འཇལ་བྱེད་ཚད་མའི་རབ་དབྱེ།

གཉིས་པ་བརྗོད་བྱའི་རང་བཞིན་གཞུང་དོན་དངོས་ལ་འཇལ་བྱེད་ཚད་མའི་རབ་དབྱེ་དང༌། །གཞལ་བྱ་གཞི་ལམ་འབྲས་བུའི་ཤན་འབྱེད་གཉིས། །དང་པོ་ནི།

འཇལ་བྱེད་ཚད་མ་རྣམ་གཉིས་ཀྱིས། །

གཞལ་བྱ་བདེན་གཉིས་གཏན་ལ་འབེབས། །

དེ་ཡི་དབང་གིས་གྲུབ་མཐའ་དང༌། །

ལྟ་སྒོམ་སྤྱོད་འབྲས་རྣམ་པར་དབྱེ། །

འཇལ་བྱེད་ཚད་མའི་རྣམ་གཞག་ལ། །

སྔ་ཕྱིའི་བཞེད་སྲོལ་ཐ་དད་ཡོད། །

དེ་ཡི་དབང་གིས་ལྟ་གྲུབ་ཀྱི། །

ཞལ་བཞེས་མི་མཐུན་སོ་སོར་གྱུར། །

ཕྱི་རབས་མཁས་རྣམས་མགྲིན་གཅིག་ཏུ། །

བདེན་གཉིས་དཔྱོད་བྱེད་ཚད་མ་ལ། །

དོན་དམ་དང་ནི་ཐ་སྙད་ཀྱི། །

ཚད་མ་གཉིས་ཞེས་ཆེས་ཆེར་སྨྲ། །

འོན་ཀྱང་དོན་དམ་རྣམ་གྲངས་དང༌། །

ཐ་སྙད་ཚུར་མཐོང་ཁོ་ན་ལས། །

རྣམ་གྲངས་མིན་དཔྱོད་ཚད་མ་དང༌། །

དག་པའི་གཟིགས་པ་འཆད་དུ་མེད། །

དོན་དཔྱོད་ཚད་མའི་རིགས་པའི་འགྲོས། །

ཚུར་མཐོང་ཚད་མར་བསྟུན་ཏེ་སྨྲ། །

དེ་ཡི་དོན་དམ་དངོས་མེད་ལས། །

ཟབ་ཞི་སྤྲོས་བྲལ་འགྲུབ་ནུས་མིན། །

ཐ་སྙད་དཔྱོད་བྱེད་ཚད་མ་ཡང༌། །

ཚུར་མཐོང་ཙམ་ལས་མེད་དེའི་ཕྱིར། །

མ་དག་ཀུན་རྫོབ་ཙམ་ཞིག་ལས། །

དག་པའི་ཀུན་རྫོབ་འགྲུབ་ནུས་མིན། །

སྔ་རབས་མཁས་པའི་དབང་པོ་རྣམས། །

བདེན་གཉིས་རྣམ་པར་དཔྱོད་བྱེད་ཀྱི། །

རིགས་པ་དོན་དམ་ཚད་མ་དང༌། །

ཐ་སྙད་ཚད་མ་གཉིས་སུ་བཞེད། །

དོན་དམ་རྣམ་གྲངས་དཔྱོད་བྱེད་དང༌། །

རྣམ་གྲངས་མ་ཡིན་ཚད་མ་གཉིས། །

ཐ་སྙད་ཚུར་མཐོང་ཚད་མ་དང༌། །

རྣམ་དག་ཐ་སྙད་ཚད་མ་གཉིས། །

དེ་ཡི་རབ་དབྱེ་མདོ་རྒྱུད་དང༌། །

བསྟན་བཅོས་དགོངས་དོན་སྔ་འགྱུར་བའི། །

མན་ངག་ཇི་བཞིན་མི་ཕམ་རྗེའི། །

ལེགས་བཤད་ཤེས་རབ་རལ་གྲིར་གསལ། །

དོན་དཔྱོད་རྣམ་གྲངས་ཚད་མ་ཡིས། །

གནས་སྐབས་རྣམ་གྲངས་དོན་དམ་དང༌། །

རྣམ་གྲངས་མིན་དཔྱོད་ཚད་མ་ཡིས། །

མཐར་ཐུག་རྣམ་གྲངས་མིན་པ་སྒྲུབ། །

ཐ་སྙད་ཚུར་མཐོང་ཚད་མ་ཡིས། །

སྣང་ཚུལ་མ་དག་ཀུན་རྫོབ་དང༌། །

ཐ་སྙད་རྣམ་དག་ཚད་མ་ཡིས། །

གནས་ཚུལ་དག་པའི་ཀུན་རྫོབ་སྒྲུབ། །

དོན་དཔྱོད་ཚད་མས་ཆོས་རྣམས་ཀུན། །

བདེན་མེད་སྟོང་པ་ཆེན་པོར་སྒྲུབ། །

ཐ་སྙད་ཚད་མས་མ་དག་དང༌། །

དག་པའི་སྣང་བ་སོ་སོར་འབྱེད། །

དེ་ལྟར་མདོ་རྒྱུད་བསྟན་བཅོས་ཀྱི། །

དགོངས་དོན་ཟབ་རྒྱས་ཅིག་ཆར་དུ། །

འཇལ་བྱེད་ཚད་མ་ཡོངས་རྫོགས་འདི། །

སྔ་རབས་མཁས་པའི་ཁྱད་ཆོས་ལགས། །

བར་སྐབས་ཀྱི་ཚིགས་སུ་བཅད་པའོ། །ཞེས་སོགས་ཏེ།

དེ་ལ་བསྟན་བཤད་བསྡུ་གསུམ་ལས། དང་པོ་ནི། སྤྱིར་གྲུབ་མཐའ་སྨྲ་བའི་གང་ཟག་ཆོས་སྤྱན་ལྡན་པ་སུ་ཡང་རུང་སྟེ། རང་རང་གི་འཇལ་བྱེད་ཚད་མ་གཉིས་ཀྱི་སྒོ་ནས་གཞལ་བྱ་བདེན་གཉིས་གཏན་ལ་འབེབས་པར་བྱེད་ཅིང༌། ཚུལ་དེའི་དབང་གིས་ཉན་ཐོས་ནས་རྡོ་རྗེ་ཐེག་པའི་བར་གྱི་གྲུབ་མཐའ་དང་ལྟ་སྒོམ་སྤྱོད་འབྲས་ཀྱི་ཁྱད་པར་སོ་སོར་རྣམ་པར་དབྱེ་བར་མཛད་དོ། །དེ་བས་ན། བདེན་པ་གཉིས་ཀྱི་རང་བཞིན་ལ། །མ་ནོར་ངེས་པའི་བློས་འཇུག་ན། །དྲི་མེད་ཚད་མ་རྣམ་གཉིས་ཀྱི། །མིག་བཟང་མཆོག་ཏུ་བསྒྲུབ་པར་བྱ། །ཞེས་གསུངས་པ་ལྟར། གཞལ་བྱ་བདེན་པ་གཉིས་ཀྱི་རང་བཞིན་ངེས་པར་འབྱེད་པ་ལ། དེའི་མེད་ན་མི་འབྱུང་བའི་རྒྱུ་འཇལ་བྱེད་ཚད་མའི་རབ་དབྱེ་ལ་མཁས་པར་བྱ་དགོས་པ་ནི་གནད་ཀྱི་དོན་ཏོ། །

དེ་ལ་སྤྱིར་འཇལ་བྱེད་ཚད་མའི་རྣམ་གཞག་ལ་ཡང༌། སྔ་ཕྱིའི་མཁས་དབང་སོ་སོའི་བཞེད་སྲོལ་ཐ་དད་པ་ཡོད་ཅིང༌། ཚུལ་དེའི་དབང་གིས་ལྟ་གྲུབ་ཀྱི་ཞལ་བཞེས་ཀྱང་མི་མཐུན་པ་སོ་སོར་གྱུར་པ་ཡིན་ནོ། །དེ་ལ་ཕྱི་རབས་ཀྱི་མཁས་དབང་རྣམས་ནི་མགྲིན་གཅིག་ལྟ་བུར་བདེན་གཉིས་རྣམ་པར་དཔྱོད་བྱེད་ཀྱི་ཚད་མ་ལ། དོན་དམ་དཔྱོད་བྱེད་ཀྱི་ཚད་མ་དང་ཐ་སྙད་དཔྱོད་བྱེད་ཀྱི་ཚད་མ་རྣམ་པ་གཉིས་ཞེས་ཆེས་ཆེར་སྨྲ་བར་མཛད་མོད་ཀྱི།

འོན་ཀྱང་བཞེད་པ་འགའ་ཞིག་གི་ལུགས་ལ། རང་རྒྱུད་པ་དང་ཚུལ་མཐུན་པའི་དོན་དམ་རྣམ་གྲངས་དཔྱོད་བྱེད་ཀྱི་ཚད་མ་དང༌། རྟོག་གེའི་གཞུང་ནས་བསྟན་པའི་ཐ་སྙད་ཚུར་མཐོང་ཚད་མ་ཁོ་ན་ཙམ་ལས། ཐལ་འགྱུར་པའི་ལུགས་ཐུན་མིན་གྱི་གཏན་ཚིགས་རྣམ་གྲངས་མ་ཡིན་པར་དཔྱོད་པའི་ཚད་མ་སྒྲ་ཇི་བཞིན་དུ་འཆད་དུ་མེད་པ་དང༌། ཁྱད་པར་དག་པའི་གཟིགས་པ་ལ་བརྟེན་པའི་ཀུན་ཏུ་ཐ་སྙད་པའི་ཚད་མ་ནི་སུ་ལ་ཡང་འཆད་དུ་མེད་དོ། །ཚུལ་དེའི་དབང་གིས་དོན་དཔྱོད་ཚད་མའི་རིགས་པའི་འགྲོས་ཀྱང་ཚུར་མཐོང་ཚད་མས་སྒྲ་ཆོས་ཅན་རྟག་པ་མིན་པར་ཐལ། དོན་བྱེད་ནུས་པའི་དངོས་པོ་ཡིན་པའི་ཕྱིར་ཞེས་འགོད་པའི་སྐབས་ཆོས་ཅན་སྒྲ་མི་འགོག་པར་དེའི་སྟེང་གི་རྟག་པ་འགོག་དགོས་པ་དང་ཚུལ་བསྟུན་ཏེ། དོན་དམ་དཔྱོད་པའི་སྐབས་སུ་ཡང་བུམ་པ་བུམ་པས་མི་སྟོང་བུམ་པ་བདེན་པས་སྟོང་ཞེས། ཆོས་ཅན་བུམ་པ་མི་འགོག་པར་དེའི་སྟེང་གི་བདེན་གྲུབ་འགོག་དགོས་ཞེས་སྨྲ་བར་མཛད་ཀྱང༌། ཚུལ་དེ་ཡིས་གཞལ་བྱ་དོན་དམ་ཀྱང་རང་རྒྱུད་པའི་སྐབས་ནས་བཤད་པ་ལྟར་གྱི་དོན་དམ་དངོས་མེད་རྣམ་གྲངས་པ་ཙམ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས་ཞེས་གསུངས་པ་ལྟར་གྱི་སྣང་སྟོང་མཉམ་ཉིད་ཆེན་པོ་རྣམ་གྲངས་མིན་པའི་དོན་དམ་ཇི་བཞིན་འགྲུབ་ནུས་པ་མིན་ནོ། །དེ་དག་གི་ཚུལ་རྒྱས་པར་གཞུང་སྤྱིའི་དཀའ་འགྲེལ་སོགས་ལས་ཤེས་པར་བྱའོ། །

དེ་བཞིན་དུ་ཐ་སྙད་དཔྱོད་བྱེད་ཀྱི་ཚད་མ་ལ་ཡང་ཐེག་དམན་གྱི་གཞུང་སྤྱི་དང་ཚད་མ་རྣམ་འགྲེལ་སོགས་ལས་བསྟན་པའི་ཚུར་མཐོང་ཚད་མ་ཙམ་ལས། དག་གཟིགས་ཐ་སྙད་པའི་ཚད་མ་འཆད་དུ་མེད་པ་དེའི་ཕྱིར། གཞལ་བྱ་ཀུན་རྫོབ་ཀྱང་མངོན་པའི་སྡེ་སྣོད་ལས་གསུངས་པ་ལྟར་གྱི་གཞི་ཕུང་ཁམས་སྐྱེ་མཆེད་མ་དག་པའི་ཀུན་རྫོབ་འདི་ཙམ་ལས། རིག་པ་འཛིན་པ་སྔགས་ཀྱི་སྡེ་སྣོད་ལས་གསུངས་པའི་གཞི་དག་པའི་ཀུན་རྫོབ་གདན་གསུམ་ལྷ་ཡི་དཀྱིལ་འཁོར་ལ་སོགས་པ་འགྲུབ་ནུས་པ་མིན་ནོ། །ཚུལ་དེས་མདོ་སྔགས་གཉིས་ཀའི་སྐབས་སུ་ཡང༌། དོན་དམ་མེད་དགག་ཙམ་དང༌། གཞིའི་ཀུན་རྫོབ་མ་དག་པའི་སྣང་བ་ཙམ་ལས་ལྷག་པའི་ལྟ་བ་མེད་པ་དང༌། གཉུག་སེམས་འདུས་བྱས་སུ་སྨྲ་བ་སོགས་བྱུང་བ་ཡིན་ནོ། །

སྔ་རབས་མཁས་པའི་དབང་པོ་རྣམས་ཀྱིས་ནི། སྤྱིར་བདེན་གཉིས་རྣམ་པར་དཔྱོད་བྱེད་ཀྱི་རིགས་པ་ལ། རྩ་བའི་དབྱེ་གཞི་སྟོང་ཉིད་དོན་དམ་དཔྱོད་པའི་ཚད་མ་དང༌། སྣང་བ་ཐ་སྙད་དཔྱོད་པའི་ཚད་མ་སྟེ་གཉིས་སུ་གྲངས་ངེས་པར་བཞེད་ཅིང༌། དབྱེ་ན་དོན་དམ་དཔྱོད་བྱེད་ཀྱི་ཚད་མ་ལ་རྣམ་གྲངས་དཔྱོད་བྱེད་དང༌། རྣམ་གྲངས་མ་ཡིན་པ་དཔྱོད་བྱེད་ཀྱི་ཚད་མ་གཉིས་དང༌། ཐ་སྙད་དཔྱོད་བྱེད་ཀྱི་ཚད་མ་ལ་ཚུར་མཐོང་ཐ་སྙད་པའི་ཚད་མ་དང༌། རྣམ་དག་ཐ་སྙད་པའི་ཚད་མ་གཉིས་སུ་དབྱེ་བར་མཛད་དོ། །དེས་ན་འཇལ་བྱེད་ཚད་མའི་ཁྱད་པར་དེ་དང་དེ་ཡི་ངོ་བོ་དང་དབྱེ་བའི་ཁྱད་པར་དེ་ལ་རྩོད་པ་སྤོང་བའི་རབ་དབྱེ་སོགས་ནི། བཀའ་མདོ་རྒྱུད་གཉིས་དང་བསྟན་བཅོས་ཆེན་པོའི་དགོངས་དོན་སྔ་འགྱུར་པའི་མན་ངག་ཇི་བཞིན། མི་ཕམ་ཆོས་རྗེས་ལེགས་བཤད་ཆེན་པོ་དོན་རྣམ་ངེས་ཤེས་རབ་རལ་གྲི་སོགས་སུ་གསལ་བར་གསུངས་པ་དེ་དག་ལས་མཁྱེན་པར་འཚལ་ལོ། །

དེས་ན་དོན་དཔྱོད་ཚད་མ་ལ་གཉིས་སུ་ཕྱེ་བའི་སྟོབས་ཀྱིས། རེ་ཞིག་དོན་དཔྱོད་རྣམ་གྲངས་དཔྱོད་པའི་ཚད་མ་ཞལ་གྱིས་བཞེས་པའི་སྒོ་ནས་ཐེག་པ་འོག་མའི་ལྟ་བ་དང་གྲུབ་པའི་མཐའ་ཐམས་ཅད་ཁྱད་དུ་མི་གསོད་པར་གནས་སྐབས་བྱེ་སྨྲའི་ལུགས་ཀྱི་གང་ཟག་གི་བདག་མེད་སོགས་ནས་རང་རྒྱུད་པའི་ལུགས་ཀྱི་མཐུན་པའི་དོན་དམ་གྱི་བར་དུ་རྣམ་གྲངས་པའི་དོན་དམ་གྱི་ཁྱད་པར་དུ་བྱས་པའི་སྟོང་པ་དང༌། བདག་མེད་ཇི་བཞིན་གཏན་ལ་ཕབ་སྟེ་ཐེག་པ་འོག་མ་རྣམས་ཀྱང་དངོས་དང་བརྒྱུད་པའི་སྒོ་ནས་ཐར་པ་དང་ཐམས་ཅད་མཁྱེན་པའི་ལམ་རྣམ་དག་ཡིན་པར་འཆད་ཅིང༌། རྣམ་གྲངས་མ་ཡིན་པར་དཔྱོད་པའི་ཚད་མ་ཞལ་གྱིས་བཞེས་པའི་སྒོ་ནས་ཐལ་འགྱུར་པའི་ལུགས་ཀྱི་དོན་དམ་སྟོང་པ་ཆེན་པོ་དང༌། དཔལ་མ་ཧཱ་ཡོ་གའི་ལུགས་ཀྱི་དོན་དམ་མཉམ་པ་ཆེན་པོ་ནས་ཨ་ཏི་རྫོགས་པ་ཆེན་པོའི་གཞི་དབྱིངས་ཀ་ནས་དག་པའི་བར་གྱི་དོན་དམ་ངོ་བོ་སྟོང་པ་ཆེན་པོ་རྣམ་གྲངས་མ་ཡིན་པའི་ཁྱད་པར་དུ་བྱས་པ་ཀུན་ཀྱང་སྒྲོ་སྐུར་དང་བྲལ་བར་གཏན་ལ་ཕབ་སྟེ་ཐར་པ་དང་ཐམས་ཅད་མཁྱེན་པའི་ལམ་གྱི་ཁྱད་པར་བླ་ན་མེད་པ་སྒྲུབ་པར་བྱེད་དོ། །

དེ་བཞིན་དུ་ཐ་སྙད་ཚད་མ་ལ་གཉིས་སུ་ཕྱེ་བའི་སྟོབས་ཀྱིས་ཐ་སྙད་ཚུར་མཐོང་ཚད་མ་ཞལ་གྱིས་བཞེས་པའི་སྒོ་ནས་རྒྱུ་མཚན་ཉིད་ཐེག་པའི་ལུགས་ཀྱི་སྡུག་ཀུན་རྒྱུ་འབྲས་ཀྱིས་བསྡུས་པའི་ཕུང་ཁམས་སྐྱེ་མཆེད་སོགས་སྣང་ཚུལ་མ་དག་པའི་ཀུན་རྫོབ་རྣམས་ཀྱང་སྒྲོ་སྐུར་དང་བྲལ་བར་གཏན་ལ་འབེབས་ཤིང༌། ཐ་སྙད་དག་པའི་ཚད་མ་ཞལ་གྱིས་བཞེས་པའི་སྒོ་ནས་རྒྱུ་མཚན་ཉིད་ཐེག་པའི་ལུགས་ཀྱི་ངེས་དོན་བདེ་གཤེགས་སྙིང་པོའི་སྣང་ཆ་འོད་གསལ་བའི་ཀུན་རྫོབ་སོགས་དང༌། དཔལ་མ་ཧཱ་ཡོ་གའི་ལུགས་ཀྱི་ཀུན་རྫོབ་དག་པ་ཆེན་པོ་ནས་ཨ་ཏི་རྫོགས་པ་ཆེན་པོའི་གཞི་སྣང་ལྷུན་གྱིས་གྲུབ་པའི་བར་གྱི་ཀུན་རྫོབ་དག་པ་ཆེན་པོ་རང་བཞིན་འོད་གསལ་བའི་ཁྱད་པར་དུ་བྱས་པ་མཐའ་དག་སྒྲོ་སྐུར་དང་བྲལ་བ་སྒྲུབ་པར་བྱེད་དོ། །

གཞན་དུ་དཔེར་ན་ཐ་སྙད་དག་པའི་ཚད་མ་མེད་དུ་ཟིན་ན། སྒྱུ་འཕྲུལ་གསང་བ་སྙིང་པོ་སོགས་ཀྱི་སྐབས་ནས་བསྟན་པའི་ཀུན་རྫོབ་དག་པ་ཆེན་པོ་ཡོད་པར་དམ་བཅའ་བ་ཙམ་ལས་སྒྲུབ་བྱེད་ཀྱི་ཚད་མ་མི་རྙེད་དེ། དོན་དཔྱོད་ཚད་མས་ནི་དེ་སྒྲུབ་པར་མི་ནུས་པ་ཙམ་དུ་མ་ཟད། དེའི་ངོར་མི་སྟོང་པར་ཡོད་པ་ཙམ་དུ་སྨྲས་ཀྱང་བདེན་གྲུབ་ཏུ་འགྱུར་ཞིང༌། ཚུར་མཐོང་ཚད་མས་ནི་ཕུང་ལྔ་མ་དག་པ་དང༌། ས་སྲ་ཞིང་འཐས་པ། མེ་ཚ་ཞིང་བསྲེག་པ་ཙམ་དུ་འགྲུབ་ཀྱི་ཕུང་ལྔ་རིགས་ལྔ་འབྱུང་ལྔ་ཡུམ་ལྔའི་དཀྱིལ་འཁོར་དུ་བསྒྲུབ་ག་ལ་ནུས། དེ་བས་ན་རྒྱུ་གཅིག་པ་དང་ཡིག་འབྲུའི་ཚུལ་སོགས་ཀྱིས་བསྟན་པ་ལྟར། སྔོན་བྱུང་དངོས་ལྔའི་གཏན་ཚིགས་དང་རྗེས་འཇུག་ཚུལ་ལྔའི་གཏན་ཚིགས་སོགས་མངོན་སུམ་དང་རྗེས་སུ་དཔག་པའི་ཚུལ་གྱིས་སྟོང་ཆ་ནས་ངོ་བོ་སྟོང་པ་དོན་དམ་མཉམ་པ་ཆེན་པོའི་ཁྱད་པར། དོན་དམ་རྣམ་གྲངས་མ་ཡིན་པའི་ཚད་མས་བསྒྲུབས་པར་མཛད་ཀྱང༌། སྣང་ཆ་ནས་རང་བཞིན་འོད་གསལ་བའི་ཆ་ཀུན་རྫོབ་དག་པ་ཆེན་པོའི་ཁྱད་པར་ནི། ཐ་སྙད་དག་གཟིགས་ཚད་མས་བསྒྲུབ་པར་མཛད་པ་ཁོ་ན་ལས་གཞན་དུ་མ་དམིགས་པའི་ཕྱིར་རོ། །དེ་ལྟར་མདོར་བསྡུ་ན་དོན་དམ་དཔྱོད་བྱེད་ཀྱི་ཚད་མས་གཟུགས་ནས་རྣམ་མཁྱེན་གྱི་བར་དུ་གཞི་ལམ་འབྲས་གསུམ་གྱིས་བསྡུས་པའི་ཆོས་ཐམས་ཅད་གནས་སྐབས་དང་མཐར་ཐུག་གི་ཚུལ་དུ་བདེན་མེད་སྟོང་པ་ཆེན་པོར་སྒྲུབ་པར་བྱེད་ཅིང༌། ཀུན་ཏུ་ཐ་སྙད་པའི་ཚད་མས་སྣང་ཚུལ་དང་གནས་ཚུལ་གྱི་སྒོ་ནས་མ་དག་པ་དང་དག་པའི་སྣང་བ་སོ་སོར་དབྱེ་བར་མཛད་དོ། །དེ་ལ་དོན་དམ་དང་ཐ་སྙད་དཔྱོད་པའི་ཚད་མའི་ཐ་སྙད་ནི་རང་རྒྱུད་པ་སོགས་གྲུབ་མཐའ་འོག་མའི་ལུགས་ཡིན་གྱི། ཐལ་འགྱུར་པའི་ལུགས་ལ་ཚད་མའི་ཐ་སྙད་སྦྱར་བ་མི་འཐད་དོ་སྙམ་ན། ཐལ་འགྱུར་བའི་ལུགས་ལ་ཚད་མའི་ཐ་སྙད་མེད་པར་མི་འགྲུབ་སྟེ། ཟླ་བས་ཚིག་གསལ་དུ་ཚད་མ་ནི་བཞི་སྟེ། མངོན་སུམ་པའི་ཚད་མ་དང༌། རྗེས་སུ་དཔག་པ་དང༌། ལུང་དང་དཔེ་ཉེར་འཇལ་གྱི་ཚད་མ་བཞིའོ། །ཞེས་རང་ལུགས་ཀྱི་ཚད་མ་ལ་གྲངས་བཞིར་བཞེད་པས་སྤྱིར་ཚད་མའི་རྣམ་གཞག་ཀྱང་ཡོད་ཅིང༌། བྱེ་བྲག་ཚུར་མཐོང་ཚད་མ་དང་དག་གཟིགས་ཚད་མའི་ཁྱད་པར་ཡང་ཡོད་པར་བཞེད་དེ།

མིག་ནི་རབ་རིབ་ཅན་གྱིས་དམིགས་པ་ཡིས། །

རབ་རིབ་མེད་ཤེས་ལ་གནོད་མིན་ཇི་ལྟར། །

དེ་བཞིན་དྲི་མེད་ཡེ་ཤེས་སྤངས་པའི་བློས། །

དྲི་མེད་བློ་ལ་གནོད་པར་ནུས་མ་ཡིན། །ཞེས་དང་དེའི་ཐད་ཀྱི་རང་འགྲེལ་དུ་ཟག་པ་མེད་པའི་ཡེ་ཤེས་དང་བྲལ་བ་སོ་སོའི་སྐྱེ་བོ་རྣམས་ཀྱི་ཤེས་པས་ཀྱང་གཟིགས་པ་ཟག་པ་མེད་པ་ལ་གནོད་པ་མིན་ཞེས་སོགས་གསུངས་པའི་ཕྱིར། དེ་བཞིན་དུ་དག་པའི་གཟིགས་པ་ཚད་མ་ལ་ལྟོས་ན་ཚུར་མཐོང་གི་བློ་ཚད་མ་མིན་པར་ཡང་བཞེད་དེ། མིག་དང་རྣ་བ་སྣ་ཡང་ཚད་མ་མིན་སོགས་གསུངས་པར་མཛད་པ་དང༌། འཇིག་རྟེན་དེ་ཉིད་མཐོང་བས་འཕགས་གཞན་གྱིས། །ཅི་དགོས་འཕགས་པའི་ལམ་གྱིས་ཅི་ཞིག་བྱ་ཞེས་དང༌། རང་འགྲེལ་ལས་དེ་ཁོ་ན་ཉིད་དཔྱོད་པས་ནི་འཕགས་པ་རྣམས་ཁོ་ན་ཚད་མ་ཡིན་གྱི་ཞེས་སོགས་ཀྱིས་ཐ་སྙད་དུ་ཚད་མ་དང་ཚད་མིན་གྱི་རྣམ་གཞག་གསལ་བར་བསྟན་ཅིང་དོན་དམ་པར་ཚད་མ་དང་ཚད་མིན་གྱི་རབ་དབྱེའི་སྤྲོས་པ་མཐའ་དག་དམིགས་སུ་མེད་པར་གཏན་ལ་ཕབ་པར་མཛད་པའོ། །

སྐབས་དོན་བསྡུ་བ་ནི། དེ་ལྟར་བཀའ་འཁོར་ལོ་གསུམ་གྱིས་བསྡུས་པའི་མདོ་དང་རྒྱུད་སྡེ་རིན་པོ་ཆེའི་དགོངས་འགྲེལ་གྱི་བསྟན་བཅོས་དང་བཅས་པའི་དགོངས་དོན་གང་ཟག་དང་ཆོས་ཀྱི་བདག་མེད་གཉིས་ཀྱི་ཚུལ་དུ་བསྟན་པས་རྣམ་གྲངས་དང་རྣམ་གྲངས་མ་ཡིན་པའི་དོན་དམ་ཟབ་པའི་ཆ་དང་སྣང་ཚུལ་དང་གནས་ཚུལ་གཉིས་ཀྱི་སྒོ་ནས་བསྟན་པའི་མ་དག་པ་དང་དག་པའི་ཀུན་རྫོབ་རྒྱ་ཆེ་བའི་ཆ་ཐམས་ཅད་གང་རུང་ལ་སྐུར་པ་བཏབ་པའི་སྒོ་ནས་སྤོང་མི་དགོས་པར་ཅིག་ཅར་དུ་འཇལ་བར་བྱེད་པ་ལ་དོན་དམ་པའི་ཚད་མ་རང་རྒྱུད་པ་མན་ཆད་ཀྱི་གཞུང་ནས་བསྟན་པའི་རྣམ་གྲངས་དཔྱོད་བྱེད་ཀྱི་ཚད་མ་དང་ཐལ་འགྱུར་པའི་སྐབས་སོགས་མདོ་སྔགས་ཀྱི་གཞུང་ནས་བསྟན་པའི་རྣམ་གྲངས་མིན་པའི་ཚད་མ་མཐའ་དག་དང༌། ཚད་མ་སྡེ་བདུན་སོགས་ཀྱི་གཞུང་ནས་བསྟན་པའི་མ་དག་ཚུར་རོལ་མཐོང་བའི་ཚད་མ་དང༌། རྒྱུད་བླ་མ་དང་གསང་བ་སྙིང་པོ་སོགས་ཀྱི་སྐབས་ནས་བསྟན་པའི་དག་པའི་གཟིགས་པ་ཚད་མ་སྟེ་འཇལ་བྱེད་ཀྱི་ཚད་མ་མཐའ་དག་ཡོངས་སུ་རྫོགས་པ་འདི་ནི་སྔ་རབས་མཁས་པའི་ཁྱད་ཆོས་སུ་གྱུར་པ་ལགས་སོ། །ཞེས་བར་སྐབས་ཀྱི་ཚིགས་སུ་བཅད་པའོ། །