དུས་ཚིགས་ཀྱི་རྣམ་གཞག་ལེགས་པར་བཤད་པའི་ཕྲེང་བ།

དུས་ཚིགས་ཀྱི་རྣམ་གཞག་ལེགས་པར་བཤད་པའི་ཕྲེང་བ་ཞེས་བྱ་བ་བཞུགས།

ན་མོ་ཤྲཱི་མཛྙུ་གྷོ་ཥཱ་ཡ། དུས་གསུམ་ཇི་སྙེད་ཤེས་བྱའི་ཆོས་རྣམས་དང་། །སྣོད་བཅུད་ཀུན་གྱི་གནས་ཚུལ་ཇི་ལྟ་བར། །མངོན་སུམ་གཟིགས་ནས་སྟོན་མཛད་སྐྱབས་ཀྱི་ཕུལ། །ཐུབ་དབང་དུས་ཀྱི་འཁོར་ལོའི་ཞབས་ལ་འདུད། །རྒྱལ་བས་ལོ་ཟླ་ཞག་གསུམ་ལས་བརྩམས་ཏེ། །ཆོས་ཚུལ་ཇི་སྙེད་གསུངས་པ་ཐམས་ཅད་ཀྱང་། །དུས་ཚིགས་རྣམ་པར་གཞག་པའི་རིམ་པ་ལས། །མ་འདས་འདིར་ནི་དེ་ཡི་རྣམ་གཞག་བཤད། །དེ་ཡང་གསུང་རབ་དགོངས་འགྲེལ་དུ་མ་ལས་དུས་ཚིགས་ཀྱི་རྣམ་གཞག་བཤད་ཀྱང་འདིའི་སྐོར་ལ་ལུང་ལས་བསྟན་ཚུལ་དང་། གྲུབ་མཐའི་ཁྱད་པར་དང་། མཁས་པ་སྔ་ཕྱི་དུ་མའི་བཞེད་པ་མི་འདྲ་བ་མང་དུ་སྣང་ངོ་། །འདིར་དེ་དག་ལ་དགག་སྒྲུབ་བཏང་སྙོམས་སུ་བྱས་ཏེ། འདུལ་མངོན་ཁོ་ན་གཙོ་བོར་མི་བྱེད་པར་རང་ལུགས་ཀྱི་རྣམ་གཞག་རྒྱས་བསྡུས་འཚམ་པ་ཞིག་བཤད་པར་བྱའོ། །འདི་ལ་བདུན། ལོ་ཟླ་ཞག་གསུམ་ཇི་ལྟར་འགྲུབ་པའི་ཚུལ། ལོ་ཟླ་ཞག་གསུམ་གྱི་རྣམ་གཞག །ཡོལ་དུས་ཚིགས་ཀྱི་རྣམ་གཞག །དུས་ཚིགས་ལ་བརྟེན་ནས་ལོ་འགོ་འཛིན་ཚུལ། གསོ་སྦྱོང་དབྱར་གནས་སོགས་འབྱུང་བའི་དུས། དེ་དག་ལས་འཕྲོས་པའི་དོན། མཁས་པར་བྱས་པའི་དགོས་པའོ། །དང་པོ་ནི། སྤྱིར་དུས་མཐའི་སྐད་ཅིག་མ་གཅིག་ནི་དུས་ཀྱི་ཐུང་མཐའ་ཡིན་ཞིང་། དེའི་ཡུན་ནི། འདུལ་བ་དང་ལུང་གི་མངོན་པ་ལྟར་ན་སེ་གོལ་གཅིག་ཏོག་པའི་ཡུན་ཚད་ལ་ཆ་དྲུག་ཅུ་རྩ་བཞིར་བྱས་པའི་ཆ་རེ་རེ་དུས་མཐའི་སྐད་ཅིག་མ་རེ་རེ་ཡིན་པར་འདོད་ལ། རིགས་པའི་མངོན་པ་བས་ནི་རྣམ་འགྲེལ་ལས། རྡུལ་གཅིག་བགྲེ་དུས་ཆུང་བ་ཡི། །མཐར་ཐུག་དུས་ཀྱང་སྐད་ཅིག་འདོད། །ཅེས་གསུངས་པ་ལྟར། རྡུལ་ཕྲ་རབ་གཅིག་གོས་གཅིག་ནས་གཅིག་ཏུ་འགྲེ་བའི་ཡུན་ཚད་ལ་དུས་མཐའི་སྐད་ཅིག་མར་འདོད་དོ། །དེ་ལྟ་བུའི་དུས་མཐའི་སྐད་ཅིག་མ་བརྒྱ་ཉི་ཤུ་ལ་དེའི་སྐད་ཅིག་མ་གཅིག །དེ་དྲུག་ཅུ་ལ་ཐང་གཅིག །དེ་སུམ་ཅུ་ལ་ཡུད་ཙམ་གཅིག །དེ་སུམ་ཅུ་ལ་ཉིན་ཞག་གཅིག །དེ་སུམ་ཅུ་ལ་ཟླ་བ་གཅིག དེ་བཅུ་གཉིས་སོང་བ་ལ་ལོར་འཇོག་པ་ཡིན་ཏེ། མཛོད་ལས། སྐད་ཅིག་མ་བརྒྱ་ཉི་ཤུ་ལ། །དེ་ཡི་སྐད་ཅིག་དེ་དག་ཀྱང་། །དྲུག་ཅུ་ལ་ནི་ཐང་གཅིག་གོ །ཡུད་ཙམ་ཉིན་ཞག་ཟླ་གསུམ་ནི། །གོང་ནས་གོང་དུ་སུམ་ཅུ་འགྱུར། །ཞག་མི་ཐུབ་དང་བཅས་པ་ཡི། །ཟླ་བ་བཅུ་གཉིས་ལ་ལོ་གཅིག །ཞེས་གསུངས་པའི་ཕྱིར་རོ། །དུས་འཁོར་བལྟར་ན། སྐྱེས་བུའི་དབུགས་ཕྱི་ནང་དུ་རྒྱུ་བའི་ཁུག་པ་གཅིག་ལ་དབུས་གཅིག་ཏུ་བྱས་པ་དྲུག་ལ་ཆུ་སྲང་གཅིག །ཆུ་སྲང་དྲུག་ཅུ་ལ་ཆུ་ཚོད་གཅིག །ཆུ་ཚོད་ང་དགུ་རྗེས་འབྲང་དང་བཅས་པ་ལ་ཚེས་ཞག་གཅིག་དང་། ཆུ་ཚོད་དྲུག་ཅུ་ལ་ཉིན་ཞག་གཅིག །དེ་སུམ་ཅུ་ལ་ཟླ་བ་དང་། ཟླ་བ་བཅུ་གཉིས་ལ་ལོར་འཇོག་པ་ཡིན་ཞིང་། ཉིན་ཞག་གཅིག་ལ་ནི་དབུགས་ཉིས་ཁྲི་ཆིག་སྟོང་དྲུག་བརྒྱ་རྒྱུའོ། །གཉིས་པ་ལ་གསུམ། ཞག་གི་ཁྱད་པར། ཟླ་བའི་ཁྱད་པར། ལོའི་ཁྱད་པར་རོ། །དང་པོ། ཞག་ལ་གསུམ་སྟེ། ཚེས་ཞག་དང་། ཉིན་ཞག་དང་། ཁྱིམ་ཞག་གོ །འདི་དག་གི་འཇོག་ཚུལ་ནི་བཻ་དཀར་ལས། ཐོག་མར་སོ་སོའི་ངོས་འཛིན་ནི། །ཟླ་བའི་འཕེལ་འགྲིབ་བཅོ་ལྔ་ཆའི། །ཆ་རེ་རྫོགས་ཚེ་ཚེས་ཞག་ཡིན། །ནམ་ལངས་ལག་རིས་མཐོང་བ་ནས། །རྗེས་མའི་ལག་རིས་མཐོང་བའི་བར། །ཉིན་གྱི་ཞག་པོ་ཕྲུགས་གཅིག་ཡིན། །ཉི་མས་ཁྱིམ་གཅིག་སྤྱོད་པའི་ཡུན། །སུམ་ཅུར་ཕྱེ་བ་ཁྱིམ་ཞག་བརྗོད། །ཅེས་གསུངས་པ་ལྟར་གསུམ་གྱི་དང་པོ་ཚེས་ཞག་ནི་ཟླ་བ་འཕེལ་འགྲིབ་ཀྱི་སྒོ་ནས་འཇོག་སྟེ། དེ་ཡང་ཟླ་བའི་ཡར་ངོ་ལ་འཕེལ་བའི་ཆ་བཅོ་ལྔ་དང་མར་ངོ་ལ་འགྲིབ་པའི་ཆ་བཅོ་ལྔ་ཡོད་པའི་ཆ་རེའི་ཡུན་ལ་ཚེས་ཞག་རེར་འཇོག་པའི་ཕྱིར་ཏེ། ཟླ་བའི་རྒྱར་དཔག་ཚད་ལྔ་བཅུ་ཡོད་ཅིང་། དཔག་ཚད་གསུམ་དང་སུམ་ཆ་རེ་འཕེལ་གྲིབ་བྱེད་པའི་ཡུན་ཚད་ལ་ཆུ་ཚོད་ང་དགུ་དང་ཆུ་སྲང་གསུམ་དབུགས་བཞི་ཆ་ཤས་བཅུ་དྲུག་ཙམ་རེ་ཡོད་པས་དེ་ལ་ཚེས་ཞག་རེའི་ཐ་སྙད་བྱེད་པའི་ཕྱིར་རོ། །གཉིས་པ་ཉིན་ཞག་ནི། ཉི་མས་གླིང་ལ་བྱ་བ་བྱེད་པའི་སྒོ་ནས་བཞག་པ་ཡིན་ལ། དེ་ཡང་བཻ་དཀར་ལྟར་མཁས་པ་ཁ་ཅིག་ནི། ནམ་ལངས་ལག་པའི་རི་མོ་མཐོང་བ་ནས་ཕྱི་མའི་ལག་རིས་མཐོང་ཁ་མའི་བར་བཞེད་ལ། འདུལ་མངོན་གྱི་གཞུང་འགའ་ཞིག་ལས། ནམ་ལངས་ནས་ནམ་ལངས་ཀྱི་བར་བཞེད་པ་ཕལ་ཆེར་ནི་སྔ་མ་དང་འདྲ་བར་སེམས་ཤིང་། འདུལ་མངོན་གྱི་གཞུང་ལ་ལར་ཞག་སྔོན་མའི་སྐྱ་རེངས་ཤར་བ་ནས་བྱི་མའི་སྐྱ་རེངས་མ་ཤར་ཙམ་གྱི་བར་ལ་འཇོག་པར་སྣང་སྟེ། སྐྱ་རེངས་ཡང་དང་པོ་ཤར་བ་དང་ཐ་མ་ཤར་བ་ལ་བཞེད་པའི་ཚུལ་གཉིས་སྣང་ངོ་། །གང་ལྟར་ཡང་ཉིན་ཞག་གཅིག་ལ་ཆུ་ཚོད་དྲུག་ཅུའམ་ཡུད་ཙམ་སུམ་ཅུ་རེ་ལྷག་ཆད་མེད་པར་འོང་བས། ཉིན་ཞག་གི་ཐོག་མ་སྐྱ་རེངས་དང་པོ་ཤར་བ་ལ་འདོད་ན་ནི་ཉིན་མཚན་གྱི་རིང་ཐུང་མཉམ་པ་ཞིག་ཅི་ལྟ་བ་བཞིན་འཇོག་དཀའ་བའི་གནོད་བྱེད་ཡོད་སྙམ་སྟེ། དེ་ལྟར་ན་སྐྱ་རེངས་དང་པོའི་དུས་དེ་མཚན་དུས་སུ་ཁས་བླང་དུ་མི་རུང་བས་ཉིན་དུས་སུ་ཁས་བླང་དགོས་ཤིང་། དེ་ལེན་ན་ཉི་མ་ནུབ་ནས་མཚན་མོ་འབྱུང་བར་ནི་ཐམས་ཅད་ཀྱིས་འདོད་པས། སྟོན་དཔྱིད་ཉིན་མཚན་མཉམ་པའི་དུས་ལྟ་བུའི་མཚན་དུས་དེ་ཉིན་དུས་ལས་ཤིན་ཏུ་ཐུང་བར་ཁས་ལེན་དགོས་པར་འགྱུར་བའི་ཕྱིར་རོ། །འོན་ཀྱང་འདི་བཞེད་མཁན་མང་བས་བརྟག་པར་བྱ་བའི་གནས་སོ། །མཐའ་གཅིག་ཏུ་དགག་མི་ནུས་ཏེ། འབྲལ་སྤང་གི་སྐབས་ལྟར་ན་དོགས་གཞི་ཤིན་ཏུ་ཆེ་བའི་ཕྱིར་ཏེ། ཁ་ཅིག་འབྲལ་སྤང་འབྱུང་བའི་དུས་ཀྱི་ཐོག་མ་དང་། སྤྱིར་ཉིན་མཚན་གྱི་ཐོག་མའི་དུས་གཉིས་འདྲ་བར་འདོད་ཅིང་། ཁ་ཅིག་དེ་གཉིས་མི་འདྲ་བར་འདོད་པའི་ཚུལ་གཉིས་ཡོད་པའི་ཕྱིར་རོ། །ཡང་སྐྱ་རེངས་ཤར་ནས་འོད་དམར་གྱི་བར་ཉིན་མོ་དང་། དེ་ནས་མཚན་མོའི་མཐའི་སྐད་ཅིག་མའི་བར་མཚན་མོར་འཇོག་པར་སྣང་ཡང་། གཞུང་གཞན་དུ་བསྙེན་གནས་དང་སྨྱུང་གནས་གཉིས་ཉིན་ཞག་གི་ཐོག་མའི་ནངས་པར་ལེན་དགོས་པར་བཤད་པའི་རིགས་པ་དང་། ཁྱད་པར་དུ་མཁས་གྲུབ་ནོར་བཟང་རྒྱ་མཚོས་དུས་བཞི་གཡས་སྐོར་གསལ་བའི་སྒྲོན་མེ་ལས། ཉིན་ཚད་ནི་ནམ་ལངས་ལག་རིས་མཐོང་བ་ནས་ཕྱི་དྲོའི་མཐའི་ལག་རིས་མཐོང་བའི་བར་ལ་བཤད་པས་མཚན་མོ་ཡང་དེར་ཤེས་ཤིང་། བཻ་དཀར་གྱི་བཞེད་པ་ཡང་དེ་དང་འདྲ་བས་དེ་ལྟར་བྱས་ན་ལེགས་སྙམ་མོ། །གསུམ་པ་ཁྱིམ་ཞག་ནི། ཉི་མས་རྒྱུ་སྐར་ཉེར་བདུན་ལ་རང་འགྲོས་ཀྱི་ཚུལ་གྱིས་ལོངས་སྤྱོད་པའི་ཆ་ལ་ཁྱིམ་བཅུ་གཉིས་ཡོད་ཅིང་། ཁྱིམ་རེ་རེ་ལའང་ཆ་སུམ་ཅུ་རེ་ཡོད་པའི་ཆ་རེའི་ཡུན་ཚད་ལ་ཁྱིམ་ཞག་རེར་འཇོག་གོ ཁྱིམ་ཞག་རེ་རེའི་ཡུན་ཚད་ལ་ནི། ཆུ་ཚོད་དྲུག་ཅུ་དང་ཆུ་སྲང་ང་གཉིས་དབུགས་བཞི་ཆ་ཤས་བརྒྱ་རེ་བརྒྱད་བཅས་འབྱུང་ལ། ལྷག་མ་ནི་འཆད་པར་འགྱུར་རོ། །ཞག་གསུམ་པོ་དེ་ལ་དངོས་བརྟགས་ཀྱི་ཁྱད་པར་ཡོད་དམ་ཞེ་ན། མཁས་པ་ཁ་ཅིག་ཞག་གསུམ་ཀ་ཞག་མཚན་ཉིད་པར་བཞེད་ལ། ཁ་ཅིག་ཞག་ལ་ཉིན་ཞག་དབང་བཙན་པས། ཉིན་ཞག་མ་གཏོགས་གཞན་གཉིས་ཞག་བཏགས་པ་བར་འདོད་དོ། །ཞག་ཞེས་པ་ནི་མཚན་མོ་ཁོ་ན་ལ་མི་བཟུང་སྟེ། ཆེས་ཞག་ནི་ཉིན་མཚན་གཉིས་ཀ་ལ་འོང་ཞིང་། ཉིན་ཞག་ཅེས་པ་ཡང་ཉིན་མཚན་བསྡོམས་པ་ལ་བྱེད་ཀྱི། མཚན་ཁོ་ན་ལ་མི་བྱེད་པའི་ཕྱིར་དང་། ཁྱིམ་ཞག་གི་ཆ་ཡང་ཉིན་མཚན་གཉིས་ཀ་ལ་འོང་བའི་ཕྱིར་རོ། །གཉིས་པ་ཟླ་བ་ལ་གསུམ་སྟེ། ཚེས་ཟླ། ཉིན་ཞག་གི་ཟླ་བ། ཁྱིམ་ཟླའོ། །འདི་གསུམ་ལའང་རང་རང་གི་ཞག་སུམ་ཅུ་རེ་ལོངས་པ་ན་རང་རང་གི་ཟླ་བ་རེར་འཇོག་ལ། དེ་ཡང་ཚེས་ཟླ་ལས་ཉིན་ཞག་གི་ཟླ་བ་རིང་ལ་དེ་ལས་ཀྱང་ཁྱིམ་ཟླ་རིང་ངོ་། །ཡང་ཟླ་བ་དེ་ལ་ཉི་སྐར་གྱི་དབང་དུ་བྱས་ན་མགོ་ཟླ་བ་སོགས་བཅུ་གཉིས་དང་། བདག་པོའི་དབང་དུ་བྱས་ན་སྟག་གི་ཟླ་བ་སོགས་བཅུ་གཉིས་དང་། དུས་ཀྱི་དབང་དུ་བྱས་ན་དགུན་ཟླ་དང་པོ་སོགས་བཅུ་གཉིས་སམ་དབྱེ་བ་གཞན་ཡང་ཡོད་དོ། ཁྱིམ་གྱི་དབང་དུ་བྱས་ན་ཁྱིམ་ཟླ་བཅུ་གཉིས་ཡོད་དེ། གཞུ་དང་ཆུ་སྲིན་བུམ་པ་ཉ། ལུག་གླང་འཁྲིག་པ་ཀརྐ་ཊ། །སེང་གེ་བུ་མོ་སྲང་སྡིག་པ། །ཞེས་འབྱུང་བ་ལྟར་ཡོད་པའི་ཕྱིར་རོ། །གཞུ་ཆུ་སྲིན་བུམ་པ་གསུམ་དགུན་དུས་ཀྱི་ཁྱིམ་རབ་འབྲིང་ཐ་གསུམ། དེ་བཞིན་དུ་ཉ་ལུག་གླང་གསུམ་དཔྱིད་དུས་ཀྱི། །འཁྲིག་པ་ཀརྐ་ཊ་སེངྒེ་གསུམ་དབྱར་དུས་ཀྱི། བུ་མོ་སྲང་སྡིག་པའི་ཁྱིམ་གསུམ་སྟོན་དུས་ཀྱི་ཁྱིམ་མོ། །དེ་ཡང་གླིང་འདིའི་དབང་དུ་བྱས་ཀྱི། གཞན་དུ་ན་གཞུ་ཁྱིམ་ཉིད་ཤར་དུ་དཔྱིད་དུས་ཀྱི་ཁྱིམ་དུ་འགྱུར་བ་སོགས་ཡོད་དོ། །ཡུན་ཚད་ནི། ཉི་མས་རྒྱུ་སྐར་ཉེར་བདུན་གྱི་ནང་ནས་རྒྱུ་སྐར་གཉིས་དང་གཅིག་གི་རྐང་པའི་བཞི་ཆ་རེ་ལ་རང་འགྲོས་ཀྱི་ཚུལ་གྱིས་ལོངས་སྤྱོད་པའི་ཡུན་ཚད་རེ་ལ་ཁྱིམ་ཟླའམ་ཁྱིམ་རེ་རེར་འཇོག་སྟེ། ཇི་སྐད་དུ། སྣུབས་སྐར་ནས་བཟུང་ཆུ་སྨད་བཞི་ཆ་གཞུ། །ཆུ་སྨད་བཞི་ཆ་མོན་ཕྱེད་ཆུ་སྲིན་ཁྱིམ། །མོན་ཕྱེད་ནས་ནི་ཁྲུམས་སྟོད་ཞི་གསུམ་བུམ། །ཁྲུམས་སྟོད་བཞི་ཆ་ནམ་གྲུ་རྫོགས་པ་ཉ། །ཐ་སྐར་ནས་བཟུང་སྨིན་དྲུག་བཞི་ཆ་ལུག །མགོ་ཕྱེད་གླང་དང་ནམ་སོའི་བཞི་གསུམ་འཁྲིག །སྐག་རྫོགས་ཀརྚ་དབོ་ཡི་བཞི་ཆ་སེང་། ནག་ཕྱེད་བུ་མོ་ས་གྷའི་བཞི་གསུམ་སྲང་། །ས་གའི་བཞི་ཆ་སྣྲོན་རྫོགས་སྡིག་པའི་ཁྱིམ། །ཞེས་འབྱུང་བ་ལྟར་རོ། །དེ་ཡང་ཉི་མ་དགུན་ཟླ་ར་བ་གཞུ་ཁྱིམ་ན་གནས་པའི་དུས་སུ་སྐར་མ་སྣུབས་དང་ཆུ་སྟོད་གཉིས་དང་ཆུ་སྨད་ཀྱི་བཞི་ཆ་ལ་ལོངས་སྤྱོད་པ་ཡིན་ཞིང་། ཉི་མ་དཔྱིད་འབྲིང་ལུག་ཁྱིམ་དུ་གནས་པའི་ཚེ་དབྱུག་པ་བྲ་ཉེ་གཉིས་དང་སྨིན་དྲུག་གི་བཞི་ཆ་དང་། ཉི་མ་སྟོན་ཟླ་ཐ་ཆུང་སྡིག་པའི་ཁྱིམ་ན་གནས་པའི་ཚེ་ས་གའི་བཞི་ཆ་ལྷ་མཚམས་སྣྲོན་གསུམ་ལ་གཡོན་སྐོར་གྱི་ཚུལ་གྱིས་རང་འགྲོས་སུ་སྤྱོད་པ་སྟེ། གཞན་ལའང་རིགས་པ་སྦྱོར། དེ་ལྟར་ཁྱིམ་བཅུ་གཉིས་པོ་རེ་རེ་ལ་རྒྱུ་སྐར་གཉིས་གཉིས་དང་གཅིག་གི་རྐང་བའི་བཞི་ཆ་རེ་ཡོད་ཅིང་རྒྱུ་སྐར་རེ་རེ་ལ་རྐང་བ་བཞི་བཞི་ཡོད་པས་རྒྱུ་སྐར་གཉིས་དང་བཞི་ཆའི་རྐང་བའི་ཁྱོན་བསྡོམས་ན་ཁྱིམ་རེ་རེར་རྒྱུ་སྐར་གྱི་རྐང་བ་དགུ་རེ་ཐོབ་ལ། རྐང་བ་རེར་ཡུལ་གྱི་ཆུ་ཚོད་བཅོ་ལྔ་རེའི་ཡུན་ཚད་ཡོད་དོ། །བཅོ་ལྔ་བ་དགུ་ཕྲག་གཅིག་ལ་སོ་སོར་ཕྱེ་ན་ཆུ་ཚོད་བརྒྱ་དང་སུམ་ཅུ་རྩ་ལྔ་འབྱུང་བ་ནི། རྩིས་ཀྱི་རི་མོ་ནས་འབྱུང་བའི་མདའ་ཡོན་ཟླ་བའི་གོ་དོན་ནོ། །གཞན་ཡངས་རིས་ཀྱི་ཟླ་དག་གནས་གཉིས་སུ་བྱས་པའི་ཐོག་མ་ནི་འདས་པའི་ལོ་རྣམས་ཀྱི་ཁྱིམ་ཟླའི་གྲངས་ཡིན་ལ། འོག་མ་བསྒྱུར་ནས་ཐོབ་ནོར་སྟེར་མར་བསྲེས་པ་ནི་ཚེས་ཟླའི་གྲངས་ཡིན་ཞིང་། ཐོབ་ནོར་ནི་དེའི་བར་གྱི་ཟླ་ལྷག་གི་གྲངས་ཡིན་ཏེ་ཚེས་ཟླའོ། །འོག་མའི་འགོ་བྱེད་རེ་ལྔས་བྱེད་པ་ནི་ལོ་གཉིས་དང་ཟླ་བ་ཕྱེད་དང་དགུ་ནས་ཟླ་ལྷག་རེ་འབྱུང་བ་དེ་འདོན་པའི་ཆེད་དུ་བྱ་སླ་བའི་དབང་དུ་བྱས་པ་ཡིན་ཏེ། ལོ་གཉིས་ལ་ཟླ་བ་བཅུ་བཞི་ཡོད་ཅིང་དེའི་སྟེང་དུ་ཟླ་བ་ཕྱེད་དང་དགུ་བསྣན་ཏེ་བསྡོམས་པས་ཟླ་བ་སོ་གཉིས་དང་ཕྱེད་འབྱུང་ཡང་ཕྱེད་དེ་ལ་བྱེད་མ་བདེ་བས་བདེ་བའི་ཕྱིར་དུ་གཉིས་ཀྱིས་བསྒྱུར་ཏེ་མདའ་རོར་བྱས་པ་སྟེ་ཞར་བྱུང་ངོ་། །ཟླ་བ་གསུམ་ལས་གང་གཙོ་ཞེ་ན། ཁ་ཅིག་ཟླ་བ་གསུམ་པོ་དེ་ལ་གཙོ་ཕལ་ལམ། དངོས་བཏགས་ཀྱི་དབྱེ་བ་མི་མཛད་ལ། །མཁས་པ་མང་པོས་ཟླ་བ་ལ་ཚེས་ཟླ་གཙོ་ཆེ་བས་གཞན་གཉིས་ཟླ་བ་བཏགས་པ་བར་བཞེད་དོ། །གཙོ་ཆེ་ལུགས་ནི། ས་རིས་ཀྱི་ཆད་ལྷག་འདོན་པ་ཚེས་ཞག་དང་ཚེས་ཟླའི་དབང་དུ་བྱས་ལ། འདུལ་མངོན་གྱི་གསོ་སྦྱོང་ཞག་མི་ཐུབ་བྱེད་པ་ཡང་དེའི་དབང་དང་། རྒྱ་རྩིས་ཀྱི་གནམ་གང་ཆད་པ་ཡང་ཚེས་ཟླ་དབང་བཙན་པའི་སྒོ་ནས་འཇོག་གི་གཞན་གྱི་དབང་མིན་པས་སོ། །ཚེས་ཟླ་གཙོ་མི་ཆེ་ན་ཉིན་ཞག་ཆད་དོན་མེད་པས་གནམ་གང་ཡང་ཆད་དོན་མེད་དོ། །དེའི་ཕྱིར་ཚེས་ཞག་སུམ་ཅུ་ལོངས་པའི་ཚེ་ཉིན་ཞག་དང་ཁྱིམ་ཞག་མ་རྫོགས་ཀྱང་ཟླ་བ་རེ་རེར་འཇོག་པ་ནི་ཚེས་ཟླ་རྫོགས་པའི་དབང་ཡིན་པར་ཤེས་པར་བྱའོ། །གསུམ་པ་ལོའི་རྣམ་གཞག་བཤད་པ་ལ་གསུམ། ལོའི་དབྱེ་བ་དང་། དེ་ལ་འབྱུང་བའི་ཟླ་བ་དང་ལོའི་ཐ་སྙད། ཞར་ལ་སྐར་མའི་དབྱེ་བའོ། །དང་པོ་ལོ་ལ་གསུམ་སྟེ། ཚེས་ལོ། ཉིན་ཞག་གི་ལོ། ཁྱིམ་ལོའོ། །དེ་དག་ཀྱང་རང་རང་གི་ཟླ་བ་བཅུ་གཉིས་རེ་རྫོགས་པ་ནས་འཇོག་ལ། དེ་ཡང་ཚེས་ལོ་ཐུང་ཞིང་། ཉིན་ཞག་གི་ལོ་ནི་ཚེས་ལོ་ལས་ཞག་དྲུག་གིས་རིང་ལ། ཁྱིམ་ལོ་ནི་ཉིན་ཞག་གི་ལོ་ལས་ཀྱང་ཞག་ལྔ་ལྷག་ཙམ་གྱིས་རིང་ངོ་། །མདོར་ན་ཚེས་ཞག་སུམ་བརྒྱ་དྲུག་ཅུ་ལ་ཚེས་ལོ་གཅིག །ཉིན་ཞག་སུམ་བརྒྱ་དྲུག་ཅུ་ལ་ཉིན་ཞག་གི་ལོ་གཅིག ཁྱིམ་ཞག་སུམ་བརྒྱ་དྲུག་ཅུ་ལ་ཁྱིམ་ལོ་གཅིག་ཏུ་འཇོག་ཅིང་། གཞན་ཡང་ཉི་མ་ལྷོ་བགྲོད་མཐར་ཐུག་ནས་སླར་ལྷོ་བགྲོད་མཐར་ཐུག་ཏུ་སླེབ་པའི་བར་ལ་ཁྱིམ་ལོ་གཅིག་ཏུ་འཇོག་གོ །འོ་ན་ད་ལྟའི་ལོ་བརྩི་ཚུལ་འདི་གང་གི་དབང་ཡིན་ཞེ་ན། འདི་ནི་ཚེས་ལོའི་དབང་དུ་བྱས་པ་ཡིན་ཏེ། འདི་ལ་གནམ་གང་དྲུག་ཆད་པས་ཉིན་ཞག་གི་ལོ་མིན་ཅིང་། ཁྱིམ་ལོ་ནི་དེ་ལས་ཀྱང་རིང་བའི་ཕྱིར་རོ། ཁྱིམ་ལོ་གཅིག་ལ་ཉིན་ཞག་གི་ལོ་གཅིག་དང་ཞག་ལྔ་ཡོད་དེ། དེ་ལ་ཉིན་ཞག་གསུམ་བརྒྱ་དང་རེ་ལྔ་ཡོད་པའི་ཕྱིར་ཏེ། ཁྱིམ་ལོ་གཅིག་ལ་ཁྱིམ་ཞག་སུམ་བརྒྱ་དང་དྲུག་ཅུ་ཡོད་ཅིང་། དེ་ལ་ཉིན་ཞག་སུམ་བརྒྱ་དང་རེ་ལྔ་འབྱུང་བའི་ཕྱིར་ཏེ། ཁྱིམ་ཞག་སུམ་བརྒྱ་དང་དྲུག་ཅུ་འདས་པའི་ཚེ། ཉིན་ཞག་ཀྱང་དེ་ཙམ་ཞིག་འདས་པར་མ་ཟད། དེའི་སྟེང་དུ་ཆུ་ཚོད་སུམ་བརྒྱ་ལྷག་ཙམ་སོང་བས་དེའི་ཡུན་ལ་ཉིན་ཞག་ལྔ་འབྱུང་བའི་ཕྱིར་ཏེ། ཁྱིམ་ཞག་རེ་རེ་ཉིན་ཞག་རེ་རེ་ལས་ཆུ་སྲང་ལྔ་བཅུ་རེས་ལྷག་ཅིང་། ཆུ་སྲང་ལྔ་བཅུ་པ་ཚན་པ་སུམ་བརྒྱ་དྲུག་ཅུ་བསྡོམས་པ་ལ་ཆུ་ཚོད་སུམ་བརྒྱ་འབྱུང་བའི་ཕྱིར་རོ། ཁྱིམ་ལོ་གཅིག་ལ་ཚེས་ལོ་གཅིག་དང་ཚེས་ཞག་བཅུ་གཅིག་རྗེས་འབྲང་དང་བཅས་པ་ཡོད་དེ། དེ་ལ་ཚེས་ཞག་སུམ་བརྒྱ་དང་དོན་གཅིག་རྗེས་འབྲང་དང་བཅས་པ་ཡོད་པའི་ཕྱིར་ཏེ། ཁྱིམ་ལོ་གཅིག་ལ་ཉིན་ཞག་སུམ་བརྒྱ་དང་རེ་ལྔ་ཡོད་ཅིང་། ཉིན་ཞག་དེ་ཙམ་ཞིག་འདས་པའི་ཚེ་ཚེས་ཞག་ཀྱང་དེ་ཙམ་ཞིག་འདས་པའི་རྟིང་ཆུ་ཚོད་སུམ་བརྒྱ་དང་རེ་ལྔ་ལྷག་པ་གང་ཞིག ཆུ་ཚོད་དེ་ཙམ་ཞིག་ལ་ཚེས་ཞག་དྲུག་འབྱུང་བའི་ཕྱིར། དང་པོ་གྲུབ་སྟེ། རགས་རྩིས་ཉིན་ཞག་དེ་ཚེས་ཞག་ལས་ཆུ་ཚོད་རེས་ལྷག་པའི་ཕྱིར་རོ། །འདིར་གནད་བསྡུ་ན་རྒྱུ་སྐར་ཉི་མ་ཟླ་བ་གསུམ་ལས་རྒྱུ་སྐར་རྣམས་འགྲོས་མགྱོགས་ལ། དེ་ལས་ཉི་མ་ཅུང་བུལ་བས་རྒྱུ་སྐར་ལས་ཕྱིར་རིམ་གྱིས་ལུས་ཏེ་རྒྱུ་སྐར་ཐམས་ཅད་རྫོགས་པའི་ཚེ་ཁྱིམ་ལོ་གཅིག་རྫོགས་པ་ཡིན་ལ། ཉི་མ་ལས་ཀྱང་ཟླ་བ་འགྲོས་འགོར་བས་ཉིན་ཞག་རེ་ལ་ཟླ་བ་ཉི་མ་ལས་ཕྱིར་རིམ་གྱིས་ལུས་པའི་རྐྱེན་གྱིས་ཟླ་བའི་ཆ་ལ་སྔར་བཤད་པ་ལྟར་འཕེལ་འགྲིབ་བྱེད་པའི་ཆ་སུམ་བརྒྱ་དྲུག་རྫོགས་པ་ན་ཚེ་ལོ་གཅིག་རྫོགས་པ་ཡིན་ཏེ། ད་དུང་ཞིབ་པར་འཆད་ནུས་ཀྱང་མ་བཤད་དོ། །འོ་ན་ལོ་གསུམ་པོ་ལ་དངོས་བཏགས་ཀྱི་ཁྱད་པར་ཡོད་དམ་མེད་ཅེ་ན། འདི་ལ་མཁས་པ་ཁ་ཅིག་ལོ་ལ་ཁྱིམ་ལོ་དབང་བཙན་པས་ཁྱིམ་ལོ་དེ་ལོ་དངོས་ཡིན་གྱི་གཞན་གཉིས་ལ་བཏགས་པ་པའོ་ཞེས་འདོད་ལ། ཁ་ཅིག་དངོས་བཏགས་ཀྱི་ཁྱད་པར་མི་འབྱེད་པར་གསུམ་ག་ལོ་མཚན་ཉིད་པར་བཞེད་དོ། །གཉིས་པ་ནི་སྤྱིར་ལོ་གཅིག་ལ་ཟླ་བ་བཅུ་གཉིས་འབྱུང་སྟེ། བཅོ་ལྔ་ལ་སྐར་མ་གང་འཆར་བའི་ཉ་སྐར་དབང་དུ་བྱས་ན། མགོ་རྒྱལ་མཆུ་དབོ་ནག་པ་ས་ག་སྣྲོན་ཆུ་སྟོད་གྲོ་བཞིན་ཁྲུམས་ཐ་སྐར་སྨིན་དྲུག་གི་ཟླ་བ་སྟེ་བཅུ་གཉིས་པོ་འབྱུང་བར་ངེས་པའི་ཕྱིར། དེ་རྣམས་ཀྱང་ཟླ་བ་གང་དང་གང་ལ་ཉ་བའི་ཚུལ་ཡོད་དེ། ཧོར་ཟླ་བཅུ་གཅིག་པའི་བཅོ་ལྔ་ལ་མགོས་ཉ་བ་ནས་བཅུ་པའི་བཅོ་ལྔ་ལ་སྨིན་དྲུག་གིས་ཉ་བའི་བར་ཡིན་པའི་ཕྱིར། ཟླ་ལྷག་ཡོད་པའི་ཚེ་མ་དེར་ངེས་ཏེ། བཅུ་གཅིག་པའི་བཅོ་ལྔ་ལ་ལག་གིས་ཉ་བ་དང་། བཅུ་པའི་བཅོ་ལྔ་ལ་བྲ་ཉེས་ཉ་བའང་སྲིད་པའི་ཕྱིར་རོ། །ཉ་སྐར་གྱི་དབང་དུ་བྱས་ནས་ཟླ་བ་དེ་རྣམས་ལ་སྨིན་དྲུག་གི་ཟླ་བ་སོགས་ཀྱི་ཐ་སྙད་ཀྱང་བྱས་པ་ཡིན་ནོ། །རྒྱ་ནག་པ་ལྟར་ན། ལོ་གཅིག་ལ་བྱི་བའི་ཟླ་བ་གླང་སྟག་ཡོས་འབྲུག་སྦྲུལ་རྟ་ལུག་སྦྲེལ་བྱ་ཁྱི་ཕག་གི་ཟླ་བ་སྟེ་བཅུ་གཉིས་ཡོད་པར་འདོད་ཅིང་ལོ་ལའང་དེ་ལྟར་བཅུ་གཉིས་ཡོད་དོ། །བྱི་བའི་ལོ་ལ་ཤིང་མེ་ས་ལྕགས་ཆུ་ལྔ་ཡོད་པ་ལྟར། གཞན་རྣམས་ལའང་ལྔ་ལྔར་འབྱེད་པས་ལོ་རྒན་དྲུག་ཅུ་ཞེས་གྲགས་སོ། །ཕོ་མོའི་ཁྱད་པར་ནི། བྱི་སྟག་འབྲུག་རྟ་སྦྲེལ་ཁྱི་ཕོ། །གླང་ཡོས་སྦྲུལ་ལུག་བྱ་ཕག་མོ། །ཞེས་འབྱུང་བ་ལྟར་ཕོ་དྲུག་དང་མོ་དྲུག་གོ །རྒྱ་གར་པ་ལྟར་ན། བདེ་མཆོག་སྟོད་འགྲེལ་ལས། རབ་བྱུང་རྣམ་བྱུང་དཀར་བོ་དང་། །རབ་མྱོས་སྐྱེས་བདག་ཨཾ་གི་ར། །དཔལ་གདོང་དངོས་པོ་ན་ཚོད་ལྡན། །འཛིན་བྱེད་དབང་ཕྱུག་འབྲུ་མང་པོ། །མྱོས་ལྡན་དཔའ་བོ་ཁྱུ་མཆོག་དང་། །སྣ་ཚོགས་ཉི་མ་ཉི་སྒྲོལ་བྱེད། །ས་སྐྱོང་མི་ཟད་ཐམས་ཅད་འདུལ། །ཀུན་འཛིན་འགལ་བ་རྣམ་འགྱུར་དང་། །བོང་བུ་དགའ་བ་རྣམ་རྒྱལ་ཉིད། །རྒྱལ་བ་མྱོས་བྱེད་གདོང་ངན་དང་། །གསེར་འཕྱང་རྣམ་འཕྱང་སྒྱུར་བྱེད་དང་། །ཀུན་ལྡན་འཕར་བ་དགེ་བྱེད་དང་། །མཛེས་བྱེད་ཁྲོ་བོ་སྣ་ཚོགས་དབྱིག །ཟིལ་ནོན་སྤྲེའུ་ཕུར་བུ་དང་། །ཞི་བ་ཐུན་མོང་འགལ་བྱེད་དང་། །ཡོངས་འཛིན་བག་མེད་ཀུན་དགའ་དང་། །སྲིན་པོ་མེ་དང་དམར་སེར་ཅན། །དུས་ཀྱི་ཕོ་ཉ་དོན་གྲུབ་དྲག །བློ་ངན་རྔ་ཆེན་ཁྲག་སྐྱུག་པ། །མི་དམར་ཁྲོ་བོ་ཟད་བྱེད་དེ། །ཞེས་གསུངས་པ་ལྟར་ཡོད་ཅིང་། དེ་རྣམས་ནི། མེ་ཡོས་ནས་མེ་སྟག་གི་བར་དང་དོན་གཅིག་གོ །གསུམ་པ་སྐར་མའི་དབྱེ་བ་ལ་གཉིས། རྒྱུ་སྐར་གྱི་དབྱེ་བ་དང་། སྐར་མ་སྤྱིའི་དབྱེ་བའོ། །དང་པོ་ནི། སྨིན་དྲུག་སྣར་མ་མགོ་དང་ལག །ནབས་སོ་རྒྱལ་སྐག་བདུན་པོ་ཤར། །མཆུ་དང་གྲེ་དབོ་མེ་བཞི་དང་། །ནག་པ་ས་རི་ས་ག་བྱང་། །ལྷ་མཚམས་སྣྲོན་སྣུབས་ཆུ་སྟོད་དང་། །ཆུ་སྨད་གྲོ་བཞིན་བྱི་བཞིན་ནུབ། །མོན་དྲ་མོན་གྲུ་ཁྲུམས་སྟོད་སྨད། །ནམ་གྲུ་ཐ་སྐར་བྲ་ཉེ་ལྷོ། །ཞེས་འབྱུང་བ་ལྟར་ཉེར་བརྒྱད་ཡོད་ཀྱང་། བྱི་བཞིན་གྲོ་བཞིན་གཉིས་སྐར་ཁོང་གཅིག་ཏུ་འདུ་བས་ཉེར་བདུན་དུ་བྱས་སོ། །ཕྱོགས་བཞིའི་དབྱེ་བ་དེ་ལྟར་མཛད་པ་ནི་འཛམ་བུ་གླིང་འདིར་སྨིན་དྲུག་སྲོད་ལ་འཆར་བའི་ཚེ་རྒྱུ་སྐར་དེ་རྣམས་ཕྱོགས་དེ་དག་གནས་པ་དང་། ཕྱོགས་དེ་རྣམས་སུ་བྱ་བ་བྱེད་པ་ལ་སྒྱུ་སྐར་དེ་དག་བཟང་བའི་དབང་དུ་མཛད་པའོ། །གཉིས་པ་ལ། སྐར་མ་འདི་རྣམས་ནི་ལྷ་གནས་པའི་གཞལ་མེད་ཁང་ཡིན་ཞིང་། གྲངས་ནི། ཇི་སྐད་དུ། དུང་གཉིས་བྱེ་བརྒྱད་ས་ཡ་ལྔ། སྐར་མའི་གྲངས་སུ་ཤེས་པར་བྱ། །ཆེ་བ་རྒྱང་གྲགས་བཅོ་བརྒྱད་དང་། །ཆུང་བ་རྒྱང་གྲགས་བཞིའམ་གཅིག །ཞེས་གླིང་བཞི་གཅིག་གི་སྟེང་དུ་གནས་པའི་དབང་བྱས་ནས་དེ་ལྟར་བཤད་ལ། རྒྱང་གྲགས་ཀྱི་ཚད་ནི། མཛོད་ལས། སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་ནས། །སོར་ཚིགས་ཞེས་བྱ་གོང་བདུན་འགྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་གསུངས་པ་ལྟར། རྡུལ་ཕྲ་རབ་བདུན་ལ་རྡུལ་ཕྲན་གཅིག དེ་བཞིན་དུ་རྡུལ་ཕྲན་བདུན་འདུས་པ་ལ་ལྕགས་རྡུལ་གཅིག་འོང་བ་ནས། སོར་ཚིགས་ཀྱི་བར་བདུན་འགྱུར་ཏེ། ལྷག་མ་སོར་མོ་ཉེར་བཞི་ལ་ཁྲུ་གང་དུ་འཇོག་པ་སོགས་སླ་ཞིང་། འདུལ་བ་ལས་ནི་དྲུག་འགྱུར་དུ་བཤད་ཀྱང་དོན་འདྲའོ། །གསུམ་པ་ནི། འདུལ་མངོན་གྱི་ལུང་ལས་བཤད་པའི་དབང་དུ་བྱས་ན་དུས་ཚིགས་ལ་སྡེ་ཚན་བཞིར་དབྱེ་སྟེ། གསུམ་དང་བཞི་དང་ལྔ་དང་དྲུག་ཏུ་དབྱེ་རིགས་པའི་ཕྱིར། དང་པོ་ནི། དགུན་དང་དཔྱིད་དང་དབྱར་དུས་ཀྱི་ཟླ་བ་བཞི་བཞིའོ། །གཉིས་པ་ནི། དགུན་དཔྱིད་དབྱར་སྟོན་གསུམ་པོ་རེ་རེ་ལ་ར་འབྲིང་ཐ་གསུམ་གསུམ་མོ། །གསུམ་པ་ནི། དགུན་དུས་དང་དཔྱིད་དུས་ཀྱི་ཟླ་བ་བཞི་བཞི་སྟེ་བརྒྱད། དབྱར་ཙམ་གྱི་ཟླ་བ་གཅིག དབྱར་ཐུང་ངུ་ཞེས་པ་ཉིན་ཞག་གཅིག ཞག་གཅིག་མ་ལོངས་པའི་དབྱར་རིང་བོ་ལ་ཟླ་བ་གསུམ་མོ། །བཞི་བ་ནི། དགུན་སྟོད་དགུན་སྨད་དཔྱིད་སྟོད་དཔྱིད་སྨད་དབྱར་སྟོད་དབྱར་སྨད་དེ་དྲུག་པོ་རེ་རེ་ལ་ཟླ་བ་གཉིས་གཉིས་སོ། །མཚན་གཞི་ཡང་། མགོ་རྒྱལ་མཆུ་དབོའི་ཟླ་བ་བཞི་ནི་དུས་ཚིགས་ལ་གསུམ་དུ་ཕྱེ་བའི་དགུན་དུས་ཀྱི་ཟླ་བ་དང་ནག་པ་ས་ག་སྒྲོན་ཆུ་སྟོད་ཀྱི་ཟླ་བ་བཞི་ནི་དེའི་དཔྱིད་དུས་ཀྱི་ཟླ་བ། གྲོ་བཞིན་ཁྲུམས་ཐ་སྐར་སྨིན་དྲུག་གི་ཟླ་བ་བཞི་ནི་དེའི་དབྱར་དུས་ཀྱི་ཟླ་བའོ། །དུས་ཚིགས་ལ་བཞིར་བྱེད་པའི་ཚེ་མགོ་ལ་སོགས་པ་གསུམ་ནི་དགུན་ཟླར་འབྲིང་ཐ་གསུམ། དབོ་སོགས་གསུམ་ནི་དཔྱིད་ཟླ། སྣྲོན་སོགས་གསུམ་ནི་དབྱར་ཟླ། ཁྲུམས་སོགས་གསུམ་ནི་སྟོན་ཟླ་ར་འབྲིང་ཐ་གསུམ་མོ། །ལྔར་ཕྱེ་བའི་ཚེ། མགོ་སོགས་བཞི་ནི་དགུན་དང་ནག་པ་སོགས་བཞི་ནི་དཔྱིད་ཀྱི་དུས། གྲོ་བཞིན་དབྱར་ཙམ་གྱི་དུས། ཁྲུམས་ཟླའི་མར་ངོའི་ཚེས་གཅིག་ནི་དབྱར་ཐུང་ངུའི་དུས། ཞག་གཅིག་གིས་མ་ཚང་བའི་ཁྲུམས་སོགས་གསུམ་ནི་དབྱར་རིང་བོའི་དུས་སོ། །དྲུག་དུ་འབྱེད་པའི་ཚེ་མགོ་དང་རྒྱལ་གཉིས་དགུན་སྟོད་ཀྱི་ཟླ་བ་ཡིན་པ་ནས། ཐ་སྐར་དང་སྨིན་དྲུག་གཉིས་དབྱར་སྨད་ཀྱི་ཟླ་བ་ཡིན་ནོ། །དེ་དག་གང་ལས་བསྟན་པ་ནི། མཛོད་ལས། དབྱར་གྱི་ཟླ་བ་གཉིས་པ་ཡི། །ཞེས་སོགས་དང་། མདོ་རྩར། དེ་དག་ནི་ལྔའོ་ཞེས་སོགས་ཀྱིས་བཤད་དོ། །དགོས་པ་ནི། དུས་ཚིགས་ལ་གསུམ་དུ་ཕྱེ་བ་དེ་ཕྱག་དར་ཁྲོད་ཀྱི་གོས་ཤེས་པའི་ཆེད་དང་། བཞིར་ཕྱེ་བ་ནི། འཇིག་རྟེན་གྱི་ཐ་སྙད་དང་མཐུན་པའི་ཆེད་དང་། ལྔར་ཕྱེ་བ་ནི། དབྱར་ཐུང་ངུ་ཤེས་པའི་ཆེད་དང་། དྲུག་ཏུ་ཕྱེ་བ་ནི། ཞག་མི་ཐུབ་ཤེས་པའི་ཆེད་ཡིན་ནོ། །དུས་ཚིགས་དེ་རྣམས་ལ་དངོས་བཏགས་ཀྱི་ཁྱད་པར་ཡོད་དམ་མེད་ཅེ་ན། མཁས་པ་ཁ་ཅིག་དངོས་བཏགས་ཀྱི་ཁྱད་པར་བྱེད་ཀྱང་། རང་ལུགས་དེ་ཐམས་ཅད་ཀྱང་དུས་ཚིགས་མཚན་ཉིད་པའོ། །དུས་ཚིགས་ལ་རྒྱས་པར་ཕྱེ་ན་དེ་ལྟར་ཡོད་ཀྱང་ཐམས་ཅད་ནི་གསུམ་དང་བཞིར་ཕྱེ་བའི་ནང་དུ་འདུའོ། །དེ་དག་འགལ་མི་འགལ་ནི། ནང་གསེས་ལ་འགལ་བ་ཡོད་ཀྱང་སྤྱིར་མི་འགལ་ཏེ། དུས་ཚིགས་ལ་བཞིར་ཕྱེ་བའི་དཔྱིད་ཟླ་ར་བ་དབོ་ཟླ་བ་དེ། གསུམ་དུ་ཕྱེ་བའི་དགུན་ཟླ་བཞི་བ་ཡིན་པའི་ཕྱིར་རོ། །འོན་ཀྱང་སྟོན་དཔྱིད་གཉིས་འགལ་ཏེ། དེ་གཉིས་ཀྱི་གཞི་མཐུན་མེད་པའི་ཕྱིར་རོ། །བཞི་བ། ལོ་འགོ་གང་ནས་འཛིན་པའི་ཚུལ་ཡོད་དེ། འདུལ་མངོན་དང་རྒྱ་རྩིས་རྙིང་མ་གཞིར་བཞག་པའི་ཚེ་དུས་ཚིགས་ཀྱི་ཐོག་མ་དགུན་ནས་འབྱུང་བས་ལོ་འགོ་ཡང་དགུན་དུས་སུ་འབྱུང་བའི་ཕྱིར་ཏེ། དུས་ཚིགས་གང་གི་དབང་དུ་བྱས་ཀྱང་དགུན་གྱི་དུས་ཉིད་ཐོག་མ་ཡིན་པའི་ཕྱིར་རོ། །འདི་ལ་ཡང་ཡར་ངོ་ནས་འཛིན་པ་དང་མར་ངོ་ནས་འཛིན་པ་གཉིས་ཡོད་པ་ལས། འཇིག་རྟེན་པ་དང་ཧོར་ལུགས་དང་རྒྱ་རྩིས་པ་རྣམས་ཀྱིས་ཡར་ངོ་སྔོན་འགྲོར་བྱེད་ལ། འདུལ་མངོན་གྱི་ལུགས་ལ་མར་ངོ་སྔོན་འགྲོ་དང་དུས་འཁོར་གྱི་ལུགས་ལ་ཚུལ་དེ་གཉིས་ཀ་ཡོད་དོ། །དེ་ཡང་ཟླ་བའི་ཡར་ངོ་ལ་འཕེལ་ཅིང་། མར་ངོ་ལ་འགྲིབ་པ་ལྟར་འཇིག་རྟེན་པ་ལ་དང་པོར་ལུས་ལོངས་སྤྱོད་སོགས་འཕེལ་བར་ལྟར་སྣང་ཡང་མཐར་འགྲིབ་པར་འགྱུར་བ་ལྟར། དང་པོ་ཟླ་བའི་ཡར་ངོ་སྔོན་འགྲོར་བྱེད་ལ། རབ་བྱུང་ལ་དང་པོ་ཆོས་སྒྲུབ་པའི་ཚེ་དཀའ་དཀའ་ལྟར་སྣང་ཡང་མཐར་ཡོན་ཏན་གོང་འཕེལ་དུ་འགྲོ་བའི་རྟེན་འབྲེལ་དང་བསྟུན་ནས་དང་པོ་མར་ངོ་སྔོན་འགྲོར་མཛད་དོ། །དགུན་ཟླའི་ཐོག་མ་མགོ་ཟླ་བ་ནས་འཛིན་པ་ཡིན་ཏེ། ཚིག་གཏེར་ལས། སྨལ་པོ་ཞེས་བྱ་ལོ་ཡི་འགོ །ཞེས་གསུངས་པའི་ཕྱིར། དེ་ཡང་འཇིག་རྟེན་ཡོངས་གྲགས་དང་བསྟུན་ན་ཧོར་ཟླ་བཅུ་པའི་ཚེས་བཅུ་དྲུག་ནས་འཛིན་པ་ཡིན་ཏེ། དེ་ནས་བཅུ་གཅིག་པའི་བཅོ་ལྔའི་བར་གྱི་ཟླ་བ་འདི་འདུལ་མངོན་རང་ལུགས་ཀྱི་མགོ་ཟླ་དང་དགུན་ཟླ་ར་བའི་གཞི་མཐུན་ཡིན་པའི་ཕྱིར་རོ། །ཡར་ངོ་སྔོན་འགྲོ་ལྟར་ན་ཧོར་ཟླ་བཅུ་པའི་ཡར་ངོའི་ཚེས་གཅིག་ནས་མར་ངོའི་བཅོ་ལྔའི་བར་ནི་དགུན་ཟླ་ར་བ་དང་སྨིན་དྲུག་གི་ཟླ་བར་འདོད་པ་གཙོ་ཆེ་ཡང་། ནག་རྩིས་རྙིང་མ་དང་དུས་འཁོར་བས་ནི་ཧོར་ཟླ་བཅུ་གཅིག་པ་དེ་དགུན་ཟླ་ར་བ་དང་སྟག་གི་ཟླ་བར་བྱས་ནས། དེའི་ཡར་ངོའི་ཚེས་གཅིག་ནས་དགུན་ཟླའི་འགོ་འཛིན་པ་འདྲ་ཡང་། དུས་འཁོར་བས་ནི་ཞིབ་ན་ཉི་མ་གཞུ་ཁྱིམ་དུ་ནམ་སླེབ་པའི་ཚེ་དགུན་ཟླ་ར་བའི་འགོ་འཛིན་ཅིང་ལོ་འགོ་ནི་ཧོར་ཟླ་གསུམ་པ་ནས་འཛིན་ལ། དེ་ཡང་ཉི་མ་ལུག་ཁྱིམ་དུ་ནམ་སླེབ་པ་ནས་འཛིན་ནོ། །རྒྱ་རྩིས་རྙིང་མས་དགུན་ཟླ་ར་བ་ནས་ལོ་འགོར་བྱེད་ཅིང་། རྒྱ་རྩིས་གསར་མའི་ལུགས་དང་གསོ་དཔྱད་དང་ཧོར་རྒྱལ་བོའི་ལུགས་དང་། ད་ལྟ་འཇིག་རྟེན་ཡོངས་གྲགས་ལ་མཆུ་ཟླ་བ་འདི་ལ་དཔྱིད་ཟླ་ར་བ་དང་སྟག་གི་ཟླ་བར་བྱས་ཏེ་ལོ་འགོ་འཛིན་ནོ། །འདུལ་བའི་ལུགས་ལ་ཧོར་ཟླ་བཅུ་པའི་བཅོ་ལྔའི་མཐའ་ནས་སྟོན་ཟླ་ཐ་ཆུང་དང་སྨིན་དྲུག་ཟླ་བ་རྫོགས་པ་ཡིན་ཏེ། མདོ་སྡེ་ཉི་མའི་སྙིང་བོ་ལས། བདག་གིས་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་གྱུར། །སྟོན་ཟླ་ཐ་ཆུང་ཞེས་བྱ་བ། །འདི་ནི་རབ་ཏུ་བརྗོད་པ་ཡིན། །ཞེས་གསུངས་པའི་ཕྱིར་རོ། །དེས་ན་ཡར་ངོ་མར་ངོའི་སྔོན་འགྲོའི་དབང་གིས་ཟླ་བ་འཇོག་ཚུལ་ཁྱད་པར་ཡོད་ལ། དེར་མ་ཟད་ཧོར་ཟླ་བརྒྱད་པ་དང་དགུ་བ་དང་བཅུ་གཉིས་པ་སོགས་ནས་ཀྱང་ལོ་འགོ་འཛིན་པའི་ལུགས་ཡོད་པར་བཤད་དེ། འདིར་མི་བརྗོད་དོ། །ལྔ་བ་གསོ་སྦྱོང་སོགས་འབྱུང་བའི་དུས་བཤད་པ་ལ་གསུམ། གསོ་སྦྱོང་། དབྱར་གནས། དགག་དབྱེ་འབྱུང་བའི་དུས་སོ། །དང་པོ་ལ་གཉིས། ཐུན་མོང་གི་རྣམ་གཞག་དང་། སོ་སོའི་རྣམ་གཞག་གོ །དང་པོ་ལ་གཉིས། སྒྲ་དོན་དང་། དབྱེ་བའོ། །དང་པོ་ནི། སྡིག་པ་སྦྱོང་ཞིང་དགེ་བ་གསོ་བས་གསོ་སྦྱོང་ཞེས་བྱ་སྟེ། ལོ་དྲི་བར། དགེ་བ་མཐའ་དག་ཡང་དག་གསོ་བྱེད་ཅིང་། །སྡིག་པ་མཐའ་དག་ཡང་དག་འདིར་སྦྱོང་བ། །དགེ་གསོ་ཕྱིར་དང་སྡིག་པ་རྣམ་སྦྱོང་ཕྱིར། །དེ་བཞིན་གཤེགས་པས་གསོ་སྦྱོང་ཞེས་གསུངས་སོ། །ཞེས་གསུངས་པ་ལྟར་རོ། །གཉིས་པ་ནི། སྤྱིར་གསོ་སྦྱོང་ལ་བདུན་ཡོད་དེ། ཞི་གནས་ཀྱི་གསོ་སྦྱོང་། མཐུན་པའི་གསོ་སྦྱོང་། གསོ་སྦྱོང་བཅུ་བཞི་བ། བཅོ་ལྔ་པ། གནོད་བཟློག་པའི། རྩོད་པ་ཟློག་པའི། བཀྲ་ཤིས་ཀྱི་གསོ་སྦྱོང་རྣམས་སུ་ཡོད་པའི་ཕྱིར་རོ། །ལོ་གཅིག་ལ་གསོ་སྦྱོང་བཅུ་བཞི་པ་དྲུག་དང་བཅོ་ལྔ་པ་བཅོ་བརྒྱད་དེ་ཉེར་བཞི་འབྱུང་ལ། ཟླ་ལྷག་ཡོད་པའི་ཚེ་ཉེར་དྲུག་ཀྱང་འབྱུང་ངོ་། །གཉིས་པ་ནི། གསོ་སྦྱོང་དེ་རྣམས་བསྡུ་ན་ཞི་གནས་དང་མཐུན་པའི་གསོ་སྦྱོང་གཉིས་སུ་འདུ་བས་གསོ་སྦྱོང་བཅུ་བཞི་དང་བཅོ་ལྔ་བ་གཉིས་ཀྱང་མཐུན་པའི་གསོ་སྦྱོང་ཡིན་ལ། འདིར་དེ་གཉིས་འབྱུང་བའི་དུས་སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་ནི། གསོ་སྦྱོང་ཉེར་བཞི་བོ་དེ་ཟླ་བ་གང་དང་གང་ལ་འབྱུང་ཞེ་ན། ཡོད་དེ། ལོ་གཅིག་ལ་ཟླ་བ་བཅུ་གཉིས་ཡོད་པའི་ཟླ་བ་རེ་རེའི་ཡར་ངོ་དང་མར་ངོ་གཉིས་སུ་གསོ་སྦྱོང་རེ་འབྱུང་ཞིང་། དེ་ཡང་ཡར་ངོ་ལ་བཅུ་གཉིས་དང་། མར་ངོ་ལ་དྲུག་སྟེ་བཅོ་བརྒྱད་ཞག་ཐུབ་པའི་གསོ་སྦྱོང་ཡིན་ལ། མར་ངོའི་དྲུག་ནི་ཞག་མི་ཐུབ་བཅུ་བཞི་བ་ཡིན་ཏེ། ས་གའི་ལྟས། ས་ག་དང་ནི་ཆུ་སྟོད་དང་། །དེ་བཞིན་ཁྲུམས་སྨད་སྨིན་དྲུག་དང་། རྒྱལ་དང་དབོ་ཞེས་བྱ་བ་ཉིད། །དྲུག་པོ་མར་ངོ་བཅུ་བཞིར་བརྗོད། །དེ་བཞིན་དེ་ལས་གཞན་དག་ནི། །བཅོ་བརྒྱད་བཅོ་ལྔ་སར་ནི་འདོད། །ཅེས་གསུངས་པ་ལྟར་རོ། །གཉིས་པ་ལ་ལྔ། སྒྲ་དོན། དུས་གང་གི་ཚེ། ཟླ་བ་གང་ལ། དེ་ལྟར་འབྱུང་བའི་རྒྱུ་མཚན་དང་། བཤོལ་འདོན་ཚུལ་ལོ། །དང་པོ་ནི། ཚེས་ཞག་གིས་ཉིན་ཞག་གི་དོད་མ་ཐུབ་པའི་དབང་གིས་བྱུང་བའི་གསོ་སྦྱོང་ཡིན་པས་ན་ཞག་མི་ཐུབ་ཀྱི་གསོ་སྦྱོང་ཞེས་བྱ་ལ། ཉིན་ཞག་བཅུ་བཞི་བ་ལ་བྱེད་པས་ན་བཅུ་བཞི་བ་སྟེ། རྒྱུ་མཚན་ནི་འཆད་པར་འགྱུར་རོ། །གཉིས་པ་ནི། འདུལ་མངོན་ལུགས་ཀྱི་དགུན་སྟོད་སྨད། དཔྱིད་སྟོད་སྨད། དབྱར་སྟོད་སྨད་དེ་དུས་ཚིགས་དྲུག་པོ་ཟླ་བ་གཉིས་གཉིས་ཡོད་པའི་ཕྱེད་དང་གཉིས་འདས་ཤིང་ཕྱེད་ལུས་པའི་ཚེ་ཞག་མི་ཐུབ་རེ་རེ་འབྱུང་བ་ཡིན་ཏེ། མཛོད་འགྲེལ་ལས། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ཤིང་། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་འདོར། །ཞེས་གསུངས་པའི་ཕྱིར། གསུམ་པ་ཟླ་བ་གང་ལ་འབྱུང་བ་ནི་ལོ་དྲི་བར། །རྒྱལ་དང་དབོ་དང་ས་ག་དང་། ཁྲུམས་སྟོད་ཁྲུམས་སྨད་སྨིན་དྲུག་བཅས། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་བ། །ཞེས་གསུངས་པ་ལྟར་རོ། །གསོ་སྦྱོང་དེ་དག་གང་ལ་འབྱུང་བ་འདི་ཧོར་ཟླ་དང་སྦྱར་ན་གོ་སླ་སྟེ། དེ་ཡང་ཧོར་ཟླ་དང་པོ་གསུམ་པ་ལྔ་བ་བདུན་པ་དགུ་བ་བཅུ་གཅིག་པ་དྲུག་གི་སྨད་རྣམས་གསོ་སྦྱོང་བཅུ་བཞི་བ་འབྱུང་བའི་དུས་ཡིན་ལ། གཞན་རྣམས་བཅོ་ལྔ་བ་འབྱུང་བའི་དུས་སོ། །བཞི་བ་ནི། རགས་བརྩིས་ལ་ཚེས་ཞག་གཅིག་ལ་ཆུ་ཚོད་ང་དགུ་ཡོད་ཅིང་། ཉིན་ཞག་གཅིག་ལ་ཆུ་ཚོད་དྲུག་ཅུ་ཡོད་པས། ཚེས་ཞག་དང་ཉིན་ཞག་གཉིས་འགོ་མཉམ་དུ་ཚུགས་པ་གཅིག་གི་དབང་དུ་བྱས་ན། ཉིན་ཞག་གཅིག་འདས་པའི་ཚེ་ཚེས་ཞག་གཅིག་དང་ཚེས་ཞག་གཉིས་པའི་སྟེང་ནས་ཆུ་ཚོད་གཅིག་སོང་། དེ་ལྟར་ཞག་རེ་ལ་སྦྱར་སྟེ་ཉིན་ཞག་ང་དགུ་འདས་པའི་ཚེ། ཚེས་ཞག་ང་དགུ་འདས་སྟེང་ཆུ་ཚོད་ང་དགུ་སོང་བས་ན་ཚེས་ཞག་དྲུག་ཅུ་འདས་པའི་ཕྱིར་ཚེས་ཟླ་གཉིས་རྫོགས་ཀྱང་། ཉིན་ཞག་གི་ཟླ་བ་གཉིས་རྫོགས་པ་ལ་ནི་ད་དུང་ཞག་གཅིག་དགོས་སོ། །རྒྱུ་མཚན་དེས་ན་གསོ་སྦྱོང་བཅུ་བཞི་བ་རྣམས་ཚེས་ཞག་ལ་བལྟོས་པའི་བཅོ་ལྔ་བ་ཡིན་ནའང་། ཉིན་ཞག་ལ་བལྟོས་པའི་བཅུ་བཞི་བ་ཡིན་ནོ། །དེའི་ཕྱིར་མདོ་རྩ་ལས། གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །ཞེས་གསུངས་པ་ནི་དེ་ལ་དགོངས་སོ། །དེ་དག་ཀྱང་གསོ་སྦྱོང་སྔ་མ་ནམ་བྱས་པའི་སང་ཉིན་ནས་བརྩིས་པའི་དབང་དུ་བྱས་སྟེ། དུས་ནོར་ནས་བྱས་པ་ལ་ནི་ངེས་པ་མེད་དོ། །ལྔ་བ་ནི། ཟླ་བཤོལ་འབྱུང་བའི་རྒྱུ་མཚན་ཡོད་དེ། ཚེས་ཞག་དང་ཉིན་ཞག་གི་བར་ནས་ལོ་ལྔ་ལྔ་ནས་ཟླ་བཤོལ་རེ་འདོན་པ་དང་། ཚེས་ཞག་དང་ཁྱིམ་ཞག་གི་བར་ནས་ལོ་གཉིས་དང་ཟླ་བ་ཕྱེད་དང་དགུ་ནས་ཟླ་བཤོལ་རེ་འདོན་པའི་ཚུལ་གཉིས་ཡོད་པའི་ཕྱིར་རོ། །དང་པོ་ནི་ཚེས་ཞག་གིས་ཉིན་ཞག་གི་དད་མ་ཐུབ་པའི་དབང་གིས་ཡིན་ཏེ། དེ་ལྟར་མ་ཐུབ་པའི་དབང་གིས་ཚེས་ལོ་དང་ཉིན་ཞག་གི་ལོ་འགོ་མཉམ་དུ་བཙུགས་ནས་ཉིན་ཞག་གི་ལོ་གཅིག་སོང་བའི་ཚེ། ཚེས་ཞག་དྲུག་ལྷག་པ་འོང་ཞིང་། ལོ་ལྔ་སོང་བ་ན་ཚེས་ཞག་དྲུག་ལྔ་སུམ་ཅུ་ཐམ་པ་འོང་བས་ཚེས་ཟླ་གཅིག་ལྷག་པར་འགྱུར་བའི་ཕྱིར་རོ། །ཚེས་ཞག་གིས་ཉིན་ཞག་གི་དོད་མི་ཐུབ་པའི་རྒྱུ་མཚན་ནི། ཉིན་ཞག་ལས་ཚེས་ཞག་ཐུང་བའི་དབང་ཡིན་ཏེ་བཤད་ཟིན་ཏོ། །འོན་ཀྱང་ད་ལྟ་ལག་ལེན་ནི་ཕྱི་མ་ལྟར་ཡིན་ཏེ། ལོ་གཉིས་དང་ཟླ་བ་ཕྱེད་དང་དགུ་ནས་ཟླ་ལྷག་རེ་འདོན་པ་གྲགས་ཆེ་བའི་ཕྱིར། འདོན་ཚུལ་ཡོད་དེ། ཁྱིམ་ལོ་གཅིག་སོང་བའི་ཚེ་ཚེས་ལོ་གཅིག་སོང་བའི་རྟིང་ནས་ཚེས་ཞག་བཅུ་གཅིག་རྗེས་འབྲང་དང་བཅས་ལྷག་པ་གང་ཞིག །དེ་བསགས་པས་ཟླ་བཤོལ་དུ་འགྱུར་བའི་ཕྱིར། དེ་ཡང་ཚེས་ཞག་གིས་ཁྱིམ་ཞག་གི་དོད་མ་ཐུབ་པའི་དབང་གིས་ཡིན་ཏེ། དོད་མི་ཐུབ་པའི་རྒྱུ་མཚན་ཚེས་ཞག་ཐུང་ལ་ཁྱིམ་ཞག་རིང་བའི་དབང་ཡིན་པར་གོང་དུ་བཤད་ཟིན་ཏོ། །ཟླ་བཤོལ་འདོད་ཚུལ་དེ་ལྟར་བྱས་པ་ལའང་དུས་མི་འདྲ་བ་འོང་སྟེ། བྱེད་རྩིས་དང་གྲུབ་རྩིས་གཉིས་ཟླ་བཤོལ་འདོན་པའི་དུས་མི་འདྲ་བའི་ཕྱིར་ཏེ། གྲུབ་རྩིས་པའི་ལུགས་ལ་ཟླ་བཤོལ་འདོན་པའི་དུས་ནི་བྱེད་རྩིས་པའི་ལུགས་ལས་སྔ་བའི་ཕྱིར་རོ། །འོན་ཀྱང་ད་ལྟའི་རྒྱ་རྩིས་ཀྱི་ཟླ་བཤོལ་འདོན་ལུགས་འདི་ཞིབ་རྩིས་དང་མཐུན་པར་སྣང་ངོ་། །བྱེད་གྲུབ་གཉིས་མི་འདྲ་བ་འོང་བའི་རྒྱུ་མཚན་ཡོད་དེ། བྱེད་རྩིས་པས་ནི་ཟླ་དག་འཕར་བ་ན་ཟླ་བཤོལ་འདོན་ལ། གྲུབ་རྩིས་པས་སྒྲུང་གི་རི་མོ་གནམ་གང་དང་ཚེས་གཅིག་གང་རུང་ལ་ཤར་བ་ན་ཟླ་བཤོལ་འདོན་པའི་ཕྱིར་རོ། །གཉིས་པ་ལ། དབྱར་སྔ་མ་ནི། དབྱར་ཟླ་འབྲིང་བོ་རྫོགས་པའི་ཉའི་ཕྱི་ཉིན་ཁས་ལེན་པ་ཡིན་ལ། དེ་ཡང་འཇིག་རྟེན་ཡོངས་གྲགས་ལྟར་དབྱར་ཟླ་ཐ་ཆུང་གི་ཚེསབཅུ་དྲུག་སྟེ། ཧོར་ཟླ་དྲུག་པའི་ཚེས་བཅུ་དྲུག་ནས་ཁས་ལེན་ཅིང་། དེ་ནས་བཟུང་སྟེ་སྟོན་ཟླ་འབྲིང་བོའི་ཚེས་བཅོ་ལྔའི་བར་ཟླ་བ་གསུམ་ཁས་ལེན་པའོ། །དེ་ལྟར་མདོ་རྩ་ལས། དབྱར་གནས་པར་ཁས་བླང་བར་བྱའོ། །ཟླ་བ་གསུམ་དུའོ། །ཚེས་བཅུ་དྲུག་ལའོ། །དབྱར་ཟླ་འབྲིང་བོའི་ཉའི་ཕྱི་དེ་ཉིན་པར་རོ། །དབྱར་ཟླ་ཐ་ཆུང་གི་ཉའོ། །ཞེས་གསུངས་པ་ལྟར་རོ། །དབྱར་ཕྱི་མ་ནི། དབྱར་ཟླ་ཐ་ཆུང་གི་ཉའི་ཕྱི་དེ་ཉིན་པར་ཏེ་ཧོར་ཟླ་བདུན་པའི་བཅུ་དྲུག་སྟོན་ཟླ་ར་བའི་མར་ངོའི་ཚེས་གཅིག་ནས་སྟོན་ཟླ་ཐ་ཆུང་གི་བཅོ་ལྔའི་བར་དུའོ། །ཟླ་བ་རང་མིང་གི་དབང་དུ་བྱས་ན། ཇི་སྐད་དུ། གྲོ་བཞིན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་བཞིན་ཁྲུམས་ཀྱི་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཞེས་གསུངས་པ་ལྟར་རོ། །དབྱར་ཁས་ལེན་པའི་ཚེ་ཟླ་བ་གསུམ་ཁས་བླངས་ན་མི་ཆགས་པར་བཤད་པས། ཟླ་བ་གསུམ་གནས་མི་གནས་གང་ལྟར་ཁས་ལེན་པའི་དུས་སུ་གསུམ་གནས་པར་ཁས་ལེན་དགོས་སོ། །འོ་ན་ད་ལྟ་ཕལ་ཆེར་ལ་ཟླ་བ་གསུམ་གནས་པ་ཆེར་མི་འོང་འདུག་པ་འདི་ཇི་ལྟར་ཡིན་ཞེ་ན། དེ་ཡང་ཁས་ལེན་པའི་ཚེ་ཟླ་བ་གསུམ་གནས་པར་ཁས་ལེན་པས་ན་མི་འགལ་ལོ། ཁོ་ན་རེ། དེ་མི་འཐད་དེ། གསུམ་གནས་པར་ཁས་ལེན་པའི་ཚེ་བརྫུན་མེད་པར་ཁས་ལེན་དགོས་པ་ཡིན་པས། ད་ལྟ་ཁ་ཅིག་ཁས་ལེན་པའི་དུས་ཉིད་ནས་ཀྱང་བསམ་དགོངས་ལ་དགག་བྱ་མེད་བཞིན་དུ་ཟླ་བ་ཕྱེད་གཉིས་ཙམ་གནས་པར་ཁས་ལེན་པའི་དམ་བཅའ་འདུག་པས་འཐད་དཀའ་བའི་ཕྱིར་ཞེ་ན། བདེན་མོད། སྦྱིན་བདག་ཡོད་མེད་དམ་དུས་དབང་གིས་དམིགས་བསལ་ཡིན་ནམ་སྙམ་སྟེ་བརྟག་པར་བྱའོ། །གསུམ་པ་དགག་དབྱེ་ནི། དབྱར་སྔ་མ་ཁས་བླངས་པ་ཡིན་ན། དབྱུག་པ་ཟླ་བའི་བཅོ་ལྔ་དང་། དབྱར་ཕྱི་མ་ཡིན་ན། སྨིན་དྲུག་ཟླ་བའི་བཅོ་ལྔའི་བར་ཡིན་པས་དེ་དང་བསྟུན་ནས་སམ་དམིགས་བསལ་ཉ་ཤི་གང་རུང་དང་བསྟུན་ནས་དགག་དབྱེ་བྱ་དགོས་སོ། །སྔ་མའི་དབང་དུ་བྱས་ནས་དགག་དབྱེ་གཉིས་ཀ་བཅོ་ལྔ་བ་ཡིན་ཀྱང་། དམིགས་བསལ་ལ་མ་ངེས་ཏེ། གསོ་སྦྱོང་བཅུ་བཞི་བའི་དུས་ཡིན་ན་དགག་དབྱེ་ཡང་བཅུ་བཞི་བ་ཡིན་ལ། དེ་བཅོ་ལྔ་བ་ལ་ནི་དགག་དབྱེ་བཅོ་ལྔ་བའོ། ཁ་ཅིག་དེའི་ཁྱད་པར་མི་བྱེད་པར་དགག་དབྱེ་ཐམས་ཅད་བཅོ་ལྔ་བར་འདོད་པ་ཡང་སྣང་ངོ་། །དྲུག་པ་ལ་གཉིས། ཉི་ཟླའི་བགྲོད་ཚུལ་དང་། དུས་ཆེན་གྱི་ཁྱད་པར་རོ། །དང་པོ་ལ་ལྔ། ཉི་ཟླའི་ཐག་ཚད། ཉི་མས་གླིང་རྣམས་ལ་བྱ་བ་བྱེད་ཚུལ། དུས་བཞི་འཁོར་ཚུལ། ཉི་ལྡོག་གི་མཚམས། ཟླ་བ་འཕེལ་འགྲིབ་ཀྱི་རྒྱུ་མཚན་བསྟན་པའོ། །དང་པོ་ནི། མངོན་པ་ལྟར་ན། རི་རབ་ཀྱི་དཔངས་སུ་དཔག་ཚད་ཁྲི་ཚོ་བཅུ་དྲུག་ཡོད་པས། ཆུ་མཚམས་ཡན་ལས་ཕྱེད་འཕགས་པའི་དཔག་ཚད་བཞི་ཁྲི་ནས་ཉི་ཟླ་འཆར་སྟེ། མཛོད་ལས། ཉི་ཟླ་ལྷུན་པོའི་ཕྱེད་ནའོ། །ཞེས་གསུངས་པས་སོ། །འོན་ཀྱང་། དུས་འཁོར་བའི་ལུགས་ལ། ལྷུན་པོའི་དབྱིབས་ཚད་དང་ཉི་ཟླ་འཆར་ས་རྣམས་མཛོད་དང་མི་འདྲ་བར་བཤད་དེ། འདིར་མི་འཆད་དོ། །ཟླ་བའི་དཀྱིལ་འཁོར་ནི་ནོར་བུ་ཆུ་ཤེལ་ལས་གྲུབ་ཅིང་། རྒྱར་དཔག་ཚད་ལྔ་བཅུ་ཡོད་ལ། ཉི་མའི་དཀྱིལ་འཁོར་མེ་ཤེལ་ལས་གྲུབ་ཅིང་། རྒྱར་དཔག་ཚད་ང་གཅིག་ཡོད་དོ། །གཉིས་ཀའི་དབྱིབས་མཎྜལ་ལྟ་བུ་ལ། དཔངས་སུ་དཔག་ཚད་དྲུག་དང་བཅོ་བརྒྱད་ཆ་གཅིག་གོ །འདི་ལ་ས་སྡེར་ནི་རྒྱུ་དབྱིབས་ཅུང་མི་འདྲ་བར་བཤད་དོ། །གཉིས་པ་ནི། མཛོད་ལས། ནམ་ཕྱེད་ཉི་མ་ནུབ་པ་དང་། །ཉི་མ་ཕྱེད་དང་འཆར་དུས་གཅིག །ཞེས་འབྱུང་བ་ལྟར། སྟོན་དཔྱིད་ཉིན་མཚན་མཉམ་པ་ལྟ་བུའི་དུས་སུ། ཉི་མའི་དཀྱིལ་འཁོར་དང་འཛམ་བུའི་གླིང་གི་དཀྱིལ་ཐད་དུ་སླེབ་པའི་ཚེ། བྱང་དུ་ནམ་ཕྱེད་པ། ཤར་དུ་ཉི་མ་ནུབ་པ། ལྷོར་ཉི་མ་ཕྱེད་པ། ནུབ་ཏུ་ཉི་མ་འཆར་བ་གསུམ་དུས་མཉམ་པའི་ཚུལ་གྱི་འབྱུང་ངོ་། །འོན་ཀྱང་དེ་ལྟར་འོང་བ་ནི་དུས་བཞི་བོ་ཐམས་ཅད་དང་སྟོན་དཔྱིད་ཉིན་མཚན་མཉམ་པའི་དུས་ཁོ་ན་དང་། ཞག་རེ་རེ་ལའང་ཡིན་ནོ་ཞེས་འདོད་པའི་ཚུལ་མང་དུ་སྣང་ངོ་། །དེ་ནི་གླིང་བཞིར་འཆར་བའི་དུས་ཀྱི་དབང་དུ་བྱས་ལ། ཉིན་ཞིག་གི་དབང་དུ་བྱས་ཚེ་ཉི་མ་དང་དེའི་འོད་ཟེར་ཅི་རིགས་གླིང་འདིར་ཤར་བའི་ཚེ་འདིར་ཉིན་མོའི་ཐ་སྙད་འབྱུང་ལ་ཉི་མ་རི་རབ་ཀྱི་རྒྱབ་ཕྱོགས་སུ་ཉེ་བར་ཕྱོགས་པའི་གྲིབ་མ་འདིར་བབས་པ་ལ་མཚན་མོའི་ཐ་སྙད་བྱེད་དེ། ད་དུང་ཞིབ་ཏུ་དཔྱད་དགོས་སོ། །གསུམ་པ་ལ། ཁ་ཅིག །གླེང་བཞིར་དུས་གཅིག་ལ་དགུན་ལྟ་བུ་དུས་གཅིག་ཁོ་ན་བཞི་ཡོད་ཀྱི། དུས་བཞི་ཅིག་ཅར་དུ་མེད་པར་འདོད་དེ། འཛམ་གླིང་འདིར་དགུན་ཡོད་པའི་དུས་སུ་གླིང་གཞན་གསུམ་ནའང་དགུན་ཁོ་ན་ཡོད་པའི་ཕྱིར་ཞེས་གསུང་། རང་ལུགས་ལ་གསུམ་སྤྱིར་བསྟན་པ་དང་། ཉིན་མཚན་ལ་ཡུད་ཙམ་གྱི་ཁྱད་པར་བྱེ་བྲག་ཏུ་བཤད་པ། ཉི་མ་དབྱར་དགུན་རིང་ཐུང་དུ་འགྱུར་བའི་རྒྱུ་མཚན་ནོ། །དང་པོ་ནི། གླིང་བཞིར་དུས་བཞི་ཡོངས་རྫོགས་གཡས་སྐོར་གྱི་ཚུལ་དུ་ཁོར་ཡུག་ཏུ་ཡོད་དེ། འཛམ་གླིང་འདིར་འཁྲིག་པའི་ཁྱིམ་ཤར་ནས་མཇུག་ཏུ་དབྱར་ཉི་རིང་བ་མཐར་ཐུག་པའི་དུས་སུ། ཤར་དུ་སྟོན་ཉིན་མཚན་མཉམ། བྱང་དུ་དགུན་ཉི་ཐུང་བའི་མཐར་ཐུག །ནུབ་ཏུ་དཔྱིད་ཉིན་མཚན་མཉམ་པ་རྣམས་དུས་མཉམ་པའི་ཚུལ་གྱིས་ཡོད་པའི་ཕྱིར་ཏེ། དབྱར་རྗེས་སུ་སྟོན། སྟོན་རྗེས་སུ་དགུན། དགུན་རྗེས་སུ་དཔྱིད། དཔྱིད་རྗེས་སུ་དབྱར་རྣམས་གླིང་བཞིར་གཡས་སྐོར་དུ་རིམ་པར་འབྱུང་བའི་ཕྱིར་རོ། །གཉིས་པ་ནི། རགས་རྩིས་ལ་འཛམ་གླིང་འདིར་ཉི་མ་རིང་བའི་མཐར་ཐུག་ཡུད་ཙམ་བཅོ་བརྒྱད་དང་མཚན་མོ་ཡུད་ཙམ་བཅུ་གཉིས་ཡོད་པའི་དུས་སུ། བྱང་ན་ཉི་མ་ཐུང་བའི་མཐར་ཐུག་ཡིན་པས་ཉིན་མོ་ཡུད་ཙམ་བཅུ་གཉིས་དང་། མཚན་མོ་ཡུད་ཙམ་བཅོ་བརྒྱད་ཡོད་དེ། འདིའི་མཚན་མོའི་དུས་ཚད་དེ་བྱང་གི་ཉིན་མོའི་དུས་ལ་ཡོད་ཅིང་། འདིའི་ཉིན་མོའི་དུས་ཚད་དེ་བྱང་གི་མཚན་མོའི་དུས་སུ་གནས་པའི་ཕྱིར། དེའི་ཚེ་ཤར་ན་སྟོན་དང་ནུབ་ན་དཔྱིད་ཉིན་མཚན་མཉམ་པ་ཡིན་ཏེ། ཤར་ན་སྟོན་ཉིན་མཚན་ཡུད་ཙམ་བཅོ་ལྔ་བར་མཉམ་ཞིང་། ཆུ་ཚོད་ཀྱི་དབང་དུ་བྱས་ན་ཆུ་ཚོད་སུམ་ཅུ་རེར་མཉམ་པ་དེ་བཞིན་དུ་ནུབ་ནའང་དཔྱིད་ཚད་མཉམ་པ་སྔར་བཞིན་འགྲུབ་པའི་ཕྱིར། མཁས་པ་ཁ་ཅིག་ཤར་དུ་སྟོན་ཉིན་མཚན་མཉམ་པའི་དུས་སུ་ཕྱི་དྲོའི་ཆ་ལ་ཡུད་ཙམ་དགུ་ཡོད་པ་དེ་བཞིན་དུ། འཛམ་བུའི་གླིང་གི་སྔ་དྲོའི་ཆ་ལའང་ཡུད་ཙམ་དགུ་ཡོད་པས། ཤར་གྱི་ཕྱི་དྲོ་དང་འཛམ་བུའི་གླིང་གི་སྔ་དྲོ་གཉིས་ཡུན་ཚད་མཉམ་པ་དང་། དེ་བཞིན་དུ་གླིང་གཞན་ལ་སྦྱོར་བར་སྣང་ཡང་། ཚུལ་དེ་མཁས་གྲུབ་ནོར་བཟང་རྒྱ་མཚོས་ཞལ་ལུང་གི་ལྷན་ཐབས་སུ་ལེགས་པར་བཀག་འདུག་པས་རེ་ཞིག་བཏང་སྙོམས་སུ་བྱའོ། །མཁས་པ་ཁ་ཅིག་དུས་བཞི་གཡོན་སྐོར་དུ་འདོད་ཀྱང་། རང་ལུགས་ནི་གཡས་སྐོར་འཐད་པར་མཐོང་ངོ་། །གསུམ་པ་ཉི་མ་རིང་ཐུང་དུ་འགྱུར་བའི་རྒྱུ་མཚན་ལ་མཁས་པ་མང་བོས། ཉི་མ་བྱང་བགྲོད་ཀྱི་ཚེ་རང་གི་རྟར་གྱུར་པའི་རླུང་ལས་ལྷག་པའི་འཕུལ་བྱེད་ཀྱི་རླུང་གཞན་གྱི་སྣོན་མ་མེད་པས་ཉི་མའི་འགྲོས་བུལ་ལ། ལྷོ་བགྲོད་ཀྱི་ཚེ་རང་གི་རྟར་གྱུར་པའི་རླུང་ལས་ལྷག་པའི་ལྕགས་རིའི་རླུང་དྲག་པོའི་སྣོན་མའི་དབང་གིས་ཉི་མའི་བགྲོད་པ་སྔར་ལས་མགྱོགས་པར་བཞེད་དོ། །འོན་ཀྱང་འདི་ལ་རིགས་པའི་གནོད་བྱེད་འཇུག་པར་སེམས་ཏེ། ཉིན་ཞག་ལྟ་བུ་ལ་མཚོན་ན་ཞག་གཅིག་ལ་ཆུ་ཚོད་དྲུག་ཅུ་རེ་ལྷག་ཆད་མེད་པར་འོང་དགོས་པར་བཤད་པས་ན། ཉི་མ་རང་དབང་གིས་མི་བགྲོད་པར་ལྕགས་རིའི་རླུང་གིས་འཕུལ་བྱེད་ཡོད་མེད་ལ་བལྟོས་ན་ནི། དེ་ལ་ངེས་པ་མེད་པས་ཉིན་ཞག་གི་ཚད་ལ་ཆུ་ཚོད་དྲུག་ཅུ་རེ་ལས་ལྷག་ཆད་ཅན་དུ་འགྱུར་བས་ན། ཞག་ཟླ་ལོ་གསུམ་འཆུགས་ལ། དེ་འཆུགས་ན་དུས་ཚིགས་ཐམས་ཅད་ཀྱང་འཆུགས་པར་འགྱུར་བའི་ཕྱིར་བཞག་དཀའོ་སྙམ་སྟེ་བརྟག །འོ་ན་ཇི་ལྟར་ཡིན་ཞེ་ན། འདི་ལ་མཁས་གྲུབ་ནོར་བཟང་རྒྱ་མཚོས་དུས་འཁོར་ཞལ་ལུང་གི་ལྷན་ཐབས་གསལ་བའི་སྒྲོན་མེ་ལས། ཉི་མའི་དཀྱིལ་འཁོར་ལ་མགྱོགས་བུལ་གྱི་ཁྱད་པར་མེད་པས་ཉི་མའི་འཆར་ས་ཤར་ནུབ་དང་ནུབ་ས་ཤར་ནུབ་ཐ་དད་པའི་ཁྱད་པར་ཡོད་པར་གྲུབ་ལ། ཞེས་དང་། དེ་ལྟར་བྱུང་བ་ནི་ཡུལ་རྣམས་ཀྱི་སྔ་དྲོའི་ཐོག་མ་འགོ་འཛུག་སྔ་ཕྱི་བྱུང་བ་དང་། ཕྱི་དྲོ་རྫོགས་པ་ལ་སྔ་ཕྱི་བྱུང་བའི་ཁྱད་པར་ལས་ཡིན་གྱི། ཉི་མའི་རླུང་འགྲོས་མགྱོགས་བུལ་སོགས་ཀྱི་ཁྱད་པར་ནི་མིན་ཏེ། ཞེས་སོགས་གསུངས་པ་ལྟར། ས་ཁྱོན་མི་འདྲ་བའི་དབང་གིས་ཉི་མ་འཆར་ས་དང་ནུབ་ས་ལ་སྔ་ཕྱི་ཡོད་པས། ཉིན་མཚན་ལ་རིང་ཐུང་འབྱུང་ཡང་། ཉི་མའི་འགྲོས་མྱུར་བུལ་དང་སྔ་དྲོ་ཕྱི་དྲོ་ལ་རིང་ཐུང་ཡོད་པ་ལྟར་སྣང་ཡང་དོན་ལ་ནི་དེ་ལྟར་མི་འོང་བར་བཞེད་དེ། ཚུལ་འདི་ནི་ལུང་རིགས་ཡང་དག་གིས་བསྒྲུབས་པའི་ངེས་པ་རྙེད་པ་ཡིན་པའི་ཕྱིར་རོ། །འོ་ན་རི་རབ་ཀྱི་མཐའ་སྐོར་ཉི་མ་བགྲོད་བྱའི་ནམ་མཁའ་དང་ས་ཁྱོན་ལ་རྒྱ་ཆེ་ཆུང་ཡོད་དམ་མེད་ཅེ་ན། ཉི་མ་ལ་ལྷོ་བགྲོད་དང་བྱང་བགྲོད་ཡོད་ཀྱང་བགྲོད་བྱའི་ས་ཁྱོན་ལ་རྒྱ་ཆེ་ཆུང་གི་ཁྱད་པར་མེད་དེ། ཡོད་ན་ཉིན་ཞག་གཅིག་ལ་ཆུ་ཚོད་དྲུག་ཅུ་རེ་ལས་ལྷག་ཆད་ཅན་དུ་འགྱུར་བ་སོགས་སྔར་བཤད་པའི་རིགས་པས་གནོད་པའི་ཕྱིར་རོ། །དེས་ན། འདིར་ཉི་མ་རི་རབ་ལས་རིང་བར་ལྷོ་བགྲོད་བྱེད་པའི་རིམ་པ་ལྟར། བྱང་ན་ཉི་མ་རི་རབ་དང་ཉེ་བའི་ཚུལ་གྱིས་བགྲོད་དེ། གླིང་གང་དུ་ཉི་མ་ཅུང་ཟད་རེ་རི་རབ་ལས་རིང་བར་བགྲོད་པའི་རྒྱབ་ཐད་ཀྱི་གླིང་དེར་རི་རབ་ལས་ཅུང་ཟད་རེ་ཉེ་བའི་ཚུལ་གྱིས་བགྲོད་པར་བྱེད་ཀྱི། རི་རབ་ཀྱི་ཕྱོགས་ཐམས་ཅད་ནས་ཆེ་ཆུང་མཉམ་པོར་བྱེད་པ་ཡིན་ནོ། །བཞི་པ་ནི། སྤྱིར་དགུན་ཟླ་ར་བའི་ནང་དུ་ཉི་མ་ལྷོ་བགྲོད་མཐར་ཐུག་གི་དུས་སུ་དགུན་ཉི་ལྡོག་པ་ཡིན་ཏེ། རགས་རྩིས་ཡོངས་གྲགས་ལྟར་ན། ཉིན་མོ་ཐུང་བ་མཐར་ཐུག་ཡུད་ཙམ་བཅུ་གཉིས་སམ་ཆུ་ཚོད་ཉེར་བཞི་ཡོད་ཅིང་། མཚན་མོ་རིང་བ་མཐར་ཐུག་ཡུད་ཙམ་བཅོ་བརྒྱད་དམ་ཆུ་ཚོད་སོ་དྲུག་ཡོད་པའི་དུས་སུ་དགུན་ཉི་ལྡོག་པ་འབྱུང་བ་གང་ཞིག །དེ་དགུན་ཟླ་ར་བ་མགོ་ཟླ་བའི་ནང་དུ་འབྱུང་བའི་ཕྱིར་ཏེ། དེ་ཡང་ཟླ་བཤོལ་མེད་པའི་ཚེ་རགས་རྩིས་ཧོར་ཟླ་བཅུ་གཅིག་པའི་ཚེས་དགུ་ཕན་ཆད་དུ་འབྱུང་ལ། ཡོད་པའི་ཚེ་བཅུ་གཅིག་པའི་ཉི་ཤུའི་སྐོར་དང་། བཅུ་གཉིས་པའི་ཚེས་འགོ་ལའང་འབྱུང་སྲིད་པའི་ཕྱིར་རོ། །དབྱར་ཟླ་ར་བའི་ནང་དུ་ཉི་མ་བྱང་བགྲོད་མཐར་ཐུག་པའི་ཚེ་དབྱར་ཉི་ལྡོག་པ་འབྱུང་སྟེ། ཉིན་མོ་ཡུད་ཙམ་བཅོ་བརྒྱད་དང་མཚན་མོ་ཡུད་ཙམ་བཅུ་གཉིས་ཡོད་པའི་དུས་སུ་དབྱར་ཉི་ལྡོག་པ་འོང་བ་གང་ཞིག །དེ་དབྱར་ཟླ་ར་བ་སྣྲོན་གྱི་ཟླ་བ་ལ་འབྱུང་བའི་ཕྱིར་དང་། དེ་ཡང་ཟླ་བཤོལ་མེད་པའི་ཚེ་ཧོར་ཟླ་ལྔ་བའི་ཚེས་དགུ་མན་ཆད་དང་། ཡོད་པའི་ཚེ་ཉི་ཤུའི་སྐོར་དང་དྲུག་པའི་ཚེས་འགོ་ལྟ་བུ་ལའང་འབྱུང་སྲིད་པའི་ཕྱིར་རོ། །དེ་བཞིན་དུ་དཔྱིད་ཟླ་ར་བ་དབོ་ཟླ་བའི་ནང་དུ་དཔྱིད་ཉིན་མཚན་མཉམ་པ་དང་། སྟོན་ཟླར་འཁྲུམས་ཟླ་བའི་ནང་དུ་སྟོན་ཉིན་མཚན་མཉམ་པ་འབྱུང་བ་ཡིན་ལ། དེ་ཡང་ཧོར་ཟླ་གཉིས་པ་དང་བརྒྱད་པའི་ནང་དུ་འབྱུང་ཞིང་། འདི་དག་ལ་ཡང་ཟླ་བཤོལ་ཡོད་མེད་ཀྱི་དབང་གིས་སྔར་ལྟར་འོང་ངོ་། ཁྱིམ་ཟླ་དང་སྦྱར་ན་གཞུ་ཁྱིམ་དུ་དགུན་ཉི་དང་། འཁྲིག་པའི་ཁྱིམ་དུ་དབྱར་ཉི་ལྡོག་ལ། ཉ་ཁྱིམ་དང་བུ་མོར་དཔྱིད་སྟོན་ཉིན་མཚན་མཉམ་པ་རྣམས་རིམ་པ་བཞིན་དུ་འབྱུང་སྟེ། ད་དུང་ཞིབ་ཆ་དགོས་སོ། །མཁས་གྲུབ་ཆེན་པོ་ནོར་བཟང་རྒྱ་མཚོ་སོགས་དུས་འཁོར་བའི་མཁས་པ་དག་གིས་ནི། ཉིན་མཚན་གང་རུང་རིང་བ་མཐར་ཐུག་གི་དུས་སུ་ཆུ་ཚོད་སོ་དྲུག་དང་ཐུང་བའི་དུས་སུ་ཆུ་ཚོད་ཉེར་བཞི་འབྱུང་བ་ནི་བྱང་ཕྱོགས་ཀྱི་རི་བོ་གངས་ལྡན་དུ་ཡིན་གྱི། བོད་ཡུལ་འདིར་མིན་ཏེ། བོད་འདིར་ཉིན་མཚན་གང་རུང་རིང་བ་མཐར་ཐུག་གི་དུས་སུ་ཆུ་ཚོད་སོ་གསུམ་དང་། ཐུང་བའི་དུས་སུ་ཆུ་ཚོད་ཉེར་དྲུག་ལྷག་ཙམ་ཞིག་འབྱུང་བའི་ཕྱིར་ཞེས་བཞེད་དེ། འདི་ཡང་ལུང་རིགས་རྣམ་དག་གིས་བསྒྲུབས་འདུག་པས་གནད་ཆེའོ། །ཉི་མ་ལྡོག་མཚམས་དང་ཉིན་མཚན་མཉམ་པའི་དུས་བཞི་བོ་དེ་དག་ནི། དུས་མི་འགྱུར་བའི་གཟེར་བཞི་ཡིན་ལ། དབྱར་དགུན་གྱི་ཉི་མ་ལྡོག་པ་དང་སྟོན་དཔྱིད་ཉིན་མཚན་མཉམ་པའི་བར་ལ་ཞག་ཅི་ཙམ་འོང་བ་ནི། དགུན་ཉི་ལྡོག་པའི་དུས་དེ་ནས་ཁྱིམ་ཞག་དགུ་བཅུ་ཙམ་དང་། ཉིན་ཞག་གོ་གཅིག་དང་ཆུ་ཚོད་བཅུ་དགུ་ཆུ་སྲང་གསུམ་དབུགས་གསུམ་དང་། ཚེས་ཞག་གོ་གཉིས་དང་ཆུ་ཚོད་ཞེ་དྲུག་ཆུ་སྲང་དགུ་དབུགས་གཅིག་སོང་བའི་ཉིན་ཞག་དེ་ཉིད་ལ་དཔྱིད་ཉིན་མཚན་མཉམ་པ་འབྱུང་བ་ལྟར། གཞན་གསུམ་གྱི་བར་ལའང་དེ་ཙམ་ཞིག་འགྲོའོ། །ལོ་སྔོན་མའི་དགུན་ཉི་ལྡོག་པའི་ཉིན་ཞག་དེ་ནས་ལོ་གཅིག་སོང་སྟེ་ཉིན་ཞག་དེ་ཐོབ་ལ་སླེབ་པའི་ཕྱི་དེ་ཉིན་པ་ནས་ལོ་ཕྱི་མ་དེའི་དགུན་ཉི་ལྡོག་པའི་བར་ལ་ཞག་བཅུ་གཅིག་རེ་འགྲོ་དགོས་ཏེ། གཞན་གསུམ་གྱི་བར་ལ་དེའི་རིགས་འགྲེ་སྦྱོར། དུས་འཁོར་བལྟར་ན། ཉི་ལྡོག་དེ་དག་ནི་རང་གླིང་གི་ཚངས་ཐིག་ཏུ་བགྲོད་གཉིས་མཐར་ཐུག་གི་དབང་དུ་བྱས་ཀྱི། གཞན་དུ་ན་ཉིན་ཞག་རེ་རེ་ལའང་དབྱར་དགུན་གྱི་ཉི་ལྡོག་རེ་རེ་དང་སྟོན་དཔྱིད་ཉིན་མཚན་མཉམ་པ་རེ་རེ་འབྱུང་བར་བཞེད་དེ། དཔེེར་ན་གླིང་འདིར་དབྱར་ཉི་ལྡོག་པའི་ཞག་དེ་ལ་བྱང་དུ་དགུན་ཉི་ལྡོག་ཅིང་། ཤར་ན་སྟོན་ཉིན་མཚན་མཉམ་པ་དང་ནུབ་ཏུ་དཔྱིད་ཉིན་མཚན་མཉམ་པར་འོང་བར་བཞེད་པའི་ཕྱིར་རོ། །དེས་ན་ཁྱིམ་ལོ་གཅིག་ལ་ཉིན་ཞག་སུམ་བརྒྱ་རེ་ལྔ་འབྱུང་བས་དབྱར་དགུན་གྱི་ཉི་ལྡོག་དང་སྟོན་དཔྱིད་ཉིན་མཚན་མཉམ་པ་བཞི་བོ་རེ་རེ་ལའང་སུམ་བརྒྱ་རེ་ལྔ་རེ་འབྱུང་བར་བཞེད་དེ། འདི་ནི་རིགས་པས་ཀྱང་འགྲུབ་པར་སྣང་བའི་ཕྱིར་རོ། །བགྲོད་གཉིས་མཐར་ཐུག་གི་དབང་དུ་བྱས་པའི་ཚེ་ནའང་། ས་ཚིགས་མི་འདྲ་བའི་དབང་གིས་རྒྱ་ནག་ལས་མདོ་སྨད་ཀྱི་ཕྱོགས་འདིར་ཉི་མ་ལྡོག་ཅུང་ཕྱི་ལ། དེ་ལས་ཀྱང་བོད་ཡུལ་དབུས་སུ་ཉི་ལྡོག་ཅུང་ཕྱི་བར་རིགས་པས་འགྲུབ་སྟེ། ཞིབ་ཏུ་བརྟགས་ན་ཤེས་སོ། །ལྔ་པ་ནི། མཛོད་ལས། ཉི་མ་དང་ནི་ཉེ་བ་ལས། །རང་གི་གྲིབ་མས་འགྲིབ་པར་སྣང་། །ཞེས་འབྱུང་བ་ལྟར། ཡར་ངོའི་ཚེས་གཅིག་ནས་བཅོ་ལྔའི་བར་ཟླ་བ་ཉི་མ་དང་ཇེ་རིང་ཇེ་རིང་དུ་སོང་བའི་དབང་གིས། ཟླ་བའི་གྲིབ་མོ་ཇེ་ཆུང་ཇེ་ཆུང་དུ་སོང་སྟེ། བཅོ་ལྔ་ལ་ཉི་མའི་འོད་ཟེར་ཟླ་བ་ལ་ཕོག་པའི་གྲིབ་མ་གཏན་མེད་པས་ཟླ་བ་ཉ་གང་བར་སྣང་ལ། མར་ངོའི་ཚེས་གཅིག་ནས་གནམ་གང་གི་བར་ཉི་ཟླ་གཉིས་ཇེ་ཉེ་ཇེ་ཉེར་སོང་ནས་ཟླ་བའི་གྲིབ་མ་ཇེ་ཆེ་ཇེ་ཆེར་གྱུར་ཏེ། གནམ་གང་ལ་ཉི་ཟླ་གཉིས་ཤིན་ཏུ་ཉེ་བས་ཟླ་བ་ལ་ཉི་མའི་འོད་ཟེར་ཆེར་ཕོག་པའི་རྐྱེན་གྱིས་དེ་རང་གི་གྲིབ་མས་རྫོགས་པར་སྒྲིབ་པར་སྣང་ངོ་། །ས་སྡེ་ལྟར་ན་དེ་དང་མི་འདྲ་བ་ཞིག་ཀྱང་ཡོད་དོ། །དྲུག་པ་དུས་ཆེན་ལ་བཞི། དུས་ཆེན་གྱི་དབྱེ་བ། ཕྱེ་བ་སོ་སོའི་རང་བཞིན། ཆོ་འཕྲུལ་ཆེན་པོ་བྱེ་བྲག་ཏུ་བཤད་པ། དགེ་བའི་འགྱུར་ཁྱད་དོ། །དང་པོ་དུས་ཆེན་ལ་དབྱེ་ན། ཇི་སྐད་དུ། མངོན་བྱང་ཆུབ་དང་ཆོས་འཁོར་དང་། །ལྷ་བབས་ཆོ་འཕྲུལ་ཆེན་པོ་སྟེ། །དད་ལྡན་བསོད་ནམས་གསོག་པ་ཡི། །ཁྱད་པར་ཅན་གྱི་དུས་ཡིན་ནོ། །ཞེས་གསུངས་པ་ལྟར། རང་ཅག་གི་བླ་མ་ལྷ་དང་བཅས་པའི་འཇིག་རྟེན་ཐམས་ཅད་ཀྱི་སྟོན་པ་བཀའ་དྲིན་ཅན་དེ་ཉིད་ཀྱིས་མཛད་པ་ཁྱད་པར་ཅན་བསྟན་པའི་ནང་ནས། མངོན་པར་བྱང་ཆུབ་པའི་དུས་ཆེན་སོགས་དུས་ཆེན་བཞི་ཞེས་ཡོངས་སུ་གྲགས་པ་དེ་རྣམས་དང་། གཞན་ཡང་ལྷུམས་སུ་ཞུགས་པ་དང་བལྟམས་པ་དང་རབ་ཏུ་བྱུང་བ་དང་མྱ་ངན་ལས་འདས་པའི་དུས་ཆེན་སོགས་མང་ངོ་། །གཉིས་པ་ནི། དུས་ཆེན་འདི་དག་ལོ་དང་ཟླ་བ་གང་ལ་བྱུང་བ་འདུལ་མངོན་གྱི་བླ་མ་མང་བོ་དང་། ཁྱད་པར་དུས་འཁོར་གྱི་སྲོལ་འཛིན་པའི་མཁས་པ་དུ་མ་ཞིག་གིས་ལུང་དང་རིགས་པ་དུ་མས་སྟོན་པའི་དུས་ཆེན་དེ་དག་ལོ་འདི་དང་ཟླ་བ་འདི་དང་འདི་ལ་བྱུང་ངོ་ཞེས་བཤད་ཀྱང་ཤིན་ཏུ་མི་མཐུན་པ་དང་། འགའ་ཞིག་མཐུན་ལ་འགའ་ཞིག་མི་མཐུན་པ་སོགས་མང་དུ་སྣང་ཡང་དེ་ཐམས་ཅད་ཀྱི་རྗེས་སུ་ནི་སུ་ཞིག་འབྲང་བར་ནུས་ཏེ། དེ་དག་ཕལ་ཆེར་ནི་རགས་པའི་རྣམ་གཞག་ཡིན་ཞིང་ལ་ལ་ཞིབ་པར་བྱེད་འདོད་ཀྱང་ཇི་ལྟ་བ་བཞིན་མ་ནུས་པར་སྣང་བས། འདིར་སྐར་རྩིས་ཀྱི་རིགས་པའི་མཐའ་རྙེད་པ་ཕུག་པ་ལྷུན་གྲུབ་རྒྱ་མཚོ་དང་། མཁས་གྲུབ་ནོར་བཟང་རྒྱ་མཚོ་དང་། སྡེ་སྲིད་སངས་རྒྱས་རྒྱ་མཚོ་སོགས་ཀྱི་རྗེས་སུ་འབྲང་བར་བྱ་སྟེ། ཚུལ་འདི་དག་ལ་དེ་རྣམས་ཀྱིས་བཞེད་པ་ནི་འཁྲུལ་མེད་རྣམ་དག་ཏུ་གོ་བའི་ཕྱིར་རོ། །དེས་ན་བདག་ཅག་གི་སྟོན་པ་དེ་ཉིད་ས་ལུག་གི་ལོར་ཆུ་སྟོད་ཀྱི་ཚེས་བཅོ་ལྔ་ལ་ལྷུམས་སུ་ཞུགས། ལྕགས་སྤྲེལ་ས་ག་ཟླ་བའི་ཚེས་བདུན་ལ་སྐུ་བལྟམས། ས་བྱི་དཔྱིད་ཟླ་ཐ་ཆུང་གི་ཚེས་བརྒྱད་ལ་རབ་ཏུ་བྱུང་གསུངས་ཏེ་འདི་ཧོར་ལུགས་དང་བསྟུན་ན་ས་ག་ཟླ་བར་བྱེད་དགོས་པར་སྣང་ངོ་། །ཤིང་རྟ་ས་ག་ཟླ་བའི་ཚེས་བཅོ་ལྔ་ལ་སངས་རྒྱས། ལོ་དེའི་ཆུ་སྟོད་ཟླ་བའི་ཚེས་བཞིར་ཆོས་འཁོར་བསྐོར། ལྕགས་བྱི་ཧོར་ཟླ་དགུ་པའི་ཉེར་གཉིས་ལ་ལྷ་ལས་བབས། མེ་འབྲུག་གམ་ཤིང་ཡོས་ཀྱི་ལོར་ལ་ཆུ་ཟླའི་ཡར་ངོ་ལ་ཆོ་འཕྲུལ་ཆེན་པོ་བསྟན། ལྕགས་འབྲུག་ལོའི་ས་ག་ཟླ་བའི་བཅོ་ལྔ་ལ་མྱ་ངན་ལ་འདའ་བའི་ཚུལ་བསྟན་ཏེ། དེ་དག་ནི་ཡོངས་སུ་གྲགས་པའི་དུས་ཆེན་ཡིན་ལ། གཞན་ཡང་མང་ངོ་། །ས་ག་ཟླ་བའི་བཅོ་ལྔ་འདི་དུས་ཆེན་གསུམ་འཛོམས་སུ་བཞེད་དེ། དེ་ཡང་ལྷུམས་སུ་ཞུགས་པ་དང་སངས་རྒྱས་པ་དང་མྱ་ངན་ལས་འདས་པའི་དུས་ཆེན་ནོ། །དེས་ན་ཧོར་ཟླ་དང་པོ་ལ་སྒྲུབ་མཆོད་འཛིན་པ་ནི་ཆོ་འཕྲུལ་ཆེན་པོའི་དུས་ཆེན་དང་། ཧོར་ཟླ་བཞི་པའི་སྨོན་ལམ་ནི་སངས་རྒྱས་པའི་དུས་ཆེན་དང་། དྲུག་པའི་དབྱར་མཆོད་ནི་ཆོས་འཁོར་བསྐོར་བའི་དུས་ཆེན་དང་། བཅུ་པའི་ལྔ་མཆོད་ནི་རྗེ་བཙུན་བཙོང་ཁ་པ་ཆེན་པོ་སྐུ་གཤེགས་པའི་དུས་ཆེན་གྱི་དབང་དུ་བྱས་པ་ཡིན་པས། དེ་དག་གི་ཁྱད་པར་ཤེས་དགོས་སོ། །གསུམ་པ་དེ་དག་ལས། ཆོ་འཕྲུལ་ཆེན་པོའི་དུས་ཆེན་ཚིགས་སུ་བཅད་པའི་སྒོ་ནས་མདོར་བསྡུས་ཏེ་བཤད་ན། འདི་ལྟར། ལྷ་དང་བཅས་པའི་སྟོན་པ་དེར། །སྔོན་ཚེ་མུ་སྟེགས་བྱེད་དག་གིས། །ཆོ་འཕྲུལ་འགྲན་པར་འདོད་ནས་ནི། །ཞུས་པས་མཆུ་ཟླའི་ཚེས་གཅིག་ལ། །རྒྱལ་བོ་གསལ་རྒྱལ་གྱིས་མཆོད་ཚེ། །ཚེམས་ཤིང་ས་ལ་བཙུགས་མ་ཐག །རིན་ཆེན་སྣ་བདུན་ལྡན་པ་ཡི། །ལྗོན་ཤིང་དཔག་ཚད་མང་ལྡན་སྤྲུལ། །ཚེས་གཉིས་ཨུ་ཏྲ་ཡ་ནས་མཆོད། །གཡས་གཡོན་རིན་ཆེན་རི་བོ་ལ། །ནགས་ཚལ་སྣ་ཚོགས་ཀྱིས་བརྒྱན་ཅིང་། །རོ་བརྒྱའི་འབྲས་ལྡན་རྩ་མཆོག་སྤྲུལ། །ཚེས་གསུམ་ཤུན་རྩི་རྒྱལ་པོས་མཆོད། །ཞལ་བཤལ་འཐོར་ཐུང་འདོར་བ་ལས། །ཡན་ལག་བརྒྱད་ལྡན་རྫིང་བུ་མཆོག །དཔག་ཚད་མདངས་ལྡན་པད་མོ་སྦྲུལ། །ཚེས་བཞི་ཨིནྡྲ་བྷུ་མིས་མཆོད། །རྫིང་བུ་དེ་ཡི་ངོས་བཞི་རུ། །ཡུར་ཆེན་བརྒྱད་བརྒྱད་འཁོར་བ་ལས། །ཆོས་ཀྱི་སྒྲ་དབྱངས་སྒྲོགས་པ་སྤྲུལ། །ཚེས་ལྔ་ཚངས་བྱིན་རྒྱལ་པོས་མཆོད། །སྟོན་པའི་ཞལ་ལས་འོད་འཕྲོས་ཏེ། །སྟོང་གསུམ་འཇིག་རྟེན་མ་ལུས་ཁྱབ། །འོད་དེས་རེག་པས་བདེ་བར་གྱུར། །ཚེས་དྲུག་ལི་ཙཱའི་ཚོགས་ཀྱིས་མཆོད། །སྟོན་པའི་འཁོར་རྣམས་ཐམས་ཅད་ཀྱིས། །གཅིག་གིས་གཅིག་སེམས་ཤེས་གྱུར་ཏེ། །ལས་འབྲས་ཡིད་ཆེས་དད་པ་རྙེད། །ཚེས་བདུན་ཤཱཀྱ་རྣམས་ཀྱིས་མཆོད། །འཁོར་ལོ་བསྒྱུར་བའི་རྒྱལ་བོ་ནི། །རིན་ཆེན་སྣ་བདུན་ལྡན་པ་ལ། །བློན་པོའི་ཚོགས་ཀྱིས་བསྐོར་བ་སྤྲུལ། །ཚེས་བརྒྱད་ལྷ་དབང་བརྒྱ་བྱིན་མཆོད། །སེང་ཁྲི་ཕྱག་གིས་མནན་པ་ལས། །སྲིན་པོ་ལྔ་བྱུང་ཕྱག་རྡོར་གྱིས། །མུ་སྟེགས་འཁོར་བཅས་ཚར་བཅད་བཏུལ། །ཚེས་དགུ་ཚངས་པའི་རྒྱལ་བོས་མཆོད། །འོད་ཟེར་འཕྲོ་བའི་སྐུ་ལུས་ཀྱིས། །ཚངས་པའི་བར་དུ་ཁྱབ་མཛད་ནས། །གསུང་གིས་ཆོས་བསྟན་འགྲོ་རྣམས་བསྒྲལ། །ཚེས་བཅུར་རྒྱལ་ཆེན་སྡེ་བཞིས་མཆོད། །འོད་ཟེར་འབར་བའི་སྐུ་མཆོག་གིས། །སྲིད་རྩེའི་བར་དུ་ཁྱབ་མཛད་དེ། །འགྲོ་ལ་ཆོས་བསྟན་རྣམ་པར་གྲོལ། །བཅུ་གཅིག་མགོན་མེད་ཟས་སྦྱིན་མཆོད། །སེངྒེའི་ཁྲི་ལ་བཞུགས་བཞིན་དུ། །སྐུ་ལུས་མི་སྣང་འོད་ཟེར་གྱིས། །སྟོང་གསུམ་ཁྱབ་ཅིང་ཆོས་སྟོན་མཛད། །བཅུ་གཉིས་ཁྱིམ་བདག་སྤྱི་ཐོས་མཆོད། །སྟོང་གསུམ་འོད་ཀྱིས་ཁྱབ་མཛད་ཅིང་། །འོད་དེས་རེག་པའི་སེམས་ཅན་རྣམས། །སྐྱོན་བྲལ་ཡོན་ཏན་ལྡན་པར་མཛད། །བཅུ་གསུམ་ཤཱུཉྩི་རྒྱལ་བོས་མཆོད། །ལྟེ་བ་ལས་ནི་འོད་ཟེར་གཉིས། །འདོམ་བདུན་པདྨ་སངས་རྒྱས་བཅས། །དེ་བཞིན་སྟོང་གསུམ་ཁྱབ་པར་སྤྲུལ། །བཅུ་བཞི་ཨུ་ཏྲ་ཡ་ནས་མཆོད། །གཏོར་བའི་མེ་ཏོག་སྣ་ཚོགས་ནི། །རིན་ཆེན་བདུན་ལྡན་ཤིང་རྟའི་སྟེང་། །སྤྲུལ་བའི་སངས་རྒྱས་མང་བཅས་སྤྲུལ། །བཅོ་ལྔ་གཟུགས་ཅན་སྣིང་བོས་མཆོད། །ཕྱག་གིས་ས་ལ་བསྣུན་མ་ཐ །སེམས་ཅན་དམྱལ་བ་བཅུ་དྲུག་རྣམས། །ཀུན་གྱིས་མངོན་མཐོང་སྐྱོ་བ་སྐྱེས། །དེ་ལྟར་ཆོ་འཕྲུལ་བསྟན་པའི་ཚེ། །ལྷ་དང་མི་སོགས་གྲངས་མེད་པའི། །སེམས་ཅན་བྱང་ཆུབ་རྣམ་གསུམ་དང་། །མངོན་མཐོ་མཆོག་ལ་སྦྱོར་བར་མཛད། །ཅེས་བྱའོ། །ཞར་ལ་དུས་བཟང་གཞན་འབྱུང་བའི་རྒྱུ་མཚན་བསྟན་པ་ལ། འོ་ན་ད་ལྟ་ཟླ་བ་རེ་རེར་ཚེས་བརྒྱད་བཅོ་ལྔ་གནམ་གང་གི་དུས་བཟང་གསུམ་འབྱུང་བ་འདི་གང་གི་སྒོ་ནས་ཡིན་ཞེ་ན། འདི་ལ་མཁས་པ་ཁ་ཅིག་ཚེས་བརྒྱད་ལ་སྨན་བླ། བཅོ་ལྔ་ལ་ཐུབ་དབང་། གནམ་གང་ལ་འོད་དཔག་མེད་སེམས་ཅན་གྱི་དོན་དུ་འབྱོན་པའི་དུས་ཆེན་ཡིན་ཞེས་བཞེད་ལ། ཁ ཅིག་ཟླ་བ་འཕེལ་འགྲིབ་ཀྱི་མཚན་མ་དེ་གསུམ་ལ་གསལ་བའི་སྒོ་ནས་ཡིན་ཏེ། ཚེས་བརྒྱད་ལ་ཟླ་བའི་ཕྱེད་འཕེལ་ཞིང་། བཅོ་ལྔ་ལ་ཉ་གང་བ་དང་། གནམ་གང་ལ་ཟླ་བའི་དཀར་ཆ་ཐམས་ཅད་འགྲིབ་པའི་སྐབས་སོ་ཞེས་འདོད་ཅིང་། འགྲིབ་པའི་ཕྱེད་ཉིན་མོ་འབྱུང་བ་ནི་མི་གསལ་བས་མི་བགྲང་ངོ་། །གཞུང་གཞན་འགའ་ཞིག་ནས་རྒྱལ་བོ་ཆེན་པོ་བཞིས་འཇིག་རྟེན་སྐྱོང་བར་ཁས་བླངས་པ་ལྟར། ཚེས་བཅོ་ལྔ་ལ་རྒྱལ་ཆེན་བཞི་རང་ཉིད་འཇིག་རྟེན་དུ་འབྱོན། གནམ་གང་ལ་རྒྱལ་ཆེན་བཞིའི་བུ་རྣམས་འཇིག་རྟེན་དུ་འོང་། ཚེས་བརྒྱད་ལ་རྒྱལ་ཆེན་བཞིའི་གཡོག་རྣམས་འཇིག་རྟེན་དུ་འོང་ཞེས་བཞེད་པ་ཡང་སྣང་སྟེ། གང་ལྟར་བྱས་ཀྱང་འགལ་བ་མེད་པར་སེམས་སོ། །ཞེས་པ་ནི། སྤྱིར་དུས་ཆེན་དང་དུས་བཟང་དེ་དག་ལ་དགེ་སྡིག་གང་བྱས་ཀྱང་འགྱུར་ཆེ་ཞིང་། ཁྱད་པར་དགེ་བ་བྱས་པ་རྣམས་སྟོབས་ཆེའོ། །དེའི་ནང་ནས་ཀྱང་དུས་ཆེན་བཞི་ལ་འགྱུར་ལྷག་པར་ཆེའོ། །ཇི་སྐད་དུ། དེ་ལྟར་དུས་ཆེན་རྣམ་བཞི་ལ། །དགེ་བ་ཅུང་ཟད་བགྱིས་པ་རྣམས། །ས་ཡ་ཕྲག་བརྒྱའི་འགྱུར་དུ་གསུངས། །དེ་དག་ཞིབ་ཏུ་རྩིས་གྱུར་ན། །ལྷག་བསམ་དག་པས་ནས་ཕུལ་གང་། །སྦྱིན་པར་བཏང་ངམ་ཕུལ་ན་ནི། །ས་ཡ་ཕྲག་བརྒྱར་འགྱུར་བའི་ཕྱིར། །ནས་ཁལ་བརྒྱད་འབུམ་སུམ་ཁྲི་དང་། །སུམ་སྟོང་སུམ་བརྒྱ་སུམ་ཅུ་གསུམ། །བྲེ་དྲུག་ཕུལ་བཞིའི་འབྲས་བུ་ནི། །འབྱུང་བར་རྒྱལ་བ་ཉིད་ཀྱིས་གསུངས། །ཞེས་འབྱུང་བ་ལྟར་རོ། །བདུན་པ་དུས་ཚིགས་ཀྱི་རྣམ་གཞག་ཤེས་པ་ལ་དགོས་པ་ཡོད་དེ། ལོ་ཟླ་ཞག་དུས་རྣམས་ལ་རྨོངས་པའི་རྨོངས་པ་ཟློག་པ་དང་། དེ་དག་གི་རྣམ་གཞག་གསུང་རབ་ནས་བཤད་པའི་དགོངས་པ་རྟོགས་པར་འགྱུར་བ་དང་། གསོ་སྦྱོང་སོགས་གང་དུ་བྱ་བའི་དུས་ལ་མཁས་པ་དང་། ཁྱད་པར་དུས་ཆེན་གང་ཡིན་ཤེས་ནས་དགེ་བ་བྱས་པ་རྣམས་གོང་འཕེལ་དུ་འགྱུར་བའི་དགོས་པ་ཡོད་པའི་ཕྱིར་རོ། །སྨྲས་པ། སངས་རྒྱས་མཐུ་དང་སྤྱི་མཐུན་ལས་ཀྱིས་ནི། །སྣོད་བཅུད་ལོ་ཟླ་ཞག་དུས་བཀོད་པའི་ཁྱད། །འདྲ་དང་འདྲ་མིན་སྣ་ཚོགས་མཆིས་པ་ཀུན། །རྒྱལ་བའི་ཡུལ་ཡིན་དེ་ལས་གཞན་དུ་མིན། །འོན་ཀྱང་གླིང་བཞི་འདི་ཡི་དབང་བྱས་ཏེ། །ཉི་ཟླ་སྐར་གསུམ་རྒྱུ་བའི་ཁྱད་པར་གྱིས། །ལོ་ཟླ་ཞག་གསུམ་དུས་ཚིག་དབྱེ་བ་སོགས། །ཇི་ལྟར་འབྱུང་བའི་རྣམ་གཞག་དེ་ཙམ་སྨྲས། །དེ་ཡང་མདོ་རྒྱུད་དགོངས་འགྲེལ་གཞུང་རྣམས་དང་། །མཁས་མང་བརྒྱུད་པའི་མན་ངག་ལ་བརྟེན་ནས། །རང་གིས་ཇི་ལྟར་རྟོགས་པའི་ཚུལ་དེ་བཞིན། །འཚམ་པར་བརྗོད་ཀྱི་ཤིན་ཏུ་རྒྱས་པར་མིན། །འདི་ལ་བཞེད་སྲོལ་མི་འདྲའི་སྤྲིན་འཁྲིགས་པས། །བློ་མིག་བསྒྲིབས་རྐྱེན་ལོག་པར་བཤད་ཉེས་ན། །ནོངས་དེ་མཁས་དང་འཕགས་པའི་ཚོགས་ཀྱི་དྲུང་། །ཟོལ་མེད་འགྱོད་པའི་ཡིད་ཀྱིས་ངེས་པར་འཆགས། །འདིར་འབད་ལེགས་པར་བཤད་ལས་རབ་དཀར་དགེ །ཇི་སྙེད་ཐོབ་དེས་མཐའ་དག་འགྲོ་བ་ཀུན། །རྩོད་དུས་དྲི་མའི་སྐྱོན་ལས་ངེས་ཐར་ཏེ། །བདེ་སྐྱིད་རྫོགས་ལྡན་དཔལ་ལ་སྤྱོད་གྱུར་ཅིག །ཅེས་དུས་ཚིགས་སྤྱི་དང་བྱེ་བྲག་གི་རྣམ་གཞག་ལེགས་པར་བཤད་པ་འདིའང་གནས་བརྟན་རིག་པ་འཛིན་པ་རྒྱལ་མཚན་དཔལ་བཟང་ཞེས་བགྱི་བས་འདི་ལྟ་བུ་ཞིག་གྱིས་དང་། ཁོ་བོས་མཐུན་རྐྱེན་མཐའ་དག་ཉེ་བར་སྦྱར་ནས་བར་དུ་བསྒྲུབ་པར་བྱའོ་ཞེས་བསྐུལ་བ་ལ་བརྟེན་ནས། སླར་ཡང་ཅོ་ནེའི་མཁན་ས་དང་མཚན་ཉིད་ཀྱི་བཤད་གྲྭ་ཟུང་འབྲེལ་གྱིས་སྐྱོང་ཞིང་འདུལ་མངོན་གྱི་གནད་ཕྱོགས་ཙམ་རིག་པ་ཤཱཀྱའི་དགེ་སློང་རིགས་པ་སྨྲ་བ་གྲགས་པ་བཤད་སྒྲུབ་ཀྱིས་ཉེ་བར་སྦྱར་བའོ།། །།དགེ་ལེགས་འཕེལ། བཀྲ་ཤིས།། །།