ལམ་རིམ་སོགས་ནས་འབྱུང་བའི་ཉམས་ལེན་གྱི་རིམ་པ་དང་ཡན་ལག་བདུན་པ་བྱེད་ཚུལ་རྣམ་པ་གཉིས།

ལམ་རིམ་སོགས་ནས་འབྱུང་བའི་ཉམས་ལེན་གྱི་རིམ་པ་དང་ཡན་ལག་བདུན་པ་བྱེད་ཚུལ་རྣམ་པ་གཉིས་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། །སྤངས་རྟོགས་མཐར་ཕྱིན་སྟོན་པ་རྫོགས་སངས་རྒྱས། །སྐྱེས་པ་བླ་ན་མེད་པ་དམ་པའི་ཆོས། །རིག་གྲོལ་གཉིས་ཀྱི་དཔལ་ལྡན་དགེ་འདུན་ཏེ། །སྐྱབས་གནས་དཀོན་མཆོག་གསུམ་ལ་ཕྱག་འཚལ་ལོ། །འདིར་ནི་དམ་པའི་ལེགས་བཤད་དང་། །མཐུན་པའི་ཆོས་འགའ་བརྗོད་པར་བྱ། ཁམས་གསུམ་སེམས་ཅན་གྲངས་མང་ཡང་། །བདེ་འགྲོའི་ལུས་རྟེན་རྙེད་པར་དཀོན། ཁྱད་པར་དལ་འབྱོར་ཚང་བ་ཡི། །མི་ལུས་ཡིད་བཞིན་ནོར་ལྟར་དཀོན། །སངས་རྒྱས་བསྟན་དང་མཇལ་བ་དཀོན། །དམ་ཆོས་ཐོས་བསམ་བྱེད་པ་དཀོན། །སྒྲུབ་པས་ཉམས་སུ་ལེན་པ་དཀོན། །འཁོར་བའི་ཕ་རོལ་བགྲོད་པ་དཀོན། །དེ་བས་སངས་རྒྱས་བསྒྲུབ་པ་དཀོན། །དེ་ཕྱིར་ཚེ་འདིའི་བདེ་བ་ཙམ། །དོན་གཉེར་ལྟོ་དང་གོས་ཀྱི་ཆེད། །འཇུག་པའི་སྐྱེས་བུ་གྲངས་མང་ཡང་། །གཏན་གྱི་བདེ་བ་བྱང་ཆུབ་ཕྱིར། །འཇུག་པ་ཉིན་མོའི་སྐར་མ་བཞིན། །ཕྱི་མ་བྱང་ཆུབ་བསྒྲུབ་པའི་ཆེད། །འབད་གང་དོན་གྱི་མཆོག་ཡིན་ལ། ཁ་ཟས་ཙམ་ཕྱིར་རྒྱུགས་པ་ནི། །མི་ཡི་ཤ་ཚུགས་ཕྱུགས་བཞིན་ཏེ། །བླུན་པོའི་ཕྱུགས་ཀྱང་ལྟོ་ཡི་ཆེད། །འབད་པས་འཇུག་པ་མཐོང་མིན་ནམ། །དེ་ལྟ་བས་ན་ཐར་འདོད་ཀྱི། །སྐྱེས་བུ་འདི་ལྟར་བསམ་བྱ་སྟེ། །མདོ་རྒྱུད་དགོངས་འགྲེལ་བཅས་པ་ལས། །མཚན་ཉིད་ལྡན་པའི་དགེ་བའི་བཤེས། །རྒྱུན་དུ་བསྟེན་པར་བྱེད་པ་ཉིད། །འདི་ཕྱིའི་ལེགས་ཚོགས་རྩ་བ་རུ། །གསུངས་ཕྱིར་བསམ་སྦྱོར་རྣམ་གཉིས་ཀྱིས། །ཐོག་མ་ཉིད་ནས་བསྟེན་པར་རིགས། །དེ་ཚེ་བླ་མ་ལྔ་བཅུ་བར། །འདིར་མང་སྨོས་པས་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་བ་ནི། །དེ་དང་དེ་ལ་འབད་དེ་བརྟག །དངོས་གྲུབ་སློབ་དཔོན་རྗེས་འབྲང་བར། །རྡོ་རྗེ་འཛིན་པ་ཉིད་གསུང་བར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ནམ་ཡང་སློབ་དཔོན་དག་གི་ནི། །ཀུན་ཏུ་སེམས་དཀྲུག་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཚེད་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་བ་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཞེས་དང་དགྲ་ནག་དཀའ་འགྲེལ་ལས། །ཚིགས་བཅད་གཅིག་ཙམ་ཉན་པ་ལ། །གང་གིས་བླ་མར་མི་འཛིན་པ། །ཁྱི་ཡི་སྐྱེ་བ་བརྒྱ་བླངས་ནས། །རྨེ་ཤ་ཅན་དུ་སྐྱེ་བར་འགྱུར། །ཞེས་པའི་དོན་ལྟར་སྤངས་བླང་བྱ། །དེ་ནས་ཤིན་ཏུ་རྙེད་དཀའ་ཞིང་། །རྙེད་ན་དོན་ཆེའི་དལ་འབྱོར་འདི། །ཡིད་བཞིན་ནོར་ལྟར་དཀོན་མཐོང་ནས། །སྙིང་བོ་ལེན་པའི་ཚུལ་ལ་འབད། །ངན་སོང་གསུམ་དང་ཡུལ་མཐའ་འཁོབ། །དབང་བོ་མ་ཚང་ལོག་ལྟ་ཅན། །རྒྱལ་བའི་བཀའ་མེད་ཚེ་རིང་ལྷ། །མི་ཁོམ་འདི་བརྒྱད་བྲལ་བ་ལ། །དལ་བ་རྣམ་པ་བརྒྱད་ཅེས་བྱ། །མི་ཉིད་དབུས་སྐྱེས་དབང་བོ་ཚང་། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དམ་ཆོས་སྟོན། །བསྟན་པ་གནས་དང་དེ་རྗེས་འཇུག །གཞན་ཕྱིར་སྙིང་བརྩེ་འབྱོར་བ་བཅུ། །དལ་བརྒྱད་འབྱོར་བཅུ་ཚང་བ་ཡི། །རྟེན་འདི་རྒྱུ་འབྲས་ངོ་བོ་དང་། །དཔེ་ཡི་སྒོ་ནས་རྙེད་དཀའ་བར། །རྒྱལ་བས་གསུངས་ཕྱིར་ལྟ་ཅི་སྨོས། །སྤྱིར་ནི་བདེ་འགྲོའི་རྟེན་ཙམ་ཡང་། །ཐོབ་ཕྱིར་དཀར་ཆོས་སྔོན་འགྲོ་སྟེ། །དགེ་བ་ལས་ནི་ཕན་བདེའི་རྒྱུ། །གཞན་དག་ཡོད་པ་མིན་ཕྱིར་རོ། །འདི་འདྲའི་དལ་བ་རྙེད་གྱུར་ནས། །དགེ་ལ་འབད་པར་མ་བྱས་ན། །དེ་ལས་བསླུས་པ་གཞན་མེད་ཅིང་། །དེ་ལས་རྨོངས་པ་གཞན་མེད་གསུང་། །ཕལ་མོ་ཆེ་ཡི་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོ་སྐྱེ་བོ་རྣམས། །ཕལ་ཆེར་ངེས་པར་ངན་འགྲོ་རུ། །འགྲོ་བར་གསུངས་ཕྱིར་ཅི་ནུས་ཀྱིས། །སྡིག་པ་སྤོང་ལ་དགེ་བ་སྒྲུབས། །དེ་ལ་ཐོག་མར་མི་རྟག་ཚུལ། །བསམ་པ་ཤིན་ཏུ་གལ་ཆེའི་ཕྱིར། །དེ་ཡང་ངེས་པར་འཆི་བ་སྟེ། །ནམ་འཆི་ཆ་ནི་མེད་པ་དང་། །ཤི་བའི་ཚེ་ན་ཆོས་མ་གཏོགས། །གཞན་གྱིས་ཕན་པར་མི་ནུས་བསམ། །ལས་ཉོན་དབང་གིས་བླངས་པ་ཡི། །ལུས་ནི་ཇི་འདྲ་ཡིན་ཕྱིན་ཆད། །ངེས་པར་འཆི་བ་ཆོས་ཉིད་དེ། །ཡུལ་དང་ས་ཕྱོགས་གང་གནས་ཀྱང་། །འཆི་བས་མི་ཚུགས་ཡོད་མ་ཡིན། །དཔེར་ན་བྱིས་པས་ནམ་མཁའ་ལ། །འཕངས་པའི་རྡོ་ནི་ལྟུང་བ་བཞིན། །ཡང་ན་ཉི་རྒས་གྲིབ་མ་བཞིན། །འཆི་བདག་བདུད་ནི་ཚུར་ཚུར་འོང་། །དེ་ཡང་དུས་ལ་བབ་པ་ན། །སྨན་སོགས་ཀུན་གྱིས་བཟློག་མི་ནུས། །དེ་ཕྱིར་ངེས་པར་འཆི་བ་ཉིད། །མི་རྟག་ཚོམས་ལས་འདི་སྐད་གསུང་། །དེ་ལ་མི་འདི་གཞོན་ཞེས་པའི། །གསོན་པའི་གདེངས་དྲོད་ཅི་ཞིག་ཡོད། ཁ་ཅིག་མངལ་དུ་འཆི་བར་འགྱུར། །དེ་བཞིན་ཁ་ཅིག་བཙས་པའི་སར། །དེ་བཞིན་ཁ་ཅིག་གོག་ཙམ་ན། །དེ་བཞིན་ཁ་ཅིག་ཡོངས་རྒྱུགས་ན། །ལ་ལ་རྒན་དང་ལ་ལ་གཞོན། །ལ་ལ་དར་ལ་བབ་པའི་མི། །རིམ་གྱིས་འཆི་བར་གསུངས་པའི་ཕྱིར། །ནམ་འཆི་ལ་ནི་ཆ་མ་མཆིས། །མ་འོངས་དུས་ཚེ་གླིང་བཞི་ནི། །རི་རབ་བཅས་པའི་སྟོང་གསུམ་གྱི། །འཇིག་རྟེན་འདི་ཡང་ཆུ་ཡིས་གཤིག །མེ་ཡིས་འཚིག་གམ་རླུང་གིས་གཏོར། །རྡུལ་ཕྲན་ཙམ་ཡང་མེད་འགྱུར་ན། །འདུས་བྱས་གཞན་དག་ལྟ་ཅི་སྨོས། །འདུས་པ་ཀུན་གྱི་མཐར་འབྲལ་ཞིང་། །བསགས་པ་ཀུན་གྱི་མཐའ་ཡང་འཛད། །མཐོན་པོའི་མཐའ་ནི་རྒུད་འགྱུར་ལ། །སྐྱེས་པ་ཀུན་གྱི་མཐའ་མར་འཆི། །མདོར་ན་རྒྱུ་རྐྱེན་ལས་བྱུང་བའི། །འདུས་བྱས་ཀུན་ཀྱང་མི་རྟག་གོ །ཤི་ནས་རྒྱུན་ཆད་འགྱུར་མིན་ཏེ། །རང་རང་ཇི་ལྟར་བསགས་པ་ཡི། །དཀར་ནག་ལས་ཀྱིས་འཕངས་པ་ལྟར། །བདེ་འགྲོ་ངན་འགྲོ་གང་རུང་དུ། །ངེས་པར་སྐྱེ་བ་ལེན་ཕྱིར་རོ། །དེ་ཡང་དགེ་བའི་ལས་ཀྱིས་ནི། །མཐོ་རིས་སྐྱེ་ཞིང་བདེར་འགྱུར་ལ། །མི་དགེའི་ལས་ཀྱིས་ངན་འགྲོ་རུ། །སྐྱེ་འགྱུར་སྡུག་བསྔལ་ཆོས་ཉིད་དོ། །དཔེར་ན་གྲོ་ཡི་ས་བོན་ལས། །འབྲས་བུ་གྲོ་ཉིད་སྐྱེ་འགྱུར་གྱི། །ནས་ལ་སོགས་པར་མི་འགྱུར་བཞིན། །གཞན་ཡང་འཇིག་རྟེན་ཁམས་འདི་ན། །ལོ་ཏོག་རྣམས་དང་རྩི་ཤིང་སོགས། །ཁྱད་པར་ཇི་སྙེད་ཡོད་པ་ཀུན། །གེགས་བྱེད་མེད་ན་རང་རང་གི །འབྲས་བུ་སོ་སོར་མ་ནོར་བར། །འབྱིན་པ་ཀུན་གྱིས་མཐོང་བ་བཞིན། །གལ་ཏེ་མི་དགེའི་ལས་ཀྱིས་ནི། །ངན་སོང་གནས་སུ་སྐྱེས་གྱུར་ན། །མི་བཟད་སྡུག་བསྔལ་འདི་ལྟར་ཡོད། །དམྱལ་བ་ཚ་གྲང་སྡུག་བསྔལ་ཆེ། །ཡི་དྭགས་བཀྲེས་ཤིང་སྐོམ་པས་གཟིར། །དུད་འགྲོ་གཅིག་ལ་གཅིག་ཟ་དང་། །རྨོངས་པའི་སྡུག་བསྔལ་དུ་མས་མནར། །དམྱལ་བའི་གནས་ནི་འཛམ་གླིང་འདིའི། །འོག་ཏུ་དཔག་ཚད་སུམ་ཁྲི་དང་། །ཉིས་སྟོང་གིས་ནི་ཆོད་པ་ན། །ཡང་སོས་དམྱལ་བ་ཡོད་པ་སྟེ། །དེ་ནས་བཞི་སྟོང་བཞི་སྟོང་གི །དཔག་ཚད་ཀྱིས་ནི་ཆོད་པ་ན། །ཚ་དམྱལ་གཞན་དག་བདུན་པོ་ཡོད། །དམྱལ་བ་དང་པོ་ཡང་སོས་ཀྱི། །སྡུག་བསྔལ་ཁྱད་པར་འདི་ལྟ་སྟེ། །སེམས་ཅན་དེ་དག་ཚོགས་པའི་ཚེ། །ལས་ཀྱི་དབང་གིས་ཕན་ཚུན་ཀུན། །གཅིག་ལ་ཡང་ནི་གཅིག་གིས་ཀྱང་། །མཚོན་ཆ་སྣ་ཚོགས་སྣུན་པར་བྱེད། །དེ་ཡི་རྐྱེན་གྱིས་ཤི་བ་ན། །ནམ་མཁའ་ལས་ནི་ཁྱེད་ཅག་ཀུན། །སོས་པར་གྱུར་ཅིག་ཅེས་པའི་སྒྲ། །བྱུང་ཚེ་སླར་ཡང་ལངས་ནས་ནི། །སྔར་བཞིན་ཕན་ཚུན་མཚོན་རྡེག་པས། ཁོར་ཡུག་སྡུག་བསྔལ་དཔག་མེད་མྱོང་། །གཉིས་པ་དམྱལ་བ་ཐིག་ནག་ནི། །དམྱལ་བའི་སྲུང་མས་སེམས་ཅན་དེ། །བཟུང་ནས་ལུས་ལ་ཐིག་བཏབ་སྟེ། །སོག་ལེ་ལ་སོགས་མཚོན་རྣོན་པོས། །བཏབ་པ་ཇི་བཞིན་གཤེག་པར་བྱེད། །གསུམ་པ་དམྱལ་བ་བསྡུས་འཇོམས་ནི། །སེམས་ཅན་དེ་རྣམས་ལྷན་ཅིག་ཏུ། །འདུས་ཚེ་དམྱལ་བའི་སྲུང་མ་ཡིས། །ལྕགས་ཀྱི་རི་ཡི་བར་དག་ཏུ། །བཙིར་ནས་རྡུལ་བཞིན་རློག་བྱེད་ཅིང་། །དབང་བོའི་སྒོ་ལ་སོགས་པ་ནས། །ཁྲག་རྒྱུན་དམར་ཆལ་འབབ་པར་འགྱུར། །བཞི་པ་དམྱལ་བ་ངུ་འབོད་ནི། །སེམས་ཅན་དེ་དག་ལྕགས་ཁང་ནང་། །བཅུག་སྟེ་མེ་འབར་འཚིག་པར་བྱེད། །ལྔ་པ་ངུ་འབོད་ཆེན་པོ་ནི། །ལྕགས་ཁང་ཉིས་རིམ་ནང་བཅུག་ནས། །མེས་སྲེག་ངུ་འབོད་ཆེན་པོ་བྱེད། །དྲུག་པ་ཚ་བའི་དམྱལ་བ་ནི། །དམྱལ་བའི་སྲུང་མས་སེམས་ཅན་དེ། །བཟུང་ནས་ལྕགས་ཟངས་འབར་བའི་ནང་། །ཉ་ནི་གསོན་པོར་སྲེག་བཞིན་བྱེད། །ལྕགས་ཀྱི་གསལ་ཤིང་འབར་བ་ཡིས། །འཕོངས་ནས་ཕུག་སྟེ་སྤྱི་བོར་འབྱིན། །དེ་ཚེ་ཁ་མིག་རྣ་བ་དང་། །སྣ་བུག་བ་སྤུའི་བུ་ག་ནས། །མེ་ལྕེ་འབར་བས་སྲེག་པས་འཚིག །ལྕགས་ཀྱི་ས་གཞི་འབར་བ་ལ། །གན་རྐྱལ་བཞག་ནས་མེ་འབར་བའི། །ལྕགས་ཀྱི་ཐོ་བས་རྡུང་ཞིང་དམྱལ། །བདུན་པ་རབ་ཏུ་ཚ་བ་ནི། །ལྕགས་ཀྱི་གསལ་ཤིང་རྩེ་གསུམ་པས། །འཕོངས་སུ་བཅུག་སྟེ་རྩེ་མོ་གསུམ། །སྤྱི་བོ་ཕྲག་པ་གཡས་གཡོན་འབྱིན། །དེ་ཚེ་ཁ་སོགས་དབང་བོའི་སྒོར། །མེ་ལྕེ་ཀུན་ནས་འབར་བས་སྲེག །ལྕགས་གླེགས་ཚ་ཞིང་འབར་བ་ཡིས། །ལུས་དཀྲིས་ལྕགས་ཟངས་འབར་བའི་ནང་། །སྲན་མ་བཞིན་དུ་བཙོས་པ་ན། །པགས་པ་ཤ་ཁྲག་ཀུན་ཞིག་སྟེ། །ཀེང་རུས་འབའ་ཞིག་ལུས་པའི་ཚེ། །ཕྱུང་སྟེ་ལྕགས་ཀྱི་ས་གཞིར་འགྲེམ། །སླར་ཡང་པགས་པ་སྐྱེས་པ་ན། །སྔར་བཞིན་ནང་བཅུག་ཁོར་ཡུག་ཏུ། །སྡུག་བསྔལ་དཔག་མེད་ཉམས་སུ་མྱོང་། །བརྒྱད་པ་མནར་མེད་དམྱལ་བ་ནི། །ཕྱོགས་བཞིའི་ལྕགས་ཀྱི་ས་གཞི་ནི། །ཤིན་ཏུ་འབར་ལས་མེ་ཡི་ཤུགས། །འོངས་ནས་སེམས་ཅན་དེ་དག་གི །པགས་པ་ཤ་རུས་རྒྱུ་མ་རྣམས། །རིམ་གྱིས་ཚིག་ནས་རྐང་ལ་ཐུག །དེ་ཚེ་མར་མེའི་སྡོང་བུ་བཞིན། །ལུས་ཀུན་མེ་ལྕེ་འབར་བས་ཁྱབ། །ལྕགས་ཀྱི་ཞིབ་མའི་ནང་དུ་ནི། །མེ་མདོག་འབར་བར་འཁྲབ་ཏུ་འཇུག །ལྕགས་ཀྱི་རི་ལ་འབབ་འཛེག་བྱེད། ཁ་ནས་ལྕེ་ཕྱུང་ཕུར་བུ་བརྒྱས། །རྒྱང་ཞིང་འཐེན་ནས་རྨོ་བར་བྱེད། །ལྕགས་ཀྱི་ཐུ་ལུམ་དམར་འབར་བ། ཁ་ཡི་ནང་དུ་འཇུག་པ་དང་། །ཚ་བའི་ཟངས་བསྐོལ་སྡུད་པར་བྱེད། །དེ་ཚེ་ཁ་དང་མགྲིན་པ་དང་། །རྒྱུ་མ་རྣམས་འཚིག་སྨད་ནས་འབྱུང་། །དེ་སོགས་སྡུག་བསྔལ་དཔག་ཏུ་མེད། །དེ་རྣམས་ཀྱི་ནི་ཚེ་ཡི་ཚད། །སྤྱིར་ན་མི་དགེའི་ལས་གང་ཡིན། །མ་ཟད་བར་དུ་མྱོང་བ་སྟེ། །བྱེ་བྲག་ཕྱེ་ན་འདི་ལྟར་རོ། །མི་ལོ་ལྔ་བཅུ་བསྡོམས་པ་ལ། །རྒྱལ་ཆེན་རིགས་བཞིའི་ཞག་གཅིག་སྟེ། །དེ་སུམ་ཅུ་ལ་ཟླ་བ་དང་། །དེ་བཅུ་གཉིས་ལ་ལོར་བྱས་པའི། །ལོ་ནི་ལྔ་བརྒྱ་རྒྱལ་ཆེན་བཞིའི། །ལྷ་ཡི་ཚེ་ཚད་ཡིན་པ་སྟེ། །དེ་རྣམས་གཅིག་ཏུ་བསྡོམས་བྱས་པ། །ཡང་སོས་དམྱལ་བའི་ཉིན་ཞག་གཅིག །དེ་སུམ་ཅུ་ལ་ཟླ་བ་དང་། །བཅུ་གཉིས་ལོར་བྱས་ལྔ་བརྒྱ་ནི། །ཡང་སོས་དམྱལ་བའི་ཚེ་ཚད་དེ། །མི་ཡི་ལོ་ལྟར་བརྩིས་པའི་ཚེ། །དུང་ཕྱུར་སྟོང་ལས་ཆེས་ལྷག་པའི། །མི་ལོ་ཁྲག་ཁྲིག་ཆེན་པོ་གཅིག །ཁྲག་ཁྲིག་དྲུག་དང་ཐེར་འབུམ་ནི། །ཆེན་པོ་གཉིས་སུ་འགྱུར་བ་ཡིན། །འོན་ཀྱང་ཚ་དམྱལ་གཞན་ཀུན་ལས། །འདི་ཉིད་ཚེ་ལོ་ཐུང་བ་སྟེ། །དེ་ཡང་མི་ལོ་བརྒྱ་དང་ནི། །ཉིས་བརྒྱ་བཞི་བརྒྱ་བརྒྱད་བརྒྱ་དང་། །སྟོང་དང་དྲུག་བརྒྱ་རྣམས་རིམ་བཞིན། །སུམ་ཅུ་རྩ་གསུམ་འཐབ་བྲལ་དང་། །དགའ་ལྡན་འཕྲུལ་དགའ་གཞན་འཕྲུལ་དབང་། །སོ་སོའི་ཞག་རེ་ཡིན་པ་སྟེ། །རིམ་བཞིན་རང་གི་ལོ་སྟོང་དང་། །ཉིས་སྟོང་བཞི་སྟོང་བརྒྱད་སྟོང་དང་། །ཁྲི་དང་དྲུག་སྟོང་ཐུབ་འགྱུར་ཞིང་། །སུམ་ཅུ་རྩ་གསུམ་ལྷ་ཡི་ལོ། །སྟོང་ཕྲག་གཅིག་ཏུ་བསྡོམས་བྱས་པ། །ཐིག་ནག་དམྱལ་བའི་ཞག་གཅིག་ཡིན། །རང་ལོ་སྟོང་ཕྲག་གཅིག་ཐུབ་སྟེ། །དེ་ལ་མི་ལོ་རབ་བཀྲམ་གཅིག །ཁྲག་ཁྲིག་ཆེན་པོ་རྣམ་གཉིས་དང་། །ཁྲག་ཁྲིག་དགུ་དང་ཐེར་འབུམ་ནི། །ཆེན་པོ་དྲུག་ཏུ་འགྱུར་བ་ཡིན། །འཐབ་བྲལ་ལྷ་ཡི་ལོ་ཉིས་སྟོང་། །གཅིག་བསྡོམས་བསྡུས་འཇོམས་ཉིན་ཞག་གཅིག །རང་ལོ་ཉིས་སྟོང་ཐུབ་པོ་དེར། །མི་ལོ་རབ་བཀྲམ་ཆེན་པོ་གཅིག །ཁྲག་ཁྲིག་ཆེན་པོ་གསུམ་དང་ནི། །ཁྲག་ཁྲིག་དྲུག་དང་ཐེར་ཆེན་བརྒྱད། །དགའ་ལྡན་ལྷ་ཡི་ལོ་བཞི་སྟོང་། །གཅིག་བསྡོམས་ངུ་འབོད་ཉིན་ཞག་གཅིག །རང་ལོ་བཞི་སྟོང་ཐུབ་པོ་དེར། །མི་ལོ་རབ་བཀྲམ་ཆེན་པོ་བརྒྱད། །རབ་བཀྲམ་གཉིས་དང་ཁྲག་ཆེན་དགུ། །ཁྲག་ཁྲིག་བཞི་དང་ཐེར་ཆེན་བཞི། །འཕྲུལ་དགའི་ལྷ་ཡི་ལོ་བརྒྱད་སྟོང་། །གཅིག་བསྡུས་ངུ་འབོད་ཆེན་པོ་ཡི། །ཞག་གཅིག་རང་ལོ་བརྒྱད་སྟོང་ལ། །མི་ལོ་གཏམས་དྲུག་བཀྲམ་ཆེན་དྲུག །རབ་བཀྲམ་གསུམ་དང་ཁྲག་ཆེན་ལྔ། །ཁྲག་ཁྲིག་ལྔ་དང་ཐེར་ཆེན་གཉིས། །གཞན་འཕྲུལ་དབང་བྱེད་ལྷ་ཡི་ལོ། ཁྲི་དང་དྲུག་སྟོང་ཀུན་བསྡོམས་པ། །ཚ་བ་ཡི་ནི་ཞག་གཅིག་སྟེ། །རང་ལོ་ཁྲི་དང་དྲུག་སྟོང་སྟེ། །མེ་ལོའི་གྲངས་ནི་གཏམས་ཆེན་ལྔ། །གཏམས་གསུམ་རབ་བཀྲམ་བརྒྱད་དང་ནི། །ཁྲག་ཁྲིག་ཆེ་བཞི་ཁྲག་ཁྲིག་གཅིག །ཐེར་འབུམ་ཆེན་པོ་དྲུག་ཏུ་འགྱུར། །མདོར་ན་དེ་དག་ཀུན་གྱི་ཚེ། །སྔ་མ་སྔ་མ་རྣམས་ལས་ནི། །ཕྱི་མ་ཕྱི་མ་བརྒྱད་འགྱུར་རིང་། །རབ་ཏུ་ཚ་བ་བར་བསྐལ་ཕྱེད། །མནར་མེད་དམྱལ་བའི་ཚེ་ཚད་ནི། །བར་གྱི་བསྐལ་པ་གཅིག་ཐུབ་བོ། །དམྱལ་བ་བརྒྱད་པོ་རེ་རེ་ཡི། །ཕྱོགས་བཞིར་མེ་མ་མུར་གྱི་འོབས། །རོ་མྱགས་འདམ་དང་སྤུ་གྲིའི་ལམ། །ཆུ་བོ་རབ་མེད་རྣམ་པ་བཞི། །སྤུ་གྲིའི་ལམ་དང་ཉེ་བ་ན། །ཤ་མ་ལི་ཡི་ནགས་ཚལ་ཡོད། །དེ་དག་རེ་རེ་ན་ཡང་ནི། །སྡུག་བསྔལ་ཁྱད་པར་དཔག་མེད་མྱོང་། །ཚ་དམྱལ་བརྒྱད་ཀྱི་ཐད་སོ་ཡི། །དཔག་ཚད་ཁྲི་ཡི་ཕ་རོལ་ན། །གངས་རིའི་ཁོར་ཡུག་རླུང་འཚུབ་པའི། །གྲང་བའི་དམྱལ་བ་བརྒྱད་ཡོད་ལ། །དང་པོ་གྲང་དམྱལ་ཆུ་བུར་ཅན། །གྲང་བས་ལུས་ལ་ཆུ་བུར་བྱུང་། །གཉིས་པ་ཆུ་བུར་རྡོལ་བ་ནི། །ཤིན་ཏུ་གྲང་ནས་ཆུ་བུར་རྡོལ། །གསུམ་པ་གྲང་ནས་སོ་ཐམ་ཐམ། །བཞི་བ་གྲང་ནས་ཀྱི་ཧུད་ཟེར། །ལྔ་བས་ཨ་ཆུ་ཆུ་ཞེས་ཟེར། །དྲུག་པ་ཤིན་ཏུ་གྲང་བའི་སྟོབས། །ལུས་ནི་ཨུཏྤ་ལ་ལྟར་གས། །བདུན་པ་དེ་ལས་ཆེས་གྲང་ནས། །ལུས་ནི་པདྨ་ལྟ་བུར་གས། །བརྒྱད་པ་ཆེས་གྲང་ལུས་ཀྱི་མདོག །རབ་དམར་ཚལ་པ་བརྒྱར་གས་ཏེ། །པདྨ་ཆེན་པོ་ལྟ་བུར་གྱུར། །དང་པོའི་ཚེ་ཚད་མི་ལོའི་གྲངས། ཁྲག་ཁྲིག་བརྒྱད་དང་ཐེར་ཆེན་གཅིག །ལྷག་མ་བདུན་གྱི་ཚེ་ཚད་ནི། །ཉི་ཤུ་ཉི་ཤུས་འཕར་ཞིང་རིང་། །དམྱལ་བའི་སྡུག་བསྔལ་ཆེ་ཁྱད་ནི། །དཔེར་ན་མདུང་ཐུང་སུམ་བརྒྱ་ཡིས། །སུ་ལ་དུས་གཅིག་དྲག་བཏབ་སྟེ། །སྡུག་བསྔལ་བྱུང་བ་དེ་ཡིས་ནི། །དམྱལ་བའི་སྡུག་བསྔལ་ཆུང་ངུར་ཡང་། །འགྲན་པར་ནུས་པ་མིན་ནོ་གསུང་། །ཡི་དྭགས་གནས་སུ་སྐྱེས་པ་ཡང་། །ཟས་སྐོམ་མི་རྙེད་བཀྲེས་ཤིང་སྐོམ། །ཤ་པགས་སྡོང་དུམ་མེས་འཚིག་བཞིན། །ཆུ་ཀླུང་མཐོང་སྟེ་བརྒྱུགས་པ་ན། །དེ་ཚེ་རལ་གྲི་མདུང་ཐོགས་པའི། །སྐྱེས་བུས་འཐུང་དུ་མི་སྟེར་ཞིང་། །ཆུ་ཀླུང་རྣག་དང་ཁྲག་ཏུ་འགྱུར། །ཡི་དྭགས་རྣམ་པ་སྣ་ཚོགས་ལས། ཁ་ཅིག་གསུས་པ་ཡུལ་ལྗོངས་བཞིན། ཁ་ནི་ཁབ་ཀྱི་མིག་ཙམ་ཞིག །ཟས་སྐོམ་མི་རྙེད་རྙེད་གྱུར་ཀྱང་། ཁར་མི་ཤོངས་ཤིང་ཤོངས་ན་ཡང་། །གསུས་པ་ཁེངས་པར་མི་འགྱུར་རོ། །ཡང་ན་ལྟོ་བ་རྒྱུ་སོགས་འཚིག །ལ་ལ་མི་གཙང་ལྗན་ལྗིན་ཟ། ཁ་ཅིག་རང་ཤ་བཅད་ནས་ཟ། །ལ་ལ་མེ་བདག་ཟོས་ནས་འཚིག །དེ་དག་རྣམས་ཀྱི་ཚེ་ཡི་ཚད། །མི་ཡི་ཟླ་བ་གཅིག་ལ་ནི། །ཡི་དྭགས་ཀྱི་ནི་ཞག་གཅིག་སྟེ། །དེ་ལྟར་བརྩིས་པས་རང་གི་ལོ། །ལྔ་བརྒྱ་ཐུབ་པར་འགྱུར་བ་ཡིན། །དེ་དག་རྣམས་སུ་སྐྱེ་བའི་རྒྱུ། །མི་དགེ་སྤྱི་དང་ཁྱད་པར་དུ། །སྦྱིན་པ་ལ་སོགས་དགེ་ཕྱོགས་སུ། །སེར་སྣ་བྱས་ལས་འགྱུར་བ་ཡིན། །དུད་འགྲོར་སྐྱེས་ཚེ་གཅིག་གིས་གཅིག ། གསོད་དང་ཟ་བའི་སྡུག་བསྔལ་དང་། །རྨོངས་ཤིང་ལེགས་ཉེས་འབྱེད་མི་ཤེས། །ལྷ་དང་མི་ཡི་དབང་འགྱུར་བ། ཁུར་བསྐུར་བཅིངས་དང་རྡེག་སོགས་ཀྱིས། །སྡུག་བསྔལ་རྣམ་པ་སྣ་ཚོགས་མྱོང་། །ཚེ་ཚད་རིང་བ་བསྐལ་བ་དང་། །ཐུང་བ་ཉིན་ཞག་གཅིག་ཀྱང་སྲིད། །དེ་ཕྱིར་ངན་སོང་གསུམ་དག་ན། །དུས་མིན་འཆི་བ་ཡོད་པ སྟེ། །ལས་སྟོབས་ཆེ་ཆུང་ཁྱད་པར་གྱིས། །ལ་ལ་སྐྱེས་ཙམ་ཉིད་ནས་ཐར། །འགའ་ཞིག་བར་སྐབས་ནས་ཀྱང་ཐར། །གཞན་དག་ཚེ་ནི་རྫོགས་ཀྱི་བར། །གལ་ཏེ་མི་དགེའི་ལས་དེ་ཉིད། །ཟད་ན་བདེ་འགྲོར་སྐྱེ་འགྱུར་ཡང་། །མ་ཟད་དམྱལ་བ་ནས་འཕོས་ཏེ། །ཡི་དྭགས་གནས་སུ་སྐྱེ་བའམ། །ཡང་ན་དུད་འགྲོར་སྐྱེ་འགྱུར་ལ། །ཡི་དྭགས་ནས་ནི་དམྱལ་བ་དང་། །དུད་འགྲོར་སྐྱེ་བར་འགྱུར་བའམ། །དུད་འགྲོ་ནས་ནི་དམྱལ་བ་དང་། །ཡི་དྭགས་གནས་སུ་སྐྱེ་བའང་ཡོད། །འགྲོ་དྲུག་གནས་ནས་ངན་འགྲོ་རུ། །སྐྱེ་བ་ས་ཡི་རྡུལ་འདྲ་སྟེ། །དེ་ནས་བདེ་འགྲོར་སྐྱེ་བ་ནི། །ཐུབ་པའི་ཕྱག་སེན་རྩེ་མོ་ཡིས། །བཞེས་པའི་རྡུལ་བཞིན་ཤིན་ཏུ་ཉུང་། །མི་དགེ་ཁོ་ནས་ངན་སོང་དང་། །དགེ་བ་ཁོ་ནས་བདེ་འགྲོ་རུ། །སྐྱེ་བར་ངེས་མོད་དགེ་སྡིག་གཉིས། །འདྲེས་མར་སྤྱད་པས་འབྲས་བུ་ཡང་། །བདེ་སྡུག་འདྲེས་མར་མྱོང་བར་འགྱུར། །དཔེར་ན་ཁ་ཅིག་ཚེ་སྟོད་བདེ། །ཚེ་སྨད་སྡུག་བསྔལ་མྱོང་བ་དང་། །ལ་ལ་ཚེ་སྟོད་སྡུག་པ་ལས། །ཚེ་སྨད་བདེ་བར་འགྱུར་བ་བཞིན། །ལ་ལ་སྔོན་ལས་གཙོ་ཆེ་བར། །གནས་སྐབས་རྐྱེན་གྱིས་བསྒྱུར་བའང་སྲིད། །ཚེ་འདིར་དགེ་ལ་མི་སྤྱོད་པའི། །སྐྱེས་བུ་ཁ་ཅིག་ལོངས་སྤྱོད་སོགས། །བདེ་བར་ལྡན་པར་སྣང་དེ་ནི། །སྔོན་ལས་རྒྱུ་བྱས་འཕྲལ་རྐྱེན་ལ། །བརྟེན་ནས་བྱུང་མེད་ལས་འབྲས་ཀྱི། ཁྱད་པར་མི་ཤེས་སྐྱེས་བུ་འགས། །རང་སྟོབས་ཁོ་ནས་བྱས་སྙམ་ཡང་། །དེ་ལྟར་ཡིན་ན་ཁྱོད་ཉིད་ཀྱིས། །གྲོ་ནས་སྲན་མ་ལ་སོགས་པའི། །ས་བོན་བཏབ་པ་གང་ཡིན་ལས། །འབྲས་བུ་སོ་སོར་མ་ནོར་བར། །བསྐྱེད་ཅིང་དེ་ཡི་ཁ་དོག་དང་། །རིང་ཐུང་ལ་སོགས་དབྱིབས་རྣམས་ཀྱི། ཁྱད་པར་ཇི་སྙེད་ཡོད་གྱུར་གང་། །དེ་དག་ཁྱོད་ཀྱིས་བྱས་སམ་ཅི། །བྱས་ན་ཁྱོད་ནི་ངོ་མཚར་ཆེ། །ཡང་ན་ཁྱོད་རང་ཇི་ལྟར་འཇོག །ཁྱོད་ཀྱི་མགོ་དང་རྐང་ལག་དང་། །མིག་རྣ་ལ་སོགས་ཁྱོད་ཡིན་ནམ། །ཡང་ན་རྣམ་པར་ཤེས་པ་ཁྱོད། །དེ་ལས་གཞན་པ་གང་ཞིག་ཡིན། །ཡིན་ན་ཁྱོད་ཀྱིས་བརྗོད་པར་གྱིས། །མགོ་ལ་སོགས་པ་ཁྱོད་ཡིན་ན། །སྔོན་མེད་མ་མཐོང་ཡ་མཚན་ཆེ། །དེ་ལྟ་ན་ནི་ཁྱོད་ཉིད་གཟུགས། །གཟུགས་ཡིན་གྱུར་པའི་གང་ཟག་སུ། །མིག་སོགས་ཡིན་ནའང་དེ་བཞིན་འགྱུར། །རྣམ་པར་ཤེས་པ་ཁྱོད་ཡིན་ན། །རྣམ་ཤེས་གཟུགས་ཅན་ཁྱོད་མཐོང་ངམ། །གལ་ཏེ་དེ་དག་ལས་གཞན་ན། །ཁྱོད་ཀྱི་ལུས་དང་ཡན་ལག་ལས། །དོན་གཞན་ཡན་གར་ཡོད་ན་དེ། །ཁྱོད་ཀྱིས་དེ་ལྟ་སྟོན་པར་རིགས། །གལ་ཏེ་རང་ཉིད་ཚུལ་བཞིན་དུ། །འཇོག་མི་ཤེས་སོ་ཟེར་ན་ནི། །རང་ཉིད་འཇོག་ཀྱང་མི་ཤེས་པ། །ཁྱོད་ཀྱིས་ལས་འབྲས་ཕྲ་བ་ཡི། །འཇོག་ཚུལ་ཇི་ལྟར་ཤེས་པར་ནུས། །དེ་ཕྱིར་འཇིག་རྟེན་མཐོང་བ་ཡི། །སྣང་ཚུལ་འདི་ཙམ་རྗེས་འབྲང་ནས། །ཤིན་ཏུ་ཕྲ་བའི་ལས་འབྲས་ལ། །ལོག་པར་ལྟ་བར་མ་བྱེད་ཅིག །ཅི་ཕྱིར་ཞེ་ན་སངས་རྒྱས་དང་། །རྒྱལ་སྲས་རིགས་པའི་དབང་ཕྱུག་གིས། །ལས་འབྲས་ངེས་པ་བསྐྱེད་པའི་ཕྱིར། །རིགས་པའི་རྣམ་གྲངས་བྱེ་བ་བརྒྱས། །ལེགས་པར་གཏན་ལ་ཕབ་པའི་ཚུལ། །ཕྲ་ཞིང་རྟོགས་པར་དཀའ་བ་ཉིད། །མཁས་པ་ཡིས་ཀྱང་ངེས་དཀའ་ན། །རྨོངས་པ་ཁྱོད་ལྟས་ཇི་ལྟར་ཤེས། །དེ་ཕྱིར་ལས་དང་འབྲས་བུའི་ཚུལ། །བསམ་གྱིས་མི་ཁྱབ་ཉིད་དོ་ཞེས། །གུས་པར་བྱས་ན་ངན་འགྲོ་ལས། །གྲོལ་འགྱུར་འདི་ལ་ཐེ་ཚོམ་མེད། །ཅི་ཕྱིར་ཞེ་ན་སངས་རྒྱས་ཀྱིས། །འཇིག་རྟེན་པ་ཡི་ཡང་དག་ལྟ། །མི་གང་སུ་ལ་ཡོད་གྱུར་པ། །དེ་ནི་བསྐལ་པ་སྟོང་རྣམས་སུ། །ངན་འགྲོར་འགྲོ་བར་མི་འགྱུར་གསུང་། །གཞན་དུ་ལོག་ལྟས་ངན་འགྲོར་འཕེན། །གཞན་ཡང་ངན་འགྲོ་ལས་ཐར་ཏེ། །བདེ་འགྲོར་སྐྱེ་བར་འདོད་གྱུར་ན། །སྐྱབས་གནས་དཀོན་མཆོག་གསུམ་པོ་ལ། །ཚིག་ཙམ་བརྗོད་པ་མ་ཡིན་པར། །འཇིགས་པ་དག་ལས་སྐྱོབ་པའི་ཆེད། །རེ་བལྟོས་སྙིང་ནས་འཆའ་བ་ཡི། །སྐྱབས་སུ་འགྲོ་བའི་སྐྱབས་འགྲོ་དགོས། །དེ་ཡང་དཀར་ནག་ལས་འབྲས་ལ། །བླང་དོར་བྱེད་པར་རག་ལས་སོ། །དེ་ལ་ཐོག་མར་དད་པ་དགོས། །དད་པ་ཡིས་ནི་ངན་སོང་སྤོང་། །དད་པས་མཐོ་རིས་འཁྲིད་པར་བྱེད། །དད་པ་མེད་པའི་མི་དག་ལ། །དཀར་པོའི་ཆོས་རྣམས་མི་སྐྱེ་སྟེ། །ས་བོན་མེ་ཡིས་ཚིག་པ་ལས། །མྱུ་གུ་སྔོན་པོ་ཇི་བཞིན་ནོ། །སུ་ཞིག་དཀོན་མཆོག་གསུམ་པོ་ལ། །སྐྱབས་སུ་མ་སོང་གང་ཡིན་པ། །དེ་ནི་ནང་བ་མ་ཡིན་ཏེ། །ནང་པའི་ཁྱད་པར་དཀོན་མཆོག་ལ། །སྐྱབས་སུ་སོང་ནས་འཇོག་ཕྱིར་རོ། །དེ་ཡང་སྐྱབས་གནས་སངས་རྒྱས་ཉིད། །དོན་གཉིས་མཐའ་རུ་ཕྱིན་པ་སྟེ། །དབྱེ་ན་ཆོས་དང་གཟུགས་སྐུ་གཉིས། །ཆོས་ལ་གྲོལ་བྱེད་ལམ་བདེན་དང་། །གྲོལ་བ་འགོག་པའི་བདེན་པ་གཉིས། །དགེ་འདུན་སྐྱེ་འཕགས་རྣམ་གཉིས་ལས། །གཙོ་བོ་འཕགས་པའི་གང་ཟག་སྟེ། །འདིར་ནི་རྒྱས་པར་བརྗོད་མི་བྱེད། །མི་ཤེས་རྨོངས་པ་ཁ་ཅིག་ནི། །ཕྱོགས་བཅུའི་ནམ་མཁའི་ཁྱོན་གྱི་མཐའ། །ཇི་སྙེད་སངས་རྒྱས་ཞིང་རྣམས་ན། །སུས་ཀྱང་གྲངས་ཀྱིས་མི་ལང་བའི། །གྲངས་མེད་སངས་རྒྱས་བཅོམ་ལྡན་འདས། །མཆིས་ཤིང་དེ་ཡང་ལ་ལ་ནི། །ཤིན་ཏུ་དག་པའི་ཞིང་རྣམས་ན། །དགྱེས་དགུར་སྤྱོད་ཅིང་བཞུགས་པ་དང་། ཁ་ཅིག་གདུལ་བྱའི་དབང་གིས་ནི། །ཅི་ལྟར་རིགས་པའི་ཞིང་དག་ན། །བཞུགས་པའི་ཁྱད་པར་ལུང་དང་ནི། །རིགས་པ་ཡིས་ནི་མི་ཤེས་པར། །སངས་རྒྱས་སྤྲུལ་པའི་སྐྱེས་ཆེན་ནམ། །རྒྱལ་སྲས་འགྲོ་བའི་དོན་བྱེད་པའི། །དམ་པའི་སྐྱེས་བུ་ཀུན་མཁྱེན་དུ། །བཏགས་པ་འགའ་ཞིག་སངས་རྒྱས་སུ། །བཟུང་ནས་སངས་རྒྱས་ཀུན་ཀྱང་ནི། །འདི་འདྲའི་ངང་ཚུལ་ཡིན་ནམ་སེམས། །སངས་རྒྱས་ཉིད་ཀྱང་ཐ་མལ་པའི། །སྐྱེས་བུ་བཞིན་དུ་འཆི་སྙམ་སྟེ། །ལས་འབྲས་ལོག་པར་ལྟ་བྱེད་པའི། །ལྟ་ངན་རྒྱུད་ལ་གོམས་པར་བྱེད། །དེ་ལྟར་ལྟ་བའི་སྐྱེས་བུ་དེས། །ནམ་མཁའ་ཁམས་ཀྱི་རྒྱ་ཆོད་དམ། །ཤེས་བྱའི་མཐའ་ཡང་འཛིན་འདོད་ཕྱིར། །འདི་ལས་རྨོངས་པ་གཞན་སུ་ཞིག །སེམས་ཅན་ཁམས་དང་སངས་རྒྱས་ཀྱི། །མཐའ་ཚད་ཀུན་མཁྱེན་ཡེ་ཤེས་ཀྱིས། །མ་རྙེད་གང་དེ་འདི་འདྲའི་མིས། །ཤེས་པར་འདོད་ཕྱིར་ཨེ་མ་མཚར། །དེ་བས་གདུལ་བྱའི་བསམ་པ་དང་། །བསྟུན་པའི་ཚུལ་ལས་གཞན་དུ་ནི། །སངས་རྒྱས་རང་ཉིད་ཀྱིས་བརྙེས་པའི། །སྐུ་གསུང་ཐུགས་ཀྱི་གསང་བའི་གནས། །བསམ་གྱིས་མི་ཁྱབ་ཇི་སྙེད་ཚུལ། །རྒྱལ་སྲས་ཉན་རང་འཕགས་པ་དང་། །ལྷ་དང་མི་སོགས་འཇིག་རྟེན་གྱིས། །ཇི་བཞིན་ཤེས་པར་མི་ནུས་ན། །གཞན་པ་སུ་ཞིག་གིས་ནི་ཤེས། །དེས་ན་སངས་རྒྱས་རྣམས་ཀྱི་ནི། །གསང་བ་བསམ་གྱིས་མི་ཁྱབ་ཅེས། །ཡོངས་སུ་ཤེས་པ་གང་ཡིན་དེས། །སངས་རྒྱས་ཆོས་རྣམས་ཤེས་ནུས་ཤིང་། །ཀུན་མཁྱེན་ཉིད་ཀྱང་འཐོབ་བཤད་ན། །བདེ་འགྲོར་སྐྱེ་བ་ལྟ་ཅི་སྨོས། །སངས་རྒྱས་ལ་ནི་སྐྱབས་སོང་བས། །འཇིག་རྟེན་ལྷ་ལ་སྐྱབས་མི་འགྲོ། །ཆོས་ལ་སྐྱབས་སུ་སོང་བས་ནི། །སེམས་ཅན་གཞན་ལ་གནོད་འཚེ་སྤོང་། །དགེ་འདུན་ལ་ནི་སྐྱབས་སོང་ཚེ། །གྲོགས་ངན་མུ་སྟེགས་ཅན་མི་འགྲོགས། །དུས་ཀུན་ཕྱག་མཆོད་སྡིག་བཤགས་སོགས། །ཡན་ལག་བདུན་པའི་ཚུལ་ལ་འབད། །བདེ་འགྲོར་སྐྱེ་བའི་རྒྱུ་མང་ཡང་། །གཙོ་བོ་དགེ་བ་བཅུ་ཉིད་དེ། །བཟློག་ན་མི་དགེ་རྣམ་པ་བཅུ། །དེ་ཡང་སྲོག་གཅོད་མ་བྱིན་ལེན། །ལོག་གཡེམ་རྫུན་དུ་སྨྲ་བ་དང་། །ཕྲ་མ་ཚིག་རྩུབ་ངག་ཀྱལ་དང་། །བརྣབ་སེམས་གནོད་སེམས་ལོག་ལྟ་སྟེ། །ལུས་ཀྱི་གསུམ་དང་ངག་གི་བཞི། །ཡིད་ཀྱི་གསུམ་སྟེ་བཅུ་རྣམས་སོ། །དགེ་བ་ཆེ་འབྲིང་ཆུང་གསུམ་གྱིས། །རིམ་བཞིན་གོང་མའི་ལྷ་དག་དང་། །འདོད་ལྷ་མི་རུ་སྐྱེ་འགྱུར་ལ། །མི་དགེ་ཆེ་འབྲིང་ཆུང་གསུམ་རིམ། །དམྱལ་བ་ཡི་དྭགས་དུད་འགྲོར་སྐྱེ། །ལས་ཀྱི་འབྲས་བུ་ཚེ་འདི་འམ། །ཕྱི་མ་ཉིད་དུ་མྱོང་བ་དང། །ཕྱི་མའི་ཕྱི་མར་མྱོང་བ་གསུམ། །གཞན་ཡང་མྱོང་བར་ངེས་པ་དང་། །མྱོང་བར་མ་ངེས་ལས་རྣམ་གཉིས། །མ་བྱས་མ་བསགས་བྱས་ཤིང་བསགས། །བསགས་ལ་མ་བྱས་ལས་རྣམ་གསུམ། །འཕེན་བྱེད་དགེ་བས་འཕངས་པ་ལ། །རྫོགས་བྱེད་དགེ་བས་རྫོགས་པ་དང་། །མི་དགེས་རྫོགས་པ་གཉིས་ཡོད་དེ། །དཔེར་ན་བདེ་འགྲོར་སྐྱེས་པ་གང་། །དུས་ཀུན་དུ་ནི་བདེ་བ་དང་། །བདེར་འགྲོར་སྐྱེས་ཀྱང་དབུལ་བོ་བཞིན། །འཕེན་བྱེད་མི་དགེས་འཕངས་པ་ལ། །མི་དགེའི་ལས་ཀྱིིས་རྫོགས་པ་དང་། །དགེ་བས་རྫོགས་པ་རྣམ་གཉིས་ཏེ། །དཔེར་ན་ངན་འགྲོར་སྐྱེས་པ་གང་། །དུས་རྣམས་ཀུན་ཏུ་སྡུག་བསྔལ་དང་། །དུད་འགྲོར་སྐྱེས་ཀྱང་བདེ་བ་བཞིན། །དེ་ཡང་རིན་ཆེན་ཕྲེང་བ་ལས། །མི་དགེ་བ་ལས་སྡུག་བསྔལ་ཀུན། །དེ་བཞིན་ངན་འགྲོ་ཐམས་ཅད་དོ། །དགེ་ལས་བདེ་འགྲོ་ཐམས་ཅད་དང་། །སྐྱེ་བ་ཀུན་ཏུ་བདེ་བ་དག །ཞེས་པའི་ཚུལ་གྱིས་ལས་གཉིས་ལས། །འབྲས་བུ་སོ་སོར་མི་འཁྲུལ་པར། །འབྱུང་གི་གཞན་དུ་འགྱུར་བ་མེད། །ཅི་འདྲ་བ་ཡི་ལས་བྱས་པ། །འབྲས་བུ་དེ་འདྲ་འཐོབ་འགྱུར་བར། །གསུངས་ཕྱིར་ལས་འབྲས་ཕྲ་བ་ཀུན། །སངས་རྒྱས་ཀྱིས་མཁྱེན་གཞན་གྱིས་མིན། །ལུས་ཅན་ཀུན་གྱི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་སྨིན་པ་ཉིད་འགྱུར་བར། །གསུངས་ཕྱིར་མི་དགེའི་ལས་ཀྱིས་ནི། །བཤགས་པ་ལ་སོགས་རྐྱེན་མེད་ན། །འབྲས་བུ་སྡུག་བསྔལ་འབྱིན་འགྱུར་བས། །དེ་ཕྱིར་སྟོབས་བཞི་བསྟེན་པར་བྱ། །མི་དགེའི་ལས་ལ་འགྱོད་པའི་སེམས། །མང་དུ་བྱས་ཏེ་བཤགས་པ་ནི། །དང་པོ་རྣམ་པར་སུན་འབྱིན་སྟོབས། །མདོ་སྡེ་ཟབ་མོ་གཟུངས་སྔགས་འདོན། །རྟེན་བཞེངས་མཆོད་པ་འབུལ་བ་དང་། །སྟོང་པ་ཉིད་ལ་མོས་པ་དང་། །སངས་རྒྱས་བྱང་སེམས་རྣམས་ཀྱི་མཚན། །བརྗོད་སོགས་གཉེན་པོ་ཀུན་སྤྱོད་སྟོབས། །ཕྱིན་ཆད་སྡིག་པ་མི་བྱེད་པར། །དམ་བཅའ་བརྟན་པོ་བྱེད་པ་ནི། །ཉེས་པ་ལས་ནི་སླར་ལོག་སྟོབས། །སྐྱབས་འགྲོ་བྱང་ཆུབ་སེམས་སྒོམ་སོགས། །རྟེན་གྱི་སྟོབས་སུ་རྒྱལ་བས་བཤད། །འདི་བཞི་རྒྱུན་དུ་བསྟེན་བྱེད་ན། །ལས་ཀྱི་སྒྲིབ་པ་ཀུན་བྱང་སྟེ། །ངན་འགྲོ་ལས་གྲོལ་ཐེ་ཚོམ་མེད། །ལས་དང་ཉོན་མོངས་རྣམ་གཉིས་ལས། །དང་པོའི་ལས་ཅན་གང་ཟག་གིས། །ལས་སྒྲིབ་སྦྱོང་པ་གནད་ཆེ་བར། །བློ་བཟང་རྒྱལ་པ་གཉིས་པས་བཤད། །ཐར་བ་འདོད་པས་ཐོག་མར་འདི་ལྟར་བསམ། །བདེ་འགྲོ་ན་ཡང་བདེ་སྡུག་འདྲེས་མ་དང་། །ཚེ་ལའང་རིང་ཐུང་སྣ་ཚོགས་འདི་ལྟ་སྟེ། །སྒྲ་མི་སྙན་པ་ཚེ་སྟོང་ཐུབ་ངེས་ཤིང་། །ནུབ་ཏུ་ལྔ་བརྒྱ་ཤར་དུ་ཕྱེད་སུམ་བརྒྱ། །འཛམ་གླིང་འདི་ན་ད་ལྟ་བརྒྱད་ཅུ་མན། །སྔོན་ཚེ་དཔག་མེད་མ་འོངས་བཅུ་བར་འགྱུར། །རྒྱལ་ཆེན་རིགས་བཞིའི་ལྷ་ཡི་ཚེ་ཚད་ནི། །མི་ལོ་ས་ཡ་དགུའོ་ལྷག་མ་ནི། །བཞི་འགྱུར་གྱིས་རིང་སུམ་ཅུ་རྩ་གསུམ་ནི། །མི་ལོ་བྱེ་བ་གསུམ་དང་ས་ཡ་དྲུག །འཐབ་བྲལ་དུང་གཅིག་བྱེ་བཞི་ས་ཡ་བཞི། །དགའ་ལྡན་དུང་ལྔ་བྱེ་བདུན་ས་ཡ་དྲུག །འཕྲུལ་དགའ་ཐེར་འབུམ་གཉིས་དང་དུང་འཕྱུར་གསུམ། །ས་ཡ་བཞིར་འགྱུར་གཞན་འཕྲུལ་དབང་བྱེད་པ། །མི་ལོ་ཐེར་འབུམ་དགུ་དང་དུང་འཕྱུར་གཉིས། །བྱེ་བ་གཅིག་དང་ས་ཡ་དྲུག་ཐུབ་འགྱུར། །གཟུགས་ཁམས་ཚངས་རིས་ཚེ་ནི་བར་བསྐལ་ཕྱེད། །འདུན་ན་འདོན་དང་ཚངས་ཆེན་ཕྱེད་ཕྱེད་རིང་། །འོད་ཆུང་ནས་བཟུང་བསྐལ་བ་ཆེན་པོའོ། །གཟུགས་མེད་ནམ་མཁའ་མཐའ་ཡས་ལ་སོགས་བཞི། །རིམ་བཞིན་ཚེ་ཚད་བསྐལ་ཆེན་ཉི་ཁྲི་དང་། །བཞི་ཁྲི་དྲུག་ཁྲི་བརྒྱད་ཁྲི་ཐུབ་པར་བཤད། །འོན་ཀྱང་དེ་དག་དུས་མིན་འཆི་བ་ཡོད། ཁ་དོག་ལོངས་སྤྱོད་སོགས་ཀྱི་ཁྱད་པར་ནི། །སྒྲ་མི་སྙན་དང་གཟུགས་ཁམས་ལྷ་རྣམས་དཀར། །གླིང་གཞན་གསུམ་དང་འདོད་ལྷ་རིགས་དྲུག་ན། ཁ་དོག་སྣ་ཚོགས་ཉིད་དུ་གྱུར་བ་ཡོད། ཁ་ཟས་སྒྲ་མི་སྙན་ན་མ་འབད་པར། །མ་རྨོས་ལོ་ཏོག་དཔག་བསམ་ཤིང་སོགས་ལས། །བྱུང་བའི་ཟས་དང་གོས་ལ་ལོངས་སྤྱོད་ཅིང་། །གླིང་གཞན་གསུམ་ན་འབད་པས་བསྒྲུབས་ཏེ་སྤྱོད། །འདོད་ལྷ་དྲུག་ལ་རང་གིས་བསྒྲུབས་པ་དང་། །མ་བསྒྲུབས་དཔག་བསམ་ཤིང་ལས་བྱུང་བ་ཡི། །ཟས་དང་གོས་ཀྱི་ཁྱད་པར་རྣམས་ལ་སྤྱོད། །བསྒྲུབ་པའང་སྤྲུལ་པའི་ཟས་གོས་ལྟ་བུ་སྟེ། །ཞིང་གི་སོ་ནོམ་བྱས་ལས་བྱུང་བ་མིན། །ནོར་དང་འབྲུ་ནི་ལྷ་གནས་ཡོད་མ་ཡིན། །གཟུགས་ཁམས་གཙོ་བོར་ཏིང་འཛིན་ཟས་ལ་སྤྱོད། །ཚ་གྲང་སྡུག་བསྔལ་ལྷ་དང་བྱང་ན་མེད། །གཟུགས་ཁམས་ཡན་ན་དབྱར་སོགས་དུས་བཞི་དང་། །ཉིན་མཚན་ཕ་མ་བྲན་གྱི་ཁྱད་པར་མེད། །འདོད་ཁམས་ལྷ་རུ་རྫུས་ཏེ་སྐྱེ་བ་ནི། །ལྷ་མོའི་པང་དང་ཕྲག་པར་ཐོལ་གྱིས་འབྱུང་། །གཟུགས་ཁམས་ལྷ་རྣམས་གོས་དང་བཅས་པར་སྐྱེ། །གཟུགས་མེད་ཁམས་ན་ཁྱད་པར་དེ་དག་མེད། །སྒྲ་མི་སྙན་དང་ལྷ་ཡི་གནས་དག་ན། །ཟག་བཅས་བདེ་བའི་ཁྱད་པར་དུ་མ་མྱོང་། །དེ་དག་དགེ་བའི་ལས་སྟོབས་ཆེ་ཆུང་གིས། །ལོངས་སྤྱོད་ཆེ་ཆུང་ཁྱད་པར་དག་ཀྱང་འབྱུང་། །འོན་ཏེ་སྡུག་བསྔལ་དག་ཀྱང་འདི་ལྟར་ཡོད། །རྒྱལ་ཆེན་རིགས་བཞི་སུམ་ཅུ་རྩ་གསུམ་རྣམས། །ལྷ་མ་ཡིན་དང་འཐབ་པས་ལུས་ཀྱི་གནད། །བཅད་ཅིང་བཏུབ་པའི་སྡུག་བསྔལ་དུ་མ་དང་། །འཐབ་བྲལ་སོགས་ན་དེ་ལྟར་ཡོད་མིན་ཀྱང་། །འཆི་ལྟས་མཐོང་བས་སྡུག་བསྔལ་དཔག་ཏུ་མེད། །གཟུགས་དང་གཟུགས་མེད་ཁམས་ཀྱི་ལྷ་རྣམས་ལ། །འཇིག་རྟེན་གྲགས་པའི་སྡུག་བསྔལ་རིགས་མེད་ཅིང་། །ཏིང་འཛིན་བདེ་ལ་ཡུན་རིང་གནས་མོད་ཀྱང་། །འདུ་བྱེད་སྡུག་བསྔལ་ཉིད་ཀྱིས་བཅིངས་པའི་ཕྱིར། །ནམ་མཁར་འཕུར་བའི་བྱ་ནི་ཇི་བཞིན་དུ། །སླར་ཡང་འོག་མའི་གནས་སུ་ལྟུང་བར་འགྱུར། །ལྷ་མིན་འཐབ་ཅིང་རྩོད་པའི་སྡུག་བསྔལ་དང་། །མི་ལ་སྐྱེ་རྒ་ན་འཆིའི་སྡུག་བསྔལ་ཏེ། །དེ་ལྟར་འགྲོ་བ་རིགས་དྲུག་ཐམས་ཅད་ཀྱང་། །འདུ་བྱེད་སྡུག་བསྔལ་འགྱུར་བའི་སྡུག་བསྔལ་དང་། །སྡུག་བསྔལ་གྱི་ནི་སྡུག་བསྔལ་གསུམ་པོ་ལས། །གང་ཡང་རུང་བས་གཟིར་བའི་ཚུལ་བསམ་བྱ། །དེ་ཡང་ཉེ་བར་ལེན་པའི་ཕུང་བོ་ལྔ། །རང་དབང་མི་ཐུབ་མི་རྟག་འཇིག་པའི་ཕྱིར། །ཁྱབ་པ་འདུ་བྱེད་སྡུག་བསྔལ་ཅེས་བྱ་ལ། །ཤིན་ཏུ་ཚ་ཚེ་བསིལ་བར་གྱུར་པ་དང་། །ཟས་ཀྱི་ཚོར་བ་བདེ་བ་མྱོང་བ་དག །འགྱུར་བའི་སྡུག་བསྔལ་ཉིད་དུ་རྣམ་པར་བཞག །ནད་ལ་སོགས་པའི་རྐྱེན་ལས་བྱུང་བ་ཡི། །ཚོར་བ་སྡུག་བསྔལ་གཟིར་བ་གང་ཡིན་དེ། །སྡུག་བསྔལ་གྱི་ནི་སྡུག་བསྔལ་ཞེས་བྱ་སྟེ། །མདོར་ན་ཁམས་གསུམ་འཁོར་བ་གར་སྐྱེས་ཀྱང་། །སྡུག་བདེན་རང་བཞིན་ཉིད་ལས་མ་འདས་པས། །ཐར་བ་འདོད་ཕྱིར་ངེས་འབྱུང་བསམ་པ་བསྐྱེད། །སྡུག་བསྔལ་གང་ལས་བྱུང་བའི་དང་པོའི་རྒྱུ། །ཉོན་མོངས་ཉིད་ཡིན་དེ་ལས་ལས་སོགས་འབྱུང་། །དེ་ཕྱིར་ཉོན་མོངས་འདོད་ཆགས་ཞེ་སྡང་དང་། །གཏི་མུག་ང་རྒྱལ་ཕྲག་དོག་སེར་སྣ་སོགས། །ཇི་ལྟར་ནུས་པའི་གཉེན་པོས་སྤོང་བར་རིགས། །དེ་ཡང་སྡུག་བསྔལ་གསུམ་གྱི་རིགས་རྣམས་ཀུན། །ཚུལ་བཞིན་ཤེས་པ་སྡུག་བསྔལ་བདེན་པ་ཤེས། །ཉོན་མོངས་ཚོགས་ཀྱི་སྐྱེ་དང་གནས་ཚུལ་རིག །ཀུན་འབྱུང་འཕགས་པའི་བདེན་པ་ཤེས་པ་ཉིད། །སྡུག་བསྔལ་ལས་ནི་གྲོལ་བའི་ཐབས་ཤེས་ན། །དེ་ཚེ་ལམ་གྱི་བདེན་པ་ཤེས་པ་སྟེ། །ལམ་གྱིས་སྡུག་བསྔལ་འགོག་ཅིང་འགགས་པ་ཤེས། །འགོག་པ་འཕགས་པའི་བདེན་པ་ཤེས་པའོ། །ཉོན་མོངས་རྒྱུ་ཡིན་སྡུག་བསྔལ་འབྲས་བུ་སྟེ། །ལམ་བདེན་རྒྱུ་སྟེ་འགོག་བདེན་འབྲས་བུའོ། །གཞན་ཡང་མ་རིག་འདུ་བྱེད་རྣམ་ཤེས་དང་། །མིང་གཟུགས་སྐྱེ་མཆེད་རེག་པ་ཚོར་བ་དང་། །སྲེད་དང་ལེན་པ་སྲིད་པ་སྐྱེ་བ་དང་། །རྒ་ཤི་ཡན་ལག་བཅུ་གཉིས་འཁོར་ལོ་འདིས། །འཁོར་བའི་སེམས་ཅན་བར་མཚམས་མེད་པར་འཁོར། །དེ་ཡང་མ་རིག་དབང་གིས་ལས་བསགས་ཏེ། །དེ་ཡི་བག་ཆགས་རྣམ་ཤེས་ལ་བསྒོས་པ། །སྲེད་ལེན་གཉིས་ཀྱིས་ལེགས་པར་གསོས་བཏབ་ནས། །རྣམ་ཤེས་ཕྱི་མར་ཉིང་མཚམས་སྦྱར་བ་ན། །མིང་གཟུགས་སྐྱེ་མཆེད་རེག་པ་ཚོར་བ་དང་། །སྐྱེ་དང་རྒ་ཤིའི་རྟེན་འབྲེལ་རིམ་པར་འགྲུབ། །མ་རིག་འདུ་བྱེད་འཕེན་པའི་རྒྱུ་ཡིན་ལ། །འབྲས་དུས་རྣམ་ཤེས་མིང་གཟུགས་ནས་བཟུང་སྟེ། །ཚོར་བའི་བར་ལྔ་འཕངས་པའི་འབྲས་བུའོ། །ཇི་ལྟར་འཕངས་ན་རྒྱུ་དུས་རྣམ་ཤེས་ལ། །ལས་ཀྱིས་བག་ཆགས་བསྒོས་པའི་ཚུལ་གྱིས་འཕེན། །སྲེད་ལེན་སྲིད་ལས་འགྲུབ་པའི་རྒྱུ་ཉིད་དེ། །སྐྱེ་དང་རྒ་ཤི་གྲུབ་པའི་འབྲས་བུའོ། །ཇི་ལྟར་འགྲུབ་ན་བག་ཆགས་བསྒོས་པ་དེ། །ནུས་མཐུ་ཅན་དུ་བྱས་པའི་ཚུལ་གྱིས་སོ། །མ་རིག་པ་དང་སྲེད་པ་ལེན་པ་གསུམ། །ཉོན་མོངས་ཡིན་ཏེ་འདུ་བྱེད་སྲིད་པ་ལས། །རྣམ་ཤེས་མིང་གཟུགས་སྐྱེ་མཆེད་རེག་ཚོར་དང་། །སྐྱེ་བ་རྒ་ཤི་བདུན་ནི་སྡུག་བདེན་ནོ། །ཉོན་མོངས་གསུམ་ལས་ལས་ནི་གཉིས་འབྱུང་ཞིང་། །དེ་ལས་སྡུག་བསྔལ་བདུན་འབྱུང་བདུན་ལས་སླར། །ཉོན་མོངས་སོགས་འབྱུང་མགལ་མེའི་འཁོར་ལོ་བཞིན། །བཅུ་གཉིས་རྣམ་པས་སྲིད་པའི་འཁོར་ལོ་བསྐོར། །དེ་དག་རྩ་བ་མ་རིག་པ་ཡིན་ཏེ། །བསླབ་པ་གསུམ་དང་ཁྱད་པར་ཆོས་ཀུན་གྱི། །རང་བཞིན་བདག་མེད་རྟོགས་པའི་ཤེས་རབ་ཀྱིས། །མ་རིག་སྤོང་བའི་ཚུལ་ལ་འབད་པར་བྱ། །གལ་ཏེ་སེམས་ཅན་དོན་ཕྱིར་སངས་རྒྱས་ཀྱི། །གོ་འཕང་འདོད་ན་བྱང་ཆུབ་སེམས་མཆོག་བསྐྱེད། །ཐེག་པ་ཆེན་པོར་འཇུག་པའི་སྒོ་གཅིག་བུ། །བྱང་ཆུབ་སེམས་ལས་གཞན་ནི་ཡོད་མ་ཡིན། །གང་གིས་སེམས་འདི་བསྐྱེད་པར་མ་བྱས་ན། །དེ་ལ་ཡོན་ཏན་བརྒྱ་ཕྲག་གཞན་ཡོད་ཀྱང་། །བྱང་ཆུབ་སེམས་དཔར་ནམ་ཡང་མི་འགྱུར་ལ། །གང་གིས་འདི་བསྐྱེད་ཡོན་ཏན་གཞན་མེད་ཀྱང་། །རྒྱལ་བའི་སྲས་འགྱུར་ལྷར་བཅས་ཀུན་གྱི་སྐྱབས། །འདི་ལ་སྦྱོང་ཚུལ་རྣམ་པ་མང་ན་ཡང་། །བསྡུ་ན་གཉིས་ཏེ་སེམས་ཅན་ཐམས་ཅད་ནི། །རང་གི་མར་ཤེས་དེ་ཡི་དྲིན་དྲན་དང་། །དྲིན་དུ་གཟོ་དང་ཡིད་འོང་བྱམས་པ་དང་། །སྙིང་རྗེ་ཆེན་པོ་ལྷག་བསམ་རྣམ་དག་དྲུག །འབྲས་བུ་བྱང་ཆུབ་སེམས་ཏེ་རྣམ་བདུན་གྱིས། །སྦྱོང་བ་རྒྱུ་འབྲས་མན་ངག་བདུན་གྱིས་དང་། །སེམས་ཅན་ཀུན་གྱི་སྡུག་བསྔལ་རང་གིས་ལེན། །རང་གི་བདེ་དགེ་གཞན་ལ་གཏོང་བ་ཡིས། །སྦྱོང་ཚུལ་བྱམས་དང་སྙིང་རྗེས་སྦྱོང་བ་སྟེ། །མདོར་ན་སེམས་ཅན་ཐམས་ཅད་སྡུག་བསྔལ་ལས། །སྐྱོབ་འདོད་སྙིང་རྗེ་བཅོས་མ་མ་ཡིན་པ། །སུ་ཞིག་ལ་ཡོད་བྱང་ཆུབ་སེམས་མཆོག་ནི། །སྐྱེས་སམ་སྐྱེ་འགྱུར་རྒྱུ་ཡི་གཙོ་བོ་ཡིན། །སེམས་ཅན་གཞན་ལ་ཅུང་ཟད་མི་འཚེ་བར། །ཞི་དུལ་གནས་པ་ཙམ་གྱིས་བྱང་སེམས་མིན། །ཡིན་ན་ཉན་ཐོས་རང་རྒྱལ་དགྲ་བཅོམ་ཀྱང་། །བྱང་ཆུབ་སེམས་དཔའ་ཉིད་དུ་ཐལ་བར་འགྱུར། །གཞན་དག་འགའ་ལ་གནོད་པ་ཙམ་གྱིས་ཀྱང་། །རྒྱལ་བའི་སྲས་སུ་འཇོག་ཏུ་མི་རུང་མིན། །གལ་ཏེ་ཡིན་ན་སངས་རྒྱས་བྱང་སེམས་ནི། །རྒྱལ་བོའི་ཚུལ་བཟུང་ལོག་པར་ཞུགས་པ་གཞན། །བཅིངས་དང་རྡེག་སོགས་མེད་པར་ཐལ་བ་དང་། །བྱང་ཆུབ་སེམས་དཔས་མངོན་སྤྱོད་ལས་དག་ཀྱང་། །གཞན་གྱི་དོན་དུ་བྱེད་པར་མི་རུང་འགྱུར། །གཞན་ཡང་སོ་སོ་སྐྱེ་བོའི་བྱང་སེམས་ཅན། ཁོང་ཁྲོ་སོགས་ཀྱང་མེད་པར་ཐལ་འགྱུར་ཕྱིར། །ཕྱི་ཡི་སྤྱོད་ཚུལ་ཙམ་གྱིས་རྒྱལ་བའི་སྲས། །ཡིན་མིན་ཇི་བཞིན་ངེས་པར་མི་ནུས་སོ། །དེ་ཕྱིར་སེམས་ཅན་ཐམས་ཅད་སྡུག་བསྔལ་ལས། །བསྒྲལ་ཏེ་སངས་རྒྱས་ཉིད་ལ་འགོད་པའི་ཆེད། །རང་ཉིད་ཀུན་མཁྱེན་དོན་དུ་གཉེར་བྱེད་པའི། །སེམས་མཆོག་ཚིག་ཙམ་མིན་པ་ཞིག་ཡོད་ན། །བྱང་ཆུབ་སེམས་དཔའ་ཉིད་དུ་རྣམ་པར་བཞག །འདི་དང་སྟོང་ཉིད་རྟོགས་པའི་ཤེས་རབ་ལ། །ཕན་ཡོན་རྒྱ་ཆེར་མདོ་ལས་གསལ་བར་བཤད། །སེམས་དེ་བསྐྱེད་ནས་སྤྱོད་པ་ཕྱིན་དྲུག་ལ། །འཇུག་པར་བྱ་སྟེ་རྒྱལ་སྲས་སྤྱོད་པའི་སྡོམ། །ཕ་རོལ་ཕྱིན་པ་དྲུག་ཏུ་འདུས་གསུངས་པས། །ཚུལ་འདིར་བསླབ་པར་བྱ་བ་གནད་དུ་ཆེ། །སྦྱིན་པ་ལ་ནི་རྣམ་པ་གསུམ་ཡོད་དེ། །ཆོས་དང་ཟང་ཟིང་མི་འཇིགས་སྦྱིན་པའོ། །གཞན་ལ་ཆོས་སྟོན་ཆོས་ཀྱི་སྦྱིན་པ་སྟེ། །ཟས་སོགས་སྟེར་བ་ཟང་ཟིང་སྦྱིན་པ་ཉིད། །འཇིགས་པ་ལས་སྐྱོབ་མི་འཇིགས་སྦྱིན་པའོ། །ཚུལ་ཁྲིམས་གསུམ་སྟེ་སྡོམ་པའི་ཚུལ་ཁྲིམས་དང་། །དགེ་བ་ཆོས་སྡུད་སེམས་ཅན་དོན་བྱེད་དོ། །བཅས་དང་རང་བཞིན་ཁ་ན་མ་ཐོ་བའི། །ཉེས་པ་སྤོང་བ་སྡོམ་པའི་ཚུལ་ཁྲིམས་དང་། །ཕྱིན་དྲུག་བསྐྱེད་དང་གནས་དང་སྤེལ་བའི་ཕྱིར། །འཇུག་པར་བྱེད་པ་དགེ་བ་ཆོས་སྡུད་ཡིན། །སེམས་ཅན་དོན་ནི་ཚུལ་བཞིན་སྒྲུབ་བྱེད་པ། །སེམས་ཅན་དོན་བྱེད་ཚུལ་ཁྲིམས་ཞེས་བྱའོ། །བཟོད་པ་གསུམ་སྟེ་གནོད་པ་བཟོད་པ་དང་། །སྡུག་བསྔལ་དང་ལེན་ཆོས་ལ་ངེས་ཐོབ་བཟོད། །རང་ལ་གནོད་བྱེད་བཟོད་པ་དང་པོ་སྟེ། །སྡུག་བསྔལ་བྱུང་བ་བཟོད་པ་གཉིས་པ་ཡིན། །ཆོས་ཉིད་ཤེས་ཤིང་མོས་པ་གསུམ་པར་འདོད། །བརྩོན་འགྲུས་གསུམ་སྟེ་གོ་ཆའི་བརྩོན་འགྲུས་དང་། །དགེ་བ་ཆོས་སྡུད་སེམས་ཅན་དོན་བྱེད་གསུམ། །མི་སྐྱོ་སེམས་ཅན་དོན་བརྩོན་དང་པོ་ཉིད། །དགེ་ཆོས་སེམས་ཅན་དོན་བྱེད་སྔར་བཞིན་ཡིན། །བསམ་གཏན་གཉིས་ཏེ་འཇིག་རྟེན་འདས་མ་འདས། །ཡང་ན་ཞི་ལྷག་ཟུང་འབྲེལ་བཅས་པའོ། །ཤེས་རབ་རྣམ་པ་གསུམ་སྟེ་ཀུན་རྫོབ་དང་། །དོན་དམ་རྟོགས་པའི་ཤེས་རབ་རྣམ་གཉིས་སྟེང་། །སེམས་ཅན་དོན་སྒྲུབ་བྱེད་པའི་ཤེས་རབ་པོ། །བསམ་གཏན་ཤེས་རབ་རྣམ་གཉིས་སོ་སོ་ལ། །ཞི་གནས་ལྷག་མཐོང་ཞེས་ནི་རབ་བཤད་པ། །དེ་ཡི་དབྱེ་བ་རྒྱས་པར་གཞན་དུ་ཤེས། །སྦྱིན་གཏོང་སྙན་པར་སྨྲ་བས་དམ་ཆོས་སྟོན། །བསྟན་པའི་དོན་ལ་གདུལ་བྱ་སྤྱོད་འཇུག་དང་། །རང་ཉིད་དོན་མཐུན་སྤྱོད་པ་བསྡུ་དངོས་བཞི། །ཕར་ཕྱིན་དྲུག་གིས་རང་རྒྱུད་སྨིན་བྱེད་ཅིང་། །བསྡུ་བ་བཞི་ཡིས་གཞན་དོན་བསྒྲུབ་བྱ་སྟེ། །འཁོར་སྡུད་པ་ལའང་འདི་ཉིད་མཆོག་ཏུ་གསུང་། །སྦྱིན་པས་ལོངས་སྤྱོད་འབྱོར་བ་འཐོབ་པར་འགྱུར། །རང་གིས་མཛའ་བཤེས་བྱམས་ཤིང་སྙན་པ་འཐོབ། །ཚུལ་ཁྲིམས་ཀྱིས་ནི་ངན་འགྲོ་ལས་ཐར་ནས། །བདེ་འགྲོའི་ལུས་རྙེད་རྒྱན་གྱི་མཆོག་ཀྱང་ཡིན། །བཟོད་པས་གཟུགས་བཟང་དགྲ་རྣམས་ཞི་བར་བྱེད། །དགེ་བ་སྒྲུབ་བྱེད་དཀའ་ཐུབ་ཀུན་གྱི་མཆོག །བརྩོན་འགྲུས་ཀྱིས་ནི་འདི་དང་ཕྱི་མ་ཡི། །དོན་ཆེན་མ་ལུས་སྒྲུབ་པར་བྱེད་པར་འགྱུར། །བསམ་གཏན་གྱིས་ནི་མངོན་པར་ཤེས་པ་སོགས། །གོང་མའི་ཡོན་ཏན་ཁྱད་པར་འགྲུབ་པར་བྱེད། །ཤེས་རབ་ཀྱིས་ནི་ཉོན་མོངས་མི་ཤེས་ཀུན། །དྲུང་ནས་ཕྱུང་སྟེ་ཀུན་མཁྱེན་ཉིད་ཀྱང་འགྲུབ། །གཞན་ཡང་མདོ་སྡེ་ལས་ནི་འདི་ལྟར་གསུང་། །བག་ཡོད་ཡོན་ཏན་ཀུན་གྱི་གཞི་ཡིན་ཏེ། །འདོད་ཆུང་ཆོག་ཤེས་ཕྱུག་པོ་ཉིད་དུ་འདོད། །དད་པ་ཚུལ་ཁྲིམས་ཐོས་དང་གཏོང་བ་དང་། །ངོ་ཚ་ཤེས་དང་ཁྲེལ་ཡོད་ཤེས་རབ་སྟེ། །བདུན་པོ་འཕགས་པའི་ནོར་གྱི་མཆོག་ཡིན་པས། །གང་ལ་འདི་ཡོད་ནོར་དང་ལྡན་ཞེས་བྱ། །མེད་ན་དོན་གྱིས་དབུལ་བོ་ཉིད་དུ་གསུང་། །དེས་མཚོན་རྒྱལ་སྲས་སྤྱོད་པའི་རབ་དབྱེ་ནི། །མདོ་ལས་བཤད་རྣམས་ཤེས་ཤིང་ཅི་ནུས་སློབ། །གཞན་ཡང་ཞི་གནས་ལྷག་མཐོང་གི །ཁྱད་པར་ཅུང་ཟད་བསྟན་པར་བྱ། །ཞི་གནས་ངོ་བོ་བསམ་གཏན་ཏེ། །སེམས་ནི་རྩེ་གཅིག་པ་ཉིད་ཡིན། །དེ་ཡང་སྤྱོད་ལམ་ཚུལ་མཐུན་པས། ཁ་དོག་གསེར་ལྟར་མཛེས་པ་ཡི། །རྒྱལ་བའི་སྐུ་བརྙན་ལ་དམིགས་ཏེ། །བྱིང་རྒོད་ལ་སོགས་སྐྱོན་བྲལ་བའི། །ཞི་གནས་བསྒྲུབ་པར་བྱའོ་གསུང་། །དེ་ཚེ་ལེ་ལོ་གདམས་ངག་བརྗེད། །བྱིང་རྒོད་འདུ་བྱེད་འདུ་མི་བྱེད། །ཉེས་པ་རྣམ་པ་ལྔ་སྤངས་ནས། །དད་དང་འདུན་པ་རྩོལ་བ་དང་། །ཤིན་སྦྱངས་དྲན་དང་ཤེས་བཞིན་དང་། །བཏང་སྙོམས་འདུ་བྱེད་གཉེན་པོ་བརྒྱད། །བསྟེན་པར་དབུས་མཐའ་ལས་གསུངས་དང་། །འཇོག་དང་རྒྱུན་དུ་འཇོག་པ་དང་། །བླན་ཏེ་འཇོག་དང་ཉེ་བར་འཇོག །དུལ་བར་བྱེད་དང་ཞི་བར་བྱེད། །རྣམ་པར་ཞི་བྱེད་རྩེ་གཅིག་བྱེད། །མཉམ་པར་འཇོག་དང་རྒྱུད་གཅིག་བྱེད། །གསུངས་བཞིན་སེམས་གནས་ཐབས་དགུ་དང་། །ཐོས་པའི་སྟོབས་དང་བསམས་པ་དང་། །དྲན་དང་ཤེས་བཞིན་བརྩོན་འགྲུས་དང་། །ཡོངས་སུ་འདྲིས་པའི་སྟོབས་དྲུག་གམ། །བསྒྲིམ་སྟེ་འཇུག་དང་ཆད་ཅིང་འཇུག །ཆད་པ་མེད་པར་འཇུག་པ་དང་། །རྩོལ་མེད་འཇུག་པའི་ཡིད་བྱེད་བཞི། །ཚུལ་བཞིན་བསྟེན་ཏེ་ཞི་གནས་བསྒྲུབ། །གང་ཚེ་སེམས་དང་ལུས་ཀྱི་ཡང་། །ཤིན་སྦྱངས་སྐྱེས་པའི་མཇུག་ཉིད་ནས། །ཡིད་ནི་རྩེ་གཅིག་དམིགས་པ་ལ། །ལྷན་ནེར་བརྟན་པར་གྱུར་པའི་ཚེ། །ཞི་གནས་ཐོབ་པར་རབ་ཏུ་བཤད། །ལྟ་བ་སྒོམ་པར་བྱེད་པའི་སྔོན། །བླ་མའི་རྣལ་འབྱོར་སོགས་བྱས་ཏེ། །རྟེན་འབྲེལ་གྱི་ནི་གཏན་ཚིགས་སོགས། །དོན་དམ་དཔྱོད་བྱེད་རིགས་པ་ལ། །བརྟེན་ནས་ལྟ་བ་བཙལ་བར་བྱ། །འདིར་ནི་གཅིག་དང་དུ་བྲལ་གྱི། །གཏན་ཚིགས་མདོར་བསྡུས་བརྗོད་བྱས་ན། །འདི་ལ་གནད་ནི་རྣམ་པ་བཞི། །དང་པོ་དགག་བྱ་ངེས་པའི་གནད། །རང་ཅག་རྣམས་ལ་ངའོ་སྙམ། །སྤྲིང་སྦྲིང་སྙིང་གི་ཐད་ཉིད་དུ། །འཛིན་པའི་བློ་འདིས་ང་གང་དུ། །ཇི་འདྲ་ཅི་ཞིག་ལྟར་བཟུང་བརྟག །དེ་ལྟར་བརྟགས་ཚེ་དེ་ཡིས་ནི། །ལུས་སེམས་སོ་སོའི་སྟེང་ཉིད་ནས། །རེ་རེ་ཁོ་ན་མ་ཡིན་པར། །ལུས་སེམས་འཚོགས་པ་འདི་ཡི་ཐོག །མིང་བརྡས་བཞག་ཙམ་མ་ཡིན་པར། །བཏགས་དོན་ང་ཞིག་ཡུལ་སྟེང་ནས། །བལྟོས་མེད་རང་རྐྱ་ཐུབ་པ་ཞིག །ཡོད་པར་བཟུང་བར་ཤེས་པར་བྱ། །གཉིས་པ་ཁྱབ་པ་ངེས་པའི་གནད། །དེ་ལྟར་བཟུང་བཞིན་གྲུབ་པའི་ང་། །ལུས་སེམས་འདི་དང་གཅིག་པའམ། །ཐ་དད་གྲུབ་པ་གང་རུང་ཞིག །ཡིན་གྱི་གཞན་དུ་མེད་ཤེས་བྱ། །གསུམ་པ་བདེན་པའི་གཅིག་བྲལ་ནི། །བདེན་འཛིན་ལྷན་སྐྱེས་ཀྱིས་བཟུང་བའི། །ང་དེ་ལུས་སེམས་འདི་གཉིས་དང་། །གཅིག་གམ་ཐ་དད་གང་ཡིན་བརྟག །གཅིག་གོ་ཞེ་ན་ང་ཉིད་ཀྱང་། །ལུས་སེམས་གཉིས་ཀར་ཐལ་བར་འགྱུར། །གལ་ཏེ་ལུས་དང་གཅིག་ཡིན་ན། །ང་ཉིད་གཟུགས་སུ་འགྱུར་ཕྱིར་དང་། །ང་ཡི་ལུས་ཞེས་བརྗོད་པའི་ཚེ། །ང་ནི་ལུས་ལས་ཐ་དད་དུ། །བརྗོད་ཅིང་བློ་ལའང་ཐ་དད་པར། །སྣང་གི་གཅིག་ཏུ་སྣང་མ་ཡིན། །གལ་ཏེ་གཅིག་ན་ལུས་ཞིག་ནས། །ང་ཉིད་སྐྱེ་བ་ལེན་པའི་ཚེ། །ལུས་ཀྱང་སྐྱེ་བ་ལེན་དགོས་ན། །དེ་ནི་སུས་ཀྱང་མ་མཐོང་ཕྱིར། །ལུས་དང་གཅིག་ཏུ་མ་གྲུབ་བོ། །སེམས་དང་ཡང་ནི་གཅིག་མིན་ཏེ། །ང་ཡི་སེམས་ཞེས་བརྗོད་པའི་ཚེ། །ང་སེམས་གཉིས་ཀ་ཐ་དད་དུ། །སྣང་གི་གཅིག་ཏུ་སྣང་མི་སྲིད། །སྣང་ནའང་ང་ཉིད་ཤེས་པར་འགྱུར། །ཤེས་པ་ཡིན་ན་མིག་ཤེས་ཀྱིས། །ཡན་ལག་གཟུགས་དང་ལྡན་པ་ཡི། །ང་ཉིད་ཁྱོད་ཀྱིས་ཨ་མཐོང་ཐམ། །བཞི་བ་བདེན་པའི་དུ་བྲལ་ནི། །གལ་ཏེ་ངར་འཛིན་གྱིས་བཟུང་ལྟར། །ང་དེ་ལུས་སེམས་གཉིས་ཀ་དང་། །མ་འབྲེལ་ཐ་དད་གྲུབ་ཅེ་ན། །འོ་ན་ལུས་སེམས་སོ་སོར་ཡང་། །བསལ་བའི་འོག་ཏུ་དེ་འདྲའི་ང་། ཁྱོད་ཀྱིས་བསྟན་པར་ནུས་སམ་ཅི། །ལུས་སེམས་གཉིས་ལས་དོན་གཞན་དུ། །བལྟོས་མེད་ཡན་གར་ང་མེད་པས། །དེ་ལྟར་ཐ་དད་གྲུབ་མ་ཡིན། །གཞན་ཡང་སྐྱེས་བུ་རང་ལུས་ཀྱི། །ཤ་རུས་པགས་པ་ཁྲག་ཆུ་སེར། །དྲོད་དང་དབུགས་དང་བུ་ག་དང་། །རྣམ་པར་ཤེས་སོགས་མ་ཡིན་ལ། །དེ་ལས་གཞན་ལའང་མ་ཡིན་ཏེ། །སྐྱེས་བུ་ས་མིན་ཆུ་མ་ཡིན། །མེ་མིན་རླུང་མིན་ནམ་མཁའ་མིན། །རྣམ་ཤེས་མ་ཡིན་ཀུན་མིན་ན། །དེ་ལས་གཞན་ན་སྐྱེས་བུ་གང་། །ཞེས་སོགས་གསུངས་པ་ཉིད་ཕྱིར་རོ། །གཞན་ཡང་ངར་འཛིན་ལྷན་སྐྱེས་ཀྱིས། །ཡན་ལག་རྣམ་པ་ལྔ་ཡི་སྟེང་། །ལུས་ཞེས་བཏགས་པ་ཙམ་མིན་པར། །ཡུལ་སྟེང་ནས་ནི་ཚུགས་སེ་བ། །གྲུབ་གྲུབ་ཞིག་ཏུ་བཟུང་བ་ནི། །བརྟགས་ལ་དགག་བྱ་ངོས་ཟིན་བྱ། །དེ་ནས་དེ་ལྟར་བཟུང་བའི་ལུས། །ལིངས་པོ་གཟུགས་བཞིའི་སྟེང་ཡོད་ན། །ལུས་འདིའི་ཡན་ལག་རྣམ་ལྔ་དང་། །གཅིག་གམ་ཐ་དད་གང་ཞིག་ཡིན། །ཐག་གཅོད་ཁྱབ་པ་ངེས་པའི་གནད། །གཅིག་ཏུ་གྲུབ་ན་ལུས་ཚང་མ། །ཡན་ལག་ལྔ་རུ་འགྱུར་བའི་ཕྱིར། །མགོ་ལའང་རྐང་ལག་ཡོད་པར་འགྱུར། །དེ་ཕྱིར་ཡན་ལག་རེ་རེ་ལ། །ལུས་ནི་ཚང་བ་རེ་རེ་དང་། །ཡང་ན་ཡན་ལག་རྣམ་ལྔ་ཡི། །གཞི་འཐུན་ལུས་ཀྱང་ཡོད་པར་འགྱུར། །དེ་ཕྱིར་གཅིག་ཏུ་མ་གྲུབ་བསམ། །གལ་ཏེ་བལྟོས་མེད་ཐ་དད་དུ། །གྲུབ་ནའང་ཡན་ལག་ལྔ་བོ་ལས། །མ་གཏོགས་ལུས་ནི་ཚང་བ་ཞིག ཁྱོད་ཀྱིས་གང་དུ་རྙེད་པར་ནུས། །དེ་ཕྱིར་ཐ་དད་མ་གྲུབ་བསམ། །དེ་བཞིན་རི་དང་ཁང་ཁྱིམ་དང་། །བུམ་པ་སོགས་ཀྱང་རང་རང་གི །སྟོད་སྨད་གཡས་གཡོན་ལ་སོགས་ཀྱི། །རྡུལ་དང་གཅིག་གམ་ཐ་དད་པར། །བརྟགས་ལ་སྔར་བཞིན་འགོག་པར་བྱེད། །དེ་བཞིན་དེ་རིང་ཤེས་པ་ཡང་། །སྔ་དྲོ་ཕྱི་དྲོའི་ཤེས་པ་དང་། །ལོ་ནི་ཟླ་བ་བཅུ་གཉིས་དང་། །བལྟོས་མེད་གཅིག་དང་ཐ་དད་དུ། །གྲུབ་པ་བརྟགས་ལ་གཞག་པར་བྱ། །མདོར་ན་ཤིང་རྟ་ལྟ་བུ་ནི། །རང་གི་གདགས་གཞི་ཚོགས་པ་ལ། །བརྟེན་ནས་མིང་བརྡས་བཞག་ཙམ་ཞིག །མ་གཏོགས་རང་གི་ངོས་ནས་ནི། །གྲུབ་པ་མེད་པར་ཐག་བཅད་དེ། །ཆོས་རྣམས་ཀུན་ཀྱང་རང་རང་གི །ཆ་ཤས་ཚོགས་པ་ལ་བརྟེན་ནས། །བཞག་པའི་ཚུལ་ནི་ཤེས་པར་བྱ། །དེ་ཚེ་དོན་དམ་དཔྱོད་བྱེད་ཀྱི། །རིགས་པས་དཔྱད་ངོར་མི་རྙེད་ཀྱང་། །རྨི་ལམ་སྒྱུ་མ་ཇི་བཞིན་དུ། །ལས་དང་འབྲས་བུའི་རྣམ་གཞག་ཀུན། །ཐ་སྙད་དུ་ནི་འཐད་པའི་ཚུལ། །རྒྱས་པར་གཞན་དུ་ཤེས་པར་བྱ། །རྣམ་མང་གཞུང་ལུགས་རྒྱ་མཚོའི་འཇིང་། །རྣམ་དཔྱོད་རི་དབང་བསྒྲིལ་བ་ལས། །རྣམ་དག་ལེགས་བཤད་བདུད་རྩི་ཡིས། །རྣམ་ཀུན་གང་བའི་བུམ་བཟང་བསྐྲུན། །འདིར་འབད་ལས་བྱུང་རབ་དཀར་དགེ །ཇི་སྙེད་བདག་གིས་ཐོབ་དེ་ཡང་། །མཐའ་དག་འགྲོ་འདི་ཀུན་མཁྱེན་གྱི། །གོ་འཕང་མཆོག་དེ་ཐོབ་ཕྱིར་བསྔོ། །ཅེས་པ་འདི་ནི་གནས་བརྟན་ངག་དབང་རྒྱལ་མཚན་དང་། གྲགས་པ་དཔལ་འབྱོར་གཉིས་ཀྱིས་འདི་ལྟ་བུ་ཞིག་གྱིས་ཞེས་བསྐུལ་བ་ལྟར། ཤཱཀྱའི་དགེ་སློང་རབ་འབྱམས་སྨྲ་བ་གྲགས་པ་བཤད་སྒྲུབ་ཀྱིས་གཞན་ལའང་ཕན་སྲིད་སྙམ་སྟེ་ཅོ་ནེ་ཏིང་འཛིན་དར་རྒྱས་གླིང་དུ་བགྱིས་པའོ། །མངྒ་ལཾ།། །། ན་མོ་གུ་རུ་བྷྱཿ འདིར་བསགས་སྦྱང་གི་གནད་བསྡུས་པ་ཡན་ལག་བདུན་པའི་ཉམས་ལེན་རྒྱུན་ཁྱེར་དུ་བྱེད་པའི་ཚུལ་ལ་གཉིས། སྦྱོར་བ་དང་དངོས་གཞིའོ། །དང་པོ་ནི། དཀོན་མཆོོག་གི་རྟེན་གྱི་དྲུང་དུ་མཆོད་པ་བཤམས་པ་སོགས་བྱས་ཏེ། སྐྱབས་འགྲོ་སོགས་སྔོན་དུ་བཏང་ནས། མཆོག་གསུམ་རྒྱལ་བ་སྲས་བཅས་བྱིན་རླབས་དང་། །ཚོགས་གཉིས་མངའ་ཐང་ཆོས་དབྱིངས་བདེན་སྟོབས་ཀྱིས། །ཞིང་འདི་བདེ་བ་ཅན་ལྟར་སྣོད་བཅུད་ཀྱི། །འབྱོར་ལྡན་མཆོད་ཚོགས་རྒྱ་མཚོས་གང་གྱུར་ཅིག །ཅེས་སམ་བདེན་པའི་བྱིན་བརླབ་བྱ། རབ་འབྱམས་ཞིང་ནས་རྩ་བརྒྱུད་བླ་མ་དང་། །ཡི་དམ་སངས་རྒྱས་བྱང་སེམས་ཉན་རང་ཚོགས། །དཔའ་བོ་མཁའ་འགྲོ་བསྟན་སྲུང་རྒྱ་མཚོར་བཅས། །སྤྱན་འདྲེན་འདིར་གཤེགས་དགོངས་ཤིང་བཞུགས་སུ་གསོལ། །ཞེས་པས་སྤྱན་དྲངས་ཏེ་མདུན་གྱི་ནམ་མཁར་བཞུགས་པའི་མོས་པ་ཤུགས་ཅན་བྱའོ། །གཉིས་པ་དངོས་གཞི་ལ། བདུན་གྱི་དང་པོ་ཕྱག་འཚལ་བ་ནི། །ལྷར་བཅས་འགྲོ་བའི་སྟོན་པ་ཟས་གཙང་སྲས། །བྱམས་བརྩེའི་བདག་ཉིད་མི་ཕམ་ཆོས་ཀྱི་རྗེ། །རྒྱལ་བའི་སྲས་པོ་ཐོགས་མེད་སྐུ་མཆེད་སོགས། །རྒྱ་ཆེན་སྤྱོད་པའི་བརྒྱུད་ལ་ཕྱག་འཚལ་ལོ། །རྒྱལ་བའི་མཁྱེན་རབ་དབང་ཕྱུག་འཇམ་པའི་དབྱངས། །རྟེན་འབྲེལ་དོན་གཟིགས་འཕགས་མཆོག་ཀླུ་སྒྲུབ་ཞབས། །དེ་སྲས་ཐུ་བོ་ཟླ་བ་གྲགས་པ་སོགས། །ཟབ་མོ་ལྟ་བའི་བརྒྱུད་ལ་ཕྱག་འཚལ་ལོ། །བསྟན་པའི་སྒྲོན་མེ་ཇོ་བོ་ཡབ་སྲས་དང་། །རྒྱལ་བ་ཀུན་དངོས་རྗེ་བཙུན་བཙོང་ཁ་བ། །རྒྱལ་ཚབ་འདུལ་འཛིན་མཁས་གྲུབ་ཆེན་པོ་སོགས། །བཤེས་གཉེན་དམ་པ་རྣམས་ལ་ཕྱག་འཚལ་ལོ། །བློ་བཟང་ཆོས་ཀྱི་རྒྱལ་མཚན་འཛིན་པའི་རྗེ། །ངག་གི་དབང་ཕྱུག་བློ་བཟང་རྒྱ་མཚོའི་དཔལ། །མཆོག་སྤྲུལ་དམ་པ་བློ་བཟང་ཡེ་ཤེས་སོགས། །དངོས་བརྒྱུད་བླ་མ་རྣམས་ལ་ཕྱག་འཚལ་ལོ། །རྡོ་རྗེ་འཆང་ཆེན་ཨིནྡྲ་བྷོ་དྷི་དང། །ལཱུ་ཧི་དཱ་རི་ཀ་དང་དྲིལ་བུ་བ། །ས་ར་ཧ་དང་ཤ་བ་རི་ལ་སོགས། །གྲུབ་ཆེན་བླ་མ་རྣམས་ལ་ཕྱག་འཚལ་ལོ། །གང་ལས་མདོ་རྒྱུད་དབང་ལུང་མན་ངག་གི །ཆ་ཤས་ཕྲ་མོ་ཡན་ཆད་ཙམ་ཞིག་ཀྱང་། །བཀའ་དྲིན་མནོས་པའི་བཤེས་གཉེན་དམ་པ་སོགས། །དྲིན་ཅན་བླ་མ་རྣམས་ལ་ལ་ཕྱག་འཚལ་ལོ། །མཚན་ལེགས་ཡོངས་བསྒྲགས་དཔལ་སོགས་བདེ་གཤེགས་བརྒྱད། །ཤཱཀ་ཐུབ་ལ་སོགས་རྒྱལ་བ་སུམ་ཅུ་ལྔ། །འཁོར་བ་འཇིག་སོགས་སངས་རྒྱས་སྟོང་ཕྲག་བཅས། །དུས་གསུམ་རྒྱལ་བ་རྣམས་ལ་ཕྱག་འཚལ་ལོ། །སངས་རྒྱས་ཉི་ཟླ་མར་མེ་གསལ་ཉི་ཁྲི། །མར་མེ་མཛད་དཔལ་ཞེས་གྲགས་སུམ་ཁྲི་དང་། །འོད་མི་འགྱུར་བ་འབུམ་ཕྲག་བརྒྱ་ལ་སོགས། །འདས་པའི་སངས་རྒྱས་རྣམས་ལ་ཕྱག་འཚལ་ལོ། །སངས་རྒྱས་གསལ་རྒྱལ་འབུམ་ཕྲག་རྣམ་པ་བཅུ། །སྤྲུལ་སྐུ་ཤཱཀྱ་ཐུབ་པ་ས་ཡ་གཅིག །མི་འཁྲུགས་སྨན་བླ་ཚེ་དཔག་མེད་ལ་སོགས། །ང་ལྟའི་སངས་རྒྱས་རྣམས་ལ་ཕྱག་འཚལ་ལོ། །སངས་རྒྱས་ཀུན་ཏུ་དཔལ་བ་སུམ་ཁྲི་དང་། །འོད་མི་འགྱུར་བ་བཞི་ཁྲི་སྟོང་ཕྲག་བརྒྱད། །འོད་ཟེར་རྣམ་པར་བཀོད་པ་འབུམ་བརྒྱད་སོགས། །མ་བྱོན་སངས་རྒྱས་རྣམས་ལ་ཕྱག་འཚལ་ལོ། །མདོ་སྡེ་ལུང་བསྟན་ཚིགས་བཅད་དབྱངས་ཀྱིས་བསྙད། །ཆེད་བརྗོད་གླེང་གཞི་རྟོགས་དང་འདས་པ་བརྗོད། །སྐྱེས་རབས་ཤིན་རྒྱས་རྨད་བྱུང་གཏན་ཕབ་སྡེའི། །ཡན་ལག་བཅུ་གཉིས་གསུང་ལ་ཕྱག་འཚལ་ལོ། །འདུལ་བ་མངོན་པ་མདོ་སྡེ་རྣམ་གསུམ་དང་། །བྱ་སྤྱོད་ཡོ་ག་རྣལ་འབྱོར་བླ་ན་མེད། །གང་གི་དགོངས་འགྲེལ་ལེགས་པར་བཤད་པ་སོགས། །ལུང་གི་དམ་ཆོས་རྣམས་ལ་ཕྱག་འཚལ་ལོ། །བསླབ་གསུམ་ངེས་འབྱུང་བྱང་སེམས་ཡང་དག་ལྟ། །ཕྱིན་དྲུག་ས་བཅུ་ལམ་ལྔ་རིམ་གཉིས་སོགས། །གྲོལ་བྱེད་ལམ་དང་གྲོལ་བའི་འགོག་པ་སྟེ། །རྟོགས་པའི་དམ་ཆོས་རྣམས་ལ་ཕྱག་འཚལ་ལོ། །བྱམས་པ་འཇམ་དབྱངས་ཕྱག་རྡོར་སྤྱན་རས་གཟིགས། །ས་སྙིང་སྒྲིབ་སེལ་ནམ་སྙིང་ཀུན་ཏུ་བཟང་། །བློ་གྲོས་མི་བཟང་ནམ་མཁའ་མཛོད་ལ་སོགས། །བྱང་ཆུབ་སེམས་དཔའི་ཚོགས་ལ་ཕྱག་འཚལ་ལོ། །བཟང་སྐྱོང་དབང་བོ་ཞི་སོགས་རྒྱལ་བའི་སྲས། །གདུང་སེལ་སྣང་བ་བརྩེགས་སོགས་རང་སངས་རྒྱས། །འོད་སྲུང་རབ་འབྱོར་ལ་སོགས་ཉན་ཐོས་ཏེ། །འཕགས་པའི་དགེ་འདུན་རྣམས་ལ་ཕྱག་འཚལ་ལོ། །ཤཱ་རིའི་བུ་སོགས་ཉན་ཐོས་ཆེན་པོ་བརྒྱད། །ལེགས་མཐོང་ལ་སོགས་བསྟན་པའི་གཏད་རབས་བདུན། །ཡན་ལག་འབྱུང་སོགས་གནས་བརྟན་བཅུ་དྲུག་བཅས། །འཕགས་པ་ཉན་ཐོས་རྣམས་ལ་ཕྱག་འཚལ་ལོ། །དཔལ་ལྡན་གསང་བ་འདུས་པ་འཁོར་ལོ་སྡོམ། །དགྱེས་རྡོར་དུས་ཀྱི་འཁོར་ལོ་གཤིན་རྗེ་གཤེད། །རྡོར་དབྱིངས་ཀུན་རིག་ལ་སོགས་རྒྱུད་སྡེ་བཞིའི། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་ལོ། །གདུགས་དཀར་སྒྲོལ་མ་རྣམ་རྒྱལ་དབྱངས་ཅན་མ། །སེང་གདོང་རི་ཁྲོད་མ་དང་འོད་ཟེར་ཅན། །རལ་གཅིག་ཕག་མོ་མཁའ་འགྲོ་སྡེ་ལྔ་སོགས། །ཞི་ཁྲོ་ལྷ་མོའི་ཚོགས་ལ་ཕྱག་འཚལ་ལོ། །ཕྱོགས་དང་མཚམས་ཀྱི་གདོན་བགེགས་འབྱུང་བའི་ཚོགས། །ཚར་གཅོད་དྲག་པོའི་སྐུར་བཞེངས་འཇིགས་ཚུལ་ཅན། །ཧཱུཾ་མཛད་འཁོར་བསྒྱུར་གཤིན་རྗེ་གཤེད་ལ་སོགས། །རབ་བརྗིད་ཁྲོ་བོའི་ཚོགས་ལ་ཕྱག་འཚལ་ལོ། །དཔལ་ལྡན་མགོན་པོ་ཕྱག་དྲུག་ཞལ་བཞི་པ། །ཕྱག་བཞི་གུར་མགོན་བྲམ་གཟུགས་ཆོས་ཀྱི་རྒྱལ། །དམག་ཟོར་རྒྱལ་མོ་རྣམ་སྲས་བེག་ཙེ་སོགས། །ཆོས་སྐྱོང་སྲུང་མའི་ཚོགས་ལ་ཕྱག་འཚལ་ལོ། །བསྡུ་ན། དངོས་བརྒྱུད་བླ་མ་རྣམས་ལ་ཕྱག་འཚལ་ལོ། །སངས་རྒྱས་བྱང་སེམས་རྣམས་ལ་ཕྱག་འཚལ་ལོ། །ཡི་དམ་མཁའ་འགྲོ་རྣམས་ལ་ཕྱག་འཚལ་ལོ། །ཆོས་སྐྱོང་སྲུང་མའི་ཚོགས་ལ་ཕྱག་འཚལ་ལོ། །ཕྱག་བྱར་འོས་པ་སོགས་ཀྱང་བྱའོ། །གཉིས་པ་མཆོད་པ་ནི། མ་ལུས་ཕྱོགས་བཅུའི་ཞིང་ན་གང་མཆིས་པའི། །ཡིད་འོང་མཆོད་ཡོན་ཞབས་བསིལ་མེ་ཏོག་སྤོས། །སྣང་གསལ་དྲི་ཆབ་ཞལ་ཟས་རོལ་མོ་དང་། །གཟུགས་སྒྲ་དྲི་རོ་རེག་བྱའི་ཚོགས་རྣམས་འབུལ། །འཁོར་ལོ་ནོར་བུ་བཙུན་མོ་བློན་པོ་དང་། །གླང་ཆེན་རྟ་མཆོག་དམག་དཔོན་རིན་པོ་ཆེ། །གདུགས་དང་གསེར་ཉ་བུམ་པ་པདྨ་དུང་། །དཔལ་བེའུ་རྒྱལ་མཚན་འཁོར་ལོ་རྣམས་ཀྱང་འབུལ། །ཁྲུས་རྫིང་གོས་དང་རིན་ཆེན་གཞལ་མེད་ཁང་། །དབུ་རྒྱན་ཅོད་པན་བསྟོད་དབྱངས་སྙན་པའི་སྒྲ། །གླིང་བཞི་སྟོང་གསུམ་ཉི་ཟླ་རི་རབ་སོགས། །བདག་ལུས་ལོངས་སྤྱོད་དགེ་ཚོགས་བཅས་ཏེ་འབུལ། །ཇི་ལྟར་རྒྱལ་སྲས་ཀུན་བཟང་ལ་སོགས་པས། །ཕྱོགས་བཅུའི་རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་མཆོད་པའི་སྤྲིན་ཚོགས་ཀྱིས། །སྐྱབས་མགོན་དམ་པ་འཁོར་བཅས་མཆོད་པར་བགྱི། གསུམ་པ་བཤགས་པ་ནི། ཐོག་མེད་དུས་ནས་ཉོན་མོངས་དབང་གྱུར་ཏེ། །མི་དགེ་བཅུ་དང་མཚམས་མེད་ལྔ་ལ་སོགས། །གང་ཡང་ལུས་ངག་ཡིད་ཀྱིས་སྡིག་པའི་ལས། །ཇི་སྙེད་བགྱིས་པ་ཐམས་ཅད་སོ་སོར་བཤགས། །དཀོན་མཆོག་གསུམ་དང་མཁན་སློབ་ཕ་མ་དང་། །དམ་ཆོས་སྨྲ་བ་རྣམས་ལ་མ་ཞུས་ཤིང་། །ལས་དང་འབྲས་བུའི་བླང་དོར་ཕྲ་རགས་ལ། །རྨོངས་པས་ལོག་ལྟ་བྱས་རྣམས་མཐོལ་ལོ་བཤགས། །སོ་ཐར་བྱང་སེམས་གསང་སྔགས་སྡོམ་པ་ཡི། །བསླབ་བྱ་རྣམས་དང་འགལ་བར་རབ་ཏུ་སྤྱད། །འཕགས་པའི་ཚོགས་རྣམས་མཉེས་པར་མི་འགྱུར་བའི། །བཅས་རང་སྡིག་ལྟུང་ཀུན་ཀྱང་སོ་སོར་བཤགས། །མདོར་ན་མཐོ་རིས་ཐར་པའི་གེགས་བྱེད་ཅིང་། །ངན་སོང་འཁོར་བའི་རྒྱུར་གྱུར་ཉེས་པའི་ཚོགས། །གང་ཡིན་དེ་ཀུན་མི་འཆབ་འགྱོད་སེམས་ཀྱིས། །བཤགས་ཤིང་སླན་ཆད་མི་བགྱིད་ཡང་དག་སྡོམ། །ཡན་ལག་ལྷག་མ་རྣམས་ནི། རང་བཞིན་སྐྱེ་འཕགས་ཡོངས་ཀྱིས་དུས་གསུམ་དུ། །བསགས་པའི་རྣམ་དཀར་ཕུང་བོ་ཇི་སྙེད་དང་། །སྲས་བཅས་རྒྱལ་བའི་མཛད་པ་མཐའ་དག་ལ། །བསམ་པ་ཐག་པས་རྗེས་སུ་ཡི་རང་ངོ་། །མ་ལུས་ཕྱོགས་བཅུའི་ཞིང་ན་རབ་བཞུགས་པའི། །རྒྱལ་བ་སྲས་བཅས་ཉན་རང་འཕགས་ཚོགས་ལ། །འགྲོ་རྣམས་ཕན་བདེའི་དཔལ་ལ་འགོད་པའི་ཆེད། །ཟབ་དང་རྒྱ་ཆེའི་ཆོས་འཁོར་བསྐོར་བར་བསྐུལ། །གང་དག་མྱ་ངན་འདའ་ཚུལ་སྟོན་བཞེད་པ། །དེ་ཀུན་ཇི་སྲིད་འཁོར་བའི་ཕྱི་མཐའི་རྒྱུན། །མ་སྟོང་དེ་སྲིད་དུ་ཡང་འཇིག་རྟེན་འདིར། །མྱ་ངན་མི་འདའ་རྟག་པར་ལེགས་བཞུགས་གསོལ། །འདི་ལྟར་བགྱིས་པ་ལས་བྱུང་རྣམ་དཀར་དགེ །དུས་གསུམ་ལེགས་ཚོགས་གཅིག་ཏུ་བསྡོམས་བྱས་གང་། །མཐའ་ཡས་སེམས་ཅན་ཀུན་གྱི་དོན་གྱི་ཕྱིར། །བླ་མེད་རྫོགས་པའི་བྱང་ཆུབ་ཐོབ་ཕྱིར་བསྔོ། །མཆོག་གསུམ་སྐྱབས་མགོན་དམ་པ་འཁོར་བཅས་ལ། །བདག་ནི་གདུང་ཤུགས་དྲག་པོས་གུས་གསོལ་བས། །ངེས་འབྱུང་བྱང་སེམས་ཡང་དག་ལྟ་བ་སོགས། །མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །དེ་ཡི་མཐུ་ལས་ཚེ་རབས་ཐམས་ཅད་དུ། །མི་ཁོམ་ལས་གྲོལ་དལ་པའི་རྟེན་ཐོབ་ཅིང་། །དུས་ཀུན་དགེ་བའི་བཤེས་དང་འཕྲད་གྱུར་ནས། །མདོ་སྔགས་དམ་ཆོས་མ་ལུས་འཛིན་པར་ཤོག །ཅེས་བྱའོ། །ཡང་ན་ཡན་ལག་དང་པོ་གསུམ་ལ། སངས་རྒྱས་ཐམས་ཅད་འདུས་སོགས་དང་། བླ་མ་སངས་རྒྱས་སོགས། སྐུ་འགྱུར་བ་མེད་སོགས་དང་། ཟབ་མོ་ལྟ་བའི་སོགས་དང་། རབ་འབྱམས་གསུང་རབ་སོགས་དང་སངས་རྒྱས་རྣམ་གཟིགས་སོགས་དང་། མཚན་ལེགས་རིན་ཆེན་སོགས་དང་། མཐུན་པའི་སྨོན་ལམ་སོགས་དང་། ཕྱོགས་བཅུའི་འགྲོ་ལ་སོགས་དང་། མར་མེ་མཛད་སོགས་སོགས་དང་། སྨྲ་བསམ་བརྗོད་མེད་སོགས་དང་། ཀུན་འབྱུང་མུན་པའི་སོགས་དང་། འཇམ་དབྱངས་ཕྱག་ན་སོགས་དང་། སྤངས་དང་ཡེ་ཤེས་སོགས་དང་། སྟོན་པ་སངས་རྒྱས་སོགས་དང་། སྒྲུབ་པ་པོ་ལ་སོགས་དང་། དཔལ་ལྡན་དུས་འཁོར་རྗེ་བཙུན་སྒྲོལ་མ་རྣམ་རྒྱལ་སོགས་དང་། བཅོམ་ལྡན་འདས་ཀྱི་སོགས་ཅི་རིགས་ཀྱིས་ཕྱག་འཚལ་བ་དང་། མེ་ཏོག་དམ་པ་ནས་མཆོད་པར་བགྱིའི་བར་དང་། བདག་གཞན་ལུས་ངག་སོགས་ཀྱིས་མཆོད་པ་འབུལ་བ་དང་། ལུས་ཀྱི་ལས་ནི་སོགས་དང་། ཐོག་མ་མེད་ནས་སོགས་ཀྱིས་བཤགས་པ་བྱས་ཀྱང་རུང་ལ། ཡན་ལག་ལྷག་མ་ནི་སྔར་ལྟར་རོ། བདུན་པོ་ཤིན་ཏུ་བསྡུ་ན། ཇི་སྙེད་སུ་དག་སོགས་ཀྱིས་བྱའོ། །དེ་ཡང་ཕྱག་འཚལ་དང་མཆོད་པ་བསྐུལ་བ་གསོལ་བ་རྗེས་སུ་ཡི་རང་བ་རྣམས་ནི་མཐུན་རྐྱེན་ཚོགས་གསོག་པའི་ཡན་ལག་དང་། བཤགས་པའི་འགལ་རྐྱེན་སྡིག་སྒྲིབ་སྦྱོང་བ་ཡིན་ལ། བསྔོ་བ་ནི་དགེ་བ་རྣམས་ལས་ཆུང་ངུ་ཆེན་པོ་དང་ཉུང་ངུ་མང་བོར་སྤེལ་ཞིང་འབྲས་བུ་ནམ་ཡང་མི་ཟད་པའི་ཐབས་སོ། །དེར་མ་ཟད་ཡོན་ཏན་དང་ཡོན་ཏན་ཅན་ནམ་དགེ་བ་བྱེད་པ་གཞན་ལ་དགའ་ཞིང་དེ་དག་གི་དགེ་བ་ལ་རྗེས་སུ་ཡི་རང་བར་བྱས་ན་ཕན་ཡོན་ཆེན་པོ་ཐོབ་ཅིང་རང་གིས་བྱས་པའི་དགེ་བ་ལ་དགའ་བ་བསྒོམས་ན་དགེ་བ་གོང་འཕེལ་དུ་འགྲོ་བར་བཤད་པས། དེའི་ཤུགས་ཀྱིས་ན་གཞན་དང་དེའི་དགེ་བ་བྱེད་པ་ལ་ཕྲག་དོག་གིས་མི་དགའ་བའམ། རང་གིས་བྱས་པའི་དགེ་བ་ལ་ཕྱིས་འགྱོད་པར་གྱུར་ན་ནི་རང་གི་བསོད་ནམས་དང་དགེ་བ་འགྲིབ་པར་འགྱུར་བ་བསྟན་ཏོ། །ཡན་ལག་དེ་དག་བསྡུ་ན་ཚོགས་གསོག་སྒྲིབ་སྦྱོང་གཉིས་སུ་འདུ་སྟེ། གཉིས་ཀ་འགལ་བ་ཡང་མིན་ནོ། །དེ་ལྟར་ཡན་ལག་བདུན་པ་ལ་རིང་དུ་འབད་ན་ནི་གནས་སྐབས་དང་མཐར་ཐུག་གི་དོན་ཆེན་པོ་རྣམས་འགྲུབ་པར་འགྱུར་ཞིང་། ཁྱད་པར་དུའང་དེང་དུས་བསྡུས་ལམ་གྱི་ཡོན་ཏན་ཕྲན་ཚེགས་རྒྱུད་ལ་སྐྱེ་བ་ནི། རྟེན་གྱི་དྲུང་དུ་ཚོགས་གསོག་སྒྲིབ་སྦྱོང་བྱེད་པ་ལ་རག་ལས་པ་ཡིན་ཏེ། ལམ་རིམ་ཆེན་མོ་ལས། ལམ་རྒྱུད་ལ་སྐྱེ་བའི་མཐུན་རྐྱེན་ཚོགས་བསག་པ་དང་འགལ་རྐྱེན་སྒྲིབ་པ་སྦྱོང་བའི་ལྷན་ཅིག་བྱེད་རྐྱེན་མེད་ན་ཉེར་ལེན་གྱི་རྒྱུ་དམིགས་རྣམ་སྐྱོང་བ་ཙམ་ལ་འབད་ཀྱང་ལམ་ཤིན་ཏུ་སྐྱེ་དཀའ་བས་བསག་སྦྱང་གི་གནད་བསྡུས་པའི་ཡན་ལག་བདུན་པས་རྒྱུད་སྦྱང་དགོས་སོ། །ཞེས་དང་། དེ་ལྟར་ཞིང་དམ་པ་ལ་དགེ་རྩ་བསྐྲུན་པའི་མཐུ་ལས་ལམ་གྱི་རིམ་པ་རྣམས་ལ་བློའི་མཐུ་ཇེ་རྒྱས་སུ་འགྲོ་བས། མཉན་ན་ཚིག་མི་ཟིན། བསམས་ན་དོན་མི་གོ །བསྒོམས་ན་རྒྱུད་ལ་མི་སྐྱེ་བའི་བློའི་མཐུ་ཤིན་ཏུ་ཆུང་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཡིན་ནོ། །ཞེས་གསུངས་པས་སོ། །སྨྲས་པ། གསུང་རབ་དགོངས་འགྲེལ་ཀུན་གྱི་བརྗོད་བྱའི་དོན། །མཆོག་དམན་བར་མའི་ཁྱད་པར་གྱིས་ཕྱེ་སྟེ། ལག་ཏུ་ལེན་པའི་རིམ་པ་ཆེས་མང་ཡང་། །གནད་ཀུན་གཅིག་བསྒྲིལ་ཡན་ལག་བདུན་པའོ། །ཚུལ་འདི་སྔོན་བྱོན་བཤེས་གཉེན་དུ་མས་ཀྱང་། །དུས་ཀུན་ཉམས་ལེན་གཙོ་བོར་མཛད་གྱུར་ན། །དེང་དུས་སྙིགས་མར་སྤྱོད་པ་བདག་ཅག་གིས། །འཇུག་བྱའི་སྙིང་བོ་ཉིད་དུ་ཅིས་མི་འཐད། །དེ་ཕྱིར་གཞན་ལ་ཕན་འདོད་ལྷག་བསམ་གྱིས། །འདིར་འབད་ལས་བྱུང་དགེ་ཚོགས་ཅི་མཆིས་པ། །བསྟ ན་དང་འགྲོ་ལ་ཡུན་རིང་ཕན་པ་དང་། །མཐར་ཡང་སངས་རྒྱས་འགྲུབ་པའི་རྒྱུར་བསྔོའོ། །ཅེས་པ་འདི་ནི། དད་དང་རྣམ་དཔྱོད་ལྡན་པའི་གནས་བརྟན་དཔལ་འབྱོར་རྒྱ་མཚོས་བསྐུལ་བའི་ངོར་ཤཱཀྱའི་དགེ་སློང་རབ་འབྱམས་སྨྲ་བ་བཤད་སྒྲུབ་མིང་ཅན་གྱིས་རྒྱས་བསྡུས་ཅི་ལྟར་འཚམས་པ་ཉིད་དུ་ལེགས་པར་སྦྱར་བས། གཞན་ལ་ཕན་ཐོགས་པར་གྱུར་ཅིག །འདིས་ཀྱང་ཀུན་མཁྱེན་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག ། མངྒ་ལཾ།། །།