གཞལ་བྱ་གཞི་ལམ་འབྲས་བུའི་ཤན་འབྱེད།
གཉིས་པ་གཞལ་བྱ་གཞི་ལམ་འབྲས་བུའི་ཤན་འབྱེད་ལ་མདོར་བསྟན་དང་ནི་རྒྱས་བཤད་གཉིས། །དང་པོ་ནི།
གཞལ་བྱ་བདེན་གཉིས་རྫོགས་ཚུལ་ལས། །
སངས་རྒྱས་པ་ཡི་ལྟ་གྲུབ་བཞིར། །
གངས་ལྗོངས་མཁས་དབང་སྔ་ཕྱི་ཡི། །
འཆད་སྲོལ་རྣམ་གཞག་རེ་ཞིག་བསྐྱུངས། །
འདིར་ནི་ཐེག་མཆོག་དབུ་མ་ཆེའི། །
གཞི་ལམ་འབྲས་བུའི་ལྟ་གྲུབ་གནད། །
གངས་ལྗོངས་སྔ་ཕྱིའི་མཁས་དབང་གི །
བཞེད་སྲོལ་ཁྱད་པར་མདོ་ཙམ་འཆད། །
ཅེས་སོགས་ཏེ། དེ་ལ་སྤྱིར་མདོ་ལས། འཇིག་རྟེན་མཁྱེན་པས་བདེན་པ་འདི་གཉིས་ཀྱི། །རྣམ་དབྱེ་གཞན་ལས་མ་གསན་རང་གིས་རིག་སོགས་དང༌། དབུ་མའི་བསྟན་བཅོས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བསྟན། །ཞེས་སོགས་གསུངས་པ་ལྟར་བཀའ་འཁོར་ལོ་གསུམ་གྱི་གཞལ་བྱ་བདེན་པ་གཉིས་ཀྱི་རང་བཞིན་ལ། རིམ་དང་ཅིག་ཅར་གྱི་ཚུལ་དུ་རྫོགས་ཚུལ་གྱི་ཁྱད་པར་ལས། ནང་པ་སངས་རྒྱས་པའི་ལྟ་གྲུབ་རྣམ་པ་བཞིར་གངས་ལྗོངས་མཁས་པའི་དབང་པོ་སྔ་ཕྱིར་བྱོན་པ་རྣམས་ཀྱིས་འཆད་སྲོལ་གྱི་ཁྱད་པར་ལ། དཔེར་ན་བྱེ་སྨྲའི་ལུགས་ཀྱི་བདེན་བཞི་མི་རྟག་བཅུ་དྲུག་ཏུ་བསྟན་པ་བདག་མེད་ཕྲ་བ་འདོད་མི་འདོད་ཀྱི་ཁྱད་པར། སྤྱིར་རང་དང་ཡུལ་ཤེས་ཀྱི་རྣམ་གཞག་སོགས་ཀྱི་ཁྱད་པར་དང༌། སེམས་ཙམ་པའི་ལུགས་ཀྱི་མཚན་ཉིད་གསུམ་གྱི་ངོ་བོ་ངོས་འཛིན་ཚུལ་གྱི་ཁྱད་པར་སོགས་ལ་འཆད་སྲོལ་གྱི་ཁྱད་པར་ཤིན་ཏུ་མང་ཡང་དེ་དག་གི་ཤན་འབྱེད་ཀྱི་རྣམ་པར་གཞག་པ་ནི་རེ་ཞིག་བསྐྱུངས་ཏེ་སྤྲོ་བར་མ་བྱས་སོ། །སྐབས་འདིར་ནི་ཐེག་མཆོག་དབུ་མ་ཆེན་པོ་ཐལ་འགྱུར་བའི་ལུགས་ཀྱི་གཞི་ལམ་འབྲས་བུའི་ལྟ་གྲུབ་ཀྱ་ིགནད་རྣམས་གངས་ཅན་ལྗོངས་སུ་སྔ་ཕྱིར་བྱོན་པའི་མཁས་དབང་རྣམས་ཀྱིས་བཞེད་སྲོལ་གྱི་རྣམ་གཞག་མདོ་ཙམ་ཞིག་འཆད་དོ། །ཞེས་པའོ། །