སོ་ཐར་སྡོམ་པའི་རྒྱུན་ལ་ལོག་རྟོག་དགག་པ།
གཉིས་པ་སོ་ཐར་སྡོམ་པའི་རྒྱུན་ལ་ལོག་རྟོག་དགག་པ་ནི།
སྔ་འགྱུར་བརྒྱུད་པའི་སྡོམ་རྒྱུན་ཀྱང༌། །
མ་དག་ཆུ་འགོ་ཀླུ་སྒྲུབ་ལོ། །
དགེ་སློང་དཔལ་ལྡན་ཆེར་གྲགས་པ། །
ཐུབ་པ་ཆེན་པོའི་ལུང་གིས་བསྔགས། །
འཛམ་གླིང་མཛེས་པའི་རྒྱན་གཅིག་པུ། །
ཤིང་རྟ་ཆེན་པོ་ཀླུ་སྒྲུབ་རྗེར། །
སྡོམ་མེད་མིང་གི་དགེ་སློང་དུ། །
སྨྲ་བའི་སྤོབས་པ་དགེ་ལ་ལྟོས། །
གཞུང་ལུགས་ཕྱོགས་ཙམ་མ་རྟོགས་ཤིང༌། །
རིགས་པའི་སྒྲུབ་བྱེད་མེད་པ་རུ། །
ཆོས་པའི་གཟུགས་ཀྱིས་ཆོས་སྤོང་གི །
ལས་ངན་མི་བཟད་སྤོངས་དང་ལེགས། །
ཞེས་སོགས་ཏེ། དེ་བཞིན་དུ་སྔ་འགྱུར་བརྒྱུད་པའི་སྡོམ་རྒྱུན་ཀྱང་མ་དག་པར་སྨྲ་བ་མང་སྟེ། ཐོག་མར་སྔོན་བྲམ་ཟེའི་བཙུན་པ་ཆེན་པོས། ཁར་སང་ཕན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །སོགས་ཀྱིས་སློབ་དཔོན་ཀླུ་སྒྲུབ་རབ་ཏུ་བྱུང་ཚུལ་ལ་སྙད་བཏགས་ཏེ། སྡོམ་པའི་ཆུ་འགོ་ཀླུ་སྒྲུབ་མ་དག་ཟེར་བ་དང༌། བར་དུ་རྨ་གཡོ་གཙང་གསུམ་གྱིས་རྒྱ་ནག་གི་དགེ་སློང་གཉིས་ཁ་སྐོང་དུ་བཞག་སྟེ་བླ་ཆེན་དགོངས་པ་རབ་གསལ་རབ་ཏུ་བྱུང་ཚུལ་ལ་སྙད་བཏགས་ཏེ་བླ་ཆེན་དགོངས་པ་རབ་གསལ་གྱི་སྡོམ་པ་མ་དག་ཟེར་བ་དང༌། ཐ་མ་རྙིང་མའི་སྔགས་འཆང་འགའ་ཞིག་གིས་ལས་ཆོག་གི་མཁན་པོ་མཛད་པ་ལ་རྗེས་སུ་དཔག་སྟེ། རྙིང་མའི་སྡོམ་རྒྱུན་མཐའ་དག་མ་དག་ངེས་ཅན་ནོ་ཟེར་བ་སོགས་སྣང་ཡང༌། ཐོག་མར་སློབ་དཔོན་ཀླུ་སྒྲུབ་ནི།
དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཞེས་སོགས་ཐུབ་པ་ཆེན་པོའི་ལུང་གིས་བསྔགས་ཤིང༌། འཛམ་གླིང་མཛེས་པའི་རྒྱན་གཅིག་ཤིང་རྟ་ཆེན་པོ་ཀླུ་སྒྲུབ་རྗེར་སྡོམ་མེད་མིང་གིས་དགེ་སློང་དུ་སྨྲ་བའི་སྙིང་སྤོབས་དགེ་བ་ལ་ལྟོས་དང་སྨྲ་བ་གཞན་ཡང་ཚུལ་དེ་དང་རྗེས་སུ་མཐུན་པར་ཟད་དོ། །
མདོར་ན་སྔ་འགྱུར་རྙིང་མ་སོགས་ཀྱི་གཞུང་ལུགས་ཀྱི་དགོངས་དོན་ཟབ་མོ་ཕྱོགས་ཙམ་ཡང་མ་རྟོགས་ཤིང༌། ལམ་རྣམ་དག་མིན་ཚུལ་གྱི་རིགས་པའི་སྒྲུབ་བྱེད་ཀྱང་མེད་པར་ཆོས་པའི་གཟུགས་ཀྱིས་ཆོས་སྤོང་གི་ལས་ངན་མི་བཟད་པའི་རྒྱུ་སྒྲུབ་པ་དེ་འདྲ་སྤོང་དང་ལེགས་པར་མངོན་ནོ། །