ལས་སྒྲིབ་སྦྱོང་བའི་ཐབས་མཆོག་རྡོ་རྗེ་སེམས་དཔའི་བུམ་སྒྲུབ།

ལས་སྒྲིབ་སྦྱོང་བའི་ཐབས་མཆོག་རྡོ་རྗེ་སེམས་དཔའི་བུམ་སྒྲུབ་བཞུགས།

ན་མོ་བཛྲ་ས་ཏྭ་ཡེ། འདིར་ལས་སྒྲིབ་དང་སྡིག་ལྟུང་སྦྱང་བའི་ཐབས་དམ་པ་རྡོ་རྗེ་སེམས་དཔའི་བུམ་སྒྲུབ་བཤད་པ་ལ། བུམ་རྫས་དང་ལྡན་པའི་བུམ་པ་མགུལ་འཆིང་དཀར་པོ་དང་བཅས་པ་སྟ་གོན་བྱས་ལ། དེའི་མདུན་དུ་མཆོད་གཏོར་བཤམས་ཏེ། སྐྱབས་སེམས་སོགས་སྔོན་དུ་བཏང་ནས། རང་ཉིད་སྐད་ཅིག་གིས་རྡོར་སེམས་སུ་བསྐྱེད་ཀྱང་རུང་ལ། ཅུང་ཟད་རྒྱས་པར་ན། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་རང་གི་སེམས་ཉིད་ཧཱུཾ་ཡིག་དཀར་པོ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས་ཚུལ་འདུས་ཡོངས་སུ་གྱུར་པ་ལས་རང་ཉིད་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་ཀྱི་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་དབྱིངས་ཀྱིས་དབང་ཕྱུག་མ་དཀར་མོ་ཞལ་གཅིག་ཕྱག་གཉིས་ཀྱི་རྡོ་རྗེ་དང་དྲིལ་བུ་འཛིན་པ་ལ་འཁྱུད་པ་གཉིས་ཀའང་དར་གྱི་ན་བཟའ་དང་རིན་པོ་ཆེའི་བུ་རྒྱན་ལ་སོགས་པ་རིན་པོ་ཆེའི་རྒྱན་གྱིས་བརྒྱན་ཅིང་དར་སྣ་ཚོགས་ཀྱི་ན་བཟའ་གསོལ་བ། འོད་ཀྱི་ཕུང་པོའི་དབུས་ན་ཞབས་རྡོ་རྗེ་སྐྱིལ་ཀྲུང་གིས་བཞུགས་པ་དེའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ་དེ་ལས་འོད་ཟེར་འཕྲོས་རང་བཞིན་གྱི་གནས་ནས་བཅོམ་ལྡན་འདས་རྡོ་རྗེ་སེམས་དཔའ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ༀ་བཛྲ་ས་མཱ་ཛཿ ཛཿཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གིས་ལྷ་རྣམས་སྤྱན་དྲངས། ཁྱེད་རྣམས་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་རྣམས་ཀྱི་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མཱ་ཡ་ཤྲཱི་ཡེ་ཧཱུཾཿཞེས་གསུངས་ཤིང་། སྤྱི་བོ་ནས་དབང་བསྐུར། ལུས་ཐམས་ཅད་གང་། དྲི་མ་ཐམས་ཅད་དག །ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར། མཆོད་པ་ཨ་མྲྀ་ཏས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག་ནས་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ༀ་ཨརྒྷཾ་ཨཱཿཧཱུཾ་ནས་ཤཔྟ་ཨཱཿཧཱུཾ་གི་བར་གྱིས་བླ་མེད་ལྟར་བྱིན་གྱིས་བརླབས་ལ། ༀ་བཛྲ་ས་ཏྭ་ཨརྒྷཾ་པྲ་ཏིཙྪ་ནས་ཤཔྟའི་བར་གྱིས་མཆོད། ནང་མཆོད་ཡོད་ན་ནི་འབུལ་རུང་། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་སེམས་དཔའ་ལ་ཕྱག་འཚལ། །ཞེས་བསྟོད། རང་གི་ཐུགས་ཀའི་ཟླ་གདན་ལ་གནས་པའི་ཧཱུཾ་ཡིག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ཡིག་སྔགས་འཕྲེང་དང་བཅས་པ་ལ་ཐིམ་པས་གཟི་བརྗིད་དང་མཐུ་སྟོབས་ཡོན་ཏན་ཕུན་སུམ་ཚོགས་པར་གྱུར་པར་བསམས་ལ། ཡིག་བརྒྱ་བརྒྱ་འམ་ཉེར་གཅིག་བཟླ་ཞིང་མཐར་སྔར་བཞིན་མཆོད་བསྟོད་བྱའོ། །དེ་ནས་མཆོད་པ་སྔར་ལྟར་བྱིན་བརླབས་བྱས་ཏེ། བུམ་པ་ཨ་མྲྀ་ཏས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་པཾ་ལས་བྱུང་བའི་བུམ་པ་དཀར་པོ་ལྟོ་བ་ཆེ་བ། མགྲིན་པ་རིང་བ་མཆུ་འཕྱང་བ་ལ་སོགས་པའི་མཚན་ཉིད་ཐམས་ཅད་དང་ལྡན་པར་གྱུར། བུམ་པའི་ནང་དུ་པཾ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར་ཨ་ལས་ཟླ་བའི་དཀྱིལ་འཁོར་དེའི་སྟེང་དུ་ཧཱུཾ་ཡིག་དཀར་པོ་ནས་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་ནས་མི་བསྐྱོད་པས་དབུ་བརྒྱན་པར་གྱུར་ཞེས་པའི་བར་སྔར་བཞིན་བྱ། དེ་ནས་མཆོད་པ་ནི། ཆུ་བོ་གངྒཱ་མ་སོགས་ཅི་རིགས་ཀྱི་མཐར། ༀ་བཛྲ་ས་ཏྭ་ས་པཱ་རི་ཝ་ར་ཨརྒྷཾ་སོགས་བཏགས་ལ་མཆོད་ཅིང་སྔར་བཞིན་བསྟོད་ལ། བཅོམ་ལྡན་འདས་རྡོ་རྗེ་སེམས་དཔའ་བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་ཀྱང་ཞིང་དག་པར་མཛད་དུ་གསོལ་ཞེས་གསོལ་བ་བཏབ་པས་ཐུགས་ཀའི་ཟླ་གདན་ལ་གནས་པའི་ཧཱུཾ་ཡིག་གི་མཐར་སྔགས་འཕྲེང་གིས་བསྐོར་བ་ལས་འོད་ཟེར་འཕྲོས་ནས་ཡོན་ཏན་ཕུན་སུམ་ཚོགས་པར་གྱུར་ཏེ་སྐུ་ཡི་ཆ་ནས་བདུད་རྩིའི་རྒྱུན་བབས་པས་བུམ་པ་གང་བར་གྱུར་པར་བསམས་ལ། ཡིག་བརྒྱ་བརྒྱའམ་སྟོང་ངམ་ཁྲི་སོགས་ཅི་འགྲུབ་བཟླ། དེ་ནས་གཏོར་མ་སྔར་བཞིན་བསངས་སྦྱངས། སྟོང་པའི་ངང་ལས་ཨཱཿལས་བྱུང་བའི་ཐོད་པ་ཡངས་ཤིང་རྒྱ་ཆེ་བའི་ནང་དུ་ཤ་ལྔ་བདུད་རྩི་ལྔའི་སྟེང་དུ་ཡི་གེ་གསུམ། དེ་ལས་འོད་ཟེར་འཕྲོས་རླུང་གཡོས་མེ་སྦར་ཐོད་པའི་རྫས་རྣམས་ཞུ་ཞིང་འཁོལ་རྡོ་རྗེ་གསུམ་གྱི་ལྷ་ཚོགས་རྣམས་བཀུག་ནས་ཡི་གེ་གསུམ་ལ་ཐིམ་པས་དེ་གསུམ་ཡང་རིམ་གྱིས་ཞུ་ནས་ཐོད་པར་ལྷུང་བས་སྦྱང་རྟོགས་སྦར་གསུམ་བྱས་པའི་ཟག་མེད་ཀྱི་ཡེ་ཤེས་ཀྱི་བདུད་རྩིའི་ངོ་བོར་གྱུར། ༀ་ཨཱཿཧཱུཾ་ལན་གསུམ། བཅོམ་ལྡན་འདས་ཀྱི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ༀ་བཛྲ་ས་ཏྭ་ས་པཱ་རི་ཝ་ར་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་བདུན་ནམ་གསུམ་གྱིས་དབུལ་ཞིང་མཆོད་བསྟོད་བྱ། མ་རྙེས་སོགས་ཀྱིས་བཟོད་གསོལ་གྱི་མཐར། ༀ་ཨཱཿབཛྲ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས་ཤིང་། དམ་ཚིག་པ་བུམ་པའི་ཆུ་དང་དབྱེར་མེད་དུ་གྱུར་པར་བསམ། དེ་ལྟར་བསྒྲུབས་པའི་ཆུ་དེ་རང་གཞན་གང་གིས་ཀྱང་འཐུང་ཞིང་ཁྲུས་བྱས་ནའང་ལས་སྒྲིབ་སྡིག་ལྟུང་དམ་ཚིག་ཉམས་ཆགས་ཐམས་ཅད་བྱང་བར་འགྱུར་བས་དགོས་པ་ཤིན་ཏུ་ཆེ་བའི་ཕྱིར་རང་ཅག་ལྟ་བུས་འདི་ལ་འབད་པར་བྱའོ། །རྡོར་སེམས་ཀྱི་སྒོམ་བཟླས་བྱེད་པར་འདོད་ན། སངས་རྒྱས་ཆོས་ཚོགས་ལ་ལན་གསུམ་གྱིས་སྐྱབས་སེམས་བྱས་ནས། སྤྱིར་རྡོར་སེམས་བསྐྱེད་ཚུལ་ལ། རང་རྡོར་སེམས་སུ་བསྐྱེད་པ་དང་། རང་གི་མདུན་གྱི་ནམ་མཁར་བསྐྱེད་ཅིང་བཟླས་པ་བྱེད་པ་དང་། གོང་དུ་བཤད་པ་ལྟར་བྱ་བ་སོགས་དུ་མ་ཞིག་ཡོད་པ་རྣམས་གང་བྱས་ཀྱང་མི་འགལ་ཞིང་ཕུན་སུམ་ཚོགས་པར་འགྱུར་མོད། འདིར་བླ་མ་སྔ་མའི་ཕྱག་ལེན་ལྟར་རང་གི་སྤྱི་བོར་རྡོར་སེམས་བསྐྱེད་ཆོག་མཛད་པ་བཞིན་བྱེད་པར་འདོད་ན། རང་ཐ་མལ་པའམ། ལྷའི་ང་རྒྱལ་ལ་གནས་པས་ཀྱང་རུང་ལ། རང་གི་སྤྱི་བོར་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་དཀར་པོ་དེ་ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་དཀར་པོ་ཞེས་པ་ནས་བསྐོར་བ་ༀ་བཛྲ་ས་མཱ་ཛཿ ༀ་བཛྲ་ས་ཏྭ་ས་པཱ་རི་ཝ་ར་ཨརྒྷཾ་ནས་ཤཔྟའི་བར་གྱིས་མཆོད། ཛཿཧཱུཾ་བཾ་ཧོཿདམ་ཚིག་པ་དང་གཉིས་སུ་མེད་པར་གྱུར། ཞེས་པ་ནས་ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུ་བརྒྱན་པར་གྱུར་ཅེས་པའི་བར་གོང་བཞིན་བྱའོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་པ་ནས། མཐུ་སྟོབས་ཡོན་ཏན་ཕུན་སུམ་ཚོགས་པར་གྱུར་ཅེས་པའི་བར་གྱི་གསོལ་བ་གདབ་ཅིང་། ཡིག་བརྒྱ་ཉེར་གཅིག་གམ་ཅི་འགྲུབ་བཟླའོ། །ཡི་གེ་བརྒྱ་པའི་གྲངས་ནི་སྲོག་ལྡན་གྱི་ཡི་གེ་དབང་དུ་བྱས་ཀྱི་གཞན་པ་རྒྱ་ལས་མང་ཞིང་། ༀ་དང་ཧཱུཾ་ཕཊ་རྣམས་ནི་དེར་མ་གཏོགས་སོ། །མཐར་བདག་ནི་མི་ཤེས་རྨོངས་པ་ཡིས། །ཞེས་པ་ནས་སྐུ་གསུང་ཐུགས་དབྱེར་མི་ཕྱེད་པར་གྱུར་པ་བསམ་མོ། །འདི་ལ་སྟོབས་བཞི་ཚང་ཚུལ་ནི། སྐྱབས་འགྲོ་སེམས་བསྐྱེད་གཉིས་རྟེན་གྱི་སྟོབས། ཡིག་བརྒྱའི་བཟླས་པ་ནི་གཉེན་པོ་ཀུན་ཏུ་སྤྱོད་པའི་སྟོབས། བདག་ནི་མི་ཤེས་སོགས་ནི་སུན་འབྱིན་པའི་སྟོབས་ཡིན་ལ། དེའི་ཤུགས་ལ་སླར་ལྡོག་པའི་སྟོབས་བསྟན་ཏོ། །ཡི་གེ་བརྒྱ་པའི་སྔགས་དོན་ནི། ༀ་ནི་སྐུ་རྡོ་རྗེའི་ས་བོན་ཡིན་ཞིང་། མཆོག་ནོར་བཀྲ་ཤིས་སོགས་དོན་བདུན་ལ་འཇུག །བཛྲ་ས་ཏྭ་ནི་རྡོ་རྗེ་སེམས་དཔའ། ས་མ་ཡ་ནི་དམ་ཚིག །མ་ནུ་པཱ་ལ་ཡ་ནི་རྗེས་སུ་སྐྱོངས། བཛྲ་ས་ཏྭ་ཏྭེ་ནོ་པ་ནི་རྡོ་རྗེ་སེམས་དཔའ་ཉིད་ཀྱིས་ཉེ་བར། ཏིཥྛ་ནི་གནས་པ། ཌི་ཌྷོ་ནི་བརྟན་པ། མེ་ནི་བདག །བྷ་ཝ་ནི་དངོས་པོའམ་རང་བཞིན་དུ་མཛོད། སུ་ཏོ་ཥྱོ་ནི་ཤིན་ཏུ་དགྱེས་པ། སུ་པོ་ཥྱོ་ནི་ཤིན་ཏུ་རྒྱས་པ། ཨ་ནུ་རཀྟོ་ནི་རྗེས་སུ་ཆགས་པ། མེ་བྷ་ཝ་གསུམ་ནི་སྔར་བཞིན་ནོ། །སརྦ་སིདྡྷི་ནི་དངོས་གྲུབ་ཐམས་ཅད། མེ་པྲ་ཡཙྪ་ནི་བདག་ལ་སྩོལ་བར་མཛོད། སརྦ་ཀརྨ་སུ་ཙ་མེ་ནི་བདག་ལ་ལས་ཐམས་ཅད་རྩོལ་བར་མཛོད། ཙིཏྟཾ་ཤྲཱི་ཡཿཀུ་རུ་ནི་སེམས་སམ་སྙིང་གི་དཔལ་དུ་མཛོད། ཧཱུཾ་ནི་ཐུགས་ཀྱི་ས་བོན་དང་། ཧ་བཞི་དང་ཧོ་དང་ལྔས་ནི་ཡེ་ཤེས་ལྔ་མཚོན། བྷ་ག་ཝན་ནི་བཅོམ་ལྡན་འདས། སརྦ་ཏ་ཐཱ་ག་ཏ་ནི་དེ་བཞིན་གཤེས་པ་ཐམས་ཅད་ཀྱི། བཛྲ་མ་མེ་ནི་རྡོ་རྗེ་བདག །མུཉྩ་ནི་མ་འདོར་ཅིག །བཛྲི་བྷ་ཝ་ནི་རྡོ་རྗེ་ཅན་གྱི་རང་བཞིན་དུ། མ་ཧཱ་ས་མ་ཡ་ས་ཏྭ་ནི་དམ་ཚིག་ཆེན་པོའི་སེམས་དཔའ། ཨཱཿནི་གསུང་དང་། ཧཱུཾ་ནི་ཐུགས་ཀྱི་ས་བོན། ཕཊ་ནི་གསལ་བར་བྱེད་པ་འམ་འཇོམས་པར་བྱེད་པའོ། །ཡི་གེ་བརྒྱ་པ་ཚུལ་བཞིན་དུ་བཟླས་ན། སྡིག་ལྟུང་ཐམས་ཅད་སྦྱོང་ཞིང་འཕེལ་ཁ་གཅོད་པ་དང་དམ་ཚིག་ཉམས་པ་སྦྱོང་བའི་ཐབས་མཆོག་ཏུ་གྱུར་པ་ཡིན་ཏེ། སྙིང་པོ་རྒྱན་ལས། སངས་རྒྱས་ཀུན་གྱི་སྐུ་གཅིག་པོ། །པད་དཀར་ཟླ་བའི་དབུས་གནས་ཤིང་། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང་། །ཡི་གེ་བརྒྱ་བ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརློབ་འགྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱི་བཤད་པ། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་པའི་ཕྱིར་རོ། །འདིའི་དམིགས་སྐོར་བྱེད་ཚུལ་ལ་མང་སྟེ། །རང་ལྷར་གསལ་བའི་ཐུགས་ཀའི་ཧཱུཾ་ཡིག་གི་ཐིག་ལེའི་ནང་དུ་ཟླ་གདན་གྱི་དབུས་སུ་རང་དང་མཐར་ཕ་མ་སོགས་སེམས་ཅན་ཐམས་ཅད་ཀྱིས་བསྐོར་བར་དམིགས་ནས། རང་གི་སྤྱི་བོའི་རྡོར་སེམས་ཡབ་ཡུམ་གྱི་སྦྱོར་མཚམས་ནས་བྱང་ཆུབ་སེམས་ཀྱི་བདུད་རྩི་རང་གི་ཚངས་བུག་ནས་ཞུགས་ཏེ་རང་དང་སེམས་ཅན་ཐམས་ཅད་ཀྱི་སྡིག་སྒྲིབ་སྦྱོང་བའི་དམིགས་པ་དང་། ཡང་རང་ལྷར་གསལ་བའི་ཐུགས་ཀའི་ཟླ་གདན་གྱི་དབུས་སུ་རང་དང་མཐར་སེམས་ཅན་ཐམས་ཅད་འཁོར་བར་མོས་ནས་སྔར་བཞིན་འབེབས་སྦྱང་བྱེད་པ་དང་། ཡང་རང་ལྷར་གསལ་བའི་མདུན་དུ་དབུས་སུ་རང་དང་མཐར་སེམས་ཅན་འཁོད་པའམ། ཡང་རང་ཐ་མལ་དུ་གནས་པའི་མདུན་ནས་བརྩམས་ཏེ་ཕ་མ་ལ་སོགས་པའི་སེམས་ཅན་ཐམས་ཅད་ཀྱིས་བསྐོར་བར་བསམས་ནས། རང་གི་སྤྱི་བོའི་རྡོ་རྗེ་སེམས་དཔའི་ཐུགས་ཀའི་ཧཱུཾ་ཡིག་ལས་རྡོར་སེམས་ཡབ་ཡུམ་དཔག་ཏུ་མེད་པ་སེམས་ཅན་ཐམས་ཅད་ཀྱི་གྲངས་དང་མཉམ་པ་སྤྲོས། སེམས་ཅན་ཐམས་ཅད་ཀྱི་སྤྱི་བོར་རྡོར་སེམས་ཡབ་ཡུམ་ཟུང་རེ་རེ་བཞུགས་པར་གྱུར་ནས་རང་དང་སེམས་ཅན་ཐམས་ཅད་ཀྱིས་ཡིག་བརྒྱ་འདོན་པར་བསམ་ཞིང་། རང་དང་སེམས་ཅན་སོ་སོའི་སྤྱི་བོ་ནས་བཞུགས་པའི་རྡོར་སེམས་ཡབ་ཡུམ་གྱི་སྦྱོར་མཚམས་ནས་བདུད་རྩིའི་རྒྱུན་ན་ར་ན་ར་བྱུང་སྟེ། རང་གཞན་ཐམས་ཅད་ཀྱི་སྤྱི་བོ་ནས་ཞུགས་པས་སྡིག་ལྟུང་ཐམས་ཅད་སོལ་ཁུ་དང་དུད་ཁུའི་རྣམ་པར་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་ཕྱིར་འཐོན་ཏེ་སྡིག་སྒྲིབ་ཐམས་ཅད་དག་པར་མོས་པའི་ཚུལ་རྣམས་ལས། ཕྱི་མ་ལྟར་བྱས་ན་བདེ་བར་སེམས་སོ། །མཐར་རྡོར་སེམས་རང་ལ་བསྟིམ་ནས་དབྱེར་མེད་དུ་གྱུར་པར་བསམས་ཏེ། སླར་ཡང་ཡིག་བརྒྱ་རེ་གཉིས་སོགས་གང་འགྲུབ་དང་། ༀ་བཛྲ་ས་ཏྭ་ཧཱུཾ་ཞེས་པ་རྡོར་སེམས་ཀྱི་སྙིང་པོ་ཅི་འགྲུབ་རེ་བཟླས་ན་ནི་ཁྱད་ཆེ། དེ་ནས་དགེ་བ་འདི་ཡིས་མྱུར་དུ་བདག །རྡོ་རྗེ་སེམས་དཔའ་འགྲུབ་གྱུར་ནས། །ཞེས་སོགས་བརྗོད་ཅིང་། གཏོར་མ་འབུལ་བར་འདོད་ན་སྔར་ལྟར་བྱའོ། །ཅེས་པ་འདི་ནི་དད་དང་རྣམ་དཔྱོད་ལྡན་པའི་གནས་བརྟན་རྒྱལ་མཚན་བཀྲ་ཤིས་ཞེས་བགྱི་བ་རང་ཉིད་ཀྱི་དད་པས་ཀུན་ནས་བསླངས་ཏེ་པར་དུ་བརྐོ་བར་བྱའོ་ཞེས་བསྐུལ་བའི་དོན་དུ་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་གཞན་འགའ་རེ་ལ་ཕན་སྲིད་སྙམ་དུ་བསམས་ནས་སྦྱར་བའོ། །སརྦ་སིདྡྷི་མྨེ་པྲ་ཡཙྪནྟུ། མཾ་ག་ལཾ་ཀུཪྺནྟུ།