ཀརྨ་གླིང་པའི་ཞི་ཁྲོའི་སྐབས་བདག་མདུན་སོ་སོའམ་དབྱེར་མེད་བསྒོམ།།
༈ཀརྨ་གླིང་པའི་ཞི་ཁྲོའི་སྐབས་བདག་མདུན་སོ་སོའམ་དབྱེར་མེད་བསྒོམ། བདག་བསྐྱེད་སྐབས་སམ་དབྱེར་མེད་གང་ལྟར་ཡང་སྔོན་དུ་ཞི་བ་བསྐྱེད་ཟིན་ནས་རྗེས་ཁྲོ་བོ་བསྐྱེད་ཚུལ་ཇི་ལྟར་ལགས། བདག་མདུན་དབྱེར་མེད་ཡིན་ན་བཟླས་པའི་སྐབས་ཛ྄བ་ཁང་དབྱེ་བསྡུ་སོགས་གང་དགོས། བུམ་དཀྱིལ་ནམ་ཙམ་ནས་བསྐྱེད། བུམ་པར་རིགས་བརྒྱ་ཡོངས་རྫོགས་གསལ་དགོས་མིན། བདག་མདུན་སོ་སོའམ། དབྱེར་མེད་གང་ལྟར་ཡང་། བརྒྱ་ཕྱག་ཀློང་བཤགས་སོགས་ཚུལ་ཇི་ལྟ་བུའི་ཉམས་སུ་ལེན། གནས་འདྲེན་གྱི་སྐབས་སྦྱོང་ཁྲུས་དབང་བསྐུར་སོགས་བྱེད་པོ་བདག་ཇི་ལྟར་བསྐྱེད། གནས་སྤར་སྐབས་རིགས་དྲུག་སོགས་དེ་དང་དེར་སྐྱེ་འགྱུར་གྱི་ལས་ཉོན་སྦྱོང་བར་དམིགས་སམ། བཤམས་པ་ལྟར་གནས་འོག་མར་སྐྱེས་པ་རིམ་པར་གོང་མར་སྤར་ཏེ་མཐར་དཀྱིལ་འཁོར་གྱི་སྒོ་དྲུང་དུ་འཁོད་ནས་ཁྲུས་སོགས་བྱེད་པ་ལགས། ཐུབ་པ་རིགས་དྲུག་གི་སྐུ་བཤམས་ནས་ཞལ་ཟས་འབུལ་ཙམ་ལས་གང་ཡང་མ་གསལ་བར་དེའི་སྔོན་རྗེས་སུ་བསྐྱེད་བསྡུ་ལྟ་བུ་ཇི་དགོས། ཡང་པདྨ་བཛྲ་གྱི་གནས་འདྲེན་སྐབས་ཀྱང་། གནས་སྤར་ལུགས་ཇི་ཡིན་བཅས་བཀའ་འདྲི་ཞུ་ཞུ། ༈ཀར་གླིང་ཞི་ཁྲོའི་ཆོས་བདག་གསུམ་པ་རྒྱ་སྟོན་ནམ་མཁའ་ཆོས་ཀྱི་རྒྱ་མཚོའི་སྐུ་ཚེའི་སྟོད་དུ་བཀའ་རྒྱ་མ་གྲོོལ་བས་ཞི་ཁྲོ་བསྡུས་པ་ཟུར་མང་ལུགས་འདི་སྤེལ། བར་དུ་འབྲིང་པོ་ཀཿཐོག་དང་ཏ་བླ་རྣམས་ཀྱི་ལུགས་ཏེ་བྱུང་། སྐུ་ཚེའི་སྨད་བཀའ་རྒྱ་གྲོལ་སྐབས་ཞི་ཁྲོའི་གཞུང་དང་རྫོགས་རིམ་བར་དོ་དྲུག་སོགས་རྒྱས་པར་སྤེལ་བ་གནས་མདོའི་ལུགས་འདི་ལགས། ཀུན་མཁྱེན་དྷརྨཱ་ཀ་རས་ཟུར་མང་ལུགས་གསན་ནས་དཔལ་སྤུངས་སུ་སྒྲུབ་མཆོད་ཉིན་གསུམ་ཙམ་མཛད་སྲོལ་འདུག་
ཀྱང་ཆ་ལག་གང་ཡང་མེད་པར་མ་ཟད་གནས་འདྲེན་ནི་གཏེར་གཞུང་དངོས་དང་འགྲིགས་དཀའ་བ་སོགས་ཡིད་རྟོན་ཕེར་བ་མི་སྣང་། སྤྱིར་རྙིང་ལུགས་ཡོ་ག་གསུམ་ལས་ཐེག་རྩེ་ཨ་ཏི་ཡོ་གའི་རྒྱུད་རྣམས་ལས་ཞི་ཁྲོའི་དཀྱིལ་འཁོར་རྒྱས་པར་བསྟན་པས་ཨ་ཏིའི་ཞི་ཁྲོའི་དཀྱིལ་འཁོར་གསུངས་པ་ཡིན། བྱེ་བྲག་ཀར་གླིང་ཞི་ཁྲོ་འདི་མ་ཧཱ་ཡོ་ག་ལ་གསུམ་དུ་དབྱེ་བའི་ནང་གསེས་མ་ཧཱའི་ཨ་ཏིའི་བསྐྱེད་ཆོག་དང་མཐུན་པ་ཤས་ཆེ། རྙིང་མ་རང་ལུགས་ཀྱི་བདག་མདུན་དབྱེར་མེད་གསུངས་པ་ཐམས་ཅད་ཐོག་མར་སྣང་སྲིད་གཞིར་བཞེངས་ཀྱི་དཀྱིལ་འཁོར་གཅིག་བསྐྱེད་པ་ལས་བདག་མདུན་སོགས་མང་པོ་བསྒོམ་མི་དགོས། དབང་བསྐུར་དང་གནས་འདྲེན་སོགས་ཀྱི་སྐབས་བཟླས་པའི་དབུར་སླེབས་པ་དང་སྙིང་པོའི་མཇུག་ཏུ་ཕཊ་ཛཿབཏགས་པས་བདག་བསྐྱེད་དཀྱིལ་འཁོར་ལས་མར་མེ་གཅིག་ལས་གཉིས་མཆེད་ཀྱི་ཚུལ་གྱིས་དཀྱིལ་འཁོར་གཉིས་པ་མདུན་དུ་ཕྱེ་ནས་མདུན་རྟེན་རྣམས་དང་དབྱེར་མེད་དུ་བསྒོམ། སྤྲོ་བསྡུ་སོ་སོར་བྱ། ཚོགས་མཆོད་དབུར་ཟིན་པ་དང་རང་ཉིད་གཙོ་བོའི་ཐུགས་ཀ་ནས་ལས་ཀྱི་ལྷ་རྡོ་རྗེ་སེམས་དཔའ་ཞིག་མདུན་དུ་འཕྲོས་པ་དེས་བྱ་བ་རྣམས་མཛད་པ་དང་། གནས་འདྲེན་སྐབས་སུའང་དེ་ལྟར་བསྒོམ། ཞི་ཁྲོའི་དཀྱིལ་འཁོར་བསྒོམ་ལུགས་ལས་བྱང་རྒྱས་པར་གཟིགས་གལ་ཆེ་ཡི་ལས་བྱང་ཆུང་བ་འདི་རིགས་མདོར་བསྡུས་ཙམ་ལས་གསལ་ཁ་ཅིའང་མེད་པས་མོས་པ་ཡིད་བྱེད་ཙམ་ལས་དམིགས་གནད་ཚུལ་བཞིན་མི་འོང་། དཀྱིལ་འཁོར་དངོས་གཞིའི་འོག་མ་གཞལ་ཡས་ཁང་སྤྱི་འགྲེ་དང་། སྟེང་ཁང་བུམ་པའི་དབྱིབས་ལ་ཐོག་ཕུབ་སོགས་ཁྱད་པར་མང་པོ་སྣང་། སྟེང་ཁང་ནང་དུ་ཞི་དཀྱིལ། འོག་ཁང་གཞལ་ཡས་ཁང་དངོས་ཀྱི་ནང་དུ་ཁྲོ་དཀྱིལ་རྣམས་བསྐྱེད་པ་ལགས། བག་ཆགས་
རང་གྲོལ་ནི་ཞི་ཁྲོ་ལུས་དཀྱིལ་སྒེར་ཐུབ་ཅིག་ལགས་པས་རྙིང་མ་རྣམས་ཀྱིས་རྒྱུན་འདོན་བྱེད། ཞི་ཁྲོའི་ཆོ་ག་བཏང་སྐབས་སྤྲོས་པ་ལ་དགའ་བ་རྣམས་ཀྱིས་ཐོག་མར་དེ་འདོན། དེ་ནས་བརྒྱུད་འདེབས་སོགས་ཆོ་ག་དངོས་ལ་འཇུག །རྙིང་མ་ཕལ་ཆེ་བས་ནི་ཆོ་གའི་སྐབས་ཆོས་སྤྱོད་འདི་འདོན་སྲོལ་མི་འདུག །ཟུར་མང་ལུགས་སུ་གནས་འདྲེན་མགོར་འདོན་འདུག་པས་སྔར་གནས་རྡོར་སེམས་ཟུར་དུ་ཕྱེེ་བ་དེ་ལ་དམིགས་པ་གཏད་དགོས་པ་ཡིན་འདྲ། ཞི་ཁྲོའི་གནས་འདྲེན་འདི་རྫོགས་ཆེན་ཀྱི་རྒྱུད་ནས་ཡང་ཡང་གསུངས་པ་ཤིན་ཏུ་ཁུངས་ལྡན་དང་། ཞག་ཞེ་དགུ་ལ་བདུན་ཚིགས་རེ་རེ་ལ་རིམ་པ་བཞིན་སོ་སོར་སྦྱོར་ཚུལ་ཀུན་མཁྱེན་ཀློང་ཆེན་པས་ཐེག་མཆོག་རིན་པོ་ཆེའི་མཛོད་ལས་རྒྱས་པར་བཀྲལ་བ་ལྟར་ལགས་ཀྱང་། དེང་སང་དེ་ལྟར་ལག་ཏུ་ལེན་མཁན་མི་འབྱུང་། རིགས་དྲུག་གནས་འདྲེན་དུས་གཅིག་བྱེད་པའི་སྐབས་རིགས་དྲུག་གི་དལ་དེ་དང་དེའི་ཡུལ་དངོས་སུ་བསྒོམ། དམྱལ་གནས་ནས་བརྩམས་རིམ་པར་དྲང་བ་སོགས་ཆགས་མེད་ཀྱིས་མཛད་པའི་གནས་འདྲེན་རྒྱས་པ་ལྟར་བསྒོམ་རྒྱུ་ལགས། བསྡུས་པའི་སྐབས་ཀྱང་དམིགས་པ་དེ་རིགས་ཚང་དགོས། ཡོན་དགེའི་མི་འགྱུར་རྡོ་རྗེ་ལ་གཏེར་ཁ་ཆེན་པོ་མང་པོ་ཞིག་གི་བཀའ་བབས་ཡོད་པ་ཡིན་འདུག་ཀྱང་རྩ་བའི་གཟུངས་མ་དང་ཆོས་བདག་སོགས་ཀྱི་རྟེན་འབྲེལ་འཆུགས་པས་ཆོས་བཀའ་གསུམ་པོ་འདི་ཙམ་ལས་མ་ཐོན། འདི་གསུམ་ཡང་ཤོག་སེར་ཚང་མ་གཏན་ལ་འབེབས་མ་ཐུབ་པས་དབུ་རྣམས་ནི་རྒྱས་པ་ལ་མཇུག་ནི་གཅིག་ཀྱང་མེད་པ་འདྲ་ཞིག་འདུག །འོན་ཀྱང་བཅོས་བསླད་མ་བྱེད་ཅེས་ནན་ཏན་དུ་གསུངས་པའི་དབང་གིས་ད་ལྟའི་བར་དུ་ཆོས་ཆེན་ཀློག་པ་ལྟར་དེ་ཉིད་མགོ་འདོན་མཇུག་འདོན་ལས་རྙིང་མ་སྤྱིའི་འགྲོས་ལྟར་ཁ་སྐོང་སོགས་གང་
ཡང་བྱེད་སྲོལ་མི་འདུག་ཀྱང་། བྱིན་རླབས་ཀྱི་རྒྱུན་ལྡན་ནི་ངེས་པར་ཡིན་འདུག །འདི་རྣམས་ལ་ཁྲིད་དང་ཞལ་རྒྱུན་སོགས་གང་ཡང་མེད་སྟབས་དམིགས་རིམ་སོགས་ལ་ཐེ་ཚོམ་ཀྱི་གནས་ནི་མང་དུ་འདུག །གནས་འདྲེན་ཀྱང་ཞི་ཁྲོ་སོགས་རྙིང་མ་སྤྱི་དང་མི་མཚུངས་པས་གཏེར་གཞུང་དངོས་བསྟན་མོས་པ་ཡིད་བྱེད་ཙམ་ལས་རིགས་བཟོ་ནི་མི་རུང་བར་རྟོགས་པས་དཀྲིགས་ཆོད་ཞུ་མ་ཤེས་ལགས། ཀོང་སྤྲུལ་་ནས།