ཞར་བྱུང་ཐར་ལམ་མཆོག་ཏུ་བསྒྲུབ་པ།
གཉིས་པ་ཞར་བྱུང་ལ་ཐར་ལམ་མཆོག་ཏུ་བསྒྲུབ་པ་དང༌། །སོ་ཐར་སྡོམ་པའི་རྒྱུན་ལ་ལོག་རྟོག་དགག །དང་པོ་ནི།
ཀྱེ་མ་དེང་དུས་བབ་ཅོལ་དུ། །
གསང་ཆེན་རྙིང་མའི་གཞུང་ལུགས་ལ། །
ཐར་པ་མེད་ཅེས་ལ་ལ་འཛེར། །
གཞན་དག་དེ་ཡི་རྗེས་སུ་བཟློས། །
ལྟ་བ་བཀའ་རྟགས་ཕྱག་རྒྱ་བཞིའི། །
ཟབ་དོན་རྟོགས་དང་མ་རྟོགས་ལས། །
ཐར་པའི་ལམ་མཆོག་ཡོད་མེད་ཀྱི། །
རྣམ་དབྱེ་ཐུབ་པ་ཆེན་པོས་གསུངས། །
དེ་ཕྱིར་བཀའ་རྟགས་ཕྱག་རྒྱ་དང༌། །
འགལ་ཚུལ་རིགས་པ་སྟོན་ཅིག་གུ།
བཀའ་རྟགས་ཕྱག་རྒྱའི་དགོངས་དོན་དང༌། །
སྔ་ཕྱི་སུ་འགལ་བརྩད་པས་ཆོག །
ཆོས་རྣམས་སྟོང་པར་མི་འདོད་པར། །
དོན་མེད་བདེན་གྲུབ་ཡན་གར་ཞིག །
མེད་པས་སྟོང་གོ་ཆོད་འདོད་པ། །
དེ་ལ་ཐར་པ་ཡོད་མེད་དཔྱོད། །
སྤྱིར་ནི་ཐེག་མཆོག་དབུ་མ་ཆེའི། །
ཐར་ལམ་རྩ་བ་བདེན་མེད་དུ། །
བཞེད་ན་བདེན་སྟོང་མིང་ཅན་དེ། །
བདེན་སྟོང་ཡིན་མིན་དཔྱོད་དང་ལེགས། །
གསང་ཆེན་སྔ་འགྱུར་བརྒྱུད་པའི་ལུགས། །
རྒྱལ་དང་རྒྱལ་སྲས་འཕགས་ཚོགས་ཀྱི། །
ཞལ་ནས་སྙན་དུ་རིམ་པར་བརྒྱུད། །
རྟོག་བཟོ་ཕལ་གྱིས་དོ་ཟླ་མིན། །
མདོ་རྒྱུད་མན་ངག་ཕྱག་བཞེས་བཅས། །
ཚང་ལ་མ་ནོར་ལམ་མཆོག་དེས། །
མཁས་དང་གྲུབ་པ་གྲངས་ལས་འདས། །
གྲུབ་པའི་ས་མཐོར་གཤེགས་ལ་ལྟོས། །
ཞེས་སོགས་ཏེ། ཀྱེ་མ་དེང་སང་གི་དུས་ན་མ་བརྟག་བབ་ཅོལ་ཙམ་དུ་གསང་ཆེན་རྙིང་མའི་གཞུང་ལུགས་ལ་ཐར་ལམ་ཙམ་ཡང་མེད་དོ་ཞེས་ལ་ལ་དག་གིས་སྨྲ་ཞིང༌། གཞན་དག་ཕལ་མོ་ཆེ་ཞིག་དེའི་རྗེས་སུ་བཟློ་བར་བྱེད་ཀྱང༌། དེ་ལ་སྤྱིར་ནང་པ་སངས་རྒྱས་པའི་རིང་ལུགས་ལྟ་བ་བཀའ་རྟགས་ཀྱི་ཕྱག་བཞིའི་ཟབ་དོན་རྟོགས་པ་དང་མ་རྟོགས་པའི་ཁྱད་པར་ལས། ཐར་པའི་ལམ་མཆོག་ཡོད་མེད་ཀྱི་རྣམ་དབྱེ་ཐུབ་པ་ཆེན་པོས་མདོ་ལས་གསུངས་པ་དེའི་ཕྱིར་ན་རྙིང་མ་པའི་ལུགས་ལ་ཐར་པ་མེད་དེ། བཀའ་རྟགས་ཕྱག་རྒྱའི་དགོངས་དོན་དང་འགལ་བའི་ཕྱིར་ཞེས་སོགས་ཀྱི་སྒོ་ནས་འགལ་ཚུལ་གྱི་རིགས་པ་དེ་སྟོན་ཅིག་གུ ལེགས་པར་བརྟགས་ན་བཀའ་རྟགས་ཀྱི་ཕྱག་རྒྱའི་དགོངས་དོན་དང་སྔ་ཕྱིའི་ལུགས་སུ་ཞིག་འགལ་རྣམ་པར་བརྩད་པས་ཆོག་པར་སྣང་སྟེ། གཟུགས་གཟུགས་ཀྱི་མི་སྟོང་པ་སོགས་གཞི་ལམ་འབྲས་བུའི་ཆོས་རྣམས་གཅིག་ཀྱང་དོན་དམ་དུ་སྟོང་པར་མི་འདོད་པར། དེ་དག་གི་སྟེང་དུ་དོན་མེད་བདེན་གྲུབ་ཡན་གར་བ་ཙམ་ཞིག་མེད་པར་དགག་པས་སྟོང་གོ་ཆོད་པར་འདོད་པ་དེ་དག་གི་ལུགས་ལ་ཐར་པ་ཡོད་མེད་དཔྱོད་པར་རིགས་སོ། །དེ་ལ་སྤྱིར་ནི་ཐེག་མཆོག་དབུ་མ་ཆེན་པོའི་ལུགས་ལ་ཐར་ལམ་རྩ་བ་བདེན་མེད་རྟོགས་པ་ལ་བཞེད་ན། དགག་བྱ་ཡན་གར་བས་སྟོང་པའི་བདེན་སྟོང་གི་མིང་ཅན་དེ། བཀའ་རྟགས་ཀྱི་ཕྱག་རྒྱ་བཞིའི་ཡ་གྱལ་གྱི་སྟོང་པ་བདག་མེད་པའི་བདག་ཉིད་ཀྱི་བདེན་སྟོང་ཡིན་མིན་དཔྱོད་དང་ལེགས་ཀྱི། དེ་ལས་གཞན་དུ་གསང་ཆེན་སྔ་འགྱུར་བརྒྱུད་པའི་རང་ལུགས་ནི། རྒྱལ་དང་རྒྱལ་སྲས་འཕགས་པའི་ཚོགས་ཀྱི་ཞལ་ནས་སྙན་དུ་རིམ་པར་བརྒྱུད་ཅིང་ལུང་རིགས་མན་ངག་གི་ཚད་མས་གྲུབ་པས་ན། རྟོག་བཟོ་ཕལ་གྱི་དོ་ཟླར་གྱུར་པ་མིན་ཏེ། མདོ་རྒྱུད་ཀྱི་ལུང་དང་བླ་མ་བརྒྱུད་པའི་མན་ངག་མཐོང་བ་བརྒྱུད་པའི་ཕྱག་བཞེས་སོགས་ཚང་ལ་མ་ནོར་བའི་ལམ་མཆོག་དེ་ལ་བརྟེན་ནས་སྔོན་ཆད་མཁས་དང་གྲུབ་པ་གྲངས་ལས་འདས་པ་ཞིག་གྲུབ་པའི་ས་མཐོར་གཤེགས་པའི་འབྲས་རྟགས་ཡང་དག་གི་ཚུལ་འདི་ལ་ལྟོས་ཞེས་མདོར་མཚོན་ཙམ་དུ་སྨྲོས་པའོ། །