ལྟ་གྲུབ་ཤན་འབྱེད་གནད་ཀྱི་སྒྲོན་མེ་ཡི་ཚིག་དོན་རྣམ་བཤད་འཇམ་དབྱངས་ དགོངས་རྒྱན།
རྩོམ་པའི་ཡན་ལག་བཤད་པ 
་ལ་མཆོད་པར་བརྗོད་པ།
༄༅། །ལྟ་གྲུབ་ཤན་འབྱེད་གནད་ཀྱི་སྒྲོན་མེ་ཡི་ཚིག་དོན་རྣམ་བཤད་འཇམ་དབྱངས་
དགོངས་རྒྱན་བཞུགས་སོ། ། བོད་པ ་སྤྲུལ་སྐུ།
ན་མོ་མཉྫུ་ཤྲཱི་ཡེ།
ཟབ་ཞི་སྤྲོས་བྲལ་ཆོས་སྐུའི་མཁའ་ཀློང་ཆེར། །
འོད་གསལ་མཁྱེན་བརྩེའི་རང་མདངས་ལོངས་སྤྱོད་རྫོགས། །
གང་འདུལ་མཛད་ཕྲིན་དཔལ་གྱི་གཟི་འོད་ཅན། །
ཀུན་མཁྱེན་འགྲོ་བའི་ཉིན་བྱེད་གཙུག་ན་རྒྱལ། །
རྒྱལ་སྲས་འཇམ་པའི་དབྱངས་དང་མ་ཕམ་སོགས། །
ཉེ་བའི་སྲས་བརྒྱད་གནས་བརྟན་བཅུ་དྲུག་དང༌། །
རྒྱན་དྲུག་མཆོག་གཉིས་འཇམ་དབྱངས་རྣམ་གསུམ་སོགས། །
རིས་བྲལ་བསྟན་འཛིན་ཚོགས་རྣམས་ཕྱག་གི་ཡུལ། །
གངས་ལྗོངས་མཁས་དབང་སྔ་ཕྱིའི་ལྟ་གྲུབ་གནད། །
མཐར་ཐུག་ དགོངས་ཀློང་རྒྱ་མཚོར་རོ་གཅིག་ཀྱང༌། །
རེ་ཞིག་བཀའ་བབ་ཆུ་བོ་རྣམ་པ ་བཞིའི། །
ཁྱད་པར་ཤན་འབྱེད་གཞུང་གི་ཚིག་དོན་སྤེལ། །
དེ་ལ་འདིར་རྣམ་འདྲེན་མི་ཡི་སེངྒེའི་བསྟན་པ་རིན་པོ་ཆེ་མདོ་དང་སྔགས་ཀྱི་ཆོས་ཚུལ་རྒྱ་མཚོའི་ དགོངས་པ ་མཐའ་དག་བོད་གངས་ཅན་གྱི་ལྗོངས་འདིར་འཇམ་དབྱངས་རྣམ་གསུམ་ལ་སོགས་མཁས་པའི་དབང་པོ་རྣམས་ཀྱིས་བཀའ་བབ་ཀྱི་ཆུ་བོ་ཆེན་པོ་བཞིའི་ཚུལ་གྱིས་ཇི་ལྟར་བཀྲལ་བའི་ལྟ་གྲུབ་ཀྱི་ཁྱད་པར་གསལ་བར་བྱེད་པ།
ལྟ་གྲུབ་ཤན་འབྱེད་ངེས་ཤེས་སྒྲོན་མེ་ཡི། དོན་འགྲེལ་ཤན་འབྱེད་གནད་ཀྱི་སྒྲོན་མེ་འདི་ཉིད་འཆད་པར་བྱེད་པ་ལ། རྩོམ་པའི་ཡན་ལག་བརྩམ་བྱ་གཞུང་དང་ནི། །རྩོམ་པ་རྫོགས་པ་མཇུག་གི་དོན་དང་གསུམ། །དང་པོར་མཆོད་པར་བརྗོད་དང་དམ་བཅའ་གཉིས། །དང་པོ་ནི།
ན་མོ་མཉྫུ་ཤྲཱི་ཡེ།
ཞེས་ལྷག་པའི་ལྷ་མཆོག་འཇམ་དཔལ་དབྱངས་ལ་མཆོད་པར་བརྗོད་ཅིང༌། གཞན་ཡང་བསྟན་བཅོས་ལུས་ཀྱི་བརྗོད་བྱ་སྔ་འགྱུར་ཆོས་ཀྱི་ཆེ་བ་བརྗོད་དེ། དེ་ཡོངས་སུ་འདོམས་པར་མཛད་པའི་འཕགས་པའི་ཚོགས་ལ་མཆོད་པར་བརྗོད་པ་ནི།
མདོ་སྔགས་ཟུང་འབྲེལ་གཞི་ལམ་འབྲས་བུའི་ཆོས། །
སྣང་སྟོང་དབྱེར་མེད་ལྟ་སྤྱོད་རྨད་བྱུང་ཆེ། །
ཐུན་མོང་ཐུན་མིན་བཀའ་དང་དགོངས་འགྲེལ་ཀུན། །
ཚད་མ་གསུམ་གྱིས་འདོམས་མཛད་འཕགས་ཚོགས་རྒྱལ། །
ཞེས་སོགས་ཏེ། དེ་ཡང་བརྗོད་བྱ་དོན་གྱི་ཁྱད་པར་སྤྱིར་རྒྱལ་བའི་བསྟན་པ་རིན་པོ་ཆེ་མདོ་དང་སྔགས་ཀྱི་ལམ་བཟང་ཟུང་དུ་འབྲེལ་བ་དང༌། བྱེ་བྲག་གཞི་ལྟ་བའི་ཁྱད་པར་བདེན་གཉིས་ཟུང་དུ་འབྲེལ་ཞིང་ལམ་སྒོམ་པའི་ཁྱད་པར་ཚོགས་གཉིས་ཟུང་དུ་འབྲེལ་བ་དང༌། ཐོབ་བྱ་འབྲས་བུའི་ཁྱད་པར་སྐུ་གཉིས་ཟུང་དུ་འབྲེལ་བ་སྟེ། མདོ་སྔགས་གང་གི་སྐབས་སུ་ཡང་བདེན་གཉིས་འགལ་འདུ་སྣང་སྟོང་ཡ་བྲལ་ཕྱོགས་རེ་བ་ལྟ་བུ་མ་ཡིན་པར་བརྗོད་བྱ་གཞི་ལམ་འབྲས་བུའི་རྣམ་གཞག་ཐམས་ཅད་སྣང་སྟོང་དབྱེར་མེད་ཟུང་འཇུག་ཆེན་པོར་གཏན་ལ་འབེབས་པའི་ཆེ་བ་དང་ལྡན་པ་དང༌།
ཁྱད་པར་ལྟ་བ་རྨད་དུ་བྱུང་བ་ནང་པ་སངས་རྒྱས་པའི་གྲུབ་མཐའ་ཆེན་པོ་སྡེ་བཞིའི་ཡ་གྱལ་ཟབ་མོ་དབུ་མ་ཆེན་པོའི་ཤིང་རྟ་མཚུངས་པ་མེད་པ་དཔལ་འཕགས་པ་ཀླུ་ཡི་དབང་པོའི་ལྟ་བ་དང་རྗེས་སུ་འབྲེལ་ཞིང༌། སྤྱོད་པ་རྨད་དུ་བྱུང་བ་རྒྱ་གར་འཕགས་པའི་ཡུལ་གྱི་འདུལ་འཛིན་ཆེན་པོ་ཉན་ཐོས་སྡེ་བཞིའི་ཡ་གྱལ་གཞི་ཐམས་ཅད་ཡོད་པར་སྨྲ་བའི་འདུལ་འཛིན་ཀུན་ལས་ཁྱད་པར་རྨད་དུ་བྱུང་བ་མཁན་ཆེན་ཞི་བ་འཚོའི་སྤྱོད་ཚུལ་དང་རྗེས་སུ་འབྲེལ་བ་སྟེ་མདོར་ན་བརྗོད་བྱ་དོན་གྱི་ཆེ་བ་ལྟ་སྒོམ་སྤྱོད་འབྲས་ཕུལ་དུ་བྱུང་བའི་ཁྱད་པར་ལྡན་པ་དང༌།
རྗོད་བྱེད་གཞུང་གི་ཁྱད་པར་ཡང༌། སྤྱིར་ཐུན་མོང་ཐེག་པའི་གཞུང་བཀའ་སྡེ་སྣོད་རིན་པོ་ཆེ་རྣམ་པ་གསུམ་དང༌། བྱེ་བྲག་རིག་པ་འཛིན་པ་སྔགས་ཀྱི་སྡེ་སྣོད་རྒྱ་མཚོ་ལྟ་བུ་རྣམས་དང༌། ཁྱད་པར་ཐུན་མོང་མ་ཡིན་པ་ནང་རྒྱུད་ཡོ་ག་རིན་པོ་ཆེ་རྣམ་པ་གསུམ་སྟེ་རྒྱལ་བའི་བཀའ་མདོ་རྒྱུད་རྒྱ་མཚོ་ལྟ་བུ་མཐའ་དག་ཡོངས་སུ་རྫོགས་པ་དང༌། དེ་དག་གི་ དགོངས་འགྲེལ་དང་བཅས་པ ་མཐའ་དག་ཚང་ལ་མ་ནོར་བར་ཡོངས་སུ་རྫོགས་པའི་ཁྱད་པར་དང་ལྡན་པ་སྟེ། དེ་ལྟར་བརྗོད་བྱ་དང་རྗོད་བྱེད་ཀྱི་རང་བཞིན་དོན་དང་ཚིག་འབྲུ་བཟང་པོའི་ཁྱད་པར་རྨད་དུ་བྱུང་བ་མཐའ་དག་ཚུལ་ཇི་ལྟར་རྗེས་སུ་འདོམས་པའི་ཁྱད་པར་ལ། རྒྱལ་བའི་བཀའ་མདོ་རྒྱུད་ཀྱི་ལུང་ཚད་མ་དང༌། རང་གི་དངོས་སྟོབས་ཀྱི་རིགས་པ་ཚད་མ་དང༌། བླ་མ་དམ་པའི་ཞལ་ལུང་གི་མན་ངག་ཚད་མ་སྟེ། དེ་ལྟར་ཚད་མ་གསུམ་གྱི་སྒོ་ནས་རྗེས་སུ་འདོམས་པར་མཛད་པའི་བདག་ཉིད་ནི་སྤྱིར་སྟོན་མཆོག་ཐུབ་པའི་དབང་པོ་ཉེ་སྲས་བརྒྱད་དང་གནས་བརྟན་བཅུ་དྲུག་སོགས་ཀྱི་ཚོགས་དང་བཅས་པ་དང༌། བྱེ་བྲག་རྒྱན་དྲུག་མཆོག་གཉིས་སོགས་འཕགས་ཡུལ་གྱི་པཎ་གྲུབ་ཆེན་པོ་རྣམས་དང༌། ཁྱད་པར་དེ་དག་གི་རྣམ་པར་འཕྲུལ་བ་མཁན་སློབ་ཆོས་གསུམ་སོགས་སྤྲུལ་པའི་ལོ་པཎ་ཆེན་པོའི་ཚོགས་དང་བཅས་པ་སྟེ་རྒྱལ་དང་རྒྱལ་སྲས་འཕགས་པའི་ཚོགས་རྣམས་ཡོངས་སུ་རྒྱལ་བར་གྱུར་ཅིག་ཅེས་མཆོད་པར་བརྗོད་པའོ། །ཚུལ་དེ་དག་གི་ཁྱད་པར་སྟོན་པའི་ཆོས་འབྱུང་སྤྱི་དང་བྱེ་བྲག་དཔལ་རོང་ཟོམ་པའི་གསུང་རྣམས་དང༌། ཁྱད་པར་བསྟན་རྒྱས་སྨོན་ལམ་སོགས་ལས་རྟོགས་པར་བྱའོ། །དེ་ལྟར་མཆོད་བརྗོད་ཀྱི་ཚུལ་འདི་ཡང༌། སྔོན་གྱི་ཤིང་རྟ་ཆེན་པོ་རྣམས་ཀྱིས་བསྟན་བཅོས་རྩོམ་པའི་ཚུལ་དང་མཐུན་པར་དམ་པའི་མན་ངག་གི་རྗེས་སུ་འབྲངས་ཏེ་བསྟན་བཅོས་ལུས་ཀྱི་བརྗོད་བྱ་སྔ་འགྱུར་ཆོས་ཀྱི་ཆེ་བ་བརྗོད་དེ། དེ་ཉིད་རྗེས་སུ་སྟོན་པར་མཛད་པའི་འཕགས་པའི་ཚོགས་རྣམས་ལ་བསྟོད་ཕྱག་བགྱིས་པའོ། །