གཞི་ཡི་རང་བཞིན་བདེན་གཉིས།
གཉིས་པ་དེ་ཡི་གཞི་ལམ་འབྲས་བུའི་ཤན་འབྱེད་ལ་གཞི་ཡི་རང་བཞིན་བདེན་གཉིས་དང༌། །ལམ་གྱི་ངོ་བོ་སྤངས་རྟོགས་ཁྱད་པར་དང༌། །མཐར་ཕྱིན་འབྲས་བུ་སྐུ་གཉིས་ཤན་འབྱེད་གསུམ། །དང་པོར་མདོར་བསྟན་རྒྱས་བཤད་དོན་བསྡུ་གསུམ། །དང་པོ་ནི།
ཐེག་མཆོག་དབུ་མའི་གཞུང་ལུགས་ལ། །
གཞི་ལམའབྲས་བུ་རྣམ་གསུམ་ལས། །
གཞལ་བྱ་སྣང་སྟོང་བདེན་པ་གཉིས། །
འཆད་པའི་ཚུལ་ལ་མི་མཐུན་ཡོད། །
ཅེས་སོགས་ཏེ། སྤྱིར་ཐེག་མཆོག་དབུ་མ་ཆེན་པོའི་གཞུང་ལུགས་ལ་གཞི་བདེན་གཉིས་དང་ལམ་སྤང་གཉེན་འབྲས་བུ་སྐུ་གཉིས་ཏེ་རྣམ་པ་གསུམ་ལས། ཐོག་མར་གཞལ་བྱ་སྣང་སྟོང་གི་བདེན་གཉིས་ཀྱི་ངོ་བོ་སོགས་འཆད་པའི་ཚུལ་ལ་ཡང་མི་མཐུན་པ་ཡོད་དོ་ཞེས་མདོར་བསྟན་པའོ། །