ཟབ་ཆོས་ཞི་ཁྲོ་དགོངས་པ་རང་གྲོལ་བསྙེན་ཡིག་རིག་པའི་སྒོ་འབྱེད།

ཟབ་ཆོས་ཞི་ཁྲོ་དགོངས་པ་རང་གྲོལ་བསྙེན་ཡིག་རིག་པའི་སྒོ་འབྱེད་ཅེས་བྱ་བ་བཞུགས་སོ། །

ཤྲཱི་ས་མནྟ་བྷ་ཏྲ་ན་མ། གཉིས་སྣང་སྤྲོས་པའི་ཀུན་རྟོག་དབྱིངས་སུ་ཐིམ། །ཟུང་འཇུག་རྡོ་རྗེའི་ངོ་བོར་འཕོ་འགྱུར་མེད། །གདོད་ནས་དག་པའི་ཡེ་ཤེས་ཀུན་ཏུ་བཟང་། །རང་ཞལ་མངོན་དུ་མཇལ་བ་འདིར་ཕྱག་ཡིན། །རྣམ་སྨིན་སྒོ་གསུམ་རྡོ་རྗེའི་རང་བཞིན་དུ། །རྒྱས་འདེབས་ལྷ་སྔགས་ཆོས་སྐུར་ལམ་འཁྱེར་གནད། །དགོངས་པ་རང་གྲོལ་བསྙེན་པའི་གསལ་བྱེད་ཞིག །རྡོ་རྗེ་འཛིན་པའི་བཀའ་བཞིན་འདི་ན་བྲི། །དེ་ཡང་སྔ་འགྱུར་རྡོ་རྗེ་ཐེག་པའི་སྔགས་རྙིང་མའི་བསྟན་པ་རིན་པོ་ཆེའི་བབས་སོ་བཀའ་གཏེར་མན་ངག་གསུམ་དང་། དེའི་ཟབ་པའི་གནད་རྡོ་རྗེ་གསུམ་ལས། སྐུ་སྣང་སྟོང་ལྷ་སྐུ་བསྐྱེད་རིམ། གསུང་རྡོ་རྗེ་གྲགས་སྟོང་བཟླས་བརྗོད། ཐུགས་རྡོ་རྗེ་གསལ་སྟོང་རྣམ་པར་མི་རྟོག་པའི་ཡེ་ཤེས། འདི་གསུམ་དུ་མ་འདུས་པའི་ལམ་གཞན་བཙལ་དུ་མེད་ལ། དེ་ལས་ཡེ་ཤེས་ལྷ་ཡི་གསང་བ་གསུམ་དང་བདག་གི་རང་བཞིན་དབྱེར་མེད་དུ་རྒྱས་འདེབས་པ་ཐུགས་སྲོག་ཡང་དང་ཡང་དུ་བསྐུལ་བའི་ཐབས་ཁྱད་པར་ཅན་ལ་བསྙེན་པའི་རྣལ་འབྱོར་ཞེས་བྱའོ། །དེ་ཚུལ་བཞིན་ཉམས་སུ་ལེན་པ་གང་དུ་བྱ་བའི་གནས་ཞི་ཁྲོ་ཐུན་མོང་དུ་བསྔགས་པའི་གནས་དབེན་ཞིང་ཉམས་དགའ་བ། གནམ་ས་བར་གསུམ་གྱི་དཔྱད་ལེགས་ཤིང་། དགྲ་

ཇག་རྐུན་གསུམ་གྱི་འཚེ་བའི་དོགས་མེད་པ། རྩ་ཆུ་ཤིང་གསུམ་གྱི་མཐུན་རྐྱེན་མོད་ཉི་ལེ་བ། གཞན་དབང་དུ་གྱུར་པ་སོགས་མ་ཡིན་པར་ལས་འདི་བརྩམ་པ་ལ་དགོས་པའི་ཆོས་གསུམ་སྟེ། ཐོག་མར་བླ་མ་རང་རྒྱུད་རྣམ་པར་དག་ཅིང་བསྐྱེད་རྫོགས་ཀྱི་དོན་ལ་མ་རྨོང་པ། ཁྱད་པར་ཆོས་འདིའི་བཀའ་དྲིན་ཞུས་པའི་བླ་མ་བརྒྱུད་པ་ལ་སེལ་མེད་པ་ལས་དབང་རྒྱས་འབྲིང་བསྡུས་གསུམ་མཐའ་རྟེན་དང་བཅས་པ་རིག་འཛིན་བརྒྱུད་པའི་ཕྱག་བཞེས་ལྟར་ལེགས་པར་ཞུས་ཏེ། བླ་མ་མཉེས་པའི་བྱ་བ་ལ་འབད་ཅིང་དམ་ཚིག་སེལ་མེད་དཔང་དུ་བྱས་ནས་ཚུལ་འདི་ལ་བརྩོན་པར་བྱའོ། །དེ་ལ་སྔོན་འགྲོ་སྣ་སེལ་དགེ་བ་དཔུང་བསྐྱེད་ཀྱི་ལས་གལ་ཆེ་བས། བཀའ་རྒྱས་འབྲིང་བསྡུས་གསུམ་སོགས་གསུང་རབ་ཀློག་པ་ཚྭ་ཚྭ་འདེབས་པ་ཆུ་གཏོར་གཏོང་བ། བསང་བརྔན་བཀྱག་པ། གླིང་བཞི་མདོས་བསྐང་། ཚེ་ཐར་སོགས་སྲོག་བསླུ། ཉེའུ་འདོན་པ། གྲོག་སྟོན་དང་། བྱ་འགྱེད། སྤྲང་སྟོན། བྱིས་སྟོན་སོགས་དཔུང་བསྐྱེད་པའི་དགེ་བའི་ལས་བསགས་པ་ལ་འབད་པར་བྱའོ། །གཉིས་པ་དམིགས་སུ་བདག་ཏུ་བཟུང་བའི་གནས་དེར། ཡུལ་ལྷ་གཞི་བདག་ལ་བརྔན་གཏོར་མ། ཕྱོགས་ཞིང་སྡེ་བརྒྱད་ལ་རང་མཐུན་གྱི་གཏོར་མ་ལྷ་ཡི་ང་རྒྱལ་གྱིས་བཏང་སྟེ། འགལ་རྐྱེན་སེལ་བ་དང་། མཐུན་རྐྱེན་བསྒྲུབ་པའི་ཕྲིན་ལས་གཉེར་དམ་དྲག་ཏུ་བཅོལ། ཁྱད་པར་གནས་ཁང་བྱི་དོར་ལེགས་པར་བྱས་ཤིང་། གོང་དུ་དཀོན་མཆོག་གསུམ་གྱི་རྟེན་འོད་འབར་བ་བཤམས་པའི་དབུས་སུ་དྲང་པོར་སྒྱུ་འཕྲུལ་རབ་འབྱམས་ཀྱི་བྲིས་སྐུ་སོགས་ཞལ་ཤར་དུ་གཟིགས་པ་བཤམས། དེ་དང་ཁ་སྤྲོད་ཡོངས་བའི་རང་ཉིད་ཁ་ནུབ་ཏུ་ཕྱོགས་པར་འདུག་པའམ། ཡང་ན་རྟེན་གསུམ་ལྷོ་ནས་བྱང་དུ་

གཟིགས་པ་ལ། རང་བྱང་ནས་ལྷོར་བལྟ་བའམ། དེ་གོ་ཟློག་པ་གནས་ཁང་གི་སྟབས་དང་བསྟུན་ཅི་བདེར་ཡང་གསུངས། སྤྱིར་ལས་གང་བསྒྲུབ་དང་ལྷ་ཡི་རིགས་དང་བསྟུན་པའི་ལྟ་ཕྱོགས་སོགས་ཀྱང་གསུངས། གང་ལྟར་ཞི་ཁྲོའི་རྟེན་གྱི་མདུན་དུ་སྟེགས་བུ་ཁེབ་ལྡན་མདའ་གང་ལས་མི་ཆུང་བ། དབུས་བག་གི་མཐོ་ཞིང་བྱང་ཤར་གཞོལ་བ་ལས་སྒྲོམ་ཁྲི་ལ་བརྟེན་ནམ་མི་བརྟེན་གང་ལྟར་ཡང་། གཏོར་མའི་ཤོམ་ནི། སྤྱིར་ཁམས་ཕྱོགས་དང་དགོས་ཀཿསྟག་སོགས་མདོ་སྨད་སྐྱེས་མཆོག་རིག་འཛིན་རྣམས་ཀྱི་བཀའ་སྲོལ་ཕྱག་བཞེས་རྒྱུན་ལ་རྩ་གསུམ་གཏོར་མ་ཞེས་བསྒྲུབ་པ་ཕྲ་རགས་གང་ལ་མེད་ཁ་མེད་མཛད་པ་དང་། ཨོ་རྒྱན་སྨིན་གྲོལ་གླིང་པ་སོགས་གྲྭ་ས་ཁུང་མ་རྣམས་ན། བཀའ་བརྒྱད་སོགས་ནས་ལས་བཞིའི་གཏོར་མ་དང་རྩ་གསུམ་དོན་གཅིག་ནའང་མིང་འདོགས་ས་དང་། སྤྱིར་རྙིང་མ་ལ་རྟེན་གཏོར། རྟག་གཏོར། གཏའ་གཏོར། བསྒྲུབ་གཏོར། དབང་གཏོར། རྒྱུན་གཏོར་སོགས་གཏོར་མའི་རྣམ་གྲངས་མང་བ་དང་། བསྒྲུབ་གཏོར་ལྟ་བུའི་གཏོར་མ་གཅིག་ལའང་ཤེས་དུས་རྣམ་པ་དྲུག་སོགས་དམིགས་པའི་ཁ་བསྒྱུར་གྱིས་ཟིན་ན་རྒྱུད་སྡེ་འོག་མ་ལྟར་ཨ་འཐས་ཀྱི་རྟོག་པས་བཅིང་མ་དགོས་སམ་སྙམ་པ་ཤར། དེ་ལྟ་ནའང་བསྙེན་རྐྱང་ཡིན་ན་དཀྱིལ་འཁོར་གཏོར་མ་སོགས་དམིགས་པའི་རྟེན་ཙམ་ལས་ནང་གི་ཏིང་འཛིན་གཙོ་བོར་བྱེད། བསྙེན་བསྒྲུབ་སྦྲེལ་ན་ཚོགས་བསགས་པའི་ཡན་ལག་དཀྱིལ་འཁོར་གཏོར་མ་མཆོད་པ་དང་དེས་ཆོག་དང་སླ་ཆོས་ཀྱིས་བགྱིད་ངན་མེད་པ་གལ་ཆེ། རྩ་གསུམ་དང་བསྒྲུབ་གཏོར་སོ་སོར་བཅས་ཀྱང་འགལ་བ་མ་མཐོང་སྟེ། རྟག་གཏོར་སོ་སོར་བཤད་པས་སོ། །བསྒྲུབ་གཏོར་ལྟ་བུ་གཅིག་ལ་དམིགས་པའི་འཕྲུལ་བྱས་ཀྱང་ལོས་ཆོག་སྟེ་བླ་མེད་ཀྱི་རྒྱུད་སྡེའི་རང་ལུགས་དང་། ཁྱད་པར་

དགོངས་པ་རང་གྲོལ་འདིའི་ཆོས་སྐད་ལམ་ཁྱེར་དང་མཐུན་ཞིང་། ལྷག་པའི་ལྷ་རབ་འབྱམས་གང་བསྒྲུབ་ཀྱང་རྩ་བ་གསུམ་ལས་མ་འདས་པའི་ཕྱིར་སྙམ་མོ། །དེ་ལྟར་བསོད་ནམས་ཀྱི་དཔུང་བསྐྱེད་པ་ཅི་རིགས་པ་གྲུབ་ནས། ཞག་ཤས་ཕྱི་མཚམས་བཅད་དེ། ལམ་འདིའི་བཀའ་སྲོལ་ཆོས་སྤྱོད་བག་ཆགས་རང་གྲོལ་གྱི་སྔོན་འགྲོ་ཡན་ལག་བཅུ་བར་བརྒྱ་རྩ་བརྒྱད་རེ་ལས་མི་ཉུང་བའི་བསགས་སྦྱང་ལ་འབད་ཅིང་། རྗེས་སུ་སྐྱེ་མེད་རྣམ་དག་མས་རྡོར་སེམས་གསལ་བཏབ་ནས་ཡི་གེ་བརྒྱ་པ་སྟོང་གིས་མཐའ་བརྟེན་པ་ཡན་ཆད་བྱ། དེས་འགལ་རྐྱེན་ཞི་ཞིང་བསོད་ནམས་ཁྱད་པར་ཅན་བསྐྱེད་པའི་དགོས་པ་ཡོད་དོ། །དེ་ནས་རང་ཉིད་དཀྱིལ་འཁོར་དང་ཞལ་སྤྲོད་ཡོངས་བའི་གདན་ནང་ཚངས་ཅན་བཏིང་བའི་འོག་ས་དཀར་རམ་འབྲས་ཀྱི་གཡུང་དྲུང་ཆོས་སྐོར་དུ་བྲིས་ཏེ་བརྟན་ཆགས་ཤིང་མི་འགྱུར་བའི་རྟེན་འབྲེལ་བྱ། གཞན་ཡང་མཚམས་གཡོག །སྨན་པ། འཚོ་ཆས། གོ་མཚོན། དཔེ་ཆ་སོགས་མཚམས་ཁོང་དུ་འཇུག་དགོས་པ་ཐམས་ཅད་དངོས་སམ་དམིགས་འོག་ཏུ་ཆུད་པར་བྱ། ཕྱིས་མཚམས་མ་གྲོལ་བར་ངོ་གསར་དང་མི་འཕྲད། ཆས་ཀའི་གཏོང་ལེན་སྤང་། སྐྲ་སེན་མི་འབྲེག །འོག་སྟན་མི་སྤྲུག །མཆིལ་མ་དྲོན་མོ་ས་ལ་མི་འབོར། མེ་ལ་ཕུ་མི་འདེབས། གླལ། སྦྲིད། གཉིད། འོག་རླུང་སོགས་དབང་མེད་དུ་ཤོར་ན་བཟླས་འཕྲེང་གི་བརྒྱ་དཔོན་ནས་བསྐྱར་ཏེ། སྔ་མ་གྲངས་སུ་མི་གཅོད། བཟླས་པའི་དུས་རིང་བའམ། གྲངས་མང་བ། འབྲུ་གྲངས་སོགས་ཀྱི་ཁུར་གྱིས་དུབ་པའི་སྐྱོ་བ་དང་སུན་པའི་སྣང་བ་ཤར་ན་འཕགས་པ་ཐོག་མེད་ཀྱིས་མགོན་པོ་བྱམས་པ་བསྒྲུབ་པ་དང་། ཏེ་ལོས་ན་རོ་བརྟེན་པ་དང་། རྗེ་མི་ལ་དང་། གཙང་ཁ་རག་སྒོམ་པ་ལ་སོགས་རྒྱ་བོད་ཀྱི་སྐྱེས་མཆོག་རྣམས་ཀྱིས་

ཆོས་ཕྱིར་དཀའ་བ་སྤྱད་པ་ལ་བསམ་བློ་བཏང་ལ་སེམས་གཟིངས་བསྟོད། གདོད་མ་ནས་ལས་ཀྱི་རྣམ་པར་སྨིན་པའི་དབང་གིས་ལུས་ཅི་འདྲ་ཞིག་བླང་། དེ་ཐམས་ཅད་མདོ་མེད་སྟོང་པར་ཟད་པ་ལས་དོན་དུ་འགྱུར་བ་གཅིག་ཀྱང་མ་བྱུང་། ད་རེས་ལུས་འདི་ལ་རྒྱལ་བ་ཞི་ཁྲོ་རབ་འབྱམས་ཀྱི་ལྷག་པའི་ལྷ་འདི་ལྟ་བུ་ཞིག་བསྒྲུབ་དུ་ཡོད་པ་སྐལ་བ་རེ་བཟང་། ན་ན་ཡང་ན་གོ་ཆོད། ཤི་ནའང་ཤི་གོ་ཆོད། རྐྱེན་ཅི་བྱུང་ཡང་དེའི་དབང་དུ་སྐད་ཅིག་ཙམ་ཡང་མི་གཏོང་བའི་ཞེ་དམ་ཡང་ཡང་བཅའ། ཐུན་སྒང་དུ། ཁ་ཅིག་སོ་བསྡམ་ནས་གཏམ་བྱ་བ་དང་། ཁ་ཡི་ཕྱེད་ལག་པས་བཀབ་ནས་གཏམ་བྱ་བ་སོགས་རང་མགོ་རང་གིས་བསྐོར་བའི་བག་མེད་ཀྱི་སྤྱོད་པ་དེ་ལྟ་བུ་མི་རུང་བ་རྗེ་གཏེར་བདག་གླིང་པ་སོགས་ཚད་མའི་སྐྱེས་བུ་དག་གི་གསུང་མང་དུ་སྣང་བས་འཇིག་རྟེན་པའི་གཏམ་གྱིས་བཟླས་པ་བསླད་ཕྱིན་མི་ཚིག་གིས་བར་བཅད་པ་ཡིན་པས་ངག་ཤོར་བ་དང་ཁྱད་མེད་པའི་ཕྱིར་གསུང་། ལར་ལས་དང་པོ་པའི་ལྷ་སྔགས་ཏིང་ངེ་འཛིན་ལ་གཅུན་ཏེ་གསལ་སྣང་ཅི་ཐོན་ལ་འབད་ཅིང་། བཟླས་གྲངས་སོགས་ཞག་ཤས་ལ་མི་གཟུང་གསུངས། སྔགས་ཕྲེང་སྐོར་ཙམ་རེ་ནས་ལྷ་སྔགས་ཀྱི་ཏིང་འཛིན་གསལ་འདེབས་རེ་བྱ། སྟོང་ཕྲག་རེ་ནས་སྟོང་ཚིག་གིས་མཆོད་པ་བསྡུས་པ་རེ་བྱ། ཁམས་གཡེང་བ་སོགས་རླུང་གི་སྐྱོན་བྱུང་བ་སྟོང་ཚིག་གིས་མཆོད་པའི་སྐབས་སུ་བུ་རམ་མུར་བ་དང་། ཐུན་མཚམས་སུ་རུས་རྙིང་གི་ཐང་བརྟེན་པ་སོགས་བྱ། བཟླས་པའི་ལྕེ་དུབ་པ་སོགས་བྱུང་ན་ཇ་དཀར་གྱིས་སྐྱེམ་ཉུང་ངུ་རེ་གསོལ། ངག་འགྲོལ་དགོས་ཐུག་ན་ཐུན་བར་དུ་མཚམས་གཡོག་ལ་བཀག་ཆ་མེད་པ་དང་། མི་བྱ་དབང་མེད་བྱུང་ན་ཐུན་སྒང་དུ་བསྙེན་པའི་སྒྲ་མི་འཆད་བཞིན་དུ་སམ་ཊར་བསླབ་དོན་ཉུང་ངུ་གནང་ཞིང་། དེ་ཡི་རིང་ལ་འཕྲེང་བའི་

མཚམས་བཟུང་ནས་སྡོད་པ་ལས་བགྲངས་བར་མི་བྱ། མཚམས་ཁུང་དེར་སྔགས་དམིགས་འོག་ཏུ་མི་ཆུད་པའི་མི་ཕར་ལ་མཐོང་བའི་བུག་རལ་འཁྱམས་གསུམ་བགེགས་འཇུག་པའི་རྒྱུར་བཤད་པས་བག་ཡོད་པར་བྱའོ། །དེ་ལྟར་འགལ་རྐྱེན་སྤང་བ་དང་། མཐུན་རྐྱེན་བསྒྲུབ་པའི་ཚུལ་རགས་པ་ཞིག་བཤད་ནས། བསྙེན་པ་དངོས་གཞི་ཉམས་སུ་ལེན་པ་ལ། སྤྱིར་ཐུན་གྱི་རྣམ་གྲངས་ཏེ་ཐུན་གཉིས་མ་དང་། ཐུན་དྲུག་མ་དང་། ཐུན་བཞི་མ་སོགས་ལས་འདིར་ཨོ་རྒྱན་སྨིན་གྲོལ་གླིང་པའི་བཀའ་སྲོལ་ལྟར་ཐུན་བཞི་མ་བཤད་དེ། ཐོར་སྲོད་གཉིས། སྔ་དགོང་གཉིས་དང་བཞི་སྟེ་འོག་ཏུ་བསྙེན་པའི་སྐབས་རང་རང་གི་ཐད་དུ་ཤེས་པར་བྱ་ལ། ཐུན་བཞི་མ་འདི་ཡུན་རིང་ཐུང་འཚམས་པས་ཞེ་མི་སུན། ལྷ་ཡི་གསལ་སྣང་ལ་ཐང་ལྷོད་མི་འཆོར། ལྕེ་མི་དུབ་པས་སྔགས་ཀྱི་ཟུར་མི་ཉམས། མངོན་རྟོགས་ལན་བཞིར་བསྐྱལ་བས་བསྐྱེད་རིམ་བོག་ཐོན་ཐུན་མཚམས་སུ་ངག་འགྲོལ་ཆོག་པའི་ཐུན་གཙང་ཤིང་རང་ཡིད་ཆེས་པ་སོགས་ཡོན་ཏན་མང་དུ་ཡོད་ཅེས་གསུངས། དངོས་གཞི་བསྙེན་པ་ཚུག་རྒྱུའི་ཉིན་དང་པོ་དགོངས་ཐུན་ལ་བབ་པ་ན། དཀྱིལ་འཁོར་ཞལ་གང་དུ་ཕྱོགས་པ་དང་ཁ་སྤྲོད་ཡོངས་པའི་རང་ཉིད་བདེ་ཞིང་འབོལ་བའི་གདན་ལ་བདུད་རྩི་ལྔ་ཡིས་ཁ་ལག་དག་པར་བཀྲུ། བགྲང་འཕྲེང་དྲི་ཞིམ་པོའི་སྤོས་རུམ་བྱ་ཞིང་། རང་དཔའ་བོ་གཅིག་པའི་སྐུར་ལང་ནས་མཚམས་གཅོད་པ་རྙིང་མ་སྤྱི་གཞུང་ལྟར་ལས། འདིར་ན་རཀ་དོང་སྤྲུག་གི་ཆོ་གར་བཤད་པ། ༀ་བཛྲ་མ་ཧཱ་ཤྲི་ཧེ་རུ་ཀོ྅ཿརང་ཉིད་སྐད་ཅིག་གིས་རྡོ་རྗེ་ཧེ་རུ་ཀ་སྐུ་མདོག་སྔོན་པོ་ཁྲོ་བོའི་ཆས་ཅན། རྡོ་རྗེ་དང་དུང་ཁྲག་འཛིན་པ། ཞབས་གཉིས་རོལ་པའི་སྟབས་ཀྱིས་དྲེགས་པ་ཕོ་མོའི་སྟན་ལ་གནས། སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་འབར་

བའི་དབུས་ན་བཞུགས་པ། དེ་ཡི་ཐུགས་ཀར་ཉི་མ་ལ་གནས་པའི་ཧཱུྃ་གི་མཐར་རྩ་བའི་སྔགས་ཕྲེང་གཡས་སུ་འཁོར་བར་བསམ་ལ། བརྒྱ་རྩ་ལས་མི་ཉུང་བར་བཟླས་ཏེ། ལྷ་སྔགས་ཀྱི་ཏིང་ངེ་འཛིན་བརྟན་པའི་ངང་ནས། ཐུགས་ཀ་ནས་རཾ་ཡཾ་ཁཾ་འཕྲོས་པ་ཡེ་ཤེས་ཀྱི་མེ་རླུང་ཆུར་བྱུང་བས་གཙང་གཏོར་ངོ་བོ་བདེ་སྟོང་གི་ཡེ་ཤེས། རྣམ་པ་དཀར་གསུམ་གྱི་གཏོར་མ་མཛེས་དགུའི་བརྒྱན་པ། བཟང་དགུའི་ཚོགས་པ། མཁོ་དགུའི་འབྱོར་བ་རྒྱ་ནམ་མཁའི་མཐའ་དང་མཉམ་པ། རྒྱུན་འཁོར་བ་མ་སྟོང་བར་དུ་འབྱུང་བར་གྱུར་ཅིག །ༀ་ཨཱཿཧཱུྃལན་གསུམ། ཨ་ཀ་རོ་སོགས། ཧཱུྃ་གསུམ། སླར་ཡང་སྙིང་གའི་ཧཱུྃ་གི་འོད་ཟེར་གྱིས་དཔལ་གཙང་རིགས་ཀྱི་མགོན་པོ་བདུན་ཅུ་རྩ་ལྔ་སོགས་དཀར་པོའི་ཕྱོགས་ལ་མངོན་པར་དགའ་བའི་ཡུལ་ལྷ་གཞི་བདག་དཔུང་དང་བཅས་པ་སྔོན་གྱི་དམ་ཚིག་རྗེས་སུ་དྲན་ནས་བྱོན་པར་བསམ། ༀ་ད་ཤ་དྷིག་ལོ་ཀ་པཱ་ལ་བྷུ་མི་པ་ཏི་ས་པཱ་རི་༴ ཅེས་སྤྱན་དྲངས་ནས་གདན་ལ་བཞུགས་པར་བསམ། བཀའ་བརྒྱད་ནས། མགོན་པོ་ཀུན་གཤེགས་གདན་ལ་བཞུགས། །ད་ལྟ་སྙིགས་མ་ལྔ་ཡི་དུས། །ཤཱཀྱའི་བསྟན་པ་བསྲུང་བ་དང་། །བདག་ཅག་རྣམས་ལ་ཕན་པའི་ཕྱིར། །གནས་འདི་ཉིད་དུ་གཤེགས་སུ་གསོལ། །གོང་གི་སྔགས་དང་། པདྨ་ཀ་མ་ལ་ཡེ་སྟྭཾ། ༀ་ད་ཤ་༴ སོགས་མཐར། ༀ་ཨརྒྷཾ་ནས། ཤབྟའི་བར་དང་། སྔགས་དེའི་མཐར། ཨེ་དཾ་བྷ་ལིངྟ་ཁ་ཁ་ཁ་ཧཱི། གསུམ་གྱི་མཐར། དཔལ་མགོན་ཆེན་པོ་ཁྱེད༴ འགྲུབ་པར་མཛོད། ཅེས་གཏོར་མ་གཙང་སར་འབུལ་ཞིང་། ཕྱོགས་སྐྱོང་འཁོར་བཅས་རང་གནས་སུ་གཤེགས་པར་གྱུར། རྒྱས་པར་འདོད་ན་བཀའ་བརྒྱད་ཆ་གསུམ་ལྟར་བྱ། དཀར་གཏོར་གཉིས་པ་གཞི་བདག་ལ་བསྔོ་བ་སྟེ། སྤྱིར་ཤ་ཁྲག་དང་དམར་རྩི་མ་འདྲེས་པ་ཐམས་ཅད་ལ་དཀར་གཏོར་གྱི་སྒྲ་འཇུག་མོད།

འོན་ཀྱང་ཕྱོགས་སྐྱོང་ལ་ཅོག་ལྡོག་དང་། གཞི་བདག་ལ་ད་ལྟ་ཐམས་ཅད་དཀར་གཏོར་དུ་འདོགས་ལ་ཆགས་མེད་རིན་པོ་ཆེས་ཀོ་ཚེ་གཏོར་མའི་རྩེ་ལྔར་འདོད་པ་འདབ་བཞི་རྩེ་དང་ལྔ་པ་འདི་ཉིད་འབུལ་བའི་ཕྱག་ལེན་ལྟར་ན་བསང་སྦྱངས་དང་། མགྲོན་འགུགས་པ་སོང་ནས། བླ་མ་དགོངས་འདུས་ཀྱི་ན་མོ་རྐང་གཉིས་མའམ། འཇའ་ཚོན་པའི་ལུགས་སུ་འདོད་པའི། ཧྲི་ལྷ་ཀླུ་གནོད་སྦྱིན་སོགས། གང་བདེས་འབུལ་བའི་མཐར། བྷཱུ་མི་༴ ཁ་ཧཱི། གཞི་བདག་ཆེན་པོ་༴ གོང་ལྟར་དང་། སངས་རྒྱས་ཀྱི་བསྟན་པ་རིན་པོ་ཆེ་ཆོས་བཞིན་དུ་སྐྱོང་བའི་གཞི་བདག་དཀར་པོའི་ཕྱོགས་ལ་མངོན་པར་དགའ་བ་ཁྱེད་རྣམས་ཀྱིས་གཙང་སྦྱར་འདོད་ཡོན་ལྔ་ལྡན་གྱི་གཏོར་མ་རྒྱ་ཆེན་པོ་འདི་བཞེས་ལ། ས་ཡི་ཕྱོགས་འདིར་རྡོ་རྗེའི་རིག་པ་འཛིན་པ་བདག་གིས་རྒྱལ་བ་ཞི་ཁྲོ་རབ་འབྱམས་ཀྱི་བསྙེན་བསྒྲུབ་ཟབ་མོའི་ལམ་ཉམས་སུ་ལེན་པ་ལ་ཕྱི་ཡི་བར་ཆད་ནང་དུ་མ་གཏོང་། ནང་གི་དངོས་གྲུབ་ཕྱིར་མ་གཡེལ། ལས་ཕྱི་ནང་གཉིས་ཀྱི་སྲུང་མ་མཛོད་ལ་ཆོས་དང་མཐུན་པའི་སྡོང་གྲོགས་རྒྱ་ཆེན་པོ་མཛོད་ཅིག །ཅེས་བརྗོད་ལ་གཏོར་མ་གཙང་སར་དོར། གཞི་བདག་འཁོར་བཅས་རང་གནས་སུ་གཤེགས་པར་གྱུར། ཅེས་བརྗོད། སྔོན་གཏོར་གསུམ་པ་བགེགས་གཏོར་ནི། ཞི་ཁྲོ་རང་གཞུང་གི་བཀའ་བསྒོ་བྱས་ཀྱང་ཆོག་མོད། འདིར་རྫོགས་ཆེན་གོང་མའི་བཀའ་སྲོལ་ལྟར། ཧཱུྃ་ཕྱོགས་བཞི་མཚམས་བརྒྱད་ཀྱི་མགྲོན་འགུགས་པ་ནི། ལྷ་ཡི་ང་རྒྱལ་དང་གཟི་བྱིན་གྱིས་དགུག་ལ། སླར་བདེན་སྟོབས་དྲག་པོས་འགུགས་པ་ནི། ན་མོ། རིག་འཛིན་རྩ་རྒྱུད་ཀྱི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། ཞི་བ་རྡོ་རྗེ་དབྱིངས་ཀྱི་ལྷ་བཞི་བཅུ་རྩ་གཉིས་རྒྱལ་བའི་དཀྱིལ་འཁོར། དཔལ་ཆེན་པོ་རྡོ་རྗེ་སྲིན་པོ་མི་བཟད་པ་ཆེ་མཆོག་ཁྲོ་བོའི་དཀྱིལ་འཁོར་

འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱི་ལྷ་ཚོགས་རྣམས་ཀྱི་བདེན་པ་དང་། རིག་འཛིན་དཔའ་བོ་མཁའ་འགྲོ་སྲུང་མ་དམ་ཅན་སྡེ་བདུན་དང་བཅས་པ་རྣམས་ཀྱི་བདེན་པའི་མཐུས། དེང་འདིར་གསང་སྤྱོད་རྡོ་རྗེའི་ཕོ་བྲང་འདིར་བལྟ་བར་མི་དབང་བའི་འབྱུང་པོ། མི་མིན་མི་རུ་བརྫུ་བ། ལྷ་མིན་ལྷ་རུ་བརྫུ་བ། དཀྱིལ་འཁོར་གྱི་མདངས་འཕྲོག་པ། མར་མེའི་འོད་སྒྲིབ་པ། བདུད་རྩིའི་ངད་ལེན་པ། དཔལ་བཤོས་ཀྱི་རྩེ་སྙིལ་བ། རཀྟའི་དྲི་ལ་སྣོམ་པ། ཐར་བ་དང་ཐམས་ཅད་མཁྱེན་པའི་བྱང་ཆུབ་བསྒྲུབ་པ་ལ་བར་དུ་གཅོད་པའི་གདོན་བགེགས་དམ་སྲི་འབྱུང་པོ་ཐམས་ཅད་སྐད་ཅིག་ཉིད་ལ་མཆོད་སྦྱིན་གཏོར་མ་འདི་ཡི་མགྲོན་དུ་ཁུག་ཅིག །ལན་གསུམ་བརྗོད། ༀ་བཛྲ་ཊཀྐཱི་རཱ་ཛ་ཧཱུྃ་ཛ་ཨ་ཀར་ཥ་ཡ་ཛ༔ བརྗོད། སླར་ཡང་། མཐོ་སྲིད་པའི་རྩེ་མོ་མན་ཆད། མནར་མེད་པའི་རྡོ་རྗེ་དམྱལ་བ་ཡན་ཆད། མཐོ་ནམ་མཁའི་ལྷ་བྲན་མན་ཆད། དམའ་ས་འོག་ལྟོ་འཕྱེ་ཡན་ཆད། མཐོ་པེ་དཀར་རྒྱལ་པོ། དམའ་གྲོང་རྒྱུག་འདྲེ་མོ། སྣང་ཞིང་སྲིད་པའི་ལྷ་མ་སྲིན་སྡེ་བརྒྱད་ནམ་མཁའ་བར་སྣང་ས་གཞི་མི་མངོན་དམར་ནག་ཁྲོམ་དུ་འཚོགས་ནས་ལག་གཉིས་བཟེད་པའི་ཕྱག་རྒྱ་དང་བཅས། བདག་ཉིད་དཔལ་ཆེན་པོའི་གཟི་བརྗིད་ལྟར་མི་བཟོད་པས་གདོང་སྨད་དེ་མིག་ས་ལ་ཕབ་ནས་འཁོར་བར་བསམ་ལ། གཏོར་མ་སྨུག་རྩི་ཤ་ཁྲག་གིས་བརྒྱན་པ་བྱིན་གྱིས་བརླབས་ནས་ལན་གསུམ་བསྐོར་ཏེ་སྟོབས་པའི་ཚུལ་གྱིས། ༀ་སརྦ་བིག་ནན་ཨེ་དཾ་བྷ་ལིངྟ་ཁ་ཁ་ཁ་ཧཱི། ལན་གསུམ། ཧཱུྃ་ཉོན་ཅིག་བགེགས་དང་སོགས། མཐར་བདེན་སྟོབས་བརྗོད་ལ་གཏོར་མ་ཕྱིར་དོར། དྲག་སྔགས་གུ་གུལ་ཡུངས་ཐུན་རོལ་མོའི་མཚམས་རྔམས་དང་བཅས་པས་བགེགས་བསྐྲད་པའི་ཆོ་ག་ནན་ཏན་བྱའོ། །དེ་རྗེས་སྒོ་དྲུང་དུ་ཐོ་དཀར་པོ་བརྗིད་ཅན་བརྟན་

ཆགས་པ་བརྩིགས་ལ་རྒྱལ་པོ་ཆེན་པོ་སྡེ་བཞིའི་སྐུ་གཟུགས་བཙུག་ལ། རང་མཐུན་གྱི་གཏོར་མ་བཞིའམ་གཅིག་གིས་ཀྱང་མི་རུང་བ་མེད་པས་ཐོ་ཡི་མདུན་དུ་སྟེགས་ལ་བཤམས། རང་ཉིད་དཔལ་ཆེན་པོའི་ཐུགས་ཀའི་ཧཱུྃ་གི་འོད་ཟེར་གྱིས་རི་རབ་ལྷུན་པོའི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་རང་རང་གི་རིགས་དང་སྡེ་ཆེན་དཔུང་དང་བཅས་པ་བྱོན་ནས་ཐོ་རི་རབ་ཏུ་གསལ་བའི་ཕྱོགས་བཞིར་འཁོད་པར་བསམ་ལ། བཀའ་བརྒྱད་ནས། ཧཱུྃ་རི་རབ་གླིང་བཞིའི་ཕྱོགས་བཞི་ནས། །ཕྱག་ན་རྡོ་རྗེའི་དབང་གི་མཐུས། །རྒྱལ་པོ་ཆེན་པོ་སྡེ་བཞི་པོ། །སངས་རྒྱས་བསྟན་པ་བསྲུང་བ་དང་། །བདག་ཅག་རེ་བ་སྐོང་བའི་ཕྱིར། །མ་དག་རྣམས་ལ་མཚམས་ཆོད་ཅིག །ཧཱུྃ་རི་རབ་ཆེན་པོའི་ཕྱོགས་བཞི་ནས། །རྒྱལ་པོ་ཆེན་པོ་སྡེ་བཞི་པོ། །ཕྱི་མཚམས་བསྲུངས་ཕྱིར་སྤྱན་འདྲེན་ནོ། །འཁོར་དང་བཅས་པ་གཤེགས་སུ་གསོལ། །ༀ་དྷིཥྛ་༼དིཥྚ་༽རཱ་ཛཱ་ཡ། ༀ་བེ་རུ་ཏ་ཀ་ཡ། ༀ་བེ་རུ་བཀྵ་ཡ། ༀ་བཻ་ཤྲཱ་མ་ཎ་ཡེ་བཛྲ་ས་མ་ཡ་ཛཿཛཿཅེས་ལན་བདུན་བཟླས་ནས་དམ་ལ་བཞག །རྒྱལ་ཆེན་བཞི་ཡི་ལྗགས་ཧཱུྃ་ལས་སྐྱེས་པའི་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྦུ་གུས་གཏོར་མ་བདུད་རྩིའི་རང་བཞིན་དྲངས་ནས་གསོལ་བར་བསམ། ༀ་དྷིཥྛི་༼དིཥྚ་༽རཱ་ཛ༴ མ་ཎ་ཨེ་དམ་བྷ་ལིངྟ་ཁ་ཁ་ཁ་ཧཱི། ལན་བདུན་གོང་གི་སྔགས་མཐར། ཨརྒྷཾ་སོགས་ཤབྟ་པྲ་ཏི་ཙྪ་ཨཱ་ཧཱུྃ། སརྦ་པཉྩ་ཨམྲྀཏ་ཁ་ཧཱི། བསྟོད་པ་ནི། ཧཱུྃ་གསང་བདག་ཕྱག་ན་རྡོ་རྗེའི་བཀའ་འཁོར་ནས། །སྟོན་པའི་བཀའ་ཉན་འཇིག་རྟེན་སྐྱོང་མཛད་ཅིང་། །རང་གི་འཁོར་རྣམ་སྐྱོང་བར་དམ་བཅས་པའི། །རྒྱལ་ཆེན་འཁོར་དང་བཅས་ལ་ཕྱག་འཚལ་བསྟོད། །དཔལ་ལྡན་རྒྱལ་པོ་ཆེན་པོ་སྡེ་བཞི་པོ། །ལས་བཞིའི་རང་རྟགས་དཀར་སེར་དམར་ལྗང་མདོག །མཆོད་དང་གཏོར་མ་བཅས་པ་འདི་བཞེས་

ལ། །ཕྱོགས་བཞིའི་འཁོར་གྱི་གདོན་ཚོགས་མཚམས་ཆོད་ཅིག །ༀ་མ་ཧཱ་ར་ཛ་ཙ་ཏུར་ཨེ་དཾ་བ་ལིངྟ་ཨམྲྀཏ་ཁ་ཁ་ཁ་ཧཱི། ཕྲིན་ལས་བཅོལ་བ། ཧོ་ཕྱི་ལྟར་ན་རྒྱལ་པོ་ཆེན་པོ་སྡེ་བཞི། ནང་ལྟར་ན་བཅོམ་ལྡན་འདས་རྒྱལ་བ་རིགས་བཞི། གསང་བ་ལྟར་ན་དཔལ་ཆེན་པོ་ཁྲག་འཐུང་རིགས་བཞིར་ངེས་པའི། རྒྱལ་ཆེན་སྡེ་བཞི་འཁོར་དང་བཅས་པ་ཁྱེད་རྣམས་ལ་ཕྲིན་ལས་བཅོལ་བ་ནི། བདག་ཅག་རིག་པ་འཛིན་པའི་རྒྱལ་བ་ཞི་ཁྲོ་རབ་འབྱམས་ཀྱི་བསྙེན་བསྒྲུབ་ཟབ་མོ་འདི་དབུ་བཙུག་ནས་མཇུག་མ་རྫོགས་ཀྱི་བར་དུ་ཕྱི་ཡི་བར་ཆད་ནང་དུ་མ་བཏང་། ནང་གི་དངོས་གྲུབ་ཕྱིར་མི་བཏང་བའི་ཕྲིན་ལས་མཛོད་ཅིག །ཐོ་རི་རབ་དུ་གྱུར་པའི་ཕྱོགས་བཞིར་རིན་པོ་ཆེའི་ཕོ་བྲང་བཞིར་རང་རང་གི་སྐུ་གཟུགས་དང་དབྱེར་མེད་པར་བཞུགས་ནས་བསྒོ་བའི་ལས་རབ་འབྱམས་ཐོག་མེད་དུ་བསྒྲུབ་པར་བསམ་ལ། ༀ་ཡེ་དྷརྨ་སོགས། ༀ་སུ་པྲ༴ སོགས་བརྟན་པར་བྱ་ལ་མེ་ཏོག་འཐོར། དེ་དག་ནི་ཕྱི་མཚམས་བཅད་པའོ། །དེ་ནས་ནང་མཚམས་བཅད་པ་ནི། སླར་ཡང་རང་དཔའ་བོ་གཅིག་པའི་ང་རྒྱལ་བརྟན་བཞིན་པའི། བགེགས་གཏོར་བསང་སྦྱང་བྱ་ཞིང་། བཀའ་བསྒོ་བགེགས་བསྐྲད། ཡུངས་ཐུན། གུ་གུལ་དྲག་སྔགས་རོལ་མོ་དང་བཅས་པའི་མཚམས་རྔམས་སུ་བྱ་ཞིང་། འདི་ལ་བླ་མ་ལ་ལས། རྒྱལ་ཆེན་ཐོ་འཛུག་རྗེས་ནས་བགེགས་གཏོར་གཏོང་བ་མི་རིག །ཐོ་ནང་དུ་བགེགས་འབོད་མི་རུང་བའི་ཕྱིར་ཟེར། འདི་ལ་རྗེ་གཏེར་བདག་གླིང་པས། ཕྱི་ནང་གི་མཚམས་བཅད་ནས་བསྲུང་འཁོར་བསྒོམ་པ་འདི་བསྙེན་པ་གྲོལ་རྒྱུའི་ཐུན་ཐ་མའི་བར་མི་བསྡུ་ཞེས་གསུངས་ཤིང་བགེགས་ལྟ་ཅི། བཀའ་སྲུང་དམ་ཅན་ལ་གཏོར་མ་གཏོང་བ་དང་། དཀྱིལ་འཁོར་གྱི་བདག་པོ་གང་ཡིན་པ་ལ་རང་འདྲའི་དཔའ་བོ་གཅིག་པ་ཞིག་སྤྲོས་ནས་ཕྱི་

ཡི་དུར་ཁྲོད་དུ་སོང་ནས་གཏོར་མ་སྦྱིན་པར་བཤད་པས། དེ་ཡི་རིགས་པས་བསྲུང་འཁོར་རྒྱབ་ཏུ་བགེགས་ལ་ལན་ཆགས་གཏོར་མ་གཏོང་བ་བསྟན། དེ་ལྟར་མིན་ཀྱང་རང་ཡི་དམ་ལྷ་ཡི་ང་རྒྱལ་དྲག་པོའི་རྣམ་འགྱུར་བསྟན་ཡང་ཐུགས་སྙིང་རྗེས་བརླན་པའི་ལྷ་སྔགས་ཏིང་འཛིན་གྱི་བྱིན་གྱིས་རླབས་ནས་བསྔོས་པའི་བདེན་སྟོབས་མཐུ་བྱིན་གྱིས་ནམ་ཡང་མི་བསླུ་བས་ལྷ་འདྲེ་ཡིད་ཀྱི་གཟུགས་ཅན་རྣམས་ཚིམས་ནས་རྒྱུད་གྲོལ་ནུས་པའི་ཕྱིར་གཟུགས་ཅན་གྱི་མི་ལྟར་ཐོ་ནང་གམ་དུ་བོས་ནས་གཏོར་མ་ལག་ཏུ་མ་བཞག་པར་མི་ཐོབ་པར་ག་ལ་ཡིན་ཏེ། ན་མོ་བདག་གི་བསམ་པའི་ཞེས་པ་ལ་སོགས་པ་སོམ་ཞིག །འཁོར་བ་ཐོག་མེད་ནས་ལན་ཆགས་ཀྱིས་འབྲེལ་བའི་འབྱུང་པོ་ལ་བགེགས་གཏོར་ཡང་ཡང་བསྔོ་བ་གལ་ཆེ་འདུག་པ་ནི། རྗེ་གཏེར་བདག་གླིང་པའི་གསུང་ཚད་མ་ལས་མཐོང་ངོ་། །དེ་ནས་ཉིན་སྔ་མའི་དགོངས་ཐུན་ལས་བྱང་རྒྱས་བསྡུས་སོགས་སྐབས་དང་བསྟུན་ལ། རྒྱས་པའི་དབང་དུ་བྱས་ན། བཀའ་བསྒོ། བསྲུང་འཁོར་ཡན་ལག་བཅུ་པ་ཕྱག་རྒྱ་བཟུང་བ། མཆོད་པ་བྱིན་རླབས། ཏིང་འཛིན་རྣམ་གསུམ། ལྷ་བསྐྱེད་ནས་བཤགས་པ་ཡན་ཆད་དཀྱུས་བཞིན་བཏང་ནས། དངོས་གཞི་བསྙེན་པ་ལ་འཇུག །དེ་ལ་རང་བཞིན་གྱི་ཕྱག་ལེན་རྣམས་ན་ཡམ་དུ་བཀོད་པ་དང་། རང་གི་བློས་བཏགས་པའི་འདོད་ཚུལ་བཀོད་པ་གཉིས། དང་པོ་ནི། གོང་གི་རྗེས་སུ་ཛ྄བ་ཀྱི་དགོངས་པ་གསལ་འདེབས་པ་ལ། དགོངས་པ་རང་གྲོལ་རང་གཞུང་གི །ཛ྄བ་འདི་ཞེས་ཐེམ་བྱང་དུ་མི་གསལ་བ་དང་། བཀའ་བབ་ཆེན་པོའི་གསུངས་ཡིན་པར་བཤད་པའི་ཐེམ་བྱང་རྣམ་གྲངས་རང་གྲོལ་དུ་ཛ྄བ་དགོངས་ཟེར་བ་ཞིག་སྣང་བ་ནི། ད་ལྟ་བསྐྱེད་རིམ་སོར་གཞུང་ན་ཛ྄བ་དགོངས་གྲགས་སྟོང་བཟླས་ཚད་རང་གྲོལ་ཟེར་བ་འདི་ཡིན་པར་སྣང་། འདི་

སྟག་བླ་པདྨ་མ་ཏིས་བླ་མ་དགོངས་འདུས་ཀྱི་ཛ྄བ་ཞི་ཁྲོ་ལ་ཁ་སྒྱུར་མར་གྲགས་པས། དགོངས་པ་རང་གྲོལ་གཏེར་གཞུང་གི་ཛ྄བ་ཡིན་པར་མ་གོ་ཞིང་། དགོངས་པ་རང་གྲོལ་བསྐྱེད་རྫོགས་ཀྱི་པུ་ཏི་གཉིས་ཡོད་པ་དུས་གསུམ་མཁྱེན་པའི་གཞུང་། གཏེར་གཞུང་འཁྲུལ་མེད་དང་། བཀའ་བབས་ཆོས་བདག་ཆོས་ཀྱི་ཁ་བསྐང་ཐམས་ཅད་ཐེམ་བྱང་དུ་དཀྱུས་གཅིག་ཏུ་བཀོད་འདུག་པས་དཔྱད་མི་བཟོད་པར་སྣང་། ད་ལྟ་ཀ་སྟག་གསེར་གསུམ་གྱི་ཆོས་བརྒྱུད་འཛིན་ནོ་ཅོག་གི་ཛ྄བ་གཞུང་བཟླས་ཚད་རང་གྲོལ་བླ་མ་དགོངས་འདུས་ཁ་བསྒྱུར་བ་འདི་ཡིན་པར་འདུག །ཞི་ཁྲོ་རང་གཞུང་ན་ཛ྄བ་ཆོག་ཞིག་ཡོད་ན་གཞན་གྱི་བསླད་དོན་ཅི་ལ་ཡོད། དེ་མེད་ན་ཉི་ཟླ་གཉིས་དང་བཀའ་བབས་གསུམ་གྱི་ཞལ་འཕང་འཁྲུལ་མེད་བྱུང་ན་གཙོ་ཆེ་མོད། གཞན་རྗེས་འཇུག་རྣམས་ཀྱི་རང་རང་གི་བཞེད་གཞུང་མང་པོ་བཀོད་སྣང་ནའང་། དགོངས་འདུས་ཛ྄བ་བསྒྱུར་འདི་ལས་གྲགས་པ་ནི་མ་མཐོང་ངོ་། །འཇིག་རྟེན་ལུགས་ཀྱི་ཞེན་ཕྱོགས་ལྟར་ན་རང་རེའི་བླ་མ་དགོན་པའི་ཕྱག་བཞེས་ཁས་ལེན་དགོས་པར་སྣང་ནའང་། འདི་ལའང་རྫོགས་ཆེན་རིག་འཛིན་གོང་མ་རྣམས་དབང་ལུང་ཆགས་མེད་རིན་པོ་ཆེ་ནས་བརྒྱུད་པ་གནས་མདོ་ལུགས་སུ་ཁས་ལེན་པར་སྣང་ཡང་། ཆོ་ག་ལ་ངེས་པ་ཅི་ཡང་མ་མཆིས་ཤིང་། ཁྱད་པར་ཛ྄བ་ལ་གྲུབ་པའི་དབང་ཕྱུག་ཆེན་པོའི་དུས་བདག་བསྐྱེད་བསྙེན་པར་འདོད་པའི་བག་ཆགས་རང་གྲོལ་ལྟར་རྡོ་རྗེ་སེམས་དཔའ་བསྒོམ་ནས་ཡིག་བརྒྱ་འབའ་ཞིག་བཟླ་ཞིང་། ལས་བྱང་མདུན་བསྐྱེད་དུ་བྱས་ནས། དེའི་བཟླས་པ་བཏགས་གྲོལ་བཟླ་ཞེས་དབུ་ཆེན་རྒན་པ་ཚོའི་གསུང་ལས་ཐོས་པ་དང་། ཡང་སློབ་དཔོན་རིན་པོ་ཆེའི་དུས། ཐུན་བཞིའི་རྣལ་འབྱོར་གྱི་བླ་མ་བརྒྱུད་པའི་གསོལ་འདེབས་ཐོག་མའི་

མགོན་པོ། ཞེས་བཏང་ནས། བླ་མ་དགོངས་འདུས་ཀྱི་བསྙེན་པའི་ཛ྄བ་དགོངས་སུ་བཤད་པའི། བདག་ཉིད་ལྷ་ཡི་ཐུགས་ཀྱི་རྩེ་མོ་གྱེན་ལ་ཞེས་པས་གསལ་བཏབ་ནས། །ཧཱུྃ་བཛྲ་ཙིཏྟ་ཨཿསོགས་ཛ྄བ་རིང་ཚར་གསུམ་དང་མཐར་ཞི་བ་རིགས་ལྔའི་ཡིག་བརྒྱ་དང་། དབྱངས་གསལ། མཆོད་བསྟོད་བྱེད་པར་བཤད། སྐྱབས་མགོན་རིན་པོ་ཆེ་རྗེ་བླ་མ་མཚན་བརྗོད་པར་དཀའ་བ་དེ་ཡི་སྐུ་ཚེའི་སྟོད་ལ་གོང་ལྟར་དང་བར་སྐབས་ཞིག་ནས། གསོལ་འདེབས་དང་། དེ་ནས་རང་རང་གི་ཐུགས་ཀར་ཞི་བའི་ལྷ་ཚོགས་རྣམས་དང་། མདུན་བསྐྱེད་ཞི་ལྷའི་སོགས་ཀྱི་ཛ྄བ་དགོངས་དང་། བྷོ་དྷི་ཙིཏྟ་བཟླ་ཞིང་། བུམ་པར་དེ་ནས་རང་གི་ཐུགས་ཀ་ནས། ཞེས་བཏང་། ཛ྄བ་རིང་མཐར། མཆོད་བསྟོད་བཞུ་བསྡུ་སོགས་དང་། ད་ལྟ་ནི་བླ་མ་དཔོན་རྒན་བཞེད་པ་ཐམས་ཅད་ཉམས་ལེན་འདི་ལྟར་ལགས་པས་རང་ལུགས་ལའང་ལག་ལེན་འདི་ལེགས་སྙམ་པའི་ཁོ་ཐག་ཆོད་པ་ཞིག་བྲི་རྒྱུ་མ་རྙེད་ལ། འོན་ཀྱང་རང་བཟོས་བསླད་པ་ནི་ཅི་ལྟར་སྤོབ། འདིར་རྡོ་རྗེ་ཐེག་པ་སྔགས་རྙིང་མ་བཀའ་གཏེར་དག་སྣང་གསུམ་ལས། གཏེར་མ་ཐམས་ཅད་ཀྱི་ཕྱི་མོ་ཡིད་ཆེས་པའི་ཁུང་བླ་མ་དགོངས་འདུས་ཀྱི་ཛ྄བ་དགོངས་ཚངས་པའི་ང་རོ་དང་། བཀའ་བརྒྱད་བདེ་གཤེགས་འདུས་པའི་དབང་གི་མཛད་བྱང་ནས་བཤད་པ་གཉིས་ཀྱི་ལེགས་ཆ་བསྡེབ་ནས་འདིར་བྲི་བར་བྱ་སྟེ། སྤྱིར་བླ་མ་དགོངས་འདུས་སོགས་ནས་ཛ྄བ་ཀྱི་ལས་རིམ་དགུ་སོགས་བཤད་ཀྱང་སྤྲོས་པ་དོར་ནས། འདིར་བསྙེན་པར་མཁོ་བའི་གཅེས་གནད། ཛ྄བ་དགོངས་བཞི་དང་། ལམ་ཁྱེར་གསུམ་གྱི་ཆིངས་སུ་བསྡུས་ན། ཛ྄བ་དགོངས་བཞི་ནི་བསྙེན་པར་བསྔགས་པ་ཟླ་བ་སྐར་མའི་ཚོགས་ཀྱིས་བསྐོར་བའི་ཛ྄བ་དགོངས། ཉེ་བསྙེན་ལ་བསྔགས་པ་འགལ་མེའི་འཁོར་ལོ་ལྟ་བུ། རྒྱལ་པོ་ཕོ་ཉ་འགྱེད་པ་ལྟ་བུ་

བསྒྲུབ་པའི་ཛ྄བ་དགོངས། བུང་བ་ཚང་བཤིག་པ་ལྟ་བུ་ལས་སྦྱོར་ལ་བསྔགས་པ་བཞི་སྟེ། དེ་ལས་སྔར་སྒོམ་རིམ་དུ་གསལ་བཏབ་པའི་དཀྱིལ་འཁོར་བའི་ལྷ་ཐམས་ཅད་ཛ྄བ་ཀྱི་དཔུང་རོགས་སུ་བསྐུལ་བ་ནི། བླ་མ་དགོངས་འདུས་ནས། ཧཱུྃ་དུར་ཁྲོད་གསང་ཆེན་རོལ་པའི་དཀྱིལ་འཁོར་ནས། །ཐབས་ཤེས་ཉི་ཟླ་མ་ཆགས་པདྨའི་གདན། །གཙོ་བརྒྱད་དར་ཟབ་རིན་ཆེན་ཁྲི་རྐང་དུ། །དུས་གསུམ་རྒྱལ་བ་འདུས་པའི་སྐུ་གསུང་ཐུགས། །བླ་མ་ཡི་དམ་ཞི་ཁྲོ་འཁོར་དང་བཅས། །ཡབ་ཡུམ་འཁོར་དང་བཅས་པའི་ཆ་ལུགས་ནི། །འབར་བ་ཞི་དང་ཁྲོ་སོགས་གར་དགུར་བསྒྱུར། །བརྗིད་པའི་སྐུ་ལ་རང་རང་ཆས་རྣམས་རྫོགས། །ཛ྄བ་ཀྱི་རྒྱུན་གསུང་ཆོས་ཀྱི་སྒྲ་དབྱངས་སྒྲོག །འཕོ་འགྱུར་མེད་པའི་ཐུགས་མཆོག་ཡེ་ཤེས་སེམས། །ཡི་དམ་དཀྱིལ་འཁོར་ལྷ་ཚོགས་འཁོར་བཅས་ལ། །ཕྱག་འཚལ་མཆོད་བསྟོད་དབང་དང་དངོས་གྲུབ་སྩོལ། །ཧཱུྃ་ལོངས་སྐུ་གསལ་དག་ཐིག་ལེའི་གཞལ་ཡས་དབུས། །སེང་གེ་གླང་རྟ་རྨ་བྱ་ཤང་ཤང་ཁྲི། །འཁོར་ལོ་རྡོ་རྗེ་རིན་ཆེན་པདྨ་དང་། །རྒྱ་གྲམ་ཉི་ཟླ་པདྨ་གེ་སར་སྟེང་། །ཞི་དང་ཁྲོ་བོར་སྟོན་པའི་ཡི་དམ་ལྷ། །བདེ་སྟོང་ལྷན་སྐྱེས་སོ་སོའི་ཡུམ་དང་བཅས། །གར་གྱི་ཉམས་ལྡན་སྐུ་ལ་རྒྱན་རྣམས་རྫོགས། །གསུང་གི་སྙིང་པོ་ཛ྄བ་དབྱངས་འབྲུག་ལྟར་སྒྲོག །ཐུགས་ནི་སྒྲོལ་གྱུར་སྲོག་བཅས་ཡེ་ཤེས་སེམས། །ཛ྄བ་ཀྱིས་རྒྱུད་བསྐུལ་རྡོ་རྗེ་སྐུ་གསུང་ཐུགས། །ༀ་གྱིས་སྤྲོས་པའི་སྟོང་གསུམ་སྐུ་ཡི་གང་། །ཨཿ་ཡིས་བསྐུལ་པའི་སྔགས་དབྱངས་ཛ྄བ་སྒྲ་སྒྲོགས། །ཧཱུྃ་གིས་དམིགས་པའི་མི་གཡོ་ཏིང་འཛིན་བརྟན། །སྐུ་གསུང་ཐུགས་མཆོག་ཡི་དམ་ཞི་ཁྲོའི་ལྷ། །མ་གསལ་བར་དུ་བསྐྱེད་ཅིང་འབད་པས་བསྒོམ། །མ་འགྲུབ་བར་དུ་ཏིང་འཛིན་མི་གཏོང་ངོ་། །ཞེས་རྩེ་གཅིག་དྭངས་བས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་

ལ་གསོལ་བ་བཏབ་ནས་ཐུགས་དམ་བསྐུལ། དེ་ཡི་དོན་ལམ་འཁྱེར་ཅི་ལྟར་བྱ་ན། ཕྱི་སྣོད་ཞི་ཁྲོ་དབྱེར་མེད་ཕོ་བྲང་ཆེན་པོར། འོག་ཞི་བ་རྡོ་རྗེ་དབྱིངས་ཀྱི་ལྷ་རིགས་ལྔ་ཚོམ་བུའི་ལྷ་ཐམས་ཅད་ཞི་བའི་ཚུལ་དགུ་དང་ལྡན་པ། ཐུབ་པ་དྲུག་ཚངས་པར་སྤྱོད་པ། སྒོ་སྲུང་ཡབ་ཡུམ་ཁྲོ་བོའི་ཉམས། རང་རང་གི་སྟེང་གི་ནམ་མཁར་ཆོས་དབྱིངས་མེ་རི་འབར་བར་ཁྲག་འཐུང་ཁྲོ་བོའི་ལྷ་ཐམས་ཅད་གར་གྱི་ཉམས་དགུ་སོགས་ཁྲོ་ཚུལ་དྲུག་ཅུ་རེ་བརྒྱད་རྫོགས་པའི་སྟེང་འོག་བར་གསུམ་བླ་མ་ཡི་དམ་སངས་རྒྱས་དང་བྱང་སེམས་དཔའ་བོ་རྣལ་འབྱོར་མའི་ཚོགས་ཀྱིས་གང་ནས། དེ་ཐམས་ཅད་སྐུ་བརྗིད་པའི་ཉམས། གསུང་ཛ྄བ་ཀྱི་སྒྲ་དབྱངས། ཐུགས་འགྲོ་བ་སྒྲོལ་བའི་སྙིང་རྗེ་དང་བཅས་པས། ཛ྄བ་ཀྱི་སྒྲ་སྒྲོགས་པའི་ལྷ་ཚོགས་ཐམས་ཅད་ཀྱི་སྐུ་གསུང་ཐུགས་ཀྱི་རྒྱུད་བསྐུལ་ཞིང་། ཁྱད་པར་དཔྲལ་བའི་ༀ་ལས་ༀ་དཀར་པོ་གྲངས་མེད་པ་འཕྲོས། སྟོང་གསུམ་འཇིག་རྟེན་ཀྱི་ཁམས་ཐམས་ཅད་རང་འདྲ་བའི་སྐུ་ཡི་གང་ནས་ཏིལ་གྱི་གང་བུ་ཁ་ཕྱེ་བ་ལྟར་བསམ། མགྲིན་པའི་ཨ་ལས་ཨ་དམར་པོ་གྲངས་མེད་པ་སྤྲོས། ལྷ་ཐམས་ཅད་ཀྱི་མགྲིན་པར་ཕོག་པས་ཞལ་ནས་ཛ྄བ་ཀྱི་ཆོས་སྒྲས་སྟོང་གསུམ་གང་བར་བསམ། ཐུགས་ཀའི་ཧཱུྃ་ལས་ཧཱུྃ་སྔོན་པོ་བསམ་གྱིས་མི་ཁྱབ་པ་འཕྲོས། སྤྲོ་བ་དང་བསྡུ་བའི་ལྷ་རྣམས་ཀྱི་ཐུགས་ཀར་ཕོག །སོ་སོའི་ཐུགས་སྲོག་ཧཱུྃ་ལ་ཐིམ་པས་གཟི་བརྗིད་འོད་ཕུང་གི་མི་གཡོ་ཞིང་བརྟན་པར་བསམ། ཛ྄བ་བསྐུལ་གྱི་གོ་དོན་དེ་ལྟར་ཤེས་པར་བྱ་ཞིང་། ཛ྄བ་དངོས་ལ་སྒོམ་དོན་དམིགས་པ་ནི། ཀུན་མཁྱེན་ཆེན་པོ་རྡོ་རྗེ་གཟི་བརྗིད་ཀྱིས་བཞེད་པ་ལྟར། རང་དཀྱིལ་འཁོར་གྱི་གཙོ་བོ་རྣམ་པར་སྣང་མཛད་དཀར་པོ་མཉམ་བཞག་གི་ཕྱག་རྒྱས་ཆོས་ཀྱི་འཁོར་ལོ་བསྣམས་པ་ཡུམ་ནམ་མཁའི་དབྱིངས་ཕྱུག་མ་དང་འཁྲིལ་

སྦྱོར། ཞབས་རྡོ་རྗེ་དཀྱིལ་ཀྲུང་གིས་སེང་གེའི་ཁྲི་ལ་བཞུགས་པ། ལོངས་སྤྱོད་རྫོགས་སྐུའི་ཆས་སྣང་ལ་རང་བཞིན་མ་གྲུབ་པ་ཐུགས་སྟོང་གསལ་འོད་ཀྱི་གོང་བུའི་ཀློང་དུ། ཆོས་སྐུ་ཀུན་ཏུ་བཟང་པོ་མཐིང་ཀ་མཉམ་བཞག་གི་ཕྱག་རྒྱས་ཡུམ་ཀུན་ཏུ་བཟང་མོ་དང་གཉིས་མེད་དུ་འཁྲིལ་བ་ཡེ་ཤེས་སེམས་དཔའི་ངོ་བོར་བཞུགས་པ། ཡབ་ཀྱི་ཐུགས་ཀར་འཁོར་ལོ་དཀར་པོ་རྩིབ་བཞི་པ་གྱེན་བསླང་གི་རྣམ་པའི་ལྟེ་བར་ཟླ་བའི་དཀྱིལ་འཁོར་ལ་ༀ་དཀར་པོ་དྲི་མ་མེད་པ་དེ་ཡི་མཐར། འདི་ནས་བསྙེན་པ་རྒྱས་བསྡུས་ཀྱི་སྔགས་ཕྲེང་བསྒོམ་རིམ་ཐ་དད་དུ་དགོས་ཀྱང་རྒྱས་པ་ཞི་ཁྲོ་དམ་པ་རིགས་བརྒྱ་ཐ་དད་དུ་བསྙེན་པའི་ཚུལ་ནི། ལྷ་སྔགས་ཏིང་ངེ་འཛིན་ཐམས་ཅད་ཤིན་ཏུ་མང་བས་ལོ་ཟླ་མ་སྦྲེལ་བར་གྲངས་བསྙེན་ཐ་མ་ཙམ་ཡང་འགྲུབ་དཀའ་བས། འདིར་ཞི་ཁྲོ་སྤྱི་བསྡུས་ཀྱི་བསྙེན་པའི་ཏིང་འཛིན་ནི། ༀ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷརྡུ་ཨཱཿཞེས་བཟླ་བ་སྐར་མའི་ཚོགས་ཀྱིས་བསྐོར་བ་ལྟ་བུའི་ཛ྄བ་དགོངས་སྟེ་བསྙེན་པ་ལ་བསྔགས་པ་ཡིན། དེ་བཞིན་དུ་རྡོ་རྗེ་སེམས་དཔའ་ལ་སོགས་པ་རིགས་ཀྱི་འཁོར་ལོས་བསྒྱུར་བ་བཞི་གཙོ་བོ་རྣམས་ཀྱི་ཐུགས་ཀར་རང་རང་གི་ཕྱག་མཚན་ལྟེ་བར་ས་བོན་བཀོད། འཁོར་རྣམས་ཐུགས་སྲོག་ས་བོན་བསམ། སྐབས་རེ་གཙོ་བོ་རྣམ་སྣང་གི་ཐུགས་ཡེ་ཤེས་སེམས་དཔའ་ཀུན་ཏུ་བཟང་པོའི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པས་འཁོར་རིགས་བཞིའི་རྒྱལ་བ་རྣམས་ཀྱི་ཐུགས་རྒྱུད་བསྐུལ། དེ་དག་ལས་སྤྲོས་པའི་འོད་ཀྱིས་འཁོར་ཚོགས་ལྷ་རྣམས་བསྐུལ། དེ་དག་ལས་མཁའ་ཁྱབ་ཀྱི་རྒྱལ་བ་རྣམས་མཆོད་པའི་འོད་ཟེར་མཐའ་ཡས་པར་སྤྲོས། མཐུ་དང་བྱིན་རླབས་ནུས་པ་ཐམས་ཅད་བསྡུས་ནས་དཀྱིལ་

འཁོར་གྱི་ལྷ་ལ་ཐིམ། གཟི་བྱིན་མཆོག་ཏུ་འབར་བའི་འོད་ཟེར་ཕྱོགས་བཅུར་འཕྲོས། བདག་དང་སེམས་ཅན་ཐམས་ཅད་ལ་ཕོག་པས་རྟོག་སྒྲིབ་ཉམས་ཆགས་ཐམས་ཅད་དག །དངོས་གྲུབ་ཐམས་ཅད་ཐོབ། རང་སྣང་ཡེ་ཤེས་ཀྱི་འཁོར་ལོ་དང་རོ་གཅིག་ཏུ་གྱུར། ཞེས་བརྗོད་ལ། བྷོ་དྷི་ཙིཏྟ་རྩེ་གཅིག་ཏུ་བཟླ། སྔགས་སྟོང་ཕྲག་རེའི་མཚམས་དངོས་སུ་འབྱོར་དང་ཡིད་ཀྱིས་རྣམ་སྤྲུལ་ཏེ། །ཀུན་ཏུ་བཟང་པོ་༴ ས་པ་རི་ཝ་ར༴ སོགས་བརྗོད། བདག་ཉིད་ཆེན་པོ་རིགས་ལྔ་ཡབ་ཡུམ་དང་༴ རྡོ་རྗེ་དབྱིངས་ཀྱི་ལྷ་ལ་ཕྱག་འཚལ་བསྟོད། །ཅེས་བྱའོ། །ཡང་སྔགས་འཕྲེང་གི་སྤྲོ་བསྡུ་གཉིས་པ་ནི། རང་ཉིད་དཀྱིལ་འཁོར་གྱི་གཙོ་བོ་ཡབ་ཀྱི་ཐུགས་ཀའི་སྔགས་ཀྱི་འཁོར་ལོ་ལས། སྔགས་ཀྱི་འོད་ཟེར་བཀྲ་ལམ་གྱིས་བྱུང་བ་རང་གི་ཞལ་ནས་ཐོན། ཡུམ་གྱི་ཞལ་དུ་ཞུགས། ཐུགས་ཀར་བརྒྱུད་ནས་ཡུམ་གྱི་གསང་བ་ནས་བདག་གི་གསང་བར་ཞུགས། སླར་ཐུགས་ཀར་འཁོར་བར་བསམ་པ་ནི། འགལ་མེ་ཀླད་ལ་བསྐོར་བ་ལྟ་བུའི་ཛ྄བ་དགོངས་ཉེ་བསྙེན་ལ་བསྔགས་པ་ཉིད་དམིགས་སྐོར་དེ་ཡི་རྗེས་སུ། ཡང་སྤྱི་དྲིལ་རྩེ་གཅིག་ཏུ་བཟླ། སྟོང་ཚིག་གི་མཆོད་བསྟོད་སྔར་བཞིན་བྱ། སྤྲོ་བསྡུའི་དམིགས་སྐོར་གསུམ་པ་ནི། སླར་ཡང་བདག་ཉིད་ལྷ་ཡི་ཐུགས་ཀའི་ས་བོན་སྔགས་དང་བཅས་པ་ལས་འོད་ཟེར་དཔག་ཏུ་མེད་པ་ཁམས་གསུམ་འགྲོ་བ་རིགས་དྲུག་གི་གནས་སུ་འཕྲོས་པས། དམྱལ་བ་ཚ་གྲངས། ཡི་དྭགས་བཀྲེས་སྐོམ། དུད་འགྲོ་བླུན་རྨོངས། ལྷ་མ་ཡིན་འཐབ་རྩོད། ལྷ་འཕོ་ལྟུང་། མི་སྐྱེ་རྒ་ན་འཆིའི་སྡུག་བསྔལ་མ་ལུས་པ་བྱང་ནས་སྣོད་བཅུད་ཐམས་ཅད་ཞི་ཁྲོ་རྩ་བ་གསུམ་གྱི་རང་བཞིན་དུ་གྱུར་ནས་སྔགས་ཀྱི་སྒྲ་སྒྲོག་པར་བསམས། འདི་ནི་རྒྱལ་པོས་ཕོ་ཉ་འགྱེད་པ་ལྟ་བུའི་ཛ྄བ་དགོངས་བསྒྲུབ་པ་ལ་བསྔགས་སོ། །

ཡང་སྤྱི་དྲིལ་རྩེ་གཅིག་ཏུ་བཟླ་ཞིང་། སྟོང་ཚིག་གི་མཆོད་བསྟོད་སྔར་བཞིན་ལ། སྤྲོ་བསྡུའི་དམིགས་སྐོར་བཞི་པ་ནི། བདག་ཉིད་ལྷ་ཡི་ཐུགས་ཀའི་ས་བོན་ལས་སྔགས་ཀྱི་འོད་ཟེར་དཔག་ཏུ་མེད་ཅིང་བརྗོད་ཀྱི་མི་ལང་བ་སྟེང་འོག་ཕྱོགས་མཚམས་ཐམས་ཅད་དུ་འཕྲོས། ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས་ལུས་ངག་ཡིད་གསུམ་གྱི་སྡིག་སྒྲིབ་མ་ལུས་པ་བྱང་ཞིང་དག་ནས་ཐམས་ཅད་དུས་གཅིག་ལ་བླ་མ་ཡི་དམ་རྒྱལ་བ་ཞི་ཁྲོ་རབ་འབྱམས་ཀྱི་སྐུ་ཤ་སྟག་ཏུ་གྱུར་ཏེ། སྟེང་འོག་ཕྱོགས་མཚམས་ཐམས་ཅད་བུང་བའི་ཚང་བཤིག་པ་ལྟར་ཛ྄བ་སྒྲ་སྒྲོག་པར་བསམ། དེ་ནི་བུང་བའི་ཚང་ཞིག་པ་ལྟ་བུའི་འཛབ་དགོངས་ཏེ། བསྒྲུབ་པ་ཆེན་པོ་དང་དབང་རྒྱས་འབྲིང་གི་དུས་སུ་བསྔགས་པའོ། །གང་ལྟར་སྤྱི་དྲིལ་བཟླ་ཞིང་། ཐུན་གྱི་མཇུག་ཙམ་དུ་མཆོད་བསྟོད་བྱ་ཞིང་། སླར་ཡང་བདག་ཉིད་དཀྱིལ་འཁོར་གྱི་གཙོ་བོའི་ཐུགས་ཀའི་སྔགས་ཕྲེང་ལས་སྟེང་ཕྱོགས་སུ་འཕྲོས་པས། སྟེང་ཕྱོགས་ཆོས་དབྱིངས་མེ་རི་འབར་བའི་དཀྱིལ་འཁོར་གྱི་དབུས་དཔལ་ཆེན་པོ་ཆེ་མཆོག་ཧེ་རུ་ཀ་ཡབ་ཡུམ་གྱི་ཐུགས་ཀར་ཕོག །དེ་ཡི་ཐུགས་རྒྱུད་བསྐུལ། འོད་ཟེར་འཁོར་ཁྲག་འཐུང་རིགས་ལྔ་སོགས་ལ་སྤྲོས། དེ་དག་ལས་ཀྱང་འོད་ཟེར་བསམ་གྱིས་མི་ཁྱབ་པ་སྤྲོས་ཏེ་ཞིང་རབ་འབྱམས་ཀྱི་རྒྱལ་བ་རྣམས་མཉེས་པའི་མཆོད་པ་ཕུལ། སྐུ་གསུང་ཐུགས་ཀྱི་བྱིན་རླབས་ནུས་མཐུ་ཐམས་ཅད་བསྡུས་ནས་རང་ལ་ཐིམ། བར་དུ་གཅོད་པའི་གདོན་བགེགས་ཐམས་ཅད་ཚར་བཅད། མར་འགྲོ་བ་སེམས་ཅན་གྱི་ལས་ཉོན་བག་ཆགས་དང་བཅས་པ་ཉི་མས་བ་མོ་བཞུས་པ་ལྟར་སྦྱངས། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་ལ་བཀོད། སྣོད་ཐམས་ཅད་གཞལ་ཡས་ཁང་། བཅུད་ཐམས་ཅད་ལྷ་དང་ལྷ་མོ།

སྒྲ་ཐམས་ཅད་གྲགས་སྟོང་ཛ྄བ་གྱི་རོལ་མོ། རྟོག་ཚོགས་ཆོས་ཉིད་གྱི་རོལ་པར་གྱུར། ༀ་བྷོ་དྷི་སོགས། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཞེས་སྦྲེལ་བར་བཟླ་ཞིང་། སྟོང་ཚིག་གི་མཆོད་པ་སྔར་བཞིན་དང་། ཆོས་སྐུ་ནམ་མཁས་བསྟོད། འདི་ནི་བསྒྲུབ་ཆེན་དམིགས་པ་སྟེ། ཞི་བར་བསྙེན་ཅིང་ཁྲོ་བོར་བསྒྲུབ། ཅེས་པའི་དོན་ཙམ་ཡང་མཚོན་ནུས་སྙམ་པ་ཤར། དེ་ལྟར་བཟླས་ནས་དུས་ཚོད་ལ་བབ་པ་ན། ཞི་ཁྲོའི་ལྷ་ཐམས་ཅད་དང་། གཞན་ཡང་སངས་རྒྱས་བྱང་སེམས་དཔའ་བོ་རྣལ་འབྱོར་མའི་ཚོགས་ཐམས་ཅད་ནམ་མཁའ་གང་བར་བྱོན་ནས་སྟོང་གསུམ་ཐམས་ཅད་བུང་བའི་ཚང་ཞིག་པ་ལྟར་འཛབ་ཀྱི་སྔགས་སྒྲས་གང་བར་བསམ། ཧཱུྃ་བཛྲ་ཙིཏྟ་ཨཱཿསོགས་ཛ྄བ་རིང་ཚར་གསུམ་དང་། སླར་ཡང་རིག་སྔགས་བསླུ་བ་མེད་པ་རྡོ་རྗེའི་བདེན་པ་འགྲུབ་པར་གྱུར་ཅིག །ཨ་ཨཱ་གསུམ་དང་། ཀ་ཁ་ག་གྷ་ང་གསུམ། ༀ་ཡེ་དྷརྨ་གསུམ། ཀུན་ཏུ་བཟང་པོ། རྡོ་རྗེ་སེམས་དཔའ། ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཚོགས་ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབས་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས་བདག་གཞན་མར་གྱུར་འགྲོ་བ་ནམ་མཁའི་མཐའ་དང་སེམས་ཅན་ཐམས་ཅད་ཀྱི་ཚེ་འཁོར་བ་ཐོག་མེད་ཀྱི་དུས་ནས་ལས་དང་ཉོན་མོངས་པའི་དབང་གིས་བསགས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་བྱང་ནས་ཞི་ཁྲོ་རྒྱལ་བའི་དཀྱིལ་འཁོར་གྱི་གོ་འཕང་རིན་པོ་ཆེ་མཆོག་ཉིད་དུ་ཐོབ་པར་གྱུར་ཅིག །ཧཱུྃ་བླ་མ་ཡི་དམ་མཁའ་འགྲོ་འཁོར་དང་བཅས། །ཡེ་ཤེས་ལྷ་ཚོགས་སྤྱན་འདྲེན་གཤེགས་སུ་གསོལ། །འཇིག་རྟེན་སྲུང་མ་ཕོ་མོ་དམ་ལ་འདུས། །ཕྱི་ནང་གསང་བའི་ཛ྄བ་བསྙེན་མཆོད་པ་འབུལ། །གཞལ་ཡས་ཁང་ཆེན་འདི་ལ་བྱིན་ཕོབ་

ལ། །བསྒྲུབ་རྫས་གཉན་པོ་འདི་ལ་བཅུད་ཅིག་སྩོལ། །སྣང་གསལ་མར་མེ་འདི་ལ་མདངས་ཅིག་ཕྱུངས། །བཀྲམས་པའི་དཀྱིལ་འཁོར་འདི་ལ་བཀྲགས་མདངས་སྐྱེད། །སྒྲུབ་མཆོག་མོས་པའི་བུ་ལ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་ད་སྩོལ་ཅིག །བགེགས་དང་ལོག་འདྲེན་འབྱུང་པོ་རྡུལ་དུ་རློགས། །ཕྱི་ནང་རྐྱེན་ངན་བར་ཆད་ཞི་བ་དང་། །བདག་ཅག་དཔོན་སློབ་ཡོན་མཆོད་འཁོར་བཅས་ཀྱིས། །ཅི་བསམ་དོན་འབྲས་ཆོས་བཞིན་འགྲུབ་པ་དང་། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །ཉམས་ཆགས་འགལ་འཁྲུལ་ཅི་མཆིས་མཐོལ་ལོ་བཤགས། །ལུས་ངག་ཡིད་ལ་ནོངས་པར་མ་གྱུར་ཅིག །ཅེས་དང་། ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས། །བླ་མ་རིག་འཛིན་བདེ་གཤེགས་ཞི་བའི་ལྷ། །ཁྲོ་བོ་རོལ་པའི་དུར་ཁྲོད་ཆེན་པོ་ནས། །ཡི་དམ་ཞི་ཁྲོ་ཁྲག་འཐུང་འབར་བའི་ལྷ། །ཡབ་ཡུམ་སྲས་དང་བཀའ་སྡོད་སྤྲུལ་འཁོར་བཅས། །ཐུགས་དམ་རྒྱུད་བསྐུལ་བཅོལ་པའི་ཕྲིན་ལས་མཛོད། །འཕྲིན་ལས་རྣམ་བཞིའི་དངོས་གྲུབ་བདག་ལ་སྩོལ། །གནས་སྐབས་མཐུན་རྐྱེན་དངོས་གྲུབ་ཆར་ལྟར་ཕོབ། །ༀ་བྷོ་དྷི་༴ ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧོ། །ཞེས་དང་། ཉེར་བསྡུ་ནི། གཟུགས་སྣང་ཐམས་ཅད་ཞི་ཁྲོའི་༴ སྐད་ཅིག་སྟོང་གསལ་༴ བདག་གི་དུས་གསུམ་དགེ་༴ ཅེས་བརྗོད་ཅིང་ཐུན་དང་ངག་འགྲོལ་ལོ། །སྔ་ཐུན་ཆོ་ག་རྒྱས་པའི་ལུགས་དང་། གུང་ཚིག །ཚྭ་ཚ། ཕྱག །མཎྜལ་ལ་སོགས་པ་ཐུན་མཚམས་འདིར་བྱ། གུང་ཡོལ་ཙམ་ནས། མཆོད་པ་ཁ་གསོ་ལ། ཧཱུྃ༔ ཨོ་རྒྱན་ཡུལ་གྱི་ཞེས་ཚིག་བདུན། ཨེ་མ་ཧོ། སྤྲོས་བྲལ་ཆོས་ཀྱི་སོགས་སྐུ་གསུམ་གསོལ་འདེབས། ༀ་ཨཱཿཧཱུྃ་རྣམ་དག་ཆོས་དབྱིངས་སོགས་གསོལ་འདེབས་ཆུང་བ་གཏོང་། དེ་ནས་ལས་བྱང་ཚོགས་ཆུང་བ་བཤགས་པ་ཡན་ཆད་སྔ་

མ་ལྟར་བྱ་ལ། ཛ྄བ་བསྐུལ་དང་། བྱིན་རླབས་བསྡུ་བའི་དམིགས་སྐོར་དང་པོ་དང་། ཟླ་བ་སྐར་མའི་ཛ྄བ་དགོངས་ཁོ་ན་ལ་དྲིལ་ཞིང་། སྤྱི་དྲིལ་རྩེ་གཅིག་ཏུ་བཟླ་བའི་ཐུན་དངོས་གཞི་ལ་སྤྱི་དྲིལ་རྩེ་གཅིག་ཏུ་བཟླ་ཞིང་ཛ྄བ་དགོངས་དམིགས་པའི་ཁ་བསྒྱུར་ཉིན་རེ་ལ་སྔ་ཐུན་མ་གཏོག་མི་དགོས། ཐུན་སྨད་དུ་ཁྲོ་བོ་ལ་དམིགས་པའི་སྤྲོ་བསྡུ་དང་། ཞི་ཁྲོའི་སྔགས་སྦྲེལ་ནས་བཟླ་བ། སྟོང་ཚིག་གིས་མཆོད་བསྟོད་དང་། ཐུན་མཐར་ཛ྄བ་རིང་དབྱངས་གསལ། རྟེན་སྙིང་སོགས་ཐུན་ཐམས་ཅད་ལ་ཁྱད་པར་མེད་པའི་ཐོ་སྲོད་དགོང་གསུམ་ལ་དེ་ལྟར་ཤེས་དགོས་སོ། །ཕྱི་ཐུན་མཐར་གཏོར་བསྔོ་དང་། དགོས་སྲུང་སྡེ་བདུན། གསུར་བསྔོ་གཏོང་། མུན་རུབ་ནས་སྲོད་ཐུན་ཡང་སྔར་གྱི་དགོང་ཐུན་དང་ཁྱད་མེད་དོ། །འདིའི་མཐར་ཚོགས་བསྐང་ཡང་རྒྱུན་དུ་མ་འཛོམས་རུང་ཉ་སྟོང་བརྒྱད་གསུམ་ལ་མེད་མི་རུང་། མཐར་སྡེ་བདུན་བསྐང་བ། ཆད་ཐོ། བརྟན་མ་བྲོ་བཀྲ་ཤིས་སོགས་དཀྱུས་ལྟར་བྱ། མཐར་གཅོད་ཐུན་དང་། ཉལ་བའི་རྣལ་འབྱོར་རོ། །ནང་པར་ཐོ་རངས་ལྡང་བའི་རྣལ་འབྱོར་གྱིས་ལྡང་སྟེ། བསམ་གཏན་གྱི་མལ་དུ་ལུས་གནད་དྲང་པོར་འདུག་པས། ཡིད་འཁོར་བའི་ཆོས་ལ་གདུང་བའི་སྐྱོ་ཤས་དྲག་པོ་དང་བཅས་ནས། ནམ་མཁར་དཔའ་བོ་མཁའ་འགྲོ་གྲངས་མེད་པའི་ཊཱ་དྲིལ་གྱི་སྒྲས་གཉིད་ལས་བསླང་བར་བསམ་ཞིང་། ཀྱེ་མ་ཀྱེ་ཧུད་སྐལ་ལྡན་རིགས་ཀྱི་བུ། ཞེས་པ་ནས། བླ་མས་རྣལ་འབྱོར་གྱི་མཐར་ཐུག་པའི་བར་ལེགས་པར་གཏོང་ངོ་། །གཞན་ཡང་ཚིག་བདུན། སྐུ་གསུམ། རང་གཞུང་གི་གསོལ་འདེབས་ཆེ་ཆུང་དང་། ལས་བྱང་ཆུང་བ་སོགས་ཁར་སེང་གི་དགོང་ཐུན་ལྟར་རོ། །ཐུན་མཐར་ཆོས་སྤྱོད་ཆགས་མེད་ཆུ་གཏོར་ལ་སོགས་གཏོང་། སྔ་ཐུན་ནི་གསོལ་འདེབས་དང་

ལས་བྱང་ཆེ་བ་སོགས་རྒྱས་པའི་ལུགས་ཁར་སང་དང་ཁྱད་མེད་དོ། །དེ་ལྟར་ཐུན་བཞིའི་རིམ་པའི་རྣལ་འབྱོར་ལ་བརྩོན་པར་བྱ་ཞིང་། བདག་དོན་བྱིན་རླབས་བསྡུ་བ། གཞན་དོན་ཕྲིན་ལས་བཟླ་བ། བདག་གཞན་གཉིས་མེད་བཟླས་པ། ཛ྄བ་དགོངས་བཞི། ལུས་ལྷ། ངག་སྔགས། སེམས་ཏིང་ངེ་འཛིན་གྱི་དཀྱིལ་འཁོར་གསུམ། སྣང་བ་སྐུ། གྲགས་པ་གསུངས། དྲན་རྟོག་ཐུགས་དེ་འཁྱེར་སོ་གསུམ། རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་སྟེ་ལམ་འཁྱེར་གསུམ་དང་མ་བྲལ་བས་ཉམས་སུ་ལེན་ནུས་པའི་གང་ཟག་ལ། བཟླས་པའི་གྲངས་དང་། ལོ་ཟླའི་དུས་སོགས་ལ་ལྟོས་མི་དགོས་པར་མཚན་མ་མྱུར་དུ་འབྱུང་བར་བཤད་ལ། བློ་དམན་གྲངས་ལ་བློ་གཏོད་པ་དག་ནི། སྤྱིར་ཞི་ཁྲོ་ཐ་དད་དུ་བསྙེན་ན་གཙོ་འཁོར་གྱི་འགྲོས་བརྩི་མོད་ཀྱང་། འདིར་སྤྱི་དྲིལ་འབྲུ་འབུམ། ཞི་ཁྲོ་སྦྲེལ་མ་འབུམ་ཕྲག་གཅིག་བཟླ་ཞིང་། འདིར་ཞི་སྔགས་འབྲུ་བཅུ་དྲུག་ལ་འབུམ་ཐེར་བཅུ་དྲུག །[འབྲུ་]འབུམ་རྗེས་སུ་ཁྲི་བཅུ་དྲུག །ཞི་ཁྲོ་སྦྲེལ་བའི་ཁ་བསྐང་ཁྲི་དང་བཅས་པ་ནི། གྲངས་བསྙེན་འབྲིང་པོ་ཙམ་དུ་འདོད་དགོས་ལ། གང་ལྟར་རྒྱས་འབྲིང་ཐ་མའི་གྲངས་རྫོགས་རྗེས་ཉིན་ཐ་མའི་ཐོར་ཐུན་ནས་བཟུང་སང་གི་སྐྱ་རེངས་མ་ཤར་བར། མདུན་གྱི་བསྒྲུབ་གཏོར་དཀྱིལ་འཁོར་གྱི་ལྷར་གསལ་བའི་སྤྱི་བོར་འཁོར་ལོ་དཀར་པོའི་ལྟེ་བར་ༀ་ཡིག་དཀར་པོ་ཟླ་ཞུན་དྭངས་མའི་མདོག་ལྟ་བུ། མགྲིན་པར་པདྨ་དམར་པོ་འདབ་མ་བརྒྱད་པའི་ལྟེ་བར་ཨཿདམར་པོ་མར་མེ་ལྟར་དྭངས་པ། སྙིང་གར་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་སྔོན་པོ་མཐིང་ཤུན་ལྟ་བུ་རྣམས་གསལ་བཏབ་ལ། རང་ཉིད་ཀྱང་ལྷར་གསལ་བའི་ཐུགས་ཀ་ནས་འོད་ཟེར་འཕྲོས་པ་མདུན་བསྐྱེད་ཀྱི་ལྷ་ཡི་ཐུགས་ཀར་ཕོག །དེ་ཡི་ཐུགས་རྒྱུད་བསྐུལ། གནས་གསུམ་

གྱི་ༀ་དཀར་ཨཱཿདམར་ཧཱུྃ་མཐིང་གསུམ་ལས་འོད་ཟེར་ཡང་དཀར་དམར་མཐིང་གསུམ་བར་མ་ཆད་པ་བྱུང་སྟེ། རང་གི་གནས་གསུམ་དུ་ཐིམ་པས་རྡོ་རྗེ་གསུམ་གྱི་དངོས་གྲུབ་ཐོབ་པར་བསམ་ལ། ཧཱུྃ་བདེ་གཤེགས་རྒྱལ་བ་༴ སྩལ་དུ་གསོལ། །ༀ་ཨཱཿཧཱུྃ་བཛྲ་གུ་རུ་དྷེ་ཝ་ཌཀྐི་ནི་ཀཱ་ཡ་ཝཱཀྐ་ཙིཏྟ་ས་མ་ཡ་སིདྡྷི་ཨ་ལ་ལ་ཧོ། ༀ་ཨཱཿཧཱུྃ་བྷོ་དྷི༴ ཧཱུྃ་བྷྱོ་ཧཱུྃ་ས་མ་ཡ་སིདྡྷི༔ ཞེས་སྔགས་ཕྱི་མ་ལ་གྲངས་སུ་བཅད་པ་བཟླ་ཞིང་། སྐབས་སྐབས་ཛ྄བ་བསྐུལ་རེ་ཡང་གཏོང་ཤིང་ནང་པར་ཐོ་རེངས་ཁར་བསྒྲུབ་གཏོར་གནས་གསུམ་དུ་གཏུགས་ནས་དངོས་གྲུབ་ལེན་པ་སོགས་བྱའོ། །ནང་པར་མཆོད་པ་དང་གཏོར་མ་གསར་དུ་བཤམས་ནས་བླ་མ་ཡི་དམ་མཁའ་འགྲོ་ཆོས་སྲུང་རྣམས་དགྱེས་པ་སྐོང་བའི་ཚོགས་བསྐང་བཤགས་རྒྱས་པར་གཏོང་། དེ་ཡི་ནང་བར་ལས་མི་འགྱང་བར་ཁ་སྐོང་བཅུ་ཆའི་སྦྱིན་སྲེག་ཀྱང་སྨིན་རྒྱས་སུ་ལེགས་པར་འགྲུབ་པར་བྱའོ། །རྗེས་སུ་ཐོ་ལ་གཏང་རག་གི་མཆོད་གཏོར་སྔར་བཞིན་འབུལ་ཞིང་སླར་གཤེགས་ནས་གྲོལ་ལོ། །དཀྱིལ་འཁོར་བསྡུ་བ་སོགས་ལས་ཀྱི་རྗེས་མི་མངོན་པར་བྱ་ཞིང་ཐོག་མར་དམ་ཚིག་གཅིག་པའི་མི་རེ་གཉིས་དང་འཕྲད་ཅིང་། སླད་ནས་རིམ་གྱིས་བག་བསང་ནས་མཚམས་གྲོལ་བར་བྱའོ། །སྨྲས་པ། ཁམས་གསུམ་འཁོར་བ་དོང་ནས་སྤྲུག་པའི་ཆོས། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི། །བསྙེན་ཡིག་རིག་པའི་སྒོ་འབྱེད་འདི་སྦྱར་བས། །བསོད་ནམས་བླ་མེད་བྱང་ཆུབ་རྒྱུ་རུ་བསྔོ། །ལམ་གྱི་མཐར་ཐུག་རང་བཞིན་རྫོགས་པ་ཆེ། །མྱུར་བདེའི་ཐབས་ཀྱིས་འབྲེལ་ཚད་ཐར་གླིང་དུ། །འདྲེན་པའི་སློབ་དཔོན་རིགས་བརྒྱའི་ཁྱབ་བདག་རྗེ། །ཨ་ཏིའི་བསྟན་པའི་རྒྱལ་མཚན་གཡོ་མེད་ཤོག །བསླུ་མེད་

དཀོན་མཆོག་གསུམ་དང་རྩ་བ་གསུམ། །དམ་ཅན་བཀའ་སྡོད་བསྲུང་མའི་མཐུ་ནུས་པ། །དྲང་སྲོང་རིག་འཛིན་གྲུབ་པའི་ངག་བདེན་པས། །ལྷག་བསམ་སྨོན་པའི་གཏམ་འདི་བསྒྲུབ་ཤིག་ཀྱེ། །དེ་ལྟར་ཟབ་ཆོས་ཞི་ཁྲོ་དགོངས་པ་རང་གྲོལ་འདི་ལ་(སྔར་)མེད་ཀྱི་བསྙེན་ཡིག་ཞིག་གྱིས་ཞེས་རང་བཞིན་རྫོགས་པ་ཆེན་པོའི་གནས་ལུགས་ཕྱིན་ཅི་མ་ལོག་པར་མངོན་དུ་གྱུར་ནའང་། བསྙེན་བསྒྲུབ་སོགས་རྡོ་རྗེ་ཐེག་པའི་ལམ་ལྟ་བ་ཁ་ཁྱེར་ཐོན་པས་ཁྱད་དུ་མི་གསོད་པར་གཅེས་སྤྲས་ཞིབ་ཏིག་མཛད་པ། གསུམ་ལྡན་རྡོ་རྗེ་འཛིན་པ་རྡོ་བླ་མ་བསོད་ནམས་བསྟན་འཛིན་གྱིས་བཀའ་ནན་ལན་དུ་མར་ཕེབས་པ་ལྡོག་མ་ནུས་ནས་ལམ་འདི་རང་གཞུང་གི་བསྙེན་ཡིག་དཔང་པོར་འཇོག་རྒྱུ་ཞིག་མ་རྙེད་ནའང་། རྗེ་གཏེར་བདག་གླིང་པའི་ཟབ་ལམ་བདེ་གཤེགས་ཀུན་འདུས་སུ་བཤད་པའི་བསྙེན་ཡིག །རྗེ་ལོ་ཆེན་དྷརྨ་ཤྲཱྀའི་བཀའ་བརྒྱད་བདེ་གཤེགས་འདུས་པའི་བསྙེན་ཡིག་སོགས། བླ་མ་དགོངས་འདུས་ཀྱི་ཛ྄བ་དགོངས་ཚངས་པའི་ང་རོ་རྣམས་ཀྱིས་ཟབ་གནད་རྣམས་བསྡུས་ཏེ་བསྒྲིགས་པ་རིག་པའི་སྒོ་འབྱེད་ཅེས་བྱ་བ་རྒན་པོ་བཀྲ་ཤིས་རྒྱ་མཚོས་རང་ལོ་དོན་དྲུག་པར་བྲིས་པ་ཛ་ཡནྟུ། གཞན་གཤིན་པོ་རྗེས་འཛིན་ལྟ་བུའི་བདག་བུམ་བཟླས་པའི་གོ་དོན་ཁ་བསྒྱུར་དང་བཅས་པ་དམིགས་སུ་བྲིས་ན་ལེགས་སྙམ་པ་ཤར་རོ། །