ཀརྨ་གླིང་པའི་ཞི་ཁྲོ་དགོངས་པ་རང་གྲོལ་གྱི་བསྙེན་སྒྲུབ་དམིགས་རིམ་ཡེ་ཤེས་གསལ་བའི་སྒྲོན་མེ།

ཀརྨ་གླིང་པའི་ཞི་ཁྲོ་དགོངས་པ་རང་གྲོལ་གྱི་བསྙེན་སྒྲུབ་དམིགས་རིམ་ཡེ་ཤེས་གསལ་བའི་སྒྲོན་མེ་ཞེས་བྱ་བ་བཞུགས་སོ། །

རིགས་ལྔ་ཡེ་ཤེས་ལྔ་ཡི་སྒྱུ་འཕྲུལ་གར། །ཞི་དང་ཁྲོ་བོའི་དཀྱིལ་འཁོར་མ་ལུས་པའི། །བདག་ཉིད་ཁྱབ་བདག་རྡོ་རྗེ་སེམས་དཔའ་ལ། །མི་ཕྱེད་དད་པའི་ཡིད་ཀྱིས་ཕྱག་འཚལ་འདུད། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི། །བསྙེན་སྒྲུབ་དམིགས་ཁྲིད་རབ་ཏུ་གསལ་བ་ཞིག །མཆོག་དམན་སྤྱི་ལ་ཕན་ཕྱིར་འབྲི་བ་ལ། །བླ་མ་ལྷ་དང་མཁའ་འགྲོས་ཤིས་པ་སྩོལ། །དེ་ལ་འདིར་གཏེར་ཆེན་ཀརྨ་གླིང་པས་སྒམ་པོ་གདར་གྱི་རི་ནས་གདན་དྲངས་པའི་ཞི་ཁྲོ་གཉིས་འདུས་ཀྱི་ལས་བྱང་ཚོར་བ་རང་གྲོལ་གྱི་བསྙེན་བསྒྲུབ་ཇི་ལྟར་བྱ་བའི་ཚུལ་ལ། སྦྱོར་བ། དངོས་གཞི། རྗེས་དང་གསུམ་ལས། དང་པོ་ནི་སྟེགས་བུ་ཁོད་སྙོམས་པ་ལ་གོང་དུ་རྩ་བ་གསུམ་གྱི་གཏོར་མ་དེ་དག་གི་མདུན་དུ་རས་བྲིས་ཡོད་ན་དེ་དང་། མེད་ན་མཎྜལ་ཚོམ་བུ་ལྔ་པའི་སྟེང་དུ་མཉྫི་རྐང་རིང་ལ་རྟེན་གཏོར་རིན་ཆེན་འབར་བ། དེའི་མདུན་དུ་སྨན་རཀ་གཏོར་གསུམ་དང་ཕྱི་ནང་གསང་བའི་མཆོད་པ་ཇི་འབྱོར་བཤམས། དེ་དག་གི་གཡས་གཡོན་གང་བདེར་རྒྱུན་བཞག་གི་ཆད་ཐོ་དང་བསྟན་མ། ཡུལ་གྱི་གཞི་བདག་གཏོར་མ་བཤམས། གཞན་ཡང་སྤྲོ་ན་ཚོགས་དང་ཉིན་རེར་འབུལ་རྒྱུའི་ཆད་བརྟན་དང་ཉིན་དང་པོར་དཀར་བགེགས་སོགས་མཁོ་བའི་ཡོ་སྤྱད་ཐམས་ཅད་ཚོགས་པར་བྱའོ། །

གཉིས་པ་དངོས་གཞི་ལ་ཐོག་མར་སྔོན་འགྲོའི་རིམ་པ་རྣམས་ལས་དང་པོར། ཧྲཱི་སྔོན་མས། ཨོ་རྒྱན་གྱི་ཡུལ་ནས་སློབ་དཔོན་རིན་པོ་ཆེ་ལ་རྩ་བ་གསུམ་གྱི་ལྷ་ཚོགས་དཔག་ཏུ་མེད་པས་བསྐོར་ནས་སྤྱན་དྲངས་ཏེ་གོང་གི་གཏོར་མ་རྣམས་དང་དབྱེར་མེད་པའི་ཚུལ་དུ་བཞུགས་པར་མོས། དེ་ནས་སྐྱབས་འགྲོ་ནི། རང་གི་མདུན་གྱི་ནམ་མཁར་ཆོས་སྐུ་ཀུན་ཏུ་བཟང་པོ་ལ་རྩ་བརྒྱུད་ཀྱི་བླ་མ་ཡི་དམ་ཞི་ཁྲོ་རབ་འབྱམས་ཕྱོགས་བཅུ་དུས་གསུམ་གྱི་སངས་རྒྱས་སྲས་དང་བཅས་པས་བསྐོར་བ་དེ་དག་གི་མཐའ་སྐོར་དུ་མཁའ་འགྲོ་ཆོས་སྐྱོང་དཔག་ཏུ་མེད་པས་བསྐོར་བ་རྣམས་བདག་ཅག་རྣམས་ལ་ཐུགས་བརྩེ་བའི་སྤྱན་གྱིས་གཟིགས་པ་གསལ་བཏབ། སྐྱབས་ཡུལ་རྣམས་ཀྱི་མདུན་དུ་བདག་གཞན་འགྲོ་བ་རིགས་དྲུག་གི་སེམས་ཅན་ཐམས་ཅད་སྐྱབས་ཞུ་བ་ལ་འཁོད་པར་མོས་ཏེ། བདག་གཞན་སེམས་ཅན་ཐམས་ཅད་སྲིད་པ་དང་ཞི་བའི་འཇིགས་པ་བརྒྱ་ཕྲག་གིས་ཐོག་མེད་ནས་མནར་ཞིང་སྡུག་བསྔལ་གྱིས་ཉམ་ཐག་པ་འདི་སུ་ཞིག་གིས་བཟོད་ནུས་སྙམ་དུ་འཇིགས་སྐྲག་གི་བློ་བསྐྱེད། དེ་ནས་འཁོར་བ་ཕྲ་རགས་ཀྱི་སྡུག་བསྔལ་གྱི་རྒྱ་མཚོ་འདི་ལས་སྒྲོལ་བའི་ནུས་པ་ནི་མདུན་གྱི་སྐྱབས་ཡུལ་རྣམས་ཁོ་ན་ལ་ཡོད། དུས་འདི་ནས་བཟུང་སྟེ་བླ་མེད་བྱང་ཆུབ་ཀྱི་བར་དུ་བདག་གཞན་ཐམས་ཅད་སྲིད་ཞིའི་འཇིགས་པ་ལས་སྐྱོབ་པའི་སྐྱབས་སུ། སྐྱབས་ཡུལ་ཁྱེད་རྣམས་བསྟེན་ནོ། །ཁྱེད་རྣམས་ལ་སྐྱབས་ཞུའོ་སྙམ་དུ། ན་མོ། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་སོགས་འགྲོ་ཀུན་གུས་པས་སྐྱབས་སུ་མཆི། །ལན་གསུམ། སེམས་བསྐྱེད་ནི། བདག་གིས་འགྲོ་ཀུན་

འཁོར་བའི་རྒྱ་མཚོ་ལས། །སྒྲོལ་བའི་དོན་དུ་ཚེ་འདིར་རྡོ་རྗེ་འཆང་། །ཐོབ་ཕྱིར་ཞི་ཁྲོ་དམ་པ་རིགས་བརྒྱ་ཡི། །རྣལ་འབྱོར་ཟབ་མོ་ཉམས་སུ་བླངས་བར་བགྱི། །ལན་གསུམ། དེ་ནས་ཉིན་དང་པོ་ལ་དཀར་བགེགས་བཏང་བའི་རྗེས་དང་། ཉིན་ཕྱི་མ་རྣམས་ལ་སྐྱབས་སེམས་ཀྱི་རྗེས་སུ། རང་ཉིད་སྐད་ཅིག་གིས་རིགས་ལྔའི་ལྷ་ཚོགས་རབ་འབྱམས་འདུས་པའི་བདག་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་དར་དང་རིན་པོ་ཆེས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་པད་ཟླའི་གདན་ལ་བཞུགས་པའི་སྐུར་གྱུར་པར་བསམས་ལ་བསྒྲུབ་པ་ལ་བར་ཆད་བྱེད་པའི་བགེགས་ལ་བཀའ་བགོ་ཞིང་བསྐྲད་པ་ནི། ཧཱུྃ་ང་ཉིད་ལྷ་ཡི༴ སོགས་བརྗོད་ཅིང་། རང་ཉིད་རྡོ་རྗེ་སེམས་དཔའི་ང་རྒྱལ་གསལ་བའི་སྐུ་ལས་འོད་ཟེར་དཔག་ཏུ་མེད་པ་འཕྲོས་པའི་རྩེ་རྣམས་སུ་ཀུན་ཏུ་བཟང་པོ་ལ་སོགས་པ་ཞི་ཁྲོ་དམ་པ་རིགས་བརྒྱའི་ལྷ་ཚོགས་རབ་འབྱམས་འཕྲོས་པས་ཕྱོགས་བཅུའི་ནམ་མཁའི་དབྱིངས་ཐམས་ཅད་གང་། དེ་དག་གི་སྐུ་ལས་མེ་དཔུང་མཚོན་ཆ་ཁྲོ་ཆུང་གི་ཚོགས་སྤྲོས་ཏེ། དེ་ནས་བགེགས་ཚོགས་ཁྱེད་རྣམས་མེ་དཔུང་ལ་སོགས་པ་དེ་དག་གིས་བརླག་པར་འགྱུར་བས་ན་བདག་ཅག་གི་ལུས་ངག་ཡིད་གསུམ་ལ་གནོད་པ་དང་། མཆོད་པའི་མདངས་ཕྲོག་ཅིང་དཀྱིལ་འཁོར་བསྒྲུབ་པ་ལ་བར་དུ་གཅོད་པའི་བགེགས་ཚོགས་མ་རིག་པའི་རྒྱུ་ལས་བྱུང་བ་ཁྱེད་རྣམས་ད་ཕྱིན་ཆད་གཞན་ལ་གནོད་པ་བྱས་པའི་ལས་ཀྱིས་རིགས་དྲུག་ཏུ་སྐྱེ་བའི་ལམ་བཀག་པའི་ཕྱིར་དུ་ཁྱེད་རྣམས་བདག་གིས་གཞན་དུ་བསྐྲད་པ་ཡིན་པས་འདིར་མ་འདུག་པར་གཞན་དུ་དེངས་ཤིག །ཧཱུྃ་ཧཱུྃ་གིས་ལྷའི་ང་རྒྱལ་གྱིས་འཇིགས་པའི་སྒྲ་བསྒྲགས། ཨུ་ཙ་སོགས་བྱེར་ཞིང་ཞེས་བརྗོད་པས་བགེགས་

ཐམས་ཅད་མཐའི་ལྕགས་རིའི་རྒྱབ་དུ་བྲོས། མི་འགྲོ་བ་ཐམས་ཅད་མེ་དཔུང་དང་ཁྲོ་ཆུང་མཚོན་ཆའི་ཚོགས་སྤྲོས་པ་ཐམས་ཅད་ཀྱིས་ཚར་བཅད་པར་བསམ། དེ་ནས་མཚམས་གཅོད་པ་ནི། ཧཱུྃ་རང་རིག་རྡོ་རྗེ༴ སོགས་བརྗོད་བཞིན་འདི་ལྟར་མོས་ཏེ་རང་ཉིད་རིགས་ཀུན་འདུས་པ་རྡོ་རྗེ་སེམས་དཔའི་ང་རྒྱལ་ལྷག་པར་ཡང་བསྐྱེད་དེ་རང་གི་ཐུགས་ཀར་ གསང་བདག་ཕྱག་ན་རྡོ་རྗེ་བསྒོམ་ལ་ཐུགས་ཀའི་ཕྱག་རྡོར ་གྱི་ཐུགས་ཀའི་ཧཱུྃ་ལས་ཧཱུྃ་སྔོན་པོ་འཕྲོས་པ་ཤར་དུ་སོང་བ་རྡོ་རྗེར་གྱུར་པ་དེ་ལས་རྡོ་རྗེ་སྔོན་པོ་དཔག་ཏུ་མེད་པ་སྟེང་འོག་ཕྱོགས་མཚམས་ཐམས་ཅད་དུ་མཆེད་པའི་འོག་ཏུ་རྡོ་རྗེའི་ས་གཞི། ཕྱོགས་མཚམས་སུ་རྡོ་རྗེའི་རྭ་བ། སྟེང་དུ་རྡོ་རྗེའི་གུར་བླ་བྲེ་དང་བཅས་པའི་རྡོ་རྗེའི་གུར་ཁང་། ཕྱག་རྡོར་ཀྱི་ལྟེ་བ་ནས་ཏྲཾ་སེར་པོ་འཕྲོས་པ་རྡོ་རྗེའི་གུར་གྱི་ཕྱི་རོལ་གྱི་ལྷོར་སོང་བ་རིན་པོ་ཆེ་སེར་པོར་གྱུར་པ་ལས་རིན་པོ་ཆེ་དཔག་ཏུ་མེད་པ་རྡོ་རྗེའི་རྭ་གུར་གྱི་སྟེང་དང་ཕྱོགས་མཚམས་བརྒྱད་དང་རྡོ་རྗེའི་ས་གཞིའི་འོག་ཏུ་མཆེད་པ་ལས་རྡོ་རྗེའི་རྭ་གུར་གྱི་ཕྱི་རོལ་དུ་རིན་པོ་ཆེའི་རྭ་གུར་དང་། རྡོ་རྗེའི་ས་གཞིའི་འོག་ཏུ་རིན་པོ་ཆེའི་ས་གཞི་སྟེ་རིན་པོ་ཆེའི་གུར་ཁང་། དེའི་རིགས་འགྲེས་ཏེ་ཕྱག་རྡོར་གྱི་མགྲིན་པ་ནས་ཧྲཱིཿདམར་པོ་རིན་པོ་ཆེའི་གུར་གྱི་ཕྱི་རོལ་གྱི་ནུབ་ཏུ་འཕྲོས་པས་པདྨ་དམར་པོར་གྱུར་པ་ལས་མཆེད་པའི་པདྨའི་གུར་ཁང་། གསང་བ་ནས་ཨཱ་ལྗང་གུ་པདྨའི་གུར་གྱི་ཕྱི་རོལ་གྱི་བྱང་དུ་འཕྲོས་པས་རྒྱ་གྲམ་ལྗང་གུར་གྱུར་བ་ལས་མཆེད་པས་རྒྱ་གྲམ་གྱི་གུར་ཁང་། གསང་བདག་གི་དཔྲལ་བ་ནས་ༀ་དཀར་པོ་རྒྱ་གྲམ་གྱི་གུར་གྱི་ཕྱི་རོལ་གྱི་སྟེང་དུ་འཕྲོས་པ་འཁོར་ལོ་དཀར་པོར་གྱུར་པ་ལས་མཆེད་པས་འཁོར་ལོའི་གུར་ཁང་། སྐུ་ལས་རཾ་ཡིག་འཕྲོས་པ་

འཁོར་ལོའི་གུར་གྱི་ཕྱི་རོལ་གྱི་ཤར་དུ་སོང་བ་མེ་དཔུང་དུ་གྱུར་པ་ལས་མཆེད་པའི་འཁོར་ལོའི་གུར་གྱི་ཕྱི་རོལ་ཏུ་མེ་དཔུང་རབ་ཏུ་འབར་བས་ཁྱབ་པ། རྭ་གུར་རྣམས་ཀྱི་ཕྱི་ནང་ཐམས་ཅད་སྤྲུལ་པའི་ཁྲོ་ཚོགས་དཔག་ཏུ་མེད་པས་གང་བའི་བསྲུང་བའི་འཁོར་ལོར་གྲུབ་སྟེ་བགེགས་འཇུག་པའི་གོ་སྐབས་མེད་པར་མོས་ལ། ༀ་ཧཱུྃ་ཏྲཾ༴ སོགས་ཀྱིས་བསྲུང་འཁོར་དེ་རྣམས་ནམ་ཡང་གཞོམ་གཞིག་མེད་ཅིང་མི་འཇིག་པའི་རང་བཞིན་དུ་གྱུར་པར་མོས། དེ་ནས་རྡོར་དྲིལ་གྱི་ཕྱག་རྒྱ་སྟེ་དམ་ཚིག་བསྟེན་པ་ནི་རྡོར་དྲིལ་ཐོགས་དེ། ཧཱུྃ་ཆོས་ཉིད༴ སོགས་བརྗོད་བཞིན་ཆོས་ཐམས་ཅད་རང་བཞིན་གྱིི་སྐྱེ་བ་མེད་པའི་ངང་ལས། ཐབས་མི་འགྱུར་བའི་བདེ་བ་ཆེན་པོ་དང་། ཤེས་རབ་སྟོང་ཉིད་རྟོགས་པའི་ཡེ་ཤེས་ཟུང་དུ་འཇུག་པ་འདི་འབྱུང་སྟེ། རྡོ་རྗེ་ནི་དེ་འདྲའི་ཐབས་བདེ་བ་ཆེན་པོའི་ཡེ་ཤེས་དང་། དྲིལ་བུ་ནི་ཤེས་རབ་སྟོང་པ་ཉིད་ཀྱི་ཡེ་ཤེས་ཀྱི་ངོ་བོའོ་སྙམ་དུ་རྡོ་རྗེ་བསོར་ཞིང་དྲིལ་བུ་འཁྲོལ། བདག་གིས་རྡོར་དྲིལ་ལ་བརྟེན་ནས་ཐབས་ཤེས་ཀྱི་དོན་རྟག་པར་དྲན་ཏེ་སངས་རྒྱས་ཐོབ་པར་བྱ་བའི་སྒོ་ནས་སེམས་ཅན་ཐམས་ཅད་ལ་ཐབས་ཤེས་ཀྱི་དོན་བསྟན་པས་རིགས་སད་པར་བྱས་ཏེ་སངས་རྒྱས་ཀྱི་སར་འཇུག་པར་བྱེད་པའི་ཆེད་དུ་རྡོར་དྲིལ་གྱི་བརྡའ་ལ་བརྟེན་ནས་ཐབས་ཤེས་དབྱེར་མེད་པའི་ཡེ་ཤེས་རྒྱུན་དུ་བསྒོམ་པར་བྱའོ་སྙམ་དུ་བསམས། དེ་ནས་ཡན་ལག་བཅུ་པའི་ཚོགས་བསགས་པ་ལ་གོང་གི་སྐྱབས་ཡུལ་རྣམས་སླར་ཡང་གསལ་བཏབ་སྟེེ། ༀ་ཨཱཿཧཱུྃ་ནམ་མཁའི༴ སོགས་ཀྱིས་གོང་བཞིན་སྐྱབས་འགྲོ་བྱ། ཆོས་ཉིད་དབྱིངས་ཀྱི༴ སོགས་ནས་རང་བཞིན་ཆོས་ཀྱི་དབྱིངས་ནས་འགྲོ་བ་རྣམས་ལ་ཐུགས་རྗེའི་སྒོ་ནས་ཐབས་ཤེས་ཀྱི་ཡེ་ཤེས་ལས་གྲུབ་པའི་སྐུར་སྤྲུལ་པའི་

ཞི་ཁྲོའི་ལྷ་ཚོགས་དཔག་ཏུ་མེད་པ་སྤྱན་དྲངས། སྣང་སྲིད་རྣམ་དག༴ སོགས་ཀྱིས་སྤྱན་དྲངས་པའི་ལྷ་ཚོགས་ཐམས་ཅད་གོང་གི་སྐྱབས་ཡུལ་རྣམས་ལ་ཐིམ་ནས་གདན་ཁྲི་པད་ཟླ་ཉི་མའི་གདན་རེ་རེ་འབུལ་བ་ལ་བཞུགས་པར་མོས། ཀུན་ཏུ་བཟང་མོ༴ སོགས་ཀྱིས་ཀུན་ཏུ་བཟང་མོ་ཆོས་ཉིད་སྟོང་པ་ཉིད་ལ་རོ་གཅིག་ཏུ་མཉམ་པར་བཞག་པ་ཀུན་ཏུ་བཟང་པོ་མི་འགྱུར་བའི་{སོར་ཆུད་པའི་}བདེ་བ་ཆེན་པོའི་ཡེ་ཤེས་ཀྱི་རྣམ་རོལ་ལས་ཤར་བའི་རྒྱལ་བ་ཞི་ཁྲོའི་ལྷ་ཚོགས་རྣམས་ལ་ཡོན་ཏན་དྲན་དེ་གུས་འདུད་བྱའོ། །བདེ་གཤེགས་ཞི་ཁྲོ༴ སོགས་ཀྱིས་རྒྱལ་བ་ཞི་ཁྲོའི་ལྷ་ཚོགས་རྣམས་ལ་ཕྱི་མཆོད་མེ་ཏོག་བདུག་སྤོས་སོགས་དང་། ནང་མཆོད་ཤ་ལྔ་བདུད་རྩི་ལྔ་ལས་གྲུབ་པའི་སྨན་རཀ་གཏོར་གསུམ་སོགས་དང་། གསང་མཆོད་རིག་མ་སྣ་ཚོགས་དང་སྙོམས་འཇུག་གི་བདེ་བའི་མཆོད་པ་དཔག་ཏུ་མེད་པས་མཆོད་པར་མོས་ལ། ཐོག་མེད་དུས་ནས༴ སོགས་ཀྱིས་ཐོག་མེད་ནས་ད་ལྟའི་བར་གྱི་དུག་གསུམ་གྱི་སྒོ་ནས་བསགས་པའི་སྡིག་སྒྲིབ་ཐམས་ཅད་འགྱོད་སེམས་སྡོམ་སེམས་གཉིས་ཀྱི་སྒོ་ནས་བཤགས། ཆོས་དབྱིངས་ཀུན༴ སོགས་ཀྱིས་སངས་རྒྱས་བྱང་སེམས་ཀྱིས་འགྲོ་བའི་དོན་མཛད་པ་དང་། ཚོགས་གཉིས་བསགས་པའི་དགེ་བ་ཐམས་ཅད་ལ་རང་གི་སེམས་ཀྱིས་དགའ་བ་བསྒོམ། ཕྱོགས་བཅུའི་ཞིང་གི༴ སོགས་ཀྱིས་ཕྱོགས་བཅུའི་སངས་རྒྱས་ཐམས་ཅད་ལ་སེམས་ཅན་ཐམས་ཅད་ཀྱི་དོན་དུ་ཆོས་ཀྱི་འཁོར་ལོ་རྒྱུན་མི་འཆད་པར་བསྐོར་བར་མཛད་དུ་གསོལ་སྙམ་དུ་བསམ། ཇི་སྲིད་འཁོར་བའི༴ སོགས་ཀྱིས་སངས་རྒྱས་བཅོམ་ལྡན་འདས་ཁྱེད་རྣམས་འཁོར་བ་འདི་མ་སྟོངས་བར་དུ་སེམས་ཅན་གྱི་དོན་བསྒྲུབ་པའི་ཆེད་དུ་མྱ་ངན་ལས་མི་འདའ་བར་

འཁོར་བའི་གནས་འདིར་བཞུགས་པར་བདག་གི་གསོལ་བ་འདེབས་སོ་སྙམ་དུ་བསམ། བདག་གིས་དུས་གསུམ༴ སོགས་ཀྱིས་དེ་ལྟར་སྐྱབས་འགྲོ་བྱས་པ་ལ་སོགས་པ་བདག་གིས་དུས་གསུམ་དུ་བསགས་པའི་དགེ་བའི་མཐུ་ལས་སེམས་ཅན་ཐམས་ཅད་གསང་སྔགས་གྱི་ལམ་དུ་ཞུགས་ནས་རྒྱལ་བ་ཞི་ཁྲོའི་གོ་འཕང་མྱུར་དུ་ཐོབ་པར་གྱུར་ཅིག་སྙམ་དུ་བསམ། །དེ་ནས་མཆོད་པ་ཐམས་ཅད་བྱིན་གྱིས་བརླབས་པ་ནི། ཧཱུྃ་བསམ་བརྗོད༴ སོགས་ཀྱིས་སྨན་རཀ་གཏོར་མ་ལ་སོགས་པ་མཆོད་པ་ཐམས་ཅད་དང་ཆོས་ཐམས་ཅད། རང་བཞིན་གྱིས་སྟོང་པ་སྒྱུ་མ་ལྟ་བུར་གསལ་བའི་ངང་ནས། རང་གི་ཐུགས་ཀ་ནས་རཾ་ཡཾ་ཁཾ་གསུམ་འཕྲོས་པས་མཆོད་རྫས་ཐམས་ཅད་ལ་ཕོག་རཾ་ལས་མེ་བྱུང་བས་སྨན་རཀ་ལ་སོགས་པའི་མཆོད་རྫས་ཀྱི་དྲི་མ་དངོས་འཛིན་དང་སེར་སྣས་བཅིངས་པ་དང་འབག་རྩོག་ཐམས་ཅད་བསྲེག །ཡཾ་ལས་རླུང་བྱུང་བས་བསྲེགས་པའི་རོ་རྣམས་གཏོར། ཁཾ་ལས་ཆུ་བྱུང་བས་མཆོད་རྫས་ཐམས་ཅད་བཀྲུས་པས་ཤིན་ཏུ་དག་པར་བྱས། མེ་ཆུ་རླུང་གསུམ་ཡང་སྨན་རཀ་སོགས་མཆོད་རྫས་ཐམས་ཅད་ལ་ཐིམ་པས་མཆོད་རྫས་ཐམས་ཅད་འདོད་ཡོན་དཔག་མེད་འབྱུང་བའི་རང་བཞིན་དུ་གྱུར་པར་མོས་ལ། དེ་ནས་ཐོག་མར་བདུད་རྩིི་བྱིན་གྱིས་བརླབས་པ་ནི། རླུང་མེ་ཐོད་སྒྱེད་ཀྱི་སྟེང་དུ་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་དབུས་དང་ཤར་ནས་གཡས་བསྐོར་གྱིས་རིགས་ལྔ་དང་ཡུམ་ལྔའི་ངོ་བོ། ༀ་མུཾ། ཧཱུྃ་ལཾ། ཏྲཱཾ་མཱཾ། ཧྲཱི་པྱཾ། ཨཱ་ཏཾ་རྣམས་ཞུ་བ་ལས་ཐབས་ཀྱི་ངོ་བོ་ཤ་ལྔ་དང་། ཤེས་རབ་ཀྱི་རང་བཞིན་བདུད་རྩིར་ལྔར་གྱུར། རླུང་གིས་མེ་སྦར་ནས་ཐོད་པའི་ཤ་ལྔ་བདུད་རྩི་ལྔ་ཞུ་ཞིང་འདྲེས་པའི་སྟེང་དུ་ༀ་ཨཱཿཧཱུྃ་གསུམ་གནས་པ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་རྣམས་

ཀྱི་གནས་གསུམ་ནས་ཡེ་ཤེས་ཀྱི་བདུད་རྩི་དཔག་ཏུ་མེད་པ་སྤྱན་དྲངས་ཏེ་ཡིག་འབྲུ་གསུམ་དང་བཅས་པ་བདུད་རྩི་ལ་ཐིམ་པས། སྐུ་གསུང་ཐུགས་རྡོ་རྗེའི་རང་བཞིན་གྱི་བདུད་རྩི་དཀར་དམར་མཐིང་གསུམ་གྱི་རྣམ་པར་གྱུར་པར་མོས་བཞིན་ༀ་ཨཿཧཱུྃ་སརྦ་པཉྩ་སོགས་སྔགས་བརྗོད། རཀྟ་བྱིན་གྱིས་བརླབས་པ་ནི། ཧཱུྃ་འདོད་ཆགས༴ སོགས་བརྗོད་པས་བྷནྡྷ་ལྕང་ལོ་ཅན་གྱི་ནང་དུ་དུག་གསུམ་གྱི་ངོ་བོ་ར་དམར་པོ་འོད་དུ་ཞུ་བ་ལས་ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ཀྱི་འདོད་ཆགས་ལ་སོགས་པའི་དུག་གསུམ་པོ་ཐམས་ཅད་ཆགས་མེད་བདེ་སྟོང་གི་ཡེ་ཤེས་སུ་དག་པའི་ངོ་བོ་རྒྱུ་རྐྱེན་རྣམ་པར་དག་པ་དང་ལྡན་པའི་རཀྟའི་རྒྱ་མཚོ་ཆེན་པོར་གྱུར་པར་མོས་ལ་ༀ་ཨཱཿཧཱུྃ་མ་ཧཱ་ཱརཀྟ་སོགས་བརྗོད། གཏོར་མ་བྱིན་གྱིས་བརླབས་པ་ནི། རླུང་མེ་ཐོད་སྒྱེད་གྱི་སྟེང་དུ་ཀ་པཱ་ལའི་ནང་དུ་དབུས་སུ་ༀ་ལས་སེངྒེའི་ཤཤར་དུ་ཧཱུྃ་ལས་གླང་ཆེན། ལྷོར་ཏྲཾ་ལས་རྟ། ནུབ་ཏུ་ཧྲིཿལས་རྨ་བྱ། བྱང་དུ་ཨཱ་ལས་ཤང་ཤང་གི་ཤཤ་ལྔ་སོ་སོའི་སྟེང་དུ་སླར་ཡང་ཡི་གེ་དེ་དག་གིས་མཚན་པ་རླུང་གིས་མེ་སྦར་ཐོད་པ་དྲོས་ཏེ་ཤ་ལྔ་པོ་ཡི་གེ་དང་བཅས་པ་ཞུ་ཞིང་འདྲེས་པས་དུག་ལྔ་ཡེ་ཤེས་ལྔའི་ངོ་བོར་དག་པའི་རང་བཞིན་གྱི་རྣམ་པ་ཤ་ལྔའི་གཏོར་མ་འདོད་པའི་ཡོན་ཏན་དཔག་ཏུ་མེད་པ་འཕྲོ་བའི་རང་བཞིན་དུ་གྱུར་པར་མོས་ལ། །ༀ་ཨཱཿཧཱུྃ་མ་ཧཱ་བྷ་ལི་ཾཏ༴ སོགས་བརྗོད། དེ་ནས་ཉེར་སྤྱོད་བྱིན་གྱིས་བརླབས་པ་ནི། ༀ་ཨཱཿཧཱུྃ་གཟུགས་སྒྲ༴ སོགས་བརྗོད་ཅིང་ཐོད་པའི་སྣོད་རེ་རེའི་ནང་དུ་སངས་རྒྱས་ཀྱི་སྐུ་གསུང་ཐུགས་ཀྱི་ངོ་བོ་ༀ་ཨཱཿཧཱུྃ་གསུམ་རེ་རེ་འོད་དུ་ཞུ་བ་ལས་གཟུགས་སོགས་ཡུལ་དྲུག་མཆོད་ཡོན་སོགས་ཡེ་ཤེས་གསེར་བུམ་གྱི་རྣམ་པ་དེ་བུམ་པའི་དབྱིབས་སུ་གྲུབ་ཀྱང་གྲུབ་རྫས་གསེར་ཡིན་པ་བཞིན་མཆོད་རྫས་རྣམས་མཆོད་རྫས་སུ་གྲུབ་ཀྱང་སྐུ་ཡེ་ཤེས་

ལས་གྲུབ་པའོ། མཆན། ལས་གྲུབ་པའི་མཆོད་པའི་ངོ་བོར་གྱུར་པར་མོས་ལ་ༀ་བཛྲ་པུཥྤེེ༴ སོགས་ཀྱིས་མེ་ཏོག་ལ་སོགས་པའི་མཆོད་པ་རྣམས་ལ་མཆོད་རྫས་སོ་སོའི་རྣམ་པ་ལ་ངོ་བོ་སངས་རྒྱས་ཀྱི་སྐུ་གསུང་ཐུགས་ཀྱི་རང་བཞིན་དུ་བྱིན་གྱིས་བརླབས་སོ། །དེ་ཡན་ཆད་ནི་སྔོན་འགྲོའི་རིམ་པའོ། །གཉིས་པ་དངོས་གཞི་ལ། ཐོག་མར་དེ་བཞིན་ཉིད་ཀྱི་ཏིང་ངེ་འཛིན་ནི། ༀ་རྣམ་པར་རྟོག་གསུམ༴ སོགས་བརྗོད་ཅིང་དངོས་པོ་རྣམས་རྒྱུ་འབྲས་ངོ་བོ་གསུམ་ལ་བདེན་པར་ཞེན་པའི་རྣམ་རྟོག་བྲལ་བའི་ངང་ནས་བརྗོད་བྲལ་དེ་བཞིན་ཉིད་ལ་མཉམ་པར་བཞག་སྟེ། དེ་ནས་མ་ཧཱ་ཤུ་ནྱ༴ སོགས་བརྗོད་ཅིང་དཔལ་ཀུན་ཏུ་བཟང་པོ་ཆོས་སྐུ་དེ་བཞིན་ཉིད་དང་དེ་རྟོགས་པའི་ཡེ་ཤེས་གཉིས་ཟུང་དུ་འཇུག་པའི་བདག་ཉིད་ངའོ་སྙམ་དུ་ང་རྒྱལ་འཛིན། གཉིས་པ་ཀུན་སྣང་གི་ཏིང་ངེ་འཛིན་ནི། ཨ་རྟོག་བྲལ༴ སོགས་ཏེ་གནས་ལུགས་སྟོང་པ་ཉིད་ཀྱི་དོན་དྲན་བཞིན་པའི་ངང་ནས་གནས་ལུགས་མ་རྟོགས་པའི་སེམས་ཅན་ཐམས་ཅད་ལ་ཆོས་ཉིད་མངོན་སུམ་དུ་རྟོགས་པར་བྱའོ་སྙམ་དུ་སྙིང་རྗེ་བསྒོམས་ལ། བཛྲ་མ་ཧཱ་ཀ༴ སོགས་དཔལ་ཀུན་ཏུ་བཟང་པོ་ལོངས་སྐུའི་ངོ་བོ་དམིགས་མེད་སྙིང་རྗེ་ཆེན་པོའི་བདག་ཉིད་ངའོ་སྙམ་དུ་བསམ། གསུམ་པ་རྒྱུའི་ཏིང་ངེ་འཛིན་ནི། ཏིང་ངེ་འཛིན་དང་པོ་གཉིས་ཀྱི་དུས་སུ་རང་ཉིད་སྟོང་པ་ཉིད་དང་ཡེ་ཤེས་ཟུང་དུ་འཇུག་པའི་ངོ་བོ་ཙམ་དུ་ཡོད་པ་དེ་ཧཱུྃ་གསལ་སྟོང༴ སོགས་ཏེ། རང་ཉིད་གསལ་སྟོང་ཟུང་འཇུག་དེ་ཉིད་དང་། སྟོང་ཉིད་སྙིང་རྗེ་ཟུང་འཇུག་ཀུན་ཏིང་གི་རྣམ་པར་གནས་པ་དེ་ལས་རང་ཉིད་ཀྱི་རིག་པའི་རྩལ་མ་འགགས་པ་དེ་ཉིད་ཀུན་ཏུ་བཟང་པོ་སྤྲུལ་སྐུའི་ཐུགས་ཀྱི་ངོ་བོ་ཨ་མཐིང་གར་གྱུར་

པ་དེ་ནམ་མཁར་གནས་པར་བསམ། འདི་དུས་སུ་རང་ཉིད་ཨ་ཡིག་སྔོན་པོའི་རྣམ་པར་གནས་པར་མོས་པ་ཡིན་ནོ། །དེ་ནས་རྟེན་གྱི་གཞལ་ཡས་ཁང་བསྒོམས་པ་ནི། སྟོང་གསལ་རང་བབས༴ སོགས་བརྗོད་བཞིན་དུ་རྒྱུའི་ཡི་གེ་ཨ་ཡིག་ལས་འཕྲོས་པའི་འབྱུང་བའི་ས་བོན་རྣམས་དང་། དེ་ལས་བྱུང་བའི་འབྱུང་ལྔ་རི་རབ་གཞལ་ཡས་ཁང་ལ་སོགས་པ་ནི། བེམ་རྫས་གདོས་བཅས་མ་ཡིན་པར་བདེ་སྟོང་གི་ཡེ་ཤེས་ལས་གྲུབ་པར་མོས་པའི་ངང་ནས་རང་ཉིད་རྒྱུའི་ཡི་གེ་ཨ་ཡིག་སྔོན་པོའི་རྣམ་པར་ནམ་མཁར་གནས་པ་དེ་ལས་ཨེ་ཡིག་སྔོན་པོ་འོག་ཕྱོགས་སུ་ཆད་དེ་ཡོངས་སུ་གྱུར་པ་ལས་ཀུན་ཏུ་བཟང་པོའི་ཐུགས་རྒྱུད་ཀྱི་མཁའ་ཁམས་དག་པ་རྡོར་དབྱིངས་མའི་ངོ་བོ་ནམ་མཁའ་སྟོང་པའི་དཀྱིལ་འཁོར་ཆོས་འབྱུང་ཟུར་དྲུག་པ་ཁ་རྒྱ་ཤིན་ཏུ་ཡངས་པ་རྩ་བ་ཕྲ་བ་བསྲུང་འཁོར་གྱི་རྡོ་རྗེའི་ས་གཞི་ལ་ཐུག་པ། དེ་བཞིན་དུ་ཆོས་འབྱུང་གི་ནང་དུ་ཨ་ལས་ཡཾ་འཕྲོས་པ་ལས་དམ་ཚིག་སྒྲོལ་མའི་ངོ་བོ་རླུང་གི་དཀྱིལ་འཁོར་གྱི་དབུས་སུ་རྒྱ་གྲམ་གྱིས་མཚན་པ་ཟླུམ་པོ་ཡེ་ཤེས་ལྔའི་རང་འོད་འཕྲོ་བ། དེའི་སྟེང་དུ་བཾ་ཆད་པ་ལས་མཱ་མ་ཀཱའི་ངོ་བོ་ཡེ་ཤེས་ཀྱི་ཆུའི་དཀྱིལ་འཁོར། དེའི་སྟེང་དུ་ལཾ་འཕྲོས་པ་ལས་སངས་རྒྱས་སྤྱན་མའི་ངོ་བོ་རིན་པོ་ཆེའི་ས་གཞི་དང་། དེའི་དབུས་སུ་རིན་པོ་ཆེ་སྣ་ལྔ་ལས་གྲུབ་པའི་རི་རབ་བང་རིམ་བཞི་པ། རི་རབ་ཀྱི་སྟེང་དུ་ཨ་ལས་བྷྲཱུཾ་ཆད་པ་ལས་རི་རབ་ཀྱི་སྟེང་གི་རྡོ་རྗེའི་ས་གཞི་ལ་དུར་ཁྲོད་བརྒྱད་ཀྱི་དབུས་སུ་ཁྲོ་བོའི་གཞལ་ཡས་ཁང་དང་། ཁྲོ་བོའི་གཞལ་ཡས་ཁང་གི་སྟེང་མདའ་ཡབ་ཀྱི་སྟེང་དུ་རྡོ་རྗེའི་ས་གཞི་སྲབ་མོ་ཆགས་པའི་སྟེང་དུ་ཞི་བའི་གཞལ་ཡས་ཁང་སྟེ། གཞལ་ཡས་ཁང་གཉིས་ཀ་རཏྣ་ལྔ་ལས་གྲུབ་པ་ཞེས་སོགས་ཆོ་གའི་ཚིག་གཅིག་གིས་དུས་

མཉམ་དུ་བསྐྱེད་པ་སྟེ་ལྷ་ཆེན་བརྒྱད་ཀྱི་ཀ་གདུང་བྱས་སོགས་ཀྱི་ཁྲོ་བོའི་གཞལ་ཡས་ཁང་གི་ཀ་གདུང་དང་། དེའི་ཚབ་ཏུ་ཞི་བ་ལ་རིན་པོ་ཆེའི་ཀ་གདུང་བྱ་སྟེ། ཞི་ཁྲོ་གཉིས་ཀྱི་གཞལ་ཡས་ཁང་ནི་བདག་གིས་བྱས་པའི་ཞི་ཁྲོའི་དཀྱིལ་འཁོར་བློས་བསླངས་བཞེངས་ཚུལ་མུ་ཏིག་ཆུན་འཕྱངས་ལྟར་གསལ་བར་བསྒོམ་པར་བྱ་སྟེ། འདིར་དེང་སང་ཆོས་འབྱུང་གི་ལུགས་དར་ཆ་ཆེ་ཞིང་དེའི་ལུགས་ལ། ཞི་ཁྲོའི་དཀྱིལ་འཁོར་གཉིས་ཁང་པ་སྟེང་འོག་ཏུ་བསྒོམ་ཚུལ་གསུངས་པ་ལྟར་བཤད་པ་སྟེ། དོན་དངོས་གནས་ལ་ནི་གཞལ་ཡས་ཁང་ཕྱི་རིན་པོ་ཆེ་སྟེ། རྩིགས་པ་རིམ་ལྔ་ནི་ཕྱི་རིན་པོ་ཆེ་ལ་ནང་ངོས་ཐམས་ཅད་ཐོད་པ་སྐམ་རློན་རྙིད་གསུམ་བརྩེགས་པ་ངོས་རྣམས་རཀྟའི་སྤྱིན་གྱིས་སྦྱར་བ་ཕ་གུ་ཡང་ཕྱི་རིན་པོ་ཆེ་དང་ནང་ངོས་ཐོད་སྐམ་བརྩེགས་པ། དྲྭ་ཕྱེད་ཀྱི་ཀ་ཐུང་རྣམས་ཀྱང་ཕྱི་ངོས་རིན་པོ་ཆེ་དང་ནང་ངོས་མི་རྐང་གི་རྣམ་པ། དྲྭ་བ་ཡང་རིན་པོ་ཆེ་དང་རྒྱུས་འཕྲེང་དང་ཐོད་ཚལ་ལ་སོགས་པའི་དྲྭ་བ་དང་དྲྭ་ཕྱེད་སྤེལ་མར་དཔྱངས་པ། གསེར་གདུང་གི་ཕྱི་ངོས་རིན་པོ་ཆེ་ནང་ངོས་ལྷུ་བཞིའི་རུས་པའི་རྣམ་པ། ཤར་བུ་རིན་པོ་ཆེ་དང་རུས་རྐང་སྤེལ་མ། མདའ་ཡབ་རིན་པོ་ཆེ་ལ་སྟེང་དུ་མཆོད་རྟེན་གྱི་རྣམ་པ་དང་སྟེང་འགེབ་ཏོག་དང་བཅས་པ་རིན་པོ་ཆེ་ལས་བྱས་པ་ལ། འགེབ་འོག་རྣམས་མི་ལྤགས་ཀྱིས་བཀབ་པ་དང་། གདུང་ཕྲན་རྣམས་ལྷ་ཕྲན་དང་གདུང་ཆེན་ལྷ་ཆེན་དང་། གཟའ་བརྒྱད་ཀྱི་ཀ་ཞུ། རུས་སྦལ་ཆུ་སྲིན་གྱི་ཀ་གདན་སོགས་བློས་བསླངས་ལས་བཤད་པ་ལྟར་ཏེ། དེ་ཡང་ཕྱི་རིན་པོ་ཆེ་ཞི་བའི་དཀྱིལ་འཁོར་དང་། ནང་དུར་ཁྲོད་འབར་བའི་ཁྲོ་བོའི་དཀྱིལ་འཁོར་གྱི་རྣམ་པ་ཅན་གྱི་གཞལ་མེད་ཁང་གཅིག་གི་ནང་དུ་ཐོག་མར་ཞི་བའི་ལྷ་ཚོགས་ཡོངས་རྫོགས་བསྒོམ། དེ་ནས་ཁྲོ་བོའི་ལྷ་ཚོགས་བསྒོམ་པའི་ཚེ་དབུས་ཀྱི་

རྣམ་སྣང་གི་གོ་སར་ཆེ་མཆོག་དང་བུདྡྷ་ཧེ་རུ་ཀ་དང་གསུམ་པོ་གཅིག་ལ་གཅིག་མ་འདྲེས་པར་བསྒོམ་པ་དང་། དེ་བཞིན་ཏུ་ཤར་གྱི་རྡོར་སེམས་དང་བཛྲ་ཧེ་རུ་ཀ་གཉིས་ཀྱང་གོ་ས་གཅིག་ལ་གཅིག་མ་འདྲེས་པར་མེ་ལོང་ནང་གི་གཟུགས་བརྙན་ལྟར་བསྒོམ་པ་ལ་སོགས་པ། ཞི་བ་ཞེ་གཉིས་ཁྲག་འཐུང་དྲུག་ཅུ་པོ་ཁང་པ་གཅིག་གི་ནང་དུ་གོ་ས་གཅིག་ལ་སོ་སོར་མ་འདྲེས་པར་བསྒོམ་པ་ནི་གཞུང་གི་དགོངས་པ་དངོས་སུ་སྣང་ལ། དེ་ལྟར་སྒོམ་མི་བདེ་ན་ལས་བྱང་ཆེ་བར་རྣམ་སྣང་བསྒོམ་པའི་ཚེ་ཀུན་བཟང་རྣམ་སྣང་གི་སྤྱི་བོར་བཏེགས་པར་གསུངས་པའི་རིགས་པ་ལྟར་ཁྲོ་བོ་རྣམས་སྒོམ་པའི་ཚེ་ཞི་བའི་ལྷ་ཚོགས་རྣམས་དེའི་སྟེང་གི་བར་སྣང་ལ་བཏེགས་པར་བྱ་བ་ཆགས་མེད་ཀྱིས་ཀྱང་གསུངས་པ་ལྟར་ཤིན་ཏུ་ལེགས་སོ། །གང་ལྟར་ཡང་བདག་བསྐྱེད་ཀྱི་གཞལ་ཡས་ཁང་འདིའི། རྡོ་རྗེའི་རྭ་གུར་འོད་ཕྲེང་དང་བཅས་པ་ནས་ནམ་མཁའི་དཀྱིལ་འཁོར་གྱི་བར་གྱི་བརྟེན་པ་ཐམས་ཅད་བསྲུང་འཁོར་གྱི་རྭ་གུར་གྱི་ནང་དུ་ཡོད་པ་ཡིན་ནོ། །གཞལ་ཡས་ཁང་བསྒོམས་ཟིན་པ་ན་བྷྲཱུཾ་བི་ཤ་སོགས་ཀྱིས་ཡེ་ཤེས་ཀྱི་རང་བཞིན་ནམ་དུ་ཡང་མི་འཇིག་པར་བྱིན་གྱིས་བརླབས། །དེ་ནས་བརྟེན་པའི་ལྷ་ཚོགས་བསྒོམ་པ་ལ། ཆོས་འབྱུང་ལྟར་ན་དང་པོ་སྟེང་ཁང་དུ་ཞི་བའི་ལྷ་ཚོགས་བསྒོམ་པའམ། དངོས་པོ་ལ་གཞལ་ཡས་ཁང་གཅིག་གི་ནང་དུ་དང་པོ་ཞི་བའི་ལྷ་ཚོགས་བསྒོམ་པ་ནི། བདག་ཉིད་ཐ་མལ་བའི་ཤེས་པ་འདི་ལ་རྣམ་རྟོག་གཟུང་འཛིན་འཁྲུལ་སྣང་གི་དྲི་མ་ཐམས་ཅད་དང་བྲལ་བའི་སྤྲོས་བྲལ་གྱི་ཡེ་ཤེས་གྱི་ངོ་བོ་ནམ་མཁའི་ཨ་ཡིག་མཐིང་ནག་དཀྱིལ་འཁོར་གྱི་དབུས་སུ་བབས་པ་ལས། རྡོ་རྗེ་མཐིང་ནག་གི་ལྟེ་བར་ཨ་སྔོན་པོས་མཚན་པར་གྱུར། དེ་ལས་འོད་ཟེར་གྱི་ཚོགས་དཔག་

ཏུ་མེད་པ་ཡར་སངས་རྒྱས་ཀྱི་ཞིང་ཐམས་ཅད་དུ་འཕྲོས་པས་རྒྱལ་བ་སྲས་དང་བཅས་པ་མཆོད། མར་འཁོར་བའི་གནས་སུ་འཕྲོས་པས་འགྲོ་བ་རིགས་དྲུག་གི་སྒྲིབ་གཉིས་སྦྱངས་ཏེ་འོད་ཟེར་རྣམས་ཚུར་འདུས་ནས་རྡོ་རྗེ་ཨ་དང་བཅས་པ་ལ་ཐིམ་པས་རྡོ་རྗེ་ཨ་དང་བཅས་པ་འོད་དུ་ཞུ་བ་ལས་རིན་པོ་ཆེ་བཞུས་ནས་སངས་རྒྱས་ཀྱི་གཟུགས་སྐུ་བླུགས་པ་ལྟར། བདག་ཉིད་སྐད་ཅིག་གིས་ཀུན་ཏུ་བཟང་པོ་ཡབ་ཡུམ་སྤྲོས་པའི་མཚན་མ་ཐམས་ཅད་སྤངས་པའི་བརྡར་(སྐུ་མདོག་མཐིང་ནག་)རྒྱན་དང་ཕྱག་མཚན་སྤངས་པ་གཞུང་ལྟར་བསྐྱེད་དེ་སྔགས་ཀྱིས་ཡེ་ཤེས་ཀྱི་སྐུར་བྱིན་གྱིས་བརླབས། སྔགས་ཀྱིས་ཡེ་ཤེས་ཀྱི་སྐུར་བྱིན་གྱིས་བརླབས་པ་འདི་འོག་མ་ཐམས་ཅད་ལ་འགྲེས་པར་བྱའོ། །དེ་ནས་འཁོར་བསྐྱེད་པ་ནི། ཐོག་མར་བདག་ཉིད་ཀུན་བཟང་ཡབ་ཡུམ་གཉིས་ཀྱིས་སྙོམས་འཇུག་གི་སྦྱོར་བ་མཛད་པས་ཡབ་ཡུམ་གྱི་བྱང་སེམས་དཀར་དམར་གཉིས་དབུ་མའི་ལམ་ནས་བརྒྱུད་དེ་ཡུམ་གྱི་པདྨར་རོ་གཅིག་ཏུ་འདྲེས། དེ་ལས་ཡབ་ཀྱི་ཐིག་ལེ་གཙོ་བོར་གྱུར་བའི་ཐིག་ལེ་ཆ་གཅིག་ཆད་པ་དེ་ༀ་ཡིག་དཀར་པོ་དང་། ཡུམ་གྱི་ཐིག་ལེ་གཙོ་བོར་གྱུར་བའི་བྱང་སེམས་ཆ་གཅིག་ཆད་པ་དེ་ལཾ་ཡིག་དཀར་པོ་གྱུར། དེ་ནས་ༀ་ཡིག་དེ་རྡོ་རྗེའི་ལམ་ནས་ཀུན་ཏུ་བཟང་པོའི་ཐུགས་ཀར་དྲངས། ལཾ་ཡིག་དེ་ཀུན་ཏུ་བཟང་མོའི་ཐུགས་ཀར་དྲངས། རང་རང་གི་ཐུགས་ཀ་ནས་ཕྱིར་སྤྲོས་ཏེ། དབུས་ཀྱི་གདན་སྟེང་དུ་བབས་ཏེ་ༀ་ལས་རྣམ་སྣང་དང་། ལཾ་ལས་དབང་ཕྱུག་མ་བསྒོམ་པ་སྟེ། ཞི་བའི་ལྷ་ཚོགས་ཡབ་ཡུམ་སྙོམས་འཇུག་ཅན་ལྔ་པོ་རྣམས་ཀྱི་ཡབ་ཀྱི་ས་བོན་ཀུན་ཏུ་བཟང་པོའི་ཐུགས་ཀར་དྲངས་ཏེ་ཕྱིར་སྤྲོས། ཡུམ་གྱི་ས་བོན་རྣམས་ཀུན་ཏུ་བཟང་མོའི་ཐུགས་ཀར་དྲངས་ཏེ་ཕྱིར་སྤྲོས་པ་དང་།

སེམས་དཔའ་སེམས་མ་རྣམས་ནི་རིགས་ལྔ་ཡབ་ཡུམ་སྙོམས་འཇུག་གི་སྦྱོར་བས་བྱང་སེམས་རང་རང་གི་ཡུམ་གྱི་པདྨར་བབས་པས་ཡབ་ཀྱི་བྱང་སེམས་གཙོ་བོར་གྱུར་བའི་ཐིག་ལེ་ལས་སེམས་དཔའ་ཡབ་ཀྱི་ས་བོན་དུ་གྱུར་པ་རིགས་ལྔ་ཡབ་ཀྱི་ཐུགས་ཀར་དྲངས། ཡུམ་གྱི་བྱང་སེམས་གཙོ་བོར་གྱུར་པའི་ཐིག་ལེ་ལས་སེམས་མ་ཡུམ་གྱི་ས་བོན་དུ་གྱུར་པ་རིགས་ལྔའི་ཡུམ་གྱི་ཐུགས་ཀར་དྲངས་ཏེ་སྤྲོས་པ་དང་། ཐུབ་པ་དྲུག་གི་ས་བོན་ཀུན་ཏུ་བཟང་པོའི་ཐུགས་ཀར་དང་། སྒོ་བཞིའི་ཡབ་ཀྱི་ས་བོན་ཡང་ཀུན་ཏུ་བཟང་པོའི་ཐུགས་ཀར་དང་། སྒོ་བཞིའི་ཡུམ་གྱི་ས་བོན་ཀུན་ཏུ་བཟང་མོའི་ཐུགས་ཀར་དྲངས་ནས་སྤྲོས་པ་དང་། ཆེ་མཆོག་ཡབ་ཡུམ་ཀྱི་ས་བོན་ཀུན་བཟང་ཡབ་ཡུམ་ཀྱི་ཐུགས་ཀ་ནས་སྤྲོས་པ་དང་། ཁྲག་འཐུང་ཡབ་ལྔའི་ས་བོན་ཆེ་མཆོག་གི་ཐུགས་ཀར་དྲངས་ཏེ་སྤྲོས་པ་དང་། ཡུམ་ཁྲོ་མོ་ལྔའི་ས་བོན་ཀྲོ་ཏི་ཤྭ་རི་མའི་ཐུགས་ཀར་དྲངས་ཏེ་སྤྲོས་པ་དང་། ཀོའུ་རི་མ་བརྒྱད་སེང་ཧ་མ་བརྒྱད་དབང་ཕྱུག་ཉེར་བརྒྱད་ཀྱི་ས་བོན་ཆེ་མཆོག་གི་ཐུགས་ཀར་དྲངས་ཏེ་སྤྲོ་བ་དང་། སྒོ་མ་བཞིའི་ས་བོན་ཁྲག་འཐུང་རིགས་བཞིའི་ཐུགས་ཀར་དྲངས་ཏེ་སྤྲོ་བ་རྣམས་ཤེས་པར་བྱས་ཏེ། ཐོག་མར་བདག་ཉིད་ཀུན་ཏུ་བཟང་པོའི་ཐུགས་ཀ་ནས་དབུས་སུ་རང་ཉིད་བཞུགས་པའི་གོ་སར་ༀ་དང་ལཾ་དཀར་པོ་འཕྲོས་མ་ཐག་རང་ཉིད་ཀུན་བཟང་ཡབ་ཡུམ་སྟེང་དུ་འཕགས། དེའི་ཤུལ་དུ་ༀ་ལས་རང་ཉིད་རྣམ་པར་སྣང་མཛད་ལ་ལཾ་ལས་བྱུང་བའི་དབང་ཕྱུག་མས་འཁྱུད་པའི་སྐུར་གསལ་ཏེ་དེའི་ཚེ་དབུས་སུ་རྣམ་སྣང་གི་སྤྱི་བོར་ཀུན་བཟང་ཡབ་ཡུམ་བཞུགས་པའོ། །ཡང་རང་ཉིད་ཀུན་ཏུ་བཟང་པོའི་ཐུགས་ཀ་ནས་ཧཱུྃ་དང་ཀུན་ཏུ་བཟང་མོའི་ཐུགས་ཀ་ནས་མུཾ་སྔོན་པོ་ཤར་དུ་འཕྲོས་ཏེ། ཧཱུྃ་ལས་རང་ཉིད་རྡོ་རྗེ་སེམས་དཔའ་ལ། མུཾ་ལས་སངས་རྒྱས་

སྤྱན་མས་འཁྱུད་པའི་སྐུར་གྱུར། དེ་ནས་རང་ཉིད་རྡོར་སེམས་ཀྱི་ཐུགས་ཀ་ནས་གཡས་སུ་ཀྵི་དཀར་པོ་དང་གཡོན་དུ་མཻ་དཀར་པོ་འཕྲོས། ཀྵི་ལས་གཡས་སུ་ས་ཡི་སྙིང་པོ། མཻ་ལས་གཡོན་དུ་བྱམས་པ་བསྐྱེད། དེ་ནས་ཡུམ་སངས་རྒྱས་སྤྱན་མའི་ཐུགས་ཀ་ནས་མདུན་དུ་ཧཱུྃ་དཀར་པོ་དང་། རྒྱབ་ཏུ་ཡང་ཧཱུྃ་དཀར་པོ་འཕྲོས་ཏེ་མདུན་དུ་ཧཱུྃ་ལས་ལ་སཻ་དཀར་མོ་དང་། རྒྱབ་ཏུ་ཧཱུྃ་ལས་པུཥྤེ་དཀར་མོ་གསལ་བཏབ་སྟེ་རྡོ་རྗེ་རིགས་ཀྱི་གཙོ་འཁོར་དྲུག་གི་ཚོམ་བུ་ཤར་དུ་བསྐྱེད། དེའི་འགྲེས་སྦྱར་ཏེ། རིན་འབྱུང་ཡབ་ཡུམ་སོགས་རིགས་ལྔའི་གཙོ་བོ་ཡབ་ཀྱི་ས་བོན་དེ་རང་ཉིད་ཀུན་ཏུ་བཟང་པོའི་ཐུགས་ཀ་ནས་དང་། ཡུམ་གྱི་ས་བོན་ཀུན་ཏུ་བཟང་མོའི་ཐུགས་ཀ་ནས་སྤྲོ་བ་དང་། རིགས་ལྔའི་འཁོར་གྱི་བྱང་སེམས་གཉིས་ཀྱི་ས་བོན་རིགས་ལྔའི་གཙོ་བོ་ཡབ་དང་སེམས་མ་གཉིས་ཀྱི་ས་བོན་རིགས་ལྔའི་ཡུམ་གྱི་ཐུགས་ཀ་ནས་སྤྲོ་བ་ཡིན་པར་ཤེས་པར་བྱས་ནས་རིན་འབྱུང་དང་སྣང་མཐའ་དོན་གྲུབ་གཙོ་འཁོར་དྲུག་དྲུག་རྣམས་ལྷོ་དང་ནུབ་དང་བྱང་དང་གསུམ་དུ་བསྐྱེད་པར་བྱ་སྟེ། དེ་ལ་རིགས་ལྔའི་གཙོ་བོ་རྣམས་རང་ཉིད་ཡིན་པར་བསྒོམ་པར་མ་ཟད་ཞི་ཁྲོའི་ལྷ་ཡོངས་རྫོགས་ལ་རང་ཉིད་ཡིན་པའི་འདུ་ཤེས་དང་ང་རྒྱལ་ཐོབ་པར་བྱེད་པ་ནི་གནད་ཆེ་ཤོས་ཡིན། དེ་ལ་རིགས་ལྔའི་གཙོ་བོ་རྣམས་རང་རང་གི་གདན་ལ་ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་རང་རང་གི་ཕྱག་མཚན་ཐུགས་ཀར་བསྟོད་དེ་འཛིན་པ། གཡོན་པ་ཕྱག་མཚན་དང་བཅས་པས་ཡུམ་གྱིས་སྐུ་རྒྱབ་ནས་འཁྱུད་པ། རིགས་ལྔའི་ཡུམ་རྣམས་ཀྱིས་ཞབས་གཉིས་ཡབ་ཀྱི་སྐེད་པ་ནས་འཁྲིལ་ཏེ། སྐུ་རྒྱབ་ཏུ་རྐང་མཐིལ་གཉིས་སྤྲད་པ་པདྨའི་སྐྱིལ་ཀྲུངས་ཀྱིས་འཁྱུད་པ་དང་། ཕྱག་གཡས་པས་རང་རང་གི་ཕྱག་མཚན་དང་བཅས་པས་ཡབ་ཀྱི་

མགུལ་བ་གཡོན་པ་ནས་འཁྱུད་པ། གཡོན་པས་རང་རང་གི་ཕྱག་མཚན་ཡབ་ཀྱི་དཔུང་པ་གཡས་པའི་ཐད་དུ་འཛིན་པ། རིགས་ལྔ་ཡབ་ཡུམ་གཉིས་ཕྱག་མཚན་གཅིག་པ་ཡིན་ནོ། །སེམས་དཔའ་རྣམས་ཀྱི་སྐྱིལ་ཀྲུང་ནི་འཇིག་རྟེན་པའི་མི་རྣམས་ཀྱི་སྐྱིལ་ཀྲུང་དང་འདྲ། སེམས་མ་རྣམས་ཀྱི་ཕྱེད་སྐྱིལ་ནི་ཞབས་གཡོན་པ་སེམས་དཔའི་སྐྱིལ་ཀྲུང་ལ་ཞབས་གཡས་ཕྱེད་བརྐྱང་བྱས་པ་སྟེ། ཞི་བའི་ལྷ་ཚོགས་རིགས་ལྔ་ཡབ་ཡུམ་བཅུ་དང་། སེམས་དཔའ་ཡབ་ཡུམ་བཅུ་དྲུག་ནི། རིན་པོ་ཆེའི་དབུ་རྒྱན་དང་། སྙན་རྒྱན། མགུལ་རྒྱན། སྐ་རགས་དང་། དཔུང་གདུབ། ཕྱག་གདུབ། སོར་གདུབ། རྐང་གདུབ། དོ་ཤལ། སེ་མོ་དོ་རྣམས་དང་། དར་དམར་པོའི་སྨད་དཀྲིས། སྔོན་པོའི་སྟོད་གཡོགས། དཀར་པོའི་ཕུ་དུང་། སེར་པོའི་དབུ་རྒྱན་གྱི་རྩ་བའི་ཅོད་པཎ། ལྗང་གུའི་སྐྲ་ཆིངས་ཏེ་དར་དང་རིན་པོ་ཆེས་བརྒྱན་པ་སྐུ་ལ་རུས་པ་དང་རྒྱུས་པ་སོགས་མེད་པས་སྐུའི་ཆ་གང་ནས་ཀྱང་དགུག་ཏུ་རུང་བས་མཉེན་པ། སྐུའི་ཆ་གང་ཡིན་ཀྱང་རང་ཚད་དང་མཐུན་པའི་ཁོ་ལག་ཡངས་ཤིང་མཉེན་ཆ་མེད་པའི་འཁྲོག་པོ་མ་ཡིན་པས་ལྕུགས་པ། སྐུ་ཤ་ལྷོད་པ་མ་ཡིན་པར་འཚམས་པར་དམ་ཧྲིལ་ལེ་བའི་འཁྲུལ་བག་ཆགས་པ། འཁྲི་ཤིང་ལྟར་ལྡེམ་ལ་དྲང་བ། གཉེར་མ་སོགས་རྒས་པའི་སྐྱོན་དང་བྲལ་བས་གཞོན་པའི་ཚུལ་ཅན། རང་རང་གི་ཁ་དོག་ལྟར་ཁ་དོག་དྭངས་ཤིང་གསལ་བ། ཟླ་འོད་བཞིན་རང་མདངས་ཀྱི་འོད་ལྷང་ལྷང་འཚེར་བ། མཛེས་ཤིང་ཅི་ཙམ་བལྟས་ཀྱང་ངོམས་པ་མེད་པས་ལྷུན་སྡུག་པ། གཞན་གྱིས་ཟིལ་གྱིས་གནོན་པར་མི་ནུས་པར་མ་ཟད་གཞན་དག་ཟིལ་གྱིས་གནོན་པའི་གཟི་བརྗིད་འབར་བའི་སྐུ་ཅན་དང་། སྐུའི་སྣང་ཆ་ཤིན་ཏུ་མངོན་པར་བཀྲ་ཡང་རང་བཞིན་གྱིས་སྟོང་པའི་སྣང་སྟོང་ཟུང་འཇུག་གམ། ཟབ་གསལ་ཟབ་པ་

སྟོང་ཉིད་རྟོགས་པའི་ཤེས་རབ་དང་གསལ་བ་སྟོང་ཉིད་རྟོགས་པའི་ཡེ་ཤེས་ཀྱི་གཟུང་ཆ་ལྷར་ཤར་བའི་ལྷའི་རྣལ་འབྱོར་གཉིས་ངོ་བོ་དབྱེར་མེད་དུ་གྱུར་པ་མཆན། གཉིས་མེད་ཀྱི་སྐུར་འཛིན་མེད་མ་བཅོས་པའི་ལྟ་བ་དྲན་པའི་སྒོ་ནས་བསྒོམ་པར་བྱའོ། །ལྷ་སྐུ་སྣང་སྟོང་དུ་བསྒོམ་པ་འདི་ཞི་ཁྲོའི་ལྷ་ཐམས་ཅད་ལ་འགྲེས་པར་བྱའོ། །ཡང་རིགས་ལྔའི་ཕྱི་རོལ་དུ་ཐུབ་པ་དྲུག་བསྒོམ་པ་ནི། ཨ་བདག་ཉིད་ཀུན་བཟང་ཐུགས་ཀ་ནས༔ ཀྲེཾཿབྲེཾཿ༴ སོགས་ཏེ་རང་ཉིད་ཀུན་ཏུ་བཟང་པོའི་ཐུགས་ཀ་ནས་སྟེང་དུ་སྟེ་ཤར་དུ་ཀྲེཾ་དཀར་པོ། འོག་ཏུ་སྟེ་ནུབ་དུ་བྲེཾ་ནག་པོ། ཤར་ལྷོར་ཏྲུཾ་ལྗང་ནག །ལྷོ་ནུབ་ཏུ་ཀྵི་ཾསེར་པོ། ནུབ་བྱང་དུ་སྲུཾ་མཐིང་ཀབྱང་ཤར་དུ་ཡེ་དམར་པོ་འཕྲོས་པ་ལས་ཐུབ་པ་དྲུག་ཆོས་གོས་རྣམ་གསུམ་གསོལ་བ་དབུ་གཙུག་ཏོར་དང་ལྡན་པ་སྤྲུལ་སྐུའི་ཆ་ལུགས་ཅན་བཞེངས་སྟབས་སུ་པདྨའི་གདན་ལ་བཞུགས་པ་ཕྱག་གཉིས་རང་རང་གི་ཕྱག་མཚན་འཛིན་པ་གསལ་འདེབས། དེ་ནས་སྒོ་བཞིར་སྒོ་བ་ཡབ་ཡུམ་བརྒྱད་བསྒོམ་པ་ནི། ཨ་བདག་ཉིད་ཀུན་བཟང་ཡབ་ཡུམ་གྱི༔ ཐུགས་ནས༴ སོགས་ཏེ་འདིར་ནི་ཚིག་ཟིན་ལས་གསུངས་པ་ལྟར་ཀུན་བཟང་ཡབ་ཀྱི་ཐུགས་ཀ་ནས་སྒོ་བ་ཡབ་རྣམས་དང་ཡུམ་གྱི་ཐུགས་ཀ་ནས་ཡུམ་རྣམས་ཀྱི་ས་བོན་སྤྲོ་བ་སྟེ། ཡབ་ཀྱི་ཐུགས་ནས་ཧཱུྃ་དང་ཡུམ་གྱི་ཐུགས་ནས་ཛཿདཀར་པོ་ཤར་སྒོ་དང་། དེ་བཞིན་ཏུ་ལྷོ་སྒོར་ཧཱུྃ་ཧཱུྃ་སེར་པོ། ནུབ་སྒོར་ཧཱུྃ་བཾ་དམར་པོ། བྱང་སྒོར་ཧཱུྃ་ཧོ་ལྗང་གུ་རྣམས་འཕྲོས་པ་ལས་ཤར་སྒོར་རྣམ་རྒྱལ་དཀར་པོ་ལ་ལྕགས་ཀྱུ་མ་༼ཞགས་པ་མ་༽དཀར་མོས་འཁྱུད་པ་སོགས་སྒོ་བཞིར་སྒོ་བ་ཡབ་ཡུམ་བརྒྱད་བསྒོམ་པ་སྟེ། ཡབ་རྣམས་ཞབས་གཡས་བསྐུམ་གཡོན་བརྐྱངས་ཀྱི་འདོར་ཐབས་སུ་བཞུགས་པ། ཕྱག་གཡས་པས་རང་རང་གི་ཕྱག་མཚན་ནམ་མཁར་ཕྱར་བ། གཡོན་པས་ཕྱག་མཚན་

དང་བཅས་པ་ཐུར་དུ་བསྡིགས་པ། ཡུམ་རྣམས་ཞབས་གཡས་བསྐུམ་པས་ཡབ་ཀྱི་སྐེད་པར་འཁྲིལ་ཞིང་གཡོན་བརྐྱངས་པ། ཕྱག་གཡས་ཕྱག་མཚན་དང་བཅས་ཡབ་ཀྱི་སྐེད་ནས་འཁྲིལ་བ། གཡོན་པ་ཕྱག་མཚན་བཅས་ཡབ་ཀྱི་དཔུང་པ་གཡས་ཐད་དུ་བརྐྱངས་པ་སྟེ་ཡབ་ཡུམ་གཉིས་ཀ་གཞུང་ལྟར་ཕྱག་མཚན་འདྲ་བའོ། །སྒོ་བ་ཡབ་ཡུམ་བརྒྱད་པོ་ནི་ཐམས་ཅད་མཚུངས་པར་དབུ་སྐྲ་གྱེན་དུ་བརྫེས་པ། དབུ་ལ་ཐོད་པ་སྐམ་པོའི་སྟེང་དུ་རིན་པོ་ཆེའི་རྒྱན་ལྔའི་བརྒྱན་པ། ཐོད་པ་དར་གྱིས་དཀྲིས་པའི་སྣེ་ཅོད་པཎ་དུ་བྱས་པ། རུས་པའི་སྙན་ཆ། མགུལ་རྒྱན། གདུ་བུ། ཐོད་པ་སྐམ་རློན་རྙིད་གསུམ་གྱི་ཕྲེང་བ་གསུམ་དང་། སྦྲུལ་གྱི་ཞགས་པ་སྐེ་ནས་ཐུར་དུ་དཔྱངས་པ། གླང་ལྤགས་འོག་དང་མི་ལྤགས་སྟེང་དུ་སྦྱར་ནས་གཉིས་ཀའི་སྤུ་ཕྱིར་བསྟན་མགོ་གཡས་སུ་བསྟན་པ་སྐུ་ཡི་སྟོད་དུ་གསོལ་བ། སྙིང་གར་རོ་ཐལ་གྱི་ཚོམ་བུ། མཁུར་ཚོས་ལ་ཁྲག་གི་ཐིག་ལེ། ཨོལ་སྐོ་ལ་ཞག་གི་ཟོ་རིས་སྐུ་སྨད་ལ་སྟག་ཤམས་གསོལ་བ་དང་། སྐུ་ལ་རྒྱན་སྣ་ཚོགས་ཀྱིས་བརྒྱན་པ་སོགས་ལས་སྐུ་ཤིན་ཏུ་འཕྱོར་སྒེག་དང་ལྡན་པའི་ཉམས་དང་ལྡན་པ། སྐུ་རབ་ཏུ་གཏུམ་ཞིང་རྒྱས་པ་སོགས་ལས་འཇིག་རྟེན་འདི་ན་ཤིན་ཏུ་དཔའ་བའི་སྙིང་སྟོབས་དང་ལྡན་པའི་ཉམས་དང་། ཞལ་བསྒྲད་པ་སོགས་ལས་བལྟ་བ་ཙམ་ཡང་མི་བཟོད་པའི་འཇིགས་སུ་རུང་བ་སྟེ་སྐྲག་ཐུབ་པའི་ཉམས་དང་ལྡན་པ་སྟེ་སྐུའི་གར་གསུམ་དང་། སྐུ་སྦོམ་པ་དང་མགྲིན་པ་རྒྱས་པ་སོགས་ལས་སྟོང་གསུམ་གང་བའི་རྒོད་པའི་ཧ་སྒྲ་ཆེན་མོ་འབྱུང་བས་རྒོད་པའི་ཉམས་དང་། སྐུ་ཁྲོས་ཤིང་འབར་བ་སོགས་ལས་གདུག་པ་ཅན་ཐམས་ཅད་ལ་གཤེ་ཞིང་གཞོམ་པའི་སོད་སོད་རྒྱོབ་རྒྱོབ་ལ་སོགས་པའི་གསུང་སྒྲ་དྲག་པོ་འབྱུང་བའི་ཉམས་དང་། སྐུ་ཁྲོ་གཏུམ་སོགས་ལས་གསུང་གི་སྒྲ་དེ་དག་

ཀྱང་བདུད་སྡེའི་སྙིང་འགས་པར་བྱེད་པའི་ཤིན་ཏུ་རྩུབ་པའི་སྒྲ་མི་བཟད་པ་འབྱུང་བའི་རྔམ་པའི་ཉམས་ཏེ་གསུང་གི་གར་གསུམ་དང་། མཛད་སྤྱོད་གཞན་དོན་མཛད་པ་སོགས་ལས་སེམས་ཅན་ལ་སྙིང་རྗེའི་ཐུགས་དང་ལྡན་པའི་ཉམས་དང་། རབ་ཏུ་ཁྲོས་པ་སོགས་ལས་གདུག་པ་ཅན་ལ་སྡང་བའི་ཐུགས་དང་ལྡན་པའི་ཉམས་དང་། གཞན་གྱིས་བལྟར་མི་བཟོད་པའི་གཏུམ་རྔམ་སོགས་ལས་གདུག་ཅན་སྒྲོལ་བ་སོགས་ལ་དྲག་ཏུ་རྔམ་པའི་ཐུགས་དང་ལྡན་པའི་ཉམས་སྟེ་ཐུགས་ཀྱི་ཉམས་གསུམ་དང་(བཅས་)འབར་བའི་གར་དགུ་དང་ལྡན་པ་སྣང་ལ་རང་བཞིན་མེད་པ་སྣང་སྟོང་གཉིས་ཚོགས་ཀྱི་སྐུར་བསྒོམ། གར་དགུ་འདི་འོག་གི་ཁྲག་འཐུང་ཡབ་ཡུམ་ཐམས་ཅད་ལ་སྦྱར་ཏེ་བསྒོམ། དེ་ལྟར་ཞི་བའི་ལྷ་ཚོགས་ཞེ་གཉིས་དང་རྟེན་དང་བརྟེན་པར་བཅས་པ་ཐམས་ཅད་རང་དང་རྒྱུད་ཐ་དད་མ་ཡིན་པར་ཐམས་ཅད་རང་རང་གི་སེམས་ཀྱི་སྣང་ཆ་ལས་གྲུབ་པ་དང་རང་སེམས་ཀྱི་སྣང་ཆ་ལ་གང་སྣང་ཐམས་ཅད་ཡེ་གདོད་མ་ནས་ཞི་བའི་རྟེན་དང་བརྟེན་པའི་ལྷ་ཚོགས་ཀྱི་རྣམ་པར་གྲུབ་པ་དང་། སྣོད་བཅུད་ཐམས་ཅད་བདག་གིས་བསྒོམ་པའི་ཞི་བའི་དཀྱིལ་འཁོར་རྟེན་དང་བརྟེན་པའི་རྣམ་པར་ཤར་བ་འདི་ལས་གཞན་དུ་མེད་པར་འདི་ཁོ་ནའོ་སྙམ་དུ་སྣང་སྲིད་ཞི་བའི་དཀྱིལ་འཁོར་དག་པ་རབ་འབྱམས་སུ་མཐོང་བར་བྱས་ཏེ་སེམས་མ་ཡེང་བར་ཡིད་ཀྱི་ཡུལ་དུ་གསལ་སང་ངེ་བསྒོམ་པར་བྱས་ཏེ་ༀ་ཨཱཿཧཱུྃ་གསུམ་གྱིས་ཞི་བའི་ལྷ་ཚོགས་ཐམས་ཅད་ཀྱི་སྐུ་ནི་ཐུགས་ཡེ་ཤེས་ལས་གྲུབ་པའི་དབྱིབས་དང་ཁ་དོག་གི་རྣམ་པ་ཐམས་ཅད་དུ་མི་ཤིགས་པ་རྡོ་རྗེའི་སྐུ་དང་། གསུང་ནི་སྒྲ་སྐད་མཐའ་ཡས་པའི་སྐད་ཀྱིས་ཆོས་སྒོ་མཐའ་དག་ཅིག་ཆར་དུ་སྟོན་པའི་རྡོ་རྗེའི་གསུང་དང་། ཐུགས་ནི་ཤེས་བྱ་

མཐའ་དག་ཅིག་ཆར་དུ་གཟིགས་པའི་རྡོ་རྗེའི་ཐུགས་སུ་བསྒོམ་སྟེ། དེ་ཐམས་ཅད་རང་ཉིད་ཡིན་ནོ་སྙམ་དུ་ང་རྒྱལ་འཛིན་ནོ། །དེ་ནས་ཆོས་འབྱུང་ལྟར་ན། འོག་ཁང་ཁྲོ་བོའི་དཀྱིལ་འཁོར་ནང་དུ་ཁྲོ་བོའི་ལྷ་ཚོགས་རྣམས་བསྒོམ་པའམ། དངོས་གནས་ལ་ཞི་བའི་ལྷ་ཚོགས་རྣམས་དང་གོ་ས་གཅིག་ཏུ་ཞི་ཁྲོའི་ལྷ་ཚོགས་བསྒོམ་པར་བྱ་སྟེ། མི་བདེ་ན་ཁྲོ་བོའི་ལྷ་ཚོགས་རྣམས་བསྒོམ་པའི་ཚེ་ཞི་བ་ཞེ་གཉིས་གཞལ་ཡས་ཁང་གི་བར་སྣང་ལ་བཏེག་ནས་དེའི་ཤུལ་དུ་ཁྲག་འཐུང་དྲུག་ཅུ་བསྒོམ་པར་བྱ་སྟེ། ཧཱུྃ་རང་བྱུང་རང་ཤར༴ སོགས་ཏེ་སུས་ཀྱང་བཟོས་པ་མ་ཡིན་པར་རང་བྱུང་དུ་བྱུང་ཞིང་ཡེ་ཤེས་ཀྱི་རང་སྣང་ལས་ཤར་བའི་རང་གི་འོག་ཏུ་དཀྱིལ་འཁོར་གྱི་དབུས་སུ་རང་ཀུན་ཏུ་བཟང་པོའི་ཐུགས་ཀ་ནས་ཧཱུྃ་སྨུག་ནག་དང་། ཀུན་ཏུ་བཟང་མོའི་ཐུགས་ཀ་ནས་་ཕྱིར་ལོག་སྨུག་ནག་འཕྲོས་པ་ལས་དབུས་སུ་མཁའ་ལྡིང་བརྒྱད་ཀྱི་སྟེང་དུ་རིན་པོ་ཆེ་ཟུར་བརྒྱད་དང་པདྨ་ཉི་མའི་སྟེང་དུ་ཆེ་མཆོག་ཡབ་ཡུམ་གཉིས་ཡེ་ཤེས་ཀྱི་རང་སྣང་དུ་ཤར་བར་བསྒོམ། དེ་ནས་དབུས་ཀྱི་ཆེ་མཆོག་ཡབ་ཀྱི་ཐུགས་ཀ་ནས་ཧཱུྃ་སྨུག་ནག་དང་ཡུམ་གྱི་ཐུགས་ཀ་ནས་ཡབ་ལ་འཁྱུད་ཚུལ་མཚོན་པའི་་ཕྱིར་བལྟས་སྨུག་ནག་གཉིས་དབུས་ཀྱི་ཆེ་མཆོག་གི་གདན་ཐོག་ཏུ་སྤྲོས་པ་དང་། ཆེ་མཆོག་ཡབ་ཡུམ་སྟེང་དུ་འཕགས་པ་དུས་མཉམ་དུ་མོས། དེའི་ཤུལ་དུ་ཧཱུྃ་ཧཱུྃ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་སྒྲིབ་པ་སྦྱངས་བའི་དོན་བྱས། ཚུར་འདུས་པ་ལས་རང་ཉིད་དབུས་སུ་བྷུདྡྷ་ཧེ་རུ་ཀ་ཡབ་ཡུམ་དུ་བསྒོམ། ཆེ་མཆོག་བྷུདྡྷ་ཧེ་རུ་ཀའི་སྤྱི་བོར་བཞུགས། དེ་བཞིན་དུ་ཁྲག་འཐུང་ཡབ་རྣམས་ཀྱི་ས་བོན་རང་ཉིད་ཆེ་མཆོག་དང་། ཡུམ་རྣམས་ཀྱི་ས་བོན་ཡུམ་ཀྲོ་ཏི་ཤྭ་རི་མའི་ཐུགས་ཀ་ནས་སྤྲོས་ཏེ།

ཁྲག་འཐུང་ལྷག་མ་བཞི་བསྒོམ། ཆེ་མཆོག་ཡབ་ཡུམ་དང་ཁྲག་འཐུང་ཡབ་ཡུམ་ལྔ་ནི་ཞལ་གསུམ་ཕྱག་དྲུག་ཞབས་བཞི་གཡས་བསྐུམ་གཡོན་བརྐྱངས་པ་ཕྱག་བར་བ་གཉིས་ཀྱིས་ཕྱག་མཚན་ཐུགས་ཀར་སྟེང་འོག་ཏུ་འཛིན་པ། ཕྱག་ལྷག་མ་བཞི་གཡས་གཡོན་དུ་བརྐྱངས་པ་རྡོ་རྗེ་དང་རིན་པོ་ཆེའི་གཤོགས་པ་བརྐྱངས་པའོ། །ཡུམ་རྣམས་སྐུ་མདོག་རང་རང་གི་ཡབ་དང་མཚུངས་ཤིང་ཞལ་གཅིག་ཕྱག་གཉིས་མ། ཞབས་གཡས་པ་ཡབ་ཀྱི་རྐེད་ལ་འཁྲིལ་ཞིང་གཡོན་བརྐྱངས་པ། གཡས་ཀྱི་ཕྱག་མཚན་རང་གི་ཡབ་ཀྱི་ཕྱག་དང་པོའི་ཕྱག་མཚན་དང་གཡོན་པ་ཐམས་ཅད་བྷནྡྷ་འཛིན་པ། ཆེ་མཆོག་དང་ཁྲག་འཐུང་ཡབ་ཡུམ་ཐམས་ཅད་ཞལ་ཁྲོ་གཉེར་ཅན་སྤྱན་གསུམ་དམར་བ་སྡང་མིག་གིས་ལྟ་བ་དབུ་སྐྲ་གྱེན་དུ་བརྫེས་པ། སྨ་ར་དང་ཨག་ཚོམ་ལས་མེའི་ཚྭ་ཚྭ་འཕྲོ་བ་དང་ཐོད་སྐམ་གྱི་དབུ་རྒྱན་ནས་ཞབས་གདུབ་ཀྱི་བར་ཞི་བའི་སྒོ་བ་དང་འདྲ་ཞིང་ཡབ་རྣམས་སྟག་ཤམ་དང་ཡུམ་རྣམས་གཟིག་ཤམ་མནབ་པ་རཱུ་ཏྲའི་ལུས་ཀྱི་སྐ་རེགས་བྱས་པའོ། །སྒེག་པ་སོགས་གར་དགུ་ནི་གོང་ལྟར་རོ། །དེ་ནས་ཁྲག་འཐུང་རིགས་བཞིའི་ཕྱི་རོལ་དུ་བདག་ཉིད་ཆེ་མཆོག་གི་ཐུགས་ཀ་ནས་ལྷ་སོ་སོའི་རང་མདོག་གི་ཧ་བརྒྱད་ཕྱོགས་མཚམས་བརྒྱད་དུ་འཕྲོས་པ་ལས་ཀཽ་རི་མ་བརྒྱད་དང་། དེའི་ཕྱི་རོལ་ཏུ་ཆེ་མཆོག་གི་ཐུགས་ཀ་ནས་ཧེ་བརྒྱད་འཕྲོས་པ་ལས་སེང་ཧ་མ་བརྒྱད་བསྒོམ། དེ་ནས་ཤར་གྱི་བཛྲ་ཧེ་རུ་ཀའི་ཐུགས་ཀ་ནས་ཛ་དཀར་པོ་དང་རཏྣ་ཧེ་རུ་ཀའི་ཐུགས་ཀ་ནས་ཧཱུྃ་སེར་པོ་སོགས་འཕྲོས་པ་ལས། སྒོ་བཞིར་སྒོ་མ་བཞི་དང་། བདག་ཉིད་ཆེ་མཆོག་གི་ཐུགས་ཀ་ནས་ལྷ་སོ་སོའི་རང་མདོག་གི་བྷྱོཿཉེར་བརྒྱད་དཀྱིལ་འཁོར་གྱི་ཕྱི་ཁྱམས་རྟ་བབས་ཀྱི་གཡས་གཡོན་གྱི་

གནས་གསུམ་གསུམ་དང་སྒོ་ཁང་བཞིར་འཕྲོས་པ་ལས་དབང་ཕྱུག་ཉེར་བརྒྱད་བསྐྱེད་པར་བྱ་སྟེ། ཀཽ་རི་མ་བརྒྱད་མན་ཆད་ཞིང་གི་སྟོད་གཡོགས་ཅན་དང་སྲིན་མོའི་གཟུགས་ཅན་ནོ། །འདི་དག་ལ་རུས་རྒྱན་དང་གཟིག་ཤམ་སོགས་ཕྱག་ལེན་ལ་ཡོད་ཀྱང་གཞུང་དུ་ནི་མ་བཤད་དོ། །དེ་དག་གི་སྐུ་མདོག་ཕྱག་མཚན་བཞུགས་སྟངས་སོགས་ནི་གཞུང་དུ་གསལ་བ་ལྟར་བསྒོམ་སྟེ། རང་གི་སེམས་ཀྱི་སྣང་བ་ལ་ཤར་བའི་ཕྱི་སྣོད་ནི་བདག་གིས་བསྒོམ་པའི་ཁྲོ་བོའི་རྟེན་གྱི་དཀྱིལ་འཁོར་དང་། རང་སྣང་ལ་སྣང་བའི་བཅུད་ཀྱི་སེམས་ཅན་རྣམས་ནི་བདག་གིས་བསྒོམ་པའི་ཁྲོ་བོའི་ལྷ་ཚོགས་ཏེ། དེ་འདྲའི་རྟེན་དང་བརྟེན་པ་ཐམས་ཅད་རང་སེམས་ཀྱི་སྣང་ཆ་ལས་གྲུབ་པ་དང་སྣང་ཡང་བདེན་གྲུབ་ཀྱིས་སྟོང་པའི་ཆུ་ཟླ་ལྟ་བུར་བསྒོམ་མོ། །བསྙེན་བཟླས་ཙམ་ལ་བདག་བསྐྱེེད་རྐྱང་བ་ལས་མ་བསྒོམ་ཀྱང་ཆོག་མོད། ཚོགས་དང་མཆོད་པ་འབུལ་བའི་རྟེན་དང་བསྒྲུབ་པ་མ་གྲོལ་བར་བརྟན་པར་བཞུགས་ནས་བརྟེན་པའི་ཆེད་དུ་མདུན་བསྐྱེད་བསྒོམས་ན་འདིར་བདག་བསྐྱེད་གཙོ་བོར་བྱས་པའི་སྐབས་ཡིན་པས་བདག་བསྐྱེད་ཀྱི་གཞལ་ཡས་ཁང་གི་མདུན་ཕྱོགས་གྱི་དུར་ཁྲོད་གནས་པའི་རྡོ་རྗེ་རྭ་བའི་ནང་དུ་། མདུན་བསྐྱེད་ཀྱི་འོག་གི་ནམ་མཁའི་ཆོས་འབྱུང་ཟུར་དྲུག་ནས་མདུན་བསྐྱེད་ཀྱི་རྭ་གུར་གཞལ་ཡས་ཁང་དང་བཅས་པ་བསྒོམ་པ་སྟེ། ནུས་ན་གོང་གི་ཆོ་ག་གཅིག་གིས་བདག་མདུན་གཉིས་ཀ་དུས་གཅིག་ཏུ་བསྒོམ། མི་ནུས་ན་བདག་བསྐྱེད་ཀྱི་ལྷ་ཚོགས་ཐམས་ཅད་བསྒོམ་ཟིན་པའི་སྐབས་འདིར་བྷྲཱུཾ་ནི་གཞལ་ཡས་ཁང་དང་། ཧཱུྃ་ནི་བརྟེན་པ་ལྷ་དང་། པྲ་ཝེ་ཤ་སོ་སོར་དབྱེ་བའི་དོན་ཅན་ཡིན་པས་བྷྲཱུཾ་ཧཱུྃ་པྲ་ཝེ་ཤ་ཡ་ཕཊ་ཅེས་པས་བདག་བསྐྱེད་ཀྱི་རྟེན་དང་བརྟེན་པའི་

དཀྱིལ་འཁོར་ལས་མདུན་བསྐྱེད་ཀྱི་རྟེན་དང་བརྟེན་པའི་དཀྱིལ་འཁོར་སོ་སོར་ཆད་ནས་གོང་གི་གནས་སུ་རྟེན་གཏོར་དང་དབྱེར་མེད་དུ་འཁོད་པར་བསམས་ལ། ༈ དེ་ནས་ཡེ་ཤེས་པ་སྤྱན་འདྲེན་པ་ནི། སངས་རྒྱས་རྣམས་ཀྱི་ལོངས་སྐུ་ནི་རང་སྣང་ལས་གྲུབ་པའི་འོག་མིན་དག་པའི་ཞིང་ན་བཞུགས་པ་སྟེ། དེ་ཡང་རྟེན་གཞལ་ཡས་ཁང་དང་བརྟེན་པ་དམ་པ་རིགས་བརྒྱ་སོགས་གདུལ་བྱ་གང་འདུལ་གྱི་ལྷ་ཚོགས་དང་སྤྱོད་ལམ་མཐའ་ཡས་པའི་བདག་ཉིད་ཅན་དུ་བཞུགས་པ་ཡིན་ཞིང་དེ་ཡང་ཐུགས་ནི་ཆོས་ཐམས་ཅད་ཀྱི་རང་བཞིན་སྟོང་པ་ཉིད་ལ་རོ་གཅིག་དབྱེར་མེད་དུ་སོང་བའི་སྒོ་ནས་མཉམ་པར་བཞག་པ་ལས་དོན་དམ་པར་ཤར་ཕྱོགས་ཀྱི་སྣང་བ་སོགས་སྤྲོས་པ་ཐམས་ཅད་དང་བྲལ་ཀྱང་རྩལ་སྣང་དུ་སྐུ་དང་ཡེ་ཤེས་ཀྱི་སྣང་བ་དང་། དག་པའི་ཡུལ་གྱི་མཐའ་དབུས་ལ་སོགས་པའི་སྣང་ཆ་མ་འགགས་པར་ཡོད་པར་ཤེས་པར་བྱས་ཏེ། ཐོག་མར་རང་ཉིད་ཀུན་བཟང་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། འོག་མིན་རང་སྣང་དག་པའི་གནས་སུ་བཞུགས་པའི་ཞི་ཁྲོའི་ལྷ་ཚོགས་རབ་འབྱམས་ཀྱི་ཐུགས་ཀར་ཕོག་པས་གདུལ་བྱས་སྤྱན་དྲངས་པ་ལ་འབྱོན་པར་དགོངས་པར་མོས་ལ། ཚིག་གི་སྒོ་ནས་སྤྱན་དྲངས་པ་ནི། ཧཱུྃ་དཔེ་མེད་བསམ་བརྗོད༴ སོགས་ཏེ། རྫོགས་པའི་སངས་རྒྱས་རྣམས་གང་ལ་མཉམ་པར་བཞག་ནས་བཞུགས་པའི་གནས་ནི་འཇིག་རྟེན་འདིའི་དཔེ་མེད་པ་སྒྲ་རྟོག་གིས་མངོན་སུམ་དུ་མཐོང་བ་དང་བརྗོད་པའི་ཡུལ་དང་བྲལ་བའི་རང་བཞིན་ཆོས་ཀྱི་དབྱིངས་སུ་རྩལ་སྣང་ལ་རྟེན་དང་བརྟེན་པའི་ལྷར་ཤར་བའི་དབུས་ཕྱོགས་སུ། ཆོས་སྐུ་ཀུན་ཏུ་བཟང་པོ་སྤྲོས་བྲལ་ཉག་གཅིག་གི་ཡེ་ཤེས་རང་གསལ་བ་དྲི་མ་ཐམས་ཅད་དག་པ་ལྷུན་གྲུབ་ཏུ་ཡེ་ཤེས་ལྔ་དང་ལྡན་པ་ཉོན་མོངས་པ་ལྔ་དག་པའི་

བདག་ཉིད་བདེ་གཤེགས་རིགས་ལྔ་དང་འདུ་འབྲལ་མེད་པའི་བདག་ཉིད་ཅན་ཁྱེད་ནི་འགྲོ་བ་མ་ལུས་པའི་དོན་སྒྲུབ་པའི་ཕྱིར་དུ། བདག་གི་ཡིད་སྣང་དག་པ་ལས་ཤར་བའི་རྒྱལ་བ་ཞི་ཁྲོའི་དཀྱིལ་འཁོར་གྱི་གནས་འདིར་བྱོན་པར་མཛོད་ཅིག །དེ་བཞིན་དུ་དཔེ་མེད་བསམ་བརྗོད་བྲལ་བའི་དབྱིངས་ནས་ཤར་བའི་ཕྱོགས་ལྔ་ནས་ལོངས་སྤྱོད་རྫོགས་སྐུའི་ཆ་ལུགས་འཆང་བའི་གཏི་མུག་རྣམ་དག་ཆོས་དབྱིངས་ཡེ་ཤེས་དང་ལྡན་པའི་གཟུགས་ཕུང་དག་པ་རྣམ་པར་སྣང་མཛད་ལ་སོགས་པ་རྒྱལ་བ་རིགས་ལྔ་ཡུམ་ལྔ་དང་སྙོམས་པར་འཇུག་པའི་སྐུ་ཅན་སྐུ་གསུང་ཐུགས་ཀྱི་ཡོན་ཏན་གྲངས་མེད་པ་འགག་མེད་དུ་གྲུབ་པ་རྣམས་དང་། རྣམ་ཤེས་ཚོགས་བརྒྱད་གནས་སུ་དག་པའི་ངོ་བོ་བྱང་ཆུབ་སེམས་དཔའ་བརྒྱད་དང་། རྣམ་ཤེས་བརྒྱད་ཀྱི་ཡུལ་བརྒྱད་དག་པའི་ངོ་བོ་སེམས་མ་བརྒྱད་དེ་རིགས་ལྔ་གཙོ་འཁོར་ཐམས་ཅད་འགྲོ་བ་མ་ལུས་པའི༴ སོགས། གོང་ལྟར་ལྷག་མ་རྣམས་ཤེས་སླ། དེ་ནས་ཁྲོ་བོའི་ལྷ་ཚོགས་རྣམས་གདུང་བའི་དབྱིངས་ཀྱིས་སྤྱན་དྲངས་པ་ནི། ཧཱུྃ་སངས་རྒྱས་ཀུན་གྱི༴ སོགས་ཏེ། ཁྲག་འཐུང་ཧེ་རུ་ཀ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་བདག་ཉིད་ཡིན་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཕྱོགས་གཅིག་ཏུ་ཡོངས་སུ་རྫོགས་པའི་དཔལ་དང་ལྡན་པ་སྟེ། དེ་འདྲའི་ཡོན་ཏན་མངའ་བ་ཁྲག་འཐུང་ཧེ་རུ་ཀ་ཡབ་ཡུམ་དང་། སེམས་ཅན་གྱི་ཉོན་མོངས་པ་འཇོམས་པའི་ཕྱིར་དུ་ཁྲག་འཐུང་རིགས་ལྔ་ལ་སོགས་པའི་སྐུར་སྤྲུལ་བའི་འཁོར་ཚོགས་དུ་མ་དང་བཅས་པ་འགྲོ་བ་སོགས་ཏེ་ཕྱི་མ་རྣམས་དེའི་འགྲོས་ཀྱིས་ཤེས་ནུས་པ་ལྟར་དམིགས་ནས་ཚིག་བརྗོད་ཅིང་། སྔགས་བརྗོད་པའི་ཚེ་ཡེ་ཤེས་པའི་ཞི་ཁྲོའི་ལྷ་ཚོགས་རྟེན་དང་བརྟེན་པར་བཅས་པ་ཐམས་ཅད་རང་བཞིན་འོག་

མིན་ནས་བྱོན་ཏེ། དམ་ཚིག་པའི་རྟེན་དང་བརྟེན་པའི་དཀྱིལ་འཁོར་གྱི་སྟེང་དུ་ཐོ་བརྩེགས་སུ་བཞུགས་པར་མོས། དེ་ནས་ཡེ་ཤེས་པ་རྣམས་དམ་ཚིག་པ་ལ་དབྱེར་མེད་དུ་བཞུགས་གསོལ་བྱ་བ་ནི། ཧཱུྃ་སྒྱུ་མ་གཟུགས་བརྙན༴ སོགས་དཔེར་ན་སྒྱུ་མའི་རྟ་གླང་དུ་སྣང་ཡང་རྟ་གླང་གིས་སྟོང་པའི་སྣང་སྟོང་གཉིས་ཚོགས་ཡིན་པ་ལྟར་གཞལ་ཡས་ཁང་དུ་སྣང་ཡང་རང་བཞིན་གྱིས་སྟོང་པའི་ཡེ་ཤེས་ལྔའི་རང་འོད་འཕྲོ་བའི་གཞལ་ཡས་ཁང་གི་དབུས་སུ་སེང་གེ་ལ་སོགས་པའི་གདན་ལྔའི་སྟེང་དུ་པད་ཟླ་ཉི་མའི་སྟེང་དུ་ཆོས་སྐུ་ཀུན་ཏུ་བཟང་པོ་ཡབ་ཡུམ་དང་དེའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་རྩལ་སྣང་དུ་ཤར་བའི་རིགས་ལྔ་ཡབ་ཡུམ་བཅུ་དང་། སེམས་དཔའ་སེམས་མ་ཡབ་ཡུམ་བཅུ་དྲུག་སོགས་ཁྱེད་རྣམས་རང་སྣང་དག་པ་ལས་ཤར་བའི་ལྷའི་གདན་འདི་རྣམས་ཀྱི་གནས་སུ་དམ་ཚིག་པ་དང་དབྱེར་མེད་དུ་བཞུགས་པར་གསོལ། ཚིག་དོན་ལྷག་མ་རྣམ་དེས་འགྲེས། ཡཾ་བཾ་སོགས་ཀྱིས་ཡེ་ཤེས་པ་རྣམས་ལ་སྔར་བསྒོམ་པའི་རླུང་ཆུ་སའི་དཀྱིལ་འཁོར་རི་རབ་གཞལ་ཡས་ཁང་དང་པད་ཟླ་ཉི་མའི་གདན་རྣམས་བཞུགས་པའི་གནས་སུ་ཕུལ་ཏེ། ཧཱུྃ་སངས་རྒྱས་ཞི་བའི༴ སོགས་ཀྱིས་ཁྱེད་རྣམས་རང་རང་ལ་ཕུལ་བའི་གདན་འདི་ལ་དམ་ཚིག་པ་དང་ཆུ་ལ་ཆུ་བཞག་པ་ལྟར་དབྱེར་མེད་དུ་བཞུགས་ཤིག །རིགས་ལྔ་སོགས་ལྷ་ཐམས་ཅད་ཀྱང་དུ་མ་སོ་སོར་སྣང་ཡང་ཐམས་ཅད་ཀུན་ཏུ་བཟང་པོའི་ཡེ་ཤེས་གཅིག་གི་རང་བཞིན་ལས་གྲུབ་པའི་ངོ་བོ་གཅིག་ཡིན་པས། ཐམས་ཅད་ངོ་བོ་གཅིག་པའི་ངང་དུ་རང་རང་གི་དམ་ཚིག་པ་དང་དབྱེར་མེད་དུ་བཞུགས་པར་མཛོད་ཅིག་ཅེས་བྱ་སྟེ། ༀ་ཨཱཿཧཱུྃ་སོགས་ཀྱིས་ཡེ་ཤེས་པའི་ཞི་བའི་རྟེན་གཞལ་ཡས་ཁང་དང་། དམ་ཚིག་པའི་རྟེན་གཞལ་

ཡས་ཁང་དང་ཡེ་ཤེས་པའི་ལྷ་རྣམས་ཀྱི་སྐུ་གསུང་ཐུགས་དམ་ཚིག་པའི་ལྷ་རྣམས་ཀྱི་སྐུ་གསུང་ཐུགས་དང་དབྱེར་མེད་དུ་གྱུར་ནས་ཐུགས་དགྱེས་བཞིན་དུ་བཞུགས་པར་བསྒོམ། དེ་ནས་ཁྲོ་བོའི་དཀྱིལ་འཁོར་བཞུགས་གསོལ་བྱ་བ་ནི། ཧཱུྃ་ཞི་བ་ལོངས་སྐུའི༴ སོགས་ཏེ། དེ་ལ་ཞི་བ་ལོངས་སྐུའི་རིག་རྩལ་ཆོ་འཕྲུལ་ཞེས་པ་ནི། ཆེ་མཆོག་ནི་ཀུན་ཏུ་བཟང་པོ་དྲག་པོའི་སྐུར་བསྟན་པ། བྷུདྡྷ་ཁྲག་འཐུང་རྣམ་པར་སྣང་མཛད་དྲག་པོའི་སྐུར་བསྟན་པ་ལ་སོགས་པའི་དོན་དེ་ལྷག་མ་རྣམས་ཤེས་སླ། བྷྲཱུཾ་ཨེ་ཡཾ་སོགས་ཀྱིས་འོག་གི་འབྱུང་བ་ལྔ་ནས་གཞལ་ཡས་ཁང་གི་བར་དང་། རཏྣ་ཙཀྲ་སོགས་ཀྱིས་བྱོལ་སོང་གི་གདན་དང་བྲག་རི་པད་ཟླ་ཉི་གདན་ཕུལ་ཏེ་ༀ་ཨཱཿཧཱུྃ་སོགས་ཀྱིས་གོང་བཞིན་དམ་ཡེ་བསྲེ། དེ་ནས་ལྷ་ཚོགས་རྣམས་ལ་རང་རང་གི་སྐུ་ལས་ལྷ་མོ་དཔག་མེད་དང་འཇམ་དབྱངས་ཕྱག་རྡོར་སོགས་གྲངས་མེད་པ་སྤྲུལ་ནས་བདག་མདུན་གྱི་ལྷ་ཚོགས་ཐམས་ཅད་ལ་གུས་པས་ཕྱག་འཚལ་བ་ནི། ཧཱུྃ་ཡིད་ཤེས་རྣམ་དག༴ སོགས་ཏེ། དེ་ཡང་ལྷ་དེ་དང་དེ་ལ་རང་རང་གི་དག་པའི་སྒོ་ནས་ཕྱག་འཚལ་བ་སྟེ། མ་དག་པའི་ཡིད་ཀྱི་ཤེས་པ་འཁྲུལ་བའི་དྲི་མའི་ཆ་ཐམས་ཅད་རྣམ་པར་དག་པའི་ཟག་མེད་ཀྱི་ཡིད་ཀྱི་ཤེས་པའི་ངོ་བོ་ནི་ཡབ་ཀུན་ཏུ་བཟང་པོ་ཁྱེད་ཡིན་ལ། ཡིད་ཡུལ་དུ་སྣང་བའི་ཆོས་ཁམས་ཐམས་ཅད་དྲི་མས་དག་པའི་ཟག་མེད་ཡེ་ཤེས་ཀྱི་སྣང་ཆའི་ཆོས་ཁམས་ནི་ཡུམ་ཀུན་ཏུ་བཟང་མོ་ཡིན་སྙམ་པ་དང་། ཀུན་བཟང་ཡབ་ཡུམ་གཉིས་ནི་དུས་གསུམ་གྱི་སངས་རྒྱས་གྱི་སྔོན་ནས་སངས་རྒྱས་ཤིང་། སངས་རྒྱས་ཐམས་ཅད་བསྐྱེད་པ་ཡིན་པས་སངས་རྒྱས་སྤྱིའི་མེས་པོ་ལྟ་བུ་སྟེ། དེ་འདྲའི་ཀུན་བཟང་ཡབ་

ཡུམ་གཉིས་ལ་གུས་པའི་འདུད་དོ་སྙམ་དུ་བསམ། ལྷག་མ་ཐམས་ཅད་དེས་འགྲེས་པས་ཤེས་སོ། །རང༷་སྣང༷་གནས༷་ཡུལ༷་དག༷་པ༷་ཞེས་པ་རྣམས་ནི་རང་སྣང་ལ་གནས་ཡུལ་ཐམས་ཅད་དག་པ་ཡེ་ཤེས་ཀྱི་ལྷར་ཤར་བའི་སྒོ་ནས་ཕྱག༷་འཚལ༷་ལོ༷། ཞེས་པ་སྟེ། ཕྱག་འཚལ་བའི་ཡུལ་ཐམས་ཅད་དག་སྣང་དུ་ཤར་དགོས་པའི་དོན་ནོ། །ཁྲོ་བོའི་ཕྱག་འཚལ་སྐབས། མ་རིག་རྩད་གཅོད་དང་ཞེ་སྡང་རྩད་གཅོད་དང་ང་རྒྱལ་རྩད་གཅོད་སོགས་ནི་ལྷ་དེ་དང་དེས་སེམས་ཅན་ལ་ཞེ་སྡང་བཅོམ་པ་ལ་སོགས་པའི་འཕྲིན་ལས་ཀྱི་ཡོན་ཏན་དང་གཉིས༷་སུ༷་མེད༷་པའི༷་ཚུལ༷་གྱི༷ས་ཞེས་པ་རྣམས་ནི་ལྷ་དེ་རང་ཉིད་ངོ་བོ་དབྱེར་མེད་ཡིན་པར་མོས་པའི་སྒོ་ནས་ཕྱག༷་འཚལ༷་བ་སྟེ་དངོས་སུ་ན་གཉིས་མེད་དུ་མཐོང་བ་དགོས་སོ། །ཧཱུྃ་ཆོས་སྐུ༴ སོགས་ནི་རྒྱལ་བ་ཞི་ཁྲོ་རྣམས་ཀྱི་ཐུགས་ཆོས་ཀྱི་སྐུ་ནི་ཤེས་བྱ་ཐམས་ཅད་ལ་དེ་དག་མཁྱེན་པའི་སྒོ་ནས་ནམ་མཁའ་ལྟར་ཁྱབ་པ་དང་། དེ་དག་གི་ལོངས་སྐུ་ནི་ཉི་མ་ལས་འོད་བཞིན་ཐུགས་ཆོས་སྐུའི་སྣང་ཆ་ལས་གྲུབ་པ་དང་། སྤྲུལ་སྐུ་ནི་མཁའ་ལ་འཇའ་ཚོན་སྣ་ཚོགས་ཤར་བ་ལྟར་ལོངས་སྐུའི་གང་འདུལ་གྱི་སྐུ་རགས་པ་བསམ་གྱིས་མི་ཁྱབ་པ་སྣ་ཚོགས་བསྟན་པ་སྟེ། དེ་ལྟ་བུའི་སྐུ་གསུམ་དང་ལྡན་པའི་ཞི་ཁྲོའི་ལྷ་ཚོགས་ཐམས་ཅད་ལ་ཕྱག་འཚལ་ལོ་ཞེས་པའོ། །དེ་ནས་མཆོད་པ་འབུལ་བ་ལ། དང་པོ་ཕྱི་མཆོད་ནི། ཧཱུྃ་སྲིད་པར་གཏོགས་པའི་མེ་ཏོག༴ ནམ་མཁའི་ཁམས་འདིར་སྲིད་པ་འཇིག་རྟེན་གྱི་ཁམས་སུ་གཏོགས་པ་ཇི་སྙེད་མཆིས་པ་དག་ན་ཡོད་པའི་མེ་ཏོག་གི་རིགས་དཀར་སེར་དམར་ལྗང་སྔོན་པོ་མ་ལུས་པ་དང་། བདག་གིས་དངོས་སུ་བཤམས་པ་འདི་དང་ཡིད་ཀྱིས་ཀྱང་མེ་ཏོག་

དཔག་མེད་སྤྲུལ་ཏེ་འཁོར་འདས་གཉིས་ཀྱི་འབྱོར་བའི་མེ་ཏོག་ཀུན་བླ་མ་དང་ཞི་ཁྲོའི་ཚོགས་ལ་འབུལ་ལོ། མེ་ཏོག་རྣམས་སྤྱན་ལ། སྣང་ཡང་རང་བཞིན་གྱིས་སྟོང་པའི་མེ་ཏོག་འདི་རྣམས་འགྲོ་བ་མ་ལུས་པའི་ཚོགས་བསགས་པའི་ཆེད་དུ་བཞེས་སུ་གསོལ་ཅིག་ཅེས་མོས་ཏེ། སྔགས་བརྗོད་པ་ན་ལྷ་མོ་དཔག་ཏུ་མེད་པས་ལྷ་རྣམས་ཀྱི་དབུའི་རྒྱན་དུ་མེ་ཏོག་ཕུལ་བས་ཐུགས་ཟག་མེད་ཀྱི་བདེ་བས་མཉེས་པར་བསམ། ལྷག་མ་ཐམས་ཅད་དེས་འགྲེས་ཚོར་སྟོང་སོགས་ནི་སྣའི་ཚོར་ཡང་རང་བཞིན་སྟོང་པའི་དྲི། མར་མེ་ལ་གསལ་བའི་ངོ་བོར་སྣང་ཡང་དང་། དྲི་ཆབ་ལ་ལུས་ལ་བདེ་ཉམས་སུ་སྣང་ཡང་དང་། ཞལ་ཟས་ལ་ལྗགས་ལ་རོ་མྱོང་ཅན་དུ་སྣང་ཡང་དང་། རོལ་མོ་རྣམས་ལ་སྒྲ་གྲགས་པའི་རྣམ་པར་སྣང་ཡང་རང་བཞིན་གྱིས་སྟོང་པའི་རོལ་མོ་འདི་འགྲོ་བ་སོགས་སོ། །དེ་ནས་ནང་གི་མཆོད་པ་ནི། །ཧཱུྃ་བླ་མ་ཀུན་བཟང༴ སོགས་ཏེ་སྣོད་དང་བཅུད་ཀྱི་དབྱིབས་དང་ཁ་དོག་གི་གཟུགས་ཇི་སྙེད་མཆིས་པ་ཐམས་ཅད་སྤྱན་ལ་མཛེས་པའི་གཟུགས་མཛེས་པ་མི་འདྲ་བ་སྣ་ཚོགས་པ་འཛིན་པའི་ལྷ་མོ་དཔག་ཏུ་མེད་པ་སྤྲུལ་ནས་ལྷ་རྣམས་ཀྱི་སྤྱན་ལ་གཟུགས་ཀྱི་མཆོད་པ་ཕུལ་ནས་ཐུགས་དགྱེས་པ་སོགས་འོག་མ་རྣམས་ལ་དེ་ལྟར་མོས་སོ། །གསང་མཆོད་ནི། ཧཱུྃ་གསང་མཆོག་སྐུ༴ སོགས་ཏེ། ལྷ་རྣམས་ལ་གཟུགས་སྒྲ་དྲི་རོ་རེག་བྱ་ལྔ་དང་ཁྱད་པར་སྙོམས་འཇུག་གི་རེག་བྱའི་ཟག་མེད་ཀྱི་བདེ་བ་བསྐྱེད་པའི་གསང་བའི་རིག་མ་སྐུའི་རིགས་ཀྱི་རིག་མ་སོགས་རིག་མ་ལྔ་པོ་གྲངས་མེད་པ་སྤྲུལ་ཏེ་ཕུལ་བས་ཐུགས་བདེ་སྟོང་གིས་ཚིམ་པར་མོས། དེ་ནས་ནང་གི་མཆོད་པ་སྨན་རཀ་གཏོར་གསུམ་འབུལ་བ་ནི། དང་པོ་བདག་མདུན་ཐམས་ཅད་ལ་སྔར་བྱིན་གྱིས་བརླབས་པའི་སྨན་གྱི་བདུད་རྩི་འཐོར། ངག་ཏུ་

ཧཱུྃ་རིགས་ལྔ༴ སོགས་བརྗོད་ཅིང་བདུད་རྩི་འདི་རིགས་ལྔ་དང་ཡུམ་ལྔའི་ས་བོན་ལས་ཤ་ལྔ་དང་བདུད་རྩི་ལྔའི་རྣམ་པར་གྲུབ་པའི་རྒྱུ་བྱས་ཡེ་ཤེས་ལྔའི་རང་བཞིན་དུ་བྱིན་གྱིས་བརླབས་པའི་རྐྱེན་ལས་བྱུང་བའི་ཐབས་དང་ཤེས་རབ་ཀྱི་ངོ་བོར་བྱུང་བ་ཡིན་ལ། རིགས་ལྔ་ཡབ་ཡུམ་གཉིས་སུ་མེད་པའི་ཐབས་ཤེས་ཀྱི་ནང་དུ་དམ་པ་རིགས་བརྒྱའི་ལྷ་ཚོགས་ཐམས་ཅད་འདུས་པས་ན་ཞི་ཁྲོ་དམ་པ་རིགས་བརྒྱའི་སྐུ་གསུང་ཐུགས་ལས་གྲུབ་པའི་བདུད་རྩི་འདི་བླ་མ་དང་། ཀུན་ཏུ་བཟང་པོ་དང་ཞི་ཁྲོའི་ལྷ་ཚོགས་ཐམས་ཅད་ལ་འབུལ་ལོ། ཁྱེད་རྣམས་ཀྱིས་བདག་ཅག་འགྲོ་བ་རྣམས་ལ་ཐུགས་བརྩེ་བས་དགོངས་ཏེ་བཞེས་ནས་བདག་ལ་དབང་བསྐུར་བ་དང་མཆོག་ཐུན་མོང་གི་དངོས་གྲུབ་མ་ལུས་པ་སྩོོལ་ཅིག་སྙམ་དུ་བསམས་ལ། སྔགས་བརྗོད་ཚེ་བདུད་རྩི་འཐོར་བའི་ཟེགས་མ་ལྷ་ཐམས་ཅད་ཀྱི་ལྗགས་ལ་ཐིམས་པས་བདེ་བ་ཆེན་པོས་ཐུགས་རྒྱུད་ཡོངས་སུ་གང་བར་མོས། དེ་ནས་བདུད་རྩི་ལས་དངོས་གྲུབ་ལེན་པ་ནི། ཧཱུྃ་རིགས་ལྔ་ཡབ་ཡུམ༴ སོགས་ཏེ་རིགས་ལྔ་ཡབ་ཡུམ་གྱི་རང་བཞིན་གྱི་དམ་རྫས་སྦྱར་བ་ལས་བྱུང་བའི་བདུད་རྩི་རིགས་ལྔ་དང་ཡེ་ཤེས་ལྔའི་ངོ་བོར་གྱུར་པའི་བདུད་རྩི། མཚན་ལྡན་ཀ་པཱ་ལའི་ནང་དུ་འཁྱིལ་བ་རང་བཞིན་གྱིས་གྲུབ་པའི་དངོས་གྲུབ་ཀྱི་སྙིང་པོ་ལེན་པ་འདི་ལས་སྣང་བའི་གོ་མ་འགགས་ཙམ་དུ་ཡོད་པའི་དམ་པ་རིགས་བརྒྱའི་སྐུ་གསུང་ཐུགས་ཀྱི་དངོས་གྲུབ་ཀྱི་སྙིང་པོ་ལེན་པར་བྱའོ་སྙམ་དུ་བསམས་ལ། མཐེབ་སྲིན་གྱིས་བདུད་རྩི་བཅུས་ཏེ་སྔགས་བརྗོད་ཅིང་རང་གི་གནས་གསུམ་དུ་གཏུགས་ཤིང་རང་གི་ལུས་ལ་དམ་པ་རིགས་བརྒྱའི་སྐུའི་དངོས་གྲུབ་ཐོབ་པས་ལུས་སྐུ་རྡོ་རྗེར་གྱུར་པ་སོགས་སུ་བསམ།

གཉིས་པ་རཀྟ་འབུལ་བ་ནི། ཧཱུྃ་དུག་ལྔ༴ སོགས་བརྗོད་ཅིང་། གཏི་མུག་ལ་སོགས་པའི་ཉོན་མོངས་པ་དུག་ལྔ་ཡེ་ཤེས་ལྔར་གནས་གྱུར་པའི་སྒོ་ནས་བསྒྲལ་བའི་ཡེ་ཤེས་ཁྲག་གི་རྣམ་པར་ཤར་བའི་ཁྲག་འདི་ནི་གནས་ལུགས་ཀྱི་ངོ་བོ་རིག་པའི་སྣང་ཆ་གོ་མ་འགགས་པར་ཤར་ཡང་། སྣང་བ་དེ་ལ་འཛིན་ཞེན་གྱིས་སྟོང་བའི་སྣང་སྟོང་ཟུང་འཇུག་དང་། གསལ་རིག་ཏུ་ཤར་ཡང་གསལ་བ་ཞེན་འཛིན་གྱིས་སྟོང་པའི་གསལ་སྟོང་ཟུང་འཇུག་དང་། ཉམས་བདེ་བའི་ངོ་བོར་སྣང་ཡང་བདེ་བ་ལ་ཞེན་པས་སྟོང་པའི་བདེ་སྟོང་ཟུང་འཇུག །གནས་ལུགས་ཀྱི་ངོ་བོ་དྲན་བཞིན་དུ་ཡོད་ཀྱང་ཞེན་གཏད་ཀྱི་དྲན་པས་སྟོང་པའི་དྲན་སྟོང་ཟུང་འཇུག་སྟེ། དེ་འདྲའི་འཁྲུལ་བའི་གཟུང་འཛིན་གཉིས་སུ་མེད་པའི་འཛིན་བྲལ་གྱི་ཡེ་ཤེས་ཀྱི་ངོ་བོ་ཡིན་ཏེ། དེ་འདྲའི་གསང་བའི་ཁྲག་ཆེན་པོ་འདི་བླ་མ་དང་ཀུན་བཟང་ཞི་ཁྲོའི་ཚོགས་ལ་འབུལ་ལོ་སྙམ་དུ་སྔགས་བརྗོད་ཅིང་རཀྟ་ལྗགས་ལ་ཕུལ་བས་ཁམས་གསུམ་གྱི་ཉོན་མོངས་པ་དུག་ལྔ་གསོལ་བས་ཡེ་ཤེས་ལྔར་བསྒྱུར་ཏེ་འཁོར་བའི་རྒྱ་མཚོ་སྟོང་པར་བསམ། གསུམ་པ་གཏོར་མ་འབུལ་བ་ནི། ༀ་ཨཱཿཧཱུྃ་གཟུགས་ཕུང༴ སོགས་ཏེ། རང་གི་གཟུགས་ཕུང་རྣམ་དག་རྣམ་པར་སྣང་མཛད་དང་ཆོས་དབྱིངས་ཡེ་ཤེས་ཀྱི་ངོ་བོར་གྱུར་པ་རིགས་གཞན་གྱི་རྟེན་ཡིན་པས་བྷནྡྷ་ལྟ་བུ། ཚོར་བའི་ཕུང་པོ་རིན་འབྱུང་དང་མཉམ་ཉིད་ཡེ་ཤེས་ཀྱི་ངོ་བོར་དག་པ་ནི་སངས་རྒྱས་རྣམས་ཀྱིས་ལོངས་སྤྱོད་བྱའི་གཙོ་བོ་ཡིན་པས་གཏོར་མ་བཤམས་པ་ལྟ་བུ། འདུ་ཤེས་ཀྱི་ཕུང་པོ་སྣང་མཐའ་དང་སོར་རྟོག་ཡེ་ཤེས་ཀྱི་ངོ་བོར་དག་པ་ནི་ཤེས་བྱ་སོ་སོ་བ་དག་ལ་སོ་སོར་སྤྱོད་པའི་ཡེ་ཤེས་ཀྱི་ཆ་དུ་མ་ཡོད་པས་མཐེབ་ཀྱུ་དུ་མས་བསྐོར་བ་ལྟ་བུ། འདུ་བྱེད་

ཀྱི་ཕུང་པོ་དོན་གྲུབ་དང་བྱ་གྲུབ་ཡེ་ཤེས་ཀྱི་ངོ་བོར་དག་པ་ནི་སངས་རྒྱས་རྣམས་འཇིག་རྟེན་ན་ཆེ་བའི་རྒྱན་དང་གང་འདུལ་གྱི་ཕྲིན་ལས་སྣ་ཚོགས་འཇུག་པའི་རྒྱུ་ཡིན་པས་གཏོར་མའི་རྒྱན་ལྟ་བུ། རྣམ་ཤེས་ཀྱི་ཕུང་པོ་མི་བསྐྱོད་པ་དང་མེ་ལོང་ཡེ་ཤེས་ཀྱི་ངོ་བོར་དག་པ་ནི་རིགས་གཞན་དང་ཡེ་ཤེས་གཞན་བཞི་ལ་ཁྱབ་བྱེད་ཡིན་པས་སྣོད་རྒྱན་སོགས་དང་བཅས་པའི་གཏོར་མ་སྤྱི་ལྟ་བུ་སྟེ་དེ་ལྟར་དམིགས་ནས་འབུལ་བའོ། །མདོར་ན་རང་གི་ཕུང་པོ་ལྔ་པོ་འདི་རིགས་ལྔ་ཡེ་ཤེས་ལྔའི་ངོ་བོར་མོས་ནས་མཆོད་ཡུལ་རྣམས་ཀྱི་ཆོས་སྐུ་ལ་འབུལ་བར་མོས་པའོ། །དེ་ནས་ལོངས་སྐུ་ལ་གནས་ལུགས་སྟོང་ཉིད་རྟོགས་པའི་ཡེ་ཤེས་ཀྱི་གཏོར་མ་འབུལ་བ་ནི། ཨེ་སྟོང་པ་འགག་མེད༴ སོགས་བརྗོད་བཞིན་འདི་ལྟར་མོས་ཏེ་གནས་ལུགས་རྟོགས་པའི་ངོ་བོ་ལ་བདེན་གྲུབ་དང་བདེན་ཞེན་ལ་སོགས་པའི་སྤྲོས་པ་ཐམས་ཅད་སྟོང་སེང་ངེ་བར་མཐོང་བའི་སྟོང་པ་འདི་ནི་གསལ་བ་དང་བདེ་བ་སོགས་ཀྱི་རྟེན་ཡིན་པས་བྷནྡྷ་ལྟ་བུ་དང་། སྟོང་པ་དེའི་ངང་ནས་སྟོང་པའི་ངོ་བོ་དེ་རབ་ཏུ་གསལ་ཞིང་སྣང་བའི་གསལ་རིག་གི་ཡེ་ཤེས་གོ་མ་འགགས་པ་ནི་རྣལ་འབྱོར་བའི་མྱོང་བྱ་དང་། རྟོགས་བྱའི་གཙོ་བོ་ཡིན་པས་གཏོར་མ་ལྟ་བུ་དང་། གསལ་རིག་གི་ཡེ་ཤེས་བདེ་བ་ཆེན་པོ་དེའི་རྩལ་ལམ་རང་བཞིན་དུ་སེམས་ཅན་ལ་སྙིང་རྗེ་དང་ཤེས་བྱ་སོ་སོ་བ་རྣམས་མཁྱེན་པའི་ཐུགས་རྗེ་དང་ཡེ་ཤེས་ཀྱི་ཆ་མཐའ་ཡས་པ་གསལ་རིག་དེ་ལ་ལུ་གུ་རྒྱུད་དུ་འབྲེལ་ཞིང་རྫོགས་པར་ཡོད་པ་ནི་གསལ་བ་དེའི་རྒྱན་ཡིན་པས་གཏོར་མའི་རྒྱན་ལྟ་བུ་སྟེ། དེ་འདྲའི་གནས་ལུགས་ཀྱི་ཡེ་ཤེས་གསལ་སྟོང་ཐུགས་རྗེ་གསུམ་དབྱེར་མེད་པ་མཆོད་ཡུལ་རྣམས་ཀྱི་ལོངས་སྤྱོད་རྫོགས་པའི་སྐུ་ལ་འབུལ་བར་བགྱིའོ་སྙམ་དུ་བསམ། དེ་ནས་སྤྲུལ་སྐུ་ལ་སྣོད་བཅུད་ཀྱི་གཏོར་མ་འབུལ་བ་

ནི། །ༀ་ཨཱཿཧཱུྃ་ཕྱི་སྣོད་འཇིག་རྟེན༴ སོགས་ཏེ་སྣོད་ཀྱི་འཇིག་རྟེན་ནི་རྟེན་ཡིན་པས་གཏོར་གཞོང་ལྟ་བུ། བཅུད་ཀྱི་སེམས་ཅན་ཐམས་ཅད་ནི་བརྟེན་པ་པོ་དང་དགོས་པའི་གཙོ་བོ་ཡིན་པས་གཏོར་མ་ལྟ་བུ། འཇིག་རྟེན་ཁམས་ཀྱི་འབྲུ་མར་ལ་སོགས་པའི་རྩི་བཅུད་དང་། ནས་འབྲས་ལ་སོགས་པའི་འབྲས་བུ་དང་། ཨ་རུ་ར་ལ་སོགས་པའི་སྨན་རྣམས་ནི་གསོལ་བའི་རྒྱན་ཡིན་པས་གཏོར་རྒྱན་ལྟ་བུ་སྟེ། དེ་འདྲའི་སྣོད་བཅུད་འབྲུ་སྨན་ལ་སོགས་པའི་གཏོར་མ་འདི་མཆོད་ཡུལ་རྣམས་ཀྱི་སྤྲུལ་སྐུ་ལ་ཕུལ་བར་མོས། དེ་ནས་སྔགས་ཀྱིས་ཤ་ལྔ་ལས་གྲུབ་པའི་གཏོར་མ་རིགས་ལྔ་དང་ཡེ་ཤེས་ལྔའི་རང་བཞིན་ཅན་གྱི་དམ་རྫས་མཆོད་པ་འདི་ལྷ་ཐམས་ཅད་ཀྱི་ལྗགས་ལ་ཕུལ་ནས་ཐུགས་ལ་དགྱེས་པ་བསྐྱེད་པར་བསམ་མོ། །དེ་ཡང་གུ་རུ༴ སོགས་ཀྱི་རྩ་བ་གསུམ་དང་། བྷོ་དྷི་ཙིཏྟ༴ སོགས་ཀྱིས་ཞི་བའི་ལྷ་ཚོགས་རྣམས་དང་། རུ་ལུ༴ སོགས་ཀྱིས་ཁྲོ་བོའི་ལྷ་ཚོགས་རྣམས་ལ་འབུལ་བ་ཡིན་པས་བསྡུ་ན་དེ་ཙམ་གྱི་ཆོག །རྒྱས་པར་ན་དེའི་རྗེས་སུ་ལྷ་སོ་སོའི་མཚན་སྔགས་ཀྱིས་ལྷ་སོ་སོ་ལ་འབུལ་ལོ། །དེ་ནས་བདག་མདུན་གྱི་ལྷ་ཚོགས་རྣམས་ལ་ཡོན་ཏན་གྱི་སྒོ་ནས་བསྟོད་པ་ནི། སྔར་སྤྲུལ་པའི་ལྷ་མོ་རྣམས་དང་འཇམ་དཔལ་སོགས་ཀྱིས་ཀྱང་བསྟོད་པར་མོས་པ་ཡིན་ལ། གཙོ་བོ་རང་ཉིད་ཀྱིས་ཀུན་ཏུ་བཟང་པོ་སོགས་བདག་མདུན་གྱི་ལྷ་ཚོགས་ཐམས་ཅད་ཀྱི་ཡོན་ཏན་དྲན་པའི་སྒོ་ནས་བསྟོད་པ་འབུལ་བ་སྟེ། དེ་ལ་ཐོག་མར་བདག་མདུན་གྱི་ཀུན་ཏུ་བཟང་པོ་ཡབ་ཡུམ་གཉིས་ལ་དམིགས་ཏེ། དེའི་སྐུ་གསུང་ཐུགས་དང་ཡོན་ཏན་ཕྲིན་ལས་ལྔ་ལ་བསྟོད་པ་སྟེ། ༀ༷༔ བླ༷་མ༷་ཀུན༷་བཟང༷༴ སོགས་ཏེ། ཀུན་ཏུ་བཟང་པོ་ནི་གནས་ལུགས་སྟོང་པ་ཉིད་ལ་རོ་གཅིག་ཏུ་མཉམ་པར་བཞག་

པའི་ཡེ་ཤེས་ཆོས་ཀྱི་སྐུ་དེེ་གཟུགས་ཅན་གྱི་སྐུའི་རྣམ་པར་བཞེང་པ་ཡིན་པས། ཆོས་ཀྱི་སྐུའི་ངོ་བོ་ཡིན་ཞིང་སྐུ་དེ་ནི་ཡེ་ཤེས་ལས་གྲུབ་པ་ཡིན་པས་གདོས་བཅས་ལ་སོགས་པའི་མཚན་མ་དང་བློས་བྱས་གཟུང་བའི་མཚན་མ་སོགས་དང་བྲལ་བ་དང་། སྐུའི་གནས་ཚུལ་ཇི་ལྟ་བ་བཞིན་དུ་ཚིག་ཙམ་གྱིས་རྟོགས་པ་དང་བྲལ་བ་འོག་མིན་ན་བཞུགས་པའི་སྐུ་དེ་ཉིད་གནས་ཚུལ་ལས་ཅུང་ཟད་ཀྱང་གཡོ་མི་དགོས་པར་འཇིག་རྟེན་གྱི་ཁམས་མཐའ་ཡས་པ་རྣམས་སུ་རེ་རེ་བྱོན་པ་ལྟ་བུ་གར་ཡང་ཐོགས་པ་མེད་པ་ཟང་ཐལ་གྱི་སྐུ་ཡིན་ལ། ཀུན་ཏུ་བཟང་མོ་ནི་སྒྲ་རྟོག་གི་ཇི་བཞིན་པར་བསམ་བརྗོད་ཀྱི་ཡུལ་ལས་འདས་པའི་ཆོས་སྐུ་དེ་བཞིན་ཉིད་ཀྱི་ངོ་བོ་ཡིན་ལ། ཡབ་ཡུམ་གཉིས་ཀ་དུག་ལྔ་རང་གྲོལ་ཞེས་པ་ཉོན་མོངས་པ་ལྔ་པོ་ཉོན་མོངས་པ་ལྔའི་རང་བཞིན་སྟོང་པ་ཉིད་ཀྱི་དབྱིངས་སུ་རང་ཐིམ་པའི་ཚུལ་གྱིས་སྤངས་པའི་ཡེ་ཤེས་ལས་གྲུབ་པའི་སྐུ་སྟེ། སྤྲོས་བྲལ་ཐིག་ལེ་ཉག་གཅིག་གི་ཡེ་ཤེས་ཀྱི་སྐུ་ཡབ་ཀུན་ཏུ་བཟང་པོ་དང་། དེ་ཡང་གང་ལ་མཉམ་པར་བཞག་པའི་སྒོ་ནས་སྙོམས་པར་འཇུག་པའི་ཡུལ་རྟག་ཆད་ཀྱི་མཐའ་ཐམས་ཅད་དང་བྲལ་བའི་དེ་བཞིན་ཉིད་ཀྱི་ངོ་བོ་ཡུམ་ཀུན་ཏུ་བཟང་མོ་གཉིས་ནི་ལུ་གུ་རྒྱུད་དུ་ཟུང་དུ་འཇུག་པའི་བདག་ཉིད་ཅན་ཏེ། དེ་འདྲའི་ཀུན་བཟང་ཡབ་ཡུམ་ཀྱི་སྐུ་ལ་གུས་པས་ཕྱག་འཚལ་བསྟོད། ཨཱཿཀུན་ཏུ་བཟང་པོ་ཡབ་ཡུམ་གྱི་གསུང་ནི་འཇིག་རྟེན་གྱི་ཁམས་རབ་འབྱམས་སུ་གང་འདུལ་གྱི་ཐབས་སྟོན་པའི་སྒྲ་སྐད་མཐའ་ཡས་པའི་སྒྲར་གྲགས་པ་སྐད་ཅིག་ཀྱང་རྒྱུན་ཆད་པ་མེད་ཀྱང་རང་བཞིན་གྱིས་གྲུབ་པ་མ་ཡིན་པར་རང་བཞིན་གྱིས་སྟོང་པའི་གྲགས་སྟོང་ཟུང་དུ་འཇུག་པ་ཡིན་ལ། དེ་འདྲའི་གསུང་སྒྲ་དེ་ནི་རྩོལ་བས་བསྐྱེད་པ་མ་ཡིན་པར་ལྷུན་གྲུབ་རང་བྱུང་དུ་ཆོས་སྒོ་མཐའ་དག་ཅིག་ཆར་དུ་སྟོན་

པའི་གསུང་ཡིན་ཏེ། དེ་འདྲའི་སྒྲ་སྐད་ཐམས་ཅད་པའི་གསུང་གི་སྒྲ་གྲགས་སྟོང་ཟུང་དུ་འཇུག་པ་དེ་རྒྱུན་མི་འཆད་པར་གསུང་ཡང་དེ་ལ་རྩོལ་བའི་རྟོག་པས་ཅིར་ཡང་མི་དགོངས་པར་སྒྲ་སྐད་སྣ་ཚོགས་པའི་སྒོ་ནས་ཆོས་སྒོ་སྣ་ཚོགས་པ་སྟོན་པའི་གསུང་གི་སྒྲ་ནི་རང་གྲགས་པ་སྟེ། ལྷུན་གྲུབ་ཏུ་གྲགས་པ་ཡིན་གྱི་གསུང་དེ་ལ་རྟོག་པས་དམིགས་གཏད་བྱེད་པ་དང་བྲལ་ཞིང་རྗེས་སུ་འཛིན་པའི་རྩོལ་བཅས་ཀྱི་དངོས་པོ་སྟོང་པ་ཡིན་ཀྱང་རྩོལ་བ་མེད་པར་གདུལ་བྱ་གང་འདུལ་གྱི་ཆོས་སྒོ་མཐའ་ཡས་པ་སྟོན་པའི་གསུང་གི་སྒྲ་དབྱངས་ནི་རྣམ་པ་སྣ་ཚོགས་པ་ཅིར་ཡང་སྟོན་པར་མཛད་དེ། དེ་འདྲའི་ཀུན་བཟང་ཡབ་ཡུམ་གྱི་གསུང་ལ་གུས་པས་བསྟོད་དོ། །ཧཱུྃ་ཀུན་ཏུ་བཟང་པོ་ཡབ་ཡུམ་གྱིི་ཐུགས་སོ་སོ་རང་རིག་པའི་ཡེ་ཤེས་ནི་འཛིན་ཞེན་ཅན་གྱི་དྲན་པ་སྟོང་ཞིང་གདོས་བཅས་ཏེ་བདེན་འཛིན་གྱི་ཞེན་པ་དང་བྲལ་ཞིང་ཤེས་བྱ་སྣ་ཚོགས་པའི་སྣང་བ་གང་ཤར་བ་ཐམས་ཅད་རང་བཞིན་གྱིས་སྟོང་པར་ཤར་བ་དང་དུས་མཉམ་དུ་འཇུག་པས་དེ་དག་ལ་འཛིན་ཞེན་རང་ཤུགས་ཀྱིས་གྲོལ་བའི་ཡེ་ཤེས་ནི་འགག་པ་མེད་པ་ཡིན་ཏེ། དེ་ལྟར་དངོས་པོར་འཛིན་པ་མེད་པར་དངོས་འཛིན་ཐམས་ཅད་དང་བྲལ་བས་གཟུང་འཛིན་འཁྲུལ་བའི་ཡིད་དང་བྲལ་ཞིང་། དེ་འདྲའི་ཐུགས་དགོངས་ནི་གནས་ལུགས་ཀྱི་ངོ་བོ་རང་ས་དེ་གར་འཁྲུལ་པ་ཐམས་ཅད་རང་གྲོལ་དུ་སོང་བའི་དབྱིངས་སྟོང་པ་དང་དེ་རྟོགས་པའི་ཡེ་ཤེས་གཉིས་ནམ་ཡང་དབྱེར་མེད་པའི་ཐུགས་ཏེ། དེ་འདྲའི་ཀུན་ཏུ་བཟང་པོ་ཡབ་ཡུམ་གྱི་ཐུགས་ལ་གུས་པས་བསྟོད་པ་འབུལ་ལོ། །ཧྲཱིཿཀུན་ཏུ་བཟང་པོ་ཡབ་ཡུམ་གྱི་ཐུགས་ཀྱི་ཡོན་ཏན་ཤེས་བྱ་ཐམས་ཅད་ཅིག་ཆར་མཁྱེན་པ་དང་། སྟོབས་བཅུ་ལ་སོགས་པ་དང་གསུང་གི་ཡོན་ཏན་སྒྲ་སྐད་ཐམས་ཅད་པ་དང་། གསུང་དབྱངས་

ཡན་ལག་དྲུག་ཅུ་དང་། སྐུའི་ཡོན་ཏན་དབྱིབས་དང་ཁ་དོག་སོགས་རྣམ་པ་ཐམས་ཅད་པ་དང་། མཚན་བཟང་པོ་སོ་གཉིས་ལ་སོགས་པ་ནི་རྩོལ་བས་གཞན་དུ་བཙལ་ནས་གསར་དུ་འབྱུང་དགོས་པ་མ་ཡིན་པར་གཞི་ཡེ་ཤེས་གཅིག་གི་ངོ་བོར་རམ་སྐུ་གསུང་ཐུགས་ཀྱི་གཞི་ལ་རང་ཤུགས་ཀྱིས་རྫོགས་ཤིང་ལྷུན་གྲུབ་ཏུ་གནས་པ་དང་། འོད་གསལ་བ་སྟེ་ཡོན་ཏན་གྱི་ཆ་ཐམས་ཅད་མ་འདྲེས་པར་མངོན་པར་བཀྲ་ཞིང་གསལ་བ་དེ་ཡང་འོད་དཔག་ཏུ་མེད་པ་སྟེ་ཡོན་ཏན་གྱི་ཆ་དཔག་ཏུ་མེད་པ་དང་ལྡན་ཞིང་དེ་དག་ཀྱང་སེམས་ཅན་གྱི་ཚུལ་བཞིན་དུ་བསམ་བརྗོད་གྱི་ཡུལ་ལས་འདས་ཤིང་མཚོན་པའི་དཔེ་དང་བྲལ་བའི་ཡོན་ཏན་གྱི་ཆ་ཐམས་ཅད་ཡོངས་སུ་རྫོགས་པ་སྟེ། དེ་འདྲའི་ཀུན་བཟང་ཡབ་ཡུམ་གྱི་ཡོན་ཏན་ལ་གུས་པས་འདུད་དོ། །ཧ༔ ཀུན་ཏུ་བཟང་པོ་ཡབ་ཡུམ་ཀྱི་ཕྲིན་ལས་ནི་སེམས་ཅན་ཐམས་ཅད་སྲིད་ཞི་ལས་སྒྲོལ་འདོད་ཀྱི་ཐུགས་བརྩེ་བའི་སྙིང་རྗེ་དེ་དང་དེའི་རང་འོད་ལྟ་བུ་དེ་དང་རང་བཞིན་གཅིག་པའི་གདུལ་བྱ་གང་འདུལ་གྱི་ཐབས་མཐའ་ཡས་པ་ཐམས་ཅད་སོ་སོར་མཁྱེན་པའི་ཡེ་ཤེས་ཀྱི་ཆ་ཐམས་ཅད་ཡོངས་སུ་རྒྱས་ཤིང་རྫོགས་པ་ནི་བྱེད་པ་པོ་ལ་ཡོད་པའི་ཕྲིན་ལས་ཏེ། དེ་ནི་གདུལ་བྱ་འདུལ་བའི་དུས་ལ་བབ་ཚེ་གསར་དུ་བཙལ་བ་སྟེ་བསྐྱེད་དགོས་པ་མ་ཡིན་པར་ཐུགས་རྒྱུད་ལ་ལྷུན་གྲུབ་ཏུ་རྫོགས་པར་ལྡན་ཞིང་ཕྲིན་ལས་ཡོངས་འདུས་ཀྱིི་ཐིག་ལེའི་སྐུ་དཔག་ཏུ་མེད་པའི་མཛད་ཕྲིན་ཐམས་ཅད་རང་ལ་ཚང་ཞིང་རྫོགས་པ་ཡིན་ཏེ། དེ་འདྲའི་ཀུན་བཟང་ཡབ་ཡུམ་ཀྱི་ཕྲིན་ལས་ལ་གུས་པས་བསྟོད་དོ་སྙམ་དུ་བསམ། དེ་ནས་ཀུན་བཟང་ཡབ་ཡུམ་གྱི་ཐུགས་ཡེ་ཤེས་ལྔ་ལ་བསྟོད་པ་འབུལ་བ་ནི། ཧཱུྃ་ཧཱུྃ༔ ཆོས་སྐུ་ཀུན་ཏུ་བཟང་པོ་ཡབ་ཡུམ་གྱི་ཐུགས་ཤེས་བྱ་ཐམས་ཅད་མངོན་སུམ་དུ་

རིག་པའི་ཡེ་ཤེས་ནི་བདེན་གྲུབ་གང་ཡང་མ་བཟུང་བའི་སྒོ་ནས་བདེན་གྲུབ་ལ་ཐོགས་པ་མེད་པ་དང་། ཤེས་བྱ་མཐའ་དག་མི་མཁྱེན་པའི་ཐོགས་པ་མེད་པའི་ཟང་ཐལ་ཅན་འོད་ལྟ་བུའི་ཆོས་ཀྱི་སྐུ་ུསྟེ་དེ་ནི་སྤྲོས་བྲལ་ཉག་གཅིག་གི་ཡེ་ཤེས་ཤེས་བྱ་ཐམས་ཅད་ཅིག་ཆར་གསལ་ཞིང་འོད་འཚེར་བ་སྟེ་རབ་ཏུ་གསལ་ཞིང་མཐོང་བ། གསལ་བའི་ཡེ་ཤེས་གཅིག་པུ་དེ་ལ་ཤེས་བྱ་མཐའ་དག་མ་འདྲེས་པར་སོ་སོར་མཁྱེན་པའི་ཡེ་ཤེས་ཀྱི་ཆ་ཤས་ཐམས་ཅད་ལུ་གུ་རྒྱུད་ལྟར་འབྲེལ་ཞིང་ཡོངས་སུ་རྫོགས་པ་ཡེ་ཤེས་དེའི་ངོར་འགྱུ་འཕྲིག་གཟུང་འཛིན་འཁྲུལ་བའི་དངོས་པོ་ཐམས་ཅད་ཡེ་ནས་ཟད་དེ་མེད་ཅིང་འཁྲུལ་བའི་ངོ་བོས་སྟོང་པ་དྲི་མ་ཐམས་ཅད་སྟོང་པའི་རང་བཞིན་དག་པ་གཉིས་ལྡན་གྱི་ཆོས་སྐུ་རང་བཞིན་གྱི་འོད་གསལ་བ་དེ་མངོན་སུམ་དུ་གཟིགས་ཤིང་གསལ་བའི་ཐུགས་རྗེ་ནམ་ཡང་འགག་པ་དང་རྒྱུན་ཆད་པ་མེད་པའི་ཡེ་ཤེས་དེ་ལ་ཞེ་སྡང་རང་སར་གྲོལ་ནས་དཀར་གསལ་ཞེས་པ་རྡོ་རྗེ་སེམས་དཔའི་རང་བཞིན་ཅན་ཆོས་ཐམས་ཅད་མེ་ལོང་གི་གཟུགས་བརྙན་ལྟར་སྣང་ཡང་རང་བཞིན་གྱིས་མ་གྲུབ་པའི་སྣང་སྟོང་ཟུང་འཇུག་རྟོགས་པའི་ཡེ་ཤེས་ཀྱི་ཆ་ཡོད་པ་ནི་མེ་ལོང་ལྟ་བུའི་ཡེ་ཤེས་ཏེ། དེ་ལ་བདག་གིས་ཡུལ་གཟུང་བ་དང་ཡུལ་ཅན་འཛིན་པ་གཉིས་བདེན་པའི་ཐ་དད་དུ་ཞེན་པ་མེད་པའི་ངང་ནས་གུས་པས་བསྟོད་དོ་སྙམ་དུ་བསམ། དེས་འགྲེས་ཏེ། ཧཱུྃ་སྭཿཆོས་སྐུ་ཀུན་ཏུ་སོགས་ནས་རྒྱུན་ཆད་མེད་པའི་ཡེ་ཤེས་དེ་ལ་ང་རྒྱལ་རང་སར་གྲོལ་བའི་སེར་གསལ་ཞེས་པ་རིན་འབྱུང་གི་སྐུའི་རང་བཞིན་འཁོར་འདས་ཐམས་ཅད་དོན་དམ་པར་རོ་མཉམ་མམ་བདེན་སྟོང་དུ་མཉམ་པར་རྟོགས་པའི་ཡེ་ཤེས་ཀྱི་ཆ་གཅིག་ཡོད་པ་ནི་མཉམ་པ་ཉིད་ཀྱི་ཡེ་ཤེས་ཏེ་དེ་ལ་

སོགས་སོ། །ཧཱུྃ་ཨཾཿཆོས་སྐུ་ཀུན་ཏུ་བཟང་པོ་ཞེས་པ་ནས་རྒྱུན་ཆད་མེད་པའི་ཡེ་ཤེས་དེ་ལ་འདོད་ཆགས་རང་སར་གྲོལ་བའི་དམར་གསལ་ཏེ་སྣང་མཐའི་རང་བཞིན་ཤེས་བྱ་མ་ལུས་པ་ཐམས་ཅད་སོ་སོར་མ་འདྲེས་པར་གཟིགས་པའི་ཡེ་ཤེས་ཀྱི་ཆ་གཅིག་ཡོད་པ་ནི་སོ་སོར་རྟོག་པའི་ཡེ་ཤེས་ཏེ་དེ་ལ་སོགས་སོ། །ཧཱུྃ་ཧཿཆོས་སྐུ་ཀུན་ཏུ་བཟང་པོ་ཞེས་པ་ནས་རྒྱུན་ཆད་མེད་པའི་ཡེ་ཤེས་དེ་ལ་ཕྲག་དོག་རང་སར་དག་པའི་ལྗང་གསལ་ཞེས་པ་དོན་གྲུབ་ཀྱི་རང་བཞིན་ཅན་སྙིང་རྗེ་དང་དེའི་སྒོ་ནས་ཐེག་པ་གསུམ་གྱི་ལམ་ལ་སོགས་པ་གདུལ་བྱ་འདུལ་བའི་ཐབས་མཐའ་ཡས་པ་ཐམས་ཅད་རྫོགས་པར་མཁྱེན་པའི་ཡེ་ཤེས་ཀྱི་ཆ་གཅིག་ཡོད་པ་ནི་བྱ་བ་གྲུབ་པའི་ཡེ་ཤེས་ཏེ་དེ་ལ་སོགས་སོ། །ཧཱུྃ་ༀཿཆོས་སྐུ་ཀུན་ཏུ་བཟང་པོ་ཞེས་པ་ནས་རྒྱུན་ཆད་མེད་པའི་ཡེ་ཤེས་དེ་ལ་གཏི་མུག་རང་སར་གྲོལ་བའི་མཐིང་གསལ་ཞེས་པ་རྣམ་སྣང་གི་རང་བཞིན་ཆོས་ཉིད་མངོན་སུམ་དུ་གཟིགས་ནས་དེ་ལས་ནམ་ཡང་མི་གཡོ་བའི་ཡེ་ཤེས་ཀྱི་ཆ་གཅིག་ཡོད་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཏེ་དེ་ལ་སོགས་སོ། །དེ་ནས་ཞི་བའི་འཁོར་རྣམས་ལ་བསྟོད་པ་ནི། ༀ་གདོད་ནས་མ་སྐྱེས༴ སོགས་གདོད་ནས་རྒྱུ་ལས་མ་སྐྱེས་ཤིང་རང་གི་གཤིས་དྲི་མས་ཡེ་ནས་རྣམ་པར་དག་པ་ལ་འཕྲལ་དུ་གློ་བུར་བའི་དྲི་མ་ཡང་དག་པའི་དག་པ་གཉིས་ལྡན་གྱི་ཆོས་སྐུ་དང་། དེ་མངོན་སུམ་དུ་གཟིགས་པའི་གསལ་བའི་ཡེ་ཤེས་གཉིས་ཟུང་དུ་འཇུག་པ་ནི། ཆོས་སྐུ་ཀུན་ཏུ་བཟང་པོ་སྟེ། དེའི་རིག་པ་ཡེ་ཤེས་ཀྱི་རྩལ་ཞེས་པ་རང་བཞིན་ལ་མ་དག་པའི་ཕུང་པོ་ལྔ་དང་ཁམས་ལྔ་དང་རྣམ་ཤེས་ཚོགས་བརྒྱད་དེ་དག་གི་ཡུལ་གྱི་སྣང་བ་བརྒྱད་དང་དུག་ལྔ་དང་ཉོན་མོངས་པ་དྲུག་དང་བདུད་བཞི་ལ་སོགས་པ་དྲི་མ་

མཐའ་ཡས་པ་དག་པའི་ཡེ་ཤེས་ཀྱི་ཆ་རེ་རེ་ཡོད་ཅིང་ཀྱང་ཡེ་ཤེས་ཀྱི་ཆ་དེ་དག་ཀྱང་དཔེར་ན་ཞེ་སྡང་དག་ཆ་རྡོ་རྗེ་སེམས་དཔའ་དང་བྷུདྡྷ་ཧེ་རུ་ཀའི་རང་བཞིན་དུ་གྲུབ་པ་ལ་སོགས་པ་ཞི་ཁྲོ་རབ་འབྱམས་ཀྱི་ལྷའི་ངོ་བོར་རྫོགས་པ་སྟེ་གྲུབ་པ་ཡིན་པས་ཞི་ཁྲོའི་ལྷ་ཚོགས་ཐམས་ཅད་ཀུན་ཏུ་བཟང་པོའི་ཡེ་ཤེས་གཅིག་གི་ཆ་ཤས་རྣམས་ལྷ་སོ་སོའི་རང་བཞིན་དུ་གྲུབ་པ་དེ་ཉིད་ལྷ་སོ་སོའི་དབྱིབས་དང་ཁ་དོག་སོགས་ཀྱི་ཆོ་འཕྲུལ་དུ་ཤར་བ་ཡིན་པས་ན། དེ་འདྲའི་ཡེ་ཤེས་ཀྱི་ཞེ་སྡང་དག་པའི་ཆ་ཤས་ཀྱི་ཆོ་འཕྲུལ་ལས་ཤར་བའི་ཞེ་སྡང་དང་རྣམ་ཤེས་ཀྱི་ཕུང་པོ་རང་སར་དག་པའི་མེ་ལོང་ཡེ་ཤེས་ཀྱི་རང་བཞིན་ཅན་མཐིང་གསལ་མདངས་ལྡན་ལོངས་སྤྱོད་རྫོགས་སྐུའི་རྣམ་པ་ཅན་རྡོ་རྗེ་སེམས་དཔར་ཤར་བ་ཡིན་ནོ། །དེ་ཡང་ཐབས་ཤེས་དབྱེར་མེད་པ་ཡིན་པས་ས་ཁམས་དག་པ་སངས་རྒྱས་སྤྱན་མ་དང་འཁྲིལ་ཏེ། གླང་ཆེན་ལ་སོགས་པའི་གདན་སྟེང་དུ་ཉོན་མོངས་པ་དུག་ལྔ་རང་ངོས་ནས་གྲུབ་པར་བཟུང་སྟེ་རྒྱུད་ལ་བསམ་བཞིན་སྐྱེར་མ་བཅུག་པའི་སྒོ་ནས་ནམ་ཡང་སྤོང་མི་ནུས་པས་དེ་ལྟར་སྤང་པ་མ་ཡིན་པར་དུག་ལྔའི་འཁོར་གསུམ་རང་བཞིན་གྱིས་སྟོང་པར་རྟོགས་པའི་སྒོ་ནས་གནས་སུ་དག་པ་སྟེ་རང་ཞིར་འགྲོ་བའི་སྒོ་ནས་སྤངས་པའི་ཚུལ་སྟོན་པར་མཛད་པ་དང་། སྐུ་ནི་གོང་བཞིན་མཉེན་པ་ཞེས་སོགས་ནས་གཟི་བརྗིད་འབར་བར་བཞུགས་པའོ་སྙམ་དུ་བསམ། དེའི་འཁོར་དུ་ཡབ་ཀྱི་ཆ་འཛིན་ཞེས་སོགས་ནས་པུཥྤེ་མ་དང་བཅས་གཙོ་འཁོར་དྲུག་ནི་རྣམ་རྟོག་གི་བཅོས་ནས་བསྐྱེད་པ་མ་ཡིན་པར་དཔལ་ཀུན་ཏུ་བཟང་པོའི་རྒྱུད་ཀྱི་ཞེ་སྡང་རྣམ་ཤེས་དང་བཅས་པ་དང་ས་ཁམས་དག་པའི་ཆ་དེ་ཡེ་ཤེས་ཀྱི་རང་བཞིན་དུ་མ་བཅོས་པར་ལྷུན་གྲུབ་ཏུ་ཡོད་པའི་གཙོ་འཁོར་དྲུག་ཡིན་ནོ། །དེ་འདྲའི་རྡོར་སེམས་ཡབ་ཡུམ་ནི་ཀུན་ཏུ་

བཟང་པོ་དངོས་ཀྱི་སྤྲུལ་པ་དང་། བྱང་སེམས་ཡབ་ཡུམ་བཞི་ནི་ཀུན་ཏུ་བཟང་པོས་བརྒྱུད་ནས་སྤྲུལ་བ་དང་། དངོས་ཀྱི་སྤྲུལ་བ་རྡོར་སེམས་ཡབ་ཡུམ་གྱིས་དངོས་སུ་སྤྲུལ་བ་དང་། སྤྲུལ་དང་ཡང་སྤྲུལ་སོགས་ནི་འདི་ལྟར་ཤེས་པར་བྱའོ། །དེའི་འགྲེས་སྦྱར་ནས་ལྷག་མའི་བསྟོད་པ་རྣམས་ཀྱི་དམིགས་ཚུལ་ཤེས་པར་བྱའོ། །དེ་ནས་ཁྲོ་བོའི་བསྟོད་པ་ནི། ཆེ་མཆོག་ཧེ་རུ་ཀ་ཀུན་ཏུ་བཟང་པོའི་སྐུའི་ཆ་ལས་ཤར་བ་ལ་སོགས་པ་རིམ་པ་བཞིན་དུ་ཁྲག་འཐུང་རྣམས་ནི། གསུང་ལ་ལོངས་སྐུར་བཏགས་པའི་ལོངས་སྐུ་དང་། ཐུགས་དང་། ཡོན་ཏན་དང་། གསུང་དང་། ཕྲིན་ལས་སྤྲུལ་པ་དང་། ཀུན་ཏུ་བཟང་པོའི་རྒྱུད་ཀྱི་རྣམ་ཤེས་བརྒྱད་དག་པའི་ཡེ་ཤེས་ལས། ཀཽ་རི་བརྒྱད་དང་། དེ་བཞིན་དུ་ཡུལ་བརྒྱད་དག་པ་ལ་སེང་ཧ་བརྒྱད་དང་། བདུད་བཞི་དག་པ་ལས་སྒོ་བ་དང་། སྒལ་ཚིག་ཉེར་བརྒྱད་དག་པའི་ཡེ་ཤེས་ཉེར་བརྒྱད་ཀྱི་རྩལ་ལས་དབང་ཕྱུག་ཉེར་བརྒྱད་ཤར་བ་མོས་དགོས་པ་ཤེས་པར་བྱས་ཏེ། ཧཱུྃ་སྣོད་བཅུད་སྣང་སྲིད་ཐམས་ཅད་ཀྱི་གཞི་ལས་རྟེན་དང་བརྟེན་པའི་དཀྱིལ་འཁོར་དུ་བཞེངས་པ་སྟེ་གྲུབ་པའི་ལྷུན་གྲུབ་རྩོལ་མེད་དུ་རང་བྱུང་བའི་རྟེན་གྱི་དཀྱིལ་འཁོར་གྱི་དབུས་སུ་དཔལ་ཀུན་ཏུ་བཟང་པོའི་སྐུ་དང་ཐུགས་རིག་པའི་ཡེ་ཤེས་དབྱེར་མེད་པའི་རྩལ་གྱི་ཆོ་འཕྲུལ་ལས་ཤར་བ། ཉོན་མོངས་པ་ཐམས་ཅད་འཇོམས་པར་མཛད་ཅིང་ཉོན་མོངས་དང་གཉིས་སྣང་འཁྲུལ་བའི་ཁྲག་འཐུང་བའི་ཧེ་རུ་ཀ་ཆེན་པོ། བདུད་བགེགས་གཞོམ་པ་སོགས་ལ་མཐུ་རྩལ་ཐོགས་པ་མེད་པ། སྐུ་ལ་དུག་གསུམ་དག་པའི་བརྡར་མི་ལྤགས་དང་གླང་ལྤགས་སྟག་ཤམ་སྟེ་བགོ་བའི་གོས་གསུམ། སྐུ་གསུམ་ལྡན་པའི་བརྡར་ཁྲག་གི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་སྟེ་བྱུག་པའི་རྫས་གསུམ། རིགས་ལྔའི་བདག་ཉིད་ཡིན་པའི་

བརྡར་ཐོད་སྐམ་གྱི་དབུ་རྒྱན། འདུ་བྱེད་ལྔ་བཅུ་དག་པ་དང་གདུལ་བྱ་ལ་འདུས་བྱས་མི་རྟག་པ་སྟོན་ཕྱིར་ཐོད་རློན་གྱི་ཕྲེང་བ་སྟེ་ཐོད་རྒྱན་དང་། ཀླུ་རྣམས་འཇོམས་པ་དང་འཇིགས་པ་ཐམས་ཅད་བྲལ་བའི་བརྡར་སྦྲུལ་རྒྱན་དང་གདགས་པའི་རྒྱན་གཉིས་ཏེ་དུར་ཁྲོད་ཀྱི་ཆས་བརྒྱད་ཡོངས་སུ་རྫོགས་པས་སྐུ་ལ་བརྒྱན་པ། ཐབས་བདེ་བ་ཆེན་པོ་དང་ཤེས་རབ་སྟོང་པ་ཉིད་གཉིས་ནམ་ཡང་དབྱེར་མི་ཕྱེད་པའི་བརྡར་ཐབས་ཀྱི་ངོ་བོ་ཡབ་ཀྱི་སྐུ་ལ་ཤེས་རབ་ཀྱི་ངོ་བོ་ཡུམ་གྱིས་འཁྲིལ་ཏེ། རཱུ་ཏྲ་ཕོ་མོ་སོགས་བརྩེགས་པའི་གདན་སྟེང་དུ་ཐེག་པ་རིམ་དགུ་ཡོངས་སུ་རྫོགས་པའི་རྩེ་མོར་ཕྱིན་པ་ཅན་གྱི་སྐུའི་ཆ་ལུགས་བསྟན་ནས་བཞུགས་ཤིང་། སྐུ་ནི་གོང་བཞིན་སྒེག་པ་དང་སོགས་ནས། ཞི་བ་ལ་སོགས་པའི་གར་དགུ་དང་ལྡན་པའི་སྐུ་ཅན་ཏེ། དེ་འདྲའི་བཅོམ་ལྡན་འདས་དཔལ་ཆེན་པོ་ཆེ་མཆོག་ཧེ་རུ་ཀ་སྤྲུལ་པའི་འཁོར་ཚོགས་རྒྱ་མཚོ་རང་ཤུགས་ཀྱིས་རྫོགས་པ་དེ་ལ་གུས་པས་བསྟོད་དོ། །དེས་འགྲེས་པས་ལྷག་མ་ཤེས་པར་འགྱུར་རོ། །དེ་ནས་ཉེས་ལྟུང་བཤགས་པ་ནི། ༀ་ཨཱཿཧཱུྃ་བླ་མ་ཀུན་བཟང་སོགས་ཏེ། ཚིག་དོན་ཤེས་སླ་བ་ལྟར་དམིགས་ནས་ཉེས་ལྟུང་ཐམས་ཅད་འགྱོད་སེམས་ཀྱིས་བཤགས་པར་བྱའོ། །དེ་ནས་ཕྱག་འཚལ་མཆོད་བསྟོད་བྱེད་པའི་ལྷ་མོ་ལ་སོགས་པ་རྣམས་རང་གི་ཐུགས་ཀར་ཐིམ་པར་བསམ། དེ་ནས་རྒྱལ་བ་ཞི་ཁྲོའི་ལྷ་ཚོགས་རྣམས་བདག་རྒྱུད་ལ་འགྲུབ་བྱེད་སྔགས་བཟླ་བའི་ཛབ་ཀྱི་བཟླས་པ་བྱ་བ་ལ་ཐོག་མར་གསོལ་འདེབས་འདོན་ལ་ཡི་དམ་གྱི་ལྷ་རྣམས་བདག་རྒྱུད་ལ་འགྲུབ་པར་གསོལ་བ་དྲག་ཏུ་བཏབ་སྟེ། ཛབ་ལ་འཇུག་པ་ལ་ཛབ་ཁ་དབྱེ་བ་དང་། ཛབ་བཟླ་བ་དངོས་དང་གཉིས། དང་པོ་ནི། བདག་མདུན་གྱི་ལྷ་ཚོགས་ཐམས་ཅད་ཀྱི་སྐུ་མདོག་ཕྱག་

མཚན་རྒྱན་ཆ་ལུགས་བཞུགས་སྟངས་སོགས་གསལ་བར་དྲན་པའི་ངང་ནས། ཨཱཿརྒྱལ་བ་ཞི་ཁྲོའི་ལྷ་ཚོགས་བདག་ལ་དགོངས། །ཁྱེད་ཀྱི་སྐུ་གསུང་ཐུགས་ཀྱི་རྡོ་རྗེ་གསུམ། །བདག་གི་རྒྱུད་ལ་འཇུག་པར་ཛབ་ཀྱིས་བསྐུལ། །ཐུགས་དམ་དགོངས་ལ་འགྲུབ་པར་མཛད་དུ་གསོལ། །ཡི་དམ་རྒྱལ་བ་ཞི་ཁྲོའི་ལྷ་ཚོགས་ཀྱི། །གཞོམ་མེད་སྐུ་གསུང་ཐུགས་ཀྱི་རྡོ་རྗེ་གསུམ། །བདག་གི་ལུས་ངག་སེམས་སུ་མ་གྲུབ་པར། །ཛབ་བཟླས་སྔགས་ཀྱི་རྣལ་འབྱོར་མི་གཏོང་ངོ་། །ཞེས་བསྐུལ་བས་སྔགས་བཟླས་པས་ལྷ་ཚོགས་ཐམས་ཅད་བདག་རྒྱུད་ལ་འཇུག་ཅིང་རྒྱུད་བྱིན་གྱིས་བརླབས་པའི་དགོངས་པ་རྩེ་གཅིག་ཏུ་གཏད་ཅིང་བརྩེ་བའི་སྒོ་ནས་བཞུགས་པར་མོས། གཉིས་པ་ཛ྄བ་བཟླ་བ་དངོས་ནི། བླ་མ་གོང་མ་རྣམས་ཀྱི་ཕྱག་ལེན་ལ་ཞི་ཁྲོའི་ལྷ་ཚོགས་ཀུན་འདུས་ཀྱི་སྔགས་བཟླ་བ་གཙོ་བོར་བྱེད་པས་དེ་ལྟར་ལག་ལེན་འཚམས་པ་དང་གནད་དོན་ཡང་ལེགས་པས་འདིར་ཡང་དེ་བཞིན་དུ་བཤད་པར་བྱ་སྟེ། རང་ཉིད་ཀུན་ཏུ་བཟང་པོ་ཡབ་ཡུམ་ལ་སོགས་པ་སྟེང་གི་ཞི་བའི་ལྷ་ཚོགས་ཞེ་གཉིས་ཀྱི་ཐུགས་ཀར་ཟླ་བའི་གདན་རེ་རེའི་སྟེང་དུ་རང་རང་གི་ཐུགས་སྲོག་ས་བོན་ལྷ་རང་མདོག་ཅན་གྱི་མཐར། ༀ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷར་ཏུ་ཨ་ཞེས་པ་ཞི་བ་ཀུན་འདུས་ཀྱི་སྔགས་ལྷ་རང་རང་གི་ཁ་དོག་ཅན་{གྱི་}ཡབ་རྣམས་ལ་ཡིག་ངོ་ནང་བསྟན་གཡས་བསྐོར་དང་། ཡུམ་རྣམས་གཡོན་བསྐོར་དུ་འཁོད་པ་དང་། རང་ཉིད་ཆེ་མཆོག་ཡབ་ཡུམ་ལ་སོགས་པ་འོག་ཏུ་ཁྲོ་བོའི་ལྷ་ཚོགས་དྲུག་ཅུའི་ཐུགས་ཀར་ཉི་མའི་གདན་རེ་རེའི་སྟེང་དུ་རང་རང་གི་ཐུགས་སྲོག་ས་བོན་ལྷ་རང་མདོག་ཅན་གྱི་མཐར། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཞེས་པ་ཁྲོ་བོ་ཀུན་འདུས་ཀྱི་

སྔགས་ལྷ་རང་རང་གི་ཁ་དོག་ཅན་གྱི་ཡབ་རྣམས་ལ་ཡིག་ངོ་ནང་བསྟན་གཡས་བསྐོར་དང་། ཡུམ་རྣམས་ལ་ཡིག་ངོ་ཕྱིར་བསྟན་གཡོན་བསྐོར་དུ་འཁོད་པ། ས་བོན་སྔགས་ཕྲེང་དང་བཅས་པ་རང་འོད་འཚེར་ཞིང་འོད་ཟེར་སྣ་ལྔས་གཅིག་ལ་གཅིག་སྦྲེལ་བའི་ཚུལ་དུ་གནས་པར་གྱུར་པར་བསམ་ལ། ཐོག་མར་ཞི་ཁྲོའི་ལྷ་ཚོགས་ཡོངས་རྫོགས་ཀྱི་ཐུགས་ས་བོན་སྔགས་འཁོར་དང་བཅས་པ་ལ་སྤྱིར་དམིགས་པ་རྩེ་གཅིག་ཏུ་གཏད་ནས་བོ་དྷི་ཙིཏྟ་ཅི་རིགས་བཟླ། དེ་ནས་འདི་ལྟར་དུས་གཅིག་ལ་དམིགས་པ་གསལ་ཐེབས་དཀའ་བས་ཀུན་ཏུ་བཟང་པོ་ཞི་བ་ཀུན་འདུས་ཡིན་པས་རང་ཀུན་ཏུ་བཟང་པོའི་ཐུགས་ཀར་ཟླ་བ་ལ་ཨཱཿསྔོན་པོའི་མཐར་བོ་དྷི་ཙིཏྟ་ཁ་དོག་སྔོན་པོས་བསྐོར་བ་ཙམ་ལ་དམིགས་པ་གཏད་ནས་བོ་དྷི་ཙིཏྟ་སོགས་ཞི་ཁྲོའི་སྔགས་ཅི་རིགས་བཟླ། དེ་ནས་ཆེ་མཆོག་ཁྲོ་བོ་ཀུན་འདུས་ཡིན་པས་དེའི་ཐུགས་ཀར་ཉི་མ་ལ་ཧཱུྃ་སྨུག་ནག་གི་མཐར་རུ་ལུའི་སྔགས་སྨུག་ནག་གིས་བསྐོར་བ་ལ་དམིགས་པ་གཏད་ནས་བོ་དྷི་ཙིཏྟ་ཅི་རིགས་བཟླ། གཞན་རྣམས་ལ་ཐོག་མར་སྤྱིར་དམིགས་པ་དེས་ཆོག་པར་བྱ་སྟེ། འདི་དག་ལ་བཀོད་པའི་བཟླས་པ་ཟེར། ཡི་དམ་གྱི་ལྷ་རྣམས་རང་རྒྱུད་ལ་འཇུག་པའི་གནད་ཡིན་ནོ། །དེ་ནས་དོ་ལའི་བཟླས་པ་ལ། ཐོག་མར་ཡེ་ཤེས་ཀྱི་ལྷའི་བྱིན་རླབས་མྱུར་དུ་འཇུག་པའི་བཟླས་པ་ནི། རང་ཉིད་ཀུན་ཏུ་བཟང་པོའི་ཐུགས་ཀའི་ས་བོན་ཨཱ་སྔོན་པོ་ལ་སྔགས་ཀྱི་ཕྲེང་བ་ཡིག་འབྲུ་རྣམས་གཅིག་འོག་དུ་གཅིག་ཆུག་པ་ཁ་དོག་སྔོན་པོ་འོད་ཟེར་སྣ་ལྔའི་ཐག་པ་ལ་བརྒྱུས་པ་བ་ཐག་གཟེང་བ་ལྟ་བུ་བྱུང་རང་གི་ཞལ་ནས་ཐོན། མདུན་བསྐྱེད་ཀུན་ཏུ་བཟང་པོའི་ཞལ་དུ་ཞུགས། དེའི་ཐུགས་ཀར་ཡང་སྔགས་ཕྲེང་ས་བོན་དང་བཅས་པ་འཁོད་པ་དེ་ལ་ཐིམ་པས་ཐུགས་ལ་དགྱེས་

པ་དང་མཐུ་སྟོབས་བསྐྱེད། སླར་བྱུང་མདུན་བསྐྱེད་ཀུན་ཏུ་བཟང་པོའི་ཐུགས་ཀ་ནས་བྱུང་སྟེ། རང་གི་ཐུགས་ཀར་ཞུགས་ཏེ་སྙིང་གའི་ཐུགས་སྲོག་ལ་ཐིམ་པས་རྒྱལ་བ་ཞི་ཁྲོའི་ལྷ་ཚོགས་ཀྱི་སྐུ་གསུང་ཐུགས་གསུམ་བདག་གི་སེམས་རྒྱུད་ལ་ཞུགས་པར་གྱུར་པ་རྒྱུན་མ་ཆད་པར་འཁོར་བར་བསམ་བཞིན་བོ་དྷི་ཙིཏྟ་ཅི་ནུས་བཟླ། འདི་ཞི་ཁྲོའི་གཙོ་འཁོར་ཡོངས་རྫོགས་ཀྱི་སྔགས་དུས་གཅིག་ཏུ་བཟླ་བ་ཡིན་པས་བདག་བསྐྱེད་ཀྱི་ཞི་བའི་ལྷ་ཐམས་ཅད་ཀྱི་སྙིང་གའི་ས་བོན་ལས་བོ་དྷི་དང་། ཁྲོ་བོ་རྣམས་ཀྱི་ས་བོན་ལས་རུ་ལུའི་སྔགས་ཕྲེང་འོད་ཟེར་ལྔ་ལྡན་རྣམས་དུས་གཅིག་ཏུ་བྱུང་སྟེ། མདུན་བསྐྱེད་ཞི་ཁྲོའི་ལྷ་དེ་དང་དེའི་ཞལ་དུ་ཞུགས་ནས་སོ་སོའི་ཐུགས་ཀའི་སྔགས་ཕྲེང་ལ་ཐིམ་པས་མཐུ་སྟོབས་བསྐྱེད་ཅིང་ཐུགས་མཉེས། སླར་ཐམས་ཅད་དུས་གཅིག་ཏུ་ལྷ་རང་རང་གི་ཐུགས་ནས་བྱུང་སྟེ། བདག་བསྐྱེད་ཀྱི་ལྷ་དེ་དང་དེའི་ཐུགས་ཀ་ནས་ཞུགས། ཐུགས་སྲོག་ལ་ཐིམ་པས་ཞི་ཁྲོ་རབ་འབྱམས་ཀྱི་སྐུ་གསུང་ཐུགས་གསུམ་བདག་རྒྱུད་ལ་ཞུགས་པར་སྒོམ་པ་ཡིན་པར་སྣང་ཡང་དམིགས་པ་འཆར་དཀའ་ལ། ཀུན་ཏུ་བཟང་པོ་ཉིད་ཞི་ཁྲོ་ཀུན་འདུས་ཡིན་པས་སྔ་མ་གཅིག་པུས་ཆོག་ཅིང་དེའི་ཐུགས་ཀ་ནས་ཞི་ཁྲོ་གཉིས་ཀའི་སྔགས་ཀྱང་འཕྲོ་འདུ་བྱེད་ཆོག་གོ །དེ་ནས་བདེ་སྟོང་འདྲེན་པའི་དོ་ལའི་བཟླས་པ་བྱ་སྟེ། རང་ཉིད་ཀུན་ཏུ་བཟང་པོའི་ཐུགས་སྲོག་ཨ་ལས་སྔགས་ཕྲེང་འོད་ལྔའི་ཐག་པ་ལ་བརྒྱུས་པ་བྱུང་། རང་གི་ཞལ་ནས་ཐོན། ཡུམ་ཀུན་ཏུ་བཟང་མོའི་ཞལ་དུ་ཞུགས། ཡུམ་གྱི་རྩ་དབུ་མའི་ནང་བརྒྱུད་དེ་བདེ་བ་ཆེན་པོའི་གནས་ཡུམ་གྱི་གསང་བའི་ཆུ་སྐྱེས་ནས། རང་གི་རྡོ་རྗེའི་བུ་གར་བདེ་ཁྲིལ་གྱིས་ཞུགས་སྟེ། བདེ་དྲོད་ཆས་ཆེར་འབར་བཞིན་རྩ་དབུ་མའི་ནང་བརྒྱུད་དེ་སྙིང་གའི་ཐུགས་སྲོག་ལ་ཐིམ་པས་བདེ་ཆེན་གྱི་ཡེ་ཤེས་

ཆེས་ཆེར་རྒྱས། དེ་ལྟར་རྒྱུན་མི་འཆད་པར་འཁོར་བར་གྱུར་པར་མོས་བཞིན་བོ་དྷི་ཙིཏྟ་བཟླའོ། །དེ་ནས་རང་དོན་བྱིན་རླབས་བསྡུ་བའི་དམིགས་པ་བྱ་བ་ནི། བདག་བསྐྱེད་ཀྱི་ཞི་ཁྲོའི་ལྷ་ཚོགས་ཡབ་ཡུམ་ཐམས་ཅད་ཀྱི་ཐུགས་ཀའི་ས་བོན་དང་སྔགས་ཕྲེང་ལས་འོད་ཟེར་གྱི་ཚོགས་དཔག་ཏུ་མེད་པ་སྟེང་འོག་ཕྱོགས་བཞི་མཚམས་བརྒྱད་ཀྱི་སངས་རྒྱས་ཀྱི་ཞིང་རབ་འབྱམས་མ་ལུས་པ་ཐམས་ཅད་དུ་འཕྲོས། འོད་ཟེར་གྱིས་སངས་རྒྱས་སྲས་དང་བཅས་པ་མཆོད་པས་ཐུགས་མཉེས། བདག་གི་ཚོགས་རྫོགས། དེ་ནས་འོད་ཟེར་རྣམས་སླར་འདུས་པའི་ཚེ་ཕྱོགས་བཅུའི་སངས་རྒྱས་ཐམས་ཅད་ཀྱི་གནས་གསུམ་ནས་སྐུའི་བྱིན་རླབས་ཐམས་ཅད་ཞི་ཁྲོ་རབ་འབྱམས་ཀྱི་སྐུ་དཔག་ཏུ་མེད་པ། གསུང་གི་བྱིན་རླབས་ཐམས་ཅད་ཞི་ཁྲོའི་སྔགས་ཀྱི་ཡིག་འབྲུ། ཐུགས་ཀྱི་བྱིན་རླབས་ཐམས་ཅད་རྡོ་རྗེ་འཁོར་ལོ་ལ་སོགས་པ་ཞི་ཁྲོའི་ཕྱག་མཚན་གྱི་རྣམ་པ་དཔག་ཏུ་མེད་པ་ཕྱོགས་བཅུའི་ནམ་མཁའི་ཁམས་གང་བ་སྤྱན་དྲངས་ཏེ་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་གསུང་ཐུགས་དང་། ས་བོན་སྔགས་འཕྲེང་དང་བཅས་པ་ལ་ཐིམ་པས་ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་ཞུགས། ནུས་མཐུ་ཤིན་ཏུ་རྒྱས། བདག་དུས་གསུམ་སངས་རྒྱས་ཐམས་ཅད་ཀྱི་བདག་ཉིད་དུ་གྱུར་པར་མོས་ལ་བོ་དྷི་ཙིཏྟ་ཅི་ནུས་བཟླ། དེ་ནས་གཞན་སྣོད་བཅུད་ཞིང་སྦྱོང་གི་བཟླས་དམིགས་བྱ་བ་ནི། བདག་བསྐྱེད་ཀྱི་ཞི་ཁྲོའི་ལྷ་ཚོགས་ཡབ་ཡུམ་ཐམས་ཅད་ཀྱི་ཐུགས་ཀའི་ས་བོན་དང་། སྔགས་ཕྲེང་ལས་འོད་ཟེར་གྱི་ཚོགས་དཔག་ཏུ་མེད་པ་སྟེང་འོག་ཕྱོགས་བཞི་མཚམས་བརྒྱད་ཀྱི་འཁོར་བ་སྲིད་པའི་གནས་རབ་འབྱམས་མ་ལུས་པ་ཐམས་ཅད་དུ་འཕྲོས། བ་མོར་

ཉི་མ་ཕོག་པ་བཞིན་སྣོད་ཀྱི་མ་དག་པ་དང་། བཅུད་ཀྱི་དམྱལ་བ་ཚ་གྲང་། ཡི་དྭགས་བཀྲེས་སྐོམ་ལ་སོགས་པ་འཁོར་བའི་སྡུག་བསྔལ་དང་། སྡུག་བསྔལ་གྱི་རྒྱུ་མི་དགེ་བ་དང་། ཟག་བཅས་ཀྱི་དངོས་པོ་སྒྲིབ་གཉིས་བག་ཆགས་དང་བཅས་པ་སྦྱངས། ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་འོད་ཟེར་གྱིས་རེག་པས་ཕྱི་སྣོད་ཐམས་ཅད་ཞི་ཁྲོའི་རྟེན་གྱི་དཀྱིལ་འཁོར་ཡེ་ཤེས་ལས་གྲུབ་པ། ནང་བཅུད་ཐམས་ཅད་རྒྱལ་བ་ཞི་ཁྲོའི་སྐུ་ཤ་སྟག་ཏུ་གྱུར་པར་བསམ་བཞིན་བོ་དྷི་ཙིཏྟ་བཟླ། ཚེ་འདས་ལ་དབང་བསྐུར་བ་སོགས་ཀྱི་ཚེ། ཚེ་འདས་ལ་གཙོ་བོར་དམིགས་ནས་བཟླས་དམིགས་འདི་ལ་གཙོ་ཆེར་བྱའོ། །དེ་ནས་འགྱུར་བཟླས་ཀྱི་དམིགས་པ་བྱ་བ་ནི། བདག་མདུན་གྱི་ཞི་ཁྲོའི་ལྷ་ཚོགས་ཐམས་ཅད་དང་། སངས་རྒྱས་བྱང་སེམས་ཐམས་ཅད་དང་། སེམས་ཅན་ཐམས་ཅད་ཞི་ཁྲོའི་སྐུར་གྱུར་པ་རྣམས་ཀྱི་ཞལ་ནས་སྔགས་ཀྱི་སྒྲ་དབྱངས་སྒྲོག་ཅིང་། ལྷ་ཐམས་ཅད་གྱི་བ་སྤུའི་བུ་ག་དང་། སྐུའི་རྡུལ་ཕྲ་རབ་རྣམས་དང་། དག་པའི་ཕྱི་སྣོད་ཀྱི་རྡུལ་ཕྲ་རབ་རེ་རེ་ལས་ཀྱང་སྔགས་ཀྱི་སྒྲ་རྒྱུན་མི་འཆད་པར་འབྱུང་བ་ལ་དམིགས་པ་རྩེ་གཅིག་ཏུ་གཏད་ནས་བོ་དྷི་ཙིཏྟ་ཅི་ནུས་བཟླའོ། །དེ་ལྟར་བཟླས་པས་བསྙེན་ཚད་ཀྱི་གྲངས་སུ་བརྩི་མི་རུང་ཡང་གྲངས་དེ་ཙམ་གྱི་སྔགས་བཟླས་པའི་ཕན་ཡོན་ཐོབ་པར་གསུངས་ཏེ། ཕན་ཡོན་ནི་འབྲས་བུའོ། །དེས་བཟླས་དམིགས་རྣམས་སོང་ཟིན་ལ་འདིར་བསྙེན་སྒྲུབ་ཙམ་ལ་ཡིག་བརྒྱ་མ་བཟླས་ཀྱང་ཆོག་མོད། ཉམས་ཆགས་བཤགས་པའི་ཆེད་དུ་ཅི་འཛོམས་ཞིག་བཟླས་ན་ཤིན་ཏུ་བཟང་བས་དེ་ལྟར་ན། ཀུན་བཟང་ཡབ་ཡུམ་གྱི་གདན་འོག་ཏུ་བཞུགས་པའི་རྣམ་སྣང་ཡབ་ཡུམ་ཤར་གྱི་གནས་སུ་འཁོད། རྡོར་སེམས་ཡབ་ཡུམ་དེ་རྣམ་སྣང་གི་ཤུལ་

གྱི་དབུས་སུ་བཀོད་ཏེ། རང་ཉིད་གཙོ་བོར་དབུས་ཀྱི་རྡོ་རྗེ་སེམས་དཔའ་མཐིང་ག་ཡབ་ཡུམ་གྱི་ང་རྒྱལ་བསྐྱེད་ནས་དེའི་ཐུགས་ཀར་ཟླ་གདན་ལ་ཧཱུྃ་སྔོན་པོའི་མཐར་རྡོ་རྗེ་སེམས་དཔའི་ཡིག་བརྒྱ་ཁ་དོག་སྔོན་པོས་བསྐོར་བ་ལ་དམིགས་པ་དང་སྤྲོ་བསྡུས་ཀྱི་སྒོ་ནས་ཡིག་བརྒྱ་བཟླ་བ་སྟེ། ༈ དེ་ཉིད་ཚིག་གི་གསལ་འདེབས་པར་འདོད་ན། དཀྱིལ་འཁོར་དབུས་ཀྱི་རྣམ་སྣང་ཡབ་ཡུམ་གཉིས། །ཤར་གྱི་རྡོ་རྗེ་སེམས་དཔའི་གནས་སུ་འཁོད། །རྡོར་སེམས་ཡབ་ཡུམ་དབུས་ཀྱི་གདན་དུ་བྱོན། །དེ་ཡི་ཐུགས་ཀར་ཟླ་སྟེང་ཧཱུྃ་གི་མཐར། །ཡི་གེ་བརྒྱ་པས་གཡས་སུ་བསྐོར་བར་གྱུར། །{བར་}ཅེས་བརྗོད་ཅིང་དམིགས་ལ་རྡོ་རྗེ་སེམས་དཔའི་ཡིག་བརྒྱ་བཟླ་བཞིན་དུ། ས་བོན་སྔགས་ཕྲེང་ལས་འོད་ཟེར་སྔོན་པོ་འཕྲོས། རང་ཉིད་རྡོར་སེམས་ཀྱི་ལུས་གང་། ནད་གདོན་སྡིག་སྒྲིབ་བག་ཆགས་ཐམས་ཅད་བྱང་ཞིང་དག །འོད་ཟེར་རྣམས་བ་སྤུའི་བུ་ག་ནས་སྤྲོས་ཏེ་ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས་ཉེས་ལྟུང་སྡིག་སྒྲིབ་ཐམས་ཅད་བ་མོར་ཉི་ཟེར་ཕོག་པ་བཞིན་དག་པར་བྱས་པར་མོས་སོ། །འདིར་དེ་ཙམ་ལས་རིགས་ལྔ་གཞན་དང་། ཁྲག་འཐུང་ཡིག་བརྒྱ་སོགས་བཟླ་མི་དགོས་ཏེ། དེ་དག་ནི་ལས་སྦྱོར་གྱི་སྐབས་སུ་ཡིན་པས་སོ། །དེ་ནས་བཟླས་པའི་མཐར་ལས་བཞིའི་སྔགས་བཟླ་བ་ནི། ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་དཀར་པོ་དཔག་ཏུ་མེད་པ་འཕྲོས་པས་བདག་དང་སེམས་ཅན་ཐམས་ཅད་ལ་ཕོག་པས་ནད་གདོན་སྡིག་སྒྲིབ་ཐམས་ཅད་ཞི་བར་གྱུར་པར་མོས་བཞིན། བོ་དྷི་ཙིཏྟའི་མཐར་ཤིནྟཾ་ཀུ་རུ་ན་མཿཞེས་བཏགས་པ་གསུམ་སོགས་དང་། ཡང་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་སེར་པོའི་ཚོགས་དཔག་ཏུ་མེད་པ་འཕྲོས་པས་

བདག་དང་སེམས་ཅན་ཐམས་ཅད་ལ་ཕོག་པས་ཚེ་བསོད་དཔལ་འབྱོར་ཡེ་ཤེས་ཤིན་ཏུ་རྒྱས་པར་གྱུར་པར་བསམ་ཞིང་། བོ་དྷི་ཙིཏྟའི་མཐར་པུཥྚཾ་ཀུ་རུ་སྭ་ཞེས་བཏགས་པ་དང་། ཡང་ཁྲོ་བོའི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་དམར་པོའི་ཚོགས་དཔག་ཏུ་མེད་པ་འཕྲོས་པས་རང་དང་སེམས་ཅན་ཐམས་ཅད་ལ་ཕོག་ནས་མོས་པ་རྣམ་བཞི་དང་རླུང་སེམས་ཐམས་ཅད་རང་རང་གི་ཅི་འདོད་བཞིན་དབང་དུ་འདུས་པར་གྱུར་པར་བསམ་ཞིང་། བོ་དྷི་ཙིཏྟའི་མཐར་ཝ་ཤཾ་ཀུ་རུ་ཧོཿབཏགས་པ་དང་། ཡང་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་སྔོན་པོའི་ཚོགས་དཔག་ཏུ་མེད་པ་འཕྲོས་པས་རང་དང་སེམས་ཅན་ཐམས་ཅད་ལ་ཕོག་པས་རང་དང་སེམས་ཅན་རྣམས་ལ་གནོད་པའི་དགྲ་བགེགས་ལོག་འདྲེན་རྣམ་རྟོག་དང་བཅས་པ་ཚར་བཅད་པར་བསམ་ཞིང་། བོ་དྷི་ཙིཏྟའི་མཐར་མ་ར་ཡ་ཕཊཿཅེས་བཏགས་པ་རྣམས་ཀྱང་གསུམ་རེ་སོགས་བཟླ། དེ་ནས་བཟླས་སྒོམ་གྱི་ལྷག་ཆད་ཐམས་ཅད་དག་ཅིང་རིག་སྔགས་བཟླས་ཤིང་བསྒོམ་གྱི་བྱིན་རླབས་ཐམས་ཅད་བདག་གི་སེམས་རྒྱུད་ལ་རབ་ཏུ་བརྟན་པར་བྱས་པར་གྱུར་པར་མོས་བཞིན་དུ་དབྱངས་གསལ་ཡིག་བརྒྱ་རྟེན་སྙིང་རྣམས་བརྗོད། འདི་ལ་ཡིག་བརྒྱ་ཙམ་གྱིས་ཀྱང་ཆོག་གོ །དེ་ནས་ཛ྄བ་ཀྱི་མཆོད་བསྟོད་བྱ་བ་ནི། ཞི་ཁྲོའི་ལྷ་ཚོགས་ཐམས་ཅད་ལ་ལས་བྱང་ལས་བྱུང་བ་བཞིན་ཕྱི་ནང་གསང་བའི་མཆོད་པ་སྨན་རཀ་གཏོར་གསུམ་དང་བཅས་དཔག་ཏུ་མེད་པ་འབུལ་བ་དང་། སྐུ་གསུང་ཐུགས་ཀྱི་ཡོན་ཏན་དྲན་པའི་སྒོ་ནས་བསྟོད་པ་འབུལ་བར་མོས་ཏེ། ཧཱུྃ་ཡེ་ཤེས་ལྷ་ཚོགས་སོགས་ནས། ཅི་མཆིས་མཐོལ་ལོ་བཤགས། ཞེས་བརྗོད། དེ་ནས་བོ་དྷི་ཙིཏྟ་དང་ཀཱ་ཡ་ཝཀྐ་ཙིཏྟ་སིདྡྷི་ཕ་

ལ་ཧཱུྃ། ཞེས་པས་རྒྱལ་བ་ཞི་ཁྲོ་ཐམས་ཅད་ཀྱི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་བདག་ལ་ཐོབ་པར་བསམ་མོ། །དེ་ནས་ཐུན་རེ་རེ་ལ་ལས་བྱང་རེ་འདོན་ན་ཐུན་སྔ་མ་རྣམས་ལ་འདི་ལས་འོག་ཏུ་འཆད་པའི་བདག་བསྐྱེད་བསྡུ་རིམ་དང་། རྗེས་ཐོབ་ཀྱི་ལྷར་ལྡང་བ་བྱས་ནས་དགེ་བ་བསྔོས་ཏེ། ཐུན་མཚམས་ལ་འཇུག་སྟེ་ཐུན་རྗེས་མ་རྣམས་ལ་མཆོད་པ་བྱིན་རླབས་ནས་འཇུག་པ་ཡིན་ནོ། །གསུམ་པ་རྗེས་ཀྱི་བྱ་བ་ནི། ལས་བྱང་ཚར་རེ་ལས་མི་བྱེད་པ་དང་བྱེད་ཀྱང་ཐུན་ཐ་མའི་དུས་སུ་འདི་ནས་སྡེ་བདུན་མདོར་བསྡུས་ཙམ་འདོན་ནས་ཚོགས་ལ་འཇུག་པ་ཡིན། བརྒྱ་ཕྱག་དང་ཀློང་བཤགས་སོགས་ནི་བྱས་ནའང་ལེགས་མོད་བསྙེན་སྒྲུབ་ལ་ངེས་པར་དགོས་པའང་མིན། སྤྱིར་གཏེར་གཞུང་གི་སྔོན་འགྲོ་ལས་གཞན་པའི་ཐུན་མོང་གི་སྔོན་འགྲོ་དང་། གསོལ་འདེབས་དང་ཛབ་བསྐུལ་རྒྱས་པ་དང་། ཚོགས་བསྐང་རྒྱས་པ་སོགས་འདོན་ཚོགས་ཤིན་ཏུ་མང་བ་ཙམ་ལས་བསྙེན་སྒྲུབ་ཀྱི་སྐབས་འདིར་སྙིང་པོ་ཆེར་མེད། དེ་བས་ནི་ལས་བྱང་ཆེ་བ་ལ་བརྟེན་ན་དམིགས་པ་གསལ་འདེབས་སླ་བས་འདོན་ཚོགས་གཞན་རྣམས་རྒྱས་པར་བྱེད་པའི་སྤྲོས་པ་བསྐྱུངས་ནས་རྒྱུན་དུ་ལས་བྱང་ཆེ་བ་བཏང་ནས་སྐྱབས་སེམས་དང་བགེགས་ལ་བཀའ་བསྒོ་བ་ནས་བསྟོད་པ་དང་བཟླས་པའི་བར་གྱི་དམིགས་པ་ཐམས་ཅད་དལ་བའི་སྒོ་ནས་མ་ཆད་པར་གསལ་ཅི་ཐེབས་བྱེད་པ་ནི་བསྙེན་སྒྲུབ་ཀྱི་རྣལ་འབྱོར་དངོས་ཡིན་པས་ཤིན་ཏུ་གནད་ཆེ་བ་ཡིན་ནོ། །གལ་ཏེ་རྒྱུན་དུ་ལས་བྱང་ཆེ་བ་མི་ལྕོགས་པའམ་དམིགས་པ་གསལ་ཐེབ་པ་ལ་བྱང་ཆ་ཐོན་པ་དག་གིས་ལས་བྱང་ཆུང་བ་གཏོང་ན་ཡང་། ཞི་ཁྲོའི་ལྷ་ཚོགས་ཐམས་ཅད་སོ་སོའི་ས་བོན་ལས་བསྐྱེད་

པ་མི་དགོས་པར་སྐད་ཅིག་དྲན་རྫོགས་སུ་བསྐྱེད་པ་དང་། བསྐྱེད་པ་ན་སྔགས་ཀྱིས་བྱིན་རླབས་མི་དགོས་པ་ཙམ་ལས་གཞལ་ཡས་ཁང་དང་ལྷ་རྣམས་ཀྱི་གདན་དང་སྐུ་མདོག་ཕྱག་མཚན་རྒྱན་དང་ཆ་ལུགས་ལ་སོགས་པའི་མཚན་ཉིད་ཐམས་ཅད་དང་། ཕྱི་ནང་གསང་བའི་མཆོད་པ་སྨན་རཀ་གཏོར་གསུམ་སོགས་དམིགས་པ་དང་བཅས་པ་དང་། བཟླས་དམིགས་ལ་སོགས་པ་ཡོངས་རྫོགས་དགོས་པ་ནི་ལས་བྱང་ཆེ་བ་དང་ཁྱད་པར་མེད་དོ། །གང་ལྟར་ཡང་སྡེ་བདུན་གྱི་མཇུག་ཏུ་ཚོགས་བྱ་བ་ནི། ལས་བྱང་ཆེ་ཆུང་གང་ལྟར་བྱས་ཀྱང་ཆོག་སྟེ། ལས་བྱང་ཆེ་བ་སོང་ཡང་ཚོགས་དང་གཏོར་མ་སོགས་ནི་ལས་བྱང་ཆུང་བ་ལྟར་བྱས་ཀྱང་འགལ་བ་མེད་པ་མ་ཟད་ལག་ལེན་ཀྱང་བདེའོ། །གང་ལྟར་ཡང་རང་ཉིད་རྡོར་སེམས་ཀྱི་ང་རྒྱལ་གྱིས་ཚོགས་ལ་འཁུ་བའི་བགེགས་རྣམས་ལ་བཀའ་བསྒོས་ཏེ་གཞན་དུ་བསྐྲད། དེ་ནས་རང་ཉིད་རྡོར་སེམས་ཀྱི་ཐུགས་ཀ་ནས་སངས་རྒྱས་ཐམས་ཅད་ཀྱི་སྐུ་ཡི་ངོ་བོ་ༀ་དཀར་པོ། གསུང་གི་ངོ་བོ་ཨཱཿདམར་པོ། ཐུགས་ཀྱི་ངོ་བོ་ཧཱུྃ་སྔོན་པོ་གསུམ་སྤྲོས་པས་ཚོགས་རྫས་རྣམས་ལ་ཕོག་པས་ཚོགས་རྫས་ཐམས་ཅད་རྡོ་རྗེ་གསུམ་གྱི་ངོ་བོ་ༀ་དཀར་ཨཱཿདམར་ཧཱུྃ་མཐིང་གསུམ་བརྩེགས་པའི་རྣམ་པར་གྱུར། ཡི་གེ་དེ་གསུམ་ལས་མེ་ཆུ་རླུང་གསུམ་འཕྲོས་པས་ཚོགས་ཀྱི་ཉེས་སྐྱོན་དྲི་མ་མ་དག་པ་ཐམས་ཅད་མེས་བསྲེག །རླུང་གིས་གཏོར། ཆུས་བཀྲུས་པས་ཤིན་ཏུ་དག་པར་བྱས་ཏེ་མེ་ཆུ་རླུང་གསུམ་ཡི་གེ་གསུམ་དང་བཅས་པ་ཐོད་པའི་ནང་དུ་འོད་དུ་ཞུ་བ་ལས་ཚོགས་རྫས་དཔག་མེད་དཀར་དམར་མཐིང་གསུམ་གྱི་ཁ་དོག་ཅན་རྣམ་པ་ཤ་ལྔའི་རྫས་དང་བདུད་རྩི་ལྔའི་རྣམ་པ། ངོ་བོ་སྐུ་གསུང་ཐུགས་ཀྱི་རྡོ་རྗེ་གསུམ་གྱི་རང་བཞིན་དུ་གྲུབ་པ། བྱེད་ལས་ནད་གདོན་ཞི་བ་དང་ཉམས་རྟོགས་རྒྱས་བྱེད་ཀྱི་བདུད་རྩིར་

གྱུར་པར་མོས། བར་འདིར་བསྐང་བ་བྱས་ན་ཤིན་ཏུ་བསྡུས་པ་ཙམ་བྱ། དེ་ནས་ཚོགས་ཀྱི་སྤྱན་འདྲེན་ནི། རང་གི་ཐུགས་ཀའི་འོད་ཟེར་གྱིས་རྒྱལ་བ་ཞི་ཁྲོའི་ལྷ་ཚོགས་མ་ལུས་པ་འཁོར་སངས་རྒྱས་བྱང་སེམས་མཐའ་ཡས་པ་དང་བཅས་པ་སྤྱན་དྲངས་མདུན་བསྐྱེད་ཡོད་ན་དེ་ལ་བསྟིམ། མེད་ན་མདུན་གྱི་ནམ་མཁར་བཞུགས་པར་མོས། དེ་ནས་ལྷ་མོ་དཔག་ཏུ་མེད་པ་རྣམས་ཀྱིས་ཚོགས་རྫས་ལས་ཐོད་པས་བཅུས་ཏེ་ཤ་ལྔའི་བཟའ་བ་དང་། བདུད་རྩི་ལྔའི་བཏུང་བ་རྣམས་ཚོགས་ཞིང་དང་བདག་བསྐྱེད་ལྷ་ཚོགས་ཐམས་ཅད་ལ་ཕུལ་བ་རྣམས་ཚིམ་པར་གསོལ་བས་ཐམས་ཅད་ཀྱི་རྒྱུད་ཟག་མེད་བདེ་སྟོང་གི་ཡེ་ཤེས་ཀྱིས་གང་བར་མོས། དེ་ནས་ཚོགས་བར་བ་ཡང་དེ་བཞིན་དུ་ཕུལ་བ་གསོལ་བས་དགྱེས་ཤིང་ཚིམ་པའི་མཐུ་སྟོབས་ཀྱིས་བདག་གི་དམ་ཚིག་ཉམས་ཆགས་ཐམས་ཅད་བྱང་ཞིང་དག་པར་མོས། དེ་ནས་ཚོགས་ཐ་མ་རང་ཉིད་ཆེ་མཆོག་གི་ང་རྒྱལ་གྱིས་བསྟན་དགྲ་དམ་ཉམས་དང་ཁམས་གསུམ་སེམས་ཅན་གྱི་རྒྱུད་ཀྱི་བདག་འཛིན་ཐམས་ཅད་རཱུ་ཏྲའི་གཟུགས་ཀྱི་རྣམ་པར་སྒོ་མ་བཞི་ལ་སོགས་པས་བཀུག་ནས་ཚོགས་ཐ་མ་ལ་བཅུག་བཅིངས་མྱོས་པར་བྱས་ཏེ། རང་བཞིན་གྱི་དབྱིངས་ན་བཞུགས་པའི་ཁྲོ་བོའི་ལྷ་ཚོགས་དཔག་ཏུ་མེད་པ་སྒྲོལ་བའི་ལས་ལ་སྤྱན་དྲངས་ཏེ། ཁྲོ་བོ་རྣམས་དང་སྒྲོལ་གིང་ཀིང་ཀ་ར་ལ་སོགས་པའི་མཚོན་ཆ་སྣ་ཚོགས་ཀྱིས་བསྒྲལ། ཤ་ཁྲག་ཐམས་ཅད་ཡེ་ཤེས་ཀྱི་བདུད་རྩིའི་ངོ་བོར་བྱིན་གྱིས་བརླབས་ཏེ། བདག་མདུན་གྱི་ཞི་བ་དང་ཁྲོ་བོའི་ལྷ་ཚོགས་ཐམས་ཅད་ལ་ལྷ་མོ་རྣམས་ཀྱིས་ཕུལ་ཏེ་གསོལ་བས་ཁམས་གསུམ་གྱི་བདག་འཛིན་དང་ཉོན་མོངས་པའི་རྟོག་ཚོགས་ཐམས་ཅད་གཏན་ནས་དག་པར་བསམ་མོ། །

དེ་ནས་ཚོགས་ཀྱི་རྫས་བཟའ་བ་རྣམས་ཐབས་རིགས་ལྔའི་ངོ་བོ་ཤ་ལྔ་དང་། བཏུང་བ་རྣམས་ཤེས་རབ་ཡུམ་ལྔའི་ངོ་བོ་བདུད་རྩི་ལྔར་མོས་ནས་ཟོས་པས་རྒྱུད་ལ་དགའ་བཞིའི་བདེ་སྟོང་གི་ཡེ་ཤེས་སྐྱེས་པ་དང་། ཡེ་ཤེས་ཀྱི་རིག་མ་དང་སྙོམས་པར་ཞུགས་པ་ལས་དགའ་བཞིའི་ཡེ་ཤེས་དང་ཁྱད་པར་ལྷན་སྐྱེས་ཀྱི་བདེ་བ་སྐྱེས་པར་མོས་ལ་ཟ་ཞིང་གནས་ལུགས་ལ་མཉམ་པར་བཞག །དེ་ནས་ཚོགས་ཀྱི་ལྷག་མ་རྣམས་བྷནྡྷའི་སྣོད་དུ་སྐུ་གསུང་ཐུགས་ཀྱི་རྡོ་རྗེ་གསུམ་ལས་གྲུབ་པའི་ཟག་མེད་ཀྱི་བདུད་རྩི་མི་ཟད་པའི་གཏེར་དུ་གྱུར་པར་མོས་ཏེ། དབང་མོ་ཉེར་བརྒྱད་ལ་སོགས་པ་ལྷག་མ་ལ་དབང་བ་རྣམས་ལ་སྦྱིན་པས་ཐམས་ཅད་ཚིམ་པར་བསམས་ལ། དེ་ནས་དེ་ཁོ་ན་ཉིད་ཀྱི་བསྐང་བ་བྱ་བ་ནི། དངོས་པོའི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དང་། རང་སེམས་མ་བཅོས་པའི་སྣང་བ་འགག་མེད་འདི་ཐབས་ཀྱི་ཡེ་ཤེས་དང་། དེའི་རང་བཞིན་གསལ་བ་ནི་ཤེས་རབ་དང་། སྡུག་བསྔལ་གྱི་ཚོགས་ཐམས་ཅད་རང་བཞིན་གྱིས་གྲུབ་པ་ཅིར་ཡང་མེད་བཞིན་དུ་སྣང་བ་ཙམ་དང་། ཀུན་རྫོབ་ཀྱི་ཆོས་ཐམས་ཅད་ཀྱི་རང་བཞིན་ཆོས་ཉིད་དོན་དམ་པ་དང་། ཕུང་ཁམས་སྐྱེ་མཆེད་རྣམས་ཀྱི་རང་བཞིན་ནི་ཡེ་ནས་ཞི་བའི་ལྷ་ཚོགས་ཀྱི་བདག་ཉིད་དང་། ཉོན་མོངས་པའི་རྟོག་ཚོགས་རྣམས་ཀྱི་རང་བཞིན་ནི་ཁྲོ་བོའི་ལྷ་ཚོགས་ཀྱི་བདག་ཉིད། ལྷ་རྣམས་ལ་མཆོད་པ་འབུལ་བ་ཡང་དོན་དམ་པར་མཆོད་བྱ་མཆོད་བྱེད་གཉིས་སུ་མེད་པའི་ངང་ནས་མཆོད་པ། ཐུགས་དམ་བསྐང་བ་ཡང་དོན་དམ་པར་བསྐང་བྱ་སྐོང་བྱེད་ཀྱི་ཆོས་སྐྱེ་བ་མེད་པའི་ངང་ནས་སྐོང་བ་དང་། ཡབ་ཡུམ་ཟུང་འཇུག་སྦྱོར་བ་ཐམས་ཅད་དོན་དམ་པར་སྦྱོར་བྱ་སྦྱོར་བྱེད་གཉིས་སུ་མེད་པའི་ངང་ནས་མཆོད་པར་རྟོགས་པའི་སྒོ་ནས་སྦྱོར་བ་ཟུང་འཇུག་ཆེན་པོའི་སྦྱོར་བ་

དང་། བསྒྲལ་བ་ཡང་དེ་ལྟར་མོས་པས་ལྷ་ཚོགས་ཐམས་ཅད་ཀྱི་ཐུགས་དམ་བསྐང་བར་བསམས་ཏེ། ཨ་ལ་ལ་ཧོ་སོགས་བརྗོད་ཅིང་དོན་བསམས་ལ་དགེ་བ་བསྔོ། དེ་ནས་གནམ་ཆོས་གཏོར་མ་འབུལ། རྒྱུན་དུ་གཏོར་འགུགས་རྒྱས་པ་མ་ལྕོགས་ན། ན་མོ་མཆོག་གསུམ་རྩ་གསུམ་བདེན་པས་དགྲ་བགེགས་དམ་སྲི་ཐམས་ཅད་དམར་གྱི་གཏོར་མ་འདི་ལ་ཁུག་ཅིག་ཛཿཧཱུྃ་བཾ་ཧོཿཞེས་པས་དགྲ་བགེགས་དམ་སྲི་ཐམས་ཅད་གཏོར་མ་དང་གཉིས་སུ་མེད་པར་མོས་ལ། ༀ་ཨཱཿཧཱུྃ་གིས་བྱིན་གྱིས་བརླབས་ཏེ། ལས་བྱང་ཆུང་བའི། ཧཱུྃ་སྔོན་ཚེ་སོགས་ཀྱིས་ཀཽ་རི་དང་སེང་ཧ་བརྒྱད་དང་། དབང་ཕྱུག་ཉེར་བརྒྱད་དང་། ཟབ་ཆོས་གཏེར་གྱི་སྲུང་མ་ལ་སོགས་པ། སྔོན་ཚེ་ཨོ་རྒྱན་རིན་པོ་ཆེས། བདག་གི་བརྒྱུད་འཛིན་རྣམས་ཀྱིས་གཏོར་མ་འབུལ་བ་བཀའི་ཆད་བྱས་པའི་དམ་ཅན་གྱི་ཚོགས་ཐམས་ཅད་ལ་དམིགས་ནས་ཕུལ་བས་བདག་གིས་ཅི་འདོད་ཀྱི་ལས་བཅོལ། དེ་ནས་བརྟན་མའི་གཏོར་མ་ༀ་ཨཱཿཧཱུྃ་གིས་བྱིན་གྱིས་བརླབས་ཏེ། ཧཱུྃ་བྷྱོ་སོགས་ཀྱིས་དབང་ཕྱུག་མ་དང་བརྟན་མ་བཅུ་གཉིས་ལ་ཕུལ་ཏེ་འདོད་པའི་ཕྲིན་ལས་སྒྲུབ་པའི་ལས་བཅོལ། དེ་ནས་གཏོར་གཞོང་གི་འོག་ཏུ་ས་རིམ་པ་དགུའི་འོག་རོལ་ལས་ཀྱིི་གཤིན་རྗེ་ཁ་གདངས་པའི་ནང་དུ་སྒྲུབ་པའི་འགབ་འདྲེ་ལ་སོགས་པ་གནོད་བྱེད་ཐམས་ཅད་བཀུག་ནས་བཅིངས་མྱོས་བྱས་ཏེ། ཧཱུྃ་ཕྱོགས་མེད་སོགས་ཀྱིས་དེའི་སྟེང་དུ་དབུས་སུ་བདེ་གཤེགས་རིགས་ཀྱི་ལྷ་ཚོགས་རྣམས་དང་། ཤར་དུ་རྡོ་རྗེའི་རིགས་ཀྱི་ལྷ་དང་ལྷ་མོའི་ཚོགས་ཀྱིས་བྲོ་བརྡུང་བ་སོགས་དབུས་དང་ཕྱོགས་བཞིར་དེ་དང་མཐུན་པའི་རིགས་ཀྱི་ལྷ་དང་ལྷ་མོ་དཔག་ཏུ་མེད་པས་རང་རང་གི་རིགས་ཀྱི་ཡེ་ཤེས་ལྔའི་གླུ་ལེན། རང་རང་གི་དབྱིབས་ཀྱི་བྲོ་ར་ཟླ་གམ་གྲུ་བཞི་སོགས་སུ་བྲོ་

བརྡུང་། དུག་ལྔ་འཇོམས་པའི་དགོངས་པ་གཏད་པས་དགྲ་བགེགས་དམ་སྲི་ཐམས་ཅད་ཆོས་ཀྱི་སྣོད་དུ་མ་གྱུར་བར་ལྡང་མི་ནུས་པར་བསམ། དེ་ལྟར་རྒྱུན་དུ་ཚོགས་དང་ཆད་བརྟན་བྲོ་མནན་ཐམས་ཅད་ལས་བྱང་ཆུང་བ་ལྟར་བྱ། ཉིན་ཐ་མར་སྤྲོ་ན་དེ་དག་ལས་བྱང་ཆེ་བ་ལྟར་བྱའོ། །ཚོགས་བསྐང་སོགས་བྱེད་པར་མི་སྤྲོ་ན་བཟླས་པའི་བསྙེན་བསྟོད་ཀྱི་འཕྲོར་བདག་མདུན་ལ་རྗེས་ཆོག་གི་མཆོད་བསྟོད་མདོར་བསྡུས་བྱས་ཏེ། ཡིག་བརྒྱ་དང་དབྱངས་གསལ་བཟླས་པས་ཆོ་ག་ལྷག་ཆད་ནོར་འཁྲུལ་གྱི་ཉེས་པ་ཐམས་ཅད་དག་པར་མོས། སྤྲོ་ན་དེ་ལྟར་མོས་པའི་སྒོ་ནས་ལས་བྱང་ཆེ་བའི་བདག་ཉིད་སྤྱི་གཙུག་སོགས་ཀྱང་བྱ། མ་བྱས་ཀྱང་ཆོག །དེ་ནས་ལྷ་ཚོགས་ཐམས་ཅད་ལ་ཉེས་བྱས་བཟོད་པར་གསོལ་བ་ནི། ལས་བྱང་ཆེ་བའི། གང་ཡང་བདག་བློ་སོགས་ཚིག་རྐང་དྲུག་བརྗོད། དེ་ནས་ཤིས་པ་བརྗོད་པ་ནི། བདག་མདུན་གྱི་ལྷ་ཚོགས་ཐམས་ཅད་དང་ནམ་མཁའ་གང་བའི་སངས་རྒྱས་བྱང་སེམས་ཐམས་ཅད་དང་། དཀྱིལ་འཁོར་གྱི་ཕྱི་ཁྱམས་སུ་འཁོད་པའི་བསྟན་སྲུང་རྒྱ་མཚོའི་ཚོགས་ཐམས་ཅད་ཀྱིས་ཞལ་ནས་བཀྲ་ཤིས་པའི་གླུ་དབྱངས་བརྗོད། ཕྱག་ནས་མེ་ཏོག་འཐོར། ཕྱོགས་ཐམས་ཅད་དུ་བཀྲ་ཤིས་བརྗོད་པའི་ཡུལ་སེམས་ཅན་མ་ལུས་པ་ཐམས་ཅད་འཁོད་པར་མོས་ཏེ། ཆོས་སྐུའི་བཀྲ་ཤིས་དྲི་མ་ཐམས་ཅད་ཟད་པའི་དབྱིངས་སྟོང་པ་ཉིད་དང་ཡེ་ཤེས་ཟུང་དུ་འཇུག་པ་དེ་སེམས་ཅན་ཐམས་ཅད་ལ་འགྲུབ་པར་ཤོག་ཅིག །ལོངས་སྐུའི་བཀྲ་ཤིས་གསལ་སྟོང་འཛིན་མེད་ཀྱི་སྣང་བ་ལས་གྲུབ་པའི་ཡེ་ཤེས་ཀྱི་རྩལ་སྐུ་རྣམ་པ་ཐམས་ཅད་འགྲུབ་པ་དང་། སྤྲུལ་སྐུའི་བཀྲ་ཤིས་ཐུགས་རྗེའི་ཕྲིན་ལས་རྒྱུན་མི་ཆད་

དུ་འཇུག་པར་དང་། གཞི་ཡི་བཀྲ་ཤིས་རང་རྒྱུད་ཀྱི་ཉོན་མོངས་ཞི་ཞིང་དུལ་བ་སོགས་འགྲུབ་པར་ཤོག་ཅིག་ཅེས་ཤིས་བརྗོད་མཛད་པས་བདག་དང་སེམས་ཅན་ཐམས་ཅད་ལ་དེ་ལྟར་འགྲུབ་པར་བསམ། ཡང་ན་ལས་བྱང་ཆེ་བའི་བཀྲ་ཤིས་བརྗོད། དེ་ནས་བདག་གིས་ཞི་ཁྲོའི་དཀྱིལ་འཁོར་སྒྲུབ་ཅིང་བཟླས་སྒོམ་ལ་སོགས་པའི་དགེ་བ་འཁོར་གསུམ་ཡོངས་སུ་དག་པ་འདིས་སེམས་ཅན་གྱི་དོན་བསྒྲུབ་པའི་ཕྱིར་དུ་ཀུན་ཏུ་བཟང་པོའི་གཞི་ཐོག་ཏུ་གྲོལ་ནས་གང་འདུལ་གྱི་མཛད་པས་ཁམས་གསུམ་འཁོར་བའི་སེམས་ཅན་མ་ལུས་པ་ཐམས་ཅད་སྲིད་ཞིའི་སྡུག་བསྔལ་ཕྲ་རགས་ལས་བསྒྲལ་ནས་སྐུ་གསུམ་འབྲས་བུ་མྱུར་དུ་ཐོབ་པར་བྱེད་པར་ཤོག་ཅིག །བདག་འགྲོ་བ་ཡོངས་ཀྱི་དཔལ་དུ་གྱུར་པར་ཤོག་ཅིག་སྙམ། བསྔོ་བ་བྱ་བ་ནི། ན་མོ་འཁོར་གསུམ་སོགས་བརྗོད། འདིར་གཞན་དོན་ཁུར་དུ་ཁྱེར་བའི་ཐེག་ཆེན་གྱི་བསྔོ་བ་བྱེད་པའི་ཆེད་དུ་གཞུང་གི་ཚིག་ལས་དམིགས་པ་བྱེད་ཚུལ་ལོགས་སུ་བྱེད་པའོ། །དེ་ནས་ཉིན་དང་པོ་རྣམས་ལ། འདིར་ནི་རྟེན་དང་སོགས་ཀྱིས་མདུན་བསྐྱེད་བརྟན་བཞུགས་བྱ། ཉིན་ཐ་མར་རྟེན་ཡོད་ན་གོང་བཞིན་མདུན་བསྐྱེད་ཀྱི་ཡེ་ཤེས་པ་བརྟན་བཞུགས་དང་། དམ་ཚིག་པ་རང་ལ་བསྟིམ། ཆོས་སྐྱོང་འཇིག་རྟེན་པ་ཡོད་ན་གཤེགས་གསོལ་བྱ། རྟེན་མེད་ན་ༀ་ཁྱེད་ཀྱིས་སོགས་ཀྱིས་མདུན་བསྐྱེད་ཡེ་ཤེས་པ་དང་། ཆོས་སྐྱོང་འཇིག་རྟེན་པ་གཉིས་ཀ་གཤེགས། དམ་ཚིག་པ་རང་ལ་བསྟིམ། གང་ལྟར་ཡང་ཆོ་ག་རེ་རེའི་མཐར་བདག་བསྐྱེད་ནི་བསྡུ་རིམ་དགོས་ཏེ། གཟུགས་སྣང་ཐམས་ཅད་སོགས་བརྗོད་ཅིང་རྒྱལ་བ་ཞི་ཁྲོའི་ལྷ་ཚོགས་ཐམས་ཅད་ཀྱི་སྐུ་ཐམས་ཅད་རྟེན་སྲུང་འཁོར་འོག་གཞི་གཞལ་ཡས་ཁང་དང་བཅས་པ་འཇའ་ཡལ་

བ་ལྟར་དང་། གསུང་ཐམས་ཅད་འབྲུག་སྒྲ་ཡལ་བ་ལྟར་དང་། ཐུགས་ཐམས་ཅད་མཁའ་ལ་སྤྲིན་དེངས་པ་ལྟར་སྟོང་སེང་ངེ་བར་སོང་བར་བསམ་ལ། དེའི་ངང་ནས་གནས་ལུགས་ལ་ཅི་འདོད་ཀྱི་བར་དུ་མཉམ་པར་འཇོག །དེ་ནས་སྐད་ཅིག་སྟོང་གསལ་སོགས་ཀྱིས་སླར་ཡང་རང་ཉིད་རྒྱལ་བ་ཞི་ཁྲོའི་ལྷ་ཚོགས་ཐམས་ཅད་འདུས་པའི་བདག་ཉིད་ཁྱབ་བདག་རྡོ་རྗེ་སེམས་དཔའི་སྐུ་སྣང་ལ་རང་བཞིན་གྱིས་སྟོང་པའི་སྣང་སྟོང་ཡེ་ཤེས་སྒྱུ་མའི་སྐུར་གྱུར་བར་མོས་ལ་རྒྱུན་གྱི་སྤྱོད་ལམ་ལ་འཇུག་གོ །དེ་ལྟར་ཉམས་སུ་བླངས་ན་གནད་ཚང་ཞིང་གཞུང་དང་མི་འགལ་ལ་འཇུག་པ་བདེ་བ་ཡིན་ནོ། །གཞན་ཡང་ལས་བྱང་གཞུང་ལས་གསུངས་[པའི་]སོ་སོའི་སྔགས་བཟླ་བར་འདོད་ན་ནི། ཀུན་བཟང་ཡབ་ཡུམ་གྱི་སྔགས་མཉམ་དུ་སྦྲེལ་བ་ལ་ཚད་ཀྱི་གྲངས་བསྙེན་བསྐྱལ་ཞིང་གོང་གི་བསྙེན་དམིགས་ཚང་བར་བྱ། རིགས་ལྔ་ཡབ་ཡུམ་ལ་དེའི་བཅུ་ཆ་ཙམ་བཟླ་བ་དང་། བཀོད་པའི་བཟླས་པ་དང་ཡབ་ཡུམ་ལ་དོ་ལིའི་བཟླས་པ་ཙམ་མམ་བྱིན་རླབས་བསྡུ་བ་དང་གཞན་དོན་བྱེད་པའི་བཟླས་དམིགས་རྣམས་སྦྱར། སེམས་དཔའ་བརྒྱད་དང་སེམས་མ་བརྒྱད་དང་། ཐུབ་དྲུག་དང་། སྒོ་བ་ཡབ་ཡུམ་རྣམས་ལ་རིགས་ལྔའི་སྔགས་ཀྱི་བཅུ་ཆ་ཙམ་བཟླ་ཞིང་བཀོད་པའི་བཟླས་པ་ཙམ་བྱ། དེ་ནས་ཆེ་མཆོག་ལ་ཀུན་ཏུ་བཟང་པོའི་སྔགས་གྲངས་དང་མཉམ་པའམ་དེའི་ཕྱེད་ཆ་ཙམ་དང་བཟླས་དམིགས་ཐམས་ཅད་དང་། ལས་བྱང་ཆུང་བ་ཡིན་ན་ཆེ་མཆོག་དང་བུདྡྷ་ཧེ་རུ་ཀ་ངོ་བོ་གཅིག་ཏུ་བསྒོམ་ནས་བུདྡྷ་ཧེ་རུ་ཀ་ཡབ་ཡུམ་གྱི་སྔགས་དེ། དེ་ཙམ་བཟླ་ཞིང་བཟླས་དམིགས་ཐམས་ཅད་འགྱུར་བཟླས་ཀྱི་བར་སྦྱར། རིགས་ལྔ་ལ་ཆེ་མཆོག་གི་བཅུ་ཆའམ་རིགས་བཞི་ལ་བུདྡྷ་ཧེ་རུ་ཀའི་བཅུ་ཆ་དང་། བཀོད་

པ་དང་བྱིན་རླབས་བསྡུ་བ། གཞན་དོན་བྱེད་པ་སྦྱར། ཀཽ་རི་བརྒྱད་དང་སེང་ཧ་བརྒྱད་དང་དབང་ཕྱུག་ཉེར་བརྒྱད་དང་སྒོ་མ་བཞི་ལ་ཁྲག་འཐུང་རིགས་ལྔ་ཡབ་ཡུམ་གྱི་སྔགས་བཅུ་ཆ་ཙམ་དང་། བཀོད་པའི་བཟླས་པ་ཙམ་བྱའོ། །དེ་ཡང་ཀུན་བཟང་ཡབ་ཡུམ་གྱི་སྔགས་གྲངས་མ་སོང་བར་དུ་དེ་གཙོ་བོར་བཟླ་ཞིང་མཐར་ཞི་ཁྲོའི་ལྷ་རྣམས་ཀྱི་སྔགས་བཀོད་བཟླས་ཙམ་གྱིས་ཅུང་ཟད་རེ་བཟླས་ཏེ་ཐུན་བཀྲོལ། དེའི་གྲངས་བསྙེན་སོང་བ་ན་ཐོག་མར་ཀུན་བཟང་ཡབ་ཡུམ་གྱི་སྔགས་ཅུང་ཟད་བཟླས་ཏེ་རྣམ་སྣང་གི་སྔགས་བཟླས་དམིགས་པ་དང་བཅས་ཏེ་གཙོ་བོར་བཟླ། མཐར་གཞན་རྣམས་ཀྱི་སྔགས་རྣམས་བཀོད་བཟླས་ཙམ་གྱིས་ཅུང་ཟད་རེ་བཟླ། དེ་བཞིན་དུ་རྣམ་སྣང་གི་སྔགས་གྲངས་སོང་བ་རྡོར་སེམས་གཙོ་བོ་དང་། དེ་སོང་བ་ན་རྡོར་སེམས་ཀྱི་འཁོར་རྣམས་ཀྱི་སྔགས་གྲངས་རིམ་བཞིན་བཟླ་བ་སོགས་ཁྲོ་བོའི་ལྷ་ཚོགས་རྣམས་ཀྱི་བར་དུ་བཟླས་ཀྱང་ཆོག །ཐུན་རེ་ལ་ཀུན་བཟང་ཡབ་ཡུམ་ལ་གཙོ་བོར་བཟླས་ལ། རིགས་ལྔ་ལ་དེའི་བཅུ་ཆ་སོགས་བཟླས་ནས་གྲངས་བསོགས་ཀྱང་ཆོག །དེ་ལྟར་མི་ནུས་ན་ཐུན་རེ་ལ་ཀུན་བཟང་ཡབ་ཡུམ་གྱི་སྔགས་ཅི་ཐུབ་དང་། རྣམ་སྣང་སོགས་རིགས་ལྔ་ཡབ་ཡུམ་ལ་བདུན་ནམ་ཉེར་གཅིག་རེ། གཞན་ཐམས་ཅད་གསུམ་གསུམ། ཆེ་མཆོག་ལ་བརྒྱ། ཁྲག་འཐུང་ལྔ་ལ་བདུན་ནམ་ཉེར་གཅིག་སྟེ། གཞན་ཐམས་ཅད་ལ་གསུམ་རེ་བཟླ་བའི་སྒོ་ནས་ཐུན་བཅད་དེ་ཀུན་བཟང་ཡབ་ཡུམ་གྱི་སྔགས་གྲངས་སོང་བ་ན་ཐམས་ཅད་ཀྱི་གྲངས་བསྙེན་སོང་བར་བྱས་ཀྱང་ཆོག་པ་ཕྱག་ལེན་ལྟར་རོ། །གང་ལྟར་ཡང་དེའི་ཚུལ་ནི་དང་པོ་སྐྱབས་སེམས་ནས་ཛ྄བ་ཁ་དབྱེ་བའི་བར་གོང་བཞིན་སོང་བ་ན། རང་ཉིད་ཀུན་ཏུ་བཟང་པོ་ཡབ་ཡུམ་གྱི་ཐུགས་ཀར་ཟླ་བའི་གདན་རེ་རེའི་སྟེང་དུ་ཡབ་ཀྱི་ཐུགས་

ཀར་ཐུགས་སྲོག་ཨ་སྔོན་པོའི་མཐར་ཧཱུྃ་བཛྲ་ཙིཏྟ་ཨཿཁ་དོག་སྔོན་པོས་གཡས་སུ་བསྐོར། ཡུམ་གྱི་ཐུགས་ཀར་ཨ་དཀར་པོའི་མཐར་བཛྲ་ས་མནྟ་བྷ་ཏྲ་ༀ་ཁ་དོག་དཀར་པོས་གཡོན་དུ་བསྐོར་བར་གྱུར་པ་དང་གཉིས་ཀ་ལ་སེམས་ཅིག་ཆར་གཏད་དེ་ཐབས་ཤེས་ཡ་མ་བྲལ་བའི་ཕྱིར་དུ་ཡབ་ཡུམ་གཉིས་ཀྱི་སྔགས་སྦྲེལ་ཏེ་ཅི་རིགས་བཟླ། དེ་ནས་གོང་གི་བཟླས་དམིགས་ཐམས་ཅད་བྱེད་བཞིན་དུ་ཅི་ནུས་བཟླའོ། །དེ་ནས་ས་བོན་དང་སྔགས་ཀྱི་ཁ་དོག་ལྷ་རང་རང་གི་མདོག་ཏུ་ཤེས་པར་བྱས་ཏེ། རང་ཉིད་དབུས་ཀྱི་རྣམ་སྣང་ཡབ་ཡུམ་གྱི་ཐུགས་ཀར་ཟླ་བ་ལ་ཡབ་ཀྱི་ཐུགས་ཀར་ༀ་དཀར་པོའི་མཐར་རང་སྔགས་གཡས་དང་། ཡུམ་གྱི་ཐུགས་ཀར་ལཱཾ་དཀར་དམར་གྱི་མཐར་རང་སྔགས་གཡོན་དུ་བསྐོར་བར་གྱུར་པར་མོས་ལ། ༀ་ཛི་ན་ཛིཀ྄་སོགས་བཟླ། དེ་ནས་རང་ཉིད་ཤར་གྱི་རྡོར་སེམས་ཡབ་ཡུམ་གྱི་ཐུགས་ཀར་ཟླ་བ་ལ་ཧཱུྃ་སྔོན་པོ་ལ་སྔགས་གཡས་དང་། ཡུམ་ལ་མུཾ་མཐིང་སྐྱ་ལ་སྔགས་གཡོན་དུ་བསྐོར་བར་གྱུར། ཧཱུྃ་བཛྲ་ཌྷྲྀཀ྄་སོགས། རྡོར་སེམས་ཡབ་ཡུམ་ཀྱི་གཡས་ཀྱི་ས་སྙིང་གི་ཐུགས་ཀར་ཟླ་བ་ལ་ཀྵི་དཀར་པོའི་མཐར་སྔགས་ཀྱིས་གཡས་སུ་བསྐོར་བར་གྱུར། ཀྵི་ཧི་སོགས། གཡོན་གྱི་བྱམས་པའི་ཐུགས་ཀར་ཟླ་བ་ལ་མཻ་དཀར་པོའི་མཐར་སྔགས་ཀྱིས་གཡས་སུ་བསྐོར་བར་གྱུར། མཻ་ཏྲི་སོགས། མདུན་གྱི་ལ་སྱེ་མའི་ཐུགས་ཀར་ཟླ་བ་ལ་ཧཱུྃ་དཀར་པོའི་མཐར་རང་སྔགས་ཀྱིས་གཡོན་དུ་བསྐོར་བར་གྱུར། ཧཱུྃ་ལ་སྱེ་སོགས། རྒྱབ་ཀྱི་པུཥྤེ་མའི་ཐུགས་ཀར་ཟླ་བ་ལ་ཧཱུྃ་དཀར་པོའི་མཐར་རང་སྔགས་ཀྱིས་གཡོན་དུ་བསྐོར་བར་གྱུར། ཧཱུྃ་པུཥྤེ་སོགས། དེ་ནས་རང་ཉིད་ལྷོའི་རིན་འབྱུང་ཡབ་ཡུམ་གྱི་ཐུགས་ཀར་ཟླ་བའི་སྟེང་དུ་ཡབ་ལ་སྭཱ་སེར་པོ་ལ་རང་སྔགས་གཡས་

དང་། ཡུམ་ལ་མཾ་སེར་སྐྱ་ལ་རང་སྔགས་གཡོན་དུ་བསྐོར་བར་གྱུར། སྭཱ་རཏྣ་སོགས། རིན་འབྱུང་ཡབ་ཡུམ་གྱི་གཡས་ཀྱི་ཀུན་བཟང་གི་ཐུགས་ཀར་ཟླ་བ་ལ་ཧཱུྃ་དམར་སེར་གྱི་མཐར་རང་སྔགས་གཡས་སུ་བསྐོར་བར་གྱུར། ཧཱུྃ་སྭཱ་སོགས། གཡོན་གྱི་ནམ་སྙིང་གི་ཐུགས་ཀར་ཟླ་བ་ལ་ཏྲཾ་སེར་པོའི་མཐར་རང་སྔགས་གཡས་སུ་བསྐོར་བར་གྱུར། ཏྲཾ་ཨ་གརྦྷ་སོགས། མདུན་གྱི་མ་ལེ་མའི་ཐུགས་ཀར་ཟླ་བ་ལ་ཏྲཾ་སེར་པོའི་མཐར་རང་སྔགས་གཡོན་དུ་བསྐོར་བར་གྱུར། ཏྲཾ་མ་ལེ་སོགས། རྒྱབ་ཀྱི་དྷུཔྤེ་མའི་ཐུགས་ཀར་ཟླ་བ་ལ་ཛཿསེར་པོའི་མཐར་རང་སྔགས་གཡོན་དུ་བསྐོར་བར་གྱུར། ཛཿདྷུཔྤེ་སོགས། དེ་ནས་རང་ཉིད་ནུབ་ཀྱི་སྣང་མཐའ་ཡབ་ཡུམ་གྱི་ཐུགས་ཀར་ཟླ་བའི་སྟེང་དུ་ཡབ་ལ་ཨཾ་དམར་པོའི་མཐར་རང་སྔགས་གཡས་དང་། ཡུམ་ལ་པྱཾ་དམར་སྐྱའི་མཐར་རང་སྔགས་གཡོན་དུ་བསྐོར་བར་གྱུར། ཨཾ་ཨ་རོ་སོགས། སྣང་མཐའ་ཡབ་ཡུམ་གྱི་གཡས་ཀྱི་སྤྱན་རས་གཟིགས་ཀྱི་ཐུགས་ཀར་ཟླ་བ་ལ་ཧྲཱིཿདཀར་དམར་གྱི་མཐར་རང་སྔགས་གཡས་སུ་བསྐོར་བར་གྱུར། ཧྲཱིཿཧ་སོགས། གཡོན་གྱི་འཇམ་དཔལ་གྱི་ཐུགས་ཀར་ཟླ་བ་ལ་མུཾ་དམར་སེར་གྱི་[མཐར་]རང་སྔགས་གཡས་སུ་བསྐོར་བར་གྱུར། མུཾ་ཤྲི་སོགས། མདུན་གྱི་གིརྟི་མའི་ཐུགས་ཀར་ཟླ་བ་ལ་ཧྲཱིཿདམར་སྐྱའི་མཐར་རང་སྔགས་གཡོན་དུ་བསྐོར་བར་གྱུར། ཧྲཱི་གིརྟི་སོགས། རྒྱབ་ཀྱི་ཨ་ལོ་མའི་ཐུགས་ཀར་ཟླ་བ་ལ་བཾ་དམར་པོའི་མཐར་རང་སྔགས་གཡོན་དུ་བསྐོར་བར་གྱུར། བཾ་དྷི་བཾ་སོགས། དེ་ནས་རང་ཉིད་བྱང་གི་དོན་གྲུབ་ཡབ་ཡུམ་གྱི་ཐུགས་ཀར་ཟླ་བའི་སྟེང་དུ་ཡབ་ལ་ཧ་ལྗང་ཁུའི་མཐར་རང་སྔགས་གཡས་དང་། ཡུམ་ལ་ཏཾ་ལྗང་སྐྱའི་མཐར་རང་སྔགས་གཡོན་དུ་བསྐོར་བར་གྱུར། ཧ་པྲ་ཛྙ་སོགས། དོན་གྲུབ་ཡབ་ཡུམ་གྱི་

གཡས་ཀྱི་སྒྲིབ་སེལ་གྱི་ཐུགས་ཀར་ཟླ་བ་ལ་ཐླྷིཾ་ལྗང་གུའི་མཐར་རང་སྔགས་གཡས་སུ་བསྐོར་བར་གྱུར། ཐླྷིཾ་ས་རམ་སོགས། གཡོན་གྱི་ཕྱག་རྡོར་གྱི་ཐུགས་ཀར་ཟླ་བ་ལ་ཛྷིཾ་ལྗང་གུའི་མཐར་རང་སྔགས་ཀྱིས་གཡས་སུ་བསྐོར་བར་གྱུར། ཛྷིཾ་ཀུ་རུ་སོགས། མདུན་གྱི་གནྡྷེ་མའི་ཐུགས་ཀར་ཟླ་བ་ལ་ཧོ་ལྗང་གུའི་མཐར་རང་སྔགས་གཡོན་དུ་བསྐོར་བར་གྱུར། ཧོ་གནྡྷེ་སོགས། རྒྱབ་ཀྱི་ནིརྟི་མའི་ཐུགས་ཀར་ཟླ་བ་ལ་ཨ་ལྗང་གུའི་མཐར་རང་སྔགས་གཡོན་དུ་བསྐོར་བར་གྱུར། ཨ་ནིརྟི་སོགས། དེ་ནས་རིགས་ལྔ་གཙོ་འཁོར་གྱི་ཕྱི་རོལ་གྱི་ཤར་གྱི་ལྷའི་ཐུབ་པའི་ཐུགས་ཀར་ཟླ་བ་ལ་ཀྲེཾ་དཀར་པོའི་མཐར་རང་སྔགས་གཡས་བསྐོར་དུ་འཁོད་པར་གྱུར། ༀ་མུ་ནེ་སོགས། ནུབ་ཀྱི་དམྱལ་བའི་ཐུབ་པའི་ཐུགས་ཀར་ཟླ་བ་ལ་བྲེཾ་ནག་པོའི་མཐར་རང་སྔགས་གཡས་སུ་བསྐོར་བར་གྱུར། ༀ་མུ་ནེ་སོགས། ཤར་ལྷོར་ལྷ་མིན་ཐུབ་པའི་ཐུགས་ཀར་ཟླ་བ་ལ་ཏྲུཾ་ལྗང་གུའི་མཐར་རང་སྔགས་གཡས་སུ་བསྐོར་བར་གྱུར། ༀ་མུ་ནེ་སོགས། ལྷོ་ནུབ་ཏུ་མིའི་ཐུབ་པའི་ཐུགས་ཀར་ཟླ་བ་ལ་ཀྵཾ་སེར་པོའི་མཐར་རང་སྔགས་གཡས་སུ་བསྐོར་བར་གྱུར། ༀ་མུ་སོགས། ནུབ་བྱང་བྱོལ་སོང་ཐུབ་པའི་ཐུགས་ཀར་ཟླ་བ་ལ་སྲུཾ་མཐིང་གའི་མཐར་རང་སྔགས་གཡས་སུ་བསྐོར་བར། ༀ་མུ་སོགས། བྱང་ཤར་ཡི་དྭགས་ཐུབ་པའི་ཐུགས་ཀར་ཟླ་བ་ལ་ཡེ་དམར་པོའི་མཐར་རང་སྔགས་གཡོན་དུ་བསྐོར་བ་གྱུར། ༀ་མུ་སོགས། དེ་ནས་ཤར་སྒོའི་རྣམ་རྒྱལ་ཡབ་ཡུམ་གྱི་ཐུགས་ཀར་ཟླ་བའི་སྟེང་དུ་ཡབ་ལ་ཧཱུྃ་དཀར་པོའི་མཐར་རང་སྔགས་གཡས་དང་། ཡུམ་ལྕགས་ཀྱུ་མ་ལ་ཛཿདཀར་པོའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀྲོ་དྷ་བི་ཛ་སོགས། ལྷོ་སྒོར་གཤིན་རྗེ་ཡབ་ཡུམ་གྱི་ཐུགས་ཀར་ཟླ་བ་ལ་ཧཱུྃ་སེར་པོའི་མཐར་རང་སྔགས་གཡས་དང་། ཡུམ་ལ་ཧཱུྃ་སེར་

པོའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀྲོ་དྷ་ཡ་མནྟ་སོགས། ནུབ་སྒོའི་རྟ་མགྲིན་ཡབ་ཡུམ་གྱི་ཐུགས་ཀར་ཟླ་བ་ལ་ཡབ་ལ་ཧཱུྃ་དམར་པོའི་མཐར་རང་སྔགས་གཡས་དང་། ཡུམ་ལ་བཾ་དམར་པོའི་མཐར་རང་སྔགས་གཡོན་དུ་བསྐོར་བར་གྱུར། ༀ་པདྨ་ཀྲོ་དྷ་སོགས། བྱང་སྒོའི་བདུད་རྩི་འཁྱིལ་བ་ཡབ་ཡུམ་གྱི་ཐུགས་ཀར་ཟླ་བ་ལ་ཡབ་ལ་ཧཱུྃ་ལྗང་གུའི་མཐར་རང་སྔགས་གཡས་དང་། ཡུམ་ལ་ཧོཿལྗང་གུའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀྲོ་དྷ་ཨ་མྲྀ་ཏ་སོགས། དེ་ལ་ༀ་བཛྲ་བི་ཛ་ཡ་ཧཱུྃ་ནི་ཡབ་དང་། བཛྲ་ཨཾ་ཀུ་ཤ་ཛཿཡུམ་གྱི་སྔགས་ཡིན་པ་སོགས་སོ། །དེ་ནས་ཁྲོ་བོའི་སྔགས་བཟླ་བ་ནི། དཀྱིལ་འཁོར་གྱི་དབུས་སུ་བུདྡྷ་ཧེ་རུ་ཀདེའི་དབུ་ཐོག་ཏུ་ཆེ་མཆོག །དེའི་དབུ་ཐོག་ཏུ་རྣམ་སྣང་། དེའི་དབུ་ཐོག་ཏུ་ཀུན་བཟང་ཡབ་ཡུམ་རྣམས་ཡོད་པ་ལས། དབུས་ཀྱི་ཆེ་མཆོག་ཡབ་ཡུམ་གྱི་ཐུགས་ཀར་ཉི་མའི་གདན་ལ་ཡབ་ལ་ཧཱུྃ་སྨུག་ནག་གི་མཐར་རང་སྔགས་གཡས་དང་། ཡུམ་ལ་ཧཱུྃ་ཡུམ་སྔགས་རྣམས་ཧཱུྃ་ཕྱིར་ལོག་ཡིན་མཆན། སྨུག་ནག་གི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་མ་ཧཱ་ཀྲོ་དྷ་སོགས། དབུས་ཀྱི་བུདྡྷ་ཧེ་རུ་ཀ་ཡབ་ཡུམ་གྱི་ཐུགས་ཀར་ཉི་མ་ལ་ཡབ་ལ་ཧཱུྃ་སྨུག་ནག་གི་མཐར་རང་སྔགས་གཡས་དང་། ཡུམ་ལ་་སྨུག་ནག་གི་མཐར་རང་སྔགས་གཡོན་དུ་བཀོད་པར་གྱུར། ༀ་བུདྡྷ་ཀྲོ་དྷ་སོགས། དེ་ནས་རང་ཉིད་ཤར་གྱི་བཛྲ་ཧེ་རུ་ཀ་ཡབ་ཡུམ་གྱི་ཐུགས་ཀར་ཉི་མ་ལ་ཡབ་ལ་ཧཱུྃ་མཐིང་ནག་གི་མཐར་རང་སྔགས་གཡས་དང་། ཡུམ་ལ་་མཐིང་ནག་ལ་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀྲོ་དྷ་སོགས། རང་ཉིད་ལྷོའི་རཏྣ་ཧེ་རུ་ཀ་ཡབ་ཡུམ་གྱི་ཐུགས་ཀར་ཉི་མ་ལ་

ཡབ་ལ་ཧཱུྃ་སེར་ནག་གི་མཐར་རང་སྔགས་གཡས་དང་། ཡུམ་ལ་་སེར་ནག་གི་མཐར་རང་སྔགས་གཡོན་དུ་བསྐོར་བར་གྱུར། ༀ་རཏྣ་ཀྲོ་དྷ་སོགས། རང་ཉིད་ནུབ་ཀྱི་པདྨ་ཧེ་རུ་ཀ་ཡབ་ཡུམ་ཀྱི་ཐུགས་ཀར་ཉི་མ་ལ་ཡབ་ལ་ཧཱུྃ་དམར་ནག་གི་མཐར་རང་སྔགས་གཡས་དང་། ཡུམ་ལ་་དམར་ནག་གི་མཐར་རང་སྔགས་གཡོན་དུ་བསྐོར་བར་གྱུར། ༀ་པདྨ་ཀྲོ་དྷ་སོགས། རང་ཉིད་བྱང་གི་ཀརྨ་ཧེ་རུ་ཀ་ཡབ་ཡུམ་གྱི་ཐུགས་ཀར་ཉི་མ་ལ་ཧཱུྃ་ལྗང་ནག་གི་མཐར་རང་སྔགས་གཡས་དང་། ཡུམ་ལ་་ལྗང་ནག་གི་མཐར་རང་སྔགས་གཡོན་དུ་བསྐོར་བར་གྱུར། ༀ་ཀརྨ་ཀྲོ་དྷ་སོགས། དེ་ནས་ཁྲག་འཐུང་རིགས་བཞིའི་ཕྱི་རོལ་གྱི་ཀཽ་རི་མ་བརྒྱད་ཀྱི་ཤར་གྱི་ཀཽ་རི་མའི་ཐུགས་ཀར་ཉི་མ་ལ་ཧ་དཀར་པོ་ལ་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀཽ་རི་སོགས། ལྷོའི་ཙཽ་རི་མའི་ཐུགས་ཀར་ཉི་མ་ལ་ཧ་སེར་པོ་ལ་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཙཽ་རི་སོགས། ནུབ་ཀྱི་པྲ་མོའི་ཐུགས་ཀར་ཉི་མ་ལ་ཧ་དམར་པོའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་པྲ་མོ་ཧ༔ བྱང་གི་བཻ་ཏའི་ཐུགས་ཀར་ཉི་མ་ལ་ཧ་ལྗང་གུ་ལ་རང་སྔགས་གཡོན་དུ་བསྐོར་བར་གྱུར། ༀ་བཛྲ་བཻ་སོགས། ཤར་ལྷོའི་པུསྐ་སིའི་ཐུགས་ཀར་ཉི་མ་ལ་ཧ་སེར་པོ་ལ་རང་སྔགས་གཡོན་དུ་བསྐོར་བར་གྱུར། ༀ་བཛྲ་པུཥྐ་སོགས། ལྷོ་ནུབ་ཀསྨ་རིའི་ཐུགས་ཀར་ཧ་ལྗང་གུའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཀསྨ་སོགས། ནུབ་བྱང་ཙནྜའི་ཐུགས་ཀར་ཉི་མ་ལ་ཧ་སེར་པོའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་ཙནྜ་སོགས། བྱང་ཤར་སྨ་ཤ་མའི་ཐུགས་ཀར་ཉི་མ་ལ་ཧ་མཐིང་གའི་མཐར་རང་སྔགས་གཡོན་དུ་བསྐོར་བར་གྱུར། ༀ་བཛྲ་སྨ་ཤ་ནི་ཧ། དེ་ནས་ཀཽ་རི་བརྒྱད་ཀྱི་ཕྱི་རོལ་དུ་སེང་ཧ་མ་བརྒྱད་དེ། སྔ་མ་བཞིན་དུ་སེང་

ཧ་བརྒྱད་ཀྱི་ཐུགས་ཀར་ཉི་མའི་གདན་རེ་རེ་ལ་ཤར་གྱི་སེང་གདོང་མའི་ཐུགས་ཀར་ཧེ་སྨུག་ནག་ལ་ༀ་བཛྲ་སེང་ཧ་མུ་ཁ་སོགས། ལྷོར་སྟག་གདོང་མའི་ཐུགས་ཀར་ཧེ་དམར་པོ་ལ་གཡོན་བསྐོར་དུ་ༀ་བཛྲ་བྱ་ཀྲི་སོགས། ནུབ་ཀྱི་སྲི་ལའི་ཐུགས་ཀར་ཧེ་ནག་པོ་ལ་ༀ་བཛྲ་སྲི་ལ་སོགས། བྱང་གི་སྤྱང་གདོང་མའི་ཐུགས་ཀར་ཧེ་མཐིང་ནག་ལ་ༀ་བཛྲ་ཤྭ་ན་སོགས། ཤར་ལྷོའི་ཀྲི་ཏིའི་ཐུགས་ཀར་ཧེ་སེར་པོ་ལ་ༀ་བཛྲ་ཀྲི་ཏ་སོགས། ལྷོ་ནུབ་ཀང་ཀའི་ཐུགས་ཀར་ཧེ་དམར་པོ་ལ་ༀ་བཛྲ་ཀང་ཀ་སོགས། ནུབ་བྱང་ཁ་ཁའི་ཐུགས་ཀར་ཧེ་ནག་པོ་ལ་ༀ་བཛྲ་ཁ་ཁ་སོགས། བྱང་ཤར་འུག་གདོང་མའི་ཐུགས་ཀར་ཧེ་མཐིང་ནག་ལ་ༀ་བཛྲ་ཧུ་ལུ་སོགས། དེ་ནས་སྒོ་མ་བཞིའི་ཐུགས་ཀར་ཉི་མའི་གདན་རེ་རེའི་སྟེང་དུ་ཤར་གྱི་རྟ་གདོང་མའི་ཐུགས་ཀར་ཛཿདཀར་པོ་ལ་གཡོན་བསྐོར་དུ་ༀ་བཛྲ་ཨཾ་ཀུ་ཤ་ཛཿལྷོར་ཕག་གདོང་མར་ཧཱུྃ་སེར་པོ་ལ་ༀ་བཛྲ་པ་ཤ་ཧཱུྃ། ནུབ་སེང་གདོང་མར་བཾ་དམར་པོ་ལ་ༀ་བཛྲ་སྤོ་ཊ་བཾ། བྱང་སྦྲུལ་གདོང་མར་ཧོ་ལྗང་གུ་ལ་གཡོན་བསྐོར་དུ་ༀ་བཛྲ་གནྚེ་ཧོཿདེ་ནས་དཀྱིལ་འཁོར་གྱི་ཕྱི་ཁྱམས་ལ་སྒོ་བཞིའི་གཡས་གཡོན་དུ་དབང་ཕྱུག་མ་གསུམ་རེ་དང་། སྒོ་ཁང་དུ་རེ་རེ་སྟེ་དབང་ཕྱུག་ཉེར་བརྒྱད་རྣམས་ཀྱི་ཐུགས་ཀར་ཉི་མའི་གདན་རེ་རེའི་སྟེང་དུ་བྷྱོ་རང་མདོག་གི་མཐར་རང་སྔགས་རང་མདོག་གིས་གཡོན་དུ་བསྐོར་བ་བཀོད་པ་ཐམས་ཅད་ལ་འདྲ་བར་ཤེས་པར་བྱས་ཏེ། བྱང་ཤར་ནས་བརྩམས་ཏེ་ཐམས་ཅད་གཡས་བསྐོར་གྱི་སྒོ་ནས་ཤར་སྒོའི་གཡོན་གྱི་སྲིན་མོ་སྨུག་ནག་ལ་བྷྱོ་སྨུག་ནག་མཐར་ༀ་བཛྲ་མ་ནུ་རཀྵ་སི་བྷྱོ། ཚངས་པ་ལ་བྷྱོ་སེར་ༀ་པྲ་མ་ནི་བྷྱོ། ལྷ་ཆེན་ལ་བྷྱོ་ལྗང་གུ་ༀ་རེ་ཏྲི་མ་བྷྱོ། ཤར་སྒོའི་གཡས་སུ་གཏོགས་འདོད་ལ་བྷྱོ་སྔོན་པོ་ༀ་བྷ་ན་བྷ་བྷྱོ། གཞོན་ནུ་ལ་བྷྱོ་དམར་པོ་ༀ་ཀཽ་རི་མ་བྷྱོ། བརྒྱ་བྱིན་ལ་བྷྱོ་དཀར་

པོ་ༀ་ཨིན་ཏྲ་ཡ་ནི་བྷྱོ། ལྷོ་སྒོའི་གཡོན་གྱི་རྡོ་རྗེ་ཕ་ཝཾ་མར་བྷྱོ་སེར་པོ་ༀ་སེངྷ་ཀ་མ་ནི་བྷྱོ། ཞི་བ་ཆུ་སྲིན་ལ་བྷྱོ་དམར་པོ་ༀ་ཨ་མྲྀ་ཏ་བྷྱོ། བདུད་རྩི་སྡིག་གདོང་མར་བྷྱོ་དམར་པོ་ༀ་སོའུ་ནི་བྷྱོ། ལྷོ་སྒོའི་གཡས་ཀྱི་ཟླ་བ་ཁྲ་མགོ་མར་བྷྱོ་དཀར་པོ་ༀ་ཏ་ན་ཧཾ་བྷྱོ། བེ་ཅོན་ཝ་གདོང་མར་བྷྱོ་ལྗང་གུ་ༀ་རཀྴ་སི་བྷྱོ། སྲིན་མོ་སྟག་གདོང་མར་བྷྱོ་ནག་པོ་ༀ་བཀྴ་སི་བྷྱོ། ནུབ་སྒོའི་གཡོན་གྱི་ཟ་བ་བྱ་རྒོད་མར་བྷྱོ་ལྗང་གུ་ༀ་ར་ཏྲི་མ་བྷྱོ། དགའ་བ་རྟ་གདོང་མར་བྷྱོ་དམར་པོ་ༀ་རེ་ཏྲི་རེ་མ་ཏི་བྷྱོ། སྟོབས་ཆེན་ཁྱུང་གདོང་མར་བྷྱོ་དཀར་མོ་ༀ་ཨེ་ཀ་ཙ་ར་མ་བྷྱོ། ནུབ་སྒོའི་གཡས་སུ་སྲིན་མོ་ཁྱི་གདོང་མར་བྷྱོ་དམར་པོ་ༀ་མ་ནུ་ཧ་ར་མ་བྷྱོ། འདོད་པ་པུ་ཤུད་མར་བྷྱོ་དམར་པོ་ༀ་སི་ཏི་ཀ་མ་བྷྱོ། ནོར་སྲུང་ཤ་མགོ་མར་བྷྱོ་ལྗང་གུ་ༀ་བྷ་ཡ་བྷྱ་བྷྱོ། བྱང་སྒོའི་གཡོན་དུ་རླུང་ལྷ་སྤྱང་གདོང་མར་བྷྱོ་ལྗང་གུ་ༀ་མ་ཧཱ་མ་ར་ན་བྷྱོ། མི་མོ་སྐྱིན་གདོང་མར་བྷྱོ་དམར་མོ་ༀ་ཨགྣེ་ཡེ་བྷྱོ། ཕག་མོ་ཕག་གདོང་མར་བྷྱོ་ནག་པོ་ༀ་བ་ར་ཧཾ་བྷྱོ། བྱང་སྒོའི་གཡས་སུ་རྡོ་རྗེ་ཁྭ་གདོང་མར་བྷྱོ་དམར་མོ་ༀ་ཙ་མུཎྜི་བྷྱོ། སྣ་ཆེན་གླང་ཆེན་མར་བྷྱོ་ལྗང་གུ་ༀ་བྷུ་ཏ་ན་བྷྱོ། ཆུ་ལྷ་སྦྲུལ་གདོང་མར་བྷྱོ་ལྗང་གུ་ༀ་པ་ཎི་བཛྲ་བྷྱོ། ཤར་གྱི་སྒོ་ཁང་གི་རྡོ་རྗེ་ཁུ་བྱུག་མར་བྷྱོ་དཀར་པོ་ༀ་མ་ཧཱ་ཀ་ལ་བྷྱོཿལྷོའི་སྒོ་ཁང་གི་རྡོ་རྗེ་ར་གདོང་མར་བྷྱོ་སེར་པོ་ༀ་ཙ་ཀ་ལ་བཛྲ་བྷྱོ། ནུབ་ཀྱི་སྒོ་ཁང་གི་རྡོ་རྗེ་སེང་གདོང་མར་བྷྱོ་དམར་མོ་ༀ་བཛྲ་བུམ་པ་ཀ་ར་ན་བྷྱོ། བྱང་གི་སྒོ་ཁང་གི་སྦྲུལ་གདོང་མའི་ཐུགས་ཀར་ཉི་མ་ལ་བྷྱོ་ལྗང་གུའི་མཐར་རང་སྔགས་གཡོན་བསྐོར་དུ་གྱུར་པ་ལ་དམིགས་ནས་ༀ་ལམ་པོ་དྷ་ར་ན་བྷྱོ། ལན་གསུམ་མམ་བདུན་སོགས་བཟླའོ། །བཟླས་དམིགས་འདི་ནི་ཤིན་ཏུ་རྙོག་ཆེས་པ་ཡིན་ཀྱང་བློ་དམན་རྣམས་ཀྱིས་ལྷ་སོ་སོའི་ས་བོན་དང་རང་རང་གི་སྔགས་དང་། སྔགས་འཁོར་གྱི་གདན་དང་གཡས་

བསྐོར་དང་གཡོན་བསྐོར་གྱི་སྔགས་ཀྱི་རིམ་པ་སོགས་མ་འདྲེས་པར་ཤེས་པའི་ཆེད་དུ་དེ་ལྟར་བཀོད་པ་ཡིན་པས་བསྙེན་མཚམས་པ་རྣམས་ཀྱིས་འདི་ལ་གཟིགས་བཞིན་བཟླས་པ་བྱས་ན་གོ་མ་འཁྲུགས་ཤིང་གསལ་བ་ཞིག་འོང་། ཡང་ཕྱག་ལེན་སེམས་དཔའ་སེམས་མ་བཞི་བཞིའི་སྔགས་ཚན་དུ་བཅད་ནས་བཟླ་བ་སོགས་ཀྱང་དམིགས་པ་འཆར་དཀའ་ན་འདི་ལྟར་སོ་སོར་བཟླས་ན་ལེགས། སྤྱིར་དམིགས་པ་གསལ་ཐེབས་ན་ནི་ལྷ་ཚོགས་ཞི་བ་ཞེ་གཉིས་ཀྱི་ཐུགས་ཀར་ཟླ་བའི་གདན་རེ་རེ་དང་ཁྲོ་བོའི་ལྷ་ཚོགས་དྲུག་ཅུའི་ཐུགས་ཀར་ཉི་མའི་གདན་རེ་རེའི་སྟེང་དུ་རང་རང་གི་ས་བོན་རང་མདོག་གི་མཐར་སྔགས་ཀྱིས་ཡབ་རྣམས་ལ་གཡས་བསྐོར་དང་ཡུམ་རྣམས་གཡོན་བསྐོར་དུ་གྱུར། ཞེས་པ་ཙམ་གྱིས་ཞི་ཁྲོའི་ལྷ་ཚོགས་ཐམས་ཅད་ཀྱི་ཐུགས་ཀར་སྔགས་འཁོར་རྣམས་དུས་གཅིག་ཏུ་གསལ་བཏབས་ལ། དེ་ནས་ཐོག་མར་ཀུན་བཟང་ཡབ་ཡུམ་གྱིི་ཐུགས་ཀའི་སྔགས་འཁོར་ལ་དམིགས་ནས་བཀོད་པའི་བཟླས་པ་དང་། དོ་ལིའི་བཟླས་པ་སོགས་བྱ། དེ་ནས་རྣམ་སྣང་ཡབ་ཡུམ་གྱི་ཐུགས་ཀའི་སྔགས་འཁོར་ལ་དམིགས་ནས་བཀོད་པའི་བཟླས་པ་བྱ་བ་སོགས་དབང་ཕྱུག་ཉེར་བརྒྱད་ཀྱི་སྔགས་ཀྱི་བར་རྣམས་རིམ་པ་བཞིན་དུ་བཟླའོ། །གང་ལྟར་ཡང་གོང་དུ་བཤད་པ་བཞིན་རྣམ་སྣང་དང་རྡོར་སེམས་ཡབ་ཡུམ་གོ་བརྗེས་ནས་ཡིག་བརྒྱ་བཟླ་བ་དང་། ལས་བཞིའི་བཟླས་དམིགས། བསྙེན་བསྟོད་སོགས་བྱའོ།། །།ཚེ་གཅིག་སངས་རྒྱས་ཐོབ་པར་འདོད་པ་རྣམས། །རྒྱལ་བ་ཞི་ཁྲོའི་བསྐྱེད་རྫོགས་རྣལ་འབྱོར་ལ། །

ནམ་ཡང་ལྷོད་པར་མེད་པར་འཇུག་བྱས་ན། །སངས་རྒྱས་མྱུར་དུ་ཐོབ་ལ་སོམ་ཉི་མེད། །དེ་ཕྱིར་དལ་འབྱོར་དོན་ཡོད་བྱ་བའི་ཕྱིར། །ཟབ་ཆོས་འདི་ཡི་བསྙེན་སྒྲུབ་རྣལ་འབྱོར་ལ། །རྟག་པར་རྒྱུན་དུ་བརྩོན་པ་ལྷུར་བླངས་ཏེ། །ཚུལ་བཞིན་སྒྲུབ་ཅིང་ཉམས་སུ་ལེན་པར་འཚལ། །ཞེས་ཀརྨ་གླིང་པའི་ཞི་ཁྲོ་དགོངས་པ་རང་གྲོལ་གྱི་བསྙེན་སྒྲུབ་ཀྱི་དམིགས་རིམ་ཡེ་ཤེས་གསལ་བའི་སྒྲོན་མེ་ཞེས་བྱ་བ་འདི་ནི་སང་སང་སྐུ་དབོན་དམ་པ་རྟོགས་ལྡན་སྟོན་པའི་གསུང་གནང་བ་བཞིན། བཙུན་པ་མཆོག་དགའ། རྟོགས་ལྡན། ཀར་ཆོས། ཚོགས་འཕེལ། དཔལ་ལི། བསྟན་རྒྱམ་དང་། དུང་དཀར་དགོན་གྱི་གྲྭ་སྡེ་དྲུག་གི་བསྐུལ་ངོར། ཐུབ་བསྟན་དགེ་ལེགས་རྒྱ་མཚོས་སྦྱར་བའོ།། །།