ཐེག་མཆོག་དབུ་མའི་རང་བཞིན།
གཉིས་པ་རྒྱས་བཤད་ལ་ཐེག་མཆོག་དབུ་མའི་རང་བཞིན་དང༌། །དེ་ཡི་གཞི་ལམ་འབྲས་བུའི་ཤན་འབྱེད་གཉིས། །དང་པོ་ནི།
གཞན་དག་མཐའ་གཉིས་བྲལ་བ་ཡི། །
བར་གྱི་ཆོས་དེ་དབུ་མར་འཆད། །
གཞི་ལམ་འབྲས་བུ་རེ་རེ་ནས། །
དབུ་མ་མིན་པའི་དམ་བཅའ་སྨྲ། །
དེ་འདྲའི་དབུ་མ་བདེན་གཉིས་གང༌། །
འཕགས་ལམ་མཉམ་རྗེས་གང་དུ་སྒོམ། །
མཐར་འབྲས་སྐུ་གཉིས་གང་ཡིན་སོགས། །
དྲིས་ཤིང་བརྩད་པས་དམ་བཅའ་འཇིག །
རང་བཞེད་སྤྲོས་མཐའ་ཀུན་བྲལ་གྱི། །
གནས་ལུགས་གཞི་ཡི་དབུ་མར་བཞེད། །
ཚུལ་དེས་ལམ་དང་འབྲས་བུ་ཡང༌། །
དབུ་མ་ཉིད་དུ་བཏགས་པར་མཛད། །
ཅེས་སོགས་ཏེ། དབུས་དང་ཤིན་ཏུ་དབུ་མ་ངོས་འཛིན་ཚུལ་ལ། གཞན་འགའ་ཞིག་ནི་ཀུན་རྫོབ་རྟོག་བཏགས་ཀྱི་སྣང་བ་རྟག་མཐའ་ཤིན་ཏུ་ཕྲ་བ་དང༌། དོན་དམ་མེད་དགག་གི་སྟོང་པ་ཆད་མཐའ་ཤིན་ཏུ་ཕྲ་བར་འཇོག་པའི་ཡ་གྱལ་གཉིས་པོ་རེ་རེ་ནས་དབུ་མ་མིན་ཞིང༌། དེ་གཉིས་ཀྱི་བར་གྱི་ཆོས་དེ་དབུས་སམ་དབུ་མ་ཡིན་དགོས་ཀྱི། ཡ་གྱལ་གཞི་ལམ་འབྲས་གསུམ་རེ་རེ་ནས་དབུ་མ་མིན་ནོ་ཞེས་པའི་དམ་བཅའ་སྨྲ་བར་མཛད་དོ། །
གཞི་དབུ་མ་དབུ་མ་མིན་པ་གང་ཞིག་ལམ་འབྲས་གཉིས་པོ་ཡང་དབུ་མ་མིན་པའི་ཕྱིར་སོགས་གསུངས། དེའི་རྗེས་སུ་འབྲངས་ཏེ་མཁས་མཆོག་འགའ་ཞིག་གིས་ཀྱང༌། མི་ཕམ་རིན་པོ་ཆེའི་རྒྱན་འགྲེལ་གྱི་སྐབས་ནས་བསྟན་པའི་དབུ་མའི་ངོས་འཛིན་དེ་མི་འཐད་ཅེས་དགག་པར་མཛད་པ་ལ། དེའི་ལན་དུ་དོགས་སེལ་ལས། གཞི་ལམ་འབྲས་གསུམ་རེ་རེ་ནས་དབུ་མ་མིན་པར་སྨྲ་བ་ནི་རྣམ་པར་འཁྱམས་ཏེ་ཞེས་སོགས་གསུངས་ཤིང༌། དེ་བཞིན་དུ་རབ་གསལ་བརྒལ་ལན་དུ་ཡང༌།
མཁས་མཆོག་བློ་བཟང་རབ་གསལ་གྱིས། ཁྱེད་དབུ་མ་པར་མི་འགྱུར་ཏེ། དབུས་ལ་ཡང་གནས་པ་མེད་པའི་ཕྱིར། དེས་ན་བར་གྱི་ཆོས་སམ་དབུས་ལ་གནས་དགོས་པར་གསུངས་པ་ལ་ལན་བསྟན་པའི་སྐབས་སོགས་སུ་གཞན་ལུགས་དགག་ཅིང་རང་ལུགས་ཀྱི་དབུ་མའི་ངོས་འཛིན་རྒྱ་ཆེར་གསུངས་པ་ལྟར་རོ། །དེས་ན་བདེན་པ་གཉིས་ཀྱི་བར་ན་གནས་པའི་དབུ་མ་དེ་གཞི་དབུ་མ་བདེན་གཉིས་གང་ཡིན་དང༌། ལམ་གྱི་གནས་སྐབས་སུ་འཕགས་ལམ་མཉམ་རྗེས་གང་དུ་བསྒོམ་དང༌། མཐར་འབྲས་སྐུ་གཉིས་གང་དུ་འཇོག་སོགས་དྲིས་ཤིང་བརྩད་པས་དམ་བཅའ་འཇིག་པར་སྣང་ངོ༌། །རང་བཞེད་ནི་རབ་གསལ་བརྒལ་ལན་དུ་མཐའ་ཀུན་དང་བྲལ་བའི་གནས་ལུགས་གཞི་དབུ་མ་ཡིན་ལ་ཞེས་སོགས་ལན་མང་དུ་གསུངས་ཤིང༌། དོགས་སེལ་དུ་ཡང་གཞི་དབུ་མ་དབུ་མ་མཚན་ཉིད་པར་བསྒྲུབ་ཅིང་ཚུལ་དེས་ལམ་དང་འབྲས་བུ་ཡང་དབུ་མ་བཏགས་པར་གྲུབ་ཚུལ་གསུངས་པ་ལྟར་སྤྲོས་མཐའ་ཀུན་བྲལ་གྱི་གནས་ལུགས་གཞི་དབུ་མར་བཞེད་ཅིང༌། ཚུལ་དེས་ལམ་དང་འབྲས་བུ་གཉིས་ཀྱང་དབུ་མར་བཏགས་ཏེ་བསྟན་པར་མཛད་དོ། །