ཐུན་རེ་བཞིན་ཞི་ཁྲོའི་བསྙེན་པ་གཏོང་ཚུལ།
ཐུན་རེ་བཞིན་ཞི་ཁྲོའི་བསྙེན་པ་གཏོང་ཚུལ། ཐོར་ཐུན་ཡི་དམ་གཞན་གྱི་རིགས་ཚང་བར་བཏང་། དེ་འཕྲོས་ཐུན་གསུམ་ལ་ཐུན་རེའི་ནང་། གཙོ་བོ་ཡབ་ཡུམ་སྟོང་ཕྲག་བཞི་དང་སུམ་བརྒྱ་བཞི་བཅུ་ཐམ་པ་རེ། རིགས་ལྔ་ཡབ་ཡུམ་སྦྲེལ་བ་ཐུན་རེའི་ནང་བདུན་ཅུ་རེ། སེམས་དཔའ་ཡབ་ཡུམ་ནས་བཟུང་སྒོ་བ་ཡན་ཆད་ལ་སུམ་ཅུ་སོ་ལྔ་རེ། དེ་ལྟར་བྱས་པས་ཞག་ལྔ་བཅུ་ཐམ་པས་སྒོས་བསྙེན་འགྲུབ་བོ། །དེ་རྗེས་སྤྱི་ཛབ྄་ཉིན་རེ་ཁྲི་གཉིས་རེ་བཟླས་པས་ཞག་བཅོ་ལྔ་ནས་འགྲུབ་བོ། །ཁྲོ་བོ་ལ་ཐུན་གསུམ་གོང་བཞིན་ཐུན་རེ་ལ་གཙོ་བོ་ཡབ་ཡུམ་སྟོང་ཕྲག་དྲུག་དང་བརྒྱ་ཚོ་གཅིག་བཅུ་གསུམ་རེ། ཁྲག་འཐུང་ཡབ་ཡུམ་ལྔ་སྦྲེལ་བ་རེ་རེ་ལ་ལྔ་བཅུ་ང་བདུན་རེ། འཁོར་ཀཽའུ་རི་མན་ཆད་ལ་ཉེར་བརྒྱད་རེ་བྱས་པས་ཞག་དྲུག་ཅུས་ཁྲོ་བོའི་སྒོས་ཛ྄བ་འགྲུབ། སྤྱི་ཛབ྄་ཉིན་རེ་ཁྲི་ཚོ་གསུམ་རེ་བྱས་པས་ཞག་བཅུས་གྲངས་བསྙེན་འགྲུབ་བོ། །བཀའ་བརྒྱད་གྲངས་བསྙེན་ཐུན་དང་སྦྱོར་ལུགས། བསྙེན་པ་རྒྱས་པ་བྱེད་ཚེ། ཐུན་བཞི་བྱེད་དུས། ཐོར་ཐུན་གཅིག །སྔ་དྲོའི་ཐུན་གཅིག །ཕྱི་དྲོའི་ཐུན་གཅིག །སྲོད་ཐུན་གཅིག་བཅས་བཞིའི་ཐུན་རེ་རེ་ལ་བསྙེན་པ་བྱེད་ལུགས། ཞི་བསྙེན་སྔོན་དུ་སོང་བ་ཡིན་ན། ཞི་བསྙེན་ཕྲེང་སྐོར་རེ། གཙོ་བསྙེན་སྟོང་ཕྲག་གསུམ་རེ་དང་། ཉིས་བརྒྱ་ལྔ་བཅུ་རེ། དཔལ་བརྒྱད་པོ་རེ་རེ་ལ་བརྒྱ་ཚོ་ཕྱེད་གསུམ་རེ་བྱས་པས་ཞག་བརྒྱ་གཅིག་ལ་ཞི་བསྙེན་ཁྲི་ཚོ་གཅིག །གཙོ་
བསྙེན་འབྲུ་འབུམ་གཅིག །དཔལ་བརྒྱད་པོ་འབུམ་ཕྲག་རེ་འགྲོ་བ་ཡིན། ཡང་ཐོར་ཐུན་ལ་ཡི་དམ་རྒྱུན་ཁྱེར་རྣམས་འདོན་ནས། སྔ་དྲོ་མན་ཆད་ཐུན་གསུམ་བྱེད་ཚེ་ཐུན་རེ་རེ་ལ་གཙོ་བསྙེན་སྟོང་ཚོ་བཞི་སུམ་བརྒྱ་ལྔ་བཅུ་རེ། དཔལ་བརྒྱད་པོ་རེ་རེ་ལ་བརྒྱ་ཚོ་གསུམ་རེ་དང་སུམ་ཅུ་སོ་ལྔ་རེ་བྱས་པས་འགྲུབ་པ་ཡིན་ནོ། །ཁྲོ་བོའི་སྤྱི་དྲིལ་དང་། དྲག་སྔགས་སོ་ལྔ་གཉིས་བསྙེན་ཡིག་གཞུང་ལྟར་འགྲོ་དགོས་སོ། །