ལཱུ་ཧི་བའི་བསྐྱེད་རིམ་འདོད་འཇོའི་དགོངས་པ་རབ་གསལ།

ལཱུ་ཧི་བའི་བསྐྱེད་རིམ་འདོད་འཇོའི་དགོངས་པ་རབ་གསལ་ཞེས་བྱ་བ་བཞུགས།

ན་མོ་མཉྫུ་ཤྲཱི་གྷོ་ཥཱ་ཡ། སྒྲིབ་བྲལ་ལྷན་སྐྱེས་བདེ་བའི་ཡེ་ཤེས་ཉིད། །རབ་མཛེས་ཨིནྡྲ་ནཱི་ལའི་ལྷུན་པོ་བཞིན། །ཀུན་ནས་རབ་བརྗིད་ཟུང་འཇུག་སྒྱུ་མའི་སྐུར། །རྣམ་རོལ་དཔལ་ལྡན་འཁོར་ལོ་སྡོམ་པར་བདུད། །ཉི་འོད་འབུམ་གྱི་རྩེ་དགའ་དང་འགྲོགས་པའི། །རབ་དམར་བྱུ་རུའི་མདངས་ལྡན་ཆགས་པའི་ཉམས། །མཛེས་སྡུག་ལང་ཚོའི་དཔལ་མངའ་བཅོམ་ལྡན་མ། །རྡོ་རྗེ་ཕག་མོས་བདེ་ཆེན་དངོས་གྲུབ་སྩོལ། །དུས་ཀྱི་མཐའ་འདིར་ཧེ་རུ་ཀ་དཔལ་ཉིད། །ངུར་སྨྲིག་གར་རོལ་གསང་ཆེན་རྒྱུད་སྡེ་ཡི། །དགོངས་པ་འགྲེལ་མཛད་རྒྱལ་བ་གཉིས་པར་གྲགས། །ཡབ་སྲས་བརྒྱུད་པར་བཅས་ལ་གུས་བཏུད་ནས། །གྲུབ་ཆེན་ལཱུ་ཧི་པ་ཡིས་བཤད་པའི་སྲོལ། །འཁོར་ལོ་སྡོམ་པའི་རིམ་པ་དང་པོའི་གནད། །རྗེ་བཙུན་བླ་མའི་མན་ངག་ཇི་ལྟ་བར། །འཆད་པར་འདོད་དོ་མཁའ་འགྲོས་བརྩེ་བས་སྐྱོངས། །འདིར་དཔལ་འཁོར་ལོ་བདེ་མཆོག་གི་བསྐྱེད་རིམ་སྒྲུབ་ཐབས་ཀྱི་གོ་རིམ་དང་མཐུན་པར་འཆད་པ་ལ་གསུམ་སྔོན་དུ་འགྲོ་བ་སྤྱིའི་རྣམ་གཞག་མདོར་བསྡུས་བཤད་པ་དང་། སྒྲུབ་ཐབས་ཀྱི་གཞུང་དོན་སོ་སོར་བཤད་པ་དང་། འཕྲོས་དོན་བཤད་པའོ། །དང་པོ་ལ་གཉིས། རྩ་བཤད་ཀྱི་རྒྱུད་ངོས་བཟུང་པ་དང་། དགོངས་འགྲེལ་གྱི་རིམ་པ་བྱོན་ཚུལ་ལོ། །དང་པོ་ནི། བཅོམ་ལྡན་འདས་ཀྱིས་གདུལ་བྱའི་དོན་དུ་མདོ་སྔགས་ཀྱི་ཕྱོགས་གཉིས་གསུངས་པའི་ནང་ནས་བརྗོད་བྱའི་ངོས་ནས་ཚེས་ཟབ་པ་ནི་བླ་མེད་ཀྱི་རྒྱུད་སྡེ་རྣམས་ཡིན་ལ། དེའི་ནང་ནས་ཀྱང་ཕ་རྒྱུད་ཐམས་ཅད་ཀྱི་གཙོ་བོ་ནི་དཔལ་གསང་བ་འདུས་པ་དང། མ་རྒྱུད་ཐམས་ཅད་ཀྱི་གཙོ་བོ་ནི་དཔལ་འཁོར་ལོ་བདེ་མཆོག་གི་རྒྱུད་རྣམས་ཡིན་ནོ། །འདིའི་རྩ་རྒྱུད་ལ་ནི་རྒྱས་པ་ཤོ་ལོ་ཀ་འབུམ་ཕྲག་གསུམ་པ་དང་། འབྲིང་པོ་ཤོ་ལོ་ཀ་འབུམ་ཕྲག་གཅིག་པ། བསྡུས་པ་ལེའུ་གཅིག་པ་གསུམ་ཡོད་དེ། ཧེ་རུ་ཀ་མངོན་འབྱུང་ལས། འབུམ་ཕྲག་འབུམ་ཕྲག་གསུམ་ལས་བྱུང་། །རྒྱུད་ཀྱི་སྙིང་པོ་བསྡུས་པ་ཡིན། །ཞེས་དང་། མཁའ་འགྲོ་རྒྱ་མཚོ་ལས། །དེ་ལྟར་ངེས་བརྗོད་འབུམ་གསུམ་ལས། །བྱུང་པ་བདེ་མཆོག་ཉུང་ངུ་སྟེ། །ཞེས་གསུངས་པའི་ཕྱིར། བཤད་རྒྱུད་ལ་ལྔ་ཡོད་དེ། རྡོ་རྗེ་མཁའ་འགྲོ། ཀུན་སྤྱོད། སྡོམ་འབྱུང་དང་ཕག་མོའི་མངོན་འབྱུང་གཉིས་གཅིག་ཏུ་བྱས་པ་དང་། མངོན་བརྗོད། ཁ་སྦྱོར་གྱི་རྒྱུད་དང་བཅས་པ་རྣམས་སུ་ཡོད་པའི་ཕྱིར། ཕྱོགས་མཐུན་གྱི་རྒྱུད་ཀྱང་ཡོད་དེ། ཧེ་རུ་ཀ་མངོན་འབྱུང་། རྣལ་འབྱོར་མ་བཞི་ཞལ་སྦྱོར། མཁའ་འགྲོ་རྒྱ་མཚོ་རྣམས་སུ་ཡོད་པའི་ཕྱིར། གཉིས་པ་དགོངས་འགྲེལ་གྱི་རིམ་པ་ཡོད་དེ། ལཱུ་ནག་དྲིལ་གསུམ་གྱིས་མཛད་པའི་འདིའི་སྐོར་གྱི་གཞུང་ཐམས་ཅད་དང་ཁྱད་པར་ལཱུ་ཧི་པས་མཛད་པའི་མངོན་རྟོགས་དང་བཅས་པ་རྣམས་སུ་ཡོད་པའི་ཕྱིར། ཕྱི་མ་འདི་ལ་འགྲེལ་པ་དུ་མ་ཡོད་དེ། ལྭ་བ་པ། པྲཛྙཱ་རཀྵི་ཏ། བི་བྷུ་ཏི། ཨ་བྷྱ། ཇོ་བོས་མཛད་པའི་འགྲེལ་པ་སོགས་རྒྱ་འགྲེལ་རྣམས་དང་། རྗེས་མཛད་པའི་འདོད་འཇོ་རྣམས་སུ་ཡོད་པའི་ཕྱིར། གཉིས་པ་ལ་གཉིས། སྒྲུབ་ཐབས་ཀྱི་ཆིངས་མདོར་བསྟན་པ་དང་། ཉམས་སུ་ལེན་པའི་རིམ་པ་ཉིད་བཤད་པའོ། །དང་པོ་ནི། རྩ་རྒྱུད་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་གུར། །ཨཱ་ལི་ཀཱ་ལི་ཞེས་བརྗོད་ནས། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་པ། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བས། །གོ་ཆ་ཆེན་པོས་ཡང་དག་བསྲུང་། །སྔགས་རྣམས་ཀུན་གྱིས་མཆོད་པར་བྱ། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་པ་ལྟར་དེ་ཉིད་བཅུ་བཞི་ཡོད་དེ། །འདི་ནི་བསྐྱེད་རྫོགས་གཉིས་ཀ་ལ་སྦྱར་བ་ཡོད་ཀྱང་། འདིར་བསྐྱེད་རིམ་གྱི་དབང་དུ་བྱས་ན། གོས་སམ་གནས་ཀྱི་དེ་ཉིད་ལ་ཕྱག་རྒྱའི་ཉིད། སྒྲུབ་གྲོགས་ཀྱི་དེ་ཉིད། སྲུང་འཁོར་གྱི་དེ་ཉིད། ཨཱ་ལིའི་དེ་ཉིད། ཀཱ་ལིའི་དེ་ཉིད། སྟོང་ཉིད་བསྒོམ་པ་རྒྱུ་སོགས་སྟོང་པ་སྔོན་དུ་འགྲོ་བའི་དེ་ཉིད། བར་དོ་མཚོན་བྱེད་སོགས་འཇུག་པ་སྒྲའི་འདི་ཉིད། དམ་ཡེ་གཉིས་གཅིག་ཏུ་བསྲེ་བ་སྦྱོར་བའི་དེ་ཉིད། མཆོད་པ་བཞིས་མཆོད་པ་བདུད་རྩིས་ཚིམ་པར་བྱེད་པའི་འདི་ཉིད། ཉེར་བསྡུ་བྱེད་པ་མྱང་འདས་ཀྱི་དེ་ཉིད། ལག་མཆོད་ཀྱི་དེ་ཉིད། དབང་བསྐུར་བའི་དེ་ཉིད། ཡབ་ཡུམ་གཉིས་ལ་གོ་ཆ་བགོ་བའི་དེ་ཉིད། བཟླས་པ་དང་སྔགས་མཆོད་ཀྱི་དེ་ཉིད་རྣམས་སུ་ཡོད་པའི་ཕྱིར། དེ་ཉིད་བཅུ་བཞིར་བཤད་པ་ལ་དགོས་པ་ཡོད་དེ། རྒྱུ་དོན་ཐམས་ཅད་དེ་ཉིད་བཅུ་བཞིར་འདུ་བར་ཤེས་པའི་ཆེད་ཡིན་པའི་ཕྱིར་རོ། །གཉིས་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང་། ཐུན་མཚམས་སུ་ཇི་ལྟར་བྱ་བའོ། །དང་པོ་ལ་གསུམ། ཐུན་གྱི་འགོར་ཇི་ལྟར་བྱ་བ་དང་། དངོས་གཞི་ལ་ཇི་ལྟར་བྱ་བ་དང་། མཇུག་ཏུ་ཇི་ལྟར་བྱ་བའོ། །དང་པོ་ལ་གཉིས། ཐོག་མར་བྱ་བའི་རིམ་པ་བཤད་པ་དང་། སྒྲུབ་ཐབས་ཀྱི་ཡན་ལག་དངོས་བཤད་པའོ། །དང་པོ་ལ་བཞི། རྡོར་དྲིལ་དང་ནང་མཆོད་བྱིན་རླབས། སྔོན་འགྲོའི་མཆོད་གཏོར་བྱིན་རླབས་སོགས་དང་། བདག་བསྐྱེད་མཆོད་པ་བྱིན་རླབས་དང་། རྡོར་སེམས་ཀྱི་སྒོམ་བཟླས་བྱ་ཚུལ་ལོ། །དང་པོ་ལ་བཞི། རྡོར་དྲིལ་བྱིན་རླབས་དང་། ནང་མཆོད་བསངས་པ། སྦྱངས་པ། བསྐྱེད་ཅིང་བྱིན་གྱིས་བརླབ་པའོ། །དང་པོ་ནི། ཐོག་མར་སྐད་ཅིག་གིས་རང་ཉིད་ཧེ་རུ་ཀ་སྔོན་པོ་ཞེས་སོགས་ཀྱིས། ཐ་མལ་གྱི་ཕུང་པོ་རང་བཞིན་གྱིས་སྟོང་པར་སྦྱངས་པའི་སྟོང་པའི་ངང་ལས། སྣ་ཚོགས་པདྨ་དང་ཉི་མའི་གདན་ལ་སྐད་ཅིག་གིས་རང་ཉིད་ཧེ་རུ་ཀ་ཡབ་ཡུམ་ཞལ་གཅིག་ཕྱག་གཉིས་པར་བསྒོམ་པར་བྱ་སྟེ། འཆད་པར་འགྱུར་པའི་མཆོད་གཏོར་སོགས་བསངས་སྦྱངས་བསྐྱེད་དེ་བྱིན་གྱིས་བརླབ་པ་ནི་ཐ་མལ་གྱི་སྣང་ཞེན་གྱིས་མི་ནུས་པས་ལྷའི་ང་རྒྱལ་དང་ལྡན་པའི་སྒོ་ནས་བྱེད་དགོས་པའི་ཕྱིར། དེ་ནས་རྡོར་དྲིལ་བྱིན་རླབས་བྱ་བ་ནི་འདིའི་བཤད་པ་ཕལ་ཆེར་ན་མི་གསལ་ཡང་། ཆོ་གའི་གཞུང་ལས་འབྱུང་བ་ལྟར་ཅུང་ཟད་བརྗོད་ན་སྤྱི་ལ་གོ་དོན་གྱི་ཁྱད་ཆེ་བས། དེ་ཇི་ལྟར་བྱ་བའི་ཚུལ་ཡོད་དེ། ལམ་དང་འབྲས་བུའི་སྐབས་ཀྱི་བདེ་བ་ཆེན་པོའི་ཡེ་ཤེས་སོགས་ཐབས་ཀྱི་ཆ་ཐམས་ཅད་རྡོ་རྗེ་དང་། སྟོང་ཉིད་རྟོགས་པའི་ཤེས་རབ་སོགས་ཤེས་རབ་ཀྱི་ཆ་ཐམས་ཅད་དྲིལ་བུའི་རྣམ་པར་ཤར་བའི་སྒོ་ནས་དྲིལ་བུ་འཛིན་ཅིང་། དེ་གཉིས་ཀའང་བདེ་སྟོང་དབྱེར་མི་ཕྱེད་པའི་དོན་དམ་པ་བྱང་ཆུབ་ཀྱི་སེམས་ཀྱི་རང་བཞིན་ཡིན་ནོ་སྙམ་དུ་བསམས་ལ། ༀ་ཞེས་སོགས་བརྗོད་པའི་སྒོ་ནས་བྱིན་གྱིས་བརླབ་པ་ཡིན་པའི་ཕྱིར། སྔགས་དང་པོ་འདིའི་དོན་ཡོད་དེ། ༀ་ནི་བཀྲ་ཤིས་པ་སོགས་དོན་བདུན་ལ་འཇུག་པ་དྲན་པའི་སྒོ་ནས་བརྗོད་ན་ཕན་ཡོན་ཆེ་བ་དང་། སརྦ་ཏ་ཐཱ་ག་ཏ་སིདྡྷི་བཛྲ་ནི། དེ་བཞིན་གཤེགས་པ་ཐམས་ཅད་ཀྱི་གྲུབ་པའི་རྡོ་རྗེ། ས་མ་ཡ་ཏིཥྛ་ཨེ་ཥ་སྟཱཾ་དྷཱ་ར་ཡ་མི་ནི་དམ་ཚིག་མནོས་ཏེ་འདི་བདག་གིས་བཟུང་བར་བགྱིའོ། །བཛྲ་སཏྭ་ནི་རྡོ་རྗེ་སེམས་དཔའ། ཧི་ལྔས་ཡེ་ཤེས་ལྔ་དང་། ཧཱུཾ་གསུམ་གྱིས་ནི་སྐུ་གསུང་ཐུགས་རྡོ་རྗེ་གསུམ་དབྱེར་མི་ཕྱེད་པ་དེ་མཚོན་ཞིང་། ཕཊ་ནི་གསལ་བ་དང་། སྭཱ ཧཱ་ནི་གཞི་ཚུགས་པའི་དོན་ཡིན་པའི་ཕྱིར། དེ་ནས་བཛྲ་གྷཎྜ་ཧཱུཾ་ཞེས་བརྗོད་ཅིང་འདིའི་དོན་ཡོད་དེ། དྲང་དོན་དུ་རྡོ་རྗེ་དྲིལ་བུ་ཞེས་པ་ཡིན་ལ། ངེས་དོན་དུ་ཧཱུཾ་གིས་ཡེ་ཤེས་ལྔ་དང་ཆོས་ཐམས་ཅད་བདེན་སྟོང་དུ་དྲིལ་ནས་རྟོགས་དགོས་པར་མཚོན་ཞིང་། དྲིལ་བུའི་སྒྲས་ཀྱང་དོན་དེ་སྒྲོག་པར་བསམ་པར་བྱ་དགོས་པའི་ཕྱིར། དེ་ནས་རྡོ་རྗེ་སེམས་དཔའ་ལ་སོགས་པའི་སངས་རྒྱས་ཐམས་ཅད་མཉེས་པར་བྱའོ་སྙམ་ཞིང། སེམས་ཅན་རྨོངས་དང་ཞེས་སོགས་ཀྱི་དོན་ལྟར་བསམ་དགོས་ཏེ། དོན་ནི་དྲང་དོན་དུ་མཚོན་བྱེད་དཔེའི་རྡོ་རྗེ་ལག་གིས་གསོར་ཞིང་། ངེས་དོན་མཚོན་བྱ་དོན་གྱི་རྡོ་རྗེ་བདེ་སྟོང་དབྱེར་མེད་ཀྱི་ཡེ་ཤེས་དེ་རང་རྒྱུད་ལ་གསོར་བའམ་བསྐྱེད་པ་ནི་མཛེས་པའི་ཕྱིར་ཏེ། དེས་སེམས་ཅན་རྨོངས་པ་མ་རིག་པ་དང་བྲལ་བར་བྱས་པའི་སྒོ་ནས་འཁོར་བའི་སྡུག་བསྔལ་ཐམས་ཅད་ལས་རྣམ་པར་ཐར་བར་འགྱུར་བའི་བྱ་བ་བྱེད་པའི་ཕྱིར། དེ་ལྟར་བྱེད་པའི་རྒྱུ་མཚན་ཡོད་དེ། ཡེ་ཤེས་དེས་ཆོས་ཀྱི་མཆོག་དེ་ཁོ་ན་ཉིད་རྟོགས་པའི་ཕྱིར་རོ། །དེའི་ཕྱིར་སྤྲོོ་བ་དང་བཅས་ཏེ་ཕྱི་ནང་གི་རྡོར་དྲིལ་བཟུང་བ་བྱའོ། །ཧཱུཾ་གསུམ་དང་ཧོ་གསུམ་གྱི་མཚོན་དོན་ཡང་ཡོད་དེ། ཧཱུཾ་གསུམ་གྱིས་རྡོ་རྗེ་གསུམ་དབྱེར་མི་ཕྱེད་པ་དང་། ཧོ་གསུམ་གྱིས་ནི་སེམས་ཅན་ཆུང་འབྲིང་ཆེན་པོ་གསུམ་འཁོར་བ་ལས་ཐར་བར་བྱེེད་པ་དེ་མཚོན་པའི་ཕྱིར། ༀ་བཛྲ་དྷརྨཱ་ར་ཎི་ཞེས་སོགས་ཀྱི་དོན་ཡང་ཡོད་དེ། བཛྲ་དྷཱ རྨཱ་ར་ཎི་ཏ་པྲ་ར་ཎི་ཏ་ས་མ་བྲ་ར་ཎི་ཏ་ནི། རྡོ་རྗེ་སྟེ་སྟོང་པ་ཉིད་ཀྱི་ཆོས་སྒྲ་སྒྲོག་རབ་ཏུ་སྒྲོག་ཀུན་ཏུ་རབ་ཏུ་སྒྲོག སརྦ་བུདྡྷ་ཀྵེ་ཊ་པྲ་ཙ་ལི་ནེ་ནི་སངས་རྒྱས་ཀྱི་ཞིང་ཐམས་ཅད་རབ་ཏུ་གཡོ་བ། པྲཛྙཱ་པཱ་ར་མི་ཏ་ནཱ་ད་སྭ་བྷཱ་ཝ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲའི་རང་བཞིན། བཛྲ་སཏྭ་ཧྲྀ་ད་ཡ་སནྟོ་ཥ་ཎི་ཞེས་པ་ནི་རྡོ་རྗེ་སེམས་དཔའི་ཐུགས་ཀུན་དུ་དགྱེས་པ། ཧཱུཾ་དང་ཧོ་ནི་སྔར་བཞིན་དང་། སྭཱཧཱ་ནི་ལེགས་པ་སྦྱིན་པ་སོགས་ཀྱི་དོན་ཡིན་པའི་ཕྱིར། གཉིས་པ་ནི། རང་གི་སྙིང་ཁ་ནས་དུམ་སྐྱེས་མ་དཔག་ཏུ་མེད་པ་སྤྲོས་ཏེ་རྫས་ལ་གནས་པའི་བགེགས་ཐམས་ཅད་བསྐྲད་པར་བསམ་པ་ཡིན་ཏེ། ཁཎྜ་རོ་ཧི་ནི་དུམ་སྐྱེས་མ་ཞེས་པའི་དོན་ཡིན་པའི་ཕྱིར། གསུམ་པ་ནི། སྭཱ་བྷཱ་ཝའི་སྔགས་བརྗོད་ཅིང་ནང་མཆོད་ཀྱི་རྫས་སྣོད་དང་བཅས་པ་སྟོང་པར་སྦྱངས་པའི་ཚུལ་གྱིས་བདེ་སྟོང་དབྱེར་མེད་ཀྱི་འོད་གསལ་དུ་འཇུག་དགོས་པ་ཡིན་ཏེ། དེ་རྣམས་ལ་ཐ་མལ་གྱི་སྣང་ཞེན་བསལ་ནས་བདེ་སྟོང་དབྱེར་མེད་ཀྱི་རྣམ་རོལ་ཏུ་བལྟ་དགོས་པའི་ཕྱིར། སྭཱ་བྷཱ་ཝའི་སྔགས་དོན་ཀྱང་ཡོད་དེ། དངོས་ཟིན་ལྟར་ན་རང་བཞིན་གྱིས་དག་པའི་ཆོས་ཐམས་ཅད་རང་བཞིན་གྱིས་དག་པ་དེ་ངའོ་ཞེས་པ་ཡིན་ཞིང་། དོན་ལ་ནི་དག་པ་སྔ་ཕྱི་གཉིས་རིམ་པ་བཞིན་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་རང་བཞིན་གྱིས་སྟོང་པའི་བདག་ཉིད་དུ་བལྟ་དགོས་པའི་དོན་ཡིན་པའི་ཕྱིར་རོ། །བཞི་པ་ལ་གཉིས། བསྐྱེད་པ་དང་བྱིན་གྱིས་བརླབ་པའོ། །དང་པོ་བསྐྱེད་ཚུལ་ཡོད་དེ། སྟོང་པའི་ངང་ལས་ཡཾ་དང་རཾ་ལས་རླུང་དང་མེའི་དཀྱིལ་འཁོར་གྱི་སྟེང་དུ་ཡེ་གེ་གསུམ་དང་། དེ་ལས་མི་མགོའི་སྒྱེད་བུ་ལྟག་པ་དབུས་སུ་བསྟན་པ་གསུམ་གྱི་བར་དུ་ཨཱ་ལས་ཐོད་པ་དུམ་བུ་གཅིག་པ་ཕྱི་དཀར་ལ་ནང་དམར་བའི་ནང་དུ་ཤ་ལྔ་དང་བདུད་རྩི་ལྔ་ༀ་ལ་སོགས་པ་རང་རང་གི་ས་བོན་ལས་བསྐྱེད་པ་ཡིན་པའི་ཕྱིར། དེ་ལྟར་བྱས་པའི་མཚོན་དོན་དང་དགོས་པ་ཡོད་དེ། སྟོང་པའི་ངང་ལས་བྱུང་པ་ནི་དེ་རྣམས་རང་བཞིན་གྱིས་སྟོང་པའི་རྣམ་འཕྲུལ་དུ་བལྟ་བ་དང་། རླུང་མེ་གཉིས་རང་གི་ས་བོན་ལས་བསྐྱེད་པ་ནི་མིང་རྐྱང་བཏགས་ཡོད་ཙམ་དུ་ཤེས་པ་དང་། སྒྱེད་པུ་གསུམ་གྱིས་ནི་བདེ་བའི་རྟེན་སྒྲུབ་པ་པོའི་སྒོ་གསུམ་མཚོན་ཞིང་། ཐོད་པ་བདེ་སྐྱོང་གི་སྣོད་ཡིན་པས་ཕྱི་དཀར་བས་བདེ་བ་དང་ནང་དམར་བས་སྟོང་པ་དང་། དུམ་བུ་གཅིག་པས་བདེ་སྟོང་དབྱེར་མེད་པ་དེ་མཚོན་པའི་ཕྱིར། ཤ་ལྔ་བདུད་རྩིའི་རྫས་སུ་འཇོག་པའི་རྒྱུ་མཚན་ཡོད་དེ། བྱིན་གྱིས་བརླབས་ནས་རང་གིས་ལོངས་སྤྱོད་ཅིང་ལྷ་ལ་ཕུལ་བས་དངོས་གྲུབ་མྱུར་དུ་འགུགས་པས་ལྕགས་ཀྱུ་དང་གསལ་བར་བྱེད་པས་སྒྲོན་མ་ལྔ་ཞེས་བཤད་པའི་ཕྱིར། དྲི་ཆེན་སོགས་དེའི་རྫས་སུ་འཇོག་པའི་རྒྱུ་མཚན་ཡོད་དེ། ཚུལ་བཞིན་ལོངས་སྤྱོད་ཅིང་ཕུལ་བས་འཆི་མེད་འགྲུབ་པར་འགྱུར་བའི་སྒོ་ནས་ཡིན་པའི་ཕྱིར། སྤྱིར་ཤ་ལྔ་གཤེགས་པ་ལྔ་དང་བདུད་རྩི་ལྔ་གཤེགས་མ་ལྔའི་ས་བོན་ལས་བསྐྱེད་པ་ཡོད་ཀྱང་འདིར་དེ་ལས་ལྡོག་སྟེ་བསྐྱེད་ཅིང་ཡི་གེ་དེ་རྣམས་ཀྱིས་མཚན་པར་བྱས་པ་ལ་དགོས་པ་ཡོད་དེ། ཤ་ལྔ་གཤེགས་མ་ལྔའི་ངོ་བོ་དང་། བདུད་རྩི་ལྔ་གཤེགས་པ་ལྔའི་ངོ་བོར་བྱིན་གྱིས་བརླབ་པའི་ཆེད་ཡིན་པའི་ཕྱིར། ས་བོན་གྱི་ཡི་གེ་རྣམས་གཡས་སྐོར་དུ་འགོད་པའི་ཚུལ་ཡོད་ཀྱང་འདིར་དེ་དང་མི་འདྲ་སྟེ། ཕྱོགས་ཀྱི་ཡེ་གེ་རྣམས་གཡོན་སྐོར་དང་མཚམས་ཀྱི་ཡི་གེ་གཡས་སྐོར་དུ་བྱས་ནས་འགོད་པ་ཡིན་པའི་ཕྱིར། རྫས་དེ་རྣམས་ཀྱི་དབྱིབས་དང་སྡོད་ལུགས་ཇི་ལྟར་བྱ་བའི་ཚུལ་ཡོད་དེ། ཤ་རྣམས་ཚང་མའམ་དུམ་བུར་བཏུབ་པ་ལྟ་བུ་དང་། ཤ་དང་བདུད་རྩི་ཕན་ཚུན་གོ་ས་སོ་སོ་པའམ་གོ་ས་མི་འགོག་པ་དང་ཤ་རྣམས་བདུད་རྩིའི་ནང་དུ་བཅུག་པའི་རིགས་སུ་བསམ་པར་བྱ་བ་ཡིན་པའི་ཕྱིར། རླུང་མེ་སོགས་ཀྱི་མཚོན་དོན་ཁྱད་པར་བ་ཡོད་དེ། རླུང་གིས་མེ་སྦར་ཏེ་ཐོད་པའི་རྫས་ཞུ་བ་སོགས་ཀྱིས་ནི་རང་རྒྱུད་ཀྱི་རླུང་གིས་གཏུམ་མོ་བསྐུལ་ནས་བྱང་སེམས་ཞུ་སྟེ་བདེ་སྟོང་དབྱེར་མེད་ཀྱི་ཡེ་ཤེས་སྐྱེ་བ་དེ་མཚོན་པའི་ཕྱིར་རོ། །འདི་ནི་གསར་འདུས་དང་གཤིན་རྗེ་གཤེད་ཀྱི་སྒོ་ནས་ནང་མཆོད་སོགས་བྱིན་རླབས་བྱ་བའི་ཚུལ་དང་ཡང་ཆོས་མཐུན་ནོ། །གཉིས་པ་བྱིན་གྱིས་བརླབ་པའི་ཚུལ་ཡོད་དེ། རྫས་ཀྱི་སྟེང་དུ་ཧཱུཾ་ལས་ཐུགས་རྡོ་རྗེ་མཚོན་བྱེད་ཀྱི་ཁ་ཊྭཱཾ་ག་བསྐྱེད་པ་ཐོད་པར་ལྷུང་ནས་ཞུ་བས་རྫས་རྣམས་དངུལ་ཆུའི་མདོག་ཅན་དུ་བསྒྱུར་ཞིང་། སྟེང་དུ་འཁོར་ལོ་གསུམ་གྱི་ལྷའི་ངོ་བོར་གྱུར་པའི་དབྱངས་གསལ་རྣམས་བཀོད་དེ་ཡི་གེ་གསུམ་གྱི་ངོ་བོར་བསྒྱུར་ནས། དེ་ལས་འོད་ཟེར་འཕྲོས་པས་རྒྱ་མཚོ་ན་གནས་པའི་བདུད་རྩི་དང་། སངས་རྒྱས་བྱང་སེམས་སོགས་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་སྟེ་ཡི་གེ་གསུམ་ལ་ཐིམ་པས་ཞུ་ནས་ཐོད་པའི་རྫས་རྣམས་བྱིན་གྱིས་བརླབ་པར་བསམ་པ་ཡིན་པའི་ཕྱིར། དེ་ཡང་དམར་སེར་དུ་གྱུར་ཞེས་པ་ཡན་གྱིས་དམ་ཚིག་པའི་རྫས་བསྐྱེད་པ་དང་དེ་མན་གྱིས་ཡེ་ཤེས་པའི་རྫས་འཇུག་པ་ཡིན་ཏེ། ལྷ་དམ་ཚིག་པ་ལ་ཡེ་ཤེས་པ་འཇུག་པ་དང་ཆོས་མཐུན་ཞིང་ཡེ་ཤེས་པའི་རྫས་ཀྱིས་དམ་ཚིག་པའི་རྫས་རྣམས་བྱིན་གྱིས་རློབ་པར་བྱེད་པ་ཡིན་པའི་ཕྱིར། མཇུག་ཏུ་ཡི་གེ་གསུམ་ལན་གསུམ་སོགས་བརྗོད་དགོས་པ་ཡིན་ཏེ། རྫས་རྣམས་རྡོ་རྗེ་གསུམ་གྱི་བདག་ཉིད་དུ་བྱིན་གྱིས་བརླབ་པའི་ཆེད་ཡིན་པའི་ཕྱིར་རོ། །གཉིས་པ་ལ་གཉིས། མཆོད་གཏོར་བྱིན་གྱིས་བརླབ་པ་དང། མགྲོན་སྤྱན་དྲངས་ནས་འབུལ་བའི་ཚུལ་ལོ། །དང་པོ་ཡོད་དེ། མཆོད་པ་བྱིན་རླབས་ནི་འཆད་པར་འགྱུར་ཞིང་། གཏོར་མ་བྱིན་རླབས་ནི་ནང་མཆོད་ལྟར་བྱ་བ་ཡིན་པའི་ཕྱིར་རོ། །གཉིས་པ་ལའང་གཉིས། སྤྱན་དྲངས་ནས་འབུལ་བ་དང་། འཕྲིན་ལས་བཅོལ་ཏེ་གཤེགས་སུ་གསོལ་པའོ། །དང་པོ་ཡོད་དེ། འཕར་བའི་ཕྱག་རྒྱ་བྱས་ནས་ངག་ཏུ་ཕེཾ་ཞེས་བརྗོད་ཅིང་འོད་ཟེར་གྱིས་ཕྱོགས་སྐྱོང་སོགས་སྤྱན་དྲངས་པ་ཐ་མལ་གྱི་སྣང་ཞེན་སྦྱོང་བའི་ཆེད་དུ། འོད་གསལ་དུ་བཅུག་ནས་ཧེ་རུ་ཀ་ཡུམ་བཅས་སུ་བསྐྱེད་དེ་ལྗགས་བྱིན་གྱིས་བརླབས་ནས་སྔགས་ཀྱིས་འབུལ་བ་ཡིན་པའི་ཕྱིར། སྔགས་ལན་གཉིས་ཀྱིས་འབུལ་བའི་རྒྱུ་མཚན་ཡོད་དེ། ཕྱོགས་དང་མཚམས་ཀྱི་འཇིག་རྟེན་པ་རྣམས་ལ་སོ་སོར་འབུལ་པའི་ཆེད་ཡིན་པའི་ཕྱིར། སྔགས་དོན་ཡོད་དེ། ཁ་ཁ་ཁཱ་ཧི་ཁཱ་ཧི་ནི་ཟོ་ཟོ་ཟོ་ཤིག་ཟོ་ཤིག སརྦ་ཡཀྵ་རཀྵ་ནས་ཨ་བ་སྨཱ་རའི་བར་ནི་གནོད་སྦྱིན་ཐམས་ཅད་སྲིན་པོ་དང་འབྱུང་པོ་དང་ཡི་དྭགས་དང་ཤ་ཟ་སྨྱོ་བྱེད་བརྗེད་བྱེད། བཛྲ་ཌཱ་ཀ་ནས་ཡཙྪ་ནྟུའི་བར་ནི་རྡོ་རྗེ་མཁའ་འགྲོ་མཁའ་འགྲོ་མ་རྣམས་ལ་སྟེར་བས་གཏོར་མ་འདི་བཟུང་དུ་གསོལ་དམ་ཚིག་པ་བསྲུང་བར་གྱིས། བདག་ལ་དངོས་གྲུབ་སྩོལ། ཡ་ཐེ་ནས་ཛི་གྷྲ་ཐའི་བར་ནི་ཇི་ལྟར་འདོད་པ་དེ་ལྟར་བཟའ་བ་བཏུང་བ་མྱང་བར་གྱིས། མ་ཏི་ཀྲ་མ་ནས་བྷ་ཝནྟུའི་བར་ནི་རིམ་པ་ལས་མི་འདའ་བར་བདག་གི་དགོས་པ་ཐམས་ཅད་བདེ་བ་དམ་པས་རྣམ་པར་དག་པའི་གྲོགས་མཛད་དུ་གསོལ་ཞེས་པའི་དོན་ཡིན་པའི་ཕྱིར། དེ་ནས་མཆོད་པ་དང་ནང་མཆོད་ཀྱང་འབུལ་ལོ། །གཉིས་པ་ཡོད་དེ། ལྷ་ཡི་ཚོགས་རྣམས་མ་ལུས་དང་། །ཞེས་སོགས་བརྗོད་ཅིང་འཕྲིན་ལས་བཅོལ་ནས་བཛྲ་མུཿཞེས་པས་སེ་གོལ་གདབ་ཅིང་གཤེགས་པར་བསམ་པ་ཡིན་པའི་ཕྱིར། འདིར་ཕྱོགས་སྐྱོང་སོགས་ལ་མཆོད་གཏོར་ཕུལ་པ་ལ་དགོས་པ་ཡོད་དེ། སྒྲུབ་ཐབས་ཀྱི་དངོས་གཞི་བསྒོམ་པ་ལ་བར་ཆད་མི་འབྱུང་བའི་ཆེད་ཡིན་པའི་ཕྱིར་རོ། །གསུམ་པ་བདག་བསྐྱེད་ཀྱི་མཆོད་པ་བྱིན་རླབས་ནི་འོག་ཏུ་ཡང་རུང་མོད་འདིར་བྱེད་པ་ལ་གཉིས། བསངས་སྦྱངས་དང་། བསྐྱེད་ཅིང་བྱིན་གྱིས་བརླབ་པའོ། །དང་པོ་ནང་མཆོད་ཀྱི་སྐབས་ལྟར་བྱའོ། །གཉིས་པ་ཇི་ལྟར་བྱ་བའི་ཚུལ་ཡོད་དེ། སྟོང་པའི་ངང་ལས་ཐོད་པའི་མིང་ཡིག་དང་པོ་ཀ་ལ་ཀླད་ཀོར་བྱིན་པའི་ཀཾ་ངཾ་ཨཱ་ལས་ཐོད་པ་རྣམས་ཀྱི་ནང་དུ་འདིར་བདག་བསྐྱེད་ལ་མཆོད་མགོ་རང་གི་གཡོན་དང་མདུན་བསྐྱེད་ལྟ་བུ་ལ་དེ་ཉིད་ཀྱི་གཡོན་ནས་འགོ་བརྩམས་ཏེ་ཧཱུཾ་རེ་རེ། དེ་ཡོངས་སུ་གྱུར་པ་ལས་མཆོད་རྫས་རྣམས་ངོ་བོ་བདེ་སྟོང་དབྱེར་མེད་ཀྱི་ཡེ་ཤེས་ཡིན་པ་ལ། རྣམ་པ་མཆོད་རྫས་སོ་སོའི་རྣམ་པ་ཅན་དང་། བྱེད་ལས་སམ་ནུས་པ་མགྲོན་རྣམས་ཀྱི་མིག་ལ་སོགས་པའི་དབང་པོ་དྲུག་གི་སྤྱོད་ཡུལ་དུ་ཟག་མེད་ཀྱི་བདེ་བ་སྟེར་བའི་ཁྱད་ཆོས་གསུམ་ལྡན་དུ་མོས་ནས། ཨརྒྷཾ་སོགས་རང་རང་གི་མིང་ཡི་གེ་གསུམ་དང་སྤེལ་ཏེ་བྱིན་གྱིས་བརླབ་པར་བྱ་བ་ཡིན་པའི་ཕྱིར་རོ། །མཆོད་པ་རྣམས་ཧཱུཾ་གྱི་ས་བོན་ལས་བསྐྱེད་པའི་རྒྱུ་མཚན་ཡོད་དེ། ཧཱུཾ་ནི་སྤྱིར་ཐུགས་རྡོ་རྗེ་མཚོན་བྱེད་ཡིན་ལ་འདིར་ཧེ་རུ་ཀའི་ཐུགས་བདེ་སྟོང་དབྱེར་མེད་ཀྱི་ཡེ་ཤེས་མཚོན་བྱེད་ཡིན་པས། དེ་ཉིད་མཆོད་རྫས་སོ་སོའི་རྣམ་པར་ཤར་བར་ཤེས་དགོས་པའི་ཆེད་ཡིན་པའི་ཕྱིར། མཆོད་པ་ཡེ་ཤེས་ཀྱི་བདག་ཉིད་དུ་མོས་པ་ལ་དགོས་པ་ཁྱད་པར་ཅན་ཡོད་དེ། དེ་ལ་ལོངས་སྤྱད་པས་རང་རྒྱུད་ལ་ཡེ་ཤེས་དེ་ལྟ་བུ་སྐྱེ་བའི་བག་ཆགས་ཁྱད་པར་ཅན་འཇོག་པའི་ཆེད་ཡིན་པའི་ཕྱིར། ཡི་གེ་གསུམ་དང་སྤེལ་བའི་རྒྱུ་མཚན་ཡོད་དེ། མཆོད་པ་རྣམས་རྡོ་རྗེ་གསུམ་གྱི་སྒོ་ནས་བྱིན་གྱིས་བརླབ་པའི་ཆེད་ཡིན་པའི་ཕྱིར་རོ། །བཞི་པ་ལ་གཉིས། བསྐྱེད་པ་དང་། བཟླས་པ་བྱ་བའོ། །དང་པོ་ནི། སྤྱིར་རང་ཉིད་རྡོར་སེམས་སུ་བསྐྱེད་ནས་ཡིག་བརྒྱ་བཟླས་ཀྱང་རུང་མོད། ཕྱག་ལེན་ལ་རང་གི་སྤྱི་བོར་བསྒོམས་ནས་བྱེད་པ་ལྟར་བྱ་བ་ཡིན་ཏེ། དེ་ཡང་འདིའི་སྔོན་དུ་སངས་རྒྱས་ཆོས་དང་དགེ་འདུན་ལ། །ཞེས་སོགས་འབྱུང་བ་ལྟར་སྐྱབས་སེམས་བྱེད་པའམ། གཞན་གྱིས་ཀྱང་རུང་ལ། དེ་ནས་རང་གི་སྤྱི་བོར་པཾ་ལས་པདྨ་ཞེས་སོགས་ལྟར་བསྐྱེད་ཅིང་ཡེ་ཤེས་པ་བཅུག་ནས་བཟླས་པ་ལ་འཇུག་པ་ཡིན་པའི་ཕྱིར། གཉིས་པ་ནི། ཡིག་བརྒྱ་སྤྱི་འགྲོ་ལྟར་ཡང་རུང་ལ། འདིར་སཱཏྭའི་དོད་ལ་ཧེ་རུ་ཀ་ཞེས་འབྱུང་བ་ལྟར་ན་འདི་ལྟར་ཡིན་ཏེ། བཛྲ་ནི་རྡོ་རྗེ། ཧེ་རུ་ཀ་ཞེས་པ་རྣམས་དོན་འགྱུར་ལ་ཁྲག་འཐུང་ཡིན་ཞིང་། ས་མ་ཡ་ནི་དམ་ཚིག །མ་ནུ་ནི་རྗེས་སུ། པཱ་ལ་ཡཱ་ནི་སྐྱོང་བ། ཏྭེ་ནོ་པ་ཏིཥྛ་ནི་ཉེ་བར་གནས་པར་མཛོད། ཌི་ཌྷོ་ནི་བརྟན་པ། སུ་ཏོ་ཥྱོ་ནི་ཤིན་ཏུ་དགྱེས་པ། སུ་བོ་ཥྱོ་ནི་ཤིན་ཏུ་རྒྱས་པ། ཨ་ནུ་ར་ཏོ་ནི་རྗེས་སུ་ཆགས་པ། མེ་ནི་བདག་དང་བྷ་ཝ་རྣམས་ནི་རང་བཞིན་དུ་མཛོད་ཅིག་ཅེས་པའམ། དངོས་པོར་མཛོད་ཅིག སརྦ་སིདྡྷི་མེ་པྲ་ཡཙྪ་ནི་དངོས་གྲུབ་ཐམས་ཅད་བདག་ལ་སྩོལ་ཅིག སརྦ་ཀརྨཱ་ནས་ཀུ་རུའི་བར་ནི་ལས་ཀུན་ལ་བདག་གི་སེམས་ཀྱི་དཔལ་དུ་མཛོད་ཅིག ཧཱུཾ་ནི་ཐུགས་དང་། ཧ་བཞི་དང་ཧོ་དང་ལྔ་ནི་ཡེ་ཤེས་ལྔ། བྷ་ག་ཝཱན་ནི་བཅོམ་ལྡན་འདས། མ་མེ་མུཉྩ་ནི་བདག་ལ་གྲོལ་བར་མཛོད་ཅེས་པའམ། མ་འདོར་ཅིག་ཅེས་པ། མ་ཧཱ་ས་མ་ཡ་སཏྭ་ནི་དམ་ཚིག་སེམས་དཔའ་ཆེན་པོ། ཨཱཿནི་གསུང་རྡོ་རྗེའི་ས་བོན་ཡིན་པའི་ཕྱིར། ཧཱུཾ་དང་ཕཊ་ནི་ཡི་གེ་བརྒྱ་བར་མི་ཐེ་ཡང་མཇུག་ཏུ་སྦྱར་བ་ཡིན་ལ། ཡི་གེ་བརྒྱ་པ་ཞེས་པ་ནི་སྲོག་ལྡན་གྱི་ཡི་གེའི་དབང་དུ་བྱས་པ་ཡིན་ཏེ། གཞན་དུ་ན་དེ་ལས་མང་བའི་ཕྱིར་རོ། །མཐར་གསོལ་བ་བཏབ་ནས་རང་ལ་བསྟིམ་པས་རང་དང་དབྱེར་མེད་དུ་གྱུར་པར་བསམ་མོ། །འདི་ལ་སྟོབས་བཞི་ཚང་བ་ཡིན་ཏེ། སྐྱབས་སེམས་ནི་རྟེན་གྱི་སྟོབས། བཟླས་པ་ནི་གཉེན་པོ་ཀུན་ཏུ་སྤྱོད་པའི་སྟོབས། བདག་ནི་མི་ཤེས་སོགས་ནི་སུན་འབྱིན་པའི་སྟོབས་ཡིན་ལ། སླར་ལྡོག་པའི་སྟོགས་ནི་ཤུགས་ཀྱིས་བསྟན་པའི་ཕྱིར། རྡོར་སེམས་ཀྱི་སྒོམ་བཟླས་བྱས་པ་ལ་དགོས་པ་ཡོད་དེ། དམ་ཚིག་ཉམས་པ་སོགས་ཀྱི་ཉེས་ལྟུང་སྦྱོང་ཞིང་འཕེལ་ཁ་ཆད་པར་འགྱུར་བའི་ཕྱིར་ཏེ། དེ་སྐད་དུ་ཡང་སྙིང་པོ་རྒྱན་ལས། ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་ནས། །འཕེལ་བར་ཡང་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པ། །ཞེས་སོགས་གསུངས་པའི་ཕྱིར་རོ། །གཉིས་པ་ལ་བཞི། སྒོ་གསུམ་དག་པར་བྱས་ནས་ཚད་མེད་བཞི་བསྒོམ་པ། ཕུང་ཁམས་སྐྱེ་མཆེད་བྱིན་གྱིས་བརླབ་པ། སྲུང་འཁོར་བསྒོམ་པ། ཚོགས་གསོག་པའོ། །དང་པོ་ནི། ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། ཧེ་ནི་རྒྱུ་སོགས་སྟོང་པ་ཉིད། །རུ་ནི་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་འབྱུང་བ་ལྟར་བསྒོམ་པར་བྱ་བ་ཡིན་ཏེ། དེ་ཡང་ཤྲཱི་ཧེ་རུ་ཀ་ཞེས་བརྗོད་ཅིང་དེའི་དོན་བསམས་པའི་སྒོ་ནས་དག་པ་གསུམ་གྱི་རྣལ་འབྱོར་ལ་འཇུག་པ་ཡིན་པའི་ཕྱིར། ཡི་གེ་བཞི་པོ་དེས་བརྗོད་བྱའི་དོན་མཚོན་ཚུལ་ཡོད་དེ། ཧེ་ཡིག་གིས་ནི་ཕུང་སོགས་ཀྱིས་བསྡུས་པའི་ཆོས་རྣམས་རང་བཞིན་གྱིས་གྲུབ་པས་སྟོང་པའི་ཆོས་ཀྱི་བདག་མེད་པ་དང་། རུ་ཡིག་གིས་གང་ཟག་རང་བཞིན་གྱིས་གྲུབ་པས་སྟོང་པའི་གང་ཟག་གི་བདག་མེད་པ་མཚོན་པས་གཉིས་ཀས་ཀྱང་ཡུལ་གྱི་བདག་མེད་མཚོན་པ་ཡིན་ལ། ཀ་ཡིག་གིས་ནི་ཡུལ་ཅན་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་མཚོན་ཞིང་། ཤྲཱི་ཡིག་གིས་ཡུལ་ཡུལ་ཅན་གཉིས་ཆུ་ལ་ཆུ་བཞག་པ་བཞིན་དུ་གཉིས་སུ་མེད་པར་སྦྱོར་བའི་བདེ་སྟོང་དབྱེར་མི་ཕྱེད་པའི་བདག་ཉིད་ཅན་གྱི་ཆོས་སྐུ་དེ་ངའོ་སྙམ་དུ་ང་རྒྱལ་བཞག་ནས་ཨེ་ཝཾ་གྱི་དོན་བསྒོམ་དགོས་པར་མཚོན་པའི་ཕྱིར་རོ། །དེ་ལྟར་བསྒོམས་པ་དེ་ལ་ཡིད་དག་པར་བྱེད་པའི་རྣལ་འབྱོར་དང་། དེ་ལས་ལྷའི་སྐུར་ལྡང་ནས་ཡི་གེ་དེ་དག་བརྗོད་པ་ལ་ལུས་དག་པར་བྱེད་པའི་རྣལ་འབྱོར་དང་། དེ་ནས་འགོར་ༀ་དང་། མཐར་ཧཱུཾ་ཧཱུཾ་ཕཊ་སྦྱར་བའི་དབྱངས་གསལ་ལན་གསུམ་བརྗོད་ཅིང་རང་གི་ལྟེ་བའི་ཕྱོགས་སུ་གཡོན་དུ་ལན་གསུམ་བསྐོར་བ་ལས་ལྷའི་ཚོགས་སྤྲོ་བསྡུ་བྱེད་པ་ལ་ངག་དག་པར་བྱེད་པའི་རྣལ་འབྱོར་ཞེས་བྱ་སྟེ། རང་གི་སྒོ་གསུམ་གྱི་དྲི་མ་སོ་སོར་དག་པར་བྱེད་པའི་རྣལ་འབྱོར་ཡིན་པའི་ཕྱིར། དེ་ལྟར་བསྒོམས་པ་ལ་དགོས་པ་ཡོད་དེ། སྒྲུབ་པ་པོའི་སྒོ་གསུམ་གྱི་བྱ་བ་ཐམས་ཅད་དག་པ་གསུམ་གྱི་རྣལ་འབྱོར་གྱིས་ཟིན་དགོས་པར་ཤེས་པའི་ཆེད་ཡིན་པའི་ཕྱིར་རོ། །དེ་ནས་སེམས་ཅན་ཐམས་ཅད་སྡུག་བསྔལ་དང་བྲལ་བ་དང་། བདེ་བ་དང་ལྡན་པ་དང་། ཐོབ་ཟིན་པའི་བདེ་བ་བརྟན་པ་དང་། ཡིད་དེ་བཞིན་ཉིད་ལ་གནས་པར་གྱུར་ཅིག གནས་པར་བྱའོ་སྙམ་པའི་སྒོ་ནས་ཚངས་པའི་གནས་བསྒོམ་དགོས་པ་ཡིན་ཏེ། འཆད་པར་འགྱུར་བའི་ལམ་ཐམས་ཅད་ཐེག་ཆེན་གྱི་ཉམས་ལེན་དུ་འགྱུར་བར་བྱ་བའི་ཆེད་ཡིན་པའི་ཕྱིར་རོ། །གཉིས་པ་ལ་གསུམ། ཕུང་པོ་དང་། སྐྱེ་མཆེད་དང་། ཁམས་བྱིན་གྱིས་བརླབ་པའི་ཚུལ་ལོ། །དང་པོ་ནི། རང་གི་དཔྲལ་བའི་དབུས་སུ་བྷྲུཾཾ་དཀར་པོ་ཞེས་སོགས་འབྱུང་བ་ལྟར་བྱ་བ་ཡིན་ཞིང་། དེ་ཡང་རྣམ་སྣང་བྷྲུཾཾ་དེར་འགོད་པའི་རྒྱུ་མཚན་ཡོད་དེ། རྣམ་སྣང་ལུས་དག་བྱེད་ཀྱི་ལྷ་ཡིན་ལ། ལུས་སམ་གཟུགས་ཕུང་གི་རྟེན་ཁམས་དཀར་པོ་ནི་དཔྲལ་བ་ན་གནས་པའི་ཕྱིར། རྡོ་རྗེ་ཉི་མ་ལྟེ་བར་འགོད་པ་ཡིན་ཏེ། དེ་ནི་ཚོར་ཕུང་དག་བྱེད་ཡིན་ལ། ཚོར་ཕུང་ནི་གཙོ་བོར་དྲོད་ལ་བརྟེན་ནས་འབྱུང་བས་དྲོད་ཀྱི་གཙོ་བོ་གཏུམ་མོ་ལྟེ་བ་ན་གནས་པའི་ཕྱིར། པདྨ་གར་དབང་ནི་མགྲིན་པར་འགོད་པ་ཡིན་ཏེ། དེ་ནི་འདུ་ཤེས་ཀྱི་ཕུང་པོ་དག་བྱེད་ཡིན་ལ་འདུ་ཤེས་ནི་གཙོ་བོར་མགྲིན་པ་ནས་བྱུང་སྟེ་དབང་པོའི་སྒོར་འཇུག་པའི་ཕྱིར། རྡོ་རྗེ་རྒྱལ་པོ་རྐང་པའི་ལོང་བུའི་འོག་ཏུ་འགོད་པ་ཡིན་ཏེ། དེ་ནི་འདུ་བྱེད་ཀྱི་ཕུང་པོ་དག་བྱེད་ཡིན་ལ་མཚུངས་ལྡན་འདུ་བྱེད་རྩ་ཉོན་དང་ཉེ་ཉོན་རྣམས་གཡོ་བྱེད་ཀྱི་རླུང་གི་གཙོ་བོ་ནི་རྐང་པའི་ལོང་བུའི་ཕྱོགས་ན་གནས་པའི་ཕྱིར། རྡོར་སེམས་སྙིང་ཀར་འགོད་པ་ཡིན་ཏེ། དེ་ནི་རྣམ་ཤེས་ཀྱི་ཕུང་པོ་དག་བྱེད་ཡིན་ལ། རྣམ་ཤེས་ཀྱི་གཙོ་བོ་ཡིད་ཀྱི་རྣམ་ཤེས་སྲོག་འཛིན་དང་བཅས་པ་ནི་སྙིང་ཁ་ན་གནས་པའི་ཕྱིར། ཧེ་རུ་ཀ་སྤྱི་བོར་འགོད་པ་ཡིན་ཏེ། དེ་ནི་ཕུང་པོ་ལྔའི་དེ་བཞིན་ཉིད་དག་བྱེད་ཡིན་པ་དང་། ཕུང་པོ་གཞན་བཞི་གཟུགས་ཕུང་ལ་བརྟེན་ཅིང་གཟུགས་ཕུང་གི་གཙོ་བོར་བྱང་སེམས་ནི་སྤྱི་བོ་ན་གནས་པའི་ཕྱིར་རོ། །ཇི་ལྟར་བསྐྱེད་པའི་ཚུལ་ཡོད་དེ། གནས་དེ་རྣམས་སུ་བྷྲུཾ་དཀར་པོ་སོགས་རང་རང་གི་མངོན་དང་མཐུན་པའི་ས་བོན་ཡི་གེ་དྲུག་ལས་བསྐྱེད་པ་ཡིན་པའི་ཕྱིར། ལྷ་དེ་རྣམས་ནི་རིགས་དྲུག་གི་ངོ་བོ་ཡིན་ཏེ། རིམ་པ་བཞིན་རྣམ་སྣང་རིན་འབྱུང་འོད་དཔག་དོན་གྲུབ་རྡོ་རྗེ་སེམས་དཔའ་མི་བསྐྱོད་པའི་ངོ་བོ་ཡིན་པའི་ཕྱིར། གལ་ཏེ་ཧེ་རུ་ཀ་མི་བསྐྱོད་པའི་ངོ་བོ་ཡིན་ན་མི་འཐད་དེ། རིགས་ཉི་ཚེ་བར་འགྱུར་བའི་ཕྱིར་ཞེ་ན། སྐྱོན་མེད་དེ། མི་བསྐྱོད་པའི་རིགས་དང་རིགས་དྲུག་པ་མི་འགལ་བའི་ཕྱིར་རོ། །འོན་ཀྱང་སྐབས་འདིར་རྡོ་རྗེ་སེམས་དཔའ་ཉིད་རིགས་དྲུག་པར་བྱའོ། །གཉིས་པ་སྐྱེ་མཆེད་བྱིན་གྱིས་བརླབ་པ་ནི། མིག་གཉིས་སུ་ༀ་དཀར་པོ་ཞེས་སོགས་འབྱུང་བ་ལྟར་བྱ་བ་ཡིན་ཏེ། དེ་ཡང་གནས་དེ་དང་དེར་ས་བོན་ༀ་དཀར་པོ་སོགས་དྲུག་ལས་གཏི་མུག་རྡོ་རྗེ་སོགས་དྲུག་བསྐྱེད་པར་བྱ་བ་ཡིན་པའི་ཕྱིར། ལྷ་དྲུག་པོ་དེ་སེམས་དཔའ་དྲུག་གི་ངོ་བོ་ཡིན་ཏེ། རིམ་པ་བཞིན་ས་སྙིང་ཕྱག་རྡོར་ནམ་སྙིང་འཇིག་རྟེན་དབང་ཕྱུག་སྒྲིབ་སེལ་ཀུན་བཟང་རྣམས་ཀྱི་ངོ་བོ་ཡིན་པའི་ཕྱིར། དེ་དྲུག་གནས་དེ་རྣམས་སུ་འགོད་པའི་རྒྱུ་མཚན་ཡོན་དེ། རང་གི་སྦྱང་གཞིའི་གཙོ་བོ་སྐྱེ་མཆེད་རྣམས་གནས་དེ་དག་ཏུ་ཡོད་པའི་ཕྱིར་རོ། །གསུམ་པ་ཁམས་བྱིན་གྱིས་བརླབ་པ་ནི། ལྟེ་བ་ས་ལ་ལཾ་སེར་པོ་ཞེས་སོགས་འབྱུང་བ་ལྟར་བྱ་བ་ཡིན་ཏེ། གནས་དེ་རྣམས་སུ་ལཾ་སེར་པོ་སོགས་ས་བོན་ལྔ་ལས་རང་རང་གི་མདོག་དང་མཐུན་པའི་ལྟུང་བྱེད་མ་སོགས་ལྷ་ལྔ་པོ་དེར་བསྐྱེད་པར་བྱ་བའི་ཕྱིར། དེ་ལྔ་པོ་གང་གི་ངོ་བོ་ཡིན་པ་ཡོད་དེ། ལྟུང་བྱེད་མ་སྤྱན་མའི་ངོ་བོ་ཡིན་པ་ནས་པདྨའི་དྲ་བ་ཅན་ཆོས་དབྱིངས་རྡོ་རྗེ་མའི་ངོ་བོ་ཡིན་པའི་ཕྱིར། ལྷ་དེ་རྣམས་གནས་དེ་དང་དེར་སྒོམ་པའི་རྒྱུ་མཚན་ཡོད་དེ། སྦྱོང་བྱེད་ལྷ་རྣམས་ཀྱི་སྦྱང་གཞིའི་གཙོ་བོ་ཁམས་རྣམས་དེ་དང་དེར་གནས་པའི་ཕྱིར། གོང་དུ་བཤད་པ་དེ་རྣམས་ཇི་ལྟར་བསྒོམ་པའི་ཚུལ་ཡོད་དེ། ལྷ་དེ་དག་རང་གི་ཕུང་པོ་དང་སྐྱེ་མཆེད་དང་ཁམས་རྣམས་དང་ངོ་བོ་དབྱེར་མེད་དུ་བལྟ་ཞིང་གནས་དེ་དང་དེར་གཟུགས་བརྙན་ཤར་བ་བཞིན་དུ་བསམ་པ་དང་བདེ་སྟོང་དབྱེར་མེད་ཀྱི་ཡེ་ཤེས་ལྷ་དེ་དང་དེ་དག་ཏུ་ཤར་བའི་ང་རྒྱལ་དང་གསལ་སྣང་ལ་སློབ་པ་ཡིན་པའི་ཕྱིར། དེ་ནས་པྲ་ཀྲྀ་ཏ་ཞེས་སོགས་བརྗོད་ནས་ང་རྒྱལ་འཛིན་པ་ཡིན་ཏེ། སྔགས་དོན་ནི་རང་བཞིན་གྱིས་ཡོངས་སུ་དག་པའི་ཆོས་ཐམས་ཅད་རང་བཞིན་གྱིས་ཡོངས་སུ་དག་པ་དེ་ངའོ་སྙམ་དུ་ང་རྒྱལ་བཟུང་བའི་དོན་ཡིན་པའི་ཕྱིར་རོ། །གསུམ་པ་སྲུང་འཁོར་བསྒོམ་ཚུལ་ལ་གཉིས། བདེ་མཆོག་གི་སྐོར་ནས་གསུངས་ཚུལ་མདོར་བསྡུས་དགོད་པ་དང་། སྐབས་འདིར་ཇི་ལྟར་སྒོམ་པའི་ཚུལ་ལོ། །དང་པོ་ནི་ཡོད་དེ། རྩ་རྒྱུད་ལས། རང་རྣམས་ནི་ཕྱོགས་སུ་དགོད། །ཞེས་སོགས་གསུངས་པའི་དོན་མངོན་བརྗོད་སོགས་ཀྱིས་སྲུང་འཁོར་རྒྱས་འབྲིང་བསྡུས་པ་གསུམ་གྱི་བསྒོམ་ཚུལ་དུ་མཛད་ལ། དེ་ཡང་རྒྱས་པ་ནི་ར་གུར་གྱི་ནང་དུ་འཁོར་ལོ་རྩིབས་བཅུ་པའི་དབུས་སུ་རྡོར་སེམས་དང་ཕྱོགས་མཚམས་རྣམས་སུ་ཁྲོ་བོ་བཅུ་བསྒོམས་ནས་བཟླས་པ་བྱ་ཞིང་འཕྲིན་ལས་མཛད་པ་དང་། འབྲིང་པོ་ནི་འདིར་བསྒོམ་པ་ལྟར་དང་། བསྡུས་པ་ནི་དྲིལ་བུའི་ཐུགས་སུ་བསྒོམ་པ་ལྟར། རྡོ་རྗེའི་ས་གཞི་ར་གུར་བླ་རེ་མདའི་དྲ་བ་མེ་རི་དང་བཅས་པ་བསྐྱེད་ནས་སྔགས་དྲུག་གིས་བྱིན་གྱིས་བརླབ་པ་ཡིན་པའི་ཕྱིར་རོ། །གཉིས་པ་ལ་གཉིས། ར་གུར་སོགས་ཇི་ལྟར་བྱ་བ་དང་། ཁྲོ་མོ་རྣམས་བསྐྱེད་ནས་བགེགས་ལ་ཕུར་བུས་གདབ་པའི་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། རང་ཉིད་ཧེ་རུ་ཀའི་ང་རྒྱལ་གྱིས་གཡོན་པའི་མཐེབ་མཛུབ་ཀྱིས་སེ་གོལ་ཕྱོགས་བཞིར་གདབ་ཅིང་། ༀ་སུམ་བྷ་ནི་ཞེས་སོགས་ཞལ་བཞི་པའི་སྔགས་བརྗོད་པའི་ཚེ་སྔགས་འོད་ཟེར་དང་བཅས་པ་ལས་ཕྱོགས་མདོག་ཅན་གྱི་སྣ་ཚོགས་རྡོ་རྗེའི་རྭ་བ་གྲུ་བཞི་པ་དང་། འོག་གི་སྣ་ཚོགས་རྡོ་རྗེའི་ལྟེ་བའི་ཧཱུཾ་གི་འོད་ཟེར་ལས་སྤྲོས་པའི་རྡོ་རྗེའི་ས་གཞི་དང་། ར་བའི་མཐར་རྡོ་རྗེ་རྩེ་ལྔ་པའི་རྣམ་པ་ཅན་གྱི་མདའི་དྲ་བ་མེ་རབ་ཏུ་འབར་བ་ཕན་ཚུན་དུ་རྒྱུགས་པ་དང་སྟེང་དུ་རྭ་བའི་རྒྱ་དང་མཉམ་པའི་དབྱིབས་གྲུ་བཞི་པ་རྩེ་མོ་རིམ་གྱིས་ཕྲ་བའི་རྡོ་རྗེའི་གུར་དང་། དེའི་འོག་ཏུ་རྡོ་རྗེའི་བླ་རེ་སྟེ། རྡོ་རྗེ་ཆེ་བ་རྣམས་ཀྱི་ཁོང་སེང་དུ་རྡོ་རྗེ་ཆུང་བའི་རྡུལ་ཕྲ་རབ་ཀྱིས་བར་མཚམས་མེད་པར་གཏམས་པ། ཐམས་ཅད་ཀྱང་ཕྱི་རོལ་དུམ་བུ་གཅིག་ཏུ་གྱུར་པ་དང་། དེའི་ཕྱི་རོལ་ཏུ་རྡོ་རྗེའི་མེ་རབ་ཏུ་འབར་བས་བསྐོར་བར་བསམ་པ་ཡིན་པའི་ཕྱིར་རོ། །དེ་ནས་ༀ་མེ་དེ་ནི་ཞེས་སོགས་ཀྱི་སྔགས་བརྗོད་ནས་བྱིན་གྱིས་བརླབ་པར་བྱ་བ་ཡིན་ཏེ། སྔགས་དང་པོའི་དོན་ནི་ས་གཞི་རྡོ་རྗེའི་རང་བཞིན་དུ་འཆིང་བ་དང་། གཉིས་པ་ནི་རྡོ་རྗེའི་དྲ་བ། གསུམ་པ་ནི་རྡོ་རྗེའི་གུར། བཞི་པ་ནི་རྡོ་རྗེའི་བླ་རེ། ལྔ་པ་ནི་རྡོ་རྗེའི་མདའི་དྲ་བ། དྲུག་པ་ནི་རྡོ་རྗེའི་ཉི་མ་མེ་འབར་བ་སྟེ་ཧཱུཾ་དང་བཅས་པས་དེ་རྣམས་བྱིན་གྱིས་བརློབ་པ་ཡིན་པའི་ཕྱིར། བཾ་གཉིས་དང་སཾ་དང་ཁཾ་རྣམས་འབྱུང་བའི་རྒྱུ་མཚན་ཡོད་དེ། རིམ་པ་བཞིན་ར་བ་གུར་མདའ་དང་བླ་རེ་རྣམས་ཀྱི་མིང་ཡིག་དང་པོ་དང་ས་བོན་ཡིན་པའི་ཕྱིར་རོ། །གཉིས་པ་ཇི་ལྟར་བྱ་བའི་ཚུལ་ཡོད་དེ། སུམ་བྷ་ནི་སོགས་སྔགས་ཚན་བཞི་བརྗོད་དེ་ར་བའི་ཕྱོགས་བཞིར་བཀོད་ནས་དེ་ལས་སྒོམ་བཞི་དང་། ཡང་སྔགས་ཚན་གཉིས་གཉིས་མཚམས་བཞིར་བཀོད་པ་ལས་མཚམས་མ་བཞི་སྟེ་བརྒྱད་དང་། ཤར་ནུབ་ཀྱི་སྔགས་གཉིས་ལས་སྟེང་འོག་ཏུ་ཁྭ་གདོང་མ་དང་ཁྱི་མདོང་མ་གཉིས་པ་རེ་སྟེ་བཅུ། སྨད་ཕུར་བུའི་རྣམ་པར་བསྐྱེད་ཅིང་། དེའི་འོད་ཟེར་ལས་སྤྲོས་པའི་ཁྲོ་མོ་རྣམས་ཀྱིས་བགེགས་འགུག་པ་དང་ཕུར་གདབ་བྱ་བ་སོགས་ཡིན་པའི་ཕྱིར། ཧཱུཾ་བཅུ་ལས་ཁྲོན་པ་བཅུ་བསྐྱེད་པའི་ཚེ་སྟེང་འོག་གཉིས་གང་དུ་བྱ་བའི་ཚུལ་ཡོད་དེ། སྟེང་གི་དོད་ཤར་གྱི་ཤར་དང་འོག་གི་དོད་ནུབ་ཀྱི་ནུབ་ཏུ་བསྐྱེད་པ་ཡིན་པའི་ཕྱིར་རོ། །ཕུར་གདབ་ཀྱི་སྔགས་དོན་ཡོད་དེ། གྷ་གྷ་ནི་གྷ་ཏ་གྷ་ཏ་སྟེ་གསོད་བྱེད་ལ་བོད་པ་དང་། གྷཱ་ཏ་ཡ་གཉིས་ནི་ཆོམས་ཤིག་གཉིས། སརྦ་དུཥྚཾ་ནི་མ་རུངས་པ་ཐམས་ཅད། ཕཊ་ནི་གསལ་བར་བྱེད་པ། ཀཱི་ལ་ཡ་གཉིས་ནི་ཕུར་བུས་ཐོབ་ལ་མི་འགུལ་བར་གྱིས། སརྦ་པཱ་བཾ་ནི་སྡིག་པའི་བསམ་པ་ཅན་ཐམས་ཅད། ཕཊ་ནི་དགས་པ་དང་ཧཱུཾ་གསུམ་ནི་བསྐུལ་བ། བཛྲ་ཀཱི་ལ་ཡཱ་ནི་རྡོ་རྗེ་ཕུར་བུ་ཞེས་བོད་པ། བཛྲ་དྷཱ་ར་ཨཱ་ཛྙཱ་པ་ཡ་ཏི་ནི་རྡོ་རྗེ་འཆང་གི་བཀའ་ཉོན་ཅིག སརྦ་དུཥྚཱཾ་བིགྷྣན་ཀཱ་ཡ་ཝཱ་ཀྩིིཏྟཱ་བཛྲ་ཀཱི་ལ་ཡ་ནི་བགེགས་གདུག་པ་ཅན་རྣམས་ཀྱི་ལུས་ངག་ཡིད་གསུམ་ལ་ཕུར་བུས་ཐོབ་ཅིག ཧཱུཾ་དང་ཕཊ་ནི་བསྐུལ་བ་དང་གསལ་བའི་དོན་ཡིན་པའི་ཕྱིར་རོ། །བཛྲ་མུདྒ་ར་སོགས་ཀྱི་དོན་ཡང་ཡོད་དེ། རྡོ་རྗེ་ཐོ་བས་ཕུར་བུ་རྡུངས་ཤིག་ཅེས་པའི་དོན་ཡིན་པའི་ཕྱིར་རོ། །དེ་ནས་ཕུར་གདབ་སོགས་བྱ་བའི་ཚུལ་ཡོད་དེ། ཕྱོགས་གཡོན་སྐོར་དང་མཚམས་གཡས་སྐོར་དང་སྟེང་འོག་གི་བགེགས་ཀྱི་གཙོ་བོ་རྣམས་ཀྱི་སྤྱི་བོ་ནས་ཕུར་བུ་ཟུག་པ་ལ་ཁྲོ་མོ་རྣམས་ཀྱི་ཐོ་བས་བརྡུང་པས། བགེགས་ཐམས་ཅད་བདེ་སྟོང་དང་དབྱེར་མེད་ཀྱི་ངོ་བོར་གྱུར། ཁྭ་གདོངས་སོགས་ཀྱིས་བགེགས་ལྷག་མ་རྣམས་རྒྱང་རིང་དུ་བསྐྲད་ནས། རང་ཕྱོགས་ཀྱི་རྡོ་རྗེའི་ར་བ་ལ་ཐིམ་པས་ཆུ་ལས་ཆུ་བརྡབས་པས་ཟེགས་མ་ཕྱིར་འཐོར་བ་བཞིན་དུ། ར་བ་ལས་འོད་ཟེར་ཕྱིར་འཕྲོས་པས་རྡོ་རྗེ་དང་པདྨ་དང་འཁོར་ལོའི་ར་བ་ཟླུམ་པོ་གསུམ་དུམ་བུ་གཅིག་ཏུ་གྱུར་པའི་ཕྱི་རོལ་ཏུ་རྡོ་རྗེའི་མེ་གཡོན་སྐོར་དུ་འཁྱིལ་ཞིང་འབར་བས་ཕྱོགས་ཐམས་ཅད་དུ་ཁྱབ་པས་འགྲོ་བ་ཐམས་ཅད་ཀྱང་བགེགས་དང་བྲལ་བར་བསམ་པ་ཡིན་པའི་ཕྱིར། འདིར་འདོད་འཇོ་ལས། རབ་ཟླུམ་པོ་གསུམ་སྔར་གྱི་ར་བ་གྲུབ་ཞི་བ་དང་བར་མཚམས་མེད་པར་འགྱུར་བར་གསུངས་པ་ལྟར་ན། དེའི་ཚེ་ཐམས་ཅད་ཀྱང་ཟླུམ་པོར་བྱ་དགོས་བར་སེམས་ཏེ། གཞན་དུ་ན་བར་མཚམས་མེད་པར་འོང་དཀའ་བའི་ཕྱིར་རོ། །འཁོར་ལོ་དང་པད་ར་ཡང་དཔངས་མཐོ་སྟེ། རྡོར་ར་དང་མཉམ་དགོས་པའི་ཕྱིར་རོ། །བགེགས་རྣམས་བདེ་སྟོང་དབྱེར་མེད་དུ་བསྒོམ་པ་ལ་དགོས་པ་ཡོད་དེ། དེ་རྣམས་ལ་ཕན་གདགས་པའི་ཆེད་ཡིན་པའི་ཕྱིར། འདིའི་སྲུང་འཁོར་རྒྱས་པའི་སྐབས་དང་གཞུང་གཞན་ནས་ཕུར་གདབ་བྱེད་མཁན་དང་ཕུར་བུ་ཁྲོ་བོར་བསྐྱེད་པར་གསུངས་ཀྱང་། འདིར་ཁྲོ་མོས་དེ་བྱེད་པར་བཤད་པའི་དགོས་པ་ཡོད་དེ། བུད་མེད་ཀྱི་རྣམ་པས་འདུལ་དགོས་པ་ལ་ཁྲོ་བོ་རྣམས་ལྷ་མོའི་རྣམས་པར་བསྟན་ནས་སྣ་ཚོགས་པའི་ཐབས་ཀྱིས་སེམས་ཅན་གྱི་དོན་མཛད་པར་བཤད་པ་བཞིན་ཡིན་པའི་ཕྱིར། སྲུང་འཁོར་བསྒོམ་པ་ལ་དགོས་པ་ཡོད་དེ། འགལ་རྐྱེན་བར་ཆད་ཀྱིས་མི་ཚུགས་པའི་ཆེད་ཡིན་པའི་ཕྱིར། སེམས་ཅན་ཐམས་ཅད་བགེགས་དང་བྲལ་བར་བསམ་པ་ལ་དགོས་པ་ཡོད་དེ། ཐེག་ཆེན་ཐུན་མོང་མ་ཡིན་པའི་སྲུང་འཁོར་དུ་འགྱུར་བའི་ཆེད་ཡིན་པའི་ཕྱིར། འོ་ན་འདིར་བཤད་པའི་འབྲིང་པོ་དེ་ཁོ་ན་ལྟར་བསྒོམ་པར་བྱ འམ་ཞེ་ན། དེར་མ་ངེས་ཏེ་སྲུང་འཁོར་རྒྱས་འབྲིིང་བསྡུས་གསུམ་གྱི་རྣམ་གཞག་ཤེས་ནས་ལཱུ་དྲིལ་ནག་གསུམ་གྱི་སྐབས་སུའང་། རྒྱས་འབྲིང་བསྡུས་གསུམ་གང་བསྒོམས་ཀྱང་མི་འགལ་བར་བཤད་པ་ལྟར་ཡིན་པའི་ཕྱིར་རོ། །བཞི་པ་ཚོགས་གསོག་པ་ལ་གཉིས། སྦྱང་གཞི་འཛམ་བུ་གླིང་པའི་མི་མངལ་སྐྱེས་ཁམས་དྲུག་ལྡན་དུ་སྐྱེ་བ་ལེན་པའི་རྒྱུར་སྐྱེས་ནས་མྱོང་འགྱུར་གྱིས་ལས་གསོག་པ་དང་ཆོས་མཐུན་བར་བསོད་ནམས་ཀྱི་ཚོགས་བསགས་པ་དང་། དེའི་འོག་ཏུ་འཆི་བ་འོད་གསལ་མངོན་དུ་བྱས་པ་དང་ཆོས་མཐུན་པར་འཆི་བ་ཆོས་སྐུར་འ ཁྱེར་བའི་ལམ་འཁྱེར་ཡེ་ཤེས་ཀྱི་ཚོགས་བསགས་པའོ། །དང་པོ་ལ་གཉིས། ལྷ་སྤྱན་འདྲེན་པ་དང་། མཆོད་པའོ། །དང་པོ་ཇི་ལྟར་བྱ་བའི་ཚུལ་ཡོད་དེ། སྲུང་འཁོར་གྱི་དབུས་སུ་རང་ཉིད་ཧེ་རུ་ཀར་གསལ་པའི་ཐུགས་དཀར་བཾ་སེར་པོ་ལས་བྱུང་བའི་སྣ་ཚོགས་པདྨའི་ལྟེ་བར་ལྭ་བ་པ་སོགས་ཀྱིས་བཤད་པ་ལྟར་ཨཾ་ལས་བྱུང་བའི་ཟླ་བའི་སྟེང་དུ་ཧཱུཾ་ཡིག་དངུལ་ཆུའི་མདོག་ཅན་ཡེ་ཤེས་ལྔའི་རང་བཞིན་ཅན་གྱི་འོད་ཟེར་གྱིས་སྒོ་གསུམ་གྱི་དྲི་མ་དག་པར་བྱས་ཏེ་ཕྱིར་འཕྲོས་པའི་འོད་ཟེར་གྱིས་ཚོགས་ཞིང་རྣམས་སྤྱན་འདྲེན་པ་ཡིན་པའི་ཕྱིར། ཧཱུཾ་གིས་ཡེ་ཤེས་ལྔ་མཚོན་ཚུལ་ཡོད་དེ། ཨ་བྷྱས། ཨུས་དོན་གྲུབ། ཧས་སྣང་མཐའ། མགོ་བོས་རིན་འབྱུང་། ཟླ་ཚེས་ཀྱིས་རྣམ་སྣང་། ཐིག་ལེ་ནཱ་ད་དང་བཅས་པས་མི་བསྐྱོད་པ་མཚོན་པར་བཤད་པའི་ཤུགས་ཀྱིས་ཡེ་ཤེས་ལྔ་མཚོན་ཚུལ་ཡང་གོ་བའི་ཕྱིར་རོ། །ཚོགས་ཞིང་གནས་གང་ནས་སྤྱན་འདྲེན་པའི་ཚུལ་ཡོད་དེ། བདེ་སྟོང་དབྱེར་མེད་ཀྱི་ཆོས་སྐུ་ལ་རང་བཞིན་གྱིས་གནས་སུ་བྱས་ནས་གཟུགས་སྐུའི་རྣམ་པར་སྤྱན་འདྲེན་པ་དང་། དང་པོར་ལོངས་སྐུར་སངས་རྒྱས་པའི་རང་བཞིན་གྱི་གནས་ནས་སྤྲུལ་སྐུའི་རྣམ་པར་སྤྱན་འདྲེན་པ་དང་འོག་མིན་ནས་སྤྱན་འདྲེན་པ་རྣམས་ལས་འདིར་ཕྱི་མ་གཉིས་ལྟར་བྱ་བ་ཡིན་པའི་ཕྱིར། གང་གི་རྣམ་པར་སྤྱན་འདྲེན་པའི་ཚུལ་ཡོད་དེ། སངས་རྒྱས་བྱང་སེམས་སྤྱིའི་དབང་དུ་མཛད་པ་དང་། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་དང་། གཙོ་བོའི་རིགས་བདག་གི་ཚུལ་དང་། དཀྱིལ་འཁོར་པའི་ལྷ་ཚོགས་རྣམས་དང་དབྱེར་མེད་ཀྱི་ཚུལ་དང་། བླ་མ་དུར་ཁྲོད་ན་བཞུགས་པའི་རྣམ་པར་སྤྱན་འདྲེན་པ་སོགས་དུ་མ་ཡོད་པ་ལས་འདིར་བླ་མ་དང་དཀྱིལ་འཁོར་པའི་ལྷ་ཚོགས་ཐ་དད་པའི་ཚུལ་གྱིས་སྤྱན་འདྲེན་ཞིང་། དེ་ཡང་བླ་མ་རྡོ་རྗེ་འཆང་གི་རྣམ་པ་ཅན་དང་། ཚོགས་ཞིང་གཞན་རྣམས་བསྒོམ་པར་འགྱུར་བའི་འཁོར་ལོ་སྡོམ་པའི་ལྷ་ཚོགས་འཁོར་བཅས་ཀྱི་རྣམ་པར་སྤྱན་འདྲེན་པ་ཡིན་པའི་ཕྱིར། སྤྱིར་གནས་གང་ནས་དང་རྣམ་པ་གང་གིས་སྤྱན་འདྲེན་པ་ནི་གོང་དུ་བཤད་པ་དེ་རྣམས་གང་བྱས་ཀྱང་ཁྱད་པར་ཤེས་ན་མི་འགལ་ཏེ། ཚད་ལྡན་དུ་མས་བཤད་པའི་ཕྱིར་རོ། །གཉིས་པ་ལ་གསུམ་གྱི་དང་པོ་ཕྱག་འཚལ་བའི་ཚུལ་ཡོད་དེ། གང་གི་དྲིན་གྱིས་ཞེས་སོགས་ཀྱིས་བླ་མ་དང་། ཧེ་རུ་ཀ་དཔལ་ཞེས་སོགས་ཀྱིས་གཙོ་བོ་ཡབ་ཡུམ་དང་། གནས་དང་ཉེ་བའི་ཞེས་སོགས་ཀྱིས་འཁོར་རྣམས་ལ་ཕྱག་འཚལ་བ་ཡིན་པའི་ཕྱིར་རོ། །གཉིས་པ་ཡོད་དེ། ཐུགས་ཀ་ནས་མཆོད་པའི་ལྷ་མོ་རྣམས་སྤྲུལ་ཏེ་ཤྲཱི་ཧེ་རུ་ཀ་ཨརྒྷཾ་སོགས་ཀྱི་སྔགས་བརྗོད་དེ་མཆོད་ནས་སླར་བསྡུ་བ་ཡིན་པའི་ཕྱིར། ཨརྒྷཾ་ནས་ཤཔྟའི་བར་གྱི་སྔགས་དོན་ཡོད་དེ། མཆོད་ཡོན་ནས་རོལ་མོའི་བར་གྱི་མིང་ཡིན་པའི་ཕྱིར། བཛྲ་ཝི་ནི་ཞེས་སོགས་ཀྱི་དོན་ཡོད་དེ། རྡོ་རྗེ་པི་ཝང་མ་གླིང་བུ་མ་རྔ་ཟླུམ་མ་རྫ་རྔ་མ་དང་། རྡོ་རྗེ་བཞད་མ་སྒེག་མོ་གླུ་མ་གར་མ་དང་། རྡོ་རྗེ་མེ་ཏོག་འདུག་སྤོས་མར་མེ་དྲི་ཆབ་མ་དང་། གཟུགས་རོ་རེག་བྱ་ཆོས་དབྱིངས་རྡོ་རྗེ་མ་ཞེས་པའི་དོན་ཡིན་པའི་ཕྱིར། གསུམ་པ་ཡོད་དེ། བཅོམ་ལྡན་དཔའ་བོ་དབང་ཕྱུག་ཞེས་སོགས་རྐང་བརྒྱད་ཀྱིས་བསྟོད་ཅིང་། དཀོན་མཆོག་གསུམ་ལ་ཞེས་སོགས་ཀྱིས་སྐྱབས་འགྲོ་སྡིག་བཤགས་ཡི་རང་སེམས་བསྐྱེད་ཅིང་ལམ་ལ་བརྟེན་པར་དམ་འཆའ་བ་ལུས་འབུལ་དང་བཅས་པ་རྣམས་བྱ་བ་ཡིན་པའི་ཕྱིར། རྐང་བརྒྱད་ཀྱི་འགོར་ༀ་དང་མཐར་ཧཱུཾ་ཧཱུཾ་ཕཊ་འབྱུང་བའི་རྒྱུ་མཚན་ཡོད་དེ། དེ་ནི་རྒྱ་སྐད་ལ་ༀ་ན་མོ་བྷ་ག་ཝ་ཏེ་ཝི་རེ་ཤཱ་ཡ་ཧཱུཾ་ཧཱུཾ་ཕཊ་ཞེས་སོགས་འབྱུང་བའི་འགོ་མཇུག་གཉིས་རང་སོར་བཞག་པ་ཡིན་པའི་ཕྱིར། མཐར་ཚོགས་ཞིང་རྣམས་ཇི་ལྟར་བྱ་བའི་ཚུལ་ཡོད་དེ། རང་གནས་སུ་གཤེགས་པ་དང་མི་དམིགས་པར་བསམ་པ་དང་། རང་ལ་སྡུད་པ་རྣམས་ལས། འདིར་ཡིག་བརྒྱ་བརྗོད་པའི་རྗེས་སུ་ཕྱི་མ་ལྟར་བྱ་བ་ཡིན་པའི་ཕྱིར། དེ་ལྟར་བྱས་པ་ལ་དགོས་པ་ཡོད་དེ། བྱིན་གྱིས་བརླབ་པའི་ཆེད་ཡིན་པའི་ཕྱིར། གང་དུ་ཐིམ་པར་བསམ་པའི་ཚུལ་ཡོད་དེ། སྨིན་མཚམས་སམ་སྙིང་གར་ཐིམ་པར་བསམ་པ་ཡིན་པའི་ཕྱིར། ཚོགས་ཞིང་མཆོད་པ་ལ་དགོས་པ་ཡོད་དེ། བསོད་ནམས་ཀྱི་ཚོགས་རྫོགས་པར་འགྱུར་བའི་ཆེད་ཡིན་པའི་ཕྱིར་རོ། །དག་པ་གསུམ་གྱི་རྣལ་འབྱོར་ནས་འདིའི་བར་རྗེའི་སྨོན་ལམ་ནས་བསྟན་ཚུལ་ཡོད་དེ། སྒོ་གསུམ་སྤྱོད་པ་དཔལ་ལྡན་ཧེ་རུ་ཀའི། །སྐུ་གསུང་ཐུགས་ཀྱི་དག་བྱེད་ལྷ་རྣམས་ཀྱི། །བྱིན་གྱིས་བརླབས་པས་བགེགས་ཀུན་བཟློག་པ་དང་། རླབས་ཆེན་བསོད་ནམས་ཚོགས་ནི་རྫོགས་པར་ཤོག །ཅེས་པས་བསྟན་པའི་ཕྱིར་རོ། །གཉིས་པ་ཡེ་ཤེས་ཀྱི་ཚོགས་གསོག་པ་ལ་གཉིས། དངོས་དང་ཆོས་མཐུན་སྦྱོར་ཚུལ་བཤད་པའོ། །དང་པོ་ཇི་ལྟར་བསྒོམ་པའི་ཚུལ་ཡོད་དེ། སྔར་བཤད་པའི་མཆོད་ཡུལ་ལྷ་དང་། མཆོད་མཁན་རང་དང་། མཆོད་བྱ་རྫས་ཀྱི་འཁོར་གསུམ་དོན་དམ་པར་མ་གྲུབ་པས། རྣམ་པར་རིག་པའི་སེམས་སམ་རྟོག་པས་བཏགས་པ་ཙམ་དུ་བལྟ་ཞིང་། རང་གི་གནས་གསུམ་དུ་ཧེ་རུ་ཀ་ཞེས་པའི་ཡི་གེ་གསུམ་རིམ་པར་བཀོད་ནས་དེས་མཚོན་པའི་ཆོས་ཐམས་ཅད་རང་བཞིན་གྱིས་མེད་ཀྱང་ཐ་སྙད་ཙམ་དུ་བྱ་བྱེད་འཐད་པའི་སྣང་སྟོང་ཟུང་དུ་འཇུག་པ་སྒྱུ་མ་ལྟ་བུའོ་སྙམ་དུ་བསྒོམ་པར་བྱ་བ་སོགས་ཡིན་པའི་ཕྱིར། དེ་ལྟར་ཡིན་ཀྱང་དེ་མ་རྟོགས་པའི་སེམས་ཅན་རྣམས་འཁོར་བའི་སྡུག་བསྔལ་ལས་བདག་གིས་ཐར་བར་བྱའོ་སྙམ་དུ་ཆོས་ལ་དམིགས་པའི་སྙིང་རྗེ་ཆེན་པོ་བསྒོམས་ནས་རྟེན་འབྲེལ་གྱི་སྣང་བ་ཙམ་དེ་ཡང་སྡུད་པ་ཡིན་ཏེ། ༀ་སྭཱ་བྷཱ་ཞེས་སོགས་ཀྱི་དོན་བསམ་པའི་སྒོ་ནས་ཁམས་གསུམ་པོ་རང་བཞིན་གྱིས་སྟོང་པར་བསྒོམ་དགོས་པའི་ཕྱིར། སྔགས་འདིའི་ཚིག་དོན་ནི་སྔར་བཤད་ཟིན་པ་ལྟར་ཡིན་ཏེ། གཟུང་འཛིན་གྱིས་བསྡུས་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཚུལ་དེ་ཉིད་བསྒོམ་པར་སྟོན་པའི་སྐབས་ཡིན་པའི་ཕྱིར། དེ་ནས་ཇི་ལྟར་བྱ་བའི་ཚུལ་ཡོད་དེ་ཧེ་རུ་ཀ་ཞེས་པའི་ཡི་གེ་གསུམ་ཡོངས་སུ་གྱུར་པ་ལས། སྨོན་ལམ་གྱི་དབང་གིས་ༀ་ཨཱཿཧཱུཾ་གསུམ་སྟེང་ནས་སྟེང་དུ་བརྩེགས་པ་ལས་སྐུ་གསུང་ཐུགས་ཀྱི་ལྷ་ཚོགས་རྣམས་སྤྲོས་ཏེ། མཐོ་རིས་སོགས་འཁོར་ལོ་གསུམ་གྱི་ལྷའི་ངོ་བོར་བྱས་ནས་དེ་རྣམས་སྙོམས་པར་འཇུག་པ་སྔོན་དུ་འགྲོ་བས་ཡི་གེ་གསུམ་ལ་ཐིམ། ཡི་གེ་གསུམ་རིམ་གྱིས་ཐིམ་པའི་མཐའ་ཧཱུཾ་གི་ནཱ་ད་ཡང་སྐྲའི་རྩེ་མོ་བརྒྱ་སྟོང་བཤགས་པའི་ཚད་ཙམ་དུ་གནས་པར་བསམས་ལ། སེམས་ཅན་ཐམས་ཅད་ཀྱིས་ཆོས་ཉིད་མ་རྟོགས་པས་བདག་གིས་དེ་རྟོགས་པར་བྱས་ནས་སེམས་ཅན་ཐམས་ཅད་འཁོར་བའི་སྡུག་བསྔལ་ལས་ཐར་བར་བྱའི་སྙམ་དུ་དམིགས་མེད་ཀྱི་སྙིང་རྗེ་ཆེན་པོ་བསྒོམས་ནས་ཤཱུནྱ་ཏའི་སྔགས་བརྗོད་དེ་ནཱ་ད་ཡང་འོད་གསལ་དུ་ཞུགས་པར་བསྒོམ་པ་ཡིན་པའི་ཕྱིར། ཤཱུནྱ་ཏའི་སྔགས་དོན་ཡང་ཡོད་དེ། ཤཱུནྱ་ཏ་ནི་སྟོང་པ་ཉིད། ཛྙཱ་ན་ནི་ཡེ་ཤེས། བཛྲ་ནི་རྡོ་རྗེ་སྟེ་མི་ཕྱེད་པ། སྭཱ་བྷཱ་ཝ་ནི་རང་བཞིན། ཨཏྨ་ཀ་ནི་བདག་ཉིད། ཨ་ཧཾ་ནི་ངའོ་ཞེས་པ་ཡིན་ལ། མདོར་ན་ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོའི་ཡེ་ཤེས་དབྱེར་མི་ཕྱེད་པའི་བདག་ཉིད་དེ་ངའོ་སྙམ་དུ་རྒྱལ་པའི་ཐུགས་ཆོས་སྐུ་ལ་ང་རྒྱལ་བཞག་ནས་བསྒོམ་པར་བྱ་བའི་དོན་ཡིན་པའི་ཕྱིར་རོ། །ལས་དང་པོ་པའི་སྐབས་སུ་སྣང་ངོར་གཉིས་སྣང་ཕྲ་མོ་ཁེགས་པ་མི་འོང་ཡང་མོས་པ་ཡིད་བྱེད་ཀྱིས་ཁེགས་པར་བསམ་དགོས་པ་ཡིན་ཏེ། ནཱ་ད་ཕྲ་མོའི་སྣང་བ་སྡུད་བའི་རྒྱུ་མཚན་ནི་ཀུན་རྫོབ་ཀྱི་སྣང་བ་ཕྲ་མོ་ཡང་སྡུད་པའི་དོན་ཡིན་པའི་ཕྱིར་རོ། །འདིར་དམིགས་མེད་ཀྱི་སྙིང་རྗེ་བསྒོམ་པར་གསུངས་པ་ནི་སྤྱི་དོན་གྱི་སྙིང་རྗེ་ཡིན་ཏེ། སྤྱིར་སྙིང་རྗེ་ལ་ཐུན་མོང་བ་དང་ཐུན་མོང་མ་ཡིན་པ་གཉིས་ཡོད་ཀྱང་། འདིར་སྔ་མ་ཡིན་ལ། མོས་པ་ཙམ་གྱིས་སྦྱོང་བ་ལ་ནི་སྦས་དོན་དང་མཐར་ཐུག་གི་སྙིང་རྗེ་ཡང་ཡོད་པར་འདོད་འཇོ་ལས་བཤད་པའི་ཕྱིར། ཐུན་མོང་མ་ཡིན་པའི་སྙིང་རྗེ་ཡང་ཡོད་དེ། བླ་མེད་ཀྱི་སྐབས་སུ་བདེ་ཆེན་གྱི་ཡེ་ཤེས་ལ་སྙིང་རྗེར་བཤད་པ་ཡོད་པའི་ཕྱིར་རོ། །གཉིས་པ་ལ་གཉིས། དགོས་པ་དང་། ཆོས་མཐུན་སྦྱོར་ཚུལ་དངོས་སོ། །དང་པོ་ནི། འདིར་སྟོང་ཉིད་བསྒོམ་པ་ལ་དགོས་པ་ཡོད་དེ། སྟོང་ཉིད་གསར་དུ་རྟོགས་པ་དང་། དྲན་པ་གསོ་བ་དང་། རྟོགས་ཟིན་བརྟན་པ་དང་། ཡེ་ཤེས་ཀྱི་ཚོགས་བསག་པ་དང་། ཐ་མལ་གྱི་སྣང་ཞེན་སྦྱོང་བ་དང་། བསྒོམ་བྱའི་རྟེན་བརྟེན་པ་རྣམས་སྟོང་ཉིད་རྟོགས་པའི་ཡེ་ཤེས་ཀྱི་རྣམ་རོལ་དུ་འཆར་བ་དང་། བདེན་འཛིན་སྤོང་བ་དང་། སྲུང་བའི་མཆོག་ཏུ་འགྱུར་བ་སོགས་ཀྱི་དགོས་པ་ཡོད་པའི་ཕྱིར། གཉིས་པ་ཤཱུ ནྱ་ཏའི་སྔགས་དོན་ལྟར་སྟོང་ཉིད་བསྒོམ་ཚུལ་འདི་ལ་འཆི་བ་ཆོས་སྐུར་འཁྱེར་པའི་རྣལ་འབྱོར་ཞེས་བྱ་སྟེ། སྦྱང་གཞི་འཛམ་བུའི་གླིང་པའི་མི་མངལ་སྐྱེས་ཁམས་དྲུག་ལྡན་ཞིག་ཕུང་སོགས་རིམ་གྱིས་ཐིམ་ནས་འཆི་བ་འོད་གསལ་མངོན་དུ་བྱེད་པ་དང་རྣམ་པའམ་ཆོས་མཐུན་ཞིང་། རྣལ་འབྱོར་པ་རང་ཉིད་ལ་འབྱུང་འགྱུར་གྱི་འཆི་བ་སྦྱོང་བར་བྱེད། ལམ་རྫོགས་རིམ་གྱིི་སྐབས་སུ་དཔེ་དང་དོན་གྱི་འོད་གསལ་དང་རྣམ་པ་མཐུན་ཞིང་། དེ་འདྲ་བའི་རྟོགས་པ་རྒྱུད་ལ་སྐྱེ་བའི་དགེ་རྩ་སྨིན་བྱེད་ཁྱད་པར་ཅན་དུ་འགྱུར། འབྲས་བུའི་སྐབས་སུ་རྒྱལ་བའི་ཐུགས་ཆོས་སྐུ་དང་རྣམ་པ་མཐུན་ཞིང་། ད་ལྟ་ནས་ཀྱང་འབྲས་བུ་ལམ་བྱེད་ཀྱི་ཚུལ་དུ་ང་རྒྱལ་བཞག་ནས་བསྒོམས་པས། དེ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག་པའི་ཕྱིར་རོ། །དེ་ལྟར་བསྒོམ་པ་དེ་སྦྱང་གཞི་ལ་འཆི་བ་འོད་གསལ་མངོན་དུ་བྱས་པ་དང་ཆོས་མཐུན་པ་ཡང་ཡིན་ཏེ། ༀ་དཀར་པོ་ནི་འཆི་བ་འོད་གསལ་དུ་འཇུག་པའི་སྣང་བ་དཀར་ལམ་པ་དང་ཆོས་མཐུན། དེ་ཨཱཿདམར་པོ་ལ་ཐིམ་པ་ནི་སྣང་དེ་མཆེད་པ་དམར་ལམ་པ་ལ་ཐིམ་པ་དང་ཆོས་མཐུན། དེ་ཧཱུཾ་སྔོན་པོ་ལ་ཐིམ་པ་ནི་མཆེད་པ་དེ་ཉེར་ཐོབ་ནག་ལམ་པར་ཐིམ་པ་དང་ཆོས་མཐུན། ཧཱུཾ་ཡིག་ནཱ་ད་དང་བཅས་པ་སྟོང་པར་ཐིམ་པ་ནི་ཉེར་ཐོབ་འོད་གསལ་དུ་ཐིམ་པ་དང་ཆོས་སམ་རྣམ་པ་མཐུན་པའི་ཕྱིར་རོ། །གཉིས་པ་ཐུན་གྱི་དངོས་གཞི་ལ་ཇི་ལྟར་བྱ་བ་ལ་གསུམ། བར་དོ་ལོངས་སྐུར་འཁྱེར་བའི་རྣལ་འབྱོར་བཤད་པ། གཞལ་ཡས་ཁང་གང་ལ་གནས་པའི་རྟེན་བསྐྱེད་པ། རྣལ་འབྱོར་བཞི་བསྒོམ་པའི་ཚུལ་ལོ། །དང་པོ་ལ་གཉིས། དངོས་དང་ཆོས་མཐུན་སྦྱོར་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། དེ་ལྟར་སྣང་བ་ཐམས་ཅད་བསྡུས་པའི་སྟོང་པ་ཉིད་ཀྱི་ངང་ལས་རང་གི་སེམས་གཉིས་སུ་མེད་པའི་ཡེ་ཤེས་དེ་ཉིད་ནམ་མཁར་ནཱ་དའི་གཟུགས་གྱེན་དུ་བགྲེང་བ་ཤིན་ཏུ་ཕྲ་བ་དཀར་ལ་དམར་བའི་མདངས་ཆགས་པའི་རྣམ་པར་བཞག་པར་བྱ་བ་ཡིན་པའི་ཕྱིར་རོ། །གཉིས་པ་ལ། དེ་ལྟར་བསྒོམ་པའི་ཚུལ་འདི་ལ་བར་དོ་ལོངས་སྐུར་འཁྱེར་བའི་རྣལ་འབྱོར་ཞེས་བྱ་སྟེ། སྦྱང་གཞི་ལ་འཆི་བ་འོད་གསལ་ལས་བར་དོའི་ལུས་འགྲུབ་པ་དང་རྣམ་པ་མཐུན་ཞིང་དེ་སྦྱོང་བར་བྱེད། རིམ་པ་གཉིས་པའི་སྐབས་སུ་དག་མ་དག་གི་སྒྱུ་མའི་སྐུ་གཉིས་དང་རྣམ་པ་མཐུན་ཞིང་དེ་འདྲ་བའི་རྫོགས་རིམ་གྱི་རྟོགས་པ་རྒྱུད་ལ་སྐྱེ་བའི་དགེ་རྩ་སྨིན་བྱེད་ཁྱད་པར་ཅན་དུ་འགྱུར། འབྲས་བུའི་སྐབས་སུ་ལོངས་སྤྱོད་རྫོགས་པའི་སྐུ་དང་རྣམ་པ་མཐུན་ཞིང་། ད་ལྟ་ནས་ཀྱང་འབྲས་བུ་ལམ་བྱེད་ཀྱི་ཚུལ་དུ་བྱས་ནས་བསྒོམས་པས་ལོངས་སྐུ་དེ་མྱུར་དུ་འགྲུབ་པར་བྱེད་པའི་བག་ཆགས་ཁྱད་པར་ཅན་འཇོག་པའི་ཕྱིར་རོ། །སྟོང་ཉིད་ལས་ལངས་མ་ཐག་ཏུ་ནཱ་ད་ནམ་མཁར་བཞག་དགོས་པ་ཡིན་ཏེ། གཞི་ལ་འཆི་བ་འོད་གསལ་ལས་ལངས་མ་ཐག་བར་དོ་འགྲུབ་པ་དང་། ལམ་དུས་སུ་དཔེ་དོན་གྱི་འོད་གསལ་ལས་ལངས་མ་ཐག་དག་མ་དག་གི་སྒྱུ་མའི་སྐུ་གཉིས་འགྲུབ་པ་དང་ཆོས་མཐུན་པར་བསྒོམ་པ་ཡིན་པའི་ཕྱིར་རོ། །ནཱ་ད་དཀར་བའི་མདངས་ཅན་དུ་བྱས་པ་ལ་དགོས་པ་ཡོད་དེ། བར་དོ་དང་ལམ་དང་འབྲལ་བུའི་སྒྱུ་ལུས་ཀྱི་སྒྲུབ་གཞི་སྲོག་འཛིན་གྱི་རླུང་ཁ་དོག་དཀར་པོ་ཡིན་པ་དེ་མཚོན་པའི་ཕྱིར། དམར་པོའི་མདངས་ཅན་དུ་བྱས་པ་ལ་དགོས་པ་ཡོད་དེ། གཞི་ལ་བར་དོ་དེ་ཉིད་ཆགས་པས་བཅིངས་པ་དང་། ལམ་དུས་ཀྱི་སྒྱུ་ལུས་པའི་ཐུགས་བདེ་ཆེན་གྱིས་བཅིངས་པ་དེ་མཚོན་པའི་ཕྱིར། འདུས་པ་དང་འཇིགས་བྱེད་སོགས་ལ་བར་དོའི་མཚོན་བྱེད་ལྷའི་རྣམ་པ་ཅན་དུ་བསྒོམ་པ་ཡོད་ཀྱང་འདིར་དེའི་མཚོན་བྱེད་ནཱ་དའི་གཟུགས་སུ་བསྒོམ་པའི་རྒྱུ་མཚན་ཡོད་དེ། སྦྱང་གཞི་བར་རོའི་སེམས་ཅན་ལུས་ཀྱི་དབྱིབས་ཚད་སོགས་མི་འདྲ་བ་དུ་མ་འབྱུང་བས་དེ་མཚོན་པའི་ཆེད་དུ་དེ་ལྟར་དུ་བསམ་པ་ཡིན་པའི་ཕྱིར་རོ། །ནཱ་ད་སུམ་འཁྱོག་ཏུ་བསྒོམ་པར་བཤད་པ་ལྟར་ན་མཚོན་ཚུལ་ཡོད་དེ། བར་དོའི་ལུས་ངག་ཡིད་གསུམ་མཚོན་པའི་ཕྱིར། མདོར་ན་འདིར་ནཱ་ད་ནམ་མཁར་འཇོག་པའི་རྒྱུ་མཚན་ཡོད་དེ། སྦྱང་གཞི་ཐ་མལ་གྱི་བར་དོ་མཚོན་པའི་སྒོ་ནས་དེ་སྦྱོང་ཞིང་ལམ་འབྲས་ཀྱི་སྒྱུ་མའི་སྐུ་འགྲུབ་པའི་རྒྱུ་བྱེད་པའི་ཕྱིར་རོ། །གཉིས་པ་ལ་གཉིས། འབྱུང་བ་རིམ་བ རྩེགས་དང་རི་རབ་བསྐྱེད་ཚུལ། སྣ་ཚོགས་པདྨ་རྡོ་རྗེ་དང་བཅས་པ་བསྐྱེད་ཚུལ་ལོ། །དང་པོ་ལ་འབྱུང་བཞི་ཇི་ལྟར་བསྐྱེད་པའི་ཚུལ་ཡོད་དེ། རྩ་རྒྱུད་ལས། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་དང་། བ་ལང་གནས་དང་སྟེང་ལྡིང་བ། །ལྷག་མ་རྩ་བསྐམས་དེ་ནས་ནི། །དུང་ཆེན་པོ་ཡི་རང་བཞིན་བྱ། །ཡང་ན་རུས་སྦལ་དག་གིའོ། །ཞེས་གསུངས་པའི་ཕྱི་མས་སོ་སོར་བསྟན་པ་ལྟར་བསྐྱེད་པ་ཡིན་པའི་ཕྱིར། དེའི་དོན་ཡང་ཡོད་དེ། བ་ལང་གནས་ནི་ས་དཀྱིལ་དང་། སྟེང་ལྡིང་ནི་ཆུ་དཀྱིལ་དང་། ལྷག་མ་བསྐམས་ནི་མེ་དཀྱིལ་དང་། རྩ་ཞེས་པ་ནི་རླུང་དཀྱིལ་དང་། རུས་སྦལ་ཞེས་པའི་ནི་རི་རབ་བསྒོམ་པར་བསྟན་པ་ཡིན་པའི་ཕྱིར། དེ་ཡང་རླུང་དཀྱིལ་ནས་རིམ་བརྩེགས་སུ་བསྐྱེད་པ་ཡིན་ཏེ། སྟོང་པའི་ངང་ལས་ས་བོན་ཡཾ་རཾ་བཾ་ལཾ་སུཾ་རྣམས་ལས་འབྱུང་བཞི་དང་རི་རབ་རྣམས་སྒྲུབ་ཐབས་སུ་བཤད་པ་ལྟར་རིམ་གྱིས་བསྐྱེད་པ་ཡིན་པའི་ཕྱིར། འབྱུང་བཞིའི་ཁ་དོག་ནི་གསལ་བ་ལྟར་ཡིན་ལ། རི་རབ་ཀྱི་ཁ་དོག་ཇི་ལྟར་བསྒོམ་པའི་ཚུལ་ཡོད་དེ། ཤར་ཤེལ། ལྷོ་བཻ་ཌཱུརྱ། ནུབ་པདྨ་རཱ་ག བྱང་གསེར་གྱི་མདོག་ཏུ་བྱ་བ་སྡོམ་འགྱུར་སོགས་ནས་བཤད་པ་ལྟར་ཡིན་པའི་ཕྱིར། ལྕོག་བརྒྱད་བསྒོམ་ཚུལ་ཡང་ཡོད་དེ། སྟེང་གི་ཕྱོགས་མཚམས་བརྒྱད་དུ་རི་གྲུ་བཞི་པའི་རྣམ་པ་ཅན་ཇི་ལྟར་འཚམ་པ་བརྒྱད་བསྒོམ་པ་ཡིན་པའི་ཕྱིར། དེ་རྣམས་བསྒོམ་པ་ལ་དགོས་པ་ཡོད་དེ། ཕྱི་དཀྱིས་དང་ལུས་དཀྱིལ་གྱི་རྟེན་གྱི་དོན་དུ་དང་། རྫོགས་རིམ་གྱི་སྐབས་སུ་རྡོ་རྗེའི་ལུས་ཀྱི་གནས་ལུགས་རྟོགས་པའི་ཆེད་ཡིན་པའི་ཕྱིར་རོ། །གཉིས་པ་ཇི་ལྟར་བསྒོམ་པའི་ཚུལ་ཡོད་དེ། རི་རབ་ཀྱི་སྟེང་གི་དབུས་སུ་པཾ་སེར་པོ་ལས་སྣ་ཚོགས་པདྨ་དང་། དེའི་ལྟེ་བར་ཧཱུཾ་ལས་སྣ་ཚོགས་རྡོ་རྗེ། དེའི་སྟེང་དུ་ལྟེ་བ་དང་ཚད་མཉམ་པའི་སྣ་ཚོགས་པདྨ་འདབ་མ་བརྒྱད་པ་ཞིག་ཀྱང་བསྒོམ་པར་བྱ་བ་ཡིན་པའི་ཕྱིར་རོ། །གསུམ་པ་རྣལ་འབྱོར་བཞི་བསྒོམ་པའི་ཚུལ་ལ་གཉིས། སྤྱིའི་རྣམ་གཞག་དང་། བསྒོམ་ཚུལ་དངོས་སོ། །དང་པོ་ནི། སྤྱིར་བདེ་མཆོག་གི་སྐབས་འདིར་རྟེན་བརྟེན་པའི་དཀྱིལ་འཁོར་བསྐྱེད་པའི་ཚུལ་ལ་མི་འདྲ་བ་དུ་མ་ཞིག་འབྱུང་བ་ཡིན་ཏེ། སྡོམ་འབྱུང་ལས་རྟེན་བརྟེན་པ་གཉིས་ཅིག་ཅར་བསྐྱེད་པའི་རྣམ་གཞག་དང་། བཤད་རྒྱུད་མངོན་བརྗོད་དང་སཾ་བྷུ་ཊི་ནས་རིམ་ཅན་དུ་བསྐྱེད་པར་བཤད་པ་ལྟར། གྲུབ་ཆེན་ནག་པོ་སྤྱོད་པས་ཕྱི་མ་གཉིས་ཀྱི་རྗེས་སུ་འབྲང་ནས་རིམ་ཅན་དུ་བསྐྱེད་ལ། ལཱུ་ཧི་པས་ནི་སྔ་མའི་རྗེས་སུ་འབྲང་ནས་ཅིག་ཅར་དུ་བསྐྱེད་པའི་ཚུལ་གཉིས་ལས། སྤྱིར་དེ་གང་བྱས་ཀྱང་མི་འགལ་ཡང་འདིར་ལཱུ་ཧི་པའི་ལུགས་ལྟར་བྱ་བ་ཡིན་པའི་ཕྱིར། ལཱུ་ཧི་པའི་ལུགས་འདི་སྒོང་སྐྱེས་སྦྱོང་བ་ལ་མཆོས་མཐུན་སྦྱར་དུ་ཡོད་ཀྱང་གཙོ་བོ་མངལ་སྐྱེས་སྦྱོང་བ་ལ་སྦྱར་དགོས་ཏེ། སྡོམ་འབྱུང་ལས་དེ་ལྟར་བཤད་པའི་ཕྱིར་རོ། །གཉིས་པ་ལ་བཞི། བར་དོ་གང་དུ་སྐྱེ་བ་ལེན་པའི་ཁུ་བྲག་གི་ཐིག་ལེ་དང་རྣམ་པ་མཐུན་པར་བསྒོམ་པ་རྣལ་འབྱོར་དང་། ཁུ་ཁྲག་གི་དབུས་སུ་ཉིང་མཚམས་སྦྱར་ནས་ལུས་འཕེལ་བ་དང་རྣམ་པ་མཐུན་པར་བསྒོམ་པ་རྗེས་སུ་རྣལ་འབྱོར་དང་། ཕྱིར་བཙས་པ་དང་རྣམ་པ་མཐུན་པར་བསྒོམ་པ་སྐྱེ་བ་སྤྲུལ་སྐུའི་ལམ་འཁྱེར་ཤིན་ཏུ་རྣལ་འབྱོར་དང་། རྫོགས་རིམ་རྣལ་འབྱོར་ཆེན་པོ་བསྒོམ་པའི་ཚུལ་ཅུད་ཟད་བཤད་པའོ། །དང་པོ་ཇི་ལྟར་བསྒོམ་ཚུལ་ཡོད་དེ། རྒྱུད་དང་རྒྱ་གཞུང་གཞན་ནས་ཟླ་བ་དང་ཉི་མ་གཉིས་ཀ་བསྒོམ་པ་སོགས་བཤད་པ་ཡོད་ཀྱང་། འདིར་ལཱུ་ཧི་པའི་སྒྲུབ་ཐབས་ཀྱི་ལུགས་ལྟར་པདྨའི་ལྟེ་བར་དབྱངས་གསལ་ལུགས་འབྱུང་ལུགས་ལྡོག་ཏུ་བཀོད་པ་ཡོངས་སུ་གྱུར་པ་ལས། དབྱངས་གསལ་གྱི་གཟུགས་བརྙན་དང་ལྡན་པའི་ཟླ་བའི་དཀྱིལ་འཁོར་དཀར་ལ་དམར་པའི་མདངས་ཅན་དུ་བསྒོམ་པ་ཡིན་པའི་ཕྱིར། དབྱངས་གསལ་གྱི་མཚོན་དོན་ཡོད་དེ། དབྱངས་སོ་གཉིས་ཀྱིས་མཚན་སོ་གཉིས་དང་། གསལ་བྱེད་བརྒྱད་ཅུས་དཔེ་བྱད་བརྒྱད་ཅུ་མཚོན་པའི་ཕྱིར། དབྱངས་སོ་གཉིས་སུ་འབྱེད་པའི་རྒྱུ་མཚན་ཡོད་དེ། སྡོམ་འབྱུང་ལས། དཀར་པོའི་ཚེས་གཅིག་ནས་བརྩམས་ཏེ། ཇི་སྲིད་ཟླ་བ་རྫོགས་པའི་བར། །དཀར་པོའི་ཚེས་གཅིག་ལ་ཨ་ཡིག །རྒད་པའི་སོར་མོར་ཡི་གེ་ལ། །ཞེས་པ་ནས། ནག་པོའི་ཚེས་གཅིག་ནས་བརྩམས་ཏེ། ཇི་སྲིད་གཞན་ནམ་དེ་སྲིན་ལ། །འཕོ་བ་དེ་བཞིན་ཉིད་དུ་འགྱུར། །ཞེས་པའི་བར་གྱིས་བསྟན་པ་ལྟར་ཟླ་བ་ཡར་ངོ་མར་ངོའི་དབྱེ་བས་ལུས་ཀྱི་ཐིག་ལེ་དཀར་པོ་རྐང་པ་ནས་ཡར་བརྩེགས་པ་དང་སྤྱི་བོ་ནས་མར་འབབ་པའི་ཆ་སོ་གཉིས་དང་སྦྱོར་བའི་ཆེད་ཡིན་པའི་ཕྱིར། གསལ་བྱེད་བརྒྱད་ཅུར་འབྱེད་པའི་རྒྱུ་མཚན་ཡོད་དེ། གསལ་བྱེད་རྣམས་ས་སོགས་ཁམས་ལྔར་བསྡུས་ནས་དགའ་བ་བཞི་བཞི་སྟེ་ཉི་ཤུ། དེ་རེ་རེར་ཡང་ཁམས་དམར་པོའི་རྡུལ་རེ་རེ་གནས་པས་བཞི་བཅུ། དེ་ལའང་ཐབས་ཤེས་གཉིས་གཉིས་སུ་ཕྱེ་བས་བརྒྱད་ཅུར་བཞག་པའི་ཕྱིར་རོ། །ཟླ་བ་དང་དབྱངས་གསལ་གཉིས་ཀྱིས་ཡེ་ཤེས་གང་མཚོན་པ་ཡང་ཡོད་དེ། ཨཱ་ལི་དང་ཟླ་བའི་དཀར་ཆས་མེ་འོད་ལྟ་བུའི་ཡེ་ཤེས་མཚོན་ཞིང་དེ་ལས་བྱང་ཆུབ་པ་དང་། ཀཱ་ལི་དང་ཟླ་བའི་དམར་ཆས་མཉམ་པ་ཉིད་ཀྱི་ཡེ་ཤེས་མཚོན་ཞིང་དེ་ལས་བྱང་ཆུབ་པ་ཡིན་པའི་ཕྱིར་རོ། །གསལ་བྱེད་ཀྱི་ཡི་གེ་ལ་ལྷག་པ་བསྣོན་ཚུལ་ཡོད་དེ། ཌ་ཌྷ་ད་དྷ་ཡ་ལ་སྟེ་དྲུག་བསྣོན་པར་བྱ་བའི་ཕྱིར་རོ། །དེ་ལྟར་བསྒོམ་པ་ལ་རྣལ་འབྱོར་ཞེས་བརྗོད་པའི་རྒྱུ་མཚན་ཡོད་དེ། དབྱངས་གསལ་གཉིས་ནས་གཅིག་གི་ངོ་བོར་སྦྱོར་བ་དང་། ཟླ་བ་གཅིག་ཉིད་ཡེ་ཤེས་གཉིས་ཀྱི་ངོ་བོར་སྦྱོར་བའི་རྣལ་འབྱོར་ཡིན་པས་ན་དེ་ལྟར་དུ་བརྗོད་པའི་ཕྱིར་རོ། །གཉིས་པ་ཇི་ལྟར་བསྒོམ་པའི་ཚུལ་ཡོད་དེ། རང་ནམ་མཁའི་ནཱ་དས་ཟླ་བ་དཀར་ལ་དམར་བའི་མདངས་ཅན་མཐོང་བ་ན། སངས་རྒྱས་ཡབ་ཡུམ་གྱི་བྱང་སེམས་དཀར་དམར་གྱི་དབུས་སུ་སྐྱེ་བ་བླང་བར་བྱའོ་སྙམ་པ་སོགས་ཀྱི་འཕེན་པས་དེ་ལ་ཞུགས་པ་ལས། རྒྱུ་རྡོ་རྗེ་འཛིན་པའི་ངོ་བོ་ཧཱུཾ་ཡིག་དཀར་ལ་དམར་པའི་མདངས་ཅན་ཞིག་ཏུ་རིམ་གྱིས་རྫོགས་པར་གྱུར་པ་ནི་སོར་རྟོགས་ཡེ་ཤེས་ལས་བྱང་ཆུབ་པ་ཡིན་ལ། དེ་ལས་འཁོར་ལོ་ལྔའི་ལྷ་ཚོགས་ཀྱི་སྤྲོ་བསྡུ་བྱེད་པ་ནི་བྱ་གྲུབ་ཡེ་ཤེས་ལས་བྱང་ཆུབ་པ་ཡིན་པའི་ཕྱིར་རོ། །ཡེ་ཤེས་དེ་གཉིས་ལ་རྗེས་སུ་རྣལ་འབྱོར་ཞེས་བརྗོད་པའི་རྒྱུ་མཚན་ཡོད་དེ། སྔར་བཤད་པའི་ཟླ་བ་དེ་བདེ་བ་ཆེན་པོའི་རྒྱུ་ཡིན་པ་དེ་བཞིན་དུ་ཧཱུཾ་ཡིག་འདིའང་འདིའི་རྗེས་སུ་མཐུན་པའི་རྒྱུ་ཡིན་པས་ན་དེ་ལྟར་དུ་བརྗོད་པའི་ཕྱིར་རོ། །དེ་ལྟ་བུའི་རིམ་པ་འདི་ལ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་ཞེས་བྱ་སྟེ། སྦྱང་གཞི་ལ་བར་དོའི་རྣམ་ཤེས་ཕ་མའི་ཁུ་ཁྲག་གི་དབུས་སུ་སྐྱེ་བ་བླངས་པ་དང་ཆོས་མཐུན་ཞིང་སྒྲུབ་པ་པོ་རང་ཉིད་ཀྱི་སྐྱེ་བ་སྦྱོང་བར་བྱེད། ལམ་རྫོགས་རིམ་གྱི་སྐབས་སུ་དག་མ་དག་པའི་སྒྱུ་མའི་སྐུས་རགས་པའི་སྤྲུལ་སྐུ་བཟུང་བ་དང་ཆོས་མཐུན་ཞིང་དེ་ལྟ་བུའི་རྟོགས་པ་རྒྱུད་ལ་སྐྱེ་བའི་དགེ་རྩ་སྨིན་བྱེད་ཁྱད་པར་ཅན་དུ་འགྱུར། འབྲས་བུའི་སྐབས་སུ་ལོངས་སྤྱོད་རྫོགས་པའི་སྐུས་མཛད་པ་བཅུ་གཉིས་སོགས་མཛད་པའི་སྤྲུལ་སྐུའི་རྣམ་པ་བསྟན་པ་དང་ཆོས་མཐུན་ཞིང་། ད་ལྟ་ནས་ཀྱང་འབྲས་བུ་ལམ་བྱེད་ཀྱི་ཚུལ་དུ་བྱས་ནས་བསྒོམས་པས་སྤྲུལ་སྐུ་དེ་མྱུར་དུ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །དེ་ལྟ་བུ་དེ་སྦྱང་གཞི་དང་ཡང་ཆོས་མཐུན་པ་ཡིན་ཏེ། འབྱུང་བཞི་རི་རབ་དང་བཅས་པ་ནི་ཕ་མ་གཉིས་ཀྱི་ལུས་སྤྱི་དང་ཆོས་མཐུན། སྣ་ཚོགས་པདྨ་ཆུང་ངུ་ནི་དེ་གཉིས་ཀྱི་རྩ་འཁོར་དང་ཆོས་མཐུན། དབྱངས་གསལ་དཀར་དམར་བ་ནི་དེ་གཉིས་ཀྱི་ཁམས་དཀར་དམར་དང་ཆོས་མཐུན། དབྱངས་གསལ་གཉིས་འདྲེས་ནས་ཟླ་བ་དཀར་ལ་དམར་བའི་མདངས་ཅན་དུ་སོང་བ་ནི། ཁམས་དཀར་དམར་གཉིས་མའི་མངལ་དུ་འདྲེས་པ་དང་ཆོས་མཐུན། ཟླ་བའི་དབུས་སུ་ནཱ་ད་ཞུགས་པ་ནི་ཐིག་ལེའི་དབུས་སུ་བར་དོའི་རྣམ་ཤེས་ཞུགས་པ་དང་ཆོས་མཐུན། དེ་ནས་ཧཱུཾ་ཡིག་ཏུ་རིམ་གྱིས་རྫོགས་པ་ནི། མངལ་དུ་ལུས་རིམ་གྱིས་འཕེལ་བ་དང་ཆོས་མཐུན། དེ་ལས་འབྲས་བུ་ཧེ་རུ་ཀའི་སྐུ་རྫོགས་པར་བསྐྱེད་པ་ནི་མངལ་ནས་ཕྱི་རོལ་དུ་བཙས་པ་དང་ཆོས་མཐུན་པའི་ཕྱིར་རོ། །ལམ་རྫོགས་རིམ་གྱི་སྐབས་དང་སྦྱར་བའི་མཚོན་དོན་ཁྱད་པར་ཅན་ཡོད་དེ། སྣ་ཚོགས་པདྨས་ནི་རྫོགས་རིམ་པའི་ཕོ་མོ་གཉིས་ཀྱི་རྩ་འཁོར་དེ་མཚོན། དབྱངས་གསལ་གྱིས་དེ་གཉིས་ཀྱི་ཁམས་དཀར་དམར་དེ་མཚོན། ཟླ་བ་དཀར་དམར་གྱི་ཁམས་དཀར་དམར་གྱི་འདུ་འཕྲོད་དེ་མཚོན། དེར་ནཱ་ད་ཞུགས་ཏེ་ཧཱུཾ་ཡིག་ཏུ་གྱུར་པས་ནི་འདུ་འཕྲོད་ལས་བྱུང་བའི་བདེ་སྟོང་གི་ཡེ་ཤེས་ཁྱད་པར་ཅན་མཚོན་པའི་ཕྱིར་རོ། །རྫོགས་རིམ་པས་རྡོ་རྗེའི་ལུས་ལ་གནད་དུ་བསྣུན་པས་བདེ་ཆེན་འདྲེན་ཚུལ་ཡང་མཚོན་པ་ཡིན་ཏེ། པདྨས་སྒྲུབ་པ་པོའི་རྩ་འཁོར་དང་། གསལ་བྱེད་ཀྱིས་ལྟེ་བར་གནད་དུ་བསྣུན་པས་གཏུམ་མོ་སྦར་བ་དང་། དབྱངས་ཀྱིས་ཁམས་ཞུ་བ་དང་། དེ་ཉིད་ཡོངས་སུ་བྱུང་བ་ལས་ཟླ་བ་དཀར་ལ་དམར་བའི་མདངས་ཅན་དུ་བསྐྱེད་པས་ནི་ཁམས་དཀར་དམར་གྱི་འདུ་འཕྲོ་དང་། ཟླ་བའི་དབུས་སུ་ནཱ་ད་ཞུགས་པ་ལས་ཧཱུཾ་ཡིག་ཏུ་གྱུར་པས་ནི། འདུ་འཕྲོ་བྱས་པ་ལས་བྱུང་བའི་ཡས་བབ་མས་བརྟན་གྱི་ལྷན་སྐྱེས་ཁྱད་པར་ཅན་མཚོན་པའི་ཕྱིར་རོ། །དེ་ནས་སྐད་ཅིག་མའི་སྔགས་བརྗོད་ཅིང་དེའི་དོན་བསྒོམ་ཚུལ་ཡོད་དེ། ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དང་དབྱེར་མི་ཕྱེད་པའི་ཆོས་ཀྱི་སྐུའི་བདག་ཉིད་དེ་ངའོ་སྙམ་དུ་ང་རྒྱལ་བཟུང་ནས་བསྒོམ་པ་ཡིན་པའི་ཕྱིར་རོ། །དམིགས་མེད་ཀྱི་སྙིང་རྗེ་བསྒོམ་པ་ནས་འདིའི་བར་རྗེས་སྨོན་ལམ་ནས་བསྟན་ཚུལ་ཡོད་དེ། སྤྲོས་ཀུན་འོད་གསལ་གནས་སུ་སྡུད་པ་དང་། །ཞེས་པ་ནས། དེ་འདྲའི་རྫོགས་རིམ་སྐྱེ་བའི་སྣོད་གྱུར་ཅིག ཅེས་པའི་བར་གྱིས་བསྟན་པའི་ཕྱིར་རོ། །གསུམ་པ་ལ་ལྔ། རྟེན་བརྟེན་པ་བསྐྱེད་ཚུལ་མདོར་བསྟན་པ། གསལ་གདབ་པ་རྒྱས་པར་བཤད་པ། ཕྱོགས་མཐུན་གྱི་དག་པ་དང་ལུས་དཀྱིལ་བསྒོམ་ཚུལ། གོ་བགོས་ཏེ་ཡེ་ཤེས་པ་བཅུག་ནས་དབང་བསྐུར་བ། མཆོད་བསྟོད་དང་དག་པ་དྲན་ཚུལ་ལོ། །དང་པོ་ཇི་ལྟར་བྱ་བའི་ཚུལ་ཡོད་དེ། ཟླ་བ་དབྱངས་གསལ་ཧཱུཾ་དང་བཅས་པ་ཡོངས་སུ་གྱུར་པ་ལས་རྟེན་བརྟེན་པའི་དཀྱིལ་འཁོར་ཐམས་ཅད་དུས་གཅིག་ཏུ་གྱུར་པའི་ཚུལ་གྱིིས་ཆོས་དབྱིངས་ཡེ་ཤེས་ལས་བྱང་ཆུབ་པ་ཡིན་པའི་ཕྱིར་རོ། ཁ་ཅིག་ཚུལ་འདི་སྐྱེ་བ་སྤྲུལ་སྐུའི་ལམ་འཁྱེར་ཡིན་ན་སྦྱང་གཞི་ལ་སྣོད་བཅུད་རིམ་གྱིས་གྲུབ་ཅིང་འདིར་རྟེན་བརྟེན་པ་ཅིག་ཅར་དུ་གྲུབ་པས་ཆོས་མི་མཐུན་པས་ཇི་ལྟར་བྱ་ཞེ་ན། སྐྱོན་མེད་དེ། དེ་དང་གོ་རིམ་ཆོས་མཐུན་ཇི་ལྟ་བ་བཞིན་མི་སྦྱོར་ཡང་རྟེན་གཞལ་ཡས་ཁང་བསྒོམ་པ་ནི་གང་དུ་སྐྱེ་བའི་གནས་དང་ཆོས་མཐུན་ཞིང་། བརྟེན་པའི་ལྷ་ནི་སེམས་ཅན་མངལ་དུ་སྐྱེ་བ་བླངས་ནས་ཕྱི་རོལ་ཏུ་བཙས་པ་དང་འདྲ་བས་སྐྱེ་བ་སྤྲུལ་སྐུར་འཁྱེར་བའི་ལམ་འཁྱེར་དུ་འཇོག་པ་ཡིན་པའི་ཕྱིར། དེ་ལྟར་བསྒོམས་པ་ལ་དགོས་པ་ཡོད་དེ། ལམ་དང་འབྲས་བུའི་སྐབས་སུ་རྟེན་བརྟེན་པའི་དཀྱིལ་འཁོར་དུས་མཉམ་དུ་གྲུབ་པ་དང་རྣམ་པ་མཐུན་ཞིང་དེ་འགྲུབ་པའི་དགེ་རྩ་སྨིན་བྱེད་དུ་འགྱུར་བའི་ཕྱིར་རོ། །གཉིས་པ་ལ་གཉིས། རྟེན་གསལ་གདབ་པ་དང་། བརྟེན་པ་ལ་གསལ་གདབ་པའོ། །དང་པོ་ལ་གཉིས། དུར་ཁྲོད་དང་། གཞལ་ཡས་ཁང་བསྒོམ་པའི་ཚུལ་ལོ། །དང་པོ་ནི། སྒྲུབ་ཐབས་ལས་གཞལ་ཡས་ཁང་གི་རྩིག་པ་སོགས་དུར་ཁྲོད་ཀྱི་སྔོན་དུ་བྱུང་ཡང་འདིར་དུར་ཁྲོད་སྔོན་དུ་འཆད་པ་ཡིན་ཏེ། གཞལ་ཡས་ཁང་གི་རྣམ་གཞག་རྣམས་ལྷན་ཅིག་འཆད་པར་འགྱུར་པའི་ཕྱིར་རོ། །དེ་ལྟར་ན་དུར་ཁྲོད་བསྒོམ་པའི་ཚུལ་ཡོད་དེ། ཤར་དུ་གཏུམ་དྲག་ཞེས་སོགས་སྒྲུབ་ཐབས་སུ་ཤིན་ཏུ་གསལ་བ་ལྟར་བསྒོམ་པའི་ཕྱིར་རོ། །དུར་ཁྲོད་བསྒོམ་ཚུལ་འདི་རྒྱས་པའི་དབང་དུ་བྱས་པ་ཡིན་གྱི། བསྡུས་ཏེ་བསྒོམ་པར་འདོད་ནའང་རུང་སྟེ། ལྷ་སྔ་དང་གཤིན་རྗེ་གཤེད་ཀྱི་དུར་ཁྲོད་ལྟར་ཡིན་པའི་ཕྱིར་རོ། །དུར་ཁྲོད་ཀྱི་མཚོན་དོན་ཡོད་དེ། དེར་རོ་བདག་མེད་པ་ལྟར་མི་རྟག་པ་དང་བདག་མེད་པ་དང་ཡིད་འབྱུང་བ་མཚོན་པའི་ཕྱིར་རོ། །གཉིས་པ་ལ། དུར་ཁྲོད་ཀྱི་ནང་དུ་རྡོར་ར་མེ་རི་དང་བཅས་པ་བསྒོམ་དགོས་ཏེ། སྒྲུབ་ཐབས་དངོས་གཞི་བསྒོམ་པ་ལ་བར་ཆད་མི་འབྱུང་བའི་ཆེད་ཡིན་པའི་ཕྱིར་རོ། །འོ་ན་འདིར་བསྒོམ་པའི་རྡོར་ར་སོགས་སྔར་སྲུང་འཁོར་གྱི་སྐབས་སུ་བསྒོམ་པ་དེ་ཡིན་ནམ། གསར་དུ་བསྐྱེད་པ་ཡིན་ཞེ་ན། གཞན་ནས་དེ་ཙམ་དུ་མི་གསལ་ཡང་། སྔ་མ་འོད་གསལ་དུ་བསྡུས་ནས་ཕྱི་མ་གསར་དུ་བསྐྱེད་པ་ཡིན་ཏེ། རྗེའི་འདོད་འཇོ་ལས། དེ་རྣམས་འོད་གསལ་དུ་བསྡུས་ཏེ་གཞལ་ཡས་ཁང་གྲུབ་པའི་དུས་སུ་སླར་ཡང་རྡོ་རྗེའི་རབ་གྲུབ་པར་བཤད་ཀྱི། གཞན་གཉིས་མ་བྱུང་ཡང་མེད་ཀྱང་ཆོག་གོ ཞེས་གསུངས་པའི་ཕྱིར། འདིར་སྔ་མ་འོད་གསལ་དུ་བསྡུས་ནས་ཕྱི་མ་བསྐྱེད་པ་ཡང་མི་འགལ་ཏེ། འཕགས་ལུགས་ཀྱི་སྲུང་འཁོར་ཐུན་མོང་མ་ཡིན་པ་འོད་གསལ་དུ་བསྡུས་ནས་ཕྱི་མ་བསྐྱེད་པ་ལྟ་བུ་ཡིན་པའི་ཕྱིར་རོ། །དེའི་ནང་དུ་སྣ་ཚོགས་པདྨའི་ལྟེ་བར་སྣ་ཚོགས་རྡོ་རྗེ་བསྒོམ་དགོས་པ་ཡིན་ཏེ། སྔ་མ་ཕྱི་མའི་རྟེན་གཞི་ཡིན་ཞིང་། གཉིས་ཀའང་གཞལ་ཡས་ཁང་གི་རྟེན་གཞི་ཡིན་པའི་ཕྱིར། སྣ་ཚོགས་རྡོ་རྗེའི་དབྱིབས་སོགས་ཇི་ལྟར་བྱ་བའི་ཚུལ་ཡོད་དེ། ལྟེ་བའི་དབྱིབས་གྲུབ་བཞི་པ་བྲེ་ལེབ་ཀྱི་རྣམ་པ་ཅན། རྒྱར་སྒོ་ཚད་བཅུ་གཉིས། དཔངས་སུ་སྒོ་ཚད་ལྔའམ་ཕྱེད་ལྔ། རྭའི་གྲངས་ནི་ཕྱོགས་རེ་རེར་ལྔ་ལྔ་སྟེ་ཉི་ཤུ་པའམ་གསུམ་གསུམ་སྟེ་བཅུ་གཉིས། སྲིད་རྟ་བབས་སྒོ་ཚད་གསུམ་མ་ལ་རྭ་སྒོ་ཚད་བཞི་དང་། རྟ་བབས་སྒོ་ཚད་གཅིག་མ་ལ་རྭ་སྒོ་ཚད་གཉིས་ཡིན་ཞིང་། མདོག་ནི་རྭ་ཁྲའམ་ཕྱོགས་མདོག་གང་བྱས་ཀྱང་མི་འགལ་བའི་ཕྱིར། གཞལ་ཡས་ཁང་གི་རྩིག་པ་སོགས་ཇི་ལྟར་བྱ་བའི་ཚུལ་ཡོད་དེ། ཕྱོགས་སོ་སོའི་ལྟེ་བའི་ཟད་མཚམས་ནས་ནང་དུ་སྒོ་ཚད་གཉིས་གཉིས་དོར་བའི་མཚམས་ཀྱི་མཐའ་ནས་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་པ་ལྔ་ཀ་བསྡོམས་པའི་ཞེང་ཆ་ཕྲན་གཅིག དཔངས་ཆ་ཕྲན་བཅུ་གསུམ། དེའི་སྟེང་དུ་ཕ་གུ་དཔངས་ཆ་ཕྲན་གཅིག་དང་ཞེང་ཆ་ཕྲན་ཕྱེད་གཉིས་ཡོད་པའི་ཕྱིར་འཕགས་པ། དེའི་ཕྱི་ངོས་སུ་རིན་པོ་ཆེ་དབྱིབས་དང་ཁ་དོག་སྣ་ཚོགས་པས་སྤྲས་པ། དེའི་སྟེང་དུ་གསེར་གྱི་སྐ་རགས་སྣམ་བུ་ལེབ་མོར་བརྐྱང་བ་ལྟ་བུ་བཞི་སོ་སོའི་འོག་གི་བར་བར་དུ་ཀ་ཆུང་བྲེ་ཕུལ་དང་བཅས་པ་བཙུགས་པའི་བཞི་ཀ་བསྡོམས་པའི་དཔངས་ཆ་ཕྲན་གཉིས་དང་ཞེང་ཆ་ཕྲན་གཅིག་པས་ཁོར་ཡུག་ཏུ་བསྐོར། དེའི་ཕྱི་ངོས་སུ་དྲ་བ་དང་དྲ་ཕྱེད་རྔ་ཡབ་དང་བཅས་པ། དེའི་སྟེང་ངོས་སུ་གཞལ་ཡས་ཁང་གི་ཐོག་གི་ཕྱི་སྣེ་བྱ་འདབ་འོག་གི་འདོད་སྣམ་དང་མཉམ་པར་ཆ་ཕྲན་གཉིས་ཕྱིར་འཕགས་པའི་ཕྱི་ངོས་སུ་རིན་པོ་ཆེའི་ཤར་བུ་ཐུར་དུ་འཕྱང་བ། དེའི་ཐད་ཀྱི་སྟེང་ཕྱོགས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན་རྒྱར་ཆ་ཕྲན་གཅིག་དང་དཔངས་ཆ་ཕྲན་གཅིག་གམ་ཕྱེད་པ་དེའི་སྟེང་དུ་རྒྱལ་མཚན་དང་བ་དན་སོགས་ཀྱིས་མཛེས་པར་བྱས་པ་ཡིན་པའི་ཕྱིར། དཔངས་ཚད་ཀྱང་ཡོད་དེ་གཞལ་ཡས་ཁང་གི་ནང་གི་དཔངས་སུ་ཆ་ཕྲན་བཅུ་དྲུག་ཡོད་པའི་ཕྱིར་རོ། །སྒོ་དང་སྒོ་འཁྱུད་སོགས་ཀྱི་ཁྱད་པར་ཡོད་དེ། རྩ་ཐིག་དང་ཚངས་ཐིག་འཕྲད་མཚམས་ནས་བརྒྱད་ཆ་ཕྱིའི་སྒོ། དེ་ནས་ཆ་ཕྲན་བཞི་ཕྱིར་སོང་བས་སྒོ་འཁྱུད། དེ་ནས་ཆ་ཕྲན་གཉིས་རེ་གཡས་གཡོན་དུ་སོང་བས་སྒོ་འགྲམ། དེ་ནས་ཆ་ཕྲན་གཉིས་རེ་ཐད་ཀར་སོང་བས་སྒོ་ལོགས་སུ་འགྱུར་བའི་ཕྱིར་རོ། །འགྲམ་ལོགས་གཉིས་སྒོ་དང་མི་མཉམ་པའི་ཕྱོགས་འདི་ལ་སྒོ་ལོགས་ཀྱི་གདོང་དང་སྣ་ཚོགས་རྡོ་རྗེའི་ལྟེ་བའི་ཟད་མཚམས་ཀྱི་བར་ལ་ཆ་ཕྲན་གཅིག་ཡོད་པར་བཤད་ཀྱང་། འགྲམ་ལོགས་སྒོ་དང་མཉམ་པ་ལ་ནི་སྔ་མ་དང་མི་འདྲ་སྟེ། དེ་ལ་ནི་རྡོ་རྗེའི་ལྟེ་བའི་ཟད་མཚམས་དང་རྩིག་གདོང་གཉིས་ཁ་ད་ཆད་དུ་ཡོད་པའི་ཕྱིར་རོ། །ནང་གི་འཁོར་ལོ་ཐོག་དང་བཅས་པ་ཇི་ལྟར་བྱ་བའི་ཚུལ་ཡོད་དེ། སྐུ་འཁོར་གྱི་རྩིབས་རྣམས་ཀྱི་བར་སྟོང་ནི་དམ་ཚིག་གི་འཁོར་ལོའི་ལྟེ་བ་ཡིན་པས་ཕྱོགས་མདོག་དང་། དེ་བཞིན་དུ་གསུང་དང་ཐུགས་ཀྱི་འཁོ་ལོའི་རྩིབས་རྣམས་ཀྱི་བར་གྱི་གཞི་ནི་རང་རང་གི་འོག་མའི་ལྟེ་བའི་མདོག་ཡིན་ཞིང་། བདེ་ཆེན་གྱི་འཁོར་ལོ་ཡང་ཐུགས་ཀྱི་འཁོར་ལོའི་ལྟེ་བ་ན་ཡོད་པས་སྔ་མ་དང་མཚུངས་པའི་ཕྱིར། དམ་ཚིག་གི་འཁོར་ལོ་ནི་འོག་གཞི་དང་མཉམ་ཞིང་སྐུ་འཁོར་ནས་རིམ་གྱིས་མཐོ་བ་ཡིན་ཏེ། འཁོར་ལོ་བཞི་ནི་རིམ་པ་བཞིན་ཆ་ཕྲན་གཉིས་དང་། གཅིག་དང་། ཕྱེད་དང་། ཆ་ཕྲན་གཅིག་གི་བཞི་ཆས་ཕྱི་མ་ཕྱི་མ་མཐོ་བའི་ཕྱིར། འཁོར་ལོའི་ཞིང་ཚད་ཀྱི་ཁྱད་པར་ཡོད་དེ། བདེ་ཆེན་གྱི་འཁོར་ལོའི་ལྟེ་བ་ལ་སྒོ་ཚད་གཅིག་དང་། འདབ་མ་དང་འཁོར་ལོའི་རྩིབས་རྣམས་ལ་ཆ་ཕྲན་གསུམ་གསུམ། མུ་ཁྱུད་རྣམས་ལ་ཆ་ཕྲན་ཕྱེད་རེ་ཡིན་པའི་ཕྱིར། ལྷའི་དབང་དུ་བྱས་ན་མཐོ་དམན་དུ་འགྱུར་ཚུལ་ཡོད་དེ། ལྷ་ཐམས་ཅད་ཀྱི་སྐུའི་དཔངས་ལ་སྒོ་ཚད་རེ་རེ་ཡིན་ཡང་འཁོར་ལོའི་དཔངས་ཀྱི་ས་དམ་ཚིག་སྐུ་གསུང་ཐུགས་བདེ་ཆེན་གྱི་འཁོར་ལོའི་ལྷ་རྣམས་རིམ་པ་བཞིན་གཙོ་བོའི་ཞབས་དང་། ལྟེ་བ་དང་། ཐུགས་ཀ་དང་། མགྲིན་པ་དང་། མཛོད་སྤུའི་ཐད་ཀར་སླེབས་ཙམ་གྱི་ཚུལ་དུ་ཡོད་པའི་ཕྱིར་རོ། །དེ་ལྟར་ན་སྐུ་འཁོར་གྱི་ལྷའི་ཞབས་བཙུགས་ས་ནས་ཆ་ཕྲན་གཅིག་གིས་མཐོ་བའི་ས་ནས་གསུང་འཁོར་གྱི་ལྷ་རྣམས་ཀྱི་ཞབས་བཞག་པ་ཡིན་ཏེ། རིགས་པ་སྔ་མ་དེ་ཉིད་ཀྱིས་འགྲུབ་པའི་ཕྱིར་རོ། །འོ་ན། འཁོར་རྣམས་ལ་དེ་ལྟར་མཐོ་ཁྱད་བྱུང་བ་དེ་ནི་འཁོར་ལོ་རྣམས་གནས་པའི་གཞི་དང་བཅས་པ་ཡིན་ནམ། འཁོར་ལོ་གཅིག་པུ་ཡིན་ཞེ་ན། མཁས་པ་ཕལ་ཆེར་ཁྱད་པར་མི་འབྱེད་པར་འཁོར་ལོ་ཉིད་ཡིན་པ་ལ་བྱེད་ཀྱང་ཁྱད་པར་འབྱེད་དགོས་ཏེ། རྗེའི་འདོད་འཇོ་ལས། དེ་ལྟར་འོག་མ་འོག་མ་ལས་གོང་མ་གོང་མ་ཡར་འཕགས་པའང་འཁོར་ལོ་གང་ལ་གནས་པའི་གཞི་ལ་བྱ་དགོས་ལ། འཁོར་ལོའི་རྩིབས་རྣམས་དང་མུ་ཁྱུད་རྣམས་ནི་ཚད་དེ་ལས་མཐོ་བ་མིན་པས་ངོ་མཐོང་ཙམ་དུ་བྱའོ། །ཞེས་གསལ་པར་བཤད་པའི་ཕྱིར་རོ། །ཐོག་གི་རིམ་པ་ཇི་ལྟར་བྱ་བའི་ཚུལ་ཡོད་དེ། དམ་ཚིག་གི་འཁོར་ལོའི་ཟུར་གྱི་ཐོག་ནི་གདུང་གྲུ་ཆོད་དུ་བཏང་བའི་ཚུལ་གྱིས་འབུབས་པ་ཡིན་ལ། སྐུ་འཁོར་གྱི་རྩིབས་དང་ལྟེ་བའི་ཟད་མཚམས་ནས་ཀ་བ་དཔངས་ཆ་ཕྲན་བཅུ་གསུམ་བྲེེ་ཕུལ་དང་བཅས་པ་དང་། ཞེད་ཆ་ཕྲན་གཅིག་པ་ཕྱོགས་རེ་རེར་གཉིས་གཉིས་ཏེ་བརྒྱད་བཙུགས་པའི་སྟེང་དུ་གདུང་ཟླུམ་འཁོར་མར་བཏང་བ་ལ་ལྕམ་སྣེ་ནང་མ་དང་། ཕྱི་མ་དམ་ཚིག་གི་འཁོར་ལོའི་ཐོག་ཅུང་ཟད་ཡོད་པའི་ཁ་གདངས་ལ་ཀ་ཆུང་བྲེ་ཕུལ་དང་བཅས་པ་བཙུགས་པའི་སྟེང་དུ་གདུང་ཟླུམ་འཁོར་མར་བྱས་པ་ལ་བཀལ་ནས་འབུབས་པ་ཡིན་པའི་ཕྱིར། དེ་བཞིན་དུ་གསུང་དང་ཐུགས་ཀྱི་འཁོར་ལོ་གཉིས་པའང་སྦྱར་བར་བྱ་སྟེ། ཀ་བ་སྔར་ལྟར་བཙུགས་པའི་ལྟེང་དུ་གདུང་བཏང་པ་ལ་ལྕམ་སྣེ་ནང་མ་དང་། ཕྱི་མ་རང་རང་གི་འོག་ཐོག་གི མཐའི་སྟེང་དུ་ཀ་ཆུང་སོགས་བྱས་པ་ལ་བཀལ་པའི་ཚུལ་གྱིས་འབུབས་པ་དང་། བདེ་ཆེན་གྱི་འཁོར་ལོའི་ཕྱོགས་མཚམས་ཀྱི་པདྨའི་འདབ་མའི་བར་མཚམས་ཀྱི་ཐད་ཕྱིའི་མུ་ཁྱུད་ཀྱི་ཕྱོགས་རེ་རེར་ཀ་པ་གཉིས་གཉིས་ཏེ་བརྒྱད་ཀྱི་སྟེང་དུ་གདུང་འཁོར་བཏང་པ་ལ་ཕྱོགས་བཞིར་གདུང་བཞི་མིག་མངས་རིས་སུ་བྲེས་ཤིང་ཐོག་བྱ་ལ། དབུས་ཀྱི་རེ་མིག་གི་སྟེང་དུ་རྡོ་རྗེ་ནོར་བུའི་ཏོག་གིས་སྤྲས་པའི་རྒྱ་ཕིབས་གུར་རམ་མཆོད་རྟེན་ལྟར་བྱ་བ་ཡིན་པའི་ཕྱིར་རོ། །ཀ་བ་རྣམས་བསྡོམས་པའི་གྲངས་ཀྱང་ཡོད་དེ། རྟ་བབས་ཀྱི་ཀ་བ་བཅུ་དྲུག སྒོ་ལོགས་ཀྱི་ཀ་བ་བརྒྱད། འཁོར་ལོ་བཞིའི་ཀ་བ་སོ་གཉིས་ཏེ་ང་དྲུག་ཡོད་པའི་ཕྱིར་རོ། །རྟ་བབས་གང་ན་གནས་པ་དང་སྣམ་བུའི་གྲངས་ཀྱང་ཡོད་དེ། སྒོ་བཞི་སོ་སོར་མདུན་དུ་སྟེགས་བུ་གྲུ་བཞི་པའི་སྟེང་དུ་ཞེས་སོགས་སྒྲུབ་ཐབས་ནས་འབྱུང་བ་ལྟར་ཡོད་པའི་ཕྱིར། སྣམ་བུ་རྣམས་ཀྱི་ཚད་དབྱིབས་དང་ལྷག་མ་གཞན་རྣམས་འདིར་རེ་ཞིག་མི་འཆད་དེ། མང་དུ་དོགས་པས་གཞན་དུ་ཤེས་པར་བྱ་དགོས་པའི་ཕྱིར་རོ། །དེ་ལྟ་བུའི་གཞལ་ཡས་ཁང་བསྒོམ་པ་ལ་དགོས་པ་ཡོད་དེ། སྦྱང་གཞི་རང་ཉིད་ལ་འབྱུང་འགྱུར་གྱི་མ་དག་པའི་སྣོད་ཀྱི་འཇིག་རྟེན་ལ་ལོངས་སྤྱོད་དགོས་པའི་ལས་ཀྱི་ནུས་པ་སྦྱོང་། ལམ་རྫོགས་རིམ་གྱི་སྐབས་སུ་དག་མ་དག་གི་སྒྱུ་ལུས་པའི་རྟེན་གཞལ་ཡས་ཁང་དངོས་གནས་ལ་འགྲུབ་པའི་དགེ་རྩ་སྨིན་བྱེད་ཁྱད་པར་ཅན་དུ་འགྱུར། འབྲས་བུ་སངས་རྒྱས་ཀྱི་སའི་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་དང་རྣམ་པ་མཐུན་ཞིང་། ད་ལྟ་ནས་ཀྱང་འབྲས་བུ་ལམ་བྱེད་ཀྱི་ཚུལ་དུ་བྱས་ནས་བསྒོམས་པས་དེ་འདྲ་བ་མྱུར་དུ་འགྲུབ་པའི་ནུས་པ་ཁྱད་པར་ཅན་འཇོག་པའི་ཕྱིར་རོ། །གཉིས་པ་ལ་གཉིས། གཙོ་བོ་ཡབ་ཡུམ་གསལ་གདབ་པ་དང་། འཁོར་རྣམས་གསལ་གདབ་པའོ། །དང་པོ་ནི། དབུས་ཀྱི་པདྨའི་ལྟེ་བར་ཞེས་སོགས་འབྱུང་བ་ལྟར་ཡིན་ལ། འདི་ལ་གཉིས། བཤད་ཚུལ་སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་ནི། བཤད་རྒྱུད་མངོན་བརྗོད་སོགས་ནས་བདེ་མཆོག་ལ་ཞལ་ཕྱག་ཕྱག་མཚན་སོགས་མི་འདྲ་བ་དུ་མ་ཞིག་བཤད་པ་ཡོད་དེ། ཞལ་བཞི་ཕྱག་བཅུ་གཉིས་པ་འདི་ལྟ་བུ་དང་། ཞལ་གསུམ་ཕྱག་དྲུག་པ། ཞལ་དྲུག་ཕྱག་བཅུ་གཉིས་པ། ཞལ་བརྒྱད་ཕྱག་བཅུ་དྲུག་པ། ཞལ་བཅུ་གཉིས་ཕྱག་ཉེར་བཞི་པ་དང་། དེ་ལས་ཀྱང་ཆེས་མང་བ་སོགས་བཤད་པའི་ཕྱིར། འོན་ཀྱང་དེ་ཐམས་ཅད་ངོ་བོའམ་རྒྱུད་ཐ་དད་པ་ནི་མ་ཡིན་ཏེ། ཆེད་དུ་བྱ་བའི་གདུལ་བྱའི་དབང་གིས་སྐུའི་རྣམ་པ་མི་འདྲ་བར་བསྟན་པ་ཙམ་ཡིན་པའི་ཕྱིར་རོ། །གཉིས་པ་ནི་ལུགས་འདིར་དང་པོ་ལྟར་ཡིན་ཏེ། རྩ་རྒྱུད་ཀྱི་དགོངས་པ་འགྲེལ་བའི་བཤད་རྒྱུད་མངོན་བརྗོད་ཀུན་སྤྱོད་སོགས་ནས་གསུངས་པ་ལྟར། ལཱུ་དྲིལ་ནག་གསུམ་རྗེས་འབྲང་དང་བཅས་པའི་གྲུབ་ཆེན་གྱིས་ཀྱང་དེ་ལྟར་དུ་བཞེད་པའི་ཕྱིར་རོ། །ཡབ་ཡུམ་གཉིས་ཀྱི་སྐུ་མདོག་ཕྱག་མཚན་སོགས་སྒྲུབ་ཐབས་ལས་གསལ་བ་ལྟར་ཡིན་ལ། དེ་དག་གིས་མཚོན་ཚུལ་གྱི་ཁྱད་པར་ཡོད་དེ། དེ་ཡང་ཕྱག་དང་པོ་གཉིས་ཀྱིས་རྡོར་དྲིལ་བཟུང་ནས་ཡུམ་ལ་འཁྱུད་པས་ནི་ཤེས་རབ་སྟོང་པ་ཉིད་ཀྱིས་ཐབས་བདེ་བ་ཆེན་པོ་ལ་འཁྱུད་པ་མཚོན་ཞིང་། རྡོ་རྗེས་བདེ་བ་ཆེན་པོ་དང་། རྭ་ལྔས་ནི་ཡེ་ཤེས་ལྔ་མཚོན་ལ། དྲིལ་བུས་སྟོང་ཕྱོགས་ཀྱི་ཤེས་རབ་མཚོན། དེ་གཉིས་བཟུང་ནས་ཡབ་ཡུམ་མཉམ་པར་སྦྱོར་བས་ནི་བདེ་སྟོང་དབྱེར་མེད་དུ་སྦྱོར་པ་དེ་མཚོན། ཟླ་བ་དབུའི་གཡོན་དུ་ཅུང་ཟད་ཡོ་བས་ནི་སྤྱི་བོ་ནས་བྱང་སེམས་འབེབ་པ་དེ་མཚོན། མི་རུས་ཀྱི་ཐལ་བས་ལུས་ལ་བྱུགས་པས་ནི་བྱང་སེམས་ཀྱིས་ལུས་ཀྱི་གནས་རྣམས་ཁྱབ་པ་དེ་མཚོན། ཁ་ཊྭཱཾ་ཀས་ནི་སེམས་ལྷན་སྐྱེས་ཀྱི་བདེ་བའི་ངོ་བོར་སྐྱེས་པ་དེ་མཚོན། ཞལ་བཞིས་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་མངོན་པར་འདུ་བྱ་བ་མེད་པའི་རྣམ་ཐར་སྒོ་བཞི་མཚོན། དེ་བཞིན་དུ་གླང་པོ་ཆེའི་པགས་པ་བཤུས་ཏེ་གྱོན་པས་ནི་གཏི་མུག་སྤངས་པ་དང་། ཌ་མ་རུས་ནི་སངས་རྒྱས་ཐམས་ཅད་ཀྱི་ཐུགས་རྒྱུད་བསྐུལ་པ་དང་། དགྲ་སྟས་ནི་སྒོ་གསུམ་གྱི་སྐྱོན་གཅོད་པ་དང། གྲི་གུག་གིས་ནི་མཐར་འཛིན་གཅོད་པ་དང་། མདུང་རྩེས་ནི་ཁམས་གསུམ་གྱི་ཉོན་མོངས་པ་རྣམས་འབིགས་པ་དང་། ཐོད་པས་ནི་བདེ་བ་ཆེན་པོ་དང་། ཞགས་པས་ནི་བདེ་བ་ཆེན་པོས་རང་རྒྱུད་འཆིང་བ་དང་། ཚངས་པའི་མགོས་མྱ་ངན་ལས་འདས་པའི་གོ་འཕང་མངོན་དུ་བྱས་པ་དང་། རྡོ་རྗེ་རྩེ་ལྔ་པས་ནི་ཡེ་ཤེས་ལྔ་དང་། མགོ་རློན་ལྔ་བཅུས་ནི་བདེ་ཆེན་གྱི་ཡེ་ཤེས་ཐབས་ཤེས་ཀྱི་བདག་ཉིད་ཅན་དུ་སྦྱོར་བ་དང་། སྤྱན་གསུམ་གྱིས་ནི་དུས་གསུམ་གྱི་ཆོས་ཐམས་ཅད་གཟིགས་པ་དང་། སྟག་ལྤགས་ཀྱིས། འདོད་ཆགས་དང་བྲལ་བ་དང་། ཞལ་འགྱུར་བས་ལོག་ལྟ་སྤངས་པ་དང་། མཆེ་བ་བཞི་གཙིགས་པས་བདུད་བཞི་འཇོམས་པ་དང། ཕྱག་བཅུ་གཉིས་ཀྱིས་རྟེན་འབྲེལ་བཅུ་གཉིས་སྤྱངས་པ་དང་། ཐོད་བསྐམ་གྱིས་འོད་གསལ་ལས་གཟུགས་སྐུར་བཞེངས་པ་དང་། སྤྱི་བོའི་སྣ་ཚོགས་རྡོ་རྗེས་ནི་འཕྲིན་ལས་བཞིས་སེམས་ཅན་གྱི་དོན་མཛད་པ་དང་། མགུལ་རྒྱན་གདུ་བུ་རྣ་རྒྱན་ནོར་བུ་ཐལ་ཆེན་མཆོད་ཕྱིར་ཐོགས་ཏེ། ཕྱག་རྒྱ་དྲུག་གིས་ནི་ཕྱིན་དྲུག་དང་། ཉམས་དགུས་ནི་བདེ་བ་ཆེན་པོའི་ཡེ་ཤེས་ཀྱི་ངོ་བོར་གྱུར་པའི་ཞི་ལྷག་གཉིས་དག་པ་དང་། རལ་པ་གྱེན་དུ་བརྫེས་པས་ནི་ཡོན་ཏན་གོང་དུ་འཕེལ་བ་དང་། དྲག་པོ་ཡུམ་བཅས་མནན་པས་ནི་རྟག་ཚད་གཉིས་མནན་པ་དང་། ཚུལ་དེ་ལས་མི་འདའ་བས་ནི་འགྲོ་བ་ཀུན་ཟིལ་གྱིས་མནན་པ་དེ་མཚོན་པའི་ཕྱིར་རོ། །དེ་ལྟར་གཙོ་བོ་ཡབ་ཡུམ་གསལ་བཏབ་སྟེ་གསང་གནས་བྱིན་གྱིས་བརླབས་ནས་གནས་བཞི་བྱིན་གྱིས་བརླབ་པའི་ཚུལ་ཡོད་དེ། ཡབ་ཡུམ་གཉིས་ཀྱི་ལྟེ་བ་ལ་སོགས་པའི་གནས་བཞིིར་ཟླ་ཉིའི་དཀྱིལ་འཁོར་མེ་ལོང་གྱེན་དུ་བསླང་བ་ལྟ་བུ་རེ་རེ་བཀོད་ནས་དེའི་ངོས་སུ་ཉི་གདན་ལ་ཡབ་ཀྱི་སྔགས་དང་། ཟླ་གདན་ལ་ཡུམ་གྱི་སྔགས་རྣམས་འགོད་པར་བཤད་པ་ལྟར་བྱས་ནས་བྱིན་གྱིས་བརླབ་པ་ཡིན་པའི་ཕྱིར། དེ་ནས་དགའ་བཞི་མོས་པ་ཡིད་བྱེད་ཚུན་ཆད་ཀྱིས་དྲངས་པ་ལ་དགོས་པ་ཡོད་དེ། རིམ་པ་དང་པོའི་སྐབས་སུ་དགའ་བཞི་དངོས་གནས་ལ་འགྲུབ་པ་དང་། རྟེན་བརྟེན་པ་རྣམས་བདེ་སྟོང་གི་རྣམ་རོལ་ཏུ་འཆར་བ་དང་། རྫོགས་རིམ་གྱི་བདེ་སྟོང་དབྱེར་མེད་ཀྱི་ཡེ་ཤེས་ཁྱད་པར་ཅན་སྐྱེ་བའི་རྒྱུད་སྨིན་བྱེད་དུ་འགྱུར་བ་དང་། རྩ་རླུང་ཐིག་ལེ་རྣམས་བྱིན་གྱིས་བརླབ་པ་དང་། ཕོ་ཉ་ཁྱད་པར་ཅན་དང་འདུ་བ་རྙེད་བའི་ཆེད་ཡིན་པའི་ཕྱིར་རོ། །གཉིས་པ་འཁོར་གྱི་ལྷ་གསལ་གདབ་པ་ལ། ཐོག་མར་བདེ་ཆེན་གྱིི་འཁོར་ལོར་ལྷ་མོ་བཞི་ཐོད་པ་དང་བཅས་པ་འགོད་པ་ཡིན་ཏེ། ཕྱོགས་བཞིར་སྤྱན་སོགས་ལྷ་མོ་བཞིའི་ངོ་བོར་གྱུར་པའི་མཁའ་འགྲོ་མ་སོགས་བཞི་དང་མཚམས་བཞིར་བདུད་རྩི་ལྔས་གང་བའི་ཐོད་པ་བཞི་དགོད་པ་ཡིན་པའི་ཕྱིར། སྤྱན་སོགས་སྐུའི་རྣམ་པ་དེ་ལྟར་བསྟན་པའི་རྒྱུ་མཚན་ཡོད་དེ། སྔོན་དྲག་པོའི་ཆུང་མ་བཞི་འདུལ་བའི་ཚེ་ཚུལ་དེ་ལྟར་བསྟན་ཅིང་དེའི་རྣམ་པས་སྒྲུབ་པ་པོ་ལ་དངོས་གྲུབ་སྟེར་བའི་ཆེད་ཡིན་པའི་ཕྱིར། དེ་ནས་འཁོར་ལོ་གསུམ་གྱི་ལྷ་རྣམས་བསྐྱེད་ཚུལ་ཡོད་དེ། ཐུགས་ཀྱི་འཁོར་ལོའི་ཤར་རྩིབས་པུལླི་ར་མ་ལ་ཡར་ཁཎྜ་ཀ་པཱ་ལ་དང་རབ་གཏུམ་མ་གཉིས་འགོད་པ་ནས། དབང་ལྡན་གྱི་རྩིབས་མཱ་ལ་ཝར་རྡོ་རྗེ་སྐུ་དང་ཤིང་གྲིབ་མ་ཡབ་ཡུམ་འགོད་པ་དང་། གསུང་གི་འཁོར་ལོའི་ཤར་རྩིབས་ཀཱ་མ་རཱུ་པར་མྱུ་གུ་ཅན་དང་ས་སྲུང་མོ་ཡབ་ཡུམ་འགོད་པ་ནས། དབང་ལྡན་གྱི་རྩིབས་ལ་མིག་མི་བཟང་དང་བྱ་གདོང་མ་ཡབ་ཡུམ་འགོད་པ་དང་། སྐུའི་འཁོར་ལོའི་ཤར་རྩིབས་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ་ཡབ་ཡུམ་འགོད་པ་ནས། དབང་ལྡན་གྱི་རྩིབས་ལ་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་ཡབ་ཡུམ་འགོད་པ་ཡིན་པའི་ཕྱིར། དེ་ནས་དམ་ཚིག་གི་འཁོར་ལོར་ལྷ་མོ་བརྒྱད་འགོད་པའི་ཚུལ་ཡོད་དེ། ཤར་ལ་སོགས་པའི་སྒོ་བཞིར་ཁྭ་གདོང་མ་སོགས་བཞི་དང་། མེ་ལ་སོགས་པའི་མཚམས་བཞིར་གཤིན་རྗེ་བརྟན་མ་སོགས་བཞི་སྒྲུབ་ཐབས་ནས་འབྱུང་བ་བཞིན་འགོད་པ་ཡིན་པའི་ཕྱིར། འོ་ན་སྒོ་མཚམས་མ་བརྒྱད་ལ་ཡབ་མེད་པ་ཅི་ཡིན་ཞེ་ན། དངོས་སུ་མེད་ཀྱང་དོན་གྱིས་ཡོད་པ་ཡིན་ཏེ། སྒོམ་བཞིས་ཡབ་རྣམས་གདོང་བརྙན་གྱི་ཚུལ་དུ་སྦས།མཚམས་མ་བཞིས་ཡབ་རྣམས་ཕྱེད་གཟུགས་ཀྱི་ཚུལ་དུ་སྦས་པའི་ཕྱིར་རོ། །སྐུ་གསུང་ཐུགས་ཀྱི་འཁོར་ལོ་གསུམ་ལ་གནས་གསུམ་གྱི་མིང་གིས་འདོགས་པའི་རྒྱུ་མཚན་ཡོད་དེ། སྔོན་ཁཎྜ་ཀ་པཱ་ལ་ལ་སོགས་པའི་མིང་ཅན་གྱི་ལྷ་བཞི་དང་དྲི་ཟ་བཞི་ན མ་མཁའ་ནས་འོངས་ཏེ། པཱུ་ལླི་ར་མ་ལ་ཡ་ལ་སོགས་པའི་ཡུལ་བརྒྱད་བཟུང་བ་དང་། མྱུ་གུ་ཅན་ལ་སོགས་པའི་མིང་ཅན་གྱི་གནོད་སྦྱིན་བཞི་དང་སྲིན་པོ་བཞིས་སྟེང་ནས་འོངས་ཏེ་ཀཱ་མ་རཱུ་པ་ལ་སོགས་པའི་ཡུལ་བརྒྱད་བཟུང་བ་དང་། སྟོབས་པོ་ཆེ་ལ་སོགས་པའི་མིང་ཅན་གྱི་ཀླུ་བཞི་དང་ལྷ་མ་ཡིན་བཞི་ས་འོག་ནས་འོངས་ཏེ་པྲེ་ཏ་པཱུ་རི་ལ་སོགས་པའི་ཡུལ་བརྒྱད་བཟུང་ནས་སྤྱོད་པའི་ཚེ། དེ་རྣམས་རིམ་པ་བཞིན་འཁོར་ལོ་གསུམ་གྱི་ལྷ་ཡབ་ཡུམ་རྣམས་ཀྱིས་བཏུལ་ནས་མིང་ཆ་ལུགས་འདྲ་བར་མཛད་པས་འདུལ་བྱེད་ཀྱི་ལྷ་ལ་གདུལ་བྱའི་མིང་དུ་བཏགས་པ་ཡིན་པའི་ཕྱིར། དམ་ཚིག་གི་འཁོར་ལོའི་ལྷ་ལ་མིང་དེ་ལྟར་འདོགས་པའི་རྒྱུ་མཚན་ཡོད་དེ། དེ་དག་གི་མིང་ཅན་གྱི་མིའམ་ཅི་བཞི་དང་ཕྲ་མེན་མ་བཞིས་དུར་ཁྲོད་བརྒྱད་དམ། འཐུང་གཅོད་སོགས་བཟུང་ནས་གནས་པའི་ཚེ་སྒོ་མཚམས་མ་བརྒྱད་ཀྱིས་བཏུལ་ཏེ་རྒྱན་མིང་ཆ་ལུགས་དེ་རྣམས་དང་འདྲ་བར་མཛད་པས་དེ་ལྟར་དུ་བཏགས་པའི་ཕྱིར་རོ། །གདུལ་བྱ་དེ་རྣམས་སྔོན་གང་གི་འཁོར་ཡིན་པ་ཡོད་དེ། དྲག་པོ་དབང་ཕྱུག་ཆུང་མ་དང་བཅས་པའི་འཁོར་ཡིན་པའི་ཕྱིར། དེ་རྣམས་ཇི་ལྟར་བཏུལ་པའི་ཚུལ་ཡོད་དེ། སྔོན་སྟོན་པ་རྡོ་རྗེ་འཆང་ཉིད་བཅོམ་ལྡན་འདས་འཁོར་ལོ་བདེ་མཆོག་གི་སྐུར་བཞེངས་ནས་དྲག་པོ་ཆུང་མ་དང་བཅས་པ་ཞབས་འོག་ཏུ་མནན་ནས་བཏུལ་བའི་ཚེ། བྱང་ཆུབ་སེམས་དཔའ་ཀུན་ཏུ་བཟང་པོ་དང་། འཇམ་དཔལ་དང་། འཇིག་རྟེན་དབང་ཕྱུག་དང་། སའི་སྙིང་པོ་དང་། ཕྱག་ན་རྡོ་རྗེ་དང་། བྱམས་པ་དང་། ནམ་མཁའི་སྙིང་པོ་དང་། ནམ་མཁའ་མཛོད་རྣམས་དང་། སྒྲིབ་སེལ་དང་། སྤོས་ཀྱི་གླང་པོ་དང་། བློ་གོས་མི་ཟད་པ་དང་། ཡེ་ཤེས་ཏོག་དང་། སྤོབས་པ་བརྩེགས་པ་དང་། མྱ་ངན་དང་མུན་པ་ཐམས་ཅད་ངེས་པར་སེལ་བ་དང་། ངན་སོང་ཀུན་འདྲེན་དང་། དྲ་བ་ཅན་གྱི་འོད་རྣམས་དང་། ཟླ་བའི་འོད་དང་། རིན་ཆེན་འོད་དང་། ཉི་མའི་འོད་དང་། རྡོ་རྗེའི་འོད་དང་། ནོར་བཟང་དང་། མཐུ་ཆེན་ཐོབ་དང་། བློ་གྲོས་རྒྱ་མཚོ་དང་། བཟང་སྐྱོང་རྣམས་ནི་རིམ་པ་བཞིན་དུ་ཁཎྜ་ཀ་པཱ་ལ་ལ་སོགས་པའི་དཔའ་བོ་ཉེར་བཞི་དང་། རྡོ་རྗེ་ཕོ་ཉ་མོ་དང་། སྐུལ་བྱེད་མ་དང་། རིན་ཆེན་སྒྲོལ་མ་དང་། རྡོ་རྗེ་འོད་བྱེད་མ་དང་། རོ་ལངས་མ་དང་། རྡོ་རྗེ་གཞོན་ནུ་དང་། ཀམྤོ་ཛི་དང་། དབང་ཕྱུག་མ་རྣམས་དང་། ཡེ་ཤེས་སྒྲོལ་མ་དང་། རྡོ་རྗེ་འཇིགས་མ་དང་། གནྡྷ་རི་དང་། རྒྱལ་བ་ཅན་དང་། གཟུགས་རྡོ་རྗེ་མ་ལ་སོགས་པ་རྣམས་དང་། རྒྱལ་མཚན་རྩེ་མོའི་དཔུང་རྒྱན་དང་། སོ་སོར་འབྲང་མ་དང་། རྨ་བྱ་ཆེན་མོ་དང་། རི་ཁྲོད་ལོ་མ་ཅན་དང་། རྡོ་རྗེ་ལྕགས་སྒྲོགས་མ་དང་། ཕྱིར་ཟློག་མ་དང་། གཙུག་གཏོར་མ་དང་། འཇིགས་བྱེད་མ་རྣམས་ནི་རིམ་པ་བཞིར་རབ་གཏུམ་མ་ལ་སོགས་པའི་དཔའ་མོ་གཉིས་བཞིར་སྤྲུལ་པ་དང་། ཁྲོ་བོ་འཇིག་རྟེན་གསུམ་རྒྱལ་སོགས་སྒོ་མཚམས་མ་བརྒྱད་དུ་སྤྲུལ་ནས་གདུལ་བྱ་དེ་དག་བཏུལ་བའི་ཕྱིར་རོ། །ཕྱིའི་ཡུལ་ཉེར་བཞི་པོ་རྣམས་ནི་འཛམ་བུའི་གླིང་དུ་ཡོད་ཀྱང་འཕགས་ཡུལ་ཁོ་ནར་མ་ངེས་ཏེ། དྲག་པོ་འཇིགས་བྱེད་ཡབ་ཡུམ་ཡུལ་མ་ག་དྷ་ན་གནས་ཤིང་། གཞན་རྣམས་འཕགས་ཡུལ་དང་བོད་སོགས་ཀྱི་ཡུལ་གཞན་དག་ནའང་ཡོད་པར་བཤད་པའི་ཕྱིར་རོ། །འོ་ན་ཁྭ་གདོང་མ་ལ་སོགས་པའི་གདོང་བརྙན་བཞི་པོ་དེ་དབུ་རིལ་པོ་ཡིན་ནམ། མིན་ཞེ་ན། ཕྱི་མ་ལྟར་བྱ་སྟེ། འདིའི་དོགས་གཅོད་ལ་རྗེས་འདོད་འཇོ་ལས། བྱ་རོག་གདོང་ལ་སོགས་པ་ནི་དབུ་རིལ་པོ་མིན་གྱི། གདོང་གི་ཕྱོགས་ཙམ་ཞིག་དེ་རྣམས་ཀྱི་གདོང་ཡིན་ཏེ། དེ་ལྟ་མ་ཡིན་ན་རྣ་རྒྱན་སོགས་གདགས་སུ་མི་རུང་ངོ་ཞེས་བོད་ཀྱི་བླ་མ་དག་གསུང་ངོ་། །ཞེས་སྔ་མའི་བཞེད་པ་བཀོད་པ་ལྟར་བྱས་ཆོག་པའི་ཕྱིར་རོ། །དེ་ལྟ་བུའི་དཔའ་བོ་དང་མཁའ་འགྲོ་རྣམས་ཀྱི་ངོ་བོ་གང་ཡིན་ཤེས་པར་བྱས་ནས་དེ་ལྟར་བསྒོམས་པ་ལ་དགོས་པ་ཡོད་དེ། སྒྲུབ་པ་པོ་རང་ཉིད་ལ་བྱིན་གྱིས་རློབ་པ་དང་དངོས་གྲུབ་སྟེར་བར་འགྱུར་བའི་ཆེད་ཡིན་པའི་ཕྱིར་རོ། །དེ་ལྟ་བུའི་ལྷ་རེ་གཉིས་པའི་སྒྲུབ་ཐབས་འདི་ནི་བདེ་མཆོག་གི་སྒྲུབ་ཐབས་གཞན་ཐམས་ཅད་ཀྱི་ནང་ནས་གཙོ་བོ་ཡིན་ཏེ། དཀྱིལ་འཁོར་འདི་ནི་བདེ་མཆོག་གི་རྩ་བའི་དཀྱིལ་འཁོར་དུ་གསུངས་ཤིང་། རིགས་དྲུག་པའི་དབང་དུ་བྱས་པར་མ་ཟད། རིགས་ཐམས་ཅད་བསྡུས་པའི་དབང་དུ་བྱས་པའི་ཕྱིར་ཏེ། འཁོར་གྱི་ལྷ་ཐམས་ཅད་ཀྱང་དཔྲལ་པར་རྡོ་རྗེའི་འཕྲེང་བ་འཛིན་པ་ལ་མཚོན་དོན་ཁྱད་པར་ཅན་ཡོད་པའི་ཕྱིར་རོ། །གསུམ་པ་ཕྱོགས་མཐུན་གྱི་དག་པར་བརྗོད་པ་དང་ལུས་དཀྱིལ་བསྒོམ་ཚུལ་ལ་གཉིས། དག་པ་བསྒོམ་ཚུལ་དང་། ལུས་དཀྱིལ་བསྒོམ་ཚུལ་ལོ། །དང་པོ་ལ་སྤྱིར་དག་པ་བསྒོམ་པ་ནི་སྐབས་འདི་ཁོ་ནར་མ་ངེས་ཏེ། བཟླས་པའི་མཇུག་ཏུ་བསྒོམ་པ་དང་། ལས་དཀྱིལ་གྱི་དེ་མ་ཐག་བསྒོམ་པ་དང་། མཆོད་བསྟོད་ཀྱི་མཇུག་ཏུའང་བསྒོམ་པར་བཤད་པ་ལྟར་ཡིན་པའི་ཕྱིར་རོ། །བྱང་ཕྱོགས་སོ་བདུན་པོ་འདི་ལ་ཐུན་མོང་བ་དང་ཐུན་མོང་མ་ཡིན་པ་གཉིས་འབྱུང་བའི་དང་པོ་ཡོད་དེ། སྤྱི་འགྲོ་ལྟར་དྲན་པ་ཉེར་ཞག་བཞི། ཡང་དག་སྤོང་པ་བཞི། རྫུ་འཕྲུལ་གྱི་རྐང་པ་བཞི། དབང་པོ་ལྔ། སྟོབས་ལྔ། བྱང་ཆུབ་ཀྱི་ཡན་ལག་བདུན། འཕགས་ལམ་ཡན་ལག་བརྒྱད་དང་བཅས་པ་རྣམས་ཡིན་པའི་ཕྱིར། གཉིས་པ་ཡོད་དེ། བྱང་ཕྱོགས་སོ་བདུན་གྱི་བྱེད་ལས་དང་ལྡན་པའི་བདེ་ཆེན་གྱི་ཡེ་ཤེས་ལ་ལྡོག་པའི་སྒོ་ནས་སྔར་ལྟར་འབྱེད་པ་ཡིན་པའི་ཕྱིར། སྒྲུབ་པ་པོ་དབང་པོ་རྣོ་རྟུལ་གྱི་སྒོ་ནས་བསྒོམ་ཚུལ་ཡོད་དེ། དབང་པོ་རྟུལ་པོས་སོ་བདུན་ལྷར་ཤར་བ་ཙམ་བསྒོམ་པ་དང་། རྣོན་པོས་ནི་སོ་བདུན་པོ་རང་བཞིན་མེད་པར་རྟོགས་པའི་བདེ་ཆེན་གྱི་ཡེ་ཤེས་དེ་ཉིད་ལྷ་རེ་གཉིས་སུ་ཤར་བའི་ཚུལ་གྱིས་སྒོམ་པ་ཡིན་པའི་ཕྱིར། གལ་ཏེ་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་ཡོད་ཅིང་། ལྷ་ལ་རེ་གཉིས་ཡོད་པས་གྲངས་མི་མཐུན་ནོ་སྙམ་ན། དེའི་སྐྱོན་མེད་དེ། དཔའ་བོ་དང་དཔའ་མོ་ཉེར་བཞི་ཡབ་ཡུམ་ཟུང་རེ་གྲངས་གཅིག་ཏུ་བྱས་པ་ཡིན་པའི་ཕྱིར། དག་པ་དཔའ་མོ་ཉེར་བཞི་དང་སྦྱར་ནས་དཔའ་བོ་ཉེར་བཞི་དང་དངོས་སུ་མ་སྦྱར་ཡང་ཉེས་པ་མེད་དེ། ཡུམ་གྱི་དག་པས་ཡབ་རྣམས་ཀྱང་དོན་གྱིས་གོ་བར་བྱ་བ་ཡིན་པའི་ཕྱིར་རོ། །སོ་སོར་སྦྱོར་ཚུལ་ཡོད་དེ། སྒྲུབ་ཐབས་ལས་གསལ་བ་ལྟར་ཡིན་པའི་ཕྱིར་རོ། །དག་པ་འདི་ལྟར་དྲན་པ་ནི་རྒྱས་པའི་དབང་དུ་བྱས་པ་ཡིན་གྱི། བསྡུས་ནས་དྲན་པར་བྱས་ཀྱང་རུང་སྟེ། འདོད་འཇོ་ལས། ལྷ་རྣམས་རེ་རེ་ནས་སམ། སྤྱིར་བསྡུས་ནས་བལྟ་བར་བྱ་སྟེ། ཆོས་སོ་བདུན་གྱི་ངོ་བོར་ལྟ་བའི་གཙོ་བོའི་དོན་དེ་ཡིན་པའི་ཕྱིར་དང་། ཞེས་གསུངས་པའི་ཕྱིར་རོ། །དེ་ལྟར་བསྒོམ་པར་བསྟན་པ་ལ་དགོས་པ་ཡོད་དེ། ལམ་འདིའི་གདུལ་བྱས་ཕར་ཕྱིན་ཐེག་པའི་ལམ་རྣམས་ཤེས་དགོས་པར་བསྟན་པ་དང་། ཐེག་པ་གསུམ་གྱི་ལམ་གྱི་གནད་ཐམས་ཅད་བྱེད་ལས་ཀྱི་སྒོ་ནས་ལམ་འདིར་འདུས་པར་ཤེས་པ་དང་། རིམ་པ་དང་པོའི་སྐབས་སུ་གཟུགས་ཅན་གྱི་ལྷའི་སྣང་བ་ཙམ་ལ་ཞེན་པ་སྤངས་ནས་བདེ་ཆེན་གྱི་ཡེ་ཤེས་ཀྱི་གཟུང་རྣམ་ལྷའི་རྣམ་པར་ཤར་བ་ཤེས་པ་དང་། རྫོགས་རིམ་དང་འབྲས་བུའི་སྐབས་སུ་བྱང་ཕྱོགས་སོ་བདུན་རང་བཞིན་མེད་པར་མངོན་སུམ་དུ་རྟོགས་པའི་བདེ་ཆེན་གྱི་ཡེ་ཤེས་དེ་ཉིད་ལྷ་རེ་གཉིས་ཀྱི་སྐུར་བཞེངས་པའི་དགེ་རྩ་སྨིན་བྱེད་དུ་འགྱུར་བར་ཤེས་པའི་ཆེད་ཡིན་པའི་ཕྱིར་རོ། །གཉིས་པ་ལ་གཉིས། ལུས་དཀྱིལ་སྤྱིའི་རྣམ་གཞག་མདོར་བསྟན་པ་དང་། བསྒོམ་ཚུམ་དངོས་སོ། །དང་པོ་ནི། སྤྱིར་ལུས་དཀྱིལ་བསྒོམ་ཚུལ་ལ་གོ་རིམ་མི་འདྲ་བ་ཡོད་དེ། མངོན་བརྗོད་ལས་གསུངས་པའི་རྗེས་སུ་འབྲངས་ནས་ལུས་དཀྱིལ་སྔོན་ལ་བསྒོམས་ནས་ཕྱི་དཀྱིལ་རྗེས་སུ་བསྒོམ་པ་དང་། ལུས་དཀྱིལ་དང་ཕྱི་དཀྱིལ་དུས་མཉམ་དུ་སྒོམ་པ་དང་། ཕྱི་དཀྱིལ་གྱི་རྗེས་སུ་ལུས་དཀྱིལ་བསྒོམ་པར་བྱེད་པའི་ཚུལ་གསུམ་ལས་འདིར་ཕྱི་མ་ལྟར་བྱ་བ་ཡིན་པའི་ཕྱིར། དེར་མ་ཟད་ཕྱིན་དཀྱི་ལོགས་སུ་མི་སྒོམ་པར་ལུས་དཀྱིལ་ཙམ་བསྒོམ་པའི་ཚུལ་ཡོད་དེ། དྲིལ་བུ་པས་དེ་ལྟར་དུ་བཤད་པའི་ཕྱིར་རོ། །གཉིས་པ་ལ་གཉིས། ལུས་རྟེན་གྱི་དཀྱིལ་འཁོར་དུ་བསྒོམ་པ་དང་། བརྟེན་པའི་དཀྱིལ་འཁོར་དུ་བསྒོམ་པའི་ཚུལ་ལོ། །དང་པོ་ལ་རྗེ་ས་སྐྱ་བ་དག་ན་རེ། སྒྲུབ་པ་པོའི་ལུས་འདི་ལ་བདེ་མཆོག་གི་རྟེན་བརྟེན་པ་གདོད་ནས་གྲུབ་པ་གསལ་འདེབས་པ་ཡིན་ནོ་གསུང་། དེ་ནི་འཐད་པ་མ་ཡིན་ཏེ། ལུས་ཅན་རྣམས་སངས་རྒྱས་སུ་ཐལ་བ་དང་། གསར་དུ་བསྐྱེད་མི་དགོས་པ་སོགས་སུ་འགྱུར་བའི་ཕྱིར་རོ། །བསྒོམ་པའི་ཚུལ་ཡོད་དེ། རྐང་པ་གཉིས་པ་བགྲད་པ་གཞུའི་དབྱིབས་སུ་ཡོད་པ་ཞེས་སོགས་འབྱུང་བ་ལྟར་ཡིན་ལ། དེ་ཡང་དཔེར་ན། སྣམ་བུ་སྐད་ཅིག་སྔ་མས་ཉེར་ལེན་དང་རྒྱ་སྐྱེགས་སྐད་ཅིག་སྔ་མས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་སྣམ་བུ་སྐད་ཅིག་ཕྱི་མ་ཚོན་ཅན་དུ་འགྱུར་པ་དེ་བཞིན་དུ། ཕྱི་དཀྱིལ་གྱི་རླུང་དཀྱིལ་བསྒོམས་པའི་རྒྱུན་དང་རང་གི་རྐང་པ་གཉིས་བགྲད་པ་མཉམ་དུ་ཚོགས་པས་ཉེར་ལེན་དང་བྱེད་རྐྱེན་བྱས་ནས་ཕྱི་དཀྱིལ་གྱི་རླུང་དཀྱིལ་སྐད་ཅིག་ཕྱི་མ་ལུས་དཀྱིལ་གྱི་རླུང་དཀྱིལ་དུ་འགྱུར་བ་ཡིན་ལ། དེ་བཞིན་དུ་ཕྱི་དཀྱིལ་གྱི་མེ་སོགས་དང་སུམ་མདོ་སོགས་ལུས་ཀྱི་ཆ་དེ་དང་དེ་འཕྲད་པ་ལས་ལུས་དཀྱིལ་གྱི་གཞལ་ཡས་ཁང་གི་ཆ་དེ་དང་དེར་འགྱུར་པར་སྒོམ་པ་ཡིན་པའི་ཕྱིར། ལུས་ཀྱི་ཆ་དེ་དང་དེ་རྟེན་དང་བརྟེན་པ་དེ་དང་དེར་གྱུར་པར་བསྒོམས་པའི་ཚུལ་གྱིས་ལུས་དཀྱིལ་དུ་འགྲོོ་བ་ཡིན་གྱི། ལུས་ལ་བཀོད་པ་ཙམ་གྱིས་ནི་ལུས་དཀྱིལ་དུ་མི་འགྲོ་སྟེ། དེ་ནི་རྒྱུད་སྡེ་འོག་མ་ལ་ཡང་ཡོད་པའི་ཕྱིར་རོ། །དེས་ན་གཞལ་ཡས་ཁང་གཉིས་བྲེ་ནང་དུ་བྲེ་བཅུག་པའི་ཚུལ་གྱིས་གནས་པ་ནི་མ་ཡིན་ཏེ། ཕྱི་དཀྱིལ་གྱི་རིགས་རྒྱུན་ཉིད་ལུས་དཀྱིལ་གྱི་རྟེན་གཞལ་ཡས་ཁང་དུ་འགྱུར་བའི་ཕྱིར། དཔེར་ན། འདུས་པའི་ལུས་དཀྱིལ་གྱི་གཞལ་ཡས་ཁང་བཞིན་ནོ། །དེ་ལྟར་བསྒོམས་པ་ལ་དགོས་པ་ཡོད་དེ། འབྲས་བུའི་སྐབས་སུ་ལུས་ཀྱི་ཆ་དེ་དང་དེ་ལུས་དཀྱིལ་གྱི་གཞལ་ཡས་ཁང་གི་ཆ་དེ་དང་དེར་དངོས་གནས་སུ་འགྱུར་བའི་ཆེད་ཡིན་པའི་ཕྱིར་རོ། །དེ་བཞིན་དུ་པཱུ་ཛ་ལ་སོགས་པ་ཡུལ་ཉེར་བཞིའི་མིང་ཡིག་དང་པོ་ཐིག་ལེས་བརྒྱན་པ་རྣམས་ཡོངས་སུ་གྱུར་པ་ལས། རྩིབས་ཁོང་སྟོང་རྩིབས་ཤུན་གྱི་རྣམ་པ་ཅན་དུ་བསྐྱེད་ནས་ཕྱིའི་ཡུལ་ཉེར་བཞིའི་ངོ་བོར་བསྒོམས་པ་ལ་དགོས་པ་ཡོད་དེ། ཡུལ་ཉེར་བཞིའི་དཔའ་བོ་དང་རྣལ་འབྱོར་མ་རྣམས་ཀྱིས་སྒྲུབ་པ་པོའི་རྩ་རླུང་ཐིག་ལེ་རྣམས་བྱིན་གྱིས་རློབ་པར་འགྱུར་པའི་ཆེད་ཡིན་པའི་ཕྱིར་རོ། །གཉིས་པ་ལ་ལུས་དཀྱིལ་འགོད་པའི་གཞི་ལ་མི་འདྲ་བ་ཡོད་དེ། ནག་པོ་སྤྱོད་པས་རྒྱུ་རྡོ་རྗེ་འཛིན་པ་ཡབ་ཡུམ་བསྐྱེད་པ་ཞུ་བ་ལས་བྱུང་བའི་འབྲས་བུ་རྡོ་རྗེ་འཛིན་པའི་ལུས་ལ་འགོད་པ་དང་། དྲིལ་བུ་པས་ཕྱི་དཀྱིལ་སྔར་མི་སྒོམ་པའི་གཞིའི་ཧེ་རུ་ཀའི་ལུས་ལ་འགོད་པ་ཡིན་ལ། ལཱུ་ཧི་བས་ནི་ཕྱིར་དཀྱིལ་གྱི་རྟེན་བརྟེན་པ་རྣམས་ཅིག་ཅར་དུ་བསྐྱེད་པའི་ཧེ་རུ་ཀའི་ལུས་ལ་འགོད་པ་ཡིན་པའི་ཕྱིར་རོ། །ཇི་ལྟར་འགོད་པའི་ཚུལ་ཡོད་དེ། སྙིང་ག་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་གི་བྱང་སེམས་བ་མོ་འཛག་པ་ཉུངས་ཀར་སྦོམ་པོའི་ཚད་ཀྱི་དཔྱིད་ཧཱུཾ་ཡིག་ཡོངས་སུ་གྱུར་པ་ལས་གཙོ་བོ་དང་། ལྟེ་བའི་དམར་ཆ་གཏུམ་མོའི་མེའི་གཟུགས་ཀྱི་ཐིག་ལེ་ཡོངས་སུ་གྱུར་པ་ལས་ཡུམ་བསྐྱེད་དེ། དཔྱིད་དང་ཐིག་ལེ་གཉིས་སྙིང་གར་འཕྲད་ནས་སྙོམས་པར་འཇུག་པར་མོས་པ་ཡིན་པའི་ཕྱིར་རོ། །ཡབ་ཀྱི་སྙིང་གའི་མི་ཤིགས་པའི་ཐིག་ལེ་དེ་ལ་དཔྱིད་ཅེས་བརྗོད་པའི་རྒྱུ་མཚན་ཡོད་དེ། དཔྱིད་དུས་དེས་རྩི་ཤིང་སོགས་རྒྱས་པར་བྱེད་ཅིང་། གཞན་ཡིད་དགའ་བར་བྱེད་པ་ལྟར། ཐིག་ལེ་དེས་ཀྱང་བདེ་སྟོང་གི་ཡེ་ཤེས་བསྐྱེད་ཅིང་རྒྱས་པར་བྱེད་པའི་སྒོ་ནས་སྒྲུབ་པ་པོའི་ཡིད་དགའ་བར་བྱེད་པས་ན་དེ་ལྟར་དུ་བརྗོད་པའི་ཕྱིར་རོ། །དེ་ནས་འཁོར་རྣམས་བསྐྱེད་ཚུལ་ཡོད་དེ། སྙིང་གའི་ཕྱོགས་ཀྱི་རྩ་འདབ་བཞི་ལས་མཁའ་འགྲོ་མ་སོགས་བཞི་དང་། མཚམས་ཀྱི་རྩ་འདབ་བཞི་ལས་ཐོད་པ་བཞི་དང་། སྐྲ་མཚམས་སོགས་ལུས་ཀྱི་གནས་ཉེར་བཞིའི་རྩ་ཁམས་རྣམས་ལས་དཔའ་བོ་དཔའ་མོ་རྣམས་དང་། ལྕེའི་རྩ་བར་གནས་པའི་རྩ་སོགས་ལས་སྒོ་མཚམས་མ་རྣམས་བསྐྱེད་པ་ཡིན་པའི་ཕྱིར། རྩ་ཁམས་ཐུན་མོང་དུ་ལྷར་བསྐྱེད་པའམ། ཁམས་ལས་དཔའ་བོ་རྣམས་དང་རྩ་ལས་དཔའ་མོ་རྣམས་བསྐྱེད་པར་ཡང་རུང་སྟེ། མཁའ་འགྲོ་རྒྱ་མཚོར། ཉི་ཤུ་རྩ་བཞིར་དབྱེ་བ་ཡིས། །སྐུ་གསུང་ཐུགས་ཀྱི་འཁོར་ལོ་ཡིན། །གནས་རྣམས་དག་ནི་ཐམས་ཅད་དུ། །རྩ་རྣམས་ཀུན་ནི་ཡང་དག་བཤད། །ཡུལ་འདི་རྣམས་ཀྱི་བུ་མོ་གང་། །རྩ་ཡི་གཟུགས་ཀྱི་གནས་སོ་ཞེས། །ཞེས་དང་། དྲིལ་བུ་ཞབས་ཀྱིས་ཀྱང་། འདི་དག་གནས་སུ་རྣལ་འབྱོར་མ། །རྩྭ་ཡིན་དཔའ་བོ་ཉི་ཤུ་བཞི། །ལུས་ཀྱི་ཁམས་སུ་བརྟག་པར་བྱ། །ཞེས་གསུངས་པའི་ཕྱིར་རོ། །འཁོར་ལོའི་རྣམ་པ་ཅན་གྱི་རྩིབས་རྣམས་ཕྱིའི་ཡུལ་ཉེར་བཞི་དངོས་དང་བསྐྱེད་པའི་ལྷ་རྣམས་ཡུལ་དེ་ན་བཞུགས་པའི་དཔའ་བོ་རྣལ་འབྱོར་མ་རྣམས་དངོས་གནས་སུ་མོས་ནས་བསྒོམས་དགོས་པ་ཡིན་ལ། དེ་ལྟར་བསྒོམས་པ་ལ་དགོས་པ་ཡོད་དེ། གནས་དེ་དག་གི་རྩ་རླུང་ཐིག་ལེ་རྣམས་དཔའ་བོ་རྣལ་འབྱོར་རྣམས་ཀྱིས་བྱིན་གྱིས་བརླབས་པ་ལ་བརྟེན་ནས། ལུས་ཀྱི་རྩ་བདུན་ཁྲི་ཉིས་སྟོང་གི་རླུང་དང་ཐིག་ལེ་རྣམས་གནས་ཉེར་བཞིའི་རྩ་ནས་བརྒྱུད་དེ་དྷཱུ་ཏཱིའི་ནང་དུ་འཇུག་པའི་རྒྱུད་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར་རོ། །དབང་པོའི་སྒོ་བརྒྱད་ཀྱི་རྩ་རྣམས་སྒོ་མཚམས་མ་བརྒྱད་དུ་བསྒོམས་པ་ལ་དགོས་པ་ཡོད་དེ། གནས་དེ་དག་གི་རྩ་རླུང་ཐིག་ལེ་རྣམས་དེ་རྣམས་ཀྱིས་བྱིན་གྱིས་རླབས་ཏེ། དབང་པོའི་སྒོ་ནས་རྒྱུ་བའི་ལས་རླུང་རྣམས་དྷཱུ་ཏཱིར་འཇུག་པའི་རྒྱུད་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར། དེ་ལྟར་ཡིན་ཏེ། རྗེས་སྐབས་འདིའི་སྨོན་ལམ་ལས། སྒོ་མཚམས་མ་རྣམས་དབང་པོའི་སྒོར་བསྒོམས་པས། །ལས་རླུང་དབང་པོའི་སྒོ་ནས་ལྡོག་པར་ཤོག །ཉེར་བཞིའི་ཡུལ་དུ་དཔའ་བོ་དཔའ་མོ་རྣམས། །བསྒོམས་པས་རླུང་རྣམས་ཉེར་བཞིའི་རྩར་འདུས་ཤོག །ཞེས་གསུངས་པའི་ཕྱིར་རོ། །སྙིང་གའི་ཕྱོགས་མཚམས་སུ་ལྷ་མོ་བཞི་དང་ཐོད་པ་བཞི་བསྒོམས་པ་ཡང་ཚུལ་དེ་ལྟར་ཡིན་ཏེ། དེ་ཉིད་ལས། ཆོས་ཀྱི་འཁོར་ལོའི་འདབ་མར་བདེ་ཆེན་གྱི། །ལྷ་རྣམས་བསྒོམས་པས་སླར་ཡང་རླུང་རྣམས་ནི། །སྙིང་གའི་ཕྱོགས་དང་མཚམས་ཀྱི་རྩ་བརྒྱད་དུ། །འདུས་ནས་དབུས་ཀྱི་དྷཱུ་ཏཱིར་འཇུག་པར་ཤོག །ཞེས་གསུངས་པའི་ཕྱིར་རོ། །སྙིང་གར་གཙོ་བོ་ཡབ་ཡུམ་བསྒོམས་པའི་གནད་ཀྱང་དེ་ལྟར་ཡིན་ཏེ། མཐར་རླུང་ཐམས་ཅད་སྙིང་གའི་དྷཱུ་ཏཱིར་ཐིམ་ནས་རྫོགས་རིམ་གྱི་ལམ་ཐམས་ཅད་རྫོགས་པར་སྐྱེ་བའི་དགེ་རྩ་སྨིན་བྱེད་དུ་འགྱུར་བའི་ཆེད་ཡིན་པའི་ཕྱིར་ཏེ། དེ་ཉིད་ལས། ནང་གི་རྗེ་བཙུན་ཡབ་ཡུམ་བསྒོམས་པ་ལས། །དཔྱིད་དང་ཐིག་ལེ་ཕན་ཚུན་སྙོམས་ཞུགས་ནས། །རྫོགས་པའི་རིམ་པ་མཆོག་རྣམས་སྐྱེ་བ་ཡི། །དགེ་བའི་རྩ་བ་ཡོངས་སུ་སྨིན་པར་ཤོག །ཅེས་གསུངས་པའི་ཕྱིར་རོ། །མདོར་ན་འདི་ལྟ་བུའི་ལུས་དཀྱིལ་བསྒོམས་པ་ནི་གནད་ཤིན་ཏུ་ཆེ་བ་ཡིན་ཏེ། དེ་ནི་ལུགས་འདིའི་ཐུན་མོང་མ་ཡིན་པའི་ཁྱད་ཆོས་སུ་འགྱུར་བའི་ཕྱིར་ཏེ། དེ་ལྟར་བསྒོམས་པས་ཕྱིའི་ཡུལ་ཉེར་བཞིན་བཞུགས་པའི་དཔའ་བོ་དང་རྣལ་འབྱོར་མ་རྣམས་ཡིད་ལྟར་མགྱོགས་པའི་ཤུགས་ཀྱིས་བྱོན་ནས། གཟིགས་པ་ཙམ་གྱིས་རྒྱུད་བྱིན་གྱིས་བརླབས་ཏེ་རླུང་ཐིམ་ནས་ལྷན་སྐྱེས་ཀྱི་ཡེ་ཤེས་སྐྱེ་བའི་ནུས་པ་ཁྱད་པར་ཅན་འཇོག་པར་འགྱུར་བའི་ཕྱིར་ཏེ། རྩ་རྒྱུད་ལས། དེ་རྣམས་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པ་ཡིན། །ཞེས་དང་། མངོན་བརྗོད་ལས་ཀྱང་། དེ་རྣམས་དགྱེས་ནས་དངོས་གྲུབ་མཆོག །ཇི་ལྟར་འདོད་བཞིན་སྩོལ་བར་མཛད། །ཞེས་གསུངས་པའི་ཕྱིར། དེ་ལྟར་དཔའ་བོ་དང་རྣལ་འབྱོར་མ་རྣམས་ཀྱིས་སྒྲུབ་པ་པོ་ལ་བྱིན་གྱིས་བརླབས་པ་ལ་བརྟེན་ནས་ཕོ་ཉ་གསུམ་པོ་གང་རུང་དང་འདུ་བ་རྙེད་ནས་ལྷན་སྐྱེས་ཀྱི་ཡེ་ཤེས་ཁྱད་པར་ཅན་མངོན་དུ་བྱེད་པར་འགྱུར་བའི་ཚུལ་ཡོད་དེ། དང་པོར་སྔགས་སྐྱེས་ཀྱི་རྣལ་འབྱོར་མ་རྣམས་དང་འདུ་བ་རྙེད། དེ་ནས་ཞིང་སྐྱེས་ཀྱི་རྣལ་འབྱོར་མ་རྣམས་དང་འདུ་བ་རྙེད། དེ་ནས་ལྷན་སྐྱེས་ཀྱི་རྣལ་འབྱོར་མ་རྣམས་དང་འདུ་བ་རྙེད་ཅིང་། དེ་རྣམས་ཀྱིས་ལམ་བགྲོད་པའི་གྲོགས་མཛད་པ་ལ་བརྟེན་ནས་ལྷན་སྐྱེས་ཀྱི་བདེ་བ་སྐྱེ་ཞིང་བདེ་བ་དེས་སྟོང་པ་ངེས་པའི་བདེ་སྟོང་དབྱེར་མེད་བསྒོམས་པ་ལ་བརྟེན་ནས་ཟུང་འཇུག་གི་གོ་འཕང་ཡང་མྱུར་དུ་འཐོབ་པར་འགྱུར་བའི་ཕྱིར་ཏེ། མངོན་བརྗོད་ལས། དཔལ་ལྡན་རྡོ་རྗེ་རྣལ་འབྱོར་མ། །རྣམ་དག་ཡེ་ཤེས་ཅན་རྣམས་ཀྱིས། །རྣལ་འབྱོར་རྡོ་རྗེ་ཅན་རྣམས་གཟིགས། །ཞེས་པ་ནས། དཔལ་ལྡན་རྡོ་རྗེ་འཛིན་དངོས་སུ། །འགྱུར་བ་འདི་ལ་ཐེ་ཚོམ་མེད། ཅེས་དང་། རྗེའི་ལཱུ་ཧི་པའི་ཤིས་བརྗོད་ལས། ཐུགས་ཀྱི་རིགས་ཀྱི་སྔགས་སྐྱེས་ཞིང་སྐྱེས་སོགས། །ཕོ་ཉའི་གྲོགས་དང་མྱུར་དུ་འདུས་པ་ལས། །བདེ་བའི་དགའ་སྟོན་འབར་བའི་བཀྲ་ཤིས་ཤོག །ཅེས་དང་། དེ་བཞིན་དུ་གསུང་དང་སྐུ་ལའང་སྦྱར་ནས་གསུངས་ཤིང་། རྗེའི་རྒྱུད་འགྲེལ་སྦས་དོན་ཀུན་གསལ་ལས་ཀྱང་། ཁྱད་པར་བདེ་མཆོག་གི་ལམ་ལེགས་པར་ཤེས་ནས་སྒྲུབ་པ་བྱེད་པ་རྣམས་ལ་མཁའ་འགྲོ་མའི་ཕོ་ཉ་ཅན་རྣམས་ཀྱིས་བྱིན་གྱིས་རློབ་པ་དང་། ལམ་གྱི་གྲོགས་མཛད་པས་ཆེས་མྱུར་བ་ཡིན། ཞེས་དང་། འདི་རྣམས་བསྒོམས་པས་ཡུལ་ཁྱད་པར་ཅན་དེ་རྣམས་ན་གནས་པའི་དཔའ་མོ་རྣམས་དང་མྱུར་དུ་འཕྲད་ལ། དེ་ལ་བརྟེན་ནས་ལམ་ཚེགས་མེད་པར་ཆོས་ཤིན་ཏུ་མྱུར་བར་འགྱུར་རོ། །ཞེས་གསུངས་པའི་ཕྱིར་རོ། །འོ་ན་ཕོ་ཉ་དེ་གསུམ་གྱི་ངོས་འཛིན་དང་། ནང་གསེས་མཆོག་དམན་གྱི་ཁྱད་པར་ཇི་ལྟ་བུ་ཡིན་ཞེ་ན། ངོས་འཛིན་ཚུལ་ལ་འདོད་པ་མི་འདྲ་བ་ཡོད་ཀྱང་རྗེའི་བཞེད་པ་ནི་འདི་ལྟར་ཡིན་ཏེ། ལྷན་སྐྱེས་ཀྱི་ཕོ་ཉ་ནི་རྫོགས་རིམ་གྱི་དོན་གྱི་ལྷན་སྐྱེས་རང་རྒྱུད་ལ་སྐྱེས་པའི་འཇིག་རྟེན་ལས་འདས་པའི་རྣལ་འབྱོར་མ་རྣམས་ཡིན་ལ། ཞིང་སྐྱེས་ནི་ཞིང་ཁྱད་པར་ཅན་དུ་སྐྱེས་སྟོབས་ཀྱིས་རྣལ་འབྱོར་མར་སོང་བ་དང་། སྔགས་སྐྱེས་ནི་བསྐྱེད་རིམ་ལ་གནས་པའི་རྣལ་འབྱོར་མ་སྟེ། མཆོག་དམན་ཡང་དེ་གསུམ་གྱི་སྔ་མ་སྔ་མ་མཆོག་ཡིན་པའི་ཕྱིར་ཏེ། རྒྱུད་འགྲེལ་དེ་ཉིད་ལས། ཕོ་ཉ་གསུམ་ངོས་འཛིན་ལ་མི་འདྲ་བ་མང་དུ་འདུག་ནའང་། དང་པོ་ནི། དོན་གྱི་ལྷན་སྐྱེས་ཐོབ་པ་ཡན་ཆད་དེ་འཇིག་རྟེན་ལས་འདས་པའི་མཁའ་འགྲོ་མའོ། །གཉིས་པ་ནི་གནས་སོ་གཉིས་ལ་སོགས་པར་སྐྱེས་པ་རྣལ་འབྱོར་མས་རྗེས་སུ་བཟུང་བས་རྣལ་འབྱོར་མར་གྱུར་པའོ། །གསུམ་པ་ནི་དབང་ལ་སོགས་པས་རྒྱུད་ལེགས་པར་སྦྱངས་པ་རིམ་པ་དང་པོའི་རྣལ་འབྱོར་ལ་བྱེད་པ་སྟེ། དེ་གཉིས་ནི་འཇིག་རྟེན་པའི་རྣལ་འབྱོར་མའོ། །ཞེས་བཤད་པ་ལྟར་ཡིན་པའི་ཕྱིར་རོ། །ཕྱི་དཀྱིལ་ནས་ལུས་དཀྱིལ་གྱི་བར་སྒོམ་པ་འདི་ལ་ནི་སྐུ་གསུམ་གྱི་སྒྲུབ་ཐབས་སུ་གསུངས་པའི་རྒྱུ་མཚན་མོད་དེ། ཕྱི་དཀྱིལ་སྒོམ་པ་སྤྲུལ་སྐུའི་རྣལ་འབྱོར། བྱང་ཕྱོགས་སོ་བདུན་གྱི་དག་པ་སྒོམ་པ་ཆོས་སྐུའི་རྣལ་འབྱོར། ལུས་དཀྱིལ་སྒོམ་པ་ལོངས་སྐུའི་རྣལ་འབྱོར་དུ་འགྱུར་བའི་རྒྱུ་མཚན་གྱིས་དེ་ལྟར་དུ་གསུངས་པའི་ཕྱིར་རོ། །དེ་ནི་གཙོ་བོའི་དབང་དུ་བྱས་པ་ཡིན་གྱི། གཞན་དུ་ན་ཕྱོགས་མཐུན་སྔར་བཤད་པའི་ལམ་འཁྱེར་གསུམ་པོ་ཡང་དེ་ལྟར་ཡིན་ཏེ། ཤཱུནྱ་ཏའི་སྔགས་དོན་སྒོམ་པ་ནི་ཆོས་སྐུའི་རྣལ་འབྱོར། ནཱ་ད་འཇོག་པ་ནི་ལོངས་སྐུའི་རྣལ་འབྱོར་དེ་ལས་རྒྱུ་འབྲས་ཀྱི་རྡོ་རྗེ་འཛིན་བསྐྱེད་པ་ནི་སྤྲུལ་སྐུའི་རྣལ་འབྱོར་དུ་འགྱུར་བའི་ཕྱིར་རོ། །བཞི་པ་གོ་བགོས་ཤིང་ཡེ་ཤེས་པ་བཅུག་ནས་དབང་བསྐུར་བ་ལ་གཉིས། གོ་ཆ་བྱ་ཞིང་ཡེ་ཤེས་པ་གཞུག་པ་དང་། དབང་བསྐུར་ནས་རྒྱས་གདབ་པའི་ཚུལ་ལོ། །དང་པོ་ལ་གཉིས། གོ་ཆ་བཅིང་བ་དང་། ཡེ་ཤེས་པ་གཞུག་པའོ། །དང་པོ་ནི། སྤྱིར་གོ་ཆ་འགོད་པའི་གཞི་དེ་ལ་བཞེད་ཚུལ་མི་འདྲ་བ་དུ་མ་ཡོད་དེ། དཀྱིལ་འཁོར་པའི་ལྷ་ཐམས་ཅད་ལ་འགོད་པ་དང་། ཡབ་ཡུམ་རེ་རེ་ཁོ་ནར་འགོད་པ་དང། ཡབ་ཡུམ་གཉིས་ཀ་ལ་འགོད་པའི་ཚུལ་གསུམ་ཡོད་པའི་ཕྱིར་རོ། །འདིར་གཙོ་བོ་ཡབ་ཡུམ་གཉིས་ཀ་ལ་དགོད་ཀྱི་གཞན་ལ་ནི་མ་ཡིན་ཏེ། ལཱུ་ནག་དྲིལ་གསུམ་གྱི་གྲུབ་ཆེན་གྱི་གཞུང་ལས་དེ་ལྟར་དུ་འབྱུང་ཞིང་། བཤད་རྒྱུད་མངོན་བརྗོད་ལས་ཀྱང་གོ་ཆ་གཉིས་པོ་འགོ་བར་བྱ། ཞེས་ཡབ་ཡུམ་གཉིས་ཀྱི་གོ་ཆ་དགོད་པ་ལས་གཞན་མ་བཤད་པའི་ཕྱིར་རོ། །ཇི་ལྟར་བསྒོམ་པའི་ཚུལ་ཡོད་དེ། རང་གི་སྙིང་གར་ༀ་ཧ་དཀར་པོ་ཡོངས་སུ་གྱུར་པ་ལས་ཞེས་སོགས་འབྱུང་བ་ལྟར་ཡབ་ཀྱི་གོ་ཆ་དྲུག་དང་། གཙོ་མོའི་ལྟེ་བར་ༀ་བཾ་དམར་པོ་ཞེས་སོགས་འབྱུང་བ་ལྟར་ཡུམ་གྱི་གོ་ཆ་དྲུག་འགོད་པར་བྱ་བ་ཡིན་པའི་ཕྱིར། དེ་ཡང་ས་བོན་དྲུག་ཚན་གཉིས་ལས་ལྷ་དེ་རྣམས་ཡུམ་བཅས་སུ་བསྐྱེད་པ་ཡིན་ཀྱང་ཁྱད་པར་ཡོད་དེ། ཡབ་ཀྱི་གོ་ཆ་དྲུག་ནི་ཡུམ་གྱིས་ཡབ་ལ་འཁྱུད་པ་ཡིན་ལ། ཡུམ་གྱི་གོ་ཆ་དྲུག་ནི་ཡབ་ཡུམ་གྱི་པང་ནས་ཚུར་འཁྱུད་པའི་ཚུལ་དུ་བྱེད་དགོས་པའི་ཕྱིར་རོ། །ལུས་ཀྱི་གནས་དེ་རྣམས་སུ་དེ་དང་དེར་ངོ་བོ་དབྱེར་མེད་དུ་བྱས་ནས་བསྒོམ་དགོས་པ་ཡིན་ཏེ། བདེ་སྟོང་དབྱེར་མེད་ཀྱི་ཡེ་ཤེས་ཀྱི་ཆ་དེ་ཉིད་གནས་དེ་དང་དེའི་ངོ་བོར་མེ་ལོང་ལ་གཟུགས་བརྙན་ཤར་བ་བཞིན་དུ་བལྟ་དགོས་པའི་ཕྱིར་རོ། །དེ་ལྟར་བསྒོམ་པ་ནི་རྒྱས་པའི་དབང་དུ་བྱས་པ་ཡིན་གྱི། བསྡུ་ན་ༀ་ཧ་སོགས་ཀྱི་ཡི་གེ་ཙམ་བཀོད་ནས་ལྷ་དེ་རྣམས་དང་ངོ་བོ་དབྱེར་མེད་དུ་མོས་པས་ཀྱང་ཆོག་པ་ཡིན་ཏེ། རྩ་རྒྱུད་ལས། ཡ་སོགས་བརྒྱད་པའི་ས་བོན་དང་། །དེ་བཞིན་གུག་སྐྱེད་བཅུ་གཉིས་ཀྱི། །ཡི་གེ་བར་མ་དོར་བྱས་པ། །ཡན་ལག་དྲུག་ཧེ་རུ་ཀར་བརྗོད། །དཔའ་བོ་དྲུག་དང་མཉམ་སྦྱོར་བ། །ཡི་གེ་གཅིག་ཏུ་ཡང་དག་གནས། །ༀ་ན་མ་སྭཱཧཱ་བཽ་ཥ་ཊ། ཧཱུཾ་ཧཱུཾ་ཕཊ་དང་ཡང་དག་ལྡན་ཞེས་དང་། འདོད་འཇོ་ལས་ཀྱང་། ༀ་ཧ་སྙིང་གར་དགོད་ལ། རྡོ་རྗེ་སེམས་དཔའ་དང་ངོ་བོ་དབྱེར་མེད་དུ་བྱ་བའམ། ཡང་ན་སྔགས་དེ་ཡོངས་སུ་གྱུར་པ་ལས་རྡོར་སེམས་སུ་སྔར་བཤད་པ་ལྟར་བསྐྱེད་དེ། ཞེས་གསུངས་པའི་ཕྱིར་རོ། །ལུས་དབང་ལུས་ཀྱི་ཆ་ཐམས་ཅད་ལ་ཁྱབ་པས་དེའི་ངོ་བོ་ནི་དེ་ཐམས་ཅད་དུ་སྒོམ་རིགས་ཀྱི། དཔྲལ་པར་སྒོམ་པ་མི་འཐད་དོ་ཞེ་ན། སྐྱོན་མེད་དེ། ལུས་དབང་གི་གཙོ་བོ་དཔྲལ་བའི་ཕྱོགས་ན་གནས་པའི་རྒྱུ་མཚན་གྱིས་ཡིན་པའི་ཕྱིར་རོ། །གོ་ཆ་ཞེས་བརྗོད་པའི་རྒྱུ་མཚན་ཡོད་དེ། གོ་ཆ་བཙན་པོ་དང་འདྲ་བའི་སྲུང་བ་ཡིན་པས་ན་དེ་ལྟར་དུ་བརྗོད་པའི་ཕྱིར་རོ། །གོ་ཆ་བསྒོམས་པ་ལ་དགོས་པ་ཡོད་དེ། བགེགས་ཀྱིས་མི་ཚུགས་པའི་ཆེད་ཡིན་པའི་ཕྱིར་རོ། །གཉིས་པ་ཡེ་ཤེས་པ་ནི། འབར་བའི་ཕྱག་རྒྱ་དང་སྔགས་ཀྱིས་སྤྱན་འདྲེན་པ་ཡིན་ཏེ། དེ་ཡང་འཛུབ་མོ་གཉིས་མདུད་ཅིང་གུང་མོ་གཉིས་རྩེ་མོ་སྦྱར་ཞིང་མཐེ་བོང་གཉིས་བརྟན་པོར་སྦྱར་ནས་ཐུར་དུ་བསྟན་ལ། མིང་མེད་དང་མཐེའུ་ཆུང་རྣམས་བརྐྱང་བ་དཔྲལ་པར་བཞག་ནས་གཡས་གཡོན་དུ་བསྐོར་ཞིང་། ངག་ཏུ་ཕེཾ་ཞེས་བརྗོད་དེ་ཧཱུཾ་གི་འོད་ཟེར་གྱིས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་ལ་སོགས་པ་ཐམས་ཅད་མདུན་གྱི་ནམ་མཁར་སྤྱན་དྲངས་ལ། འོད་ཟེར་རང་གི་སྙིང་ཁར་ཐིམ་པར་བསམ་པར་བྱ་བ་ཡིན་པའི་ཕྱིར། ཕེཾ་ཞེས་བརྗོད་པའི་རྒྱུ་མཚན་ཡོད་དེ། དེ་མཁའ་འགྲོ་བསྐུལ་བའི་སྙིང་པོ་ཡིན་པའི་ཕྱིར་རོ། །དེ་ནས་མཆོད་པ་སོགས་བྱ་དགོས་པ་ཡིན་ཏེ། ༀ་བཛྲ་ཝཱི་ཎི་ཞེས་སོགས་བརྗོད་ནས་རིག་མ་བཅུ་དྲུག་གིས་མཆོད་ཅིང་། སྒོ་བ་བཞིའི་སྔགས་ཀྱིས་དགུག་བཞུག་བཅིངས་མཉེས་བྱ་བ་ཡིན་པའི་ཕྱིར། དེ་ལྟར་བྱས་པ་ལ་དགོས་པ་ཡོད་དེ། རང་དང་ཡེ་ཤེས་པ་ཐ་དད་དུ་འཛིན་པ་འགོག་པ་དང་། ཡེ་ཤེས་པ་དང་དབྱེར་མེད་དུ་བལྟ་བ་དང་། ཡེ་ཤེས་པས་བྱིན་གྱིས་རློབ་པ་སོགས་ཀྱི་ཆེད་ཡིན་པའི་ཕྱིར་རོ། །དེའི་བརྟན་བྱེད་དུ་ༀ་ཡོ་ག་ཞེས་སོགས་ཀྱི་སྔགས་བརྗོད་དགོས་ཞིང་དེའི་དོན་ཡང་ཡོད་དེ། ཡོ་ག་ནི་རྣལ་འབྱོར། ཤུདྡྷཱ་ནི་དག་པ། སརྦ་དྷརྨཱ་ནི་ཆོས་ཐམས་ཅད། ཡོ་ག་ཤུདྡྷོ་ཧཾ་ནི་རྣལ་འབྱོར་དག་པ་དེ་ངའོ་ཞེས་པ་ཡིན་པའི་ཕྱིར། དེ་ཚིག་གི་དོན་ཙམ་ཡིན་ལ། ངེས་དོན་ཡོད་དེ། ཆོས་ཐམས་ཅད་རང་བཞིན་གྱིས་ཡོངས་སུ་དག་པའི་དེ་ཁོ་ན་ཉིད་དང་བདེ་བ་ཆེན་པོའི་ཡེ་ཤེས་དབྱེར་མེད་པའི་བདག་ཉིད་དེ་ངའོ་ཞེས་པའི་དོན་ཡིན་ཞིང་། དམ་ཚིག་པ་དང་ཡེ་ཤེས་པ་གཉིས་རོ་མཉམ་དུ་སྦྱར་བ་ནི་ཞེས་སོགས་ཀྱི་དོན་ཡང་དེ་ཡིན་པའི་ཕྱིར་རོ། །བརྟན་བྱེད་དུ་སརྦ་བཱི་ར་ཞེས་སོགས་ཀྱི་སྔགས་བརྗོད་ཅིང་དེའི་དོན་ཡང་ཡོད་དེ། སརྦ་ནི་ཐམས་ཅད། བཱི་ར་ནི་དཔའ་བོ། ཡོ་གི་ནཱི་ནི་རྣལ་འབྱོར་མ། ཀཱ་ཡ་ཝཱ་ཀ་ཙིཏྟ་ནི་སྐུ་གསུང་ཐུགས། སྭཱ་བྷཱ་ཝ་སོགས་ནི་རང་བཞིན་གྱི་བདག་ཉིད་དེ་ངའོ་ཞེས་ང་རྒྱལ་འཛིན་པའི་དོན་ཡིན་པའི་ཕྱིར་རོ། །དེའི་ང་རྒྱལ་དྲིལ་ནས་འཛིན་ཚུལ་ཡོད་དེ། དཔའ་བོ་དང་རྣམ་འབྱོར་མ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་གྱི་བདག་ཉིད་དེ་ངའོ་སྙམ་དུ་ང་རྒྱལ་འཛིན་དགོས་པའི་ཕྱིར། འདི་ལྟ་བུ་ལ་ང་རྒྱལ་ཞེས་བརྗོད་པའི་རྒྱུ་མཚན་ཡོད་དེ། ང་རྒྱལ་དངོས་མིན་ཀྱང་ང་རྒྱལ་དེ་ནི་སེམས་ཁེངས་པའི་རྣམ་པ་ཅན་ཡིན་པས་དེ་དང་རྣམ་པ་ཕྱོགས་འདྲ་བས་ན་དེ་ལྟར་དུ་བརྗོད་པའི་ཕྱིར་རོ། །གཉིས་པ་ནི། སྔར་ཡེ་ཤེས་པ་དང་མཉམ་དུ་སྤྱན་དྲངས་པའི་དབང་ལྷ་རྣམས་ལ་རིག་མ་བཅུ་དྲུག་གིས་མཆོད་དགོས་པ་ཡིན་ཏེ། འདིར་མཆོད་པ་དེ་དབང་ལྷ་ལ་ཡིན་པར་རྗེའི་འདོད་འཇོ་ལས་བཤད་པའི་ཕྱིར་རོ། །དབང་ལྷ་ཡང་ཡེ་ཤེས་པའི་འཁོར་ལོ་དང་ལྷན་ཅིག་སྤྱན་འདྲེན་པ་ནི་མན་ངག་ཡིན་པའི་ལྭ་ཝ་པས་བཤད་ཅིང་། དྲིལ་བུ་པ་ཡང་དེ་དང་འདྲ་སྟེ། སྙིང་གའི་ཧཱུཾ་གྱི་ས་བོན་གྱིས། །ཡེ་ཤེས་དཀྱིལ་འཁོར་དབང་བསྐུར་ལྷ། །སྤྱན་དྲངས། ཞེས་གསུངས་པའི་ཕྱིར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་ཏུ་གསོལ་ཞེས་སོགས་འབྱུང་བ་ལྟར་དབང་བཞི་བསྐུར་བ་ཡིན་ཏེ། ཆུ་དབང་བསྐུར་བ་ལས་བུམ་པའི་དབང་། ཧེ་རུ་ཀ་ཡབ་ཡུམ་སྙོམས་པར་ཞུགས་པའི་བྱང་སེམས་ལྕེ་ལ་བཞག་པ་ལས་གསང་དབང་། ཧེ་རུ་ཀས་ཕག་མོ་ཕྱག་རྒྱར་གནང་བ་དང་སྙོམས་པར་ཞུགས་པས་རླུང་ཐིམ་པའི་མོས་པ་བྱས་པ་ལས་ཤེར་དབང་། ཧེ་རུ་ཀས་དོན་གྱི་དབང་བཞི་པ་དེ་ཉིད་ཚིག་གིས་བསྟེན་པའི་དོན་གོ་བ་ལས་དབང་བཞི་པར་འཇོག་པ་ཡིན་པའི་ཕྱིར། དབང་བཞི་པའི་སྐབས་སུ་འབྲས་དུས་ཀྱི་ཟུང་འཇུག་གི་སྐུ་ལ་ངོ་སྤྲོོད་པ་ཡིན་ཏེ། འོད་གསལ་མཐོང་བ་ཡིན་ནོ་ཞེས་པ་ཡན་ཆད་ཀྱིས་དོན་དམ་འོད་གསལ་དང་། ཀུན་རྫོབ་ཏུ་རླུང་སེམས་ཙམ་ལས་གྲུབ་པའི་ཞེས་པ་མན་ཆད་སྒྱུ་མའི་སྐུ་དང་ཟུང་འཇུག་ལ་བརྡ་སྤྲོས་པ་ཡིན་པའི་ཕྱིར་རོ། །འདི་དག་གིས་དབང་སྔར་མ་ཐོབ་པ་གསར་དུ་ཐོབ་པ་བྱེད་པ་མིན་ཀྱང་དགོས་པ་ཡོད་དེ། ཐོབ་ཟིན་བརྟན་པ་དང་། དེ་དང་དེའི་ནུས་པ་ཁྱད་པར་ཅན་རེ་འཇོག་པའི་ཆེད་ཡིན་པའི་ཕྱིར་རོ། །ལྷ་རྣམས་ལ་རྒྱས་འདེབས་དེ་ལྟར་བྱེད་པའི་རྒྱུ་མཚན་ཡོད་དེ། གཙོ་བོ་ལ་མི་བསྐྱོད་པས་རྒྱས་འདེབས་བ་དེ་རྒྱུ་ལ་འབྲས་བུའི་རྒྱས་གདབ་པ་ཡིན་ནོ། །ཡུམ་ལ་རྣམ་སྣང་གིས་རྒྱས་གདབ་པ་ནི་ཆོས་སྐུ་ལ་གཟུགས་སྐུའི་རྒྱས་གདབ་པ་དང་། གཞན་རྣམས་ནི་རིགས་ཅན་ལ་རིགས་ཀྱིས་རྒྱས་གདབ་པ་ཡིན་པའི་ཕྱིར་ཏེ། མཁའ་འགྲོ་མ་སོགས་བཞི་ནི་རིན་འབྱུང་གི་རིགས་དང་། འཁོར་ལོ་བཞིའི་ལྷ་རྣམས་རིམ་པ་བཞིན་མི་བསྐྱོད་པ་དང་། སྣང་མཐའ་དང་། སྣམ་སྣང་དང་། དོན་གྲུབ་ཀྱི་རིགས་སུ་འཇོག་པའི་ཕྱིར་རོ། །དེ་ནས་དབང་ལྷ་རྣམས་རང་ལ་བསྟིམ་ཞིང་། དེ་ལྟར་དབང་བསྐུར་པ་ལ་དགོས་པར་ཁྱད་པར་ཅན་ཡོད་དེ། བགེགས་ཀྱིས་མི་ཚུགས་པ་དང་། སྒྲིབ་པ་ཀུན་སྦྱོང་བ་དང་། སྒོམ་བཟླས་ཀྱི་སྣོད་དུ་རུང་བ་དང་། ཞི་སོགས་ཀྱི་ལས་འགྲུབ་སླ་བ་དང་། བྱང་སེམས་ཉམས་པ་གསོ་བ་དང་། དམ་ཚིག་དང་སྡོམ་པ་ཉམས་པ་གསོ་བ་དང་། མ་འོངས་པ་ན་སངས་རྒྱས་ཀྱིས་དབང་བསྐུར་བར་འགྱུར་བའི་དགོས་པ་དང་བཅས་པ་ཇོ་བོ་ཆེན་པོས་བཤད་པ་ལྟར་ཡོད་པའི་ཕྱིར་རོ། །ལྔ་པ་མཆོད་བསྟོད་དང་བསྒོམ་ཞིང་དག་པ་དྲན་ཚུལ་སོགས་ནི་སྔར་མཆོད་པ་བྱིན་རླབས་མ་བྱས་ན་འདིར་བྱ་བ་ཡིན་ཏེ། སྐབས་དེ་གཉིས་གང་དུ་བྱས་ཀྱང་མི་འགལ་བའི་ཕྱིར་རོ། མཆོད་པ་ལ་ཆུ་བཞི་དང་གསུམ་དང་གཉིས་གང་བྱས་ཀྱང་མི་འགལ་ཏེ། སྡོམ་འབྱུང་ལས་ཆུ་བཞི་བཤད་ཅིང་། སྒྲུབ་ཐབས་ཚད་ལྡན་འགའ་ལས་གསུམ་དང་གཉིས་ཀྱང་བཤད་པའི་ཕྱིར་དང་། ལཱུ་ཧི་པ་རང་གི་སྒྲུབ་ཐབས་ལས་ནི་སྐབས་འདིར་སྔགས་མཆོད་ཙམ་ལས་མ་བྱུང་བའི་ཕྱིར་རོ། །དེ་ནས་ཆུ་བཞི་སོགས་སྔོན་དུ་འགྲོ་བའི་ཉེར་སྤྱོད་རོལ་མོ་འདོད་ཡོན་རིག་མ་བཅུ་དྲུག་དང་བཅས་པའི་ཕྱིའི་མཆོད་པ་རྣམས་བྱ་བ་ཡིན་ཏེ། ལྷ་མོ་སྤྲོོས་ཏེ་མཆོད་བྱེད་ཀྱི་སྔགས་ནི་གཞན་ནམ་ༀ་ཨཱཿགུ་རུ་བཛྲ་ཤྲཱི་ཧེ་རུ་ཀ་ཨརྒྷཾ་པྲ་ཏིཙྪ་སོགས་ཀྱིས་མཆོད་པ་ཡིན་པའི་ཕྱིར། མཆོད་པའི་ལྷ་མོ་རྣམས་ཀྱི་སྐུ་མདོག་སོགས་ཇི་ལྟར་བྱ་བའི་ཚུལ་ཡོད་དེ། མེ་ཏོག་མ་སོགས་ཀྱི་སྐུ་མདོག་ཕྱག་མཚན་སོགས་རྒྱས་པར་འདོད་འཇོ་ལས་འབྱུང་བ་ལྟར་ཡིན་པའི་ཕྱིར། མཆོད་པ་འདི་རྣམས་དབང་བཞི་གང་དང་འབྲེལ་བའི་ཚུལ་ཡོད་དེ། བུམ་པའི་དབང་ནི། ཕྱི་བུམ་དབང་དང་འབྲེལ་བའི་མཆོད་པ། ནང་མཆོད་མྱང་བ་ནི་ནང་གསང་དབང་དང་འབྲེལ་བའི་མཆོད་པ། ཡབ་ཡུམ་སྙོམས་ཞུགས་ཏེ་དགའ་བཞི་དྲངས་པ་ནི་དབང་གསུམ་པ་དང་འབྲེལ་བའི་མཆོད་པ། ལྷན་སྐྱེས་ཀྱི་དགའ་བས་སྟོང་ཉིད་རྟོགས་པར་མོས་པའམ་རྟོགས་པའི་དེ་ཁོ་ན་ཉིད་ཀྱི་མཆོད་པ་ནི་དབང་བཞི་པ་དང་འབྲེལ་བའི་མཆོད་པ་ཡིན་པའི་ཕྱིར་རོ། །དེ་ནས་ནང་མཆོད་ཇི་ལྟར་འབུལ་བའི་ཚུལ་ཡོད་དེ། མགྲོན་རྣམས་ཀྱི་ལྗགས་བྱིན་གྱིས་བརླབས་ནས་ཨ་མྲྀ་ཏའི་སྔགས་དང་། ༀ་ཨཱཿཧཱུཾ་གསུམ་གྱིས་བྱིན་གྱིས་བརླབས་ལ། དངོས་བརྒྱུད་ཀྱི་བླ་མ་རྣམས་ཀྱི་མཚན་སྔགས་ཀྱི་མཐར་ཡི་གེ་གསུམ་བཏགས་ནས་ཕུལ་པའི་རྗེས་སུ། དཀྱིལ་འཁོར་པའི་ལྷ་ཐམས་ཅད་ལ་རང་རང་གི་སྔགས་ཀྱི་མཐར་འབྲུ་གསུམ་བཏགས་ནས་འབུལ་ཞིང་། དེ་ནས་ཕྱོགས་སྐྱོང་སོགས་འཇིག་རྟེན་པ་རྣམས་ལ་འབུལ་བ་ཡིན་པའི་ཕྱིར་རོ། །དེའི་ཚེ་ཐུགས་ཀ་ནས་ལྷ་མོ་རོ་རྡོ་རྗེ་མ་སྤྲོས་ནས་འབུལ་པ་ཡིན་ཏེ། དེས་ཐོད་པ་བཟུང་ནས་བདུད་རྩི་བཅུས་ཏེ་མགྲོན་རྣམས་ལ་སྟབས་པས་གསོལ་བས་ཚིམ་པར་བསམ་དགོས་པའི་ཕྱིར་རོ། །མཐར་ༀ་ཨ་མྲྀ་ཏ་ཞེས་སོགས་བརྗོད་དེ་མཆོད་པའི་ང་རྒྱལ་འཛིན་དགོས་པ་ཡིན་ཏེ། མ་མྲྀ་ཏ་ནི་འཆི་མེད་དམ་པ་བདུད་རྩི། སྭ་ད་ནི་མཉེས་པ། སྭཱ་བྷཱ་ཝ་ནི་རང་བཞིན། ཨཱཏྨ་ཀཾ་ནི་བདག་ཉིད། ཨ་ཧཾ་ནི་ངའོ་ཞེས་པའི་དོན་ཡིན་པའི་ཕྱིར་རོ། །དེ་ནས་གསང་མཆོད་དང་དེ་ཁོ་ན་ཉིད་ཀྱིས་མཆོད་པ་ཇི་ལྟར་བྱ་བའི་ཚུལ་ཡང་ཡོད་དེ། རང་གི་སྙིང་གའི་ཧཱུཾ་ལས་བྱུང་བའི་རྣལ་འབྱོར་མ་བཞི་དང་། སྒོ་མཚམས་བརྒྱད་ཀྱིས་ཐོད་པ་ན་གནས་པའི་བདུད་རྩི་ལྔས་མཆོད་ལ། ༀ་སརྦ་བཛྲ་ཀཱ་མི་ནི་ཞེས་སོགས་མཇུག་ཏུ་ཡི་གེ་གསུམ་བརྗོད་ཅིང་ཕུལ་བའི་རྗེས་སུ། གནས་བཞི་དང་གསང་གནས་སྔར་བྱིན་གྱིས་བརླབས་པ་དྲན་པར་བྱས་ནས་དགའ་བཞི་དྲངས་པ་ནི་གསང་མཆོད་དང་། ལྷན་སྐྱེས་ཀྱི་དགའ་བས་དེ་ཁོ་ན་ཉིད་དངོས་སུ་རྟོགས་པའམ་རྟོགས་པར་མོས་པ་ནི། དེ་ཁོ་ན་ཉིད་ཀྱི་མཆོད་པ་ཡིན་པའི་ཕྱིར་རོ། །རང་གཙོ་བོ་ཡབ་ཡུམ་གཉིས་ཀྱིས་དགའ་བ་མྱོང་བའི་ཚེ་ཕྱི་དཀྱིལ་དང་ལུས་དཀྱིལ་གྱི་ལྷ་རྣམས་ཀྱིས་ཀྱང་ཅིག་ཅར་དུ་བདེ་བ་ཆེན་པོ་ཉམས་སུ་མྱོང་བར་བསམ་དགོས་པ་ཡིན་ཏེ། འདིར་འཁོར་ཐམས་ཅད་ཀྱང་གཙོ་བོ་དང་རྒྱུད་གཅིག་ཅིང་དེའི་ཆ་ཤས་ཙམ་དུ་ཟད་དོ་སྙམ་དུ་བལྟ་དགོས་པའི་ཕྱིར་རོ། །སྤྱིར་སྔགས་ཀྱི་སྐབས་སུ་ཟབ་གསལ་གཉིས་མེད་སྒོམ་པ་ལ་ལྟ་བ་དགོས་ཤིང་། ཁྱད་པར་ཆོས་སྐུའི་ལམ་འཁྱེར་དང་། དེ་ཁོ་ན་ཉིད་ཀྱི་མཆོད་པ་དང་། བདེ་སྟོང་དབྱེར་མེད་སྒོམ་པ་ལ་བདག་མེད་རྟོགས་པའི་ལྟ་བ་དྲན་པ་ནི་མེད་མི་རུང་གི་ཡན་ལག་ཡིན་ཏེ། དེ་ལ་ཐོས་བསམ་ཙམ་ཡང་མེད་ན་ནི་དགོས་དོན་ཇི་ལྟ་བ་བཞིན་འགྲུབ་པར་དཀའ་བའི་ཕྱིར་རོ། །དེ་ནས་སྔགས་མཆོད་ཇི་ལྟར་བྱ་བའི་ཚུལ་ཡོད་དེ། ཡབ་ཡུམ་གྱི་སྙིང་པོ་དང་ཉེ་སྙིང་། སྙིང་པོའི་རྣལ་འབྱོར་མ་བཞིའི་སྔགས། འཁོར་ལོ་གསུམ་གྱི་དཔའ་བོ་དང་དཔའ་མོ་རྣམས་ཀྱི་སྔགས། སྒོ་མཚམས་མ་བརྒྱད་དང་ཡབ་ཡུམ་གྱི་རྐང་བརྒྱད་ཀྱི་སྔགས་མཆོད་རྣམས་སྒྲུབ་ཐབས་ནས་འབྱུང་བ་བཞིན་རིམ་པར་བྱ་བ་ཡིན་པའི་ཕྱིར། སྔགས་དེ་རྣམས་བརྗོད་པ་ནི་མཆོད་པར་འགྱུར་བའི་ཚུལ་ཡོད་དེ། འདོད་འཇོ་ལས། རྩ་རྒྱུད་ལས། སྔགས་རྣམས་ཀུན་གྱིས་ཡང་དག་མཆོད། །ཅེས་གསུངས་པས་བསྟོད་པའི་མཆོད་པའི་སྔགས་སོ། །ཞེས་བཤད་པ་ལྟར་བསྟོད་ཅིང་བསྐུལ་བའི་སྒོ་ནས་ལྷ་མཉེས་པར་བྱེད་པས་ན་མཆོད་པར་བཞད་པའི་ཕྱིར་རོ། །མཆོད་པའི་འཁོར་གསུམ་ཐམས་ཅད་རང་བཞིན་མེད་པར་རྟོགས་པའི་བདེ་སྟོང་དབྱེར་མེད་ཀྱི་ངོ་བོར་མོས་པ་ནི་ཤིན་ཏུ་གལ་ཆེ་བ་ཡིན་ཏེ། དེས་ཚོགས་གཉིས་བདེ་བླག་ཏུ་རྫོགས་པར་འགྱུར་བར་བཤད་པའི་ཕྱིར་རོ། །དེ་ནས་ལྷའི་འཁོར་ལོ་བསྒོམ་ཞིང་དག་པ་དྲན་པར་བྱ་བ་ཡིན་ལ། བསྒོམ་པའི་ཚུལ་ཡོད་དེ། རིམ་པ་དང་པོའི་སྤང་བྱའི་གཙོ་བོ་ནི་ཐ་མལ་གྱི་སྣང་ཞེན་གཉིས་ཡོད་ལ། དེ་ལ་ཐ་མལ་གྱིི་སྣང་བའི་གཉེན་པོར་ལྷའི་རྣམ་པ་ལ་སློབ་པ་དང་། ཐ་མལ་གྱི་ཞེན་པའི་གཉེན་པོར་ལྷའི་ང་རྒྱལ་ལ་སློབ་པ་ཡིན་ཞིང་། དེ་དག་གི་ཚེ་རྣམ་པ་ལྷར་གསལ་བ་ལ་དམིགས་ནས་བསྒོམས་པས་ཡིད་ངོར་ཐ་མལ་གྱི་སྣང་བ་འཆར་བ་རེ་ཞིག་བཀག་པའི་ཚུལ་གྱིས་དེའི་གཉེན་པོར་འགྱུར་ལ། དངོས་པོ་ལ་ལྷར་མ་སོང་ཡང་ལྷའི་ང་རྒྱལ་བཅོས་མིན་དུ་བྱས་པས་ཡིད་ངོར་ཐ་མལ་གྱི་ཞེན་པ་རེ་ཞིག་བཀག་པའི་ཚུལ་གྱིས་དེའི་གཉེན་པོར་འགྲོ་བ་ཡིན་པའི་ཕྱིར་རོ། །དེའི་ཚེ་ཟབ་གསལ་གཉིས་སུ་མེད་པའི་ཚུལ་གྱིས་སྒོམ་པར་བྱེད་པ་ཡིན་ཏེ། དམིགས་པ་ལྷ་ལ་དམིགས་ནས་རྣམ་པ་རང་བཞིན་མེད་པར་དྲན་པ་གཉིས་ཟུང་འབྲེལ་དུ་སྐྱོང་བའི་ཟབ་གསལ་གཉིས་མེད་ཀྱི་རྣལ་འབྱོར་ནི་སྐབས་འདིར་ཉམས་ལེན་གྱི་གཙོ་བོ་ཡིན་པའི་ཕྱིར་རོ། །དེ་ནས་དག་པ་དྲན་ཚུལ་ཡོད་དེ། ལྷའི་དག་པ་ནི་སྔར་ཕྱི་དཀྱིལ་དང་ལུས་དཀྱིལ་ཀྱི་སྐབས་སུ་བཤད་ཟིན་ཅིང་། རྒྱན་གྱི་དག་པ་དྲན་ཚུལ་ཡང་ཡོད་དེ། སྔགས་རྣམས་དང་རྒྱན་དེ་རྣམས་ཚོགས་པ་ལས་བྱུང་བའི་ཕྱག་རྒྱ་དྲུག་དང་ཐོད་སྐམ་ལ་སོགས་པ་ཡོད་ན་དངོས་སུ་བརྒྱན་པའམ། མེད་ནའང་རྒྱན་དེ་རྣམས་ཀྱིས་བརྒྱན་པར་བསམ་པ་ཡིན་ཞིང་། དག་པའི་དོན་ནི་སྔགས་དེ་རྣམས་ལས་རྒྱན་དེ་དག་བྱུང་བར་སྒོམ་པ་ཉིད་ཡིན་པའི་ཕྱིར་རོ། །དེ་ནས་ཁ་ཊྭཱཾ་ཀ་ནི་ལྷ་ཡིས་སྐུ། །ཞེས་སོགས་ཀྱི་དོན་ཡང་ཡོད་དེ། ཁ་ཊྭཱཾ་ཀ་ནི་ཧེ་རུ་ཀའི་སྐུ་བདེ་བ་ཆེན་པོའི་ངོ་བོ་དང་། ཌ་མ་རུ་ནི་རྣལ་འབྱོར་མ་སྟེ་ཤེས་རབ་སྟོང་པ་ཉིད་ཀྱི་སྒྲ་སྒྲོག་པ་དང་། ཧེ་རུ་ཀ་ནི་ཉིན་མོའི་སྒྲས་བརྗོད་པའི་དག་པ་སྒྱུ་མའི་སྐུའི་རང་བཞིན་དང་། ཕག་མོ་ནི་མཚན་མོའི་སྒྲས་བསྟན་པའི་ཤེས་རབ་དོན་དམ་འོད་གསལ་གྱི་རང་བཞིན་དུ་བསྒོམ་པར་བྱ་བ་ཡིན་ལ། དེ་འདྲ་བའི་ཧེ་རུ་ཀ་ནི་འཁོར་བ་བག་ཆགས་དང་བཅས་པ་སྤངས་པ་ལས་བྱུང་བས་ན། མྱ་ངན་འདས་བྱུང་དཔའ་བོ་སྟེ། །ཞེས་གསུངས་ཤིང་། དེ་ཉིད་ཀྱང་སྒྲུབ་པ་པོར་རང་ཉིད་ཀྱི་རླུང་སེམས་ཙམ་གྱི་ཉེར་ལེན་ལས་སྤྲུལ་པའི་རིག་དྲུག་པ་རྡོ་རྗེ་འཆང་ཆེན་པོ་ཉིད་ཡིན་པས་ན། དྲུག་པ་སེམས་ཀྱི་སྤྲུལ་པ་སྟེ། །ཞེས་འབྱུང་བ་དང་། རྡོ་རྗེ་ཕག་མོ་ནི་རང་བཞིན་གྱིས་རྣམ་པར་དག་པའི་ཆོས་ཀྱི་དབྱིངས་ལས་སྤྲུལ་པའི་ལྷ་མོའི་གཟུགས་སུ་བསྟན་པར་བསམ་པ་ནི། དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཞེས་པའི་དོན་ཡིན་ལ། ལྷག་མའི་དོན་ནི་གོང་དུ་བཤད་ཟིན་པ་ལྟར་དྲན་པར་བྱ་དགོས་པའི་ཕྱིར་རོ། །ཕྱི་དཀྱིལ་གྱི་དག་པ་དྲན་པ་ནས་འདིའི་བར་གྱི་ཉམས་ལེན་རྣམས་ཀྱིས་ཕར་ཕྱིན་ཐེག་པའི་མཁྱེན་གསུམ་གྱི་ལམ་གྱི་གནད་ཐམས་ཅད་བསྡུས་པ་ཡིན་ཏེ། གཞི་ཕུང་ཁམས་སྐྱེ་མཆད་ཀྱི་ཆོས་རྣམས་རང་བཞིན་མེད་པར་རྟོགས་པའི་བདེ་བ་ཆེན་པོའི་ཡེ་ཤེས་ཀྱིས་བསྡུས་པའི་ཆོས་སོ་བདུན་ལྷ་སོ་བདུན་དུ་ཤར་བར་བསྒོམས་པས་གཞི་ཤེས་ཀྱི་ལམ་གྱི་གནད་དང་། ཡེ་ཤེས་དེ་ཉིད་ས་བཅུར་བཞག་པ་ལ་ལུས་ཀྱི་གནས་དང་ཉེ་བའི་གནས་ལ་སོགས་པར་མོས་པའི་ལུས་དཀྱིལ་བསྒོམས་པས་ནི་ལམ་ཤེས་ཀྱི་གནད་དང་། རྣལ་འབྱོར་པ་རང་གི་གཞི་ལམ་ཁྱད་གཞིར་བྱས་པའི་སྟེང་ནས་ཁྱད་ཆོས་གོ་ཆ་འཆིང་བ་སོགས་བསྒོམས་པས་ནི་རྣམ་མཁྱེན་གྱི་ལམ་གྱི་གནད་བསྡུས་པར་འདིའི་རྒྱ་འགྲེལ་དུ་མ་དང་རྗེ་ཉིད་ཀྱིས་ཀྱང་བཤད་པའི་ཕྱིར་རོ། །བཞི་པ་རྫོགས་རིམ་རྣལ་འབྱོར་ཆེན་པོ་ཅུང་ཟད་བསྒོམ་པའི་ཚུལ་ཡོད་དེ། དེ་ཡང་གཙོ་བོར་བསྐྱེད་རིམ་བསྒོམ་པའི་ཞར་བྱུང་གི་ཚུལ་དུ་བྱེད་པ་ཡིན་པས། དབྱངས་གསལ་ངག་ཏུ་བརྗོད་པ་ལས། དབྱངས་གསལ་གྱི་འཕྲེང་བ་འོད་ཟེར་ལྔ་ལྡན་འོད་ཟེར་གྱི་སྣེ་ལས། འཁོར་ལོ་གསུམ་གྱི་ལྷ་ཚོགས་སྣ་བུག་གཡས་པའི་རླུང་དང་འགྲོགས་ནས་སྤྲོས་པས། འགྲོ་བ་རྣམས་འཁོར་ལོ་གསུམ་གྱི་གོ་འཕང་ལ་བཀོད་པ་སོགས་བྱས་ནས། རང་གི་སྣ་བུག་གཡོན་ནས་ཞུགས་ཏེ་ལྟེ་བར་གནས་པ་ཡོངས་སུ་གྱུར་པ་ལས་རིམ་གྱིས་ཧེ་རུ་ཀ་དཀར་པོ་ཡུམ་ཕག་མོ་དང་བཅས་པར་བསྐྱེད་པའི་གསང་གནས་བསྐྱེད་པའི་དགའ་བའི་སྒྲས་འགྲོ་བ་རྣམས་བཀུག་སྟེ་དུར་ཁྲོད་ལ་ཐིམ་པ་སོགས་ཀྱི་སྡུད་རིམ་བཤད་པ་ལྟར་བྱས་པའི་མཐར་ནཱ་ད་ཕྲ་མོ་ལ་སེམས་འཛིན་དེ་ནས་ནཱ་ད་ཡང་མི་དམིགས་པར་བསམས་ཏེ་བདེ་སྟོང་གི་རྣལ་འབྱོར་སྒོམ་པར་བྱེད་པ་ཡིན་པའི་ཕྱིར་རོ། །གསུམ་པ་ཐུན་གྱི་མཇུག་ཏུ་ཇི་ལྟར་བྱ་བའི་ཚུལ་ལ་གཉིས། བཟླས་པ་དང་། གཏོར་མ་སོགས་ཀྱི་རིམ་པའོ། །དང་པོ་ལ་གཉིས། རྡོར་བཟླས་དང་། ངག་བཟླས་སོ། །དང་པོ་འདིར་བསྐྱེད་རིམ་པའི་རྡོར་བཟླས་ཇི་ལྟར་བྱ་བའི་ཚུལ་ཡོད་དེ། དེ་ནས་སླར་རྟེན་བརྟེན་པའི་དཀྱིལ་འཁོར་དུ་སྐད་ཅིག་གིས་ལྡང་ནས་རང་གི་ལྟེ་བར་ཟླ་བ་ལ་གནས་པའི་ཧཱུཾ་མམ། ནཱ་ད་དཀར་ལ་དམར་བའི་མདངས་ཅན་ལས་རླུང་ཕྱིར་འབྱུང་བ་ཧཱུཾ་གྱི་གདངས་ཀྱིས་འཁོར་ལོ་ལྔའི་ལྷ་ཚོགས་སྤྲོས་ཏེ་འགྲོ་བའི་དོན་བྱས། ༀ་གྱི་གདངས་ཀྱིས་ནང་དུ་ཞུགས་ནས་ཧཱུཾ་མམ་ནཱ་ད་ལ་ཐིམ། ཨཱཿའི་གདངས་ཀྱིས་གནས་པར་བསམས་ཏེ་རླུང་ཅུང་ཟད་འཛིན་པ་ཉིད་ཡིན་པའི་ཕྱིར་རོ། །གཉིས་པ་ངག་བཟླས་ལ་སྤྱིར་བྱ་ཚུལ་ལྔ་ཡོད་དེ། དམ་ཚིག་གི་བཟླས་པ། དོ་ལིའི་བཟླས་པ། ཁྱོགས་ཀྱི་བཟླས་པ། གོང་བུའི་བཟླས་པ། ཁྲོ་བོའི་བཟླས་པ་རྣམས་སུ་ཡོད་པའི་ཕྱིར་རོ། །དེ་རྣམས་གང་བྱེད་ཀྱང་འཕྲེང་བ་བསྐྱེད་ཆོག་རྒྱས་པ་སྔགས་རིམ་ནས་འབྱུང་བ་ལྟར་རམ། བསྡུས་པ་སྐབས་འདིར་མངོན་རྟོགས་ནས་འབྱུང་བ་བཞིན་པདྨ་གར་དབང་དུ་བསྐྱེད་པ་ལ་ཡེ་ཤེས་པ་བསྟིམ་མཆོད་ནས་འཕྲེང་བར་གྱུར་པར་བསམས་ཏེ་བཟླས་པ་བྱེད་པ་ཡིན་ལ། དེའི་ཚེ་གཙོ་འཁོར་དུ་ཡོད་ཀྱི་ཞལ་ནས་འདོན་པར་མོས་དགོས་པ་ཡིན་ཏེ། དེ་ལྟར་བཟླས་ནས་དེ་སྙེད་ཀྱི་གྲངས་ཀྱི་འགྱུར་ཁྱད་འབྱུང་བ་དྲིལ་བུ་པ་སོགས་ཀྱིས་བཤད་པའི་ཕྱིར་རོ། །དེ་ཡང་ཐུན་གྱི་ངོ་བོ་ལ་ལྷའི་ང་རྒྱལ་གྱིས་སེམས་མ་གཡེང་བར་བཟླས་པ་རྣམས་དེའི་གྲངས་སུ་གཞུག་པར་བྱའི། ཐུན་མཚམས་སུ་བཟླས་པ་རྣམས་བཟླས་པའི་གྲངས་སུ་མི་འདྲེན་ཡང་བཟླ་དགོས་པ་ཡིན་ཏེ། ལས་སྒྲིབ་སྦྱོང་བ་དང་བར་ཆད་ཞི་བ་སོགས་ཀྱི་ཆེད་དུ་སྤྱོད་ལམ་ཐམས་ཅད་ཀྱི་ཚེ་བཟླས་ཆོག་པར་འདིའི་རྒྱ་འགྲེལ་སོགས་དུ་མ་ཞིག་ལས་བཤད་པའི་ཕྱིར་རོ། །བཟླས་བྱའི་སྔགས་ནི་གོང་དུ་བརྗོད་པའི་སྔགས་རྣམས་ཡིན་ཀྱང་། གྲངས་དང་བཟླ་ཚུལ་གྱི་དབང་དུ་བྱས་ན་ཁྱད་པར་ཡོད་དེ། རང་ཉིད་བདག་འཇུག་བྱེད་པ་དང་། གཞན་ལ་དབང་བསྐུར་བ་སོགས་ཀྱི་ལས་རུང་དུ་བྱེད་པ་ལ། འདིའི་བསྙེན་པ་རྒྱས་པའི་དབང་དུ་བྱས་ན། དཱ་རི་ཀ་པ་དང་ནག་པོ་པས་བཤད་པ་ལྟར། གཙོ་བོ་ཡབ་ཡུམ་ལ་ཁྲི་ཕྲག་གསུམ་གསུམ་དང་། འཁོར་ལོ་གསུམ་གྱི་ལྷ་རེ་རེ་ལ་ཁྲི་ཕྲག་གཉིས་གཉིས། ལྷ་མོ་གཞན་བཅུ་གཉིས་པོ་རེ་རེ་ལ་སྟོང་ཕྲག་ཕྱེད་དྲུག་རེ་བཟླ་ཞིང་། འབྲིང་དང་། བསྡུས་པ་གཉིས་ལ་ནི་གཙོ་བོ་ལ་འབུམ། འཁོར་རྣམས་ལ་ཁྲི་ཕྲག་རེ། རྒྱས་བསྡུས་གཉིས་ཀ་ལ་ཡེ་ཤེས་འབེབ་སྔགས་ཁྲི་ཕྲག་གཅིག་བཟླ་དགོས་པའི་ཕྱིར་རོ། །ཡབ་ཀྱི་བཟླས་བྱའི་སྔགས་ནི་རྩ་སྔགས་རབ་ཡིན་ལ། དེ་མིན་སྙིང་པོའི་སྔགས་སུ་གསུངས་པས་ཡུམ་ལའང་མཚོན་ཞིང་། ཡབ་ཡུམ་གྱི་རྩ་སྔགས་གོང་དུ་བླངས་ནས་འདོན་པ་ཡོད་ཀྱང་དེ་གཙོ་བོར་མི་འདོན་ན་འཁོར་ལོ་ལྔའི་ལྷ་རྣམས་ཀྱི་སྔགས་བཟླས་པའི་མཇུག་ཏུ་ཅི་འགྲུབ་བཟླས་ཀྱང་ཆོག་སྟེ། ཚད་ལྡན་གྱི་གཞུང་འགའ་ལས་དེ་ལྟར་དུ་འབྱུང་ཞིང་། རིགས་པ་གཞན་གྱིས་ཀྱང་གྲུབ་པའི་ཕྱིར་རོ། །གོ་ཆའི་སྔགས་བཟླ་བ་ཁ་ཅིག་ནས་མི་འབྱུང་ཡང་རྩ་སྔགས་ཀྱི་མཐར་བཟླ་བར་བྱ་སྟེ། རྩ་རྒྱུད་ལས། ས་སྟེང་འདི་ན་རིན་ཆེན་བཞི། །ཞེས་བཤད་པའི་བཞིའི་ཡ་གྱལ་ཡིན་པའི་ཕྱིར་རོ། །འོན་ཀྱང་བསྙེན་པའི་གྲངས་སུ་ངེས་པར་འདྲེན་མི་དགོས་པར་སེམས་ཏེ་བརྟག་ལ། རྐང་བརྒྱད་ཀྱི་སྔགས་ནི་བཟླས་པའི་གྲངས་སུ་བྱས་ནས་ཏོན་ཀྱང་མི་འགལ་ཞིང་། དེ་མ་བྱས་པར་ཇི་ལྟར་འཚམ་པ་ཞིག་བཟླ་བའམ་མིན་ཀྱང་ཆོག་སྟེ། འདི་བསྟོད་སྔགས་ཡིན་པས་གདམ་པ་ཅན་དུ་བཤད་པའི་ཕྱིར་རོ། །བཟླས་པ་འབྲིང་བྱ་ཚུལ་ནི་བཤད་རྒྱུད་མངོན་བརྗོད་ལས་བཤད་དེ། དེ་ཉིད་ལས། སྔོན་དུ་བསྙེན་པ་བྱ་བ་ནི། །ཆོ་ག་བཞིན་དུ་འབུམ་དུ་བཟླ། །འཁོར་ལོའི་གསང་སྔགས་འབུམ་བཟླ་ཞིང་། །རང་གི་ལྷ་ཡིའང་འབུམ་དུ་བཟླ། །གཞན་ནི་ཁྲི་རུ་བཟླ་བར་བྱ། །ཞེས་དང་། སྔགས་རྣམས་སྔོན་མའི་དབང་དུ་བྱས་ནས། ལྭ་ཝ་པས་ཀྱང་གཙོ་བོ་ལ་འབུམ་འཁོར་ལ་ཁྲི་ཕྲག་རེ་བཟླ་བར་བཤད་ལ། ཡང་དཱ་རི་ཀ་བས་འབྲིང་པོའི་དབང་དུ་མཛད་ནས་དེ་ཁོ་ན་ལྟར་པ་བཤད་ཅིང་། ཐུན་མོང་དུ་ཡེ་ཤེས་འབེབས་སྔགས་ཁྲི་དང་། བཟླས་པའི་ཁ་སྐོང་གི་སྦྱིན་སྲེག་ཀྱང་བྱ་བར་བཤད་པ་ལྟར་ཡིན་པའི་ཕྱིར་རོ། །འཁོར་གྱི་ལྷ་དྲུག་ཅུའི་སྔགས་བསྡུས་པ་བྱེད་པ་ལ་ཚུལ་གཉིས་ཡོད་ཀྱང་། འདིར་བཤད་རྒྱུད་མངོན་བརྗོད་ལས་གསུངས་པ་བཞིན་བྱ་ན་འདི་ལྟར་ཡིན་ཏེ། གཙོ་བོ་ཡབ་ཡུམ་གཉིས་འབྲིང་པོ་ལྟར་ཡིན་ཞིང་འཁོར་རྣམས་ལ་ནཱི་རྀ་ལྀ་བཞི་དང་། མ་ཡིག་དོར་བའི་ཀ་ཙ་ཊ་ཏ་བའི་སྡེ་ཚན་གྱི་ཡི་གེ་ཉེར་བཞི་དང་། ཡ་ར་ལ་ཝ་བཞིི་དང་། ཤ་ཥ་ས་ཧ་བཞིའི་མགོར་ཐིག་ལེ་བྱིན་ནས་རེ་རེའི་ཐོག་མར་ༀ་དང་མཐར་ཧཱུཾ་ཧཱུཾ་ཕཊ་སྦྱར་བ་རྣམས་རིམ་པ་བཞིན་སྙིང་པོའི་རྣལ་འབྱོར་མ་བཞི་དང་། འཁོར་ལོ་གསུམ་གྱི་ལྷ་ཟུང་ཉེར་བཞི་དང་། སྒོ་མ་བཞི་དང་། མཚམས་མ་བཞིའི་སྔགས་སུ་བཤད་པ་ལྟར་རམ་རྀ་སོགས་ས་བོན་སོ་དྲུག་པོ་སྤྲེལ་ནས་ཐོག་མཐར་སྔར་བཞིན་སྦྱར་ཏེ་བཟླས་པས་ཀྱང་ཆོག་པར་རྗེ་ཡབ་སྲས་རྗེས་འབྲང་དང་བཅས་པ་དུ་མས་བཤད་པ་ལྟར་ཡིན་པའི་ཕྱིར་རོ། །བཟླ་བྱའི་སྔགས་རྣམས་ཀྱི་ནང་ནས་ཡབ་ཀྱི་སྙིང་པོའི་སྔགས་དོན་ཡོད་དེ། ༀ་ནི་སྔགས་ཀྱི་འགོ་འདྲེན་ཡིན་ཞིང་དེའི་ཨ་ཨུ་མ་གསུམ་གྱིས་ནི་སྐུ་གསུང་ཐུགས་མཚོན་པ་དང་སྔར་བཤད་པ་ལྟར་བཀྲ་ཤིས་པ་སོགས་ལ་འཇུག་པ་ཡིན་ལ། ཤྲཱི་ནི་དཔལ། བཛྲ་ནི་རྡོ་རྗེ། ཧེ་རུ་ཀ་ནི་ངེས་ཚིག་གིས་བཤད་ན་ཐོད་ཁྲག་ལ་རོལ་པའམ་ཁྲག་འཐུང་། ཌཱ་ཀཱི་ནཱི་ནི་མཁའ་འགྲོ་མ། ས་མཱ་རཾ་ནི་སྡོམ་པའམ་བདེ་མཆོག སྭཱ་ཧཱ་ནི་གཞི་ཚུགས་ཅེས་པའི་དོན་ཡིན་པའི་ཕྱིར་རོ། །ཉེ་སྙིང་ལ་བསྒྱུར་རྒྱུ་མེད་ཀྱང་མཚོན་དོན་ཡོད་དེ། ཧྲཱིཿལ་སོགས་པའི་ཡི་གེ་ལྔས་ཡེ་ཤེས་ལྔ་མཚོན་པ་ཡིན་པའི་ཕྱིར། ཡུམ་གྱི་སྙིང་པོ་དང་ཉེ་སྙིང་གི་དོན་ཡང་ཡོད་དེ། དང་པོ་ནི་རྡོ་རྗེ་རྣམ་པར་སྣང་མཛད་ཅེས་པ་ཡིན་ལ། ཕྱི་མ་ནི་སངས་རྒྱས་ཐམས་ཅད་ཀྱི་རྡོ་རྗེ་མཁའ་འགྲོ་མ་ཞེས་པར་འགྱུར་བའི་ཕྱིར་རོ། །ཌཱ་ཀཱི་ནཱི་ཞེས་སོགས་བཞིའི་དོན་ཡོད་དེ། གཞན་གསུམ་བསྒྱུར་པ་ལྟར་ཡིན་ལ། ལཱ་མ་ནི་མཛེས་མ་ཞེས་པར་འགྱུར་བའི་ཕྱིར་རོ། །ཀ་ར་ཀ་ར་སོགས་ཀྱི་དོན་ལ་དྲང་ངེས་གཉིས་ཡོད་པའི་དྲང་དོན་བཤད་ན་དཔའ་བོའི་སྔགས་ཀྱི་དོན་ཀྱང་ཤེས་པར་འགྱུར་བས་བསྡུས་ཏེ་བཤད་ན་འདི་ལྟར་དུ་འགྱུར་ཏེ། ཀ་ར་གཉིས་ནི་གྱིས་ཤིག་གཉིས། ཀུ་རུ་གཉིས་ནི་མཛོད་གཉིས། དེ་བཞིན་དུ་སྦྱར་ཏེ། བྷནྡྷ་འཆིང་། ཏྲཱ་ས་ཡ་སྐྲག་པར་གྱིས། ཀྵོ་བྷ་ཡ་བསྐྱོད་པར་གྱིས། ད་ཧ་སྲེགས། པ་ཙ་ཚོས། བྷཀྵ་ཟོ། པ་ས་ཞག རུ་དྷི་ར་གྲག ཨནྟྲ་རྒྱུ་མ། མཱ་ལཱ་བ་འཕྲེང་བ། ལཾ་པི་ནི་འཕྱང་བ། སཔྟ་བདུན། པཱ་ཏ་ལ་ས་འོག ག་ཏ་གནས་པ། བྷུ་ཛི་གི་ལག་འགྲོ། ས་ར་བ་པཱ་སྦྲུལ་རྣམས། ཏ་རྫི་ལ་བསྡིགས། ཨ་ཀཊ་ཌྷྱ་ཡུག་ཅེས་པ་ཡིན་ལ། ཧྲཱིཾ་ཧྲཱིཾ་སོགས་ལ་བསྒྱུར་པ་མེད་ཀྱང་མཚོན་དོན་ཁྱད་པར་ཅན་ཡོད་ཚུལ་ནི་འོག་ཏུ་འཆད་པར་འགྱུར་བའི་ཕྱིར་རོ། །རྩ་སྔགས་ཀྱི་ངེས་དོན་ཤེས་པ་གལ་ཆེ་སྟེ། རྩ་རྒྱུད་ལེའུ་དགུ་པ་ལས་དེ་མ་ཤེས་ན་རྩ་སྔགས་ཀྱི་དེ་ཉིད་མི་ཤེས་པས་དངོས་གྲུབ་འགྲུབ་དགའ་བར་གསུངས་པའི་ཕྱིར་རོ། །དེས་ན་འདིའི་ངེས་དོན་ཅུང་ཟད་ཅིག་བཤད་ན་འདི་ལྟར་ཡིན་ཏེ། དེ་ཡང་རྒྱུད་འགྲེལ་ནས་འབྱུང་བ་ལྟར་རྩ་སྔགས་བཏུ་བའི་ངེས་དོན་དང་། བཏུས་པའི་རྩ་སྔགས་ཀྱི་ངེས་དོན་གཉིས་ཡོད་པའི་ནང་ནས་ཕྱི་མ་འཆད་པ་ལ། ཀ་ར་གཉིས་ནི་ལས་སྒྲིབ་ཡང་ཡང་ཟད་པར་བྱེད་པ། ཀུ་རུ་ནི་ཉོན་མོངས་ཡང་ཡང་ཟད་པར་བྱེད་པ། བྷྱནྡྷ་ནི་ལྷའི་འཁོར་ལོ་རྣམས་རང་བཞིན་མེད་པར་རྟོགས་པའམ་འཆིང་བ་། ཏྲཱ་ས་ཡ་ནི་ཀུན་རྫོབ་ཀྱི་ཆོས་ཐམས་ཅད་སྒྱུ་མ་ལྟ་བུར་རྟོགས་ནས་མི་སྐྲག་པ། ཀྵོ་བྷ་ཡ་ནི་ཆོས་རྣམས་ལ་དོན་དམ་དཔྱོད་བྱེད་ཀྱི་རིགས་པས་དཔྱད་ནས་ཅུང་ཟད་ཀྱང་མ་རྙེད་པའི་སྟོང་ཉིད་སྒོམ་པ། ཧྲཾ་ལ་ནི་ཆ་དུ་མ་ཡོད་པའི་ནང་ནས་རས་སྒྲུབ་པ་པོའི་རྡོ་རྗེ་དེར་ལྟར་བྱས་པས་ནི་ཕྱག་རྒྱའི་པདྨ། ཧ་ས་ནི་སྒྲུབ་པ་པོའི་བྱང་སེམས། དེའི་སྲོག་གི་ཨུའམ་ན་རོས་ནི་ཕུང་ཁམས་སྐྱེ་མཆེད་འོད་གསལ་དུ་སྡུད་པ། ཟླ་ཚེས་ཀྱིས་ནི་སྤྱི་བོ་ནས་བྱང་སེམས་འབབ་པ། ཐིག་ལེས་ནི་བདེ་སྟོང་དབྱེར་མེད་མཚོན། ཧྲཿའི་ཧས་ནི་སྒྲུབ་པ་པོའི་བྱང་སེམས། ར་སྟས་ནི་ཕྱག་རྒྱའི་ཁམས་དམར་པོ། རྣམ་བཅད་ཀྱིས་ནི་ཐིག་ལེ་གཉིས་ཡུམ་གྱི་པདྨར་འདྲེས་པ་དེ་མཚོན། ཕེཾ་གྱི་ཕས་ནི་ཟུང་འཇུག ཟླ་ཚེས་ཀྱིས་ནི་དོན་དམ་འོད་གསལ། ཐིག་ལེས་ནི་དེ་གཉིས་དབྱེར་མེད་དུ་སྦྱོར་བ་དེ་མཚོན། ཕཊ་གྱིས་ནི་འོད་གསལ་གྱི་ཡེ་ཤེས། ད་ཧས་ནི་ཡེ་ཤེས་དེས་མཚན་འཛིན་སྲེག་པ། པ་ཙས་ནི་ཟག་བཅས་ཀྱི་ཕུང་པོ་ཆོས་པ། བྷཀྵས་ནི་རྣམ་རྟོག་དེ་ཟད་པར་བྱེད་པ། བ་ས་ནས་ལམྦྷིའི་བར་ནི་ལྷ་ལ་བསྟོད་ཅིང་འབོད་པ། བོས་ནས་གྲྀཧྣ་དང་ཏ་རྫ་ཡས་ནི་བསྡིགས་ལ་ཚར་ཆོད་ཅིག་སྟེ་སཔྟ་ནས་སརྦཾ་བཱའི་བར་གྱིས་སྦྲུལ་གདུག་དང་འདྲ་བའི་བདེན་འཛིན་གྱི་རྣམ་རྟོག་དེ་ནི་ཚར་ཆོད་ཅིག ཨ་ཀཌྷྱ་ས་ནི་རྣམ་ཐར་སྒོ་གསུམ་གྱི་རིགས་པས་མཚན་འཛིན་ཐམས་ཅད་ཆོད། ཧྲི་ལ་ཡི་གེའི་ཆ་བཞི་ཡོད་པའི་ཧ་ས་ཐབས། ར་སྟས་ཤེས་རབ། ཨི་ས་ཡེ་ཤེས་བཞི། ཐིག་ལེས་དེ་རྣམས་ངོ་བོ་དབྱེར་མེད་དུ་སྦྱོར་བ་དེ་མཚོན། ཛཽཾཎ་ལ་ཚ་དུ་མ་ཡོད་པའི་ཛཎས་ནི་ཕུང་ཁམས་སོགས་བདེ་སྟོང་དབྱེར་མེད་ཀྱི་ངོ་བོར་འཆིང་བ། ན་རོ་གཉིས་ཀྱིས་ནི་དབང་པོ་དང་ཡུལ་ལྔ། ཟླ་ཚེས་ཀྱིས་ཁམས། ཐིག་ལེས་ནི་བདེ་སྟོང་དབྱེར་མེད་དུ་བྱེད་པ་དེ་མཚོན། ཀྵྨཾ་གྱིས་ནི་གཟུང་འཛིན་གཉིས་ཀྱི་སྣང་བ་ཐམས་ཅད་འོད་གསལ་དུ་བསྡུས་ནས་ཉམས་སུ་མྱོང་བ། ཧཾ་གིས་ནི་བདེ་སྟོང་གི་ངང་དུ་རོ་གཅིག་པ། ཧིཾ་གིས་ནི་སོར་རྟོར་ཡེ་ཤེས། ཧཱུཾ་གིས་ནི་ཆོས་དབྱིངས་ཡེ་ཤེས། ཀི་ལིའི་ཀ་ལ་ཐིག་ལེ་བྱིན་པའི་ཀཾ་གིས་ནི་ལྷན་སྐྱེས་ཀྱི་བདེ་བ་དང་། སི་ལིའི་ས་དང་ཨི ས་ནི་བདེ་སྟོང་དབྱེར་མེད་དུ་བསྡོམས་པ། དྷི་ལིས་ནི་ཡེ་ཤེས་དེ་ལ་ལོངས་སྤྱོད་པ་མཚོན་ཞིང་དེའི་ངེས་དོན་ཡིན་ལ། སྔགས་ཕལ་ཆེར་ལ་ལན་གཉིས་རེ་ཟློས་ཏེ་བྱུང་བ་ནི་ཡང་ཡང་གི་དོན་དུ་བཤད་པ་ལྟར་ཡིན་པའི་ཕྱིར་རོ། །དཔའ་བོའི་མཚན་གཞན་བོད་སྐད་དུ་བསྒྱུར་བ་ལྟར་ཡིན་ལ། མ་བསྒྱུར་པ་ཁཎྜ་ཀ་པཱ་ལ་དང་། མ་ཧཱ་ཀངྒ་ལ་དང་། ཀདྒ་ལ་དང་། སུ་ར་བཻ་རི་ཎཱ་ཞེས་པ་རྣམས་ཀྱི་དོན་ཡང་ཡོད་དེ། རིམ་པ་བཞིན་དུ་ཐོད་པའི་དུམ་བུ། ཀང་རུས་ཆེན་མོ། ཀེང་རུས། ཆང་དགྲ་ཞེས་པར་འགྱུར་བའི་ཕྱིར་རོ། །འཁོར་ལོ་གསུམ་གྱི་དཔའ་མོ་རྣམས་ཀྱི་སྔགས་དོན་ཡོད་དེ། པྲ་ཙནྚི་ནི་རབ་གཏུམ་མ་ཡིན་པ་ནས་མ་ཧཱ་བཱིརྱ་ནི་བརྩོན་འགྲུས་ཆེན་མོའི་བར་ཡིན་པའི་ཕྱིར། སྒོ་མཚམས་མ་བརྒྱད་ཀྱི་སྔགས་དོན་ཡང་ཡོད་དེ། ཀཱ་ཀ་སྱ་ནི་ཁ་གདོང་མ་ཡིན་པ་ནས། ཡ་མ་མ་ཐ་ནཱི་གཤིན་རྗེ་འཛོམས་མའི་བར་ཡིན་པའི་ཕྱིར་རོ། །ཡབ་དང་ཡུམ་གྱི་རྐང་པ་བརྒྱད་ཀྱི་སྔགས་དོན་ཡང་ཡོད་དེ། དང་པོ་ནི་བཅོམ་ལྡན་དཔའ་བོའི་དབང་ཕྱུག་ལ་ཕྱག་འཚལ་ལོ། །ཞེས་སོགས་ལྟར་ཡིན་ལ། ཕྱི་མ་ནི་བཅོམ་ལྡན་འདས་མ་རྡོ་རྗེ་ཕག་མོ་ལ་ཕྱག་འཚལ་ལོ། །ཞེས་སོགས་འབྱུང་བ་ལྟར་ཡིན་པའི་ཕྱིར་རོ། །གཉིས་པ་གཏོར་མ་སོགས་ཇི་ལྟར་བྱ་བའི་ཚུལ་ལ་གཉིས། གཏོར་མ་དང་། ཐུན་གྱི་སྔ་ཕྱིའི་བར་སོགས་ལ་ཇི་ལྟར་བྱ་བའོ། །དང་པོ་ནི། བྱིན་རླབས་སྔོན་འགྲོའི་སྐབས་བཞིན་བྱས་ནས་ཇི་ལྟར་སྤྱན་འདྲེན་པའི་ཚུལ་ཡོད་དེ། རང་གི་ཐུགས་ཀའི་ཧཱུཾ་གྱི་འོད་ཟེར་གྱིས་འདས་མ་འདས་ཀྱི་གཏོར་མགྲོན་རྣམས་ལྷན་ཅིག་སྤྱན་འདྲེན་པ་ཡིན་པའི་ཕྱིར། དེ་ནས་ལག་པ་བྱིན་རླབས་བྱ་བའི་ཚུལ་ཡོད་དེ། དབྱངས་གསལ་ལས་ལག་པ་གཉིས་ཟླ་ཉི་ཧཱཾ་དང་བཅས་པར་བསྐྱེད་ནས་ༀ་ཨ་ནྱོ་ནྱ་ཞེས་སོགས་ཀྱི་སྔགས་བརྗོད་པའི་སྒོ་ནས་ལག་པ་གཉིས་རྡོ་རྗེ་ཐལ་མོར་བསྒྱུར་ནས་བདེན་པ་བརྗོད་ཅིང་བྱིན་གྱིས་བརླབས་པ་ཡིན་པའི་ཕྱིར། སྔགས་དེའི་དོན་ཡོད་དེ། ཨ་ནྱོ་ནྱ་ནས་སརྦ་དྷ རྨཱཿནི། ཕན་ཚུན་རྗེས་སུ་རབ་ཏུ་ཞུགས་པའི་ཆོས་ཐམས་ཅད། པ་ར་སྥ་ར་ནས་སརྦ་དྷརྨྨཱཿནི། མཆོག་ཏུ་ཤིན་ཏུ་རབ་ཏུ་ཞུགས་པའི་ཆ ོས་ཐམས་ཅད་། ཨཏྱནྟ་ནས་སརྦ་དྷརྨྨཱཿ་ནི། དང་པོར་རབ་ཏུ་རྗེས་སུ་གནས་པའི་ཆོས་ཐམས་ཅད་ཅེས་པ་ཡིན་ཞིང་། དེ་ཡང་ལག་པ་གཉིས་ཐབས་ཤེས་དབྱེར་མེད་པའི་རྡོ་རྗེའི་ཐལ་མོར་བྱིན་གྱིས་རློབ་པར་བྱེད་པའི་དོན་ཡིན་པའི་ཕྱིར་རོ། །ལྷ་མོ་ཚད་མ་དམ་ཚིག་ཚད་མ་དང་། ཞེས་སོགས་ཀྱི་དོན་ཡང་ཡོད་དེ། དཀྱིལ་འཁོར་པའི་ལྷ་རྣམས་ནི་མི་བསླུ་བའི་ཡེ་ཤེས་དང་ལྡན་པའི་ཚད་མའི་སྐྱེས་བུ་ཡིན་པས། དེའི་ཡེ་ཤེས་དང་དམ་ཚིག་ཀྱང་མི་བསླུ་བས་ན་ཚད་མ་ཡིན་ལ། དེ་དག་སྟོན་པའི་གསུང་ངག་ཀྱང་མི་བསླུ་བའི་ཚད་མ་ཡིན་པའི་བདེན་པ་དེས། ཁྱེད་རྣམས་ལ་གཏོར་མ་ཕུལ་བ་ནི་བདག་ཅག་རྗེས་སུ་འཛིན་པའི་རྒྱུར་གྱུར་ཅིག་ཅེས་པ་ཡིན་པའི་ཕྱིར་རོ། །འདས་པའི་མགྲོན་ལ་འབུལ་བའི་ཚུལ་ཡོད་དེ། ལྗགས་བྱིན་གྱིས་བརླབས་ནས་ༀ་ཨཱཿབཛྲ་ཨ་ར་ལི་ཞེས་སོགས་ཀྱི་སྔགས་བརྗོད་དེ་ཕུལ་ནས་མཆོད་བསྟོད་བྱ་བ་ཡིན་པའི་ཕྱིར། སྔགས་དེའི་དོན་ཡང་ཡོད་དེ། བཛྲ་ཨ་ར་ལི་ཧོ་ནི་རྡོ་རྗེ་རོལ་པ། བཛྲ་ཌཱ་ཀི་ནྱ་ནི་རྡོ་རྗེ་མཁའ་འགྲོ། ས་མ་ཡ་སྟྭཾ་ནི་དམ་ཚིག་ལྡན་པ་ཁྱོད། ཏྲི་ཤྱ་ཧོཿནི་ཀྱེ་གཟིགས་ཤིག་ཅེས་པ་ཡིན་པའི་ཕྱིར་རོ། །འཇིག་རྟེན་པ་རྣམས་ལ་འབུལ་བའི་ཚུལ་ཡོད་དེ། སྔོན་འགྲོའི་སྐབས་ལྟར་འབུལ་བ་སོགས་ཡིན་པའི་ཕྱིར་རོ། །མཐར་གཤགས་གསོལ་བྱ་བའི་ཚུལ་ཡོད་དེ། ཡིག་བརྒྱ་བཟླས་ནས་ༀ་ཡོ་ག་ཤུདྡྷ་སརྦ་དྷརྨྨཱཿཞེས་སོགས་ཀྱི་མཐར་ༀ་བཛྲ་མུཿཞེས་བརྗོད་ཅིང་། འཇིག་རྟེན་པ་རྣམས་རང་གནས་སུ་གཤེགས་ཤིང་། དཀྱིལ་འཁོར་གྱི་འཁོར་ལོ་བདག་ཉིད་ལ་ཐིམ་ནས་བྱིན་གྱིས་བརླབས་པར་བསམ་ཞིང་སྨོན་ལམ་གདབ་པ་ཡིན་པའི་ཕྱིར། ཡོ་ག་ཞེས་སོགས་ཀྱི་དོན་ནི་སྔར་བཤད་ཟིན་ལ། བཛྲ་མུཿཞེས་པའི་དོན་ཡོད་དེ། ངེས་ཚིག་གིས་བཤད་ན་མཱུ་ལ་ནི་རྩ་བའི་དོན་ཡིན་པས། རྩ་བའམ་རང་གནས་སུ་གཤེགས་པའི་དོན་ཡིན་པའི་ཕྱིར་རོ། །དེ་ནས་ཉེར་བསྡུ་སོགས་ཇི་ལྟར་བྱ་བའི་ཚུལ་ཡོད་དེ། ཡེ་ཤེས་སེམས་དཔའ་ཡབ་ཡུམ་སྙོམས་པར་ཞུགས་པའི་རྐྱེན་གྱིས་ནཱ་དའི་བར་སྡུད་རིམ་བྱས་ཏེ། སླར་ཡང་ལྷའི་སྐུར་སྐད་ཅིག་གིས་ནི་ལྡང་ནས་གོ་ཆ་བགོ་ཞིང་། པཱུ་ཛ་ལ་སོགས་པའི་གནས་ཉེར་བཞིའི་མིང་ཡིག་དང་པོ་ལ་ཐིག་ལེས་བརྒྱད་པ་ལུས་ལ་བཀོད་ནས་ཞལ་བཞི་པའི་སྔགས་བརྗོད་དེ་བགེགས་ཐམས་ཅད་བསྐྲད་པར་བྱ་བ་སོགས་ཡིན་པའི་ཕྱིར་རོ། །གཉིས་པ་ལ་གཉིས། ཐུན་སྔ་ཕྱིའི་བར་དང་། ཐུན་བཞི་ལ་རྒྱས་བསྡུས་ཇི་ལྟར་བྱ་བའི་ཚུལ་ལོ། །དང་པོ་ལ་གཉིས། སྤྱི་དང་། ཁ་ཟས་ཀྱི་རྣལ་འབྱོར་རོ། དང་པོ་ནི། ཧེ་རུ་ཀའི་རྣལ་འབྱོར་ལ་གནས་པའི་སྒོ་ནས་འདོད་ཡོན་སོགས་ལ་འཇུག་དགོས་པ་ཡིན་ཏེ། ལྷའི་རྣལ་འབྱོར་དང་མ་བྲལ་ན་ལུས་ཀྱི་སྒུལ་བསྐྱོད་དང་ངག་གི་སྨྲ་བརྗོད་བཏང་སྙོམས་པ་རྣམས་ཀྱང་ཚོགས་རྫོགས་པའི་ཡན་ལག་ཏུ་འགྱུར་བའི་ཕྱིར་ཏེ། ཀུན་སྤྱོད་ལས། ཧེ་རུ་ཀའི་གོ་འཕང་གནས། །ཡན་ལག་གི་ནི་བསྐྱོད་པ་དང་། །ཚིག་གི་རབ་འབྱམས་ཇི་སྙེད་པ། །དེ་སྙེད་ཕྱག་རྒྱ་གསང་སྔགས་ཡིན། །ཞེས་གསུངས་པའི་ཕྱིར་རོ། །གཉིས་པ་ཁ་ཟས་ཀྱི་རྣལ་འབྱོར་ཇི་ལྟར་བྱ་བའི་ཚུལ་ཡོད་དེ། བཟའ་བཏུང་གཏོར་མ་ལྟར་བྱིན་གྱིས་བརླབ་པའམ། ཡང་ན་སྡོམ་འབྱུང་ལས་བཤད་པ་ལྟར། ཡི་གེ་གསུམ་དང་ཧ་ཧོ་ཧྲིཿའི་སྒོ་ནས་བྱིན་གྱིས་བརླབས་པའི་ཕུད་ལྷ་དང་བླ་མ་ལ་ཕུལ་བའི་རྗེས་སུ། ལུས་དཀྱིལ་སྐད་ཅིག་གིས་གསལ་བཏབ་ནས་ནང་གི་སྦྱིན་སྲེག་གི་ཚུལ་དུ་ལོངས་སྤྱད་ན་ཉེས་པ་སྦྱོང་ཞིང་བསོད་ནམས་ཀྱང་འཕེལ་བར་འགྱུར་བའི་ཕྱིར་ཏེ། གདན་བཞི་ལས། གང་ཞིག་ཅུང་ཟད་བཟའ་བཏུང་རྣམས། །བསྔོ་བ་བྱས་ཏེ་བཟའ་བྱས་ན། །འདི་ལྟར་སྤྱོད་པའི་རྣལ་འབྱོར་པ། །བུ་ལོན་དུ་ཡང་མི་འགྱུར་རོ། །ཞེས་གསུངས་པའི་ཕྱིར། དེ་ལྟར་མ་བྱས་པར་སྲེད་པ་དང་བཅས་པས་སྤྱད་ན་ཉེས་པར་འགྱུར་བ་ཡིན་ཏེ། སྡོམ་འགྱུར་ལས། གལ་ཏེ་སྲེད་ལྡན་འཐུང་གྱུར་ན། །དེ་ནི་དུག་ཏུ་འགྱུར་བ་ཡིན། །ཞེས་གསུངས་པའི་ཕྱིར་རོ། །གཉིས་པ་ཐུན་བཞིའི་སྐབས་སུ་རྒྱས་བ སྡུས་ཇི་ལྟར་བྱ་བའི་ཚུལ་ཡོད་དེ། ཐུན་དང་པོ་ལ་བཟའ་བཏུང་གི་བར་བྱས་ནས། ཐུན་གཞན་གསུམ་གྱི་ཚེ་རྒྱས་པར་ན་དག་པ་གསུམ་ནས་བརྩམས་ཏེ་སྔ་མ་དང་འདྲ་ལ། ཅུང་ཟད་བསྡུ་ན་ནི་འདོད་འཇོ་ལས། སྐད་ཅིག་མའི་སྔགས་གསུམ་བརྗོད་ནས་རྟེན་བརྟེན་པའི་དཀྱིལ་འཁོར་སྐད་ཅིག་གིས་བསྐྱེད་ནས་གསལ་འདེབས་པ་མན་གཞན་སྔར་དང་འདྲ་བ་ལ། ཆོས་སོ་བདུན་གྱི་དག་པ་རྒྱས་བསྡུས་ཅི་རིགས་བྱ་བར་བཤད་པ་ལྟར་བྱ་བ་ཡིན་པའི་ཕྱིར། དེས་ན་ཐུན་ཕྱི་མ་གསུམ་ལ་དག་པ་གསུམ་ནས་ཚོགས་བ སག་པའི་བར་ནི་བསྡུ་བའི་ཚེ་སྤྱིར་མ་བྱས་ཀྱང་མི་འགལ་ཏེ། འདིའི་རྒྱ་གཞུང་རྣམས་ནས་དེ་ལྟར་བྱ་བ་མ་བཤད་ཅིང་། རྗེ་ཉིད་ཀྱིས་ཀྱང་ལས་དང་པོ་པས་བྱས་ན་ཕུན་སུམ་ཚོགས་པའི་ཡན་ལག་ཏུ་འགྱུར་བར་བཤད་ཀྱི། ངེས་པར་བྱ་དགོས་པར་མི་བཞེད་པའི་ཕྱིར་རོ། །འདིར་འདོད་འཇོ་ལས་སྔགས་གསུམ་བརྗོད་ནས་རྟེན་བརྟེན་པ་སྐད་ཅིག་གིས་བསྐྱེད་པ་འདི་ལ་མངོན་བྱང་སྔོན་མ་རྣམས་མ་མཛད་པར་སེམས་ཏེ། འདི་ལྟར་མཛད་པ་ནི་ལྭ་ཝ་པ་དང་དྲིལ་བུ་ཞབས་ཀྱི་བཞེད་པ་དང་བསྟུན་པར་སྣང་པས། དེ་གཉིས་ཀྱིས་ཐུན་བར་པ་གཉིས་ཀྱི་སྐབས་སུ་ཧཱུཾ་ལས་སྐད་ཅིག་གིས་རྟེན་བརྟེན་པ་བསྐྱེད་པའི་ཚུལ་སྔགས་རིམ་ནས་བཤད་པ་ལྟར་ཡིན་པའི་ཕྱིར། གཞན་ཡང་སྔགས་རིམ་ལས་བསྡུ་ཚུལ་མི་འདྲ་བ་འགའ་ཞིག་བཀོད་པའི་རྗེས་སུ་དེ་དག་གི་དོན་བསྡུ་བ་ནི། དེ་ལྟར་ན་ཐུན་ཐོག་མཐའ་གཉིས་རྒྱས་ལ། བར་པ་གཉིས་བསྡུས་པའི་ལུགས་གཅིག་དང་། དང་པོ་རྒྱས་ལ་གཞན་གསུམ་བསྡུས་པ་ནི་དལ་བྲེལ་གྱིས་མིན་གྱི། རྒྱུན་པའི་བྱེད་ལུགས་སོ། །བྲེལ་པས་ཀྱང་དང་པོ་རྒྱས་ལ་ཐ་མ་གསུམ་བསྡུས་ཏེ་བྱེད་པ་དང་། ཐུན་དང་པོ་ལའང་དལ་བྲེལ་གཉིས་ཀྱི་དབང་གིས་རྒྱས་བསྡུས་གཉིས་བྱེད་ལ། གཞན་གསུམ་བསྡུས་ཏེ་བྱེད་པ་མན་སྙེའི་ལུགས་རྣམས་གང་རུང་བྱ་ལ། ཞེས་གསུངས་པ་ལྟར་བྱར་རུང་བ་ཡིན་ཏེ། བྱེ ད་ཤེས་ན་ནི་མཁས་གྲུབ་ཚད་ལྡན་གྱི་ལུགས་ཡིན་པས་ཤིན་ཏུ་ཡང་མི་འགལ་བའི་ཕྱིར་རོ། །དེར་མ་ཟད་མན་ངག་གིས་རྒྱས་བསྡུས་བྱེད་ལུགས་གཞན་སྣང་ཡང་འདིར་མི་འཆད་དེ། སླ་ཆོས་བྱེད་པར་འགྱུར་བའི་སྐྱོན་འོང་བའི་ཕྱིར་རོ། །ཐུན་གྱི་མཐར་ཉལ་བ་དང་ལྡང་བའི་རྣལ་འབྱོར་ཇི་ལྟར་བྱ་བའི་ཚུལ་ཡོད་དེ། ཉལ་བའི་ཚེ་དབྱངས་གསལ་ཚར་གཅིག་བརྗོད་དེ་སྡུད་རིམ་བྱས་ནས་གཉིད་ཀྱི་འོད་གསལ་དུ་འཇུག་ལ། ལྡང་བའི་ཚེ་འོད་གསལ་ལས་ལུས་དཀྱིལ་དང་བཅས་པའི་ཧེ་རུ་ཀའི་སྐུར་ལྡང་བར་བྱེད་པའི་ཕྱིར་རོ། །གསུམ་པ་ནི། དེ་ལྟར་ཉམས་སུ་བླངས་ན་ཕན་ཡོན་རྒྱ་ཆེན་པོ་འཐོབ་པར་འགྱུར་བ་ཡིན་ཏེ། རྩ་རྒྱུད་ལས། མི་མཆོག་གང་ཞིག་ཀུན་སྤྱོད་པ། །སྡིག་པ་ཐམས་ཅད་རྣམ་དག་བདག །དེ་བཞིན་གཤེགས་པའི་ས་འཐོབ་ཅིང་། །སྐྱེ་དང་སྐྱེ་བར་བདག་གཤེགས་ཀྱི། །རིགས་ཀྱི་རྒྱལ་པོ་ཆོས་ལྡན་འགྱུར། །ཞེས་པ་ནས། དེ་བཞིན་ཤྲཱི་ཧེ་རུ་ཀ་ཡི། །མཚན་གྱིས་སྡིག་པ་འཇིག་པར་འགྱུར། །བསམ་གཏན་བསམ་པ་ཙམ་གྱིས་སམ། །ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་འཐོབ་འགྱུར་བའམ། །ཡང་ན་འཁོར་ལོས་བསྒྱུར་བ་འཐོབ། །ཅེས་པའི་བར་གསུངས་པའི་ཕྱིར་རོ། །ཚུལ་འདི་ལ་ཤར་སྒོམ་བྱས་པ་ཙམ་གྱིས་ཀྱང་ཕན་ཡོན་གཞན་དང་མི་འདྲ་བ་འཐོབ་པར་འགྱུར་ཏེ། རྗེའི་གསུང་འབུམ་ཐོར་བུ་ལས། འདི་དག་གང་ཤར་སྒོམ་ཙམ་རེ་བྱེད་པ་ལ་ཡང་། ལམ་གྱི་ལུས་ཡོངས་སུ་རྫོགས་པའི་ཉམས་ལེན་གྱི་གནད་ཚང་བ་ཡིན་པས། ས་ཆོད་དང་དགེ་སྦྱོར་གྱི་བྱེད་ཚུལ་གཏན་མི་འདྲའོ། །ཞེས་གསུངས་པའི་ཕྱིར་རོ། ཁྱད་པར་དུ་འདི་སྐོར་ལ་ལེགས་པར་སྦྱངས་པའི་སྒོ་ནས་ཉམས་ལེན་བྱས་ན་ཕན་ཡོན་ལྷག་པར་ཆེ་བར་ངེས་ཏེ། དེ་ཉིད་ལས། དེས་ན་དཔལ་འཁོར་ལོ་བདེ་མཆོག་གི་སྐོར་ལ་མཁས་པར་བྱས་ཤིང་རྒྱུད་ལ་སྐྱེ་དགོས་ཏེ། ཞེས་པ་ནས། དེ་ཡང་ལྷུན་པོའི་རྩེ་ལ་དངོས་སུ་བཞུགས་ཏེ་བྱིན་རླབས་མྱུར་བའོ། །ཞེས་གསུངས་པའི་ཕྱིར་རོ། །གལ་ཏེ། སྦྱངས་མ་སྦྱངས་ལ་མ་བལྟས་པ་འདོན་པའི་བརྩོན་འགྲུས་བྱས་ན་འདྲའོ་སྙམ་ན་དེ་ནི་མི་འདྲ་སྟེ། དོན་ཤེས་མི་ཤེས་པའི་དབང་གིས་དཀྱིལ་འཁོར་སྒྲུབ་ཅིང་མཆོད་པ་ལྟ་བུ་ལའང་མཆོག་དམན་གྱི་ཁྱད་པར་ཡོད་པའི་ཕྱིར་ཏེ། འདོད་འཇོ་ལས། དཀྱིལ་འཁོར་སར་ལྟར་བསྒྲུབས་ནས་མཆོད་ན་ནི། དེ་འདྲ་བའི་གོ་བ་མེད་པར་དཀྱིལ་འཁོར་མཆོད་པ་ལས་ཆེས་མཆོག་ཏུ་འགྱུར་བ་ཡིན། ཞེས་གསུངས་པའི་ཕྱིར་རོ། །འདིར་སྨྲས་པ། རྣལ་འབྱོར་མ་རྒྱུད་དུང་འཕྱུར་གཅིག་དང་ནི། །བྱེ་བ་དྲུག་གསུངས་དེ་ཡིི་ནང་ནས་ཀྱང་། །རབ་དང་ཕུལ་བྱུང་འཁོར་ལོ་སྡོམ་པའི་རྒྱུད། །ཇི་བཞིན་འགྲེལ་མཛད་ཀུན་མཁྱེན་བཙོང་ཁ་པ། །གང་དེའི་བཞེད་གཞུང་དགོངས་དོན་ཀུནྡའི་ཚལ། །སྔོན་བྱོན་མཁས་པའི་ལེགས་བཤད་འོད་དཀར་གྱིས། །གསལ་བར་ཕྱེ་མོད་ལམ་འདིའི་འཆད་ཉན་རྒྱུན། །ཡུན་རིང་གནས་དང་འཕེལ་ཕྱིར་འདི་ཉིད་བགྱིས། །དེ་ཡང་རྒྱལ་བའི་བསྟན་པ་སྤྱི་དང་ནི། །རྗེ་བཙུན་བླ་མའི་མདོ་སྔགས་དམ་པའི་ཆོས། །དུས་མཐར་ཕྱོགས་འདིར་འཛིན་པའི་སྨོན་འགྲུབ་པ། །དེ་ཡི་བསྐུལ་ལས་ཡིན་གྱི་གཞན་མ་ཡིན། །རྗེ་བཙུན་བླ་མའི་དགོངས་ཟབ་དཔག་དཀའ་བས། །ཚུལ་འདིར་མ་རྟོགས་ལོག་བཤད་ཉེས་པ་གང་། །སྙིང་ནས་ཆགས་སོ་ལེགས་པར་བཤད་པའི་དགེ །འཁོར་ལོ་སྡོམ་པའི་བསྟན་པ་རྒྱས་ཕྱིར་བསྔོ། །ཞེས་དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རིམ་འདོད་འཇོའི་དགོངས་པ་རབ་གསལ་ཞེས་བྱ་བ་འདི་ཡང་། བསྟན་པའི་མངའ་བདག་ཅོ་ནེའི་ཀོའུ་ཤྲི་ནང་སོས་སྨོན་ལམ་དང་ཐུགས་བསྐྱེད་ཟུང་དུ་འབྲེལ་བའི་རྣམ་དཔྱོད་ཀྱིས་ཕྱོགས་འདིར་རྒྱུད་ཀྱི་བཤད་གྲྭ་གསར་དུ་བཙུགས་ཤིང་། ཁྱད་པར་དུ་འཁོར་ལོ་བདེ་མཆོག་གི་འཆད་ཉན་འཛུག་པའི་ཚེ་དེའི་རྒྱུན་ལ་ཕན་པར་དགོངས་ནས་གནང་སྦྱིན་དང་བཅས་འདིའི་བསྐྱེད་རིམ་ཞིག་གྱིས་ཤིག་ཅེས་བསྐུལ་བ་ལ་བརྟེན་ནས། སློབ་དཔོན་རྡོ་རྗེ་འཆང་བློ་གྲོས་རྒྱ་མཚོ་ལ་སོགས་པའི་བཤེས་གཉེན་དུ་མའི་བཀའ་དྲིན་གྱིས་ལམ་འདི་ལ་ཐོས་བསམ་ཅུང་ཟད་བྱས་ཤིང་མོས་པའི་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་འདི་སྐོར་གྱི་གཞུང་དུ་མ་ལ་རིང་དུ་འདྲིས་པར་བྱས་ནས། ཅོ་ནེའི་མཁན་ས་དང་། རྒྱུད་པའི་འཆད་ཉན་གྱི་བླ་མའི་གོ་སར་གནས་པའི་ཚེ་སྦྱར་བ་སྟེ། འདིས་ཀྱང་རྒྱལ་བའི་བསྟན་པ་ལ་ཕན་ཐོགས་པར་གྱུར་ཅིག །བཀྲ་ཤིས།། །