ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་ཡིག་དྲི་བཟང་ངད་ལྡན་ཀུན་ཏུ་བཟང་པོའི་ཞལ་ངོམ།

ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་ཡིག་དྲི་བཟང་ངད་ལྡན་ཀུན་ཏུ་བཟང་པོའི་ཞལ་ངོམ་བཞུགས།

གདོད་ནས་མངོན་པར་བྱང་ཆུབ་པ། །སྐྱེ་འགགས་གནས་གསུམ་ལས་འདས་ཤིང་། །ནང་གསལ་གཞོན་ནུ་བུམ་པའི་སྐུ། །ཀུན་བཟང་གདོད་མའི་མགོན་པོར་འདུད། །བརྟན་གཡོ་སྣང་སྲིད་ཆོས་ཁམས་མ་ལུས་པར། །གཟུང་འཛིན་གཉིས་མེད་ཕྱག་རྒྱས་ལེགས་ཐེབས་པ། །ཆོས་ཉིད་འགྱུར་བ་མེད་པའི་བདག་ཉིད་ཅན། །གསང་ཆེན་རིགས་གཅིག་རྡོ་རྗེ་སེམས་དཔར་འདུད། །གང་གི་རང་བཞིན་སྤྲོས་ཀུན་བྲལ་ཡང་ལྷུན་གྲུབ་གདངས་ལས་སྙིང་རྗེའི་རྩལ། །རོལ་པ་འགགས་མེད་སྒྱུ་མའི་ཆོ་འཕྲུལ་ཇི་བཞིན་གདུལ་བྱའི་ངོར་སྣང་བཞིན། །མི་དགེས་བསྐྲུན་པའི་དམྱལ་སོགས་རིགས་དྲུག་འགྲོ་བའི་སྡུག་བསྔལ་གཞོམ་མཛད་པ། །གང་ལ་གང་འདུལ་ཞི་ཆགས་ཁྲོ་བོའི་སྐུར་སྟོན་དམ་པ་རིགས་བརྒྱར་འདུད། །མཁྱེན་པའི་ཡེ་ཤེས་མཁའ་ལྟར་རྒྱ་ཆེ་ཞིང་། །བྱམས་བརྩེའི་རོལ་རྩལ་འོད་བརྒྱ་འབར་བའི་དལ། །མཐུ་སྟོབས་ནུས་པའི་ཚ་ཟེར་འབུམ་འཕྲོ་བ། །ཨོ་རྒྱན་འཇིགས་མེད་གླིང་པས་དགེ་ལེགས་སྩོལ། །དུས་གསུམ་ཀུན་མཁྱེན་པདྨ་སཾ་བྷ་ཝས། །ཟབ་གཏེར་བདག་པོར་མངའ་གསོལ་དབང་བསྐུར་ཞིང་། །སྨོན་ལམ་གཏད་རྒྱ་དུས་ལ་བབ་པའི་ཚེ། །ཟབ་གཏེར་སྒོ་འབྱེད་ཀརྨ་གླིང་པ་རྒྱལ། །གྲངས་མེད་གསུམ་གྱི་དམ་བཅའ་ཕྱིར་བསྙིལ་ཏེ། །ཚེ་གཅིག་སངས་རྒྱས་འགྲུབ་ངེས་རྡོ་རྗེའི་ཐེག །དེ་ལས་ཁྱད་འཕགས་མཐོང་ཐོས་

དྲན་རེག་ཀུན། །གྲོལ་ངེས་དགོངས་པ་རང་གྲོལ་རྨད་དུ་བྱུང་། །དེ་ལྟའི་གདམས་པའི་སྨིན་གྲོལ་བདུད་རྩིའི་རྒྱུན། །སེལ་མེད་དད་པའི་ཡུར་བས་ལེགས་དྲངས་ནས། །སྐལ་བཟང་གདུལ་བྱའི་ཞིང་སར་བརླན་མཛད་པའི། །རྩ་རྒྱུད་བླ་མའི་ཚོགས་ཀྱི་བཀའ་དྲིན་དྲན། །འདི་ལྟའི་གཞུང་བཟང་ཆུ་སྐྱེས་ཚལ། །དད་གསུམ་འོད་བརྒྱས་ལེགས་ཕྱེས་ནས། །བསྙེན་ཡིག་དྲི་བཟང་ངད་སྤྲོས་ན། །དོན་གཉེར་རྐང་དྲུག་ཚོགས་དགྱེས་མཛོད། །དེ་ཡང་འདིར་ཨོ་རྒྱན་སངས་རྒྱས་གཉིས་པའི་དངོས་སློབ་སྤྲུལ་པའི་ལོ་ཙ་བ་ཆེན་པོ་ཅོག་རོ་ཀླུའི་རྒྱལ་མཚན་གྱི་སྤྲུལ་པའི་ཟློས་གར་གླིང་པ་ལྔ་ལས་ཀརྨ་གླིང་པ་དེ་ཉིད་ཀྱིས་དྭགས་ལྷ་དཔལ་གྱི་སྒམ་པོ་བྲག་རི་ལྷ་བུའི་གར་བྱེད་པ་འདྲ་བའི་མགུལ་ནས་གདན་དྲངས་ཤིང་ཡབ་ཉི་ཟླ་སངས་རྒྱས་ལ་གནང་ཆེད་གཏེར་སྟོན་ཉིད་གཞན་དོན་དུ་གཤེགས་སྔ་བ་དང་། ཡབ་དགུང་གྲངས་བརྒྱ་དང་ཉི་ཤུར་བཞུགས་པ་སོགས་ཀྱིས་ཞི་ཁྲོའི་ཆོས་སྐོར་འདི་ཉིད་ཡབ་ཀྱིས་སྤེལ་བའི་རྟེན་འབྲེལ་འགྲིགས་པ་དང་། དེ་ལ་ཡང་ཡབ་བརྒྱུད་དང་སློབ་བརྒྱུད་གཉིས་སུ་དབྱེ་བ་ལ། ཡབ་བརྒྱུད་ནི་ཡབ་ཉིད་གཏེར་སློབ་དུ་གྱུར་ཚེ་མཚན་བསྒྱུར་ནས་ཉི་ཟླ་ཆོས་རྗེ་ཞེས་གསོལ་ཞིང་དེ་ནས་བརྒྱུད་པ་དང་། ཡབ་སྲས་གཉིས་ཀ་ནས་གཏེར་སློབ་ཉི་ཟླ་འོད་ཟེར་ལ་བརྒྱུད་པ་ལ་སློབ་བརྒྱུད་དེ། དེ་ལའང་དབུས་བརྒྱུད་དང་གཙང་བརྒྱུད་ཁམས་བརྒྱུད་གསུམ་དུ་གྲགས་པའང་ཁོ་བོས་ཐོབ་པ་ལགས་ཤིང་། དེའང་སྨིན་གྲོལ་གྱི་གདམས་པ་ཐོབ་ཡུལ་ནི། ཞེ་ཆེན་རབ་འབྱམས་པ་བསྟན་པའི་རྒྱལ་མཚན་གྱི་ཟློས་གར་འགྱུར་མེད་ཀུན་བཟང་རྣམ་རྒྱལ་ཞབས་དང་། གཙང་པ་སྒྲུབ་ཆེན་པདྨ་བཤེས་གཉེན། དཔོན་སློབ་ཡང་སྲིད་པདྨ་གསང་སྔགས་བསྟན་འཛིན་

འགྱུར་མེད་བཀྲ་ཤིས་རྒྱ་མཚོ་སྟེ་རྣམ་འདྲེན་དམ་པ་ཟུང་གཉིས་ནས་ལེགས་པར་ནོད་ཅིང་། དེ་ཡང་བྱིན་རླབས་ཀྱི་སྤྲིན་དཔུང་དམ་སེལ་གྱི་རླུང་གིས་མ་གཏོར་ཞིང་། དངོས་གྲུབ་གྱི་སྦྲང་ཆར་དུས་ལས་མི་ཡོལ་བར་ལས་སྐལ་ལྡན་པ་དག་གི་ཞིང་སར་ཕབ་པས་སྐུ་གསུམ་གྱི་འབྲས་བུ་སྨིན་པར་གདོན་མི་ཟ་བས་ཐེ་ཚོམ་མེད་པ་ནི་གལ་ཤིན་ཏུ་ཆེའོ། །དེ་ལྟ་བུའི་ལོ་རྒྱུས་ཅུང་ཟད་སྔོན་དུ་བཏང་ནས་ད་ནི་ཞི་ཁྲོ་དགོངས་པ་རང་གྲོལ་གྱི་བསྙེན་བསྒྲུབ་ལ་འཇུག་པའི་ཚུལ་ནི། ཐོག་མར་ཆོས་སྤྱི་དང་བྱེ་བྲག་ལ་ཐོས་བསམ་དང་། ཁྱད་པར་རྡོ་རྗེ་ཐེག་པའི་གཞི་ལམ་འབྲས་བུ་གསུམ་ལས་སྨིན་བྱེད་དང་གྲོལ་བྱེད་སྔོན་དུ་སོང་བཞིན་བསྐྱེད་རྫོགས་ལ་གོམས་འདྲེས་ཡོད་པ་ཞིག་གལ་ཆེ་སྟེ། རིག་པ་རང་ཤར་ལས། གསང་སྔགས་གསང་བའི་རྒྱུད་ལ་མཁས། །ཕྱི་ནང་སྒྲུབ་པ་ཐམས་ཅད་བྱེད། །ཅེས་དང་། སྒྱུ་འཕྲུལ་ལས། ཐོས་བསམ་བསྒོམ་ལ་རབ་སྦྱངས་པའི། །ཤེས་རབ་མིག་ལྡན་རྣམས་ཀྱིས་ཟུངས། །ཞེས་གསུངས་པ་ལྟར་ཉམས་འོག་ཏུ་ཚུད་པ་དག་བསྐྱེད་རྫོགས་བཟླས་བསྒོམ་ལ་བརྩོན་ན་འབྲས་བུ་འབྱིན་སླ་བ་ཡིན་ནོ། །དེ་ལའང་སྦྱོར་བ་སྔོན་འགྲོའི་རིམ་པ་དང་། དངོས་གཞིའི་ཆོ་གའི་རིམ་པ་དང་། རྗེས་ཀྱི་བྱ་བ་གསུམ་མོ། །དང་པོ་ལའང་བྱེ་བྲག་བསྙེན་བསྒྲུབ་ཀྱི་སྔོན་དུ་ས་བརྟགས་བསླང་སྦྱངས་བཟུང་སོགས་སྤྱི་ལྟར་ལས་མི་དགོས་ཤིང་། གང་དུ་བྱ་བའི་གནས་དེར་བྱི་དོར་སོགས་ལེགས་པར་བྱས་ནས་སྐུ་གསུང་ཐུགས་ཀྱི་རྟེན་དགྲམ་པ་དང་། ཁྱད་པར་ཞི་ཁྲོའི་སྐུ་རྟེན་སོགས་ཡོད་ན་བཤམས་ཤིང་མེད་ཀྱང་ཆད་པའི་སྐྱོན་དུ་མི་འགྱུར་རོ། །དཀྱིལ་འཁོར་ཡང་རྒྱས་བསྡུས་འཚམས་ཤིང་ལག་ཏུ་ལེན་བདེ་བའི་ཐབས་ལ་རས་བྲིས་ཀྱི་དལ་ཡོད་ན་བཀྲམས་ཤིང་མེད་ཚེ་ཚོམ་བུ་ལ་

བརྟེན་པས་ཀྱང་མི་རུང་བ་ནི་མ་ཡིན་ནོ། །ཅིའི་ཕྱིར་ན་སྔགས་གསར་རྙིང་གཉིས་ཀ་ན་རབ་རྡུལ་ཚོན་འབྲིང་རས་བྲིས་ཐ་མ་ཚོམ་བུ་བླ་མའི་ལུས་དཀྱིལ་སྤྲུལ་པའི་དཀྱིལ་འཁོར་སྟེ་གྲངས་ངེས་པ་དང་། མ་ངེས་པར་ཡང་གསུངས་པས་མཐའ་གཅིག་ཏུ་མི་བཟུང་ངོ་། །དེ་དག་གང་ཡང་རུང་སྟེ་དངོས་པོ་དང་མཚན་མར་འཛིན་པའི་ཞེན་པ་སྟོང་པར་སྦྱངས་ནས་སླར་རྟེན་གཞལ་ཡས་ཁང་དང་བརྟེན་པའི་ལྷ་ཚོགས་བསྐྱེད་དགོས་པའོ། །ཇི་ལྟར་ཡང་དལ་གྱི་སྟེང་དུ་བུམ་པ་ལྔའམ་གཅིག་ཉེར་ལྔའམ་སོ་ལྔའི་བཅུད་ལྡན། རྨ་བྱའི་མདངས། མེ་ལོང་། ཚོགས་དྲུག་གི་རྫས་ཀྱང་སྤྲོ་ན་བཤམས། གོང་དུ་རྩ་བ་གསུམ་དང་ཆོས་སྐྱོང་སྡེ་བདུན་གྱི་གཏོར་མ་གཞུང་ལྟར་དང་། དེ་ཡང་བླ་མའི་གཏོར་མ་རིན་ཆེན་འབར་བ་སྟེ་གཏོར་དབང་རེག་པ་དོན་ལྡན་ལྟར། ཡི་དམ་ལ་གདན་གྲུ་བཞི་བཞི་བརྩེགས་ཀྱི་ཁར་ཟླུམ་པོ་པདྨ་འདབ་བཞིའི་བསྐོར་བ་ཞིག་ལ་ཟླུམ་བཤོས་ཞེ་གཉིས་ཀྱིས་བསྐོར་བ་དང་། ཁྲོ་བོ་ལའང་སྣོད་གཞན་གཅིག་ཏུ་གདན་གོང་མཚུངས་ཀྱི་ཁར་དཔལ་གཏོར་ལྔ་ནི་ཁྲག་འཐུང་རིགས་ལྔ་ཡབ་ཡུམ། དེའི་ཕྱི་གྲུ་གསུམ་ཉི་ཤུ་ནི་ཀཽ་རི་བརྒྱད་དང་། སེང་ཧ་བརྒྱད་སྒོ་མ་བཞིའོ། །དེའི་ཕྱི་རོལ་མདུན་དུ་ཟླུམ་པོ། གཡས་སུ་གྲུ་བཞི། རྒྱབ་ཏུ་ཟླ་གམ། གཡོན་དུ་གྲུ་གསུམ་བདུན་རེས་བསྐོར་བ་དབང་ཕྱུག་ཉེར་བརྒྱད། ཞི་ཁྲོ་གཉིས་ཀའི་གཏོར་མའི་མཐར་མཐེབ་ཀྱུ་གྲངས་ངེས་མེད་པས་བསྐོར་ཞིང་དཀར་རྒྱན་དང་། ཤ་མར་ཟས་སྣ་སོགས་ཀྱིས་ཀྱང་གཏམས་ལ་བཞག །གཞན་ཡང་རང་གི་རྒྱུན་གསོལ་གྱི་གཏོར་མ་ཡང་རྒྱས་བསྡུས་འོས་བབས་དང་བསྟུན་ཏེ་བཤམས། རྒྱས་པར་སྤྲོ་ན་བསྐང་གཏོར་སོགས་བཤམས་པར་གསུངས་ཀྱང་བསྙེན་བསྒྲུབ་ལ་དེ་ཙམ་མོ། །དེ་དག་གི་གཡས་གཡོན་དུ་སྨན་རཀ་སོ་སོའི་རྒྱུ་རྩི་བཏབ་པ་དང་། དལ་

གྱི་མདུན་ནས་ཕྱི་ནང་གི་མཆོད་པ་ཉིས་རིམ་མམ། ཕྱི་མཆོད་སྣ་བདུན་ཕྲེང་ཚར་དུ་བཤམས། གཞན་ཡང་མཁོ་བའི་ཡོ་བྱད་རྒྱན་བཀོད་ལྟར་རམ་མིན་ཀྱང་ཡུངས་ཐུན་དང་འདྲེ་འཇིགས། རྡོལ་དྲིལ་སྤོས་སྣ་སོགས་ཡོད་བཞིན་དུ་མི་བཤམས་པ་དང་། མེད་ལ་ཕུག་བཅོལ་ནས་མཚམས་བསྒྲུབ་གཤོལ་བ་སོགས་གཉིས་སུ་མ་ལྷུང་བ་གཅེས་སོ། །རང་ཉིད་ཀྱང་དཀྱིལ་འཁོར་ལ་ཞལ་ཕྱོགས་པར་གདན་ནང་ཚང་ཅན་ནམ་གང་ཡང་རུང་བ་བཏིང་བའི་འོག་ཏུ་འབྲས་སམ་ས་དཀར་གྱིས་གཡུང་དྲུང་བྲིས་ན་ལེགས་པ་ལས་རྒྱ་གྲམ་བྲིས་ན་ཕྱག་མཚན་འགོང་བའི་ཉེས་པ་འགོ་ཕྱིར་མི་རུང་བར་བཤད་དོ། །ཕྱི་སྒོའི་ལོག་ཅི་བདེར་རྒྱལ་ཆེན་ཐོ་འཛུག་གི་ཆེད་དུ་ཐོ་དཀར་པོ་བརྩིགས་ནས་མི་འགྱེལ་ཐབས་ཀྱང་གནད་ཅིག་ཡིན་ཞིང་། ཐོ་བྱང་ལ་རྒྱལ་ཆེན་བཞིའི་སྔགས་འདོད་གསོལ་བཅས་བྲིས་པའང་སྟ་གོན་བྱ་བ་སོགས་མདོར་ན་མཚམས་ལ་མ་ཞུགས་གོང་ནས་རྟོག་འཇུག་ཞིབ་མོས་ཕྱིར་འདོན་ནང་སྐྱེལ་གྱི་ཀ་ཅ་ནོར་རྫས་སོགས་འབྱིན་འཇུག་དང་། དེ་དག་གི་སྔོན་དུ་ཚོགས་བསག་གི་རིམ་པ་སྤྱི་དང་། ཁྱད་པར་སྲོག་བླུ་ཉེའུ་འདོན་ཆུ་གཏོར། འཁོར་འདས་མཆོད་པ་གང་ནུས་སོགས་ཡར་མཆོད་མར་སྦྱིན་བཅས་རང་འབྱོར་དང་བསྟུན་ཏེ་ནན་ཏན་བྱ་བ་ལ་གལ་ཤིན་ཏུ་ཆེའོ། །དེ་དག་ནི་སྦྱོར་བ་སྔོན་འགྲོའི་རིམ་པའོ། །གཉིས་པ་དངོས་གཞི་ལའང་གཉིས་ཏེ་དང་པོ་མཚམས་ལ་སྡོད་ཉིན་གྱི་སྔ་དྲོ་ནས་རིག་འཛིན་འདུས་པ་སོགས་ཞི་དྲག་གང་རུང་གི་ཆོ་ག་འཚམས་པ་ཞིག་བཏང་ནས་ཛ྄བ་བཟླས་བསྟོད་པ་བཅས་རྫོགས་ནས་སྤྲོ་ན་ཚོགས་མཆོད་ཀྱང་བཏང་ཞིང་། ཕྱི་སྒོའི་ཐོ་རྩར་ཕྱིན་ལ་རྒྱལ་ཆེན་ཐོ་འཛུག་རྒྱས་བསྡུས་ཅི་རིགས་ཀྱིས་ཐོ་བྱང་མི་འགུལ་བར་བསྡམས། སྡེ་བརྒྱད་མཆོད་པ་ཡང་ནན་ཏུ་བཏང་ལ་ཕྱི་ནང་འགྲུལ་

བགྲོད་རྒྱུན་གཅོད། ནང་དུ་ལོག་ནས་ཆོ་གའི་མཇུག་བསྡུས་ནས་རེ་ཞིག་དལ་བར་བསྡད་ཅིང་། དགུང་མོའི་ཐུན་ལ་བབ་ཚེ་མཚམས་བསྒྲུབ་ལ་འཇུག་པར་བྱའོ། །གཉིས་པ་ནི་སྤྲོས་པ་བསྐྱུངས་ན། སྔ་དྲོ་ཞི་བའི་ཆོ་ག་བཞག་ཅིང་སྐབས་འདིར་ཞི་ཁྲོའི་ཆོ་ག་ལ་འཇུག་པའི་སྔོན་དུ་ཐར་ལམ་དཀར་པོའམ། འདི་ཉིད་ཀྱི་རང་གཞུང་གི་སྔོན་འགྲོའམ། ཀློང་སྙིང་གི་སྔོན་འགྲོ་གང་རང་ཞིག་དང་འདི་ཉིད་ཀྱི་བརྒྱུད་འདེབས་ཡང་སྔོན་དུ་བཏང་ནས། སྡེ་བརྒྱད་མཆོད་པ་ཚར་ཁ་ཤས་ལྡབ་ཅིང་མཐར་ཕྲིན་བཅོལ་ཡང་ནན་ཏན་བྱ། བགེགས་གཏོར་ཡང་འདི་ཉིད་ལ་འོས་པའི་མཚམས་ལྷ། རང་ཉིད་སྐད་ཅིག་གིས་ཐ་མལ་གྱི་ལུས་སེམས་གནས་འགྱུར་གྱི་ཚུལ་དུ་བཅོམ་ལྡན་འདས་དཔལ་ཆེན་བཛྲ་ཧེ་རུ་ཀ་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་གནམ་ལྕགས་རྡོ་རྗེ་རྩེ་ལྔ་པ་མེ་རབ་ཏུ་འབར་བ་དང་། གཡོན་བསྡིགས་མཛུབ་ལས་ཀྱང་མེ་རི་དང་མེ་དཔུང་འབར་བ་ཞབས་གཉིས་གྱད་ཀྱི་འདོར་སྟབས་བསྒྲད་ཅིང་འབར་བའི་གར་དགུ་དང་དཔལ་གྱི་ཆས་བརྒྱད་ཀྱིས་འཇིགས་པར་སྤྲས་ཤིང་ཚམ་རྔམས་གཟི་བརྗིད་སོགས་བཟོད་པར་དཀའ་བའི་སྐུ་ལས་ཁྲོ་མཚོན་མེ་དཔུང་གི་ཚོགས་དཔག་ཏུ་མེད་པ་འཕྲོས་ནས་བགེགས་ཚོགས་ལོག་པར་འདྲེན་པ་ཐམས་ཅད་བསྐྲད་ཅིང་ཚར་བཅད་པའི་བདག་ཉིད་ཅན་དུ་གྱུར་ཞེས་བསམ། བགེགས་གཏོར་བྱིན་རླབས་དང་བསྔོ་ཚིག་གང་རུང་གིས་བསྔོས་མཐར། ལས་བྱང་རྩར་ཕྲེང་གི །ཧཱུྃ་ང་ཉིད་ལྷ་ཡི་ང་རྒྱལ་གྱིས༔ སོགས་ཀྱིས་བགེགས་བསྐྲད་ཅིང་མཚམས་བཅད་པ་ནས་བཟུང་ཛ྄བ་བཟླས་བར་དཀྱུས་ལྟར་བྱ་བ་ལས་མེད་མོད། འོན་ཀྱང་ལས་བྱང་ཆུང་བ་འདོན་པར་སྤྲོ་ནའང་དེ་ལྟར་བྱས་པས་ཆོག་པར་མངོན་ཞིང་། ཉི་མ་སྔ་ཕྱི་ལས་བྱང་གཉིས་རེས་

མོས་སམ། ཡང་ན་སྔ་ཆོག་ཀུན་ལ་རྒྱས་པ་ཚར་རེ་དང་། གཞན་མ་ཀུན་ལ་ཆུང་བ་གཅིག་པོས་ཆོག་ཅིང་། ཚིག་ཚོགས་ལས་བྱང་ཆེ་བ་རྒྱས་ཀྱང་ལས་བྱང་ཆུང་བ་འཇུག་པ་བདེ་ཕྱིར་ཐུན་ཐམས་ཅད་ལ་དེ་ཁོ་ནས་ཀྱང་ཆོག་པར་ངེས་སོ། །གང་ལྟར་ཡང་ཛ྄བ་ལ་བབས་ཚེ། བསྙེན་པ་དང་བསྒྲུབ་པ་དང་བསྒྲུབ་ཆེན་དང་ལས་སྦྱོར་བཞི་ལས་དང་པོ་ནི། སྤྱིར་ཆོ་གའི་བྱ་བ་ཐམས་ཅད་བསྙེན་པར་འདུ་ཞིང་། ཁྱད་པར་ཞི་ཁྲོའི་ཆོ་ག་གང་ཡིན་ཀྱང་འདྲ་སྟེ་སྣང་སྲིད་གཞིར་བཞེངས་ཀྱི་དཀྱིལ་འཁོར་དུ་སྒྲུབ་དགོས་པ་ལ་བདག་མདུན་བུམ་གསུམ་དུ་འཛིན་པའི་ཕྱོགས་རིས་ལྟར་མ་ཡིན་ཏེ། བདག་གཞན་འགྲོ་བ་རིགས་དྲུག་གི་སེམས་ཅན་ཐམས་ཅད་ཞི་ཁྲོའི་དཀྱིལ་འཁོར་གཅིག་ཏུ་བསྒྲུབ་པ་ལ་སྣོད་ཀྱི་འཇིག་རྟེན་མ་ལུས་པ་རྟེན་ཞི་ཁྲོའི་དལ་དུ་བསྒོམས་པས་སྦྱང་གཞི་སྣོད་ཀྱི་བག་ཆགས་དག་པར་བྱེད་ལ། དེའི་ནང་དུ་བརྟེན་པའི་ལྷ་ནི་ཀུན་གཞི་སོགས་ཚོགས་བརྒྱད་ཀྱི་སེམས་རིགས་བརྒྱའི་ལྷ་ཚོགས་སུ་འཆར་བའི་དག་བྱ་ཕུང་ཁམས་སྐྱེ་མཆེད་ཀྱི་དྲི་མ་དག་བྱེད་ཞི་ཁྲོའི་ལྷ་ཚོགས་སྟེ་རྣམ་པ་ལམ་བྱེད་ཀུན་གཞི་རྣམ་དག་ཀུན་ཏུ་བཟང་པོའི་ཐུགས་ཀར་ཀུན་གཞིའི་རྣམ་ཤེས་བདེ་སྟོང་གཉིས་སུ་མེད་པའི་རྩལ་སྣང་གི་རྟོག་ཚོགས། སེམས་དང་སེམས་བྱུང་གི་རྣམ་པར་ཤར་བ་མཐའ་དག་གཟུགས་ཕུང་རྣམ་པར་སྣང་མཛད་དུ་དག་པས་མཚོན་ཡུལ་དང་དབང་པོའི་འདུ་འཕྲོད་ཐམས་ཅད་ཀྱི་དག་བྱ་དག་འབྲས་ལས་རིགས་བརྒྱའི་ལྷ་སྐུར་གྲུབ་ཚུལ་མ་ཤེས་པའི་བསྐྱེད་རིམ་རང་རྒྱུད་པ་ནི་རི་མོའི་མར་མེ་དང་མཚུངས་སོ། །དེའི་ཕྱིར་ན་ལས་བྱང་ཚོར་གྲོལ་གྱི་བསྐྱེད་རིམ་སྐབས་སུ། བདག་ཉིད་ཐ་མལ་རང་སེམས་འདི༔ རྟོག་མེད་སྐད་ཅིག་དྲན་རྫོགས་སུ༔ ཀུན་ཏུ་བཟང་པོ་སྐུ་མདོག་

མཐིང་༔ ཞེས་པ་བྱ་བྱེད་དང་ཡིད་ཆོས་སུ་འཛིན་པ་རྣམ་པར་དག་པའི་གདངས་ཀྱི་ཀུན་ཏུ་བཟང་པོ་སྣང་སྟོང་མཚོན་པའི་ཡབ་ཡུམ་ལྟར་བསྟན་ནས་ཞི་ཁྲོའི་ལྷ་ཚོགས་ཐམས་ཅད་ཀྱི་འཆར་གཞིར་གྱུར་པ་སྟེ། དེ་ཡང་དབྱིངས་ལས་ཤར་བཞིན་ཀུན་གྱི་བདག་ཉིད་དུ་མཚོན་ཕྱིར་གཞལ་ཡས་ཁང་ཡོངས་ལ་སྒྲིབ་མེད་དུ་ཁྱབ་པའི་ཐུགས་ཀའི་ཁྱམས་ལ་རིགས་ལྔ་ཡབ་ཡུམ་དང་སེམས་དཔའ་སེམས་མ་བཅུ་དྲུག་རྣམས་བཞུགས་ཤིང་རྟེན་དང་བརྟེན་པ་ཐམས་ཅད་སྣོད་ལ་སྣོད་བཅུགས་པ་ལྟ་བུའི་སྒྲིབ་གཡོགས་ཅན་མ་ཡིན་པས་ཕྱི་གསལ་ནང་གསལ་ཞེས་བཤད་ལ། ཁྲག་འཐུང་གི་ལྷ་ཚོགས་ཀྱང་ཀླད་པ་དུང་ཁང་ཕུང་ཁམས་སྐྱེ་མཆེད་ལ་དག་པ་སྦྱར་བའི་ལུས་དཀྱིལ་དངོས་བསྟན་དུ་མི་བཟུང་སྟེ། འདི་ནི་འབྲས་དུས་ཀྱི་གདན་གསུམ་ཚང་བའི་ལྷ་གདོད་ནས་ཡོད་པའི་གསལ་འདེབས་ཙམ་མོ། །དེའང་ཞི་ཁྲོའི་དཀྱིལ་འཁོར་གཉིས་ལས་དང་པོ་ནི། གཙོ་བོ་ཀུན་ཏུ་བཟང་པོའི་ཐུགས་རིག་པ་རང་སྣང་གི་ངོ་བོ་ཉིད་རྣམ་སྣང་སྟེ། རྔམ་གློག་ལས། དབུས་སུ་རྣམ་པར་སྣང་མཛད་གཙོ། །ཞེས་གསུངས་པའི་ཕྱིར་རོ། །རྣམ་སྣང་གི་མདུན་ནས་བརྩམས་ཏེ་གཡས་བསྐོར་གྱིས། ཕྱོགས་བཞིར་ཡེ་ཤེས་བཞིའི་བདག་ཉིད་ཕུང་ཁམས་ཀྱི་རང་བཞིན་གདོད་ནས་དག་པའི་ངོ་བོ་རིགས་བཞིའི་གཤེགས་པ་གཤེགས་མ་ལ་འཁོར་རང་རང་གི་སེམས་དཔའ་དང་སེམས་མ་རྣམས་ཀྱིས་བསྐོར་ཞིང་། སྒོར་བཞིར་སྒོ་བ་ཡབ་ཡུམ། རང་གཞུང་དུ་གསལ་བའི་གནས་དྲུག་ཏུ་ཐུབ་པ་དྲུག་རྣམས་གསལ་ཞིང་། ཁྲག་འཐུང་གི་ལྷ་ཚོགས་ཀྱང་གོང་གསལ་བཞིན་ལུས་ཀྱི་ལྷའི་བཞུགས་ཚུལ་དང་དོན་མཐུན་པར་རང་བཞིན་སྤྲུལ་པའི་ཞིང་ཁམས་ལྔའམ་བཅུར་བཤད་པའི་སྟེང་ཕྱོགས་དུར་ཁྲོད་མེ་རི་འབར་བའི་ཞིང་གི་རྟེན་དང་བརྟེན་པར་བཅས་པའི་བཀོད་པ་དང་

དོན་མཐུན་གྱི་ཞི་བའི་སྐབས་སུ་དཀྱུས་བཞིན་དང་། ཁྲོ་བོའི་རྟེན་དང་བརྟེན་པར་བཅས་པའང་གོང་གི་མེ་རི་འབར་བའི་བཀོད་པ་དང་མཚུངས་པར་གསལ་གདབ་པ་ཙམ་ཡིན་ལ། དེ་ལྟར་བསྐྱེད་པ་ཡང་རིམ་པ་དང་པོའི་ལམ་རིམ་གྱིས་བགྲོད་པ་ལྟར་མ་ཡིན་ཞིིང་འདི་ནི་སྒྲུབ་པ་པོའི་སྒོ་གསུམ་སྐུ་གསུམ་རྒྱལ་བའི་ལྷ་ཚོགས་སུ་བསྒྱུར་བའི་ཐབས་ཐེག་རྩེ་ཤིན་ཏུ་རྣལ་འབྱོར་གྱི་ལུགས་ཡིན་པས་འདི་མན་གྱི་ལམ་རིམ་དག་དང་མཚུངས་པར་མི་བལྟའོ། །དེ་ཡང་ཛ྄བ་དངོས་ལ། དང་པོ་བསྙེན་པ་ནི། ཟུར་ཆེན་ཆོས་དབྱིངས་རང་གྲོལ་གྱི་བསྙེན་ཡིག་ལྟར་འགོད་པ་ལ། རྣམ་སྣང་གི་ཐུགས་ཉི་ཟླའི་དཀྱིལ་ན་ཀུན་ཏུ་བཟང་པོ་ཡབ་ཡུམ་མཐིང་ཀ་ཕྱག་གཉིས་མཉམ་བཞག་ཞབས་གཉིས་སྐྱིལ་ཀྲུང་དུ་བཞུགས་པ་ཚོན་གང་འོད་ཀྱི་གོང་བུ་འབར་བར་འོད་འཕྲོས་སྣང་སྲིད་སྣོད་བཅུད་ཐམས་ཅད་ལྷ་དང་ལྷ་མོའི་གཞལ་ཡས་ཁང་ཆེན་པོ་གཅིག་ཏུ་གྱུར་ཏེ་ཆོས་ཐམས་ཅད་སངས་རྒྱས་ཀྱི་ཞིང་འོག་མིན་སྡུག་པོ་བཀོད་པའི་རང་བཞིན་དུ་གྱུར་པའི་ངང་ལ་མཉམ་པར་བཞག་གོ །དེ་ལྟར་སྒོམ་དགོས་པ་ཡང་། རྔམ་གློག་ལས། གཙོ་བོའི་ཐུགས་ཀར་གཞི་ཡི་ཀུན་ཏུ་བཟང་། །ཚོན་གང་འོད་ཀྱི་གོང་བུ་གསལ་བར་བསྒོམ། །ཞེས་གསུངས་པ་ལྟར་རོ། །བར་འདིར་ཛ྄བ་དབྱངས་ཁྲི་འབུམ་བཟླས། ཉམས་སྐྱོང་ཤེས་པ་འུར་ཆོད་བཏང་། ཞེས་གསུངས་པས། ཀུན་ཏུ་བཟང་པོའི་ཐུགས་ཀར་ཟླ་ཉིའི་གདན་ལ་ཏིང་འཛིན་སེམས་དཔའ་ཡི་གེ་ཨ་མཐིང་གའི་མཐའ་སྐོར་དུ་སྔགས་ཀྱི་ཕྲེང་བ་ཞལ་ནང་དུ་བསྟན་པ། བཀོད་ཚུལ་གཡས་སུ་བཀོད་པ་ཡིག་འབྲུ་རྣམས་རང་མལ་དུ་མི་གཡོ་བར་སྡོད་བཞིན་འོད་ཟེར་སྣ་ལྔའི་ཟེར་ཐག་སྐར་མའི་ཕྲེང་བ་ལྟར་འཕྲོས་པས་བདེ་བར་གཤེགས་པ་ཡོངས་ཀྱི་ཐུགས་རྒྱུད་བསྐུལ།

སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྒྲིབ་པ་མ་ལུས་པ་སྦྱངས། སླར་ཡང་འོད་ཟེར་ཚུར་འདུས་ཞི་ཁྲོའི་ལྷ་ཚོགས་ཀྱི་ཐུགས་རྒྱུད་བསྐུལ། སེམས་ཅན་ཐམས་ཅད་ཞི་ཁྲོའི་གོ་འཕང་ལ་བཀོད། ཚུར་འདུས་འོད་ཟེར་དང་བདུད་རྩི་ཁ་དོག་ལྔ་ལྡན་གྱིས་རྩ་ཁམས་ཀྱི་ལྷ་ཚོགས་རྣམས་ཐུགས་བརྒྱུད་བདེ་བས་མཉེས། འཁོར་བ་ཐོག་མ་མེད་པ་ནས་བསགས་པའི་ལས་ཉོན་སྡིག་སྒྲིབ་དམ་ཚིག་ཉམས་ཆགས་འགལ་འཁྲུལ་ཉེས་བྱས་སོགས་སྒྲིབ་པ་མ་ལུས་དག །མཆོག་དང་ཐུན་མོང་གི་དངོས་གྲུབ་ཐོབ་པར་གྱུར། །ཞེས་བསམ་ལ། ༀ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷརྟུ་ཨ། ཞེས་ཞི་བ་སྤྱི་དྲིལ་ཅི་ནུས་བཟླ་ཞིང་། དུང་ཁང་ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་སྟེང་དུ་ཧཱུྃ་ཡིག་མཐིང་ནག་ལ་རུ་ལུའི་སྔགས་ཕྲེང་གིིས་གོང་བཞིན་བསྐོར་བ་ལས་ཀྱང་འོད་ཟེར་སྤྲོ་བསྡུ་བྱ་ཞིང་རུ་ལུ་ཅི་ནུས་བཟླའོ། །དེ་ལྟར་ཞི་ཁྲོ་གཉིས་ཀའི་སྔགས་ཕྲེང་འཁོར་ལུགས་བློ་ཡུལ་དུ་ངེས་པར་བྱས་ནས། གཙོ་འཁོར་ཡོངས་རྫོགས་ཀྱི་སྔགས་རྣམས་ལྷ་ཚོགས་གསལ་འདེབས་ཀྱི་ཚུལ་དུ་བཟླ་སྐབས་ཀྱི་དམིགས་པ་ནི། ཞི་བ་རྣམས་ཀྱི་ཐུགས་ཀར་ཟླ་སྟེང་དུ་ཨཿཡིག་མཐིང་ནག་དང་། ཁྲོ་བོ་རྣམས་ཀྱིས་ཐུགས་ཀར་ཉི་གདན་ལ་ཧཱུྃ་མཐིང་ལ་ཞི་ཁྲོ་སོ་སོའི་སྔགས་ཀྱིས་བསྐོར་བ་དང་། འཁོར་གྱི་ཚོགས་དང་བཅས་པའི་སྐུ་ལས་འོད་ཟེར་ཁ་དོག་སྣ་ཚོགས་པ་ཕྱོགས་བཅུའི་ཞིང་རབ་འབྱམས་རྒྱ་མཚོར་འཕྲོས་པས་ནམ་མཁས་གར་ཁྱབ་ཆོས་སྐུ་དང་ལོངས་སྐུས་ཁྱབ་པ་དང་སེམས་ཅན་གྱིས་གར་ཁྱབ་སྤྲུལ་སྐུས་ཁྱབ་པའི་ཞི་ཆགས་ཁྲོ་བོའི་དཀྱིལ་འཁོར་གཙོ་འཁོར་དང་འདོད་དགུར་བསྒྱུར་བའི་མངོན་རྟོགས་ལྟར་སྣང་བ་ཀུན་ལ་སྔགས་ཕྲེང་གི་འོད་ཟེར་ལས་སྤྲུལ་པས་བླ་ན་མེད་པའི་མཆོད་པ་འཁོར་བ་མ་སྟོང་གི་བར་དུ་རྒྱུན་མི་འཆད་པའི་རང་

བཞིན་དུ་སྤྲུལ་ནས་ཕུལ་བས་ཟག་མེད་ཀྱི་བདེ་སྟོང་གི་མཆོད་པས་མཉེས་ནས། སྐུའི་ཆ་རྣམས་ནས་ཞི་ཁྲོ་དམ་པ་རིགས་བརྒྱ་སྐུ་ཆེ་ཆུང་དཔག་གིས་མི་ལང་བ། གསུང་ལས་བཏགས་གྲོལ་གྱི་སྔགས་རྣམས་གསེར་བཙོ་མའི་མདང་ལྡན་གྱི་ཡིག་འབྲུ་ཁ་ཆར་བུ་ཡུག་འཚུབ་པ་ལྟ་བུ། ཐུགས་ལས་འོད་ཁ་དོག་སྣ་ལྔ་ལས་གྲུབ་པའི་མཆོད་རྟེན་དང་། རིང་བསྲེལ་བསམ་གྱིས་མི་ཁྱབ་པ་དང་། རྒྱལ་བ་རྣམས་ཀྱི་གསང་བ་གསུམ་གྱི་བྱིན་ནུས་བཅུད་དུ་དྲིལ་བ་ༀ་དཀར་ཨཱཿདམར་ཧཱུྃ་མཐིང་གི་རྣམ་པ་འཇའ་ཚོན་ཐིག་ལེ་ཐིག་ཕྲན་དང་བཅས་པ་སྔགས་ཀྱི་རང་སྒྲས་བསྐྱོད་དེ་རྒྱ་མཚོ་ཆེན་པོར་ཁ་ཆར་འབབ་པ་བཞིན་དུ་རང་ཉིད་ཀྱི་སྒོ་གསུམ་ལ་ཐིམ་པའི་མོད་ལ་འོད་ཟེར་འགྲོ་བ་རིགས་དྲུག་གི་གནས་རྣམས་སུ་འཕྲོས་པས་སོ་སོའི་སྡིག་སྒྲིབ་བག་ཆགས་ཉེས་ལྟུང་ཐམས་ཅད་བ་མོར་ཉི་ཟེར་ཕོག་པ་བཞིན་དུ་དག་ནས་སྐུ་གསུམ་རྒྱལ་བའི་གོ་སར་དབུགས་དབྱུང་བར་གྱུར་ཞེས་བསམ་ལ། ལྟ་སྒོམ་གྱི་ངང་ནས་ཧཱུྃ་བཛྲ་ཙིཏྟ་ཨ༔ སོགས་རང་གཞུང་ལྟར་དལ་བྲེལ་དང་བསྟུན་ཏེ་ཚར་བཅུ་ཕྲག་གམ། བདུན་ལྔ་གསུམ་སོགས་དལ་བུས་གཏོང་མཐར་སྤྱི་དྲིལ་གྱི་དམིགས་པ་ཡང་བསྐྱར་པདྨ་ཀུན་གྲོལ་རྣམ་རྒྱལ་གྱི་དགོངས་བཞེད་བཞིན་ལ་འཇུག་དགོས་པའོ། །ལྷ་ཚོགས་ཞི་བ་རྣམས་ཀྱི་སོགས། ཡང་ན་ཞི་ཁྲོ་སྤྱི་དྲིལ་དུ་བྱེད་ན་ཞི་ཁྲོའི་སྔགས་སྦྲེལ་ཏེ་བཟླས་སོ། །ཡང་ན་ཞི་བ་དང་ཁྲོ་བོའི་སྦྲེལ་ཛ྄བ་ཅེས་སོ་སོའི་གཙོ་འཁོར་སྦྲེལ་ཏེ་བཟླ་ལུགས་དང་བཏགས་གྲོལ་ཕུང་པོ་རང་གྲོལ་ལྟར་བཟླ་ལུགས་དང་། དེ་དག་སོ་སོའི་དམིགས་རིམ་ཀྱང་ཟུར་ཆེན་པས་མཛད་པའི་བསྙེན་ཡིག་དེར་བཤད་མོད། འོན་ཀྱང་འཇུག་པ་ཅུང་ཟད་དཀའ་བ་ལ་བསམ་ཏེ་ཟོར་ཡངས་

པའི་དབང་དུ་བྱས་ན་བཤད་མ་ཐག་པའི་དམིགས་པ་ལའང་བསྙེན་པ་དང་། བསྒྲུབ་པ་དང་བསྒྲུབ་པ་ཆེན་པོ་དང་ལས་སྦྱོར་ཀྱང་ཚང་བར་སེམས་སོ། །ཅིའི་ཕྱིར་ན་ཡབ་བསྐྱེད་བསྙེན་པ་དང་། ཡབ་ཡུམ་གཉིས་བསྐྱེད་བསྒྲུབ་པ། འཁོར་བསྐྱེད་བསྒྲུབ་པ་ཆེན་པོ་ལྟར་གསུངས་པ་ཡང་ཡོད་ལ། ཐུགས་ཀར་སྔགས་ཕྲེང་བཀོད་པ་བསྙེན་པ་དང་། འོད་ཟེར་སྤྲོ་བསྡུས་ཀྱིས་བྱིན་ནུས་བསྡུ་བ་སྒྲུབ་པ། སྣོད་ལྷའི་གཞལ་ཡས་ཁང་དང་བཅུད་ཞི་ཁྲོའི་ལྷ་ཚོགས། སྒྲར་གྲགས་སྔགས། དྲན་རྟོག་ཆོས་ཉིད་ཀྱི་རོལ་པར་ལམ་དུ་ཁྱེར་བ་བསྒྲུབ་ཆེན། འགྲོ་བ་རིགས་དྲུག་གི་སྡུག་བསྔལ་རྒྱུ་དང་འབྲས་བུར་བཅས་པ་སྦྱངས་ནས་ཞི་ཁྲོའི་གོ་འཕང་ལ་བཞག་པ་ལས་སྦྱོར་དུ་དབྱེའོ། །དེ་ལའང་ལས་བཞིའི་ཆོ་ག་དང་ལྔ་ལས་ཐུགས་ཀའི་སྔགས་ཕྲེང་ལས་འོད་ཟེར་དཀར་སེར་དམར་ལྗང་མཐིང་སོགས་འཕྲོས་པས་ཞི་རྒྱས་དབང་དྲག་གི་ལས་བཞི་དང་ཟུང་འཇུག་བདེ་བ་ཆེན་པོ་མཆོག་གི་དངོས་གྲུབ་སོགས་བསྡུ་བ་དང་ཐོབ་པའི་དམིགས་འདུན་ཡང་ཤེས་པར་བྱའོ། །དེ་ལ་སྒྲུབ་ཆེན་དང་འབྲེལ་ན་དཀྱིལ་འཁོར་བསྐོར་ཞིང་ཛ྄བ་དབྱངས་བྱ་བར་གསུངས་སོ། །མདོར་ན་དུས་དང་གནས་སྐབས་ཐམས་ཅད་དུ་འཁྱེར་སོ་གསུམ་དང་མི་བྲལ་བ་ཡང་ལུས་སྣང་སྟོང་ལྷར་སྐུར་ལམ་མེ། ངག་གྲགས་སྟོང་སྔགས་སུ་ལྡིར་རེ། སེམས་རིག་སྟོང་རྒྱལ་བའི་ཐུགས་སུ་ལྷང་ངེ་བའི་ངང་ནས་བཟླས་པ་ལ་བརྩོན་པར་བསྐྱེད་དོ། །འདི་ལྟར་བདག་མདུན་བུམ་གསུམ་སོགས་མེད་པ་ལ་ཡོད་པར་གྱི་སྒྲོ་བཏགས་ཀྱང་ཀུན་བརྟགས་ཀྱི་བསྐྱེད་རིམ་དང་མི་འདྲ་ཞིང་འདི་ནི་འབྲས་བུ་རྒྱལ་བ་སྐུ་གསུམ་གྱི་བཞུགས་ཚུལ་དང་མཐུན་པའི་ཡོངས་གྲུབ་ཆེན་པོའི་བསྐྱེད་རིམ་ཕྱི་ནང་སྣོད་བཅུད་ཐམས་ཅད་ཡེ་ནས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་སུ་

རྣམ་པར་དག་པའི་རང་བཞིན་ཡིན་པ་ལ་ཡིན་པར་གསལ་གདབ་པ་ཙམ་ལས་གཞན་མེད་པས་ཛ྄བ་ཁང་དབྱེ་བ་སོགས་མ་བྱས་ཀྱང་འགལ་བ་མི་འདུག་སྙམ་མོ། །དེའང་ཉིན་མཚན་ཟུང་ལ་ཐུན་གཉིས་བྱེད་པའི་ཚུལ་ཡང་སྣང་མོད། འོན་ཀྱང་སྔ་ཐུན་དང་། དགུང་ཐུན་གཉིས། སྲོད་ཐུན་དང་ཐོར་ཐུན་གཉིས་སྟེ་བཞི་པོ་ནི་ལག་ཏུ་བླང་བ་བདེའོ། །ཟླ་བ་གཅིག་ལ་མཚོན་ན་ཉིན་དང་པོའི་དགུང་ཐུན་ནས་འགོ་བཟུང་བའི་ཞག་སྔ་མ་བཅུ་པོར་ཐུན་སྒང་ཅུང་ཟད་ཐུང་བ་དང་། ཐུན་བར་རིང་ཙམ་བྱེད་ཅིང་། དེ་ནས་བཟུང་རིམ་གྱིས་ཐུན་སྒང་རིང་བ་དང་ཐུན་མཚམས་ཐུང་བ་ལ་བསླབ་པོ། །དེའང་སྔགས་ཀྱི་གྲངས་ཚད་ཀྱང་རིམ་གྱིས་ཇེ་མང་ལ་སློབ་པ་ལས་ཇེ་ཉུང་མི་རུང་བ་དང་། ཐུན་སྒང་གི་སྔགས་གྲངས་ཀྱང་མ་ཚང་བཞིན་དུ་ཐུན་གྲོལ་མི་རུང་བར་ཡང་གསུངས་པ་ཐོས་སོ། །ཐུན་གྲོལ་སྐབས་ལ་སླེབས་ཚེ་འདི་ལྟར་རོ། །བརྒྱ་སྟོང་ཁྲི་འབུམ་ས་ཡ་བྱེ་བ་དུང་ཕྱུར་ནས་ཡར་འཕེལ་བར་གྱུར་ཅིག །ༀ་ཨ་ཨཱ་ཨི་ཨཱི་སོགས། ཀ་ཁ་ག་གྷ་ང་སོགས། ཤ་ཥ་ས་ཧ་ཀྵ༔ ཡེ་དྷརྨ་བཅས་ལན་གསུམ་ལྡབ་ལ། བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས་ན་བདག་སོགས་སེམས་ཅན་ཐམས་ཅད་ཀྱི་སྒྲིབ་གཉིས་བག་ཆགས་དང་བཅས་པ་བྱང་ཞིང་དག་ནས་མཆོག་གི་དངོས་གྲུབ་རྒྱལ་བ་ཞི་ཁྲོའི་གོ་འཕང་མངོན་སུམ་དུ་ཐོབ་པ་དང་། ཐུན་མོང་དངོས་གྲུབ་ཕྲིན་ལས་རྣམ་པ་བཞི་འགྲུབ་པ་དང་། གྲུབ་པ་ཆེན་པོ་བརྒྱད་ཐོབ་པ་སོགས་མཆོག་

ཐུན་མོང་གཉིས་ཀྱི་དངོས་གྲུབ་དམ་པ་རྩོལ་བར་མཛད་དུ་གསོལ། ཞེས་བརྗོད་ལ། མཆོད་ཅིང་བསྟོད་མཐར་བཤགས་ཚིག་གང་རུང་གི་རྗེས་སུ་ཡིག་བརྒྱ་ལན་གསུམ་བརྗོད་ཅིང་དགེ་བསྔོ་ཡང་བྱ། དེ་ཡང་སྡེ་བདུན་ནི་ཉིན་ལྟར་གྱི་དགོང་མོའི་ཐུན་མཚམས་སུ་གཏོང་རྒྱུ་ཆགས་མེད་དང་། བརྒྱ་ཀློང་གཉིས་མཚམས་ཀྱི་ཐོག་མཐའ་བར་གསུམ་ཙམ་ལས་བསྙེན་པ་གཙོ་བོར་འདོན་པ་ཡང་གལ་ཆེ་མོད། ཉིན་ལྟར་འདོན་པར་སྤྲོ་ན་མི་ཆོག་པ་ཡང་མ་ཡིན་ནོ། །བསྐང་བ་ཚོགས་མཆོད་ཀྱང་དེ་མཚུངས་ལས་མི་དགོས་སོ། །ཐུན་ལས་ལངས་སྐབས་ཀྱང་འཁྱེར་སོ་གསུམ་དང་མ་བྲལ་བར་བྱ་ཞིང་བཟའ་བཏུང་ཚོགས་འཁོར་གྱི་ཚུལ་དུ་རོལ་པ་དང་དེ་ལས་གཞན་རྣམ་ཀུན་ཏུ་འཆག་མི་རུང་བའི་རྒྱུན་ཁྱེར་རྣམས་མི་ལུས་ཙམ་རེ་བྱེད་པ་ལས་དོན་རྩ་བསྙེན་བསྒྲུབ་ཁོ་ན་ལ་དྲིལ་བ་ཤིན་ཏུ་གལ་ཆེ། དེའང་སྤྱིར་བསྙེན་ཡིག་རྣམས་ལས་གསུངས་པ་ལྟར་རི་སྒོག་ཀླུང་སྒོག་སྔགས་ཀྱི་ནུས་པ་འཕྲོག་པའི་ཁ་ཟས་གང་ཡང་རུང་སྟེ་བྱིན་གྱིས་མ་བརླབས་པར་བཟའ་མི་རུང་བར་གསུང་པ་དང་། སྐུ་མཚམས་གཞན་པ་ཕར་མཐོང་དང་རང་ཚུར་མཐོང་བ་གཉིས། གསུང་མཚམས་གཞན་དང་ངག་བསྲེས་པ། ཐུགས་མཚམས་རྣམ་རྟོག་ཁ་ཡན་དུ་ཤོར་བ་གསུམ་ལ་ཕྱི་མ་ཐུ་བ་གསུངས་པས་སྤོང་དགོས། ཐུན་མཚམས་ཀུན་དང་སྲོད་ཐུན་བསྡུ་བའི་ཚེ་སྣོད་བཅུད་ཞི་ཁྲོའི་དཀྱིལ་འཁོར་དུ་གསལ་བ་མཐའ་ནས་འཇའ་ཚོན་ཡལ་བ་བཞིན་བསྡུས་ཏེ་ཡེ་ཤེས་སེམས་དཔའ་ཀུན་ཏུ་བཟང་པོ་དང་ཏིང་ངེ་འཛིན་སེམས་དཔའ་ས་བོན་གཉིས་བཅས་ལ་ཐིམ་པས་གནས་ལུགས་བརྗོད་དུ་མེད་པའི་ངང་ལ་མཉམ་པར་བཞག །ཐུན་མཚམས་གཞན་དུ་ལྷ་སྐུ་སྒྱུ་མ་ལྟ་བུའི་ངང་ནས་སྤྱོད་ལམ་བྱ་བ་ནི། གཉིད་ཚེ་སྣང་བ་སྟོང་པར་བསྡུས་པ་ཕྱང་ཆད་དུ་མི་བཟུང་བར་འོད་

གསལ་སྦུབ་འཇུག་གམ། ཡང་ན་ཐིམ་ལ་མ་སྨུག་པའི་ཡེ་ཤེས་དྲན་པར་བྱས་ཏེ་གཟུང་འཛིན་དང་བྲལ་བའི་ངང་ལ་གཉིད་ལོག་ཅིང་། ནམ་སད་སྐབས་སུའང་འཁྲུལ་པ་རྒྱ་འབྱམས་སུ་མི་ཤོར་བར་ཡེངས་མེད་འཛིན་མེད་ལ་སློབ་པ་དང་ཐོར་ཐུན་ལ་བབ་ཚེ་བཟླས་བརྗོད་ནུས་པ་སྟོབས་འབྱིན་སོགས་སྔོན་དུ་འགྲོ་བའི་དལ་འབྱོར་རྙེད་དཀའ་ནས་བཟུང་བླ་མའི་རྣལ་འབྱོར་བར་བཏང་ནས། བླ་མའི་རྣལ་འབྱོར་གྱི་སྐབས་རྒྱལ་བ་ཞི་ཁྲོ་རབ་འབྱམས་འདུས་པའི་ངོ་བོ་སློབ་དཔོན་ཆེན་པོ་པདྨ་འབྱུང་གནས་སོགས་འཕགས་བོད་ཀྱི་གྲུབ་ཆེན་རྣམས་དང་གཞན་ཡང་རྩ་གསུམ་དམ་ཅན་དང་བཅས་པ་ལ་གསོལ་བ་བཏབ་མཐར་བཛྲ་གུ་རུ་བརྒྱ་སྐོར་གྱི་མཇུག་ཏུ་ཞི་ཁྲོ་སྤྱི་དྲིལ་ཁོ་ནས་ཐུན་བཟུང་ཀྱང་ཆོག་པར་སེམས་སོ། །ཅིའི་ཕྱིར་ན་ཞི་ཁྲོ་ཡང་བླ་མའི་རྣམ་རོལ་ལས་མ་འདས་པའི་ཕྱིར་རོ། །དེ་སྐད་དུ་ཡང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་མཆོག །དེ་ལྟར་ཡང་སྒྲུབ་པ་པོ་རང་ཉིད་ཀྱིས་ཐེ་ཚོམ་མ་ཆོད་ན་ལས་བྱང་ཆུང་བའམ། རྒྱུན་ཁྱེར་བསྡུས་པ་འདྲ་བཏང་དགོས་སམ་སྙམ་ནའང་དེ་ལྟར་བྱའོ། །ཐུན་མཚམས་ཀྱི་བྱ་བ་རྣམས་སྤྱི་ལྟར་ཤེས་པར་བྱས་ལ་ཐུན་སྒང་རྣམས་སུ་སྒོ་གསུམ་གཅུད་ལ་བོར་ནས་ལུས་ལྷའི་བསྐྱེད་རིམ་དང་ངག་བཟླས་པ་ཚད་མེད་དང་། སེམས་ཡེངས་མེད་འཛིན་མེད་ཁོ་ན་ལ་མ་བརྩོན་ན་བསམ་སྤྱོད་གཉིས་ཀ་ངན་པ་ལང་ཤོར་གྱི་དབང་དུ་བཏང་ནས་ལོ་མཚམས་ཟླ་མཚམས་ཀྱི་གྲངས་ཁོ་ན་གཙིགས་སུ་བྱས་པས་འབྲས་བུ་གང་ཡང་འབྱིན་མི་ནུས་པས་རྒྱུ་འབྲས་བསླུ་བ་མེད་པར་བསམ་ནས་རང་གིས་རང་ལ་མི་ཁྲེལ་བ་ཞིག་གལ་ཆེའོ། །ངག་རྒྱུན་གཅོད་ཐུབ་ན་ལེགས་མོད་ཀྱང་

དེ་ལྟར་མ་བྱུང་ཡང་ཐུན་སྒང་དུ་ཅི་ལ་ཐུག་ཀྱང་གཏོང་མི་རུང་། དེ་ལྟར་ཡང་ཕུག་རོན་གྱི་ལད་མོ་དང་སོ་དབྲག་ནས་བཤད་པ་ཅི་བྱས་ཀྱང་སྔགས་རྒྱུན་གཅོད་པས་སྤང་དགོས་སོ། །ཉིན་མཚན་ཐུན་བཞི་བྱེད་ན་ཐུན་སྒང་དུ་ཇ་སོགས་བཏུང་བ་རུང་ཀྱང་བཟའ་བ་མ་ཡིན་ནོ། །ཐུན་གཉིས་ལྟར་ན་ཉི་དྲོས་སྐབས་སུ་བཟའ་བ་ཅི་དགོས་ཟ་བ་ལས་ཕྱི་དྲོ་ཟོས་ན་གཉིད་རྨུགས་སོགས་ཀྱི་སྐྱོན་ཡོད། བཏུང་བ་ནི་གོང་བཞིན་ནོ། །འོན་ཀྱང་མཐའ་གཅིག་ཏུ་བཟུང་བའི་གུ་དོགས་མི་དགོས་སོ། །གང་ལྟར་ཡང་སྦྱོར་བ་སེམས་བསྐྱེད་དང་། དངོས་གཞི་དམིགས་མེད། རྗེས་ལ་བསྔོ་སྨོན་གྱི་རྒྱས་འདེབས་སོགས་ཀྱང་གལ་ཆེའོ། །མཚམས་ཀྱི་ཞག་གྲངས་དུམ་བུ་གསུམ་དུ་བསྒོས་པའི་སྔོན་མར་བསྙེན་དམིགས་བྱིན་ནུས་བསྡུ་བ་ཁོ་ན་གལ་ཆེ་ཞིང་། བར་བ་ལམ་ཁྱེར་གསུམ་དང་རྗེས་མའི་སྔོན་མའི་དུམ་བུ་གཉིས་རིགས་དྲུག་གི་སྡུག་བསྔལ་སྦྱོང་བ། རྗེས་མའི་དུམ་གཅིག་ལས་བཞིའི་དམིགས་པ་ཁ་བསྒྱུར་སོགས་བྱ་བའོ། །དེ་ནས་མཚམས་གྲོལ་རྒྱུའི་ཉིན་གཉིས་པ་ཐུག་པའི་དགུང་མོའི་ཐུན་ལ་བབས་ཚེ་བསྙེན་པའི་སྐབས་བསྙེན་བསྒྲུབ་ལས་སྦྱོར་བཞིའི་གཤམ་དུ་དངོས་གྲུབ་བསྡུ་བའི་དམིགས་པ་ནི་སྣང་སྲིད་འཁོར་འདས་ཀྱི་ཚེ་དཔལ་བསོད་ནམས་ཡེ་ཤེས་ཡོན་ཏན་ཐམས་ཅད་འོད་ཁ་དོག་སྣ་ལྔའི་རྣམ་པས་དངོས་གྲུབ་ཀྱི་རྫས་ལ་ཐིམ་པར་བསམ་ནས་སྤྱི་དྲིལ་ལ་ཤམས་འདོགས་ཀཱ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཞེས་མང་དུ་བཟླ། དེ་བཞིན་དུ་ཐུན་ཀུན་ལ་དེ་ལྟར་བྱེད་ཅིང་ཐོར་ཐུན་ཐ་མའི་བྱ་བ་རྣམས་གྲུབ་རྗེས་དངོས་གྲུབ་བསྡུ་བའི་དམིགས་པའི་འཕྲོ་འདུ་གསལ་བཞིན་དངོས་གྲུབ་བླང་ཚིག་ཅི་རིགས་ཀྱིས་བླང་ཆོག་ཤིང་། འཇུག་པ་བདེ་ཕྱིར། ཧཱུྃ་བདེ་གཤེགས་རྒྱལ་བ་ཞི་ཁྲོ་ལྷ་ཚོགས་ཀྱིས། །འགྱུར་མེད་སྐུ་ཡི་༴ ༴ ༴ སརྦ་སིདྡྷི་

ཕ་ལ་ཧཱུྃ་ཨ། ཞེས་པས་བླང་བར་བྱའོ། །དེ་ལ་དངོས་གྲུབ་བླང་བ་འདིའི་འོག་བརྩམས་ནས་ཐུན་འོག་ཐམས་ཅད་དུ་མཆོད་པ་གསར་བཤམས་དང་། དངོས་གྲུབ་ཀྱི་རྫས་དཀར་གསུམ་མངར་གསུམ་ལ་གཞི་བྱས་པའི་ལས་བཞིའི་གཏོར་མ་དང་དེ་དག་གི་མཐར་རིལ་བུ་ཡང་ཟླུམ་པོ་གྲུ་བཞི་གོང་མཚུངས་ཀྱིས་བསྐོར་ཞིང་གཞན་ཡང་ཤིང་ཏོག་སོགས་ཟས་སྣ་འབྱོར་ཚད་བཤམས་ལ་གུ་གུལ་བདུག །ཨ་མྲྀ་ཏས་བསངས། བྱིན་འབེབས་བྱ་བ་སོགས་གལ་ཆེའོ། །དེ་ལྟར་གྱི་རྫས་གསར་པ་དང་སྒྲུབ་རྫས་རྙིང་པ་ནས་ཤ་མར་དང་། ཚོགས་རྫས་ཅུང་ཟད་བླངས་པ་རྫས་གསར་པའི་སྟེང་དུ་སྤུང་ཏེ་མཉམ་དུ་བླང་བར་བྱའོ། །གཞན་མཚམས་སྒང་སོགས་སུའང་དངོས་གྲུབ་ཀྱི་རྨི་ལྟས་བཟང་པོ་རྨིས་ན་ཡིད་གྱིས་དངོས་གྲུབ་ཡང་ཡང་བླང་བ་ཡང་གལ་ཆེ་བར་གསུངས་སོ། །ཚུལ་འདི་ནི་ཞི་ཁྲོའི་རང་གཞུང་གི་དགོངས་པ་འཁོར་འདས་སྣང་སྲིད་དཀྱིལ་འཁོར་གཅིག་ཏུ་བསྒྲུབ་པའི་ལུགས་སུ་བྱས་པ་ཡིན་ལ། དེ་ལས་གཞན་མ་རྙིང་མའི་རང་ལུགས་ཀྱི་བདག་མདུན་བུམ་གསུམ་ཐ་དད་དུ་ཆོ་ག་གཅིག་གིས་བསྒྲུབ་ཚུལ་དང་། ཛ྄བ་ལ་མ་ཐུག་བར་དེ་ལྟར་བསྒྲུབ་ནས་གདོད་ཛ྄བ་ཁང་དབྱེ་བ་བདག་བསྐྱེད་དམ་ཚིག་པ་དང་དེ་ལས་མདུན་དུ་ཡེ་ཤེས་པའི་དལ་སོ་སོར་ཕྱེ་སྟེ་མེ་རི་འདབ་འབྱར་དུ་བཞུགས་པའི་བསྐྱེད་ཚུལ་དང་། བསྙེན་བསྒྲུབ་ཡན་ལག་བཞིའི་རྣམ་དབྱེ་སོ་སོར་ཡོད་མོད། དེ་ལས་ཀྱང་བདག་ཉིད་དལ་དུ་འཇུག་གམ་གསོན་གཤིན་རྗེས་འཛིན་གྱི་སྐབས་རྣམ་བུམ་དང་། ལས་བུམ་སོགས་སྐབས་ཐོབ་ལྟར་ཤེས་དགོས་སོ། །འདིར་སྨྲས་པ། རྒྱལ་རྣམས་དགོངས་པ་མཁའ་ལྟར་རྒྱ་ཆེ་ཞིང་། །བསྟན་པ་རྒྱ་མཚོ་ཇི་བཞིན་དཔག་དཀའ་ཡང་། །མདོ་དོན་འགྲོར་ཕན་སེམས་བསྐྱེད་གཙོར་

གསུངས་བཞིན། །བདག་གིས་བརྩམས་འདི་དེ་རྗེས་ཅིས་མི་འབྲངས། །ལ་ལ་བཞེད་ཀྱིས་བརྩམས་པ་གང་ལ་ཡང་། །སྡེབ་སྦྱོར་སྙན་ཚིག་མཛེས་ཆ་མི་ལྡན་ན། །རྩོམ་པའི་ཡན་ལག་མ་ཚང་སྐྱོན་ཡིན་ཞེས། །སྨྲ་མོད་དེ་ཡང་ཡིད་ཆེས་གནས་མ་ཡིན། །ཅི་ཕྱིར་ཞེ་ན་ཕྱི་པའི་བསྟན་བཅོས་འགར། །དེ་ལྟའི་ཡོན་ཏན་ལྡན་ཡང་ཐར་པ་དང་། །རྣམ་མཁྱེན་ལམ་དུ་དཀྲི་བར་ནུས་མིན་དོགས། །དེ་ཕྱིར་ཕན་སེམས་ཁོ་ན་གལ་ཆེ་སྙམ། །སྦྱོར་བ་སེམས་བསྐྱེད་དམ་པས་ཟིན་པ་དང་། །དངོས་གཞི་དམིགས་མཚན་ཞེན་པས་མ་བཅིངས་ཤིང་། །རྗེས་སུ་བསྔོ་སྨོན་དམ་པས་རྒྱས་ཐེབས་ཕྱིན། །འདི་སོགས་གང་ཡང་བྱང་ཆུབ་ལམ་དུ་འགྲོ། །དེ་ཕྱིར་འདི་བརྩམས་དགེ་བས་མཚོན་བྱས་ཏེ། །བདག་གིས་དུས་གསུམ་བསགས་པའི་དགེ་བའི་ཚོགས། །བསྡུས་ཤིང་བཟླུམ་སྟེ་མཐའ་ཡས་འགྲོ་བའི་ཚོགས། །ཞི་ཁྲོ་རབ་འབྱམས་གོ་འཕང་ཐོབ་ཕྱིར་བསྔོ། །ཞེས་ཞི་ཁྲོ་དགོངས་པ་རང་གྲོལ་གྱི་གཞུང་བཟང་པད་ཚལ་འབྱེད་པའི་བསྙེན་ཡིག་དྲི་བཟང་ངད་ལྡན་ཀུན་ཏུ་བཟང་པོའི་ཞལ་ངོམ་ཞེས་བྱ་བ་འདི་ཉིད་བླ་མ་དམ་པ་སངས་རྒྱས་ཆོས་འཕེལ་གྱིས་བསྐུལ་ངོར། ཟུར་ཆེན་ཆོས་དབྱིངས་རང་གྲོལ་གྱིས་མཛད་པའི་བསྙེན་ཡིག་གཞིར་བཞག་ཏེ་རིགས་མཐུན་འགའ་ལས་ཀྱང་བསྡུར་བཞིན་སྤེལ་བའི་བྱེད་པོ་བྱ་བྲལ་ཀུན་བཟང་གཞན་ཕན་དང་ཡི་གེར་འདུ་བྱེད་དམ་ཚིག་གི་ནོར་བུ་སྤྱི་བོའི་རྒྱན་དུ་འཆང་བ་ཀུན་བཟང་འཆི་མེད་ཀྱིས་བགྱིས་པའི་དགེ་བས་འགྲོ་རྣམས་སྐུ་གསུམ་རྒྱལ་བའི་གོ་འཕང་ཐོབ་པར་གྱུར་ཅིག་གུ། །བཀྲ་ཤིས། དགེའོ།། །།