ལས་ཀྱི་རྣམ་གཞག་གསལ་བའི་མེ་ལོང་།

ལས་ཀྱི་རྣམ་གཞག་གསལ་བའི་མེ་ལོང་ཞེས་བྱ་བ་བཞུགས།

ན་མོ་མཉྫུ་གྷཱོ་ཥཱ་ཡ། གནས་དང་གནས་མིན་མཁྱེན་པའི་སྟོབས་ཉིད་ཀྱིས། །ལས་དང་འབྲས་བུའི་གནས་ཚུལ་མངོན་གཟིགས་ནས། །བརྩེ་བས་འགྲོ་ལ་ཇི་བཞིན་གསལ་མཛད་པ། །ཟླ་མེད་སྟོན་པ་ཤཱཀྱའི་རྒྱལ་པོར་འདུད། །རྒྱལ་ཚབ་དམ་པ་མི་ཕམ་ཆོས་རྗེ་དང་། །རྒྱལ་སྲས་ཀླུ་སྒྲུབ་ཐོགས་མེད་སྐུ་མཆེད་ཞབས། །རྒྱལ་བ་གཉིས་པ་བརྒྱུད་པར་བཅས་པ་ལ། །བཏུད་ནས་ལས་ཀྱི་ནམ་གཞག་བཤད་པར་བྱ། །འདི་ལ་དགུ། ལས་ཀྱི་མཚན་ཉིད། ངོ་བོའི་སྒོ་ནས་དབྱེ་བ། ལས་གསོག་ཚུལ། དབྱེ་བའི་རྣམ་གྲངས་གཞན། ལས་ལམ་བཅུའི་རྣམ་གཞག །ལས་ལྕི་ཡང་གི་ཁྱད་པར། ལས་ཀྱི་འབྲས་བུའི་རྣམ་གཞག །འཕེན་རྫོགས་ཀྱི་ཁྱད་པར། དེ་དག་གི་འཕྲོས་སོ། །དང་པོ་ནི། ཐལ་འགྱུར་བ་དང་བྱེ་བྲག་སྨྲ་བས་ལུས་ངག་གི་ལས་གཟུགས་ཅན་དུ་འདོད་ཀྱང་། འདིར་ཐོགས་མེད་སྐུ་མཆེད་སོགས་ཀྱི་བཞེད་པ་ལྟར་འཆད་པས། ཉོན་མོངས་དང་དེའི་བག་ཆགས་གང་རུང་གིས་ཀུན་ནས་བསླངས་ཤིང་ཉོན་མོངས་ལས་གཞན་པའི་སེམས་བྱུང་སེམས་པ་དེ། ལས་ཀྱི་མཚན་ཉིད། གཉིས་པ་ལས་དེ་ལ་ངོ་བོའི་སྒོ་ནས་དབྱེ་ན། སེམས་པའི་ལས་དང་། བསམ་པའི་ལས་གཉིས་ཡོད་པའི་སེམས་པའི་ལས་དང་ཡིད་ལས་དོན་གཅིག་ཅིང་། བསམ་པའི་ལས་ནི་ལུས་ངག་གི་ལས་ལ་བྱེད་པ་ཡིན་ཏེ། མགོན་པོ་ཀླུ་སྒྲུབ་ཀྱིས་རྩ་བ་ཤེས་རབ་ལས། དེ་ལ་སེམས་པའི་ལས་ཞེས་གང་། །གསུངས་པ་དེ་ནི་ཡིད་ཀྱིར་འདོད། །བསམ་པ་ཞེས་ནི་གང་གསུངས་པ། །དེ་ནི་ལུས་དང་ངག་གིར་འདོད། །ཞེས་དང་། དབྱིག་གཉེན་གྱིས་མཛོད་ལས་ཀྱང་། །ལས་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ཡིན་ཏེ། །དེས་བསྐྱེད་ལུས་དང་ངག་གི་ལས། །ཞེས་གསུངས་པའི་ཕྱིར། སྒྲ་དོན་ནི། སེམས་པའི་ལས་དེ་ལ་ཡིད་ཀྱི་ལས་ཞེས་བྱ་སྟེ། ཡིད་ཀྱིས་བསྒྲུབས་པ་ཙམ་གྱིས་ཆོག་གི་ལུས་ངག་གང་རུང་དུ་ཐོན་པ་ལ་མ་བལྟོས་པའི་ལས་ཡིན་པའི་ཕྱིར། བསམ་པའི་ལས་དེ་ལ་ལུས་ངག་གི་ལས་ཞེས་བྱ་སྟེ། ཡིད་ལས་སེམས་པས་བསྐུལ་ནས་ལུས་ངག་གང་རུང་གིས་བསྒྲུབ་པར་བྱ་དགོས་པའི་ལས་ཡིན་པའི་ཕྱིར་ཞེས་བྱའོ། །དེ་ལྟར་ན་ལུས་ངག་ལ་མ་བལྟོས་པར་རང་དང་མཚུངས་ལྡན་གྱི་སེམས་ཡུལ་ལ་གཡོ་ཞིང་སྐུལ་བར་བྱེད་པས་རབ་ཏུ་ཕྱེ་བའི་ལས་དེ་སེམས་པའི་ལས་ཀྱི་འཇོག་བྱེད་དང་། ལུས་ངག་གང་རུང་གིས་བསྒྲུབ་དགོས་པའི་རིག་གནས་ཀྱི་ལས་དེ་བསམ་པའི་ལས་ཀྱི་འཇོག་བྱེད་དུ་རིགས་སོ། །གསུམ་པ་ལས་ཇི་ལྟར་གསོག་ཚུལ་ནི། ལས་གསོག་པ་པོའི་རྟེན་ལ་སྐྱེ་འཕགས་གཉིས་ཡོད་ཅིང་། འཕགས་པའི་རྟེན་ལ་ནི་ཟག་བཅས་ཀྱི་དགེ་བའི་ལས་གསོག་པ་ཡོད་ཀྱང་། འཁོར་བར་འཕེན་བྱེད་ཀྱི་ལས་གསར་དུ་གསོག་པ་ནི་མེད་དེ། རྟེན་འབྲེལ་མདོ་འགྲེལ་ལས། བདེན་པ་མཐོང་ལ་འཕེན་པ་མེད། །ཅེས་གསུངས་པའི་ཕྱིར། ཇི་སྲིད་ཡན་ལག་དང་པོ་མ་རིག་པའི་དབང་དུ་འགྲོ་བ་དེ་སྲིད་དུ་འཕེན་བྱེད་ཀྱི་ལས་དཀར་ནག་གཉིས་གསོག་ཅིང་། དེ་ཡང་འཕགས་ལམ་མ་ཐོབ་བར་དུ་གསོག་ཀྱང་དེ་ཐོབ་ནས་གསོག་པར་མི་འདོད་དོ། །དེ་ཡང་ཚེ་འདི་ཙམ་གྱི་ཆེད་དུ་སྲོག་གཅོད་སོགས་མི་དགེ་བ་ལ་འཇུག་ན་བསོད་ནམས་མ་ཡིན་པའི་ལས་གསོག་ལ། ཕྱི་མ་ཙམ་གྱི་ཆེད་དུ་འདོད་ཁམས་ཀྱི་སྦྱིན་གཏོང་དང་ཚུལ་ཁྲིམས་སྲུང་བ་སོགས་བྱེད་ན་བསོད་ནམས་ཀྱི་ལས་གསོག་ཅིང་། ཁམས་གོང་མའི་སས་བསྡུས་པའི་ཞིག་ནས་སོགས་བསྒོམས་ན་མི་གཡོ་བའི་ལས་གསོག་པའི་ཚུལ་གྱིས་འཁོར་བར་འགྲུབ་པར་འགྱུར་བ་ཡིན་ནོ། །དེའི་རིག་པས་འཁོར་བ་ལས་ཐར་འདོད་ཀྱི་བློས་དགེ་བའི་ལས་ལ་འཇུག་ན་ཐར་པའི་རྒྱུར་འགྱུར་པའི་ལས་གསོག་པར་འགྱུར་བ་འགྲུབ་བོ། །བཞི་པ་ནི། སྤྱིར་ལས་དེ་ལ་དབྱེ་ན། དགེ་མི་དགེ་ལུང་མ་བསྟན་གྱི་ལས་གསུམ། དེ་གསུམ་ཡང་ཟག་བཅས་ཟག་མེད་ཀྱི་ལས་གཉིས་སུ་འདུའོ། །རྣམ་གྲངས་ཀྱིས་དབྱེ་ན་མང་སྟེ། བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་གསུམ། བདེ་སྡུག་བཏང་སྙོམས་མྱོང་འགྱུར་གྱི་ལས་གསུམ། རྣམ་སྨིན་མྱོང་བར་ངེས་པ་དང་མ་ངེས་པའི་ལས་གཉིས། མྱོང་ངེས་ལ་ནི་མཐོང་ཆོས་དང་སྐྱེ་གནས་དང་ལན་གྲངས་གཞན་ལ་མྱོང་འགྱུར་གྱི་ལས་གསུམ། བསགས་མ་བསགས་དང་བསགས་ལ་མ་བྱས་པ་དང་བྱས་ལ་མ་བསགས་པ་དང་བྱས་ཤིང་བསགས་པ་དང་མ་བྱས་ཤིང་མ་བསགས་པའི་ལས་རྣམས་དང་། དཀར་ལ་རྣམ་སྨིན་དཀར་བ་དང་ནག་ལ་རྣམ་སྨིན་ནག་པ་དང་དཀར་ནག་འདྲེས་མའི་ལས་དང་མི་དཀར་མི་ནག་པའི་ལས་བཞིའོ། །དེ་རྣམས་ཀྱི་ཁྱད་པར་རིམ་པར་བཤད་ན་འདི་ལྟར་ཡིན་ཏེ། རྣམ་སྨིན་བདེ་བ་མྱོང་འགྱུར་གྱི་ལས་དེ་དགེ་བའི་ལས་ཡིན་ལ། མཚན་གཞི་ནི་སྲོག་གཅོད་སྤོང་བའི་ལས་ལྟ་བུ། རྣམ་སྨིན་སྡུག་བསྔལ་མྱོང་འགྱུར་གྱི་ལས་དེ་མི་དགེ་བའི་ལས། མཚན་གཞི་ནི་སྲོག་གཅོད་ཀྱི་ལས་ལྟ་བུ། རྣམ་སྨིན་བདེ་སྡུག་གང་ཡང་མྱོང་འགྱུར་མ་ཡིན་པའི་ལས་དེ་ལུང་མ་བསྟན་གྱི་ལས། མཚན་གཞི་ནི་དགེ་སྡིག་གང་ཡང་མིན་པའི་བར་མའི་སེམས་ཀྱིས་བྱས་པའི་ལས་ལྟ་བུ་ཡིན་པའི་ཕྱིར། དགེ་བ་དང་ལུང་མ་བསྟན་གྱི་ལས་ནི་ཁམས་གསུམ་ན་ཡོད་ཀྱི། མི་དགེ་བའི་ལས་ནི་འདོད་ཁམས་མ་གཏོགས་ཁམས་གོང་ན་མེད་དེ། ཁམས་གོང་གི་སས་བསྡུས་པའི་མི་དགེ་བ་མེད་པའི་ཕྱིར་ཏེ། གོང་སས་བསྡུས་པའི་ཉོན་མོངས་ཡོད་ཀྱང་ཐམས་ཅད་ལུང་མ་བསྟན་ཡིན་པའི་ཕྱིར་ཏེ། མཛོད་ལས། གོང་མ་ཐམས་ཅད་ལུང་མ་བསྟན། །ཞེས་གསུངས་པའི་ཕྱིར། གཙོ་བོའི་དབང་དུ་བྱས་ན་ཀུན་སློང་དགེ་བས་བྱས་པའི་ལས་དེ་དགེ་བའི་ལས་དང་། ཀུན་སློང་དུག་གསུམ་གང་རུང་གིས་བྱས་པའི་ལས་དེ་མི་དགེ་བའི་ལས་ཡིན་ཏེ། ཀུན་སློང་བཟང་ངན་གྱིས་དགེ་མི་དགེར་འགྱུར་བའི་ཕྱིར་ཏེ། མཛོད་ལས། དགེ་བ་སྦྱོར་དང་མཇུག་བཅས་རྣམས། །ཆགས་སྡང་གཏི་མུག་མེད་ལས་སྐྱེས། །ཞེས་གསུངས་པའི་ཕྱིར། ཀུན་སློང་བཟང་པོས་བྱས་པའི་ལས་ལ་དགེ་བ་དང་། ཀུན་སློང་ངན་པས་བྱས་པའི་ལས་ཡིན་ན་མི་དགེ་བ་ཡིན་པས་མ་ཁྱབ་པར་སེམས་ཏེ། མང་པོའི་དོན་དུ་སྙིང་རྗེས་ཀུན་ནས་བསླངས་ཏེ་གཞན་གྱི་སྲོག་བཅད་པའི་དངོས་གཞིའི་ལས་དེ་དགེ་བར་འཇོག་དཀའ་ཞིང་། ཀུན་སློང་ངན་ཡང་སྦྱིན་པ་བཏང་བའི་ལས་དེ་མི་དགེ་བར་ཡང་འཇོག་དཀའ་བའི་ཕྱིར། དེ་ལྟ་བུ་མེད་དོ་ཞེ་ན་ཡོད་དེ། དེད་དཔོན་སྙིང་རྗེ་ཅན་གྱིས་མི་ནག་དུང་ཐུང་བསད་པ་ལྟ་བུ་དང་། དུད་འགྲོ་གསོད་པའི་ཆེད་དུ་ཁ་ཟས་སྦྱིན་པའང་མཐོང་བའི་ཕྱིར། འོན་ཀྱང་མཁས་པ་ཁ་ཅིག་འདི་གཉིས་ཀྱང་ཀུན་སློང་གི་དབང་ཁོ་ནས་དགེ་མི་དགེར་འདོད་ལ། ཁ་ཅིག་སྔོན་མའི་རྒྱུའི་ཀུན་སློང་དགེ་བ་ཡིན་ཀྱང་དངོས་གཞི་སྲོག་བཅད་པའི་ལས་དེ་མི་དགེ་བ་དང་། ཕྱི་མའི་རྒྱུའི་ཀུན་སློང་མི་དགེ་བ་ཡིན་ཀྱང་དངོས་གཞི་སྦྱིན་པ་བཏང་བའི་ལས་དེ་དགེ་བར་འདོད་པ་ལས་ཕྱི་མ་ལྟར་འཐད་སྙམ་སྟེ། བརྟག་པར་བྱའོ། ཁ་ཅིག་དེ་གཉིས་ཀྱི་ནང་ནས་སྔོན་མ་དེ་ལས་ནག་ལ་རྣམ་སྨིན་དཀར་བའི་ལས་ཡིན་ནོ་ཟེར། དེ་ནི་མི་འཐད་དེ། ལས་ནག་པོའི་རྣམ་སྨིན་དཀར་བ་མི་སྲིད་པའི་ཕྱིར་ཏེ། རྒྱུ་མི་དགེ་བ་ལས་རྣམ་སྨིན་གྱི་འབྲས་བུ་བདེ་བ་དང་རྒྱུ་དགེ་བ་ལས་རྣམ་སྨིན་གྱི་འབྲས་བུ་སྡུག་བསྔལ་འབྱུང་བ་མི་སྲིད་པའི་ཕྱིར་ཏེ། བསྟོད་སྤྲིན་རྒྱ་མཚོ་ལས། སྦྱིན་ལས་འབྱོར་ལྡན་གནས་ཡིན་དབུལ་པོ་མིན། །སེར་སྣ་དབུལ་པོའི་གནས་ཡིན་འབྱོར་ལྡན་མིན། །ཞེས་གསུངས་པ་ལྟར་གནས་དང་གནས་མ་ཡིན་པར་མཁྱེན་པའི་སྟོབས་ཡོད་པའི་ཕྱིར། ལས་དགེ་མི་དགེ་གཉིས་རྣམ་སྨིན་བདེ་སྡུག་འབྱིན་པའི་སྒོ་ནས་བཞག་ཀྱང་། ལས་དགེ་མི་དགེ་ལ་རྣམ་སྨིན་འབྱིན་པས་མ་ཁྱབ་སྟེ། ཁོང་ཁྲོས་གཏན་མེད་དུ་འཇོམས་ནུས་པའི་དགེ་བ་དང་། སྟོབས་བཞིའི་བཤགས་པས་གཏན་ནས་འདག་ངེས་ཀྱི་མི་དགེ་བའི་ལས་ཡོད་པའི་ཕྱིར་ལུང་མ་བསྟན་གྱི་ལས་ལ་ནི་རྣམ་སྨིན་མི་འབྱིན་པས་ཁྱབ་ཀྱང་འབྲས་བུ་འབྱིན་པ་ཡོད་དེ། རྒྱུ་མཐུན་དང་སྐྱེས་བུ་བྱེད་པའི་འབྲས་བུ་འབྱིན་པ་ཡོད་པའི་ཕྱིར་རོ། །ཟག་བཅས་ཟག་མེད་ཀྱི་ལས་ཀྱི་ཁྱད་པར་ཡོད་དེ། །སོ་སྐྱེའི་རྒྱུད་ཀྱི་ལས་དགེ་སྡིག་རྣམས་ཟག་བཅས་ཀྱི་ལས་ཡིན་ཀྱང་། ཐེག་དམན་འཕགས་པའི་རྒྱུད་ལ་ནི་ཟག་བཅས་ཀྱི་ལས་ཡོད་ཀྱི། ཐེག་ཆེན་འཕགས་པ་དང་དེའི་དགྲ་བཅོམ་པའི་རྒྱུད་ལ་ནི་ཟག་མེད་མ་གཏོགས་ཟག་བཅས་ཀྱི་ལས་མེད་པའི་ཕྱིར། སངས་རྒྱས་འཕགས་པའི་རྒྱུད་ལ་ཟག་བཅས་ལྟ་ཅི། ཟག་མེད་ཀྱི་ལས་ཀྱང་མེད་དེ། ཟག་མེད་ཀྱི་ལས་ལ་ནི་འབད་རྩོལ་ཕྲ་མོ་དང་བཅས་པའི་རྟོག་པ་ཞིག་དགོས་ལ་སངས་རྒྱས་འཕགས་པ་ལ་འབད་རྩོལ་དང་རྟོག་པ་མེད་པའི་ཕྱིར། བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་ཀྱི་ཁྱད་པར་ཡོད་དེ། འདོད་པའི་དགེ་བའི་ལས་ནི་བསོད་ནམས་ཀྱི་ལས་དང་། མི་དགེ་བའི་ལས་ནི་བསོད་ནམས་མ་ཡིན་པའི་ལས་དང་། ཁམས་གོང་མའི་ལས་བསྡུས་པའི་ལས་ནི་མི་གཡོ་བའི་ལས་ཡིན་པའི་ཕྱིར། བསོད་ནམས་དང་བསོད་ནམས་མ་ཡིན་པའི་ལས་ཞེས་བརྗོད་པའི་རྒྱུ་མཚན་ཡོད་དེ། སྲུང་བར་ཚིམ་པར་བྱེད་པ་དང་མི་བྱེད་པས་དེ་སྐད་དུ་བརྗོད་པའི་ཕྱིར། མི་གཡོ་བའི་ལས་དེ་སྤྱིར་དགེ་བ་ཡིན་ཀྱང་མི་གཡོ་བ་ཞེས་བརྗོད་པའི་རྒྱུ་མཚན་ཡོད་དེ། འདོད་པའི་ལས་གཉིས་ཀྱི་རྣམ་སྨིན་གྱི་འབྲས་བུ་གཞན་དུ་འགྱུར་ཞིང་གཡོ་བ་ཡོད་ལ། མི་གཡོ་བའི་ལས་ཀྱི་རྣམ་སྨིན་གྱི་འབྲས་བུ་ནི་གོང་མ་ལས་ས་གཞན་འདོད་ཁམས་སུ་མི་སྨིན་པས་མེ་གཡོ་བ་ཞེས་བརྗོད་པའི་ཕྱིར་ཏེ། མཛོད་ལས། གང་ཕྱིར་ས་ནི་དེ་དག་ཏུ། །ལས་རྣམ་སྨིན་ཕྱིར་མི་གཡོའི་ཕྱིར། །ཞེས་གསུངས་པའི་ཕྱིར། འདོད་ཁམས་ཀྱི་ལས་གཉིས་ཀའི་རྣམ་སྨིན་གཡོ་བ་ཡོད་དེ། དཔེར་ན། སྦྱིན་པ་བཏང་བས་ལྷ་མིའི་རྟེན་ལ་ལོངས་སྤྱོད་ཆེན་པོ་འབྱུང་བ་ཡིན་པ་ལ། སྲོག་གཅོད་མང་པོ་བྱས་པའི་རྐྱེན་གྱིས་རྒྱན་སྣ་ཚོགས་དང་ལྡན་པའི་གླང་པོ་ཆེ་ས་སྲུང་གི་བུར་སྐྱེས་པ་ལྟ་བུ་ཡིན་པའི་ཕྱིར་ཏེ། མཛོད་རང་འགྲེལ་ལས། ལྷ་དག་གི་ནང་དུ་རྣམ་པར་སྨིན་པར་འགྱུར་བ་གང་ཡིན་པ་དེ་ཉིད་རེས་འགའ་རྐྱེན་གཞན་གྱི་དབང་གིས་མི་དང་དུད་འགྲོ་དང་ཡི་དྭགས་ཀྱི་ནང་དུ་རྣམ་པར་སྨིན་པར་འགྱུར་རོ། །ཞེས་གསུངས་པའི་ཕྱིར། འདི་ཡང་ཚུལ་ཁྲིམས་མ་བསྲུངས་པའི་དབང་གིས་གླང་ཆེན་དུ་སྐྱེས་པ་ཡིན་གྱི། སྦྱིན་པའི་རྣམ་སྨིན་ལ་དུད་འགྲོར་སྐྱེ་བ་མེད་དེ། རྒྱུ་དགེ་བ་ལས་རྣམ་སྨིན་ངན་འགྲོར་སྐྱེ་བ་མེད་པར་བཤད་ཟིན་པའི་ཕྱིར། འོན་ཀྱང་དེར་སྦྱིན་འབྲས་དེའི་བོང་ཚོད་དང་ཁ་དོག་དང་ལོངས་སྤྱོད་ཀྱི་རྣམ་སྨིན་དུ་སོང་བ་ཡིན་ཏེ། དཀའ་བའི་གནས་ཡིན་པས་གཞུང་ཆེན་མོ་རྣམས་དང་བསྟུན་ནས་དཔྱད་དགོས་པ་ཡོད་དོ། །བདེ་སྡུག་བཏང་སྙོམས་མྱོང་འགྱུར་གྱི་ལས་གསུམ་གྱི་ཁྱད་པར་ཡོད། འབྲས་བུ་མྱོང་ཚུལ་གྱི་སྒོ་ནས་བཞག་པ་ཙམ་མ་གཏོགས། དགེ་མི་དགེ་ལུང་མ་བསྟན་གསུམ་གྱི་རྣམ་གྲངས་ཡིན་པའི་ཕྱིར་ཏེ། དགེ་བ་ལས་བདེ་བ་དང་མི་དགེ་བ་ལས་སྡུག་བསྔལ་དང་ལུང་མ་བསྟན་གྱི་ལས་ཀྱིས་བདེ་སྡུག་བར་མ་བཏང་སྙོམས་མྱོང་འགྱུར་གྱི་སྒོ་ནས་བཞག་པ་ཡིན་པའི་ཕྱིར། མྱོང་བར་ངེས་པ་དང་མ་ངེས་པའི་ལས་ཀྱི་ཁྱད་པར་ཡོད་དེ། ཐོགས་མེད་ཀྱིས་སའི་དངོས་གཞི་ལས། མྱོང་བར་འགྱུར་བ་ངེས་པའི་ལས་ནི་བསམས་བཞིན་དུ་བྱས་པ་དང་བསགས་པའི་ལས་གང་ཡིན་པའོ། །མྱོང་བར་འགྱུར་བར་མ་ངེས་པའི་ལས་ནི་བསམས་བཞིན་བྱས་ལ་མ་བསགས་པ་གང་ཡིན་པའོ། །ཞེས་གསུངས་པ་ལྟར་ཡིན་པའི་ཕྱིར། དེའི་ཁྱད་པར་ནི་འོག་ཏུ་འཆད་ལ། མཛོད་ལས་ནི། ཉོན་མོངས་རབ་དང་དྲག་པོ་དང་། ཡོན་ཏན་ཞིང་དང་རྒྱུན་ཆགས་སུ། །བྱས་པ་གང་ཞིག་ཡིན་པ་དང་། ཕ་མ་གསོད་གང་དེ་ངེས་སོ། །ཞེས་མྱོང་ངེས་ཀྱི་ལས་དྲུག་ཏུ་ཡང་བཤད་དེ། གཙོ་བོའི་དབང་དུ་བྱས་པའོ། །མྱོང་བར་ངེས་པ་ནི་ལས་དེའི་གཉེན་པོ་མེད་ན་ངེས་ཞེས་པའི་དོན་ཡིན་གྱི། མྱོང་ངེས་ཀྱི་ལས་ཡིན་ན། རྣམ་སྨིན་ངེས་པར་མྱོང་དགོས་པས་མ་ཁྱབ་སྟེ། སྟོབས་བཞིའི་བཤགས་བསྡམ་བྱས་ན་མྱོང་ངེས་ཀྱི་ལས་ངན་པ་ཡང་འདག་པར་བརྒྱད་སྟོང་འགྲེལ་ཆེན་ལས་གསུངས་པའི་ཕྱིར། མ་ངེས་པ་ནི་གཉེན་པོ་མེད་ཀྱང་རང་སྟོབས་ཀྱིས་ནམ་སྨིན་འབྱིན་མི་ནུས་པ་ཡིན་ལ། གྲོགས་རྐྱེན་དང་འཕྲད་ན་འབྱིན་པའང་ཡོད་དོ། །མཐོང་ཆོས་ལ་མྱོང་བ་སོགས་ལས་གསུམ་གྱི་ཁྱད་པར་ཡོད་དེ། ཚེ་འདི་ལ་བྱས་པའི་ལས་ཀྱི་རྣམ་སྨིན་ཚེ་འདི་ཉིད་དུ་སྨིན་པ་ནི་མཐོང་ཆོས་ལ་མྱོང་བ་དང་། ཚེ་ཕྱི་མ་ཉིད་ལ་སྨིན་པ་ནི་སྐྱེ་བ་གཞན་ལ་མྱོང་བ་དང་། ཕྱི་མའི་ཡང་ཕྱི་མའི་ཐོག་ཏུ་སྨིན་པར་འགྱུར་བའི་ལས་ནི་ལན་གྲངས་གཞན་ལ་མྱོང་འགྱུར་གྱི་ལས་ཡིན་པའི་ཕྱིར། མཐོང་ཆོས་ལ་མྱོང་འགྱུར་སོགས་གསུམ་པོ་དེ་རྣམ་སྨིན་འགོ་ཟུག་པའི་དབང་དུ་བྱས་པ་ཡིན་གྱི། ཚེ་གསུམ་པོ་དེ་ཙམ་དུ་མ་ངེས་ཏེ། རྒྱུན་སྐྱེ་བ་གཞན་དང་གཞན་དུ་མྱོང་བའང་ཡོད་པའི་ཕྱིར་ཏེ། མཛོད་འགྲེལ་ལས་མཐོང་བའི་ཆོས་ལ་མྱོང་བར་འགྱུར་བའི་ལས་ཀྱི་རྣམ་པར་སྨིན་པ་ཚེ་རབས་གཞན་དག་ན་ཡང་ཡོད་མོད་ཀྱི། རྩོམ་པའི་དབང་གིས་མིང་དེ་ལྟར་རྣམ་པར་བཞག་གོ །ཞེས་གསུངས་པའི་ཕྱིར། མཐོང་ཆོས་སམ་ཚེ་འདི་ལ་སྨིན་པར་འགྱུར་བའི་ལས་ཀྱི་མཚན་གཞི་ཡོད་དེ། མཐོང་ལམ་དང་དགྲ་བཅོམ་གསར་དུ་ཐོབ་པ་ལ་ཕན་གནོད་བྱས་པ་དང་། འགོག་སྙོམས་དང་བྱམས་པ་ཚད་མེད་བསྒོམས་པ་དང་ཉོན་མོངས་མེད་པའི་སྙོམས་འཇུག་ལས་ལངས་མ་ཐག་པའི་གང་ཟག་རྣམས་ལ་ཕན་གནོད་བྱས་པའི་རྣམ་སྨིན་ཚེ་འདི་ཉིད་ལ་འཕྲལ་དུ་སྨིན་པར་འགྱུར་བའི་ཕྱིར་ཏེ། མཛོད་ལས། མཐོང་དང་དགྲ་བཅོམ་འབྲས་ལངས་པ། །དེ་ལ་ཕན་གནོད་བྱས་པ་ཡི། །འབྲས་བུ་འབྲལ་དུ་མྱོང་བར་འགྱུར། །ཞེས་དང་། གང་དག་འགོག་བྱམས་ཉོན་མོངས་མེད། །ལངས་པ་དེ་ལ་ཕན་གནོད་བྱས། །འབྲས་བུ་འབྲལ་དུ་མྱོང་བར་འགྱུར། །ཞེས་གསུངས་པ་ལྟར་ཡིན་པའི་ཕྱིར། བསགས་མ་བསགས་སོགས་ཀྱི་ལས་ཀྱི་ཁྱད་པར་ཡོད་དེ། མཛོད་ལས། བསམས་བཞིན་པ་དང་རྫོགས་པ་དང་། །མི་འགྱོད་གཉེན་པོ་མེད་པ་དང་། འཁོར་དང་རྣམ་པར་སྨིན་པ་ལས། །བསགས་པའི་ལས་ཞེས་བྱ་བ་ཡིན། །ཞེས་ནོར་བ་མ་ཡིན་པར་བསམས་བཞིན་དུ་བྱས་པ་དང་། རྣམ་སྨིན་གྱི་སྐྱེ་བ་འགྲུབ་ངེས་ལྟ་བུ་རྫོགས་པར་བྱས་པ་དང་། ལས་དེ་ལ་འགྱོད་པ་མེད་པ་དང་། དེ་ལ་གནོད་བྱེད་ཀྱི་གཉེན་པོ་མེད་པ་དང་། ལས་བྱས་པ་དེ་ལ་རྗེས་སུ་ཡི་རང་བ་དང་། གནས་སྐབས་མ་ངེས་ཀྱང་རྣམ་སྨིན་ངེས་པའི་ལས་དྲུག་པོ་དེ་ལ་བསགས་པའི་ལས་སུ་དངོས་སུ་བསྟན་ནས། ཤུགས་ལ་དེ་དྲུག་ལས་གཞན་པའི་ལས་རྣམས་མ་བསགས་པའི་ལས་སུ་བཤད་ལ། སའི་དངོས་གཞི་ལས། བསགས་པའི་ལས་ནི་རྣམ་པ་བཅུ་མ་གཏོགས་པ་སྟེ། འདི་ལྟ་སྟེ། རྨི་ལམ་དུ་བྱས་པ་དང་མ་ཤེས་པར་བྱས་པ་དང་བསམས་བཞིན་མི་ཡིན་པར་བྱས་པ་དང་དྲག་པོ་མིན་ལ་རྒྱུན་ཆགས་མིན་པར་བྱས་པ་དང་ནོར་བས་བྱས་པ་དང་བརྗེད་པས་བྱས་པ་དང་མི་འདོད་བཞིན་དུ་བྱས་པ་དང་རང་བཞིན་གྱིས་ལུང་དུ་མ་བསྟན་པ་དང་འགྱོད་པས་བསལ་བ་དང་གཉེན་པོས་བསལ་བ་སྟེ། ལས་རྣམ་པ་བཅུ་པོ་འདི་དག་ལས་མ་གཏོགས་པའི་ལས་གཞན་གང་ཡིན་པའོ། །མ་བསགས་པའི་ལས་ནི་རྣམ་པ་བཅུ་པོ་ཇི་སྐད་བསྟན་པ་ཉིད་དོ། །ཞེས་རྨི་ལམ་དུ་བྱས་པ་ནས་གཉེན་པོས་བསགས་པའི་བར་གྱི་ལས་བཅུ་པོ་དེ་མ་བསགས་པའི་ལས་སུ་གསལ་བར་བསྟན་ནས། འདི་དག་ལ་མ་གཏོགས་པའི་ལས་ཞེས་པས་བཅུ་པོ་ལས་གཞན་པའི་ལས་ནི་བསགས་པའི་ལས་སུ་བསྟན་པ་ལྟར་ཡིན་པའི་ཕྱིར། བསྡུ་བར་མུ་བཞི་བཤད་དེ། བྱས་ལ་མ་བསགས་པའི་ལས་ནི། མི་མཁས་པས་བྱས་པ་དང་རྨི་ལམ་དུ་བྱས་པ་དང་ཆེད་དུ་བྱས་པ་དང་རང་མི་འདོད་ཀྱང་གཞན་གྱིས་བྱེད་དུ་བཅུག་པ་དང་ལན་གཅིག་བྱས་ནས་འགྱོད་པ་ད ང་གཉེན་པོ་བསྟེན་ནས་སྲབ་མོར་བྱས་པའི་ལས་སོགས་དང་། བསགས་ལ་མ་བྱས་པ་ནི་སྲོག་གཅོད་སོགས་ཀྱི་ལས་དེ་དང་དེ་བྱེད་པའི་ཆེད་དུ་ཡུན་རིང་པོ་ནས་བསམས་ཀྱང་སྲོག་གཅོད་སོགས་མ་བྱས་པ་དང་། བྱས་ལ་བསགས་པ་ནི་བསམས་བཞིན་དང་མ་ནོར་བ་དང་འགྱོད་སེམས་མེད་པ་སོགས་ཀྱིས་ལས་དེ་དང་དེ་བྱས་པ་དང་། མ་བྱས་ཤིང་བསགས་པ་ནི་དེ་རྣམས་སུ་མ་གཏོགས་པ་སྟེ་བཞིར་བཤད་པའི་ཕྱིར། མཛོད་འགྲེལ་ལས་ནི་བློ་སྔོན་བཏང་ནས་ཤེས་བཞིན་བྱས་ཀྱང་གོམས་པ་ལང་ཤོར་གྱིས་སྨྲས་པའི་བརྫུན་ལྟ་བུ་ནི་བྱས་པ་ཡིན་ཀྱང་བསགས་པ་མ་ཡིན་པ་དང་། བསམས་བཞིན་དུ་བྱས་ཀྱང་འགྲོ་བ་དེར་སྐྱེས་ངེས་ཀྱི་ལས་མིན་ན་བྱས་པ་ཡིན་ཡང་བསགས་པ་མ་ཡིན་པར་བཤད་དེ། ཅུང་ཟད་མི་འདྲ་བ་ཡོད་པས་ཞིབ་ཆ་དགོས་སོ། །དཀར་ལ་རྣམ་སྨིན་དཀར་བ་སོགས་ཀྱི་ལས་བཞིའི་ཁྱད་པར་ཡོད་དེ། མི་དགེ་བའི་ལས་ནི་ནག་ལ་རྣམ་སྨིན་ནག་པའི་ལས་དང་། གཟུགས་ཁམས་ཀྱི་དགེ་བའི་ལས་ནི་དཀར་ལ་རྣམ་སྨིན་དཀར་བ་དང་། འདོད་པའི་དགེ་བའི་ལས་ནི་དཀར་ནག་འདྲེས་མ་ལ་རྣམ་སྨིན་ཡང་འདྲེས་མ་དང་ཟག་མེད་ཀྱི་ལས་ནི་སྤྱིར་ངོ་བོ་དཀར་ཡང་རྣམ་སྨིན་མི་འབྱིན་པས་དེའི་དབང་དུ་བྱས་པའི་མི་དཀར་མི་ནག་པའི་ལས་ཡིན་པའི་ཕྱིར་ཏེ། མཛོད་ལས། དཀར་ནག་ལ་སོགས་བྱེ་བྲག་གིས། །ལས་ནི་རྣམ་པ་བཞི་ཡིན་ནོ། །ཞེས་པའི་རྩ་འགྲེལ་ལས་དེ་ལྟར་བཤད་པའི་ཕྱིར། །འདོད་པའི་དགེ་བའི་ལས་དེ་མཛོད་ཀྱི་ལུགས་འདིར་དཀར་ནག་འདྲེས་མའི་ལས་སུ་འཇོག་པའི་ཚུལ་ཡོད་དེ། རྒྱུད་གཅིག་ལ་མི་དགེ་བ་དང་སྡུག་བསྔལ་ཅི་རིགས་འདྲེས་པས་ན་དེ་ལྟར་དུ་བཞག་པ་ཡིན་གྱི། ལས་ཀྱི་ངོ་བོ་འདྲེས་མ་ཡིན་པའི་སྒོ་ནས་མ་ཡིན་པའི་ཕྱིར་ཏེ། ངོ་བོ་དང་རྣམ་སྨིན་གཉིས་དཀར་ནག་གཉིས་ཀ་ཡིན་པའི་ལས་མེད་པའི་ཕྱིར་ཏེ། མཛོད་འགྲེལ་ལས། འདི་ནི་རྒྱུད་ཀྱི་སྒོ་ནས་བཞག་གི །ངོ་བོ་ཉིད་ཀྱི་སྒོ་ནས་མིན་ཏེ། ལས་སམ་རྣམ་པར་སྨིན་པ་གཅིག་ལ་དཀར་བ་ཡང་ཡིན་ནག་པོ་ཡང་ཡིན་པ་དེ་ལྟ་བུ་ནི་མེད་དེ། ཞེས་གསུངས་པའི་ཕྱིར། འོན་ཀྱང་ཀུན་བཏུས་ལས་ནི། མུ་དང་པོ་དང་ཐ་མ་གཉིས་སྔར་དང་འདྲ་ཡང་། མུ་གཉིས་པ་ནི་ཁམས་གསུམ་གྱི་དགེ་བའི་ལས་ལྟ་བུ་དང་། གསུམ་པ་ནི་སྦྱོར་བ་དཀར་ལ་བསམ་པ་ནག་པ་དང་། བསམ་པ་ནག་ལ་སྦྱོར་བ་དཀར་བའི་ལས་ལྟ་བུ་ལ་བཤད་དེ་མི་འགལ་ལོ། ཁ་ཅིག་རྒྱུའི་ཀུན་སློང་མི་དགེ་བས་བསླངས་ཡང་དུས་ཀྱི་ཀུན་སློང་དགེ་བས་བྱས་པའི་ལས་དེ། ལས་དཀར་ལ་རྣམ་སྨིན་ནག་པ་དང་། རྒྱུའི་ཀུན་སློང་དགེ་ཡང་དུས་ཀྱི་ཀུན་སློང་མི་དགེ་བས་བྱས་པའི་ལས་དེ། ལས་ནག་ལ་རྣམ་སྨིན་དཀར་བ་ཡིན་ཟེར། ཁ་ཅིག་དེ་ནི་འཐད་དེ། དགེ་མི་དགེ་ནི་རྒྱུའི་ཀུན་སློང་བཟང་ངན་གྱི་དབང་གིས་འགྱུར་བས་ལས་སྔ་མ་ནག་ལ་ཕྱི་མ་དཀར་བའི་ཕྱིར་ཏེ། དབུ་མ་རིན་ཆེན་འཕྲེང་བ་ལས། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཞེས་དང་། འདོད་ཆགས་ཞེ་སྡང་གཏི་མུག་མེད། །དེས་བསྐྱེད་ལས་ནི་དགེ་བར་འདོད། །ཅེས་གསུངས་པའི་ཕྱིར་ཟེར་ཡང་གོང་དུ་བཤད་པ་ལྟར་དཔྱད་དགོས་པ་ཡོད་དོ། །སྤྱིར་ལས་དེ་ལ་བསམ་པའི་དབང་གིས་དངོས་གཞི་དཀར་ལ་སྦྱོར་མཇུག་ནག་པ་དང་། སྦྱོར་མཇུག་ནག་ལ་དངོས་གཞི་དཀར་བ་དང་། གསུམ་ཀ་དཀར་པ་དང་། གསུམ་ཀ་ནག་པ་དང་འདྲེས་མ་ཅི་རིགས་ཡོད་པར་སེམས་ཏེ། རྒྱུའི་ཀུན་སློང་དཀར་ལ་དུས་ཀྱི་ཀུན་སློང་ནག་པ་དང་། དེ་ལས་ལྡོག་པ་དང་། གཉིས་ཀ་དཀར་བ་དང་། གཉིས་ཀ་ནག་པ་སོགས་ཅི་རིགས་འབྱུང་བའི་དབང་གིས་དངོས་གཞི་ཡང་རྫོགས་མ་རྫོགས་དང་དཀར་ནག་ཅི་རིགས་སུ་འགྱུར་ཞིང་། མཇུག་ཏུ་ཡང་རྗེས་སུ་ཡི་རང་བ་དང་འགྱོད་པ་ཡོད་མེད་ཀྱིས་དཀར་ནག་མི་འདྲ་བར་འགྱུར་བའི་ཕྱིར་ཏེ། རྒྱུའི་ཀུན་སློང་ཕན་པར་འདོད་ཀྱང་དུས་ཀྱི་ཀུན་སློང་དང་སྦྱོར་བའི་དུས་སུ་གནོད་སེམས་སྐྱེ་བ་དང་། དེ་ལས་ལྡོག་པ་སོགས་འབྱུང་བ་མཐོང་བའི་ཕྱིར། སྦྱིན་གཏོང་ལྟ་བུ་གཅིག་ལའང་ཀུན་སློང་མི་འདྲ་བ་འབྱུང་སྟེ། ཀུན་སློང་བཟང་པོས་སྦྱིན་པ་གཏོང་བར་མ་ཟད། གཞན་གྱི་ནོར་འཕྲོ ག་ནས་དེ་གཏོང་བ་དང་། མི་འདོད་བཞིན་དུ་གཏོང་བ་དང་། གསོད་པར་འདོད་ནས་གཏོང་བ་དང་། ལན་ལ་རེ་སྟེ་གཏོང་བ་དང་། ཆགས་པའི་དབང་གིས་གཏོང་བ་དང་། མཛའ་བ་ཙམ་གྱི་ཕྱིར་གཏོང་བ་སོགས་མི་འདྲ་བ་སྣ་ཚོགས་འབྱུང་བའི་ཕྱིར། དེ་བཞིན་དུ་ཚུལ་ཁྲིམས་སྲུང་བ་སོགས་ལའང་ཅི་རིགས་ཡོད་པར་ཤེས་པར་བྱའོ། །ལྔ་པ་ལས་ལམ་བཅུ་བཤད་པ་ནི། དགེ་མི་དགེའི་ལས་ཀྱི་རྣམ་གྲངས་མང་ཡང་། གཙོ་བོ་བསྡུས་ནས་བཅུར་གསུངས་པ་ཡིན་ཏེ། མཛོད་ལས། དེ་ལས་ཆེ་ལོང་བསྡུས་ནས་ནི། དགེ་དང་མི་དགེ་ཅི་རིགས་པར། །ལས་ཀྱི་ལམ་ནི་བཅུར་གསུངས་སོ། །ཞེས་འབྱུང་བ་ལྟར་རོ། །འདི་ལ་གཉིས། མི་དགེ་བའི་ལས་ལམ་བཅུ་དང་། དགེ་བའི་ལས་ལམ་བཅུའོ། །དང་པོ་ལ་བཅུ་ལས། སྲོག་གཅོད་པ་སོགས་རེ་རེ་ལའང་གཞི་དང་བསམ་པ་དང་སྦྱོར་བ་དང་མཐར་ཐུག་བཞི་བཞིས་བཤད་ན། སྲོག་གཅོད་ཀྱི་གཞི་ན་སེམས་ཅན་གཞན་ནོ། །བསམ་པ་ལ་གསུམ་ལས་འདུ་ཤེས་ནི་གཞི་སེམས་ཅན་ཡིན་པ་ལ་ཡིན་པར་འདུ་ཤེས་པ་དང་སེམས་ཅན་མིན་པར་འདུ་ཤེས་པ་དང་། སེམས་ཅན་མིན་པ་ལ་མིན་པར་འདུ་ཤེས་དང་སེམས་ཅན་དུ་འདུ་ཤེས་པ་བཞི་ཡོད་པའི་འདུ་ཤེས་དང་པོ་དང་གསུམ་པ་ནི་མ་འཁྲུལ་ལ། གཉིས་པ་དང་བཞི་པ་ནི་འཁྲུལ་བའོ། །འདི་ལ་ཀུན་སློང་བྱེ་བྲག་པ་ལྷས་སྦྱིན་ཁོ་ན་གསོད་སྙམ་ནས་སྦྱོང་བ་བརྩམས་པ་ན་མཆོད་སྦྱིན་དུ་ནོར་ནས་བསད་ན་དངོས་གཞིའི་ལས་ལམ་མེད་པས། དེ་ལྟ་བུ་ལ་འདུ་ཤེས་མ་འཁྲུལ་པ་དགོས་ཤིང་། སྦྱོར་བའི་དུས་སུ་གང་བྱུང་ཡང་གསོད་སྙོམ་པ་ཀུན་སློང་སྤྱི་ལ་ཞུགས་པ་ཡོད་ན་འདུ་ཤེས་མ་འཁྲུལ་བ་མི་དགོས་ཏེ། འདི་ནི་གཞན་དགུ་ལའང་ཅི་རིགས་པར་ཤེས་པར་བྱའོ། །ཉོན་མོངས་ནི་དུག་གསུམ་གང་རུང་ངོ་། །ཀུན་སློང་ནི་གསོད་པར་འདོད་པའོ། །སྦྱོར་བ་ནི་རང་ངམ་གཞན་ལ་བྱེད་དུ་འཇུག་པ་གཉིས་སོ། །སྦྱོར་བའི་ངོ་བོ་ནི་མཚོན་ནམ་དུག་གམ་རིག་སྔགས་ཀྱི་སྒོ་ནས་བྱས་པ་གང་རུང་ངོ་། །མཐར་ཐུག་སྦྱོར་བ་དེའི་རྐྱེན་གྱིས་ཕ་རོལ་པོ་དེའི་ཚེ་འམ་རང་གི་སྔོན་དུ་ཤི་བ་སྟེ། རང་དང་དུས་མཉམ་མམ་རང་སྔོན་དུ་ཤི་བའི་རྗེས་སུ་དེ་ཤི་ན་ནི་དངོས་གཞི་མེད་དོ། །དམག་ལ་སོགས་པ་མང་པོ་གྲོས་མཐུན་བྱས་ནས་གསོད་པ་པོ་གཅིག་གིས་ཕ་རོལ་པོ་བསད་ནའང་ཐམས་ཅད་སྲོག་གཅོད་ཀྱི་ལས་ལམ་དངོས་གཞི་འབྱུང་བ་ཡིན་ཏེ། མཛོད་ལས། དམག་ལ་སོགས་པ་དོན་གཅིག་ཕྱིར། །ཐམས་ཅད་བྱེད་པ་པོ་བཞིན་ལྡན། །ཞེས་གསུངས་པའི་ཕྱིར། འོན་ཀྱང་གྲོས་མཐུན་ཚིག་ཙམ་གྱིས་མི་འདོད་བཞིན་དུ་བྱས་ནས་གསོད་སེམས་གཏན་མེད་ན་ནི་དངོས་གཞི་མི་འབྱུང་བ་གསལ་ལ། མ་མཐོང་ཞིང་གསོད་སེམས་མེད་པར་སྲོག་ཆགས་རྐང་འོག་ཏུ་ཤི་བ་ལྟ་བུས་སྡིག་པ་འཕྲན་བུ་འོང་ཡང་དངོས་གཞིའི་ལས་ལམ་མེད་དོ། །སྲོག་གཅོད་ཀྱི་ལས་རྣམས་ལུས་ཀྱི་ལས་ཡིན་ཀྱང་། ལུས་ཀྱིས་དངོས་སུ་བྱས་པས་མ་ཁྱབ་སྟེ། ངག་དང་ཡིད་ཀྱིས་དབང་ཙམ་གྱིས་སྲོག་གཅོད་པ་ཡོད་པའི་ཕྱིར་ཏེ། དྲང་སྲོང་ཁྲོས་པ་ཙམ་དང་དམོད་པོར་བ་ཙམ་གྱིས་གཞན་གྱི་སྲོག་འགགས་པ་ཡོད་པར་བཤད་པའི་ཕྱིར། མ་བྱིན་ལེན་གྱི་གཞི་ནི་གཞན་གྱི་རྫས་སོ། །བསམ་པ་ལ་གསུམ་ལས་འདུ་ཤེས་དང་ཉོན་མོངས་ནི་སྔར་བཞིན་དང་། ཀུན་སློང་ནི་མ་བྱིན་པར་ལེན་པར་བརྗོད་པའོ། །སྦྱོར་བ་ནི་རང་ངམ་གཞན་གྱིས་རྐུ་བའམ་འཕྲོག་ཏུ་བཅུག་ཀྱང་འདྲའོ། །མཐར་ཐུག་ནི་ཐོབ་བློ་སྐྱེས་པས་ཆོག་གི་གནས་དཔགས་ངེས་པར་མི་དགོས་ཏེ། ས་ཞིང་འགྲོག་པ་ལྟ་བུའང་ཡོད་པས་སོ། །མ་བྱིན་ལེན་འདི་ལ་འདུལ་བའི་སྐབས་སུ་མིའི་རྫས་དང་དཀོན་མཆོག་གི་ཡོ་བྱད་དང་མི་མ་ཡིན་པའི་ཡོ་བྱད་དང་། འཇོག་རྫས་དང་བགོ་རྫས་སོགས་མ་བྱིན་པར་བླངས་པ་ལ་ལྟུང་བ་ཆེ་ཆུང་གི་ཁྱད་པར་མང་དུ་བཤད་དེ། འདིར་སྤྱི་ལ་སྦྱར་མི་དགོས་ཀྱང་ཤེས་དགོས་པ་ཡོད་དོ། །ལོག་གཡེམ་གྱི་གཞི་ལ་བཞི་སྟེ་བགྲོད་བྱ་མིན་པ་ནི་མ་ལ་སོགས་པའི་བུད་མེད་གཞན་དང་སྐྱེས་པ་ཐམས་ཅད་དང་། ཡན་ལག་མིན་པ་ནི་མངལ་སྒོམ་གཏོགས་པ་ཁ་ལ་སོགས་པ་དང་། གནས་མིན་པ་ནི་བླ་མ་དང་རྟེན་བཞུགས་པའི་དྲུང་དང་། དུས་མིན་པ་ནི་སྦྲུམ་མ་དང་བསྙེན་གནས་སྲུང་བ་ལྟ་བུའི་དུས་སོ། །བསམ་པ་ལ་གསུམ་ལས་འདུ་ཤེས་མ་འཁྲུལ་བ་ནི་སྤྱིར་བཏང་སྟེ། འདུལ་བ་ལས་འདི་ལ་འདུ་ཤེས་འཁྲུལ་མ་འཁྲུལ་གང་ཡིན་ཀྱང་འདྲ་བར་བཤད། ཉོན་མོངས་དུག་གསུམ་གང་རུང་ངོ་། །ཀུན་སློང་ནི་མི་ཚངས་པར་སྤྱོད་པར་འདོད་པའོ། །སྦྱོར་བ་ནི་དེའི་ཆེད་དུ་རྩོལ་བའོ། །མཐར་ཐུག་ནི་གཉིས་ཀྱི་གཉིས་སྤྲད་པའོ། །རང་གི་བུད་མེད་ལ་ནི་ལོག་གཡེམ་མི་འབྱུང་བས། ལོག་གཡེམ་ལ་མི་ཚངས་སྤྱོད་ཀྱིས་ཁྱབ་ཀྱང་། མི་ཚངས་སྤྱོད་ལ་ལོག་གཡེམ་གྱི་མ་ཁྱབ་པོ། །བརྫུན་དུ་སྨྲ་བའི་གཞི་ལ་གཉིས་ཏེ་མཐོང་ཐོས་སོགས་དང་ཕ་རོལ་པོས་དོན་གོ་ནུས་པའོ། །བསམ་པ་ལ་གསུམ་ལས་འདུ་ཤེས་ནི་མཐོང་བས་སོགས་ལ་མ་མཐོང་བ་སོགས་སུ་བསྒྱུར་བའོ། །ཉོན་མོངས་ནི་དུག་གསུམ་གང་རུང་ངོ་། །ཀུན་སློང་ནི་འདུ་ཤེས་བསྒྱུར་ན་སྨྲ་འདོད་པའོ། །སྦྱོར་བ་མི་སྨྲ་བའམ་ཅང་མི་སྨྲ་བ་སོགས་ཀྱི་བརྡའམ་མཚན་མས་དང་དུ་ལེན་པའོ། །དེ་ནས་བརྫུན་སྨྲའི་ལས་ལས་འབྱུང་བ་ལ་ངག་གིས་སྨྲ་དགོས་པས་མ་ཁྱབ་བོ། །མཐར་ཐུག་ནི་ཕ་རོལ་པོས་གོ་བའོ། །དེ་ནི་ཚིག་ཙམ་གོ་བས་མི་ཆོག་གི་དོན་གོ་དགོས་ཏེ། དོན་མ་གོ་ན་ཅི་ཟེར་མི་ཤེས་པས་སོ། །དོན་མ་གོ་ན་ངག་ཀྱལ་ཙམ་དུ་འགྲོ་སྟེ། དེ་ནི་ཕྲ་མ་དང་ཚིག་རྩུབ་ལའང་འདྲའོ། །ཕྲ་མའི་གཞི་ནི་མཐུན་པ་དང་མི་མཐུན་པའི་སེམས་ཅན་ནོ། །བསམ་པ་ལ་གསུམ་ལས་འདུ་ཤེས་དང་ཉོན་མོངས་ནི་སྔར་ལྟར་རོ། །ཀུན་སློང་ནི་མཐུན་པ་དབྱེ་འདོད་དང་མི་མཐུན་པ་འདུ་མ་མི་འདོད་པའོ། །སྦྱོར་བ་ནི་དེའི་ཆེད་དུ་ཚིག་བདེན་མི་བདེན་གང་རུང་སྨྲ་བའོ། །མཐར་ཐུག་ནི་སྨྲས་པའི་དོན་གོ་བའོ། །ཚིག་རྩུབ་ཀྱི་གཞི་ནི། མནར་སེམས་སྐྱེ་བའི་གཞིར་གྱུར་བའི་སེམས་ཅན་ནོ། །བསམ་པ་ལ་གསུམ་ལས་འདུ་ཤེས་དང་ཉོན་མོངས་ནི་སྔར་བཞིན་ནོ། །ཀུན་སློང་ནི་ངག་རྩུབ་པོ་སྨྲ་འདོད་པའོ། །མཐར་ཐུག་ནི་སྨྲས་པའི་དོན་དེས་གོ་བའོ། །ཕན་སེམས་ཀྱིས་ཡིན་ན་དངོས་གཞིའི་ལས་ལམ་མེད་དོ། །ངག་ཀྱལ་གྱི་གཞི་ནི་དོན་དང་མི་ལྡན་པའོ། །བསམ་པ་ལ་གསུམ་ལས་འདུ་ཤེས་ནི་བརྗོད་དོན་དེ་ལ་དེར་འདུ་ཤེས་པའོ། །ཉོན་མོངས་ནི་དུག་གསུམ་གང་རུང་ངོ་། །ཀུན་སློང་ནི་འབྲེལ་མེད་དུ་སྨྲ་བར་འདོད་པའོ། །སྦྱོར་བ་ནི་དེ་སྨྲ་བར་བཞུགས་པའོ། །མཐར་ཐུག་ནི་དེ་སྨྲ་ཟིན་པ་སྟེ། འདི་ལ་དོན་གོ་དགོས་པའི་ངེས་པ་མེད་དོ། །ངག་ཀྱལ་གྱི་ངོ་བོ་ནི་འཐབ་མོའི་གཏམ་དང་མཚང་འདྲུ་བ་དང་སྨྲེ་ངག་འདོན་པ་དང་དགའ་མགུར་སྤྱོད་པའི་གཏམ་དང་འདུ་འཛིན་དང་ར་རོ་བའི་གཏམ་དང་། བཞད་གད་དང་གླུ་དང་བསྟན་བཅོས་ངན་པ་འདོན་པ་སོགས་སོ། །བརྣབ་སེམས་ཀྱི་གཞི་ནི་གཞན་གྱི་ནོར་དང་ཡོ་བྱད་དོ། །བསམ་པ་ལ་གསུམ་ལས་འདུ་ཤེས་ནི་གཞི་དེ་ལ་དེར་འདུ་ཤེས་པའོ། །ཉོན་མོངས་ནི་དུག་གསུམ་གང་རུང་ངོ་། །ཀུན་སློང་ནི་བདག་གིར་བྱ་བར་འདོད་པའོ། །སྦྱོར་བ་ནི་དེར་རྩོལ་བར་བྱེད་པའོ། །མཐར་ཐུག་ནི་དེ་བདག་གིར་གྱུར་ཅིག་སྙམ་པའོ། །གནོད་སེམས་ཀྱི་གཞི་དང་འདུ་ཤེས་དང་ཉོན་མོངས་ནི་ཚིག་རྩུབ་བཞིན་ནོ། །ཀུན་སློང་ནི་རྡེག་པ་ལ་སོགས་པར་འདོད་པའོ། །སྦྱོར་བ་ནི་དེའི་ཆེད་དུ་སྦྱོར་བའོ། །མཐར་ཐུག་ནི་རྡེག་པ་དང་འཆིང་བ་སོགས་བྱ་བར་ཐག་བཅད་པའོ། །ལོག་ལྟའི་གཞི་ནི་ཡོད་པའི་དོན་ནོ། །བསམ་པ་ལ་གསུམ་ལས་འདུ་ཤེས་ནི་དོན་དེ་ལ་བདེན་པར་འདུ་ཤེས་པའོ། །ཉོན་མོངས་ནི་དུག་གསུམ་གང་རུང་ངོ་། །ཀུན་སློང་ནི་སྐུར་པར་འདེབས་འདོད་པའོ། །སྦྱོར་བ་ནི་བསམ་དོན་དེར་བརྩམས་པའོ། །འདི་ལ་བཞི་སྟེ། ལེགས་སྤྱད་དང་ཉེས་སྤྱད་སོགས་མེད་དོ་ཞེས་རྒྱུ་ལ་སྐུར་འདེབས་བྱེད་པ་དང་། དེ་གཉིས་ཀྱི་རྣམ་སྨིན་མེད་དོ་ཞེས་འབྲས་བུ་ལ་སྐུར་བ་དང་། འཇིག་རྟེན་ཕ་རོལ་དང་བརྫུས་ཏེ་སྐྱེ་བ་དང་། ཕས་ས་བོན་བཏབ་པ་དང་མས་ས་བོན་བཟུང་བ་མེད་དོ་ཞེས་བྱེད་པ་ལ་སྐུར་བ་དང་། དགྲ་བཅོམ་པ་མེད་དོ་ཞེས་ཡོད་པའི་དངོས་པོ་ལ་སྐུར་པ་འདེབས་པ་རྣམས་སོ། །མཐར་ཐུག་ནི་སྐུར་པ་གདབ་པར་ངེས་པའོ། །ལོག་ལྟའི་ལས་ལམ་གྱི་དངོས་གཞི་རྫོགས་པ་ལ་ཁྱད་ཆོས་དུ་མ་ཚང་དགོས་ཀྱི། དེ་ལྟར་སྐྱེས་པ་ཙམ་གྱིས་མི་ཆོག་གོ །མཛོད་ལས། གསུམ་ལམ་བདུན་ནི་ལས་ཀྱང་ཡིན། །ཞེས་འབྱུང་བ་ལྟར་ལས་ལམ་ཡིན་མིན་གྱི་ཁྱད་པར་ཡོད་དེ། ལུས་ངག་གི་ལས་བདུན་ནི་ལས་ཀྱང་ཡིན་ཞིང་། རང་ཉིད་ཀུན་ནས་སློང་བྱེད་ཀྱི་སེམས་པ་འཇུག་པའི་གཞི་ཡིན་པས་ལས་ཀྱི་ལམ་ཡང་ཡིན་ལ། ཡིད་ཀྱི་ལས་གསུམ་ནི་རང་དང་མཚུངས་ལྡན་གྱི་སེམས་པ་འཇུག་པའི་གཞི་ཡིན་པས་ལས་ཀྱི་ལམ་ཡིན་ཀྱང་ལས་དངོས་མ་ཡིན་པའི་ཕྱིར། དེ་དག་གི་ཀུན་སློང་དང་མཚུངས་ལྡན་གྱི་ཡིད་ལས་སེམས་པ་ནི་ལས་ཡིན་ཀྱང་ལས་ཀྱི་ལམ་མ་ཡིན་ཏེ། རང་གི་ངོ་བོའི་སྒོ་ནས་ལས་ཁོ་ནར་འགྱུར་བའི་ཕྱིར་རོ། །འོན་ཀྱང་ཞིབ་ཏུ་དཔྱད་དགོས་པ་ཡོད་དོ། །གཉིས་པ་དགེ་བའི་ལས་ལམ་བཅུ་ནི་མི་དགེ་བ་བཅུ་ལས་ལྡོག་པའི་སྒོ་ནས་ཅི་ལྟར་རིགས་པར་ཤེས་པར་བྱའོ། །དྲུག་པ་ལ་གཉིས། ལས་ལམ་བཅུའི་ལྕི་ཡང་དང་། ལས་སྟོབས་ཆེ་བ་གཞན་བཤད་པའོ། །དང་པོ། ལུས་ཀྱི་ལས་གསུམ་དང་ངག་གི་བཞི་སྟེ་བདུན་ནི་སྔ་མ་སྔ་མ་ལྕི་ཞིང་། ཡིད་ཀྱི་གསུམ་ནི་ཕྱི་མ་ཕྱི་མ་ལྷག་པར་ལྕིའོ། །གཞན་ཡང་སའི་དངོས་གཞི་ལྟར་ན་ཀུན་སློང་དྲག་པོའི་དབང་གིས་ལྕི་བ་དང་། ལན་མང་པོ་དང་ཡུན་རིང་དུ་བྱས་ནས་ལྕི་བ་དང་། དཀོན་མཆོག་གསུམ་དང་བླ་མ་དང་ཕ་མ་ལྟ་བུ་ལ་ཕན་གནོད་བྱས་པས་ལྕི་བ་དང་། གཉེན་པོ་མེད་པས་ལྕི་བ་སོགས་ཡོད་ཅིང་། བཤེས་སྤྲིངས་ལས། རྟག་དང་མངོན་པར་ཞེན་དང་གཉེན་པོ་མེད། །ཡོན་ཏན་གཙོ་དང་གཞི་ལས་བྱུང་བའི་ལས། དགེ་དང་མི་དགེ་རྣམ་ལྔ་ཆེན་པོ་སྟེ། །དེ་ལས་དགེ་བ་སྦྱོང་ལ་བརྩོན་པར་གྱིས། །ཞེས་གསུངས་ཏེ་འདྲའོ། །གཉིས་པ་ལ་ཞིང་གི་སྒོ་ནས་སྟོབས་ཆེ་བ་འཕགས་པ་དང་དེར་མ་ཟད། སོ་སྐྱེ་ཡིན་ཡང་བསོད་ནམས་གསོག་པའི་རྟེན་དུ་སྟོབས་ཆེ་བ་ནི། མཛོད་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའ་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པ་ཡིན། །ཞེས་གསུངས་པ་ལྟར་ཡིན་ལ། །སྤྱིར་དཀོན་མཆོག་དང་བླ་མའམ་བླ་མ་དང་འདྲ་བ་དང་ཕ་མ་སོགས་ལ་ཕན་གནོད་ཆུང་ངུ་ཞིག་བྱས་ཀྱང་ཕན་ཡོན་དང་ཁ་ན་མ་ཐོ་བའི་སྡིག་ཆེ་བར་བཤད། དགེ་འདུན་གྱི་ཞལ་དུ་འདུ་བའི་སྒོ་འཕྲོག་ན་ནི་དམྱལ་བ་ཆེན་པོར་ལྟུང་ལ། འདུ་སྒོ་མིན་ཡང་དགེ་འདུན་གྱི་ཡོད་བྱད་མ་བྱིན་པར་བླངས་ན་ནི་མནར་མེད་ཀྱི་འཁོར་དུ་སྐྱེ་བར་གསུངས་ཏེ། ད་ལྟ་ནི་འདི་འདྲ་བྱེད་མཁན་བྱུང་དོགས་པས་གཟབ་པར་འཚལ་ལོ། །རྟེན་གྱི་སྒོ་ནས་སྟོབས་ཆེ་བ་ནི། སྤྱིར་མཁས་པའི་སྡིག་པ་ཡང་ལ། བླུན་པོའི་སྡིག་པ་ལྕི་བར་གསུངས་ཏེ། དེ་ཡང་མཁས་པ་སྡིག་ལྟུང་ལ་འགྱོད་སེམས་ཀྱི་བཤག་སྡོམ་བྱེད་པས་ཡང་བར་འགྱུར་བ་དང་། བླུན་པོས་དེ་ལྟར་མི་བྱེད་པའི་སྟེང་དུ་སྡིག་པ་འགའ་ཞིག་ལ་རྗེས་སུ་ཡི་རང་བྱས་ནས་འཕེལ་བར་འགྱུར་བའི་དབང་དུ་མཛད་ཀྱི། ཤེས་བཞིན་དུ་དགེ་སྡིག་ཁྱད་དུ་གསོད་པའི་མཁས་རློམ་ལ་ནི་ལྕི་བ་ཡིན་ནོ། །རྟེན་ཁྱིམ་པ་དང་རབ་བྱུང་གཉིས་ལས་ཕྱི་མས་བྱས་པའི་དགེ་སྡིག་ནི་ལྷག་པར་སྟོབས་ཆེ་ཞིང་སྡོམ་ལྡན་དང་སྡོམ་ལྡན་མིན་པ་གཉིས་ལས་སྔ་མས་བྱས་པའི་ལས་སྟོབས་ཆེ་ལ། སྡོམ་ལྡན་ལའང་གཅིག་ལྡན་དང་གཉིས་ལྡན་ནམ་གསུམ་ལྡན་རྣམས་ལས་ཕྱི་མ་ཕྱི་མས་བྱས་པའི་ལས་སྟོབས་ལྷག་པར་ཆེའོ། །བྱང་སེམས་ཡིན་མིན་གཉིས་ལས་སྔ་མས་བྱས་པའི་དགེ་བའི་ལས་སྟོབས་ཆེ་བ་སོགས་ཤེས་པར་བྱའོ། །དངོས་པོའི་སྒོ་ནས་སེམས་ཅན་ལ་སྦྱིན་པ་གཏོང་བ་ལ་ཆོས་ཀྱི་སྦྱིན་པ་སྟོབས་ཆེ་ལ། སངས་རྒྱས་ལ་མཆོད་པ་ལ་ཟང་ཟིང་ལས་སྒྲུབ་པའི་མཆོད་པ་ཆེས་ཕུལ་དུ་བྱུང་ངོ་། །བསམ་པའི་སྒོ་ནས་ཐར་པ་དོན་གཉེར་གྱི་བསམ་པས་མཆོད་པ་སྟོབས་ཆེ་ལ། སེམས་ཅན་ཐམས་ཅད་ཀྱི་དོན་དུ་ཐམས་ཅད་མཁྱེན་པ་དོན་གཉེར་གྱི་བསམ་པས་མ་ཆོད་པ་ནི་དེ་བས་ཀྱང་སྟོབས་ཆེ་བར་གསུངས་སོ། །ལས་ཉོན་སྟོབས་ཆེ་བ་མང་ཡང་བྱང་སེམས་ལ་ཁྲོས་པའི་ཁོང་ཁྲོ་དང་། མཚམས་མེད་དང་། ཆོས་སྤོང་གི་ལས་དང་། ལོག་ལྟ་འགའ་ཞིག་ནི་ལྷག་པར་སྟོབས་ཆེ་སྟེ། དེའི་ཚུལ་གཞན་དུ་ཤེས་པར་བྱའོ། །མདོར་ན་ལས་སྟོབས་ཆེ་ཆུང་དུ་འགྱུར་བའི་ཚུལ་ཡོད་དེ། །མཛོད་ལས། འཇུག་དང་ཞིང་དང་གཞི་དང་ནི། སྦྱོར་དང་སེམས་པ་བསམ་པ་སྟེ། །དེ་དག་ཆུང་དང་ཆེ་བ་ལས། །ལས་ཀྱང་ཆུང་དང་ཆེ་བ་ཉིད། །ཅེས་འབྱུང་བ་ལྟར་ལས་དེ་བྱས་པའི་མཇུག་ཏུ་རྗེས་སུ་ཡི་རང་བྱེད་པ་དང་། ཕ་མ་དང་སློབ་དཔོན་སོགས་ཕན་འདོགས་པའི་ཞིང་དང་བླ་མ་དང་དཀོན་མཆོག་གསུམ་སོགས་ཡོན་ཏན་གྱི་ཞིང་དང་། ལས་ལམ་བྱེད་པའི་གཞི་དང་། ལས་ལམ་དེའི་སྦྱོར་བ་དང་། རྫོགས་པར་བྱེད་པའི་སེམས་པ་དང་། ཀུན་སློང་བསམ་པའི་ཁྱད་པར་དྲུག་པོ་ཆུང་བ་ལས་ནི་ལས་སྟོབས་ཆུང་ལ། དེ་རྣམས་ཆེ་བ་ལས་ནི་ལས་ཀྱང་སྟོབས་ཆེ་བའམ་ལྕི་བར་འགྱུར་བའི་ཕྱིར་རོ། །བདུན་པ་ལས་གཉིས་ཀྱི་འབྲས་བུ་ལ་དགེ་བའི་འབྲས་བུར་རྣམ་སྨིན། རྒྱུ་མཐུན། བདག་པོ་འམ་དབང་གི་འབྲས་བུ་གསུམ། དང་པོ་ནི། མི་དགེ་བཅུ་ཆེན་པོ་རེ་རེས་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོར་སྐྱེའོ། །མཛོད་ལས་མི་དགེ་བཅུ་པོ་ཐམས་ཅད་ལ་སྦྱོར་དངོས་མཇུག་གསུམ་སོ་སོར་བྱས་ནས་སྦྱོར་བས་རྣམ་སྨིན་དང་། དངོས་གཞིས་རྒྱུ་མཐུན་དང་། མཇུག་གིས་བདག་འབྲས་འབྱིན་པ་ཞིག་ཀྱང་གསུངས་ཏེ། དེ་ཉིད་ལས། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་བུ་འབྱིན་པར་འདོད། །ཞེས་པའི་ཐད་ཀྱི་འགྲེལ་པ་རྣམས་ལས་དེ་ལྟར་སོ་སོར་ཕྱེ་ནས་བཤད་པའི་ཕྱིར། འདི་ནི་སྲོག་གཅོད་པའི་ཚེ་སྦྱོར་བའི་དུས་སུ་གཞན་སྡུག་བསྔལ་བར་བྱེད་ཅིང་། དངོས་གཞིའི་དུས་སུ་དེ་མི་འབྱུང་བ་ལ་དགོངས་སོ། །རྣམ་སྨིན་གྱི་འབྲས་བུ་ལ་ཕྱི་མའི་འཕངས་འབྲས་ཀྱིས་མ་ཁྱབ་སྟེ། མཐོང་ཆོས་ལ་རྣམ་སྨིན་མྱོང་བ་སྲིད་པའི་ཕྱིར་རོ། །རྒྱུ་མཐུན་གྱི་འབྲས་བུ་ནི། མིར་སྐྱེས་ཀྱང་སྲོག་གཅོད་སོགས་རིམ་པ་བཞིན་ཚེ་ཐུང་བ་དང་ལོངས་སྤྱོད་ཆུང་བ་དང་ཆུང་མ་མ་བསྲུངས་པར་འགྱུར་བ་དང་སྐུར་བ་མང་བ་དང་མཛའ་བོ་དང་དབྱེ་བ་དང་སྒྲ་ཡིད་དུ་མི་འོང་བ་ཐོས་པ་དང་ཚིག་མི་ཉན་པ་དང་དུག་གསུམ་ཆེ་བའོ། །བདག་འབྲས་ནི། སྲོག་བཅད་པ་ལས་སྣོད་ཀྱི་འཇིག་རྟེན་གྱི་བཟའ་བཏུང་དང་སྨན་དང་འབྲས་བུ་སོགས་མཐུ་ཆུང་བར་འགྱུར་བ་དང་། མ་བྱིན་པ་བླངས་པས་འབྲས་བུ་ཉུང་བ་དང་ཐན་པ་དང་ཆར་དང་སེར་བས་འབྲས་བུ་མ་རུང་བར་བྱད་པ་དང་། ལོག་གཡེམ་གྱིས་འདམ་རྫབ་དང་ལྗན་ལྗིན་སོགས་དང་བཅས་པ་དང་། བརྫུན་དུ་སྨྲ་བས་ལས་ཀྱི་མཐའ་མི་རྒྱས་པ་དང་མི་མཐུན་པ་དང་བསླུ་བ་དང་འཇིགས་པ་དང་བཅས་པ་དང་། ཕྲ་མས་ས་ཕྱོགས་འབར་འབུར་དང་བགྲོད་དཀའ་བ་སོགས་དང་བཅས་པ་དང་། ཚིག་རྩུབ་ཀྱིས་ས་ཕྱོགས་སྡོང་དུམ་དང་ཚེར་མ་དང་རྡོ་མང་བ་དང་ཆུ་དཀོན་པ་སོགས་དང་བཅས་པ་དང་། ངག་ཀྱལ་གྱིས་ལྗོན་ཤིང་སོགས་ལ་འབྲས་བུ་མི་འཆགས་པ་སོགས་དང་བཅས་པ་དང་། བརྣབ་སེམས་ཀྱིས་ཕུན་སུམ་ཚོགས་པ་རྣམས་རིམ་གྱིས་འགྲིབ་པར་འགྱུར་བ་དང་། གནོད་སེམས་ཀྱིས་ནད་ཡམས་དང་འཁྲུགས་པ་མང་བ་དང་སྟག་དང་སེང་གེ་སོགས་ཀྱིས་འཚེ་བར་བྱེད་པ་དང་། ལོག་ལྟས་ནི་སྣོད་ཀྱི་འབྱུང་ཁུང་མཆོག་དང་གཙོ་བོ་རྣམས་ནུབ་པར་འགྱུར་བའོ། །དེ་དག་ནི་ལས་སོ་སོའི་འབྲས་བུའི་དབང་དུ་བྱས་པ་སྟེ། མཁས་པ་ཁ་ཅིག །སྤྱིར་རྣམ་སྨིན་གྱི་འབྲས་བུ་ཡིན་ན། རང་དང་སྐྱེས་བུ་བྱེད་འབྲས་དང་བདག་འབྲས་དང་རྒྱུ་མཐུན་གྱི་འབྲས་བུ་བཞི་ཀ་ཡིན་པས་ཁྱབ་པ་དང་། འདུས་བྱས་ཡིན་ན་བྱེད་འབྲས་དང་བདག་འབྲས་གཉིས་ཀ་ཡིན་དགོས་ཞེས་འདོད་པས་དེ་ཡང་ཤེས་དགོས་སོ། །གཉིས་པ་ལ་གསུམ་ལས། དགེ་བའི་རྣམ་སྨིན་ནི་དགེ་བ་ཆུང་འབྲིང་ཆེན་པོ་གསུམ་གྱིས་མི་དང་འདོད་པའི་ལྷ་དང་ཁམས་གོང་མའི་ལྷར་སྐྱེ་ལ། རྒྱུ་མཐུན་དང་བདག་འབྲས་ནི་མི་དགེ་བའི་འབྲས་བུ་ལས་ལྡོག་སྟེ་སྦྱར་བའོ། །མདོར་ན་མ་དག་པའི་སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན་རྣམས་ནི་ལས་ཀྱི་རྒྱུ་ལས་བྱུང་བ་ཡིན་ཏེ། དཔལ་ལྡན་ཟླ་བས་དབུ་མ་འཇུག་པར། འགྲོ་བ་མ་ལུས་ལས་ལས་སྐྱེས་བར་གསུངས། །ཞེས་དང་། མཛོད་ལས་ཀྱང་། འཇིག་རྟེན་སྣ་ཚོགས་ལས་ལས་སྐྱེས། །ཞེས་གསུངས་པའི་ཕྱིར། དཀར་པོའི་ལས་དེ་རྣམས་རང་ཉིད་གཅིག་པུ་ཞི་བདེ་དོན་གཉེར་གྱི་བསམ་པ་ཙམ་གྱིས་ཟིན་ན་ནི་དམན་པའི་བྱང་ཆུབ་འགྲུབ་པའི་རྒྱུར་འགྱུར་ལ། བྱང་ཆུབ་ཀྱི་སེམས་དང་རྫོགས་བྱང་དུ་བསྔོ་བའི་བསྔོ་བས་ཟིན་ན་ནི་སངས་རྒྱས་ཐོབ་པའི་རྒྱུར་འགྱུར་བ་ཡིན་ནོ། །བརྒྱད་པ་ལ་གཉིས། འཕེན་རྫོགས་ཀྱི་ཁྱད་པར་དང་། དུས་མྱུར་བུལ་དང་ལས་གང་གི་འབྲས་བུ་སྔོན་ལ་འབྱིན་ཚུལ་ལོ། །དང་པོ་ནི། རིན་ཆེན་འཕྲེང་བ་ལས། མི་དགེ་བ་ལས་སྡུག་བསྔལ་ཀུན། དེ་བཞིན་ངན་འགྲོ་ཐམས་ཅད་དང་། །དགེ་ལས་བདེ་འགྲོ་ཐམས་ཅད་དང་། སྐྱེ་བ་ཀུན་ཏུ་བདེ་བ་དག །ཅེས་གསུངས་པ་ལྟར་དགེ་བའི་ལས་ཀྱིས་ནི་བདེ་འགྲོར་འཕེན་གྱི། ངན་འགྲོར་འཕེན་མི་སྲིད་ལ། མི་དགེ་བའི་ལས་ཀྱིས་ནི་ངན་འགྲོར་འཕེན་གྱི། བདེ་འགྲོར་འཕེན་མི་སྲིད་དེ། ལས་དཀར་ནག་གཉིས་ཀྱི་རྣམ་སྨིན་འཆོལ་ནས་འབྱིན་པ་མི་སྲིད་པའི་ཕྱིར། དཔེར་ན། གྲོ་ནས་སོགས་ཀྱི་ས་བོན་སྣ་ཚོགས་ལས་འབྲས་བུ་ནོར་ནས་མི་འབྱུང་བ་བཞིན་ནོ། །རྫོགས་བྱེད་ལ་ནི་ངེས་པ་མེད་དེ། འཕེན་བྱེད་དགེ་བས་འཕངས་ཤིང་རྫོགས་བྱེད་ཀྱང་དགེ་བས་རྫོགས་པ་དང་། འཕེན་བྱེད་མི་དགེ་བས་འཕངས་ཤིང་རྫོགས་བྱེད་མི་དགེ་བས་རྫོགས་པ་དང་། དགེ་བས་འཕངས་ཀྱང་མི་དགེ་བས་རྫོགས་པ་དང་། མི་དགེ་བས་འཕངས་ཀྱང་དགེ་བས་རྫོགས་པ་དང་། དགེ་བས་འཕངས་ཀྱང་འདྲེས་མས་རྫོགས་པ་དང་། མི་དགེ་བས་འཕངས་ཀྱང་འདྲེས་མས་རྫོགས་པ་དང་དྲུག་ཡོད་པའི་ཕྱིར་ཏེ། བདེ་འགྲོའི་རྟེན་ལ་བདེ་བ་ཤས་ཆེར་ཡུན་རིང་མྱོང་བ་དང་པོ་དང་། ངན་འགྲོའི་རྟེན་ལ་སྡུག་བསྔལ་ཆེར་མྱོང་བ་གཉིས་པ་དང་། བདེ་བའི་རྟེན་ལ་སྡུག་བསྔལ་ཆེར་མྱོང་བ་གསུམ་པ་དང་། ངན་འགྲོའི་རྟེན་ལ་བདེ་བ་ཆེར་མྱོང་བ་བཞི་པ་དང་། བདེ་འགྲོའི་རྟེན་ལ་བདེ་སྡུག་འདྲེས་མར་མྱོང་བ་ལྔ་པ་དང་། ངན་འགྲོའི་རྟེན་ལ་བདེ་སྡུག་འདྲེས་མར་མྱོང་བ་དྲུག་པ་ཡིན་པའི་ཕྱིར། གཞན་ཡང་དགེ་བས་བདེ་འགྲོར་སྐྱེས་ཀྱང་ཡན་ལག་དང་ཉིད་ལག་དང་དབང་པོ་མ་ཚང་བ་དང་མདོག་མི་སྡུག་པ་དང་ཚེ་ཐུང་བ་དང་ནད་མང་བ་དང་དབུལ་བ་སོགས་ནི་མི་དགེ་བས་བྱེད་ལ། མི་དགེ་བས་ལྷ་མིན་དང་དུད་འགྲོ་དང་ཡི་དྭགས་སུ་སྐྱེས་ཀྱང་ལོངས་སྤྱོད་ལྷའི་དཔལ་འབྱོར་ལྟ་བུར་གྱུར་པ་ནི་དགེ་བས་བྱས་པ་སྟེ། དེས་མཚོན་ནས་གཞན་ཡང་ཤེས་དགོས་སོ། །བྱེ་བྲག་སྨྲ་བས་འཕེན་བྱེད་ཀྱི་ལས་གཅིག་གིས་སྐྱེ་བ་གཅིག་ཁོ་ན་འཕེན་ཅིང་། རྫོགས་བྱེད་ལ་དུ་མ་འབྱུང་བ་དང་། ལས་དུ་མས་ཀྱང་སྐྱེ་བ་གཅིག་ཁོ་ན་མི་འཕེན་པར་འདོད་མོད། ཀུན་བཏུས་ལས་ནི། ལས་གཅིག་གིས་ལུས་གཅིག་འཕེན་པའི་ལས་ཀྱང་ཡོད། ལས་གཅིག་གིས་ལུས་དུ་མ་འཕེན་པའི་ལས་ཀྱང་ཡོད། ལས་དུ་མས་ལུས་གཅིག་འཕེན་པའི་ལས་ཀྱང་ཡོད། ལས་དུ་མས་ལུས་དུ་མ་འཕེན་པའི་ལས་ཀྱང་ཡོད་དོ་ཞེས་གསུངས་པ་ལྟར་འདིར་ཡང་འདོད་དེ། ལས་སྟོབས་ཆེན་གཅིག་གིས་ལུས་མང་པོ་དང་། ལས་སྟོབས་ཆུང་དུ་མས་ལུས་གཅིག་འཕེན་པར་འདོད་རིགས་པའི་ཕྱིར་ཏེ། དགྲ་ནག་གི་འགྲེལ་བ་ལས། ཚིགས་བཅད་གཅིག་ཙམ་ཉན་པ་ལ། །གང་གིས་བླ་མར་མི་འཛིན་པ། ཁྱི་ཡི་སྐྱེ་གནས་བརྒྱར་སྐྱེས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་གསུངས་པ་ལྟ་བུས་འགྲུབ་པའི་ཕྱིར། འོན་ཀྱང་ཞི་བ་ཆ་འབྱེད་དགོས་པ་ཡོད་དོ། །གཉིས་པ་ལ་ལས་སྟོབས་ཆེན་འགའི་རྣམ་སྨིན་ནི་ཚེ་འདིའམ་ཕྱི་མ་ལྟ་བུར་སྨིན་པར་འགྱུར་ཡང་། ལས་འགའ་ཞིག་དང་རྣམ་སྨིན་གྱི་འབྲས་བུའི་བར་དུ་བསྐལ་པ་ལ་སོགས་པས་ཀྱང་ཆོད་པ་ཡོད་དེ། མདོ་ལས། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་པ་ལུས་ཅན་རྣམས་ལ་ནི། །འབྲས་བུ་དག་ཏུ་སྨིན་པར་འགྱུར། །ཞེས་གསུངས་པའི་ཕྱིར། །དགེ་མི་དགེའི་ལས་ཆེ་ཆུང་མང་པོ་བསགས་པ་རྣམས་ཀྱི་རྣམ་སྨིན་འབྱིན་ཚུལ་ཡོད་དེ། སྤྱིར་ལས་ལྕི་བ་གང་ཡིན་པ་དེ་ཐོག་མར་སྨིན་ལ། ལྕི་ཡང་མཉམ་ན་འཆི་ཁར་གང་མངོན་དུ་གྱུར་པ་དེ་ཐོག་མར་སྨིན། དེ་ཡང་འདྲ་ན་གང་གོམས་ཆེ་བ་དེ་སྔོན་ལ་སྨིན། དེ་ཡང་འདྲ་ན་གང་ཐོག་མར་བྱས་པ་དེ་སྔོན་ལ་སྨིན་པར་འགྱུར་བའི་ཕྱིར་ཏེ། མཛོད་འགྲེལ་ལས། ལས་ཀྱིས་འཁོར་བར་ལྕི་གང་དང་། ཉ་བ་གང་དང་གོམས་པ་གང་། །སྔོན་བྱས་གང་ཡིན་དེ་ལས་ནི། །སྔ་མ་སྔ་མ་རྣམ་སྨིན་འགྱུར། །ཞེས་གསུངས་པའི་ཕྱིར་རོ། །དགུ་པ་ལ། འདི་སྙམ་དུ་ལས་བྱེད་པའི་དུས་ཀྱི་རྟེན་དེ་ཞིག་ནས་ཡུན་རིང་དུ་སོང་བའི་ཚེ་སྔར་བྱས་པའི་ལས་དེ་ཡང་ཞིག་དགོས་པས་ཕྱིས་དེའི་འབྲས་བུ་ཇི་ལྟར་སྨིན་པར་འགྱུར་ཞེ་ན། དེའི་ལན་ནི་རྒྱས་པར་དབུ་མའི་གཞུང་ཆེ་བ་ནས་བཤད་པ་ལྟར་ལས་ལ་རྟག་ཆད་སྤོང་བའི་སྤོང་ཚུལ་ཞིག་བདག་གིས་ལོགས་སུ་བྲིས་ཡོང་བས་འདིར་མི་འཆད་ལ། མཚོན་ཙམ་ནི་ལས་དེ་དང་དེ་བྱས་ནས་འགགས་ཀྱང་དེའི་བག་ཆགས་སེམས་རྒྱུད་ཀྱི་སྟེང་དུ་བཞག་པའི་རྟེན་འབྲེལ་གྱི་རྒྱུན་རང་རྒྱུད་ལ་ཡོད་པ་དེ་རྐྱེན་གྱིས་གསོས་འདེབས་པ་དང་འཕྲད་ན་ལས་དེ་དང་དེའི་འབྲས་བུ་འབྱིན་པ་ཡིན་ལ། དེ་ཡང་རྨི་ལམ་གྱི་དཔེ་ལྟར་འགགས་ནས་རིང་དུ་སོང་ཡང་རང་བཞིན་མེད་པའི་ལས་ཀྱིས་རང་བཞིན་གྱིས་མེད་པའི་འབྲས་བུ་བསྐྱེད་པ་ནི་འཐད་པ་ཡིན་ཏེ། ཟླ་བས་ཡབ་སྲས་མཇལ་བའི་མདོའི་དོན་བསྡུས་ནས་དབུ་མ་འཇུག་པ་ལས། རྨི་ལམ་དམིགས་པའི་ཡུལ་དག་མཐོང་ནས་ནི། །སད་ཀྱང་བླུན་ལ་ཆགས་པ་སྐྱེ་འགྱུར་ལྟར། །དེ་བཞིན་འགགས་ཤིང་རང་བཞིན་ཡོད་མིན་པའི། །ལས་ལས་ཀྱང་ནི་འབྲས་བུ་ཡོད་པ་ཡིན། །ཞེས་གསུངས་པ་ལྟར་ཡིན་པའི་ཕྱིར། དེས་ན་དགེ་བའི་ལས་བྱས་པ་རྣམས་ལ་རྗེས་སུ་ཡི་རང་ཞིང་དགའ་བ་དང་། རྫོགས་བྱང་དུ་བསྔོས་ན་འཕེལ་བ་དང་མི་འཛད་པ་སོགས་ཡིན་པས་དེ་ལྟར་བྱས་དགོས་ལ། མི་དགེ་བའི་ལས་ལ་ནི་སྟོབས་བཞིའི་བཤགས་བསྡམ་ཅི་ནུས་བྱ་དགོས་ཏེ། བཤགས་བསྔམ་ཤུགས་དྲག་བྱས་ན་མྱོང་ངེས་ཀྱི་ལས་ཀྱང་འདག་པར་གསུངས་པའི་ཕྱིར། ངན་སོང་དུ་སྐྱེས་ནས་སྡུག་བསྔལ་ཆེན་པོ་མྱོང་བར་འགྱུར་བའི་མྱོང་ངེས་ཀྱི་ལས་ཤིན་ཏུ་སྟོབས་ཆེན་འགའ་ཞིག་ནི། ཤེར་ཕྱིན་ལ་བསླབ་པའི་གཉེན་པོ་ཀུན་ཏུ་སྤྱོད་པའི་སྟོབས་ཙམ་གྱིས་སྦྱངས་ནས་ལས་ཀྱི་ལྷག་མ་འགའ་ཞིག་གི་རྣམ་སྨིན་ཕྲན་བུ་ཚེ་འདི་ཐོག་ཏུ་མྱོང་སྟེ་རྩ་བ་ནས་ཟད་པར་འགྱུར་བའང་ཡོད་དེ། ཤེར་ཕྱིན་སུམ་བརྒྱ་པ་ལས། ཡང་རབ་འབྱོར་རིགས་ཀྱི་བུའམ་རིགས་ཀྱི་བུ་མོ་གང་དག་འདི་ལྟ་བུའི་མདོ་སྡེའི་ཚིག་འདི་དག་ལེན་པ་དང་འཛིན་པ་དང་འཆང་བ་དང་ཀློག་པ་དང་ཀུན་ཆུབ་པར་བྱེད་པ་དེ་དག་ནི་མནར་བར་འགྱུར། ཤིན་ཏུའང་མནར་བར་འགྱུར་རོ། །དེ་ཅིའི་ཕྱིར་ཞེ་ན། རབ་འབྱོར་སེམས་ཅན་དེ་དག་ནི་ཚེ་རབས་སྔ་མའི་མི་དགེ་བའི་ལས་ངན་སོང་དུ་སྐྱེ་བར་འགྱུར་བ་གང་དག་བྱས་པ་དེ་དག་ཚེ་འདི་ཉིད་ལ་མནར་བས། ཚེ་རབས་སྔ་མའི་མི་དགེ་བའི་ལས་དེ་དག་བྱང་བར་འགྱུར་ཏེ། སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་རོ། །ཞེས་དང་། རྟོག་གེ་འབར་བ་ལས་ཀྱང་། དམྱལ་བར་སྐྱེ་བའི་ལས་རྣམས་དེས་ནི་ཚེ་འདིར་མགོ་བོ་ཚ་བ་ཙམ་དུ་འགྱུར་རོ། །ཞེས་གསུངས་པའི་ཕྱིར། འོ་ན། མདོ་ལས། ལས་རྣམས་བསྐལ་བ་བརྒྱར་ཡང་ནི། ཆུད་མི་ཟ་ཞེས་པ་དང་། སྔོན་གྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ་ཞེས་གསུངས་པ་ཇི་ལྟར་ཡིན་ཞེ་ན། སྐྱོན་མེད་དེ། དང་པོ་ནི་གཉེན་པོ་མེད་ན་ངེས་ཞེས་པའི་དོན་ཡིན་ལ། ཕྱི་མ་ནི་རྣམ་སྨིན་གྲུབ་ཟིན་པ་ལོང་བ་དང་འོན་པ་དང་ལྐུགས་པ་སོགས་གསོ་དཀའ་བ་ལ་དགོངས་པ་ཡིན་པའི་ཕྱིར་རོ། །ལས་དཀར་ནག་གཉིས་ལ་འཇུག་ལྡོག་བྱེད་པ་ཤིན་ཏུ་གལ་ཆེ་སྟེ། ལས་ཀྱི་དབང་གིས་སོ་སྐྱེ་ལྟ་ཅི་ཐེག་དམན་འཕགས་པ་ཡང་འཁོར་བར་སྐྱེ་བ་ཡོད་ལ། བྱང་སེམས་སོ་སྐྱེ་སྦྱོར་ལམ་བཟོད་པ་མ་ཐོབ་པ་ངན་སོང་དུ་སྐྱེ་བའང་སྲིད་ཅིང་། ལས་ཀྱིས་མི་ཚུགས་པའི་ས་ཕྱོགས་ཀྱང་མེད་པའི་ཕྱིར་ཏེ། སྐྱེས་རབས་ལས། ལས་ཀྱི་རྣམ་པར་སྨིན་པ་བསམ་མི་ཁྱབ། བརྩེ་བའི་བདག་ཉིད་ཆེ་ཡང་དུད་འགྲོར་སྐྱེས། །ཞེས་དང་། ཚོམས་ལས། གང་དུ་གནས་ཀྱང་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ལ་མེད་རྒྱ་མཚོའི་ནང་ན་མེད། །རི་བོ་རྣམས་ཀྱི་གསེབ་ཏུ་ཞུགས་ཀྱང་མིན། །ཞེས་གསུངས་པའི་ཕྱིར། མདོར་ན་ལས་འབྲས་སོགས་ཆོས་ཐམས་ཅད་རང་བཞིན་གྱིས་སྟོང་པ་རྟེན་འབྲེལ་གྱི་དོན་དུ་གོ་ན་ནི་ལྷག་པར་གནད་ཆེ་སྟེ། ཏིང་ངེ་འཛིན་རྒྱལ་པོ་ལས། སྒྱུ་མ་ཆུ་བུར་སྨིག་རྒྱུ་གློག་འདྲ་ཞིང་། །ཆོས་རྣམས་ཐམས་ཅད་ཆུ་ཡི་ཟླ་བ་བཞིན། །ཤི་ན ས་འཇིག་རྟེན་ཕ་རོལ་འགྲོ་བ་ཡི། །སེམས་ཅན་ཤེད་ལས་སྐྱེས་པ་མི་དམིགས་ཀྱང་། ལས་རྣམས་བྱས་པ་མེད་པར་མི་འགྱུར་ཏེ། །དཀར་ནག་ཇི་བཞིན་འབྲས་བུ་སྨིན་པར་བྱེད། །རིགས་པའི་ཚུལ་གྱི་སྒོ་འདི་བཟང་པོ་སྟེ། །ཕྲ་ཞིང་མཐོང་དཀའ་རྒྱལ་བའི་སྤྱོད་ཡུལ་ཡིན། །ཞེས་གསུངས་པའི་ཕྱིར་རོ། །སྨྲས་པ། རྒྱལ་བའི་གསུང་རབ་མང་དང་ཁྱད་པར་དུ། །མངོན་པའི་མདོ་བསྟན་གཞུང་ལུགས་རྒྱ་མཚོ་ནས། །འབྱུང་བའི་ལས་ཀྱི་རྣམ་གཞག་ཆ་ཙམ་ཞིག །བློ་གྲོས་སོར་རྩེས་ཉེར་བླངས་བཀོད་པའི་དགེས། །བདག་གཞན་ཀུན་གྱིས་ཚེ་རབས་ཐོག་མེད་ནས། །ད་ལྟའི་བར་བསགས་ལས་ཀྱི་སྒྲིབ་པའི་ཚོགས། །རབ་བྱང་མངོན་མཐོ་ལྷ་མིའི་རྟེན་བརྒྱུད་དེ། །མཐར་ཐུག་བླ་མེད་རྫོགས་བྱང་ཐོབ་གྱུར་ཅིག །ཅེས་པ་འདི་ཡང་ཤཱཀྱའི་དགེ་སློང་གྲགས་པ་བཤད་སྒྲུབ་ཀྱིས་ཅོ་ནེའི་གཟིམས་ཁང་ཉིད་ནས་སྦྱར་བའི་ཡི་གེ་པ་ནི་དད་དང་རྣམ་དཔྱོད་ལྡན་པའི་གནས་བརྟན་གྲགས་པ་འོད་ཟེར་རོ།། །