ཟབ་ཆོས་ཞི་ཁྲོ་དགོངས་པ་རང་གྲོལ་ལས་རྫོགས་རིམ་བར་དོ་དྲུག་གི་ཁྲིད་ཀྱི་ནང་ཚན་འཆི་ཁའི་བར་དོ་འཕོ་བ་དྲན་པ་རང་གྲོལ།

༈ ཟབ་ཆོས་ཞི་ཁྲོ་དགོངས་པ་རང་གྲོལ་ལས་རྫོགས་རིམ་བར་དོ་དྲུག་གི་ཁྲིད་ཀྱི་ནང་ཚན་འཆི་ཁའི་བར་དོ་འཕོ་བ་དྲན་པ་རང་གྲོལ་གྱི་དོན་ཚེ་འདིའི་གསལ་འདེབས་ངག་འདོན་དུ་བཀོད་པ་ནི། ཐོག་མར་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད་སྔོན་དུ་འགྲོ་བ་བྱས་ཏེ་དངོས་གཞི་ནི། ཨཿཆོས་ཀུན་སྤྲོས་བྲལ་འོད་གསལ་འདུས་མ་བྱས། །ཀ་དག་རང་གདངས་ལྷུན་གྲུབ་འོག་མིན་ཞིང་། །མཚན་ཉིད་བཀོད་པ་ཕུན་སུམ་ཚོགས་པའི་དབུས། །རང་ཉིད་བཅོམ་ལྡན་དཔལ་ལྡན་རྡོ་རྗེ་སེམས། །གསལ་བའི་ཐུགས་ཀར་ཧཱུྃ་ཡིག་སྔོན་པོ་ལས། །ཧཱུྃ་ཆད་འཁོར་བའི་སྒོ་རྣམས་བཀག་པར་གྱུར། །ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་གིས་གཤང་ལམ། ཆུ་ལམ། སྲིད་པའི་ལམ་ལྟེ་བ། ཁ་སྣ་བུ་ག་གཉིས། མིག་གཉིས། རྣ་བ་གཉིས་ཀྱི་བུ་ག་རྣམས་ཧཱུྃ་སྔོན་པོ་བཀྲག་མདངས་དང་ལྡན་པ་རེ་རེས་བཀག་པར་བསམ། རང་མདུན་ནམ་མཁར་གྲུ་གང་ཙམ་གྱི་སྟེང་། །ཡེ་ཤེས་འོད་ལྔའི་འཇའ་ཟེར་འཁྲིགས་པའི་ཀློང་། །རྒྱལ་བ་ཀུན་དང་ངོ་བོ་དབྱེར་མེད་པ། །དཔལ་ལྡན་བླ་མ་ཨོ་རྒྱན་རྡོ་རྗེ་འཆང་། །ཆ་ལུགས་དང་ལྡན་ཞལ་འཛུམས་མདངས་ལྡན་བཞུགས། །རང་ལུས་གདན་གསུམ་ཚང་བའི་དཀྱིལ་འཁོར་དབུས། །དཀར་ལ་སེར་བའི་འོད་ཆགས་རྩ་དབུ་མའི། །མར་སྣེ་ལྟེ་འོག་རྩ་གསུམ་འདུས་པའི་དཀྱིལ། །བྱ་གྲུབ་ཡེ་ཤེས་རང་འོད་འབར་བའི་ཀློང་། །རླུང་སེམས་ཐིག་ལེ་དཀར་པོ་འཕར་ལྷབ་

ལྷབ། །ཡར་བརྒྱུད་ལྟེ་བའི་གནས་སུ་འདྲེན་པར་བསམ། །ཧིག་བདུན་དང་། ལྟེ་བ་སྤྲུལ་པའི་འཁོར་ལོའི་རྩ་འདབས་དབུས། །མཉམ་ཉིད་ཡེ་ཤེས་རང་འོད་འབར་བའི་ཀློང་། །རླུང་སེམས་ཐིག་ལེ་དཀར་པོ་འཕར་ལྷབ་ལྷབ། །ཡར་བརྒྱུད་སྙིང་ཁའི་གནས་སུ་འདྲེན་པར་བསམ། །ཧིག་བདུན་དང་། སྙིང་གར་ཆོས་ཀྱི་འཁོར་ལོའི་རྩ་འདབས་དབུས། །མེ་ལོང་ཡེ་ཤེས་རང་འོད་འབར་བའི་ཀློང་། །རླུང་སེམས་ཐིག་ལེ་དཀར་པོ་འཕར་ལྷབ་ལྷབ། །ཡར་བརྒྱུད་མགྲིན་པའི་གནས་སུ་འདྲེན་པར་བསམ། །ཧིག་བདུན་དང་། མགྲིན་པ་ལོངས་སྤྱོད་འཁོར་ལོའི་རྩ་འདབས་དབུས། །སོར་རྟོགས་ཡེ་ཤེས་རང་འོད་འབར་བའི་ཀློང་། །རླུང་སེམས་འདུས་པའི་ཐིག་ལེ་དཀར་ལྷབ་ལྷབ། །ཡར་འཕར་སྤྱི་བོའི་གནས་སུ་འདྲེན་པར་བསམ། །ཧིག་བདུན་དང་། སྤྱི་བོར་བདེ་ཆེན་འཁོར་ལོའི་རྩ་འདབས་དབུས། །ཆོས་དབྱིངས་ཡེ་ཤེས་རང་འོད་འབར་བའི་ཀློང་། །རླུང་སེམས་འདུས་པའི་ཐིག་ལེ་དཀར་ལྷབ་ལྷབ། །ཡར་འཕར་བླ་མའི་ཐུགས་ཀར་ཐིམ་པར་བསམ། །ཧིག་བདུན་བརྗོད་དེ་ཐུགས་ཡིད་བསྲེ་སྟེ་མཉམ་པར་གཞག་པར་བྱ། སླར་ཡང་ཐིག་ལེ་མར་ལྟེ་འོག་ཏུ་ཕབ་སྟེ་ངང་འཁྱིལ་ལེ་གནས་པར་བསམ་ལ་སྔར་ལྟར་བསྐྱར་ནས་གྲངས་གསོགས་པར་བྱའོ། །སྤྲོ་ན་བརྒྱུད་འདེབས་ནི། །ཨེ་མ་ཧོ། །ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ལོངས་སྐུ་རྡོ་རྗེ་སེམས་དཔའ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །མཁའ་འགྲོ་ཡེ་ཤེས་མཚོ་རྒྱལ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཆོས་རྒྱལ་ཁྲི་སྲོང་ལྡེའུ་བཙན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ལོ་ཆེན་བཻ་རོ་ཙཱ་ན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཅོག་རོ་ཀླུ་ཡི་རྒྱལ་མཚན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །གཏེར་སྟོན་

ཀརྨ་གླིང་པ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །སྲས་མཆོག་ཉི་ཟླ་ཆོས་རྗེ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཆོས་བདག་ཉི་ཟླ་འོད་ཟེར་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ནམ་མཁའ་ཆོས་ཀྱི་རྒྱ་མཚོ་ལ་གསོལ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །གྲུབ་ཐོབ་དངོས་གྲུབ་རིན་ཆེན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །མཁས་གྲུབ་ཀརྨ་ཆགས་མེད་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །གྲུབ་དབང་པདྨ་རིག་འཛིན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །པདྨ་ཀུན་གྲོལ་རྣམ་རྒྱལ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །རྒྱལ་སྲས་གཞན་ཕན་མཐའ་ཡས་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །རྫོགས་སྤྲུལ་ཆོས་ཀྱི་རྡོ་རྗེ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཨོ་རྒྱན་བསྟན་འཛིན་ནོར་བུ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །བཤད་སྒྲུབ་བསྟན་པའི་རྒྱལ་མཚན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཐུབ་བསྟན་སྐལ་བཟང་རྒྱ་མཚོ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །རྣལ་འབྱོར་ཚུལ་ཁྲིམས་རྒྱ་མཚོ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །ཞི་ཁྲོ་དམ་པ་རིགས་བརྒྱ་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །གནས་གསུམ་དཔའ་བོ་མཁའ་འགྲོ་ལ་གསོལ་བ་འདེབས། །སྐུ་

གསུམ་འཕོ་བ་འགྲུབ་པར་བྱིན་གྱིས་རློབས། །བཀའ་སྲུང་དམ་ཅན་སྡེ་བདུན་ལ་གསོལ་བ་འདེབས། །སྐུ་གསུམ་འཕོ་བ་འགྲུབ་པར་བྱིན་གྱིས་རློབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །ཟག་བཅས་ཤ་ཁྲག་ཕུང་པོ་ངར་འཛིན་ལུས། །ཟག་མེད་འོད་ལུས་འགྲུབ་པར་བྱིན་གྱིས་རློབས། །རྗེས་སུ་བསྔོ་སྨོན་རྣམ་དག་གིས་རྒྱས་འདེབས་པར་བྱའོ། །ཞེས་བེར་རྩིང་དབོན་སྤྲུལ་རྣམས་ཀྱིས་ཐུགས་བཞེད་བསྐང་ཕྱིར་ཚུལ་མིང་ནས་བྲིས་པ་དགེའོ། །༼༽མི་འདྲ་བ་ཐེ་ཚོམ་ཅན་འདམ་ངའི་རྟགས། {}ལྷག་མོ་ཡིན་ནམ་སྙམ་པའི་རྟགས། ་་་་་་་་་་་མ་དཔེ་མི་གསལ་བའི་རྟགས། []མ་དཔེ་ལས་ཆད་པ་ཡིན་སྙམ་པའི་རྟགས། ()གོ་བ་ལེན་བདེ་བའི་ཆེད་དུ་གསར་དུ་བསྣན་རྟགས། གསལ་བཤད་ཉུང་ངུ་། ༈ དེ་ཡང་བར་དོ་ཐོས་གྲོལ་གྱི་ཆོས་སྐོར་འདི་དག་ནི་འཛམ་གླིང་མཁས་པ་དག་གིས་གདེང་འཇོག་མཐོན་པོར་གནང་བའི་ཆོས་ཚུལ་ཁྱད་པར་ཅན་ཞིག་ཡིན་པ་དང་། འདིའི་དབང་ལུང་དང་ཁྲིད་རྒྱུན་ཆོ་གའི་ཕྱག་བཞེས་སོགས་ད་དུང་རྒྱུན་མ་ཆད་པར་དར་ཁྱབ་ཆེ་བས། ཟབ་ཆོས་འདིའི་ཕྲིན་ལས་ཕྱོགས་བཅུར་རྒྱས་པའི་ཕྱིར། གསུང་འདི་དག་གལ་ཆེ་བའི་གནས་སུ་བཟུང་ནས་མ་དཔེ་འཚོལ་སྡུད་སོགས་ལ་དཀའ་ངལ་མང་ཙམ་བྱས་ཏེ་དེབ་འདི་དག་བསྐྲུན་པ་ཡིན་ཀྱང་མ་དཔེ་ཇི་བཞིན་མ་ཆོད་པ་སོགས་སྐྱོན་དུ་མ་ཡོད་སྲིད་པས་རྒྱ་ཆེ་བའི་ཀློག་པ་པོ་རྣམས་ཀྱིས་དེ་ལུགས་ཐུགས་ངེས་དགོས་ཤིང་། གཞན་ཡང་

གཏེར་ཁ་གསར་རྙིང་གི་ཐོས་གྲོལ་གྱི་ཆོ་གའི་སྐོར་གྱི་ཡི་གེ་དག་ནི་དར་ཁྱབ་ཆེ་བས་འདིར་འགྲེལ་བཤད་དག་གི་གཞི་བྱས་པའི་ཆོ་གའི་གཞུང་ཉུང་བསྡུས་ཙམ་ལས་མ་བཀོད་ལ། དེ་མིན་དབང་དང་འགྲེལ་བཤད་ཁྲིད་ཡིག་རྒྱབ་ཆོས་ཀྱི་ཆོས་ཚན་གང་རྙེད་མཐའ་དག་ཕྱོགས་བསྡུས་བྱས་ཡོད་པ་ཡིན་ནོ།། །།བླ་རུང་སྔ་འགྱུར་དཔེ་ཚོགས་རྩོམ་སྒྲིག་པས།