དེ་ལ་འདིར་སོགས།

༈ བླ་མ་ལ་ཕྱག་འཚལ་ལོ། །དེ་ལ་འདིར་གང་ཟག་བརྩོན་འགྲུས་དང་དབང་པོ་འབྲིང་རྣམས་བར་དོར་གྲོལ་བའི་གདམས་པ་ལ་གསུམ་ལས། དང་པོ་འཆི་ཁ་བར་དོ་ལ་མི་གསལ་བ་གསལ་གདབ་པ་སྒེག་མོ་ལ་མེ་ལོང་བསྟན་པ་ལྟ་བུའི་གདམས་ངག་ནི། ཉི་ཟླ་ཁ་སྦྱོར་ལས། གང་ཞིག་ལུས་ཅན་སྐྱེས་བུ་རྣམས། །ཞེས་དང་། ཚེ་ནི་མི་སྡོད་མགྲོན་པོ་འདྲ། །མགྲོན་པོ་རྟག་ཏུ་བསྡད་པ་མེད། །ཅེས་གསུངས་པ་ལྟར། འགྲོ་བ་ལུས་ཅན་ཀུན་གྱིས་ཀྱང་འཆི་བའི་ལམ་དུ་ཆས་དགོས་པའི་ཕྱིར། ད་ལྟ་རང་རེ་ཅག་བདེ་བར་ཡོད་པའི་དུས་ནས་འཆི་ལྟས་བརྟགས་ཚུལ་དང་བསླུ་བའི་ཆོ་ག །འཆི་ཁ་བར་དོ་སོགས་ཀྱི་གདམས་ངག་རྣམས་རང་གི་ཉམས་འོག་ཏུ་ཆུད་པར་མ་བྱས་ན། ཇི་སྐད་དུ། བླ་མའི་གདམས་ངག་སེམས་ལ་མ་བཞག་ན། །རང་གིས་རང་ཉིད་བསླུ་བར་མི་འགྱུར་རམ། །ཅེས་གསུངས་པས། དུས་རྒྱུན་དུ་རང་ལ་ནད་རྐྱེན་སོགས་ཡོད་མེད་གང་གི་དུས་སུའང་འཆི་ལྟས་བརྟགས་ལ། གལ་ཏེ་བྱུང་བའི་ཚེ་བསླུ་བའི་ཆོ་ག་ཟབ་མོའི་ཐབས་ལ་བརྩོན། ཅིས་ཀྱང་བཟློག་མི་ནུས་པར་འཆི་ངེས་ན། རྒྱུད་ལས། དེ་ཚེ་བླ་མའི་མན་ངག་རྣམས། །རང་གི་རྒྱུད་ལ་འདྲེས་པར་བྱ། །ཞེས་པ་ལྟར། རང་ལ་རྒྱུ་རྫས་ལོངས་སྤྱོད་ཅི་ཡོད་པ་ཐམས་ཅད་མཆོད་སྦྱིན་གྱི་ཕྱོགས་སུ་སྤོང་དག་བྱས་ལ། ཚེ་འདི་སྣང་གི་ཞེན་པ་ཐམས་ཅད་རྦད་ཀྱིས་བཅད་ནས། གནས་གྲོང་ལྟ་བུ་ཡིན་ན་དབེན་པ་ཞིག་ལ་ཕྱིན་ནས་ཆོས་གྲོགས་བཟང་པོ་གཅིག་ཙམ་ཉེ་དྲུང་དུ་བཞག་སྟེ། སྐུ་གསུང་ཐུགས་རྟེན་གྱི་མདུན་དུ་ཅི་འབྱོར་བའི་མཆོད་པ་བཤམས་ལ། དེ་དུས་ཀྱི་གདམས་ངག་རྣམས་རང་གི་ཡིད་ལ་གསལ་པོར་ཡོད་ན་དེས་ཆོག་པས་སྐབས་འདིར་དྲན་པར་བྱ་སྟེ། སྐུ་དང་ཡེ་ཤེས་ལ་འཇུག་པའི་

འོད་གསལ་སྦུབ་འཇུག །ཡུལ་དང་གནས་ལ་འཇུག་པའི་གྲོང་འཕོ་གྲོང་འཇུག་གི་གདམས་པ་གཉིས་གང་ལ་འདྲེས་ཤིང་གོམས་པའི་བློའི་ནུས་པ་དང་སྦྱར་ལ། སྔ་མ་ནི་ཉི་ཟླ་ཁ་སྦྱོར་ལས། སྐུ་དང་ཡེ་ཤེས་འཇུག་ལུགས་ནི། །རིག་པ་འདི་ལྟར་གཏད་པར་བྱ། །ཕུང་པོ་སེང་གེའི་ཉལ་ལུགས་ཀྱིས། །རིག་པ་ཉིད་ནི་མིག་ལ་གཏད། །ཡིད་ཙམ་བར་སྣང་ལམ་དུ་བྱ། །དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པར་ནི། །འཚང་རྒྱ་བ་ལ་ཐེ་ཚོམ་མེད། །ཅེས་པས་དོན་ཐིམ་རིམ་བྱུང་བའི་ཚེ། ནམ་མཁའ་མཐོང་བའི་སར་བསྡད་ལ། བཞུགས་སྟངས་གསུམ་གང་རུང་ངམ་སེང་གེའི་ཉལ་ལུགས་བྱས་ནས་གཞོག་གཡས་ས་ལ་ཕབ། མགོ་བྱང་ཕྱོགས་སུ་བསྟན་ཏེ། ཤེས་པ་མིག་ལ་གཏད། མིག་དབྱིངས་རིག་ལ་གཏད་ནས། ཀ་དག་གི་ངང་ལ་སྤྲོ་བསྡུ་མེད་པའི་ངང་ནས་འཚོ་བའི་འདུ་བྱེད་བཏང་བས་སྐད་ཅིག་དེ་ཉིད་ལ་གྲོལ་བར་འགྱུར་རོ། །འདི་ལ་གསང་ལམ་ངོ་སྤྲོད་ཀྱང་བྱ་སྟེ་ཤིན་ཏུ་གནད་ཟབ་པའི་ཕྱིར། ད་ལྟ་ནའང་ནམ་མཁའ་དྭངས་བའི་ཚེ་རིག་པ་དབྱིངས་སུ་གཏད་དེ། བདག་ངེས་པར་འཆི་བའི་དུས་ལ་བབས་པ་ཡིན་པས་སྤྲོས་པ་མེད་པའི་ཀློང་དུ་མྱ་ངན་ལས་འདའ་བར་བྱའོ་སྙམ་དུ། དབུགས་ཕྱིར་འཕང་པའི་ཕྱི་ལ་ཤེས་པ་གཏད་མེད་ཉིད་དུ་འཇོག་པ་ནི་ཤིན་ཏུ་མྱུར་བའི་ལམ་ཡིན་ནོ། །ཕྱི་མ་ནིི། ཡང་རྒྱུད་ལས། ཡུལ་གནས་དག་ལ་འཇུག་ལུགས་ནི། གྲོང་ཕོ་གྲོང་འཇུག་གདམས་པ་སྟེ། རྣམ་ཤེས་རླུང་ལ་ཞོན་ལ་སྦྱང་། །དེ་ཡང་གོང་དུ་འབྱོང་བ་གཅེས། །རིག་པ་བསྡུ་དང་འཕང་བ་གཅེས། །དེ་ཡང་ཧིག་གིས་འཕང་བའོ། །དེ་ཉིད་བླ་མའི་ཞལ་ལ་ཐུག །ཅེས་པས། རླུང་ཐ་མ་ཕྱིར་འགྲོ་དུས་སྙིང་ག་ན་རིག་པ་ཨ་དཀར་པོ་ཞིག་ཏུ་བསམ་ལ་ཚང་བུག་ནས་ཡར་རྒྱང་གིས་

སོང་བར་བསམ་པའི་མོད་ལ་ཧིག་ཉེར་གཅིག་བརྩེགས་མར་བརྗོད་པས་གྲོལ་བར་ངེས་སོ། །དེ་ཡང་རྒྱུད་ཀྱི་ཚིག་ཟིན་གྱིས་ཇི་ལྟར་བསྟན་བ་བཞིན་ད་ལྟ་ནས་འབྱོངས་པ་གལ་ཆེའོ། །གནད་འདི་ལྟ་བུ་དང་ལྡན་པ་རྣམས་ནི་ཐིམ་རིམ་ངེས་པ་ལ་མ་ལྟོས་པར་བྱང་ཆུབ་སེམས་དཔའི་དབུགས་འཕོ་ལུགས་དག་གི་མྱང་ངན་ལས་འདས་པ་ཡང་ཡོད་དོ། །གལ་དེ་རང་ལ་གདམས་ངག་དེ་དག་མི་གསལ་ཞིང་གདེང་མེད་ན་སྔ་མ་ལས། གལ་དེ་དེ་དག་མི་གསལ་ན། །རང་གི་བླ་མ་གནས་པ་ན། །གོང་གི་མན་ངག་གསལ་ཡང་གདབ། །བླ་མ་མེད་ན་རྡོ་རྗེ་སྤུན། །ཤེས་པས་གསལ་ཡང་གདབ་པར་བྱ། །ཞེས་པས། རབ་རང་གི་བླ་མ། འབྲིང་རྡོ་རྗེ་སྤུན་སྲིང་། ཐ་ནའང་རང་དང་དམ་ཚིག་ལ་སེལ་མེད་ཅིང་འཆི་ཁའི་བར་དོའི་ངོ་སྤྲོད་ཀློག་ཤེས་པ་གཅིག་གིས། འདི་སྐད་དུ། དང་པོ་འཆི་བའི་བརྡའ་སྦྱར་ཞིང་སེམས་བསྐྱེད་དུ་བཅུག་པ་ནི། ཀྱེ་རིགས་ཀྱི་བུ་ཆེ་གེ་མོ་མ་ཡེངས་པར་ཉོན་ཅིག །འོ་ན་ད་ལམ་འདིར་འཇམ་དཔལ་རྣམ་པར་རོལ་པ་ལས། ཕ་མ་ཁྱོད་ཀྱི་སྐྱབས་མ་ཡིན། །མཛའ་བཤེས་རྩ་ལེགས་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །རང་ཉིད་གཅིག་པུར་ཕྱི་མར་འགྲོ། །ཞེས་གསུངས་པ་ལྟར། ད་ནི་ཁྱོད་ལ་འཆི་ཁ་བར་དོ་ཞེས་བྱ་བ་དེ་སླེབས་ནས་འདུག་པས། དེའང་ཁྱོད་གཅིག་པུ་ཤི་བ་མ་ཡིན་ལ་འགྲོ་བ་ལུས་ཅན་ཀུན་འཆི་བའི་ལམ་དུ་ཆས་དགོས་པས་མྱ་ངན་མ་བྱེད་ཅིག །ཁྱོད་རང་ཕ་མ་མཛའ་བཤེས་ཟས་ནོར་ལོངས་སྤྱོད་སོགས་ལ་ཆགས་པ་དང་ཞེན་པ་མ་བྱེད་ཅིག །གལ་དེ་ཆགས་ཀྱང་ཐར་བའི་གེགས་མ་གཏོགས། ད་རང་གི་རྗེས་སུ་འབྲང་བའི་ཐབས་ནི་མི་འདུག །དེས་ན་ཚེ་འདི་སྣང་གི་བྱ་བ་གང་ལའང་མ་ཆགས་པར་སེམས་བསྐྱེད་འདི་ལྟར་མཛོད། ད་ནི་བདག་འཆི་བའི་དུས་ལ་བབས་ནས་འདུག་

པས། ད་རེས་འཆི་བ་འདི་ལ་བརྟེན་ནས་འཆི་བ་འོད་གསལ་ཆོས་ཀྱི་སྐུ་ངོ་ཤེས་པར་བྱ་སྟེ། དེའི་ངང་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ནས་སླར་གང་འདུལ་གྱི་འགྲོ་བའི་དོན་འཁོར་བ་མ་སྟོང་གི་བར་དུ་བྱའོ། །དེའི་ཆེད་དུ་ངོ་སྤྲོད་འདི་ཉན་ཅིང་ཡིད་ལ་བཟུང་བར་བྱའོ། །ཞེས་སྙིང་ཐག་པ་ནས་བསམ་པ་ནི། ཇི་སྐད་དུ། མི་རྟག་བྱམས་དང་སྙིང་རྗེ་ཡི། །ཆོས་མཇུག་ཐེག་ཆེན་ལམ་དུ་འགྲོ། །ཞེས་གསུངས་སོ། །དེ་ནས་ངོ་སྤྲོད་ཀྱི་ཚིག་གིས་གསལ་འདེབས་པ་ནི། ཀྱེ་རིགས་ཀྱི་བུ་ད་ནི་སྔར་གྱི་གདམས་ངག་དྲན་པའི་དུས་ལ་བབ་པ་ཡིན། དེ་ཡང་ཁྱོད་རང་གཞི་ཁྲེག་ཆོད་ཀྱི་དགོངས་པ་རང་བྱུང་གི་ཡེ་ཤེས་བླ་མས་ངོ་སྤྲད་པ་དེ་ལ་ཡེངས་སྒོམ་ཐོབ་ཤོར་མེད་པའི་ངང་ནསརིག་པ་མིག་ལམ་དུ་ཆུག །མིག་བར་སྣང་ལ་ལྟོས་ཏེ་ལམ་ཐོད་རྒལ་གྱི་ཡེ་ཤེས་ལྷུན་གྲུབ་ཏུ་འཆར་བའི་དབྱིངས་རིག་གཉིས་མེད་ཀྱི་ངང་ནས་འོད་གསལ་ལྷུན་གྲུབ་བདེ་བ་ཆེན་པོར་བཞུད་ཅིག །གལ་ཏེ་དེ་ལྟར་མ་གྱུར་ཀྱང་ཁྱེད་རང་གི་ཐིམ་རིམ་དང་སྣང་མཆེད་ཐོབ་གསུམ་རྫོགས་པའི་རྗེས་སུ་དབུགས་བར་སྣང་ལ་ཡལ་ཏེ། རིག་གདངས་སྙིང་གར་འདུས་པས་ལུས་སེམས་ཀྱི་འབྲེལ་ཐག་ཆད་དེ། རྣམ་ཤེས་འོད་གསལ་ལ་འཇུག་ཏུ་ཉེ་བས་རྣམ་ཤེས་ནམ་མཁར་ཐིམ་པ་ཞེས་བྱ་བ་དབྱར་མ་སྟོན་གྱི་ནམ་མཁའ་སྤྲིན་དང་བྲལ་བ་ལྟ་བུའི་ཀ་དག་གཞི་ཡི་གནས་ལུགས་བསམ་བརྗོད་སྤྲོས་པ་དང་བྲལ་བའི་རང་བྱུང་གི་ཡེ་ཤེས་ཀྱི་ངོ་བོ་མ་བཅོས་རྣལ་མ་ཤར་བ་ཡིན། དེ་ཉིད་ངོ་ཤེས་པ་ཙམ་གྱིས་ཁྱོད་ལ་བར་དོ་མེད་པར་དག་ཆེན་རིག་པ་ཡེ་སངས་རྒྱས་པའི་ངོ་བོར་སྐད་ཅིག་གིས་བྱང་ཆུབ་པ་ལ་ཐེ་ཚོམ་མེད་དོ། །དེའི་ཕྱིར་ན་རིག་པའི་ངང་ལས་མ་གཡོས་པར་གཟུགས་སྐུ་ཆོས་ཀྱི་དབྱིངས་

སུ་བསྡུ་བར་མཛད་འཚལ་ལགས། །ཞེས་ཡང་ཡང་གདབ་པས་སྔོན་སྦྱང་ཅུང་ཟད་ཡོད་པ་རྣམས་དེར་གྲོལ་ལོ། །ཅེས་ལན་གསུམ་སོགས་སྒྲ་དག་ལ་གསལ་བར་དལ་བུས་བརྗོད། ཡང་ན་འདི་སྐད་དུ། ཀྱེ་རིགས་ཀྱི་བུ་འོད་གསལ་འདི་རང་བྱུང་གི་ཡེ་ཤེས་དངོས་ཡིན་གྱི་འདིའི་ངང་ལ་སེམས་མ་བཅོས་པར་ཞོག་དང་། ཡར་གྱི་ཟང་ཐལ་དུ་ཁྱོད་སངས་རྒྱས་སོ། །དེས་བློའི་སྤྲོས་པ་མ་ཞིག་ན། ཁྱོད་རང་གི་རིག་པ་ཨཱཿདཀར་པོའི་རྣམ་པར་ཚངས་བུག་ནས་དཔག་ཆེན་གྱིས་མདའ་འཕང་བ་བཞིན་སོང་ལ་སྟེང་གི་ཕྱོགས་ན་ནམ་མཁའ་རྣམ་པར་དག་པའི་འཇིག་རྟེན་ཡོད་དེ་དེ་ན་བཅོམ་ལྡན་འདས་ནམ་མཁའི་རྒྱལ་པོ་ཞེས་བྱ་བ་ཡོད་ཀྱི། དེ་ལ་རིགས་ཀྱི་བུ་ཁྱོད་མ་འཇིགས་པར་ལྟ་བའི་གནས་ལུགས་རྫོགས་པ་ཆེན་པོ་གཞིའི་དབང་ཡོད་ཀྱི་དབང་དེ་ཞུས་ལ་ཆོས་ཉིད་ཀྱི་གཞི་སྣང་ལ་བཞུད་ཅིག །དེའི་ཚེ་ཁྱོད་ཀ་དག་གི་ས་ལ་སངས་རྒྱས་པར་འགྱུར་རོ། །གལ་ཏེ་དེར་མ་གྲོལ་ན་ཆོས་ཉིད་ཀྱི་བར་དོའི་སྣང་བ་ཐམས་ཅད་རང་སྣང་དུ་ངོ་ཤེས་པར་གྱིས་ཤིག །རང་ངོ་ཤེས་མ་ཐག་ཏུ་ཀ་དག་གི་དབྱིངས་སུ་བདེ་བར་གཤེགས་ཤིག །ཅེས་ལན་གསུམ་བརྗོད་ཅིིང་རང་ཉིད་ཀྱང་མཉམ་པར་བཞག་གོ །འདི་ནི་རྫོགས་པ་ཆེན་པོ་རང་བྱུང་སོགས་ནས་བཏུས་པ་ཡིན་པས་མཆོག་ཏུ་འཕགས་ཏེ། དེ་ཡང་ངོ་སྤྲོད་སྤྲས་པ་ལས། གསང་བའི་བདག་པོ། དབང་པོ་ལ་རྣོ་བརྟུལ་མེད་དོ། །ཤེས་རབ་ལ་ཆེ་ཆུང་མེད་དོ། །དུས་ལ་སྔ་ཕྱི་མེད་དོ། །ན་སོ་ལ་རྒན་གཞོན་མེད་དོ། །སྡིག་པ་ལ་ཆེ་ཆུང་མེད་དོ། །འཆི་ཁར་བསྟན་ཀྱང་སངས་རྒྱ་བའི་འཆི་ཁ་མ་བསྒྱུར་ཐབས་ཀྱི་མན་ངག་ཅེས་བྱའོ། །རིགས་ཀྱི་བུ་ངའི་མན་ངག་རིན་པོ་ཆེ་འདི་ནི་མ་སྒོམ་པར་སངས་རྒྱ་བ་ཡིན་ནོ། །དེའི་ཕྱིར་ན་གདམ་ངག་ཅན་

གནད་ཀྱིས་སངས་རྒྱ་བ་ཡིན་ནོ་ཞེས་གསུངས་སོ། །དེ་ཡང་ཁྱོད་རང་འཆི་བའི་ཐོག་མར་ཐིམ་རིམ་འོང་ཚུལ་ནི། དང་པོ་ས་ཆུ་ལ་ཐིམ་པས་ཕྱི་རྟགས་སུ་ལུས་འགུལ་བསྐྱོད་མི་ནུས་ཤིང་ལུས་ས་ལ་བྱིང་སྙམ་བྱེད། ནང་རྟགས་སུ་སྨིག་རྒྱུའི་ཆར་ཟིལ་དང་ཆུ་གཡོ་ལྟ་བུ་སྔོ་མེར་མེར་ལམ་ལམ་དུ་ཤར། ཆུ་མེ་ལ་ཐིམ་པས་ཕྱི་རྟགས་སུ་ཁ་སྣ་སྐམ་ཤིང་ལྕེ་རྐན་ཕུག་འགྲོ། ནང་རྟགས་སུ་སྲིན་བུ་མེ་ཁྱེར་ལྟ་བུའི་དམར་ཁྲོལ་ཁྲོལ་འབྱུང་། མེ་རླུང་ལ་ཐིམ་པས་ཕྱི་རྟགས་སུ་ལུས་དྲོད་མཐའ་ནས་ཡལ། ནང་རྟགས་སུ་དུ་བ་ཕྱུར་བ་ལྟ་བུའི་ཉམས་སྐྱེ། རླུང་རྣམ་ཤེས་ལ་ཐིམ་པས་ཕྱི་རྟགས་སུ་དབུགས་ཐུང་བརྩེགས་སུ་རྒྱུ་ཞིང་། ནང་རྟགས་སུ་མེ་འབར་བ་དང་། སྒྲོན་མའི་ཕྲེང་བ་བཏེགས་པ་ལྟ་བུ་འབྱུང་། དེའི་ཚེ་དབང་པོའི་ཚོགས་དྲུག་གི་ཤེས་པ་རྣམ་ཀྱང་གསལ་བོར་མི་སྣང་ཞིང་འགག །དེ་དུས་སུ་འཆི་ཁ་མའི་ཤེས་པ་དེ་ཡང་རྨི་ལམ་ཟ་ཟའི་སྐབས་ལྟར་ཤེས་པ་ལང་ལིང་བན་བུན་གཅིག་ཏུ་མི་གནས་པར་འཆར་རོ། །དེའི་རྗེས་སུ་རིག་པ་སྙིང་གི་དཀྱིལ་དུ་འདུས་ནས་སྨྲ་ཡང་མི་ཤེས་ཤིང་དྲན་པ་ཉམས། དེ་དུས་ལུས་ནས་སྲོག་རྩའི་ནང་དུ་ཁྲག་ཐིག་གསུམ་རིམ་པས་ལྷུང་ཚེ། ཁ་དང་མིག་སྐྱ་ལོག་འགྲོ་ཞིང་དབུགས་རིང་གསུམ་ཕྱིར་ལ་འཕང་ནས་མགོ་གུག་ཏེ་ཕྱི་དབུགས་ཧིག་ཁྲོག་གིས་ཆད་འགྲོ་བ་ཡིན། དེའི་དུས་སུ་ཁྱོད་ལ་སྣང་མཆེད་ཐོབ་གསུམ་འཆར་བས། དང་པོ་རྣམ་ཤེས་སྣང་བ་ལ་ཐིམ་ཚེ་དབུ་མའི་ཡར་སྣེ་ནས་དཀར་ཆ་ཐུར་དུ་བབས་དུས། ཕྱི་རྟགས་སུ་དཀར་ལམ་འཆར། ནང་རྟགས་སུ་ཞེ་སྡང་གི་རྟོག་པ་སུམ་ཅུ་རྩ་གསུམ་འགག །གསང་རྟགས་སུ་ཤེས་པ་གསལ་ཉམས་དང་ལྡན། གཉིས་པ་སྣང་བ་མཆེད་པ་ལ་ཐིམ་ཚེ། དབུ་མའི་མར་སྣེ་ནས་དམར་ཆ་གྱེན་ལ་ལྡོག་དུས་ཕྱི་རྟགས་སུ་དམར་ལམ་ཤར། ནང་རྟགས་སུ་འདོད་

ཆགས་ཀྱི་རྟོག་པ་བཞི་བཅུ་འགགས། གསང་རྟགས་སུ་ཤེས་པ་བདེ་ཉམས་དང་ལྡན། གསུམ་པ་མཆེད་པ་ཉེར་ཐོབ་ལ་ཐིམ་ཚེ་དཀར་དམར་གཉིས་སྙིང་དབུས་སུ་འཕྲད་དེ་གནམ་ས་ཁ་བརྡབ་པ་ལྟ་བུའི་སྣང་བ་སྐྱེ། ཕྱི་རྟགས་སུ་ནག་ལམ་འཆར། ནང་རྟགས་སུ་གཏི་མུག་གི་རྟོག་པ་བདུན་འགགས། གསང་རྟགས་སུ་མི་རྟོག་པའི་ཉམས་ཅུང་ཟད་སྐྱེ་ཞིང་རིག་པ་སྙིང་དཀྱིལ་ན་དྲན་མེད་དུ་བརྒྱལ་ལོ། །བརྒྱལ་ཚད་ཡང་རིང་ཐུང་མཐའ་གཅིག་ཏུ་མ་ངེས་སོ། །གང་ལྟར་ཡང་བརྒྱལ་སངས་པའི་ཚེ་གཞིའི་འོད་གསལ་དེ་འགྲོ་བ་ཀུན་ལ་འཆར་བར་བཞེད་པས། དེ་འཆར་ཚུལ་ནི། ཁྱོད་རང་དབུགས་ཆད་མ་ཐག་ཏུ། ཁྱོད་ལ་བར་དོ་དང་པོའི་འོད་གསལ་ཞེས་བྱ་བ་ཆོས་ཉིད་ཕྱིན་ཅི་མ་ལོག་པའི་གནས་ལུགས། ཀ་དག་བློ་བྲལ་གྱི་རིག་པ། རྣམ་རྟོག་གིས་བསླད་གཏན་ནས་མ་ཞུགས་པའི་རང་བྱུང་ཡེ་བབས་(ཤེས་)ཀྱི་ངང་ཟང་ཐལ་ལེ་ཡོད་པ་འདི་ཀ་ངོ་བོ་ཀ་དག་རང་བཞིན་ལྷུན་གྲུབ། ཐུགས་རྗེ་ཀུན་ཁྱབ་སྐུ་གསུམ་དབྱེར་མེད་ཀྱི་ངོ་བོར་བཞུགས་པ་འདི་ཉིད་རང་ངོ་ཤེས་པར་མཛོད་ལ་ཁྱོད་དེའི་ངང་ལ་ཆོས་སྐུའི་དགོངས་པའི་ཀློང་དུ་བཙན་ས་ཟིན་པར་གྱིས་ཤིག །ཅེས་ལན་གསུམ་སོགས་དལ་བུས་སྒྲ་དག་ལ་གསལ་བར་བརྗོད་ལ་རང་ཡང་མཉམ་པར་བཞག །འོ་དེར་མ་གྲོལ་ན་དེའི་རྗེས་སུ་སྒོ་གང་རུང་ནས་རྣམ་ཤེས་ཕྱིར་ཐོན་ནས། འོད་གསལ་གཉིས་པ་དག་པའི་སྒྱུ་ལུས་ཞེས་བྱ་བ་ཤིའམ་མ་ཤི་ངོ་མི་ཤེས་པའི་ཤེས་པ་གསལ་ལམ་མེ་བ་གཅིག་འོང་གསུངས། དེ་དུས་དེར་རྫོགས་རིམ་པ་ཡིན་ན་གནས་ལུགས་མ་བཅོས་པའི་ངང་ལ་མཉམ་པར་ཞོག །བསྐྱེད་རིམ་པ་ཡིན་ན་ཡི་དམ་གྱི་ལྷ་སྣང་ལ་རང་བཞིན་མེད་པ་གསལ་ཐོབ། ཐ་མལ་པ་ཡིན་ན་སངས་རྒྱས་འོད་དཔག་མེད་འཁོར་སྤྱན་རས་གཟིགས་སོགས་ཡིད་ལ་གྱིས་དང་སྐད་ཅིག་མ་དེར་གྲོལ་

གསུངས་སོ། །གཉིས་པ་ནི། འོ་དེར་མ་གྲོལ་ན་དེའི་རྗེས་སུ་ཆོས་ཉིད་བར་དོའི་འཆར་ཚུལ་ནི། ཐལ་འགྱུར་ལས། འདི་ནས་ཆོས་ཉིད་བར་དོར་བཤད། །འཆི་ཁ་ལས་ནི་ཐལ་བའི་ཚེ། །རྣམ་ཤེས་ནམ་མཁའ་དག་ལ་ཐིམ། །ནམ་མཁའ་འོད་གསལ་ལ་ཐིམ་དུས། །ཕྲ་རགས་སྣང་བ་ཀུན་འགགས་ཏེ། །དབང་པོ་ཀུན་ལྡན་འོད་ཀྱི་ལུས། །ལུས་ལས་གྲིབ་མ་བཞིན་དུ་འགྱུར། །ཞེས་པ་ལྟར། ཆོས་ཉིད་ཀྱི་བར་དོ་ཞེས་བྱ་བ་རིག་པ་ཉིད་ལུས་ཀྱིས་རྒྱ་དང་བྲལ་བའི་གནད་ཀྱི་རང་གདངས་གཞི་སྣང་དུ་ཤར་བ། དཔེ་བུམ་པ་ཆག་པའི་མར་མེ་ཕྱིར་གསལ་བ་ལྟར། དེ་ཡང་ནམ་མཁའ་འོད་གསལ་ལ་ཐིམ་པའི་སྐད་ཅིག་དང་པོ་ཡེ་ཤེས་ཀྱི་མཐོང་ཞེས་བྱ་བ་རང་གི་མིག་གཉིས་ནས་ཕར་འོད་ཟེར་ཚོན་སྣ་ལྔའི་དྲུ་གུ་བརྐྱང་པ་ལྟར་སྣང་ངོ་། །དེའི་ཚེ་ད་ལྟའི་སྣང་བ་འདི་རུ་ལོག་སྟེ་སྒྲ་འོད་ཟེར་གསུམ་གྱི་སྣང་བ་རྒྱ་ཆེར་འཆར་རོ། །དེ་ནས་འོད་གསལ་ཟུང་འཇུག་ལ་ཐིམ་ཚེ་སྣང་བ་ཐམས་ཅད་རིགས་ལྔའི་ཚོམ་བུར་འཆར་རོ། །དེ་ནས་ཟུང་འཇུག་ཡེ་ཤེས་ལ་ཐིམ་ཚེ་རང་གི་སྙིང་ག་ནས་ཕར་ཡེ་ཤེས་བཞི་ལྡན་གྱི་སྣང་བ་འོད་ཐག་དང་ཐིག་ལེའི་ཚོམ་བུར་འཆར་རོ། །དེ་ནས་ཡེ་ཤེས་ལྷུན་གྲུབ་ལ་ཐིམ་ཚེ་ལྷུན་གྲུབ་སྒོ་བརྒྱད་ཀྱི་སྣང་བ་དུས་གཅིག་ལ་འཆར་རོ། །དེ་དུས་སུ་རྗེས་དྲན་དང་མངོན་ཤེས་སོགས་འཆར་རོ། །དེ་ནས་ལྷུན་གྲུབ་རིན་པོ་ཆེའི་སྣང་བ་ཀ་དག་ལ་ཐིམ་ཚེ་ཐིམ་ལུགས་བརྒྱད་སྐད་ཅིག་ལ་འབྱུང་བ། ཆོས་ཉིད་བར་དོའི་ཡུན་རིང་ཐུང་ཡང་མཐའ་གཅིག་ཏུ་མ་ངེས་སོ། །དེ་དག་གི་དུས་ན་གྲོལ་བ་གནད་ཀྱི་མན་ངག་ལ་གསུམ་སྟེ། ཆོས་ཉིད་ཀྱི་སྣང་བ་རང་སྣང་དུ་ངོ་ཤེས་པ་མ་པང་དུ་བུ་འཇུག་པ་ལྟ་བུའི་གདམས་པ་དང་། ཤེས་ཐོག་དེར་དར་ཅིག་རང་བཞིན་གྱི་བསམ་

གཏན་ལས་མི་གཡོ་བ་གསེར་གྱི་ཐུར་མ་ལྟ་བུའི་གདམས་ངག་དང་། གནས་ཐོག་གི་ངང་རང་ས་ཀ་དག་ལས་གྲོལ་ནས་ཕྱིར་མི་ལྡོག་པ་དཔག་ཆེན་གྱི་མདའ་ལྟ་བུའི་མན་ངག་རྣམས་དྲན་པར་བྱ་བ་གནད་གལ་པོ་ཆེ་ཡིན་ནོ། །གསུམ་པ་དེར་མ་གྲོལ་ན་དེའི་རྗེས་སུ་སྲིད་པ་བར་དོའི་སྣང་ཚུལ་ནི། རྒྱུད་ལས། སྔོན་འབྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོག་མེད་རྒྱུ། །ལས་ཀྱི་རྫུ་འཕྲུལ་ཤུགས་དང་ལྡན། །རིགས་མཐུན་ལྷ་མིག་དག་པས་མཐོང་། །ཞེས་དང་། ཇི་སྐད་དུ། ལས་བཟང་ངན་གྱི་སྣང་བ་སྣ་ཚོགས་སུ་ཤར་བས་ལས་ཀྱི་སྣང་བའོ། །ཞེས་སོ། །སྲིད་པ་བར་དོའི་གནས་ཚད་ཀྱང་མཐའ་གཅིག་ཏུ་མ་ངེས་སོ། །དེ་ཡང་རང་ཤར་ལས། བདེན་པ་མཐོང་བའི་སེམས་ཅན་ནི། །རྟོགས་པ་རྒྱུད་ལ་མ་སྐྱེས་ཀྱང་། །ཕྱོགས་བཅུ་སྤྲུལ་པའི་ཞིང་ཁམས་སུ། །གནས་ནས་མཐར་ཕྱིན་གྲོལ་བར་འགྱུར། །ཞེས་གསུངས་སོ། །འདི་དུས་སུ་སྔར་གྱི་གདམས་ངག་དྲན་པ་དང་། བླ་མ་ལ་མོས་གུས་དང་། དཀོན་མཆོག་གསུམ་ལ་སྐྱབས་འགྲོ་དང་གསོལ་འདེབས། དག་ཞིང་ཡིད་ལ་བྱ་བ་རྣམས་གལ་ཆེའོ། །རང་སློབ་ངོར་ནོར་བུའི་མིང་ནས་བྲིས་པའོ།། །།