གཉིས་པ་རོ་ལ་སྦྱངས་པ་ནི།
གཉིས་པ་རོ་ལ་སྦྱངས་པ་ནི། རོ་དེའི་མདུན་དུ་མཎྜལ་ཁྲུ་དོ་བ་ལ་སོགས་པ་བྱས་ཏེ་གུརྒུམ་ལ་སོགས་པ་དྲི་བཟང་པོས་ཆགས་ཆགས་བཏབ་ལ་པདྨ་འདབ་བརྒྱད་མཛེས་ཚོན་དུ་བྲིས་པའི་དབུས་སུ་རིན་པོ་ཆེའམ་རྫ་ཡིན་ན་ས་དཀར་གྱིས་བསྒྱུར་བའི་བུམ་པ་ཁ་རྒྱན་མགུལ་ཆིངས་གཟུངས་ཐག་དང་བཅས་པའི་ནང་དུ་ཆུ་གཙང་མ་བུམ་རྫས་དང་བཅས་པས་བཀང་བའི་ཕྱོགས་བཞིར་མཚལ་ལམ་ལྡོང་རོས་ཀྱིས་ཨ་བཞི་བྲིས་པ་བཞག་ལ། བུམ་པ་འོད་ལྔའི་གཞལ་ཡས་ཁང་དུ་བསམ་པའི་ནང་དུ་སྟོན་པ་ཀུན་ཏུ་བཟང་པོ་མཐིང་ཀ་མཉམ་བཞག་དང་བཅས་པ་ཡབ་ཡུམ་གྱི་ཕྱོགས་མཚམས་སུ་རིགས་ལྔའི་སངས་རྒྱས་དང་། སྟེང་དུ་བླ་མ་བརྒྱུད་པ་རྣམས་བསམ་ལ་སྐད་ཅིག་གྱིས་སྤྱན་དྲངས་ཏེ་བསྟིམ་ནས། ༀ་ཨཱཿ་ཧཱུྃ་སྭཱ་ཧཱ་དང་། ཨ་འབུམ་ཕྲག་གཅིག་གིས་བསྙེན་པ་བྱས་ལ། བར་བར་དུ། ༀ་ཨ་བྷྱ་རྒྱ་ཏཾ་ཀེཾ་དང་། ཆེ་གེ་མོའི་སྡིག་པ་དང་སྒྲིབ་པ་ཐམས་ཅད་ཤཱནྟཾ་ཀུ་རུ་ཡེ་སྭཱ་ཧཱ། ཞེས་བརྗོད་ཅིང་། གཟུངས་ཐག་ནས་བཟུང་སྟེ་རང་ཉིད་རྡོ་རྗེ་སེམས་དཔར་བསམ་པའི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་བླ་མ་དང་ལྷ་སོ་སོའི་སྐུའི་ཆ་ནས་བདུད་རྩི་བབ་པས་བུམ་པ་ཁེང་བར་བསམ་ལ། མཆོད་པ་དང་བསྟོད་པ་ཅི་ཤེས་པས་བསྟོད་དེ་མཐར། ཨ་ཨ་ཞེས་བརྗོད་པས་ཡེ་ཤེས་པ་གཤེགས། དམ་ཚིག་པ་ཆུར་ཞུ་བར་བསམ་ལ་བུམ་པ་དེ་རོའི་སྤྱི་བོར་བཞག་སྟེ་ཨ་ལོ་གྲངས་ཙམ་བརྗོད་ནས་བུམ་པའི་ཆུ་དེ་ཡེ་ཤེས་ལྔའི་ཆུ་རྒྱུན་དུ་དམིགས་ལ་ཨ་དང་བཅས་པས་བཀྲུས་པས་སྒྲིབ་པ་དག་པར་བསམ་སྟེ་ཨ་མང་དུ་བརྗོད་པས་དམྱལ་བའི་གནས་ནས་འདྲོངས་བར་ངེས་སོ། །དེ་ནས་མགྲིན་པར་བྷྱ་དང་།
གསང་གནས་སུ་རྒྱ་དང་། མཆན་ཁུང་དུ་ཀེཾ་དང་། སྤྱི་བོར་ཏཾ་བརྗོད་ནས་བཀྲུས་པས་རིམ་པ་ལྟར། ཡི་དྭགས། བྱོལ་སོང་། ལྷ་མིན། ལྷའི་གནས་རྣམས་ནས་འདྲོངས་ངེས་སོ། །དེ་ནས་ༀ་ཨཱཿཧཱུྃ་སྭཱ་ཧཱ། ཞེས་བརྗོད་ཅིང་བུམ་པ་སྙིང་ཀར་བཟུང་ནས་བཀྲུས་པས་མིའི་སྐྱེ་གནས་ངན་པ་སྦྱངས་ཏེ་མི་ལུས་རིན་པོ་ཆེར་དྲངས་ནས་ཚེ་དེས་ཐར་བའི་སྐལ་བ་ཅན་དུ་འདྲོངས་སོ། །དེ་ལྟར་ཞག་གསུམ་མམ་ལྔའམ་བདུན་དུ་བྱས་ན་ཕུང་པོ་བསྲེགས་སམ་བསྐྱལ་ན་ལྷ་མི་ཁྱད་པར་ཅན་ནམ། རྣམ་པར་གྲོལ་བའི་རྟགས་ནམ་མཁའ་ལ་མི་འབྱུང་མི་སྲིད་པའོ། །ཡང་ན་མིང་བྱང་བཀྲུ་བར་གསུངས་སོ། །ཞེས་རྒྱུད་ཉི་ཟླ་ཁ་སྦྱོར་རྒྱུད་ཀྱི་དགོངས་པ་ཐེག་མཆོག་མཛོད་དུ་བཀྲལ་བ་ལྟར་རོ། །སྐྱེ་མེད་ཀྱི་ཡི་གེ་ཨ་ལ་རིང་ཆ་དང་ཚེག་དྲག་མེད་པའོ།། །།