རྩོམ་པ་རྫོགས་པ་མཇུག་གི་དོན་ལ།

གསུམ་པ་རྩོམ་པ་རྫོགས་པ་མཇུག་གི་དོན་ལ། ཇི་ལྟར་རྩོམ་པའི་ཚུལ་དང་བརྩམས་པ་ཡི། །དགེ་བའི་རྩ་བ་ཡོངས་སུ་བསྔོ་བའོ། །དང་པོ་ནི།

དེ་ལྟར་ཆགས་སྡང་དུག་གིས་མ་བསླད་པར། །

གངས་ལྗོངས་མཁས་དབང་སྔ་ཕྱིའི་བཞེད་སྲོལ་གྱི། །

ཤན་འབྱེད་གནད་དོན་ཁྱད་པར་མ་འདྲེས་པའི། །

གནས་ཚུལ་གསལ་བའི་སྒྲོན་མེད་མདོ་ཙམ་མོ། །

རྒྱལ་བ་ཤཱཀྱ་སེངྒེའི་རིང་ལུགས་མཆོག །

གསང་ཆེན་སྔ་འགྱུར་ཆོས་ཀྱི་རྒྱལ་ཐབས་ཆེའི། །

ཟབ་ཡངས་ཆོས་སྟོན་འགྱེད་པའི་སྒོ་སྲང་ནས། །

དད་གསུམ་སློང་ཕོར་འཛིན་ལྟས་རིང་ཞིག་གནས། །

ཚུལ་དེས་དཔྱོད་ལྡན་གཞོན་ནུའི་སྐལ་བ་རུ། །

ལེགས་ཐོབ་ཆོས་སྟོན་ཟས་ཀྱི་སྐལ་བ་འདི། །

དཔལ་ལྡན་བླ་མའི་བཀའ་དྲིན་གསོ་ཕྱིར་དང༌། །

གཟུར་གནས་དཔྱོད་ལྡན་འགའ་ལ་ཕན་པའི་སླད། །

ཤཱཀྱའི་དགེ་སློང་ཤར་ཕྱོགས་དྭགས་པོ་པ། །

མདོ་སྔགས་བསྟན་པའི་ཉི་མ་ཞེས་བྱ་བས། །

མདོ་སྔགས་ལུང་དང་བླ་མའི་མན་ངག་བཞིན། །

ཡང་དག་རིགས་པའི་ལམ་གྱིས་གསལ་བར་བྲིས། །

ཞེས་སོགས་ཏེ། ཚུལ་དེ་ལྟར་གོང་དུ་ཇི་སྐད་བསྟན་པ་དག་ཀྱང་རང་བློ་ཆགས་སྡང་མི་ཟད་པའི་ཀུན་རྟོག་ངན་པའི་དུག་ཆུས་མ་བསླད་པར། གངས་ལྗོངས་མཁས་པའི་དབང་པོ་སྔ་ཕྱིའི་བཞེད་སྲོལ་གྱི་ཤན་འབྱེད་གཞི་ལམ་འབྲས་བུའི་གནད་དོན་གལ་ཆེ་བའི་ཁྱད་པར་མ་འདྲེས་པའི་གནས་ཚུལ་གསལ་བར་བྱེད་པའི་སྒྲོན་མེ་མདོར་བསྡུས་ཙམ་དུ་བསྟན་པའོ། །ཞེས་གསུངས་ཏེ། ཚུལ་དེ་ཡང་རྒྱལ་བ་ཤཱཀྱ་སེངྒེའི་རིང་ལུགས་མཆོག་གྱུར་གསང་ཆེན་སྔ་འགྱུར་ཆོས་ཀྱི་རྒྱལ་ཐབས་ཆེན་པོར། ཆོས་ཀྱི་རྒྱལ་སྲིད་ལ་དབང་བསྒྱུར་བའི་བཤེས་གཉེན་རྣམས་ཀྱིས། སྐལ་ལྡན་སློབ་ཚོགས་རྒྱ་མཚོར་ཟབ་ཅིང་ཡངས་ལ་རྒྱ་ཆེ་བའི་ཆོས་སྟོན་རྒྱ་ཆེར་འགྱེད་པའི་སྒོ་སྲང་ན། གསང་སྔགས་རྙིང་མའི་མིང་ཙམ་ཡང་བོར་ལ་ཁད་པའི་སློབ་ཕྲན་ཐ་ཤལ་བ་དེས། དྭངས་འདོད་ཡིད་ཆེས་ཡོད་མདོག་གི་དད་པ་གསུམ་གྱི་སློང་ཕོར་ཆེས་ཆེར་འཛིན་ལྟས་ཡུན་རིང་དུ་གནས་ཁུལ་གྱིས་མི་ཚེ་འདའ་བར་བགྱིས་པའོ། །ཚུལ་དེའི་དབང་གིས་དཔྱོད་ལྡན་གཞོན་ནུའི་སྐལ་བར་ལེགས་པར་ཐོབ་པའི་ཆོས་སྟོན་གྱི་ཟས་སྐལ་ཕྲན་བུ་ཙམ་ཞིག་ཐོབ་པར་གྱུར་པ་འདི་ཆུད་ཟ་བར་འཕངས་པའི་བློས། སྤྱིར་དཔལ་ལྡན་བླ་མའི་བཀའ་དྲིན་གསོ་བའི་ཕྱིར་དང༌། ཁྱད་པར་གཟུར་གནས་རྣམ་པར་དཔྱོད་པའི་བློ་དང་ལྡན་པ་རེ་ཟུང་ཡོད་སྲིད་ན་དེ་དག་ལ་ཕན་པའི་སླད་དུ། ཤཱཀྱའི་དགེ་སློང་ཤར་ཕྱོགས་དྭགས་པོའི་རྒྱུད་དུ་བྱུང་བ་མདོ་སྔགས་བསྟན་པའི་ཉི་མ་ཞེས་བྱ་བར་བོས་པས། མདོ་སྔགས་ཀྱི་ལུང་ཚད་མ་དང༌། བླ་མའི་མན་ངག་ཚད་མ་ཇི་ལྟ་བ་བཞིན་དུ། ཡང་དག་པའི་རིགས་པའི་ལམ་གྱིས་ཚིག་དོན་ཉུང་ངུའི་ངག་གི་གསལ་བར་བྲིས་པའོ། །

གཉིས་པ་དགེ་བའི་རྩ་བ་ཡོངས་སུ་བསྔོ་བ་ནི།

དགེ་དེས་མཁའ་མཉམ་སྲིད་པའི་འགྲོ་བ་ཀུན། །

མཐོ་རིས་ཡོན་ཏན་བདུན་གྱི་དཔལ་ལ་སྤྱོད། །

སྐྱེས་བུ་གསུམ་གྱི་ལམ་ལ་རབ་ཞུགས་ཏེ། །

ཀུན་ཀྱང་བླ་མེད་བྱང་ཆུབ་འགྲུབ་གྱུར་ཅིག།

བདག་ཀྱང་འདི་ནས་སྲིད་པ་ཇི་སྲིད་བར། །

སྣ་ཚོགས་གཟུགས་ཀྱིས་འགྲོ་ཁམས་འཇུག་པ་ན། །

སྐྱབས་གཅིག་བསླུ་མེད་གཞོན་ནུ་ཟུར་ཕུད་ཅན། །

མི་འབྲལ་སྣང་བ་དམ་པས་རྩེན་གྱུར་ཅིག།

ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན། །

རྒྱལ་བསྟན་བཤད་སྒྲུབ་འཁོར་ལོའི་སྣང་བས་ཁྱབ། །

ཚུལ་གནས་ཐོས་བསམ་སྒོམ་པའི་ཕ་རོལ་སོན། །

འཆད་རྩོད་རྩོམ་པས་ཐུབ་བསྟན་མཛེས་གྱུར་ཅིག།

ཅེས་སོགས་ཏེ། དེ་ལྟར་ཡོངས་སུ་རྩོམ་པར་བགྱིས་པའི་དགེ་བ་དེ་ཡིས་གཞན་དོན་དུ་ཕན་པ་དང་བདེ་བའི་རྒྱུར་གྱུར་ཏེ། མཁའ་མཉམ་སྲིད་པའི་འགྲོ་བ་ཀུན་ཀྱང་ལམ་གྱི་རྟེན་མཐོ་རིས་ཡོན་ཏན་བདུན་གྱི་དཔལ་ལ་སྤྱོད་ཅིང༌། ལམ་གྱི་ངོ་བོ་གནས་སྐབས་སྐྱེས་བུ་གསུམ་གྱི་ལམ་ལ་རབ་ཏུ་ཞུགས་ཏེ། རིགས་ཅན་གསུམ་གྱིས་བསྡུས་པའི་འགྲོ་བ་མཐའ་དག་ཀུན་ཀྱང༌། མཐར་འབྲས་བླ་ན་མེད་པའི་བྱང་ཆུབ་ཆེན་པོ་མྱུར་དུ་འགྲུབ་པར་གྱུར་ཅིག གཞན་ཡང་བདག་དོན་དུ་ལྷག་པའི་ལྷ་དགྱེས་པའི་རྒྱུར་གྱུར་ཏེ། བདག་ཀྱང་དུས་འདི་ནས་བཟུང་སྟེ་སྲིད་པ་ཇི་སྲིད་ཀྱི་བར་དུ་བྱ་དང་རི་དྭགས་གྲོང་ཁྱེར་གྱི་སློང་མོ་བ་ལ་སོགས་པ་སྣ་ཚོགས་པའི་གཟུགས་ཀྱིས་འགྲོ་བ་རིགས་དྲུག་གི་ཁམས་སུ་སྐྱེ་གནས་རྣམ་པ་བཞིའི་ཚུལ་གྱིས་འཇུག་པ་ན། སྐྱབས་དང་དཔུང་གཉེན་གཅིག་པུར་གྱུར་ཅིང་དུས་ནམ་ཡང་བསླུ་བ་མེད་པ་རྗེ་བཙུན་འཇམ་དཔལ་དབྱངས་གཞོན་ནུ་ཟུར་ཕུད་ལྔ་པ་ཅན་དེ་ཉིད་དང་མི་འབྲལ་བར་བརྩེ་བའིཐུགས་ཀྱིས་དགོངས་ཏེ་མཚན་དཔེའི་ཞལ་མཇལ་ཞིང༌། ཚངས་པའི་གསུང་གི་སྣང་བ་དམ་པས་ཡོངས་སུ་རྩེན་པར་གྱུར་ཅིག་གུ། དེ་བཞིན་དུ་གཉིས་དོན་དུ་བསྟན་པ་རྒྱས་པའི་རྒྱུར་གྱུར་ཏེ། ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན་ཏུ་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་ཉི་ཟླ་ཟུང་འབྲེལ་གྱི་འཁོར་ལོའི་སྣང་བས་ཁྱབ་ཅིང༌། ཕྱོགས་བཞིའི་དགེ་འདུན་འདུས་པའི་སྡེ་ཐམས་ཅད་གཞི་བསླབ་པ་ཚུལ་ཁྲིམས་རྣམ་པར་དག་པ་ལ་གནས་ཤིང༌། རང་དོན་གསན་བསམ་སྒོམ་པའི་ཕ་རོལ་ཏུ་སོན་པ་དང༌། གཞན་དོན་དུ་འཆད་རྩོད་རྩོམ་པའི་སྒོ་ནས། གསར་རྙིང་རིས་མེད་ཀྱི་ཐུབ་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པའི་སྒོ་ནས་མཛེས་པར་གྱུར་ཅིག །ཅེས་པའོ། །

དེ་ལྟར་ལྟ་གྲུབ་ཤན་འབྱེད་ཀྱི་གཞུང་གི་ཚིག་དོན་རྣམ་པར་བཤད་པ་མདོར་བསྡུས་སུ་བཀོད་པ་འདི་ཡང་སྤྱིར་གཞན་ཕྱོགས་ཀྱི་ཡིག་ཆ་སྨྲ་བ་ཕལ་གྱིས་སྔ་འགྱུར་བའི་གཞུང་ལུགས་རྣམས་ནི་ཨ་མྱེའི་གོ་དོན་ཙམ་ལས་འཛིན་མཚམས་ཀྱི་ཁྱད་པར་ཅི་ཡང་མེད་པར་སྨྲ་བ་དང༌། རང་ཕྱོགས་འཛིན་ཁུལ་བྱེད་པ་རྣམས་ཀྱང་གཞུང་དོན་གྱི་འཛིན་མཚམས་ཟབ་པའི་ཁྱད་པར་ཅི་ཡང་མ་མཁྱེན་པར་རང་གར་ཆགས་སྡང་སྤེལ་བའི་རྒྱུ་སྒྲུབ་པ་སོགས་མང་དུ་སྣང་བར་བརྟེན། ཆགས་སྡང་མེད་པའི་ཡིད་ཀྱིས་རྩ་བ་ཉུང་བསྡུས་ཙམ་སྤེལ་ཁུལ་བགྱིས་ཟིན་རུང་དོན་མེད་ཆགས་སྡང་སྤེལ་བ་སོགས་ཀྱི་རྒྱུ་ལྟར་སྣང་བ་འགྲེལ་པ་བྲི་འདོད་སོགས་གཏན་མེད་རུང༌། ཉེ་ཆར་ཆོས་རྗེ་སྨིན་གླིང་རྒྱལ་སྲས་རིན་པོ་ཆེ་ཀུན་གཟིགས་འཇམ་དབྱངས་ཆོས་གྲགས་དཔལ་ཡོན་ཏན་རྒྱ་མཚོའི་སྡེ་དང༌། གྲུབ་དབང་རྫོགས་ཆེན་མཆོག་གི་མཁན་རིན་པོ་ཆེ་པདྨའི་མཚན་ཅན་དང༌། སྡོམ་བརྩོན་སྡེ་སྣོད་འཛིན་པ་ཆེན་པོ་ཆོས་འབྱོར་མཚན་ཅན་དང༌། གོ་འཇོ་ཁ་ལེགས་མཆོག་སྤྲུལ་པདྨའི་མཚན་ཅན་དང༌། མཁན་ཆེན་རིན་པོ་ཆེ་ཐུབ་བསྟན་མཆོག་གི་སྐུ་ཚ་ཚུལ་ཁྲིམས་བསྟན་འཛིན་སོགས་དམ་པ་དུ་མས་བཀྲ་ཤིས་པའི་ལྷ་རྫས་དང་ཆབས་གཅིག་བཀའ་སྩལ་སྤྱི་བོར་ཕེབས་པར་བརྟེན་ཤར་ཕྱོགས་དྭགས་པོའི་རྒྱུད་དུ་བྱུང་བ་ཤཱཀྱའི་དགེ་སློང་མདོ་སྔགས་བསྟན་པའི་ཉི་མས་སྤེལ་བའི་དགེ་བས་གསར་རྙིང་རིས་མེད་པའི་རྒྱལ་བའི་བསྟན་པ་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག ། །

ཕྱོགས་དང་རིས་མེད་རྒྱལ་བསྟན་རིན་པོ་ཆེ། །

ཕྱོགས་ཞེན་རྩོད་པའི་དུཿ ཁ་རབ་ཞི་སྟེ། །

ཕྱོགས་ཀྱི་ཐ་གྲུ་ཡངས་པའི་རྒྱལ་ཁམས་ཀུན། །

ཕྱོགས་ལས་རྣམ་རྒྱལ་ཐུབ་བསྟན་མཛེས་གྱུར་ཅིག།

སརྦ་མངྒ་ལམ། །