བྱང་ཆུབ་ལམ་གྱི་རིམ་པའི་དམར་འཁྲིད་འཁྱེར་བདེ་ཀུན་ཕན།
བྱང་ཆུབ་ལམ་གྱི་རིམ་པའི་དམར་འཁྲིད་འཁྱེར་བདེ་ཀུན་ཕན་ཞེས་བྱ་བ་བཞུགས།
ན་མོ་གུ་རུ་མཉྫུ་གྷོ་ཥྚཱ་ཡ། ཐུབ་དབང་དམ་པ་མི་ཕམ་འཇམ་པའི་དབྱངས། །ཀླུ་སྒྲུབ་ཞབས་དང་ཐོགས་མེད་ཨ་ཏི་ཤ །འབྲོམ་སྟོན་ཀུན་མཁྱེན་བཙོང་ཁ་བ་ལ་སོགས། །བརྒྱུད་པའི་བླ་མ་རྣམས་ལ་གུས་ཕྱག་འཚལ། །དེ་ལ་འདིར་ཡང་དག་པར་རྫོགས་པའི་སངས་རྒྱས་ནས་རྩ་བའི་བླ་མའི་བར་རིམ་པར་བརྒྱུད་པའི་བྱང་ཆུབ་ལམ་གྱི་རིམ་པའི་འཁྲིད་དམིགས་དམ་པའི་མན་ངག་བཞིན་ཉམས་ལེན་དུ་འཁྱེར་བདེ་མདོར་བསྡུས་དགོད་པ་ལ་གསུམ། སྦྱོར་བ་དང་། དངོས་གཞི། མཇུག་གོ །དང་པོ་ལ་གཉིས། སྔོན་གྲོ་སྐྱབས་སེམས་དང་། དངོས་གཞི་བཤེས་གཉེན་བསྟེན་ཚུལ་ལོ། །དང་པོ་ནི། གནས་ཁང་བྱི་དོར་བྱས་ཏེ་སྐུ་གསུང་ཐུགས་ཀྱི་རྟེན་བཀྲམ། མཆོད་པ་ལེགས་པར་བཤམས་ལ། ཐོག་མར་སྐྱབས་སུ་འགྲོ་བ་ནི། བླ་མ་རྒྱལ་བ་སྲས་དང་བཅས་པའི་དཀོན་མཆོག་གསུམ་པོ་ཐམས་ཅད་མདུན་གྱི་ནམ་མཁར་མངོན་སུམ་དུ་བྱོན་ནས་བཞུགས་པར་གྱུར་ཅེས་བརྗོད་དམ། མིན་ཀྱང་དེའི་མོས་པ་ཤུགས་ཅན་བྱ། རང་བཞིན་སྤྱི་དང་ཁྱད་པར་བདག་ཉིད་ཐོག་མ་མེད་པ་ནས་ད་ལྟའི་བར་འཁོར་བ་དང་ངན་སོང་གསུམ་དུ་སྡུག་བསྔལ་མི་བཟད་པ་མྱོང་ཞིང་། ད་དུང་ཡང་མྱོང་བར་འགྱུར་བའི་ཚུལ་དྲན་པར་བྱས་ཏེ། ཡིད་སྐྱོ་ཞིང་འཇིགས་པའི་བློ་ཤུགས་དྲག་པོ་དང་ཁྱེད་མཁྱེན་སྙམ་པའི་རེ་བལྟོས་འཆའ་བའི་ཡིད་གཏད་ཀྱི་བློ་ལིངས་སྐྱུར་གྱི་སྒོ་ནས་དེ་དག་གི་ཡོན་ཏན་དྲན་བཞིན་པར་ངག་ཏུ། བདག་སོགས་འགྲོ་བ་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །སངས་རྒྱས་བཅོམ་ལྡན་འདས་རྣམས་ལ༴ དམ་པའི་ཆོས་རྣམས་ལ༴ འཕགས་པའི་དགེ་འདུན་རྣམས་ལ༴ བདུན་ནམ་ཉེར་གཅིག་བརྒྱ་སྟོང་སོགས་ཅི་ནུས་བརྗོད་པའི་བར་སྐབས་རྣམས་སུའམ་མཐར། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་ལ་སྐྱེས་བུ་གསུམ་གྱི་ལམ་གྱི་རིམ་པ་རྣམས་མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་ལན་བདུན་ནམ་ཉེར་གཅིག་སོགས་བརྗོད་ཅིང་། འདིར་མི་གསལ་ཡང་དེའི་ཚེ་སྐྱབས་གནས་དེ་དག་གི་སྐུ་ལས་འོད་ཟེར་དཀར་པོ་དཔག་ཏུ་མེད་པ་བྱུང་སྟེ། རང་གི་སྤྱི་བོ་སོགས་སུ་ཞུགས་ནས་ཉེས་པའི་ཚོགས་མ་ལུས་པ་དག་སོང་སྙམ་དུ་བསམས་ནའང་ཁྱད་ཆེ་བར་སེམས། དེ་ནས་སེམས་བསྐྱེད་པ་ནི། བདག་གིས་སེམས་ཅན་ཐམས་ཅད་ཀྱི་དོན་དུ་མྱུར་བ་མྱུར་བར་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྐྱེས་བུ་གསུམ་གྱི་ལམ་གྱི་རིམ་པ་རྣམས་ཉམས་སུ་བླང་བར་བགྱིའོ། །ཞེས་ལན་གསུམ་སོགས་དོན་དྲན་བཞིན་པས་བརྗོད། གཉིས་པ་ལ་གཉིས། བསམ་པ་དང་། སྦྱོར་བས་བསྟེན་ཚུལ་ལོ། །དང་པོ་ལ་གཉིས། རྩ་བ་དད་པ་སྦྱང་བ་དང་། བཀའ་དྲིན་དྲན་པའི་སྒོ་ནས་གུས་པ་བསྐྱེད་པའོ། །དང་པོ་ནི། རྒྱུད་ལས། སློབ་དཔོན་གྱི་ནི་ཡོན་ཏན་བཟུང་། །སྐྱོན་ནི་ནམ་ཡང་བཟུང་མི་བྱ། །ཡོན་ཏན་བཟུང་ན་དངོས་གྲུབ་ཐོབ། །སྐྱོན་རྣམས་བཟུང་ན་དངོས་མི་འགྲུབ། །ཅེས་གསུངས་པ་ལྟར། བླ་མ་ལ་དད་པ་སྐྱེ་བ་ལ་ཐོག་མར་དེ་ལ་སྐྱོན་རྟོག་གི་བློ་འགོག་དགོས་ཏེ། དེ་མ་བཀག་ན་དད་པ་ཚུལ་བཞིན་དུ་མི་སྐྱེ་ལ། དེ་མ་སྐྱེས་ན་རང་ལ་ཚེ་འདི་ཕྱི་ཐམས་ཅད་དུ་ལེགས་ཚོགས་འབྱུང་བའི་སྒོ་འགགས་ནས་འདུག་ཅིང་། ཁྱད་པར་ཚེ་ཕྱི་མ་རྣམས་སུ་ནི་དགེ་བའི་བཤེས་གཉེན་དང་འཕྲད་པའི་སྐལ་དང་བྲལ་ནས་ངན་འགྲོར་ལྟུང་བར་འགྱུར་བའི་ཕྱིར་རོ། །དེས་ན་རང་ལ་ཆོས་སྟོན་པའི་བླ་མས་མཚོན་ནས་ཆོས་འབྲེལ་ཡོད་པ་རྣམས་ལེགས་པར་གསལ་བཏབ་སྟེ། བླ་མ་དེ་དག་གི་ངོས་ནས་སྐྱོན་ཡོད་དམ་མེད་ཀྱང་བླའི། རང་ངོས་ནས་སྐྱོན་ལྟར་སྣང་བའི་ཆ་རྣམས་བློ་ངོར་འཆར་བཅུག་ལ། ག་རེ་བདག་གི་བླ་མ་འདི་ལ་སྐྱོན་འདི་དག་ཡོད་ནས་སྣང་ངམ། མེད་བཞིན་དུ་སྣང་སྙམ་དུ་རྟོག་གོ །དེའི་ཚེ་འདི་སྙམ་དུ་བདག་ནི་ལས་མ་དག་པའི་དབང་གིས་འདི་དག་ལ་སྐྱོན་ཡོད་པ་ལྟར་སྣང་གི །བླ་མ་སངས་རྒྱས་འདི་ལ་སྐྱོན་ག་ལ་སྲིད་སྙམ་དུ་ལེགས་པར་བསམ། སྐྱོན་མེད་ནས་སྣང་མི་སྲིད་སྙམ་ན། དེ་ནི་སྲིད་དེ། དཔེར་ན། འཁྲུལ་པའི་ཤེས་ངོར་དུང་དཀར་སེར་པོ། གངས་རི་སྔོན་པོར་སྣང་བ་སོགས་དང་། སྐྱོན་ཀུན་ཟད་ཀྱི་སངས་རྒྱས་དེ་ཉིད་ཀྱང་ལེགས་སྐར་མུ་སྟེགས་བྱེད་སོགས་ལ་སྐྱོན་ཅན་དུ་སྣང་བ་བཞིན་ནོ་སྙམ་དུ་བསམ། དེ་ལྟར་སྐྱོན་རྟོག་གི་བློ་བཀག་ནས་དད་པ་ལ་སྦྱང་དགོས་ཏེ། དད་པ་རྣལ་མ་སྐྱེས་ན་བཤེས་གཉེན་ཚུལ་བཞིན་དུ་བསྟེན་པ་འབྱུང་བར་མ་ཟད། དངོས་གྲུབ་ཀྱི་རྩ་བ་བླ་མ་ཡིན་པ་དེ་བཞིན་དུ་དད་པ་ཡང་བདེ་ལེགས་ཐམས་ཅད་ཀྱི་རྩ་བར་གསུངས་པའི་ཕྱིར་རོ། །དེས་ན་བླ་མ་དེ་ལ་མཁས་བཙུན་བཟང་གསུམ་གྱི་ཡོན་ཏན་ཁྱད་པར་ཅན་ཡོད་ན་ལྟ་ཅི། ཐ་ནའང་དངོས་ཞེན་ཆུང་བ་ཀློག་འཛིན་བཟང་བ་སོགས་ཡོན་ཏན་ཕྲན་ཚེགས་ཡོད་པ་རྣམས་གསལ་བཏབ་སྟེ། བདག་གི་བླ་མ་ལ་ཡོན་ཏན་འདི་ལྟ་བུ་ཡོད་སྙམ་དུ་ཡང་ཡང་བསམས་ནས་སངས་རྒྱས་དང་འདྲ་བར་དད་པ་ཤུགས་ཅན་བསྐྱེད། གཉིས་པ་བཀའ་དྲིན་དྲན་ནས་གུས་པ་བསྐྱེད་པ་ནི། སྤྱིར་ནམ་མཁའ་དང་སེམས་ཅན་གྱི་ཁམས་ལ་མཐའ་མེད་པ་དེ་བཞིན་དུ། སངས་རྒྱས་བཅོམ་ལྡན་འདས་དཔག་ཏུ་མེད་པ་དག་སྲིད་ནའང་། དེ་རྣམས་ཀྱི་རང་བཞིན་གྱི་སྐུ་དངོས་ནི་བདག་ཅག་ལྟ་བུ་སྐལ་བ་དམན་པའི་མཐོང་ཡུལ་དུ་འགྱུར་བ་མིན་ལ། གལ་ཏེ་འགྱུར་སྲིད་ནའང་དགེ་བའི་བཤེས་གཉེན་འདིས་ནི་རྒྱལ་བའི་གདུང་འཚོབ་ཀྱི་རྣམ་པས་བདག་ལ་ཆོས་ཀྱིས་ཕན་བཏགས་པ་ལས་ལྷག་པའི་དོན་མཛད་རྒྱུ་མི་འདུག་པས། རང་ངོས་ནས་བླ་མ་འདི་ནི་སངས་རྒྱས་དེ་དག་ལས་ཀྱང་བཀའ་དྲིན་བླ་ལྷག་ཏུ་ཆེ་བར་ངེས། ཆོས་བསྟན་པའི་དོན་བཞིན་རང་གིས་བསྒྲུབ་ནུས་ན་སངས་རྒྱས་ཀྱི་གོ་འཕང་ཀྱང་སྟེར་བའི་ཕྱིར་བཀའ་དྲིན་འདི་ནི་སྟོང་གསུམ་གསེར་གྱིས་བཀང་ཡང་གཞལ་ནུས་པ་མིན་ནོ་སྙམ་དུ་བསམ་པའི་ཚུལ་གྱིས་གུས་པ་བསྐྱེད་དོ། །གཉིས་པ་སྦྱོར་བས་བསྟེན་ཚུལ་ནི། བསྡུ་ན་བླ་མ་མཉེས་པ་ནི་སྒོ་དུ་མ་ནས་བསྒྲུབ་ཅིང་། མི་མཉེས་པ་ཅུང་ཟད་ཀྱང་མི་བསྒྲུབ་པར་ཁྲུས་དང་སྐུ་མཉེ་དྲིལ་ཕྱིས་སོགས་མུས་ཀྱིས་བཀུར་ཞིང་ངག་གིས་བསྟོད་པ་དང་། ཅི་གསུང་བཀའ་བཞིན་དུ་བསྒྲུབ་པར་བྱ། དེ་ལྟར་མི་ནུས་ནའང་ཇི་སྙམ་དུ་མི་འཇོག་པར་ཤད་སྦྱང་ལེགས་པར་བྱ་བ་ལ་འབད། གཙོ་བོར་སྒྲུབ་པའི་མཆོད་པས་མཉེས་པར་བྱ་དགོས་ཀྱང་། རང་ཉིད་ཀྱི་ཚོགས་བདེ་བླག་ཏུ་རྫོགས་པ་སོགས་ཀྱི་དགོས་པ་ཁྱད་པར་ཅན་ཡོད་པས་ན་ཟང་ཟིང་གི་དངོས་པོ་གྱ་ནོམ་པ་སོགས་ཀྱིས་མཆོད་པར་བྱའོ། །བླ་མ་དངོས་སུ་བསྟེན་བཞིན་པའི་ཚེ་དེ་ལྟར་བྱ་དགོས་ལ། རང་ཉིད་གཅིག་པུ་ལྟ་བུས་ཉམས་སུ་ལེན་པའི་སྐབས་ཡིན་ན། བསྙེན་བཀུར་སྤྱི་དང་ཁྱད་པར་ཁྲུས་སོགས་དངོས་སུ་མ་གྲུབ་པའི་དོད་ལྟ་བུར། དངོས་བརྒྱུད་ཀྱི་བླ་མ་ཀུན་ལ་ཐུན་མོང་དུ་ཕྱག་འཚལ་བ་དང་མཆོད་པ་སོགས་ཀྱི་ལག་ལེན་དམིགས་པས་བྱ་བ་ལ། ཐོག་མར། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་དང་ཚོགས་གཉིས་ཡོངས་སུ་རྫོགས་ཤིང་ཆོས་ཀྱི་དབྱིངས་རྣམ་པར་དག་པ་དང་། བདག་གི་དད་མོས་ཀྱི་མཐུས་ས་གཞི་རིན་པོ་ཆེའི་རང་བཞིན་བདེ་བ་ཅན་ལྟར་དག་ཅིང་ཕུན་སུམ་ཚོགས་པར་གྱུར་ཅིག །ཐམས་ཅད་དུ་ནི་ས་གཞི་དག ཞེས་སོགས་དང་། དེའི་དབུས་སུ་རིན་པོ་ཆེའི་སེང་གེའི་ཁྲི་རྩ་བརྒྱུད་ཀྱི་བླ་མའི་གྲངས་དང་མཉམ་པ་བང་རིམ་གྱི་རྣམ་པས་བཀོད་པ་མཛེས་པར་གྲུབ་པར་གྱུར་ཅིག །ཅེས་པས་ས་གཞི་གདན་ཁྲི་བཅས་གསལ་གདབ། རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་། ཞེས་སོགས་དང་། མ་ལུས་སེམས་ཅན་སོགས་ཤླཽ་ཀ་གསུམ་མམ་གཅིག་གིས་སྐྱབས་ཡུལ་རྣམས་སྤྱན་དྲངས། ཁྲུས་ཀྱི་ཁང་བ་སོགས་ཀྱིས་ཁྲུས་ཁང་བསྐྱེད། ཇི་ལྟར་བལྟམས་པ་སོགས་ཀྱིས་ཁྲུས་གསོལ། སྟོང་གསུམ་ཀུན་དུ་སོགས་ཀྱིས་དྲི་བཟང་བྱུག །སྲབ་འཇམ་ཡང་བ་སོགས་ཀྱིས་གོས་འབུལ། བདག་དང་འགྲོ་ལ་སོགས་ཀྱིས་བཞུགས་སུ་གསོལ། དེ་ནས་ཡན་ལག་བདུན་པ་འབུལ་བ་ལ། ཐོག་མར་ཕྱག་འཚལ་བ་ནི། འདྲེན་པ་མཉམ་མེད་སྟོན་པ་བཅོམ་ལྡན་འདས། ནས་རྗེའི་བར་བརྒྱུད་རིམ་གཉིས་ལམ་རིམ་གསོལ་འདེབས་ལྟར་ལ། ལྷག་མ་ནི་འཇམ་དཔལ་ཞལ་ལུང་བཞིན་ཏེ་དེར་མ་ཟིན་པ་ནི་བློ་བཟང་རྒྱ་མཚོའི་སྡེ་ཞེས་པའི་འཕྲོར། སྦྱིན་པ་རྒྱ་མཚོ་བློ་གྲོས་གཞན་ཕན་པ། །རྗེ་བཙུན་བློ་བཟང་སྦྱིན་པར་གསོལ་བ་འདེབས། །ཅེས་པ་ཕྱག་འཚལ་ལོ། །ཞེས་པར་བསྒྱུར་བ་དང་། ཇི་སྙེད་སུ་དག་སོགས་ཀྱིས་ཕྱག་འཚལ། དེ་ནས་མཎྜལ་ཚོམ་བུ་སོ་བདུན་མ་གང་ལྕོགས་དང་བདུན་མ་གང་མང་གི་རྗེས་སུ། མཆོད་ཡོན་ཕལ་ཆེར་སོགས་སམ། རྒྱལ་བ་རྒྱ་མཚོ་སོགས་ཀྱིས་ཆུ་གཉིས་ཉེར་སྤྱོད་རོལ་མོ། །འཛམ་བུ་གླིང་དང་གླིང་ཞེས་སོགས་དང་། ཞིང་འདིར་སོགས་ཀྱིས་འདོད་ཡོན་ལྔ་རྒྱལ་སྲིད་བདུན་དང་། མེ་ཏོག་དམ་པ་སོགས་ཀྱིས་བླ་ན་ཡོད་མེད་ཀྱི་མཆོད་པ་རྣམས་འབུལ། འདོད་ཆགས་ཞེ་སྡང་སོགས་ཤླཽ་ཀ་གཅིག་གིས་བཤགས་པ་བྱ། འདིར་བཤགས་པའི་ཚིག་གཞན་བརྗོད་ཀྱང་ཕུན་སུམ་ཚོགས་པར་འགྱུར་བ་ལས་མི་འགལ། ཕྱོགས་བཅུའི་རྒྱལ་བ་ནས་ཐལ་མོ་རབ་སྦྱར་གསོལ་བར་བགྱི། ཞེས་པའི་བར་གྱིས་ཡན་ལག་གཞན་དང་། དེ་ནས་ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། སོགས་ཀྱིས་བྱིན་རླབས་ཞུ། ཡང་ན། གོང་དུ་བླ་བརྒྱུད་ཀྱི་ཕྱག་འཚལ་མདོར་བསྡུས་ཞིག་དང་འདིར་གསོལ་འདེབས་རྒྱས་པ་བྱས་ཏེ་མཐར་ཡོན་ཏན་ཀུན་གྱི་སོགས་སྦྱར་ནའང་ལེགས། མཇུག་ཏུ་ཕྱག་འཚལ་བ་དང་སོགས་བསྔོ་སྨོན་ཅི་རིགས་བྱའོ། །དེ་ལྟར་ཉམས་སུ་ལེན་པའི་ཚེ་ཐུན་རིང་ཐུང་དང་གྲངས་ཀྱང་སྐབས་བསྟུན་གྱིས་བྱ། སྔ་ཕྱི་དུམ་བུར་བཅད་ཅིང་ཉམས་སུ་བླངས་ཆོག་པས་སྟན་ཐོག་གཅིག་ཏུ་དམིགས་སྐོར་ལྷག་མ་རྣམས་ཚངས་དགོས་པའི་ངེས་པ་མེད་པས་ན། དཔེ་ཆ་བཤད་སྦྱང་བྱེད་པ་ལྟར་མཇུག་གི་བར་དུ་ངེས་པར་འདོན་དགོས་པ་ཡང་མིན་ནོ། །དེས་ན་སྐབས་གང་ཡིན་གྱི་དམིགས་པ་ལ་དཔྱད་སྒོམ་གཙོ་བོར་བྱ་ཞིང་། འཇོག་སྒོམ་ཀྱང་བྱ་དགོས་པ་ཡང་ཡོད་ལ། ཤེས་ན་བྲིས་པ་ལྟར་བྱེད་པར་ཡང་མ་ངེས་སོ། །ཐུན་འཚམས་སུ་དངོས་གཞིའི་སྐབས་ཀྱི་དམིགས་རྣམ་དྲན་པ་དང་། བསག་སྦྱང་ལ་གཙོ་བོར་འབད་ཅིང་། བག་ཡོད་བསྟེན་པ། དབང་པོའི་སྒོ་སྡོམ་པ། ཟས་ཀྱི་ཚོད་རིག་པ། ནམ་གྱི་ཐུན་སྟོད་སྨད་དུ་རྣལ་འབྱོར་ལ་བརྩོན་པ་སོགས་ལ་བསླབ་པར་བྱའོ། །གཉིས་པ་དངོས་གཞི་ལ་གཉིས། དལ་འབྱོར་ལ་སྙིང་པོ་ལེན་པའི་ཕྱིར་དུ་བསྐུལ་བ་དང་། སྙིང་པོ་ཇི་ལྟར་ལེན་ཚུལ་ལོ། །དང་པོ་ལ་གསུམ། དལ་འབྱོར་ངོས་བཟུང་བ། དོན་ཆེ་བ། རྙེད་དཀའ་བར་བསམ་པའོ། །དང་པོ་ནི། ངན་འགྲོ་གསུམ་དང་ལྷ་ཚེ་རིང་པོ་བཞི་ནི་མི་མ་ཡིན་པའི་མི་ཁོམ་པ་དང་། མིར་སྐྱེས་ཀྱང་གླེན་ལྐུག ལོག་ལྟ་ཅན། མཐའ་འཁོབ་ཏུ་སྐྱེས་པ། རྒྱལ་བའི་བཀའ་མེད་པའི་སར་སྐྱེས་པ་བཞི་ནི་མིར་གྱུར་པའི་མི་ཁོམ་པ་སྟེ། དེ་དང་བྲལ་བ་ནི་དལ་བ་བརྒྱད་དོ། །སྤྱིར་མི་ཡིན་པ། ས་ཚིག་གམ་ཆོས་ཚིག་གང་རུང་གིས་ཕྱེ་བའི་ཡུལ་དབུས་སུ་སྐྱེས་པ། དབང་པོ་ཚང་བ། ལས་མཐའ་མ་ལོག་པ། གནས་ལ་དད་པ་ལྔ་རང་འབྱོར་དང་། སངས་རྒྱས་བྱོན་ནམ། དེའམ་དེའི་ཉན་ཐོས་ཀྱིས་ཆོས་སྟོན་བཞིན་པ། སྒྲུབ་པའི་བསྟན་པ་མ་ཉམས་པ། ཆོས་བསྟན་པ་ཉམས་སུ་བླངས་ནས་འབྲས་བུ་ཐོབ་པའི་རྗེས་སུ་འཇུག་པ། གཞན་གྱིས་སྙིང་བརྩེ་བར་བྱེད་པ་ལྔ་གཞན་འབྱོར་ཡིན་པས་དེ་ལྟ་བུའི་དལ་འབྱོར་རང་ལ་ཚང་མ་ཚང་དཔྱད་པའི་ཚེ། རང་ཉིད་མིར་སྐྱེས་ཤིང་དཀོན་མཆོག་དང་ལས་འབྲས་ལ་ཡིད་ཆེས་ཡོད་པ་དང་། གསུང་རབ་ལ་ཐོས་བསམ་བྱེད་ནུས་པ། དབང་བོོ་ཚང་ཞིང་འཚམས་མེད་མ་བྱས་པ། སངས་རྒྱས་འཇིག་རྟེན་དུ་བྱོན་ཅིང་དེས་ཆོས་གསུངས་པ་གནས་པ། སྦྱིན་བདག་སོགས་ཀྱིས་མཐུན་རྐྱེན་སྦྱོར་བ་ཡང་ཡོད་པས་དལ་འབྱོར་རྣམས་དོན་གྱིས་ཚང་འདུག་སྙམ་ནས་དགའ་བ་བསྒོམ་པར་བྱའོ། །གཉིས་པ་དོན་ཆེ་བར་བསམ་པ་ནི། ལྷ་ཀླུ་ལྷ་མིན་སོགས་འགྲོ་བ་གཞན་གྱི་རྟེན་ལ་མངོན་མཐོ་དང་ངེས་ལེགས་ཀྱི་རྒྱུར་འགྱུར་བའི་ལས་གསོག་པའི་ནུས་པ་མཐུ་ཆུང་ཞིང་། མིའི་རྟེན་ལ་ལས་དེ་དག་གསོག་པའི་ནུས་པ་སྟོབས་ཆེ་བ། འཛམ་བུའི་གླིང་པ་ལས་ཀྱ་ས་བ་ཡིན་པས་ལས་དཀར་ནག་གང་བསྒྲུབས་ཀྱང་སྟོབས་ཤིན་ཏུ་ཆེ། ཁྱད་པར་དལ་འབྱོར་ཚང་བའི་མིའི་ལུས་རྟེན་ལ་ནི། མངོན་མཐོ་དང་ངེས་ལེགས་ཉན་རང་གི་བྱང་ཆུབ་འམ། ཀུན་མཁྱེན་གྱི་གོ་འཕང་ཡང་བསྒྲུབས་ཕྱིན་འགྲུབ་པར་འགྱུར་བས། ཇི་སྐད་དུ། དལ་བའི་རྟེན་འདི་ཡིད་བཞིན་ནོར་ལས་ལྷག །ཅེས་གསུངས་པ་ལྟར། བདག་གི་འདི་ལྟ་བུའི་རྟེན་ཐོབ་པ་ནི་རྙེད་པ་ལེགས་པར་རྙེད་པའོ་སྙམ་དུ་དགའ་བ་ཤུགས་ཅན་བསྐྱེད། དེས་ན་རྟེན་འདི་དོན་མེད་དུ་མི་བཏང་བར་སྙིང་པོ་བླང་བའི་སྒོ་ནས་དོན་ལྡན་དུ་བྱའོ་སྙམ་དུ་ཡང་ཡང་བསམ། གསུམ་པ་རྙེད་དཀའ་བར་བསམ་པ་ལ་གསུམ། དཔེ། རྒྱུ། ངོ་བོའི་སྒོ་ནས་རྙེད་པར་དཀའ་བའོ། །དང་པོ་ནི། འདི་ལྟ་བུའི་རྟེན་ནི། ད་རེས་སྟེས་དབང་གིས་རྙེད་པ་མ་གཏོགས་ཤིན་ཏུ་རྙེད་པར་དཀའ་སྟེ། དཔེར་ན་གྱང་ལོགས་ལ་སྲན་མ་གཏོར་བའི་ཚེ་ཆགས་སྲིད་པ་དཀའ་བ་དང་། རྒྱ་མཚོ་ཆེན་པོར་གཡེང་བའི་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་དཀའ་བ་དང་། ངན་འགྲོར་འགྲོ་བ་ནི་ས་ཆེན་པོའི་རྡུལ་དང་མཚུངས་ཤིང་བདེ་འགྲོར་སྐྱེ་བ་ཐུབ་པའི་ཕྱག་སེན་གྱི་རྩེ་མོས་བཞེས་པའི་རྡུལ་དང་འདྲ་བར་དཀོན་པར་གསུངས་པ་ལྟར་རོ་སྙམ་དུ་བསམ། གཉིས་པ་ནི། སྤྱིར་བདེ་འགྲོ་ཙམ་ཐོབ་པ་ལ་ཡང་ཚུལ་ཁྲིམས་རྣམ་དག་སྣ་གཅིག་ཡན་ཆད་བསྲུང་དགོས་ཤིང་། ཁྱད་པར་དལ་འབྱོར་ཚང་བའི་རྟེན་ཐོབ་པའི་རྒྱུར་ཚུལ་ཁྲིམས་རྣམ་པར་དག་པས་གཞི་གཟུང་། སྦྱིན་སོགས་ཀྱིས་གྲོགས་བྱས། སྨོན་ལམ་དྲི་མ་མེད་པས་འཚམས་སྦྱོར་བ་སོགས་དགོས་ན། དེ་ལྟར་བསྒྲུབ་པ་དཀོན་པས་བདག་གི་སྤྱོད་པ་འདི་ལྟ་བུས་དལ་འབྱོར་ཤིན་ཏུ་རྙེད་པར་དཀའོ་སྙམ་དུ་བསམ་མོ། །གསུམ་པ་ནི། དམྱལ་བ་ལས་ཡི་དྭགས། དེ་ལས་ཀྱང་དུད་འགྲོ་ཉུང་ཞིང་། དེ་ལས་ནི་མིའི་འགྲོ་བ་ཤིན་ཏུ་ཉུང་བ་དབྱར་གྱི་སྲིན་བུའི་གྲངས་ཀྱིས་ཤེས་ལ། དལ་འབྱོར་མ་ཚང་བའི་མིའི་འགྲོ་བ་ནས་ཀྱི་ཕུང་བོོའི་ཚོད་དུ་བྱས་ན། དེ་ཚང་བ་ནི་ནས་རྡོག་གཅིག་གི་གྲངས་ཚད་ལྟར་ཤིན་དུ་དཀོན་པའོ་སྙམ་དུ་བསམ། མདོར་ན། བཞི་བརྒྱ་བ་ལས། ཕལ་མོ་ཆེར་ན་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེ་བས་སོ་སོ་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ། །ཞེས་གསུངས་པ་ལྟར། བདག་ཀྱང་དལ་འབྱོར་ཐོབ་ནས་ཆོས་མ་བསྒྲུབ་ན། ངན་འགྲོར་འགྲོ་བས་རྟེན་འདི་ལ་ད་ལྟ་ནས་ཆོས་རྣམ་དག་ཅིག་བསྒྲུབ་དགོས་སྙམ་དུ་ངེས་པ་ཤུགས་ཅན་བསྐྱེད་པར་བྱའོ། །གཉིས་པ་སྙིང་བོོ་ཇི་ལྟར་ཉམས་སུ་ལེན་པ་ལ་གསུམ། སྐྱེས་བུ་ཆུང་ངུ་དང་ཐུན་མོང་བའི་ལམ་དང་། འབྲིང་དང་ཐུན་མོང་བའི་ལམ་དང་། ཆེན་པོའི་ལམ་གྱི་རིམ་པ་ལ་བློ་སྦྱང་བའོ། །དང་པོ་ནི། ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །ཞེས་གསུངས་པ་ལྟར། འདིར་བསྟན་པའི་སྐྱེས་བུ་ཆུང་ངུའི་ལམ་ཉམས་སུ་ལེན་པ་ལ་གཉིས། འཇིག་རྟེན་ཕྱི་མ་དོན་གཉེར་གྱི་བློ་བསྐྱེད་པ་དང་། ཕྱི་མའི་བདེ་ཐབས་བསྟན་པའོ། །དང་པོ་ལ་གཉིས། འཆི་བ་མི་རྟག་པ་བསམ་པ། ངན་འགྲོའི་སྡུག་བསྔལ་བསམ་པའོ། །དང་པོ་ནི། འཆི་བ་མི་རྟག་པ་མ་བསམས་ན་ཚེ་འདིའི་སྣང་ཤས་ཀྱི་དབང་དུ་སོང་ནས་ཕྱི་མའི་བདེ་ཐབས་བསྒྲུབ་པར་མི་འགྱུར་ལ། དེ་བསམས་ན་རང་ངམ་ཤུགས་ཀྱིས་ཕྱི་མའི་དོན་དུ་ཆོས་བསྒྲུབ་པ་ལ་འཇུག་པ་འོང་བས་དེ་བསམ་པ་ལ་གསུམ། ངེས་པར་འཆི་བ། ནམ་འཆི་ཆ་མེད་པ། ཤི་བའི་ཚེ་ཆོས་མ་གཏོགས་གཞན་གྱིས་མི་ཕན་པར་བསམ་པའོ། །དང་པོ་ནི། སྔོན་བྱོན་པའི་སངས་རྒྱས་བྱང་སེམས་སྐྱེ་འཆི་ལ་དབང་ཐོབ་པ་རྣམས་ཀྱང་མྱ་ངན་ལས་འདའ་བའི་ཚུལ་བསྟན་ཅིང་། འཕགས་བོད་ཀྱི་པཎ་གྲུབ་དང་རྒྱལ་བློན་སོགས་མདོར་ན་སྔར་འདི་མ་ཤི་བར་ཚེ་ཐར་བྱ་བ་ནི་གཅིག་ཀྱང་མེད་ན། བདག་གཅིག་པུ་ལྟ་ཅི། དེ་ཡང་དུས་ངེས་པ་ཅན་གྱི་འཆི་བ་ནི་སྔགས་རྫས་སོགས་རྐྱེན་གང་གིས་ཀྱང་བཟློག་ཏུ་མེད་པས་ངེས་པར་འཆི། །སྐྱེས་ཙམ་ཉིད་ནས་ཉི་རྒས་གྲང་སོ་བཞིན་དུ་མི་སྡོད་པར་ཉིན་རེ་ཞག་རེ་བཞིན་འཆི་བདག་གི་དྲུང་དུ་རིམ་གྱིས་མྱུར་བར་འགྲོ་ཞིང་། ཚེ་ཟད་པ་ལ་གསར་སྣོན་ནི་ཅུང་ཟད་མེད་པས་ངེས་པར་འཆི། བྱིས་པའི་དུས་སུ་བསྒྲུབ་འདོད་མི་སྐྱེ་ཞིང་རྒས་པའི་ཚེ་བསྒྲུབ་མི་ནུས། བར་སྐབས་སུ་ལྟོ་གོས་སོགས་ཀྱི་ཆེད་དང་། གཉིད་ཀྱིས་གཡེངས་ནས་ཆོས་བསྒྲུབ་པའི་ལོང་མེད་བཞིན་པར་འཆི་དགོས་པར་འདུག་སྙམ་དུ་བསམ། གཉིས་པ་ནམ་འཆི་ཆ་མེད་བསམ་པ་ལ། སྤྱིར་སྒྲ་མི་སྙན་པ་མ་གཏོགས་གཞན་རྣམས་ལ་ཚེ་ཚད་བཤད་པ་ལྟར་ཐུབ་པའི་ངེས་པ་མེད་ཅིང་། ཁྱད་པར་འཛམ་བུའི་གླིང་བ་རྣམས་ནི་བསྐལ་བ་དང་པོའི་དུས་སུ་ཚེ་ལོ་དཔག་ཏུ་མེད་ལ། མཐར་ཚེ་ལོ་བཅུ་ལ་ཐུག་གི་བར་དུ་འགྱུར་བས་ཤིན་དུ་ཡང་མ་ངེས། ད་ལྟ་རང་ལས་རྒས་གཞོན་མང་པོ་ཞིག་ཀྱང་གོ་རིམ་མ་ངེས་པར་ཤི་བ་ནི་མངོན་སུམ་དུ་གྱུར་པས་ནམ་འཆི་ཆ་མེད། ཕྱིའི་དགྲ་གདོན་མེ་ཆུ་སོགས་དང་། ནང་གི་འབྱུང་བ་འཁྲུགས་པའི་ནད་སོགས་འཆི་རྐྱེན་ནི་ཤིན་དུ་མང་ལ། གསོན་རྐྱེན་ཟས་སྨན་མི་འཕྲོད་པ་དང་ལོངས་སྤྱོད་སོགས་ལ་བརྟེན་ནས་འཐབ་རྩོད་ལྟ་བུས་ཀྱང་འཆི་བས་ནམ་འཆི་ཆ་མེད། ས་ཆེན་པོ་འདི་རི་རབ་དང་བཅས་པའང་འཇིག་པར་འགྱུར་སྲིད་ན། བདག་གི་ལུས་ཕྲན་བུ་འདི་ཕྱི་ནང་གི་རྐྱེན་ཅུང་ཟད་ཙམ་གྱིས་ཀྱང་འཆི་བར་འགྱུར་བས་དེ་རིང་རང་མི་འཆི་བའི་ངེས་པ་མེད་པས་ནམ་འཆི་ཆ་ག་ལ་ཡོད་སྙམ་དུ་བསམ། གསུམ་པ་ཤི་བའི་ཚེ་ཆོས་མ་གཏོགས་གཞན་གྱིས་མི་ཕན་པ་ནི། འཇིག་རྟེན་ཕ་རོལ་ཏུ་འགྲོ་བའི་ཚེ། གཉེན་གྲོགས་སོགས་གཅིག་ཀྱང་འཁྲིད་ས་མེད། ནོར་གྱི་ཕུང་པོ་ཡོད་ཀྱང་རྡུལ་ཙམ་ཡང་འཁྱེར་དུ་མེད། ཚེ་འདིའི་ཕུན་ཚོགས་གཞན་ལྟ་ཅི། རང་གི་ལུས་འདི་ཉིད་ཀྱང་མལ་དུ་ཅམ་གྱིས་བཞག་ནས་རྣམ་ཤེས་གཅིག་པུ་འཇིག་རྟེན་ཕ་རོལ་ཏུ་འགྲོ་བའི་ཚེ། ཕན་པ་ནི་དམ་པའི་ཆོས་ལས་གཞན་མི་འདུག་སྙམ་དུ་ཡང་ཡང་བསམ་སྟེ། ངེས་པར་ད་ལྟ་ཉིད་ནས་ཆོས་འབའ་ཞིག་བྱ་བར་ཐག་གཅད་པར་བྱའོ། །གཉིས་པ་ངན་འགྲོའི་སྡུག་བསྔལ་བསམ་པ་ནི། མགོན་པོ་ཀླུ་སྒྲུབ་ཀྱིས། རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གིས་རིང་བ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །ཞེས་གསུངས་པ་ལྟར་ངན་འགྲོའི་སྡུག་བསྔལ་བསམ་དགོས་ཏེ། མ་བསམས་ན་དེའི་རྒྱུ་ལས་མི་ལྡོག་ཅིང་། དེ་མ་ལོག་ན་ནི་སྡུག་བསྔལ་མྱོང་བ་ལས་མ་འདས་པས་སོ། །དེས་ན་ངན་འགྲོའི་སྡུག་བསྔལ་བསམས་ན་དེ་ལ་སྐྲག་པ་འབྱུང་ཞིང་བྱུང་ན་དེའི་རྒྱུ་ལ་འཛེམ་པ་འོང་བས་དེ་ཟློག་པའི་ཐབས་སྐྱབས་འགྲོ་སོགས་ལ་འབད་པར་འགྱུར་བ་སོགས་ཀྱི་དགོས་པ་མང་བས་ན་བསམ་ཚུལ་ནི། དེ་ལྟར་འཆི་བ་ཞིག་ངེས་པར་འོང་ལ། ཤི་བའི་འོག་ཏུ་རྒྱུན་ཆད་ནས་མི་འགྲོ་བས་འགྲོ་བ་གཉིས་གང་རུང་ཞིག་ཏུ་སྐྱེ་བ་ལེན་པར་འགྱུར་རོ། །དེ་ཡང་དགེ་བའི་ལས་ཀྱིས་བདེ་འགྲོ་དང་མི་དགེ་བའི་ལས་ཀྱིས་ངན་འགྲོར་སྐྱེ་བར་ངེས་པས། བདག་གིས་ནི་ངན་འགྲོའི་རྒྱུ་མི་དགེ་བ་རྒྱལ་བོོའི་བང་མཛོད་ལྟར་མང་དུ་བསགས་ཤིང་གསོག་བཞིན་པར་འདུག་ལ། བདེ་འགྲོའི་རྒྱུ་དགེ་བ་གདེང་ཁེལ་སྣ་གཅིག་ཀྱང་བསགས་པ་མི་སྣང་། དེས་ན་ངན་སོང་དུ་སྐྱེ་བ་ལས་འོས་མི་འདུག་པས། དེར་སྐྱེས་པའི་ཚེ་སྡུག་བསྔལ་མྱོང་ཚུལ་ནི་གཞན་གྱི་སྡུག་བསྔལ་ལ་ཕར་བལྟ་བ་ལྟ་བུའི་ཤེས་པ་ཁ་ཕྱིར་བལྟས་ཀྱིས་རང་གི་རྒྱུད་ཐོག་ཏུ་ཁེལ་དཀའ་བས་ན། སྡུག་བསྔལ་དེ་རང་ཉིད་ཀྱིས་མྱོང་བར་བསམ་པར་བྱའོ། །འདི་ལ་གསུམ། དམྱལ་བ། དུད་འགྲོ། ཡི་དྭགས་ཀྱི་སྡུག་བསྔལ་བསམ་པའོ། །དང་པོ་ལ། ཚ་དམྱལ་འཁོར་བཅས་དང་། གྲང་དམྱལ་གྱི་སྡུག་བསྔལ་བསམ་ཚུལ་ལོ། །དང་པོ་ནི། སྤྱིར་དམྱལ་བ་རྣམས་ཀྱི་སྡུག་བསྔལ་རིམ་གྱིས་མྱོང་དགོས་པ་མིན་ནའང་། འདིར་རིམ་པར་བསྒོམས་ན་མྱོང་བ་ཐོན་པ་ལ་ཁྱད་ཆེ་བས་དེ་ལྟར་དུ་བསམ་པ་ནི། ཚ་དམྱལ་བརྒྱད་ཀའི་འོག་ཐམས་ཅད་ལྕགས་བསྲེགས་ཀྱིས་གཞི་ལོགས་ལྕགས་བསྲེགས་ཀྱི་ར་བ། སྟེང་འོག་ཕྱོགས་འཚམས་ཐམས་ཅད་དུ་མེ་ལྕེ་འབར་བས་ཁྱབ་པར་མཚུངས་པས། དེ་འདྲ་ཞིག་གི་ནང་དུ་རང་ཉིད་ད་ལྟ་སྐྱེས་པར་མོས་ཏེ། བརྒྱད་ཀྱི་དང་པོ་ཡང་སོས་ནི། དམྱལ་བ་དེར་སྐྱེས་པའི་ཚེ་རང་དང་འདྲ་བའི་སེམས་ཅན་མང་པོ་དེར་ཚོགས་ཏེ་ཕན་ཚུན་གཅིག་ལ་གཅིག་གིས་ཞེ་སྡང་དྲག་པོས་མཚོན་ཆ་སྣ་ཚོགས་བསྣུན་པ་ལ་བརྟེན་ནས། ལུས་ཚལ་པ་དུ་མར་སོང་སྟེ་ས་ལ་འགྱེལ་ནས་སྡུག་བསྔལ་མྱོང་བ་ན། ནམ་མཁའ་ལས་ཁྱེད་རྣམས་ཡང་སོས་པར་གྱུར་ཅིག་ཅེས་པའི་སྒྲ་བྱུང་བ་དང་། ཡང་སྔར་བཞིན་སོས་ཏེ་ཕན་ཚུན་མཚོན་བསྣུན་པ་སོགས་ཀྱིས་སྡུག་བསྔལ་ཁོར་ཡུག་ཏུ་མྱོང་བར་བསམ། ཐིག་ནག་ནི། དེ་ནས་བྲོས་པས་དམྱལ་བའི་སྲུང་མ་དག་གིས་བཟུང་ནས་ས་གཞི་ལ་གན་རྐྱལ་དུ་བསྐྱེལ་ཏེ་ལུས་ལ་ཐིག་བརྒྱད་སོགས་བཏབ་ནས་མཚོན་རྣོན་པོས་དེ་བཞིན་དུ་གཤེགས་པར་བྱེད། བསྡུས་འཇོམས་ནི། ཡང་བྲོས་པས་དམྱལ་སྲུང་རྣམས་ཀྱིས་རིར་ལུག་གླང་སེང་གདོང་ལྟ་བུའི་རི་གཉིས་བརྡབ་པའི་བར་དུ་བཅུག་ནས་བཙིར་བས་དབང་པོའི་སྒོ་ཐམས་ཅད་ནས་ཁྲག་གི་རྒྱུན་དམར་ཆལ་གྱིས་འབབ་པར་བྱེད། ངུ་འབོད་ནི། ཡང་བྲོས་བས་ལྕགས་ཀྱི་ཁང་བ་ཞིག་ཏུ་སླེབ་པ་ན་སྒོ་དབྱེར་མེད་དུ་འགྲིག་སྟེ་ཕྱོགས་ཀུན་ནས་མེ་ལྕེ་འབར་བས་བསྲེག་ཅིང་ད་འཕྲོགས་ཡང་མི་འདུག་སྙམ་ནས་ངུ་འབོད་ལྷང་ལྷང་བྱེད། ངུ་འབོད་ཆེན་པོ་ནི། ཡང་བྲོས་པ་ན་ལྕགས་ཁང་ཉིས་རིམ་དུ་ཆུད་དེ་སྔ་མ་བཞིན་བསྲེག་ཅིང་། ལྕགས་ཁང་ནང་མ་ནས་ཐོན་སྲིད་ཀྱང་ཕྱི་མ་ནས་མི་ཐོན་པའི་དབང་གིས་ངུ་འབོད་ཆེན་པོ་བྱེད། ཚ་བ་ནི། ཡང་བྲོས་པ་ན་སྲུང་མས་ལྕགས་ཀྱི་གསལ་ཤིང་མེ་འབར་བས་འཕོང་ནས་སྤྱི་བོའི་བར་དུ་ཕུག་པས་སྒོ་ཐམས་ཅད་ནས་མེ་འབར་བ་དང་ཁྲོ་ཆུ་ཁོལ་མའི་ནང་དུ་འཚོད་པར་བྱེད། རབ་ཏུ་ཚ་བ་ནི། ཡང་བྲོས་པས་སྲུང་མ་རྣམས་ཀྱིས་རབ་ཏུ་འབར་བའི་གསལ་ཤིང་རྩེ་གསུམ་པས་འཕོང་ནས་ཕུག་སྟེ་རྩེ་མོ་དབུས་མ་སྤྱི་བོ་དང་གཡས་གཡོན་གཉིས་ཕྲག་པ་ནས་ཐོན་པ་དང་། ལྕགས་བསྲེགས་ལེབ་མོས་ལུས་ལ་སྣམ་བུ་ལྟར་དཀྲེ་ཞིང་ཁྲོ་ཆུ་ཁོལ་མའི་ནང་དུ་ཀེང་རུས་ལ་ཐུག་གི་བར་འཚོད་པར་བྱེད། མནར་མེད་ནི། ཡང་བྲོས་པས་ཕྱོགས་བཞི་ནས་མེའི་ཤུགས་འོང་ནས་འཚིག་སྟེ། ཤ་རྒྱུས་རུས་པ་རྣམས་བཤིག་ནས་མར་མེའི་སྙིང་པོ་བཞིན་དུ་ལུས་ཐམས་ཅད་མེ་ལྕེ་འབར་བས་ཁྱབ་ཅིང་། སྨྲེ་སྔགས་འདོན་པས་སེམས་ཅན་དུ་འདུ་ཤེས་པ་ཙམ་དང་། གཞན་ཡང་ལྕགས་ཀྱི་ཐུ་ལུམ་འབར་བ་ཁར་འཇུག་པ་སོགས་ཀྱིས་སྡུག་བསྔལ་དཔག་མེད་མྱོང་བ་རྣམས་ཡང་དང་ཡང་དུ་བསམས་པའི་ཚུལ་གྱིས་སྙིང་ཐག་པ་ནས་འཇིགས་ཞུམ་ཞུམ་པ་ཞིག་འོང་བར་བྱ། དེ་ལྟ་བུའི་སྡུག་བསྔལ་དེ་ཡང་རྒྱུན་ཐུང་ངུ་ཙམ་མ་ཡིན་པར། མིའི་ལོ་ལྔ་བཅུ་ལ་རྒྱལ་ཆེན་རིགས་བཞི་པའི་ཉིན་ཞག་གཅིག །དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བྱས་པའི་ལོ་ལྔ་བརྒྱ་ནི་རྒྱལ་ཆེན་བཞི་པའི་ཚེ་ཚད་དང་། དེ་ཐམས་ཅད་བསྡོམས་པ་ལ་ཞག་གཅིག །དེ་སུམ་ཅུ་ལ་ཟླ་བ། དེ་བཅུ་གཉིས་ལ་ལོར་བྱས་པའི་རང་ལོ་ལྔ་བརྒྱ་ནི། ཡང་སོས་པའི་ཚེ་ཚད་ཡིན་ཞིང་། དེ་བཞིན་དུ་མི་ལོ་བརྒྱ། ཉིས་བརྒྱ། བཞི་བརྒྱ། བརྒྱད་བརྒྱ། སྟོང་དྲུག་བརྒྱ་ལ་ཞག་གཅིག་ཏུ་བྱས་ནས་ལོ་སྟོང་། ཉིས་སྟོང་། བཞི་སྟོང་། བརྒྱད་སྟོང་། ཁྲི་དྲུག་སྟོང་ནི་རིམ་པ་བཞིན་སུམ་ཅུ་རྩ་གསུམ་པ་ནས་གཞན་འཕྲུལ་དབང་བྱེད་པའི་བར་གྱི་ཚེ་ཚད་ཡིན་ལ། ལྷའི་ཚེ་དེ་དག་རིམ་པ་བཞིན་དུ་ཐིག་ནག་ནས་ཚ་བའི་བར་གྱི་ཞག་གཅིག་རེར་བྱས་ནས་ལོ་སྟོང་ནས་ཁྲི་དྲུག་སྟོང་གི་བར་ཐུབ། རབ་ཏུ་ཚ་བ་བར་བསྐལ་བྱེད་དང་མནར་མེད་ནི་བར་གྱི་བསྐལ་བ་གཅིག་གི་བར་དུ་སྡུག་བསྔལ་མྱོང་བའི་ཚུལ་བསམ་ཞིང་། དམྱལ་བ་བརྒྱད་ཀྱི་ནང་གི་ཚེ་ཐུང་ཤོས་ཡང་སོས་པའི་ཚེ་ཚད་ནི་ལོ་ཁྲག་ཁྲིག་གཅིག་ཐེར་འབུམ་ཆེན་པོ་དྲུག་ཐེར་འབུམ་གཉིས་ཏེ། ལྷག་མ་རྣམས་བརྒྱད་འགྱུར་གྱིས་རིང་བས། ད་ལྟ་མེ་སྟག་ལྟ་བུས་ཚ་བའི་སྡུག་བསྔལ་རྒྱུན་ཐུང་དུ་བྱུང་བ་ཙམ་ཡང་མི་བཟོད་ན། སྔར་ལྟར་སྡུག་བསྔལ་ཤིན་དུ་ཆེ་ཞིང་རྒྱུན་རིང་བ་དེ་ཇི་ལྟར་བཟོད་སྙམ་དུ་བསམ། དེ་ནས་དམྱལ་བ་བརྒྱད་པོ་དེ་དག་རེ་རེ་ལ་ཡང་རྩིག་ངོས་བཞི་བཞི་དང་སྒོ་བཞི་ཡོད་ལ། དེ་དག་གི་ཕྱི་རོལ་ཏུ་ལྕགས་ཀྱི་ར་བས་བསྐོར་ཞིང་དེ་ལ་ཡང་སྒོ་བཞི་བཞི་ཡོད་པའི་སྒོ་རེ་རེ་ན། མེ་མ་མུར་གྱི་འོབས་སོགས་འཁོར་གྱི་དམྱལ་བ་བཞི་བཞི་ཡོད་པ་ལས། སྒོའི་ཐད་སོར་མེ་མ་མུར་གྱི་འོབས་དང་དེ་ནས་རིམ་པ་བཞིན་དུ་རོ་མྱགས་ཀྱི་འདམ་དང་། སྤུ་གྲིའི་ལམ་སོགས་དང་། ཆུ་ཀླུང་རབ་མེད་རྣམས་ན་སྡུག་བསྔལ་གྱི་ཁྱད་པར་དཔག་མེད་མྱོང་བའི་ཚུལ་བསམ། གཉིས་པ་གྲང་དམྱལ་ནི། གྲང་དམྱལ་བརྒྱད་ཀའི་གནས་ཀྱི་འོག་ཁ་བའི་ཐང་དང་འཁྱག་རོམ། མཐའ་གངས་རིའི་ཕྲེང་བ། ནང་མུན་པས་ཁྱབ་ཅིང་ཁ་བ་རླུང་དང་འཐབ་པའི་བུ་ཡུག་འཚུབ་པར་འདྲ་བས་དེའི་ནང་དུ་རང་ཉིད་སྐྱེས་ཡང་བསམ། དང་པོ་ཆུ་བུར་ཅན་ནི། ལུས་ལ་ཁ་བའི་བུ་ཡུག་ཆེན་པོ་རླུང་གི་ཕྱོགས་ཀུན་ནས་བཏབ་པས་ཆུ་བུར་འབྱུང་ཞིང་འཁུམས་པའི་སྡུག་བསྔལ་མྱོང་བར་བསམ། ཆུ་བུར་རྡོལ་བ་ནི། དེ་ལས་ཀྱང་གྲང་ནས་ཆུ་བུར་རྡོལ་ཏེ་རྣག་ཁྲག་སོགས་འཛག །ཨ་ཆུ་ཟེར་བ་ནི། དེ་ལས་གྲང་ནས་སྐད་གདངས་དྲག་པོས་དེ་ལྟར་དུ་འདོན། ཀྱི་ཧུད་ཟེར་བ་ནི། དེ་བས་ཀྱང་གྲང་ནས་སྐད་ཀྱི་ཕུགས་ནས་གདེངས་དེ་སྐད་འདོན། སོ་ཐམ་ཐམ་པ་ནི། སྔར་ལས་ཀྱང་གྲང་ནས་སྐད་འདོན་མི་ནུས་པར་སོ་ཐམ་ཐམ་ཕྱེད། ལ་ལྟར་གས་པ་ནི། དེ་ལས་ཀྱང་གྲང་ནས་ལུས་ཀྱི་མདོག་སྔོན་པོར་གྱུར་ཏེ་ཁ་ལྔའམ་དྲུག་ཅུ་གས། པདྨ་ལྟར་གས་པ་ནི། དེ་བས་ཀྱང་གྲང་ནས་ཤའུ་དམར་ཧུ་རེ་བར་གྱུར་ནས་ཚལ་པ་བཅུ་སོགས་སུ་གས། པདྨ་ཆེན་པོ་ལྟར་གས་པ་ནི། དེ་ལས་ཀྱང་ཤིན་དུ་གྲང་ནས་ལུས་ཀྱི་མདོག་དམར་པོར་གྱུར་ཏེ་ཁ་བརྒྱའམ་དེ་ལས་མང་དུ་གས་པའི་སྡུག་བསྔལ་དཔག་མེད་མྱོང་བར་བསམ། ཡུན་ཚད་ནི། ཏིལ་གྱི་སྦྱར་མ་གཉིས་བྲེ་བོ་ཆེའི་ཁལ་བརྒྱད་ཅུ་བ་ཞིག་ཏིལ་གྱིས་བྱུར་བུར་བཀང་སྟེ། ལོ་བརྒྱ་བརྒྱ་ནས་ཏིལ་རེ་རེ་བྱུང་བས་ཏིལ་དེ་མ་ལུས་པར་ཟད་པའི་ཡུན་ནི། ཆུ་བུར་ཅན་གྱི་ཚེ་ཚད་དང་། གཞན་རྣམས་སྔ་མ་ལས་ཕྱི་མ་ཉི་ཤུ་ཉི་ཤུས་རིང་བར་གསུངས་པས། ད་ལྟ་དགུན་གྱི་ལྷག་པ་ཤིན་དུ་གྲང་བའི་ནང་དུ་གཅེར་བུར་རིང་དུ་གནས་པ་ལྟ་ཅི། ཅུང་ཟད་གནས་ནའང་གྲང་བའི་སྡུག་བསྔལ་བཟོད་དཀའ་ན། སྔར་གྱི་སྡུག་བསྔལ་ཆེས་ཡུན་རིང་བ་དེ་ཇི་ལྟར་བཟོད་སྙམ་དུ་རང་རྒྱུད་ལ་བཀར་ནས་བསམ། གཞན་ཡང་དམྱལ་བ་གཉིས་ཀྱི་འཁོར་དང་མིའི་ཡུལ་དང་མཚོ་འགྲམ་སོགས་ན་ཉེ་ཚེ་བའི་དམྱལ་བ་ཐག་པ་དར་གཏུན་དང་ཕྱག་མ་དང་ཀ་བ་དང་རྩིག་པ་དང་ཕྲུ་ཆེན་ལ་སོགས་པའི་དབྱིབས་ཅན་ཡོད་པར་བཤད་པ་རྣམས་ཀྱི་སྡུག་བསྔལ་ཡང་བསམ་མོ། །གཉིས་པ་དུད་འགྲོ་ནི། དབྱིངས་ན་གནས་པ་ནི་ཆུ་མཚམས་མན་ཆད་ཀྱི་ཁོངས་སུ་འབྲུའི་ཕུང་བོོ་ལྟར་སྤུངས་ནས་ཡོད་ཅིང་། ཆེ་བས་ཆུང་བ་དག་ཟ་ཞིང་ཆུང་བས་ཆེ་བའི་ལུས་འབིག་པ་དང་། མུན་ནག་འཐིབ་པོར་རང་གི་རྐང་ལག་བརྐྱང་བསྐུམ་ཙམ་ཡང་མི་མཐོང་ཞིང་གཅིག་གིས་གཅིག་མནན་པའི་སྡུག་བསྔལ་དང་། ཀླུའི་རིགས་ལ་བྱེ་ཚན་དང་ནམ་མཁའ་ལྡིང་གི་འཇིགས་པ་དང་། བྱ་དང་རི་དྭགས་སོགས་སུ་སྐྱེས་ན་རྔོན་པ་སོགས་ཀྱིས་གཙེས་པ་དང་། རྟ་གླང་བོང་བུ་སོགས་ལ་བཀོལ་སྤྱད་བརྡེག་པ་སོགས་ཀྱི་སྡུག་བསྔལ་ཡོད་ཚུལ་རྣམས་བསམ། མདོར་ན་ད་ལྟར་ང་ལ་གཞན་གྱིས་བརྡེག་པའི་སྡུག་བསྔལ་ཅུང་ཟད་ཀྱང་མྱོང་མི་འདོད་ན། ཕྱི་མར་བོང་བུ་ལྟ་བུར་གྱུར་ནས་གཞན་ཞིག་གིས་ཁུར་བ་ཀལ་བཞིན་པར་རྡེག་འཚོག་ཡང་ཡང་བྱེད་ན་དེའི་སྡུག་བསྔལ་ཇི་ལྟར་བཟོད་སྙམ་དུ་བསམ་པར་བྱའོ། །གསུམ་པ་ཡི་དྭགས་ནི། འདོད་པའི་དངོས་པོ་མཐའ་དག་གིས་དབེན་ཞིང་ཤིན་དུ་ཉམ་ང་བའི་གནས་སུ་སྐྱེས་པར་མོས་ཏེ། དེ་ལ་ཕྱིའི་སྒྲིབ་པ་ཅན་ནི་བཟའ་བཏུང་གི་རིགས་མི་རྙེད་ཅིང་། གལ་ཏེ་ཆུ་ཀླུང་དང་ལྗོན་ཤིང་འབྲས་བུ་ཅན་སོགས་མཐོང་ནས་རྩར་ཕྱིན་པ་ན་མཚོན་ཆ་ཐོགས་པའི་སྲུང་མས་འགེགས་པའམ། ཡང་ན་རྣག་ཁྲག་སོགས་སུ་མཐོང་བ་དང་། ནང་གི་སྒྲིབ་པ་ཅན ་ནི་ཁ་ཁབ་མིག་ཙམ་མགྲིན་པ་རྟ་རྔ་ཙམ་ལྟོ་བ་ཡུལ་ལྗོངས་ཙམ་ཡན་ལག་འཇག་མ་ཙམ་དུ་གྱུར་ནས། ཟས་སྐོམ་མི་རྙེད་ཅིང་རྙེད་ཀྱང་ཁར་མི་ཤོང་ལ་ཤོང་ཡང་མགྲིན་པར་མི་ཐར་ཐར་ཀྱང་ལྟོ་བ་མི་ཁེངས། ཟས་སྐོམ་གྱི་སྒྲིབ་པ་ཅན་ནི་ཟོས་ཤིང་འཐུངས་པ་རྣམས་མེར་འབར་ནས་ཁོང་པ་འཚིག་ཅིང་། མི་གཙང་བ་དང་རང་གི་ཤ་ཡང་བཅད་ཀྱིན་ཟ་བ་དང་། དབྱར་ཟླ་ཟེར་ཡང་ཚ་ལ་དགུན་ཉི་ཟེར་ཡང་གྲང་བའི་སྡུག་བསྔལ་མྱོང་ཚུལ་རྣམས་བསམ། མདོར་ན་ད་ལྟ་རང་ཟས་སྐོམ་མེད་པར་ཉིན་ཞག་གཅིག་ཀྱང་འདུག་དཀའ་ན་ཡི་དྭགས་ཞིག་ཏུ་སྐྱེས་ནས་ཟས་སྐོམ་མི་རྙེད་པའི་བཀྲེས་སྐོམ་གྱི་སྡུག་བསྔལ་རྒྱུན་རིང་དུ་མྱོང་བར་འགྱུར་བ་ཇི་ལྟར་བཟོད་སྙམ་དུ་ཡང་ཡང་བསམ། དེའི་ཕྱིར་དེ་དག་ལས་ཐར་པའི་ཐབས་ད་ལྟ་ཉིད་ནས་བསྒྲུབ་པར་བྱའོ་སྙམ་དུ་བསམ། གཉིས་པ་ཕྱི་མར་བདེ་བའི་ཐབས་ལ་གཉིས། བསྟན་པའི་འཇུག་སྒོ་སྐྱབས་འགྲོ་སྦྱང་བ་དང་། བདེ་ལེགས་ཀྱི་རྩ་བ་ལས་འབྲས་ལ་ཡིད་ཆེས་ཀྱི་དད་པ་བསྐྱེད་པའོ། །དང་པོ་ལ་གཉིས། དངོས་དང་། བསླབ་བྱའོ། །དང་པོ་ནི། གོང་དུ་བརྗོད་པའི་ངན་འགྲོའི་སྡུག་བསྔལ་དེ་རྣམས་ལས་སྐྱོབ་པའི་སྐྱབས་ཡང་དག་ཞིག་འཚོལ་དགོས་པར་འདུག་པས། དེ་ནི་ཇི་སྐད་དུ། སངས་རྒྱས་ཆོས་དང་དགེ་འདུན་ཏེ། ཐར་པ་འདོད་པ་རྣམས་ཀྱི་སྐྱབས། ཞེས་གསུངས་པ་ལྟར། སངས་རྒྱས་བཅོམ་ལྡན་འདས་དེ་སྐུ་མཚན་དཔེས་སྤྲས་ཤིང་མཐོང་ན་མི་མཐུན་པ་མེད་པ། གསུང་ཡན་ལག་དྲུག་ཅུ་རྩ་བཞི་དང་ལྡན་ཞིང་སེམས་ཅན་ཐམས་ཅད་ཀྱི་སྐད་དང་མཐུན་པའི་དྲི་བའི་ལན་འདེབས་ནུས་པ། ཐུགས་ཤེས་བྱ་མཐའ་དག་མངོན་སུམ་དུ་གཟིགས་ཤིང་སེམས་ཅན་ཐམས་ཅད་ལ་ཐུགས་རྗེས་རྒྱུན་ཆད་མེད་པར་གཟིགས་པ། འཕྲིན་ལས་འགྲོ་བའི་དོན་ལ་འབད་མེད་ལྷུན་གྲུབ་ཏུ་འཇུག་པའི་སྒོ་ནས་རྒྱུན་མི་ཆད་དུ་ཕན་འདོགས་པ། རང་འཇིགས་པ་མཐའ་དག་ལས་གྲོལ་ཞིང་གཞན་སྒྲོལ་བ་ལ་མཁས་པ་སོགས་ཀྱི་ཡོན་ཏན་དང་ལྡན་པས་སྐྱབས་སྟོན་པ་པོར་འོས། དེ་ལྟ་བུའི་སངས་རྒྱས་དེ་སྤངས་རྟོགས་ཀྱི་ཆོས་སྔ་མ་མངོན་དུ་མཛད་པ་ལས་བྱུང་བས་ལུང་གི་བརྗོད་བྱར་གྱུར་པའི་སྤངས་རྟོགས་ཀྱིས་བསྡུས་པའི་རྟོགས་པའི་ཆོས་དཀོན་མཆོག་རྣམས་སྐྱབས་དངོས་སུ་འོས། ཆོས་དཀོན་མཆོག་དེ་ཡང་སློབ་པ་འཕགས་པ་རྣམས་ཀྱིས་ཚུལ་བཞིན་དུ་བསྒྲུབ་པར་མཛད་པ་ལ་རག་ལས་པས་འཕགས་པ་དེ་རྣམས་སྐྱབས་བསྒྲུབ་པའི་ཟླ་གྲོགས་སུ་འོས་པའི་ཚུལ་རྣམས་བསམས་ཏེ། དེ་དག་གི་ཡོན་ཏན་དྲན་པའི་སྒོ་ནས་དད་པ་ཤུགས་ཅན་བྱ་ཞིང་དཔུང་གཉེན་ཞུ་འདོད་ཀྱི་བློ་དུང་དུང་བ་ཞིག་བསྐྱེད་པས། དེའི་མཐུས་ཇི་སྐད་དུ། གང་ཞིག་མོས་པ་གཙོར་བྱེད་པ། །དེའི་མདུན་ན་ཐུབ་པ་བཞུགས། །ཞེས་གསུངས་པ་ལྟར། སྐྱབས་ཡུལ་དེ་རྣམས་ཐུགས་རྗེས་དབང་གིས་མདུན་གྱི་ནམ་མཁར་མངོན་སུམ་དུ་བྱོན་བྱུང་སྙམ་དུ་བསམས་ལ། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་སྟོན་པ་མཛད་དུ་གསོལ། འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །མ་དག་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་སྐྱབས་དངོས་མཛད་དུ་གསོལ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་ཟླ་གྲོགས་མཛད་དུ་གསོལ། ཞེས་ཉེར་གཅིག་གམ་བདུན་སོགས་བརྗོད་ཅིང་འོད་ཟེར་འཕྲོ་སྦྱང་བྱ། གཉིས་པ་བསླབ་བྱ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་སུ་མི་འགྲོ་ཞིང་དེའི་སྐུ་བརྙན་རྣམས་ལའང་སངས་རྒྱས་དངོས་ཀྱི་འདུ་ཤེས། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤོང་ཞིང་ཚིག་བཞི་བ་ཡན་ལའང་ཆོས་དཀོན་མཆོག་གི་འདུ་ཤེས། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་ནམ་སྡིག་གྲོགས་དང་འདྲིས་མི་ཆེ་ཞིང་རབ་བྱུང་གི་རྟགས་ཅན་ཙམ་ལའང་དགེ་འདུན་དངོས་ཀྱི་འདུ་ཤེས་འཇོག་པ་དང་། ཅི་ཟ་ཅི་འཐུང་གི་ཕུད་ཀྱིས་མཆོད་པར་བྱའོ། །སྐྱབས་སུ་སོང་བའི་ཕན་ཡོན་ནི། ནང་བ་སངས་རྒྱས་པར་ཚུད་པ་དང་། ལས་སྒྲིབ་འདགས་པ། ཚོགས་རྫོགས་པར་འགྱུར་བ་སོགས་མང་ངོ་། །གཉིས་པ་རྩ་བ་ཡིད་ཆེས་ཀྱི་དད་པ་སྦྱང་བ་ནི། དཀོན་མཆོག་ལ་སྐྱབས་སུ་སོང་ཡང་ལས་དཀར་ནག་ལ་བླང་དོར་ཕྱིན་ཅི་ལོག་ཏུ་སྤྱད་ན་དཀོན་མཆོག་གིས་ཀྱང་སྐྱོབ་མི་ནུས་པས། ལས་དཀར་ནག་ལ་འདོར་ལེན་ཚུལ་བཞིན་དུ་བྱ་དགོས་ལ། དགེ་མི་དགེའི་ལས་ལ་ནང་གསེས་ཀྱིས་ཕྱེ་ན་རྣམ་གྲངས་མང་ཡང་། རགས་པ་རྣམས་བསྡུས་ན་དཀར་ནག་གི་ལས་ལམ་བཅུ་ཚན་གཉིས་སུ་འདུ་བས། འདི་ལ་གསུམ། ནག་པོའི་ལས་འབྲས། དཀར་པོའི་ལས་འབྲས། དེ་དག་ལ་འཇུག་ལྡོག་ཇི་ལྟར་བྱའོ། །དང་པོ་ལ་བཅུ་ལས། སྲོག་གཅོད་ནི། གཞི་རང་ལས་གཞན་པའི་སེམས་ཅན་བསམ་པའི་ཁྱད་པར་དེར་འདུ་ཤེས་ཤིང་ཉོན་མོངས་དུག་གསུམ་གང་རུང་གི་སྒོ་ནས་ཀུན་སློང་གསོད་པར་འདོད་དེ་སྦྱོར་བ་རང་ངམ་གཞན་ལ་བྱེད་དུ་བཅུག་པས་མཚོན་དུག་སོགས་ཅི་རིགས་བྱས་པའི་རྐྱེན་གྱིས་མཐར་ཐུག་རང་གི་སྔོན་དུ་ཤི་བ་ན་སྲོག་གཅོད་ཀྱི་མི་དགེ་བའི་ལས་ཀྱི་དངོས་གཞི་རྫོགས། མ་བྱིན་ལེན་ནི། གཞི་རང་མི་དབང་ཞིང་གཞན་གྱིས་བདག་ཏུ་བཟུང་བའི་གསེར་སོགས་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་འབྲལ་བར་འདོད་དེ་སྦྱོར་བ་ཐབས་སྣ་ཚོགས་ཀྱིས་བླངས་ཏེ་མཐར་ཐུག་ཐོབ་བློ་སྐྱེས་པ་ན་རྫོགས། ལོག་གཡེམ་ནི། གཞི་གཞན་གྱིས་བདག་ཏུ་བཟུང་བའམ་རང་གི་ཉེ་དུ་སོགས་བགྲོད་བྱ་མིན་པ་དང་བགྲོད་བྱ་ཡིན་ཀྱང་ཁ་དང་བཤང་ལམ་སོགས་ཡན་ལག་མིན་པ་དང་། རྟེན་གྱི་དྲུང་སོགས་གནས་མིན་པ་དང་བསྙེན་གནས་པ་སོགས་དུས་མ་ཡིན་པ་གང་རུང་ལ་དེར་འདུ་ཤེས་ཤིང་། ཉོན་མོངས་གང་རུང་གི་སྒོ་ནས་ཀུན་སློང་བགྲོད་པར་འདོད་དེ་སྦྱོར་བ་དེའི་དོན་ལ་བརྩོན་པས་མཐར་ཐུག་གཉིས་ཀྱི་གཉིས་སྤྲད་པ་སོགས་ལས་རྫོགས། རྫུན་དུ་སྨྲ་བ་ནི། གཞི་མངོན་ཤེས་སོགས་མེད་པ་ལྟ་བུ་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་འདུ་ཤེས་བསྒྱུར་ནས་སྨྲ་བར་འདོད་དེ་སྦྱོར་བ་ལུས་ངག་གང་རུང་གི་རྣམ་འགྱུར་བསྟན་པས་མཐར་ཐུག་ཕ་རོལ་བོས་དོན་གོ་བ་ན་རྫོགས། ཕྲ་མ་ནི། གཞི་གང་ཟག་གཉིས་ལྟ་བུ་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་དབྱེ་བར་འདོད་དེ་སྦྱོར་བ་འབྱེད་ནུས་ཀྱི་ཚིག་སྨྲས་པ་མཐར་ཐུག་དོན་གོ་བ་ན་རྫོགས། ཚིག་རྩུབ་ནི། གཞི་མནར་སེམས་སྐྱེ་བའི་གཞིར་གྱུར་པའི་སེམས་ཅན་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་ངག་རྩུབ་པོ་སྨྲ་བར་འདོད་དེ་སྦྱོར་བ་ཕ་རོལ་བོའི་སྐྱོན་བརྗོད་པས་མཐར་ཐུག་དོན་གོ་བ་ན་རྫོགས། ངག་ཀྱལ་ནི། གཞི་དོན་མེད་པ་དང་ལྡན་པ་ལ་དེར་འདུ་ཤེས་ཤིང་ཉོན་མོངས་གང་རུང་གི་སྒོ་ནས་ཀུན་སློང་བྱུང་རྒྱལ་དུ་སྨྲ་བར་འདོད་དེ་སྦྱོར་བ་ངག་ཀྱལ་སྨྲ་བར་རྩོམ་པས་མཐར་ཐུག་སྨྲས་ཟིན་པ་ན་རྫོགས། བརྣབ་སེམས་ནི། གཞི་གཞན་གྱི་ནོར་དང་ལོངས་སྤྱོད་ལ་དེར་འདུ་ཤེས་ཤིང་རང་ནོར་ལ་ཆགས་སེམས་དང་གསོག་སེམས། གཞན་ནོར་ལ་རོ་མྱང་སེམས་དང་འཁུ་སེམས་ངོ་ཚ་དང་ཉེས་དམིགས་ཐིལ་གྱིས་ནོན་པའི་ཆོས་ལྔ་ཉོན་མོངས་གང་རུང་གི་སྒོ་ནས་ཀུན་སློང་བདག་གིར་བྱ་བར་འདོད་དེ་སྦྱོར་བ་རང་ལ་འབྱུང་བའི་ཆེད་དུ་ཡིད་ཀྱིས་རྩོལ་བས་མཐར་ཐུག་དེར་སྨོན་ཅིང་ཐག་བཅད་པ་ན་རྫོགས། གནོད་སེམས་ནི། གཞི་ཡིད་དུ་མི་འོང་བའི་སེམས་ཅན་ལ་དེར་འདུ་ཤེས་ཤིང་གནོད་བྱེད་ཀྱི་རྒྱུ་ལ་མཚན་མར་འཛིན་པའི་ཞེ་སྡང་། གནོད་བྱེད་ལ་མི་བཟོད་པ། ཚུལ་མིན་ཡིད་ཕྱེད་དྲན་པའི་འཁན་འཛིན། བརྡེག་པ་སོགས་བྱས་ན་སྙམ་པའི་འཁུ་སེམས། ངོ་ཚ་དང་ཉེས་དམིགས་ཟིལ་གྱིས་ནོན་པའི་ཆོས་ལྔ་ལྡན་གྱི་ཉོན་མོངས་གང་རུང་གི་སྒོ་ནས་ཀུན་སློང་བརྡེག་གསོད་སོགས་བྱ་བར་འདོད་དེ་སྦྱོར་བ་དེ་བྱེད་པར་རྩོལ་ཞིང་མཐར་ཐུག་དངོས་སུ་ནུས་ན་བྱེད་པར་ཐག་བཅད་པ་ན་རྫོགས། ལོག་ལྟ་ནི། གཞི་དཀོན་མཆོག་དང་ལས་འབྲས་ལྟ་བུ་ཡོད་པའི་དོན་ལ་མེད་པར་འདུ་ཤེས་ཤིང་ཉོན་མོངས་དུག་གསུམ་གང་རུང་གི་སྒོ་ནས་ཀུན་སློང་སྐུར་བ་འདེབས་པར་འདོད་དེ་སྦྱོར་བ་བསམས་པ་ལྟར་མེད་པར་ཐག་བཅད་པ་ན་ལོག་ལྟའི་དངོས་གཞི་རྫོགས་པར་འགྱུར་ཚུལ་རྣམས་གསུམ། དེ་དག་ནང་གསེར་ཀྱི་ལྕི་ཡང་ནི། ལུས་ངག་གི་བདུན་སྔ་མ་སྔ་མ་ལྕི་ལ་ཡིད་ཀྱི་གསུམ་ཕྱི་མ་ཕྱི་མ་ལྕི། སྤྱིར་བླ་མ་དཀོན་མཆོག་ཕ་མ་སོགས་ལ་ཕན་གནོད་གང་བྱས་ཀྱང་ཞིང་གི་སྒོ་ནས་སྟོབས་ཆེ། བསམ་པ་ཤུགས་དྲག་ཅིང་རྒྱུན་རིང་པོར་བྱས་པ་དང་། ཤེས་བཞིན་གྱི་ཁྱད་གསོད་དང་སེམས་ཅན་མང་པོའི་དོན་དུ་བྱས་པ་སོགས་བསམ་པའི་སྒོ་ན་སྟོབས་ཆེ། མཆོད་སྦྱིན་རྣམ་དག་དང་སྒྲུབ་པའི་མཆོད་པ་སོགས་དངོས་པོའི་སྒོ་ནས་སྟོབས་ཆེ། སྤྱིར་སྡོམ་པ་དང་ལྡན་མི་ལྡན་གཉིས་ལས་ལྡན་པས་བྱས་པ་ནི་རྟེན་གྱི་སྒོ་ནས་སྟོབས་ཆེ་བའི་ཚུལ་སོགས་ཀྱང་ཤེས་པར་བྱ། དེ་དག་གི་འབྲས་བུ་ཇི་ལྟ་བུ་ཡིན་པ་ནི། ས་བོན་སྣ་ཚོགས་བཏབ་ཀྱང་འབྲས་བུ་མི་འཚོལ་བ་ལྟར། སྡིག་པ་ཤིན་ཏུ་ལྕི་བས་རྣམ་སྨིན་གྱི་འབྲས་བུ་དམྱལ་བ། འབྲིང་གིས་ཡི་དྭགས། ཆུང་ངུས་དུད་འགྲོར་སྐྱེ། རྒྱུ་མཐུན་གྱི་འབྲས་བུ་སྲོག་གཅོད་ཀྱིས་ཚེ་ཐུང་། མ་བྱིན་ལེན་གྱིས་ལོངས་སྤྱོད་དབུལ། ལོག་གཡེམ་གྱིས་ཆུང་མ་བསྲུང་དུ་མི་བཏུབ། རྫུན་གྱིས་མི་ཁ་སྡང་། ཕྲ་མས་མཛའ་བཤེས་ཉུང་། ཚིག་རྩུབ་ཀྱིས་མི་སྙན་པ་ཐོས། ངག་ཁྱལ་གྱིས་ཚིག་མི་བཙན། བརྣབ་སེམས་ཀྱིས་རེ་བ་མི་འགྲུབ། གནོད་སེམས་ཀྱིས་འཇིགས་སྐྲག་ཆེ། ལོག་ལྟས་ཡང་དག་པའི་དོན་ལ་རྨོངས། བདག་པོའི་འབྲས་བུ་ཡང་རིམ་པར་སྦྱར་ཏེ། གང་དུ་སྐྱེས་པ་དེར་བཟའ་བཏུང་རང་སྨན་གྱི་ནུས་པ་ཉམས། ལོ་འབྲས་ཉུང་ཞིང་སྨིན་མི་ནུས། འདམ་རྫབ་མང་། འཇིགས་སྐྲག་ཆེ། ས་ཕྱོགས་མི་སྙོམས་ཤིང་བགྲོད་དཀའ་སྡོང་དུམ་དང་ཚེར་མ་དང་རྡོ་སོགས་མང་། ལྗོན་ཤིང་ལ་འབྲས་བུ་མི་ཆགས། ཕུན་ཚོགས་འགྲིབ། དགྲ་གདོན་གྱིས་འཚེ། བཟང་ངན་གོ་ལྡོག་པར་འགྱུར་བ་ལ་སོགས་བསམ། གཉིས་པ་དཀར་བོའི་ལས་ལམ་ནི། གོང་དུ་བཤད་པ་ལྟར་མི་དགེ་བ་བཅུ་གོ་ལྡོག་པ་ནི་དགེ་བ་བཅུ་ཡིན་ལ། དགེ་བའི་ལས་ཆུང་འབྲིང་ཆེན་པོ་གསུམ་གྱིས་རྣམ་སྨིན་གྱི་འབྲས་བུ་རིམ་པ་བཞིན་དུ་མ་འདོད་ལྷ་གོང་མའི་ལྷར་སྐྱེ། རྒྱུ་མཐུན་ནི་ཚེ་རིང་བ་སོགས་དང་། བདག་འབྲས་ནི་སྨན་མཐུ་ཆེ་བ་སོགས་སྔར་ལས་ལྡོག་སྟེ་སྦྱར་བ་འབྱུང་བའི་ཚུལ་བསམ། སྦྱིན་པ་ལྟ་བུ་གཞི་ནས་མཐར་ཐུག་གི་བར་དགེ་སེམས་ཁོ་ནས་ཟིན་པ་ནི་གཅིག་ཏུ་དཀར་བའི་ལས་དང་། སྲོག་གཅོད་ལྟ་བུ་དེ་དག་སྡིག་སེམས་ཁོ་ནས་ཟིན་པ་ནི་གཅིག་ཏུ་ནག་པའི་ལས་ཡིན་ལ། དེ་བཞིན་དུ་བསམ་པའི་དབང་གིས་ལས་ནག་ལ་རྣམ་སྨིན་དཀར་བ་དང་ལས་དཀར་ལ་རྣམ་སྨིན་ནག་པ་ནི་འདྲེས་མའི་ལས། འཕེན་བྱེད་དགེ་བས་འཕངས་ལ་རྫོགས་བྱེད་མི་དགེ་བས་རྫོགས་པ་དང་མི་དགེ་བས་འཕངས་ཤིང་དགེ་བས་རྫོགས་པ། མྱོང་བར་ངེས་པ་མྱོང་བར་མ་ངེས་པ་ཚེ་འདི་ལ་མྱོང་བ་ཕྱི་མར་མྱོང་བའི་ལས་ཀྱི་ཁྱད་པར་རྣམས་བསམས་ནས་བླང་དོར་བྱེད་འདོད་བསྐྱེད་ཅིང་དཔྱད་སྒོམ་བྱ། ཁྱད་པར་རྣམ་མཁྱེན་སྒྲུབ་པའི་རྟེན་དུ་ས་ཆོད་ཆེ་བས། ཚེ་ཁ་དོག་རིགས་དབང་ཕྱུག་ཚིག་བཙན་པ་དབང་ཆེ་བ་སྐྱེས་པ་ཡིན་པ་སྟོབས་དང་ལྡན་པ་སྟེ་རྣམ་སྨིན་གྱི་ཡོན་ཏན་བརྒྱད་ལྡན་གྱི་ལུས་རྟེན་ཐོབ་པའི་ཐབས་སུ། གཞན་གྱི་སྲོག་སྐྱོབ་པ། རྟེན་ལ་མར་མེ་འབུལ་བ་ལ་སོགས་རྒྱུ་བརྒྱད་བསྒྲུབ་པ་ལ་འབད་པར་བྱའོ། །གསུམ་པ་འཇུག་ལྡོག་ཇི་ལྟར་བྱ་བ་ནི། དེ་ལྟར་ལས་འབྲས་ཀྱི་རྣམ་གཞག་ཤེས་ནས་རྒྱལ་བས་གསུངས་པ་ལ་ཡིད་ཆེས་པའི་སྒོ་ནས་དགེ་སྡིག་ལ་བླང་དོར་ལེགས་པར་བྱ། དེ་ལྟར་བྱས་ཀྱང་བག་མེད་པ་དང་ཉོན་མོངས་པའི་དབང་གིས་ཉེས་པ་བྱུང་བ་ལ་འཇིགས་པས་ཡིད་བློང་བློང་བོར་གྱུར་པ་ན། དཀོན་མཆོག་གི་རྟེན་གྱི་དྲུང་དུ་སྐྱབས་འགྲོ་དང་བྱང་ཆུབ་ཀྱི་སེམས་སྒོམ་པ་རྟེན་གྱི་སྟོབས། སྔར་བྱས་ཀྱི་སྡིག་པ་ལ་འགྱོད་པ་སུན་འབྱིན་པའི་སྟོབས། ཕྱིན་ཆད་མི་བྱེད་པ་སླར་ལྡོག་པའི་སྟོབས། ཕྱག་འཚལ་ཞིང་ཕུང་པོ་གསུམ་པ་འདོན་པ་སོགས་གཉེན་པོ་ཀུན་དུ་སྤྱོད་པའི་སྟོབས་རྣམས་ཉམས་སུ་ལེན་པ་ལ་འབད་པར་བྱའོ། །གཉིས་པ་འབྲིང་དང་ཐུན་མོང་བའི་ལམ་ལ་བློ་སྦྱོང་བ་ནི། ལམ་སྒྲོན་ལས། སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་གསུངས་པ་ལྟར་ཉམས་སུ་ལེན་པ་ལ། གོང་དུ་བརྗོད་པ་ལྟར་ཉམས་སུ་བླངས་པས་ངན་འགྲོ་ལས་ཐར་བ་ཞིག་བྱུང་ཀྱང་དེ་ཙམ་གྱིས་མི་ཆོག་གི །ལས་ཉོན་གྱི་དབང་གིས་འཁོར་བའི་གནས་སུ་ཉིང་འཚམས་སྦྱོར་བའི་བཅིངས་པ་ལས་གྲོལ་བའི་ཐར་བ་ཐོབ་པར་བྱ་དགོས་པས་འདི་ལ་གཉིས། ཐར་བ་དོན་གཉེར་གྱི་བློ་བསྐྱེད་པ་དང་། དེར་བགྲོད་པའི་ལམ་གྱི་རང་བཞིན་བཤད་པའོ། །དང་པོ་ལ་གཉིས། སྡུག་ཀུན་གཉིས་ཀྱི་སྒོ་ནས་བསམ་པ་དང་། རྟེན་འབྲེལ་བཅུ་གཉིས་ཀྱི་སྒོ་ནས་བསམ་པའོ། །དང་པོ་ལ་གཉིས། སྡུག་བསྔལ་འཁོར་བའི་ཉེས་དམིགས་དང་། ཀུན་འབྱུང་འཁོར་བའི་འཇུག་རིམ་མོ། །དང་པོ་ལ་གསུམ། ངན་འགྲོའི་སྡུག་བསྔལ་བསམས་པ་གོང་དུ་སོང་བས་ན་མི་དང་བདེ་འགྲོ་གཞན་གཉིས། རིགས་དྲུག་ཐུན་མོང་བའི་སྡུག་བསྔལ་བསམ་པའོ། །དང་པོ་ནི། ལས་ཉོན་གྱི་དབང་གིས་སྐྱེ་བ་བླངས་པ་འདི་སྐྱེ་རྒ་ན་འཆི་སོགས་སྡུག་བསྔལ་སྣ་ཚོགས་པའི་གནས་སུ་གྱུར་བ་སྟེ། དེ་ཡང་སྐྱེ་བའི་སྡུག་བསྔལ་ནི་མངལ་སྐྱེས་ལ་མཚོན་ན། མའི་མངལ་དུ་ཉིང་མཚམས་སྦྱར་ནས་བཙལ་བ་ལ་ཐུག་གི་བར་མས་བཟའ་བཏུང་ཧ་ཅང་ཚ་བ་དང་གྲང་བ་བསྟེན་པའི་རྐྱེན་གྱིས་ཚ་གྲང་གི་སྡུག་བསྔལ་དང་། འཆོང་བ་དང་བརྒྱུགས་པ་སོགས་ཀྱི་ཚེ་སྡུག་བསྔལ་སྣ་ཚོགས་མྱོང་བཞིན་པའི་ངང་ནས་ཞག་ཕྱེད་དང་སུམ་བརྒྱ་ལྷག་ཙམ་སོང་བ་ན། ལས་ཀྱི་རླུང་གིས་མགོ་བོ་ཐུར་དུ་བསྟན་ནས་ཕྱིར་བཙའ་བའི་ཚེ་མངལ་སྒོར་བཙིར་བ་དང་། བཙས་ནས་སྟན་ལ་བཞག་པ་དང་གཞན་གྱིས་ལག་ཏུ་བླངས་པ་སོགས་ཀྱི་ཚེ་ཚ་ཞིང་རྩུབ་པའི་སྡུག་བསྔལ་སྣ་ཚོགས་མྱོང་བའི་ཚུལ་བསམ། རྒ་བའི་སྡུག་བསྔལ་ནི། ན་ཚོད་དར་བའི་སྐབས་ཀྱི་མདངས་སྟོབས་ཉམས་ནས་ལུས་རྒུད་སྐྲ་དཀར་སོ་ཐོན་འགྲོ་འདུག་དཀའ་མིག་མི་གསལ་བ་སོགས་འཆི་བ་ལ་ཕྱོགས་པའི་སྡུག་བསྔལ། ན་བའི་སྡུག་བསྔལ་ནི། ཚོར་བ་སྡུག་བསྔལ་གྱིས་ལུས་སེམས་གདུངས་ཤིང་ཟས་སྐོམ་སྤྱད་དུ་མི་བཏུབ་པ་སོགས་ཀྱི་སྡུག་བསྔལ། འཆི་བའི་སྡུག་བསྔལ་ནི། སྨན་པ་སོགས་ཀྱིས་བོར་ཏེ་བཀྲག་མདངས་ཉམས། ཁ་སྐམས། མཆུ་བརྫེས། སྣ་ཞོམས། མི་གདོང་མོར་སོང་། གཉེན་བཤེས་རྣམས་ཀྱིས་བསྐོར་ནས་སྨྲེ་སྔགས་འདོན་བཞིན་དུ་འཁོར་ལོངས་སྤྱོད་ཕུན་ཚོགས་རྣམས་དང་ལུས་འདི་ཉིད་ཀྱང་མལ་དུ་བཞག་ནས་མི་འདོད་བཞིན་དུ་འཆི་དགོས་པའི་སྡུག་བསྔལ། མི་སྡུག་པ་དང་འཕྲད་པ་ནི། དགྲ་དང་འཕྲད་པའམ་གཏམ་ངན་གྱིས་འཇིགས་པ་སོགས་ལས་སྡུག་བསྔལ། སྡུག་པ་དང་བྲལ་བ་ནི་འཕངས་ཤིང་སྡུག་པའི་གཉེན་སོགས་དང་བྲལ་བ་ལས་སྡུག་བསྔལ། འདོད་པ་བཙལ་ཏེ་མ་རྙེད་པ་ནི། རང་གི་འདོད་དོན་བསྒྲུབས་ཀྱང་མ་གྲུབ་པས་སྡུག་བསྔལ་འབྱུང་བའི་ཚུལ་རྣམས་སྙིང་ཐག་པ་ནས་བསམ་མོ། །གཉིས་པ་བདེ་འགྲོ་གཞན་གཉིས་ཀྱི་སྡུག་བསྔལ་ནི། ལྷ་མིན་རྣམས་ལྷའི་དཔལ་འབྱོར་ལ་མི་བཟོད་པའི་ཕྲག་དོག་ལ་བརྟེན་ནས་འཐབ་ཅིང་རྩོད་པའི་སྡུག་བསྔལ་དང་བཅས། ལྷའི་ནང་ཚན་འདོད་ལྷ་རྣམས་འཆི་བར་ཉེ་བའི་ཚེ། ལུས་ཀྱི་བཀྲག་མདངས་ཉམས་པ་སོགས་འཆི་ལྟས་ལྔ་དང་ལུས་ཀྱི་འོད་ཆུང་བ་སོགས་ཉེ་བའི་འཆི་ལྟས་ལྔ་བྱུང་བར་རིག་ནས་སྡུག་བསྔལ་བ་སོགས་དང་བཅས། གོང་སའི་ལྷ་རྣམས་སྡུག་བསྔལ་རགས་པ་མེད་ཀྱང་གནས་པ་དང་འཆི་འཕོ་བ་རང་དབང་མ་ཐོབ་པའི་གནས་ངན་ལེན་གྱི་སྡུག་བསྔལ་དང་བཅས་པའི་ཚུལ་རྣམས་བསམ། གསུམ་པ་རིགས་དྲུག་ཐུན་མོང་བའི་སྡུག་བསྔལ་ནི། འཁོར་བ་ལས་མཐར་ཕྱིན་ཚངས་པར་གྱུར་ཀྱང་སླར་བྲན་དུ་འགྱུར་བ་ལྟ་བུ་ནི་འགྲུབ་པའི་སྡུག་བསྔལ། སྐྱེ་རྒ་ན་འཆི་བཞི་ནི་གྲུབ་པའི་སྡུག་བསྔལ། རྨ་འབྲས་ཚ་བའི་སྡུག་བསྔལ་ཆེར་སོང་བ་ལྟ་བུ་སྡུག་བསྔལ་གྱི་སྡུག་བསྔལ། ཕྱིན་ནས་ངལ་བ་ན་བསྡད་པས་བདེ་བར་སྣང་ཡང་བསྡད་དྲག་ན་སླར་ན་བ་ལྟ་བུ་འགྱུར་བའི་སྡུག་བསྔལ། འཁྱགས་པའི་སྦུབས་སུ་ཆུད་པ་ཞིག་དེ་ལས་མ་ཐར་བར་དུ་འགྲོ་བའི་སྐབས་མེད་པ་ལྟ་བུ་ནི་འདུ་བྱེད་ཀྱི་སྡུག་བསྔལ་ཡིན་ལ། མདོར་ན་ཉེར་ལེན་གྱི་ཕུང་པོ་འདི་བླངས་ཕྱིན་ད་ལྟ་དང་མ་འོངས་པའི་སྡུག་བསྔལ་འདྲེན་པ་ལས་འོས་མེད་སྙམ་དུ་བསམ། ཉེར་ལེན་གྱི་ཕུང་བོ་ཞེས་པ་ནི་རྒྱུ་འབྲས་གཉིས་ཀྱི་སྒོ་ནས་བཏགས་པ་ཡིན་ལ། དེ་ཡང་ཉེར་ལེན་ནི་འདུན་པ་དང་འདོད་ཆགས་ལ་ཟེར་ཞིང་། མ་འོངས་པའི་ཕུང་བོ་ཐོབ་འདོད་ཀྱི་འདུན་པ་དང་ད་ལྟའི་ཕུང་བོ་ལ་ཆགས་པའི་འདོད་ཆགས་ཀྱི་དབང་གིས་ཕུང་བོ་ཕྱི་མ་འགྲུབ་པས་རྒྱུའི་སྒོ་ནས་དང་། ད་ལྟའི་ཕུང་བོ་ལ་བརྟེན་ནས་ཀྱང་ཕུང་བོ་ཐོབ་འདོད་ཀྱི་འདུན་པ་དང་འདོད་ཆགས་འདྲེན་པས་འབྲས་བུའི་སྒོ་ནས་བཏགས་པ་སྟེ། དེ་ལྟར་གཅིག་ལས་གཅིག་འབྱུང་བའི་ཚུལ་གྱིས་འཁོར་བར་འཁོར་བའི་ཚུལ་བསམ། གཞན་ཡང་འཁོར་བ་ན་ཕ་བུ་དང་བུ་ཕར་འགྱུར་ཞིང་དབང་ཆེ་བ་ཆུང་བ་དང་ཆུང་བའང་ཆེ་བར་འགྱུར་ལ། དགྲ་གཉེན་གོ་བཟློག་སྟེ་འགྱུར་བ་སོགས་ངེས་པ་མེད་པས་འཁོར་བ་ལ་ཡིད་གཏན་མི་འདུག་སྙམ་དུ་མྱོང་བ་མ་ཐོན་གྱི་བར་དུ་བསྒོམ་མོ། །གཉིས་པ་ཀུན་འབྱུང་འཁོར་བའི་འཇུག་རིམ་ནི། དེ་ལྟར་འཁོར་བའི་སྡུག་བསྔལ་ཤེས་པར་བྱས་ནས་དེ་མི་འདོད་ན། དེའི་རྒྱུ་ངོས་བཟུང་ནས་སྤོང་དགོས་པས་རྒྱུ་གང་ཡིན་ན། འདི་ལ་ལས་ཉོན་གཉིས་ཡོད་ཀྱང་ཉོན་མོངས་གཙོ་བོ་ཡིན་ལ། དེ་ནི་སེམས་རྒྱུད་མ་ཞི་བར་བྱེད་པའི་ཤེས་པ་ཞིག་གི་སྟེང་ནས་འཇོག་ཅིང་རྣམ་གྲངས་མང་ཡང་གཙོ་བོའི་དབང་དུ་བྱས་ན་ལྟ་བ་ལྔ་དང་ལྟ་མིན་ལྔར་འདུ་བས་དེ་དག་རང་རྒྱུད་ཀྱི་སྟེང་དུ་ངོས་བཟུང་ན། འདོད་ཆགས་ནི་རང་ཉིད་གང་ལ་ཆགས་པ་སྐྱེ་བའི་ཡུལ་དེ་ལ་རྗེས་སུ་ཆགས་པས་ལྟ་བ་དང་རེག་པ་སོགས་ལོངས་སྤྱོད་འདོད་ཀྱི་བློ་དུང་དུང་ཡོད་པའི་ཉོན་མོངས། ཁོང་ཁྲོ་ནི། དགྲ་ལྟ་བུ་ཞིག་ལ་དམིགས་ནས་མནར་སེམས་རྩུབ་པོས་ཞེ་སྡང་སོལ་མེ་རླུང་གིས་སྦར་བ་ལྟ་བུ་ལམ་ལམ་སྐྱེ་བའི་ཉོན་མོངས། ང་རྒྱལ་ནི། འཇིག་ལྟའི་དབང་གིས་རིགས་ནོར་ཡོན་ཏན་ལོངས་སྤྱོད་སོགས་ལ་བརྟེན་ནས་གང་ཟག་འདིས་བདག་གི་བ་སྤུའི་ཆ་ཙམ་ཡང་མི་བདོ་སྙམ་དུ་རང་ཉིད་ལ་མཆོག་ཏུ་འཛིན་པ་ཁེངས་པའི་རྣམ་པ་ཅན་གྱི་ཉོན་མོངས། མ་རིག་པ་ནི། ལས་འབྲས་དང་ཆོས་ཀྱི་གནས་ལུགས་བསྒྲིབ་ཅིང་མི་གསལ་བར་བྱེད་པའི་ཉོན་མོངས། ཐེ་ཚོམ་ཉོན་མོངས་ཅན་ནི། དཀོན་མཆོག་དང་ལས་འབྲས་སོགས་ཡོད་དམ་མེད་བདེན་ནམ་མི་བདེན་སྙམ་ནས་དོན་མི་འགྱུར་དུ་དོགས་པའི་ཉོན་མོངས། འཇིག་ལྟ་ནི། ཉེར་ལེན་གྱི་ཕུང་པོའི་སྟེང་ནས་ང་དང་ངའི་ཞེས་རང་དབང་བའི་བདག་ཏུ་འཛིན་པའི་ཤེས་རབ་ཉོན་མོངས་ཅན། མཐར་ལྟ་ནི། འཇིག་ལྟས་བཟུང་བའི་བདག་དེ་རྟག་པ་ཐེར་ཟུག་ཏུ་ལྟ་བའམ་འདི་ནས་ཕྱི་མར་ཉིང་འཚམས་སྦྱོར་བ་མེད་པར་ལྟ་བའི་ཤེས་རབ་ཉོན་མོངས་ཅན། ལྟ་བ་མཆོག་འཛིན་ནི། འཇིག་ལྟ་སོགས་ལྟ་ངན་གསུམ་གང་རུང་དང་དེ་དག་ལས་བྱུང་བའི་ཕུང་བོ་ལ་དམིགས་ནས་མཆོག་ཏུ་འཛིན་པའི་ཤེས་རབ་ཉོན་མོངས་ཅན། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱི་ལྟ་བ་ནི། རང་གི་བློ་ངོར་ཚུལ་འཆལ་སྤངས་པའི་ཚུལ་ཁྲིམས་དང་། ཚུལ་དང་ཆ་བྱད་དང་ལུས་ངག་གི་འཇུག་པ་ངེས་པའི་བརྟུལ་ཞུགས་དང་། དེ་དག་ལས་བྱུང་བའི་ཕུང་བོ་ལ་དམིགས་ནས་གྲོལ་བར་འདོད་པའི་ཤེས་རབ་ཉོན་མོངས་ཅན། ལོག་ལྟ་ནི་ལས་འབྲས་སོགས་མེད་པར་ལྟ་བའམ་སྣོད་བཅུད་རྣམས་དབང་ཕྱུག་སོགས་ཀྱིས་བྱས་པར་འཛིན་པའི་ཤེས་རབ་ཉོན་མོངས་ཅན་ནོ། །དེ་དག་ངོ་ཤེས་པར་བྱས་ནས་ནམ་རང་རྒྱུད་ལ་སྐྱེས་པ་ན་དང་དུ་མི་ལེན་ཅིང་སྤོང་བར་བྱ་སྟེ། ཉོན་མོངས་དེ་དག་གིས་ལས་བསགས་ནས་དེའི་དབང་གིས་འཁོར་བ་དང་ངན་སོང་དུ་སྐྱེ་བར་འགྱུར་བའི་ཕྱིར་རོ། །ཉོན་མོངས་པས་བསྐྱེད་པའི་ལས་ལ་སེམས་པའི་ལས་དང་། བསམ་པའི་ལས་གཉིས་ལས། དང་པོ་ནི། རང་དང་མཚུངས་ལྡན་གྱི་སེམས་ཡུལ་ལ་གཡོ་ཞིང་བསྐུལ་བར་བྱེད་པའི་སེམས་བྱུང་ཡིན་ལ། གཉིས་པ་ནི། སེམས་པ་ནི་སེམས་པ་དེས་ཀུན་ནས་སླངས་པའི་ལུས་ངག་གི་རིག་བྱེད་དང་མཉམ་དུ་འཇུག་པའི་སེམས་པ་ཡིན་ཞིང་། འཕེན་བྱེད་ཀྱི་ལས་གསོག་པ་པོ་སོ་སྐྱེ་རྣམས་ཡིན་ལ། ལས་དེ་ལ་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་གསུམ། དང་པོ་ནི། འདོད་ཁམས་ཀྱི་སྦྱིན་པ་གཏོང་བ་སོགས་དགེ་བའི་ལས། གཉིས་པ་ནི། སྲོག་གཅོད་པ་སོགས་མི་དགེ་བའི་ལས། གསུམ་པ་ནི་ཁམས་གོང་མའི་སས་བསྡུས་པའི་ཞི་གནས་སོགས་བསྒོམས་པའི་ལས་སོ། །སྨིན་ཚུལ་ནི། མངོན་པ་ལས། ལས་ཀྱིས་འཁོར་བར་ལྕི་གར་དང་། །ཉེ་བ་གང་དང་གོམས་པ་གང་། །སྔོན་བྱས་གང་ཡིན་དེ་དག་ལས། །སྔ་མ་སྔ་མ་རྣམ་སྨིན་འགྱུར། །ཞེས་པའི་ཚུལ་གྱིས་འབྱུང་། ལས་ཀྱི་དབང་གིས་འཆི་བ་དང་ཉིང་འཚམས་སྦྱོར་ཚུལ་ནི། རྐྱེན་གང་རུང་གིས་འཆི་བ་ན་ཕྱི་དབུགས་ཆད་ཀའི་ཚེ། དགེ་མི་དགེ་ལུང་མ་བསྟན་གྱི་སེམས་གསུམ་ཅི་རིགས་འབྱུང་ལ། འདིའི་སྐབས་སུ་སྡིག་སེམས་མ་སྐྱེས་པ་གལ་ཆེ། ཕྱི་དབུགས་ཆད་ནས་ནང་དབུགས་མ་ཆད་པའི་བར་དེར་འཆི་སེམས་ཕྲ་མོར་འགྱུར་བས་ལུང་མ་བསྟན་གྱི་སེམས་ཁོ་ན་འབྱུང་། སྤྱིར་བཏང་དགེ་བ་བྱེད་པ་རྣམས་གནད་གཅོད་ཆུང་ཞིང་གཟུགས་ཡིད་དུ་འོང་བ་རྨི་ལམ་བཞིན་དུ་མཐོང་ལ། མི་དགེ་བ་བྱེད་པ་རྣམས་དེ་ལས་ལྡོག་སྟེ་འབྱུང་ཡང་དམིགས་བསལ་མ་ངེས། སྙིང་ཁ་ནས་རྣམ་ཤེས་འཕོས་པ་དང་མཉམ་དུ་སྲང་མདའི་མཐོ་དམན་ལྟར་བར་དོར་འགྲོ་བ་གང་དུ་སྐྱེ་འགྱུར་གྱི་བྱད་དབྱིབས་ཅན་གྱི་བར་དོ་འགྲུབ་པོ། དེར་ཞག་ཞེ་དགུ་ཚུན་ཆད་བདུན་ཕྲག་ཅི་རིགས་པར་གནས་ནས། གང་གི་ཚེ་སྐྱེ་གནས་སྒྱུ་མ་བཞིན་དུ་མཐོང་སྟེ་དེར་ཆགས་སྡང་གི་དབང་གིས་ཉིང་འཚམས་སྦྱོར་བའི་ཚུལ་རྣམས་བསམ། གཉིས་པ་སྡུག་ཀུན་གཉིས་ཀྱི་སྒོ་ནས་བསམས་པས་མྱོང་བ་ཐོན་ན་རྟེན་འབྲེལ་གྱི་སྒོ་ནས་བསམ་དགོས་པའི་ངེས་པ་མེད་ཀྱང་། འགའ་ཞིག་ལ་འཆར་བདེ་བས་དེའི་དབང་དུ་བྱས་ཏེ་ཅུང་ཟད་བརྗོད་པ་ལ། མ་རིག་པ་ལ་ལས་འབྲས་ལ་རྨོངས་པ་ཡོད་ནའང་གཙོ་བོར་ཡན་ལག་དང་པོ་དེ་ཁོ་ན་ཉིད་ལ་རྨོངས་པའི་མ་རིག་པའི་དབང་གིས་འདུ་བྱེད་ཀྱི་ལས་དཀར་ནག་གང་རུང་ཞིག་བསགས་ཏེ་ལས་དེའི་བག་ཆགས་རྒྱུ་དུས་ཀྱི་རྣམ་ཤེས་ཀྱི་སྟེང་དུ་བསྒོས་པ་ལ་འདོད་སྲེད་སོགས་ཀྱི་སྲེད་པ་དང་དེར་ཆགས་པའི་ལེན་པ་གཉིས་ཀྱིས་གསོས་བཏབ་པས། སྲིད་པའི་རྟེན་འབྲེལ་མཐུ་ཅན་དུ་སོང་ནས། རྒྱུ་དུས་ཀྱི་རྣམ་ཤེས་དེ་ཉིད་ཕྱི་མར་འགྲོ་བ་གཉིས་གང་རུང་ཞིག་ཏུ་ཉིང་འཚམས་སྦྱར་བའི་ཚེ་འབྲས་དུས་ཀྱི་རྣམ་ཤེས་ཀྱི་རྟེན་འབྲེལ་གྲུབ་པ་དང་མཉམ་དུ་ཚོར་བ་སོགས་མིང་དང་མེར་མེར་བོ་སོགས་གཟུགས་ཀྱི་རྟེན་འབྲེལ་དང་སྐྱེ་བ་ཡང་གྲུབ། དེ་འཕེལ་བས་མིག་ལ་སོགས་པ་སྐྱེ་མཆེད་ཀྱི་རྟེན་འབྲེལ། དེ་ནས་ཡུལ་དབང་རྣམ་ཤེས་གསུམ་འདུས་ཏེ་རེག་པའི་རྟེན་འབྲེལ། དེ་ལས་ཚོར་བའི་རྟེན་འབྲེལ། ཕུང་བོ་ན་ཚོད་གཞན་དུ་འགྱུར་བའི་ཆ་ནི་རྒ་བ་དང་ཕུང་བོའི་རིགས་མཐུན་དོར་བ་ནི་ཤི་བའི་རྟེན་འབྲེལ་ལོ། །དེ་ནི་ཚེ་གཉིས་ལ་རྫོགས་པའི་དབང་དུ་བྱས་པ་སྟེ། ཚེ་གསུམ་ལ་རྫོགས་པའང་ཡོད་དོ། །བསྡུ་ན་འཕེན་བྱེད་ཀྱི་རྒྱུ་འབྲས་གཉིས་དང་། འགྲུབ་བྱེད་ཀྱི་རྒྱུ་འབྲས་གཉིས་སུ་འདུ་སྟེ། མ་རིག་པ་འདུ་བྱེད་རྒྱུ་དུས་ཀྱི་རྣམ་ཤེས་གསུམ་ནི་འཕེན་བྱེད་ཀྱི་རྒྱུ་དང་རྣམ་ཤེས་ཀྱི་ཕྱེད་འབྲས་དུས་ཀྱི་རྣམ་ཤེས་ནས་ཚོར་བའི་བར་ལྔ་འཕངས་པའི་འབྲས་བུ་ཡིན་ལ། སྲེད་ལེན་སྲིད་ལས་གསུམ་འགྲུབ་བྱེད་ཀྱི་རྒྱུ་དང་སྐྱེ་བ་དང་རྒ་ཤི་གཉིས་འགྲུབ་པའི་འབྲས་བུར་འདུ་བའི་ཕྱིར་རོ། །དེ་ཡང་གང་གིས་འཕེན་ན་མ་རིག་པ་ལ་བརྟེན་པའི་འདུ་བྱེད་ཀྱི་ལས་དཀར་ནག་གང་རུང་གིས་འཕེན་ཅིང་ཇི་ལྟར་འཕངས་ན་རྒྱུ་དུས་ཀྱི་རྣམ་ཤེས་ལ་ལས་དེའི་བག་ཆགས་བསྒོས་པའི་ཚུལ་གྱིས་འཕངས། གང་གིས་འགྲུབ་ན་སྲེད་པའི་རྐྱེན་དང་ལྡན་པའི་ལེན་པས་འགྲུབ་ལ་དེས་གང་གྲུབ་པ་ནི་སྐྱེ་རྒ་གཉིས་སོ། །དེ་ལྟ་བུའི་ཚུལ་གྱིས་འཁོར་བའི་གནས་སུ་མགལ་མེའི་འཁོར་ལོ་བཞིན་དུ་ཡང་ཡང་འཁོར་བའི་ཚུལ་བསམས་ནས་ཡིད་སྐྱོ་ཤས་དྲག་པོས་དེ་ལས་ཐར་འདོད་ཀྱི་བློ་ཤུགས་དྲག་བསྐྱེད་ཅིང་གོང་འཕེལ་དུ་གཏང་བར་བྱ་ལ། དེ་ཡང་ངན་འགྲོའི་རྟེན་འབྲེལ་བསམས་ཏེ་སྐྱེས་བུ་ཆུང་ངུ་དང་ཐུན་མོང་བ་དང་། བདེ་འགྲོའི་རྟེན་འབྲེལ་བསམས་ནས་འབྲིང་དང་ཐུན་མོང་བའི་ལམ་ལ་བློ་སྦྱང་བར་བྱའོ། །གཉིས་པ་ཐར་བར་བགྲོད་པའི་ལམ་གྱི་རང་བཞིན་ནི། འཁོར་བའི་ཉེས་དམིགས་མཐོང་ནས་དེ་ལས་ངེས་པར་འབྱུང་འདོད་སྐྱེས་པ་དེས། ལྷག་པའི་བསླབ་པ་གསུམ་ལ་འབད་དགོས་པས། ཚུལ་ཁྲིམས་ཀྱི་བསླབ་པ་ནི། སོ་ཐར་སོགས་རང་གིས་གང་ཁས་བླངས་པ་རྣམས་དང་། རང་བཞིན་གྱི་ཁ་ན་མ་ཐོ་བའི་གཙོ་བོ་མི་དགེ་བཅུ་སྤོང་གི་ཚུལ་ཁྲིམས་བསྲུང་བ་ལ་འབད་ཅིང་། ཏིང་ངེ་འཛིན་གྱི་བསླབ་པ་དང་ཤེས་རབ་ཀྱི་བསླབ་པའི་གཙོ་བོ་ནི་ཞི་གནས་དང་ལྷག་མཐོང་གིས་བསྡུས་པས་འོག་ནས་འཆད་པ་ལྟར་བསླབ་པར་བྱ་དགོས་ཏེ། ཚུལ་ཁྲིམས་ཀྱི་བསླབ་པས་ཉོན་མོངས་པ་མངོན་གྱུར་རྣམས་སུན་འབྱིན། ཏིང་ངེ་འཛིན་གྱིས་མགོ་མནོན། ཤེས་རབ་ཀྱིས་ཉོན་མོངས་པའི་ས་བོན་སྤངས་ནས་རྣམ་པར་གྲོལ་བར་བྱེད་པའི་ཕྱིར་རོ། །ཚུལ་ཁྲིམས་བསྲུང་བ་ལ་རང་ངོས་ནས་ཅི་ནུས་སུ་འབད་ཀྱང་བག་མེད་སོགས་ཀྱིས་ཉེས་ལྟུང་བྱུང་ན་ལྟུང་བ་འབྱུང་བའི་སྒོ་བཞི་བོ་ཤེས་ནས་བསྲུང་། ད་དུང་ཡང་ཉེས་པ་འབྱུང་ན་ཀྱེ་མ་འདི་ནི་རང་གིས་རང་ལ་ངེས་པར་གནོད་པར་བྱས་པ་སྟེ། ལས་འབྲས་མི་བསླུ་བས་འདི་ལྟར་བྱས་ན་ཕྱི་མར་ངན་འགྲོར་ལྟུང་བར་འགྱུར་དུ་འོང་སྙམ་དུ་བསམས་ནས་སྟོབས་བཞི་བཤགས་སྡོམ་ལ་རྒྱུན་དུ་འབད་པར་བྱ་སྟེ། ལས་ཉོན་གཉིས་ལས་ཉོན་མོངས་གཙོ་ཡང་ལས་དང་པོ་བས་ལྷག་པར་ལས་སྒྲིབ་སྦྱོང་བ་གནད་ཆེ་བར་རྗེ་ཉིད་ཀྱིས་བཤད་པས་སོ། །གསུམ་པ་སྐྱེས་བུ་ཆེན་པོའི་ལམ་གྱི་རིམ་པ་ལ་བློ་སྦྱོང་བ་ནི། དེ་ལྟར་འཁོར་བ་ལས་གྲོལ་བའི་ཆེད་དུ་བསླབ་པ་གསུམ་ལ་འབད་ནས་འཁོར་བ་ལས་གྲོལ་བར་བྱེད་པ་ནི་མཆོག་ཡིན་ཀྱང་། འདིར་དེ་ཙམ་གྱིས་མི་ཆོག་པར། ཇི་སྐད་དུ་ལམ་སྒྲོན་ལས། རང་རྒྱུད་རྟོག་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་གསུང་པ་ལྟར་སེམས་ཅན་ཐམས་ཅད་ཀྱི་དོན་བསྒྲུབ་དགོས་པས། དེ་ལ་ནི་ཐེག་ཆེན་གྱི་ལམ་དུ་འཇུག་དགོས་སོ། །འདི་ལ་གཉིས། སྤྱོད་པའི་རྟེན་སེམས་བསྐྱེད་པ་དང་། སྤྱོད་པ་ལ་སློབ་ཚུལ་ལོ། །དང་པོ་ནི། ཐེག་ཆེན་ལ་འཇུག་པའི་སྒོ་གང་ཡིན་སྙམ་ན། དེ་ནི་བྱང་ཆུབ་ཀྱི་སེམས་ཡིན་ཏེ། འདི་རྒྱུད་ལ་སྐྱེས་ཙམ་ནས་ཐེག་ཆེན་པར་ཆུད་ཅིང་མ་སྐྱེས་པའམ་ཉམས་ན་ཡོན་ཏན་གཞན་ཇི་ལྟ་བུ་ཡོད་ཀྱང་དེར་མི་ཆུད་པའི་ཕྱིར་ན་སངས་རྒྱས་ཀྱི་རྒྱུ་ཐུན་མོང་མ་ཡིན་པའི་ས་བོན་ལྟ་བུ་ཡིན་པས་སོ། །འདི་སྦྱོང་བའི་མན་ངག་ལ་གཉིས། ཇོ་བོ་ཆེན་པོ་དང་། རྒྱལ་སྲས་ཞི་བ་ལྷ་ནས་བརྒྱུད་པའོ། །དང་པོ་ནི། རྒྱུ་འབྲས་མན་ངག་བདུན་གྱི་སྒོ་ནས་སྦྱོང་ཚུལ་ཏེ། འབྲས་བུ་སངས་རྒྱས་ནི་བྱང་ཆུབ་ཀྱི་སེམས་ལས་འབྱུང་། དེ་ལྷག་བསམ་རྣམ་དག་ལས། དེ་སྙིང་རྗེ་ཆེན་པོ་ལས། དེ་བྱམས་པ་ལས། དེ་དྲིན་གཟོ་བ་ལས། དེ་དྲིན་དྲན་པ་ལས། དེ་མར་ཤེས་པ་ལས་འབྱུང་བས་སོ། །དེས་ན་འདི་ལ་གཉིས། གཞན་དོན་དོན་གཉེར་དང་། བྱང་ཆུབ་དོན་གཉེར་བསྐྱེད་ཚུལ་ལོ། །དང་པོ་ལ་གཉིས། དེའི་གཞི་བསྒྲུབ་པ་དང་། དེ་བསྐྱེད་ཚུལ་ལོ། །དང་པོ་ནི། སྔར་ལྟར་སྐྱེས་བུ་ཆུང་འབྲིང་གི་སྐབས་ཇི་ལྟར་འཚམ་པ་སྔོན་དུ་སོང་ནས་སེམས་ཅན་ཐམས་ཅད་མར་ཤེས་པ་སོགས་ཀྱི་སྔོན་དུ་བཏང་སྙོམས་བསྒོམ་པ་གནད་ཆེ་བས། དགྲ་གཉེན་བར་མའི་སེམས་ཅན་ཞིག་མདུན་དུ་གསལ་བཏབ་སྟེ། རྟོག་པ་གང་སྐྱེ་བལྟས་པས་ཆགས་པ་སྐྱེ་ན་འདིས་སྔོན་བདག་གི་དགྲ་མང་དུ་བྱས་ནས་གནོད་པ་ཡོད་པས་ན་ཅིའི་ཕྱིར་ཆགས། སྡང་བ་སྐྱེ་ན་འདིས་སྔོན་བདག་གི་གཉེན་བྱས་ནས་ཕན་བཏགས་པའང་སྲིད་པས་སྡང་དུ་ག་ལ་རུང་སྙམ་སྟེ་ཆགས་སྡང་གི་རྟོག་པ་བཀག་ནས་སེམས་སྙོམས་པར་བསྒྲུབ། དེ་ནས་ཕ་མ་དང་གཉེན་གཞན་དང་དགྲ་སོགས་ལ་སྦྱར་ནས་བསྒོམ། མདོར་ན་དགྲ་གཉེན་གོ་ལྡོག་སྟེ་གྱུར་བ་དང་འགྱུར་བའང་མང་བས་ན། བདག་གིས་འདིར་གང་ལ་ནི་ཆགས་ཤིང་སུ་ལ་སྡང་བར་བྱ་སྙམ་ནས་བཏང་སྙོམས་བསྒོམ་པར་བྱའོ། །དེ་ནས་མར་ཤེས་པ་སོགས་གསུམ་ལས། དང་པོ་ནི། རང་གི་མ་གསལ་བཏབ་སྟེ། མ་འདིས་འཁོར་བ་ཐོགས་མ་མེད་པ་ནས་ད་ལྟའི་བར་དུ་བདག་གི་མ་ཡང་ཡང་བྱས་ཤིང་ད་དུང་བྱེད་པར་འགྱུར་སྙམ་དུ་བསམ། དེ་ནས་ཕ་དང་གཉེན་གཞན་དང་། བར་མ་དང་། དགྲ་སོགས་ལའང་དེ་ལྟར་དུ་སྦྱར་ནས་སེམས་ཅན་ཐམས་ཅད་མ་ལྟ་བུར་ཤེས་པར་བྱ། གཉིས་པ་ནི། མ་འདིས་བདག་ཟླ་བ་བཅུའི་བར་དུ་ལྟོར་བཟུང་ནས་ཕན་པའི་སྤྱོད་ལམ་ཐམས་ཅད་བསྟེན། དལ་འབྱོར་གྱི་ལུས་སྲོག་འདི་བསྐྱེད་པས་དང་པོར་དྲིན་ཆེ། དེ་ནས་བཙས་པའི་ཚེ་འཇམ་པའི་སྟན་ལ་བཞག །བརྩེ་བའི་སེམས་ཀྱིས་བསྐྱངས། བྱམས་པའི་མིག་གིས་བལྟས། དགའ་བའི་འཛུམ་གྱིས་བསུས། སྙན་པའི་མིང་ནས་བོས། ཤའི་དྲོད་ལ་བཅར། མངར་བའི་ནུ་ཞོ་བསྣུན། ཟས་ལྕེས་སྙོད། སྣབས་ཁས་ཕྱིས། མི་གཙང་བ་ལག་པས་ཕྱིས། འཇིགས་པ་ཀུན་ལས་སྐྱབས་པ་སོགས་མདོར་ན་བསམ་སྦྱོར་གཉིས་ཀྱི་སྒོ་ནས་ཕན་དཔག་ཏུ་མེད་པ་བཏགས་པས་དྲིན་ཤིན་དུ་ཆེའོ་སྙམ་དུ་བསམ། དེ་ནས་ཕ་སོགས་གཞན་ལ་ཁ་སྦོས་ནས་དེ་ལྟར་བསྒོམས་པས་དྲིན་དྲན་པར་བྱ། གསུམ་པ་ནི། དེ་ལྟར་ཤིན་ཏུ་དྲིན་ཆེ་བའི་མ་འདི་རྣམས་བདེ་བས་ཕོངས་ཤིང་འཁོར་བ་དང་ངན་སོང་གི་གནས་སུ་སྡུག་བསྔལ་སྣ་ཚོགས་ཀྱིས་གཟིར་བས་འདི་རྣམས་ཀྱིས་བདག་ལ་མི་རེ་ན་སུ་ལ་རེ། འདི་རྣམས་ཀྱི་དོན་བྱེད་པའི་ཁུར་བདག་ལ་མི་འབབ་ན་སུ་ལ་འབབ། དེས་ན་བདག་གིས་འདི་རྣམས་ཀྱི་དོན་བྱ་དགོས་ནའང་ཟས་སྐོམ་ནོར་རྫས་སོགས་ཀྱིས་ཕན་བཏགས་ཀྱང་ཕན་དེ་ཙམ་མི་ཆེ་བས། ངེས་པར་ཐར་བ་དང་ཐམས་ཅད་མཁྱེན་པའི་གོ་འཕང་ལ་འགོད་པར་བྱའོ་སྙམ་དུ་སྙིང་ཐག་པ་ནས་བསམ། དེ་ནས་ཕ་སོགས་ལ་རིམ་གྱིས་དེ་ལྟར་སྦྱར་ཏེ་དྲིན་གཟོ་བའི་ཚུལ་བསམ། གཉིས་པ་གཞན་དོན་དོན་གཉེར་གྱི་བློ་བསྐྱེད་ཚུལ་ལ་གསུམ་ལས། དང་པོ་བྱམས་པ་ནི། དེ་བསྒོམས་པ་ལས་ཕན་ཡོན་དཔག་ཏུ་མེད་པ་འབྱུང་བའི་ཚུལ་དྲན་པར་བྱས་ནས། མ་གསལ་བཏབ་སྟེ་མ་རྒན་འདི་བདེ་བ་དང་འཕྲད་ན་ཅི་མ་རུང་། བདེ་བ་དང་འཕྲད་པར་གྱུར་ཅིག །ཅི་ནས་ཀྱང་བདེ་བ་དང་འཕྲད་པར་བདག་གིས་བྱའོ་སྙམ་དུ་བསམ་ཞིང་ངག་ཏུ་ལན་མང་བོར་བརྗོད་ཅིང་། བདེ་བ་སྣ་ཚོགས་ཡིད་ཀྱིས་སྦྱིན་པར་བྱ། དེ་ནས་ཕ་སོགས་ལ་རིམ་གྱིས་དེ་ལྟར་བསྒོམ་མོ། །གཉིས་པ་སྙིང་རྗེ་ནི། ཕན་ཡོན་དྲན་པར་བྱས་ནས། མ་རྒན་འདི་སྡུག་བསྔལ་དང་བྲལ་ན་ཅི་མ་རུང་སྡུག་བསྔལ་དང་བྲལ་བར་གྱུར་ཅིག །ཅི་ནས་ཀྱང་སྡུག་བསྔལ་དང་བྲལ་བར་བྱའོ། །སྙམ་དུ་བསམ་ཞིང་ལན་མང་དུ་བརྗོད་ཅིང་སྡུག་བསྔལ་ཡིད་ཀྱིས་བླངས། དེ་ནས་ཕ་སོགས་ལ་དེ་བཞིན་སྦྱོར། གསུམ་པ་ལྷག་བསམ་ནི། བདེ་བས་ཕོངས་ཤིང་སྡུག་བསྔལ་གྱིས་གཟིར་བའི་མ་རྒན་འདི་བདེ་བ་དང་ལྡན་ཞིང་སྡུག་བསྔལ་དང་བྲལ་བ་ཞིག་ངེས་པར་བདག་གིས་བྱའོ། །སྙམ་དུ་དམ་བཅའ་ཞིང་ལན་མང་དུ་བརྗོད་ལ། ཕ་སོགས་ལའང་སྦྱར་ནས་བསྒོམ། གཉིས་པ་བྱང་ཆུབ་དོན་གཉེར་གྱི་བློ་བསྐྱེད་ཚུལ་ནི། དེ་ལྟ་བུའི་དམ་བཅའི་དོན་བཞིན་སངས་རྒྱས་ན་མ་གཏོགས་ད་ལྟའི་གནས་སྐབས་འདི་ལྟ་བུས་བསྒྲུབ་མི་ནུས་པས། སངས་རྒྱས་ཀྱི་གོ་འཕང་ཐོབ་འདོད་ཀྱི་འདུན་པ་ཤུགས་དྲག་པོས་སྐྱབས་འགྲོའི་སྐབས་བཞིན་སངས་རྒྱས་ཀྱི་ཡོན་ཏན་དྲན་པའི་སྒོ་ནས་བདག་གིས་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་། ཐོབ་པར་གྱུར་ཅིག ཅི་ནས་ཀྱང་ཐོབ་པར་བྱའོ། །སྙམ་དུ་བསམ་ཞིང་ངག་ཏུ་བརྗོད་པར་བྱའོ། །གཉིས་པ་ཞི་བ་ལྷ་ནས་བརྒྱུད་པ་ནི། རང་གཅེས་འཛིན་ལ་སྐྱོན་དུ་བལྟ་ཞིང་གཞན་གཅེས་འཛིན་ལ་ཡོན་ཏན་དུ་བལྟས་པའི་སྒོ་ནས་སྦྱོང་བ་ལ་དེ་ཡང་མ་མདུན་དུ་གསལ་བཏབ་སྟེ། སྙིང་ཐག་པ་ནས་རང་གི་སྣ་བུག་གི་རླུང་སངས་ཀྱིས་བུས་པ་དང་མཉམ་དུ་རང་རྒྱུད་ཀྱི་བདེ་དགེ་ཐམས་ཅད་འོད་ཟེར་དཀར་བོའི་རྣམ་པས་རླུང་དང་འགྲོགས་ཏེ་སྣ་བུག་གཡས་ནས་ཐོན། མདུན་གྱི་མ་དེའི་སྣ་བུག་གཡོན་པ་ནས་ཞུགས་པས་ལུས་སེམས་ཐམས་ཅད་བདེ་དགེས་ཁྱབ་སོང་སྣམ་དུ་བྱམས་པ་བསྒོམ་པ་དང་། ཡང་སྣ་བུག་གི་རླུང་རྔུབ་པ་དང་མཉམ་དུ་དེའི་སྡིག་སྒྲིབ་སྡུག་བསྔལ་ཐམས་ཅད་འོད་ཟེར་ནག་བོའི་རྣམ་པས་རླུང་ལ་ཞོན་ནས་དྲངས་ཏེ་མའི་སྣ་བུག་གཡས་ནས་ཐོན། རང་གི་སྣ་བུག་གཡོན་ནས་ཞུགས་ཏེ་སྙིང་ཁར་ནག་ཕུང་ངེ་བྱུང་བས་དེ་སྡུག་བསྔལ་ཐམས་ཅད་དང་བྲལ་སོང་སྙམ་དུ་སྙིང་རྗེ་བསྒོམ་པ་སྤེལ་མར་ཡང་ཡང་བྱ་ཞིང་། དེ་ནས་ཕ་སོགས་ལའང་རིམ་གྱིས་དེ་ལྟར་སྦྱངས་ནས། དེ་རྣམས་ཀྱི་ཆེད་དུ་སངས་རྒྱས་ཐོབ་པར་བྱའོ་སྙམ་དུ་སེམས་བསྐྱེད་པར་བྱའོ། །མ་སོགས་ལ་རིམ་གྱིས་བསྒོམས་པ་ནི་ངེས་པ་བརྟན་པོ་འོང་བའི་ཆེད་ཡིན་པས། བསྡུས་ནས་ཉམས་སུ་ལེན་པའི་ཚེ། སེམས་ཅན་ཐམས་ཅད་ལ་ཐུན་མོང་དུ་དམིགས་པས་དེ་ལྟར་བསམ་པར་བྱས་ནའང་ལེགས། གཉིས་པ་སྤྱོད་པ་ལ་སློབ་ཚུལ་ལ་གཉིས། ཕྱིན་དྲུག་དང་། བསྡུ་བཞི་ལ་སློབ་ཚུལ་ལོ། །དང་པོ་ནི། སེམས་བསྐྱེད་ཀྱང་རྒྱལ་སྲས་ཀྱི་སྤྱོད་པ་ལ་མ་བསླབ་ན་འཚང་མི་རྒྱ་ཞིང་། སྤྱིར་སྤྱོད་པའི་དབྱེ་བ་མཐའ་ཡས་ཀྱང་བྱམས་མགོན་གྱིས་སྤྱོད་པ་རྣམས་བསྡུ་ན་ཕྱིན་དྲུག་ཏུ་འདུ་བར་གསུངས་པ་ལྟར་འདུ་ཞིང་གྲངས་ངེས་ཚུལ་ལ། མངོན་མཐོ་དང་། དོན་གཉིས་བསྒྲུབ་པ་དང་། ཐེག་ཆེན། སྡུད་པ་དང་། ཐབས་ཀྱི་རྣམ་པ་དང་། བསླབ་གསུམ་ལ་བལྟོས་པའི་གྲངས་ངེས་སོགས་ཡོད་ཀྱང་། འདིར་སྐབས་དོན་བསྡུས་ཏེ་བརྗོད་ན་དྲུག་ལས། དང་པོ་ནི། གཏོང་བའི་སེམས་པ་དགེ་བ་དང་དེས་ཀུན་ནས་བསླངས་པའི་ལུས་ངག་སྦྱིན་པ་ལ་འཇུག་བཞིན་པའི་དུས་ཀྱི་སེམས་པ་ནི་སྦྱིན་པའི་ངོ་བོ་ཡིན་ལ། དེ་རྫོགས་བྱང་དུ་བསྔོ་བའི་བསྔོ་བས་ཟིན་པའི་སྒོ་ནས་གོམས་པ་ཡོངས་སུ་རྫོགས་པ་ན་སྦྱིན་པའི་ཕར་ཕྱིན་དུ་འགྱུར་རོ། །དབྱེ་ན་ཆོས། མི་འཇིགས། ཟང་ཟིང་གི་སྦྱིན་པ་གསུམ། ཇི་ལྟར་གཏོང་ཚུལ་ནི། འདི་ལ་བརྟེན་ནས་སྦྱིན་པའི་ཕར་ཕྱིན་རྫོགས་པར་བྱའོ་སྙམ་པ་དགོས་པ་ལ་དམིགས་པ་དང་། དང་པོ་ནས་བདག་གིས་བཏང་ཟིན་པ་ཡིན་པས་བཅོལ་བ་ལེན་པ་དང་མཚུངས་སོ་སྙམ་དུ་དངོས་པོ་ལ་དམིགས་པ་དང་། ལེན་པ་པོ་འདི་རྣམས་བདག་གི་སྦྱིན་པའི་ཕར་ཕྱིན་རྫོགས་པར་བྱེད་པའི་དགེ་བའི་བཤེས་གཉེན་ནོ་སྙམ་པའི་ཞིང་ལ་དམིགས་པ་སྟེ་ཁྱད་པར་གསུམ་དང་ལྡན་པའི་སྒོ་ནས་བཞིན་མདངས་གསལ་བ་སོགས་ཀྱིས་སྦྱིན་པར་བྱའོ། །ཆོས་ཀྱི་སྦྱིན་པ་ནི། དངོས་སུ་ཆོས་སྟོན་པའམ། གླེང་མོའི་ཚུལ་གྱིས་བླང་དོར་བསྟན་པ་སོགས་བྱ། མི་འཇིགས་སྦྱིན་པ་ནི། གཞན་རྒྱལ་བོའམ་དགྲ་དང་མེ་ཆུ་སོགས་ཀྱི་འཇིགས་པ་ལས་རང་སྟོབས་ཀྱིས་དངོས་སུ་སྐྱོབ་པ་དང་དེ་ལས་ཐར་པའི་ཐབས་སོགས་བྱ། ཟང་ཟིང་གི་སྦྱིན་པ་ནི། བཟའ་བཏུང་གོས་རིན་པོ་ཆེ་རྟ་སོགས་ཅི་རིགས་གཏོང་བར་བརྩོན་ཞིང་། རང་གིས་དངོས་སུ་མི་འགྲུབ་ནའང་ཡིད་ཀྱིས་རང་གི་ལུས་ལོངས་སྤྱོད་བདེ་དགེ་ཐམས་ཅད་གང་ལ་གང་འཚམས་ཀྱི་རྣམ་པས་གཏོང་བའི་བློ་གོམས་པར་བྱའོ། །དེ་ཡང་རང་གི་སྣ་བུག་ནས་རླུང་ཕར་འགྲོ་བ་ན་ལུས་ལོངས་སྤྱོད་སོགས་ཡིད་ཀྱིས་གང་དགོས་སུ་སྤྲུལ་ཏེ་བཏང་བས་དེ་རྣམས་ཀྱི་རེ་བ་རྫོགས་པར་གྱུར་སྙམ་དུ་བསམས་པ་ནི། ཤེས་རབ་ཅན་གྱི་སྦྱིན་པར་གསུངས་སོ། །གལ་ཏེ་གཏོང་བའི་སྐབས་མིན་པའམ། མི་ནུས་པ་ལྟ་བུ་ཞིག་ཡིན་ནའང་དངོས་པོ་དེ་རྣམས་དཀོན་མཆོག་ལ་བསྔོས་ནས་འདི་ལྟར་བསམ་པར་བྱ་སྟེ། དངོས་པོ་འདི་རྣམས་ནི་བདག་གི་དབང་བྱར་ག་ལ་འགྱུར། འདི་དག་སངས་རྒྱས་བྱང་སེམས་སོགས་ཀྱི་ཡིན་ནོ་སྙམ་དུ་རྣམ་པར་བརྟགས་ཏེ་བཅངས་ནའང་ཐབས་མཁས་ཡིན་པས་ཕན་ཡོན་ཆེ་བར་བཤད། གཉིས་པ་ནི། གཞན་གནོད་གཞི་བཅས་ལས་ཡིད་ཕྱིར་ལོག་པའི་སྤོང་སེམས་ནི་ཚུལ་ཁྲིམས་ཀྱི་ངོ་བོ་ཡིན་ལ། ཚུལ་ཁྲིམས་ལ་ཉེས་སྤྱོད་སྡོམ་པ་དགེ་བ་ཆོས་སྡུད། སེམས་ཅན་དོན་བྱེད་གསུམ། བསྲུང་ཚུལ་ལ་ཉེས་སྤྱོད་སྡོམ་པ་ནི། རང་གིས་ཁས་བླངས་པའི་སོ་ཐར་དངོས་དང་། མི་དགེ་བཅུ་སྤོང་བའི་སྡོམ་པ་རྣམས་བསྲུང་བ་དང་། དེ་དག་གི་ཉེས་པས་གོས་མ་གོས་རང་རྒྱུད་ལ་བརྟག་པར་བྱ་ཞིང་། གལ་ཏེ་ཉེས་པས་གོས་ན་ཕྱིར་བཅོས་དང་སྟོབས་བཞིའི་བཤགས་བསྡམ་ལ་འབད་པར་བྱའོ། །དགེ་བ་ཆོས་སྡུད་ནི། བྱང་སེམས་ཀྱི་ལུས་ངག་གི་དགེ་བ་རྣམས་ཡིན་ལ། དེ་ཡང་ཐོས་བསམ་སྒོམ་གསུམ་ལ་འབད་ཅིང་བླ་མ་དང་ཕ་མ་དང་ནད་པའི་རིམ་གྲོ་བྱེད་པ། དཀོན་མཆོག་དང་། ཆོས་སྨྲ་བ་དང་ཡོན་ཏན་ཅན་གྱི་བསྔགས་པ་བརྗོད་ཅིང་དགེ་བ་ལ་དགའ་བ་བསྒོམ་པ། དཀོན་མཆོག་གསུམ་ལ་མཆོད་ཅིང་དགེ་བ་རྫོགས་བྱང་དུ་བསྔོ་སྨོན་བྱེད་པ། བཤེས་གཉེན་དང་བག་ཡོད་བསྟེན་ཅིང་ཉེས་པ་འཆགས་པ་སོགས་ཀྱི་དགེ་སྦྱོར་ལ་བརྩོན་པར་བྱའོ། །སེམས་ཅན་དོན་བྱེད་ནི། བྱང་སེམས་ཀྱིས་སེམས་ཅན་ལ་ཕན་འདོགས་པ་ཡིན་ལ། དེ་ལ་དོན་བྱ་བ་བཅུ་གཅིག་ཏུ་བཤད་ཀྱང་དེར་ངེས་པ་ནི་མ་ཡིན་ཏེ། བྱང་སེམས་ཀྱིས་སེམས་ཅན་གྱི་དོན་བྱེད་པའི་ཚུལ་དཔག་ཏུ་མེད་པ་ཡོད་པའི་ཕྱིར་རོ། །མདོར་ན་སེམས་ཅན་ལ་བསམ་སྦྱོར་གཉིས་ཀྱི་སྒོ་ནས་ཕན་པའི་བྱ་བ་ཅི་ནུས་བསྒྲུབ་པའི་ཕྱིར་ད་ལྟ་ནས་འབད་ཅིང་མི་ནུས་པ་རྣམས་སྨོན་ཡུལ་དུ་བྱའོ། །གསུམ་པ་ནི། གནོད་བྱེད་དང་སྡུག་བསྔལ་སོགས་ཀྱིས་མི་བརྫི་ཞིང་ཆོས་ལ་མོས་པ་ཤིན་དུ་བརྟན་པའི་སེམས་པ་ནི་བཟོད་པའི་ངོ་བོ་ཡིན་ལ། དེ་ལ་གནོད་པ་ལ་ཇི་མི་སྙམ་པ་དང་། སྡུག་བསྔལ་དང་ལེན་དང་། ཆོས་ལ་ཆོས་སེམས་དང་གསུམ། དང་པོ་ནི། གནོད་བྱེད་ཀྱིས་གནོད་པ་བྱས་པ་ལ་བཟོད་པ་སྟེ། མ་བཟོད་པར་ཁྲོ་ན་ཉེས་དམིགས་དུ་མ་ཡོད་པས་སོ། །སྤྱིར་ཡུལ་གང་ལའང་ཁྲོ་མི་རིགས་ཤིང་། ཁྱད་པར་གྲོགས་ཚངས་པར་མཚུངས་པར་སྤྱོད་པ་དང་། བྱང་སེམས་ལ་ཁོང་ཁྲོས་ན་དགེ་བ་མང་དུ་འཇོམས་པ་སོགས་ཉེས་དམིགས་ཤིན་དུ་ཆེ་བས་ཁོང་ཁྲོ་དགག་པར་བྱའོ། །དེ་ཡང་ད་ལྟ་གནོད་པ་བྱས་པའི་གང་ཟག་ཞིག་ལ་དམིགས་ནས། འདིས་བདག་ལ་གནོད་པ་བྱེད་པ་ནི་གང་གིས་དབང་ཡིན་སྙམ་དུ་བརྟག་གོ །དེའི་ཚེ་དེ་ལྟར་བྱེད་པ་དེ་ནི་ཉོན་མོངས་པའི་དབང་ཡིན་པར་ཤེས་ནས་ཁྲོ་བ་དགག །ཡང་དངོས་སུ་གནོད་པ་ནི་དབྱུག་པས་བྱས་ལ་བརྒྱུད་ནས་ཡང་ཞེ་སྡང་གིས་རྦད་པས་དངོས་བརྒྱུད་གང་གི་དབང་བྱས་ཀྱང་གང་ཟག་ལ་ཁྲོ་མི་རིགས་ལ་རྩ་བའི་རྒྱུ་ལ་ཁྲོ་ན་རང་གིས་སྔོན་གཞན་ལ་གནོད་པའི་འབྲས་བུ་ཡིན་པས་རང་གི་སྔོན་ལས་ལ་ཁྲོ་རིགས་ཀྱི། གང་ཟག་དེ་ཉིད་ལ་ཁྲོ་མི་རིགས་སོ། །ཡང་གཞན་གྱིས་ངན་སྨྲས་བྱས་པ་མི་བཟོད་སྙམ་ན། དེ་ཙམ་མི་བཟོད་ན་དམྱལ་བའི་སྡུག་བསྔལ་ཇི་ལྟར་བཟོད་སྙམ་དུ་བསམ། སྡུག་བསྔལ་དང་ལེན་ནི། སྡུག་བསྔལ་དེ་བཅོས་སུ་ཡོད་ན་མི་དགའ་བ་བྱེད་མི་དགོས་ལ་བཅོས་སུ་མེད་ན་ནི་མི་དགའ་བ་བྱས་ཀྱང་གནོད་པ་ལས་མི་ཕན་པའི་ཚུལ་བསམ། གཞན་ཡང་སྡུག་བསྔལ་ཡོད་ན། དེས་ཡིད་ཐར་པ་ལས་བསྐུལ། དྲེག་པ་སེལ། སྡིག་ལ་འཛེམ། དགེ་བ་བསྒྲུབ་པ་ལ་དགའ། གཞན་ལ་སྙིང་རྗེ་སྐྱེ་བའི་ཡོན་ཏན་རྣམས་འབྱུང་བས་སྡུག་བསྔལ་འདི་ནི་དགེ་བའི་བཤེས་གཉེན་དང་འདྲ་བར་འདོད་པའི་གནས་སོ་སྙམ་དུ་བསམ། འདི་ཡོད་ན་རང་གིས་སྔོན་བྱས་པའི་ལས་ངན་གྱི་འབྲས་བུ་མཛད་ཅིང་། སྡུག་བསྔལ་དེའམ་སེམས་ཅན་གཞན་གྱི་སྡུག་བསྔལ་རྒྱུ་དང་བཅས་པ་དང་དུ་ལེན་པའི་བློ་མྱོང་ཐོག་ནས་འདྲེན་པ་སོགས་ཡོན་ཏན་མང་དུ་འབྱུང་བར་བསམ་མོ། །ཆོས་ལ་ངེས་སེམས་ནི། དཀོན་མཆོག་གསུམ་དང་ལས་འབྲས་དང་བདག་མེད་གཉིས་སོགས་དང་། གསུང་རབ་ཀྱི་དོན་ལ་ཐོས་བསམ་ཕྱོགས་རིས་མེད་པར་བྱེད་པར་མོས་པ་སོགས་སོ། །བཞི་པ་ནི། དགེ་བ་བསྡུ་བ་དང་སེམས་ཅན་གྱི་དོན་དུ་སེམས་མངོན་པར་སྤྲོ་བ་ནི་བརྩོན་འགྲུས་ཀྱི་ངོ་བོ་ཡིན་ལ། དེ་ལ་གོ་ཆ། དགེ་བ་ཆོས་སྡུད། སེམས་ཅན་དོན་བྱེད་དང་གསུམ། དང་པོ་ནི། སེམས་ཅན་མང་བོའི་དོན་དུ་ལྟ་ཞོག །སེམས་ཅན་གཅིག་གི་དོན་དུའང་བསྐལ་བ་ཆེན་པོ་གྲངས་མེད་པའི་བར་དམྱལ་བར་གནས་ཏེ་སངས་རྒྱས་བསྒྲུབ་དགོས་པ་བྱུང་ཡང་བརྩོན་པ་མི་གཏོང་བའོ། །དགེ་བ་ཆོས་སྡུད་ནི། ཕྱིན་དྲུག་རྫོགས་པར་བྱ་བའི་ཕྱིར་དེ་དག་ལ་སློབ་ཅིང་དཀོན་མཆོག་མཆོད་པ་སོགས་ལ་བརྩོན་པའོ། །སེམས་ཅན་དོན་བྱེད་ནི། དོན་བྱ་བ་བཅུ་གཅིག་གི་སྒོ་ནས་སེམས་ཅན་གྱི་དོན་ལ་བརྩོན་པའོ། །བརྩོན་འགྲུས་ཀྱི་མི་མཐུན་ཕྱོགས་ལ། ད་རུང་ལོང་ཡོད་སྙམ་ནས་ཕྱི་བཤོལ་བྱེད་པའི་ལེ་ལོ། གནས་སྐབས་ཀྱི་དམན་པའི་བདེ་བ་ཕྲ་མོ་ལ་ཆགས་ཤིང་གཡེང་བའི་ལེ་ལོ། །དེ་འདྲ་བདག་གིས་མི་ནུས་སྙམ་ནས་སྒྱིད་ལུག་པ་དང་བྱ་དཀའ་བ་དང་སྡུག་བསྔལ་ལ་འཇིགས་ནས་ཞུམ་པའི་ལེ་ལོ་རྣམས་བྱུང་ན་དགག་པར་བྱའོ། །ལྔ་བ་ནི། དགེ་བའི་དམིགས་པ་ལ་མི་གཡེང་བར་གནས་པའི་སེམས་རྩེ་གཅིག་པ་ནི་བསམ་གཏན་གྱི་ངོ་བོ་ཡིན་ལ། དེ་ལ་ལུས་སེམས་བདེར་གནས། ཡོན་ཏན་མངོན་གྲུབ། སེམས་ཅན་དོན་བྱེད་དང་གསུམ། དང་པོ་ནི། ལུས་སེམས་ཤིན་སྦྱངས་བསྐྱེད་པའི་བསམ་གཏན། གཉིས་པ་ནི། མངོན་ཤེས་སོགས་ཡོན་ཏན་སྒྲུབ་པའི་བསམ་གཏན། གསུམ་པ་ནི། སེམས་ཅན་གྱི་དོན་བྱེད་པའི་བསམ་གཏན་ནོ། །བསམ་གཏན་གྱི་གཙོ་བོ་ཞི་ལྷག་གཉིས་ལས་འདིར་ཞི་གནས་བསྒོམ་ཚུལ་མདོར་བསྡུས་ཏེ་བསྟན་པ་ལ། བསྒོམ་པའི་གནས་ནི། མཐུན་རྐྱེན་རྙེད་སླ་བ། གནས་བཟང་བ། ས་བཟང་བ་སོགས་ཀྱི་ཡིད་དང་མཐུན་པར། རྟེན་གྱི་གང་ཟག་འདོད་ཆུང་ཆོག་ཤེས་པ་སོགས་ཀྱི་ཡོན་ཏན་དང་ལྡན་པས། སྤྱིར་དམིགས་པའི་ཡུལ་མང་ཡང་སངས་རྒྱས་རྗེས་སུ་དྲན་པ་དང་ཚོགས་རྫོགས་པ་སོགས་ཀྱི་དགོས་པ་ཡོད་པས་ན། སངས་རྒྱས་ཀྱི་སྐུ་བརྙན་དམིགས་རྟེན་དུ་བྱ་བ་ནི། སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ། སྟོན་པའི་སྐུ་བརྙན་བྲིས་འབུར་ལེགས་པ་གཅིག་ལ་ཡང་ཡང་བལྟ་ཞིང་དེའི་མཚན་མ་བཟུང་ནས་ཡིད་ཡུལ་དུ་འཆར་བ་གོམས་སུ་བཅུག་སྟེ། དབུ་སོགས་སྐུའི་ཆ་ཤས་གསལ་གདབ། མཐར་སྐུའི་སྤྱི་ཡིད་ལ་བྱས་ནས་ཡན་ལག་རགས་པ་རྣམས་ཆ་ཕྱེད་ཙམ་འཆར་ཐུབ་པ་བྱུང་ཡང་དམིགས་རྟེན་ཡིན་པས་དེས་ཆོག་ཤེས་པར་བྱ། གཞུང་ནས་བཤད་པའི་སྤྱོད་ལམ་བརྒྱད་ལ་གནས་བཞིན་པར་རླུང་འགྲོ་འོང་ཉེར་གཅིག་སོགས་བགྲང་། དེ་ནས་ཏིང་ངེ་འཛིན་བསྒྲུབ་པ་ལ་མི་སྤྲོ་བའི་ལེ་ལོ་དང་། དམིགས་པ་བརྗེད་པ་དང་། བྱིང་རྒོད་དང་། འདུ་བྱེད་དང་། འདུ་མི་བྱེད་པ་སྟེ་ཉེས་པ་ལྔའི་གཉེན་པོར་བརྩོན་འགྲུས་དང་། འདུན་པ་དང་། དད་པ་དང་། ཤིན་སྦྱངས་དང་། དྲན་པ་དང་། ཤེས་བཞིན། གཉེན་པོ་འདུ་བྱེད་པ་དང་། འདུ་མི་བྱེད་པའི་བཏང་སྙོམས་ཏེ་འདུ་བྱེད་བརྒྱད་བསྟེན་པའི་སྒོ་ནས་བསྒྲུབ་དགོས་པས། དེ་ལ་ཐོག་མར་ཏིང་ངེ་འཛིན་གྱི་ཡོན་ཏན་མཐོང་བའི་དད་པས་དྲང་པའི་འདུན་པ་དྲག་པོས། འདྲིས་པར་བྱས་པའི་སངས་རྒྱས་ཀྱི་སྐུ་དེ་གསེར་བཙོ་མ་ལྟ་བུ་མཚན་དཔེས་སྤྲས་ཤིང་འོད་ཟེར་འཕྲོ་བ་ཆེ་ཆུང་འཚམས་པ་ཞིག་སངས་རྒྱས་དངོས་ཀྱི་རྣམ་པ་རང་གི་སྨིན་འཚམས་ཀྱི་ནམ་མཁར་གསོལ་བཏབ་ལ། དམིགས་ཡུལ་དེ་ཉིད་ངེས་པའི་འཛིན་སྟངས་དམ་པ་ངེས་ཤེས་ཀྱི་ངར་ཐོན་པའི་གསལ་ཆ་དང་། དྲན་པས་མི་གཡེང་པའི་གནས་ཆ་བརྟན་པོ་གཉིས་དང་ལྡན་པའི་སྒོ་ནས་མི་བརྗེད་པར་བྱ། དེའི་མུ་ནས་བྱིང་རྒོད་བྱུང་མ་བྱུང་བརྟགས་ཏེ་སྐྱེ་བའི་གྲབ་བྱེད་ན་ཤེས་བཞིན་གྱིས་རིག་པར་བྱ། དམིགས་པའི་དྭངས་ཆ་ཡོད་ཀྱང་གསལ་ཆ་དང་འཛིན་སྟངས་ཀྱི་ངར་ཆའི་ཤུགས་ཅུང་ཟད་ཞན་དུ་སོང་ན་བྱིང་བ་ཕྲ་མོ་སྐྱེས་པ་ཡིན་པས་སེམས་ཀྱི་འཛིན་སྟེངས་བསྒྲིམས་ཏེ་བསྒོམ། གསལ་ཆའི་ངར་ཧད་ཀྱིས་ཤོར་ནས་དྭངས་ཆ་ཙམ་ལས་མི་འདུག་ན་བྱིང་བ་རགས་པ་ཡིན་པས་ངོ་ཤེས་པར་བྱས་ལ་བཟློག་ཐབས་བྱ། འདོད་པའི་ཡུལ་ཡིད་དུ་འོང་བ་འཆར་ལ་ཁད་བྱུང་ན་རྒོད་པ་ཕྲ་མོ་ཡིན་པས་སེམས་འཕྲོ་གྲབ་བྱེད་པ་བཀག་ནས་དམིགས་པར་གདགས། འདོད་ཆགས་ཀྱི་རྣམ་པ་ཧད་ཀྱིས་བྱུང་ན་རྒོད་པ་རགས་པ་ཡིན་པས་ངོས་ཟིན་པར་བྱས་ནས་འགོག །དེ་ལྟར་བྱིང་རྒོད་བཀག་ནས་གྲིམ་ལྷོད་རན་པའི་མཚམས་ཟིན་པར་བྱས་ཏེ་རང་ཉམས་ལ་དཔག་ནས་བསྒོམས་པས་ཏིང་ངེ་འཛིན་སྐྱོན་མེད་འགྲུབ་པོ། དེས་མ་གྲུབ་ནའང་སྟོབས་དྲུག་གི་སྒོ་ནས་སེམས་གནས་དགུ་དང་ཡིད་བྱེད་བཞིའི་རིམ་པས་བསྒྲུབ་པ་ནི། ཐོག་མར་དང་པོ་ཐོས་པའི་སྟོབས་ཀྱིས་སེམས་གནས་དང་པོ་དམིགས་པ་ལ་སེམས་འཇོག་པ་བསྒྲུབ། དེ་ནས་གཉིས་པ་བསམ་པའི་སྟོབས་ཀྱིས་སེམས་གནས་གཉིས་པ་དམིགས་པ་ལ་རྒྱུད་དུ་འཇོག་པ་བསྒྲུབ། དེ་ནས་གསུམ་པ་དྲན་པའི་སྟོབས་ཀྱིས་སེམས་གནས་གསུམ་པ་དམིགས་པ་ལ་བླན་ཏེ་འཇོག་པ་དང་། བཞི་པ་གོང་དུ་ཉེ་བར་འཇོག་པ་བསྒྲུབ། དེ་ནས་བཞི་པ་ཤེས་བཞིན་གྱི་སྟོབས་ཀྱིས་སེམས་གནས་ལྔ་བ་ཏིང་ངེ་འཛིན་ལ་དགའ་བ་དུལ་བར་བྱེད་པ་དང་། དྲུག་པ་ཏིང་ངེ་འཛིན་ལ་མི་དགའ་བ་འགོག་པ་ཞི་བ་བྱེད་པ་བསྒྲུབ། དེ་ནས་ལྔ་པ་བརྩོན་འགྲུས་ཀྱི་སྟོབས་ཀྱི་སེམས་གནས་བདུན་པ་གཉིད་རྨུགས་སོགས་རྣམ་པར་ཞི་བར་བྱེད་པ་དང་། སེམས་གནས་བརྒྱད་པ་བྱིང་རྒོད་སོགས་ཀྱིས་བར་གཅོད་མི་ནུས་པར་རྒྱུན་ཆགས་སུ་སྐྱེ་བ་གཅིག་ཏུ་བྱེད་པ་བསྒྲུབ། དེ་ནས་དྲུག་པ་འདྲིས་པའི་སྟོབས་ཀྱིས་སེམས་གནས་དགུ་པ་དམིགས་པ་ལ་རང་གི་རང་གིས་མཉམ་པར་འཇོག་པ་ཞེས་བྱ་བ་བསྒྲུབ་པོ། དེ་ཡང་སེམས་གནས་དང་པོ་གཉིས་ཀྱི་སྐབས་སུ་ཡིད་བྱེད་བཞིའི་ནང་ནས་བསྒྲིམས་ཏེ་འཇུག་པའི་ཡིད་བྱེད་དང་། གསུམ་པ་ནས་བདུན་པའི་བར་ཆད་ཅིང་འཇུག་པའི་ཡིད་བྱེད་དང་། བརྒྱད་པའི་ཚེ་ཆད་མེད་དུ་འཇུག་པའི་ཡིད་བྱེད་དང་། དགུ་པའི་དུས་སུ་རྩོལ་མེད་དུ་འཇུག་པའི་ཡིད་བྱེད་ཀྱི་སྐབས་སོ། །སེམས་གནས་དགུ་པ་དེ་ཉིད་ཞི་གནས་རྗེས་མཐུན་པ་ཡིན་ལ། དེ་ནས་སེམས་ཤིན་སྦྱངས་སྐྱེ་ཞིང་དེ་ལ་བརྟེན་ནས་ལུས་ཤིན་སྦྱངས་སྐྱེས་པ་དེའི་མཐུས་ལུས་ལ་བདེ་བའི་ཉམས་སྐྱེ། དེ་ནས་སེམས་ཤིན་སྦྱངས་ཀྱི་བདེ་བ་སྐྱེའོ། །ལུས་ཤིན་སྦྱངས་སྐྱེས་མ་ཐག་ཏུ་ཞི་གནས་ཅུང་མ་ཐོབ་ཀྱང་། དེ་ནས་སེམས་དམིགས་པ་ལ་ལྷན་ནེར་སྡོད་པའི་ཏིང་ངེ་འཛིན་དང་རྗེས་སུ་མཐུན་པའི་ཤིན་སྦྱངས་མི་གཡོ་བ་ཐོབ་པ་དང་མཉམ་དུ་བསམ་གཏན་དང་པོའི་ཉེར་བསྡོགས་ཀྱིས་བསྡུས་པའི་ཞི་གནས་འགྲུབ་པ་ཡིན་ལ། གེགས་སེལ་བོགས་འདོན་སོགས་རྒྱས་པར་གཞུང་ཆེ་བ་རྣམས་ནས་ཤེས་པར་བྱའོ། །དེ་འདྲའི་ཞི་གནས་དེ་ཐེག་པ་གཉིས་ཀའི་ཏིང་འཛིན་ཐུན་མོང་བ་ཡིན་བམ་གང་གི་བསམ་པས་ཟིན་ན་དེའི་བྱང་ཆུབ་ཐོབ་པའི་རྒྱུར་འགྱུར་རོ། །དྲུག་པ་ནི། བརྟགས་པའི་དངོས་པོ་ལ་ཆོས་རབ་ཏུ་རྣམ་པར་འབྱེད་པ་ནི་ཤེས་རབ་ཀྱི་ངོ་བོ་ཡིན་ལ། ཤེས་རབ་དེ་རྫོགས་བྱང་ཉིད་དུ་བསྔོ་བའི་བསྔོ་བས་ཟིན་ནས་གོམས་པ་ཡོངས་སུ་རྫོགས་པ་ནི་དེའི་ཕར་ཕྱིན་ཏེ། ཤེར་ཕྱིན་དང་ཤེས་རབ་ཀྱི་ཕར་ཕྱིན་དོན་གཅིག་ཏུ་མི་འདོད་པ་ནི་ལེགས་སྙམ། དེ་ལ་དོན་དམ་དང་ཀུན་རྫོབ་རྟོགས་པའི་ཤེས་རབ། སེམས་ཅན་གྱི་དོན་བྱེད་པའི་ཤེས་རབ་གསུམ། དང་པོ་ནི། བདག་མེད་པའི་རྟོགས་པའི་ཤེས་རབ། གཉིས་པ་ནི། རིག་པའི་གནས་ལྔ་གང་རུང་ལ་མཁས་པའི་ཤེས་རབ། གསུམ་པ་ནི། སེམས་ཅན་གྱི་དོན་ལེགས་པར་བསྒྲུབ་པའི་ཤེས་རབ་པོ། འདིར་ཤེས་རབ་ཀྱི་གཙོ་བོ་དེ་ཁོ་ན་ཉིད་རྟོགས་པའི་ཤེས་རབ་གཏན་ལ་དབབ་པར་བྱའོ། །འདི་ལ་གཉིས། མཉམ་གཞག་དང་། རྗེས་ཐོབ་པོ། དང་པོ་ལ་གཉིས། བདག་མེད་གཏན་ལ་དབབ་པ་དང་། ལྷག་མཐོང་བསྒོམ་ཚུལ་ལོ། །དང་པོ་ལ་གཉིས། གང་ཟག་གི་བདག་མེད་དང་། ཆོས་ཀྱི་བདག་མེད་གཏན་ལ་འབེབས་པའོ། །དང་པོ་ལ་དགག་བྱ་ངེས་པའི་གནད་སོགས་བཞི་ལས། དང་པོ་ནི། དཔེར་ན། རང་ལ་མི་ཞིག་གིས་ཕན་ཆེན་པོ་ཞིག་བཏགས་པའམ་གནོད་པ་ཆེན་པོ་ཞིག་བྱས་པའི་ཚེ། ང་ལ་ཕན་བཏགས་བྱུང་སྙམ་པ་དང་། གནོད་པ་བྱས་བྱུང་སྙམ་པའི་ཕན་གནོད་བྱ་ཡུལ་གྱི་ང་ཚང་བ་ཞིག་སྙིང་དཀྱིལ་ནས་ལྷང་ལྷང་འཆར་བ་ཡོད་པས། དེའི་ཚེ་ངར་འཛིན་ལྷན་སྐྱེས་ཀྱི་འཛིན་ཚུལ་གསལ་ལོ། །དེ་ད་ལྟ་མེད་ཀྱང་གསལ་བཏབ་སྟེ་སྐྱེར་བཅུག་ནས་བློའི་བྱིངས་དེ་ངའོ་སྙམ་པའི་བློ་ཇི་ལྟར་སྐྱེས་པ་དེ་ལ་དམིགས་ནས། བློའི་ཟུར་ཞིག་གིས་ངར་འཛིན་དེས་ང་དེ་གང་དུ་བཟུང་། ཇི་ལྟར་བཟུང་སྙམ་དུ་བལྟ། དེ་ལྟར་བལྟས་པས་དེ་རེས་ལུས་ཀྱི་སྟེང་དུ་ཡོད་པ་དང་རེས་སེམས་ཀྱི་སྟེང་དུ་ཡོད་པ་འདྲ་བ་སོགས་འཆར་ཚུལ་སྣ་ཚོགས་ཞིག་བྱུང་བའི་མཐར་ལུས་སེམས་གཉིས་དང་འདྲེས་པ་ལྟར་འབྱེད་མི་ཐུབ་པ་འདྲ་བ་ཞིག་གི་སྟེང་ནས། གང་ལ་ཡང་བལྟོས་པ་མེད་པར་ང་རང་གི་ངོས་ནས་ཡོད་པའི་ཚུགས་ཐུབ་གདོད་མ་ནས་གྲུབ་གྲུབ་པ་ཞིག་འཆར་འོང་བ་ངོས་ཟིན་པ་ནི་དགག་བྱ་ངེས་པའི་གནད་དེ་ལེགས་པར་ངེས་པར་བྱ། གཉིས་པ་ནི། དེ་ལྟར་བཟུང་བའི་ང་དེ། རང་གི་ལུས་སེམས་འདི་དང་གཅིག་དང་ཐ་དད་གང་ཆུང་ངམ། དེ་གང་རུང་མ་ཡིན་པ་ཞིག་སྙམ་པ་ན། ཡོད་ཕྱིན་གཅིག་དང་ཐ་དད་གང་རུང་ཡིན་དགོས་པས་དེ་གཉིས་གང་རུང་མ་ཡིན་པའི་ཕུང་གསུམ་མེད་པར་རྟོགས་པ་ནི་ཁྱབ་པ་ངེས་པའི་གནད། གསུམ་པ་ནི། དེ་འདྲའི་ང་དེ་ལུས་སེམས་གཉིས་དང་གཅིག་ཏུ་གྲུབ་བམ་སྙམ་ན། མི་འཐད་དེ། གཅིག་ཏུ་གྲུབ་ན་དབྱེར་མེད་ཀྱི་གཅིག་ཏུ་སོང་བས་དབྱེར་མེད་ཀྱི་གཅིག་པ་ནི་ང་ཞེས་ལུས་སེམས་གཉིས་ཀྱི་ཉེ་བར་ལེན་པ་པོ་དང་། ངའི་ལུས་སེམས་ཞེས་དེའི་ཉེ་བར་བླང་བྱའི་ཁྱད་པར་ཐ་དད་དུ་མེད་པར་འགྱུར་བའི་ཕྱིར་རོ། །ང་ལུས་སེམས་ལས་ཐ་དད་མེད་པར་ཁས་བླངས་དུ་མི་རུང་ལྟ། དེ་ལྟར་ན་ངའི་ལུས་ངའི་སེམས་ཞེས་པ་སོགས་མི་འཐད་པས། ལུས་ཞི་བ་དང་སེམས་ནི་ངའོ་ཞེས་པ་ཙམ་དུ་འགྱུར་བས་ཕུང་པོ་འདོར་ལེན་བྱེད་པའི་བདག་ཁས་ལེན་པ་དོན་མེད་དུ་ཐལ་བའི་ཕྱིར་རོ། །གཞན་ཡང་ང་ལུས་དང་གཅིག་ཡིན་ན་མི་འཐད་དེ། ཤི་བའི་འོག་ཏུ་ལུས་མེར་བསྲེགས་པའི་ཚེ་ང་ཡང་མེར་བསྲེགས་དགོས་པ་དང་། ང་ཕྱི་མར་ཉིང་འཚམས་སྦྱོར་བའི་ཚེ་ལུས་འདི་དང་བཅས་བཞིན་དུ་སྐྱེ་དགོས་པ་སོགས་སུ་འགྱུར་རོ། །སེམས་དང་གཅིག་ཡིན་ནའང་མི་འཐད་དེ། ང་ལ་མགོ་རྐང་ལག་སོགས་ཡོད་པ་བཞིན་དུ་སེམས་ལ་ཡང་དེ་དག་ཡོད་པར་འགྱུར་བའི་ཕྱིར་རོ། །ཡང་ན། ལུས་སེམས་གཉིས་ཡོད་པ་ལྟར་ང་ཡང་མི་འདྲ་བ་གཉིས་ཡོད་པར་འགྱུར་བས། དེ་ལྟར་གཅིག་ཏུ་མ་གྲུབ་སྙམ་དུ་ངེས་པ་ནི། བདེན་པའི་གཅིག་བྲལ་ངེས་པའི་གནད་དོ། །བཞི་བ་ནི། གཅིག་ཏུ་མི་རུང་བས་དེ་འདྲའི་ང་དེ་ལུས་སེམས་གཉིས་ལས་ཐ་དད་དོ་སྙམ་ན། སྤྱིར་ཐ་སྙད་ཙམ་དུ་ང་ལུས་སེམས་གཉིས་དང་ཐ་དད་དུ་འཇོག་ཀྱང་སྔར་ལྟར་གཞན་ལ་རག་མ་ལས་པ་ལྟ་བུའི་ང་དེ་ལུས་སེམས་དང་ཐ་དད་དུ་གྲུབ་ནའང་མི་རུང་སྟེ། དེ་ལྟ་ན་རང་བཞིན་གྱིས་གྲུབ་པའི་ཐ་དད་དུ་སོང་བས་གཏན་ནས་མ་འབྲེལ་བའི་ཐ་དད་དུ་གྲུབ་པར་འགྱུར་བའི་ཕྱིར་འདི་ནི་ལུས་སོ། །འདི་ནི་སེམས་མོ་ཞེས་བློས་འཛིན་རྒྱུར་ཡོད་པ་ལྟར་ལུས་སེམས་སོ་སོར་བསལ་བའི་འོག་ཏུ་འདི་ནི་ངའོ་ཞེས་འཛིན་རྒྱུ་ཡོད་དགོས་པ་ལས་དེ་མི་འདུག་པའི་ཕྱིར་ཏེ། ལུས་སེམས་ཚོགས་པའི་སྟེང་ནས་ངར་འདོགས་པའི་ཕྱིར་རོ། །དེ་ལྟར་དཔྱད་ནས་ངེས་པ་རྙེད་པ་ནི་བདེན་པའི་དུ་བྲལ་ངེས་པའི་གནད་དོ། །ཡང་ན་ལུས་སེམས་གཉིས་ཀྱི་དོད་དུ་གཟུགས་སོགས་ཕུང་པོ་ལྔ་ཞེས་སྦྱོར། དེ་ལྟར་གནད་བཞིའི་དཔྱད་པ་བྱས་པས་སྔར་ལྟར་རང་བཞིན་གྱིས་གྲུབ་པའི་ཚུགས་སེ་བའི་ང་མ་རྙེད་པར་སྟོང་ཆམ་གྱིས་སོང་བ་ན་དབུ་མའི་ལྟ་བ་རྙེད་པ་ཡིན་གསུངས། གཉིས་པ་ནི། རང་གི་ལུས་འདིའི་སྟེང་དུ་ཡན་ལག་ཚོགས་པ་ལ་མ་བལྟོས་པར་ལུས་ལིངས་པོ་ཞིག་ཡུལ་སྟེང་ནས་གྲུབ་གྲུབ་པར་འཆར་བ་ངོས་ཟིན་པར་བྱས་ནས་དེ་ལྟར་ཤར་བ་ལྟར་བཟུང་བའི་ལུས་དེ། ཡན་ལག་རྣམས་དང་གཅིག་གམ། ཐ་དད། དང་པོ་ལྟར་ན་མི་འཐད་དེ། ཡན་ལག་སྤྱི་ཙམ་དང་གཅིག་ཡིན་ན་ནི་ལུས་དང་ཡན་ལག་གཅིག་ཏུ་ཐལ་བས། དེ་ལྟ་ན་བྱ་བྱེད་ཐམས་ཅད་ཀྱང་གཅིག་ཏུ་འགྱུར་ལ། ཡན་ལག་སོ་སོ་དང་གཅིག་ན། ཡན་ལག་མང་པོ་ཡོད་པ་དེ་བཞིན་དུ་ལུས་ཀྱང་ཚང་བ་མང་པོ་ཡོད་པར་འགྱུར་བའི་ཕྱིར་རོ། །ཐ་དད་ནའང་མི་འཐད་དེ། སྤྱིར་ལུས་ཡན་ལག་དང་ངོ་བོ་གཅིག་ལ་ལྡོག་པ་ཐ་དད་ཀྱང་། སྔར་ལྟར་བཟུང་བའི་ལུས་དེ་ཡན་ལག་རྣམས་དང་ཐ་དད་ན་ནི་དེ་དག་ལ་མ་བལྟོས་པར་ལུས་གྲུབ་དགོས་པས། ཡན་ལག་རྣམས་སོ་སོར་བསལ་པའི་འོག་དུ་ད་དུང་ཡང་ལུས་རིལ་བོ་ཞིག་ཡོད་པར་ཐལ་བར་འགྱུར་བའི་ཕྱིར་རོ། །དེ་བཞིན་དུ་ཀ་བུམ་སོགས་ཆོས་གཞན་ལའང་སྦྱོར། གཉིས་པ་ནི། ཐོག་མར་གང་ཟག་གི་བདག་མེད་གཏན་ལ་ཕབ་པ་ལྟར་ང་མེད་པ་ལྷང་གིས་ངེས་པ་ན་དགག་བྱ་བཀག་ཙམ་གྱི་མེད་དགག་ལ་ངེས་ཤེས་ཀྱི་རྒྱུན་འཐུད་ནས་མཉམ་པར་འཇོག་ཅིང་། ཤུགས་ཞན་དུ་སོང་ན་གནད་བཞིའི་དཔྱད་པ་ཅུང་ཟད་རེ་བྱས་ནས་དེ་ལྟར་དུ་གྲུབ་པ་མེད་སྙམ་དུ་མཉམ་པར་བཞག་སྟེ། སྔར་ཞི་གནས་གྲུབ་པ་ཡིན་ན། དཔྱད་བསྒོམ་སྤེལ་མར་བྱས་པའི་མཐུས་ལྷག་མཐོང་ཐོབ་ནས་ཞི་ལྷག་ཟུང་འབྲེལ་དུ་འགྱུར་རོ། །གཉིས་པ་རྗེས་ཐོབ་ཏུ། སྔར་དཔྱད་པ་ལྟར་ཡུལ་སྟེང་ན་མེད་བཞིན་དུ། སྒྱུ་མའི་རྟ་གླང་ལྟར་བཏགས་ཡོད་མིང་རྐྱང་ཙམ་དུ་འཆར་བ་ཞིག་འོང་། གལ་ཏེ་རང་བཞིན་གྱིས་གྲུབ་པར་ལམ་ལམ་ལྟར་བྱུང་ནའང། ལྟ་བ་དྲན་ཙམ་བྱས་ནས་སྣང་ཚུལ་ལྟར་མ་གྲུབ་སྙམ་དུ་ཐག་བཅད་པའི་དྲན་ཤེས་ཀྱིས་སྐྱོང་། གཞན་ཡང་ཆོས་གང་དང་གང་ཡང་མིང་བརྡས་བཞག་ཙམ་གྱི་རྟེན་འབྱུང་དུ་ངེས་པ་ཉིད་ཀྱིས་རང་བཞིན་མེད་པའི་ཚུལ་ལ་ངེས་ཤེས་འདྲོངས་པ་དང་། དེ་ལྟར་ངེས་པ་ཉིད་ཀྱིས་བྱ་བྱེད་ཐམས་ཅད་འཐད་པའི་རྟེན་འབྱུང་ལ་ངེས་པ་འདྲེན་པའི་ཚུལ་ཤེས་པའི་སྒོ་ནས་སྟོང་པ་རྟེན་འབྲེལ་གྱི་དོན་དུ་འཆར་བ་ལ་བསླབ་པར་བྱའོ། །གཉིས་པ་བསྡུ་བཞི་ལ་སློབ་ཚུལ་ནི། དེ་ལྟར་རང་རྒྱུད་སྨིན་བྱེད་ཀྱི་ཕྱིན་དྲུག་ལ་བསླབ་ནས་ཟང་ཟིང་སོགས་སྦྱིན་པ་གསུམ་གྱིས་འཁོར་བསྡུ། ཆོས་གཏམ་སོགས་ཀྱི་སྙན་པར་སྨྲ་བས་ཐེ་ཚོམ་གཅོད་པ་སོགས་ཀྱིས་མགུ་བར་བྱ། མངོན་མཐོ་སོགས་གདུལ་བྱའི་བློ་དང་འཚམས་པར་བསྟན་པའི་དོན་སྤྱོད་པས་ཡང་དག་པའི་ལམ་ལ་བཀྲི། རང་ཉིད་ཚུལ་འཐུན་བསྒྲུབ་པའི་དོན་མཐུན་པས་དེའི་དོན་དུ་འགྱུར་བའི་ཚུལ་ལ་བསླབ་པར་བྱའོ། །གསུམ་པ་མཇུག་གི་རིམ་པ་ལ་ནི། སྔར་བཤད་པ་ལྟར་ཉམས་ལེན་བྱས་ནས་སྙིང་པོ་བསྒྲིལ་ཏེ་ཉམས་སུ་ལེན་པ་ནི། དལ་འབྱོར་རྙེད་དཀའ་བ་སོགས་བསམས་ནས་སྐྱབས་སེམས་བྱས་རྗེས། ཚོགས་ཞིང་བླ་མའི་རྣལ་འབྱོར་དང་འབྲེལ་བའི་སྡིག་བཤགས་ཚོགས་གསོགས་ལ་འབད་ཅིང་། དངོས་གཞི་གཏོང་ལེན་སྤེལ་བའི་བྱང་ཆུབ་ཀྱི་སེམས་དང་སྟོང་ཉིད་ལ་དམིགས་པའི་ཞི་ལྷག་བསྒྲུབ་པ་ལ་གཙོ་བོར་འབད་པ་དང་མཐར་དགེ་བ་རྫོགས་བྱང་དུ་བསྔོ་བར་བྱའོ། །ལམ་སྤྱིའི་དོན་བསྡུ་ན། ཐོག་མར་བཤེས་གཉེན་བསྟེན་པ་ལ་འབད། དེ་ནས་དལ་འབྱོར་གྱི་སྐོར་བསམ་ཞིང་འཆི་བ་མི་རྟག་པ་དང་ཤི་ནས་ངན་འགྲོར་འཁྱམས་ཚུལ་བསམས་ཏེ་སྐྱབས་འགྲོའི་སྐོར་ལ་འབད། དེ་ནས་ལས་འབྲས་བསམས་ནས་སྟོབས་བཞི་ལ་འབད་དོ། །དེ་ལྟར་ཆུང་ངུའི་ཆོས་སྐོར་རྣམས་ཚགས་སུ་ཆུད་པ་ན། འཁོར་བའི་ཉེས་དམིགས་བསམས་ཏེ་འཁོར་བ་ལས་ཐར་འདོད་བསྐྱེད། དེ་ནས་འཁོར་བའི་རྒྱུ་ངོས་བཟུང་ནས་དེ་སྤོང་འདོད་བསྐྱེད་ཅིང་། རྟེན་འབྲེལ་གྱི་སྐོར་ལའང་དེ་ལྟར་བྱ། དེ་ནས་འཁོར་བ་ལས་གྲོལ་བྱེད་ཀྱི་ལམ་སྤྱི་དང་སོ་ཐར་ལ་འབད་དོ། །དེ་ལྟར་འབྲིང་གི་སྐོར་རྣམས་ཚགས་སུ་ཆུད་པ་ན། བྱམས་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་སྦྱངས་ནས་སྤྱོད་པ་ཕྱིན་དྲུག་ལ་ཅི་ནུས་སུ་བསླབ་པར་བྱའོ། །དེ་ལྟ་བུའི་ལམ་གྱི་རིམ་པ་ནི་རྒྱལ་བ་དགྱེས་པའི་ལམ་སྲོལ་རྨད་དུ་བྱུང་ཞིང་། གསུང་རབ་ཀུན་གྱི་གནད་དོན་བསྡུས་པ་ཡིན་པས་ཐོས་བསམ་ཅུང་ཟད་རེ་བྱས་པས་ཀྱང་ཕན་ཡོན་ཆེན་པོ་མང་དུ་འབྱུང་སྟེ། རྗེའི་ཞལ་ནས། གསུང་རབ་ཀུན་གྱི་སྙིང་པོ་བསྡུ་བསྡུ་བ་། རླབས་ཆེན་སྡུད་པར་ངེས་པས་དེ་དོན་བསམ། ཞེས་གསུངས་པའི་ཕྱིར་ན་ཉམས་ལེན་སྙིང་པོར་བྱེད་པར་རིགས་སོ། །སྨྲས་པ། རྒྱལ་བ་ཀུན་གྱི་བགྲོད་པ་གཅིག་པའི་ལས། །ཤིང་རྟ་ཆེན་པོ་རྣམས་ཀྱི་བཞེད་པའི་སྲོལ། །སྐྱེས་བུ་གསུམ་གྱི་ལམ་མཆོག་ཡིད་བཞིན་ནོར། །ཐུབ་བསྟན་རྒྱལ་མཚན་རྩེ་མོར་མངོན་པར་མཆོད། །འདིར་འབད་ལས་བྱུང་དགེ་ཚོགས་གསེར་འཁོར་ཆེས། །སྒྲིབ་གཉིས་ཕས་རྒོལ་གཡུལ་ལས་རྣམ་རྒྱལ་ཏེ། །གཏན་བདེ་བླ་མེད་བྱང་ཆུབ་ཆེན་པོའི་སར། །མངོན་པར་སྤྱོད་པའི་སྐལ་བཟང་མྱོང་བར་ཤོག །དེ་ལྟ་བུའི་ལམ་གྱི་རིམ་པ་འདི་ནི། ཕྱོགས་འདིའི་མཁས་པ་ཆེན་པོ་བཟང་བོ་རྒྱལ་མཚན་པའི་དྲུང་ནས་ལམ་རིམ་ཆེན་མོའི་ལུང་དང་། ཁྱད་པར་སློབ་དཔོན་སེམས་དཔའ་ཆེན་པོ་བློ་བཟང་སྦྱིན་པའི་སྐུ་ཞབས་ནས་ཞལ་ལུང་གི་དམར་འཁྲིད་སྩལ་པའི་ཚེ། རང་གིས་ཞལ་ལུང་ནས་སྐྱེས་བུ་ཆུང་འབྲིང་གི་སྐོར་བློ་འཛིན་དང་ཆེན་པོའི་སྐོར་ལ་དེ་ཙམ་བྱེད་པ་མ་བྱུང་ཡང་འཁྲིད་རྒྱུན་ཉན། སྟོང་འཁོར་སྤྲུལ་སྐུ་དང་། སློབ་དཔོན་བློ་བཟང་དོན་གྲུབ་པའི་དྲུང་ནས་ཀྱང་དམར་འཁྲིད་ཀྱི་ལུང་རྒྱུན་བླངས་ཏེ། ཚིག་དོན་གྱི་ཆ་ལ་ཡིད་བཤད་རྒྱས་པར་བྱེད་པའི་རྒྱུན་འཐུད་མ་ལྕོགས་ཀྱང་དོན་གྱི་གནད་དྲིལ་བའི་རྒྱུན་གྱི་ཉམས་ལེན་འཁྱེར་བདེར་བསྡུས་ནས་འབད་ཁུལ་བྱས། གཞན་ལ་ཉམས་འཁྲིད་འབོགས་པ་སོགས་ཀྱི་སྒོ་ནས་རྒྱུན་རྒྱ་ཆེར་སྤེལ་ཐུབ་པ་ཞིག་མ་བྱུང་ཡང་། ཕྱོགས་འདིའི་བསྟན་པའི་མངའ་བདག་ཀཽ་ཤྲི་ནང་སོ་ཡེས་ཀྱིས་རྗེ་བླ་མའི་ལེགས་བཤད་ལ་བརྟེན་ནས་ཚུལ་འདི་ཐོས་བསམ་གྱིས་ཐུགས་སུ་ཆུད་པའི་ཚེ། ལམ་སྲོལ་འདི་ཉིད་བསྟན་པའི་སྙིང་པོར་གཟིགས་ནས། རང་ཕྱོགས་འདིར་གཞན་འགའ་ལའང་ཕན་སྲིད་པར་དགོངས་ཏེ་བཀས་བསྐུལ་བ་དང་། སྡོམ་བརྩོན་རི་ཁྲོད་པ་གྲགས་པ་འོད་ཟེར་གྱིས་ཀྱང་རང་གི་ཉམས་སུ་ལེན་པར་བཞེད་ནས་བསྐུལ་བའི་ཚེ། ཤཱཀྱའི་དགེ་སློང་རིགས་པ་སྨྲ་བ་གྲགས་པ་བཤད་སྒྲུབ་ཀྱིས་རྒྱལ་དབང་ལྔ་པས། ན་ཚོད་ཆེས་ཕྲའི་སྒོ་ངའི་སྦུབས་རྒྱ་ནས། །རྣམ་དཔྱོད་རྩལ་ཀུན་རྫོགས་པ་རབ་དཀའ་མོད། །ལང་ཚོའི་སྒྲོ་གཤོག་རྒྱས་ཀྱང་བཤད་སྒྲུབ་ཀྱི། །ནམ་མཁའ་འཕུར་ནུས་མིན་པའི་བྱ་དེས་ཅི། །ཞེས་གསུངས་པ་ལྟར། རང་ཉིད་ཀྱིས་ཐོས་བསམ་ཅུང་ཟད་བྱས་པའི་འབྲས་རྟགས་ཞིག་ཀྱང་དགོས་སྙམ་ནས་དམར་འཁྲིད་འཇམ་དཔལ་ཞལ་ལུང་གི་དགོངས་པ་གཙོ་བོར་བྱས་ཤིང་ལམ་རིམ་གཉིས་ནས་ཟུར་བརྒྱན་ཧ་ཅང་བཤད་ཡམས་སུ་སོང་ན་དམིགས་པའི་ཐོག་ཏུ་འདྲིལ་དཀའ་བར་མཐོང་ནས་དོན་གྱི་གནད་མ་ཆད་པས་མདོར་བསྡུས་ཏེ་ཅོ་ནེ་ཏིང་འཛིན་དར་རྒྱས་གླིང་ཏུ་སྦྱར་བའོ། །འདིས་ཀྱང་ཆོས་ཀྱི་རྒྱལ་བོ་ཙོང་ཁ་བ་ཆེན་པོའི་བསྟན་པ་ལ་ཕན་པར་གྱུར་ཅིག །བཀྲ་ཤིས།། །།