སྤྱི་དོན་མཉམ་རྗེས་རབ་དབྱེ།
གཉིས་པ་རྒྱས་བཤད་ལ་སྤྱི་དོན་མཉམ་རྗེས་རབ་དབྱེ་དང༌། །སྐབས་དོན་མཉམ་བཞག་རང་བཞིན་རྒྱས་པར་བཤད། །འཕྲོས་དོན་སྣང་བཅས་སྣང་མེད་ཤན་འབྱེད་གསུམ། །དང་པོ་ནི།
མཉམ་བཞག་ལ་ཡང་སྣང་བཅས་དང༌། །
སྣང་བ་མེད་པའི་ཏིང་འཛིན་གཉིས། །
དེ་བཞིན་རྗེས་ཐོབ་འཇིག་རྟེན་དང༌། །
འཇིག་རྟེན་འདས་པའི་རྗེས་ཐོབ་ཡོད། །
ཅེས་སོགས་ཏེ། དེ་ལ་སྤྱིར་མདོ་དང་བསྟན་བཅོས་ཆེན་པོ་ལས་བྱུང་བ་ལྟར། འཕགས་ལམ་མཉམ་བཞག་གི་ཁྱད་པར་ལ་ཡང་སྣང་བཅས་རྣལ་འབྱོར་མངོན་སུམ་དང༌། སྣང་མེད་རྣལ་འབྱོར་མངོན་སུམ་གྱི་ཏིང་ངེ་འཛིན་དང་གཉིས་སུ་ཡོད་ལ། དེ་བཞིན་དུ་རྗེས་ཐོབ་ལ་ཡང་འཇིག་རྟེན་དང་འཇིག་རྟེན་ལས་འདས་པའི་རྗེས་ཐོབ་གཉིས་སུ་ཡོད་པའོ། །