བླ་བརྒྱུད།
བླ་བརྒྱུད་བཞུགས།
རིགས་བརྒྱའི་ཁྱབ་བདག་རྡོ་རྗེ་འཆང་། །རྗེ་བཙུན་རྡོ་རྗེ་རྣལ་འབྱོར་མ། །གྲུབ་ཆེན་རྡོ་རྗེ་དྲིལ་བུ་པ། །གསོལ་བ་འདེབས་སོ་བྱིན་གྱིས་རློབས། །རུས་སྦལ་ཞབས་དང་དྲ་བ་འཛིན། །ནག་པོ་གུ་ཧྱ་རྣམ་རྒྱལ་ཞབས། །ཏེ་ལོ་ནཱ་རོ་ཕམ་མཐིང་ལ། །གསོལ་བ༴ ཤེར་བརྩེགས་བློ་གྲོས་གྲགས་པའི་དཔལ། །ཀུན་སྙིང་བསོད་ནམས་རྩེ་མོ་དང་། །གྲགས་པ་རྒྱལ་མཚན་ས་པཎ་ལ། །གསོལ་བ༴ བོ་དོང་ཁྲོ་བུ་ཡང་རྩེ་བ། །བུ་སྟོན་ཡབ་སྲས་ཙོང་ཁ་པ། །མཁས་གྲུབ་ཞ་ལུ་ཆེན་པོ་ལ། །གསོལ་བ༴ ཀུན་མཁྱེན་ངག་དབང་བརྩོན་འགྲུས་སོགས། །དཔལ་ལྡན་འཁོར་ལོ་སྡོམ་པ་ཡི། །རྩ་བརྒྱུད་བླ་མ་ཐམས་ཅད་ལ། །གསོལ་བ་འདེབས་སོ་བྱིན་གྱིས་རློབས། །སྨོན་ལམ་ནི། ཐུན་མོང་ལམ་གྱིས་རྒྱུད་སྦྱངས་ཏེ། །རྣམ་དག་དབང་གི་སྒོར་ཞུགས་ནས། །དམ་ཚིག་སྡོམ་པ་མིག་འབྲས་ལྟར། །ཚུལ་བཞིན་སྲུང་བར་ཉིད་གྱུར་ཅིག །མ་དག་སྐྱེ་ཤི་བར་དོ་གསུམ། །སྦྱོང་བྱེད་རིམ་པ་དང་པོའི་ལམ། །སྒྲུབ་པ་སྙིང་པོར་བྱེད་པ་ཡིས། །རང་རྒྱུད་སྨིན་པར་བྱེད་ནུས་ཤོག །རྗེས་གཞིག་རིམ་པའི་རྣལ་འབྱོར་སོགས། །ཐབས་མཁས་མཆོག་ལས་བདེ་སྟོང་གི །ཡེ་ཤེས་སྒྱུ་ལུས་ཟུང་འཇུག་བཅས། །མངོན་གྱུར་གྲོལ་བར་བྱེད་ནུས་ཤོག །དེ་ཡི་མཐུ་ལས་འགྲོ་བ་ཀུན། །དཔལ་ལྡན་འཁོར་ལོ་སྡོམ་པ་ཡི། །གོ་འཕང་མཆོག་ལ་སྐད་ཅིག་གིས། །བདེ་བླག་ཉིད་དུ་འགོད་ནུས་ཤོག །ཞེས་དང་། བཀྲ་ཤིས་ནི། རབ་ཡངས་ནམ་མཁར་འཁོར་ལོ་བདེ་མཆོག་གི །ལྷ་ཚོགས་ཁ་ཅིག་མེ་ཏོག་ཆར་འབེབས་ཤིང་། །ལ་ལས་གླུ་དབྱངས་གཞན་དག་བགེགས་འཇོམས་ཀྱིས། །འཕྲིན་ལས་མཛད་པས་ཁྱེད་ལ་དཔལ་སྟེར་བར། །ཤིས་ཀྱིས་ཤིས་བརྗོད་བདག་གིས་བསྒྲགས་པར་བྱ། །ཡན་ལག་བདུན་ལྡན་ཁྱབ་བདག་རྡོ་རྗེ་འཆང་། །གསང་བདག་ས་ར་ཧ་དང་ཀླུ་སྒྲུབ་ཞབས། །རྡོ་རྗེ་དྲིལ་བུ་ལ་སོགས་བླ་མ་ལ། །དགེ་ལེགས་མཚན་མ་ཇི་སྙེད་མཆིས་པ་དེས། །མི་མཐུན་ཕྱོགས་ཞི་བཀྲ་ཤིས་དཔལ་ཐོབ་ཤོག །བཅོམ་ལྡན་ཧེ་རུ་ཀ་དཔལ་ཡབ་ཡུམ་དང་། །མཁའ་འགྲོ་ལཱ་མ་དུང་སྐྱེས་གཟུགས་ཅན་མ། །དཔའ་བོ་རྣལ་འབྱོར་མ་ཚོགས་ཐམས་ཅད་ལ། །དགེ་ལེགས་མཚན་མ༴ མི་མཐུན་ཕྱོགས་ཞི༴ འཁོར་ལོ་སྡོམ་པའི་རྩ་བཤད་རྒྱུད་རྣམས་དང་། །རིམ་གཉིས་ལམ་དང་དེ་ཡི་ཕྱོགས་གཅིག་ཙམ། །འཛིན་པར་བྱེད་དང་སྒྲུབ་པ་མ་ལུས་ལ། །དགེ་ལེགས་མཚན་མ་ཇི་སྙེད་མཆིས་པ་དེས། །མི་མཐུན་ཕྱོགས་ཞི་བཀྲ་ཤིས་དཔལ་ཐོབ་ཤོག །ཡེ་ཤེས་རང་བཞིན་ལས་གྲུབ་ཕོ་བྲང་མཆོག །ཉི་ཟླ་འོད་འཕྲོ་རིན་ཆེན་རྒྱན་གྱིས་མཛེས། །དཀྱིལ་འཁོར་ལྷ་ཚོགས་འདུ་བའི་གཞིར་གྱུར་པ། །དགེ་ལེགས་མཚན་མ་ཇི་སྙེད་མཆིས་པ་དེས། །མི་མཐུན་ཕྱོགས་ཞི་བཀྲ་ཤིས་དཔལ་ཐོབ་ཤོག །ཅེས་དྲིལ་བུ་ལྷ་ལྔའི་བླ་བརྒྱུད་སྨོན་ལམ་ཤིས་བརྗོད་མདོར་བསྡུས་འདི་ཡང་། གནས་བརྟན་ཀུན་དགའ་ནོར་བུས་བསྐུལ་བ་ལྟར། བཤད་སྒྲུབ་མིང་ཅན་གྱིས་མྱུར་བར་བྲིས་སོ། །བཀྲ་ཤིས།། །།