ཞི་ཁྲོ་བསྙེན་ཚུལ་དང་འབྲེལ་བའི་རྣམ་བཞག་གི་ངེས་པ་མདོར་བསྡུས་ཀུན་གཟིགས་བླ་མའི་དགྱེས་མཆོད་ཡེ་ཤེས་སྣང་གསལ།

ཞི་ཁྲོ་བསྙེན་ཚུལ་དང་འབྲེལ་བའི་རྣམ་བཞག་གི་ངེས་པ་མདོར་བསྡུས་ཀུན་གཟིགས་བླ་མའི་དགྱེས་མཆོད་ཡེ་ཤེས་སྣང་གསལ་བཞུགས་སོ། །

ན་མོ་གུ་རུ་ས་མནྟ་བྷ་ཏྲ་ཡེ། སེམས་དང་ཡེ་ཤེས་རང་སྣང་འཁོར་འདས་ཀུན། །དབྱེར་མེད་དཀྱིལ་འཁོར་གཅིག་ཏུ་ཡོངས་རྫོགས་པའི། །དགོངས་པ་རང་གྲོལ་གཅེར་མཐོང་ངོ་སྤྲོད་པའི། །སངས་རྒྱས་ཉག་གཅིག་བླ་མར་གུས་ཕྱག་འཚལ། །སེམས་ཅན་ཕ་མར་མཐོང་བའི་སྙིང་རྗེ་དང་། །སེམས་ཉིད་ཆོས་སྐུར་རྟོགས་པའི་ཤེས་རབ་ཀྱིས། །སེམས་སྣང་དཀྱིལ་འཁོར་རོལ་པ་ཡོངས་ཤེས་པའི། །སེམས་དཔའི་དགོངས་སྤྱོད་ཐབས་མཁས་རླབས་ཆེན་གྱིས། །སྨིན་གྲོལ་ལྟ་ཅི་ཚིག་ཙམ་ཐོས་པས་ཀྱང་། །འཁྲུལ་སྣང་སྡིག་སྒྲིབ་ཉམས་ཆགས་རང་གྲོལ་ནས། །འབྲེལ་ཚད་བླ་མེད་སྐུ་བཞིའི་སར་འགོད་པ། །ཟབ་ལམ་གཞུང་འདིའི་བརྗོད་བྱ་དེ་འདྲ་ལགས། །ཚུལ་འདིར་རྣམ་པར་བཞག་པ་མང་པོར་སྣང་། །ཚད་ལྡན་དམ་པའི་བཞེད་པའང་ཡོད་མོད་དེ། །ཡིད་ལ་ངེས་པ་ཐོབ་པའི་ལེགས་བཤད་ནི། །རྣམ་གཉིས་བླ་མའི་གདམས་སྲོལ་བསྡུས་ཏེ་བྲི། །ཚུལ་འདི་ལ་གཉིས། བསྙེན་པ་དང་འབྲེལ་བ་ལྷ་ཡི་བསྐྱེད་རིམ་གྱི་ཁྱད་པར་དང་། དཀྱིལ་འཁོར་གྱི་བྱ་བ་དང་འབྲེལ་བའི་ཆོ་གའི་ཡན་ལག་རྣམས་ཀྱི་རིམ་པ་མདོར་བསྡུས་ཏེ་ལུང་འདྲེན་དང་སྡེབ་སྦྱོར་སྤང་སྟེ་གོ་སླའི་ངག་གིས་དམར་ཁྲིད་དུ་འགོད་དོ། །དང་པོ་ལ། སྦྱོར་བ། དངོས་གཞི། རྗེས་ཀྱི་རིམ་པ་དང་གསུམ་ལས། དང་པོ།

དེ་ཡང་སྒྲུབ་པ་པོ་རྟེན་གྱི་ཁྱད་པར་ཐུན་མོང་གི་ལམ་གྱིས་རྒྱུད་ལེགས་པར་འབྱོངས་ཤིང་ཐེག་ཆེན་དུ་སེམས་བསྐྱེད་པ་དབང་གིས་སྨིན་ཅིང་དམ་ཚིག་དང་ལྡན་པས་ཆེད་དུ་བྱ་བའི་ཁྱད་པར་སྙིང་རྗེ་ཚད་མེད་པའི་བློས་སེམས་ཅན་གྱི་དོན། དམིགས་ཡུལ་དངོས་གྲུབ་ཀྱི་ཁྱད་པར་ནི་གཞན་དོན་ལ་ཐོགས་མེད་ཀྱི་མཁྱེན་བརྩེ་ནུས་པ་ཡོངས་སུ་རྗོགས་པའི་གདོད་མའི་མགོན་པོ་དཔལ་ཀུན་ཏུ་བཟང་པོའི་གོ་འཕང་དུས་ཀྱི་ཁྱད་པར་ཚེ་འདི་ཉིད་ལ་མངོན་དུ་བྱ་བ། ཐབས་ཀྱི་ཁྱད་པར་དེ་ལྟ་བུའི་གོ་འཕང་དེ་བསྒྲུབ་ནུས་པའི་ཡན་ལག་བསྐྱེད་རྫོགས་རྫོགས་པ་ཆེན་པོ་རྣམས་ཆ་ཚང་བའི་གདམས་པ་འདིར་རིམ་པར་འཇུག་པའི་བསམ་སྦྱོར་གྱིས་ཐོག་མར་བསྙེན་པ་ལ་འཇུག་པར་བྱའོ། །བསྙེན་པའི་དུས་གནས་ཡོ་བྱད་སོགས་སྤྱི་ལྟར་དང་། རྒྱབ་དཔུང་དགེ་བའི་ཚོགས་དང་ཁྱད་པར་གྱི་སྔོན་འགྲོ་གནད་དུ་འགྲོ་བར་བསྒྲུབ་བོ། །རུང་བའི་གནས་ཁང་དུ་རྟེན་ཡོད་ན་བཀྲམ་པའི་མདུན་སྟེགས་བུ་ཁེབ་ལྡན་གྱི་ཁར་འབྲུ་ཚོམ་བཀོད་པའི་སྟེང་ཞི་ཁྲོའི་མཆོད་གཏོར་དང་། སྡེ་བདུན་སོགས་ཀྱི་གཏོར་མ། གཡས་གཡོན་དུ་སྨན་རཀ་མདུན་དུ་ཉེར་སྤྱོད་ལྔ་བཤམས། གཞི་བདག་དང་བགེགས་ཀྱི་གཏོར་མ་ཚོགས་རྫས་སོགས་ཐམས་ཅད་མ་ཚང་བ་མེད་པར་བཤམས། གཉིས་པ་ལ་སྔོན་འགྲོ་དང་། དངོས་གཞིའི་བསྒོམ་རིམ་གཉིས། དང་པོ་ནི། སྟན་བདེ་བར་སྐྱིལ་ཀྲུང་གིས་འཁོད་ནས། རང་གི་སྤྱི་བོའི་ཐད་ཀྱི་མདུན་གྱི་ནམ་མཁར་པད་ཟླའི་གདན་ལ། དཀོན་མཆོག་རྩ་གསུམ་ཀུན་འདུས་ཀྱི་ངོ་བོ་རྩ་བའི་བླ་མ་བསྒོམ་ཞིང་། སྐུ་གསུམ་བླ་མའི་གསོལ་འདེབས་ཀྱིས་ཚིག་རྗེས་དོན་དྲན། དེ་ཡང་བླ་མ་ལ་སངས་རྒྱས་སུ་ཐག་ཆོད་པའི་མོས་གུས་ཀྱི་གདུང་ཤུགས་ཡིད་འགྱུར་བ་།

རང་གི་སེམས་ཉིད་སྐུ་གསུམ་གྱི་ངོ་བོར་ཐག་ཆོད་པའི་ངོ་སྤྲོད་ལ་ཐེ་ཚོམ་མེད་པའི་ངེས་ཤེས་ཐོབ་པར་བཅོས་མེད་རང་བབས་སུ་བཞག་པའི་ངང་རྗེན་ནེ་བ། མ་རྟོགས་སྡུག་བསྔལ་གྱིས་གཟིར་བའི་ཕ་མ་སེམས་ཅན་ཐམས་ཅད་ལ་ཤས་མི་བཟོད་པ་ལྟ་བུའི་སྙིང་རྗེ་ཡིད་དུང་ངེ་བའི་ངང་ནས་གསོལ་བ་བཏབ་པའི་མཐར་བླ་མ་འོད་དུ་ཞུ་སྟེ་རང་ལ་ཐིམ་པས་རང་སེམས་དང་བླ་མའི་ཐུགས་དབྱེར་མེད་དུ་གྱུར་པའི་ངང་ལ་མཉམ་པར་བཞག །དེ་ནས་ༀ་བཛྲ་ས་ཏྭ་ཧཱུྃ་ཞེས་བརྗོད་པས་སྐད་ཅིག་གིས་རང་ཉིད་རྡོ་རྗེ་སེམས་དཔར་བསྐྱེད་ལ། རྡོ་རྗེ་དྲིལ་བུ་བརླབས་པ་ཐབས་ཤེས་ཀྱི་དེ་ཁོ་ན་ཉིད་དྲན་པས་དམ་ཚིག་གསུམ་བཟུང་། བསང་ཆུ་བདུད་རྩི་འཁྱིལ་པ་བསྒྲུབ་སྟེ་བདག་གནས་ཡོ་བྱད་ཐམས་ཅད་ལ་གཏོར་བས་བགེགས་བསལ། ཕྱོགས་སྐྱོང་དང་གཞི་བདག་ལ་གཏོར་མ་ཕུལ་ཞིང་བར་ཆད་མི་འབྱུང་བར་བསྙེན་སྒྲུབ་མཐར་ཕྱིན་པའི་ཕྲིན་ལས་བཅོལ། བགེགས་ལ་གཏོར་མ་བསྔོས་ཏེ། བཀའ་བསྒོས་ཤིང་བགེགས་བསྐྲད་པ་ནི། ཧཱུྃ་རང་ཉིད་ལྷ་ཡི་སོགས་བརྗོད། རྒྱལ་པོ་ཆེན་པོ་བཞིའི་ཐོ་འཛུགས་པའང་འདིར་བྱ། ཧཱུྃ་རང་ཉིད་ལྷ་ཡི་ཐུགས་ཀ་ནས་སོགས་ཀྱིས་བསྐྲད་པའི་བགེགས་རྣམས་སླར་མི་འཇུག་པ་སོགས་ཀྱི་ཆེད་དུ་བསྲུང་འཁོར་འགོད་པ་ནི། རང་ཉིད་རྡོར་སེམས་སུ་གསལ་བའི་ཐུགས་ཀའི་ཧཱུྃ་ལས་ཧཱུྃ་མཐིང་གའི་ཚོགས་དཔག་ཏུ་མེད་པ་སྤྲོས་པ་ཡོངས་སུ་གྱུར་པ་ལས་རང་སྣང་གི་གར་ཁྱབ་ཚུན་ཆད་ཀྱི་སྟེང་འོག་ཕྱོགས་མཚམས་ཐམས་ཅད་རྡོ་རྗེ་སྔོན་པོའི་གུར་ཁང་ཟླུམ་པོ། ཏྲཾ་ལས་དེའི་ཕྱི་རོལ་ཏུ་རིན་པོ་ཆེ་སེར་པོའི་གུར། དེའི་ཕྱི་ཧྲཱི་ལས་པདྨ་དམར་པོ། དེའི་ཕྱི་ཨ་ལས་རྒྱ་གྲམ་ལྗང་གུ། ༀ་ལས་འཁོར་ལོ་དཀར་པོ། རཾ་ལས་མེ་དཔུང་ཁ་དོག་ལྔ་ལྡན་རེ་རིམ་པ་དྲུག་པོ་ཐམས་ཅད་མ་འདྲེས་ཤིང་རང་མདོག་གི་འོད་ཀྱིས་

གང་བའི་སོ་སོའི་བར་སྟོང་དང་བཅས་པ། ངོ་བོ་དེ་བཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་དྲུག་གི་རང་བཞིན་ཅན། རྣམ་པ་ཕྱག་མཚན་རྣམས་ཀྱི་བར་སྟོང་གི་ཆ་རྣམས་ཀྱང་རང་རང་གི་རྒྱུ་ལས་གྲུབ་པའི་ཕྱག་མཚན་ཕྲ་མོའི་རྡུལ་ཕྲ་རབ་ཀྱིས་བར་མཚམས་མེད་པར་གཏམས་ནས་རླུང་ཡང་རྒྱུ་བའི་སྐབས་དང་བྲལ་བ་བྱེད་ལས་ཕྱི་ནང་གི་བར་དུ་གཅོད་པ་ཐམས་ཅད་ལས་སྲུང་ཞིང་དེ་དག་གིས་གླགས་མི་རྙེད་པར་བསྒོམ་པའོ། །བསྲུང་འཁོར་འདི་བསྙེན་པ་གྲུབ་ཀྱི་བར་མི་བསྡུ་ཞིང་ཐུན་ཐམས་ཅད་ཀྱི་མགོར་གསལ་འདེབས་རེ་བྱ་བས་བརྟན་པར་བྱའོ། །དེ་ནས་རང་རང་གི་ཐུགས་སྲོག་ལས་འོད་ཟེར་འཕྲོས་པས་ཚོགས་ཞིང་རྒྱལ་བ་སྲས་དང་བཅས་པ་ཐམས་ཅད་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པའི་རྣམ་པས་མདུན་དུ་སྤྱན་དྲངས་ལ། ཚོགས་བསགས་ཡན་ལག་བཅུ་པ་རང་རང་གི་ཚིག་དོན་ལས་གཞན་དུ་མ་ཡེངས་པའི་སྒོ་ནས་ལན་གསུམ་བྱ། མཐར་རང་ལ་བསྟིམ། མཆོད་པ་བྱིན་རླབས་ནི་ཧཱུྃ་དམིགས་བསམ་བརྗོད་བྲལ་སོགས། ནང་གི་མཆོད་པ་སྨན་རཀ་གཏོར་གསུམ་དང་། ཕྱིའི་མཆོད་པ་རྡོ་རྗེ་ལྷ་མོ་བཅུ་དྲུག་གི་རོལ་པར་རང་རང་གི་སྔགས་དང་ཕྱག་རྒྱ་ཏིང་ངེ་འཛིན་རྣམས་དམིགས་ཕྱེད་པར་བྱིན་གྱིས་རླབས་སོ། །དེ་ལྟར་སྔོན་དུ་འགྲོ་བའི་རིམ་པ་རྣམས་ནི། དཔེར་ན་ཁམས་དྲུག་ལྡན་པའི་ལུས་རྟེན་ལེན་པ་ལ་དེའི་སྔོན་དུ་འགལ་རྐྱེན་མེད་ཅིང་མཐུན་རྐྱེན་ཚང་བའི་ལས་ཁྱད་པར་ཅན་བསགས་དགོས་པ་བཞིན་དུ་འདིར་ཡང་སེམས་བསྐྱེད་དང་ལྡན་པས་ཚོགས་བསགས་པ་སོགས་ཀྱིས་དངོས་གཞི་ལྷའི་དཀྱིལ་འཁོར་བསྒོམ་པའི་འགལ་རྐྱེན་མཐའ་དག་སྦྱོངས་ཤིང་མཐུན་རྐྱེན་མ་ཚང་བ་མེད་པར་བྱས་པས་སྲིད་པའི་ས་

བོན་དུ་གྱུར་པའི་ལས་རྣམས་སྦྱོངས་ཤིང་། ཚོགས་གཉིས་ཀྱི་རྒྱུ་ལས་སྐུ་གཉིས་འགྲུབ་པའི་རྟེན་འབྲེལ་དངོས་གཞི་དཀྱིལ་འཁོར་ཡོངས་སུ་རྫོགས་པའི་བར་གྱི་སྦྱོར་བ་ཡིན་པས་དེའི་གཞི་འདེངས། རྫོགས་རིམ་གྱི་དགེ་རྩ་རྣམས་སྨིན་བྱེད་ཀྱི་བརྒྱུད་རྒྱུ་ཁྱད་པར་ཅན་ཡིན་པའི་གནད་ཤེས་པར་བྱའོ། །གཉིས་པ་དངོས་གཞི་བསྒོམ་པའི་རིམ་པ་ལ་གསུམ། དམ་ཚིག་པ་བསྐྱེད་ཚུལ་གྱི་ཁྱད་པར་བརྗོད་པ། ཡེ་ཤེས་སྤྱན་འདྲེན་སོགས་ལས་ཀྱི་རིམ་པ། སྐབས་དོན་བསྙེན་པ་བྱ་ཚུལ་དངོས་སོ། །དང་པོ་ལ་གཉིས། གཞུང་དོན་རྩ་རྒྱུད་དང་མཐུན་པར་བཀྲལ་ནས་བསྒོམ་པའི་རིམ་པ་རྗེ་བཙུན་བླ་མའི་བཞེད་ཚུལ་དང་། ལུང་{ལུང་}ཁྲོམས་དཀྲུགས་དང་མཐུན་པར་བཀྲལ་ཏེ་བསྒོམ་པ་ཤིང་རྟ་ཆེན་པོ་དྷརྨ་ཤྲཱིས་བཞེད་པ་མདོ་ཙམ་བསྟན་པའོ། །དང་པོ་ནི། གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །ཞེས་སོགས་གསུངས་པ་ལྟར། ཐ་མལ་གྱི་འཆི་བར་སྐྱེ་གསུམ་དང་མཐུན་པར་བསྒོམ་པས་དེ་གསུམ་གྱི་བག་ཆགས་སྦྱོངས་ཤིང་། སངས་རྒྱས་སྐུ་གསུམ་དང་རྣམ་པ་མཚུངས་པར་བསྒོམ་པས་དེ་ཐོབ་པའི་གཞི་རང་རྒྱུད་ལ་གནས་པའི་རིགས་ཁམས་ལ་གསོས་འདེབས་ཤིང་རྫོགས་པའི་རྒྱུར་བྱས། རྫོགས་རིམ་གྱི་འོད་གསལ། སྒྱུ་ལུས། ཟུང་འཇུག་དང་རྣམ་པ་མཐུན་པར་བསྒོམ་པས་དེའི་སྨིན་བྱེད་ཁྱད་པར་ཅན་དུ་འགྱུར་བས་ཏིང་འཛིན་རྣམ་གསུམ་བསྒོམ་པ་ནི། ཧཱུྃ་རྟོག་བྲལ་བསྒོམ་མེད་སོགས་ཀྱིས་འདི་ལྟར་སྣང་བའི་ཆོས་ཐམས་ཅད་ཀྱི་རང་བཞིན་སྟོང་པ་ཉིད་སྤྲོས་པ་དང་བྲལ་བའི་རིག་པ་རང་བྱུང་གི་ཡེ་ཤེས་ཆེན་པོའི་ངང་ལ་བཅོས་མེད་དུ་འཇོག་པ་དང་། དེ་ལྟར་མ་རྟོགས་པའི་སེམས་ཅན་ཐམས་ཅད་ལ་སྒྱུ་མ་ལྟ་བུའི་སྙིང་རྗེ་ཆེན་པོ་མཁའ་ཁྱབ་ཏུ་བསྐྱེད་ཅིང་། དེ་ལྟ་བུའི་

རིག་སྟོང་སྙིང་རྗེ་ཟུང་དུ་འཇུག་པའི་སེམས་ཉིད་ཨ་ཡིག་མཐིང་ནག་ཡེ་ཤེས་ལྔའི་རང་འོད་འབར་བའི་རྣམ་པར་བསྒོམ་པའོ། །དེ་ནས་སྣོད་ཀྱི་འཇིག་རྟེན་འདི་མས་ནས་ཡར་ཆགས་པ་དང་། རྫོགས་རིམ་གྱི་འབྱུང་ལྔའི་ཁམས་ཀྱི་རླུང་རྣམས་དབུ་མའི་དབྱིངས་སུ་ཞུགས་གནས་ཐིམ་པའི་རྟགས་སྣང་དང་། ཡར་སངས་རྒྱས་རྣམས་གང་དུ་འཚང་རྒྱ་བའི་གནས་རྣམ་པར་དག་པའི་ཞིང་ཁམས་འོག་མིན་རྡོ་རྗེ་བཙུན་མོའི་མཁའ་དབྱིངས་རྟགས་ཀྱི་ཕྱག་རྒྱའི་ཡོན་ཏན་ཡོངས་སུ་རྫོགས་པ་རྣམས་ཀྱི་དག་རྫོགས་སྨིན་གསུམ་ཚང་བའི་འབྱུང་རིམ་གཞལ་ཡས་ཁང་གདན་བཅས་བསྐྱེད་པ་ནི། ཨ་ལས་ཨེ་ཡཾ་སོགས་ཀྱིས་རྒྱུའི་ས་བོན་ལས་ཨེ་ཡཾ་སོགས་ཀྱི་ཡི་གེ་འཕྲོས་པས། ཡོངས་སུ་གྱུར་པ་ལས་འབྱུང་བཞི་རི་རབ་དང་བཅས་པ། དེའི་སྟེང་གི་གཞིར་རྡོ་རྗེའི་དྲྭ་བ་ཡེ་ཤེས་ཀྱི་མེ་འབར་བའི་ཕྲེང་བས་བསྐོར་བའི་ནང་གི་ཕྱོགས་མཚམས་སུ་དུར་ཁྲོད་ཆེན་པོ་བརྒྱད་ཀྱི་བཀོད་པས་འཇིགས་ཤིང་རྔམས་པར་བྱས་པའི་གཞི་ལ་བརྟེན་པའི་པདྨ་འདབ་མ་སོ་གཉིས་ཀྱི་ཟེའུ་འབྲུར་ཉི་མ། དེ་སྟེང་སྣ་ཚོགས་རྡོ་རྗེ་རྭ་ཕྱོགས་མདོག་ལྟེ་བ་མཐིང་ག་ལེབ་ཆགས་ཀྱི་རྣམ་པ། དེའི་སྟེང་སེམས་ཅན་རྣམས་གང་དུ་བརྟེན་པའི་སྣོད་ཀྱིས་དང་། རྫོགས་རིམ་གྱི་དུས་ཡེ་ཤེས་སྣང་བ་སྣ་ཚོགས་པ་དང་། སངས་རྒྱས་རྣམས་གང་དུ་བཞུགས་པའི་གནས་རྒྱ་ཚད་བྲལ་བའི་གཞལ་ཡས་ཁང་གི་ཡོན་ཏན་རྣམས་དག་རྫོགས་སྨིན་གསུམ་གྱི་བྱེད་ལས་ཅན་རྒྱུའི་ས་བོན་ལས་བྷྲཱུཾ་ཆད་པ་ཡོངས་སུ་གྱུར་པ་ལས་གཞལ་ཡས་ཁང་ཕྱི་ནང་གི་རིམ་པ་གཉིས་དང་ལྡན་པའི་ཕྱི་མ་ནི་རྒྱུ་རིན་པོ་ཆེ་ནང་ནས་རིམ་པས་མཐིང་དཀར་སེར་དམར་ལྗང་བའི་རྩིགས་པ་ལྔ་དང་ལྡན་པའི་སྟེང་རིན་པོ་ཆེའི་ཕྲས་མཛེས་པའི་ཕ་གུའི་མཐར་མུ་ཏིག་མགུལ་འཁོར་འཕྱང་བ། ནང་དུ་ཁྱམས་ཕྱི་

མ་བཅད་པའི་གྲུ་ཆད་ཐོད་རྩིག་གི་ཟར་བུས་སྤག་པའི་སྟེང་དུ་གཞལ་ཡས་ཁང་ནང་མ་བྷནྡྷ་སྐམ་རློན་རྙིད་པའི་རྩིགས་པ་སུམ་རིམ་རཀྟས་སྤྱིན་ཐབས་སུ་སྦྱར་བ་ལ་གནམ་ལྕགས་ཀྱི་གཟེར་བུས་བསྡམས་པ། དེའི་སྟེང་ཐོད་པའི་ཕ་གུའི་མཐར་རྒྱུ་མ་དང་དོན་སྙིང་གི་མགུལ་འཁོར་ཅན། ཕྱི་ནང་གཉིས་ཀའི་ཕ་གུའི་སྟེང་ནས་རིམ་པས་རིན་པོ་ཆེ་དང་རུས་པའི་རྒྱུ་ལས་གྲུབ་པའི་དྲ་བ་དང་དྲྭ་ཕྱེད་ཤར་བུ་མདའ་ཡབ་སོགས་ཞི་དྲག་གི་རྒྱན་ཐམས་ཅད་དང་། རྩིགས་པའི་འགྲམས་སྟེང་འདོད་སྣམ་དམར་པོ་ལ་ལྷ་མོ་རྣམས་མཆོད་པའི་སྤྲིན་སྤྲོ་བས་གང་བ། གཞལ་ཡས་ཁང་སྟེང་མའི་དབུས་ཀྱི་མཐོང་ག་མ་གཏོགས་པའི་ཐོག་བཀབ་པའི་དབུས་སུ་བུམ་རྟེན་བུམ་པ་ནས་བཟུང་མཆོད་རྟེན་གྱི་ཐིག་ཁོང་ནས་བྱུང་བ་ལྟ་བུའི་བུམ་པ་ཀུན་ནས་ཟླུམ་པོའི་ཕྱོགས་བཞིར་བུམ་སྒོ་རྒྱན་ལྡན་བཞི་དང་བཅས་པ་ཆོས་འཁོར་རིམ་པ་བཅུ་གསུམ་གདུགས་ཏོག་སོགས་ཀྱིས་མཛེས་པ། ཕྱི་མའི་སྒོ་བཞིར་ཀ་བ་བཞི་བཞ ིས་བཏེགས་པའི་རྟ་བབ་སྣམ་བུ་བརྒྱད་མའི་སྟེང་པདྨ་ལ་གནས་པའི་ཆོས་འཁོར་བཅུ་གསུམ་གདུགས་ཏོག་དང་བཅས་པའི་གཡས་གཡོན་དུ་རི་དྭགས་ཕོ་མོས་མཚན་པའོ། །གཞལ་ཡས་ཁང་སྟེང་མའི་གསེར་ཁྱམས་ཀྱི་ནང་གི་གྲུ་ཆད་ལ་ཕྱོགས་བཞིར་བརྩིགས་པའི་གློ་འབུར་བཞི། དབུས་སུ་འཁོར་ལོ་རྩིབ་བཞི་ལྟེ་བ་མུ་ཁྱུད་དང་བཅས་པ་སྤག་པ། བུམ་པའི་ནང་དུ་འཁོར་ལོ་རྩིབ་བཞི་ལྟེ་བ་མུ་ཁྱུད་དང་ལྡན་པ་གདན་ཐབས། ལྷ་གནས་རྣམས་སུ་གདན་ནི། བུམ་ནང་གི་འཁོར་ལོའི་ལྟེ་བ་དང་རྩིབ་བཞིར། སེངྒེ་གླང་ཆེན་རྟ་མཆོག་རྨ་བྱ་ཤང་ཤང་རྣམས་བརྒྱད་རེས་བཏེགས་པའི་རིན་པོ་ཆེའི་ཁྲི་པད་ཉི་ཟླ་བའི་གདན་ལྔ་བརྩེགས་རེ། དབུས་གདན་གྱི་དྲང་

ཐད་ནམ་མཁའ་ལ་ཀུན་བཟང་གི་གདན་རིན་ཆེན་པད་ཉི་ཟླ་བ་བཞི་བརྩེགས། སྟེང་འོག་དང་རྩིབ་མཆན་བཞིའི་བར་སྟོང་ལ་པད་གདན་རེ་རེ་སྟེ་ཁྱོན་དྲུག །བུམ་སྒོ་བཞིར་པད་ཟླ་ཉི་མ་སྟེ་སུམ་བརྩེགས་རེ། ཁྲོ་དཀྱིལ་གྱི་ཆེ་མཆོག་བསྐྱེད་ན་འཁོར་ལོའི་ལྟེ་བར་ལྷ་ཆེན་ཕོ་མོ་བརྫིས་པའི་མཁར་ལྡིང་སྟེ་ཁྱུང་རིན་ཆེན་པད་ཟླ་ཉི་མ་ལྔ་བརྩེགས་དང་། མདུན་དུ་བུདྡྷ་ཁྲག་འཐུང་གི་གདན་ནོ། །འོན་ཀྱང་བསྙེན་པའི་སྐབས་འདིར་ལས་བྱང་ཆུང་བ་ལྟར་བྱེད་པ་ཡིན་པས་འཁོར་ལོའི་ལྟེ་བ་དང་རྩིབ་བཞིར་དྲེགས་པ་ཕོ་མོ་བརྫིས་པའི་དབུས་སུ་དོམ། ཤར་དུ་ཁྱུ་མཆོག །ལྷོར་མ་ཧེ། ནུབ་ཏུ་གཟིག །བྱང་དུ་སྟག་རྣམས་ཀྱིས་བཏེགས་པའི་རིན་ཆེན་པད་ཟླ་ཉི་མ་རྣམས་བརྩེགས་པ། གློ་འབུར་བཞི་དང་གྲུ་ཆད་ཀྱི་གྲྭ་བཞི། གསེར་ཁྱམས་ཀྱི་ཕྱོགས་མཚམས་བརྒྱད། ནང་སྒོ་བཞིའི་སྒོ་ཁྱུད་རྣམས་སུ་ཞིང་ཆེན་ཕོ་མོ་བསྣོལ་བའི་གདན་རེ་རེ་ཁྱོན་ཉི་ཤུ། ཕྱི་མའི་ཁྲག་ཁྱམས་ཀྱི་ཕྱོགས་རེ་རེར་ཞིང་སྐམ་པོའི་གདན་དྲུག་རེ་དང་། སྒོ་ཕྱི་མའི་སྒོ་ཁྱུད་བཞིར་ཡང་རེ་རེ་སྟེ་ཁྱོན་ཉེར་བརྒྱད་དོ། །དེ་ལྟར་སྒོ་རྣམ་པར་དག་པ་འོག་མིན་གྱི་ཞིང་ཁམས་རྟེན་གཞལ་ཡས་ཁང་གདན་བཅས་བསྐྱེད་ནས། བརྟེན་པའི་ལྷ་ཚོགས་བསྐྱེད་ཚུལ་ནི། སེམས་ཅན་རྣམས་གཟུགས་མེད་ནས་མར་ཆད་དེ་རིམ་པར་ཆགས་པ་སྤྱི་དང་། བྱེ་བྲག་ཏུ་ཁམས་དྲུག་ལྡན་པའི་མིའི་ལུས་རྟེན་ལེན་པའི་ཚེ། ཕ་མའི་ཁུ་རྡུལ་དང་དྲི་ཟའི་སེམས་སྣ་ཚོགས་པས་རིམ་བཞིན་སྒོ་གསུམ་རགས་པ་འགྲུབ་པ་དང་། ལམ་དང་འབྲས་བུའི་སློབ་པ་དང་མི་སློབ་པའི་འོད་གསལ་ལས་ཡེ་ཤེས་རྡོ་རྗེ་ལྟ་བུའི་སྐུ་འགྲུབ་པ་དང་། ཀློང་གསལ་ལས་མངལ་ཞུགས་བྱང་ཆུབ་རྣམ་ལྔ་དང་སོགས་ལྟར་འབྲས་བུ་མཐར་ཐུག་སངས་རྒྱས་ཀྱི་རགས་པའི་སྤྲུལ་སྐུ་བཟུང་ནས་ལྷུམས་སུ་

ཞུགས་པ་དང་། བལྟམས་པ་དང་། བཟོ་བོའི་གནས་ལ་མཁས་པ་སོགས་དེ་རྣམས་དང་མཐུན་པར་བསྒོམ་པས་དེ་དག་གི་དག་སྨིན་རྫོགས་པའི་བྱེད་ལས་ཅན་ནི། ཧཱུྃ་བདག་ཉིད་ཐ་མལ་རང་སེམས་འདི༔ སོགས་ཀྱིས་རྒྱུའི་ཨ་ཡིག་བུམ་ནང་གི་ནམ་མཁའི་གདན་ལ་བབ་པ་ནི་གསུང་ཡིག་འབྲུ། དེ་རྡོ་རྗེ་མཐིང་ག་རྩེ་ལྔ་པ་ཨས་མཚན་པར་གྱུར་པ་ནི་ཐུགས་ཕྱག་མཚན། དེ་ལས་འོད་ཟེར་འཕྲོས། དོན་གཉིས་བྱས། དེ་བཞིན་གཤེགས་པ་ཐམས་ཅད་གདན་གསུམ་ཚང་བའི་དཀྱིལ་འཁོར་གྱི་རྣམ་པས་སྤྱན་དྲངས་ཏེ་ཐིམ་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་དཔལ་ཀུན་ཏུ་བཟང་པོ་ཡབ་ཡུམ་གྱི་སྐུར་གྱུར་པ་ནི་སྐུ་རྫོགས་པའི་ཆོ་གའོ། །ཡེ་ཤེས་རིན་ཆེན་སྣ་ཚོགས་དང་༔ ཞེས་པས་ལོངས་སྐུའི་ཆས་ཅན་ནོ། །གཙོ་བོ་ཡབ་ཡུམ་གྱི་ཐུགས་ཀ་ནས་རིགས་ལྔ་ཡབ་ཡུམ་བཅུའི་ས་བོན་དུས་གཅིག་ཏུ་འཕྲོས་པ་ལས་ཆོ་ག་གསུམ་མམ་ས་བོན་ཙམ་ལས་དུས་གཅིག་ཏུ་བསྐྱེད་ལ་རྣམ་པ་གསལ་འདེབས་པ་ནི་གཞུང་གི་ཚིག་རེ་རེ་བཞིན་རིམ་གྱིས་བྱེད་དོ། །དེ་ཡང་བུམ་ནང་གི་འཁོར་ལོའི་ལྟེ་བ་ལ་ༀ་ལཾ་ལས་རྣམ་པར་སྣང་མཛད་དང་། ཡུམ་རྣམ་པ་དེ་བཞིན་གཤེགས་པའི་རིགས་ཀྱི་ཡུམ་སངས་རྒྱས་སྤྱན་མ་ཡིན་ཏེ། ས་བོན་ལཾ་དང་། སྔགས་ཏེ་ཤྭ་ར་ཏེ་སྟྭཾ་འབྱུང་བའི་ཕྱིར་རོ། །ངོ་བོ་ནི་འདིར་རིགས་ཀྱི་དབང་གིས་རྡོར་སེམས་ཀྱི་དཀྱིལ་འཁོར་ཡིན་ཞིང་། དེ་ཡང་རྡོར་སེམས་སྐུའི་དཀྱིལ་འཁོར་ཡིན་པས་གཙོ་བོ་གོ་འཕོས་ཀྱང་གཙོ་མོ་གོ་མི་འཕོ་ཕྱིར་དབང་ཕྱུག་མ་ཡིན་ཏེ། རྣམ་སྣང་དབྱིངས་ཕྱུག་སྐུ་མདོག་དཀར༔ ཞེས་གསུངས་སོ། །གཙོ་བོ་རྣམ་སྣང་མཛད་པའི་དཀྱིལ་འཁོར་བྱེད་པའི་རྒྱུ་མཚན་ཡང་། འདིར་ངན་སོང་དང་ངན་འགྲོའི་སྡུག་བསྔལ་མི་བཟད་ཤུགས་དྲག་ཏུ་མྱོང་བ་མྱུར་དུ་སྦྱང་བའི་ཐབས་དག་

གཙོ་བོ་བསྟན་པ་ཡིན་ཞིང་། དེ་ནི་དངོས་སུ་སྐུའི་སྣང་བ་བསྟན་ནས་བཙན་ཐབས་སུ་གྲོལ་ཞིང་སྨིན་པར་མཛད་པ་བྲམ་ཟེ་དུང་ཕྲེང་གི་ལོ་རྒྱུས་བཞིན་ལ། དེའི་སྐབས་སུ་བསྟན་པ་ལྟར་གྱི་སྒྲུབ་ཐབས་འདི་ཉིད་ཡིན་པས་ན་རྒྱུ་ཀུན་འབྱུང་འགོག་པ་ལ་གོམས་པ་སྔོན་དུ་སོང་ནས་འབྲས་བུ་སྡུག་བསྔལ་ཕྱིས་སྤོང་བ་ཁོ་ན་ཙམ་མ་ཡིན་པར། སྡུག་བསྔལ་དྲག་པོས་གཟིར་བའི་འགྲོ་བ་གང་གིས་དཀྱིལ་འཁོར་ཆེན་པོ་འདི་མཐོང་བ་དང་ཚིག་ཐོས་པས་ཀྱང་སྡུག་བསྔལ་ལས་ཐར་ནས་རིག་འཛིན་གྱི་ས་ལ་སྦྱོར་བའི་ཕྱིར། ཐོས་གྲོལ་འདི་ནི་མ་བསྒོམ་པ་སངས་རྒྱས་པའི་ཆོས་སྡིག་པོ་ཆེ་བཙན་ཐབས་སུ་སངས་རྒྱས་པའི་ཆོས། ཞེས་དང་། མཚམས་མེད་ལྔ་ཡི་སྡིག་ཀྱང་བྱང་། །ན་རཀ་གནས་ཀྱང་དོང་སྤྲུག་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་པ་ལྟར་རོ། །རྣམ་པར་སྣང་མཛད་ནི་སངས་རྒྱས་ཐམས་ཅད་ཀྱི་སྐུའི་བདག་ཉིད་ཡིན་པས་ན་དེ་གཙོ་བོར་མཛད་དགོས་པའི་ཕྱིར། དེ་བཞིན་དུ་ཤར་དུ་རྡོ་རྗེ་སེམས་དཔའ་དང་། ཡུམ་ངོ་བོ་སྤྱན་མ་ལ་རྣམ་པ་དབྱིངས་ཕྱུག་མ་ཡིན་པའི་རྒྱུ་མཚན་གོང་གིས་ཤེས། སྐུ་མདོག་མཐིང་ག །ལྷོར་རིན་ཆེན་འབྱུང་ལྡན་དང་མ་ཀི་ཡབ་ཡུམ་སེར། ནུབ་ཏུ་སྣང་མཐའ་དང་གོས་དཀར་ཡབ་ཡུམ་དམར་པོ། བྱང་དུ་དོན་གྲུབ་དང་སྒྲོལ་མ་ཡབ་ཡུམ་ལྗང་གུའི་ཡབ་རྣམས་ཞལ་གཙོ་བོ་ལ་ཕྱོགས་པ་རྩིབ་ཀྱི་རིགས་བཞིའི་ཐུགས་ཀ་ནས་སེམས་དཔའ་དང་སེམས་མ་རྣམས་ཀྱི་ས་བོན་རང་རང་གི་གཡས་གཡོན་མདུན་རྒྱབ་རྣམས་སུ་དུས་གཅིག་ཏུ་འཕྲོས་པ་ལས་སྐུར་གྱུར་ཏེ། རྡོར་སེམས་ཀྱི་གཡས་སུ་ས་སྙིང་། གཡོན་དུ་བྱམས་པ། མདུན་དུ་ལ་སྱེ། རྒྱབ་ཏུ་མེ་ཏོག་མ་རྣམས་དཀར། རིན་འབྱུང་གི་གཡས་སུ་ཀུན་བཟང་ནས་ནམ་སྙིང་། མཱ་ལྱེ། བདུག་སྤོས་མ་བཞི་སེར། སྣང་མཐའི་གཡས་སུ་སྤྱན་

གཟིགས་ནས་འཇམ་དཔལ། གླུ་མ། སྣང་གསལ་མ་བཞི་དམར། དོན་གྲུབ་ཀྱི་གཡས་སུ་སྒྲིབ་སེལ་ནས་ཕྱག་རྡོར། གྷནྡྷེ་གར་མ་བཞི་ལྗང་ཞལ་རྣམས་རང་རང་གི་གཙོ་བོ་ལ་ཕྱོགས་པ་ཚོམ་བུའི་ཚུལ་ལོ། །རིགས་ལྔ་ཡབ་རྣམས་རྫོགས་པའི་སྐྱིལ་ཀྲུང་། ཡུམ་རྣམས་བརྟུལ་ཞུགས་ཀྱི་སྐྱིལ་ཀྲུང་། ཀུན་བཟང་ཡབ་ཡུམ་རྡོ་རྗེ་དང་པདྨའི་སྐྱིལ་ཀྲུང་གིས་འཁྲིལ་བ། སེམས་དཔའ་རྣམས་གཡས་ཅུང་ཟད་བརྐྱང་བའི་ཕྱེད་སྐྱིལ། སེམས་མ་རྣམས་གཡོན་བརྐྱང་བའི་ཕྱེད་སྐྱིལ་ཅན་ལྷ་ཉེར་བརྒྱད་པོ་ཐམས་ཅད་ཚོགས་གཉིས་ཡོངས་སུ་རྫོགས་པའི་མངའ་ཐང་སངས་རྒྱས་རང་སྣང་གི་ལོངས་སྤྱོད་ཆེན་པོ་ལ་དགྱེས་དགུར་རོལ་པའི་མཚོན་བྱེད། དར་དང་རིན་པོ་ཆེའི་རྒྱན་གྱིས་སྤྲས་པ། ཀུན་བཟང་གི་ཐུགས་ཀ་ནས་ཀྲེཾ་བྲེཾ་སོགས་ས་བོན་དྲུག་པད་གདན་རྣམས་ཀྱི་སྟེང་དུ་འཕྲོས་པ་ལས་ཀུན་བཟང་གཙུག་གི་ནམ་མཁར་ལྷའི་ཐུབ་པ་དཀར་པོ། འཁོར་ལོའི་འོག་ཁྲོ་དཀྱིལ་གྱི་སྟེང་མཁའ་དམྱལ་བའི་ཐུབ་པ་ནག་པོ། རྩིབ་མཆན་གྱི་ཤར་ལྷོར་ལྷ་མིན་གྱི་ཐུབ་པ་ལྗང་གུ། ལྷོ་ནུབ་ཏུ་མིའི་ཐུབ་པ་སེར་པོ། ནུབ་བྱང་དུ་བྱོལ་སོང་གི་ཐུབ་པ་མཐིང་ག །བྱང་ཤར་དུ་ཡི་དྭགས་ཀྱི་ཐུབ་པ་དམར་པོ། དྲུག་གའང་སྤྲུལ་སྐུ་ཚངས་པར་སྤྱོད་པའི་ཆས་ཅན་བཞེངས་སྟབས་ཀྱིས་འགྲོ་དོན་ལ་གཤེགས་པའི་ཚུལ་ཅན། ཞི་བའི་ལྷ་ཚོགས་འདི་དག་ཐམས་ཅད་ཀྱི་སྐུ་ལས་གསལ་ཞིང་དག་པའི་འོད་ཟེར་འཕྲོ་བའི་ཁྱད་པར་ནི། སྐུའི་གནས་དྲུག་གི་བ་སྤུའི་བུ་ག་རེ་རེ་ནས་ཀྱང་གསལ་ལ་རྣོ་བའི་འོད་ཟེར་དཀར་པོ་དང་། དམར་པོ་དང་། སེར་པོ་དང་། སྔོན་པོ་དང་། བཙོད་ཁ་དང་། ཤེལ་ལམ་དངུལ་མདོག་དང་དྲུག་པོ་རེ་རེ་ལའང་བྱེ་བ་ཕྲག་དྲུག་དྲུག་ཏུ་འཕྲོ་བའི་འཇིག་རྟེན་གསུམ་འགེང་པར་མཛད་དོ། །ཀུན་བཟང་གི་

ཐུགས་ཀ་ནས་ས་བོན་འབྲུ་བརྒྱད་པོ་བུམ་སྒོ་བཞིའི་གདན་སྟེང་དུ་འཕྲོས་པ་ལས་སྒོ་བ་ཡབ་ཡུམ་བརྒྱད་ནི་ཤར་སྒོར་རྣམ་རྒྱལ་དང་ལྕགས་ཀྱུ་མ་དཀར། ལྷོར་གཤིན་རྗེ་གཤེད་དང་ཞགས་པ་མ་སེར། ནུབ་ཏུ་རྟ་མགྲིན་དང་ལྕགས་སྒྲོག་མ་དམར་མོ། བྱང་དུ་འཁྱིལ་པ་དང་དྲིལ་བུ་མ་ལྗང་གུ་སྟེ་བརྒྱད་པོ་ཐམས་ཅད་ཀྱང་ཤིན་ཏུ་ཁྲོས་པ་དུར་ཁྲོད་ཀྱི་ཆས་བརྒྱད་དང་ལྡན་པ། སྐུ་ལས་སྐྱེས་པའི་མེ་དཔུང་གི་ཀློང་ན་གདུག་པ་ཅན་ཐམས་ཅད་ཚར་གཅོད་པའི་ཕྱིར་ཡབ་རྣམས་གཡས་བརྐྱང་བའི་དོར་སྟབས་ཀྱིས་འགྱེང་ཞིང་ཞལ་ཕྱིར་བསྟན་པ། སྒོ་བ་འདི་བཞིའི་མཚན་བསྐང་བ་ལས་སྒྱུ་འཕྲུལ་ལྟར་ཡང་མཛད་མོད་དེ། ལས་བྱང་ཆེ་ཆུང་དུ་ཁྲོ་བོ་བཅུའི་ཕྱོགས་ཀྱི་ཁྲོ་བོ་བཞི་ལྟར་མཛད་པར་བཤད་པ་ནི། སྒྱུ་འཕྲུལ་རྩ་རྒྱུད་དངོས་བསྟན་ལས་འདི་མན་ངག་གི་དཀྱིལ་འཁོར་ཡིན་པའི་ཕྱིར་ཕྱི་ནང་ལྟར་མཛད་པ་འགལ་བ་མིན་ནོ། །སྒྱུ་འཕྲུལ་གྱི་རྡོ་རྗེ་རྒྱལ་པོའི་དབང་གི་དུས་ལུས་དཀྱིལ་སྐབས་ཁྲོ་འཕྲེང་འགོད་པའི་ཚེ། སྙིང་གར་རྣམ་རྒྱལ། དཔུང་གཡས་གཤིན་རྗེ་གཤེད། སོག་ཕྲག་རྟ་མགྲིན། དཔུང་གཡོན་འཁྱིལ་བ་རྣམས་བཀོད་པ་ལྟར་འདིའི་ཞི་དཀྱིལ་གྱི་སྒོ་བའང་དེ་ལྟར་མཛད། དེ་ལྟར་ན་དཔུང་གཡས་ཀྱི་ཁྲོ་བོ་ལྷོའི་སྒོར་འགོད་པས་ལྷོའི་ལྷ་རྣམས་རིན་ཆེན་གྱི་རིགས་ཡིན་པས་སྐབས་འདིར་གཤིན་རྗེ་གཤེད་རིན་པོ་ཆེའི་རིགས་སོ། །དེ་གཞུང་གི་སྐོར་འདིའི་ཚིག་ཟིན་ནི་ཆོས་སྤྱོད་ལས། ཙིཏྟ་སྙིང་གི་ལྷོ་སྒོའི་རྩ་འདབ་ལ། །གཤིན་རྗེ་ཞགས་པ་འཁྲིལ་སྦྱོར་དོར་སྟབས་སེར། །ཞེས་གསུངས་པ་ལྟར་རོ། །དེ་ནས་ཀུན་བཟང་གི་ཐུགས་ཀ་ནས་ཧཱུྃ་ཡིག་སྨུག་ནག་ཞལ་སྦྱོར་གྱི་རྣམ་པ་ཅན། འོག་གཞིའི་ཁྲོ་དཀྱིལ་གྱི་གདན་ལ་བབས་པ་ཡོངས་སུ་གྱུར་པ་ལས་རང་ཉིད་

བཅོམ་ལྡན་འདས་དཔལ་ཆེན་པོ་བུདྡྷ་ཧེ་རུ་ཀ་ཡབ་ཡུམ་ཀྱི་སྐུ་ཡོངས་སུ་རྫོགས་པར་གྱུར་པར་བསྒོམ་མོ། །ཁྲག་འཐུང་གཙོ་བོ་ཡབ་ཡུམ་ཀྱི་ཐུགས་ཀ་ནས་ཧཱུྃ་ཡིག་ཞལ་སྦྱོར་མཐིང་སེར་དམར་ལྗང་རྣམས་རྩིབ་བཞིའི་གདན་སྟེང་དུ་འཕྲོས་པ་ལས། ཤར་ནས་རིམ་བཞིན་བཛྲ་རཏྣ་པདྨ་ཀརྨ་ཧེ་རུ་ཀ་ཡབ་ཡུམ་རྣམས་སུ་གྱུར་པ་སྟེ་ཐམས་ཅད་ཀྱང་དབུ་གསུམ་ཕྱག་དྲུག་གར་གྱི་ཉམས་ཆེན་པོ་དགུ་དང་ལྡན་ཞིང་དུར་ཁྲོད་རོལ་པའི་ཆས་བརྒྱད་ཀྱིས་སྤྲས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་དཔུང་རབ་ཏུ་འབར་ཞིང་འཁྲུགས་པའི་ཀློང་ན་རང་རིགས་ཀྱི་ཡུམ་དང་འཁྲིལ་ཞིང་ཞབས་གཡས་བརྐྱང་གཡོན་བསྐུམ་པའི་གྱད་ཆེན་པོའི་སྟབས་ཀྱི་གདན་ལ་རོལ་པ། སྐུ་མདོག་ཕྱག་མཚན་བསྐྱེད་ཚིག་ལྟར་ལ། གཞུང་འདི་ལས་དཔལ་ཆས་ཡོད་མེད་མི་གསལ་ཡང་རྒྱུད་འགྲེལ་རྣམས་ལས་དཔལ་གྱི་ཆས་བརྒྱད་ཡོད་པར་གསུངས། གཙོ་བོའི་ཐུགས་ཀ་ནས་ཧ་བརྒྱད་འཕྲོས་པ་ལས། ཤར་གྱི་གློ་འབུར་གྱི་གདན་ལ་ཀཽ་རི་མ་དཀར་མོ། ལྷོར་ཙོའུ་རི་མ་སེར་མོ། ནུབ་ཏུ་པྲ་མོ་ཧ་དམར་མོ། བྱང་དུ་བཻ་ཏ་ལི་ལྗང་མོ། ཤར་ལྷོའི་གྲུ་ཆད་ཀྱི་གདན་ལ་པུསྐ་སི་དམར་སེར། ལྷོ་ནུབ་ཏུ་ཀསྨ་རི་ལྗང་གུ། ནུབ་བྱང་དུ་ཙནྜ་ལི་སེར་སྐྱ། བྱང་ཤར་དུ་སྨེ་ཤ་ནི་མཐིང་ཀ་སྟེ་མ་མོ་བརྒྱད་དང་། ཧེ་བརྒྱད་ལས་གསེར་ཁྱམས་ཀྱི་ཤར་དུ་སེང་གདོང་མ་སྨུག་ནག །ལྷོར་སྟག་གདོང་མ་དམར་མོ། ནུབ་ཏུ་ཝ་གདོང་མ་ནག་མོ། བྱང་དུ་སྤྱང་གདོང་མ་མཐིང་ག་སྟེ། མཆེ་བ་ཅན་བཞི། ཤར་ལྷོར་རྒོད་གདོང་མ་སེར་མོ། ལྷོ་ནུབ་ཏུ་དུར་བྱ་གདོང་དམར་མོ། ནུབ་བྱང་དུ་བྱ་རོག་གདོང་ནག་མོ། བྱང་ཤར་དུ་འུག་གདོང་མ་མཐིང་ག་སྟེ་གཤོག་པ་ཅན་བཞི་དང་ཕྲ་མེན་བརྒྱད། རིགས་བཞིའི་ཁྲག་འཐུང་གི་ཐུགས་

ཀ་ནས་འབྲུ་བཞི་འཕྲོས་པ་ལས། ཤར་སྒོར་རྟ་གདོང་མ། ལྷོ་སྒོར་ཕག་གདོང་མ། ནུབ་ཏུ་སེང་གདོང་མ། བྱང་དུ་སྦྲུལ་གདོང་མ་སྟེ་སྒོ་སྐྱོང་གདོང་ཅན་བཞི་སྟེ་སྲས་མོ་ཉི་ཤུ་པོ་ཐམས་ཅད་ཀྱང་དྲག་མོ་དུར་ཁྲོད་ཀྱི་ཆས་ཅན་གཡས་ཅུང་ཟད་བསྐུམ་ཞིང་གཡོན་བརྐྱང་བའི་རྡོ་རྗེའི་གར་སྟབས་ཅན། ཀོ་སེང་བཅུ་དྲུག་ཞལ་ནང་བསྟན་སྒྱུ་འཕྲུལ་ལས་འདི་ཡན་གྱི་ལྷ་ལ་ངོ་མཚར་ཚོགས་ཀྱི་ལྷ་སུམ་ཅུ་ཞེས་བཤད་དོ། །གཙོ་བོའི་ཐུགས་ཀ་ནས་བྷྱོ་ཡིག་ཕྱོགས་ཀྱི་མདོག་ཅན་ཉེར་བརྒྱད་འཕྲོས་པ་ལས་ཁྱམས་ཕྱི་མ་ཁྲག་འཁྱམས་ཀྱི་གདན་ལ་ཤར་ནས་བརྩམས་ཏེ་ཞི་རྒྱས་དབང་དྲག་གི་མ་མོ་དྲུག་རེ་དང་། སྒོ་བཞིར་སྒོ་སྐྱོང་གདོང་ཅན་བཞི་སྟེ་ཉེར་བརྒྱད་པོ་ཐམས་ཅད་ཀྱང་སྲིན་མོ་དྲག་ཏུ་ཁྲོས་པའི་གཟུགས་མགོ་བརྙན་ཅན་དུར་ཁྲོད་ཀྱི་ཆས་ཅན་ཞབས་གཡས་བསྐུམ་པའི་རྟིང་པ་གསང་བར་གཏད་ཅིང་གཡོན་བརྐྱང་བའི་གར་སྟབས་ཅན་ནོ། །འདི་རྣམས་བཀའ་ཉན་པའི་མཚོན་བྱེད་ཞལ་ནང་བསྟན་ནམ། བསྒོ་བའི་ལས་མཛད་པའི་མཚོན་བྱེད་ཕྱིར་བསྟན་ཀྱང་རུང་ངོ་། །གཉིས་པ་ནི་ལོ་ཆེན་རིན་པོ་ཆེ་དྷརྨ་ཤྲཱིས་ལྗགས་བསྒྲིག་མ་སྡིག་སྒྲིབ་རྣམ་པར་སྦྱོང་བའི་ཆོ་ག་འདི་ནི་རྡོ་རྗེ་འཆང་འཇམ་དབྱངས་མཁྱེན་དང་བརྩེ་བའི་དབང་པོས་གསལ་བར་མཛད་ནས་ཨ་ནུ་ཡོ་གའི་རིམ་པ་ལྟར་གཙོ་བོར་མཛད་ནས་བཀའ་དྲིན་དུ་སྩལ་བ་ལུགས་འདིའི་ཤིང་རྟ་ཆེན་པོའི་བཀའ་སྲོལ་ཕྱོགས་གཅིག་མཁས་པས་བསྔགས་པའི་གནས་སུ་འདུག་ཅིང་ཡང་དག་པར་ཡིད་ཆེས་པས། དེའི་ཚུལ་ནི་སྔོན་འགྲོ་ཏིང་འཛིན་རྣམ་གསུམ་སོགས་ནས་དཀྱིལ་འཁོར་གྱི་ཁྱད་པར་ནི་རིན་པོ་ཆེའི་གཞལ་ཡས་ཁང་མཚན་ཉིད་ཐམས་ཅད་རྫོགས་པ་རྟ་བབ་བང་རིམ་བཞི་ལྡན་ཆོས་འཁོར་རྩིབ་བརྒྱད་གདུགས་

གཡས་གཡོན་རི་དྭགས་དང་བཅས་པ། གཞལ་ཡས་ཀྱི་ནང་བར་ཁྱམས་གྲུ་བཞི་པ་ལ་ལྷ་སྣམ་རིམ་པ་གཉིས་སུ་ཕྱེ་བའི་ནང་དུ་གྲུ་ཆད་དང་། འཁོར་ལོ་ཉིས་རིམ་གྱི་ནང་མ་རྩིབ་བཞི། ཕྱི་མ་རྩིབ་བརྒྱད་འཁོར་ལོའི་ལྟེ་བར་ཐིག་ལེ་ལྔ་ཕྲ་ཚོམ་གྱི་དབུས་སུ་མཐིང་གསལ་ཐིག་ལེ། ཤར་དཀར། ལྷོ་སེར། ནུབ་དམར། བྱང་ལྗང་། དབུས་ཀྱི་ཐིག་ལེའི་ནང་སེང་ཁྲི་པད་ཉི་ཟླ་གདན་ལ་ཆོ་ག་གསུམ་གྱིས་ཀུན་ཏུ་བཟང་པོ་ཡབ་ཡུམ་བསྐྱེད། དེའི་ཐུགས་ཀ་ནས་ས་བོན་འཕྲོས་པ་ལས། གཙོ་བོའི་མདུན་དུ་རྣམ་སྣང་ཡབ་ཡུམ། ཕྱོགས་བཞིའི་ཐིག་ལེ་ལ་རིགས་བཞི་ཡབ་ཡུམ། རིགས་བཞིའི་ཐུགས་ཀའི་ས་བོན་ལས་རང་རང་གི་གཡས་གཡོན་མདུན་རྒྱབ་ཏུ་སེམས་དཔའ་ཡབ་ཡུམ་བཅུ་དྲུག །སྟེང་འོག་དང་གྲུ་ཆད་བཞིར་ཐུབ་པ་དྲུག །སྒོ་ཕུབ་བཞིར་མཐར་བྱེད་ཡབ་ཡུམ་སྟེ་ཞི་བའི་ལྷ་ཚོགས་དང་གཙོ་བོའི་ཐུགས་ཀ་ནས་ས་བོན་འཕྲོས་པ་ལས་མདུན་དུ་ཆེ་མཆོག་ཡབ་ཡུམ། དེའི་ཐུགས་ཀ་ནས་ཧཱུྃ་ཧཱ་ཧེ་ཕཊ་བྷྱོ་རྣམས་ལྷའི་གྲངས་དང་མཉམ་པར་འཕྲོས་པ་ལས། ཀུན་བཟང་གི་གཡོན་དུ་བུདྡྷ་ཧེ་རུ་ཀརྩིབ་བཞིར་རིགས་བཞིའི་ཁྲག་འཐུང་ཡབ་ཡུམ། རྩིབ་བརྒྱད་ཀོའུ་རི་མ་བརྒྱད། ལྷ་སྣམ་ནང་མར་ཕྲ་མེན་བརྒྱད། ལྷ་སྣམ་ཕྱི་མའི་ཕྱོགས་བཞིར་དབང་མོ་དྲུག་རེ། སྒོའི་མཐར་ཕྱེད་བཞིའི་ཕྱི་རོལ་དུ་སྒོ་མ་བཞི། སྒོ་གཡབ་བཞིར་སྒོ་སྐྱོང་དབང་མོ་བཞི་རྣམས་བསྐྱེད་པར་མཛད་ལ། ཡང་གཞུང་དེ་ལས། འདིར་བླ་མ་གོང་མ་འགའ་ཞིག་གིས་འོག་ཁང་ཞི་བ་དང་སྟེང་ཁང་ཁྲོ་དཀྱིལ་དུ་མཛད་པ་ནི་ཆོས་སྤྱོད་དང་བསྟུན་པར་སྣང་བས་འགལ་བ་མེད་མོད། འོན་ཀྱང་ལས་བྱང་དུ་སྟེང་འོག་འགྲོས་མེད་པས་ཁྲོམས་དཀྲུགས་ཀྱི་ལུགས་འདི་གཞུང་དང་འབྱོར་བར་སྣང་བས་བཀོད་པ་སྟེ། འདི་ལའང་རྣམ་སྣང་དབུས་སུ་བཀོད་པའི་སྟེང་བར་སྣང་

ལ་ཀུན་བཟང་ཡབ་ཡུམ་འགོད་པའི་ལུགས་དཔེ་ལ་ལས་མཆན་དུ་བཤད་སྣང་ཞིང་། གཞན་དུ་དཀྱིལ་འཁོར་ནང་ནས་པད་འདབ་བཞི་འཁོར་ལོ་རྩིབ་བཞི། པད་འདབ་བཅུ་དྲུག་དང་། པད་འདབ་བཅུ་དང་། འཁོར་ལོ་རྩིབ་བཅུ་དྲུག་རྣམས་འགོད་པའི་ལག་ལེན་སྣང་བ་ནི་ལས་བྱང་ཆེ་ཆུང་། ཆོས་སྤྱོད། ཆོས་ཉིད་བར་དོའི་ངོ་སྤྲོད་སོགས་འདིའི་རྩ་བའི་ཡི་གེ་གང་དང་ཡང་མི་མཐུན་པའི་གཟུ་ལུམ་རང་བཟོ་འོ། །ཞེས་དགག་པར་མཛད་ནས། མཇུག་ཏུའང་ཆོ་གའི་འགྲོས་ཕལ་ཆེ་བ་ཞིག་ཞི་ཁྲོ་བཀའ་མ་དོང་སྤྲུགས་དང་མཐུན་པར་སྦྱར་བ་ལའང་སོམ་ཉི་མི་འཚལ་ཏེ་མཁས་ཤིང་གྲུབ་པར་གྲགས་པ་ཁ་ཅིག་གིས་གསར་རྙིང་གི་ཆོ་ག་བསྲེས་པའི་བསྒྲིགས་ཚོམ་མང་དུ་མཛད་མོད། དེ་ནི་རྒྱུད་སྡེའི་འགྱུར་སྔ་ཕྱིའི་བབ་མི་འདྲ་བས་ཉ་དང་ཉུང་མར་བསྲེ་བ་རྟོགས་ལ། འདིར་བཀའ་གཏེར་གྱི་ཆོ་ག་ཕན་ཚུན་ལྟོ་སྦྱར་བ་ནི། སྔ་འགྱུར་གྱི་ཤིང་རྟ་ཆེན་པོ་རྣམས་ཀྱིས་བཀའ་མས་གཞུང་བསྲངས། གཏེར་མའི་མན་ངག་གིས་ཟུར་བརྒྱན་ཞེས་རླུང་ལྟར་གྲགས་པ་ཉིད་ཕྱག་ལེན་དུ་བཏབ་པ་སྟེ། བཀའ་མ་དོང་སྤྲུགས་ཀྱི་ཆོ་གའི་ཁོག་ཕུབ་ཀྱི་ས་བཅད་གཞིར་བཞག་པ་ལ་ཟབ་གཏེར་འདི་ཉིད་རྡོ་རྗེའི་ཚིག་གོང་འོག་འབྲེལ་བསྡེབས་ཏེ་གྱེར་བསྒོམ་བསྒྲགས་མའི་ཚུལ་དུ་སྦྱར་བ་ཡིན་པའི་ཕྱིར་རོ། །ཞེས་གསུངས་སོ། །བཞེད་པ་སྔ་མའི་རང་ལུགས་ནི། སྤྱིར་ལུས་དཀྱིལ་བསྒོམ་པའི་ཚེ་འདིའི་ཆོས་སྤྱོད་ལྟར་གཞི་ལུས་རྡོར་སེམས་ཀྱི་སྙིང་ག་ལ་ཞི་བ་དང་། སྤྱི་བོར་ཁྲོ་བོའི་ལྷ་སྒོམ་པར་གསུངས་པར་ལྟར་ཡིན་མོད། དབང་བསྙེན་བསྒྲུབ་པ་སོགས་དང་འབྲེལ་བའི་ལས་བྱང་ཆེ་ཆུང་ལྟར་རྩ་བའི་དཀྱིལ་འཁོར་བསྒོམ་ཚེ། སྤྲུལ་གཞི་ཞི་བའི་ཡེ་ཤེས་ཀྱི་དཀྱིལ་འཁོར་སྟེང་དང་། སྤྲུལ་པ་ཁྲོ་བོའི་དཀྱིལ་འཁོར་འབར་བའི་བར་ཁྱམས་

གཉིས་དང་ལྡན་པ་འོག་ཏུ་བསྐྱེད་པ་འདི་ལས་བྱང་ཆེ་བའི་དཀྱིལ་འཁོར་བསྐྱེད་སྔགས་དང་དངོས་སུ་འབྱོར་བར་མ་ཟད་ཞིབ་ཏུ་དཔྱད་ན་རྩ་བའི་ཚིག་གིས་ཀྱང་མ་ཟིན་རྒྱུ་མི་འདུག་པས་གཞུང་གི་དགོངས་པ་རྫོགས་པར་བཀྲལ་བའི་ལེགས་བཤད་གྲུབ་པའི་མན་ངག་ཁྱད་པར་ཅན་དུ་འདུག་སྟེ་གསལ་བྱེད་སྐྱ་རེངས་ལས། ནང་གི་གློ་འབུར་དགོས་པའི་གསལ་ཁ་ཆེར་མི་སྣང་ཡང་། ཕྲ་མེན་བརྒྱད་ཀྱི་གནས་ལ་དཀྱིལ་འཁོར་ཁྱམས་ཀྱི་ཞེས་གསལ་ཁ་བཏོད་པའི་རྣམ་བཅད་ཀྱིས་ཀོའུ་རིའི་གནས་ཁྱམས་མ་ཡིན་པ་ཞིག་བསྟན་པར་སོང་བ་འདིའི་གློ་འབུར་བཞི་དང་གྲུ་ཆད་ཀྱི་གྲྭ་བཞི་བསྟན་པ་ཞེས་དང་། དཀྱིལ་འཁོར་ཁྱམས་ཀྱི་ཤར་ཕྱོགས་སུ༔ སོགས་ཀྱིས་ཁྱམས་ནང་མ་གསེར་ཁྱམས་དང་། དཀྱིལ་འཁོར་ཕྱི་རིམ་ཤར་སྒོ་རུ༔ རྡོ་རྗེ་ཁུ་བྱུག་ལྕགས་ཀྱུ་དཀར༔ ཞེས་དང་། སྤྱན་འདྲེན་གྱི་སྐབས་སུ་ཡང་། དཀྱིལ་འཁོར་མུ་རན་དབང་ཕྱུག་ཉི་ཤུ་བརྒྱད༔ ཞེས་དང་། བཞུགས་གསོལ་གྱི་སྐབས་སུ་ཡང་དཀྱིལ་འཁོར་མུ་རན་སོགས་དྲངས་ནས་ཁྱམས་ཕྱི་མ་དབང་མོའི་གནས་ཁྲག་ཁྱམས་ཡོད་པར་བཤད་ཅིང་། དེ་ཡང་ཕྱི་རིམ་གྱི་སྒྲས་ནང་རིམ་ཡོད་པའང་བསྟན་པའི་ཕྱིར་རོ། །ཞེས་གསུངས་ལ། དེ་བཞིན་དུ་གནས་འདྲེན་ཀྱི་སྐབས་སུ། བྱམས་པའི་སྒོ་མ་རྟ་གདོང་མ༔ སྒོ་བ་ཁྲོ་བོ་རྣམ་པར་རྒྱལ༔ སོགས་ཀྱིས་དང་པོ་ཁྲོ་བོའི་སྒོ་མ་བཞི་དང་། དེ་ནས་ཞི་བའི་སྒོ་བ་ཡབ་ཡུམ་གསུངས་པ་དང་། གཞན་ལས་བྱང་ཆེ་བའི་སྤྱི་བསྐུལ་དུ། ཞི་བ་ལྷུན་གྱིས་གྲུབ་པའི་ཕོ་བྲང་ནས༔ རྒྱལ་བ་ཀུན་གྱི་སྤྱི་མྱེས་ཀུན་ཏུ་བཟང་༔ ཞེས་ཞི་བའི་དཀྱིལ་འཁོར་སྔོན་དུ་དང་། ཆོས་སྐུ་ཞི་བའི་རིགས་རྩལ་ཆོ་འཕྲུལ་ལས༔ ཉོན་མོངས་གདུག་པ་འདུལ་བའི་ཁྲག་འཐུང་འཕྲོས༔ ཞེས་དེ་ལས་ཁྲོ་བོའི་དཀྱིལ་འཁོར་སྤྲོས་པ་དང་། ཁྲག་འཐུང་རོལ་པའི་དུར་ཁྲོད་

ཆེན་པོ་ནས༔ ཞེས་ཁྲོ་དཀྱིལ་དེའི་རྒྱུ་དུར་ཁྲོད་ཀྱི་མཚན་ཉིད་དུ་རྫོགས་པར་བསྟན་པ་ཡིན་ཏེ། དཔེར་ན་ཚོགས་ཆེན་འདུས་པའི་སྐབས། སྟེང་ཁང་ཞི་བ་བྱང་ཆུབ་སྙིང་པོ་ལ། འོག་ཁང་ཚོགས་ཆེན་འདུས་པའི་དཀྱིལ་འཁོར་ནི། ཞེས་སོགས་གསུངས་པ་དང་རྣམ་པ་མཚུངས་པའོ། །ཡང་གང་དག་ལུས་ཀྱི་དཀྱིལ་འཁོར་ལ་རྩ་གནས་འཁོར་ལོའི་དབང་གིས་སྙིང་གར་ཞི་བ་དང་། སྤྱི་བོར་ཁྲོ་བོ་མཛད་པ་དང་མཐུན་པར་ཕྱི་དཀྱིལ་ལའང་དེ་ལྟར་བྱེད་དོ་སྙམ་ན། འདིར་མ་ཧཱ་ཡོ་གའི་བསྐྱེད་རིམ་རྒྱུད་ཀྱི་གླེང་གཞི་ལྟར་ཞི་བ་ནས་རིམ་གྱིས་བསྐྱེད་པའི་སྐབས་ལྷ་ཆེན་རྣམས་ཀྱི་ཆུང་མ་སྲིན་མོའི་གཟུགས་སོགས་ལྟར་དབང་མོ་རྣམས་ཀྱིས་སྔོན་དཔལ་ཆེན་པོའི་སྤྱན་སྔར། དབུས་ནས་མི་འཚལ་དཀྱིལ་འཁོར་མུ་རན་སྐྱོང་༔ ཞེས་པ་ལྟར་དཀྱིལ་འཁོར་གྱི་མཐར་བཀོད་པ་བཤད་པས་ན། ཞི་བ་ལྷུན་གྱིས་གྲུབ་པའི་དཀྱིལ་འཁོར་གྱི་ཡང་སྟེང་གི་ནམ་མཁར་ཇི་ལྟར་འཁོད། འདི་སྒོམ་པའི་དུས་ཡིན་པས་རྟོག་ཚོགས་དག་པ་ལྷ་སྣང་གཅིག་གི་རོལ་པ་གྱང་ལོག་གཅིག་གི་རི་མོ་ལ་རྒྱུད་ཐ་དད་པའི་མཐོ་དམན་མེད་པ་བཞིན་ཡིན་པས་སྐྱོན་དེ་མེད་ཅེ་ན། ལར་བསྐྱེད་རིམ་བསྒོམ་པའི་དགོས་པ་ནི་སྦྱངས་བྱ་འཁོར་བའི་བག་ཆགས་ལ་ལྟོས་ནས་དེ་སྦྱངས་པ་སོགས་དག་རྫོགས་སྨིན་པའི་བྱེད་ལས་ཅན་ཡིན་པས་གོ་རིམས་དང་གཙོ་འཁོར་འཁྲུགས་པ་སོགས་མི་རུང་ལ། རྒྱུད་མཐོ་དམན་མེད་པས་དེ་ལྟར་བྱེད་ན་གཙོ་བོ་ཀུན་བཟང་ཡང་སྒོ་སྐྱོང་དུ་བྱེད་རིགས་པ་སོགས་གཙོ་འཁོར་གྱི་རྣམ་བཞག་ཐམས་ཅད་ནུབ་པས་ཧ་ཅང་ཐལ་ལོ། །གྱང་ལོག་གི་རི་མོ་དང་བཟོ་དབྱིབས་དང་བཀོད་པ་གཙོ་འཁོར་མཐོ་དམན་ཆེ་ཆུང་ལྟར་ཡོད་པས་དཔེ་ཡང་གྲུབ་བོ། །ཡང་གང་དག་རྣམ་གྲོལ་དབུགས་ཆེན་འབྱིན་པའི་ཞིང་ལྔའི་སྟེང་མེ་རི་འབར་བའི་དཀྱིལ་འཁོར་

བསྟན་ཅིང་ལུགས་འདིའི་འཚང་རྒྱ་བའི་ཞིང་ཡང་དེར་བཤད་དགོས་པས་ན་ཁྲོ་དཀྱིལ་སྟེང་དུ་བྱེད་རིགས་སོ་ཞེས་པ་དང་། དེའི་རྣམ་པ་ལམ་བྱེད་ཀྱི་དཀྱིལ་འཁོར་མ་ཧཱ་ལྟར་གྱི་ཕྱི་དཀྱིལ་འདི་མིན་པ་ལས་གཞན་དུ་འདིའི་གཞུང་གི་ལམ་བསྟན་གྱི་དུས་ཞིང་ལྔ་ལས་མེ་རི་འབར་བ་མ་བསྟན་པས་ཤེས་སོ། །ཡང་ལམ་བསྟན་གྱི་དུས་རྡོར་སེམས་དབུས་སྡུག་པོ་བཀོད་ཞིང་དུ་བཞུགས་པར་གསུངས་པས་ན་རྡོར་སེམས་གཙོ་བོར་བྱེད་ཅིང་རྣམ་སྣང་ཤར་དུ་བསྐྱེད་དགོས་ཟེར་བའང་། གནས་སྤར་སྐབས་འདིར་བསྟན་པའི་དཀྱིལ་འཁོར་གྱི་ནང་སོགས་བྱེད་པ་མིན་པ་དང་། ཨོ་རྒྱན་ཆེན་པོའི་མཛད་པའི་མཁའ་འགྲོ་སྙིང་ཐིག་སོགས་ཞི་ཁྲོའི་སྐོར་ཐམས་ཅད་ལས་གཙོ་བོ་རྣམ་སྣང་དུ་མཛད་པས་ན་སྨྲས་པ་ཙམ་དུ་ཟད་དོ། །མཚན་བྱང་མདའི་རྩེར་བཏགས་པ་དང་། དཀྱིལ་འཁོར་གྱི་སྟེང་དུ་འཕེན་པ་སོགས་བཤད་པའི་ཡིག་ཆུང་སྒྲས་ཟིན་ལ་བཤད་པ་ནི་འབྲེལ་མེད་ཅིང་འདོན་ཆོག་ལྟར་ཐབས་ཤེས་ལ་གོ་བའི་དྲང་ངེས་ཀྱི་བཤད་པའི་དོན་རྟོགས་དགོས་པས་མཁས་པར་བྱའོ། །ཡང་ཞི་བའི་ལྷ་བསྐྱེད་ཟིན་པ་དང་། འབྲུ་གསུམ་བརྗོད་པས་ནམ་མཁར་བཏེགས་ལ་དེའི་ཤུལ་དུ་ཁྲོ་བོ་རྣམས་བསྐྱེད་ནས་ཞི་བ་དབུ་རྒྱན་རིགས་བདག་གི་ཚུལ་དུ་བསྐྱེད་པར་བཞེད་པའང་། ལྷ་ཡབ་ཡུམ་སོ་སོར་མ་ཕྲལ་ན་གྲངས་ཉུང་ནས་འདིར་རིགས་བདག་གི་དོན་མེད་པས་སྐབས་འདི་བཞིན་ཤུགས་ཀྱིས་འགྲོ་ལ། ཕྲལ་ནའང་སེམས་དཔའ་དང་སྒོ་བ་སོགས་ཀྱིས་དབུ་བརྒྱན་པའི་ལྷ་འབྱུང་བ་མཐོང་ངོ་། །སྐབས་འདིར་དགག་སྒྲུབ་བྱ་བ་མིན་ཀྱང་སྒོམ་ཡིག་དུ་མ་འདིར་བྱུང་བའི་དོགས་པ་བསལ་བའོ། །དེ་ལྟར་འཁོར་བའི་དུས། བྱིས་པ་ཕྱིར་བཙས་ནས་དབང་

པོ་རིམ་པར་རྒྱས་ཤིང་འདོད་པའི་ཡུལ་ལ་ལོངས་སྤྱོད། བུ་དང་འཁོར་འབང་རྒྱས་པ་སོགས་དང་། རྫོགས་རིམ་གྱི་དུས་སུ་ཉེ་རྒྱུའི་སྤྱོད་པ་ལ་བརྟེན་ནས་རིག་འཛིན་གྱི་སྐུར་གྲུབ་ཟུང་འཇུག་གི་དཀྱིལ་འཁོར་མངོན་དུ་སྤྲོ་ནུས་པ་དང་། སངས་རྒྱས་ཀྱིས་གང་འདུལ་སྤྲུལ་པ་དཔག་མེད་སྤྲོས་པ་དང་རྣམ་པ་མཐུན་པ་སོགས་དག་རྫོགས་སྨིན་པའི་བྱེད་ལས་ཅན་གྱི་གོང་བཤད་ལྟར་གཙོ་བོ་ཡབ་ཡུམ་གཉིས་སུ་མེད་པའི་བདེ་སྟོང་ཟུང་དུ་འཇུག་པའི་བྱང་ཆུབ་ཀྱི་སེམས་ཐིག་ལེ་ཡིག་འབྲུའི་མཚན་པ་ཐུགས་ཀ་ནས་སྤྲོས་ཏེ་རང་རང་གི་གདན་ལ་བབས་པ་ལས་རྟོག་ཚོགས་དག་པ་ཞི་ཁྲོའི་འཁོར་གྱི་རྣམ་པར་འགོད་པ་ནི་བཅུད་རྣམ་པར་དག་པ་བརྟེན་པའི་ལྷ་བསྐྱེད་པའི་ཚུལ་ལོ། །དེ་ནས་བྱིན་རླབས་སོགས་སྐྱབས་རྗེས་ལས་བྱང་ཆེ་བའི་ཞི་བ་བསྐྱེད་ཟིན་པས་ༀ་ཨཱཿཧཱུྃ་ཚར་གསུམ་བརྗོད་པའི་དང་པོའི་དུས་ལྷ་ཐམས་ཅད་གྱི་གནས་གསུམ་དུ། ཟླ་བ། པདྨ། ཉི་མ་ལ་འབྲུ་གསུམ་དང་། གཉིས་པའི་ཚེ་དེ་ལས་འོད་ཟེར་འཕྲོས་པས་རྡོ་རྗེ་གསུམ་གྱི་ལྷ་ཚོགས་དྲངས་ཏེ་བསྟིམ་པ་དང་། གསུམ་པའི་དུས་སུ། སྤྱི་བོར་རྣམ་སྣང་། མགྲིན་པར་སྣང་མཐའ། ཐུགས་གར་མི་བསྐྱོད་པ་གསུམ་གྱི་སྐུར་གྱུར་པས་རྒྱས་གདབ་པར་བསྒོམ་ཞིང་གནས་གསུམ་དུ་རྡོ་རྗེའི་ཕྱག་རྒྱ་འཇོག་པར་གསུངས། དབང་བསྐུར་ནི་བྱེད་དགོས་པའི་གསལ་ཁ་མ་བྱུང་བས་མ་བྱས་ཀྱང་ཆོག་པར་མངོན་གསུངས། ལོ་ཆེན་རིན་པོ་ཆེས་ནི་ལྷ་ཡོངས་རྫོགས་བསྐྱེད་གྲུབ་རྗེས་སུ་ཞི་ཁྲོ་བཀའ་མའི་འགྲོས་ལྟར་ལ་བྱིན་རླབས་ནི་ཡི་གེ་བསྒོམས་པ་ཙམ་དང་། དབང་བསྐུར་ནི་རྒྱས་པར་གསུངས་སོ། །གནད་ཀྱི་འགངས་ཆེ་བ་འདི་ལྟ་བུ་བཀའ་མའི་གཞུང་གིས་ཁ་བསྐང་བ་ནི། བཀའ་བརྒྱད་དབང་གི་ཆོ་གའི་སྡོམ་ལས། རྒྱུད་

འདི་ཏནྟྲ་བཅོ་བརྒྱད་ཀྱི། །རྩ་བ་ཡིན་པས་ཟབ་པར་འདུག །གང་ཟག་སྤྲོས་ལ་དགའ་བ་རྣམས། །དབང་དང་ཆོ་ག་ཁ་བསྐངས་སོགས། །རྒྱས་པར་འདོད་ན་རིགས་མཐུན་པའི། །ཆོ་ག་གཞན་དང་གཞན་ནས་བླང་། །ལེན་དུ་རུང་བ་ང་ཡི་བཀའ། །ཀུན་ཏུ་བཟང་པོའི་གནང་བ་སྟེ། །ཞེས་པ་ལྟར་བཀའ་གཏེར་མན་ངག་ཟུང་དུ་འཇུག་པ་ཡན་ལག་བཞི་རྫོགས་ཀྱི་ལྷ་བསྐྱེད་ཚང་བའི་གནད་བླ་ན་མེད་པ་སྐལ་བཟང་གི་སྐྱེ་བོ་བློ་གྲོས་དང་ལྡན་པ་རྣམས་ཀྱིས་སྤྱི་བོར་ལེན་པའི་འོས་ཡིན་ནོ། །རིགས་བདག་གི་རྒྱས་འདེབས་ཚུལ་རྒྱུད་འགྲེལ་ལྟར། །ཀུན་བཟང་རྡོར་སེམས་ཆེ་མཆོག་བསྐྱེད་ན་དེ་དང་། བཛྲ་ཧེ་རུ་ཀ་རྣམས་ཡབ་ཡུམ་ཐུབ་པ་དྲུག་དང་བཅས་པ་རྣམས་ལ་མི་བསྐྱོད་པ། རྣམ་སྣང་བུདྡྷ་ཁྲག་འཐུང་ས་སྙིང་བྱམས་པ་རྣམ་པར་རྒྱལ་བ་རྣམས་ཡབ་ཡུམ་དང་བཅས་པ་ལ་རྣམ་སྣང་། རིན་འབྱུང་རཏྣ་ཧེ་རུ་ཀ་ཀུན་བཟང་ནམ་སྙིང་གཤིན་རྗེ་གཤེད་པོ་རྣམས་ཡུམ་དང་བཅས་པར་རིན་འབྱུང་། སྣང་མཐའ་པདྨ་ཧེ་རུ་ཀ་སྤྱན་གཟིགས་འཇམ་དཔལ་རྟ་མགྲིན་རྣམས་ཡུམ་དང་བཅས་པ་ལ་སྣང་མཐའ། དོན་གྲུབ་ཀརྨ་ཧེ་རུ་ཀ་སྒྲིབ་སེལ་ཕྱག་རྡོར་བདུད་རྩི་འཁྱིལ་པ་རྣམས་ཡུམ་དང་བཅས་པར་དོན་གྲུབ་གཙོ་བོར་གྱུར་པའི་རིགས་ལྔ་རེ་དང་། གནས་ཡུལ་སྒོ་སྐྱོང་གི་ཁྲོ་མོ་ཉི་ཤུ་ལ་ཡེ་ཤེས་ལྔ་དང་ལྡན་པའི་དབང་རྟགས་སུ་རྡོ་རྗེ་རྩེ་ལྔ་པ་རེ་དང་། དབང་མོ་རྣམས་ལ་རྡོ་རྗེ་རྩེ་གསུམ་པ་རེ་རེས་དབུ་བརྒྱན་ནོ་གསུངས། འདི་གཉིས་ནི་འཁོར་བའི་དུས་སྒོ་གསུམ་གྱི་ནུས་པ་རྒྱས་ནས་རང་རིགས་ཀྱི་ཆོས་ལ་འཇོག་པ་དང་། སངས་རྒྱས་རྣམས་ཀྱི་རྡོ་རྗེ་གསུམ་དང་ཡེ་ཤེས་ལྔས་རང་དབང་བསྒྱུར་བ་དང་རྫོགས་རིམ་རིག་འཛིན་གྱི་གནས་རྣམས་གོང་ནས་གོང་དུ་རྒྱས་པ་སོགས་དང་མཐུན་པའི་དག་རྫོགས་སྨིན་པའི་གནད་རྣམས་ཀྱང་

ཤེས་པར་བྱའོ། །གཉིས་པ་ནི། འཁོར་བའི་དུས་རང་རིགས་ཀྱི་གོ་ས་ནོན་པ། སངས་རྒྱས་ཀྱི་དུས་དེ་བཞིན་གཤེགས་པ་ཐམས་ཅད་དང་དབྱེར་མེད་པའི་ཡོན་ཏན་རྫོགས་པ། རྫོགས་རིམ་གྱི་དུས་ཟུང་འཇུག་གི་གནས་ཡང་དག་པར་སོན་པ་སོགས་ཀྱི་དག་རྫོགས་སྨིན་པའི་བྱེད་ལས་ཅན་ནོ། །གཉིས་པ་ནི་རྒྱུད་རྣམ་པར་དག་པ་ཡེ་ཤེས་སེམས་དཔའི་ངོ་བོར་སྒྲུབ་པའི་ཕྱིར་ཡེ་ཤེས་ཀྱི་དཀྱིལ་འཁོར་སྤྱན་འདྲེན་པ་ནི། ཧཱུྃ་དཔེ་མེད་བསམ་བརྗོད་སོགས་ཀྱིས་དམ་ཚིག་གི་འཁོར་ལོའི་མདུན་གྱི་ནམ་མཁར་སྤྱན་དྲངས། བརྟན་པར་བཞུགས་གསོལ་ནི། ཧཱུྃ་སྒྱུ་མ་གཟུགས་བརྙན་སོགས་ཀྱིས་དམ་ཚིག་པའི་དཀྱིལ་འཁོར་དང་དབྱེར་མེད་དུ་བསྟིམ། ཕྱག་འཚལ་བ་ནི། ཧཱུྃ་ཡིད་ཆོས་གནས་དག་སོགས། མཆོད་པ་འབུལ་བ་ལ་སྤྱི་དང་ཁྱད་པར་གཉིས་ལས་དང་པོ་ནི། རྡོ་རྗེ་ལྷ་མོ་བཅུ་དྲུག་གི་ཕྱི་ཉེར་སྤྱོད་ཀྱི་མཆོད་པ་སྤྲོ་བའི་ལྷ་མོ་ལྔ་ནི། ཧཱུྃ་བླ་མ་ཀུན་བཟང་རྒྱལ་བ་སོགས་འདིའི་རོལ་མོ་ནི་སྤྱི་ཡིན་ནོ། །ནང་འདོད་ཡོན་གྱི་ལྷ་མོ་དྲུག་གི་གཟུགས་རྣམས་སྒེག་མོ། སྒྲ་གླུ་མ། དྲི་བདུག་སྤོས་སམ་དྲི་ཆབ་མ། རོ་ཞལ་ཟས་མ། རེག་བྱ་ཆོས་ཀྱི་ལྷ་མོ་གཉིས་ཏེ་དྲུག་གིས་མཆོད་པ་ནི། ཧཱུྃ་བླ་མ་ཀུན་བཟང་ཞི་ཁྲོའི་ཚོགས༔ སོགས་འདི་རྣམས་ཀྱི་མཚན་མ་རྡོ་རྗེ་གཟུགས་མ་སོགས་གསུངས་སོ། །གསང་བ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིག་མ་ལྔ་འབུལ་བ་ནི། ཧཱུྃ་སྣང་བ་ཡབ་ལ་སོགས། ཁྱད་པར་གྱི་མཆོད་པ་ལ་གསུམ་གྱི་བདུད་རྩི་མཆོད་པ་ནི། ཧཱུྃ་རིགས་ལྔ་ཡབ་ཡུམ་སོགས། རཀྟ་ནི་ཧཱུྃ་དུག་ལྔ་ཡེ་ཤེས་སོགས། གསུམ་པ་ནི། ཧཱུྃ་ཕྱི་སྣོད་འཇིག་རྟེན་སོགས། ཆེ་བའི་ཡོན་ཏན་ལ་བསྟོད་པའི་མཆོད་པ་ནི། ཧཱུྃ་སྐུ་ནི་མི་འགྱུར་སོགས། བཤགས་པ་ནི། ཧཱུྃ་བླ་མ་ཀུན་བཟང་སོགས། དེ་ལྟར་འཁོར་བའི་

དུས་ཡུལ་གྱི་ལོངས་སྤྱོད་ལ་རོལ་བ་དང་། ཡོན་ཏན་ལ་བསྟོད་བསྔགས་དང་། སངས་རྒྱས་ཀྱི་དུས་ལྷ་དང་བཅས་པའི་འཇིག་རྟེན་གྱིས་མཆོད་བསྟོད་དང་། རྫོགས་རིམ་ཟུང་འཇུག་གི་ཡེ་ཤེས་བསམ་གྱིས་མི་ཁྱབ་པའི་སྤྱོད་པ་ཆེན་པོ་དང་། རྒྱལ་བའི་ཞིང་ཁམས་སུ་རིག་འཛིན་གྱི་གྲགས་པས་བསྟོད་པ་རྣམས་ཀྱིས་དག་རྫོགས་སྨིན་པའི་བྱེད་ལས་ཅན་ནོ། །ཇི་སྐད་དུ། བསྐྱེད་དང་སྤྱན་འདྲེན་ཕྱག་འཚལ་དང་། །མཆོད་བསྟོད་ཆོ་ག་གཞུང་བཞིན་ལ། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཕ་རོལ་ཕྱིན། །དེ་ལས་ལྡོག་མེད་མ་ཡེངས་བྱ། །དངོས་གྲུབ་མྱུར་དུ་ཐོབ་པར་ངེས། །གསུངས་པ་ལྟར་ཕ་རོལ་དུ་ཕྱིན་པ་དྲུག་གི་ཡོན་ཏན་རྫོགས་པའི་ཕྱག་འཚལ་མཆོད་པ་སོགས་ཐམས་ཅད་རང་བཞིན་གཉིས་སུ་མེད་པའི་ཡེ་ཤེས་ཀྱི་རྣམ་རོལ་སྒྱུ་མ་དང་རྨི་ལམ་གྱི་རྩེ་འཇོ་བཞིན། ལྷ་ལ་ལྷས་མཆོད་པ་དང་། ཡེ་ཤེས་ལ་ཡེ་ཤེས་རོལ་པའི་ཚུལ་གྱིས་བྱས་པས་མཐའ་ཡས་པའི་སངས་རྒྱས་ཀྱི་དཀྱིལ་འཁོར་མ་ལུས་པ་མཆོད་པར་འགྱུར་ཏེ། རྒྱལ་བ་རྣམས་ནི་རྒྱུད་ཐ་དད་པའི་དངོས་བྱས་ཀྱི་དབྱེ་བ་མེད་པར་ཆོས་ཀྱི་དབྱིངས་སུ་ཚུལ་གཅིག་པར་བཞུགས་པ་དང་། འགྲོ་བའི་དོན་ལ་དགོངས་པ་རྒྱུན་མི་འཆད་པར་མཉམ་པ་ཡིན་པའི་ཕྱིར་ཏེ། སྒྲུབ་ཐབས་ཀུན་བཟང་ལས། ཕྱིན་ཅི་ལོག་གི་རྟོག་པ་སྤང་བ་ཡིས། །བྱ་བ་མ་ལུས་པ་ནི་རྫོགས་པར་བྱ། །དེ་ཡིས་ཐུབ་པའི་འཁོར་ལོ་མ་ལུས་པ། །མཆོད་པ་འདི་ནི་ཀུན་ཏུ་མཆོག་ཡིན་ནོ། །ཞེས་སོ། །གསུམ་པ་སྐབས་དོན་བསྙེན་པའི་ཚུལ་དངོས་ལ་གསུམ། སྐུ་ཕྱག་རྒྱ་ཆེན་པོ་ལྷའི་རྣལ་འབྱོར་དང་། གསུང་བཟླས་པ་སྔགས་ཀྱི་རྣལ་འབྱོར་དང་། ཐུགས་འོད་གསལ་ཆོས་སྐུའི་རྣལ་འབྱོར་རོ། །དང་པོ་ནི། སྤྱིར་སྤང་བྱའི་རིགས་སུ་གྱུར་པའི་

སྒྲིབ་པ་ཐམས་ཅད་ཉོན་མོངས་དང་ཤེས་བྱའི་སྒྲིབ་པ་གཉིས་སུ་འདུ་བ་ལ་རྣལ་འབྱོར་ཆེན་པོའི་ལུགས་འདིར་དེ་ལས་ཐ་མལ་གྱི་སྣང་ཞེན་ཞེས་གྲགས་པས་སྤང་བྱའི་རིགས་ཐམས་ཅད་དེར་འདུ་བར་ཟད་དོ། །དེ་ཡང་ཐོག་མ་མེད་པ་ནས་ཞུགས་པའི་མ་རིག་པའི་བག་ཆགས་ཀྱི་དབང་གིས་རང་གི་ཡིད་ངོར་སྣོད་བཅུད་ཀྱི་དངོས་པོ་མ་དག་རང་ག་མར་དབང་མེད་དུ་འཆར་བ་འདི་ཐ་མལ་གྱི་སྣང་བ་དང་། དེ་ལ་སྣང་བ་ལྟར་བདེན་པར་གྲུབ་བོ་སྙམ་དུ་འཛིན་ཅིང་བདག་དང་བདག་གིར་ཞེན་པའི་ལོག་རྟོག་གིས་སྒྲོ་བཏགས་ནས་རྟག་ཏུ་འཁྲུལ་ཞིང་ལས་སྣ་ཚོགས་བསགས་པས་སྲིད་པའི་སྡུག་བསྔལ་གྱི་རྒྱ་མཚོ་འདིར་ཡང་དང་ཡང་དུ་ཉིང་མཚམས་སྦྱོར་ཞིང་རྒྱུན་མི་འཆད་པར་འཁོར་རོ། །དེ་ཡང་ཐ་མལ་གྱི་སྣང་བས་བསྡུས་པ་ནི་ཤེས་བསྒྲིབ་དང་ཞེན་པས་བསྡུས་པ་ནི་ཉོན་སྒྲིབ་ཏུ་གཙོ་བོར་བཞག་པའོ། །དེ་ལྟ་བུའི་སྒྲིབ་པ་གཉིས་ཀྱི་གཉེན་པོའི་ཕྱོགས་སུ་གྱུར་པའི་ལམ་ལ་རིམ་པ་གཉིས་ཀྱི་དང་པོ་བསྐྱེད་རིམ་ནི། ཐ་མལ་གྱི་སྣང་བའི་གཉེན་པོར་ཆོ་གའི་ཡན་ལག་ཚང་བའི་སྒོ་ནས་བསྐྱེད་པའི་རྟེན་དང་བརྟེན་པའི་ལྷའི་གསལ་སྣང་ལ་སྤྱི་དང་བྱེ་བྲག་གི་ཚུལ་དུ་བསླབ་པ་དང་། ཐ་མལ་གྱི་ཞེན་པའི་ངའོ་སོགས་ཀྱི་གཉེན་པོར་དཔལ་ཀུན་ཏུ་བཟང་པོ་ངའོ་སོགས་དང་། དེ་སྤང་རྟོགས་ཀྱི་ཡོན་ཏན་རྫོགས་པའི་སངས་རྒྱས་དངོས་ཡིན་ནོ་སྙམ་པའི་ང་རྒྱལ་དང་པོ་ནས་བཅོས་ནས་ཡང་དང་ཡང་དུ་བསྐྱེད་པས་ཅི་ཞིག་ན་དེའི་རྒྱུན་ལས་བཅོས་མིན་གྱི་གསལ་སྣང་དང་ང་རྒྱལ་བརྟན་པར་འགྱུར་རོ། །ལར་ཐུན་མོང་གི་ཕྲ་བ་སོགས་སྒྲུབ་པ་ལ་དེ་ཙམ་གྱི་སྟེང་ནས་སྒྲུབ་ན་ཆོག་མོད་དེ། མཆོག་གི་དངོས་གྲུབ་གྱི་རྒྱུར་གྱུར་པའི་བསྐྱེད་རིམ་ཁྱད་པར་ཅན་ལ་ནི་དེ་ཙམ་དུ་མ་ཟད། བདག་ཏུ་

འཛིན་པའི་ལོག་རྟོག་དང་རྣམ་པ་དངོས་སུ་འགལ་བའི་ཤེས་རབ་ཀྱིས་ཟིན་པར་བྱས་ནས་ཆོས་ཉིད་ཀྱི་རང་བཞིན་དུ་གཞི་འབྲས་འབྲེལ་བའི་དག་པ་སྤྱོར་ཚུལ། སྣང་སྲིད་རྣམ་དག་ལྷ་དང་ལྷ་མོའི་དབྱིངས༔ བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས༔ གསང་ཆེན་རབ་དགྱེས་གཟུངས་ཆེན་བདག་ཉིད་མས༔ མཁའ་དབྱིངས་ཀློང་ཡངས་པདྨོར་འཁྱིལ་བ་དེར༔ གཉིས་མེད་ཐིག་ལེ་ཆེན་པོར་འོད་གསལ་བ༔ ཞེས་སོགས་གསུངས་པ་ལྟར་རང་བཞིན་ཡོངས་ཤེས་ཀྱི་ལྟ་བ་ཡང་ཡང་གོམ་པར་བྱས་ནས་ལྷ་རང་རྒྱུད་དུ་འཛིན་པ་ལས་ལྡོག་སྟེ་ཟབ་དང་རྒྱ་ཆེ་བ་གཉིས་སུ་མེད་པའི་སྣང་སྟོང་ཟུང་འཇུག་གི་བསྐྱེད་རིམ། སྒྱུ་མ་གཟུགས་བརྙན་ཆུ་ཟླ་འཇའ་ཚོན་ལྟར༔ རང་ལས་བྱུང་ཞིང་རང་བྱུང་རང་ཐིམ་བཞིན༔ གཉིས་མེད་ཟུང་འཇུག་དབྱེར་མེད་ཆེན་པོ་རུ༔ ཞེས་པ་ལྟར་སྤྱིར་ཆོས་ཐམས་ཅད་ནི་ཕན་ཚུན་ལྟོས་ནས་བཞག་པའི་རྟེན་འབྲེལ་ཙམ་ཡིན་པས་ན་རང་བཞིན་གྱིས་གྲུབ་པའི་བདེན་པ་ནི་མེད་པ་ལྟར་ལྷའི་དཀྱིལ་འཁོར་ཀྱང་དེ་ལྟར་ཤེས་པར་བྱས་ནས་བསྒོམ་པའི་ཚེ་ན་སྣང་བཞིན་དུ་སྟོང་ཞིང་སྟོང་བཞིན་དུ་རྣམ་པར་སྣང་བ་ལ་བསླབ་ཅིང་ཁྱད་པར་དུ། རྣམ་པར་རྟོག་གསུམ་བྲལ་བ་ཡི༔ དམིགས་མེད་བརྗོད་བྲལ་དེ་བཞིན་ཉིད༔ ཅེས་དང་། རྟོག་བྲལ་ངང་ལས་རང་བྱུང་རྩལ༔ སྟོང་ཉིད་སྙིང་རྗེ་ཀུན་ཏུ་སྣང་༔ ཞེས་གསུངས་པ་ལྟར་གཉུག་མའི་རྩ་རླུང་ཐིག་ལེ་ལ་བརྟེན་པའི་གཞི་དུས་ཀྱི་སྐུ་གསུམ་བླ་མའི་མན་ངག་གི་ངོ་རང་ཐོག་ཏུ་འཕྲོད་པ་ན། རིག་སྟོང་སྤྲོས་བྲལ་བྱང་ཆུབ་སེམས་ཀྱི་རང་རྩལ་ཡུལ་གང་ཤར་སྟོང་ཉིད་ཀྱི་གཤིས་སུ་ལམ་ལམ་གྲོལ་བའི་སོ་སོར་རྟོགས་པའི་ཤེས་རབ་ཀྱིས་མ་རིག་པ་གཞི་ནས་སངས་ཏེ་རིག་པའི་ཡེ་ཤེས་སུ་གནས་འགྱུར་བའི་རྩལ་སྣང་འགགས་མེད་དུ་ཤར་བའི་སྣོད་བཅུད་དག་པ་

རབ་འབྱམས་ཀྱི་དཀྱིལ་འཁོར་དུ་མ་བཙལ་ལྷུན་གྱིས་གྲུབ་པའི་ཚུལ་ལ་ངེས་ཤེས་འདྲོངས་པ་ནི་སྤྱིར་རྣམ་དག་སྦྱོར་ཚུལ་གྱི་གནད་དམ་པའོ། །བྱེ་བྲག་ཏུ་ལྷ་སོ་སོའི་དག་པ་སྦྱོར་ཚུལ་ནི། ནམ་མཁའི་ཁམས་དང་གཏི་མུག་གཟུགས་ཕུང་དག་པ་ཆོས་དབྱིངས་ཡེ་ཤེས་ཀྱི་རང་བཞིན་དེ་བཞིན་གཤེགས་པ་ཐམས་ཅད་ཀྱི་སྐུའི་བདག་ཉིད་རྣམ་སྣང་ཡབ་ཡུམ་ངའོ། །ཞེས་དག་པའི་བདག་ཉིད་ལ་ངེས་ཤེས་བསྐྱེད་དོ། །དེ་བཞིན་དུ་ས་ཁམས་ཞེ་སྡང་རྣམ་ཤེས་ཀྱི་ཕུང་པོ་དག་པ་མེ་ལོང་ཡེ་ཤེས་ཐུགས་གྱི་བདག་ཉིད་རྡོ་རྗེ་སེམས་དཔའ་ཡབ་ཡུམ། ཆུ་ཁམས་ང་རྒྱལ་ཚོར་ཕུང་དག་པ་མཉམ་ཉིད་ཡེ་ཤེས་ཡོན་ཏན་གྱི་བདག་ཉིད་རིན་ཆེན་འབྱུང་ལྡན་ཡབ་ཡུམ། མེ་ཁམས་འདོད་ཆགས་འདུ་ཤེས་ཀྱི་ཕུང་པོ་དག་པ་སོར་རྟོགས་ཡེ་ཤེས། གསུང་གི་བདག་ཉིད་སྣང་བ་མཐའ་ཡས་ཡབ་ཡུམ། རླུང་ཁམས་ཕྲག་དོག་འདུ་བྱེད་ཀྱི་ཕུང་པོ་དག་པ་བྱ་གྲུབ་ཡེ་ཤེས་ཕྲིན་ལས་ཀྱི་བདག་ཉིད་དོན་ཡོད་གྲུབ་པ་ཡབ་ཡུམ། ཡིད་ཀྱི་སྐྱེ་མཆེད་དག་པ་ཀུན་ཏུ་བཟང་པོ་དང་། དེའི་ཡུལ་ཆོས་ཁམས་དག་པ་ཀུན་ཏུ་བཟང་མོའོ། །མིག་གི་རྣམ་ཤེས་དག་པ་ས་སྙིང་། རྣ་བ་ནམ་མཁའི་སྙིང་པོ། སྣ་སྤྱན་རས་གཟིགས། ལྕེ་ཕྱག་རྡོར་དག་པའོ། །དེ་རྣམས་ཀྱི་ཡུལ་གཟུགས་དག་པ་སྒེགས་མོ་དང་། སྒྲ་ཕྲེང་བ་མ། དྲི་གླུ་མ། རོ་གར་མའོ། །མིག་གི་དབང་པོ་དག་པ་བྱམས་པ། རྣ་བ་སྒྲིབ་སེལ། སྣ་ཀུན་བཟང་། ལྕེའི་དབང་པོ་དག་པ་འཇམ་དཔལ། དབང་པོའི་ཡུལ་དུས་བཞིའི་འདས་དུས་སྤོས་མ། ད་ལྟ་མེ་ཏོག་མ། མ་འོངས་སྣང་གསལ་མ། མ་ངེས་དག་པ་དྲི་ཆབ་མའོ། །ཉོན་མོངས་པ་ང་རྒྱལ་དག་པ་ལྷའི་ཐུབ་པ། ཕྲག་དོག་ལྷ་མིན་ཐུབ་པ། འདོད་ཆགས་མིའི་ཐུབ་པ། གཏི་མུག་བྱོལ་སོང་གི་ཐུབ་པ། སེར་སྣ་ཡི་དྭགས་ཐུབ་པ། ཞེ་སྡང་དག་པ་དམྱལ་བའི་ཐུབ་པ། ལུས་ཀྱི་

ཆོས་བཞིའི་ལུས་ཀྱི་རྣམ་ཤེས་དག་པ་རྣམ་རྒྱལ། ལུས་དབང་གཤིན་རྗེའི་གཤེད། ལུས་ཀྱི་རེག་བྱ་རྟ་མགྲིན། རེག་ཤེས་བདུད་རྩི་འཁྱིལ་པར་དག་པའོ། །ཕྱིན་ཅི་ལོག་གི་ལྟ་བ་བཞིའི་རྟག་པ་དག་པ་ལྕགས་ཀྱུ་མ། ཆད་ལྟ་དག་པ་ཞགས་པ་མ། བདག་ལྟ་དག་པ་ལྕགས་སྒྲོགས་མ། མཚན་མར་ལྟ་བ་དག་པ་དྲིལ་བུ་མ། དེ་ཡང་ཞི་ཁྲོ་གཉིས་ལ་དག་སྦྱོར་ཐ་དད་དུ་གསུངས་པ་ནི་མེད་དེ། ཞི་བ་གནས་གྱུར་ཁྲོ་བོ་ཡིན་པའི་ཕྱིར། ཞི་བ་རིགས་ལྔའི་སྒྲུབ་གཞི་གང་ཡིན་པ་དེ་ནི་ཁྲག་འཐུང་རིགས་ལྔའི་སྒྲུབ་གཞིའང་ཡིན་ལ་སོགས་གསུངས། གཞུང་འདིར་དབང་གི་དག་སྦྱོར་གྱི་སྐབས། ངོ་སྤྲོད་ཀྱང་གོང་ལྟར་བྱ་བ་གསུངས་པ་ལྟར། ཁྲོ་བོའི་དག་སྦྱོར་ཀྱང་རྣམ་པ་ལམ་བྱེད་བསྒོམ་པའི་སྐབས་འདིར་སྦྱར་ན་སྣང་བ་འགྱུར་བའི་ངེས་ཤེས་བསྐྱེད་པ་ལ་ཁྱད་ཆེ་བས། ཇི་སྐད་དུ། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་དག །ཁྲོ་རྒྱལ་ཡེ་ནས་ཡིན་པའི་ཕྱིར། །སོགས་ལྟར། གཏི་མུག་ཤས་ཆེ་བའི་གདུལ་བྱ་མ་རུང་བ་ཞི་བས་གདུལ་དཀའ་བ་རྣམས་ཚར་གཅོད་པའི་ཕྱིར། གཏི་མུག་ཆེན་པོའི་ཚུལ་གྱིས་རྔམ་པའི་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་བདག་ཉིད་བཅོམ་ལྡན་འདས་དཔལ་ཆེན་བུདྡྷ་ཧེ་རུ་ཀ་ངའོ། །དེ་བཞིན་དུ་ཞེ་སྡང་ཆེན་པོའི་ཚུལ་གྱིས་ཞེ་སྡང་འཇོམས་མཛད་ཐུགས་ཀྱི་བདག་ཉིད་བཛྲ་ཧེ་རུ་ཀ་དང་ང་རྒྱལ་ཆེན་པོའི་ཚུལ་གྱིས་ང་རྒྱལ་འཇོམས་མཛད་ཡོན་ཏན་གྱི་བདག་ཉིད་རཏྣ་ཧེ་རུ་ཀའདོད་ཆགས་ཆེན་པོའི་ཚུལ་གྱིས་འདོད་ཆགས་འཇོམས་མཛད་གསུང་གི་བདག་ཉིད་པདྨ་ཧེ་རུ་ཀཕྲག་དོག་ཆེན་པོའི་ཚུལ་གྱིས་ཕྲག་དོག་འཇོམས་མཛད་ཕྲིན་ལས་ཀྱི་བདག་ཉིད་ཀརྨ་ཧེ་རུ་ཀ དེ་དག་གི་རིགས་བསྐྱེད་པའི་ཡུམ་འབྱུང་བ་ཆེན་པོ་ལྔའི་དག་པ་གནས་འགྱུར་ཆོས་ཉིད་ཀྱི་རང་མདོག་ཀྲོ་ཏི་

ཤྭ་རི་ལྔ། དེ་བཞིན་དུ་མིག་སོགས་རྣམ་ཤེས་བཞི་དང་དབང་པོའི་དག་པ་གནས་འགྱུར་རྣམ་ཀུན་མཆོག་ལྡན་སྟོང་པའི་རང་གཟུགས་མ་མོ་བརྒྱད། ཡུལ་དུས་དག་པའི་གནས་འགྱུར་དབྱིངས་དང་ཡེ་ཤེས་འདྲེས་པའི་རྟགས་ཀྱི་ཕྱག་རྒྱའི་གཟུགས་འཆང་བའི་ཕྲ་མེན་བརྒྱད། ཕྱིན་ཅི་ལོག་གི་རྟོག་པ་བཞི་དག་པ་གནས་འགྱུར་ཚད་མེད་བཞིའི་རང་བཞིན་སྒོ་སྐྱོང་གདོང་ཅན་བཞི། དཔལ་གྱི་ཆོ་འཕྲུལ་ཆེན་པོའི་རང་གཟུགས་ཕྲིན་ལས་བཞི་ལ་མངའ་བརྙེས་པའི་དབང་མོ་ཉེར་བརྒྱད་དང་། གཞན་ཡང་ལྷ་དེ་དག་གི་སྐུ་མདོག་དང་ཕྱག་མཚན་ཞལ་དང་ཕྱག །རྒྱན་དང་ཆས་སོགས་ཀྱི་དག་པ་དང་རྟེན་གཞལ་ཡས་ཁང་འབྱུང་བ་རིམ་བརྩེགས་གཞལ་ཡས་དང་བཅས་པ་ཐམས་ཅད་ཀྱང་འདུས་བསགས་རྡུལ་གྱི་ཆོས་ཅན་མ་ཡིན་པར་མི་སློབ་རྒྱལ་བའི་ཡོན་ཏན་ཐམས་ཅད་བརྡ་དང་རྟགས་ཀྱི་རོལ་པར་ཤར་བ། དེ་ཡང་ཆོས་དབྱིངས་སྤྲོས་བྲལ་རང་རིག་པའི་ཡེ་ཤེས་ཀྱི་ངོ་བོར་ཡོངས་སུ་རྫོགས་ཤིང་ལྷུན་གྱིས་གྲུབ་པའི་ཚུལ་ཤེས་པར་བྱ། དག་སྦྱོར་འདི་རྒྱུད་འགྲེལ་སོགས་ལས་བསྟན་པའི་དོན་ལྟར་ཡིན་ལ་བསྙེན་པའི་དུས་འདིར་ཡན་ལག་གི་ལྷ་དང་ཚོམ་བུ་སྤྲོ་བ་སོགས་མི་འཁྱོངས་ན་བཞག་ལ་དེ་ཙམ་དུ་འཐུས་པར་བྱས་ནས་བསྒོམ་པས་ཆོག་པར་མངོན་ཞིང་གསལ་སྣང་འདོན་ཚུལ་ཀྱང་ཆ་མཉམ་པ་ལ་བསླབ་ནས་ཅུང་ཟད་གོམས་པ་ན། ཐུན་དུ་བཅད་ནས་འདི་ལྟ་བུ་ཞིག་གི་བར་དུ་ཡུལ་གཞན་ལ་ཡེངས་བར་མི་བྱའོ་ཞེས་ཞེ་དམ་བཅད་ནས་བསྒོམ་རྒྱུན་བསྲེང་ན་སྐབས་ཞིག་ནས་འཕེན་པའི་ཚད་ཀྱིས་ཐུན་རིང་ཐུང་གང་ཡང་མ་ཡེངས་པས་འཁྱོངས་ཤིང་། དང་པོ་ཡིད་ཀྱི་ཡུལ་དུ་གསལ་བར་འཆར་བ་དང་། རིམ་པས་དབང་པོའི་ཡུལ་དུ་སྣང་སྙམ་བྱེད་པ་དང་། མཐར་ལུས་ཀྱི་ཡུལ་དུ་རེག་མཐོང་ལྟ་བུའི་མཚན་མ་རྙེད་དེ་ཡུལ་གསུམ་

དུ་ཆོས་ཉིད་ཀྱི་ལྷ་སྣང་ཐོབ་པ་ལ་ཐ་མལ་སྣང་ཞེན་གྱིས་བརྫི་མི་ནུས་པར་གྱད་དུ་གྱུར་པའི་མཐུས་རང་བཞིན་རྣམ་དག་གཞིའི་དཀྱིལ་འཁོར་ལ་རྟོགས་ཤིང་གོམས་པའི་ལམ་གྱི་དཀྱིལ་འཁོར་རྣལ་དུ་འབྱོར་ཞིང་། སྣང་སྲིད་གཞིར་བཞེང་རང་བྱུང་དཀྱིལ་འཁོར་དུ། ཞེས་པ་ལྟར་བློས་བཏགས་བཅོས་མའི་བག་ཆགས་བལྟས་པ་ཙམ་མ་ཡིན་པའི་ཡོངས་གྲུབ་ཆེན་པོའི་བསྐྱེད་རིམ་སྣང་སྟོང་སྒྱུ་མ་ལྟ་བུ་ལ་བློ་རང་ཤུགས་ཀྱིས་འབྱོངས་པ་ན། ཟབ་ཆོས་ཞི་ཁྲོ་དགོངས་པ་རང་གྲོལ་ཆེན་པོའི་དོན་རང་གི་རྒྱུད་ཐོག་ནས་སློང་སྟེ་སྲིད་པའི་རྒྱུ་ཉོན་མོངས་པའི་ཀུན་འབྱུང་མ་རིག་པ་དང་མཚུངས་ལྡན་དུ་འཇུག་པའི་ཕྱིན་ཅི་ལོག་གི་འཛིན་པ་ཐམས་ཅད་མཐའ་བཞིར་མི་གནས་པའི་བདག་མེད་རྟོགས་པའི་ཤེས་རབ་ཟབ་མོའི་རང་བཞིན་ཅན་ལམ་གྱི་ངོ་བོར་གནས་འགྱུར་བས། འབྲས་བུ་སྡུག་བསྔལ་བདེན་པར་གྱུར་པའི་ཡུལ་སྣང་ཐམས་ཅད་རྒྱ་ཆེ་བ་ལྷའི་དཀྱིལ་འཁོར་འགོག་བདེན་ཆོས་སྐུའི་ངོ་བོར་རང་གྲོལ་བ་ཡིན་ཏེ། ཇི་སྐད་དུ། ཐ་མལ་རྣམ་རྟོག་རྒྱུད་ལས་གཞན་པ་ཡི། །སྲིད་པའི་སྡུག་བསྔལ་ཅི་ཡང་ཡོད་མ་ཡིན། །དེ་དང་རྣམ་པ་འགལ་བར་གྱུར་པའི་སེམས། །འདི་ནི་མངོན་སུམ་དུ་ནི་རྟོགས་པར་འགྱུར། །ཟབ་དང་རྒྱ་ཆེ་བ་ཡི་བདག་ཉིད་ཅན། །གང་ཡིན་དེ་ནི་ཀུན་རྟོག་སྣང་མི་འགྱུར། །ཞེས་གསུངས་པ་ལྟར་རོ། །ཚུལ་འདི་ལ་སྔ་འགྱུར་རང་སྐད་དུ། བསྐྱེད་རྫོགས་ཟུང་འཇུག་གམ་བསྐྱེད་རྫོགས་དབྱེར་མེད་ཅེས་གྲགས་ཏེ་རང་གནས་ཀྱི་ཡེ་ཤེས་ངོས་ཟིན་པའི་སྟོབས་ཀྱིས་བསྒོམས་པ་ན་རྫོགས་རིམ་རྩ་རླུང་ལ་གནད་དུ་བསྣུན་པའི་དུས་ཀྱི་རྟགས་སྣང་ཕྲ་རགས་རྣམས་ཀྱང་འབྱུང་ཞིང་འོད་གསལ་བའི་ཡེ་ཤེས་རྟེན་དྭངས་མ་ལྔ་ལྡན་འོད་ཀྱི་ཐིག་ལེ་དང་བཅས་པ་ལས་ཡེ་ཤེས་སེམས་དཔའ་སྐུ་ཞལ་ཕྱག་རྫོགས་པར་ལྡང་

བའི་རྣམ་པར་སྨིན་པའི་རིག་འཛིན་ཐོབ་ནུས་པའོ། །ཚུལ་འདི་ནི་ཤེས་འཇུག་མཚན་ཉིད་འབྱོར་པའི་གཟུགས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པའི་དོན་ལམ་གྱི་གཞུང་གྲོལ་ལམ་གྱི་སྟེང་ནས་ཉམས་སུ་ལེན་པའི་ཚུལ་ལྟར་བསྟན་པ་ཡིན་ལ། གང་ཟག་ཁྱད་པར་ཅན་ལ་མྱུར་ལམ་རང་ལུས་ཐབས་ལྡན་དང་གཞན་ལུས་ཕྱག་རྒྱའི་ལམ་གྱི་དུས་རིང་མིན་མྱུར་བར་འབྲས་བུ་ལ་སྦྱོར་བའི་ཚུལ་གཞུང་འདིར་མ་བསྟན་པ་མིན་ཏེ། འདི་སྐོར་གྱི་རྫོགས་རིམ་ཟབ་མོ་རྣམས་ལྟར་རོ། །གཉིས་པ་ལ་གསུམ། ཇི་ལྟར་བཟླ་བའི་ཚུལ། བཟླ་བྱའི་སྔགས། དེའི་གྲངས་ཚད་དང་བཅས་པའོ། །དང་པོ་ནི། སེམས་ཅན་གྱི་དུས་ལས་རླུང་གི་བྱེད་རྩོལ་ངག་གི་སྨྲ་བརྗོད་རྣམས་དང་། རྫོགས་རིམ་གྱི་དུས་རྩ་བ་དང་ཡན་ལག་གི་རླུང་རྣམས་དབུ་མར་ཞུགས་གནས་ཐིམ་ཏེ་འོད་གསལ་གྱི་བཞོན་པར་དག་པ་དང་། སངས་རྒྱས་ཀྱི་དུས་གཞོམས་མེད་རྡོ་རྗེའི་གསུངས་དབྱངས་ཡན་ལག་དྲུག་བཅུ་དང་ལྡན་པས་ཆོས་ཀྱི་འཁོར་ལོ་རྒྱུན་མི་འཆད་པར་བསྐོར་བ་རྣམས་དང་རྣམ་པ་མཐུན་པས་དེ་དག་གི་དག་རྫོགས་སྨིན་པའི་ལས་ཅན་གྱི་བཟླས་པའི་རིམ་པ་ལ། དང་པོ་བཟླ་གཞི་ཛ྄བ་ཁང་དབྱེ་བ་ནི། བྷྲཱུཾ་བྷི་ཤྭ་བྷི་ཤུདྡྷེ་ཕཊ་ཛཿབདག་དམ་ཚིག་གི་འཁོར་ལོ་ལས་ཡེ་ཤེས་ཀྱི་དཀྱིལ་འཁོར་ལོགས་སུ་ཕྱེས་ནས་མདུན་གྱི་ནམ་མཁར་མེ་རི་འདབ་འབྱར་གྱི་ཚུལ་དུ་བཞུགས་པར་གྱུར་པར་མོས་ལ། དེ་ལ་ལུས་ཀྱི་བཟླས་པ་ནི། མཚན་ཉིད་དང་ལྡན་པའི་བགྲང་ཕྲེང་གྲངས་ཚང་བ་བྱིན་གྱིས་བརླབས་ཏེ་གཡོན་པའི་མཐེབ་འཛུབ་ཀྱིས་སྙིང་གི་ཐད་དུ་བཟུང་ནས་སྔགས་རེ་དང་ཕྲེང་རྡོག་རེ་ལྷག་ཆད་མེད་པར་འདྲེན་ཞིང་། ཕྲེང་ཐག་དབུགས་ཀྱི་རྟ་ཉིད་དེ་སོགས་ལྟར་

ཕྲེང་ཐག་ཕར་འགྲོ་བ་དང་བདག་དམ་ཚིག་པའི་ལྷ་རྣམས་ཀྱི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པས་མདུན་གྱི་ཡེ་ཤེས་འཁོར་ལོའི་ལྷའི་ཐུགས་རྒྱུད་བསྐུལ་བ་དང་། དེ་ལས་འོད་ཟེར་དཔག་མེད་འཕྲོས་ཏེ་དོན་གཉིས་མཛད། ཕྲེང་རྡོག་རྣམས་ཚུར་འོང་བ་རེ་དང་མཉམ་དུ་ལྷའི་འཁོར་ལོ་ཆ་ཚང་བ་རེ་རང་གི་ཐུགས་ཀར་ཐིམ་པའི་མོས་པ་བརྟན་པར་བྱའོ། །ངག་གི་བཟླས་པ་ནི། སྒྲ་ཧ་ཅང་ཆེ་བ་དང་། ཆུང་བ། ཤུགས་དྲག་པ་དང་། ཞན་པ། མགྱོགས་པ་དང་བུལ་བ་སོགས་སྐྱོན་དང་བྲལ་བར་བསྙེན་པའི་གྲངས་རྫོགས་ཀྱི་བར་ཐུན་དུ་བཅད་དེ་བཟླའོ། །ཡིད་ཀྱི་བཟླས་པ་ནི། ཛ྄བ་དབྱངས་འཁོར་འདས་རང་གྲོལ་ལྟར། བདག་དམ་ཚིག་པའི་ལྷ་ཚོགས་ཞི་བ་རྣམས་ཀྱི་ཐུགས་ཀར་ཟླ་བ་དང་། ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་ལ་རང་སྲོག་ས་བོན་ནམ་ཧཱུྃ་ཡིག་རང་མདོག་གི་མཐར་ཞི་བ་ལ་བྷོ་དྷི་བཅུ་དྲུག་པ་དང་། ཁྲོ་བོ་ལ་རུ་ལུ་འབྲུ་བརྒྱད་ཀྱི་སྔགས་ཀྱི་ཁ་དོག་ལྷ་མདོག་ལྟར་བྱ་བའང་ཡོད། གསུང་རྡོ་རྗེ་མཚོན་བྱེད་དང་ལྷ་དབང་དུ་བྱ་བའི་ཕྱིར་རྟེན་འབྲེལ་དུ་དམར་པོ་བྱེད་པའང་ཡོད་ལ། དམ་ཡེ་འཕྲོ་འདུ་སྟེ་གསལ་བ་གསུམ་ལྡན་གྱི་ངང་ནས་བཟླའོ། །ཡང་ཛ྄བ་ཁང་མི་དབྱེ་ན། དམ་ཡེ་དབྱེར་མེད་ཀྱི་ལྷ་ཚོགས་ཞི་བ་རྣམས་ཀྱི་ཐུགས་ཀར་ཟླ་བ་དང་། ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་ལ་རང་སྲོག་ས་བོན་གྱི་མཐར་སྔགས་ཀྱིས་བསྐོར་བ་ལས་འོད་ཟེར་འཕྲོས། དུས་གསུམ་བདེ་གཤེགས་རྣམས་ཀྱི་ཐུགས་རྒྱུད་བསྐུལ་སོགས་འཕྲོ་འདུའི་དམིགས་པ་གཞུང་བཞིན་སྐྱོང་བ་ཡིན་ནོ། །གཉིས་པ་ནི་བཟླ་བྱའི་སྔགས་གཙོ་བོ་སྤྱི་དྲིལ་ལ་མཛད་པས། དེ་ཡང་ཇི་

སྐད་དུ། ཞི་བ་ཞེ་གཉིས་སྙིང་པོ་ནི། །བྷོ་དྷི་བཅུ་བཞི་པ་ལ་ཐུག །ཞེས་དང་། ཁྲག་འཐུང་ང་བརྒྱད་སྙིང་པོ་ནི། །རུ་ལུ་འབྲུ་བརྒྱད་པ་ལ་ཐུག །ཞེས་དང་། བཏགས་གྲོལ་ཕུང་པོ་རང་གྲོལ་ལས་ཞི་སྔགས་ལ། ཡིག་འབྲུ་བཅུ་དྲུག་པོ་རྡོ་རྗེའི་སྒྲ་ཞེས་པའི་ཁྱད་པར་ཙམ་ལས། ཞི་བ་ཞེ་གཉིས་དང་ཁྲོ་བོའི་ལྷ་ཐམས་ཅད་ཀྱི་དགོངས་པ་གཅིག་ཏུ་དྲིལ་བའི་སྙིང་པོ་ཡིན་པར་གསུངས་པས་ན་བསྙེན་པའི་སྔགས་ལ་འདི་གཉིས་འཇོག་པར་མཛད་པ་ནི་དགོངས་དོན་མ་འཁྲུལ་བའོ། །བཟླ་བའི་ཚེ་ནའང་ཞི་ཁྲོ་སོ་སོར་ཕྱེས་ནས་བཟླ་བར་མི་མཛད་ཅིང་སྔགས་གཉིས་སྦྲེལ་ཏེ་བཟླ་བའང་དྲིལ་སྒྲུབ་ཀྱི་བཟླ་ཚུལ་ལེགས་པའོ། །ཐུན་འཇོག་ཁར་ཕྲེང་སྔགས་རྣམས་ཚར་འགའ་བཟླ་བའམ། །ཡང་ན་སྔགས་མཆོད་ཀྱི་ཚུལ་དུ་ཚར་རེས་ཆོག་པར་ཐོས་སོ། །ཡང་རྒྱུད་ཆོག་ལྟར་གཙོ་འཁོར་འགྲོས་སྦྱར་ཏེ་བཟླ་བའི་ཕྱག་ལེན་ཡོངས་གྲགས་སུ་འདུག་པ་ནི་བསྙེན་ཡིག་བསྡུས་པར་བཀོད་ཡོད། འདིའི་ཚུལ་ལའང་ལུགས་གཉིས་སྣང་སྟེ། དང་པོ་ནི། ཀུན་བཟང་ཡབ་ཡུམ་གྱི་སྔགས་ཅི་འགྲོ་ལྟར་བཟླས་ནས་ཐུན་བསྡུ་ཁར་ཕྲེང་སྔགས་རྣམས་ཚར་རེ་བྱས་ཏེ་འཇོག་པ་ནི། ཐུན་འགོར་ཀུན་བཟང་ཡབ་ཡུམ་ཀྱི་སྔགས་བག་ཙམ་རེ་བྱས་ཏེ་རྣམ་སྣང་ཡབ་ཡུམ་ཀྱི་སྔགས་བཟླས་ནས་སྔར་བཞིན་མཇུག་རིམ་གྱིས་རྫོགས་པར་མཛད་པའོ། །གཉིས་པ་ནི། དང་པོ་ནས། སྔགས་ཐམས་ཅད་མང་ཉུང་གི་རིམ་པ་བཞིན་བགོས་ཏེ་ཐུན་རེའི་ནང་དུ་སྔགས་ཐམས་ཅད་བགོས་ཐོབ་བཞིན་བཟླས་ནས་བསྙེན་པ་གྲུབ་པ་དུས་མཉམ་དུ་མཛད་པའི་ལུགས་ཏེ་གཉིས་སོ། །ཡི་གེ་བརྒྱ་པའི་སྔགས་བཟླས་ཀྱང་རུང་སྟེ། མ་ཡེངས་དམ་པ་རིགས་བརྒྱའི་ཡང་སྙིང་འདི༔ སྒྲིབ་གཉིས་སྦྱོངས་ཕྱིར་ཅི་ནུས་བཟླ་བར་བྱ༔ ཞེས་དང་། དམ་པ་རིགས་བརྒྱའི་ཡང་སྙིང་ནི༔

གསང་སྔགས་ཡི་གེ་འབྲུ་བརྒྱ་ཤར༔ ཞེས་སོ། །འདི་དོང་སྤྲུགས་ལུགས་ལྟར་ལ་འབྱོར་རོ། །ཡང་ན་ལྷ་ཚོགས་ཐམས་ཅད་ཀྱི་ཐུགས་ཀར་ཧཱུྃ་ཡིག་གསལ་བའི་འོད་ཟེར་འཕྲོ་འདུ་ལ་དམིགས་དེ་ཧཱུྃ་གི་བཟླས་པ་བྱ་བ་རང་གཞུང་གི་དགོངས་པ་ཡིན་པས་གང་འོས་བཟླའོ། །ཞེས་གསུངས་སོ། །གསུམ་པ་ཅི་ཙམ་དུ་བཟླ་བའི་གྲངས་ཚད་ནི་ཞི་ཁྲོའི་སྤྱི་སྔགས་གཉིས་གཅིག་ཏུ་བརྩིས་པ་འབྲུ་འབུམ་ཕྲག་བཅུ་ཐ་མ་ཡིན་པ་ཞལ་རྒྱུན་ཡིན་པས་ལས་རུང་ངོ་། །དེས་གྲངས་དུས་མཚན་མའི་བསྙེན་པ་རྣམས་ཀྱང་ཤེས་པར་བྱའོ། །གཙོ་འཁོར་གྱི་འགྲོས་སྦྱར་ཏེ་བཟླ་ན། གཙོ་བོ་ཀུན་བཟང་ཡབ་ཡུམ། ཆེ་མཆོག་བསྐྱེད་ན་དེ་གཉིས་ཀྱི་སྔགས་ཆིག་འབུམ་རེ། ཞི་བ་རིགས་ལྔ་ཁྲོ་བོ་རིགས་ལྔ་རྣམས་ཡུམ་བཅས་ལ་ཆིག་ཁྲི་རེ། དེ་མན་གྱི་ཞི་ཁྲོའི་འཁོར་ཐམས་ཅད་ལ་ལྔ་སྟོང་རེ། སྤྱི་དྲིལ་བཞི་འབུམ་རེའོ། །བསྙེན་པའི་སྨད་ལ་སླེབ་ནས། ཐུན་མཇུག་རྣམས་སུ་ལས་བཞིའི་སྔགས་ཀྱི་ཤམ་བུར་བསྒྱུར་བའི་ཕྱག་ལེན་ཀྱང་ཡོད་དོ། །ནུབ་ཐུན་ཀུན་ཀྱི་མཇུག་ཏུ་ཚོགས་མཆོད་བྱ་བའང་ཡོད། དེ་ཙམ་མི་ནུས་ན། ཐུན་ཚུགས་པའི་ནུབ་དང་། ཕྱེད་ལ་སླེབ་དུས་དང་། མཇུག་རྫོགས་པའི་དུས་ཚོགས་མཆོད་རེ་མཛད་པའང་སྣང་། རྒྱུན་དུ་ནུབ་ཐུན་གྱི་མཇུག་ཏུ་སྡེ་བདུན་ལ་གཏོར་མ་གཏོང་བ་སོགས་གཏོར་ཆོག་རྣམས་ཀྱང་བྱའོ། །ཐུན་མཚམས་སུ་འཇུག་པ་ན་དབྱངས་གསལ་ཡིག་བརྒྱ་རྣམས་གསུམ་རེ་བཟླས་པས་ལྷག་ཆད་ཁ་སྐོང་། རྟེན་འབྲེལ་སྙིང་པོས་སྔགས་ཀྱིས་བྱིན་རླབས་རང་རྒྱུད་ལ་བརྟན་པར་བྱེད་གསུངས་པས་དེ་ལྟར་བྱ། མཆོད་བསྟོད་ཀྱི་རྗེས་སུ། ཛ྄བ་ཁང་དབྱེར་ཡོད་ན་རིག་པའི་མེ་ཏོག་དོར་བའམ་ཡང་ན་ཧཱུྃ་བརྗོད་པས་ཡེ་ཤེས་ཀྱི་དཀྱིལ་འཁོར་དམ་ཚིག་པའི་འཁོར་ལོ་ལ་ཆུ་ལ་ཆུ་བཞག་པ་ལྟར་

བསྟིམ། ཡིག་བརྒྱ་བཟླས་པས་བཟོད་པར་གསོལ། གསུམ་པ་ཐུགས་འོད་གསལ་གྱི་རྣལ་འབྱོར་ནི། གཟུགས་སྣང་ཐམས་ཅད་ཞི་ཁྲོའི་ལྷ་ཚོགས་ལ་སོགས་ཀྱིས་དཀྱིལ་འཁོར་གྱི་གཙོ་བོ་ཡབ་ཡུམ་སྙོམས་པར་ཞུགས་པའི་རྐྱེན་གྱིས་བསྡུ་རིམ་བྱ་བ་ཡིན། འདི་ལའང་དཔེར་ན་དྭངས་བའི་ཆུ་ལ། ཆུ་བུར་ཡལ་ཚེ་སྐད་ཅིག་གིས་ཆུ་རིལ་པོར་གྱུར་པ་ལས་གཞན་མི་སྣང་བ་ལྟར། སྣོད་བཅུད་དཀྱིལ་འཁོར་དུ་གསལ་བ་ཐམས་ཅད་གཙོ་བོའི་སྙོམས་འཇུག་གི་བདེ་བའི་འོད་གསལ་ལ་སེམས་ཞུགས་པ་ཙམ་གྱིས་སྐད་ཅིག་གིས་མེར་གྱིས་ཞུ་ནས་གཉིས་སྣང་ཐམས་ཅད་དང་བྲལ་བའི་འོད་གསལ་སྟོང་ཉིད་ལ་མཉམ་པར་འཇོག་པའོ། །སྐད་ཅིག་གིས་སྟོང་ཉིད་རིལ་པོར་འཛིན་པས་འདི་ལ་རིལ་འཛིན་གྱིས་བསྡུ་རིམ་ཞེས་བྱའོ། །ཡང་དཔེར་ན་མེ་ལོང་ལ་ཧ་བཏབ་ཚེ་ཁ་རླང་གི་ངད་མཐའ་ནས་དབུས་སུ་རིམ་པས་ཡལ་བ་བཞིན་དག་པའི་སྣོད་བཅུད་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། དེ་འཁོར་རྣམས་ལ། དེ་རྣམས་རིམ་པས་ཡུམ། དེ་ཡབ། དེ་ཐུགས་ཀའི་ཧཱུྃ། དེ་ཞབས་ཀྱུ་ནས་བསྡུས་ཏེ་སྒྲའི་རྒྱུན་ཙམ། དེ་ཡང་ཇེ་ཕྲར་གྱུར་ནས་སྒྲའི་རྒྱུན་ནམ་མཐའ་ཆོས་དབྱིངས་སྟོང་གསལ་བདེ་བ་ཆེན་པོར་འཇོག་པ་ལ་རྗེས་གཞིག་གི་བསྡུ་རིམ་ཞེས་བྱའོ། །དེ་ནས་སྐད་ཅིག་སྟོང་གསལ་སོགས་ཀྱིས། དཔེར་ན་དྭངས་བའི་ཆུ་རང་ལས་བྱུང་བའི་གཡོ་བའི་རྐྱེན་གྱིས་ཆུ་བུར་ཐོལ་གྱིས་གྲུབ་པ་ལྟར། འོད་གསལ་བདེ་སྟོང་གི་དབྱིངས་ལས་ཕྲ་བའི་རླུང་སེམས་ཉིད་སླར་ཡང་དཔལ་རྡོ་རྗེ་སེམས་དཔའ་ཞལ་ཕྱག་ཡོངས་སུ་རྫོགས་པའི་སྐུ་ལམ་གྱིས་བཞེངས་པའི་གནས་གསུམ་དུ་འབྲུ་གསུམ་གྱིས་མཚན་པ་ཡིག་བརྒྱ་བརྗོད་པས་བརྟན་པར་བྱ་ཞིང་བསྔོ་སྨོན་ཤེས་

བརྗོད་སོགས་བྱ། བཟའ་བཏུང་ཁྲུས་སོགས་སྤྱོད་ལམ་ཐམས་ཅད་རྡོ་རྗེ་སེམས་དཔའི་ང་རྒྱལ་དང་མ་བྲལ་བར་བྱ་སྟེ། ཐུན་གྱི་དངོས་གཞི་མི་ཡེངས་བ་ཙམ་ཡོད་ཀྱང་ཐུན་མཚམས་སུ་ཡེངས་འཁྲུལ་རྒྱ་འབྱམས་སུ་སོང་ན་རྣལ་འབྱོར་ལ་ཡར་སྐྱེད་མི་ཐོན་པས་མཉམ་བཞག་གིས་རྩི་དང་མ་བྲལ་བར་བྱའོ། །ཞེས་གསུངས་སོ། །ལར་ཐུན་རེ་རེ་བཞིན་ཡང་གོམ་ཆ་ཆེ་བ་དང་དེ་མིན་པའི་དབང་གིས། སྔགས་བརྗོད་པ་ཙམ་གྱིས་དཀྱིལ་འཁོར་གྱི་ལྷ་ཚོགས་རྟེན་བརྟེན་པ་ཐམས་ཅད་བཀྲ་ལམ་གྱིས་གསལ་བར་བྱེད་པ་དང་། ཆོ་ག་ངག་ཏུ་རྒྱས་པར་བརྗོད་ནས་བསྐྱེད་པ་གང་ཡང་། སྔོན་འགྲོ་ནས་བསྡུ་རིམ་གྱི་བར་ཚང་བར་བྱེད་དགོས་ཏེ། འདི་ལྟ་བུའི་ཆོ་ག་ཡན་ལག་ཚང་བ་ལན་གཅིག་གིས་བསྐལ་པ་ཆེན་པོ་ཆགས་གནས་འཇིག་སྟོང་བཞིའི་བར་གྱི་སྡིག་སྒྲིབ་དང་བག་ཆགས་སྦྱོངས་ནུས་པ་ཐམས་ཅད་ཞལ་མཐུན་པ་ཡིན་ཅིང་རིག་པས་ཐོབ་པའང་ཡིན་གསུངས་པས་ན་འདི་ཐམས་ཅད་ལ་སྦྱང་བྱ་དང་སྦྱོང་བྱེད་ཀྱི་གནད་ཆེ་བ་རེ་ཡོད་པས་སླ་ཆོས་སུ་བྱ་མི་རུང་ངོ་། །གསུམ་པ་རྗེས་ཀྱི་རིམ་པ་ལ། སྤྱིར་བསྙེན་པ་གྲུབ་རྗེས་དངོས་གྲུབ་བླང་བའི་དོན་ནི་ལམ་ངེས་རྫོགས་སུ་བསྒོམ་པས་རིམ་གཉིས་ཀྱི་དྲོད་ཅི་རིགས་ཐོབ་ཅིང་བསྙེན་པ་མཐར་འཁྱོལ་ནས་སྒྲུབ་པ་ཆེན་པོ་ལ་བརྟེན་ནས་དངོས་གྲུབ་བླངས་པས་རིག་འཛིན་གྱི་ས་ལ་སྦྱོར་བར་ཚོགས་སྒྲུབ་ཅེས་གྲགས་པ་ཡིན་ནོ། །དེའི་ཕྱག་ལེན་གྱི་རྒྱུན་ཙམ་ཞིག་ནི་དེང་སང་ཡང་མཛད་པར་འདུག །ལར་མཆོག་དམན་དུ་མས་གྲོང་ཆོག་རྐྱེན་བཟློག་ལའང་སྒྲུབ་ཆེན་གྱི་གཟུགས་བརྙན་བྱེད་གིན་འདུག །འདི་ནི་བསྙེན་པའི་མཇུག་ཏུ་དངོས་གྲུབ་ལེན་ཆོག་རྒྱས་བསྡུས་གང་རུང་རེ་བྱེད་སྲོལ་འདུག་སྟེ་རྟེན་འབྲེལ་གྱི་གནད་ཀྱང་ཆེ་བར་སེམས་སོ། །དེའི་ཚུལ་བསྡུས་པ་ནི་

བསྙེན་ཡིག་ཏུ་བྲིས་ཡོད་དོ། །དེ་ལྟར་ཕྱི་དཀྱིལ་དུ་བསྙེན་པ་གྲུབ་ནས་སྤྲོ་ན་ལུས་དཀྱིལ་ཨ་ནུའི་ལུགས་དང་མཐུན་པ་ཆོས་སྤྱོད་བག་ཆགས་རང་གྲོལ་ལྟར་གཞི་ལུས་རྡོ་རྗེ་སེམས་དཔར་གསལ་བའི་སྙིང་གའི་རྩ་འཁོར་དུ་ཞི་བ་ཞེ་གཉིས་དང་། མགྲིན་པར་རིག་འཛིན་དཔའ་བོ་ཡབ་ཡུམ་བཅུ། སྤྱི་བོར་ཁྲག་འཐུང་གི་ལྷ་ཚོགས་གསལ་བའི་ལྷ་ཐམས་ཅད་ཀྱི་ཐུགས་ཀའམ་གཞི་ལུས་ཀྱི་ཐུགས་ཀར་ཟླ་གདན་ལ་ཧཱུྃ་ཡིག་གི་མཐར་ཡི་གེ་བརྒྱ་པ་བཀོད་དེ་སྤྲོ་བསྡུའི་སྒོ་ནས་ཡི་གེ་བརྒྱ་པ་འབུམ་ཕྲག་གཅིག་གིས་ཁ་སྐོང་དང་བཅས་པ་བཟླ་བའོ། །དེ་ལྟར་བྱས་ན་ལུགས་འདིའི་གཞུང་དུ་བསྟན་པའི་ལས་རྣམས་སྒྲུབ་རུང་བ་དང་། མཆོག་དབང་གོང་མ་གསུམ་གྱི་མན་ངག་རྫོགས་རིམ་དང་རྫོགས་ཆེན་གྱི་སྨིན་བྱེད་ཁྱད་པར་ཅན་ཡིན་ནོ། །མདོར་ན་དུས་ཐམས་ཅད་དུ་སྐུ་གསུམ་བླ་མའི་གསོལ་འདེབས་ཀྱི་དོན་དེའི་གཞུང་བསྲིངས་ནས། གང་གི་དྲིན་གྱིས་བདེ་ཆེན་ཉིད། །སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །སོགས་གསུངས་པ་ལྟར་མཆོག་དང་ཐུན་མོང་གི་དངོས་གྲུབ་ཐམས་ཅད་ཀྱི་རྩ་བ་ནི་རྗེ་བཙུན་བླ་མ་སྟེ་ཡི་དམ་ལྷའི་དཀྱིལ་འཁོར་ཀྱང་བླ་མའི་ཕྲིན་ལས་ཀྱི་རོལ་པར་ཤེས་པའི་མོས་གུས་དང་། ཐེག་ཆེན་ཚུལ་འཇུག་ལས། འདི་སྐད་དུ། བྱང་ཆུབ་ཀྱི་སེམས་བསྒོམས་པ་ལས། ཀུན་ཏུ་བཟང་མོས་མ་ཟིན་དགེ་བའི་ཆོས་ནི་གང་ཡང་རུང་། །ཀུན་ཏུ་བཟང་པོའི་སྤྱོད་པའང་བདུད་ཀྱི་ལས་ཏེ་ཟད་ཅིང་ཐུག་པར་འགྱུར། །དེ་དང་ལྡན་པའི་ལས་ནི་བདུད་ཀྱི་ལས་ཀྱང་བྱང་ཆུབ་སྤྱོད་པ་གསུངས། །ཞེས་དང་ཇི་སྐད་དུ། ཡང་དག་དོན་གྱི་སྙིང་པོ་ནི། །ཇི་སྙེད་བརྗོད་པའི་ཁ་བརྒྱུད་ཀྱང་། །གང་ནས་བཙལ་ཀྱང་འདི་རྙེད་དོ། །རང་རིག་དྲི་མེད་

དག་པ་ཡིན། །དེ་ལ་རྟག་ཏུ་མོས་པ་ནི། །བསྙེན་པའི་དམ་པ་མཆོག་ཡིན་ནོ། །ཞེས་པ་ལྟར། རིག་སྟོང་ཆོས་སྐུའི་དགོངས་པའི་རྩལ་སྣང་སྒྱུ་མ་ལྟ་བུའི་ལྷ་སྐུ་ལ་མཉམ་ཉིད་རང་བབས་སུ་གནས་པ་དང་། སྲོགས་ཆགས་ཐམས་ཅད་གལ་ཏེ་བདུད་གྱུར་ནས། །དུམ་བུ་སྟོང་དུ་བདག་གི་ལུས་གཏུབ་ཀྱང་། །བྱང་ཆུབ་སེམས་མཆོག་ཤེས་རབ་སྙིང་རྗེ་དང་། །ཡི་དམ་རྒྱལ་བ་ཁྱེད་ནི་ཡོངས་མི་སྤང་། །གསུངས་པ་ལྟར་རང་འདོད་ལ་ཞེ་འཁྲི་མེད་པའི་སྙིང་རྗེ་ཆེན་པོའི་འགྲོ་དོན་ནམ་ཡང་མི་གཏོང་བའི་བློ་སྟེ། ཆོས་ཉིད་ལ་དམིགས་པའི་ལྟ་བ། སེམས་ཅན་ལ་དམིགས་པའི་སྙིང་རྗེ། བླ་མ་ལ་དམིགས་པའི་མོས་གུས། ལྷའི་གསལ་སྣང་དང་ང་རྒྱལ་སོགས་ཀྱིས་རང་རང་གི་མི་མཐུན་ཕྱོགས་ཟིལ་གྱིས་གནོན་པའི་བརྩོན་འགྲུས་ཀྱི་སྟོབས་དང་རྒྱུན་བསྲིང་། གལ་ཏེ་ཁམས་ལ་མི་བདེ་བ་སོགས་བྱུང་ན་བག་ཡང་གིས་སངས་བ་དང་། དེ་ནས་སླར་འཇུག་པ་སོགས་སྤྱོད་ལམ་གྱི་གནད་ལའང་མཁས་པར་བྱས་ན་གེགས་སོགས་ཉུང་བ་དང་། བྱུང་ནའང་མྱུར་དུ་ཞི་བ་ཡིན་ནོ། །འཁྲུལ་བ་ལས་ཀྱང་ཆེས་འཁྲུལ་བས་ན་ཉིང་འཁྲུལ་ཞེས་པ་རྨི་ལམ་བཟང་ངན་ལ་རེ་དྭོགས་བརྟགས་དཔྱད་ཀྱིས་སེམས་འཚུབས་པ་དང་། རྟགས་མཚན་འལ་འོལ་ལའང་རེ་དོགས་ཀྱིས་བཅིང་བ་དང་། བྱས་ཡུས་དང་། མངོན་རློམས་ང་རྒྱལ་སོགས་སྐྱོན་རྣམས་ལ་དྭོགས་ཟོན་བྱས་ནས་དེ་དག་གི་རྗེས་སུ་འབྲངས་བའི་བློ་རྦད་ཀྱིས་བཅད། ལར་བསྙེན་སྒྲུབ་སོགས་གང་བྱས་ཀྱང་རྒྱུད་ལ་བརྟགས་ནས་བྱེད་པ་འདི་དང་པོའི་སློབ་ཚུལ་ཁྱད་པར་ཅན་ཡིན་ནོ། །འཕགས་ཆེན་མཁས་གྲུབ་གཞུང་རྙིང་བདུད་རྩི་ལས། གཞན་ཟེར་ཚིག་སྒྲོས་རྙོགས་མའི་སླད་མེད་པ། །གྲུབ་པའི་དགོངས་བཅུད་སྙིང་ཁུ་མྱོང་བ་འདི། །རྗེ་བཙུན་བླ་མ་རྣམས་ཀྱི་བཀའ་དྲིན་ཡིན། །ཞེས་སོ། །གཉིས་པ་ནི། དེ་

ཡང་སྒྲུབ་པ་ཆེན་པོ་དང་འབྲེལ་བའི་དབང་སོགས་ཀྱི་ཕྱག་བཞེས་རྣམས་འདིར་མི་བྲི་ལ། དེང་སང་ཟབ་ཆོས་འདིའི་ཕྲིན་ལས་རྙིང་མའི་ཕྱོགས་སུ་ཤིན་ཏུ་དར་ཞིང་རྒྱས་ལ་མཆོག་དམན་ཀུན་གྱིས་གསོན་པོའི་སྐུ་རིམ་དང་རྐྱེན་བཟློག་ལའང་འདི་ཕན་ལྷག་པར་ཆེ་བ་དང་། ཁྱད་པར་གཤིན་པོ་རྗེས་འཛིན་གྱི་ཐབས་ལ་མཆོག་ཏུ་འཛིན་པར་བྱེད་པ་དང་། སྐྱབས་རྗེ་དམ་པ་དཔལ་སྤྲུལ་རིན་པོ་ཆེའི་ཞལ་ནས་ཞི་ཁྲོའི་དབང་སོགས་ཐོབ་པ་རྣམས་ཀྱི་ཆོ་ག་གཞན་ལས་གཤིན་ཆོག་འདི་བཞིན་བྱས་ན་ཕན་ཡོན་ཆེ་སྟེ། ལྷ་བསྒོམ་སོགས་མ་ཤེས་ནའང་། དེ་ལྟར་རྒྱལ་བ་ཞི་ཁྲོའི་ལྷ། །གང་གིས་མཚན་ཐོས་ཕྱག་འཚལ་ན། །དམ་ཚིག་ཉམས་ཆགས་ཀུན་བྱང་ནས། །མཚམས་མེད་ལྔའི་སྡིག་པ་འདག །ན་རཀ་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །སོགས་ལྟར་ཡིན་ཞེས་གསུངས་པ་ཁུང་བཙུན་ལས་ཐོས། འདིའི་ཞལ་རྒྱུན་རྣམས་གྱི་བརྗེད་ཐོ་དང་། རང་དང་སྐལ་མཉམ་གྱི་དབང་བརྟུལ་དག་ལའང་ཕན་ནམ་སྙམས་པས་ཆོ་གའི་ཡན་ལག་རྣམས་འགོད་པ་ལ་དོན་བརྒྱད། བསྒྲུབ་རྟེན་དཀྱིལ་འཁོར། ཇི་ལྟར་སྒྲུབ་ཚུལ། བདག་ཉིད་འཇུག་པ། བཀའ་སྲུང་བསྲུང་མའི་མཆོད་པ། བཤགས་པའི་རྒྱུ་བཞི། བསྐང་བའི་རྒྱུ་བཞི། གཤིན་པོ་རྗེས་འཛིན། དབང་གི་བསྐུར་ཚུལ་རྣམས་ཀྱི་གོ་དོན་མདོར་བསྡུས་ཏེ་སྟོན་ནོ། །དང་པོ་ནི། དེ་ཡང་གཞུང་འདིར་གསོན་གཤིན་གང་གི་དོན་ལ་ཡང་དབང་བསྐུར་བར་གསུངས་ཤིང་། དབང་དེ་ཡང་དཀྱིལ་འཁོར་ལ་བརྟེན་ནས་བསྐུར་བར་ཤིན་ཏུ་གསལ་ཞིང་། དཀྱིལ་འཁོར་ལའང་རས་བྲིས་དང་རྡུལ་ཚོན་གང་རུང་ལས་ཚོམ་བུ་ལ་བརྟེན་ནས་བསྐུར་བ་ཆེར་མི་གསལ་ལོ། །དེང་སང་འདིའི་དབང་བསྐུར་ཚེ།

དཀྱིལ་འཁོར་མི་དགོས་པར་གཞི་ལ་འབྲུ་ཚོམ་ཙམ་བཀྲམ་ནས་དེ་ཚོམ་བུའི་དཀྱིལ་འཁོར་ཡིན་ཟེར་བ་དང་། ནང་ན་ཞི་ཁྲོའི་ལྷ་ཚོགས་བཞུགས་ཅེས་པའི་ཚིག་ལ་བརྟེན་ནས་བུམ་པ་བཤམས་ཏེ་དབང་ཐམས་ཅད་བསྐུར་བ་དང་། གཏོར་མ་ཙམ་ལ་བརྟེན་ནས་དབང་བསྐུར་རུང་ཟེར་ཞིང་ཀུན་གྱིས་དེ་ལྟར་བྱེད་པ་ནི། གཞུང་དོན་མ་ཤེས་པར་མ་ཟད། ཉེས་དམིགས་ཆེ་བས་རང་གིས་རང་བསླུས་ཤིང་། གཞན་ལའང་ཕན་པ་ལས་གནོད་པར་འགྱུར་ཏེ། ཆོ་གའི་ཡན་ལག་གི་སྒྲུབ་གཞི་ཆེར་ཉམས་པས་སོ། །རྡུལ་ཚོན་ནི་བསྐང་བཤགས་ཉམས་ཆགས་རང་གྲོལ་ལས། གནས་ཡིད་དང་མཐུན་པར་ཕྱག་དར་དང་རྐྱང་ནུལ་བྱས་ལ། སྟེགས་བུ་ནག་འཇམ་འཁྲེགས་པའི་སྟེང་དུ་ཞི་ཁྲོའི་དཀྱིལ་འཁོར་བྲི་ཞེས་དང་། རས་བྲིས་ནི། འདིའི་དབང་གི་གཞུང་རྒྱས་པ་ལས་སྟ་གོན་གྱི་རྗེས་སུ་སྟེགས་ཁེབ་ལྡན་གྱི་སྟེང་དུ་རས་བྲིས་ཀྱི་དཀྱིལ་འཁོར་འདིངས་ཤིང་ཞེས་སོ། །རྡུལ་ཚོན་ནི་གྲོང་ཆོག་ལྟ་བུ་ལ་རྣམ་དག་འོང་དཀའ་ཞིང་། རས་བྲིས་ལེགས་པས་དེའི་བྲི་ཚུལ་ནི་ལོ་ཆེན་ལྟར་བྱེད་ན་དེའི་གཞུང་ལས་གསལ་ཞིང་། རང་གི་བླ་མའི་བཞེད་པ་ལྟར་བྱ་ན། ཕྱི་དཀྱིལ་སྒྱུ་འཕྲུལ་ཁྲོ་བོའི་དཀྱིལ་འཁོར་གྱི་རྣམ་པ་བཞིན་ལ། དེ་སྟེང་ཞི་བའི་དཀྱིལ་འཁོར་མཚོན་པའི་མུ་ཁྱུད་ཟླུམ་པོའི་བསྐོར་བའི་ཆོས་ཀྱི་འཁོར་ལོའི་ལྟེ་བ་དང་རྩིབ་བཞིར་མཐིང་གསལ་ཐིག་ལེ་སོགས་མཚོན་པའི་རིགས་ལྔའི་མདོག་ཅན་གྱི་ཐིག་ལེ་ལ་ཕྱག་མཚན་ནམ་ས་བོན། ཡང་ན་ཐིག་ལེ་ལྷ་རང་མདོག་དང་། མུ་ཁྱུད་ལ་ཕྱོགས་བཞིར་སྒོ་བ་ཡབ་ཡུམ་བརྒྱད་དང་མཚམས་བཞི་དང་ཤར་ནུབ་ཐུབ་པ་དྲུག་གི་མཚན་པ་བཀོད་པའི་དཀྱིལ་འཁོར་ཐིག་ལྡན་བྲི་བར་བྱའོ། །དེ་ལ་སྦྱངས་ཁྲུས་སོགས་སྔོན་དུ་འགྲོ་བའི་རབ་གནས་ལེགས་པར་བྱས་པ་ནི་སྒྲུབ་རྟེན་དཀྱིལ་འཁོར་

ཞེས་བྱ་སྟེ། རྒྱུད་ལས་ལྟེ་བ་རྩིབ་དང་ལྡན་པ་ཡི། །རྩིབ་བཞི་འཁོར་ལོའི་མུ་ཁྱུད་བཅས། །གྲུ་ཆད་བཞི་དང་གྲུ་བཞི་པའི། །བར་ཁྱམས་སྒོ་ཁྱུད་ལྡན་པར་བྱ། །ཞེས་དང་། མ་མཐོང་རྨོངས་ལ་བསྟན་ཕྱིར་ཚོན་ཁ་དོག་ཉི་ཤུ་རྩ་ལྔའམ་ཞེས་སོགས་གསུངས་པ་ལྟར། རྒྱལ་བའི་བཀས་བཞག་པའི་དཀྱིལ་འཁོར་ལེགས་པར་བཞེངས་ཏེ་ཞུགས་པའི་ཕན་ཡོན་ནི། རྡོ་རྗེ་སེམས་དཔའ་ལ་སོགས་པའི། །འཁོར་ལོ་མངོན་དུ་མཐོང་བ་ཡིས། །བསོད་ནམས་བསྟན་པ་གང་ཡིན་པ། །ཕྱིས་བྱས་པའང་དེ་བཞིན་ནོ། །ཞེས་གསུངས་པའི་རིགས་པས་དེ་ལ་སྒྲུབ་ཅིང་མཆོད་པའི་ཕན་ཡོན་ཀྱང་བདེ་གཤེགས་དངོས་ལ་བརྟེན་ཅིང་མཆོད་པ་ལྟར་འབྱུང་བར་ངེས་ཏེ། རྣམ་པ་ཀུན་ཏུ་མི་མཚུངས་པར་འཇོག་མི་ནུས་པའི་ཕྱིར་རོ། །འདིའི་གཏོར་དབང་ནི། མཐའ་བརྟེན་གཏོར་མའི་དབང་ཞེས་དང་། བར་དོ་དྲུག་ཁྲིད་ཀྱི་སྐབས་གཏོར་མའི་བྱིན་རླབས་རེ་མཛད་པའི་ཆེད་ཙམ་ཡིན་པས་དབང་དངོས་གཞི་དེ་ལ་བརྟེན་ནས་བསྐུར་མི་རུང་ངོ་། །སྐུ་རྟེན་དབང་གི་ཙཀླི་རྣམས་ཀྱང་དཀྱིལ་འཁོར་གྱི་ལྷ་གནས་སོ་སོར་བཀོད་པའམ་བསྡོམ་ཏེ་བཞག་ལ་ཆོ་གའི་དུས་ལྷ་དེ་དང་དེའི་ངོ་བོར་བསྐྱེད་བསྟིམ་རྒྱས་གདབ་སོགས་ཀྱིས་རབ་ཏུ་གནས་པར་བྱ་དགོས་ཏེ། དབང་གི་རྒྱུ་གཉིས་ཀྱི་ལྷན་ཅིག་བྱེད་པའི་རྒྱུ་དབང་རྫས་རབ་གནས་ཀྱི་བྱིན་རླབས་ཅན་ལ་གསུངས་པའི་ཕྱིར་རོ། །འགའ་ཞིག་ལ་ཁྲོ་བོའི་ཙཀ་གདུགས་ཅེས་ཞིག་འདུག་པ་ནི་ཕྱག་ལེན་འདི་ལས་འཁྲུལ་བར་མངོན་ནོ། །དེ་བཞིན་དུ་དབང་རྫས་གཞན་རྣམས་དང་། བུམ་པ་ལྔའམ་གཉིས་ལ་སོགས་པ་ཚང་བར་བྱ་སྟེ་རང་རང་ལ་བྱེད་པ་ཁྱད་པར་ཅན་རེ་འདུག་པས་སོ། །འདིར་སྐབས་ཐོབ་དེ་ཙམ་ལས་མི་སྤྲོའོ། །གཉིས་པ་ནི། གཞུང་འདིའི་སྒྲུབ་ཚུལ་ལ། ཆོས་སྤྱོད་བག་ཆགས་

རང་གྲོལ་ལྟར་རྡོར་སེམས་ཞི་ཁྲོའི་ལུས་དཀྱིལ་ཅན་གྱི་བདག་བསྐྱེད་མཛད། མདུན་བསྐྱེད་དང་བུམ་པ་ཆོ་གའི་གཞུང་ལྟར་ཞི་ཁྲོའི་དཀྱིལ་འཁོར་དུ་བསྐྱེད་པའི་ལུགས་དང་། བདག་མདུན་བུམ་པ་དབྱེར་མེད་དུ་གཞུང་གིས་སྒྲུབ་ནས་བུམ་པའི་བཟླས་པའི་སྐབས་ཕཊ་ཛཿས་བུམ་པ་སོ་སོར་ཕྱེས་ཏེ་བསྒྲུབ་པའི་སྲོལ་གཉིས་སྣང་བས་གང་ལྟར་བྱས་ཀྱང་མཁས་གྲུབ་ཀྱི་གཞུང་ཡིན་པས་འགལ་བ་མེད་དེ། སྔ་མ་ནི་གྲུབ་ཐོབ་པདྨ་རིག་འཛིན་གྱིས་ཞལ་རྒྱུན་རྗེ་དབོན་གྱིས་བཞེད་པ་ལ་ཆོ་ག་རང་གི་ལུགས་དང་ཤིན་ཏུ་མཐུན་ཏེ། རང་ཉིད་རྡོ་རྗེ་སེམས་དཔར་གསལ༔ སེམས་དཔའི་སྐུར་གསལ་ཐུགས་ཀ་ནས༔ ཅེས་དང་། བདག་ཉིད་རྡོར་སེམས་ཐུགས་ཀ་ནས༔ ༀ་དཀར་སོགས་དང་གནས་འདྲེན་སྐབས། བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ ཞེས་སོགས་ཀྱིས་གསལ་ལོ། །ཕྱི་མ་ལོ་ཆེན་རིན་པོ་ཆེའི་བཀའ་མ་ཚད་ལྡན་རྙིང་མའི་བསྒྲུབ་ཚུལ་དང་མཐུན་པར་མཛད་པའི་གྲུབ་པའི་ཕྱག་བཞེས་རྩོད་པ་དང་བྲལ་བའོ། །སློབ་དཔོན་རིན་པོ་ཆེའི་རྡོ་རྗེའི་གསུངས་ལས་བྱང་རང་གི་ཡིག་ཆུང་ལས། བདེ་གཤེགས་ཞི་ཁྲོའི་བསྒོམས་ཁོག་འདི༔ བདག་བསྐྱེད་མདུན་བསྐྱེད་ཐོལ་བསྐྱེད་དང་༔ འབྲུ་བསྐྱེད་བུམ་བསྐྱེད་གང་བྱེད་ཀྱང་༔ བསྒོམས་ཁོག་བློ་ལ་བྱང་བ་གཅེས༔ ཅེས་པས། སྒོམ་ཁོག་ནི་ཏིང་འཛིན་རྣམ་གསུམ་ནས། དབང་ཕྱུག་མའི་བར་གྱི་རྟེན་དང་བརྟེན་པའི་དཀྱིལ་འཁོར་བསྐྱེད་ཚུལ་དེ་ཁོ་ན་ལ་བྱ་སྟེ་འདི་ཞེས་ཉེ་ཚིག་སྨྲོས་པའི་ཕྱིར་རོ། །དེས་ན་གོང་བཤད་གཉིས་གང་རུང་ལྟར་རམ། ཡང་ན་བདག་མདུན་གཉིས་ཞལ་སྤྲོད་དུ་བསྒོམ་ཁོག་གིས་བསྐྱེད་ལ། དེ་ནས་བུམ་པ་སྟ་གོན་གྱིས་བསྒྲུབ་མེད་ན་བུམ་པ་གཉིས་པོ་བསྒྲུབ་དགོས་ཤིང་བསྒྲུབ་ཚུལ་ཀྱང་དཀྱིལ་འཁོར་

གྱི་ལྷའི་འཕྲོར་བུམ་ལྷ་བསྐྱེད་པའི་རྗེས་སུ་བྱིན་རླབས་དབང་བསྐུར་རྒྱུད་བཞིན་བྱེད་ན་དང་། མིན་ན་སྤྱན་འདྲེན་ནས་བསྟོད་མཇུག་བཤགས་པའི་བར་བདག་མདུན་བུམ་གསུམ་ཐུན་མོང་དུ་བྱའོ། །ལར་བདག་མདུན་སོགས་དབྱེར་མེད་དུ་བསྒྲུབ་པ་འདི། བླ་མེད་ཀྱི་རྒྱུད་ཐམས་ཅད་ལས་གསུངས་ཀྱང་དེ་ལའང་དབྱེར་མེད་ལུགས་མང་ཞིང་། ལྟ་བསྒོམ་གྱིས་རང་བཞིན་དབྱེར་མེད་དུ་རྟོགས་པ་མ་ཐོབ་པ་རང་རེ་ལྟ་བུས་ནི་ཕྱག་ལེན་མཁས་པའི་སྒོ་ནས་སོ་སོར་ཡིད་ཆེས་པ་རེ་སྒྲུབ་པར་བྱས་ན་རང་ལ་ཉེས་པ་མི་འབྱུང་ཞིང་། གཞན་ལ་ཕན་ཐོགས་པར་འགྱུར་བ་ཡིན་པར་གསུངས་པས་གནད་སྨིན་པར་བྱའོ། །བཟླས་པ་ནི། ཛ྄བ་དབྱངས་འཁོར་འདས་རང་གྲོལ་ལྟར་བྱས་ནས་མཆོད་ཡོན་ཕུལ་ལ་བུམ་ལྷ་འོད་དུ་ཞུ་བར་བྱའོ། །འདིར་འཕྲོས་དོན་ལ་དཀྱིལ་འཁོར་གྱི་བྱ་བ་དང་མ་འབྲེལ་བར་བདག་བསྐྱེད་ཁོ་ན་ལ་བརྟེན་ནས་གཤིན་དོན་དུ་སྒྲིབ་སྦྱངས་ཁྲུས་ཆོག་ཙམ་བྱ་ཚུལ། ཁྲུས་བུམ་རྡོར་སེམས་ཀྱིས་བསྒྲུབ་ཅིང་སྦྱངས་ཆོག་བྱས་ཏེ་དབང་མི་བསྐུར་བར་ལམ་བསྟན་སྤར་ཆོག་བྱེད་པ་མཛད་པ་གཞུང་འདིར་གསལ་ཁ་མེད་མོད་ཆོ་ག་གཞན་ལ་དེ་ལྟར་ཡོད་པས་འགལ་བ་གཏན་ནས་མེད་དོ། །གསུམ་པ་ནི། འདིའི་ཆོ་ག་ལོ་ཆེན་ལྗགས་བསྒྲིགས་ལས་རང་གཞུང་ལྟར་རྒྱས་པར་འཇུག་པ་དང་། རིག་པའི་མེ་ཏོག་དོར་ནས་མདོར་བསྡུས་ཏེ་འཇུག་པའོ། །དང་པོ་ནི། རང་གི་སེམས་ཉིད་རྣམ་པར་དག་པ་དཀྱིལ་འཁོར་གྱི་འཁོར་ལོར་རྟོགས་པ་རྩ་བའི་བླ་མ་དང་དབྱེར་མེད་དུ་བལྟས་པ་དབང་ལེན་ཡུལ་དང་། རྣམ་འགྱུར་གློ་བུར་གྱི་འཁྲུལ་ངོར་རྣམ་སྨིན་བག་ཆགས་ཀྱི་ལུས་སློབ་བུའི་ཚུལ་དུ་བྱས་ལ། དབང་གི་བྱ་བ་རྣམས་གཙོ་བོ་ལ་ཕྱེས་པའི་རྒྱལ་ཐེབ་ཀྱིས་མཛད་པར་མོས་ནས་འཇུག་པ་སྟེ།

ཐོག་མར་ལས་བུམ་གྱི་ཆུས་ཁྲུས་བྱ་སོགས་ནས་གཏང་རག་གི་མཎྜལ་དབུལ་ལོ། །ཞེས་གསུངས་པའི་བར་བྱའོ། །འདིར་གོ་དོན་ལ་གོང་བསྟན་ལྟར་བདག་བསྐྱེད་དཀྱིལ་འཁོར་གྱི་འཁོར་ལོ་རྟེན་དང་བརྟེན་པར་བཅས་པ་ཡོངས་རྫོགས་སུ་བསྒོམ་པ་ལ་སྦྱངས་བྱ་སྦྱོང་བྱེད་ཀྱི་གནད་ཆེ་ཞིང་། མདུན་བསྐྱེད་ཀྱང་དེ་ལྟར་བསྒོམ་པ་ནི། དཀྱིལ་འཁོར་ཡོངས་རྫོགས་བྲི་ཞིང་བསྒྲུབ་པར་བྱས་ནས་དེ་ལ་འཇུག་པ་སོགས་གསུངས་པ་ལྟར་ཡིན་ལ། བདག་འཇུག་གི་དུས་སུ་བདག་བསྐྱེད་ཀྱི་དཀྱིལ་འཁོར་མདུན་དཀྱིལ་དང་དབྱེར་མེད་དུ་གྱུར་པར་བསྒོམ་ལ། ཡི་གེ་བརྒྱ་པའི་སྔགས་ཀྱིས་གསལ་སྣང་དང་ང་རྒྱལ་བྱ་བ་ལ་གནད་ཐུན་མིན་ཞིག་ཡོད་གསུངས། དོན་འདི་དག་ལ་དགོངས་ཏེ། སློབ་དཔོན་རིན་པོ་ཆེས་བདག་བསྐྱེད་མདུན་བསྐྱེད་ཐོལ་བསྐྱེད་དང་༔ སོགས་བསྐྱེད་གཞི་སོ་སོ་ལ་བྱེད་ལས་ཁྱད་པར་ཅན་རེ་ཡོད་པས་བདག་མདུན་བུམ་སོགས་དང་། བསྐྱེད་ཚུལ་ཐོལ་བསྐྱེད་འབྲུ་བསྐྱེད་སོགས་དང་། བསྐྱེད་བྱའི་ལྷ་བསྒོམ་ཁོག་ལྟར་ཞི་ཁྲོའི་དཀྱིལ་འཁོར་ཁོ་ནར་གསུངས་པའི་དོན་ལ་ཞིབ་ཏུ་རྟོགས་པར་བྱ་དགོས་སོ། །དེ་ནས་གཙོ་བོའི་ཐུགས་ཀ་ནས་རང་ཉིད་རྣམ་སྨིན་གྱི་ལུས་འདིའི་རྣམ་པ་ཐོན་ཏེ། དཀྱིལ་འཁོར་ཀྱི་ཤར་སྒོའི་ཐད་ཀྱི་ཕྱི་རུ་འཁོད་དེ་དབང་ཞུ་ཞིང་ལེན་པ་ཡིན་ནོ། །ཐབས་འདི་ནི་གཞིའི་དབང་ཐོབ་པའི་ཆ་གོང་ནས་གོང་དུ་འཕེལ་བྱེད་ཀྱི་ལམ་དབང་ཡང་ཡིན། སྔགས་ལུགས་ཀྱི་གསོ་སྦྱོང་ཀྱང་ཡིན་ཏེ་ཡོན་ཏན་གྱི་ཆ་གོང་དུ་གསོ་ཞིང་། མི་མཐུན་པའི་ཉམས་ཆགས་སྦྱོང་བྱེད་དུ་གྱུར་པས་སོ། །ཁྱད་པར་དབང་ཐོབ་ནས་དམ་ཚིག་ལ་སྐྱོན་བྱུང་བ་རྣམས་ཀྱིས་ནི་རང་གཞན་གང་གི་དོན་བྱེད་ཀྱང་མི་ཕན་པར་མ་ཟད་བསྒོམ་བསྒྲུབ་ཇི་ལྟར་བྱས་ཀྱང་དམྱལ་བ་བསྒྲུབ་པ་ཁོ་ནར་ཟད་པར་གསུངས་ཤིང་། དེ་ཡང་འདས་པ་དང་

རལ་བའི་སྐྱོན་ཤིན་ཏུ་ཆེ་བ་མ་བྱུང་ན་བཤགས་པ་དང་ཕྱིར་བཅོས་བྱས་ཏེ་སླར་དབང་བསྐྱར་ཏེ་བླང་ན་སོར་ཆུད་པར་གསུངས་པས་ཐབས་འདི་ལ་ནན་ཏན་བྱ་བར་རིགས་སོ། །དེ་ལྟར་དབང་ཆོག་འདིའི་གཞུང་བཞིན་སྡོམ་པ་བཟུང་བ་དང་། སྡིག་སྒྲིབ་དག་བྱེད་ཀྱི་དབང་དང་། ཡོན་ཏན་ཡར་འཕེལ་གྱི་དབང་ལ་བསྟེན་ཏེ་རང་རྒྱུད་དག་པར་བྱས་པ་ནི་བཤགས་བསྐང་དང་། སྦྱང་ཆོག་དབང་བསྐུར་སོགས་གང་བྱས་ཀྱང་ཆེས་སྟོབས་དང་ལྡན་པ་ཡིན་མོད་དེ། དཀྱིལ་འཁོར་ལ་བསྟེན་པའི་ལས་འདི་དག་བསྒྲུབ་པ་ལ་སྔོན་དུ་བསྙེན་པ་དགོས་ཤིང་དེ་མེད་པས་ནི་མི་འགྲུབ་པར་མ་ཟད་ཡན་ལག་སྦོམ་པོའི་ལྟུང་བར་བཤད་དོ། །ལར་རྒྱུན་དུའང་ནམ་གྲུབ་པའི་ཚེ་བདག་འཇུག་ལེན་པ་དང་། ཁྱད་པར་མགོན་མེད་གཤིན་པོ་ལ་ཆོ་ག་བགྱིད་པའི་ཚེ་ན་བདག་འཇུག་གིས་རང་རྒྱུད་དག་པར་བྱས་ནས་སྙིང་རྗེ་ཆེན་པོས་སྦྱངས་ཆོག་དང་དབང་བསྐུར་གནས་སྤར་སོགས་ཀྱིས་དེ་ཉིད་འདྲེན་པའི་ཐབས་ལ་བརྩོན་པར་བྱའོ། །མདོར་བསྡུས་ཏེ་འཇུག་པ་ནི་རིག་པའི་མེ་ཏོག་དོར་བའི་ཚུལ་གསུངས་པ་ལྟར་བྱ་ཞིང་། རྒྱས་བསྡུས་གང་ཡིན་ཀྱང་གཞན་རྗེས་འཛིན་དང་འབྲེལ་ན། ༀ་རྡོ་རྗེ་ཡེ་ཤེས་ཐོབ་སོགས་ཀྱིས་གསོལ་བ་བཏབ་པས་གནང་བ་སྦྱིན་པར་བསམ་པའོ། །བཞི་པ་ནི། དེང་སང་བྱང་ཕྱོགས་འདིར་ཞི་ཁྲོ་འདོན་སྲོལ་ཤིན་ཏུ་ཆེ་ཡང་བཀའ་སྲུང་སྡེ་བདུན་གྱི་གཏོར་ཆོག་མི་གཏོང་བར་ཆད་པའི་སྐྱོན་ཡོད་དེ། དཔེར་ན་ཀུན་རིགས་ཀྱི་དུས་ཕྱོགས་སྐྱོང་ལ་གཏོར་མ་བསྔོ་བ་སོགས་གཏོར་མ་འབུལ་བའི་རིམ་པ་རྣམས་ཆད་པར་འགྱུར་བ་བཞིན་ནོ། །དེ་ཡང་བླ་མེད་གསང་བ་ཆེན་པོའི་དཀྱིལ་

འཁོར་གྱི་བཀའ་སྲུང་དཔལ་ལྡན་ཡེ་ཤེས་ཀྱི་མགོན་པོ་མ་ནིང་སོགས་སྡེ་བདུན་ལ་ཆོ་ག་བཞིན་མཆོད་ཅིང་གཏོར་མ་ཕུལ་ཏེ་ཕྲིན་ལས་བཅོལ་བས་རང་གཞན་གང་གིའང་འདི་དང་ཕྱི་མའི་བར་ཆད་སེལ་ཞིང་ཡོན་ཏན་ཐོབ་ཅིང་མཐུན་རྐྱེན་སྒྲུབ་པ་ལ། སྡོང་གྲོགས་མྱུར་བ་ཡིན་པས་མ་ཆད་པར་བྱའོ། །འདི་དང་རྗེས་འབྲེལ་གྲལ་གཤམ་མམ་ཕྱི་སྒོ་རུ་གཏོར་མ་ཆ་གསུམ་བསྔོ་བའི་ཕྱག་བཞེས་ཀྱང་འགའ་ཞིག་ལ་སྣང་ངོ་། །ལྔ་པ་ནི། དེ་ཡང་བཤགས་པའི་རྒྱུ་བཞིའམ་བཤགས་ཆེན་སྟེ་བཞི་ནི་ཀལྤ་དུམ་བུ་རྒྱུད་ཀྱི་དགོངས་པ་རྣལ་འབྱོར་སྤྱི་ཁྲུས་ངན་སོང་དོངས་སྤྲུགས་ཞེས་པའི་མན་ངག་མཚམས་མེད་པ་ལྔའི་ལས་ཀྱང་ཚེ་འདི་ཉིད་ལ་བྱང་ངེས་པའི་ཕན་ཡོན་ཅན་ཡིན་ཏེ། དེ་ཡང་རྒྱུད་དེ་གསུངས་པའི་ཚུལ་དངོས་ལྟར། དཀྱིལ་འཁོར་འདི་ལ་བརྟེན་ནས་ཞི་ཁྲོའི་ལྷ་རྣམས་ཀྱི་སྐུ་མདོག་ཕྱག་མཚན་གྱི་རྣམ་པ་ཀུན་དབང་པོའི་མངོན་སུམ་ལྟ་བུར་ཤུགས་དྲག་ཏུ་དམིགས་ཏེ་ཡོན་ཏན་དྲན་པས་ཕྱག་ཁྱད་པར་ཅན་འཚལ་བའི་སྒོ་ནས་བཤགས་པ་དང་། ངག་གི་སྒོ་ནས་གསང་སྔགས་ཀྱི་རྒྱལ་པོ་ཡི་གེ་བརྒྱ་པ་བཟླ་ཐབས་ཀྱི་མན་ངག་ལ་བརྟེན་ནས་བཤགས་པ་དང་། ཡིད་ཀྱི་སྒོ་ནས་ལྟ་བ་ཟབ་མོ་བསྒོམ་པའི་མན་ངག་ལ་བརྟེན་པའི་བཤགས་པ་དང་། སྨྲེ་སྔགས་ཀྱི་སྒོ་ནས་རང་གི་ཉེས་པ་བསྒྲགས་ཏེ་མྱ་ངན་གྱིས་གདུང་སྟེ་བཤགས་པ་དང་བཞི་ཡིན་ནོ། །དེའི་དང་པོ་ནི། བཤགས་རྒྱུད་ལས། དེ་ནས་ཕྱོགས་བཅུ་ནས་ལྷགས་པའི་རྣལ་འབྱོར་ཕོ་མོ་རྣམས་ཀྱིས་ཆས་རབ་ཏུ་བྱས་ཏེ། སྟོན་པ་ཀུན་ཏུ་བཟང་པོ་ལྟར་མཉན་པ་དང་། དེ་ནས་སྟོན་པ་ཀུན་ཏུ་བཟང་པོས་བཀའ་བསྩལ་བ། ཧོ་ཀློང་ཆེན་པོ་སྟོང་གསུམ་གྱི་སོགས་ཞི་ཁྲོའི་ལྷ་ཐམས་ཅད་ཀྱི་རྣམ་པ་དང་མཚན་སྨྲོས་ཏེ་ཕྱག་

འཚལ་བར་བསྟན་པ་ལྟར། འདིར་བརྒྱ་ཕྱག་སྡིག་སྒྲིབ་རང་གྲོལ་ཕྱག་འཚལ་བའི་ཚིག་བརྒྱ་དང་བཅུར་གསུངས་པ་བཞིན་ཏུ་ལུས་གཅེར་བུར་དབྱུང་སྟེ་རྐྱང་ཕྱག་འཚལ་བའོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ནས་བརྗོད་དེ་ཕྱག་འཚལ་བའི་ཚུལ་ནི་མདོ་སྡེ་རྣམས་ལས་ཀྱང་ཤིན་ཏུ་མང་པོར་བསྟན་པ་འདི་ཕན་ཡོན་ལྷག་པར་ཆེ་བའི་རྒྱུ་མཚན་ཅི་ཡོད་སྙམ་ན། ལར་སངས་རྒྱས་རྣམས་ནི་སྒྲིབ་གཉིས་ཟད་ཅིང་ཡོན་ཏན་རྫོགས་པར་མཉམ་པས་ན་ཐུགས་རྗེ་ལ་ཉེ་རིང་དང་། ཡོན་ཏན་ལ་ཆེ་ཆུང་མེད་མོད། འོན་ཀྱང་སྔོན་གྱི་སྨོན་ལམ་དང་ཐུགས་བསྐྱེད་ཁྱད་པར་བ་སོགས་ཀྱིས་དབང་གིས་འདུལ་བྱེད་ཕྲིན་ལས་ཀྱི་འཇུག་པ་སོ་སོར་ཡོད་པ་ལ་འགལ་བ་མེད་དེ། དཔེར་ན་ཐུབ་པའི་དབང་པོའི་སྨོན་ལམ་དང་། འོད་དཔག་མེད་ཀྱི་སྨོན་ལམ་གྱི་ཁྱད་པར་སོ་སོར་གྲུབ་ནས་གདུལ་བྱའི་དོན་མཛད་པ་བཞིན་ནོ། །འདིར་ནི་དམ་ཚིག་ཉམས་པས་མཚོན་ཏེ་ལས་སྒྲིབ་ཤིན་ཏུ་མི་བཟད་པའི་སྡུག་བསྔལ་རྒྱུ་འབྲས་མྱུར་དུ་སྦྱོང་བ་ལ་ཐུགས་བསྐྱེད་ཀྱི་ཁྱད་པར་བླ་ན་མེད་པ་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆེན་པོ་བྲམ་ཟེ་དུང་ཕྲེང་དང་། རཱུ་ཏྲ་ལྟ་བུའི་དོན་དུ་གསང་བའི་བདག་པོ་སོགས་ཀྱིས་ཞུས་པ་ལས་བསྟན་པའི་གདམས་པ་ཆེན་པོ་ཡིན་པ་དང་། གསང་ཆེན་བླ་ན་མེད་པའི་རྒྱུད་ཀྱི་དགོངས་པའི་ཟབ་གནད་ལྡན་པ་དང་། སློབ་དཔོན་ཆེན་པོ་སོགས་རིག་འཛིན་ཀྱི་ས་ལ་བཞུགས་པ་རྣམས་ཀྱིས་གཏན་ལ་ཕབ་ཅིང་འབྲས་བུ་མངོན་དུ་མཛད་པའི་རྡོ་རྗེའི་ཚིག་བསླད་མེད་ཡིན་པའི་ཕྱིར་ན་མདོ་དང་རྒྱུད་སྡེ་འོག་མར་བསྟན་པ་ལས་ཁྱད་པར་དུ་འཕགས་པ་ཡིན་ནོ། །གོང་དུ་ཕྱག་འཚལ་ཁྱད་པར་ཅན་ཞེས་པ་ནི། སྤྱིར་མདོ་སྡེ་རྣམས་ལས་ཕྱག་འཚལ་བར་

གསུངས་པ་དང་། སྔགས་ལུགས་ལའང་སྦྱོང་རྒྱུད་ལས། ལན་བརྒྱ་ཕྲག་སྟོང་དུ་བསྐོར་བར་བྱས་ཏེ་མགོ་བོས་ལན་བརྒྱ་ཕྲག་སྟོང་དུ་ཕྱག་འཚལ་ནས་ཅེས་དང་། ཁྱད་པར་དེང་སང་གསར་རྙིང་ཐམས་ཅད་ཀྱིས་བརྐྱངས་ཕྱག་ཞེས་རྩིས་ཆེར་མཛད་པའི་ལུས་ཀྱི་ཕྱག་འཚལ་ཚུལ་འདིའི་ཁུང་དངོས་ནི། རྒྱུད་འདི་ལས། ཁྱེད་ཅག་རྣམས་ཀྱིས་ལུས་གཅེར་བུར་འབྱུང་སྟེ། ཆས་རབ་ཏུ་གྱིས་ལ་ཡན་ལག་ལྔ་ས་ལ་བརྟེན་༼བརྡབ་༽ཅིང་བརྐྱངས་ཕྱག་འཚོལ་ཅིག་ཅེས་པ་འདི་ཡིན་ནོ། །དེ་བཞིན་དུ་ཕྱག་རྣལ་འབྱོར་གྱི་ལུགས་སུ་བྱས་ཏེ་ཞེས་པའང་རང་གི་བླ་མ་སོགས་ཀྱི་དྲུང་དུ་དད་པས་ཡིད་དབང་མེད་དུ་གཡོས་ཏེ་ལུས་ས་ལ་འགྱེལ་བ་ལྟར་བརྡབ་ཏེ་ཕྱག་འཚལ་བ་ལ་བློ་རྩེ་གཅིག་ཏུ་ཞུགས་པར་གྱུར་པ་དེའོ། །འདི་རབ་ལྟ་བ་མཇལ་བའི་ཕྱག་སོགས་ཡིན་ཟེར་མོད་དེ་ལ་ནི་ལུས་གཅེར་བུར་ཕྱུང་མི་དགོས་སོ། །ལུགས་སྔ་མས་དེ་ཙམ་དུ་མ་ཟད་རྟེན་ལ་སྐོར་བར་བྱེད་པའི་ཁུང་དང་ཚད་ཀྱང་བསྟན་ནོ། །དེ་ཡང་དམ་ཚིག་ཉམས་པ་སོགས་ཀྱི་ཉེས་དམིགས་དྲན་ནས་ཤིན་ཏུ་སྐྲག་ཅིག་འགྱོད་ནས་ལུས་ལྟོས་མེད་དུ་ས་ལ་བརྡབ་ཏེ་ཕྱག་འཚལ་བའོ། །དེ་ལྟར་འཚལ་བའི་ཕན་ཡོན་ཀྱང་རྒྱུད་དེ་ལས་ལུས་ས་ལ་བརྡབ་ཅིང་བརྐྱངས་ཕྱག་ལན་སྟོང་དུ་འཚལ་བས་རྣལ་འབྱོར་རྣམས་ཀྱིས་ཉམས་ཆགས་བསྐང་ནས་ཕྱག་རྒྱ་ཆེན་པོའི་རིག་འཛིན་གྱི་ས་ལ་བརྟེན་པར་འགྱུར་རོ། །སོགས་མང་དུ་གསུངས། འདི་ནི་ལུས་ཀྱི་བྱེད་པ་གཙོ་ཆེ་བས་དེའི་སྒོ་ནས་བཤགས་པ་ཞེས་བྱ་ལ་ཚད་ཀྱང་དུས་གཅིག་ལ་སྟོང་ཕྲག་རེ་འཚལ་ལོ། །གཉིས་པ་ནི། རྒྱུད་ལས། དེ་ནས་དུས་དེར་དཔལ་རྡོ་རྗེ་སེམས་དཔའ་ཞེས་བྱ་བ་སོགས་ཀྱིས་འོག་མིན་ནས་མངོན་སུམ་དུ་བྱོན་ཏེ། སྟོན་པའི་སྤྱན་སྔར་འཁོད་དེ་ཡི་

གེ་བརྒྱ་པ་བཟླ་ཚུལ་གྱི་གདམ་པ་གསུངས་པ་བཞིན། རང་གི་སྤྱི་གཙུག་པད་ཟླའི་གདན་གྱི་སྟེང་དུ་འོག་མིན་ནས་དཔལ་རྡོ་རྗེ་སེམས་དཔའ་མངོན་སུམ་དུ་བྱོན་ཏེ་བཞུགས་པར་མོས་ལ། དེའི་རྣམ་པ་གསལ་བཏབ་སྟེ་སྤྱི་གཙུགས་པད་ཉི་སོགས་སྟོབས་བཞི་ཚང་བའི་སྒོ་ནས་ཡིག་བརྒྱ་བཟླ་ཞིང་བདུད་རྩི་འབེབས་སྦྱང་གི་དམིགས་པ་གཞན་དུ་མ་ཡེངས་པར་བྱའོ། །འདི་ལ་ངག་གིས་སྔགས་བཟླ་བའི་བྱེད་པ་གཙོ་ཆེ་བས་དེའི་བཤགས་པ་ཞེས་བྱ་ལ་ཚད་ཀྱང་དུས་ཐོག་གཅིག་ལ་བརྒྱ་རྩ་བརྒྱད་བཟླས་ན། ཉམས་ཆགས་ཐམས་ཅད་བསྐང་ཏེ་ངན་སོང་གསུམ་དུ་ལྟུང་བ་ལས་ཐར་བར་འགྱུར་རོ་སོགས་ཕན་པའི་ཡོན་ཏན་དཔག་ཏུ་མེད་པར་གསུངས་སོ། །གསུམ་པ་ནི། ལྟ་བའི་ཀློང་བཤགས་སྟེ། རྒྱུད་ལས། ཡིད་ཀྱི་སྒོ་ནས་ཉམས་ཆགས་བྱུང་ན་ཐུགས་ཀྱི་ལྟ་བས་བསྐང་སྟེ། རྣལ་འབྱོར་གྱི་གྲལ་འདིར་འཁོད་པ་རྣམས་ཀྱིས་ཡིད་དམ་སེམས་ནི་དོན་དམ་པར་ཐུགས་ཡང་དག་པའི་ཡེ་ཤེས་ཉིད་ཡིན་ལ། ཡང་དག་པའི་ཡེ་ཤེས་ནི་རང་གི་ཀུན་གཞི་བྱང་ཆུབ་ཀྱི་སེམས་ཡིན་ཏེ། ཀུན་གཞི་མ་བཅོས་པ་ལ་ཡིད་རང་བྱུང་གི་ཡེ་ཤེས་བདེ་བ་ཆེན་པོར་ཤར་བ་ནི་བསྲུང་དུ་མེད་པའི་དམ་ཚིག་ཆེན་པོ་སྟེ། ཞེས་པའི་གཞུང་འདིའི་སྟེང་ནས་ལྟ་བའི་ངེས་པ་ཐོབ་དགོས་ཏེ། དེ་ནི་སེམས་བདེ་གསལ་མི་རྟོག་པའི་ངང་དུ་ཉམས་གསལ་སྟོང་ཤིགས་སེ། བློ་བདེ་འབོལ་ལེ་གནས་པ་ཙམ་ལ་ནི་ལྟ་བའི་གནད་ཡེ་མེད་པས། སྒྱུ་འཕྲུལ་དྲྭ་བ་ལ་སོགས་པའི་རྒྱུད་ཀྱི་དོན་གྲུབ་པའི་སློབ་དཔོན་སྒེགས་པའི་རྡོ་རྗེ། སངས་རྒྱས་གསང་བ། བཱི་མ་ལ། ཨོ་རྒྱན་ཆེན་པོ་ལ་སོགས་པས་ལུང་རིགས་མན་ངག་གིས་བཀྲལ་བའི་འགྲེལ་རྙིང་རྣམས་བཞིན་དུ་སྒྲོ་འདོགས་ཆོད་པའི་དོན་ལ་འཇོག་

ཚུལ་མཁས་དགོས་ཀྱང་། འདིར་མདོར་བསྡུ་ན་ཀུན་གཞིའི་སྒྲས་བསྟན་པའི་མ་བཅོས་པའི་གནས་ལུགས་ནི་རྣལ་འབྱོར་ཆེན་པོའི་སྐབས་སུ་དགག་བྱའི་སྤྲོས་པ་རྣམ་པར་བཅད་པའི་སྟོང་ཙམ་ཁོ་ན་ལ་མི་འཇོག་སྟེ། རྣམ་ཀུན་མཆོག་ལྡན་གྱི་སྟོང་ཉིད་ཞེས་དགག་གཞི་འོད་གསལ་གཉུག་མ་བྱང་ཆུབ་ཀྱི་སེམས་དང་ངོ་བོ་གཅིག་ཏུ་གྱུར་པ་མེ་དང་ཚ་བ་ལྟ་བུ་ཟུང་འཇུག་ཏུ་བཏགས་པའི་རང་བྱུང་གི་ཡེ་ཤེས་བདེ་བ་ཆེན་པོ་རུ་ཤར་བ་སྟེ་གྲུབ་པ་ནི་གནས་ལུགས་སམ་གནས་ཚུལ་མཐར་ཐུག་པ་ཡིན་ཅིང་། གཉུག་མའི་སེམས་ཉིད་དེའི་རང་རྩལ་ལམ་རང་གི་ནུས་པ་ལས་སྣང་བ་མིན་པའི་ཆོས་གཞན་མེད་པས་ན་སྲུང་དུ་མེད་པ་ཞེས་བྱ་ལ། ཚུལ་དེ་ལྟར་ལེགས་པར་རྟོགས་པ་ལ་དམ་ཚིག་ཆེན་པོ་ཞེས་གསུངས་སོ། །དེ་ཡང་ཡེ་དོན་གྱི་ཀུན་གཞི་གནས་ལུགས་དེ་ལྟར་ཡིན་པའི་ཚུལ་ལེགས་པར་རྟོགས་ཕན་ཆད་ནི། འཁོར་བའི་ཀུན་གཞི་བག་ཆགས་དང་བཅས་པས་བསྐྱེད་པའི་ཕུང་ཁམས་ཤེས་དབང་ཡུལ་དུས་སུ་གྱུར་པ་དང་། ངག་གི་སྨྲ་བརྗོད་སོགས་ཐམས་ཅད་མཚོ་ལས་རླབས་སྣང་བ་ལྟར་གནས་ལུགས་དེའི་རྩལ་སྣང་ཙམ་ལས་ཡེ་ནས་ཏེ་རང་བཞིན་གྱིས་མ་བྱུང་མ་སྐྱེས་པས་རང་བྱུང་ཆེན་པོ་ཡིན་ནོ། །དམ་ཚིག་ཉམས་ཆགས་སྡིག་སྒྲིབ་སོགས་སྤྱིར་འཁོར་བ་དང་བྱེ་བྲག་ངན་སོང་གི་གནས་རིགས་དམན་པ་སྡུག་བསྔལ་འགྲུབ་བྱེད་ནི་གནས་ལུགས་དེ་དང་མི་མཐུན་པའི་འཛིན་སྟངས་ཕྱིན་ཅི་ལོག་པ་ཙམ་གྱི་རྒྱུས་སྐྱེ་བའོ། །དེ་ལྟར་ལྟ་བ་རྟོགས་པའི་མཐུས་མ་རིག་པ་གཞི་ནས་ལྡོག་ནུས་ཏེ། །དེ་གཉིས་ནི་ཡུལ་གཅིག་ལ་འཛིན་སྟངས་མི་མཐུན་པ་ཙམ་ལས་ངོ་བོ་ཐ་དད་དུ་མེད་དོ། །བློ་གཉིས་ཀྱང་གཅིག་ཡོད་ཚེ་གཅིག་མངོན་དུ་མེད་དེ་མི་མཐུན་པའི་ཕྱིར་རོ། །བླ་ན་མེད་པའི་ཐབས་ཆེན་པོའི་ལམ་འདིས་ནི་མ་རིག་པས་བསླད་པའི་རྟོག་

སྒྲིབ་རགས་པ་ཤུགས་ཀྱིས་ལྡོག་པ་ན་འབྲས་བུ་སྡུག་བདེན་དུ་གྱུར་པའི་ཕུང་པོ་སོགས་ལྷའི་དཀྱིལ་འཁོར་དུ་གནས་པ་ལ་ངེས་པ་རིམ་བཞིན་འདྲེན་ཏེ། གནས་ཚུལ་དང་མཐུན་པའི་སྣང་ཆ་ངང་གིས་གསལ་བའི་རྒྱུ་མཚན་ནི་སྣང་སྟོང་གཉིས་ངོ་བོ་གཅིག་པས་སྣང་བ་སྤང་བའི་སྟོང་པ་དང་། སྟོང་པ་མིན་པའི་སྣང་བ་མི་སྲིད་པའི་ཕྱིར་རོ། །དེ་ལ་གོམ་པ་ཀློང་དུ་གྱུར་པ་ན་དེ་ལྟར་དོན་བྱེད་ནུས་ཏེ་ཡང་དག་པའི་རྟེན་འབྲེལ་ནི་བསླུ་བ་མེད་ཅིང་སྟོབས་དང་ལྡན་ཏེ་རྡོ་རྗེའི་སྐུ་དང་འཇའ་ལུས་གྲུབ་པའི་རིག་འཛིན་གོང་མ་རྣམས་བཞིན་ནོ། །དེ་བཞིན་དུ་རྫོགས་པ་ཆེན་པོའི་གཞུང་ལ་ནི། སེམས་ཀློང་མན་ངག་གི་སྡེ་སོ་སོར་འཇུག་སྒོ་དང་། གཞི་ལམ་འབྲས་གསུམ་གྱི་འཇོག་ཚུལ། དངོས་གཞི་གདམ་དོན་སྐྱོང་བའི་དུས་རྣམས་སུ་ཁྱད་ཆོས་ཟབ་མོ་དུ་མ་ཡོད་ཀྱང་། ངོ་བོ་རང་བཞིན་ཐུགས་རྗེ་གསུམ་གྱི་འཇོག་ཚུལ་སོགས་ལྟ་བའི་གཞི་ནི་འདི་དང་མཐུན་པའི་ཚུལ་ཤེས་པར་བྱས་ནས་འདིའི་ཐུན་མིན་གྱི་རྫོགས་རིམ་བར་དོ་དྲུག་ཁྲིད་ལའང་མན་ངག་སྡེའི་ངོ་རང་ཐོག་ཏུ་སྤྲོད་པ་དང་། ཐག་གཅིག་ཐོག་ཏུ་གཅོད་པ་དང་། གདེང་གྲོལ་ཐོག་ཏུ་འཆའ་བ་ལ་བརྟེན་ནས་ལྟ་བའི་གནད་ཤེས་པ་ན་དེའི་ལུགས་སུ་བྱས་ཏེ་ཀློང་བཤགས་བྱའོ། །ལར་རིག་འཛིན་གོང་མ་རྣམས་ཀྱི་གསུངས་རྒྱུན་ལས། རྒྱུད་ལུང་མན་ངག་གསུམ་པོ་ལྟ་བ་གཏན་ལ་འབེབས་ཚུལ་ཙམ་ལས་དངོས་གཞི་ལྟ་བ་རྟོགས་པ་ན་ཚུལ་གཅིག་པས་ན་ཡོ་ག་རྣམ་གསུམ་ལྟ་བའི་སྐྱེལ་སོ་གཅིག་གོ་ཞེས་གསུངས་སོ། །འདི་ལ་དཔལ་འཛིན་སོགས་ཁ་ཅིག་གིས་རྫོགས་ཆེན་ཧ་ཤང་གི་ལྟ་བ་ཡིན་ཟེར་བ་དང་། ཧ་ཤང་གི་ལྟ་བ་འདྲེས་ཟེར་བ་ནི་ཆོས་ཀྱི་ལོ་རྒྱུས་ཙམ་ཡང་མ་མཐོང་བའི་

ཆགས་སྡང་གི་མུན་གཏམ་གྱིས་ཆོས་སྤང་བའི་ལས་ངན་གསོགས་པ་སྟེ། རྫོགས་པ་ཆེན་པོ་ནི་སྔོན་གྱི་དུས་སུ་སློབ་དཔོན་ཆེན་པོ་དང་། པཎ་ཆེན་བི་མ་མི་ཏྲ་ལ་སོགས་རིག་འཛིན་གྱི་ས་ལ་བཞུགས་པའི་གྲུབ་པའི་དབང་ཕྱུག་རྣམས་ཀྱིས་གསང་ཆེན་བླ་ན་མེད་པའི་རྒྱུད་སྡེ་མཐར་ཐུག་པ་རྣམས་ཀྱི་མན་ངག །དགའ་རབ་རྡོ་རྗེ་ལ་སོགས་པའི་ཐུགས་བཅུད། བཻ་རོ་ལ་སོགས་པའི་རྗེ་འབངས་དང་། ཉང་ཏིང་འཛིན་བཟང་པོ་སོགས་ལ་གནང་བས་ཐམས་ཅད་འཇའ་ལུས་རིག་འཛིན་གྱི་ས་ལ་གཤེགས་པའི་བརྒྱུད་པ་དེང་སང་གི་བར་དུ་བྱིན་རླབས་དབང་། གྲོལ་བྱེད་ཁྲིད། ཉམས་མྱོང་ཕྱག་བཞེས་རྣམས་མ་ཉམས་པར་རིང་བརྒྱུད་བཀའ་མ། ཉེ་བརྒྱུད་ཟབ་གཏེར་དག་སྣང་དུ་སྩལ་བ་སོགས་ཁྱད་པར་ཅན་བཞུགས་པའི་ནང་དུ་ཧ་ཤང་འབྱུང་དོན་མེད་དོ། །ལར་རྒྱ་ནག་གི་ཡུལ་དུ་བྱ་རྒྱུད་སོགས་ཕྲན་ཚེགས་རེ་དང་། མདོ་ཕྱོགས་མ་གཏོགས་བླ་མེད་ཀྱི་རྒྱུད་མ་འགྱུར་བར་བཤད་ལ། ཧ་ཤང་ནི་དེ་དག་གི་ཕྱིས་ཞིག་ན་བྱུང་སྟེ་མདོ་སྡེ་དག་གི་ལུང་ལ་བརྟེན་ནས་སྦྱིན་པ་སོགས་རྒྱ་ཆེ་བའི་སྤྱོད་ཕྱོགས་ཐམས་ཅད་མི་དགོས་ཤིང་། ཡིད་ལ་བྱེད་པ་ཐམས་ཅད་བཀག་ནས་ཅི་ཡང་ཡིད་ལ་མི་བྱེད་པའི་སྲོལ་ཚུག་པ་མཁན་པོ་ཞི་བ་འཚོས་མ་འོངས་ལུང་བསྟན་མཛད་པ་བཞིན། སློབ་དཔོན་ཀ་མ་ལ་ཤི་ལས་སུན་བྱུང་བར་བཤད་པ་ལས་ཕྱག་རྫོགས་སོགས་བླ་མེད་ཀྱི་ཆོས་ཧ་ཤངས་གིས་བསྟན་པར་མ་བཤད་དོ། །དེ་དག་ནི་འཕྲོས་དོན་ཡིན་ལ། སྐབས་སུ་བབས་པ་དངོས་ལ་བཤགས་རྒྱུད་ཀྱི་གླེང་གཞིའི་ལེའུ་ལས་གྲངས་གསུངས་པ་ལྟར། ཐེག་པ་ལམ་ཞུགས་ནས་སྐུ་གསུང་ཐུགས་སུ་བྱུང་བའི་བཤགས་པའི་བར་དོན་ཚན་བཅུ་གསུམ་ལས་དབྱེ་སྟེ་ལེའུ་བཅོ་ལྔས་བསྟན་

ཀྱང་། འདིར་ནི་རྩ་བ་ཞི་ཁྲོའི་དཀྱིལ་འཁོར་དང་འབྲེལ་བར་སློབ་དཔོན་ཆེན་པོས་དོན་དྲུག་ཏུ་བསྡུ་བར་མཛད་པ། ཀློང་བཤགས་བརྗོད་པ་རང་གྲོལ་ལས། འདི་ལ་དྲུག་སྟེ་བརྗོད་མེད་དོན་བཤགས་དང་། ཞི་བའི་ཀློང་བཤགས་དང་། ཁྲོ་བོའི་ཀློང་བཤགས་དང་། ལྟ་བའི་ཀློང་བཤགས་དང་། རཱུ་ཏྲའི་སྨྲེ་བཤགས་དང་། བདེ་གཤེགས་སྤྱི་བཤགས་རྣམ་པ་དྲུག་གིས་བསྟན་ཅེས་པ་ལས། ལྔ་པ་ནི་གྲོལ་ལམ་ལྟ་བའི་ཀློང་བཤགས་དངོས་ཏེ། ཧཱུྃ་ཆོས་ཀྱི་དབྱིངས་ཉིད་སྤྲོས་པ་མེད་པ་ལ༔ སོགས་ཀྱི་དོན་དེ་ཡང་ལྷག་པའི་དོན་དམ་བདེན་པ་ནི། མཚན་མའི་སྤྲོས་པ་དང་བྲལ་བའི་ཆོས་ཀྱི་དབྱིངས་དང་། སྟོང་ཆེན་དེ་ལ་འཁོར་འདས་བཟང་ངན་མེད་པར་མཉམ་པ་ཉིད་དང་། སྐྱེ་འགགས་ལ་སོགས་པའི་འདུས་བྱས་ཀྱི་མཚན་ཉིད་ཅན་གྱི་རྣམ་པ་དང་བྲལ་བའི་དུས་གསུམ་འགྱུར་མེད་དང་། འཕགས་པའི་ཆོས་ཐམས་ཅད་གང་ལ་བརྟེན་ནས་འབྱུང་བའི་ཆོས་ཀྱི་དབྱིངས་དང་། དུས་གསུམ་གྱི་རྒྱལ་བ་ཐམས་ཅད་བརྟེན་པའི་གཞལ་ཡས་ཁང་དང་། ལོངས་སྤྱོད་ཆེན་པོ་གསང་བའི་སྐུ་མངོན་པར་བྱང་ཆུབ་ཅིང་འདུ་འབྲལ་མེད་པར་བཞུགས་པའི་གནས་རྡོ་རྗེ་བཙུན་མོའི་བྷ་ག་སྟེ་ཡུམ་གྱི་མཁའ་དང་རྣམ་པར་ཐར་པའི་སྒོ་བདག་མེད་པའི་གནས་ལུགས་རང་བཞིན་གྱིས་སྐྱེ་བ་མེད་པའི་དོན་དང་། སྒྱུ་མ་ལྟ་བུའི་འཁོར་འདས་ཀྱི་ཆོས་ཐམས་ཅད་སྣང་བ་ལ་ཆགས་ཐོགས་དང་བྲལ་བའི་ཆོས་ཉིད་ཆགས་པ་མེད་པ་དང་། མི་དགེ་བའི་ལས་དང་། འཁོར་བའི་ཆོས་ཀྱི་རང་བཞིན་ཏེ་ཆོས་ཉིད་དུ་གྱུར་ཀྱང་དེ་ཡི་དྲི་མས་མ་གོས་པའི་བྱང་ཆུབ་སྐྱོན་བྲལ་དང་། གང་ལ་དམིགས་ཏེ་བསྒོམ་པས་ཡང་དག་པའི་དོན་འབྱུང་བ་ལ་མི་བསླུ་བས་ཆོས་ཉིད་བདེན་པའི་དོན་ཏེ་མིང་གི་རྣམ་གྲངས་བཅུས་བསྟན་པ་དང་། ལྷག་པའི་ཀུན་རྫོབ་བདེན་པ་ཞེས་

དགག་གཞི་དྲི་མ་མེད་པའི་འོད་གསལ་གོང་གི་སྟོང་ཆེན་དང་ངོ་བོ་གཅིག་ཏུ་གྱུར་པའི་དབྱེར་མེད་པ་ནི། རྟོག་པའི་དྲྭ་བས་བཅིང་གྲོལ་གྱིས་བཟང་ངན་མེད་པའི་ཀུན་ཏུ་བཟང་པོ་དང་། རང་བཞིན་གྱིས་འོད་གསལ་བར་མཚན་མའི་རྣམ་རྟོག་གི་གྲྭ་ཟུར་དང་བྲལ་བས་ཀུན་ནས་ཟླུམ་པོའི་ཐིག་ལེ་ཆེན་པོ་དང་། སྐྱེ་འཆི་སོགས་མཚན་མའི་རྐྱེན་གྱིས་རྒྱུན་ཆད་མེད་པ་གཉུག་མའི་བྱང་ཆུབ་ཀྱི་སེམས་དང་། རྒྱུ་འབྲས་སོགས་རྩོལ་སྒྲུབ་ཀྱིས་གསར་དུ་བྱས་པ་མིན་པའི་རང་བྱུང་གི་ཡེ་ཤེས་དང་། རང་གི་ངོ་བོ་མ་རིག་པས་སྒྲིབ་པའི་རྟག་ཆད་སོགས་ཀྱིས་མཐའ་དང་བྲལ་ཞིང་དེ་དག་གི་གཉེན་པོའི་ཕྱོགས་སུ་གྱུར་པའི་རིག་པ་ཡེ་ཤེས་དང་། གང་སྣང་ཐམས་ཅད་ཡེ་ཤེས་ཀྱི་རོལ་པར་རང་གསལ་བའི་ཐབས་བདེ་བ་ཆེན་པོ་ཡབ་དང་། གཟུགས་ལ་སོགས་པའི་ཕྱི་རོལ་གྱི་ཆོས་ཐམས་ཅད་རིག་པའི་རང་སྣང་ཙམ་དུ་ལྷུན་གྱིས་གྲུབ་པ་ལས་གཞན་དུ་མི་དམིགས་པའི་ཡེ་ཤེས་ཀྱི་རང་བཞིན་ཅན་དང་སྟོང་པ་ཆེན་པོ་དང་ཡེ་ནས་ངོ་བོ་ཐ་དད་དུ་མེད་པའི་དབྱེ་བསྲི་མེད་པ་ཞེས་དང་། གཞན་ཡང་འོད་གསལ་དང་མི་ཤིགས་པའི་ཐིག་ལེ་ལ་སོགས་པའི་མིང་གིས་བསྟན་པའི་དོན་རྣམས་དྲན་པར་བྱས་ཏེ་ལྷག་པའི་བདེན་པ་དབྱེར་མེད་ཀྱི་རིག་སྟོང་ཆེན་པོ་བཅོས་བསླད་ཀྱི་རྟོག་སྒྲིབ་ཐམས་ཅད་དང་བྲལ་བ་དེའི་ངང་དུ་འཇོག་པའོ། །དེ་ལྟར་ལེགས་པར་རྟོགས་པ་མ་གྱུར་པ་དང་། མ་ཤེས་པ་དང་། ཤེས་ཀྱང་འདི་ཡིན་ནམ་མ་ཡིན་སྙམ་ཏེ་སེམས་ལ་ཐེ་ཚོམ་གྱིས་སེལ་ཞུགས་པ་ལ་སོགས་པའི་ནོངས་པ་རྣམས་འགྱོད་པས་བཤགས་པའོ། །འདི་ལ་ཡིད་ཀྱི་བྱེད་པ་གཙོ་ཆེ་བས་དེའི་བཤགས་པ་ཞེས་བྱའོ། །འདི་ནི་བཤགས་པ་རྣམས་ཀྱི་གཙོ་བོར་གྱུར་པས་ན་རྒྱལ་པོ་ཞེས་བྱའོ། །བཞི་པ་ནི། དེ་ཡང་དམ་ཚིག་ཉམས་པ་དང་ལས་ངན་མི་དགེ་བ་

གང་བསགས་པ་ཐམས་ཅད་དྲན་པར་བྱས་ཏེ། དེའི་འབྲས་བུ་སྡུག་བསྔལ་མི་བཟོད་པར་མྱོང་དགོས་པར་ཤིན་ཏུ་སྐྲག་ཅིང་འཇིགས་ལ་འགྱོད་པའི་མེ་ལྕེ་དྲག་པོས་ཡིད་ཀྱི་བུད་ཤིང་གདུང་བས། ཉེས་པ་རྣམས་སྨྲེ་སྔགས་ཀྱིས་བསྒྲགས་ཏེ་མྱ་ངན་གྱིས་བཤགས་ཚིག་སྔོན་ཚེ་རཱུ་ཏྲས་བཤགས་པ་བཞིན་བརྗོད་དེ་བཤགས་པ་ནི་དེ་དངོས་དང་། བརྗོད་མེད་ལ་སོགས་པའི་བཤགས་པ་རྣམས་ལས་དམ་ཚིག་ཉམས་པའི་ཉེས་དམིགས་དང་ཉམས་པའི་ཚུལ་གསུངས་པ་རྣམས་སྨྲེ་བཤགས་ཀྱི་ཁོངས་སུ་བསྡུས་ཏེ་བཤགས་པར་བྱའོ། །འདི་ལ་ཉེས་པ་སོགས་སྨྲེ་སྔགས་ཀྱི་སྒོ་ནས་བཤགས་པས་དེའི་བཤགས་པ་ཞེས་བྱའོ། །དེ་ལྟར་འགྱོད་པ་དྲག་པོས་བཤགས་པས་ནི་མདོ་ལམ་ལྟར་མ་ཡིན་པར། ཚེ་འདི་ལའང་སོར་ཆུད་ནས་རིག་འཛིན་གྱི་ས་ལ་སྦྱོར་བར་གསུངས། ཕྱིན་ཆད་ནི་སྲོག་ལ་བབས་ཀྱང་མི་བྱེད་པར་སེམས་པས་སྡོམ་དགོས་པས། དེ་ལའང་ལྟ་བ་དང་། ཏིང་ངེ་འཛིན་དང་། དད་པ་དང་། ཐག་ཆོད་པའི་སྤྱོད་པའི་སྒོ་ནས་བསྡམས་ཏེ་རྒྱུད་དག་སེང་ངེ་བ་ཞིག་མ་བགྱིས་ན་བཤགས་པ་རྣམས་དོན་མེད་པ་ཉིད་དུ་འགྱུར་བས་ན་མི་འཆབ་མི་སྦེད་སླན་ཆད་སྡོམ་པར་བགྱི་གསུངས་པ་ལྟར་རོ། །དེ་ལྟར་བཤགས་ཆེན་བཞི་རྒྱུད་ལས་གསུངས་པ་བཞིན་དུ་ལྷ་ཚོགས་རྣམས་ཀྱི་སྤྱན་སྔར་ཚུལ་བཞིན་དུ་བགྱིས་པས་མཚམས་མེད་པ་ལྔ་ལ་སོགས་པའི་ལས་མཐོང་ཆོས་མྱོང་འགྱུར་རྣམས་ཀྱང་བྱང་བར་གསུངས་པ་སྒྲ་ཇི་བཞིན་ཡིན་པས་འབད་པར་བྱའོ། །དྲུག་པ་ནི་བསྐང་བའི་རྒྱུ་ཞེས་བསྐང་ཆེན་བཞི་ལ་ཆོ་ག་ཕལ་ཆེ་བ་ལས་སྨན་རཀ་གཏོར་མ་མར་མེ་དང་བཞིར་མཛད་པ་ནི་གནད་ཁྱད་པར་ཅན་རེ་ཡོད་པ་ལ་གཙོ་བོར་དགོངས་པའོ། །འདིར་ནི་ཟབ་ཆོས་འདིའི་བཀའ་བབས་རྒྱ་ར་བ་ནམ་མཁའ་ཆོས་

ཀྱི་རྒྱ་མཚོའི་ཆོག་སྒྲིག་བསྐང་བཤགས་ཀྱི་གཞུང་ལས་གསུངས་པ་བཞིན་ཕྱི་ཐུན་མོང་རྫས་ཀྱི་བསྐང་བ། ནང་ཐུན་མིན་རྫས་ཀྱི་བསྐང་བ། གསང་བ་ཚོགས་ཀྱི་མཆོད་པས་བསྐང་བ། དེ་ཁོ་ན་ཉིད་དོན་དམ་བྱང་ཆུབ་སེམས་ཀྱི་བསྐང་བའོ། །འདི་ལ་གོ་དོན། རྩ་ལྟུང་བྱུང་ནས་བཤགས་ཚད་ལས་འདས་པ། ཞག་གཅིག་ཟླ་གཅིག་ལོ་གཅིག་ལོ་གཉིས་འདས་འགལ་ཉམས་འདས་རལ་ཞེས་བརྗོད་སོགས་གསུངས་ལ། དེ་བསྐང་ཐབས་ཀྱང་། འགལ་ན་ཚོགས་འཁོར་ཉམས་ན་བདོག་པས་བསྐང་། འདས་ན་བུ་དང་ཆུང་མ་ནོར་སོགས་དང་། །རལ་ན་རང་གི་སྲོག་གིས་གསོ་བར་བཤད། །ཞེས་པས་དེ་ཡང་བདོག་དགུའི་དངོས་པོ་དཀོན་མཆོག་གི་ཞིང་སར་གཏོང་བའམ། དཀྱིལ་འཁོར་གྱི་སྤྱན་སྔར་ཅི་འབྱོར་མཆོད་པར་སྦྱར་ཏེ། དང་པོ་ནི། ལྷ་གྲངས་དང་མཉམ་པ་སོགས་ཀྱིས་ཉེར་སྤྱོད་བྱིན་གྱིས་བརླབས་ལ། ཧཱུྃ་སྟོང་གསུམ་འདིའམ་གཞན་དག་ན་སོགས་ཀྱི་དོན་བཞིན་འབུལ་བའོ། །གཉིས་པ་ནི། བླ་མ་སོགས་ཀྱི་ཕྱིར་རང་གི་སྲོག་གཏོང་བའང་ཅི་མི་སེམས་པ་དགོས་མོད། དེ་ཡང་མུ་སྟེགས་ལྟར་ཏྲི་ཤུལ་གྱི་རྩེར་མཆོངས་ཏེ་འགུམ་པར་བྱ་བ་དང་། མེ་ལྔ་བསྟེན་ནས་བསྲེགས་པ་ལྟ་བུས་ནི་ཉམས་ཆགས་མི་བསྐོང་བར་མ་ཟད་ཕུང་པོ་ལ་བརྙས་པའི་ལྟུང་བར་འགྱུར་བས། འདིར་བདུད་རྩི་སྨན་སོགས་བཞི་བརྒྱ་རྩ་བརྒྱད་རེ་བཤམས་ལ། ཧཱུྃ། ཀུན་གཞི་ཀློང་ཡངས་བྷནྡྷ་རུ་སོགས་ཀྱིས་རང་གི་ལུས་དཀྱིལ་རྩ་འཁོར་ལྔའི་དབུས་ཀྱི་དྭངས་མའི་དཀར་ཆ་དང་དབྱེར་མེད་པའི་བློས་འབུལ་བ་དང་། ཧཱུྃ་སྤྱི་གཙུག་བདེ་ཆེན་འཁོར་ལོའི་བྷནྡྷ་རུ་སོགས་ཀྱིས་འཁོར་ལོ་ལྔའི་དབུས་ཀྱི་ཁྲག་གི་དྭངས་མ་དམར་ཆའི་ཁམས་དང་དབྱེར་མེད་དུ་བྱས་ནས་འབུལ་བ་དང་། ཧཱུྃ་བྷནྡྷ་འབར་བའི་གཏོར་གཞོང་དུ་སོགས་ཀྱིས་ལུས་ཀྱི་ཤ་ཁྲག་

དྲོད་དབུགས་བཀྲག་མདངས་རྣམས་བཤམས་པའི་གཏོར་མ་དང་དབྱེར་མེད་དུ་བྱས་ཏེ་འབུལ་བའོ། །ཧཱུྃ་བརྡལ་ཁྱབ་པགས་པའི་ཀོང་བུ་རུ་སོགས་ཀྱིས་སྤྱིར་འཁོར་ལོ་ལྔའི་དབུས་ཀྱི་དྭངས་མའི་ཐིག་ལེ་ལ་བརྟེན་པའི་འོད་གསལ་དང་། ལམ་སྣང་ཡེ་ཤེས་འཆར་བའི་དྭངས་མ་རྩ་ཁམས་ལས་ཤར་བའི་བདེ་ཆེན་གྱི་ཡེ་ཤེས་རྣམས་བཤམས་པའི་མར་མེ་དང་དབྱེར་མེད་དུ་བྱས་ལ་འབུལ་ཞིང་། དེ་དང་རྗེས་འབྲེལ་མར་མེའི་སྨོན་ལམ་ཀྱང་བསམ་པ་དག་པས་གདབ་པར་བྱའོ། །འདི་དག་རྣམས་ནི་སྲོག་གི་ཟུང་དང་རྟེན་དུ་གྱུར་པའི་དཀར་དམར་གྱི་ཐིག་ལེ་སོགས་སྨན་རཀ་གཏོར་མ་མར་མེ་རྣམས་དང་དབྱེར་མེད་དུ་དམིགས་པས་འབུལ་བ་ལ་སྲོག་གིས་གསོ་བའི་གནད་ཚང་བའོ། །གསུམ་པ་ནི། ཚོགས་ཀྱི་མཆོད་པ་བྱིན་གྱིས་བརླབས་ཏེ་གཞུང་བཞིན་འབུལ་བའོ། །དེ་དང་རྗེས་འབྲེལ་དུ་ཞི་ཁྲོའི་མདངས་བསྐང་གི་དོན་ནི། ཧཱུྃ་རྣམ་ཤེས་ཕུང་པོ་གནས་དག་པའི། །ཞེས་སོགས་སྲོགས་ཆགས་མདངས་ནི་སྲོག་དང་ལྡན་པ་ལ་གསུངས་པ་སྟེ། ཕུང་ཁམས་སྐྱེ་མཆེད་ཚང་བ་དག་པའི་གཞིར་བཟུང་ནས། དེ་རྣམས་དག་པའི་ཆོས་སོ་སོར་ལྷའི་རྣམ་པར་གནས་པ་ལ་ཞི་བའི་མདངས་བསྐངས་དང་། དེའི་རང་གི་རྣམ་པའི་ཉམས་དང་ལྡན་པའི་གནས་འགྱུར་ཁྲོ་བོའི་ལྷ་ཡིན་ནོ། །བསྐང་རྫས་ལ། ཟ་ལེ་འབྲི་དང་ཤེལ་སྒོང་ལུག །ཙ་ར་མཁའ་ལྡིང་མདངས་ཀྱིས་བསྐང་ཞེས་གསུངས་པའི་སྲོག་ཆགས་གསོན་མའི་བསྐང་རྫས་ཡིན་ནོ། །རྩ་བའི་དཀྱིལ་འཁོར་བསྐྱེད་ཚེ་མ་བྱུང་ཡང་ཚོགས་མཆོད་སོགས་ཀྱི་དུས་མགྲོན་ཐབས་ཀྱི་ལྷ་ལུང་གི་ཁྲོ་བོ་ཡབ་ཡུམ་བརྒྱད་དང་། སྤོར་བྱེད་བརྒྱད། དེ་དང་རྗེས་འབྲེལ་ཕུར་པའི་ལྷ་བསྐང་འདི་སྒྱུ་འཕྲུལ་ལས་བསྲུང་བའི་འཁོར་ལོ་ཁྲོ་བཅུ་ཡབ་

ཡུམ་གསུངས་པ་དང་དོན་གྱི་གནད་གཅིག་ཅེས་མཛད་པ་དང་། གཙོ་བོའི་ཁྱད་པར་མ་གཏོགས་ཡང་དག་གི་ལྷ་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཡིན་པས་ཡང་ཕུར་སྦྲགས་མའི་གནད་ཀྱིས་ཡིན་པར་གསུངས་པ་དང་། ཚོགས་ཆེན་འདུས་ཀྱི་དཀྱིལ་འཁོར་གྱི་པདྨའི་ཆུ་བར་རྡོ་རྗེ་གཞོན་ནུའི་ལྷ་ཚོགས་བསྐྱེད་པར་གསུངས་པས་འདིའི་བཤགས་ཆེན་བཞི་སོགས་ལུང་དང་མཐུན་པར་གསུངས་པའི་གནད་ཀྱིས་ཡིན་སོགས་གསུངས་པས་གང་ཡིན་ཀྱང་འདྲ་སྟེ། ཕ་རྒྱུད་མ་རྒྱུད་ཀུན་ལས་བསྟན་པའི་ཕྲིན་ལས་ཀྱི་དཀྱིལ་འཁོར་ཁྱད་པར་ཅན་ཡིན་པའི་ཕྱིར་རོ། །གཞན་ཡང་ཆོས་སྐྱོང་སྡེ་བདུན་གྱི་བསྐང་བ་དང་བཅས་པའོ། །བཞི་པ་ནི། ཧཱུྃ་དངོས་པོ་ཆོས་ཉིད་ཡངས་པའི་ཀློང་དུ་བསྐང་སོགས་ཀྱིས་བདེ་སྟོང་དབྱེར་མེད་ཆེན་པོའི་དགོངས་པའི་ངང་བསྐྱངས་ཏེ་མཉམ་པར་འཇོག་པའོ། །དེ་ལྟར་བསྐང་བཤགས་ཀྱི་རིམ་པ་འདིས་ནི། སྡིག་ལྟུང་ཉམས་ཆགས་སོགས་སྒྲིབ་གཉིས་བྱང་བ་ཙམ་དུ་མ་ཟད། བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་ཏེ། དུས་རིང་པོར་མི་ཐོགས་པར་རྒྱལ་བའི་གོ་འཕང་ཆེན་པོ་མངོན་དུ་བྱ་བའི་ཐབས་ཚང་བ་ཡིན་ཏེ། རྒྱུད་ལས། དེ་ནས་དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་ཀྱིས་ཐོས་པ་ཙམ་གྱིས་རྩ་བ་དང་ཡན་ལག་གི་དམ་ཚིག་ཉམས་ཆགས་ཐམས་ཅད་བསྐངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་བསམ་གྱིས་མི་ཁྱབ་པ་དང་ལྡན་པར་གྱུར་ཏེ། ཡི་གེ་འཁོར་ལོ་ཚོགས་ཆེན་གྱི་ས་ལ་ལྷུན་གྱིས་གྲུབ་པར་གྱུར་ཏོ། །ཞེས་གསུངས་པས་སོ། །བདུན་པ་ནི། གཤིན་པོ་རྗེས་འཛིན་གནས་འདྲེན་གྱི་ཆོ་ག་སྟེ། འདི་ལ་གཉིས། རྟེན་སྦྱངས་ཆས་ཁྲུས་དཀྱིལ་བྱ་བའི་ཚུལ་དང་། ཆོ་ག་

དངོས་སོ། དང་པོ་ནི། གཤིན་རྗེའི་གནས་ལྷོ་ཕྱོགས་ཡིན་པ་དང་། སྔོན་སྦྱང་རྒྱུད་གསུངས་པའི་ཚེ་ངན་སོང་གསུམ་པོ་ཐམས་ཅད་ཀྱི་དཀྱིལ་འཁོར་གྱི་ལྷོ་ཕྱོགས་སུ་བཀུགས་ནས་ངན་འགྲོ་དྲལ་བའི་ཆོ་ག་གསུངས་པ་དང་། རྒྱ་གར་དུ་དུར་གྱི་བྱ་བ་ཐམས་ཅད་གྲོང་སོགས་ཀྱི་ལྷོ་སྒོར་བྱེད་པའི་སྲོལ་ལྟར། དཀྱིལ་འཁོར་གྱི་ལྷོ་ཕྱོགས་དམའ་བར་ཁྲུས་དཀྱིལ་སྟེགས་བུར་རས་དཀར་རམ་དར་དཀར་གྱི་སྟེང་པདྨ་འདབ་བརྒྱད་ཀྱི་གདན་ལ་སྙུག་མདའ་སོགས་ལ་བཏགས་པའི་བྱང་བུ་ནི་ཇི་སྐད་དུ། རྣམ་ཤེས་བརྟེན་པའི་མཁར་ཡིན་པས། །འདྲ་འབགས་པུས་བཙུག་ཐལ་སྦྱར་བ། །ལག་ན་མེ་ཏོག་ཐོགས་པ་བྲིི། །ཞེས་པ་ལྟར་གྱི་སྙིང་གར་ནྲྀའམ་མིང་ཡིག་དང་པོ་ཐིག་ལེས་མཚན་པ་དང་། རྒྱབ་ཏུ་གསེར་མཚལ་གུར་གུམ་སོགས་ཀྱིས་བྲིས་པའི་བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་དཀྱིལ་འཁོར་གྱི་ལྷ་ཚོགས་ཐམས་ཅད་ལ་བདག་མིང་བྲིས་ལ་འདི་ཞིས་བགྱི་བས་ཕྱག་འཚལ་ཞིང་སྐྱབས་སུ་མཆིའོ། །སྒྲིབ་པ་སྦྱངས་དུ་གསོལ། དབང་བསྐུར་དུ་གསོལ། ལམ་བསྟན་ཏུ་གསོལ། མྱུར་དུ་འཚང་རྒྱ་བར་བྱིན་གྱིས་བརླབས་ཏུ་གསོལ། ཞེས་བྲིས་པ་དང་། སྟེང་དུ་གདུགས་གཡས་གཡོན་དུ་འཕན་སོགས་འདོན་ཆ་བཞིན་བྲི། ཕྲེང་རྒྱན་ལྟ་བུ་བདག་གིར་བྱེད་པའི་རྫས་གཅིག་ཀྱང་བཏགས། གཟུགས་མ་གྲུབ་ན་མིིང་བྲིས་ཀྱང་རུང་སྟེ། སྦྱོང་རྒྱུད་ལས། དེ་ཡི་གཟུགས་བརྙན་བྲི་བའམ། །གུར་གུམ་གྱིས་ནི་མིང་ཡང་རུང། །ངན་སོང་གསུམ་གྱི་འཇིགས་ཆེན་ལས། །སེམས་ཅན་རྣམས་ནི་གྲོལ་བའི་ཕྱིར། །བློ་ཆེན་གྱིས་ནི་དབང་བསྐུར་བྱ། །ཞེས་སོ། །དེའི་སྔོན་ཕྱོགས་དཀྱིལ་འཁོར་ཕྱོགས་ལ་གྱེན་དུ་བསྒྲིགས་པའི་རིགས་དྲུག་གི་ས་བོན་བྲིས་པ་བཀོད། མིང་བྱང་གི་གཡས་སུ་བཟའ་བ་དང་། གཡོན་དུ་བཏུང་བ་འདོད་ཡོན་

དྲི་གསུར་བསྔོ་བའི་རྫས་དང་། མཐེབ་སྐྱུ། ཆང་བུ། ཏིང་ལོ་གསུམ་གསུམ་དང་། ཡུངས་ཐུན། བྱེ་སྔགས། ཁྲུས་བུམ། མེ་ལོང་། གོས་འབུལ། སྒྲོན་མེ་གསལ་བ། རིགས་དྲུག་གི་སྦྱོང་གཏོར་སོགས་ཚང་བར་བཤམས་མོ། །གཉིས་པ་ནི། དོན་བཅུར་གསུངས་པའི་དང་པོ་གཤེད་དང་ཕྲལ་བར་རྟེན་ལ་རྣམ་ཤེས་འགུགས་པ་དང་དེ་དངོས་སོ། །དང་པོ་ནི། ཧཱུྃ་བདག་ཉིད་རྡོ་རྗེ་སེམས་དཔའི་ཐུགས་ཀ་ནས༔ སོགས་ཀྱིས་དམིགས་པའི་རྟེན་ལ་འགུགས། སྤྱིར་སྦྱོང་བ་ལ་སྦྱང་ཁྲུས་ཀྱི་རིམ་པའི། དང་པོ་བགེགས་སྦྱོང་བའི་དོན་དུ་འདིར། གཉིས་པ་ནི། ཧཱུྃ༔ ཚེ་འདས་ལུས་བརྗེས་སོགས་ནས་ཞི་དྲག་དང་ཕྱེད་མའི་སྦྱངས་བས་བགེགས་བསྐྲད། གཉིས་པ་གནས་ནས་དགུགས་པ་ནི། ཧཱུྃ་ཚེ་འདས་ལུས་བརྗེས་བར་དོའི་རྣམ་ཤེས་ཁྱོད༔ སོགས་ཀྱི་དོན་གཤིན་པོ་དེ་ཉིད་རིགས་དྲུག་གི་གནས་སུ་སྐྱེས་ནས་སྡུག་བསྔལ་མྱོང་བའི་རྒྱུ་ཞེ་སྡང་སེར་སྣ་གཏི་མུག་ལ་སོགས་པའི་ཉོན་མོངས་པའི་ས་བོན་ཨ་ནྲི་སུ་ཏྲི་པྲེ་དུའི་རྣམ་པར་བཀུགས་ཏེ། སྤྱི་བོ་ལ་སོགས་པའི་གནས་དང་དབྱེར་མེད་པའི་བྲིས་པའི་ས་བོན་དྲུག་ལ་བསྟིམ་ཞིང་གསལ་བར་བྱས་པས་ལྷག་མེད་དུ་སྦྱངས་རུང་བར་བསྒྲུབ་པ་སྟེ། དཔེར་ན་ནད་རྣམས་ཐང་གིས་བསྡུས་ཤིང་སྨིན་པར་བྱས་ན་སླར་གཉེན་པོའི་སྨན་གྱིས་ལྷག་མེད་དུ་གསོད་ནུས་པ་བཞིན་ནོ། །གསུམ་པ་རྟེན་ལ་བསྟིམ་པ་ནི། ཀྱེ་མ་དབང་མེད་ལས་ཀྱི་སོགས་སླའོ། །བཞི་པ་དུག་ཁྲུས་གསོལ་བ་ནི་ཞེས་པ་འདི་ལ་གསུམ། དང་པོ་ཁྲུས་ཀྱིས་སྦྱང་བ་ནི། ལས་བུམ་གྱིས་དཀྱིལ་འཁོར་གྱི་ལྷ་ལ་ཁྲུས་གསོལ་བའི་ཆུ་སླར་བླུགས་པའི་བུམ་པ་ཐོགས་ཏེ་ཧཱུྃ་འདི་ནི་སྦྱིན་པའི་རང་བཞིན་ཆུ༔ སོགས་ཀྱི་དོན་ལ། དེ་ཡང་ཁྲུས་ཀྱིས་སྡིག་པ་དག་པར་འདོད་པ་ནི་མུ་སྟེགས་རིག་བྱེད་པ་སོགས་ཡིན་ཏེ། དེ་དག་

གི་འདོད་པ་ལ་སྤྱིར་ཁྲུས་ཐམས་ཅད་ཀྱིས་དག་སྟེ་ཕྲལ་དུ་སེམས་དྭངས་བར་བྱེད་ཅིང་ལུས་གཙང་བར་བྱེད་པ་ལྟར་ཕུག་གི་སྡིག་པ་ཞི་བར་བྱེད་པའི་ཕྱིར་རོ། །ཁྱད་པར་དུ་ཁྲུས་ཀྱི་སྒོ་གང་གཱ་ལ་སོགས་པའི་ཆུ་བོ་བཅུ་གསུམ་གྱི་མིང་སྨྲོས་ཏེ། དེ་དག་ཏུ་ཁྲུས་བྱས་ན་མཐོ་རིས་དང་ཐར་པ་ཐོབ་པར་འདོད་དེ། དྲང་སྲོང་ལྔ་ལེན་གྱི་ཁྲུས་ཀྱི་སྒོ་ལས། ཁྲུས་པ་འདི་རྣམས་གང་གི་ཕྱིར། །དག་པར་འདོད་ནས་ཁྲུས་བྱེད་པ། །སྡིག་པ་དག་པའི་བདག་ཉིད་དེ། །ངེས་པར་མཐོ་རིས་ཐར་པར་འགྱུར། །ཞེས་ཆུ་དེ་དག་ཁོ་ནའི་སྟོབས་ཀྱིས་སྡིག་པ་དག་པར་འདོད་དོ། །དེ་ནི་སློབ་དཔོན་ཆོས་གྲགས་ཀྱིས། །ཁྲུས་ལས་ཆོས་འདོད་དང་ནི་རིག་སྨྲས་དྲེགས། །སྡིག་པ་གཞོམ་ཕྱིར་གདུང་བ་བརྩོན་བྱེད་པ། །བླུན་པོ་ཤེས་རབ་འཆལ་བའི་རྟགས་ལྔ་ཡིན། །ཞེས་གསུངས་པའི་གནད་ཀྱང་ཆུ་ཁོ་ནས་ཁྲུས་བྱས་པ་ནི་གང་གཱ་སོགས་ཡིན་ཀྱང་ལུས་ཕྱིའི་དྲི་མ་ཙམ་དག་པར་བྱེད་པ་ལས་ནང་ཁྲོལ་དང་ཁྲག་སོགས་མེད་པར་བྱ་མི་ནུས་ན། སེམས་རྒྱུད་ཀྱི་ཉོན་མོངས་དང་སྡིག་པ་སྦྱང་བའི་ནུས་པ་ག་ལ་ཡོད་དེ་གཉེན་པོ་མ་ཡིན་པའི་ཕྱིར་རོ། །ལུས་ལ་མཚོན་གྱིས་བཏབ་པའི་རྨ་དང་། མྱ་ངན་དང་ཉོན་མོངས་ཀྱིས་གདུང་བ་ལ་ཆུས་བཀྲུས་ཀྱང་མི་འདག་པ་བཞིན་ནོ། །ནང་པའི་སྔགས་རྒྱུད་སོགས་ལས་ཁྲུས་ཀྱི་ཆོ་ག་བསྟན་པ་རྣམས་ནི་དེ་ལྟར་མིན་ཏེ། ཟབ་མོ་སངས་རྒྱས་སྤྱོད་ཡུལ་བའི། །མདོ་སྡེ་འདི་ནི་ཉན་བྱེད་ན། །མདོ་སྡེ་འདིའི་གཟི་བརྗིད་ཀྱིས། །སྲོག་ཆགས་དག་ནི་ཐམས་ཅད་ཀྱི། །མི་བཟད་པ་ཡི་ནད་རྣམས་ཀྱང་། །དེ་དག་ཐམས་ཅད་ཞི་བར་བལྟ། །ཚེ་དང་བསོད་ནམས་འཕེལ་བར་འགྱུར། །སྡིག་པ་ཀུན་ལས་རྣམ་པར་གྲོལ། །ཞེས་གསུངས་པ་ལྟར་བདེན་པ་སྨྲ་བའི་སངས་རྒྱས་བཅོམ་ལྡན་འདས་རྣམས་ཀྱིས་བསྟན་པའི་སྔགས་ཀྱི་ཆོ་གས་སྒྲུབ་

པའི་ཁྲུས་ལ་ནི་སྡིག་པ་ཞི་བ་སོགས་ཀྱི་ནུས་པ་དང་ལྡན་ཏེ། སྔགས་ཀྱི་མཐུ་དང་བདེན་པའི་སྟོབས་ལ་སོགས་པར་མཐུན་པའི་རྒྱུ་རྐྱེན་ལེགས་པར་ཚང་བས་སོ། །དེ་ཡང་འདི་ནི་ཞེས་ཉེ་ཚིག་གིས་སྨྲོས་པའི་སྦྱིན་པ་ཚུལ་ཁྲིམས་སོགས་ཕ་རོལ་ཏུ་ཕྱིན་པ་བཅུ་ནི་ཆུ་རྒྱུན་དང་མཚུངས་ཏེ། རང་རང་གི་མི་མཐུན་པའི་དྲི་མ་སེར་སྣ་དང་ཚུལ་ཁྲིམས་འཆལ་བ་ལ་སོགས་སེམས་ཀྱི་རྒྱུད་ལ་ཞུགས་པ་རྣམས་དག་པར་བྱེད་པའི་རང་བཞིན་ཅན་ཡིན་ཅིང་། དག་པའི་ཡོན་ཏན་ཕ་རོལ་ཏུ་ཕྱིན་པ་བཅུ་ལ་ལེགས་པར་འགོད་པའི་ཐུགས་རྗེ་ཆེན་པོའི་ཆུ་རྒྱུན་ཅན་རང་གིས་རྣམ་པར་དག་པའི་ཁྲུས་ལེགས་པར་མཛད་ནས། གཞན་གྱི་རྒྱུད་རྣམ་པར་དག་བྱེད་གྱི་ཁྲུས་ལེགས་པར་མཛད་པའི་སངས་རྒྱས་ལ་ཕྱག་འཚལ་ལོ། །དེའི་བདེན་པའི་སྟོབས་ཀྱིས་ཁྱོད་ཀྱི་རྒྱུད་ཀྱི་སེར་སྣ་ལ་སོགས་པའི་སྒྲིབ་པ་དག་པར་གྱུར་ཅིག་ཅེས་ཡོན་ཏན་དྲན་ཅིང་ཕྱག་འཚལ་སྔོན་དུ་འགྲོ་བས་གསང་སྔགས་ཀྱི་ཡི་གེ་བརྒྱ་པ་དང་ཁྲུས་སྔགས་བཟླ་ཞིང་ཁྲུས་བྱས་པས་ནི་སྡིག་པ་སྦྱོང་ནུས་པ་ཡིན་ཏེ། སྔགས་ཀྱིས་སྒྲུབ་པའི་ཁྲུས་ཀྱིས་གདོན་གྱིས་བཏབ་པ་དང་། ནད་ཀྱིས་ཟིན་པ་ཞི་བ་མངོན་སུམ་དང་། ཐུགས་རྗེ་ཆེན་པོའི་ཆོ་གའི་གཟུངས་ཁྲུས་ཀྱིས་སྔོན་ལས་མཛེ་ནད་ཀྱིས་ཟིན་པ་ལས་གྲོལ་ནས་མཆོག་གི་དངོས་གྲུབ་བརྙེས་པ་དགེ་སློང་མ་དཔལ་མོའི་རྣམ་ཐར་ལས་གསུངས་པ་བཞིན་ནོ། །གཉིས་པ་དུག་སྦྱོང་བ་ནི་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ཀྱིས་ཁ་ཟས་དུག་ཅན་དྲང་པ་བདེན་ཚིག་གིས་བསལ་ཏེ་གསོལ་བའི་ཚིག་གིས་སྣ་དྲངས་པའི་འདོད་ཆགས་ཞེ་སྡང་གཏི་མུག་གསུམ་སོགས་ནི་དེ་ཡང་ཡུལ་ལ་ལོག་པར་ཞུགས་པའི་མ་རིག་པས་བསྐྱེད་པའི་འདོད་ཆགས་ལ་སོགས་པའི་ཉོན་མོངས་

རྣམས་ནི་འཇིག་རྟེན་ཏེ་འཁོར་བའི་སེམས་ཅན་ཐམས་ཅད་ཀྱི་ཐར་པའི་སྲོག་གཅོད་ཅིང་སྡུག་བསྔལ་གསུམ་གྱིས་གདུང་བར་བྱེད་པའི་དུག་ཡིན་ཅིང་དེ་དག་དང་བྲལ་ཞིང་སླར་མི་ལྡོག་པའི་ཡེ་ཤེས་ཐུགས་སུ་ཆུད་པའི་རྡོ་རྗེ་སེམས་དཔའ་སོགས་རིགས་ལྔས་བསྡུས་པའི་སངས་རྒྱས་དང་། ཆོས་དང་། འཕགས་པའི་དགེ་འདུན་རྣམས་ཀྱི་བདེན་པ་འཇིག་རྟེན་གསུམ་དུ་བླ་ན་མེད་པའི་སྟོབས་ཀྱིས་ཁྱོད་ཀྱི་ཞེ་སྡང་ལ་སོགས་པའི་དུག་བཅོམ་པར་གྱུར་ཅིག་དང་། གཤིན་གང་སྟེ་དབང་མེད་དུ་འཆི་བའི་འཇིགས་པ་ནི་འདོད་ཆགས་ལ་སོགས་ཀྱི་དུག་ལས་བྱུང་ཀྱང་ཆགས་བྲལ་གྱི་རྒྱལ་བ་རྣམས་སྙིང་རྗེས་ཆགས་པ་དང་། ཁྲོ་བ་དང་། རྨོངས་པར་སྟོན་པ་ནི་དེ་དག་གི་མཆོག་ཡིན་ཏེ་འགྲོ་བའི་དུག་དྲག་པོ་རྣམས་དེས་བཅོམ་པའི་ཕྱིར་ཞེས་བདེན་ཚིག་བརྗོད་ཅིང་ཕྱག་ལེན་ལ་ཀུ་ཤ་དང་རྨ་བྱའི་མདངས་ཅན་གྱིས་བྱབ་ཚུལ་དང་བཅས་ཏེ་དུག་སྦྱོང་བའོ། །དེ་བཞིན་དུ་འབྱུང་བཞིའི་རྫས་ཀྱིས་བྱབ་ཅིང་། ས་ནི་དུག་གི་ཕ་ཡིན་ཏེ་སོགས་ཀྱང་སྒྱུ་མ་ལྟ་བུ་རིས་སུ་མ་ཆད་པ་ལས་སྣང་བཞིན་དུ་འཆར་བའི་ས་ལ་སོགས་པའི་འབྱུང་བ་བཞི་ནི་རང་གི་སེམས་ཉིད་བག་ཆགས་ཀྱི་དབང་གིས་ཕྱི་རོལ་ལྟ་བུར་སྣང་བ་ཙམ་ལས་དོན་དུ་གྲུབ་པ་མེད་ལ། བག་ཆགས་དེ་དག་ལས་ས་བོན་དུ་གྱུར་པ་རྣམས་ནི་དུག་གསུམ་དང་ལྡན་པའི་ཕུང་པོའི་ཐུན་མིན་གྱི་བྱེད་རྒྱུ་ཕ་ལྟ་བུ་དང་། རྣམ་སྨིན་དུ་གྱུར་པའི་འབྱུང་བ་རྣམས་ནི་ཐུན་མོང་གི་བསྐྱེད་རྒྱུ་མ་ལྟ་བུ་ཡིན་ལ། བག་ཆགས་ཐམས་ཅད་གཏན་ནས་ལོག་པའི་སངས་རྒྱས་རྣམས་ཀྱི་བདེན་པའི་སྟོབས་ཀྱིས་བག་ཆགས་ཀྱི་རྒྱུ་ཉོན་མོངས་པའི་དུག་ཐམས་ཅད་ས་ལ་སོགས་པའི་ནང་དུ་སོང་ཤིག །བྱབ་རྫས་ས་སོགས་ཀྱིས་གང་བའི་སྣོད་ས་སོགས་རང་རང་གི་ངང་དུ་དུག་རྣམས་སོང་ལ་ཁྱོད་ཀྱི་རྒྱུད་ན་གནས་པའི་ཉོན་མོངས་པའི་

དུག་རྣམས་ལྷག་མེད་དུ་དག་པར་གྱུར་ཅིག །སངས་རྒྱས་རྣམས་ནི་ཐུགས་རྗེ་ཆེན་པོས་གཞན་རྒྱུད་ཀྱི་དུག་གསུམ་ལ་སོགས་པའི་དྲི་མ་བཅོམ་པའི་ཐབས་ལ་མངའ་བརྙེས་པ་དང་། དེའི་ཐུགས་སུ་ཆུད་པའི་ཆོས་དང་། དེ་ལེགས་པར་རྟོགས་པའི་དགེ་འདུན་རྣམས་དུག་དང་བྲལ་བ་དང་། བྲལ་བར་བྱེད་པ་ཡིན་པས་དེ་དག་ལ་སྐྱབས་སུ་སོངས་ཤིག་དང་། དེའི་བདེན་པའི་སྟོབས་དང་སྔགས་དང་ཕྱག་རྒྱ་ཏིང་ངེ་འཛིན་རྣམས་ཀྱིས་བདེན་པའི་མཐུས་ཁྱོད་ཀྱི་རྒྱུད་ལ་ཡོད་པའི་ཉོན་མོངས་པ་སོགས་ཀྱི་དུག་རྣམས་སླར་མི་འབྱུང་བར་གཏན་ནས་དག་པར་གྱུར་ཅིག །ཅེས་བདེན་པའི་ཚིག་བརྗོད་པའི་སྒོ་ནས་སྦྱོངས་ཐབས་གསུངས་པའང་བསླུ་བ་མེད་པ་ཡིན་ཏེ། ལྷ་དང་དྲང་སྲོང་གིས་བཤད་པའི། །རིགས་སྔགས་བསླུ་བར་མི་འགྱུར་ན། །འདོད་ཆགས་བྲལ་བས་བཤད་པ་ཡི། །སྔགས་ཀྱི་སྦྱོར་བས་བསླུས་པ་ནི། མ་བྱུང་འབྱུང་བར་མི་འགྱུར་རོ། །ཞེས་སོ། །གསུམ་པ་བྲབ་རྫས་ཀྱིས་སྦྱོང་བ་ནི། ཡིག་བརྒྱ་དང་མི་འཁྲུགས་པའི་གཟུངས་དང་ངན་སོང་སྦྱོང་བའི་གཟུངས་སོགས་བཟླ་ཞིང་དེ་དག་གིས་བཏབ་པའི་བྱེ་མ་ཡུངས་དཀར་ལ་སོགས་ཀྱིས་རྟེན་ལ་བྲབ་པ་སྟེ། གཙུག་ཏོར་རྣམ་རྒྱལ་མའི་རྟོགས་པ་ལས་སེམས་ཅན་སྡིག་པ་བྱེད་པ་གང་དག་ཤི་བའི་དུས་བྱས་པ་དེ་དག་གི་དོན་དུ་གཟུངས་འདི་ཡུངས་དཀར་ལ་ལན་ཉི་ཤུ་རྩ་གཅིག་བརྗོད་དེ། དེ་དག་གི་རུས་གོང་རྣམས་ཀྱི་སྟེང་དུ་གཏོར་ན། དེ་དག་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ཡི་དྭགས་སམ། གཞན་ཡང་ངན་འགྲོ་རྣམས་སུ་སྐྱེས་པར་གྱུར་ཀྱང་རུང་སྟེ། དེ་དག་གཟུངས་འདི་ཡི་མཐུས་ངན་འགྲོ་དེ་དག་ལས་ཐར་བར་འགྱུར་རོ། །ཞེས་གསུངས་ལ་གཤིན་རྗེའི་འཇིག་རྟེན་ནི་བར་དོ་

པ་ལ་གསུངས་སོ། །དེས་མཚོན་པའི་རྒྱུད་སྡེ་དང་གཟུངས་ཀྱི་ཆོ་ག་མང་པོ་ལས་འབྱུང་ངོ་། དེ་དག་ནི་སྦྱོང་ཁྲུས་ཀྱི་སྒོ་ནས་སྡིག་པ་ཕྱིར་བཟློག་པའི་ཐབས་ཆོ་ག་སྤྱི་དང་མཐུན་པའོ། །ལྔ་པ་རྒྱུད་ལྔའི་ལྷ་ལ་སྐྱབས་སུ་འགྲོ་ཞིང་༔ ཚེ་འདས་རིགས་དྲུག་གནས་ནས་དྲངས་པ་ནི༔ ཞེས་པ་འདི་ནི་དོང་སྤྲུགས་སོགས་ལྟར་སྦྱོར་བ་སྡིག་སྒྲིབ་དག་བྱེད་ཀྱི་དབང་བསྐུར་བའི་ཚུལ་ལོ། །དེ་ལ་གསུམ་དང་པོ་གསོལ་བ་འདེབས་པ་ནི། ཚེ་འདས་ཀྱིས་སློབ་དཔོན་ལ་གསོལ་བ་འདེབས་པ། ཀྱཻ་མ་མགོན་པོ་ཐུགས་རྗེས་ཅན༔ སོགས་སོ། །གཉིས་པ་གདམས་ངག་སྦྱིན་པ་ནི། སླར་སློབ་དཔོན་གྱིས་བྲམ་ཟེ་དུང་ཕྲེང་གི་ལོ་རྒྱུས་བཤད་ནས། ཀྱཻ་མ་ཚེ་འཕོས་ལུས་བརྗེས་བར་དོའི་ཡིད་ལུས་ཁྱོད༔ སོགས་སོ། །གསུམ་པ་བསྐུར་ཚུལ་དངོས་ལ་རིགས་དྲུག་པོ་རེ་རེ་བཞིན་དུ་དོན་བརྒྱད་རེས་སྟོན་ཏེ། དང་པོ་ཀྱེ་མ་བདག་འདྲའི་སོགས་ཀྱིས་སློབ་དཔོན་ལ་གསོལ་བ་འདེབས་པ་དང་། གཉིས་པ་ཀྱེ་མ་ཚེ་འཕོས་ལུས་བརྗེས་སོགས་སློབ་དཔོན་གྱིས་གདམས་པ་བཞིན་རང་རང་གི་འདྲེན་པ་ཐུབ་པ་བཅོམ་ལྡན་འདས་རྣམས་ལ་སྐྱབས་སུ་འགྲོ་བ་དང་། གསུམ་པ་རང་ཚིག་བཞིན་ཐུབ་པ་རང་རང་གི་ཐུགས་ཕྱག་མཚན་གྱིས་དབང་བསྐུར་བ་དང་། བཞི་པ་ཞེ་སྡང་སྦྱོང་བའི་ལྷ་ཀུན་ཏུ་བཟང་པོ་རྡོ་རྗེའི་རིགས་ཀྱིས་སྒྲུབ་པའི་སྨན་ལྔའི་བུམ་པ་སོགས་རང་རིགས་ཀྱི་ཡིག་བརྒྱའི་ཤམ་བུ་བཅས་བུམ་པའི་དབང་ནི། རྒྱུད་ཉི་ཟླ་ཁ་སྦྱོར་ལས། གལ་ཏེ་དབུགས་དང་བྲལ་བ་ན། །ཕུང་པོའི་གནས་སུ་བུམ་པ་ཡི། །ཡེ་ཤེས་ཆུ་རྒྱུན་གྱིས་སྦྱང་ན། །དེ་ཡང་ཐེ་ཚོམ་མེད་པའོ། །ཞེས་གསོན་པོ་སྨོས་ཅི་དགོས་ཏེ་དབུགས་དང་བྲལ་བའི་རོའི་གནས་དེ་དང་དེར་རྒྱུད་ལྔའི་ས་བོན་གསལ་བར་བཀོད་དེ་བསྒྲུབ་པའི་བུམ་

ཆུས་སྦྱངས་ན་དེ་གནས་ནས་དྲངས་ནུས་པར་གསུངས་པ་འདི་མན་ངག་ཡིན་པས་གནད་ཤིན་ཏུ་ཆེའོ། །ལྔ་པ་གཏོར་མ་འདོད་ཡོན་ལྔ་དང་ལྡན་སོགས་ཀྱིས་རིགས་དྲུག་སོ་སོའི་ལན་ཆགས་སྦྱངས་ནུས་པར་བྱིན་གྱིས་བརླབས་པའི་གཏོར་མ་སྲོག་གཅོད་དང་རྐུ་འཕྲོག་སོགས་ལན་ཆགས་གཉེར་བའི་གསོན་བདུད་གཤིན་ལྕགས་སོགས་ལ་ཚིམ་པར་བསྔོ་བ་དང་། དྲུག་པ་འདོད་ཆགས་ཞེ་སྡང་གཏི་མུག་གསུམ་སོགས་དཀྱིལ་འཁོར་གྱི་ལྷ་རྡོ་རྗེའི་རིགས་རྣམས་ཀྱི་ཐུགས་ཀ་ནས་འོད་ཟེར་རླུང་གི་ཤུགས་དང་ལྡན་པའི་ཡེ་ཤེས་ཀྱི་མེ་འཕྲོས་པས་དམིགས་ཡུལ་གྱི་ཞེ་སྡང་གི་དབང་གིས་དམྱལ་བར་སྐྱེ་བའི་རྒྱུའམ་ས་བོན་རྐང་མཐིལ་དུ་ཡིག་ནག་པོ་རང་བཞིན་མེད་པའི་དབྱིངས་སུ་ཆོས་དབྱིངས་ཡེ་ཤེས་ཀྱི་ངོ་བོར་བསྲེགས་ཤིང་གཏོར་བར་དམིགས་པ་དང་། དེས་མཚོན་ཏེ་ནུབ་པདྨའི་རིགས་རྣམས་ཀྱིས་སེར་སྣ་ཡི་དྭགས་གསང་བའི་པྲེ་དམར་པོ་སོར་རྟོགས་དང་། ཤར་དེ་བཞིན་གཤེགས་པའི་རིགས་རྣམས་ཀྱིས་དུད་འགྲོའི་ལྟེ་བའི་ཏྲི་སྔོན་པོ་མེ་ལོང་ཡེ་ཤེས། བྱང་ལས་ཀྱི་རིགས་ཀྱིས་ཕྲག་དོག་ལྷ་མིན་ལྟག་རྩའི་སུ་སེར་པོ་བྱ་གྲུབ་ཡེ་ཤེས། ལྷོ་རིན་ཆེན་རིགས་ཀྱིས་ང་རྒྱལ་ལྷ་དཔྲལ་བའི་ཨ་དཀར་པོ་མཉམ་ཉིད་ཡེ་ཤེས། འོག་གཞིའི་ཁྲོ་དཀྱིལ་གྱིས་འདོད་ཆགས་མི་ཎི་ལྗང་གུ་ལྷན་སྐྱེས་ཡེ་ཤེས་ཀྱི་ངོ་བོར་སོགས། དམིགས་པ་གནད་ཆེ་ཞིང་བྲིས་པའི་ས་བོན་རེ་རེ་བཞིན་དུ་ལེན་པ་ཕྱག་བཞེས་ཡིན་ནོ། །བདུན་པ་ནི། འདི་ནི་བཟོད་པའི་རང་བཞིན་ཆུ་སོགས་ལས་བུམ་གྱི་ཆུ་དེ་དག་གིས་བག་ཆགས་ཀྱི་དྲི་མ་དག་པར་བཀྲུ་བའི་དམིགས་པ་དང་བཅས་པས་ཁྲུས་བྱའོ། །བརྒྱད་པ་ནི། ཧཱུྃ་ས་འདི་བཅད་པ་མན་ཆད་ནི༔ སོགས་ཀྱིས་ཕྱིར་མི་ལྡོག་པའི་ས་ཐོབ་པའི་རྟེན་འབྲེལ་བསྒྲིགས་བའོ། །དེ་ནས་ཡོན་ཏན་ཡར་འཕེལ་

གྱི་དབང་ལ། དྲུག་པ་དཀྱིལ་འཁོར་དུ་འཇུག་པ་ནི༔ ཞེས་འདི་ལ་དཀྱིལ་འཁོར་དུ་འཇུག་པ་དང་། ཞུགས་པ་ལ་དབང་བསྐུར་བའི་ཚུལ་གཉིས། དང་པོ་ལའང་དོན་དགུ། དམིགས་ཡུལ་ཉིད་ཀྱིས་དང་པོ་མཎྜལ་ཕུལ་ཏེ་སློབ་དཔོན་ལ། ཨེ་མ་མགོན་པོ་ཐུགས་རྗེ་ཅན༔ སོགས་ཀྱིས་དཀྱིལ་འཁོར་ཏུ་འཇུག་པའི་དོན་དུ་གསོལ་བ་བཏབ་པས། སློབ་དཔོན་རྡོ་རྗེ་སེམས་དཔའི་རྣམ་པ་ཅན་གྱིས། ཨེ་མ་ཚེ་འདས་བུ་ཁྱོད་སོགས་ཀྱིས་ཚེ་འདི་ཡི་འཇིག་རྟེན་དོན་དུ་གཉེར་བ་ལ་ཐར་པ་སོགས་འབྲས་བུ་ཆེན་པོ་མི་འབྱུང་བས་ཕ་རོལ་ཏེ། འཁོར་བ་ལས་ཐར་འདོད་དང་གཞན་དོན་གཉེར་བར་གྱིས་ཞེས་ཀུན་སློང་བཅོས་ཚུལ་གདམས་པའོ། །གཉིས་པ་དབང་གི་སྒོ་ཡོན་ཏན་ཐམས་ཅད་ཀྱི་གཞི་རྟེན་དམ་ཚིག་དང་སྡོམ་པ་རྩོལ་བར་དཀྱིལ་འཁོར་གྱི་ལྷ་ཚོགས་དང་སློབ་དཔོན་ལ་གསོལ་བ་འདེབས་པར་མོས་པས། ཀུན་བཟང་ཞི་ཁྲོའི་ལྷ་ཚོགས་དང་༔ སོགས་ཀྱིས་གསོལ་བ་བཏབ་པས་སློབ་དཔོན་གྱིས་རྟོག་པ་ཐམས་ཅད་ལེགས་པར་བསྡུས་ནས་ནི༔ སོགས་ཀྱིས་གཞན་དུ་མི་ཡེང་བར་ལྷག་པའི་བསམ་པ་བཟང་པོ་དང་ལྡན་པས་ཉོན་ལ་གདམས་ངག་མི་བརྗེད་པར་གྱིས་ཤིག་ཅེས་གདམས་ཤིང་བསམ་པ་མི་བཟང་བ་དང་གདམས་ངག་བརྗེད་པའི་ཉེས་དམིགས་ཡང་སྟོན་པའོ། །གསུམ་པ་བུ་ཁྱོད་ཤིན་ཏུ་སྐལ་བ་བཟང་༔ སོགས་ཀྱིས་ཕན་ཡོན་བརྗོད་པས་སྤྲོ་བ་བསྐྱེད་ཅིང་དབུགས་དབྱུང་ལ་འདི་དང་རྗེས་འབྲེལ་དུ་ཕྱག་འཚལ་བའི་ཚིག་བརྗོད་དེ་དམིགས་ཡུལ་གྱིས་ཕྱག་འཚལ་བར་མོས་པ་གནས་བསྡུས་སོགས་སུ་མཛད་པ་ནི་ཕན་ཡོན་དང་གནད་ཀྱང་ཆེ་སྟེ་བྱང་སྡོམ་གྱི་སྔོན་དུ་ཚོགས་བསགས་པར་གསུངས་པ་དང་ཡང་མཐུན་ནོ། །བཞི་པ་ནི། དཀྱིལ་འཁོར་གྱི་ལྷའི་སྤྱན་སྔར་སློབ་དཔོན་གྱིས་རྗེས་སུ་བཟློས་ནས་སྐྱབས་འགྲོ་སོགས་སྡོམ་པ་

ཐམས་ཅད་དམིགས་ཡུལ་དེས་བཟུང་བར་མོས་ཤིང་དེ་ལྟར་བྱེད་པའོ། །འདི་དག་གི་སྐབས་སུ་ཁ་ཅིག་གིས་བར་དོ་བ་དབང་གི་རྟེན་དུ་མི་རུང་ཞེས་པ་དང་། དབང་གི་སྔོན་དུ་སྡོམ་པ་འཛིན་པ་རྣམས་དེ་ལྟ་བུའི་རྒྱུད་ལ་མི་སྐྱེ་ཞེས་པ་དང་། བླ་མེད་གྱི་དབང་བསྐུར་མི་རུང་བ་དང་། བསྐུར་ཀྱང་ཐོབ་མི་ནུས་ཟེར་བ་སོགས་ནི་ཤིན་ཏུ་མ་རུང་བའི་དཔྱད་པ་སྟེ་ཆོ་ག་འདིས་མཚོན་གྲུབ་པའི་གཞུང་ཕལ་མོ་ཆེའི་དགོང་དོན་ཡིན་པ་དང་། རྡོ་རྗེ་གུར་ལས། རྡུལ་ཚོན་དཀྱིལ་འཁོར་བྲིས་ནས་ནི། །གཤིན་ལ་གསོན་བཞིན་དབང་བསྐུར་ན། །ངན་སོང་གསུམ་དུ་སྐྱེས་ན་ཡང་། །དེ་ཉིད་ཀྱིས་ནི་ཐར་བར་འགྱུར། །ཞེས་པ་དང་། དེ་མཐུན་སྦྱོང་རྒྱུད་སོགས་མང་པོ་ལས་གསལ་བར་བསྟན་ནོ། །འདི་དག་གི་འདོད་པ་མཐར་གཏུག་ན་སྔགས་ཀྱི་ཆོ་གས་རྗེས་སུ་བཟུང་བའི་གཤིན་པོ་ལ་ཐར་བ་ལྟ་ཅི་ནང་པའི་གྲལ་དུའང་ཚུད་པ་མེད་པ་དང་། བླ་མེད་ཀྱི་ལུགས་སུ་བར་དོ་འཚང་རྒྱ་བའང་མེད་དེ། འབྲས་བུ་དབང་བསྐུར་མི་རུང་ཞིང་། བསྐུར་ཀྱང་མི་ཐོབ་སྟེ་བར་དོ་བ་ཡིན་པའི་ཕྱིར་ཞེས་འདོད་དགོས་པ་དང་། གསང་བ་ཆེན་པོའི་ལམ་ལ་ལོག་པར་ལྟ་བའོ། །དེ་ཡང་སྤྱིར་སྔགས་ཀྱི་མཐུ་བསམ་གྱིས་མི་ཁྱབ་པ་དང་། ཁྱད་པར་གསང་སྔགས་ནི་ཐབས་མཁས་པ་དང་། ཐབས་མང་བ་དང་། དཀའ་བ་མེད་པའི་ཕྱིར་དང་། ཡང་དགོས་མཚན་ཐོས་ནས་ཕྱག་འཚལ་བ་ཙམ་གྱིས་རྣམ་པར་གྲོལ་བའི་ཡང་གསང་བླ་ན་མེད་པའི་དཀྱིལ་འཁོར་ཆེན་པོ་འདིའི་ཆོ་གའི་མཐུས། གཤིན་པོ་དེའི་རྒྱུད་ལ་སྔགས་ལས་ཕྱེ་བའི་སྡོམ་པ་དང་དབང་བསྐུར་ལེགས་པར་ཐོབ་ནས་རིག་པ་འཛིན་པའི་རྟེན་ཅན་དུ་གྱུར་ཏེ་སངས་རྒྱས་པ་སྒྲ་ཇི་བཞིན་དུ་བཤད་ན་ཐེ་ཚོམ་གྱིས་བསྐྱེད་པའི་ལོག་ལྟ་ལྡོག་པ་དང་། དད་པས་ཉམས་སུ་བླང་བའི་ཕན་ཡོན་ཐམས་

ཅད་འབྱུང་བ་ཡིན་ནོ། །ལྔ་པ་ཚེ་འདས་ལྷ་རུ་བསྐྱེད་གསུངས་པ་ཕྱོགས་འདིར་དབང་དངོས་ཀྱི་མགོར་བྱེད་པས་ༀ་བཛྲ་ཤྲཱི་ཧེ་རུ་ཀ་སོགས་ཀྱིས་དབང་ལེན་པ་ལ་བར་དུ་གཅོད་པའི་བགེགས་བསྐྲད། དམིགས་ཡུལ་གྱི་སྙིང་གར་ཟླ་དཀྱིལ་ས་བོན་ཡིག་བརྒྱ་བཀོད་ནས་ཡིག་བརྒྱ་བཟླ་ཞིང་བདུད་རྩིའི་རྒྱུན་གྱིས་དབང་མི་ཐོབ་པའི་སྡིག་པ་དག་པར་མོས་པའོ། །དྲུག་པ་དཀྱིལ་འཁོར་གྱི་སྒོ་དབྱེ་བ་ནི། སློབ་དཔོན་རང་ཉིད་རྡོ་རྗེ་སེམས་དཔའི་རྣམ་པས་སློབ་བུ་ཁྲིད་ནས་ཤར་སྒོའི་ཐད་དུ། ཧཱུྃ་དཀྱིལ་འཁོར་ཆེན་པོའི་ཤར་གྱི་སྒོ༔ སོགས་ཀྱིས་དང་པོ་ཕྱི་སྒོ་བསྲུང་བའི་སྒོ་བ་དང་ནང་གི་སྒོ་བ་ཡབ་ཡུམ་རྣམས་ལ་གསོལ་བ་བཏབ་པས་སྒོ་ཕྱེས་ཏེ་ལྷ་རྣམས་ལ་ཕྱག་འཚལ་ནས་གཡས་སྐོར་གྱིས་ལྷོ་དང་ནུབ་དང་བྱང་རྣམས་སུ་དེ་བཞིན་བྱའོ། །བདུན་པ་ནི། ཤར་སྒོར་དབང་སྟེགས་པདྨ་འདབ་བརྒྱད་ཀྱིས་མཚན་པའི་གདན་ལ་འདུག་སྟེ། ཧཱུྃ་བདག་ཅག་རིག་པའི་མེ་ཏོག་འདི༔ སོགས་ཀྱིས་ལས་འབྲེལ་བརྟགས་ཕྱིར་མེ་ཏོག་གི་ཅོད་པཎ་འབུལ་བ་དང་། བརྒྱད་པ་ཀུན་བཟང་རིགས་ལྔ་སོགས་ཀྱིས་སྒྲིབ་པའི་ངོ་བོའི་གདོང་གཡོག་བསལ་བ་དང་། དགུ་པ་ཀྱེ་མ་ཚེ་འདས་རིགས་ཀྱི་བུ༔ སོགས་ཀྱིས་དཀྱིལ་འཁོར་བསྟན་ཏེ་ཡོན་ཏན་བརྗོད་པས་སྤྲོ་བ་བསྐྱེད་དོ། །བདུན་པ་དབང་བཞི་ཡོངས་རྫོགས་བསྐུར་བ་ནི༔ ཞེས་པ་དབང་ཆོག་ལྟར་རོ། །བརྒྱད་པ་ཞིང་དུ་སྨོན་ལམ་གདབ་པ་འདི་ནས་ཤར་གྱི་ཕྱོགས་རོལ་ན༔ སོགས་ཀྱི་དོན་ནི་སྤྱིར་བསྐྱེད་བྱེད་ཀྱི་འབྱུང་ཁམས་རྣམས་དབྱིངས་སྟོང་པ་ཆེན་པོ་ཡུམ་གྱི་ངོ་བོར་རྣམ་པར་དག་པའི་ཞིང་ལྔར་ཡེ་ནས་དག་པ་དང་། བསྐྱེད་བྱའི་ཕུང་པོ་སྐྱེ་མཆེད་སོགས་བདེ་ཆེན་ཡེ་ཤེས་ལྔའི་རྒྱལ་བའི་ངོ་བོར་ཡེ་ནས་དག་པ་ལ། དེ་ལྟར་བསྒྲུབ་པའི་

ཆེད་དུ་། མངོན་པར་དགའ་བའི་ཞིང་ཁམས་ཡོད༔ ཅེས་གསུངས་ལ་ཞིང་དེ་ནི་ས་ཁམས་རྣམ་པར་དག་པའི་རང་བཞིན་གྱི་དབྱིངས་ཡིན་ལ་སྟོང་པ་ཆེན་པོ་དེ་ལ་ཤི་བ་ལ་སོགས་པའི་འདུས་བྱས་ཀྱི་འཕོ་འགྱུར་མེད་དོ། །སེམས་ཅན་སོགས་འཁོར་འདས་ཀྱི་སྲོག་ནི་ཡེ་ཤེས་འོད་གསལ་བའི་རྟེན་འབྱུང་བའི་དྭངས་མ་ལྔ་འདུས་པའི་མི་ཤིག་པའི་ཐིག་ལེ་ཡིན་ཞིང་། དེ་ཉིད་མཚོན་པའི་དབྱིངས་ཀྱི་ས་བོན་ཡི་གེ་སུཾ་ལ་སོགས་པ་ཡིན་པས་རང་བཞིན་དེ་དང་དབྱེར་མེད་པའི་དོན་དམ་པའི་བྱང་ཆུབ་མཆོག་ཏུ་སེམས་བསྐྱེད་ལ་ཞིང་མཆོག་དེ་དག་ཏུ་་སྐྱེས་ནས་སངས་རྒྱས་སྤྱན་མ་སོགས་དང་གཉིས་སུ་མེད་པར་སངས་རྒྱས་པར་ཤོག །ཅེས་དེ་བཞིན་དུ་ཞིང་གཞན་བཞི་ལའང་རིགས་འགྲེས་སོ། །འདིས་ནི་སྦྱང་བྱ་ངེས་པར་སྦྱོང་བའི་ངག་སྦྱོར་དང་། དོན་དམ་པའི་སེམས་བསྐྱེད་དང་། ཞིང་སྦྱོང་བ་དང་། སྨོན་ལམ་གདབ་པ་རྣམས་ལྷན་ཅིག་ཏུ་བསྟན་ནོ། །འདི་ལ་རྩོད་སྤོང་གསལ་བྱེད་སྐྱ་རེངས་ལས། ཐམས་ཅད་ས་ཡི་རང་བཞིན་ཏེ༔ ཞེས་སོགས་སྨྲོས་པ་ལའང་སྐྱོན་ཅི་ཞིག་ཡོད་དེ། ས་ཡི་རང་བཞིན་གང་ཡིན་པ་དེ་ནི་ཆོས་ཐམས་ཅད་ཀྱི་རང་བཞིན་ཀྱང་ཡིན་པའི་ཕྱིར་རོ། །དེ་སྐད་དུ་བཅོམ་ལྡན་འདས་ཀྱིས་རྒྱལ་བའི་ཡུམ་དུ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ལ་རང་བཞིན་དབྱེར་མེད་པར་གསུངས་པའི་དོན། སློབ་དཔོན་འཕགས་པའི་ཞལ་སྔ་ནས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གསུངས། །ཞེས་གསལ་བར་མཛད་པ་ལྟར་ཡིན་ནོ། །དེས་ན་སྟོང་ཉིད་སྐྱེ་ཤི་ལ་སོགས་པ་མེད་པའི་རྒྱུ་མཚན་སྟོང་གཞིའི་སྒྲས་བརྗོད་པ་སྟེ། ཤེས་རབ་སྙིང་པོ་ལས། གཟུགས་ལས་

ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ཞེས་སོགས་གསུངས་པའི་དགོངས་པ་དང་མཐུན་ནོ། །ཞེས་སོ། །དགུ་པ་ནད་དང་སྒྲིབ་པ་བསལ་བ་ནི། ཀྱཻ་མ་མུན་པ་ལྟ་བུའི་འཇིག་རྟེན་ཁམས་གསུམ་འཁྱམས༔ སོགས་ཀྱི་ཚིག་འདི་དག་གོ་སླ་ལ་འདིས་ནི་ཟས་གཏད་དུ་གྲགས་པའི་འདོད་ཡོན་ལྔ་བསྔོ་བའི་ཚུལ་ཁྱད་པར་ཅན་ཞིག་བསྟན་ནོ། །ལུགས་འགའ་ཞིག་ལ་འདིའི་ཚིག་ལྟར་འདོད་ཡོན་ལྔ་སོ་སོར་གཏད་པའི་ཚུལ་གྱིས་དེ་ལྟར་བྱེད་པའི་སྲོལ་སྣང་བ་ནི་དོན་ལ་འབྱོར་རོ། །བཅུ་པ་ལམ་བསྟན་གནས་སྤར་བྱ་བ་ནི། འོད་གསལ་ཡེ་ཤེས་ཀྱི་སྣང་བ་མཚོན་པའི་མར་མེ་བསྟན་ནས་སྨོན་ལམ་བཏབ་པ་དང་། རྒྱལ་བ་རིགས་ལྔ་ལ་ཕུང་པོ་ཡོན་དུ་འབུལ་བ་སྔོན་དུ་འགྲོ་བས་སྤར་ཚུལ། དབང་ཆོག་འགའ་ཞིག་ལྟར་མདའ་གཞུ་སྦྱར་བའི་ཚུལ་གྱིས་མཚོན་པར་གསུངས་ཏེ། དཔེར་ན་གཞུ་དང་རྒྱུད་འཛོམས་པར་མདའ་བཀང་སྟེ་སྐྱེས་བུའི་འཐེན་ཤུགས་ཀྱིས་འཕང་པས་དབང་མེད་དུ་འགྲོ་བ་ལྟར། ཐབས་རྟེན་འབྲེལ་ཟབ་མོའི་ཆོ་ག་དང་། སྟོང་ཉིད་རྟོགས་པའི་ཤེས་རབ་སྙིང་རྗེའི་དབང་དུ་གྱུར་པའི་ཤུགས་ཀྱིས་འཕེན་བྱེད་ཕཊ་ཀྱིས་སྦྱོར་བས་བླ་ན་མེད་པའི་ཞིང་དུ་གནས་སྤར་བའོ། །ཞིང་ཁམས་འདི་ནས་ཤར་གྱི་ཕྱོགས་རོལ་ན༔ སོགས་ནི། མེ་ཏོག་བབས་པའི་རིགས་ལྔ་གང་ཡིན་གྱི་གནས་རང་བཞིན་སྤྲུལ་པའི་ཞིང་ལྔའི་ནང་ནས་རིགས་ཀྱི་གཙོ་བོ་དེའི་དྲུང་དུ་དང་པོ་སྤར་ནས་སྟོན་པ་དེའི་ཞལ་མཐོང་དབང་བསྐུར་ཞིང་། ཞིང་གཞན་བཞིར་ཕྱིན་ཏེ་ལམ་སྦྱང་ནས་སླར་གཙོ་བོ་དེའི་རིགས་སུ་སངས་རྒྱས་དགོས་ཕྱིར་གཟུགས་ཕུང་གི་ངོ་བོ་ༀ་དཀར་པོ་སོགས་གསུངས། ལོ་ཆེན་ཕྱོགས་ཀྱི་ལུགས་ནི། དངོས་སུ་ཁྱབ་བྱེད་ཀྱི་ཞིང་སྡུག་པོ་བཀོད་

པར་གནས་སྤར་བས། ཞར་ལ་ཁྱབ་བྱ་ཕྱོགས་བཞིའི་དེ་བཞིན་གཤེགས་པ་བཞིའི་ཞིང་ཁམས་སུ་རིགས་ཀྱི་གཙོ་བོ་རྣམས་ཀྱི་སྤྱན་སྔར་སོང་ནས། ཞལ་མཐོང་། དབང་བསྐུར། ལུང་བསྟན། དབུགས་དབྱུང་སྟེ། དབུས་རྡོ་རྗེ་སེམས་དཔའི་སྲས་སུ་མངོན་པར་བྱང་ཆུབ་པའི་ཡེ་ཤེས་བརྙེས་པར་བསམ་ཞེས་གསུངས་སོ། །སྐབས་འདི་ལ་ཡང་གསལ་བྱེད་སྐྱ་རེངས་ལས། ཅི་རྣམ་པར་སྣང་མཛད་ཡབ་ཡུམ་གྱི་སྦྱོར་མཚམས་སུ་འཕངས་པའི་གཟུགས་ཀྱི་ཕུང་པོ་དེ་ལ་ཚོར་བ་སོགས་ཕུང་པོ་གཞན་ཡོད་དམ་མེད། གལ་ཏེ་མེད་ན་དེར་འཕངས་པར་དོན་མེད་དུ་ཐལ་ཏེ། བདེ་སྡུག་ལ་སོགས་མྱོང་བ་མེད་པའི་ཕྱིར་དང་། གལ་ཏེ་ཡོད་ན་ཡང་གཟུགས་ཀྱི་ཕུང་པོ་སོགས་དམིགས་ཀྱིས་བསལ་ནས་སྨྲས་པ་དོན་མེད་དུ་ཐལ་ལོ། །ཞེས་ཕྱོགས་སྔ་མ་ངེས་པའི་རྒོལ་བ་བྱེད་པ་དང་། དེ་ལ་གྱ་ཚོམ་དུ་སྨྲས་པ་ཁ་ཅིག་ལན་ཕྱིན་ཅི་ལོག་ཏུ་འདེབས་པ་སོགས་མང་དུ་སྣང་ཡང་། འདི་དག་ཐམས་ཅད་གཞུང་འདི་ཉིད་ཀྱི་དགོངས་པ་ཇི་ལྟ་བུ་ཡིན་མ་རྟོགས་ཤིང་མ་བརྟགས་པར་སྨྲ་བ་ཁོ་ན་སྟེ། འདི་ལྟར་གཞུང་འདིར་ནི་ལམ་དུས་སུ་གང་ཟག་གཅིག་གི་རྒྱུད་ཀྱི་རྟོག་པ་མཐའ་དག་རྒྱལ་བ་རིགས་ལྔའམ། དམ་པ་རིགས་བརྒྱའི་ངོ་བོར་བསྒྲུབ་ནས་རྟོག་པ་མ་ལུས་པ་དག་ནས་འབྲས་བུ་རྡོ་རྗེ་སེམས་དཔའ་གསང་ཆེན་རིགས་གཅིག་གི་བདག་ཉིད་མངོན་དུ་བྱེད་པར་འདོད་པ་སྟེ། དེས་ན་ཤར་ལ་སོགས་པ་དེ་དག་སེམས་ཅན་རྣམས་ཀྱི་ཕྱོགས་དང་གནས་ཡུལ་ལ་བདེན་པར་བཟུང་བའི་རྟོག་པ་དེ་དང་དེ་ཉིད་དག་པའི་ཆེད་དུ་གསུངས་པ་ལས། དོན་ལ་དེ་དག་བདེན་པར་གྲུབ་པ་མེད་པའི་ཚུལ། ལས་བྱང་གི་བྲོ་བརྡུང་སྐབས་སུའང་། ཕྱོགས་མེད་ཕྱོགས་དང་བྲལ་བའི་ཤར་ཕྱོགས་སུ༔ སོགས་གསུངས་པས་ཀྱང་བསྟན་པ་ཡིན་ནོ། །དེ་བཞིན་དུ་གཟུགས་ཕུང་ལ་སོགས་

སྦྱང་གཞིའི་རྟོག་པ་དེ་དང་དེ་རང་རང་དག་འབྲས་ཀྱི་ཀློང་དུ་ཏིང་ངེ་འཛིན་ཟབ་མོས་རྒྱས་འདེབས་པ་ལ་གནས་སྤར་གྱི་ཐ་སྙད་སྦྱོར་བ་ལས། ཕྱོགས་ག་ཤེད་ནས་ག་ཤེད་དུ་སོང་བ་ནི་ཅི་ཡང་མེད་དོ། །འདི་ཡང་བཅོམ་ལྡན་འདས་ཀྱིས། མདོ་སྡེ་ནས་སྐྱེ་འཇིག་ལ་སོགས་པའི་རྟེན་འབྲེལ་གྱི་སྐབས་སུ་འཕོ་བ་མེད་པ་ཞེས་རྒྱུ་འགག་པའི་རྐྱེན་གྱིས་འབྲས་བུ་འབྱུང་བ་སྲང་མདའི་མཐོ་དམན་ལྟ་བུ་ལས་རྒྱུ་འབྲས་ལ་འགྲོ་འོང་མེད་པར་གསུངས་པ་དང་གནད་གཅིག་གོ་ཞེས་གསུངས་སོ། །དེ་དག་དང་རྗེས་འབྲེལ་དུ་བྱང་བུ་བསྲེགས་ནས་སཙྪ་འདེབས་ཚུལ་བཅས་ལེགས་པར་གསུངས་སོ། །བརྒྱད་པ་དབང་ནི། ཚུར་ཤོག་ཚུར་ཤོག་རིགས་ཀྱི་བུ༔ སོགས་ནས་དབང་ཆོག་འབྲིང་པོའམ། རྒྱས་པ་ལྟར་རོ། །གཞུང་འདི་ལས། གཤིན་ལ་གསོན་བཞིན་དབང་བསྐུར་ན༔ སོགས་དང་མཚུངས་པར་དང་པོ་སྐུ་གསུང་ཐུགས་དབང་དང་། དབང་བཞི་ཡོངས་རྫོགས་མཐའ་རྟེན་བཅས་བསྐུར་བར་གསུངས་པའི་དང་པོ་ནི། སྐུ་གསུང་ཐུགས་ཀྱི་དབང་མཆོག་རྣམས་ཞེས་པའི་ཚིག་ལ་འཐུས་པ་འདྲ་མིན་ན་རྒྱས་པ་ལྟར་མི་འབྱུང་ངོ་། །མཆོག་དབང་གོང་མ་ནི་གཞུང་འདིས་བསྟན་པ་བཞིན་དེང་སང་བསྐུར་བའི་ཕྱག་ལེན་མཛད་པར་མི་འདུག་གོ །།འདིའི་འཕྲོས་དོན་ལ་གསུམ། དང་པོ་ཆོ་གས་ཕན་འདོགས་ཡུལ་བར་དོའི་ཚུལ་ནི། དེ་ཡང་བར་དོ་བཞིའམ་དྲུག་ལ་སོགས་པའི་དབྱེ་བ་གསུངས་པ་ཁྲིད་གཞུང་དང་ཐོས་གྲོལ་ངོ་སྤྲོད་ལྟར་ཡིན་ཀྱང་ལམ་དང་མ་འཕྲད་པའམ། འཕྲད་ཀྱང་འཁྲུལ་དབང་དུ་ཤོར་བས་གཞིའི་དཀྱིལ་འཁོར་ཆོས་དབྱིངས་ཀྱི་རང་སྣང་ཤར་བ་ངོས་མ་ཟིན་ཅིང་བརྟན་པ་མ་ཐོབ་པའི་དབང་གིས་སྲིད་པ་བར་དོར་འཁྱམས་པ་ནི་སྐབས་

འདིར་གཤིན་པོ་ཞེས་ཆོ་གས་རྗེས་སུ་འཛིན་པའི་ཡུལ་ཡིན་ལ། དེ་ནི་སྤྱོད་བསྡུས་ལས། ཡང་དོན་དམ་པའི་བདེན་པའི་དཀྱིལ་འཁོར་ལ་འཇུག་པའི་རིམ་གྱིས་ཕུང་པོ་ཡོངས་སུ་སྤངས་ཏེ་རླུང་གི་ཁམས་ཀྱིས་བླངས་ནས་ཚོར་བ་དང་ལྡན་ཅིང་སྲེད་པས་རྗེས་སུ་བཅིང་པ། ཆོས་ཀྱི་དབྱིངས་ཀྱི་རྒྱུ་མཐུན་ལས་བྱུང་བའི་དྲན་པས་ཡོངས་སུ་བཟུང་བ། དགེ་བ་དང་མི་དགེ་བའི་རྣམ་པའི་ཡིད་དང་ལྡན་པས་བྱིས་པ་ལོ་ལྔ་དང་མཉམ་པ་ཐམས་ཅད་མཐོང་བ། དབང་པོ་ཐམས་ཅད་ཚང་བ། དྲི་ཟའི་ཟས་ལ་སྤྱོད་པ། རྡོ་རྗེ་ལ་སོགས་པས་མི་ལྡོག་པ། མཚན་ཉིད་ཐམས་ཅད་དང་ལྡན་པ། ལས་ཀྱི་རྫུ་འཕྲུལ་གྱི་ཤུགས་དང་ལྡན་པ། ཉི་མ་བདུན་གྱིས་འཕོ་བའི་བར་ལ་གནས་ནས། རང་གི་རྣམ་པར་རྟོག་པ་ལས་བྱུང་བའི་ལས་དགེ་བ་དང་མི་དགེ་བས་བསྐྲུན་པར་གྱུར་པའི་རྒྱུ་དང་རྐྱེན་ཐོག་ནས་འགྲོ་བ་ལྔ་རྣམས་སུ་ཟོ་ཆུན་གྱི་འཁྲུལ་འཁོར་གྱི་ཚུལ་གྱིས་ཡང་དང་ཡང་དུ་ཉིང་མཚམས་སྦྱོར་བ་ལེན་པར་བྱེད་ཅིང་། འཁོར་བའི་སྡུག་བསྔལ་རྗེས་སུ་མྱོང་བར་འགྱུར་རོ། །ཞེས་གསུངས་པ་མཛོད་དང་སྤྱི་ཁོག་མཐུན་མོད་ཀྱང་ཁྱད་པར་ཆེའོ། །དེ་ལ་དང་པོ་སྔོན་གྱི་བག་ཆགས་ལུས་ཀྱི་སྣང་བ་ཡུད་དེ་བ་འཆར། དེ་ནས་རིམ་གྱིས་ཇེ་མི་གསལ་དུ་སོང་ནས་ཕྱི་མའི་ལུས་སྣང་འཆར་བར། དུས་འཁོར་འགྲེལ་ཆེན་ལས་བཤད། དེ་ནས་ཞག་བདུན་གྱི་ཕྱེད་དང་བཞི་ཚུན་ཆད་ལ་སྔ་མའི་ལུས་སྣང་དང་དེ་ཕན་ཆད་ལ་ཕྱི་མའི་ལུས་སྣང་འཆར་བར་རྒྱུད་ཀྱི་ལུང་དྲངས་ནས་འདིའི་བར་དོའི་ངོ་སྤྲོད་ལས་གསུངས། སྔོན་གྱི་ཉེ་འབྲེལ་དང་གྲོགས་ལ་སོགས་པ་རྨི་ལམ་གྱི་ཚོད་ཙམ་དུ་མཐོང་བར་ཆོས་མངོན་པ་ལས་བཤད་པར་གསུངས། སྐྱེ་གནས་དང་དྲི་འཚོལ་ཕྱིར་ཀུན་ཏུ་རྒྱུ་བ་ལས་ཀྱི་ཁྱད་པར་བཞིན་འཁྲུལ་སྣང་ངེས་མེད་དུ་འཆར་ཞིང་རྒྱུད་མི་བརྟན་ལ། ཚེ་ཚད་རིང་

མཐའ་ཞག་བདུན་ཡིན་ལ་སྐྱེ་སྲིད་དུ་སྐྱེ་མ་ནུས་ན་བརྒྱལ་བ་ལྟ་བུའི་འཆི་ཆུང་རེ་བྱས་ནས་སླར་བར་དོར་སྐྱེས་ནས་ཞག་བདུན་རེའི་ཚུལ་གྱིས་སྐྱེ་སྲིད་འཛིན་ཅིང་། སྐྱེ་བའི་རྐྱེན་གྱི་ཚོགས་པ་མ་རྙེད་ན་ཞག་ཞེ་དགུའི་བར་རིང་ཚད་ཡིན་ཞིང་དེ་ནས་སྐྱེ་གནས་ངེས་པར་རྙེད་དོ། །ཞེས་འབྱུང་ངོ་། །གཉིས་པ་དེ་ལྟ་བུའི་བར་སྲིད་ལ་ཆོ་གས་ཕན་ཐོགས་ཚུལ་ནི། དེ་ཡང་བདེན་པའི་སྟོབས་སོགས་ཀྱིས་ཕུང་པོ་དང་མིང་བྱང་སོགས་རྟེན་ལ་བར་དོ་བ་དེ་འགུགས་པའི་ཐབས་ཀྱིས་ཁུག་ཅིང་དེར་འཇུག་པར་བྱེད་ཀྱང་ནུས་ཏེ། ཆོ་ག་རྣམས་ལས་དེའི་ཚུལ་གསུངས་པ་དང་། བར་དོ་བ་དེ་ཐོགས་མེད་དུ་རྒྱུ་ཞིང་རྫུ་འཕྲུལ་གྱི་ཤུགས་དང་ལྡན་པ་དང་། ཤིན་ཏུ་དྭངས་པའི་ལུས་ཅན་ཡིན་པས་རྡོ་རྗེ་སོགས་སྲ་བ་རྣམས་ལའང་འཇུག་པ་ལ་ཐོགས་པ་མེད་པར་གསུངས་པ་དང་། སྔགས་ཀྱི་མཐུ་བསམ་གྱིས་མི་ཁྱབ་པའི་ཕྱིར་རོ། །དེ་བཞིན་དུ་སྔགས་དང་ཕྱག་རྒྱའི་མཐུས་ཆོ་ག་རྫོགས་ཀྱི་བར་དུ་བརྟན་པར་ཡང་འགྱུར་ཏེ། དཔེར་ན་དྲི་ཟ་བའི་འབྱུང་པོའི་གདོན་ཁོག་ཏུ་ཞུགས་པ་ལ་སྔགས་སོགས་བཏབ་པའི་སྲད་བུ་བཏགས་པས་དེ་མ་བཀྲོལ་བར་འགྲོ་མི་ནུས་པ་ཡང་འགའ་ཞིག་ལ་མངོན་སུམ་མོ། །བར་དོ་བ་སྔར་རྣམ་ཤེས་དང་བྲལ་བའི་རྙིང་མའི་ལུས་ལ་འཇུག་མི་འདོད་པའང་གསུངས་ལ་ལུས་སྲེད་ཀྱིས་འཇུག་འདོད་པ་ཡང་གསུངས་མོད། ཆོ་ག་དང་སྔགས་ཀྱི་མཐུས་འཇུག་ནུས་ཏེ། སྨན་བླའི་མདོ་ནས་དེའི་ཆོ་གའི་མཐུས་ཞག་བཞི་བཅུ་རྩ་དགུ་ནས་ཀྱང་སླར་ལོག་ཅིང་བར་དོ་སོགས་ཀྱི་འཇིགས་པ་མཐོང་སྟེ་སྔར་ལས་ཀྱང་སྤང་བླང་བྱེད་པར་གསུངས་སོ། །ཞག་སྔ་མའི་དུས་རྣམས་སུ་སྔོན་གྱི་ལུས་སྣང་འཆར་བར་གསུངས་པས་ནི། བར་དོ་ངོ་སྤྲོད་ཀྱི་ཆོས་བཤད་སོགས་གོ་ནུས་པ་རིས་མཐུན་གྱི་བག་

ཆགས་སྔ་མ་སྣང་བའི་དབང་གིས་ཡིན་ཏེ། དེ་ལྟར་མིན་ན་གནས་རིགས་སོ་སོ་བར་གྱུར་ནས་མི་དང་དུད་འགྲོའི་གཏམ་ལབ་པ་བཞིན་འགྱུར་བ་ཁས་ལེན་དགོས་པས་དེ་དག་ཐམས་ཅད་དགོས་པ་མེད་པར་སྨྲ་བས་ལོག་ལྟ་ཆེན་པོའོ། །མཛོད་ལས་མི་ལྡོག་དེ་ནི་དྲི་ཟའོ། །ཞེས་འགྲོ་བ་གང་ཡིན་པའི་བར་དོ་གྲུབ་ན་དེ་ནས་སྐྱེ་བ་གཞན་དུ་བཟློག་ཏུ་མེད་པར་བཤད། ཐེག་ཆེན་གྱི་ལུགས་ལ་ལྡོག་པའང་གསུངས་ཏེ། ས་སྡེ་ལས། ཞག་བདུན་གྱིས་ཤི་འཕོས་པ་དེ་ཡང་ན་ནི་དེ་ཉིད་དུ་མངོན་པར་འགྲུབ་པར་འགྱུར་རོ། །ཡང་ན་ནི་སྐལ་བ་མི་མཉམ་པ་གཞན་དུ་སྟེ། གལ་ཏེ་ལས་གཞན་གྱི་བྱ་བ་ཡོངས་སུ་གྱུར་པས་བར་མ་དོའི་སྲིད་པའི་ས་བོན་ཡོངས་སུ་འགྱུར་བར་བྱེད་པའི་ཕྱིར་རོ། །ཞེས་དགེ་བ་སོགས་ལས་གཞན་གྱི་རྐྱེན་དང་འཕྲད་ན་ངན་སོང་དུ་འགྲོ་ངེས་པའི་བར་དོ་ཡང་སྐྱེ་གནས་བཟང་པོ་གཞན་དུ་འགྱུར་བར་བྱེད་ཅེས་པའི་དོན་ཡིན། སྔགས་ལས་ནི། ངན་སོང་དུ་སྐྱེས་ཟིན་ན་ཡང་སྔགས་ཀྱི་མཐུས་མྱུར་དུ་ཐར་བར་གསུངས་ན་བར་དོ་བ་སྨྲོས་ཅི་དགོས། དེའི་ཕྱིར་ན་དེང་སང་ཡོངས་གྲགས་ལ་དགུང་ཞག་ཞེ་དགུ་ཞེས་ཞག་བདུན་ཕྲག་བདུན་དུ་ཆོ་ག་བྱེད་པ་སོགས་དགེ་བ་ལ་འབད་དགོས་པར་དམ་པ་ཐམས་ཅད་གྱིས་བཞེད་པར་མཐུན་ནོ། །དེ་བཞིན་དུ། ཇོ་བོ་ཆེན་པོས། ཆུས་ཁྱེར་ཅོ་འཐེན་ཞེས་དཔེར་ན་ཆུས་ཁྱེར་བའི་མི་ལ་སྐམ་སར་ཡོད་པས་སྐྲའམ་གོས་སོགས་གང་ནས་ཅུང་ཟད་འཐེན་ཀྱང་སྐམ་སར་ནར་གྱིས་དྲངས་པ་ལྟར། ལས་རླུང་དྲག་པོས་དབང་མེད་དུ་དེད་ནས་མགོན་མེད་བར་དོའི་འགྲོ་བ་དེ་ལ། ཤུལ་དུ་འདུག་པའི་ཉེ་དུའི་འབྲེལ་བ་རྣམས་ཀྱིས། དེའི་དོན་དུ་སྡིག་པ་དང་མ་འདྲེས་པའི་དགེ་བ་ལ་འབད་ན། དགེ་རྩ་དེ་དག་དེའི་ཕྱི་

བཞིན་དུ་འབྲངས་ནས་སྡུག་བསྔལ་ལས་ཐར་བར་གསུངས་པ་དང་། དེའི་དོན་དུ་སྲོག་གཅོད་སོགས་བྱས་ན་གཏིང་རྡོ་བཏགས་ནས་རྡོག་པས་འཕུལ་བའི་དཔེས་དེ་ངན་འགྲོར་འཕེན་པ་སོགས་མང་དུ་གསུངས་པས་ན་གཤིན་པོ་དེ་ལ་ཕན་ཞིག་འདོགས་འདོད་ན་ནི་སྲོག་གཅོད་གཏན་ནས་མི་རུང་ངོ་། །དགེ་རྩ་བྱེད་པ་ལ་ཡང་། ཆོས་རྒྱུད་ཀྱི་འབྲེལ་བ། རིགས་རྒྱུད་ཀྱི་འབྲེལ་བ། རྒྱུ་རྫས་ཀྱི་འབྲེལ་བ་དང་གསུམ་གྱི་གང་རུང་ཡོད་དགོས་པར་གསུངས་པའང་ཤེས་པར་བྱ་བ་གནད་དུ་ཆེའོ། །དེ་བཞིན་དུ་ཟས་གཏད་ཅེས་གཤིན་པོ་ལ་འདོད་ཡོན་བསྔོ་བའི་ཚུལ་ལ་དགོས་པ་ཡོད་པ་དང་། མེད་པར་སྨྲ་བའི་ཕྱོགས་མང་ཡང་། འཇིག་རྟེན་རང་ག་མའི་སྲོལ་འགའ་ཞིག་ལས་གཤིན་པོའི་རོའི་དྲུང་ངམ་དུར་ས་སོགས་སུ་དེའི་ཟས་སྐལ་གྱི་བཟའ་བཏུང་རྣམས་བསྒྲིགས་ཏེ་མིང་ནས་འབོད་པ་སོགས་བྱ་ཞིང་། དེ་ལ་སྟེར་ཚུལ་དང་། འགའ་ཞིག་གོས་རྒྱན་རིན་ཆེན་སོགས་རོ་དང་ལྷན་ཅིག་ཏུ་སྦས་ནས་དེ་གཤིན་པོ་དེས་ཐོབ་ཅིང་དེས་ཀྱང་དེ་དག་ལ་སྤྱད་སྙམ་པ་ལ་དེ་ལྟར་མེད་ཅིང་དེ་དོན་ལ་མི་གནས་པར་གསུངས་ཏེ། ཚེ་འཕོས་པ་ཇི་ལྟར་འགྱུར་བ་ལུང་བསྟན་པའི་མདོ་ལས། ཚེ་འཕོས་པ་སྐྱེ་བ་མི་ལེན་པར་གཤིན་པོའི་འཇིག་རྟེན་ན་ཡོད་ན། བཟའ་བཏུང་དང་བཞོན་པ་དང་གོས་རྒྱན་དག་བདོག་པར་བྱེད་པ་ནི་མ་ཡིན་ནོ་ཞེས་དང་། ཀྱེ་རྒྱལ་པོ་ཆེན་པོ་ཚེ་མ་འཕོས་པའི་ཕ་སྤད་དང་སྤུན་གཅིག་ལ་ཉེ་འབྲེལ་འཛིན་པ་ཕན་པར་འདོད་པ་རྣམས་ད་ལྟ་མ་ཤི་བ་ལུས་དང་ལྡན་པ་ཡང་གཅིག་ཡུལ་གཞན་དུ་སོང་ན། དེ་ལ་ཕའམ་མའམ་བུའམ་སྤུན་གང་ཡང་རུང་བས་ཟས་སྐོམ་མང་པོ་སྦྱིན་ནོ་གསོལ་ལོ་ཞེས་བསྔོས་པ་ཡང་། ཡུལ་གཞན་དུ་སོང་བའི་རྨི་ལམ་དུ་ཡང་མི་འབྱུང་ན་དངོས་སུ་ཟ་ཞིང་འཐུང་བ་ལྟ་ག་ལ་ཡོད། ཚེ་འཕོས་

ནས་ལུས་དང་བྲལ་བ་ལ་བསྔོས་ཤིང་གཏད་པ་ཟ་ཞིང་འཐུང་བ་ལྟ་ག་ལ་ཡོད། ཅེས་དཔེ་དང་བཅས་གསལ་བར་གསུངས་སོ། །འདིར་ནི་དེ་ལྟ་མ་ཡིན་ཏེ། གསང་སྔགས་ཀྱི་ལམ་དང་འབྲེལ་བའི་ཆོ་ག་ཟབ་མོའི་ཐབས་སྔགས་དང་ཕྱག་རྒྱ་ཏིང་ངེ་འཛིན་གྱིས་བྱིན་གྱིས་བརླབས་ཏེ་སྙིང་རྗེས་ཟིན་པའི་སྒོ་ནས་ཡུལ་དེ་ལ་ཕན་གདོགས་པའི་བསམ་པས་འདོད་ཡོན་གསུར་བསྔོས་ཀྱི་ཟས་གཏད་ནི་བསྔོ་ཡུལ་གཤིན་པོ་དེས་ཐོབ་ནས་དེ་ལ་སྔར་བཤད་ལྟར་རྨི་ལམ་རྨིས་པའི་ཚོད་ཙམ་དུ་དྲི་ཁོ་ན་ལས་ཕྱེ་བའི་འདོད་ཡོན་ལྔར་སྣང་བ་ལ་ལོངས་སྤྱོད་དེ། མཛོད་ལས། དྲི་ཟ་སེམས་ཅན་བར་མའོ། །ཞེས་དེ་དྲི་ཟས་སུ་ཟ་བའི་རིགས་ཡིན་པ་དང་། དྲི་ཚོལ་བའི་ཕྱིར་རྒྱུ་བ་དང་། དབང་པོ་ཀུན་ཚང་བར་བཤད་པས་སོ། །ཁྱད་པར་གསང་སྔགས་ཟབ་མོ་འདི་ལས། ཀྱེ་མ་མུན་པ་ལྟ་བུའི་འཇིག་རྟེན་ཁམས་སུ་འཁྱམས༔ སྡུག་བསྔལ་ཉམས་ཐག་འོ་དོད་འབོད་པ་ཁྱོད༔ རྒྱལ་སྲས་ཐུགས་རྗེས་ཅན་གྱིས་སྐྱོབས་པར་ཤོག༔ ཅེས་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཡེ་ཤེས་ལྔའི་རང་བཞིན་ཅན་གྱི་རྒྱལ་སྲས་ས་སྙིང་ནམ་སྙིང་སྤྱན་གཟིགས་ཕྱག་རྡོར་སྒྲིབ་སེལ་རྣམས་ཀྱི་ཐུགས་རྗེའི་བདེན་སྟོབས་ཀྱིས་བསྔོས་པའི་འདོད་ཡོན་ལྔས་གཤིན་པོའི་བག་ཆགས་ཡིད་ལུས་ཀྱི་མིག་ཤེས་སོགས་ལ་ལོག་པར་མཐོང་བའི་སྐྱོན་ལ་ནད་ཅེས་སྒྲིབ་པ་རྣམས་བསལ་ནས་ཟག་མེད་ཀྱི་ཡུལ་ལྔའི་བདེ་བ་ལ་སྤྱོད་པར་ཤོག་ཅིག །ཅེས་རབ་ལྷག་པའི་བདེ་སྟོང་དབྱེར་མེད་ཆེན་པོའི་ངོ་བོ་དང་། འབྲིང་རྒྱལ་སྲས་སེམས་དཔའ་ཆེན་པོ་ལྔ་ཐུགས་རྗེས་འོད་དུ་ཞུ་བ་ལས་བྱུང་བ་དང་། ཐ་མའང་རྒྱལ་སྲས་སེམས་དཔའ་ལྔའི་བདེན་པ་ལ་ཡིད་ཆེས་པར་བྱས་ནས་བསྔོས་པས་དེའི་ཤེས་རྒྱུད་ངོམས་ཤིང་ཚིམ་པར་གྱུར་ནས་འཁོར་བའི་རྒྱུ་སྲེད་ལེན་གྱི་ཞེན་

པ་ཐམས་ཅད་དང་བྲལ་ནས་རིག་པ་འཛིན་པའི་ཞིང་དུ་སྐྱེ་བའི་དགོས་པ་ཡོད་དོ། །མདོ་རྒྱུད་གང་ནས་ཀྱང་སྔགས་དང་ཕྱག་རྒྱ་སོགས་ཀྱིས་བསྔོས་ཀྱང་མི་ཕན་པར་མ་གསུངས་པ་དང་། དེ་ལྟ་བུའི་ཆོ་ག་ལ་ཕན་ཡོན་དང་ནུས་པ་ཆེ་བར་གསུངས་པ་དང་། རྣལ་འབྱོར་གྱི་དབང་ཕྱུག་མི་ལ་རས་པའི་ཞལ་ནས་འཇིག་རྟེན་པ་རྣམས་ཀྱིས་དགེ་རྩ་བགྱིས་པ་བར་དོ་ལ་ཕན་པར་འདུག་གོ་ཞེས་གསུངས་སོ། །ལར་གཤིན་པོའི་དགེ་རྩ་བགྱིད་པའི་ཚེ་སྙིང་རྗེ་ཆེན་པོ་སྟེ་ཤུགས་དྲག་པོས་དེ་ལ་ཕན་འདོགས་པའི་ལྷག་བསམ་དག་པར་དགོས་ཚུལ་དང་ཁྱད་པར་སྔགས་ཀྱི་ཆོ་གས་རྗེས་འཛིན་བྱེད་པ་ལ་མན་ངག་དང་ལྡན་པ་དང་། བསྙེན་པ་གྲུབ་ཅིང་ཆོ་གའི་ཡན་ལག་མ་ཉམས་པ་གལ་ཆེ་བར་གསུངས་པས་ན་འབྲེལ་ཚད་དོན་ལྡན་ཞིག་ཟབ་ཆོས་འདི་ལ་བརྟེན་ནས་བྱས་ན་རང་ཡང་ཆོས་དང་འཕྲད་པ་དོན་ཆེན་པོ་འགྱུར་བ་ཡིན་པས་འབད་པར་བྱའོ། །གསུམ་པ་རྗེས་ཀྱི་བྱ་བ་རྣམས་ནི་ཆོ་ག་བཞིན་དུ་གོ་སླ་བ་ཡིན་མོད་བཟང་སྤྱོད་སོགས་ཀྱི་སྒོ་ནས་བསྔོ་སྨོན་ཟབ་མོས་རྒྱས་འདེབས་པ་གནད་ཆེའོ། །བླ་མའི་ལེགས་གསུངས་ནམ་མཁའི་བླ་རེས་ནི། །ལུང་རིགས་གློག་གི་རོལ་རྩེད་བསྒྱུར་བ་ལས། །དོན་ཟབ་བདུད་རྩིའི་ཟིལ་རྒྱུན་ཆེར་འཕེལ་ནས། །དད་པའི་དགའ་ཚལ་ཉམས་རྟོགས་པདྨོས་མཛེས། །རྡོ་རྗེའི་གཞུང་གི་རྣམ་ངེས་སྣང་གསལ་འདི། །བརྒྱུད་ལྡན་དམ་པའི་གསུང་སྒྲོས་ཤར་རིའི་སྤོར། །ཉེར་འཕགས་འོད་བརྒྱའི་བདག་རྐྱེན་གྱིས་བསྐྲུན་ལས། །རང་བཟོའི་སྲིན་བུའི་བཀྲག་མདངས་ག་ལ་ཡིན། །དེང་སང་སྐྱེ་བོ་ཀུན་གྱི་གཤིན་གསོན་དོན། །འདི་ལ་རེ་ནས་གཅེས་པའི་དངོས་པོ་ཀུན། །འདི་ཕྱོགས་གཏོང་བའི་ཚུལ་ལ་བརྩེར་དགོངས་ཏེ། །ཐུགས་སྐྱེད་ལྡན་པས་

ཡལ་བར་འདོར་མི་རུང་། །བརྗེད་ངས་བློ་མཁའ་རྨོང་མུན་གྱིས་ཟིན་པའི། །ཉེས་བཤད་གང་མཆིས་བླ་མ་ལྷག་པའི་ལྷ། །རྡོ་རྗེའི་བསྲུང་མའི་དབང་པོ་འཁོར་བཅས་ཀྱིས། །སྤྱན་སྔར་བྱས་བསགས་སྡིག་དང་ལྷན་གཅིག་བཤགས། །གལ་ཏེ་རྣམ་པར་དཀར་བའི་ལས་མཆིས་ན། །དེས་ཀྱང་མཐའ་ཡས་འགྲོ་བ་ལམ་བཟང་འདིའི། །གདུལ་བྱར་གྱུར་ནས་རིང་མིན་གདོད་མའི་མགོན། །རྡོ་རྗེ་སེམས་དཔའི་གོ་འཕང་མྱུར་ཐོབ་ཤོག །ཅེས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་རྣམ་ངེས་མདོར་བསྡུས་འདི་ནི་༧རིགས་ཀྱི་བདག་པོ་འཇིགས་མེད་ཡེ་ཤེས་རྡོ་རྗེ། ཁྱབ་བདག་རྒྱལ་སྲས་ཆེན་པོ། གྲུབ་དབང་རྫོགས་ཆེན་རིན་པོ་ཆེ། འཇམ་པའི་དབྱངས་དངོས་མཁྱེན་བརྩེའི་དབང་པོ། ཀུན་བཟང་ཐེག་མཆོག་མཚན་ཅན་རྣམ་པ་ལྔའི་ཞལ་སྔ་ནས་དབང་ལུང་ཡོངས་རྫོགས་བསྩལ་བ་དང་། གསལ་བྱེད་སྐྱ་རེངས་ལྟར་བློས་བསླང་ལག་ཁྲིད་ཡན་ཆད་རྒྱལ་སྲས་ཆེན་པོའི་ཐུགས་སྲས་རྗེ་ནམ་མཁའི་མཚན་ཅན་གྱིས་ཞིབ་ཏུ་གནང་བའི་དོན་སྔ་སོར་དུ་ལག་རྩེ་བླ་མ་ཞེས་རྣལ་འབྱོར་དམ་པའི་བཞེད་སྐོང་དུ་བསྒོམ་རིམ་ཡན་བྲིས་ནས། དེ་ཕྱིན་དད་དམ་ནོར་བུའི་ཅོད་པཎ་འཛིན་པ་འཇིགས་མེད་རྒྱ་མཚོས་ནན་ཏན་བསྐུལ་བ་ལྟར་རྒྱལ་ཁམས་ཉུལ་བའི་རྣལ་འབྱོར་པ་དཔལ་ཆེན་རྡོ་རྗེས་བྲིས་པ་ཛ་ཡནྟུ། དགེའོ། མངྒ་ལཾ།། །།