དབུ་མའི་ལུགས་ཀྱི་ཟབ་དོན་གྱི་སྙིང་བོ་བསྡུས་པ།

དབུ་མའི་ལུགས་ཀྱི་ཟབ་དོན་གྱི་སྙིང་བོ་བསྡུས་པ་ཞེས་བྱ་བ་བཞུགས།

ན་མོ་མཉྫུ་གྷོ་ཥཱ་ཡ། འཇམ་པའི་དབྱངས་ཀྱིས་མངོན་སུམ་རྗེས་བཟུང་སྟེ། །རྒྱལ་བའི་ཆོས་ཚུལ་ཀུན་དང་ཁྱད་པར་དུ། །ཟབ་མོ་རྟེན་ཅིང་འབྲེལ་འབྱུང་དབུ་མའི་ལམ། །གསལ་མཛད་རྗེ་བཙུན་ཙོང་ཁ་བ་དེར་འདུད། །ཉིད་ཀྱི་ལེགས་བཤད་རིན་ཆེན་བུམ་བཟང་ནས། །ཟབ་དོན་བདུད་རྩིའི་སྙིང་བོ་ཆ་ཙམ་ཞིག །དད་དང་རྣམ་དཔྱོད་འབྲེལ་བའི་ཀུ་ཤའི་རྩེས། །བླངས་ཏེ་གཞན་ལ་སྟེར་བའི་གར་གྱིས་བྲེལ། །དེ་ལ་འདིར་དབུ་མ་ཐལ་འགྱུར་བའི་ལུགས་གཙོ་བོར་བྱས་ཏེ། ཟབ་དོན་ཐོར་བུ་འགའ་ཞིག་ཕྱོགས་གཅིག་བསྡུས་ནས་འཆད་པ་ལ་འཇུག་པར་བྱ་སྟེ། འདི་ལ་གསུམ། རྟེན་འབྱུང་མཐའ་བརྒྱད་དང་བྲལ་བའི་དོན། ལས་ལ་རྟག་ཆད་སྤོང་ཚུལ། དུས་གསུམ་གྱི་རྣམ་པར་གཞག་པའོ། །དང་པོ་ལ་གཉིས། བཤད་གཞི་དགོད་པ་དང་། དེའི་དོན་བཤད་པའོ། །དང་པོ་ནི། འཕགས་པ་ཀླུ་སྒྲུབ་ཀྱིས། དབུ་མ་རྩ་བ་ཤེས་རབ་ཀྱི་མཆོད་བརྗོད་དུ། གང་གིས་རྟེན་ཅིང་འབྲེལ་བར་འབྱུང་། །ཞེས་པ་ནས། དམ་པ་དེ་ལ་ཕྱག་འཚལ་ལོ། །ཞེས་པའི་བར་གསུངས་པ་འདིའོ། །གཉིས་པ་དེའི་དོན་བཤད་པ་ལ་གཉིས། ཚིག་གི་དོན་བཤད་པ་དང་། དེ་ལས་འཕྲོས་པའི་དོན་བཤད་པའོ། །དང་པོ་བསྡུས་ཏེ་བཤད་ན། ཕྱག་འཚལ་ལོ། །གང་ལ་ན། གང་གིས་རྟེན་ཅིང་འབྲེལ་བར་འབྱུང་བ་བསྟན་པའི་རྫོགས་པའི་སངས་རྒྱས་དེ་ལའོ། །དེས་དེ་ཇི་ལྟར་བསྟན་ཅེ་ན། ཆོས་ཀུན་རང་བཞིན་གྱིས་མེད་པས་ན། །རྟེན་འབྱུང་གི་དེ་ཁོ་ན་ཉིད་མངོན་སུམ་དུ་རྟོགས་པའི་མཉམ་གཞག་ཟག་མེད་ཀྱི་གཟིགས་དོན་འདུས་བྱས་ཀྱི་རྟེན་འབྱུང་རྣམས་སྐད་ཅིག་མར་འཇིག་པའི་འགག་པ་མེད་ལ། དེ་བཞིན་དུ་རང་གི་དངོས་པོར་རེད་པའི་སྐྱེ་བ་དང་། སྔ་མ་རྒྱུན་ཆད་པ་དང་། དུས་ཐམས་ཅད་དུ་གནས་པའི་རྟག་པ་དང་། ཡུལ་རིང་བ་ནས་ཚུར་འོང་བ་དང་། ཉེ་བ་ནས་ཕར་འགྲོ་བ་དང་། དོན་སོ་སོ་བའི་ཐ་དད་པ་དང་། དོན་སོ་སོ་བ་མིན་པའི་གཅིག་པ་རྣམས་མེད་པར་བསྟན་ཏོ། །རྟེན་འབྱུང་གི་ཆོས་ཉིད་མངོན་སུམ་དུ་གཟིགས་པའི་གཟིགས་ངོ་དེར་བརྗོད་བྱ་རྗོད་བྱེད་བསྒྲུབ་བྱ་སྒྲུབ་བྱེད་གཅིག་དང་དུ་མ་མཚན་མཚོན་ལ་སོགས་པའི་ཀུན་རྫོབ་ཀྱི་སྤྲོས་པ་ཐམས་ཅད་ཉེ་བར་ཞི་ཞིང་། རྣམ་རྟོག་གི་རྒྱུ་བ་མེད་ལ་ཤེས་པ་དང་ཤེས་བྱའི་ཐ་སྙད་ཀྱང་ལོག་པའི་སྒོ་ནས་སྐྱེ་རྒ་ལ་སོགས་པ་ཉེར་འཚེ་མ་ལུས་པ་དང་བྲལ་བས་ན་ཞི་བའོ། །སངས་རྒྱས་བཅོམ་ལྡན་འདས་ཀྱིས་ནི། རྟེན་འབྱུང་གི་དེ་ཉིད་ཇི་ལྟ་བ་བཞིན་མངོན་སུམ་དུ་གཟིགས་ནས་གཞན་ལ་ཕྱིན་ཅི་མ་ལོག་པར་སྟོན་པས་ན། དེ་ལ་སྨྲ་བ་རྣམས་ཀྱི་དམ་པ་ཞེས་བྱའོ། །གང་ཞེས་པ་སྤྱི་སྒྲ་ཡིན་ཀྱང་འདིར་རྫོགས་པའི་སངས་རྒྱས་ཞེས་པ་དང་འབྲེལ་བས་ཐུབ་དབང་ལ་གོ་བར་བྱའོ། །གཞུང་འདིས་མཉམ་གཞག་ཟག་མེད་ཡེ་ཤེས་ཀྱིས་ཆོས་ཉིད་ཇི་ལྟར་གཟིགས་པའི་གཟིགས་ངོ་ན་རྟེན་འབྱུང་གི་འགག་སོགས་བརྒྱད་མེད་པར་བསྟན་ཀྱང་། སྤྱིར་འགག་སོགས་བརྒྱད་ཐ་སྙད་དུ་ཡོད་ཚུལ་ནི་འཆད་པར་འགྱུར་རོ། །གཞན་ཡང་། ཆོས་ཉིད་མངོན་སུམ་དུ་རྟོགས་པའི་སློབ་པའི་མཉམ་གཞག་ཟག་མེད་ཡེ་ཤེས་ཀྱི་གཟིགས་ངོར། གཟུགས་སྒྲ་སོགས་དང་དེའི་སྐྱེ་འགག་སོགས་ཀུན་རྫོབ་ཀྱི་སྣང་བ་མེད་པས། དེས་དེ་རྣམས་ནི་ཐ་སྙད་དུའང་མ་གཟིགས་ཀྱང་། དེ་དག་མེད་པར་གཟིགས་པ་ནི་མིན་ནོ། །ཤེས་རབ་སྙིང་བོ་ལས། གཟུགས་མེད་སྒྲ་མེད་ཅེས་སོགས་གསུངས་པའང་མཉམ་གཞག་དེའི་གཟིགས་ངོ་ན་དེ་དག་མེད་པར་དགོངས་པ་སྟེ། དེ་ཉིད་ཀྱང་གཟུགས་སོགས་རང་བཞིན་གྱིས་མེད་པའི་དོན་དང་། གཟུགས་སོགས་དོན་དམ་དཔྱོད་བྱེད་ཀྱི་རིགས་པས་དཔྱད་མི་གཟོད་པའི་དོན་དུ་འགྲོ་བའང་ཡིན་ནོ། །གཉིས་པ་འཕྲོས་དོན་ལ་གཉིས། རྟེན་འབྱུང་གི་ཁྱད་གཞི་ལ་ཁྱད་ཆོས་ལྡན་ཚུལ། དེ་དག་མཉམ་གཞག་ཟག་མེད་ཡེ་ཤེས་ཀྱི་ཡུལ་གྱི་རང་བཞིན་དུ་མི་འགྱུར་བའི་རྒྱུ་མཚན་ནོ། །དང་པོ་ནི། འདིའི་དངོས་བསྟན་གྱི་རྟེན་འབྲེལ་ནི་གཙོ་བོ་འདུས་བྱས་ཀྱི་དབང་དུ་མཛད་པ་སྟེ། དེ་ཡང་ཁྱད་གཞི་འདུས་བྱས་ལ་ཁྱད་ཆོས་འགག་སོགས་བརྒྱད་པོ་དེ་ཐ་སྙད་དུ་ཡོད་ཀྱི། རང་བཞིན་གྱིས་མེད་ཅེས་སྟོན་པའོ། །འགག་སོགས་བརྒྱད་པོ་ནི་ཐ་སྙད་དུ་ཡོད་དེ། འདུས་བྱས་རྣམས་སྐྱེས་ནས་འཇིག་པར་འགྱུར་བས་སྐྱེ་འགག་ཡོད་ལ། ལས་ཉོན་རྒྱུན་ཆད་པ་དང་། ཆོས་ཉིད་རྟག་པ་དང་། ཕར་འགྲོ་བ་དང་། ཚུར་འོང་བ་དང་། བྱས་མི་རྟག་ལྟ་བུ་དོན་གཅིག་པ་དང་། ཀ་བུམ་ལྟ་བུ་དོན་ཐ་དད་པའང་ཡོད་དོ། །དོན་གཅིག་དང་ཐ་དད་ལ་འཇོག་ཚུལ་གཞན་ཞིག་ཀྱང་བཤད་དེ། བྱ་བ་ནི་གཅིག་སྟེ་ཆོས་སོ་ཞེས་པ་ལྟ་བུ་དོན་གཅིག་དང་། བྱ་བ་ནི་གཉིས་སྟེ་ཆོས་དང་འཇིག་རྟེན་ནོ་ཞེས་པ་ལྟ་བུ་ནི་དོན་ཐ་དད་དུ་གསུངས་པས་སོ། །རྟེན་འབྱུང་གི་དོན་ལ་གཉིས་ཡོད་པའི་གཅིག་ནི། འཕགས་པ་ཀླུ་སྒྲུབ་ཀྱིས་རྩ་བ་ཤེས་རབ་ལས། བྱེད་པོ་ལས་ལ་བརྟེན་བྱས་ཤིང་། ལས་ཀྱང་བྱེད་པ་པོ་ཉིད་ལ། །བརྟེན་ནས་འབྱུང་བ་མ་གཏོགས་པ། །འགྲུབ་པའི་རྒྱུ་ནི་མ་མཐོང་ངོ་། །ཞེས་གསུངས་པ་ལྟ་བུའོ། །འདི་ནི་གཞི་དེ་ལ་བརྟེན་ནས་འགྲུབ་པ་ལ་བརྟེན་ནས་འབྱུང་བར་གསུངས་པ་སྟེ། ལྟོས་ནས་གྲུབ་པའི་དོན་ཡིན་པས་ཆོས་ཐམས་ཅད་ལ་ཁྱབ་བོ། །དེ་ལྟར་ཡང་རྩ་ཤེས་ལས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་བ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་པའི་ཕྱིར་རོ། །རྒྱུ་རྐྱེན་ལ་བརྟེན་ནས་འབྱུང་བ་ནི་འདུས་བྱས་མིན་པ་གཞན་ལ་མེད་ཀྱང་། རང་གི་ཆ་ཤས་ལ་བརྟེན་ནས་འགྲུབ་པ་ནི་ཆོས་ཐམས་ཅད་ལ་ཡོད་དེ། དེ་ཡང་ཆ་ཅན་རྣམས་རང་གི་ཆ་ཤས་དང་ཆ་ཤས་རྣམས་ཀྱང་རང་རང་གི་ཆ་གཞན་ལ་བརྟེན་ནས་གྲུབ་པའི་རྟེན་འབྱུང་ཡིན་ཏེ། དཔེར་ན། བུམ་པ་ནི་རང་གི་མཆུ་ཞབས་ལྟོ་བ་སོགས་ལ་བརྟེན་ནས་བཞག་ལ། མཆུ་ཞབས་སོགས་ཀྱང་རང་གི་གཡས་གཡོན་གྱི་ཆ་གཞན་ལ་བརྟེན་ནས་བཞག་པ་བཞིན་ནོ། །ཐུན་མོང་བའི་དབང་དུ་བྱས་ན་འཕྲད་ལྟོས་རྟེན་གསུམ་རྣམ་གྲངས་སུ་བཤད་པ་ལྟར་ཡིན་ལ། ཐུན་མོང་མ་ཡིན་པའི་དབང་དུ་བྱས་ན་མིང་བརྡའ་འམ་རྟོག་པས་བཏགས་པ་ཙམ་ལ་རྟེན་འབྲེལ་དུ་གསུངས་པ་ལྟར་ཤེས་པར་བྱའོ། །གཉིས་པ་རྒྱུ་མཚན་ལ་གཉིས། དངོས་དང་། དེའི་རིགས་པ་བསྟན་པའོ། །དང་པོ་ནི། རྟེན་འབྱུང་གི་འགག་སོགས་བརྒྱད་པོ་དེ་ཆོས་ཉིད་མངོན་སུམ་དུ་རྟོགས་པའི་མཉམ་གཞག་ཟག་མེད་ཡེ་ཤེས་ཀྱི་ཡུལ་གྱི་རང་བཞིན་དུ་མེད་དེ། དེའི་རང་བཞིན་དུ་ཡོད་ན་ཡེ་ཤེས་དེས་ཆོས་ཉིད་ཇི་ལྟར་གཟིགས་པའི་གཟིགས་ངོར་ཡོད་དགོས་ལ། དེར་ཡོད་ན་ཡེ་ཤེས་དེས་གཟིགས་པ་ལྟར་གནས་ཚུལ་བདེན་དགོས། དེ་ལྟར་བདེན་ན་ནི་གནས་ལུགས་སུ་གྲུབ་དགོས་པ་ལས། དེར་མ་གྲུབ་པའི་ཕྱིར་ཏེ། ཡེ་ཤེས་དེའི་གཟིགས་ངོར་ཆོས་ཉིད་མ་གཏོགས། ཀུན་རྫོབ་པའི་ཆོས་གང་ཡང་མི་སྣང་བའི་ཕྱིར་ཏེ། ཀུན་རྫོབ་པའི་ཆོས་ཡིན་བཞིན་དུ་གཟིགས་ངོ་དེར་གྲུབ་ན་ནི་བདེན་གྲུབ་ཏུ་ཐལ་བས་དེ་ལ་ནི་འཆད་པར་འགྱུར་པའི་རིགས་པ་རྣམས་ཀྱིས་གནོད་པའི་ཕྱིར་རོ། །གཉིས་པ་གནོད་བྱེད་ཀྱི་རིགས་པ་བསྟན་པ་ལ་གཉིས། སྐྱེ་བ་བདེན་གྲུབ་འགོག་ཚུལ་བསྟན་པ་དང་། གཞན་གྱི་འགོག་ཚུལ་བཤད་པའོ། །དང་པོ་ལ་གསུམ། རྟེན་འབྲེལ་གྱི་རྟགས། རྡོ་རྗེ་གཟེགས་མ། དེ་ལས་གཞན་པའི་རིགས་པའོ། །དང་པོ་ནི། ཕྱི་ནང་གི་དངོས་པོ་རྣམས་ཆོས་ཅན། རང་བཞིན་གྱིས་མི་སྐྱེ་སྟེ། རང་གི་རྒྱུ་རྐྱེན་ལ་བརྟེན་ནས་འབྱུང་བའི་ཕྱིར། ཁྱབ་པ་ཡོད་དེ། རྒྱུ་རྐྱེན་ལ་བརྟེན་ནས་སྐྱེ་ན། དེ་ལ་ལྟོས་པའི་རག་ལས་པ་ཡིན་དགོས་ཤིང་། དེ་ཡིན་ན། གཞན་གྱི་དབང་གིས་སྐྱེ་བར་སོང་གི །རང་དབང་གིས་སམ་རང་བཞིན་གྱིས་སྐྱེ་བ་མ་ཡིན་པར་འགྲུབ་པའི་ཕྱིར་ཏེ། དེ་སྐད་དུའང་མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལ་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང་། རྩ་ཤེ་ལས་ཀྱང་། བརྟེན་ནས་འབྱུང་བ་གང་ཡིན་པ། །དེ་ནི་ངོ་བོ་ཉིད་ཀྱིས་ཞི། །ཞེས་དང་། འཕགས་པ་ལྷས་ཀྱང་། གང་ལ་བརྟེན་ནས་གང་འབྱུང་བ། །དེ་ནི་རང་དབང་མི་འགྱུར་རོ། །ཞེས་གསུངས་པའི་ཕྱིར་རོ། །དེས་ན་རྟེན་འབྱུང་གི་རྟགས་ཀྱིས་དངོས་པོ་རང་བཞིན་མེད་པར་སྒྲུབ་པ་ལ་ནི། ལྟ་ངན་གྱི་དྲ་བ་གཅོད་པ་སོགས་ཀྱི་ཕན་ཡོན་ཡོད་པས་བསྔགས་པའི་གནས་སུ་གསུངས་ཏེ། དཔལ་ལྡན་ཟླ་བས་འཇུག་པ་ལས། གང་ཕྱིར་དངོས་པོ་བརྟེན་ནས་རབ་འབྱུང་བས། །རྟོག་པ་འདི་དག་བརྟག་པར་མི་ནུས་པ། །དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་དང་། རྟེན་འབྲེལ་བསྟོད་པ་ལས་ཀྱང་། །གང་གང་རྐྱེན་ལ་རག་ལས་པ། །དེ་དེ་རང་བཞིན་གྱིས་སྟོང་ཞེས། །གསུང་བ་འདི་ལ་ཡ་མཚན་པའི། །ལེགས་འདོམས་ཚུལ་ནི་ཅི་ཞིག་ཡོད། །ཅེས་དང་། དེ་ཕྱིར་ཁྱོད་ཀྱི་བསྟན་པ་ལ། །རྟེན་འབྱུང་མཐོང་བ་ལེགས་པར་བསྔགས། ཞེས་གསུངས་པའི་ཕྱིར་རོ། །གཉིས་པ་ལ་གཉིས། ཕྱོགས་སྔ་བརྗོད་པ་དང་། དེ་དགག་པའོ། །དང་པོ་ནི། བདག་སྐྱེའི་དོན་རང་ཉིད་རང་ལས་སྐྱེ་བའི་དོན་མིན་གྱི། ཕྱི་རོལ་གྲངས་ཅན་པས་སྐྱེ་བ་གཞིར་བྱས་པ་ལ་སྤྱིར་ཡོད་པ་ཞིག་སྐྱེ་དགོས་ཀྱི། མེད་ན་མི་སྐྱེ་བས་སྐྱེ་རྒྱུའི་དངོས་པོ་རྣམས་ཀྱང་རང་གི་རྒྱུའི་དུས་སུ་མེད་ན་མི་སྐྱེ་བས། རང་གི་རྒྱུའི་དུས་སུ་དེའི་བདག་ཉིད་དུ་མངོན་པར་མི་གསལ་བའི་ཚུལ་གྱིས་ཡོད་ནས་སྐྱེ་བ་ཡིན་ནོ་ཞེས་ཟེར་ཞིང་། སྐྱེས་ཟིན་ནས་སླར་སྐྱེ་བར་ནི་མི་འདོད་དོ། །དེ་ཡང་། མྱུ་གུ་རང་གི་རྒྱུ་ལས་སྐྱེའོ་ཞེས་འཇིག་རྟེན་གྲགས་པས། དེ་རང་གི་རྒྱུའི་དུས་སུ་མེད་ན་ནི། དེ་དེ་ལས་སྐྱེ་ཟེར་བ་ཇི་ལྟར་འཐད་སྙམ་པའོ། །གཞན་ཡང་། རྒྱུ་རྐྱེན་དུ་མ་ཚོགས་ནས་སྐྱེས་པའི་འབྲས་བུ་ཐུན་མོང་བ་གཅིག་ནི་འདུག་ལ། དེ་རྒྱུ་རྐྱེན་རྣམས་དང་རང་བཞིན་གཅིག་པའི་གཙོ་བོ་གཅིག་མེད་ན་མི་རུང་བས། དེ་རྣམས་དང་རང་བཞིན་དབྱེར་མེད་པའི་སྤྱི་གཙོ་བོ་གཅིག་ཡོད་པ་དེ་ལས། རྣམ་འགྱུར་རྣམས་ནི་ནམ་མཁའ་ལས་འཇའ་ཚོན་བཞིན་དུ་འབྱུང་ངོ་། །ཞེས་ཟེར་རོ། །ཕྱི་རོལ་པ་ཕལ་ཆེར་དང་། རང་རྒྱུད་པ་མན་ཆད་ཀྱི་རང་སྡེས་ནི། དངོས་པོ་རང་གིས་མཚན་ཉིད་ཀྱིས་གྲུབ་པའི་རྒྱུ་གཞན་ལས་སྐྱེ་བའི་གཞན་སྐྱེ་འདོད་ལ། གཅེར་བུ་པས་རྫ་བུམ་དེ་འཇིམ་པའི་བདག་ཉིད་དུ་སྐྱེ་བས་བདག་ལས་སྐྱེ་བ་དང་། རྫ་མཁན་སོགས་ལ་བརྟེན་ནས་སྐྱེ་བས་གཞན་ལའང་སྐྱེ་ཞིང་སྐྱེས་བུ་སྐྱེ་བ་སྔ་མའི་སྲོག་གི་བདག་ཉིད་དུ་ཡོད་པ་སྐྱེ་བས་བདག་ལས་སྐྱེ་བ་དང་། ཕ་མ་དང་སྔོན་གྱི་ལས་ལ་བརྟེན་ནས་སྐྱེ་བས་གཞན་ལས་སྐྱེ་བར་འདོད་ལ། རྒྱང་འཕེན་པས་ནི་ཚེར་བའི་རྣོ་བ་དང་སྲན་མའི་ཟླུམ་པ་དང་རྨ་བྱའི་མདོངས་ཀྱི་ཁ་དོག་ལྟ་བུ་ནི་གང་གིས་ཀྱང་ལག་པ་ལྟ་བུས་མ་བྱས་ཀྱང་འབྱུང་བས་རྒྱུ་མེད་ལས་སྐྱེའོ་ཞེས་འདོད་དོ། །གཉིས་པ་དེ་འགོག་པ་ནི། མགོན་པོས་རྩ་ཤེ་ལས། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །ཞེས་སོགས་གསུངས་པ་ལྟར། དངོས་པོ་རྣམས་ཆོས་ཅན། རང་བཞིན་གྱིས་མི་སྐྱེ་སྟེ། བདག་དང་གཞན་དང་གཉིས་ཀ་དང་རྒྱུ་མེད་ལས་ཀྱང་མི་སྐྱེ་བའི་ཕྱིར། བདག་ལས་སྐྱེ་ན་དོན་མེད་དང་ཐུག་མེད་དུ་ཐལ་བ་ནི། སྐྱེ་ལྡན་གྱི་མྱུ་གུ་ཆོས་ཅན། སླར་ཡང་སྐྱེ་བ་དོན་མེད་པར་ཐལ། རང་གི་བདག་ཉིད་ཐོབ་ཟིན་པའི་ཕྱིར། ཁྱབ་པ་མེད་ན། སླར་ཡང་སྐྱེ་བ་ཐུག་པ་མེད་པར་ཐལ། རང་གི་བདག་ཉིད་ཐོབ་ཟིན་ཀྱང་སླར་ཡང་སྐྱེ་དགོས་པའི་ཕྱིར། དེའི་དོན་གོ་བདེ་བར་བརྗོད་ན། མྱུ་གུ་དེ་རང་གི་རྒྱུའི་དུས་སུ་ཡོད་པའི་ཚུལ་གྱིས་བདག་ལས་སྐྱེ་ན་ནི་སྐྱེས་ཟིན་ཚར་དགོས་པས། དེ་ནས་སླར་མྱུ་གུར་སྐྱེ་བ་དོན་མེད་ལ། གལ་ཏེ་སླར་སྐྱེ་བ་དོན་ཡོད་ན་ནི། །མི་སྐྱེ་བའི་སྐབས་མེད་པར་དུས་རྟག་ཏུ་སྐྱེ་དགོས་པར་འགྱུར་ན། དེ་ནི་མི་འཐད་དོ་ཞེས་པའོ། །དེ་ལྟར་ཡང་ཟླ་བས་འཇུག་པ་ལས། དེ་ཉིད་དེ་ལས་འབྱུང་ན་ཡོན་ཏན་འགའ་ཡང་ཡོད་མ་ཡིན། །སྐྱེས་བར་གྱུར་བ་སླར་ཡང་སྐྱེ་བར་རིགས་པའང་མ་ཡིན་ཉིད། སྐྱེས་ཟིན་སླར་ཡང་སྐྱེ་བར་ཡོངས་སུ་རྟོག་པར་འགྱུར་ན་ནི། །མྱུ་གུ་ལ་སོགས་རྣམས་ཀྱི་སྐྱེ་བ་འདིར་རྙེད་མི་འགྱུར་ཞིང་། །ས་བོན་སྲིད་མཐར་ཐུག་པར་རབ་ཏུ་སྐྱེ་བ་ཉིད་དུ་འགྱུར། །ཞེས་གསུངས་པའི་ཕྱིར་རོ། །རང་ལུགས་ལ། མྱུ་གུ་ལྟ་བུ་རང་གི་རྒྱུའི་དུས་སུ་མེད་ཀྱང་ས་བོན་ཡོད་པའི་ཚུལ་གྱིས་སྐྱེ་བས་མི་འགལ་ཏེ། དེ་རྟེན་འབྲེལ་གྱི་སྐྱེ་ཚུལ་ཡིན་པའི་ཕྱིར་རོ། །གཞན་ཡང་། མྱུ་གུ་ལྟ་བུ་རང་བཞིན་གྱིས་གྲུབ་ན་ནི། གཞན་དུ་འགྱུར་བ་མི་འཐད་པས་རང་གི་རྒྱུའི་དུས་སུ་ཡོད་དགོས་པས། བདག་སྐྱེ་དངོས་སུ་ཁས་ལེན་ནམ་མི་ལེན་ཀྱང་། བདག་ལས་སྐྱེ་བར་འགྱུར་བས་སྔར་བཞིན་འགོག་པའམ་རིགས་པ་གཞན་གྱིས་དགག་གོ །གཞན་ཡང་། བདག་ལས་སྐྱེ་བ་མེད་དེ། ཡོད་ན། འབྲས་བུ་རྣམས་རང་གི་རྒྱུའི་རང་བཞིན་དུ་སོང་བས་རང་གི་རྒྱུ་ཡིན་པའི་ཆ་ནས་བསྐྱེད་བྱེད་དང་། རང་གི་འབྲས་བུ་ཡིན་པའི་ཆ་ནས་བསྐྱེད་བྱ་གཉིས་ཀ་ལེན་པར་ཐལ་བར་འགྱུར་བའི་ཕྱིར་ན་ལས་བྱ་བྱེད་ཐམས་ཅད་ཡང་གཅིག་ཏུ་འགྱུར་ཏེ། འཇུག་པ་ལས། བདག་ལས་སྐྱེ་བར་འདོད་ན་བསྐྱེད་པར་བྱ་དང་སྐྱེད་བྱེད་དང་། །ལས་དང་བྱེད་པ་པོ་ཡང་གཅིག་ཉིད་འགྱུར་ན་དེ་དག་ནི། །གཅིག་ཉིད་མ་ཡིན་པས་ན་བདག་ལས་སྐྱེ་བར་ཁས་བླང་པར། །བྱ་མིན་རྒྱ་ཆེར་བཤད་པའི་ཉེས་པར་ཐལ་བར་འགྱུར་ཕྱིར་རོ། །ཞེས་གསུངས་པའི་ཕྱིར་རོ། །གཞན་ཡང་། བདག་ལ་སྐྱེ་བ་མེད་དེ། མྱུ་གུ་དེ་རང་གི་རྒྱུའི་དུས་སུ་ཡོད་བཞིན་དུ་མི་སྐྱེ་བའི་ཕྱིར་ཏེ། ས་བོན་ངོ་བོ་རྣམ་པར་མ་འགྱུར་བར་མྱུ་གུ་སྐྱེ་བ་མེད་པའི་ཕྱིར་ཏེ། དེ་རྣམ་པར་མ་འགྱུར་བར་སྐྱེ་ན་ནི་ས་བོན་དང་མྱུ་གུའི་དུས་གཉིས་ཀྱི་ཚེ་གཉིས་ཀའི་དབྱིབས་དང་ཁ་དོག་སོགས་ལ་ཁྱད་པར་མེད་པར་ཐལ་བར་འགྱུར་བའི་ཕྱིར་ཏེ། འཇུག་པ་ལས། བྱེད་རྒྱུ་ས་བོན་གྱི་ལས་ཐལ་དད་མྱུ་གུའི་དབྱིབས་དང་ནི། ཁ་དོག་རོ་ནུས་སྨིན་པ་ཐ་དད་ཁྱོད་ལ་མེད་པར་འགྱུར། །ཞེས་གསུངས་པའི་ཕྱིར་རོ། །གཞན་ཡང་བདག་ལས་སྐྱེ་བ་མེད་དེ། མྱུ་གུའི་རྒྱུ་རྐྱེན་གྱི་ཚོགས་པ་དང་ཡ་གྱལ་གང་ལའང་མྱུ་གུ་ལན་གང་བ་གཟུང་དུ་མེད་པའི་ཕྱིར་ཏེ། རྩ་ཤེ་ལས། གལ་ཏེ་རྒྱུ་དང་རྐྱེན་རྣམས་ཀྱི། །ཚོགས་ལ་འབྲས་བུ་ཡོད་ན་ནི། །ཚོགས་ལ་གཟུང་དུ་ལོང་རིགས་ན། །ཚོགས་པ་ཉིད་ལ་ཟུང་དུ་མེད། ཅེས་གསུངས་པའི་ཕྱིར་རོ། །གཉིས་པ་གཞན་སྐྱེ་འགོག་པ་ནི། འཇུག་པ་ལས། གལ་ཏེ་གཞན་ལ་བརྟེན་ནས་གཞན་ཞིག་འབྱུང་བར་འགྱུར་ན་ནི། །འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་འགྱུར་ཞིང་། །ཐམས་ཅད་ལས་ཀྱང་ཐམས་ཅད་སྐྱེ་བར་འགྱུར་ཏེ་གང་གི་ཕྱིར། །སྐྱེད་པར་བྱེད་པ་མ་ཡིན་པ་ལུས་ལ་ཡང་གཞན་ཉིད་མཚུངས། །ཞེས་གསུངས་པ་ལྟར། རང་གིས་མཚན་ཉིད་ཀྱིས་གྲུབ་པའི་རྒྱུ་གཞན་ལས་སྐྱེ་ན། རྒྱུ་འབྲས་རང་བཞིན་གྱིས་གྲུབ་པའི་ཐ་དད་དུ་སོང་བས། དེ་གཉིས་ཕན་ཚུན་བལྟོས་མེད་ཀྱི་གཞན་དུ་འགྱུར་ལ། དེ་ལྟ་ན་ནི། འབྲེལ་མེད་དོན་གཞན་དུ་འགྱུར་ཞིང་། འབྲེལ་མེད་དོན་གཞན་ཡིད་བཞིན་དུ་རྒྱུ་འབྲས་ཡིན་ན། མེ་ལས་དུ་བ་འབྱུང་བ་དེ་བཞིན་དུ་མེ་ལྕེ་ལས་ཀྱང་རང་གི་བསལ་བྱ་མུན་པ་འཐུག་པོ་འབྱུང་བར་ཐལ་བ་དང་། རྒྱུ་ཡིན་མིན་ཐམས་ཅད་ལས་ཀྱང་འབྲས་བུ་ཡིན་མིན་ཐམས་ཅད་སྐྱེ་བར་ཐལ་ལོ། །འདོད་པར་མི་ནུས་ཏེ། རྒྱུ་ལས་འབྲས་བུ་མ་འཁྲུལ་བར་འབྱུང་བར་མཐོང་བའི་ཕྱིར་རོ། །འདི་ནི་མཚོན་པ་ཙམ་སྟེ། གཞན་སྐྱེའི་དོན་ལེགས་པར་གོ་བ་ནི། རང་བཞིན་གྱིས་གྲུབ་པའི་དགག་བྱའི་ཚད་ཟིན་པ་ལ་རག་ལས་པས། འགོག་ཚུལ་རྒྱས་པར་གཞན་ནས་ཤེས་པར་བྱའོ། །གསུམ་པ་གཉིས་ཀ་ལས་མི་སྐྱེ་སྟེ། གང་རུང་རེ་རེ་ལས་མི་སྐྱེ་བར་བསྒྲུབས་ཟིན་པའི་ཕྱིར། འདི་སླའོ། །བཞི་བ་རྒྱུ་མེད་ལས་མི་སྐྱེ་སྟེ། རྒྱུ་དང་བཅས་ཏེ་སྐྱེ་བ་མངོན་སུམ་གྱིས་དམིགས་པའི་ཕྱིར་དང་། འབྲས་བུའི་ཆེད་དུ་རྒྱུ་བསྒྲུབས་པ་ལ་དོན་ཡོད་པའི་ཕྱིར་རོ། །གཞན་ཡང་རྒྱུ་མེད་ལས་མི་སྐྱེ་སྟེ། སྐྱེ་ན་རྨ་བྱའི་མདོངས་ཀྱང་བྱ་རོག་སོགས་ལ་ཡོད་པར་ཐལ་བ་དང་། ཡུལ་དུས་གཅིག་ཏུ་སྐྱེ་ན་ནི། ཡུལ་དུ་ཐམས་ཅད་དུ་སྐྱེ་བར་ཐལ་བ་སོགས་གནོད་བྱེད་མཐའ་ཡས་པའི་ཕྱིར་རོ། །འདི་ཡང་དགག་པར་སླའོ། །དངོས་སྨྲ་བ་རྣམས་ཀྱིས་དངོས་པོ་རྣམས་མཐའ་བཞི་གང་རུང་ལས་སྐྱེ་བར་འདོད་པས། རང་བཞིན་གྱིས་གྲུབ་པའི་སྐྱེ་བ་ཁས་ལེན་པ་ཡིན་ལ། ཐལ་འགྱུར་བས་ནི། དངོས་པོ་རྣམས་ཐ་སྙད་དུ་སྐྱེ་ཡང་། མཐའ་བཞི་པོ་དེ་གང་རུང་ལས་མི་སྐྱེ་བས། རང་བཞིན་གྱིས་མི་སྐྱེ་བར་བཞེད་པ་ཡིན་ཏེ། འཇུག་པ་ལས། གང་གི་ཕྱིར་ན་བདག་དང་གཞན་དང་གཉིས་ཀ་ལས་སྐྱེ་དང་། །རྒྱུ་ལ་མ་བལྟོས་ཡོད་པ་མིན་པས་དངོས་རྣམས་རང་བཞིན་བྲལ། །ཅེས་གསུངས་པའ་ིཕྱིར་རོ། །དེ་ལྟར་ལེགས་པར་ཤེས་ཤིང་བསྒོམས་ན། སྟོང་ཉིད་ཀྱི་དོན་བསྒོམ་པར་ཡང་འགྱུར་ཏེ། རྗེའི་རྩ་ཤེའི་ཊིཀྐ་ལས། བདག་ལས་མ་ཡིན་ཞེས་པའི་ཚིགས་བཅད་འདི་ཙམ་གྱི་དོན་རང་བཞིན་གྱིས་སྐྱེ་བ་མེད་པར་ངེས་ནའང་དེ་ཁོ་ན་ཉིད་ཀྱི་དོན་སྒོམ་རྒྱུས་ཕོངས་པར་མི་འགྱུར་བས། རང་སེམས་སྐྱེ་བ་མེད་པའི་དོན་ཤེས་ནས་སྒོམ་པར་འདོད་པ་དག་གིས་ཀྱང་དེ་ཙམ་རེ་ལ་སྦྱང་བར་བྱའོ། །ཞེས་གསུངས་པའི་ཕྱིར་རོ། །གསུམ་པ་རིགས་པ་གཞན་བསྟན་པ་ནི། རྒྱ་ཆེར་རོལ་བ་ལས། ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །ཞེས་གསུངས་པ་ལྟར། མྱུ་གུ་དེ་རང་གི་ས་བོན་ལས་སྐྱེ་ཡང་། དེའི་དུས་སུ་མེད་པས། སྐྱེ་བའི་ཚེ་ས་བོན་དེ་ཉིད་ངོ་བོ་མ་འགྱུར་བར་མྱུ་གུར་ཕར་འཕོས་པ་མ་ཡིན་ལ། དེ་རང་གི་ས་བོན་ལས་གཞན་ཞིག་ནས་ཀྱང་ཚུར་འོང་བ་མ་ཡིན་ཏེ། སྔ་མ་ལྟར་ན་མྱུ་གུའི་དུས་ནའང་ས་བོན་དེ་ཇི་ལྟ་བ་བཞིན་ཡོད་དགོས་པས་ས་བོན་རྟག་པར་འགྱུར་བའི་སྐྱོན་ཡོད་ལ། ཕྱི་མ་ལྟར་ན། ས་བོན་ལ་མ་ལྟོས་པར་མྱུ་གུ་འབྱུང་དགོས་པས་ས་བོན་རྒྱུན་ཆད་པར་འགྱུར་བའི་སྐྱོན་ཡོད་པའི་ཕྱིར་རོ། །དེའི་ཕྱིར་མྱུ་གུ་རང་གི་ས་བོན་ལ་བརྟེན་ནས་འབྱུང་གི །རང་བཞིན་གྱིས་སྐྱེ་བ་མེད་དོ། །གཞན་ཡང་། དེ་ཉིད་ལས། རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པའང་དམིགས་པ་ཡོད་མ་ཡིན། །དེ་ལ་དེ་མེད་གཞན་ལའང་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །ཅེས་གསུངས་པ་ལྟར། རྒྱ་ལས་འབུར་གྱི་རྣམ་པ་ཇི་འདྲ་བ་རྒྱས་བཏབ་པའི་གཞི་དེ་ལ་སྣང་བའི་ཚེ། རྒྱ་དེ་ཉིད་རྒྱས་བཏབ་པའི་གཞི་དེར་འཕོས་པ་ཡང་མ་ཡིན་ལ། རྒྱ་ལས་གཞན་ཞིག་ཀྱང་ཚུར་འོང་བ་མ་ཡིན་པ་དཔེར་བྱས་ནས། འདུས་བྱས་ཐམས་ཅད་ཀྱང་འབྲས་བུ་སྐྱེ་བའི་ཚེ། སྔར་མེད་གསར་དུ་འབྱུང་བའི་ཚུལ་གྱིས་སྐྱེ་བ་མ་གཏོགས། རང་གི་ངོ་བོས་གདོད་མ་ནས་གྲུབ་བཞིན་པར་གང་ནས་ཀྱང་མི་འོང་ལ། རྒྱུ་འགོགས་པའི་ཚེ་གང་དུའང་མི་འགྲོ་བར་བཤད་དེ། ངོ་བོ་མི་འགྱུར་བའི་འགྲོ་འོང་མེད་པས་འགྲོ་འོང་རང་བཞིན་གྱིས་མེད་དོ། །གཞན་ཡང་། ཏིང་འཛིན་རྒྱལ་བོ་ལས། སྒྱུ་མ་ལྟ་བུ་ནམ་མཁའི་ཀློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་བཞིན། །མི་འགའ་འཇིག་རྟེན་འདིར་ཡང་ཤི་ནས་ནི། །འཇིག་རྟེན་ཕ་རོལ་འཕོ་ཞིང་འགྲོ་བ་མེད། །ཅེས་གསུངས་ཏེ། འདིས་ནི། སེམས་ཅན་འཆི་འཕོ་བྱེད་པ་སྒྱུ་མ་སོགས་དང་འདྲ་བར་ཐ་སྙད་དུ་འབྱུང་བ་ཡིན་ཀྱང་། འཆི་འཕོ་བྱེད་པ་པོ་དང་། འཆི་འཕོ་བྱེད་པ་རང་བཞིན་མེད་པར་བསྟན་ཏོ། །དེ་ཡང་། འདི་ནས་ཤི་སྟེ་འཇིག་རྟེན་ཕ་རོལ་ཏུ་སྐྱེ་བའི་ཚེ། ད་ལྟའི་ལུས་སེམས་འདི་དང་བཅས་བཞིན་དུ་ཕྱི་མར་འགྲོ་བ་ནི་མིན་ལ། ལུས་སེམས་གཉིས་ལས་དོན་གཞན་པའི་བདག་ཞིག་ཀྱང་དེར་འགྲོ་བ་མེད་མོད། དེ་ལྟ་ནའང་ཐ་སྙད་དུ་འཆི་འཕོ་འཐད་པ་ཡིན་ཏེ། དེའི་ཚུལ་ཅུང་ཟད་རྒྱས་ཙམ་བདག་གིས་མདོའི་དགོངས་པ་བཞིན་གཞན་དུ་བཤད་ཟིན་ཏོ། །གཞན་ཡང་། ས་རྡོ་ཤིང་སོགས་ལས་ཁང་བ་བྱའོ་ཞེས་པ་བརྗོད་པའི་ཚེ། ཁང་བ་དེ་ཉིད་ས་རྡོ་ཤིང་སོགས་ཀྱི་ཚོགས་པ་དང་ཡ་གྱལ་གང་ཡང་མིན་ཞིང་། དེ་རྣམས་ཀྱི་ནང་ནའང་མེད་མོད། རྐྱེན་གྱིས་ལེགས་པར་བསྒྲུབས་པ་ལ་བརྟེན་ནས་ཁང་བ་གྲུབ་པའི་ཚེ། ཁང་བ་དེ་སྒྲུབ་གཞི་དེ་ཉིད་དང་དེ་དག་གི་ནང་དང་དེ་ལས་དོན་གཞན་ཞིག་ཀྱང་འོང་བ་མིན་ལ། ཞིག་པའི་ཚེ་གང་དུའང་མི་འགྲོའོ། །འོན་ཀྱང་དེའི་འབྲས་བུ་ནི་མེད་པ་མིན་ནོ། །གཞན་ཡང་། རྒྱུ་སྤུན་ལས་སྣམ་བུ་བྱའོ་སྙམ་པའི་ཚེ། བྱ་རྒྱུའི་སྣམ་བུ་དེ་ད་ལྟ་རྒྱུ་སྤུན་དེ་ལ་རི་བོང་གི་རྭ་ལྟར་མེད་ཀྱང་ཕྱིས་འབྱུང་བའི་དོན་ལ་བསམས་པ་ཡིན་ལ། དེ་ལྟར་ནའང་དེ་ལས་རི་བོང་གི་རྭ་བྱ་མི་ནུས་ཤིང་། སྣམ་བུ་ནུས་པ་ཡིན་ནོ། །གལ་ཏེ་སྣམ་བུ་རྒྱུ་སྤུན་ལ་ཡོད་ན་ནི། སྐྱེས་ཟིན་སླར་ཡང་སྐྱེ་དགོས་པར་མ་ཟད། རྒྱུ་སྤུན་རྣམས་ཕྱོགས་ཀུན་ནས་བསྡུས་པ་ན། སྣམ་བུ་དེ་ཡང་ཕྱོགས་དེ་དག་ན་ཡོད་པར་ཐལ་ཞིང་། རྒྱུ་སྤུན་རེ་རེས་ཀྱང་སྣམ་ཡུག་རེ་རེ་བསྐྱེད་པར་འགྱུར་རོ། །དེའི་ཕྱིར་སྣམ་བུ་ནི་རྒྱུ་རྐྱེན་གྱི་དབང་གིས་འགྲུབ་པས། རང་བཞིན་གྱིས་མི་སྐྱེ་སྟེ། འཕགས་པ་ལྷས། སྣམ་བུ་རྒྱུ་ལས་འགྲུབ་འགྱུར་ཞིང་། །རྒྱུ་ཡང་གཞན་ལས་གྲུབ་གྱུར་ན། །གང་ཞིག་རང་གིས་གྲུབ་མེད་པ། །དེས་གཞན་སྐྱེད་པར་ཇི་ལྟར་འགྱུར། །ཞེས་གསུངས་པའི་ཕྱིར་རོ། །དེ་བཞིན་དུ་ཞྭ་ལྷམ་གཟན་ཤམ་ལ་སོགས་པའི་གོས་གཞན་བྱའོ་སྙམ་པ་ལའང་སྔར་གྱི་རིགས་པ་དེས་རང་ངོས་ནས་སམ་རང་དབང་གིས་མི་སྐྱེད་ཀྱི། གཞན་གྱིས་དབང་གིས་གྲུབ་པའི་རྟོག་པས་བཏགས་ཙམ་དུ་གོ་བར་བྱའོ། །མདོར་ན། སངས་རྒྱས་ཐོབ་པར་བྱའོ་སྙམ་པ་སོགས་མ་འོངས་ན་ཆོས་དང་འཇིག་རྟེན་གྱི་བྱ་བ་འདི་དང་བྱའོ་སྙམ་པའི་ཚེ། ཐོབ་བྱའི་སངས་རྒྱས་དང་འབྱུང་འགྱུར་གྱི་བྱ་བ་ཐམས་ཅད་ཀྱང་། ད་ལྟ་མེད་ཅིང་ཕྱིས་འབྱུང་བ་ཐམས་ཅད་ལའང་སྔར་གྱི་རིགས་པ་དེས་རྟོག་བཏགས་ཙམ་ཡིན་གྱིས། རང་བཞིན་གྱིས་མི་སྐྱེ་བར་གཏན་ལ་དབབ་ལ་བྱའོ། །གཉིས་པ་མཐའ་གཞན་གྱི་འགོག་ཚུལ་ནི། སྐྱེ་བ་རང་བཞིན་གྱིས་གྲུབ་པ་འགོག་པའི་རིགས་པས་འགག་པ་ཡང་རང་བཞིན་གྱིས་གྲུབ་པ་ཁེགས་པ་ཡིན་ཏེ། རང་བཞིན་གྱིས་སྐྱེ་བ་མེད་ན། རང་བཞིན་གྱིས་འགག་པ་མི་འཐད་པའི་ཕྱིར་ཏེ། རྩ་ཤེ་ལས། གང་ཚེ་ཆོས་རྣམས་ཐམས་ཅད་ཀྱི། །སྐྱེ་བ་འཐད་པར་མི་འགྱུར་བ། །དེ་ཚེ་ཆོས་རྣམས་ཐམས་ཅད་ཀྱི། །འགག་པ་འཐད་པར་མི་འགྱུར་རོ། །ཞེས་གསུངས་པའི་ཕྱིར་རོ། །ལས་ཉོན་ལྟ་བུ་རྒྱུན་ཆད་པ་དེ་ཆོས་ཅན། རང་བཞིན་གྱིས་མེད་དེ། །རང་གི་རྒྱུ་ལས་ཉོན་ལྟ་བུ་གནས་པའི་མཐུ་ཟད་པ་ལས་བྱུང་བའི་ཕྱིར། རྒྱུན་རིང་དུ་གནས་པའི་རྟག་པ་ཆོས་ཅན། རང་བཞིན་གྱིས་མེད་དེ། རང་གི་ཆ་ཤས་ལ་བརྟེན་ནས་བཞག་པའི་ཕྱིར། ལྷས་བྱིན་འོང་བ་དང་འགྲོ་བ་ཡང་ཆོས་ཅན། རང་བཞིན་གྱིས་མེད་དེ། རང་རྒྱུ་ལྷས་བྱིན་འོང་བ་དང་འགྲོ་བའི་རྩོམ་པ་སྔོན་དུ་བཏང་བ་ལས་བྱུང་བའི་ཕྱིར་ཏེ། ལྷས་བྱིན་མེད་པར་དེ་འོང་བ་རང་འགྲོ་བ་མེད་པའི་ཕྱིར་རོ། །ཚུར་འོང་བ་དེ་ཆོས་ཅན། རང་བཞིན་གྱིས་མེད་དེ། རྟོག་པས་བཏགས་ཙམ་ཡིན་པའི་ཕྱིར་ཏེ། ཁྱོད་རང་ཕྱོགས་ལ་ལྟོས་ནས་འོང་བ་ཡིན་ཀྱང་། གཞན་ལ་ལྟོས་ནས་འགྲོ་བ་ཡིན་པའི་ཕྱིར། དཔེར་ན། ཕར་རི་དང་ཚུར་རི་བཞིན། གཞན་ཡང་། ལྷས་བྱིན་བསྡད་པའི་ཚེ་འགྲོ་ཞིང་འོང་བ་ཡིན་ནམ་མིན། ཡིན་ན་ལྷས་བྱིན་དུས་རྟག་ཏུ་འགྲོ་འོང་བྱེད་པར་འགྱུར་ལ། མིན་ན་ལྷས་བྱིན་ལས་ངོ་བོ་ཐ་དད་པའི་དེའི་བསྡད་པ་དང་འགྲོ་ཞིང་འོང་བ་དེ་གང་ཡིན། དེ་ལྟ་ནའང་ལྷས་བྱིན་བསྡད་པ་བཏང་ནས་འགྲོ་འོང་བྱེད་པར་ཁས་ལེན་དགོས་པས་དེའི་འགྲོ་འོང་གནས་གསུམ་གློ་བུར་བ་ཡིན་པའི་ཕྱིར་རང་ངོས་ནས་མ་གྲུབ་བོ། །ལྷས་བྱིན་གྱིས་འགྲོ་འོང་གནས་གསུམ་བྱེད་ཀྱང་དེའི་འགྲོ་འོང་གནས་པ་ནི་དེ་མིན་ལ། ལྷས་བྱིན་ལས་དོན་གཞན་པའི་དེའི་འགྲོ་འོང་གནས་གསུམ་ཡང་མེད་དོ། །དེར་མ་ཟད། ལྷས་བྱིན་དེ་ལམ་དུ་རང་གི་རྐང་བས་འགྲོ་ཡང་། འགྲོ་ཞེས་པའི་བྱ་བ་དེ་ལྷས་བྱིན་དང་དེའི་རྐང་བ་དང་ལམ་གསུམ་པོ་གང་ཡང་མིན་ལ། དེ་དག་ལས་དོན་གཞན་པའི་དེའི་འགྲོ་བ་ཞིག་ཀྱང་མེད་དེ། དེ་བཞིན་དུ་འོང་བ་སོགས་ལའང་སྦྱར་བར་བྱའོ། །གཞན་ཡང་། ལྟ་བ་པོ་དང་ལྟ་བ་དང་སྨྲ་བ་པོ་དང་སྨྲ་བ་དང་ཉན་པ་པོ་དང་ཉན་པ་སོགས་ལའང་སྔར་གྱིས་རིགས་འགྲོས་སྦྱར་ནས་རང་བཞིན་མེད་པར་གཏན་ལ་དབབ་པར་བྱའོ། །བུམ་པ་ཆོས་ཅན། ཁྱོད་གཅིག་ཏུ་རང་བཞིན་གྱིས་མེད་དེ། ཁྱོད་རང་གིས་མཆུ་ཞབས་སོགས་ཆ་དུ་མ་ཚོགས་པ་ལ་བརྟེན་ནས་བྱུང་བའི་ཕྱིར། ཀ་བུམ་གཉིས་ཆོས་ཅན། ཐ་དད་དུ་རང་བཞིན་གྱིས་མེད་དེ། ཐ་དད་དུ་བཞག་པ་དེ་རྟོག་པས་བཏགས་ཙམ་ཡིན་པའི་ཕྱིར་ཏེ། ཁྱོད་གཅིག་ཅིག་ཤོས་ལ་བརྟེན་ནས་ཐ་དད་དུ་བཞག་གི །རང་གི་ངོས་ནས་ཐ་དད་མིན་པའི་ཕྱིར། གལ་ཏེ། རང་ངོས་ནས་ཐ་དད་ཡིན་ན། ཀ་བུམ་གཉིས་སོ་སོ་རེ་རེ་ནས་ཀྱང་ཐ་དད་ཡིན་པར་ཐལ་ཞིང་། དེ་གཉིས་ཀྱི་སྟེང་ན་གཅིག་ཡིན་པའང་མེད་པར་འགྱུར་རོ། །དེས་ན། ཀ་བ་དེ་བུམ་པ་དང་ཐ་དད་ཡིན་ཀྱང་། སྤྱིར་ཀ་བ་དེ་གཅིག་ཏུ་ཁས་ལེན་དགོས་པས། གཅིག་དང་ཐ་དད་གཉིས་ཀའང་རྟོག་པས་བཏགས་པ་ཙམ་ཡིན་གྱི། རང་བཞིན་གྱིས་མེད་པར་ངེས་སོ། །གཞན་ཡང་། རང་ཉིད་མི་གཞན་དང་ཐ་དད་ཀྱི་གཞན་ཡིན་པ་དེ་ཆོས་ཅན། རང་བཞིན་གྱིས་མེད་དེ། རྟོག་པས་བཏགས་ཙམ་ཡིན་པའི་ཕྱིར་ཏེ། རང་ཉིད་ཆོས་ཅན། ཁྱོད་མི་གཞན་དང་ཐ་དད་ཀྱི་གཞན་ཞེས་པ་དེ་རྟོག་པས་བཏགས་ཙམ་ཡིན་ཏེ། ཁྱོད་གཞན་དུ་འཇོག་པ་དེ་ཟླ་བོ་ལ་ལྟོས་ནས་བཞག་གི །ཟླ་བོ་མེད་པའི་རང་གཅིག་པུ་ལ་གཞན་ཞེས་མི་བྱ་བར་བདག་ཉིད་ཅེས་བརྗོད་རིགས་པའི་ཕྱིར་ཏེ། རྩ་ཤེ་ལས། གཞན་ནི་གཞན་ལ་བརྟེན་ཏེ་གཞན། གཞན་མེད་པར་ནི་གཞན་མི་འགྱུར། །གལ་ཏེ་གཞན་ནི་གཞན་ལས་གཞན། །དེ་ཚེ་གཞན་མེད་པར་གཞན་འགྱུར། །ཞེས་གསུངས་པའི་ཕྱིར་རོ། །གཞན་ཡང་། ཤེས་བྱ་དང་ཡོད་པ་ལྟ་བུ་དང་། བྱས་པ་དང་མི་རྟག་པ་ལྟ་བུ་དོན་གཅིག་མིང་གི་རྣམ་གྲངས་སུ་གསུངས་པ་རྣམས་དང་། རྟག་མི་རྟག་དང་། ས་མྱུག་གཉིས་ལྟ་བུ་དོན་ཐ་དད་པ་རྣམས་ཀྱང་རང་བཞིན་གྱིས་མེད་པའི་ཚུལ་ཡང་སྔར་བཞིན་ཤེས་པར་བྱའོ། །འདིར་སྐྱེ་འགག་སོགས་བརྒྱད་ལ་རང་བཞིན་འགོག་པའི་རིགས་པ་གཙོ་བོར་བསྟན་གྱི། རིགས་པ་གཞན་གཙོ་བོར་བཤད་པ་མིན་པས། དེ་དག་ཀྱང་གཞན་ནས་ཤེས་དགོས་སོ། །གཉིས་པ་ལས་ལ་རྟག་ཆད་སྤོང་ཚུལ་འཆད་པ་ལ་གསུམ། ལས་ངོས་བཟུང་བ་དང་། གསོག་ཚུལ། དེའི་འབྲས་བུ་ཇི་ལྟར་འབྱིན་པའི་འཐད་ཚུལ་ལོ། །དང་པོ་ནི། འཕགས་པ་ཀླུ་སྒྲུབ་ཀྱིས་རྩ་བ་ཤེས་རབ་ལས། དྲང་སྲོང་མཆོག་གིས་ལས་རྣམས་ནི། །སེམས་པ་དང་ནི་བསམས་པར་གསུངས། །ལས་དེ་དག་གི་བྱེ་བྲག་ནི། །རྣམ་པ་དུ་མར་ཡོངས་སུ་བསྒྲགས། །དེ་ལ་ལས་གང་སེམས་པ་ཞེས། །གསུངས་པ་དེ་ནི་ཡིད་ཀྱིར་འདོད། །བསམ་པའི་ལས་ནི་གང་གསུངས་པ། །དེ་ནི་ལུས་དང་ངག་གིར་འདོད། །ཅེས་གསུངས་པ་ལྟར། སེམས་པ་དང་བསམ་པའི་ལས་གཉིས་ཡོད་ཅིང་། དེ་ལས་སེམས་པའི་ལས་ནི། ཡིད་ཀྱི་རྣམ་ཤེས་དང་མཚུངས་པར་ལྡན་པའི་སེམས་བྱུང་ཞིག་སྟེ། དེ་ནི་ཡིད་ཀྱི་ལས་ཡིན་ལ། བསམ་པའི་ལས་ནི། སེམས་པའི་ལས་དེས་ཀུན་ནས་བསླངས་ཏེ་བྱ་བ་ལ་འཇུག་པའི་སྐབས་ཀྱི་ལུས་ངག་གི་ལས་སོ། །གཞན་ཡང་། ལས་ལ་དགེ་མི་དགེ་ལུང་མ་བསྟན་གྱི་ལས་གསུམ་ཡོད་ཅིང་། དགེ་མི་དགེ་གཉིས་ཀྱིས་ནི་རྣམ་སྨིན་ཡིད་དུ་འོང་མི་འོང་གཉིས་སོ་སོར་འབྱིན་ལ། ལུང་མ་བསྟན་གྱི་ལས་ཀྱིས་ནི་རྣམ་སྨིན་འབྱིན་པར་མི་ནུས་སོ། །གཉིས་པ་ལས་གསོག་ཚུལ་ནི་བསྡུ་ན་གསུམ་སྟེ། གཙོ་བོར་ཚེ་འདིར་ཚོར་བ་བདེ་བ་ཙམ་གྱིས་ཆེད་དུ་དམིགས་ན་ནི་མི་དགེ་བའི་ལས་གསོག་པ་ཤུགས་ཆེ་ལ། ཕྱི་མའི་བདེ་བ་ལ་གཙོ་བོར་དམིགས་ན་ནི་དགེ་བའི་ལས་གསོག་ཅིང་། ཏིང་ངེ་འཛིན་གྱི་བདེ་བ་དང་བཏང་སྙོམས་གང་རུང་ལ་གཙོ་བོར་དམིགས་ན་ནི་མི་གཡོ་བའི་ལས་གསོག་གོ །དེའི་རིགས་པས་སྲིད་པ་མཐའ་དག་ལ་ཡིད་འབྱུང་བའི་སྒོ་ནས་ལས་མངོན་པར་འདུ་བྱེད་ན་ནི་ཐར་བ་འགྲུབ་བྱེད་ཀྱི་ལས་གསོག་པར་འགྱུར་རོ། །གསུམ་པ་ལ་གཉིས། ལས་ཀྱིས་འབྲས་བུ་ཇི་ལྟར་འབྱིན་པ་དང་། དེའི་འཐད་ཚུལ་ལོ། །དང་པོ་ལ། སྤྱིར་ལས་ཀྱིས་རྣམ་སྨིན་ཇི་ལྟར་འབྱིན་པ་ནི། མདོ་ལས། ལས་ཀྱིས་འཁོར་བར་ལྕི་གང་དང་། །ཉེ་བ་གང་དང་གོམས་པ་དང་། །སྔོན་བྱས་གང་ཡིན་དེ་དག་ལས། །སྔ་མ་སྔ་མ་རྣམ་སྨིན་འགྱུར། །ཞེས་གསུངས་པ་ལྟར་ཡིན་ལ། ལས་འགའ་ཞིག་བསགས་ནས་ཡུན་རིང་དུ་ལོན་ཡང་འབྲས་བུ་འབྱིན་པ་ནི། མདོ་ལས། ལུས་ཅན་རྣམས་ཀྱི་ལས་རྣམས་ནི། །བསྐལ་བ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་ལྟར་རོ། །ལས་དེ་དག་ཀྱང་སེམས་ཀྱིས་བྱས་ཤིང་། སེམས་དང་ལས་འབྲེལ་བའི་རྟེན་ཅིང་འབྲེལ་བར་འབྱུང་བའི་ཆོས་ཉིད་ཀྱིས་འབྲས་བུ་སྣ་ཚོགས་ཞིག་སྐྱེད་པར་བྱེད་དེ། དཔལ་ལྡན་ཟླ་བས་དབུ་མ་འཇུག་པ་ལས། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། །འགྲོ་བ་མ་ལུས་ལས་ལས་སྐྱེས་པར་གསུངས། །སེམས་སྤངས་ནས་ནི་ལས་ཀྱང་ཡོད་མ་ཡིན། །ཞེས་གསུངས་པའི་ཕྱིར་རོ། །གཉིས་པ་ལ་གཉིས། རྩོད་པ་འགོད་པ་དང་། དེ་སྤོང་ཚུལ་ལོ། །དང་པོ་ནི། མགོན་པོས་རྩ་ཤེ་ལས། གལ་ཏེ་སྨིན་པའི་དུས་བར་དུ། །གནས་ན་ལས་དེ་རྟག་པར་འགྱུར། །གལ་ཏེ་འགགས་ན་འགགས་གྱུར་བས། །འབྲས་བུ་ཇི་ལྟར་བསྐྱེད་པར་འགྱུར། །ཞེས་གསུངས་ཏེ། སྔར་བཤད་པ་ལྟར་ལས་དང་འབྲས་བུའི་བར་དུ་བསྐལ་བ་ལ་སོགས་པས་ཆོད་པ་ཡོད་ཅིང་། དེ་ལས་འབྲས་བུ་འབྱུང་བ་ནི་རང་སྡེ་ཐམས་ཅད་ཀྱིས་འདོད་མོད། དེ་ལྟ་ནའང་ལས་དེ་རང་གི་རྣམ་སྨིན་གྱི་འབྲས་བུ་དངོས་སུ་འབྱིན་པའི་བར་དུ་མི་འཇིག་པར་གནས་ན་ནི་རྟག་པར་འགྱུར་བས་མི་འཐད་ལ། ལས་དེ་རང་བྱས་པའི་སྐད་ཅིག་གཉིས་པར་ཞིག་ནས་མེད་པར་འགྲོ་ན་ནི། ཕྱིས་མེད་བཞིན་དུ་ལས་དེ་ལས་བསྐལ་བ་ལ་སོགས་པས་བར་དུ་ཆོད་པའི་རྣམ་སྨིན་གྱི་འབྲས་བུ་དེ་ཇི་ལྟར་འབྱུང་བར་འགྱུར་ཞེས་དོགས་པའོ། །གཉིས་པ་དེ་སྤོང་བ་ལ་གཉིས། ལས་ལ་རྟག་ཆད་སྤོང་ཚུལ་དང་། དེ་ལས་གཞན་པའི་རྟག་ཆད་སྤོང་ཚུལ་ལོ། །དང་པོ་ལ་གཉིས། སྤྱིར་བསྟན་པ་དང་། བྱེ་བྲག་ཏུ་བཤད་པའོ། །དང་པོ་ལ་དཔེ་དོན་གཉིས་ལས་དཔེ་ནི། རྩ་ཤེ་ལས། མྱུ་གུ་ལ་སོགས་རྒྱུན་གང་ཡིན། །ས་བོན་ལས་ནི་མངོན་པར་འབྱུང་། །དེ་ལས་འབྲས་བུ་ས་བོན་ནི། །མེད་ན་དེ་ཡང་འབྱུང་མི་འགྱུར། །གང་ཕྱིར་ས་བོན་ལས་རྒྱུན་དང་། །རྒྱུན་ལས་འབྲས་བུ་འབྱུང་འགྱུར་ཞིང་། །ས་བོན་འབྲས་བུའི་སྔོན་འགྲོ་བ། །དེ་ཕྱིར་རྟག་མིན་ཆད་པ་མིན། །ཞེས་གསུངས་ནས། དེ་དོན་ལ་སྦྱོར་བ་ཡང་། དེ་ཉིད་ལས། སེམས་ཀྱི་རྒྱུན་ནི་གང་ཡིན་པ། །སེམས་ལས་མངོན་པར་འབྱུང་བར་འགྱུར། །དེ་ལས་འབྲས་བུ་སེམས་ལྟ་ཞིག །མེད་ན་དེ་ཡང་འབྱུང་མི་འགྱུར། །གང་ཕྱིར་སེམས་ལས་རྒྱུན་དང་ནི། །རྒྱུན་ལས་འབྲས་བུ་འབྱུང་འགྱུར་ཞིང་། །ལས་ནི་འབྲས་བུའི་སྔོན་འགྲོ་བ། །དེ་ཕྱིར་རྟག་མིན་ཆད་པ་མིན། །ཞེས་གསུངས་ཏེ། ཆུ་ལུད་དྲོད་གཤེར་སོགས་ཀྱིས་བསྒོས་པའི་ས་བོན་གྱི་རྒྱུན་ལས་འབྲས་བུ་མྱུ་གུ་མེ་ཏོག་སོགས་འབྱུང་བ་ལྟར། ལས་ཀྱིས་བསྒོས་པའི་སེམས་དང་དེའི་རྒྱུན་སྔ་མ་ལས་ཕྱི་མ་འབྱུང་ཞིང་། དེ་ལས་ལས་ཀྱི་འབྲས་བུ་རིམ་གྱིས་འབྱུང་ཡང་། དེའི་ཚེ་དཔེ་དོན་གཉིས་ཀའང་སྔ་མ་མི་འཇིག་པར་མི་གནས་པས་རྟག་པ་མིན་ལ། སྔ་མ་རྒྱུན་ཆད་ནས་ཕྱི་མ་འབྱུང་བ་ནི་མིན་པས་ཆད་པར་ཐལ་བའི་སྐྱོན་ཡང་མེད་དོ། །གཉིས་པ་ལ་གཉིས། རང་སྡེ་གཞན་གྱི་ལན། ཐལ་འགྱུར་བ་རང་ལན་ནོ། །དང་པོ་ནི། ལས་བྱས་པའི་སྐད་ཅིག་གཉིས་པར་དེ་འགགས་ནས་འགྲོ་བ་ཡིན་ཡང་། ལས་འགག་ཁ་མའི་དུས་སུ་ལས་དེས་མ་འོངས་པ་ནས་འབྲས་བུ་འབྱིན་པའི་ནུས་པ་འཇོག་པ་ཡིན་ལ། ནུས་པ་དེ་གང་ལ་འཇོག་པའི་གཞི་ལ་ནི། འདོད་ཚུལ་མི་འདྲ་སྟེ། བྱེ་བྲག་སྨྲ་བ་འགའ་ཞིག་བུ་ལོན་གྱི་དཔང་རྒྱ་དང་འདྲ་བ་ལས་ཀྱི་ཆུད་མི་ཟ་བ་ཞེས་པ་ཞིག་ལ་འདོད་ཅིང་། ཁ་ཅིག་ལས་ཀྱི་ཐོབ་པ་ཞེས་བྱ་བ་ཞིག་ལ་འདོད་དེ། ཆུད་མི་ཟ་བ་དང་ཐོབ་པ་དེ་ནི་ལས་གཉིས་ལས་དོན་གཞན་པའི་ལྡན་མིན་འདུ་བྱེད་རྫས་སུ་གྲུབ་པར་ཁས་ལེན་ནོ། ཁ་ཆེ་བ་དང་མདོ་སྡེ་བ་རང་རྒྱུད་པ་རྣམས་ཀྱིས་ནི་ཡིད་ཀྱི་རྣམ་ཤེས་ཀྱི་རྒྱུན་ལ་འདོད་ཅིང་། སེམས་ཙམ་པས་ནི་ཀུན་གཞིའི་རྣམ་ཤེས་ཉིད་ལས་ཀྱི་བག་ཆགས་བསྒོ་གཞིར་འདོད་དོ། །དེ་དག་གི་ལྟར་ན་སྔར་བྱས་པའི་ལས་ཕྱིས་ཞིག་ནས་མེད་ཀྱང་། ཆུད་མི་ཟ་བ་དང་ཐོབ་པ་དང་རྣམ་ཤེས་ཀྱི་རྒྱུན་དང་ཀུན་གཞི་ཅི་རིགས་ཀྱི་སྟེང་དུ་སྔར་གྱི་ལས་དེའི་བག་ཆགས་བཞག་པའི་རྐྱེན་གྱིས་ཕྱིས་དུས་ལ་བབ་པ་ན། སྔོན་གྱི་ལས་དེའི་འབྲས་བུ་འབྱིན་པ་ནི་མི་འགལ་བར་འདོད་དེ། དེ་ཐམས་ཅད་ཀྱིས་ཀྱང་ལས་དང་དེའི་སྐྱེ་འགག་རང་བཞིན་གྱིས་གྲུབ་པར་འདོད་དོ། །གཉིས་པ་ཐལ་འགྱུར་བ་རང་ལན་ནི། ཟླ་བས་དབུ་མ་འཇུག་པ་ལས། གང་ཕྱིར་རང་བཞིན་གྱིས་དེ་མི་འགག་པ། །དེ་ཕྱིར་ཀུན་གཞི་མེད་ཀྱང་འདི་ནུས་ཕྱིར། །ལ་ལར་ལས་འགགས་ཡུན་རིང་ལོན་ལས་ཀྱང་། །འབྲས་བུ་ཡང་དག་འབྱུང་བར་རིག་པར་གྱིས། །ཞེས་གསུངས་པ་ལྟར། སྔར་བྱས་པའི་ལས་འགགས་ནས་རིང་དུ་སོང་ཡང་འབྲས་བུ་སྐྱེད་པར་ནི་འདོད་ལ། དེ་ཡང་ལས་རང་བཞིན་གྱིས་གྲུབ་པར་ཁས་ལེན་ན་ནི་དེ་འགགས་པ་དངོས་པོར་མི་འཐད་ཀྱང་། ལས་རང་བཞིན་གྱིས་མ་སྐྱེས་པས་རང་བཞིན་གྱིས་མི་འགགས་ལ། དེ་ལྟ་ནའང་ལས་འགགས་པ་ནི་ཐ་སྙད་དུ་ཡོད་པར་འདོད་ཅིང་། ལས་འགགས་པ་དང་དེ་འགགས་པའི་འགགས་པ་སོགས་ཀྱང་དངོས་པོ་ཡིན་པའི་ཕྱིར་དེ་དག་ལས་ལས་ཀྱི་འབྲས་བུ་འབྱུང་བར་མ་ཟད། ཕུང་བོ་ལ་བརྟེན་ནས་བཏགས་པའི་ང་སྤྱི་ཙམ་ཞིག་ནི་སྐྱེ་བ་ཐམས་ཅད་དུ་འཇུག་ལ། དེ་ཉིད་ལས་ཀྱི་བག་ཆགས་བསྒོ་གཞིར་འདོད་པས་ཀྱང་། ལས་དང་དེའི་འབྲས་བུ་ཡང་ཆེས་འཐད་པའི་ཕྱིར་རྟག་ཆད་དུ་འགྱུར་བའི་སྐྱོན་མེད་དོ། །ལས་སོགས་རང་བཞིན་གྱིས་སྟོང་བའི་རྒྱུ་ལས་རང་བཞིན་གྱིས་སྟོང་བའི་འབྲས་བུ་སྐྱེ་བའི་དཔེ་ཡང་ཡོད་དེ། བྱད་བཞིན་དང་མེ་ལོང་དང་སྣང་བ་ཚོགས་པའི་རྟེན་འབྲེལ་ལས་གཟུགས་བརྙན་འབྱུང་བ་བཞིན་ཡིན་པའི་ཕྱིར་ཏེ། འཇུག་པ་ལས། དངོས་པོ་སྟོང་བ་གཟུགས་བརྙན་ལ་སོགས་པ། །ཚོགས་ལ་ལྟོས་རྣམས་མ་གྲགས་པ་ཡང་མིན། །ཇི་ལྟར་དེར་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པ་སྐྱེ་འགྱུར་ལྟར། །དེ་བཞིན་དངོས་པོ་ཐམས་ཅད་སྟོང་ན་ཡང་། །སྟོང་ཉིད་དག་ལས་རབ་ཏུ་སྐྱེ་བར་འགྱུར། །ཞེས་གསུངས་པའི་ཕྱིར། དེ་བཞིན་དུ་སྒྲ་བརྙན་སོགས་ལའང་སྦྱར་བར་བྱའོ། །སྔར་གྱི་ལས་འགགས་ཀྱང་དེ་ལས་འབྲས་བུ་འབྱུང་བའི་དཔེ་ཡང་ཡོད་དེ། དཔེར་ན་རྨི་ལམ་དུ་བུད་མེད་མཛེས་མ་ཞིག་དང་རྩེ་བར་རྨིས་ནས་གཉིད་སད་པའི་ཚེ་རྨི་ལམ་གྱི་བུད་མེད་འགགས་ཀྱང་དེ་ལ་དམིགས་པའི་ཆགས་པ་སྐྱེ་བ་བཞིན་ཡིན་པའི་ཕྱིར་ཏེ། འཇུག་པ་ལས། རྨི་ལམ་དམིགས་པའི་ཡུལ་དག་མཐོང་ནས་ནི། །སད་ཀྱང་བླུན་ལ་ཆགས་པ་སྐྱེ་འགྱུར་བ། །དེ་བཞིན་འགགས་ཤིང་རང་བཞིན་ཡོད་མིན་པའི། །ལས་ལས་ཀྱང་ནི་འབྲས་བུ་ཡོད་པ་ཡིན། །ཞེས་གསུངས་པའི་ཕྱིར་རོ། །ལས་འགགས་པ་ལས་འབྲས་བུ་འབྱུང་ཡང་རྣམ་སྨིན་བྱུང་ཟིན་ཐུག་མེད་དུ་ཡང་ཡང་འབྱིན་པ་ཡང་མིན་ལ། ལས་གཉིས་ཀྱི་འབྲས་བུ་འཆོལ་བར་དག་ཏུ་འབྱིན་པའང་མིན་ཏེ། དཔེར་ན་གཞི་གང་དུ་ཡོད་པ་མ་ཡིན་པར་མཚུངས་ཀྱང་རབ་རིབ་ཅན་གྱི་མིག་ཤེས་ལ་སྐྲ་ཤད་འཛག་པ་ལྟར་སྣང་གི །རི་བོང་རྭ་སོགས་མི་སྣང་བ་བཞིན་ནོ། །དེ་ལྟར་ཡང་འཇུག་པ་ལས། ཇི་ལྟར་ཡུལ་ནི་ཡོད་ཉིད་མིན་མཚུངས་ཀྱང་། །རབ་རིབ་ཅན་གྱིས་སྐྲ་ཤད་རྣམ་པར་ནི། །མཐོང་གི་དངོས་གཞན་རྣམ་པར་མ་ཡིན་ལྟར། །དེ་བཞིན་སྨིན་ལས་སླར་སྨིན་མིན་ཤེས་ཀྱིས། །དེ་ཕྱིར་རྣམ་སྨིན་མི་དགེ་ནག་པོའི་ལས། །རྣམ་སྨིན་དགེ་ཉིད་དགེ་ལས་ཡིན་མཐོང་ཞིང་། །ཞེས་གསུངས་པའི་ཕྱིར་རོ། །གཞན་ཡང་། དགེ་མི་དགེའི་ལས་ཀྱི་རྣམ་སྨིན་མི་འཚོལ་བ་ནི་གྲོ་ནས་སོགས་ཀྱི་ས་བོན་ལས་རང་རང་གི་འབྲས་བུ་མ་ནོར་བར་འབྱུང་བས་ཀྱང་འགྲུབ་པོ། །ལས་འགགས་པའམ་ཞིག་པ་ལས་གནས་སྐབས་ཀྱི་འབྲས་བུ་འབྱུང་བར་མ་ཟད། ས་བོན་འགགས་ནས་མྱུ་གུ་འབྱུང་བ་ལྟར་བྱང་ཆུབ་ཀྱི་སེམས་སྔ་མ་སྔ་མ་འགགས་ཀྱང་། དེ་ལས་འབྲས་བུ་མཐའི་བྱང་ཆུབ་འབྱུང་བའང་ཡིན་ཏེ། སྡུད་པ་ལས། ས་བོན་ལས་ནི་མྱུ་གུ་མེ་ཏོག་འབྲས་བུ་འབྱུང་། །དེ་ཡང་འགགས་ལ་ཤིང་ཡང་མེད་པ་དེ་མིན་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་རྒྱུ་ཡིན་ཏེ། །དེ་ཡང་འགགས་ལ་བྱང་ཆུབ་མེད་པ་དེ་མ་ཡིན། །ཞེས་གསུངས་པའི་ཕྱིར་རོ། །གཉིས་པ་ནི། འདུས་བྱས་ཐམས་ཅད་ལ་རྟག་ཆད་སྤོང་ཚུལ་སྔར་རྒྱ་ཆེར་རོལ་པའི་ལུང་གི་དོན་བཤད་པ་ལྟར་ཡིན་ལ། ལུང་དེའི་དོན་རྩ་ཤེ་ལས་ཀྱང་། གང་ལ་བརྟེན་ཏེ་གང་འབྱུང་བ། །དེ་ནི་རེ་ཞིག་དེ་ཉིད་མིན། །དེ་ལས་གཞན་པའང་མ་ཡིན་པ། །དེ་ཕྱིར་རྟག་མིན་ཆད་པ་མིན། །ཞེས་གསུངས་པ་ལྟར་རོ། །གཞན་ཡང་། སྤྱིར་འབྲས་བུ་གང་ཡིན་པ་དེ་རྫོགས་པར་སྐྱེས་པའི་ཚེ་དེའི་རྒྱུ་གང་ཡིན་པ་དེ་རྫོགས་པར་འགགས་དགོས་པས་རྒྱུ་རྟག་པར་གནས་པའི་སྐྱོན་མེད་ལ། འབྲས་བུ་དེ་རང་གི་རྒྱུའི་རྒྱུན་ཡིན་པས་རྒྱུ་དེ་རྒྱུན་ཆད་པ་ཡང་མིན་པའི་ཕྱིར་རྟག་ཆད་དུ་མི་འགྱུར་རོ། །དེས་ན་འབྲས་བུ་དེ་སྐྱེ་བ་ལ་མངོན་དུ་ཕྱོགས་པ་དང་དེའི་རྒྱུ་འགགས་པ་ལ་མངོན་དུ་ཕྱོགས་པ་དུས་མཉམ་ཞིང་། འབྲས་བུ་དེ་རྫོགས་པར་སྐྱེས་ཟིན་པ་དང་དེའི་རྒྱུ་རྫོགས་པར་འགགས་ཟིན་པ་གཉིས་ཀྱང་དུས་མཉམ་མོ། །འབྲས་བུ་རྣམས་རང་གི་རྒྱུའི་དུས་སུ་སྐྱེ་བཞིན་པ་ཡིན་པ་ལས་དེའི་དུས་སུ་མེད་ཀྱང་སྐྱེ་བ་མི་འགལ་ཏེ། དཔེར་ན་འོ་མ་ལ་དང་ཐོག་མར་དངོས་སུ་མེད་ཀྱང་ཕྱིས་རྐྱེན་དང་འཕྲད་ན་གསར་དུ་འབྱུང་བ་བཞིན་ནོ། །གལ་ཏེ་ལས་ལ་རྟག་ཆད་སྤོང་ཚུལ་གོང་དུ་བརྗོད་པ་ལྟར་ཡིན་ན། འོ་ན། ལས་གསོག་པའི་དུས་ཀྱི་ང་དེ་རྣམ་སྨིན་མྱོང་བ་པོའི་དུས་ཀྱི་ང་དེ་ཡིན་ནམ། མིན། ཡིན་ན་ནི་སྔར་གྱི་ལས་གསོག་པ་པོའི་ང་དེ་རྟག་པར་འགྱུར་ལ། མིན་ན། ལས་བྱེད་པ་པོས་རྣམ་སྨིན་མ་མྱོང་ཞིང་། རྣམ་སྨིན་མྱོང་བ་པོས་ལས་མ་བྱས་པར་འགྱུར་བས། ལས་མ་བྱས་པ་དང་འཕྲད་པ་དང་བྱས་པ་ཆུད་ཟ་བར་ཐལ་ལོ་ཞེ་ན། སྐྱོན་མེད་དེ། ལས་གསོག་པའི་དུས་ཀྱི་ང་དེས་རྣམ་སྨིན་མྱོང་བ་མ་ཡིན་ཀྱང་། ལས་གསོག་དུས་ཀྱི་ང་དང་རྣམ་སྨིན་མྱོང་དུས་ཀྱི་ང་གཉིས་ཀ་ནི་སྤྱིར་རང་གི་ང་དེའི་ཆ་ཤས་ཡིན་པས། རང་གི་ང་སྔ་ཕྱི་ཐམས་ཅད་ཀྱིས་བྱས་པ་དེ། རང་གི་ངས་བྱས་པར་འཇོག་ནུས་པ་ཡིན་ནོ། །དེ་ཡང་རང་གི་ང་ལ་སྤྱི་དང་བྱེ་བྲག་གཉིས་ཡོད་པའི་ང་སྤྱི་ཙམ་ནི་རང་གི་ཚེ་སྔ་ཕྱི་ཐམས་ཅད་དུ་ཡོད་ལ། བྱེ་བྲག་པ་ནི་ཚེ་རེ་རེའི་ང་དང་། ཚེ་སྟོད་སྨད་བར་གསུམ་གྱི་ང་རྣམས་དང་། ལོ་དང་ཟླ་བ་ཞག་སྔ་དྲོ་ཕྱི་དྲོའི་ང་རྣམས་ལ་བྱེད་ཅིང་། དེ་དག་ནི་ཚེ་སྔ་ཕྱི་ཀུན་ལ་མ་ཁྱབ་བོ། །དེས་ན་རང་གི་ང་སྔ་མས་ལས་བསགས་ནས་ང་ཕྱི་མས་མྱོང་ཡང་། རང་གིས་ངས་མྱོང་བར་བཞག་ཆོག་པའི་ཕྱིར་ལས་མ་བྱས་པ་དང་འཕྲད་པ་དང་བྱས་པ་ཆུད་ཟ་བའི་སྐྱོན་ག་ལ་ཡོད། དེའི་ཕྱིར་ང་སྔོན་གྱི་ཚེ་འདི་དང་འདིར་གྱུར་ཏོ་ཞེས་དྲན་པའང་འཐད་པ་ཡིན་ནོ། །འོ་ན། སྟོན་པས་ང་སྔོན་བཟོད་པ་སྨྲ་བ་ཞེས་བྱ་བའི་དྲང་སྲོང་དུ་གྱུར་ཞེས་གསུངས་པའི་དོན་ཇི་ལྟར་ཞེ་ན། སྐྱོན་མེད་དེ། དེས་ནི་གཉིས་ཀ་ཐུགས་རྒྱུད་གཅིག་ཏུ་བསྟན་པ་ཡིན་གྱི། སྟོན་པ་རང་ཉིད་དེ་དང་གཅིག་ཏུ་གྱུར་པར་མ་བསྟན་པའི་ཕྱིར་ཏེ། དེ་གཉིས་གཅིག་ཡིན་པ་ལ་རིགས་པ་ཡང་དག་གིས་གནོད་པའི་ཕྱིར་ཏེ། དེ་གཉིས་གཅིག་ཡིན་ན། སངས་རྒྱས་དང་སེམས་ཅན་ཡང་གཅིག་ཏུ་ཐལ་བ་དང་། དེ་བཞིན་དུ་རབ་ཏུ་བྱུང་མ་བྱུང་དང་། རྒན་གཞོན་དང་། སྐྱེ་བ་སྔ་ཕྱི་རྣམས་དང་། འགྲོ་བ་རིགས་དྲུག་གི་གཞི་མཐུན་ཡང་ཡོད་པར་ཐལ་བ་སོགས་སུ་འགྱུར་རོ། །གཞན་ཡང་དེ་གཉིས་གཅིག་ཏུ་མི་རུང་སྟེ། རྩ་ཤེ་ལས། སྔོན་ཚེ་རྣམས་སུ་གང་བྱུང་བ། །དེ་ཉིད་འདི་ནི་མ་ཡིན་ནོ། །ཞེས་གསུངས་པའི་ཕྱིར། གལ་ཏེ་སྔ་དྲོའི་ང་དེ་ཕྱི་དྲོའི་ང་ཡིན་པ་ལ་སྐྱོན་མེད་སྙམ་ན། ཡོད་དེ། དེ་ལྟ་ན། རྒན་གཞོན་གྱི་གཞི་མཐུན་ཡོད་པར་ཐལ་བར་མ་ཟད་སྔ་དྲོ་ཕྱི་དྲོའི་གཞི་འཐུན་དང་། དེ་བཞིན་དུ་ཉིན་ཞག་སྔ་ཕྱི། ཟླ་བ་སྔ་ཕྱི། ལོ་སྔ་ཕྱིའི་གཞི་འཐུན་ཡོད་པ་སོགས་སུ་ཐལ་བར་འགྱུར་བའི་ཕྱིར་རོ། །ལོ་སྔ་ཕྱི་གཉིས་ཀྱི་གཞི་འཐུན་ནི་མེད་དེ། ལོ་ཕྱི་མ་སྐྱེས་པའི་ཚེ་ལོ་སྔ་མ་མེད་པའི་ཕྱིར་ཏེ། ལོ་ཕྱི་མའི་འགོ་བཙུགས་པའི་ཚེ་ལོ་སྔ་མ་རྫོགས་ནས་ཞིག་པའི་ཕྱིར་ཏེ། ལོ་སྔོན་མའི་གདགས་གཞི་ཟླ་བ་བཅུ་གཉིས་པོ་རྫོགས་པས་ལོ་དེ་རྫོགས་པའི་ཕྱིར་ཏེ། རྗེའི་རྩ་ཤིའི་རྣམ་བཤད་ལས། དེའི་ཕྱིར་ལོ་རྫོགས་པ་ལ་ཟླ་བ་བཅུ་གཉིས་རྫོགས་དགོས་ཤིང་། དེའི་འོག་ཏུ་ལོ་དེ་མི་གནས་པས་རྒྱུན་ཐམས་ཅད་ཀྱང་རང་གྲུབ་པའི་དུས་སྐད་ཅིག་གཉིས་པར་མི་སྡོད་པའི་སྐད་ཅིག་མ་ཡིན་ནོ། །ཞེས་གསུངས་པའི་ཕྱིར་རོ། །ཟླ་བ་དང་ཞག་དུས་ལའང་དེ་བཞིན་དུ་སྦྱར་བར་བྱའོ། །རིགས་པ་དེ་དག་གིས་སྔ་དྲོའི་དུས་ཀྱི་མི་དེ་ཕྱི་དྲོའི་དུས་ཀྱི་མི་མ་ཡིན་པར་ཤེས་པར་བྱ་སྟེ། སྔ་དྲོའི་དུས་དེ་ཕྱི་དྲོའི་དུས་མ་ཡིན་པའི་ཕྱིར་ཏེ། དུས་འགྱུར་བ་བཞིན་དུ་མི་དེ་ཡང་འགྱུར་བའི་ཕྱིར་རོ། །མི་འགྱུར་ན་ནི། མི་དེ་རྟག་པ་ཉིད་དུ་ཐལ་བར་འགྱུར་རོ། །གོང་དུ་བརྗོད་པ་དེ་དག་རྗེ་བླ་མའི་བཞེད་པ་ཡིན་ཏེ། རྩ་བ་ཤེས་རབ་ཀྱི་ཊིཀྐ་ལས་རྗེས། ལྷས་བྱིན་གྱིས་དུས་སྔ་ཕྱིའི་བདག་སོ་སོར་མ་ཕྱེ་བར་ངའོ་སྙམ་དུ་འཛིན་པའི་དམིགས་པའི་གཞིར་གྱུར་པའི་བདག་ནི་ཐོག་མ་མེད་པ་ནས་ཞུགས་པའི་བདག་ཙམ་ཡིན་ལ། ལྷ་ལ་སོགས་པའི་ལུས་བླངས་དུས་ཀྱི་འགྲོ་བ་སོ་སོ་བའི་བདག་རྣམས་ནི་སྔ་མའི་བྱེ་བྲག་རེ་རེའོ། །ལྷས་བྱིན་གྱིས་སྐྱེ་བ་སོ་སོར་ཕྱེ་བའི་བདག་ལ་ངའོ་སྙམ་དུ་གཟུང་བའི་བདག་ནི་ཚེ་རེ་རེའི་བདག་ཕྱོགས་རེ་བ་ཡིན་ནོ། །ཞེས་དང་། ཚེ་འདིའི་ལྷས་བྱིན་གྱིས་སྔོན་གྱི་སྐྱེ་བ་དྲན་པ་ན། ང་སྔར་དེ་དང་དེར་སྐྱེས་འདུག་སྙམ་དུ་དྲན་པ་ཡིན་གྱི། ཚེ་འདིའི་དུས་ཀྱིས་ཁྱད་པར་དུ་བྱས་ནས་སྡང་དེ་དང་དེར་སྐྱེས་འདུག་སྙམ་དུ་མི་དྲན་པ་བཞིན་ནོ། །དེས་ན་ཚེ་འདིའི་ལྷས་བྱིན་གྱིས་གང་ལ་དམིགས་ནས་ངའོ་སྙམ་པ་སྐྱེ་བའི་དམིགས་པར་གྱུར་པའི་བདག་ནི་ཚེ་རབས་སྔ་མ་རྣམས་སུ་ཡང་ཡོད་པས་དེ་ལྟར་དྲན་པ་མི་འགལ་ལ། ཚེ་འདིའི་ལྷ་བྱིན་ཚེ་སྔ་མར་ཡོད་ན་རྟག་པར་འགྱུར་བ་དང་མི་འདྲའོ། །དེ་བཞིན་དུ་མ་འོངས་པའི་གང་ཟག་སྐྱེ་བ་ལ་ཡང་། ཚེ་འདིའི་དུས་ཀྱི་གང་ཟག་དེ་ཉིད་ཕྱི་མར་མི་འགྲོ་ཡང་། ངའོ་སྙམ་པའི་དམིགས་པ་ང་ཙམ་ཞིག་དེར་ཡང་རྗེས་སུ་འགྲོ་བས། རང་ཉིད་སྐྱེ་བ་ཕྱི་མ་རྣམས་སུ་སྡུག་བསྔལ་གྱིས་དོགས་ནས་དེའི་རྒྱུ་མི་དགེ་བ་སྤོང་བ་དང་། བདེ་བར་བྱ་བའི་ཕྱིར་དུ་འདིར་དགེ་བ་ལ་བརྩོན་པ་ཡང་འཐད་དེ། དཔེར་ན་དེ་རིང་གི་དུས་ཀྱི་མི་འདི་སང་གི་དུས་སུ་མེད་ཀྱང་སང་བཀྲེས་སྐོམ་གྱི་སྡུག་བསྔལ་བྱུང་གིས་དོགས་ནས་དེ་རིང་ནས་བཟའ་བཏུང་སོག་པ་དང་། རྒས་པའི་ཚེ་སྡུག་བསྔལ་གྱིས་དོགས་ནས་གཞོན་དུས་ནོར་སོག་པ་བཞིན་ནོ། །འདི་ཐམས་ཅད་ཀྱང་ཡུལ་དུས་འདིའི་བདག་ཅེས་སོ་སོར་མི་འབྱེད་པར་སྤྱིར་བདག་བདེ་བ་ཐོབ་འདོད་དང་སྡུག་བསྔལ་དང་བྲལ་བར་འདོད་ནས་བྱེད་ལ། བདག་ཙམ་ཡང་དུས་དེ་དག་ཏུ་རྗེས་སུ་འགྲོ་བས་ངེས་ཡུལ་ལ་འཁྲུལ་བ་ཡང་མིན་ནོ། །དེས་ན་ངའོ་སྙམ་དུ་ཐ་སྙད་འདོགས་མཁན་གྱི་མིང་དང་ཐ་སྙད་བཏགས་པའི་བདག་ཉིད་ཁྱབ་མཉམ་དུ་མི་བཟུང་བར་མི་དེ་བདག་དེའི་ཆ་ཤས་གཅིག་ཡིན་པར་ཤེས་པར་གྱིས་ཤིག །འདི་རྣམས་རྟེན་འབྲེལ་སྤྱི་དང་ཁྱད་པར་དུ་ལས་དཀར་ནག་གི་འབྲས་བུ་བདེ་སྡུག་འབྱུང་བའི་ངེས་པ་ལ་ཁྱད་ཆེ་བར་སྣང་བས་ཕྱོགས་ཙམ་བརྗོད་པའོ། །ཞེས་གསུངས་པ་ལྟར་ཤེས་པར་བྱ་སྟེ། གཞན་དུ་ན་ལས་འབྲས་སྤྱི་དང་ཚེ་སྔ་ཕྱིའི་བྱ་བྱེད་ཐམས་ཅད་ལ་རྨོངས་བཞིན་དུ་འཆི་བར་འགྱུར་བ་དང་། རྨོངས་བཞིན་དུ་དེའི་རྣམ་གཞག་ཀྱང་འདོད་དགོས་པར་འགྱུར་རོ། །གལ་ཏེ་རང་གི་ང་སྤྱི་ཙམ་དེ་སྔ་ཕྱི་ཐམས་ཅད་དུ་ཡོད་ན། དེ་རྟག་པར་མི་འགྱུར་རམ་ཞེ་ན། མི་འགྱུར་ཏེ། དཔེར་ན་མི་དང་མི་རྟག་པ་སྤྱི་ཙམ་ཞིག་དུས་ཀུན་ཏུ་ཡོད་ཀྱང་དེ་རྟག་པ་ཡིན་མི་དགོས་པ་བཞིན་ནོ། །གསུམ་པ་དུས་གསུམ་གྱི་རྣམ་གཞག་བཤད་པ་ལ་གཉིས། དངོས་དང་། འཕྲོས་དོན་ནོ། །དང་པོ་ལ། བྱེ་བྲག་སྨྲ་བ་རྣམས་ནི། མྱུ་གུ་ལ་སོགས་པ་རེ་རེ་ཡང་དུས་གསུམ་དུ་འཇོག་ཅིང་། མྱུ་གུའི་འདས་མ་འོངས་གཉིས་ཀའི་དུས་སུའང་མྱུ་གུ་ཡོད་པར་འདོད་དེ། དེ་ཡང་བཙུན་པ་ཆོས་སྐྱོབ་ནི། མྱུ་གུ་མ་འོངས་པ་ན་ད་ལྟར་བ་དང་ད་ལྟར་བ་ནས། འདས་པར་འཇུག་པ་ན་མ་འོངས་དང་ད་ལྟར་བའི་ངོ་བོ་འདོར་གྱི། དེའི་དུས་ཀྱི་རྗེས་མི་འདོར་ཏེ། དཔེར་ན་གསེར་གྱི་སྣོད་བཅོམ་ནས་རྒྱན་བྱེད་པ་དང་འོ་མ་ཞོར་འགྱུར་བ་ན་དབྱིབས་དང་རོ་གཞན་དུ་འགྱུར་གྱི། ཁ་དོག་གཞན་དུ་མི་འགྱུར་བ་བཞིན་ནོ་ཞེས་འདོད། དབྱངས་སྒྲོགས་ནི། དུས་རེ་རེ་ཡང་དུས་གསུམ་ཀའི་མཚན་ཉིད་དང་ལྡན་མོད་ཀྱང་གང་ཤས་ཆེ་བ་དེའི་སྒོ་ནས་དུས་གསུམ་པོ་གང་རུང་དུ་འཇོག་སྟེ། དཔེར་ན། སྐྱེས་པ་གཅིག་བུད་མེད་གཅིག་ལ་ཆགས་པ་ཤས་ཆེ་བར་གྱུར་པའི་ཚེ་དེ་ལ་ཆགས་ཞེས་བརྗོད་ཀྱི་བུད་མེད་གཞན་ལ་ཆགས་པ་དང་བྲལ་བ་མིན་པ་བཞིན་ནོ་ཞེས་འདོད། དབྱིག་བཤེས་ནི། མྱུ་གུ་ལྟ་བུའི་དངོས་པོ་གཅིག་ཉིད་ཀྱང་མ་འོངས་པ་ལ་སོགས་པའི་གནས་སྐབས་སོ་སོར་ཕྱིན་པ་ན་དེར་འཇོག་སྟེ། དཔེར་ན། རིལ་ལུ་གཅིག་ཉིད་གཅིག་དང་བརྒྱ་དང་སྟོང་གི་ཤོད་མིག་ཏུ་བཞག་ན་གཅིག་དང་བརྒྱ་དང་སྟོང་གི་ཐ་སྙད་བྱེད་པ་བཞིན་ནོ་ཞེས་འདོད། སངས་རྒྱས་ལྷ་ནི། གཞི་ལ་ལྟོས་ནས་གཞན་དུ་འཇོག་སྟེ། དཔེར་ན། བུད་མེད་གཅིག་ཉིད་རང་གི་མ་ལ་ལྟོས་ནས་བུ་མོ་དང་རང་གི་བུ་མོ་ལ་ལྟོས་ནས་མར་འཇོག་པ་བཞིན་ནོ་ཞེས་འདོད་དོ། །མདོ་སྡེ་པ། སེམས་ཙམ་པ། རང་རྒྱུད་པ་རྣམས་ཀྱིས་ནི། སྤྱིར་དངོས་པོ་དེ་ཉིད་སྐྱེ་བའི་རྒྱུ་ཡོད་ཅིང་ད་ལྟ་དངོས་པོ་དེར་མ་སྐྱེས་པ་དེ། མ་འོངས་པ་དང་། ད་ལྟ་སྐྱེས་ཟིན་པའི་དངོས་པོ་དེ་ཉིད་སྒྲར་ཞིག་པ་དེ་འདས་པ་དང་། སྐྱེས་ལ་མ་འགགས་པ་དེ། ད་ལྟར་བར་འདོད་ཅིང་། འདས་པ་དང་། མ་འོངས་པ་གང་རུང་ཡིན་ན། དངོས་མེད་ཡིན་པས་ཁྱབ་ཅེས་ཁས་ལེན་པར་ཡང་མཚུངས་ཞེས་སྟོང་ཐུན་ལས་བཤད། འོན་ཀྱང་དངོས་པོ་དེའི་དུས་སུ་འདས་མ་འོངས་གང་རུང་ཡིན་ན། དངོས་མེད་ཡིན་པར་ཁྱབ་ཅེས་མི་བཞེད་དེ། མྱུ་གུའི་རྒྱུ་དེ་མྱུ་གུའི་དུས་སུ་འདས་པ་དང་། མྱུ་གུའི་འབྲས་བུ་དེ་མྱུ་གུའི་དུས་སུ་མ་འོངས་པར་འདོད་པའི་ཕྱིར་རོ། །མྱུ་གུའི་འདས་མ་འོངས་གང་རུང་ཡིན་ན། མྱུ་གུའི་དུས་སུ་འདས་མ་འོངས་གང་རུང་ཡིན་མི་དགོས་ཏེ། མྱུ་གུ་ཞིག་པའི་ཆ་དེ་མྱུ་གུའི་འདས་པ་ཡིན་ཡང་། མྱུ་གུའི་དུས་སུ་འདས་པ་མིན་ལ། མྱུ་གུར་རེ་ཞིག་མ་སྐྱེས་ཀྱང་མྱུ་གུར་འགྱུར་རུང་གི་ཆ་དེ། མྱུ་གུའི་མ་འོངས་པ་ཡིན་ཀྱང་། མྱུ་གུའི་དུས་སུ་མ་འོངས་པ་ནི་མིན་ནོ། །དེ་ལྟ་ནའང་མྱུ་གུའི་ཞིག་པ་དེ། མྱུ་གུའི་འདས་པའི་དུས་ཡིན་མིན་དཔྱད་པར་བྱ་སྟེ། དུས་ཞེས་པ་ནི་དངོས་པོའི་སྟེང་ནས་འཇོག་དགོས་པའི་ཕྱིར་སྙམ་མོ། །མདོ་སེམས་རང་རྒྱུད་པ་གསུམ་གྱིས་ནི། སྤྱིར་མྱུ་གུའི་འདས་པ་དང་མ་འོངས་པ་གཉིས་དངོས་མེད་དུ་འདོད་པ་ཡིན་ཏེ། རྩ་ཤེའི་ཊིཀ་ཆེན་ལས། ཞིག་པ་དང་མ་སྐྱེས་པའི་མ་འོངས་པ་གཉིས་དངོས་མེད་དུ་འདོད་དེ། འདི་ནི་དབུ་མ་ཐལ་འགྱུར་བ་མ་གཏོགས་མདོ་སྡེ་བ་ཡན་ཆད་ཀྱི་རང་སྡེ་རྣམས་ཀྱིས་འདོད་པའོ། །ཞེས་གསུངས་པའི་ཕྱིར་རོ། །དེ་གསུམ་གྱིས་མྱུ་གུ་རང་བཞིན་གྱིས་གྲུབ་པར་འདོད་པའི་དབང་གིས། མྱུ་གུ་ཞིག་པའི་འདས་པ་དེ་དངོས་པོ་མིན་པར་འདོད་པ་ཡིན་ཏེ། འཇུག་པའི་རྣམ་བཤད་ལས། དེ་ཡང་དངོས་པོ་རང་བཞིན་གྱིས་གྲུབ་པར་འདོད་པའི་ཕྱོགས་ཐམས་ཅད་ལ་ཞིག་པ་དངོས་པོར་མི་རུང་ལ། ཞེས་གསུངས་པའི་ཕྱིར་རོ། །དེ་དངོས་པོ་མིན་པར་འདོད་པའི་རྒྱུ་མཚན་ཡང་ཡོད་དེ། མྱུ་གུ་ལྟ་བུ་རང་གི་དུས་སྐད་ཅིག་གཉིས་པར་མ་བསྡད་པ་དངོས་པོ་མིན་པའི་ཕྱིར་ཏེ། མྱུ་གུ་ལྟ་བུའི་དངོས་པོ་ཅིག་ཞིག་པ་ན། མྱུ་གུའི་ཆ་ཤས་ཀྱི་དངོས་པོ་ཐམས་ཅད་ནི་མེད་ལ། དེ་མྱུ་གུ་ལས་གཞན་པའི་བུམ་པ་ལ་སོགས་པའི་དངོས་པོ་གཞན་གང་དུ་ཡང་ལ་ཐོབ་པའི་ཕྱིར་སྙམ་པའོ། །ཐལ་འགྱུར་བའི་ལུགས་ཀྱི་དུས་གསུམ་ནི། དཔལ་ལྡན་ཟླ་བས་བཞི་བརྒྱ་བའི་འགྲེལ་པ་ལས། དེ་ལ་མ་འོངས་པ་ནི་ད་ལྟར་བའི་དུས་སུ་མ་ཕྱིན་པའོ། །འདས་པ་ནི་དེ་ཉིད་ལས་འདས་པའོ། །ད་ལྟར་བྱུང་བ་ནི་སྐྱེས་ལ་མ་འགགས་པའོ་ཞེས་གསུངས་པ་ལྟར། དཔེར་མཚོན་ན། མྱུ་གུ་རང་གི་དུས་སྐད་ཅིག་གཉིས་པར་ཞིག་པ་ནི་མྱུ་གུ་འདས་པའི་དུས་དང་། སྤྱིར་སྐྱེ་བའི་རྒྱུ་ཡོད་ཀྱང་དགུན་དུས་ལྟ་བུར་རེ་ཞིག་རྐྱེན་མ་ཚང་བའི་དབང་གིས་མྱུ་གུར་མ་སྐྱེས་པའི་ཆ་དེ། མྱུ་གུ་མ་འོངས་པའི་དུས་དང་། སྐྱེས་ལ་མ་འགགས་པའི་མྱུ་གུ་རང་ཉིད་ད་ལྟར་བའི་དུས་སོ། །དེས་ན་དེའི་འདས་པའི་དུས་ཡིན་ན། དེའི་དུས་སུ་འདས་པ་ཡིན་མི་དགོས་སོ། །འདི་ཙམ་ཞིག་ནི་མདོ་སྡེ་བ་ནས་ཐལ་འགྱུར་བའི་བར་ཐམས་ཅད་ཀྱང་ཁས་ལེན་ཡང་ཁྱད་པར་ཡོད་དེ། གོང་དུ་བརྗོད་པ་ལྟར་མདོ་སྡེ་བ་སོགས་གསུམ་གྱིས་ནི། མྱུ་གུ་ལྟ་བུ་འདས་མ་འོངས་གཉིས་དངོས་མེད་དུ་འདོད་ལ། ཐལ་འགྱུར་བས་ནི་དེ་གཉིས་དངོས་པོར་བཞེད་པའི་ཕྱིར་རོ། །དེ་ཡང་མྱུ་གུ་རང་རྒྱུ་ལས་སྐྱེས་པ་དེ་བཞིན་དུ། དེ་ཞིག་ཟིན་འདས་པ་དང་མ་འོངས་པ་ཡང་རང་རྒྱུ་ལས་སྐྱེས་པར་འདོད་ཅིང་། མྱུ་གུ་ཞིག་པ་དེ་སྐྱེས་ལ་རང་དུས་སུ་མ་འགགས་པ་ཡིན་ཀྱང་། ད་ལྟར་བ་ནི་མིན་ཏེ། སྤྱིར་དེ་ཞིག་པ་ཁོ་ན་ཡིན་པའི་ཕྱིར་འདས་པའོ། །མ་འོངས་པ་ནི་སྤྱིར་སྐྱེས་པ་ཡིན་ཡང་རེ་ཞིག་རང་འབྲས་དངོས་པོ་དེར་མ་སྐྱེས་པའི་ཆ་ལ་འཇོག་པས། ད་ལྟར་བ་ནི་མིན་ནོ། །མྱུ་གུའི་ཞིག་པ་དངོས་པོ་ཡིན་པ་དེ་བཞིན་དུ་དེའི་ཞིག་པའི་ཞིག་པ་སོགས་ཞིག་པའི་རིགས་འདྲ་ཕྱི་མ་རྣམས་ཀྱང་ཞིག་པ་ཡིན་པས་འདས་པ་ཡིན་གྱི། མ་འོངས་པ་དང་ད་ལྟར་བ་གང་ཡང་མིན་ནོ། །འདིར་ཞིག་པ་དངོས་པོ་ཡིན་ཏེ། ཤི་བ་དངོས་པོ་ཡིན་པའི་ཕྱིར་ཏེ། སྐྱེ་བའི་རྐྱེན་གྱིས་རྒ་ཤི་འབྱུང་བའི་ཕྱིར། གཞན་ཡང་། དེ་དངོས་པོ་ཡིན་ཏེ། མདོ་སྡེ་པ་སོགས་ཀྱིས་ནི་ཞིག་པ་བཏགས་དོན་བཙལ་ནས་འཇོག་པས་དངོས་པོར་མི་འདོད་ཀྱང་། ཐལ་འགྱུར་བའི་ལུགས་ལ་མྱུ་གུ་བཏགས་དོན་མ་བཙལ་བར་ཐ་སྙད་དུ་འཇོག་པ་ལྟར། ཞིག་པ་ཡང་བཏགས་དོན་མ་བཙལ་བར་ཐ་སྙད་དུ་དངོས་པོར་འཇོག་ནུས་པར་བཞེད་པའི་ཕྱིར། དུས་གསུམ་གྱི་ནང་ནས་འདས་མ་འོངས་གཉིས་ད་ལྟར་བ་ལ་ལྟོས་ནས་འཇོག་དགོས་པས་ད་ལྟར་བ་གཙོ་བོ་ཡིན་གྱི། འདས་མ་འོངས་གཉིས་གཙོ་བོ་མིན་ནོ། །གཉིས་པ་འཕྲོས་དོན་མཐའ་དཔྱད་པ་ལ། ཁ་ཅིག །མྱུ་གུ་འདས་པ་མྱུ་གུའི་སྔོན་དུ་བྱུང་བ་དང་། མྱུ་གུ་མ་འོངས་པ་མྱུ་གུའི་རྗེས་སུ་བྱུང་བར་འདོད་པ་ནི་ཆེར་འཁྲུལ་བ་ཡིན་ཏེ། དེ་ལྟར་འདོད་པ་ནི་མྱུ་གུའི་འདས་པ་དང་མྱུ་གུའི་དུས་སུ་འདས་པ་གཉིས་ཀྱི་ཁྱད་པར་དང་། མྱུ་གུའི་མ་འོངས་པ་དང་མྱུ་གུའི་དུས་སུ་མ་འོངས་པའི་ཁྱད་པར་མ་ཕྱེད་པའི་སྐྱོན་ཡིན་པའི་ཕྱིར་ཏེ། ཁྱད་པར་ནི་སྔར་བཤད་ཟིན་ཏོ། །དེས་ན་མྱུ་གུ་འདས་པ་ནི། མྱུ་གུའི་རྗེས་སུ་བྱུང་བ་ཡིན་ལ། མྱུ་གུ་མ་འོངས་པ་ནི། མྱུ་གུའི་སྔོན་དུ་འགྲོ་བ་ཡིན་ནོ། ཁ་ཅིག །རྟག་པའི་རིགས་རྣམས་ད་ལྟ་བ་ཡིན་ཀྱང་། ད་ལྟར་བ་ཡིན་མི་དགོས་ཞེས་གསུངས་ཏེ་དཔྱད་པར་བྱ་ཞིང་། རི་བོང་གི་རྭ་དང་ནམ་མཁའ་ལྟ་བུ་ནི། མ་འོངས་ཀྱང་མ་འོངས་པ་ནི་མིན་ནོ། །འོ་ན། ཁ་སང་གི་མྱུ་གུ་ལྟ་བུ་འདས་པ་དང་། སང་གི་མྱུ་གུ་ལྟ་བུ་མ་འོངས་པར་མི་འཇོག་གམ་ཞེ་ན། མི་འཇོག་སྟེ། དེ་དག་ད་ལྟར་བ་ཁོ་ན་ཡིན་པའི་ཕྱིར་ཏེ། ད་ལྟར་བ་ནི་དངོས་པོ་རང་དུས་ལ་ལྟོས་ནས་བརྩི་དགོས་ཀྱི། དུས་ཀྱི་ཐ་སྙད་བྱེད་པ་པོའི་བརྗོད་བཞིན་པའི་དེ་རིང་གི་དུས་ན་ད་ལྟར་མ་ཡིན་པ་ཙམ་གྱིས་ནི་ད་ལྟར་བ་མ་ཡིན་པར་མི་འགྱུར་བའི་ཕྱིར་རོ། །དེས་ན། ཁ་ཅིག ཁ་སང་དང་ལོ་ཟླ་སྔོན་མ་དང་། དེའི་དུས་ཀྱི་མི་རྣམས་འདས་པ་དང་། སང་དང་ལོ་ཟླ་ཕྱི་མ་དང་། དེའི་དུས་ཀྱི་མི་རྣམས་མ་འོངས་པར་འཇོག་པ་ནི་འཁྲུལ་པ་ཆེན་པོ་སྟེ། དེ་ནི་གཞུང་ཆེ་བ་ནས་བཤད་པའི་དུས་གསུམ་གྱི་འཇོག་ལུགས་གང་ཡང་མ་ངེས་པར། དུས་ཀྱི་ཐ་སྙད་བརྗོད་པ་པོའི་དུས་ཁོ་ན་ལ་ད་ལྟར་བ་དང་། དེའི་དུས་སུ་འདས་པ་ལ་འདས་པ་དང་། དེའི་དུས་སུ་མ་འོངས་པ་ལ་མ་འོངས་པས་ཁྱབ་པར་བཟུང་བའི་སྐྱོན་ཡིན་པའི་ཕྱིར་རོ། །དེས་ན། སྤྱིར་དུས་གསུམ་གྱི་འདོད་ཚུལ་དང་། བརྗོད་པ་པོ་རང་དུས་ལ་ལྟོས་པའི་དུས་གསུམ་གྱི་ཁྱད་པར་རྣམས་ཕྱེད་པར་བྱའོ། ཁ་ཅིག །དེའི་ཁྱད་པར་མ་ཕྱེད་པར་བསྐལ་བ་དང་པོའི་མི་རྣམས་ཤི་ཟིན་ནས་འདས་པ་ཡིན་ནོ་ཞེས་ཟེར་བ་ནི་མི་རིགས་པ་ཆེན་པོ་སྟེ། དེ་ལྟར་ཡིན་ན་དེ་རྣམས་མི་ཡང་མ་ཡིན་པར་འགྱུར་བའི་ཕྱིར་རོ། །དེས་ན་བསྐལ་བ་དང་པོའི་མི་རྣམས་ནི་སྤྱིར་ཤི་བ་མིན་ཏེ། སྲོག་ལྡན་ཡིན་པའི་ཕྱིར་ཏེ། མི་ཡིན་པའི་ཕྱིར་རོ། །དེར་མ་ཟད། སྔོན་གྱི་དུས་སུ་བྱོན་ཟིན་འདས་པ་དང་མ་འོངས་ན་འབྱུང་འགྱུར་གྱི་སངས་རྒྱས་བྱང་སེམས་ཉན་རང་རྒྱལ་བློན་པཎ་གྲུབ་དང་། སེམས་ཅན་གཞན་གང་དག་འབྱུང་བ་རྣམས་དང་། རང་གི་ཚེ་སྔ་ཕྱིའི་སེམས་ཅན་དེ་རྣམས་ནི་ད་ལྟ་མེད་ཀྱང་སྤྱིར་ཡོད་དོ། །དེ་བཞིན་དུ་ལོ་ཟླ་ཞག་དུས་སྔ་ཕྱི་རྣམས་ནི་དེ་རིང་གི་དུས་སུ་མེད་ཀྱང་སྤྱིར་ཡོད་པ་དང་། སྔར་བྱས་པ་དང་ཕྱིས་བྱེད་པར་འགྱུར་བའི་ལས་དགེ་སྡིག་སོགས་ཀྱང་ད་ལྟ་མེད་མོད། སྤྱིར་ཐ་སྙད་དུ་ཡོད་པར་ཁས་ལེན་དགོས་པ་ཡིན་ནོ། །དེ་ཡང་རྟེན་ཅིང་འབྲེལ་བར་འབྱུང་བ་ཚད་མར་བྱས་ཏེ། ཀུན་རྫོབ་སྒྱུ་མ་བཞིན་དུ་ཡོད་པར་འདོད་ཀྱི། ད་ལྟ་རང་རེའི་ཡིད་དོན་འགྱུར་མེད་ལིང་ངེར་སྣང་བ་ལྟར་རང་ངོས་ནས་གྲུབ་པ་ནི་མིན་ཏེ། ལམ་རིམ་ཆེན་མོ་ལས། འདས་པ་ལ་སོགས་པ་འདི་དག་ཡེ་མེད་ཡང་མིན་ལ། རང་གི་ངོ་བོས་གྲུབ་པའང་མིན་པ་དང་ལོག་པའམ་བརྫུན་པའི་དོན་རྟེན་འབྲེལ་གྱི་དོན་ཡིན་གྱི། ཞེས་གསུངས་པའི་ཕྱིར་རོ། །དེས་ན་སྔོན་བྱུང་ཟིན་པ་རྣམས་ད་ལྟའི་དུས་ལ་ལྟོས་ནས་འདས་ཟིན་ཀྱང་། སྤྱིར་འདས་ཟིན་པ་མིན་ལ། མ་འོངས་པ་ན་འབྱུང་འགྱུར་དེ་དག་ཀྱང་ད་ལྟའི་དུས་སུ་མ་འོངས་ཀྱང་། སྤྱིར་མ་འོངས་པ་མིན་ནོ། །དེས་ན། སྡུད་པ་ལས། རྒྱལ་བ་འདས་དང་མ་བྱོན་ཕྱོགས་བཅུར་གང་བཞུགས་པ། ཞེས་གསུངས་པ་ལྟར། བརྗོད་པ་པོ་རང་དུས་ལ་ལྟོས་པའི་དུས་གསུམ་གྱི་རྣམ་གཞག་བྱེད་ན་ནི། སྔོན་གྱི་དུས་དང་། ད་ལྟའི་དུས་དང་། ཕྱི་མའི་དུས་དང་། དེ་དག་གི་དུས་སུ་བྱོན་པ་དང་། བཞུགས་པ་དང་། འབྱོན་པའི་སངས་རྒྱས་ཞེས་བྱས་ན་བདེའོ། །འདས་མ་འོང་གི་དུས་གཉིས་ད་ལྟའི་དུས་སུ་མ་གྲུབ་ཀྱང་། སངས་རྒྱས་ཀྱིས་མཁྱེན་པའི་ཚེ་ཅིག་ཅར་དུ་མཁྱེན་པ་ཡིན་ཏེ། མཁྱེན་དུས་དང་གྲུབ་དུས་མཉམ་མི་དགོས་པའི་ཕྱིར་ཏེ། དཔེར་ན། དེ་རིང་གི་དུས་སུ་ཁ་སང་བྱས་པ་དེ་མེད་ཀྱང་དྲན་པ་བཞིན་ནོ། །གལ་ཏེ་སྔོན་གྱི་དུས་སུ་བྱུང་ཟིན་པའི་སེམས་ཅན་དེ་རྣམས་ནི། །སྤྱིར་ཡོད་ན། ད་ལྟ་ཁ་ཅིག་གིས་གཞན་ཞིག་ལ་ཁྱོད་ཀྱི་ཕ་མ་ཡོད་དམ་མེད་ཅེས་དྲིས་པ་ན། དེས་བདག་གི་ཕ་མ་ཤི་ཟིན་མེད་ཅེས་ལན་འདེབས་ལ་འདི་ཇི་ལྟར་ཡིན་ཞེ་ན། སྐྱོན་མེད་དེ། ངེས་ཚིག་གིས་དེ་ལྟར་བརྗོད་ཀྱང་བསམ་དོན་ནི་སྔར་ཤི་བའི་དུས་བྱུང་ནས་བརྗོད་པའི་དུས་དེར་མེད་པ་ལ་བསམས་པས་ན་མི་འགལ་བའི་ཕྱིར་རོ། །དེ་ལྟ་མ་ཡིན་པར་ཚིག་ཟིན་ལྟར་ན། ང་རང་གི་ཕ་མ་ལས་མ་སྐྱེས་པར་འགྱུར་ཏེ། དེའི་ཕ་མ་ཤི་ནས་མེད་པའི་ཕྱིར་རོ། །མ་ཁྱབ་ན། མེད་པ་ལས་བུ་སྐྱེ་བར་ཐལ་ལོ། །དེ་ལྟ་ནའང་མི་ཤི་བ་ཡོད་ཀྱང་། ཤི་བའི་མི་ནི་མེད་དེ། མི་ཡིན་ན་གསོན་པོ་ཡིན་དགོས་པའི་ཕྱིར་རོ། །དེས་ན་མཁས་པ་ཁ་ཅིག །རྒྱལ་པོ་གླང་དར་ཤི་བ་ཡིན་ཟེར་དགོས་ཞེས་གསུངས་པ་ནི། རིགས་པའི་གནད་ཕྲ་མོ་མ་མཁྱེན་པའི་གཏམ་མོ། །ཚུལ་འདི་ལྟ་བུ་སྨྲ་བ་ལ་ཁོ་བོ་ཅག་གི་རིགས་པའི་ཟད་མཐའ་མེད་ཀྱང་མང་དུ་དོགས་ནས་མ་སྤྲོས་ཤིང་། ཐ་སྙད་འཇོག་ཚུལ་གཞན་དག་ཀྱང་འདིར་བརྗོད་པའི་རིགས་འགྲོས་ཀྱིས་ཤེས་པར་བྱ་སྟེ། དེ་དག་གི་ཁྱད་པར་རགས་པ་ལ་རྨོངས་ན་ནི། སྐྱེ་བ་སྔ་ཕྱི་དང་ལས་འབྲས་སོགས་ཁས་བླངས་ཀྱང་དད་པས་དྲངས་པའི་ཡིད་དཔྱོད་ཙམ་ཡིན་གྱི། ཚད་མས་དྲངས་པའི་ཡིད་ཆེས་བརྟན་པོ་ཐོབ་པ་མིན་པའི་ཕྱིར་རོ། །དེས་ན་རྗེ་ཉིད་ཀྱིས་གསུངས་པ་ལྟར་རང་རྒྱུད་ལ་བག་ཆགས་བཟང་ཞིང་འཐུག་པོ་ཞིག་འཇོག་པར་འདོད་ན་ནི། ཚད་མས་ངེས་པའི་གོ་བ་བརྟན་པོ་བཙལ་བར་བྱའོ། །མདོར་ན་དངོས་པོ་རང་བཞིན་གྱིས་མེད་ཀྱང་། ཐ་སྙད་དུ་སྒྱུ་མ་དང་སྤྲུལ་པ་ལྟར་ལས་འབྲས་ལ་སོགས་པའི་བྱ་བྱེད་ཀྱི་རྟེན་འབྲེལ་ཐམས་ཅད་ལེགས་པར་འཐད་པའི་ཚུལ་ཤེས་དགོས་ཏེ། དེ་ལྟར་ཤེས་ཤིང་གུས་ན་ནི་ཕན་ཡོན་ཡོད་པར་མ་ཟད། རང་ལ་སྔོན་གྱི་བག་ཆགས་བཟང་བོ་ཡོད་པའི་རྟགས་ཀྱང་ཡིན་ཏེ། སྡུད་པ་ལས། གང་ཞིག་ཆོས་འདི་སྤྲུལ་དང་སྒྱུ་མ་འདྲར་ཐོས་ནས། །སོམ་ཉི་མེད་ཅིང་སློབ་ལ་ཕྱིར་ཞིང་སྦྱོར་བྱེད་པ། །སེམས་ཅན་དེ་ནི་རིང་ནས་ཐེག་ཆེན་ཞུགས་རིགས་བྱ། །སངས་རྒྱས་བྱེ་བ་ཁྲག་ཁྲིག་མང་ལ་ལྷག་བྱས་ཡིན། །ཞེས་གསུངས་པའི་ཕྱིར་རོ། །གཞན་ཡང་དེ་ལྟར་ཤེས་དགོས་ཏེ། མི་ཤེས་ན་དད་པ་ཡོད་ཀྱང་རྟག་ཆད་ཀྱི་མཐར་ལྟུང་ནས་འཁོར་བར་འཁོར་ལ། ཤེས་ན་ནི་མཐའ་དེ་གཉིས་ལས་གྲོལ་ཏེ་འཁོར་བ་ལས་ཐར་བར་འགྱུར་བའི་ཕྱིར་ཏེ། མགོན་པོ་ཀླུ་སྒྲུབ་ཀྱིས། ཡོད་པས་རྣམ་པར་མི་གྲོལ་ཏེ། །མེད་པས་སྲིད་པ་འདི་ལས་ནི། །དངོས་དང་དངོས་མེད་ཡོངས་ཤེས་པས། །བདག་ཉིད་ཆེན་པོ་རྣམ་པར་གྲོལ། །ཞེས་དང་། ཡོད་པ་པ་ནི་བདེ་འགྲོར་འགྲོ། །མེད་པ་པ་ནི་ངན་འགྲོར་འགྲོ། །ཡང་དག་ཇི་བཞིན་ཡོངས་ཤེས་ན། །གཉིས་ལ་མི་བརྟེན་ཐར་བར་འགྱུར། །ཞེས་གསུངས་པའི་ཕྱིར་རོ། །སྨྲས་པ། སྟོན་པ་མཆོག་དང་ཀླུ་སྒྲུབ་ཟླ་གྲགས་ཀྱི། །དགོངས་པ་རྗེ་བཙུན་བླ་མས་བཀྲལ་བ་བཞིན། །ཟབ་དོན་སྙིང་བོ་བསྡུས་པའི་ཆ་འགའ་ཞིག །དོན་གཉེར་ཅན་ལ་ཕན་ཕྱིར་ལེགས་པར་བཤད། །རྙེད་དང་བཀུར་སྟི་གྲགས་འདོད་གཏན་སྤངས་ནས། །ཟབ་མོའི་དོན་འདི་འཆད་ལ་ཞུགས་གྱུར་ཏེ། །སྒོ་གསུམ་རྣམ་དཀར་ཅི་སྙེད་བསྐྲུན་དེ་ཡང་། །མཐའ་བྲལ་ལྟ་བའི་ལམ་བཟང་རྒྱས་ཕྱིར་བསྔོ། །ཅེས་པ་འདི་ནི། ཤཱཀྱའི་དགེ་སློང་གྲགས་པ་བཤད་སྒྲུབ་རང་ཉིད་ཀྱིས་མཁས་པའི་དགོངས་པ་ཇི་ལྟར་རྟོགས་པ་བཞིན་དད་པས་ཀུན་ནས་བསླངས་ཏེ་ཅོ་ནེ་དགོན་ཉིད་དུ་སྦྱར་བའོ། །ཤུ་བཾ། བཀྲ་ཤིས།། །།