་ཀྱང་མཐར་ཐུག་སྐྱབས་གཅིག་ཏུ་འཇོག་ཚེ་ཐེག་དམན་གྱི་ཆོས་དང་དགེ་འདུན་གཉིས་སྐྱབས་མཐར་ཐུག་མིན་པར་སྨྲ་ཞིང༌། ཐེག་ཆེན་གྱི་དེ་གཉིས་སྐྱབས་མཐར་ཐུག་ཡིན་མིན་གང་ཡང་འཆད་དུ་མེད་པར་སྐྱབས་ནི་སངས་རྒྱས་ཉག་གཅིག་སྟེ་ཞེས་རང་གར་སྨྲ་བ་སོགས། གཞན་དག་ནི་རྣམ་པར་གཞག་པ་གཞན་དང་གཞན་དུ་འཆད་པར་མཛད་དོ། །

རང་བཞེད་ནི་སྔ་འགྱུར་གྱི་ལོ་པཎ་རྣམས་ཀྱིས་སྐྱབས་ཡུལ་མཆོག་གསུམ་གྱི་མཚན་ཉིད་ཀྱི་ངོ་བོ་ཡང་ཐེག་པ་ཆེན་པོ་རྒྱུད་བླ་མའི་གཞུང་དོན་ཇི་ལྟ་བ་བཞིན་དུ་དོན་གཉིས་ཡོན་ཏན་བརྒྱད་ལྡན་སངས་རྒྱས་དཀོན་མཆོག་གི་མཚན་ཉིད། འགོག་ལམ་ཡོན་ཏན་བརྒྱད་ལྡན་ཆོས་དཀོན་མཆོག་གི་མཚན་ཉིད། རིག་གྲོལ་ཡོན་ཏན་བརྒྱད་ལྡན་དགེ་འདུན་དཀོན་མཆོག་གི་མཚན་ཉིད་ཅེས་སྤྱིར་འཇོག་གོ །

འོ་ན་སངས་རྒྱས་འཕགས་པ་ཆོས་ཅན། མཚོན་བྱ་ཆོས་དང་དགེ་འདུན་གཉིས་པོར་དེར་ཐལ། མཚན་ཉིད་དེའི་ཕྱིར་ཞེ་ན། འདོད་དེ། ཚོགས་ཀྱང་དེ་ཡི་མཐར་ཐུག་ཕྱིར་སོགས་ཀྱི་གཞུང་དྲན་པར་མཛོད་ཅིག་གུ། དེ་ལ་གནས་སྐབས་ཀྱི་སྐྱབས་གསུམ་དུ་དབྱེ་སྐབས་མཚན་ཉིད་ཀྱི་ཟུར་དུ་གནས་སྐབས་ཀྱི་སྐྱབས་གནས་གང་ཞིག་འགོག་ལམ་ཡོན་ཏན་བརྒྱད་ལྡན་གྱི་ཆོས་དེ་གང་ཞིག་རིག་གྲོལ་ཡོན་ཏན་བརྒྱད་ལྡན་དགེ་འདུན་དཀོན་མཆོག་གི་མཚན་ཉིད་ཅེས་འཇོག་པར་མཛད་དོ། །

དེ་ལ་ཆོས་དཀོན་མཆོག་གི་མཚན་ཉིད་དེ་མི་འཐད་དེ། འགོག་ལམ་གྱི་ཚོགས་པ་མི་སྲིད་པའི་ཕྱིར། དེས་ན་མཚན་ཉིད་ཀྱི་ཟུར་དུ་འགོག་ལམ་གང་རུང་ཞེས་སྦྱར་དགོས་ཟེར་ཡང༌། སྣང་སྟོང་འགལ་བར་བལྟ་བ་བསྡུས་གྲྭའི་རིགས་ལམ་གྱི་གོ་དོན་ཙམ་དུ་ཟད་ཀྱི་སྣང་སྟོང་འགལ་མེད་ཀྱི་གོ་དོན་ཟབ་མོ་མ་སློང་བར་སྣང་ངོ༌། །དེ་བཞིན་དུ་མཚན་གཞིའི་ཁྱད་པར་ཡང༌། སངས་རྒྱས་དཀོན་མཆོག་གི་ཁྱད་པར་སྤངས་པ་ངོ་བོ་ཉིད་སྐུ་དང་རྟོགས་པ་ཡེ་ཤེས་ཆོས་སྐུ་དབྱེར་མེད་པ་ཟབ་ཞི་སྤྲོས་བྲལ་འོད་གསལ་འདུས་མ་བྱས་པའི་བདག་ཉིད་དང༌། ཆོས་དཀོན་མཆོག་གི་ཁྱད་པར་འགོག་བདེན་གྱི་ངོ་བོ་མཐའ་ཀུན་དང་བྲལ་བའི་སྟོང་ཉིད་གང་ཞིག་དེའི་རང་མདངས་འོད་གསལ་བའི་ངོ་བོ་རེ་ཞིག་མངོན་དུ་གྱུར་པ་ལམ་གྱི་ཆོས་སུ་བཞེད་པ་དང༌།

དགེ་འདུན་དཀོན་མཆོག་གི་ཁྱད་པར་རྒྱལ་སྲས་འཕགས་པའི་བདག་ཉིད་ས་དང་པོ་སོགས་ནས་ཀྱང་རིག་གྲོལ་ཡོན་ཏན་བརྒྱད་ཀྱི་མཚན་ཉིད་ལྡན་པར་འཇོག་པ་དང༌། རྒྱུ་འབྲས་ཀྱི་སྐྱབས་འགྲོའི་ཁྱད་པར་ཡང༌། རྒྱུ་ཡི་སྐྱབས་འགྲོ་གཞན་རྒྱུད་ལ་བྱོན་ཟིན་པ་སོགས་ཀྱིས་བསྟན་པ་ལྟར་རྒྱུ་སྐྱབས་དང༌། འབྲས་བུའི་སྐྱབས་འགྲོ་རང་རྒྱུད་དཀོན་མཆོག་གསུམ་སོགས་ཀྱིས་བསྟན་པ་ལྟར་འབྲས་སྐྱབས་ཏེ་རྣམ་པ་གཉིས་སུ་བཞེད་པ་དང༌། གནས་སྐབས་དང་མཐར་ཐུག་གི་སྐྱབས་ཀྱི་ཁྱད་པར་རྒྱུད་བླ་མའི་དགོངས་དོན་ཇི་ལྟ་བ་བཞིན་ཐེག་པ་ཆེན་པོའི་མཆོག་གསུམ་གཞིར་བཞག་གི་སྟེང་ནས་གནས་སྐབས་སྐྱབས་གསུམ་དུ་དབྱེ་ཡང༌། སྐྱབས་ནི་སངས་རྒྱས་ཉག་གཅིག་སྟེ་ཞེས་མཐར་ཐུག་གི་སྐྱབས་སངས་རྒྱས་དཀོན་མཆོག་དང༌། གཞན་གཉིས་གནས་སྐབས་ཀྱི་སྐྱབས་སུ་བཞེད་པར་མཛད་པ་སོགས་ནི། ཐེག་པ་ཆེན་པོའི་བཀའ་དང་དགོངས་འགྲེལ་གྱི་གཞུང་བཞིན་འཆད་པའི་ཁྱད་པར་མཐའ་ཡས་སོ། །