ཐེག་ཆེན་སྤངས་རྟོགས་རྫོགས་ཚུལ།

གཉིས་པ་ཁྱད་པར་ཐེག་ཆེན་སྤངས་རྟོགས་རྫོགས་ཚུལ་ནི།

འོན་ཀྱང་ཆོས་ཀྱི་བདག་མེད་དང༌། །

ཤེས་སྒྲིབ་བྲལ་བའི་སྤང་བ་སྟེ། །

འགོག་ལམ་མཐར་ཐུག་མ་རྫོགས་ཕྱིར། །

རྒྱལ་བ་རྣམས་ཀྱིས་འགོག་ལས་སློང༌། །

རྫོགས་སྨིན་སྦྱངས་པ་མཐར་ཕྱིན་ཚེ། །

མཐར་ཐུག་གློ་བུར་བྲལ་དག་ཆེ། །

སྤང་བ་ཤེས་སྒྲིབ་བྲལ་བ་དང༌། །

གཉེན་པོ་ཆོས་ཀྱི་བདག་མེད་རྫོགས། །

སྤང་བ་རྫོགས་པའི་འགོག་བདེན་ནི། །

ངོ་བོ་ཉིད་སྐུའི་རང་བཞིན་དང༌། །

རྟོགས་པ་རྫོགས་པའི་ལམ་བདེན་ཆེ། །

མཐར་ཐུག་ཡེ་ཤེས་ཆོས་སྐུ་བརྙེས། །

ཚུལ་འདི་མཚུངས་མེད་བཤེས་གཉེན་དེས། །

ཞལ་ནས་སྙན་དུ་བརྒྱུད་པ་ཡི། །

མན་ངག་གཞན་ལ་མ་སྤེལ་བར། །

ཁོ་བོ་ཅག་གི་སྐལ་བར་བྱས། །

ཞེས་སོགས་ཏེ། ཇི་སྐད་བཤད་མ་ཐག་པ་དེ་ལྟར་བྱང་ཆུབ་སེམས་དཔའི་ས་བདུན་པའི་གནས་སྐབས་སུ། ཉན་རང་གི་སྤངས་རྟོགས་ཡོངས་སུ་རྫོགས་པའི་སྟོབས་ཀྱིས་ས་བརྒྱད་པའི་སྐབས་སུ་ནི། འཇུག་པ་ལས། ཉོན་མོངས་ཟད་ཅིང་ས་གསུམ་བླ་མར་གྱུར་ཀྱང་སངས་རྒྱས་རྣམས་ཀྱིས་ནི། ཡོན་ཏན་མཁའ་ལྟར་མཐའ་བྲལ་མ་ལུས་ཐོབ་པར་ནུས་མ་ཡིན། །ཞེས་གསུངས་པ་བཞིན། ཉན་ཐོས་དགྲ་བཅོམ་པ་ལྟར་ཁམས་གསུམ་ལས་ཡོངས་སུ་འདས་ཤིང༌། ས་གསུམ་གྱི་བླ་མར་གྱུར་མོད་འོན་ཀྱང་གཉེན་པོ་ཆོས་ཀྱི་བདག་མེད་རྫོགས་པའི་རྟོགས་པ་དང་སྤང་བྱ་ཤེས་བྱའི་སྒྲིབ་པ་བྲལ་བའི་སྤངས་པ་སྟེ། ཐེག་ཆེན་ཐུན་མོང་མ་ཡིན་པའི་འགོག་ལམ་མཐར་ཐུག་མ་རྫོགས་པས་ན། ཇི་སྐད་དུ།

འོན་ཀྱང་དེ་ནི་སྙིང་རྗེ་ཡིས། །བྱང་ཆུབ་བར་དུ་སྲིད་མཚམས་སྦྱོར། །ཞེས་གསུངས་པ་ལྟར། ནང་གི་ཡོངས་འཛིན་སྙིང་རྗེ་ཆེན་པོའི་སྟོབས་ཀྱིས། ཕྱིའི་ཡོངས་འཛིན་རྒྱལ་བ་རྫོགས་པའི་སངས་རྒྱས་རྣམས་ཀྱིས་འགོག་པ་ལས་སློང་བར་མཛད་དེ། ཇི་ལྟར་ན། མདོ་ལས། ལེགས་སོ་ལེགས་སོ་སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ན། འོན་ཀྱང་རིགས་ཀྱི་བུ་གང་ངེད་ཀྱི་སྟོབས་བཅུ་དང༌། མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཕུན་སུམ་ཚོགས་པ་དེ་ཁྱོད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཡོངས་སུ་བཙལ་བའི་ཕྱིར་སྦྱོར་བ་བྱོས་ཤིག བརྩོན་འགྲུས་རྩོམས་ཤིག བཟོད་པའི་སྒོ་འདི་ཉིད་མ་དོར་ཞིག རིགས་ཀྱི་བུ་ཁྱོད་ཀྱིས་དེ་ལྟར་ཞི་བའི་རྣམ་པར་ཐར་པ་ལ་གནས་པ་ཐོབ་ཀྱང༌། བྱིས་པ་སོ་སོའི་སྐྱེ་བོ་མ་ཞི་བ་རབ་ཏུ་མ་ཞི་བ། ཉོན་མོངས་པ་སྣ་ཚོགས་ཀུན་ཏུ་འབྱུང་བར་གྱུར་པ། རྣམ་པར་རྟོག་པ་རྣམ་པ་སྣ་ཚོགས་ཀྱིས་ཡིད་གཡེངས་པ་འདི་དག་ལ་སོམས་ཤིག་ཅེས་སོགས་མདོ་སྡེ་ས་བཅུ་པ་ལས་བྱུང་བ་ལྟར་འགོག་པ་ལས་སློང་བར་མཛད་དོ། དེ་ལྟ་བུའི་སྒོ་ནས་བྱང་སེམས་བདག་ཉིད་ཆེན་པོ་དག་པ་ས་གསུམ་ལ་གནས་པ་རྣམས་ནི། ཕྱི་དང་ནང་གི་ཡོངས་འཛིན་ཁྱད་པར་ཅན་གྱིས་ཟིན་པའི་སྒོ་ནས། ཞི་བའི་མཐའ་ལ་མི་ལྷུང་བར་གྲངས་མེད་གསུམ་པར་གྱུར་པའི་ཚོགས་ཀྱིས་རྫོགས་སྨིན་སྦྱངས་པ་མཐར་ཕྱིན་པའི་ཚེ། སྤངས་རྟོགས་མཐར་ཐུག་བདག་མེད་ཀྱི་རྟོགས་པ་ཡོངས་སུ་རྫོགས་པར་གྱུར་ཏེ། གློ་བུར་བྲལ་དག་ཆེན་པོ་སྤང་བ་ཤེས་སྒྲིབ་མཐའ་དག་ཡོངས་སུ་བྲལ་བ་དང༌། གཉེན་པོ་ཆོས་ཀྱི་བདག་མེད་ཀྱི་རྟོགས་པ་ཡོངས་སུ་རྫོགས་ཏེ། སྤང་བ་རྫོགས་པའི་འགོག་བདེན་མཐར་ཐུག་ངོ་བོ་ཉིད་སྐུའི་རང་བཞིན་དང༌། རྟོགས་པ་རྫོགས་པའི་ལམ་བདེན་མཐར་ཐུག་ཡེ་ཤེས་ཆོས་སྐུ་བརྙེས་པར་འགྱུར་རོ། །དེ་ལ་སྐབས་འདིའི་འགོག་པ་ནི། འཇུག་འགྲེལ་ལས། འགོག་པ་ལ་སྙོམས་པར་འཇུག་པ་ནི་ཡང་དག་པའི་མཐའ་ལ་སྙོམས་པར་འཇུག་པ་ཡིན་པས། དེ་བཞིན་ཉིད་ལ་འགོག་པ་ཞེས་བརྗོད་དེ། འདིར་སྤྲོས་པ་མཐའ་དག་འགག་པར་འགྱུར་རོ། །ཞེས་གསུངས་པ་ལྟར་ཤེས་པར་བྱ་ཞིང༌། དེ་ལ་གོང་དུ་བསྟན་པ་ལྟར་ཉོན་སྒྲིབ་བྲལ་བའི་འགོག་པ་ཉན་རང་དང་ཐུན་མོང་དུ་གྱུར་པའི་མྱང་འདས་དང༌། ཤེས་སྒྲིབ་བྲལ་བའི་འགོག་པ་ཐེག་ཆེན་ཐུན་མིན་གྱི་མྱང་འདས་དང་གཉིས་སུ་ཡོད་པ་ལས། དང་པོ་ཐོབ་ཀྱང་དེ་ཙམ་མངོན་དུ་བྱས་ཏེ་ཞི་མཐར་མི་ལྷུང་བར་ནང་གི་ཡོངས་འཛིན་སྙིང་རྗེ་ཆེན་པོ་དང་ལྡན་པ་ལ། ཕྱིའི་ཡོངས་འཛིན་སངས་རྒྱས་ཀྱིས་ཡོངས་སུ་བསྐུལ་ཏེ་རྫོགས་སྨིན་སྦྱངས་གསུམ་རྒྱ་མཚོ་ལྟ་བུ་ལ་བསླབ་ནས་མཐར་ཐུག་གི་མྱང་འདས་ཆེན་པོ་སྒྲུབ་པར་མཛད་པའོ། །དེས་ན་ཉན་ཐོས་དང་རང་སངས་རྒྱས་རྣམས་ནི་ནང་གི་ཡོངས་འཛིན་སྙིང་རྗེ་ཆེན་པོའི་ཐབས་དང་བྲལ་བའི་སྟོབས་ཀྱིས། གང་ཟག་གི་བདག་མེད་ཀྱི་སྤངས་རྟོགས་རྫོགས་པའི་མྱང་འདས་ཙམ་མངོན་དུ་བྱས་ཏེ་བསྐལ་པ་སྟོང་ཕྲག་བཅུའི་བར་དུ་ཞི་མཐར་ལྷུང་བ་ལས་རེ་ཞིག་དེ་བཞིན་གཤེགས་པའི་ཕྱག་གིས་ཀྱང་བསྐྱོད་དུ་མེད་ཀྱང༌། བྱང་སེམས་བདག་ཉིད་ཆེན་པོ་རྣམས་ནི་ཉན་རང་དང་ཐུན་མོང་དུ་གྱུར་པའི་སྤངས་རྟོགས་ཡོངས་སུ་རྫོགས་ཏེ་སྲིད་པའི་མཐའ་ལས་གྲོལ་ཀྱང༌།

དེ་ཙམ་མངོན་དུ་བྱེད་མི་སྲིད་པ་ནི། ནང་གི་ཡོངས་འཛིན་སྙིང་རྗེ་ཆེན་པོ་དང་ལྡན་པའི་སྟོབས་ཀྱིས་ཕྱིའི་ཡོངས་འཛིན་རྒྱལ་བ་རྫོགས་པའི་སངས་རྒྱས་ཀྱིས་ཡང་ཡང་བསྐུལ་བར་མཛད་དེ། ཞི་མཐར་མི་གནས་པའི་མྱང་འདས་བསྒྲུབ་པར་མཛད་པའི་ཕྱིར། དེ་ལྟར་མིན་ན་ཞི་བ་མྱང་ངན་ལས་འདའ་བར་བསྟན་ཏེ། མདོ་ལས། བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་ལ་ཐམས་ཅད་མཁྱེན་པའི་ཡེ་ཤེས་མངོན་པར་བསྒྲུབ་པའི་སྒོ་རྣམས་སུ་བཞུགས་པར་མ་མཛད་དུ་ཟིན་ན། དེ་དེ་ཉིད་ཀྱི་ཚེ་ཡོངས་སུ་མྱང་ངན་ལས་འདའ་བར་འགྱུར་རོ། །ཞེས་གསུངས་པའི་ཕྱིར། དེས་ན་ཆོས་གསུམ་མངོན་དུ་མ་བྱས་པར་ཡང་དག་མཐའ་མངོན་དུ་བྱས་པའི་སྐྱོན་འཆད་པའི་སྐབས་སུ། བརྒྱད་སྟོང་འགྲེལ་ཆེན་ལས། ཡང་དག་པའི་མཐའ་མངོན་དུ་བྱེད་ཅིང་ཞེས་པ་ནི། ཉན་ཐོས་ཀྱི་མྱང་འདས་མངོན་དུ་བྱས་པའོ། །ཞེས་དང༌། འཇུག་འགྲེལ་ལས་ཀྱང༌། དེ་སྤངས་པས་ཁམས་གསུམ་གྱི་བླ་མ་ཉིད་དུ་གྱུར་དུ་ཟིན་ཀྱང་བྱང་ཆུབ་སེམས་དཔའ་དེས་གནས་སྐབས་དེར་སངས་རྒྱས་བཅོམ་ལྡན་འདས་རྣམས་ཀྱི་འབྱོར་པ་འཐོབ་པར་མི་ནུས་ཏེ། དེ་འཐོབ་པར་བྱ་བའི་ཕྱིར་འདིས་བསྒྲིམ་དགོས་སོ། །ཇི་ལྟར་ན། དེ་དེ་ཉིད་ཀྱི་ཚེ་ཡོངས་སུ་མྱ་ངན་འདའ་བར་འགྱུར་ཏེ། ཞེས་འབྱུང་བའི་ཕྱིར་ཞེས་དང༌། གནོད་འཇོམས་ལས་ཀྱང༌། ཐམས་ཅད་མཁྱེན་པ་ཉིད་ཀྱི་ཡུལ་ཉན་ཐོས་དང་རང་སངས་རྒྱས་ཀྱི་མྱ་ངན་འདས་པ་ཡང་དག་པའི་མཐའ་སྟེ་ཞེས་གསུངས་པའི་ཕྱིར་རོ། །

དེ་ལ་ཁ་ཅིག སྐབས་དེའི་མྱང་འདས་དེ་ཐེག་དམན་དང་ཐེག་ཆེན་གྱི་མྱང་འདས་གཉིས་ཀ་མིན་ཏེ། སྔ་མ་མངོན་དུ་བྱེད་མི་སྲིད་པ་གང་ཞིག་ཕྱི་མ་མངོན་དུ་བྱེད་མི་ནུས་པའི་ཕྱིར་གསུངས་ཀྱང་སྔ་མ་མངོན་དུ་བྱེད་མི་སྲིད་པའི་རྒྱུ་མཚན་ཕྱི་ནང་གི་ཡོངས་འཛིན་ཁྱད་པར་ཅན་གྱིས་ཟིན་པའི་སྒོ་ནས་ཞི་བ་ཙམ་མངོན་དུ་བྱེད་མི་སྲིད་པའི་དོན་བོར་ཏེ། ཐལ་ངག་སྣ་ཚོགས་འགོད་པ་ནི་བྱང་སེམས་སྲིད་པ་ཐ་མ་པ་ཆོས་ཅན། ཁྱོད་གཙང་མའི་གནས་ཀྱི་ལྷ་རྣམས་ཀྱིས་ངེས་པར་འབྱུང་བའི་ཆེད་དུ་བསྐུལ་མི་དགོས་པར་ཐལ་ཏེ། དེ་ངེས་པར་མི་འབྱུང་བ་མི་སྲིད་པའི་ཕྱིར་ཏེ། སྲིད་པ་ཐ་མ་པ་ཡིན་པའི་ཕྱིར་ཟེར་བ་སོགས་དང་ཚུལ་མཚུངས་པར་སྣང་ངོ། །ཡང་འགའ་ཞིག་བྱང་སེམས་ས་བརྒྱད་པ་ཆོས་ཅན། ཁྱོད་ཀྱིས་དུས་མིན་དུ་ཡང་དག་མཐའ་མངོན་དུ་བྱེད་པར་ཐལ། འགོག་པའི་མྱང་འདས་ཐོབ་པའི་ཕྱིར་ཟེར་ཀྱང༌། ཐོབ་ན་མངོན་དུ་བྱེད་པའི་ཁྱབ་པ་སུས་སྒྲུབ་ནུས་རང་གར་སྨྲ་བར་ཟད་དོ། །ཡང་ཁ་ཅིག་ཆོས་གསུམ་མངོན་དུ་བྱས་མཐར་ཐེག་དམན་གྱི་མྱང་འདས་མངོན་དུ་བྱེད་པར་ཐལ་ཞེས་སོགས་འབྲེལ་མེད་ཀྱི་ངག་སྤྱོར་སྣ་ཚོགས་སྨྲ་བར་སྣང་ཡང་གནད་མ་མཁྱེན་པའོ། །མདོར་ན་རང་བཞིན་རྣམ་དག་གི་མྱང་འདས་ས་དང་པོ་ནས་རྟོགས་ཀྱང་དེ་ཙམ་གྱིས་འགོག་པ་འཐོབ་པ་ཞེས་བརྗོད་པ་མ་ཡིན། ཐེག་དམན་དང་ཐུན་མོང་བའི་འགོག་པ་མདོ་དང་འཇུག་པ་རྩ་འགྲེལ་རྣམས་སུ་གསུངས་པ་ལྟར། ས་དྲུག་པར་ཤེར་ཕྱིན་ལྷག་པའི་སྒོ་ནས་མངོན་དུ་ཐོབ་ཅིང་ས་བདུན་པར་སྤངས་རྟོགས་རྫོགས་པའི་སྒོ་ནས་འདུ་བྱེད་མེད་པའི་ཚུལ་གྱིས་འཇུག་ལྡང་བྱེད་པ་དང༌། ས་བརྒྱད་པར་རྩལ་རྫོགས་པའི་སྒོ་ནས་སྲིད་མཐའ་ལས་གྲོལ་ཀྱང་ཞི་མཐའ་མངོན་དུ་མི་བྱེད། སངས་རྒྱས་ཀྱི་སར་ཆོས་གསུམ་མངོན་དུ་བྱེད་པའི་སྒོ་ནས་བྱང་ཆུབ་ཆེན་པོ་མངོན་དུ་མཛད་ཀྱང་ཞི་མཐའ་མིན་པའི་ཚུལ་སོགས་ཁྱད་པར་དུ་མ་འབྱེད་དགོས་པར་སྣང་ངོ༌། །དེས་ན།

ཚུལ་འདི་མཚུངས་མེད་བཤེས་གཉེན་དེས། །

ཞལ་ནས་སྙན་དུ་བརྒྱུད་པ་ཡིས། །

མན་ངག་གཞན་ལ་མ་སྤེལ་བར། །

ཁོ་བོ་ཅག་གི་སྐལ་བར་བྱས། །

ཞེས་བར་སྐབས་ཀྱི་ཚིགས་བཅད་སྨྲོས་པའོ། །