སྣང་བའི་རྟེན་འབྱུང་ལས་འབྲས་རྟེན།

གཉིས་པ་ལས་འབྲས་རྟེན་ལ་བསྟན་བཤད་གཉིས། །དང་པོ་ནི།

དེ་ལ་སྣང་ཚུལ་ཐ་སྙད་ངོར། །

སེམས་ཉིད་དག་དང་མ་དག་ལས། །

རྟེན་འབྱུང་སྣོད་བཅུད་སྣ་ཚོགས་ཀྱི། །

རང་སྣང་དཔག་ཡས་ལས་ལས་སྐྱེས། །

ཞེས་སོགས་ཏེ། དེ་ལ་སྣང་ཚུལ་ཐ་སྙད་ཙམ་གྱི་ངོར་སེམས་དག་པ་དགེ་བའི་ལས་དང་སེམས་ཉིད་མ་དག་པ་མི་དགེ་བའི་ལས་ལས། རྟེན་འབྱུང་སྣོད་བཅུད་སྣ་ཚོགས་ཀྱི་རང་སྣང་བདེ་སྡུག་བཟང་ངན་དག་དང་མ་དག་སོགས་ཤིན་ཏུ་དཔག་ཡས་ལས་ལས་སྐྱེས་པར་མདོ་དང་བསྟན་བཅོས་ཆེན་པོ་འཇུག་པ་སོགས་ལས་གསུངས་པ་ལྟར་རོ། །

གཉིས་པ་རྒྱས་བཤད་ལ་ཡང་དགག་བཞག་སྤང་གསུམ་ལས། །དང་པོ་ནི།

དེ་ལ་ཁ་ཅིག་ལས་འབྲས་རྟེན། །

རྟེན་འབྱུང་དངོས་པོ་བོར་ནས་སུ། །

དངོས་མེད་ཞིག་པ་དངོས་པོར་སྒྲུབ། །

དེ་ཉིད་ལས་འབྲས་རྟེན་དུ་སྨྲ། །

རྒྱུ་ཆོས་སྐད་ཅིག་དང་པོ་ཉིད། །

ཞིག་པའི་ཞིག་པ་དངོས་པོ་དང༌། །

འབྲས་ཆོས་སྐད་ཅིག་གཉིས་པ་དག །

རིམ་དང་ཅིག་ཅར་སྐྱེ་ཚུལ་འགལ། །

རྒྱུ་ཉིད་ཞིག་དང་མ་ཞིག་ལས། །

འབྲས་བུ་འབྱུང་བ་མི་རུང་དང༌། །

རྒྱུ་འབྲས་འཕྲད་དང་མ་འཕྲད་ཅེས། །

རྩོད་ཚེ་ཞིག་པས་ཅི་ཞིག་བགྱི། །

ལྟོ་བ་ཟས་ཀྱིས་མ་ཚིམས་པར། །

ཞིག་དངོས་ཟས་ཀྱིས་ཇི་ལྟར་ཚིམ། །

མིག་གིས་གཟུགས་ཉིད་མ་མཐོང་བར། །

ཞིག་དངོས་མིག་གིས་མཐོང་ལགས་སམ། །

རྒ་ཤིའི་ཕུང་པོ་རྣམ་སྤངས་ཚེ། །

ཞིག་དངོས་རྒ་ཤི་ཡིན་མིན་དཔྱོད། །

ཡིན་ན་དེ་ལས་མ་རིག་ཉིད། །

མིན་ན་ཞིག་དངོས་སངས་རྒྱས་ལགས། །

ཕུང་པོ་ཞིག་པའི་མྱང་འདས་ཚེ། །

རྟག་དངོས་གཞི་མཐུན་དེར་ཕྱག་འཚལ། །

མྱ་ངན་འདས་པ་འདུས་མ་བྱས། །

ཤིང་རྟ་ཆེན་པོ་ཀླུ་སྒྲུབ་བཞེད། །

ཅེས་སོགས་ཏེ། དེ་ལ་གངས་ལྗོངས་མཁས་པའི་དབང་པོ་ཁ་ཅིག་དབུ་མ་ཐལ་འགྱུར་ཆེན་པོའི་ལུགས་ལ་ལས་འབྲས་ཀྱི་རྟེན་དུ་རྟེན་འབྱུང་རྒྱུ་འབྲས་ཀྱི་དངོས་པོ་ཙམ་གྱི་མི་ཆོག་པར་རང་སར་བོར་ཏེ། རྒྱུ་ཞིག་ཟིན་པའི་དངོས་མེད་ཀྱི་ཞིག་པ་དངོས་པོ་ཡིན་པར་སྐྱེ་བའི་རྐྱེན་གྱིས་རྒ་ཤི་སོགས་ཀྱི་ལུང་དང༌། ཟན་ཆད་པས་བུ་ཤི་བ་སོགས་ཀྱི་རིགས་པས་སྒྲུབ་པར་བྱེད་ཅིང་དེ་ཉིད་ལས་འབྲས་ཀྱི་རྟེན་དུ་སྨྲ་བར་མཛད་དོ། །འོན་ཀྱང་རྣམ་པར་བརྟག་ན་སྐད་ཅིག་གཉིས་པ་ལྟ་བུ་ལ་མཚོན་ན་སྐད་ཅིག་དང་པོ་རྒྱུ་ཞིག་སྟེ་སྐད་ཅིག་གཉིས་པར་འབྲས་བུ་སྐྱེ་བའི་ཚེ། རྒྱུ་ཆོས་སྐད་ཅིག་དང་པོའི་རྗེས་སུ་དེ་ཞིག་པའི་ཞིག་པ་དངོས་པོ་དང༌། རྒྱུའི་རྗེས་སུ་སྐད་ཅིག་གཉིས་པར་འབྲས་བུ་སྐྱེ་བའི་འབྲས་ཆོས་སྐད་ཅིག་གཉིས་པ་དག་རིམ་དང་ཅིག་ཅར་སྐྱེ་ཚུལ་འགལ་ཏེ། རིམ་གྱིས་སྐྱེས་ན་སྐད་ཅིག་དང་པོར་རྒྱུ་ཞིག་སྐད་ཅིག་གཉིས་པར་ཞིག་པ་དངོས་པོ་སྐྱེ། དེའི་རྗེས་སུ་མྱུ་གུ་སྐྱེ་ན་ནི་འབྲས་བུ་མྱུ་གུ་དེ་སྐད་ཅིག་གསུམ་པར་འགྱུར་གྱི་སྐད་ཅིག་གཉིས་པར་ཡང་མི་འགྱུར་ཞིང༌། རྒྱུ་འབྲས་མ་འཕྲད་པའི་སྐྱོན་ཡང་གནས་པ་དང༌། སྐད་ཅིག་གཉིས་པར་མྱུ་གུ་སྐྱེ་བར་འདོད་ན་ཡང་མི་རུང་སྟེ། སྐད་ཅིག་གཉིས་པའི་ཞིག་པ་དངོས་པོ་དེ་མ་ཞིག་ན་རྟག་པར་འགྱུར་ལ། ཞིག་ན་དེ་ཞིག་པའི་ཞིག་པ་སྲིད་མཐར་སྐྱེ་བ་ལས་མྱུ་གུ་སྐྱེ་བའི་སྒོ་སྐབས་བརྙེད་པར་མི་འགྱུར་ཞིང༌། གལ་ཏེ་སྐད་ཅིག་དང་པོར་རྒྱུ་ཞིག་པའི་རྗེས་སུ་དེའི་རང་འབྲས་མྱུ་གུ་དང་དེ་མ་ཡིན་པའི་ཞིག་པ་དངོས་པོ་གཉིས་ཅིག་ཅར་སྐྱེས་ན་ནི། རང་རྒྱུ་ས་བོན་དེ་ཉིད་ཀྱིས་རང་འབྲས་མྱུ་གུ་སྐྱེ་ནུས་པའི་ཕྱིར་ན་ཞིག་པ་དངོས་པོ་དགོས་མེད་དུ་ཐལ་བའོ། །

གཞན་ཡང་དངོས་སྨྲ་བས་དབུ་མ་པར། དབུ་མར་སྨྲ་བ་ཁྱོད་ཀྱི་ལུགས་ལ་ཡང་རྒྱུ་དེ་ཉིད་ཞིག་པ་དང་མ་ཞིག་པ་གང་ལས་ཀྱང་འབྲས་བུ་སྐྱེ་བར་མི་རུང་ངོ༌། །ཞེས་དང༌། དེ་བཞིན་དུ་རྒྱུ་དང་འབྲས་བུ་གཉིས་འཕྲད་དང་མ་འཕྲད་གང་ལྟར་ཡང་འབྲས་བུ་འབྱུང་བར་མི་འཐད་ཅེས་རྩོད་ཚེ། དེའི་ལན་དུ་དེ་འདྲའི་སྐྱོན་མི་འཇུག་པའི་ཆེད་དུ། ལས་འབྲས་ཀྱི་རྟེན་དུ་ཞིག་པ་དངོས་པོ་འཇོག་པར་མཛད་ཀྱང༌། དེ་ལ་ཞིག་པ་དངོས་པོ་ཅི་ཞིག་བགྱི་སྟེ། ལུས་ཀྱིས་རེག་བྱ་མྱོང་བ་ལྟ་བུ་རྒྱུ་འབྲས་འཕྲད་པ་ལྟར་སྣང་ཡང་རྒྱུ་འབྲས་འཕྲད་པའི་སྒོ་ནས་གཅིག་ཏུ་འགྱུར་པའི་སྐྱོན་མི་འཇུག་སྟེ། དེ་གཉིས་ཀྱི་བར་དུ་ཞིག་པས་ཆོད་པའི་ཕྱིར་ཞེས་སྐྱོན་སྤོང་ན་ནི། ལྟོ་བ་ཟས་ཀྱིས་མ་ཚིམས་པར་ཟས་ཞིག་པའི་ཞིག་དངོས་ཀྱི་ཟས་ཀྱིས་ལྟོ་བ་ཚིམས་དགོས་པར་ཐལ་ཞིང༌། དེ་ལྟར་ན་ནི་ཟན་ཆད་པས་བུ་འཆི་བར་ཡང་མི་འགྱུར་རོ། །ཡང་མིག་གིས་གཟུགས་འཛིན་པ་ལྟ་བུ་རྒྱུ་འབྲས་མ་འཕྲད་པ་ལྟར་སྣང་ཡང༌། དེ་གཉིས་མ་འཕྲད་པར་ཐལ་བའི་སྐྱོན་མེད་དེ་ཞིག་པ་དངོས་པོ་མཚམས་སྦྱོར་བའི་ཕྱིར་ཞེས་སྐྱོན་སྤོང་ན་ནི། མིག་དངོས་ཀྱིས་གཟུགས་ཉིད་མ་མཐོང་བར་མིག་གི་དངོས་པོ་ཞིག་ཟིན་པའི་ཞིག་པ་དངོས་པོས་གཟུགས་མཐོང་བར་ཐལ་ཞིང༌། དེ་ལྟར་ན་མིག་ཞིག་པའི་ལོང་བས་ཀྱང་གཟུགས་མཐོང་བར་འགྱུར་རོ། །གཞན་ཡང་ནམ་ཞིག་ལམ་སྒོམ་སྟོབས་ཀྱིས་རྒ་ཤིའི་ཕུང་པོ་རྣམ་པར་སྤང་སྟེ། མྱང་ངན་ལས་འདས་པའི་ཚེ་རྒ་ཤི་ཞིག་པའི་ཞིག་པ་དངོས་པོ་དེ་རྒ་ཤི་ཡིན་དང་མིན་ཞེས་རྣམ་པར་དཔྱོད་ཅིག་དང༌། དེ་འདྲའི་ཞིག་དངོས་དེ་རྒ་ཤི་ཡིན་ན་སངས་འཕགས་དེ་རྒ་ཤི་རྒྱུད་ལྡན་དུ་ཡང་འགྱུར་ཞིང༌། དེ་ལས་མ་རིག་པ་ཡང་འབྱུང་རིགས་པ་ཉིད་དོ། །རྒ་ཤི་སྤང་བའི་ཞིག་པ་དངོས་པོ་དེ་མྱང་འདས་ཡིན་གྱི་རྒ་ཤི་མིན་ཞེས་སྨྲ་ན་ནི། དེ་འདྲའི་ཞིག་པ་དངོས་པོ་དེ་ཡང་སངས་རྒྱས་ལགས་པས། ཕུང་པོ་ཞིག་པའི་མྱང་འདས་ཆེན་པོ་རྟག་དངོས་གཞི་མཐུན་དུ་གྱུར་པ་དེ་ལ་ཕྱག་བྱ་བར་རིགས་སོ། །དེ་ལ་རྟག་དངོས་སུ་འགྱུར་བའི་ཚུལ་ཡང་སྤྱིར་ཞིག་པ་དངོས་པོ་ཡིན་པ་ཁས་བླང་གིས་གྲུབ་ཅིང་མྱང་འདས་སུ་གྱུར་ཚེ་ཞིག་པ་དེ་འདུས་མ་བྱས་ཡིན་པར་ལུང་གིས་གྲུབ་སྟེ། རྩ་བ་ཤེས་རབ་ལས། མྱང་ངན་འདས་པ་འདུས་མ་བྱས། །ཞེས་ཤིང་རྟ་ཆེན་པོ་ཀླུ་སྒྲུབ་ཀྱིས་བཞེད་པའི་ཕྱིར།

གཉིས་པ་བཞག་པར་མདོར་བསྟན་དང་ནི་རྒྱས་བཤད་གཉིས། །དང་པོ་ནི།

ལས་འབྲས་རྟེན་དུ་དངོས་པོ་ཞིག །

མེད་དུ་མི་རུང་དངོས་སྨྲ་བ། །

རང་རྒྱུད་ལ་སོགས་དེ་རྗེས་འབྲངས། །

དབུ་མ་ཆེན་པོས་རྟེན་འབྱུང་བཞེད། །

ཅེས་སོགས་ཏེ། དེ་ལ་སྤྱིར་ལས་འབྲས་ཀྱི་རྟེན་ལ་སྔོན་རྒྱ་གར་དུ་ཕྱི་རོལ་པ་ཕལ་གྱིས་ཞིག་པ་དངོས་པོ་འདོད་པ་དང༌། བྱེ་སྨྲས་ཐོབ་པ་དང༌། དེའི་བྱེ་བྲག་འགའ་ཞིག་གིས་ཆུད་མི་ཟ་བའི་རྫས་དང༌། མདོ་སྡེ་པས་སེམས་ཀྱི་རྒྱུན་དང༌། སེམས་ཙམ་པས་ཀུན་གཞི་འདོད་པ་སོགས་ལས་འབྲས་ཀྱི་རྟེན་དུ་དངོས་པོ་ཞིག་མེད་དུ་མི་རུང་བ་དངོས་པོར་སྨྲ་བའི་ལུགས་ཡིན་ཞིང༌། རང་རྒྱུད་གོང་འོག་སོགས་དབུ་མར་སྨྲ་བ་ཕལ་ཆེར་དེ་དག་གི་རྗེས་སུ་འབྲངས་པར་མཛད་ཅིང༌། དབུ་མ་ཆེན་པོ་ཐལ་འགྱུར་པས་ནི་རྟེན་འབྱུང་ཙམ་དུ་བཞེད་དོ། །

གཉིས་པ་རྒྱས་པར་བཤད་པ་ནི།

མྱུ་གུའི་རྒྱུ་ནི་ས་བོན་ཏེ། །

རྣམ་སྨིན་རྒྱུ་ནི་ལས་ཉིད་ལགས། །

གང་ཕྱིར་ལས་དེ་མ་འགགས་པར། །

དེ་སྲིད་དེ་ལས་འབྲས་བུ་འབྱུང༌། །

རྟེན་འབྱུང་བསླུ་མེད་བདེན་པ་ཡིས། །

ལས་འབྲས་བསྐལ་བརྒྱར་ཆུད་མི་ཟ། །

ཚོགས་ཤིང་དུས་ལ་བབས་པ་ན། །

འབྲས་བུ་ཉིད་དུ་སྨིན་པར་ངེས། །

ཞེས་སོགས་ཏེ། དེ་ལ་རྟེན་འབྱུང་སྒྱུ་མ་ལྟ་བུའི་ཚུལ་དུ་རང་འབྲས་མྱུ་གུའི་རྒྱུ་ནི་ས་བོན་ཙམ་དང༌། འབྲས་བུ་རྣམ་པར་སྨིན་པའི་རྒྱུ་ནི་དགེ་སྡིག་གི་ལས་ཉིད་ལགས་ཀྱི་དེ་ལས་གཞན་དུ་ལས་འབྲས་ཀྱི་རྟེན་དངོས་པོར་གྱུར་པ་ཅི་ཡང་མེད་རུང༌། འཇུག་པ་ལས། གང་ཕྱིར་ལས་དེ་རང་བཞིན་མ་འགག་པ། །དེ་ཕྱིར་ཀུན་གཞི་མེད་ཀྱང་འདི་སྒྲུབ་ནུས། །ཞེས་གསུངས་པ་ལྟར་རྒྱུ་སྲོག་གཅོད་ཀྱི་ལས་ལྟ་བུ་འགགས་པ་ལྟར་སྣང་ཡང༌། རྒྱུ་མཚན་གང་གི་ཕྱིར་ན་ལས་དེ་རང་བཞིན་གྱིས་གྲུབ་པའི་སྒོ་ནས་མ་འགགས་པ་དེའི་ཕྱིར་ན། ནམ་ཞིག་རྣམ་པར་སྨིན་པ་མྱོང་མ་ཟིན་པ་དེ་སྲིད་དེ་ལས་འབྲས་བུ་རྣམ་པར་སྨིན་པ་འབྱུང་རུང་སྟེ། ལས་འབྲས་ཀྱི་རྟེན་དུ་གྱུར་པའི་ཀུན་གཞི་སོགས་མེད་ཀྱང་རྟེན་འབྲེལ་བསླུ་མེད་ཀྱི་བདེན་པས་ལས་འབྲས་ཀྱི་བར་དུ་བསྐལ་པ་བརྒྱར་སོང་ཡང་ཆུད་མི་ཟ་བར་ནམ་ཞིག་རྒྱུ་རྐྱེན་ཚོགས་ཤིང་རྣམ་སྨིན་མྱོང་བའི་དུས་ལ་བབས་པ་ན། འབྲས་བུ་བསླུ་མེད་ཉིད་དུ་སྨིན་པར་ངེས་པ་སྟེ། མདོ་སྡེ་ལས་བརྒྱ་པ་ལས། ལུས་ཅན་རྣམས་ཀྱི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་ལྟར་རོ། །

གསུམ་པ་སྤང་བ་ནི།

ལས་འབྲས་ཤིན་ཏུ་ལྐོག་གྱུར་ཕྱིར། །

བསམ་མི་ཁྱབ་པའི་ཆོས་སུ་གསུངས། །

དེ་ལ་རྟེན་དང་འཕྲད་པ་སོགས། །

ལས་འབྲས་རྣམས་ལ་སེམས་པའང་བཀག།

ཅེས་སོགས་ཏེ། ལས་འབྲས་ཀྱི་རྟེན་དུ་གྱུར་པའི་ཀུན་གཞི་དང་ཞིག་པ་སོགས་མེད་ན་འབྲས་བུ་རྣམ་སྨིན་མྱོང་བ་མི་འཐད་དོ་ཞེ་ན། དེ་ལྟར་དཔྱད་དགོས་པ་མིན་ཏེ། ལས་འབྲས་ཀྱི་རྣམ་པར་གཞག་པ་འདི་ནི་གཞལ་བྱ་ཤིན་ཏུ་ལྐོག་གྱུར་ཡིན་པའི་ཕྱིར་ན་བསམ་གྱིས་མི་ཁྱབ་པའི་ཆོས་བཞིའི་ཡ་གྱལ་དུ་གྱུར་པ་ལས་དང་ལས་ཀྱི་རྣམ་པར་སྨིན་པ་ནི་བསམ་གྱིས་མི་ཁྱབ་པའི་ཆོས་སུ་གསུངས་ཤིང༌། དེས་ན་ཚུར་མཐོང་ཙམ་གྱིས་དཔྱད་དེ་ལས་འབྲས་ཀྱི་རྟེན་ཡོད་མེད་དང་རྒྱུ་དང་འབྲས་བུ་འཕྲད་མ་འཕྲད་སོགས་དཔྱད་ན་ལས་འབྲས་ལ་སྐུར་པ་འདེབས་པའི་རྒྱུར་འགྱུར་བས་དེ་ལྟར་སེམས་པའང་མདོ་ལས་བཀག་པར་མཛད་དོ། །དེ་བས་ན་འཇུག་པ་ལས་ཀྱང༌། ལས་འབྲས་རྣམས་ལ་སེམས་པའང་བཀག་པར་མཛད་ཅེས་གསུངས་སོ། །འོན་ཀྱང་དེ་འཇལ་བྱེད་ཀྱི་ཚད་མ་མེད་པ་ནི་རྣམ་པ་ཀུན་ཏུ་མིན་ཏེ། ཇི་སྙེད་མཁྱེན་པའི་ཡེ་ཤེས་སུ་གྱུར་པ་ལས་དང་ལས་ཀྱི་རྣམ་པར་སྨིན་པ་མཁྱེན་པའི་སྟོབས་ཀྱིས་ལས་འབྲས་ཀྱི་ཚུལ་ཕྲ་བ་ནས་གཟིགས་ཏེ་བཀའ་དང་པོ་བདེན་བཞིའི་ཆོས་འཁོར་དུ་ཟག་བཅས་ཀུན་ཉོན་རྒྱུ་འབྲས་གཉིས་དང༌། ཟག་མེད་རྣམ་བྱང་རྒྱུ་འབྲས་གཉིས་ཀྱི་ཚུལ་དུ་ཕྲ་ཞིབ་ནས་བསྟན་པའི་མདོ་ཡི་རྗེས་སུ་འབྲངས་ཏེ་ཡོད་པར་ཡིད་ཆེས་པའི་ངེས་ཤེས་འདྲོང་དགོས་པར་གསུངས་པ་ལྟར་རོ། །

གསུམ་པ་ཚུལ་དེས་ལྟ་བ་ཁས་ལེན་ཡོད་མེད་བསྟན་པ་ནི།

དེ་ལྟར་ཐ་སྙད་ལས་འབྲས་སོགས། །

ལྟ་བ་ཁས་ལེན་ཡོད་མེད་དོན། །

གཞན་དག་ཕྱོགས་རེའི་བཤད་པ་མཛད། །

རང་བཞེད་བདེན་གཉིས་ཕྱེས་ཏེ་འཆད། །

ཅེས་སོགས་ཏེ། དེ་ལྟར་ཐ་སྙད་དུ་ལས་འབྲས་ཡོད་མེད་སོགས་ཀྱི་ལྟ་བ་ཁས་ལེན་ཡོད་མེད་ཀྱི་དོན་ལ། གཞན་དག་རྣམས་ཀྱིས་དབུ་མ་པ་ལ་མཐའ་གཅིག་ཏུ་ཁས་ལེན་ཡོད་པར་སྨྲ་བ་དང༌། མེད་པར་སྨྲ་བ་སོགས་ཕྱོགས་རེའི་བཤད་པ་མཛད་ཀྱང༌། རང་བཞེད་ཀུན་མཁྱེན་ཆོས་རྗེས། བདེན་གཉིས་རྣམ་པར་ཕྱེས་ཏེ་དོན་དམ་གཏན་ལ་འབེབས་པའི་སྐབས་སུ་ཁས་ལེན་ཀུན་དང་བྲལ་བ་དང༌། ཐ་སྙད་གཏན་ལ་འབེབས་པའི་སྐབས་སུ་དབུ་མ་ཆེན་པོ་ལ་ཁས་ལེན་ཡོད་ཚུལ་སོགས་རྣམ་པར་ཕྱེས་ཏེ་འཆད་པར་མཛད་དོ། །

བཞི་པ་རྟེན་འབྱུང་ཐ་སྙད་བཞེད་ཚུལ་ལ། །དགག་བཞག་དང་ནི་གཞན་ཡང་རྟོགས་པར་གདམས། །དང་པོ་ནི།

ཐ་སྙད་བཞེད་ཚུལ་སྟོང་ཉིད་ལ། །

བློ་ཁ་མ་ཕྱོགས་གྲུབ་མཐའ་ཡིས། །

བློ་མ་བསྒྱུར་བའི་འཇིག་རྟེན་གྱི། །

རྒན་པོའི་རྗེས་འབྲངས་ལ་ལ་སྨྲ། །

ཞེས་སོགས་ཏེ། དབུ་མ་ཆེན་པོའི་ལུགས་ཀྱི་ཐ་སྙད་བཞེད་ཚུལ་ལ་ཡང་སྟོང་ཉིད་ལ་བློ་ཁ་མ་ཕྱོགས་གྲུབ་མཐས་བློ་མ་བསྒྱུར་པའི་འཇིག་རྟེན་རྒན་པོའི་རྗེས་སུ་འབྲང་དགོས་སོ། །ཞེས་རྒན་པོའི་རྗེས་འབྲངས་ཀྱི་དབུ་མ་པ་ལ་ལ་སྨྲ་བར་མཛད་ཀྱང༌། དེ་མི་འཐད་པའི་ཚུལ་རྒྱན་འགྲེལ་སོགས་ལས་རྒྱ་ཆེར་གསུངས་པ་ལྟར་རོ། །

གཉིས་པ་བཞག་པ་ནི།

རང་བཞེད་འཇིག་རྟེན་ངོར་ཞེས་པ། །

འཇིག་རྟེན་ཐ་སྙད་བདེན་པའི་ངོར། །

འཇིག་རྟེན་རྣལ་འབྱོར་མཁས་དབང་ནས། །

ཕལ་པ་བླུན་པོའི་བར་དག་ལ། །

གྲགས་ཤིང་གྲུབ་པའི་འཇིག་རྟེན་གྱི། །

མཐོང་ཐོས་ཤེས་པ་དོན་མཐུན་དག །

དོན་དཔྱོད་ཚད་མས་མ་དཔྱད་པར། །

ཐ་སྙད་ཞལ་བཞེས་མཛད་ཚུལ་ལགས། །

ཕྱི་ནང་གྲུབ་མཐས་བརྟགས་པ་ཡི། །

གཙོ་བདག་ལ་སོགས་སྒྲོ་བཏགས་ཆོས། །

འཇིག་རྟེན་ཀུན་རྫོབ་བདེན་པ་དང༌། །

ཐ་སྙད་དོན་མཐུན་གཉིས་ཀ་མིན། །

ཞེས་སོགས་ཏེ། རང་བཞེད་ནི་འཇིག་རྟེན་གྲགས་སྡེ་སྤྱོད་པའི་དབུ་མ་ཆེན་པོའི་ལུགས་ལ་འཇིག་རྟེན་ངོར་བྱས་བདག་ནི་སྨྲ་བར་བྱེད་སོགས་ཀྱིས་འཇིག་རྟེན་ཙམ་གྱི་ངོར་ཐ་སྙད་ཀྱི་རྣམ་གཞག་ཞལ་གྱིས་བཞེས་ཞེས་པའི་དགོངས་དོན་ནི། འཇིག་རྟེན་ཐ་སྙད་བདེན་པའི་ངོར་འཇིག་རྟེན་རྣལ་འབྱོར་མཁས་པའི་དབང་པོ་ལ་གྲགས་པའི་ས་ལམ་གྱི་རྣམ་གཞག་སོགས་ནས་ཕལ་པ་བླུན་པོའི་བར་དག་ལ་གྲགས་ཤིང་གྲུབ་པའི་འཇིག་རྟེན་ཀུན་རྫོབ་ཀྱི་དངོས་པོ་མཐོང་ཐོས་ཤེས་པ་དོན་མཐུན་དག་ནི། དོན་དཔྱོད་ཚད་མས་མ་དཔྱད་པར་ཐ་སྙད་ཀྱི་སྣང་བ་ཞལ་བཞེས་མཛད་ཚུལ་ལགས་སོ། །དེ་ལ་ཕྱི་ནང་གི་གྲུབ་མཐས་བཏགས་པའི་གཙོ་བོ་དང་བདག་ལ་སོགས་པ་སྒྲོ་བཏགས་ཀྱི་ཆོས་རྣམས་ནི། འཇིག་རྟེན་ཀུན་རྫོབ་ཀྱི་བདེན་པ་དང་ཐ་སྙད་དོན་མཐུན་གཉིས་ཀར་གྱུར་པའི་ཡང་དག་ཀུན་རྫོབ་མིན་ཞིང་འོན་ཀྱང་ལོག་པའི་ཀུན་རྫོབ་ཙམ་དུ་འཇོག་པར་མཛད་དོ། །

གསུམ་པ་གཞན་ཡང་རྟོགས་པར་གདམས་པ་ནི།

དེ་སོགས་གཙོ་བོ་རྣམ་བརྒྱད་དང༌། །

མ་འདྲེས་རིང་ལུགས་མི་ཕམ་རྗེའི། །

དགོངས་དོན་གསལ་བ་འཇུག་པ་ཡི། །

དོན་འགྲེལ་ཟླ་བའི་དགོངས་རྒྱན་གཟིགས། །

ཞེས་སོགས་ཏེ། བཤད་མ་ཐག་པ་དེ་དག་ལ་སོགས་པའི་ཞལ་བཞེས་མི་མཐུན་པའི་ཁྱད་པར་སྤྱི་དང་བྱེ་བྲག་གཞན་ལུགས་ཀྱི་བཞེད་པའི་ཁྱད་པར་དབུ་མ་ཆེན་པོའི་ལུགས་ལ། ཚོགས་དྲུག་ལས་ངོ་བོ་ཐ་དད་ཀྱི་ཀུན་གཞི་དང་རང་རིག་འགོག་ཚུལ་ཐུན་མིན་གཉིས་དང༌། རང་རྒྱུད་ཀྱི་སྦྱོར་བས་ཕྱིར་རྒོལ་གྱི་རྒྱུད་ལ་དེ་ཁོ་ན་ཉིད་ཀྱི་ལྟ་བ་བསྐྱེད་པར་མི་འདོད་པ་དང༌། ཤེས་པ་བཞིན་དུ་ཕྱི་དོན་ཡང་མེད་པར་ཁས་ལེན་པ་དང༌། ཉན་རང་ལ་ཆོས་ཀྱི་བདག་མེད་རྫོགས་པར་རྟོགས་པ་ཡོད་པ་དང༌། ཆོས་ཀྱི་བདག་འཛིན་ཉོན་སྒྲིབ་ཏུ་འཇོག་པ་དང༌། ཞིག་པ་དངོས་པོ་ཡིན་པ་དང༌། དེའི་རྒྱུ་མཚན་གྱིས་དུས་གསུམ་གྱི་འཇོག་ཚུལ་ཐུན་མོང་མིན་པ་སྟེ། དེ་ལྟར་ཁྱད་ཆོས་གཙོ་བོ་རྣམ་པ་བརྒྱད་དུ་བཞེད་པ་དང་མ་འདྲེས་པའི་རང་ལུགས་མི་ཕམ་ཆོས་རྗེ་སོགས་ཀྱིས་དགོངས་དོན་གསལ་བར་བཤད་པ་འཇུག་པའི་རྣམ་བཤད་དོན་འགྲེལ་ཟླ་བའི་དགོངས་རྒྱན་དུ་གཟིགས་པར་འཚལ་ལོ། །