གཏན་ཚིགས་ཐལ་རང་གི་ཁྱད་པར།
གཉིས་པ་རྒྱས་བཤད་ལ་གཏན་ཚིགས་དང་ནི་བསྒྲུབ་བྱ་དང༌། །དགག་བྱ་དང་ནི་དེ་དག་རབ་དབྱེ་བཞི། །དང་པོར་གཏན་ཚིགས་ཐལ་རང་ཁྱད་པར་དང༌། །གཏན་ཚིགས་དང་ནི་ལྟ་བའི་ཁྱད་པར་གཉིས། །དང་པོ་ནི།
གཞན་དག་དབུ་མ་ཐལ་འགྱུར་ཆེའི། །
གཏན་ཚིགས་ཐལ་འགྱུར་ཞེས་སུ་སྨྲ། །
འོན་ཀྱང་ཁས་ལེན་ཀུན་བྲལ་གྱི། །
ཐལ་འགྱུར་ཐུན་མིན་ཚིག་ཏུ་ཟད། །
རང་བཞེད་རྣམ་གྲངས་མ་ཡིན་པའི། །
དོན་དམ་ཁས་ལེན་ཀུན་དང་བྲལ། །
དེ་ཕྱིར་དབུ་མ་ཆེན་པོ་ཡི། །
གཏན་ཚིགས་ཐུན་མིན་ཐལ་འགྱུར་ཆེ། །
ཞེས་སོགས་ཏེ། གངས་ལྗོངས་མཁས་པའི་གཙུག་རྒྱན་གཞན་དག་གི་ཞལ་སྔ་ནས། དབུ་མ་ཐལ་འགྱུར་ཆེན་པོའི་སྐབས་སུ་ནི་གཏན་ཚིགས་ཐལ་འགྱུར་འབའ་ཞིག་ཏུ་འགོད་དགོས་ཏེ། གཏན་ཚིགས་ཐལ་འགྱུར་དུ་འགོད་པ་ལུགས་འདིའི་ཁྱད་ཆོས་ཞེས་སྨྲ་བར་མཛད་མོད། འོན་ཀྱང་དེའི་ལུགས་ཀྱི་རྟགས་འགོད་ཚུལ་ལ་དཔག་ན་ཆོས་ཅན་བུམ་སོགས་ཀྱི་ཆོས་མི་འགོག་པས་ན་དངོས་སྨྲ་བ་དང་ཆོས་ཅན་མཐུན་སྣང་བ་མེད་པའི་སྒོ་ནས་ཁས་ལེན་ཀུན་བྲལ་གྱི་གཏན་ཚིགས་ཐལ་འགྱུར་ཐུན་མིན་དུ་འགྱུར་དཀའ་བས་ཚིག་ཙམ་དུ་ཟད་དོ་ཞེས་གཞུང་སྤྱིའི་བཀའ་འགྲེལ་སོགས་ལས་གསུངས་པ་ལྟར་རོ། །
རང་བཞེད་ནི་མཉམ་བཞག་ཡེ་ཤེས་ཀྱི་སྤྱོད་ཡུལ་ཟབ་མོ་རྣམ་གྲངས་མིན་པའི་དོན་དམ་གྱི་ངོར་ཆོས་ཅན་མཐུན་སྣང་གི་དངོས་པོ་ཀ་བུམ་སོགས་ཀྱང་མ་དམིགས་ཤིང་དགག་བྱ་སྤྲོས་ཆོས་ཕྲ་རགས་ཐམས་ཅད་དམིགས་སུ་མེད་པར་བཀག་ཤུལ་དུ་བསྒྲུབ་བྱ་ཡོད་མེད་ཀྱི་དམིགས་གཏད་རྡུལ་ཙམ་བསྒྲུབ་ཏུ་མེད་པར་ཁས་ལེན་ཀུན་དང་བྲལ་བ་དེ་ཉིད་ཀྱི་ཕྱིར་ན། དབུ་མ་ཆེན་པོ་འདིའི་ལུགས་ཀྱི་གཏན་ཚིགས་ནི་རྟགས་དང་ཁྱབ་པ་ཕ་རོལ་པོའི་ཁས་བླངས་བ་སོགས་གཞན་ལ་གྲགས་པའི་རྗེས་དཔག་སོགས་ཐལ་འགྱུར་ཐུན་མིན་གྱི་གཏན་ཚིགས་འབའ་ཞིག་གི་སྒོ་ནས་རྒོལ་བའི་ལོག་རྟོག་ལྡོག་པར་མཛད་པ་ཉིད་ཀྱི་གཏན་ཚིགས་ཐུན་མིན་ཐལ་འགྱུར་དུ་འགོད་པའི་ཆེ་བ་དང་ལྡན་པའོ། །