གནས་སྣང་ཆོས་ཀྱི་བདེན་གཉིས་དབྱེ་ཚུལ།

གཉིས་པ་གནས་སྣང་ཆོས་ཀྱི་བདེན་གཉིས་དབྱེ་ཚུལ་ནི།

སྣང་ཚུལ་དག་པའི་ཚད་མ་ཡིས། །

གཞལ་དོན་ཡང་དག་ཡིན་མིན་གྱིས། །

གནས་སྣང་མཐུན་པ་དོན་དམ་དང་། །

གནས་སྣང་མི་མཐུན་ཀུན་རྫོབ་དབྱེ། །

ཚུལ་འདི་འཁོར་ལོ་ཐ་མ་ཡི། །

ངེས་དོན་མདོ་དང་རྒྱུད་སྡེ་དང་། །

ཐེག་ཆེན་རྒྱུད་བླ་གཞུང་སོགས་ཀྱི། །

བདེན་གཉིས་དབྱེ་ཚུལ་བླ་ན་མེད། །

ཅེས་སོགས་ཏེ། ཡང་ཐེག་པ་ཆེན་པོ་རྒྱུད་བླ་མ་སོགས་ཀྱི་གཞུང་དོན་རྒྱན་གྱི་སྤྱི་དོན་ལས་གསུངས་པ་ལྟར། སྣང་ཚུལ་ལ་དཔྱོད་པ་དག་གཟིགས་ཐ་སྙད་ཚད་མས་གཞལ་ཚེ་དེའི་གཞལ་དོན་ཡང་དག་ཡིན་མིན་གྱི་སྒོ་ནས། ཡང་དག་པའི་གནས་ལུགས་གང་ཞིག་གནས་སྣང་མཐུན་པར་གྱུར་པའི་ཡུལ་སྟོང་ཉིད་དང༌། ཡུལ་ཅན་ཡེ་ཤེས་ལྟ་བུ་སྣང་སྟོང་གཉིས་ཀ་དོན་དམ་དང༌། ཡང་དག་མིན་པའི་སྣང་ལུགས་གང་ཞིག་གནས་སྣང་མི་མཐུན་པར་གྱུར་པའི་ཡུལ་ཡུལ་ཅན་ལྟ་བུ་འཁྲུལ་བའི་ཆ་ཀུན་རྫོབ་ཏུ་འཇོག་པའི་སྒོ་ནས་བདེན་པ་གཉིས་སུ་དབྱེ་བར་མཛད་དོ། །དེ་ལྟར་གནས་སྣང་མཐུན་མི་མཐུན་གྱི་སྒོ་ནས་བདེན་པ་གཉིས་སུ་འཇོག་པའི་ཚུལ་འདི་ནི་སྙིང་པོའི་མདོ་བཅུ་ལྟ་བུ་བཀའ་འཁོར་ལོ་ཐ་མའི་ངེས་དོན་གྱི་མདོ་སྡེ་རྣམས་ལས་ངེས་དོན་བདེ་གཤེགས་སྙིང་པོའི་ཁྱད་པར་སྟོང་ཆ་ནས་ཡུལ་ཆོས་ཀྱི་དབྱིངས་ངོ་བོ་སྟོང་པ་རྣམ་ཐར་གསུམ་ལྡན་གྱི་བདག་ཉིད་དང༌། སྣང་ཆ་ནས་ཡུལ་ཅན་ཡེ་ཤེས་ཀྱི་རང་བཞིན་འོད་གསལ་བ་མཁྱེན་བརྩེ་ནུས་པའི་ཡོན་ཏན་དང་དབྱེར་མེད་པར་གྱུར་པ་གནས་སྣང་མཐུན་པའི་དོན་དམ་དང༌། འཁྲུལ་སྣང་འཁོར་བའི་རང་བཞིན་དྲི་མ་གློ་བུར་བའི་ཆ་ཡུལ་ཡུལ་ཅན་ཐམས་ཅད་གནས་ལུགས་ཀྱི་གཤིས་ལ་མ་ཞུགས་པའི་རྣམ་པར་དབྱེར་ཡོད་པ་གནས་སྣང་མི་མཐུན་པའི་ཀུན་རྫོབ་ཏུ་བཞེད་དེ། ངེས་དོན་བདེ་བར་གཤེགས་པའི་སྙིང་པོ་དངོས་སུ་སྟོན་པའི་མདོ་ཞེས་རྒྱ་བོད་གཉིས་ན་རླུང་ལྟར་གྲགས་པའི་ཕྱིར་རོ། །དེར་མ་ཟད་དཔལ་མ་ཧཱ་ཡོ་ག་སོགས་རྒྱུད་སྡེ་རིན་པོ་ཆེ་རྣམས་ཀྱི་དགོངས་པའང་ཡིན་ཏེ། མ་ཧཱའི་སྐབས་སུ་སྣང་སྟོང་གཉིས་ཀ་ལ་དག་མཉམ་བདེན་པ་དབྱེར་མེད་དོན་དམ་དཀོར་བདུན་ཆེན་པོ་ཞེས། གནས་སྣང་མཐུན་པའི་དོན་དམ་དང༌། དེའི་ལྡོག་ཕྱོགས་འཁྲུལ་པ་བཏགས་པའི་ཀུན་རྫོབ་ཅེས། གནས་སྣང་མི་མཐུན་པའི་ཆ་ཐམས་ཅད་ཀུན་རྫོབ་ཏུ་འཇོག་པ་དང༌། དེ་བཞིན་དུ་ཨ་ནུའི་སྐབས་སུ་བདེན་གཉིས་ཟུང་འཇུག་གི་དོན་དམ་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་ཞེས་སྣང་སྟོང་དབྱེར་མེད་གནས་སྣང་མཐུན་པའི་དོན་དམ་དང༌། དེའི་ལྡོག་ཕྱོགས་མ་དག་འཁྲུལ་པའི་ཀུན་རྫོབ་ཅེས་གནས་སྣང་མི་མཐུན་པའི་ཆ་ལ་ཀུན་རྫོབ་ཏུ་འཇོག་པ་དང༌། ཨ་ཏི་ཡོ་གའི་སྐབས་སུ་ཡང་ཀ་དག་ལྷུན་གྲུབ་ཟུང་འཇུག་གི་གཞི་གནས་རང་བྱུང་གི་ཡེ་ཤེས་དོན་དམ་བདེན་པ་ཞེས་གནས་སྣང་མཐུན་པའི་དོན་དམ་དང༌། གཉིས་སྣང་འཁྲུལ་པའི་ཆོས་གཞི་སྣང་མ་དག་པའི་ཀུན་རྫོབ་ཅེས་གནས་སྣང་མི་མཐུན་པའི་ཆ་ནས་ཀུན་རྫོབ་ཏུ་འཇོག་པའི་ཁྱད་པར་རྣམས་ནི་གནས་སྣང་ཆོས་ཀྱི་བདེན་གཉིས་འདི་ལས་གཞན་དུ་འཆད་ཚུལ་མ་དམིགས་ཤིང༌། གཞན་ཡང་ཐེག་པ་ཆེན་པོ་རྒྱུད་བླ་མའི་སྐབས་སུ་ཡང༌། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་ངོ་བོ་སྟོང་པའི་རང་མདངས་འོད་གསལ་བ་བྲལ་འབྲས་ཆོས་སྐུའི་ཡོན་ཏན་དང་དབྱེར་མེད་པའི་རིགས་ཁམས་བདེ་གཤེགས་སྙིང་པོ་དོན་དམ་དུ་བསྟན་ཅིང༌། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །ཞེས་དྲི་མ་གཤིས་ལ་མ་ཞུགས་པ་གཉེན་པོའི་ལམ་བསྒོམ་སྟོབས་ཀྱིས་དབྱེར་ཡོད་པའི་གཟུང་འཛིན་འཁྲུལ་པའི་ཆོས་ཀུན་རྫོབ་ཏུ་བསྟན་ཅིང༌། དེའི་ཚུལ་རྫོགས་སངས་སྐུ་ནི་འཕྲོ་ཕྱིར་དང་སོགས་ཀྱིས་བསྟན་པ་ལྟར་བྱ་བྱེད་ལྟོས་པ་ཆོས་ཉིད་ཀྱི་རིགས་པ་སོགས་ཐ་སྙད་དག་པའི་ཚད་མའི་སྒོ་ནས་ངོ་བོ་ཡེ་དག་གི་མྱང་འདས་བདེ་གཤེགས་སྙིང་པོ་གཏན་ལ་ཕབ་པར་མཛད་པ་སོགས་ཀྱི་དགོངས་པ་ནི་འདི་ལས་གཞན་དུ་མ་དམིགས་པས་གནས་སྣང་མཐུན་མི་མཐུན་གྱི་སྒོ་ནས་བདེན་གཉིས་དབྱེ་ཚུལ་འདི་ནི་གཞུང་དེ་དག་གི་དགོངས་པ་བླ་ན་མེད་པར་གྲུབ་བོ། །