ཐེག་ཆེན་ལམ་གྱི་འཇུག་སྒོ་སེམས་བསྐྱེད།
གཉིས་པ་ཐེག་ཆེན་ལམ་གྱི་འཇུག་སྒོ་སེམས་བསྐྱེད་ནི།
ཐེག་ཆེན་སེམས་བསྐྱེད་མཚན་ཉིད་ཀྱང༌། །
གཞན་དག་རྣམ་གཞག་ཅིར་ཡང་སྨྲ། །
རང་བཞེད་ཤིང་རྟ་ཆེན་པོ་ཡི། །
དགོངས་དོན་གཞུང་བཞིན་འཆད་པར་མཛད། །
དེ་ཡི་མཚན་གཞི་ཁ་ཡར་བ། །
ཤིང་རྟའི་དགོངས་པ་འགལ་བར་འཆད། །
རང་བཞེད་ཀུན་མཁྱེན་ཆེན་པོ་ཡིས། །
འགལ་མེད་གནད་དོན་གཅིག་ཏུ་བཞེད། །
ལ་ལ་དབང་པོ་རྣོ་འབྲིང་གི །
སེམས་བསྐྱེད་ལྟར་སྣང་ཚིག་ཙམ་ལོ། །
རང་བཞེད་དེ་གསུམ་ཐེག་ཆེན་གྱི། །
སེམས་བསྐྱེད་མཚན་ཉིད་པ་རུ་བཞེད། །
དེ་ལྟར་སེམས་བསྐྱེད་རབ་དབྱེ་སོགས། །
སྔ་འགྱུར་མཁས་པའི་རང་བཞེད་རྣམས། །
ཇི་བཞིན་གསལ་བ་ཤེར་ཕྱིན་གྱི། །
དོན་འགྲེལ་མ་ཕམ་དགོངས་རྒྱན་གཟིགས། །
ཞེས་སོགས་ཏེ། ཐེག་ཆེན་ལམ་གྱི་འཇུག་སྒོ་སེམས་བསྐྱེད་ཀྱི་མཚན་ཉིད་འཇོག་ཚུལ་ལ་ཡང༌། གཞན་དག་གིས་ནི་གཞན་དོན་ཕུན་ཚོགས་དང་རྫོགས་པའི་བྱང་ཆུབ་ཀྱི་ངོ་བོར་སྣང་ཞིང་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་གྱུར་པའི་གཙོ་བོ་རྣམ་རིག་ཅེས་དང༌། ཁ་ཅིག་གཞན་དོན་དུ་རྫོགས་བྱང་ལ་མྱོང་བ་ཐོན་པའི་ཚུལ་གྱིས་དམིགས་པའི་འདོད་པ་དང་མཚུངས་ལྡན་གྱི་གཙོ་བོ་རྣམ་རིག་ཅེས་ཟེར་བ་དང༌། ཡང་ཁ་ཅིག་གཙོ་བོ་རྣམ་རིག་གང་ཞིག་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་བྱུང་བ་ཞེས་དང༌། ཁ་ཅིག་གཞན་དོན་དུ་རང་གཞན་གང་རུང་རྫོགས་པའི་བྱང་ཆུབ་ཐོབ་པར་འདོད་པའི་འདུན་པ་དང་མཚུངས་ལྡན་དུ་བྱུང་བའི་གཙོ་བོ་རྣམ་རིག་ཅེས་སོགས་གཞུང་འགྲེལ་རྣམས་སུ་རྣམ་གཞག་སྣ་ཚོགས་ཅིར་ཡང་སྨྲ་བར་སྣང་ངོ༌། །
རང་ལུགས་ཀྱི་བཞེད་པ་ནི། ཤིང་རྟ་ཆེན་པོ་བྱམས་མགོན་གྱི་དགོངས་དོན་མངོན་རྟོགས་རྒྱན་སོགས་ཀྱི་གཞུང་ཇི་ལྟ་བ་བཞིན་དུ་ཀུན་མཁྱེན་ཆེན་པོའི་ཡིད་བཞིན་རིན་པོ་ཆེའི་མཛོད་དང༌། སྨིན་གླིང་ཆོས་རྗེས་སྡོམ་གསུམ་དཔག་སྙེ་སོགས་ཀྱིས་བསྟན་པ་ལྟར། གནད་དོན་བསྡུ་ན་དོན་གཉིས་ལྡན་པའི་ཐབས་ཤེས་ཁྱད་པར་ཅན་སེམས་བསྐྱེད་ཀྱི་མཚན་ཉིད་དུ་འཆད་པར་མཛད་དོ། །དེ་བཞིན་དུ་སེམས་བསྐྱེད་དེ་ཡི་མཚན་གཞིའི་ངོ་བོ་ཡང༌། གཞན་དག་རྣམས་ནི་གཙོ་སེམས་དང་སེམས་བྱུང་ཁ་ཡར་བའི་སྒོ་ནས་ཐོགས་མེད་སྐུ་མཆེད་སེམས་བྱུང་དུ་བཞེད་པ་དང༌། འཕགས་སེང་གཉིས་ཀྱིས་གཙོ་སེམས་བཞེད་པ་གཉིས་ནང་འགལ་བ་ཡིན་ནོ་ཞེས་ཤིང་རྟ་ཡབ་སྲས་དགོངས་པའི་འགལ་བར་འཆད་ཀྱང༌། རང་བཞེད་ཀུན་མཁྱེན་ཆེན་པོས།
ཤིང་རྟ་ཡབ་སྲས་ཀྱི་གཞུང་དེ་དག་ནི་དངོས་ཤུགས་ཀྱི་བཤད་པ་ཙམ་ལས་དོན་ལ་འགལ་མེད་གནད་གཅིག་ཏུ་གཙོ་སེམས་དང་སེམས་བྱུང་གཉིས་ཀའང་སེམས་བསྐྱེད་ཀྱི་མཚན་གཞིར་བཞེད་པ་ཡིན་ནོ། །མཚན་བཏགས་ཀྱི་རབ་དབྱེའི་ཁྱད་པར། མཁས་དབང་ལ་ལ་དག་ནི། སྤྱིར་མདོ་ལས། དབང་རྣོན་རྫི་བོ་ལྟ་བུའི་སེམས་བསྐྱེད་དང༌། དབང་འབྲིང་མཉན་པ་ལྟ་བུའི་སེམས་བསྐྱེད། དབང་རྟུལ་རྒྱལ་པོ་ལྟ་བུའི་སེམས་བསྐྱེད་དང་གསུམ་དུ་གསུངས་ཀྱང༌། དབང་པོ་རྣོན་འབྲིང་གཉིས་ཀྱི་སེམས་བསྐྱེད་ནི་མིང་རྐྱང་བཏགས་ཡོད་ཙམ་ལས་སེམས་བསྐྱེད་མཚན་ཉིད་པ་མིན་ཏེ། རིམ་བཞིན་སྔོན་དུ་སེམས་ཅན་ཐམས་ཅད་སངས་རྒྱས་ཀྱི་སར་བཀོད་ཟིན་པའི་རྗེས་སུ་རང་ཉིད་འཚང་རྒྱ་བའི་དུས་མི་སྲིད་པའི་ཕྱིར་ཏེ། སེམས་ཅན་ཐམས་ཅད་སངས་རྒྱས་ཟིན་པའི་དུས་མི་སྲིད་པའི་ཕྱིར་དང༌། དེ་བཞིན་དུ་རང་གཞན་སེམས་ཅན་གཉིས་ཀ་མཉམ་དུ་འཚང་རྒྱ་བའི་དམ་བཅའ་དེ་ཡང་མི་འགྲུབ་སྟེ། དེ་འདྲའི་དུས་མི་སྲིད་པའི་ཕྱིར་ཏེ། འཁོར་བ་སྟོང་པའི་དུས་མི་སྲིད་པའི་ཕྱིར་ན་དེ་གཉིས་སེམས་བསྐྱེད་ལྟར་སྣང་ཡང་དོན་ལ་ཚིག་ཙམ་ལས་དེ་འདྲའི་དམ་བཅའ་མི་འགྲུབ་བོ། །ཅེས་སྨྲ་བར་སྣང་ངོ༌། །
འོ་ན་དབང་རྟུལ་རྒྱལ་པོ་ལྟ་བུའི་འདོད་ཆེན་དམ་པའི་སེམས་བསྐྱེད་དེ་ཡང་ཆོས་ཅན། དམ་བཅའ་དེར་ཐལ། རྒྱུ་མཚན་དེའི་ཕྱིར། རང་ཉིད་སངས་རྒྱས་ཟིན་པའི་རྗེས་སུ་སེམས་ཅན་ཐམས་ཅད་སངས་རྒྱས་ཀྱི་སར་བཀོད་པའི་དུས་མི་སྲིད་པའི་ཕྱིར་ཏེ། འཁོར་བ་སྟོང་པའི་དུས་མི་སྲིད་པའི་ཕྱིར། ཁྱབ་པ་ཁས། གཞན་ཡང་སྙིང་རྗེ་ཚད་མེད་དེ་ཆོས་ཅན། བཏགས་ཙམ་ཡིན་པར་ཐལ། དེ་འདྲ་མི་སྲིད་པའི་ཕྱིར་ཏེ། སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པ་གང་ཞིག་དེ་འདྲ་མི་སྲིད་པའི་ཕྱིར་སོགས་འགྲེའོ། །
རང་བཞེད་ནི། མདོ་ལས་བྱུང་བའི་སེམས་བསྐྱེད་དེ་གསུམ་ག་སེམས་བསྐྱེད་མཚན་ཉིད་པར་བཞེད་པ་ལ་ཁྱད་པར་མེད་དོ། །དེ་ལྟར་སེམས་བསྐྱེད་ཀྱི་རབ་དབྱེ་སོགས་སྔ་འགྱུར་མཁས་པའི་རང་བཞེད་རྣམས་ཇི་བཞིན་གསལ་བར་ཤེར་ཕྱིན་མངོན་རྟོགས་རྒྱན་གྱི་དོན་འགྲེལ་མ་ཕམ་དགོངས་རྒྱན་དུ་གཟིགས་པར་འཚལ་ལོ། །