གཞུང་ལུགས་དུ་མའི་བརྗོད་བྱ་སྣ་ཚོགས་པ་མིང་གི་སྒོ་ནས་གསལ་བར་བསྟན་པ་ཉེར་མཁོ་བློ་ལྡན་དགའ་བྱེད།
གཞུང་ལུགས་དུ་མའི་བརྗོད་བྱ་སྣ་ཚོགས་པ་མིང་གི་སྒོ་ནས་གསལ་བར་བསྟན་པ་ཉེར་མཁོ་བློ་ལྡན་དགའ་བྱེད་ཅེས་བྱ་བ་བཞུགས།
མ་ལུས་ཤེས་བྱ་མངོན་གཟིགས་ཤཱཀྱའི་རྒྱལ། །མཁྱེན་རབ་གཏེར་ཆེན་མི་ཕམ་འཇམ་པའི་དབྱངས། །རྒྱལ་བ་གཉིས་པ་བློ་བཟང་གྲགས་པ་སོགས། །སྐྱབས་གནས་དམ་པ་རྣམས་ལ་གུས་བཏུད་ནས། །ལེགས་གསུངས་བཀའ་དང་དེ་ཡི་དགོངས་འགྲེལ་ལས། །འབྱུང་བའི་བླང་དང་དོར་བྱའི་ཆོས་སོགས་ཀྱི། །མིང་གི་རྣམ་གྲངས་འགའ་ཞིག་ཕྱོགས་གཅིག་ཏུ། །གོ་སླའི་ངག་གིས་གསལ་བར་བརྗོད་པར་བྱ། །དེ་ཡང་ཤེས་བྱ་གཞལ་བྱ་གཞི་གྲུབ་པ། །ཚད་མས་དམིགས་དང་རྟོགས་པར་བྱ་བ་དང་། །ཆོས་དང་ཡོད་པ་ཡུལ་སོགས་རྣམ་གྲངས་སྔགས་ཀྱི་བཀླག་ཐབས་སྨྲ་བའི་རྒྱན་ཅེས་བྱ་བ་བཞུགས་སྔགས་ཀྱི་བཀླག་ཐབས་སྨྲ་བའི་རྒྱན་ཅེས་བྱ་བ་བཞུགས་སྔགས་ཀྱི་བཀླག་ཐབས་སྨྲ་བའི་རྒྱན་ཅེས་བྱ་བ་བཞུགས་ཏེ། །དོན་གཅིག་ལ་ནི་ལྡོག་པ་ཐ་དད་ཙམ། །མི་རྟག་དངོས་པོ་དོན་བྱེད་ནུས་པ་དང་། །འདུས་བྱས་བྱས་པ་སྐྱེས་པ་གཞན་དབང་དང་། །རང་མཚན་འཇིག་པའི་ཆོས་རྣམས་དོན་གཅིག་ལ། །རྟག་པ་མི་འཇིག་ཆོས་དང་དངོས་མེད་ཆོས། །མ་སྐྱེས་མི་འགག་ཆོས་སོགས་དོན་གཅིག་གོ། །བརྟེན་ནས་གདགས་པའི་ཕྱིར་ན་རྟེན་འབྲེལ་ཏེ། །བློ་ཡི་ཡུལ་ཡིན་ཕྱིར་ན་ཤེས་བྱའོ། །དོན་བྱེད་ནུས་ཕྱིར་དངོས་པོ་ཞེས་བྱ་སྟེ། །དོན་བྱེད་ནུས་མེད་ཕྱིར་ན་དངོས་མེད་དོ། །དུ་མར་སྤུངས་པའི་ཕྱིར་ན་ཕུང་བོ་སྟེ། །སྐྱེ་ཞིང་མཆེད་པར་བྱེད་པས་སྐྱེ་མཆེད་དོ། །རང་འབྲས་རྒྱུ་ཡི་རིགས་བྱེད་ཁམས་སུ་གྲགས། །དེས་མཚོན་ལྷག་མ་གཞན་གྱི་སྒྲ་དོན་ཀྱང་། །ཤེས་པར་བྱ་སྟེ་འདིར་ནི་མང་དུ་དོགས། །ཀུན་རྫོབ་དོན་དམ་བདེན་པ་རྣམ་པ་གཉིས། །ཆོས་དང་གང་ཟག་བདག་མེད་པ་ཡང་གཉིས། །ཀུན་བཏགས་གཞན་དབང་ཡོངས་གྲུབ་མཚན་ཉིད་གསུམ། །གཟུགས་དང་ཚོར་བ་འདུ་ཤེས་འདུ་བྱེད་དང་། །རྣམ་པར་ཤེས་པ་ལྔ་ནི་ཕུང་བོ་ལྔ། །མིག་རྣ་སྣ་ལྕེ་ལུས་དང་ཡིད་ཀྱི་དབང་། །དབང་བོ་དྲུག་གོ་གཟུགས་སྒྲ་དྲི་རོ་དང་། །རེག་བྱ་ཆོས་ཏེ་ཡུལ་དྲུག་ཅེས་བྱ་བའི། །དབང་ཡུལ་དེ་དག་སྐྱེ་མཆེད་བཅུ་གཉིས་སོ། །མིག་གི་རྣམ་ཤེས་ནས་བཟུང་ཡིད་ཀྱི་བར། །དྲུག་ལ་རྣམ་པར་ཤེས་པ་དྲུག་ཅེས་བརྗོད། །དབང་བོ་ཡུལ་དང་རྣམ་ཤེས་བཅོ་བརྒྱད་རྣམས། ཁམས་ནི་བཅོ་བརྒྱད་ཡིན་ཞེས་མདོ་ལས་བཤད། །རྣམ་ཤེས་དྲུག་སྟེང་ཀུན་གཞི་ཉོན་ཡིད་གཉིས། །བསྣན་པས་ཚོགས་བརྒྱད་དག་དུ་འདོད་པའང་ཡོད། །ས་ཆུ་མེ་རླུང་འབྱུང་བ་རྣམ་པ་བཞི། །ནམ་མཁའ་དང་བཅས་ཁམས་ནི་ལྔར་ཡང་གྲག །རྣམ་ཤེས་དང་བཅས་ཁམས་དྲུག་ཅེས་ཀྱང་བྱ། །གཟུགས་ལ་ཁ་དོག་དབྱིབས་གཟུགས་རྣམ་པ་གཉིས། །སྔོ་སེར་དཀར་དམར་རྩ་བའི་ཁ་དོག་བཞི། །སྤྲིན་དང་དུ་བ་རྡུལ་དང་ཁུག་སྣ་དང་། །སྣང་བ་མུན་པ་ཉི་མ་གྲིབ་མ་ཡི། །ཡན་ལག་ཁ་དོག་བརྒྱད་དུ་རྣམ་པར་དབྱེ། །རིང་བོ་ཐུང་ངུ་གྲུ་བཞི་ཟླུམ་པོ་དང་། །མཐོ་དམན་ཕྱལ་ལེ་བ་དང་དེ་མིན་པའི། །དབྱིབས་ཀྱི་གཟུགས་ཅེས་བྱ་བ་རྣམ་པ་བརྒྱད། །སྒྲ་ལ་ཟིན་དང་མ་ཟིན་རྣམ་པ་གཉིས། །རེ་རེ་ལའང་སྙན་དང་མི་སྙན་དབྱེ། །དྲི་ལ་ཞིམ་དང་མི་ཞིམ་རྣམ་པ་གཉིས། །མངར་བ་སྐྱུར་བ་ཁ་བ་བསྐ་བ་དང་། །ཚྭ་བ་ལན་ཚྭ་བ་སྟེ་རོ་དྲུག་པོ། །རེ་རེར་དྲུག་ཏུ་དབྱེ་བས་སོ་དྲུག་འགྱུར། །འབྱུང་བཞི་འཇམ་རྩུབ་ལྕི་ཡང་བཀྲེས་སྐོམ་དང་། །གྲང་བ་བདུན་ནི་རེག་བྱ་བཅུ་གཅིག་གོ། །སྡུག་བསྔལ་ཀུན་འབྱུང་འགོག་ལམ་བདེན་པ་བཞི། །རེ་རེ་ལ་ཡང་རྣམ་བཞི་བཅུ་དྲུག་སྟེ། །སྡུག་བསྔལ་མི་རྟག་སྟོང་བ་བདག་མེད་བཞི། །ཀུན་འབྱུང་རྒྱུ་དང་རབ་སྐྱེ་རྐྱེན་དང་བཞི། །འགོག་པ་ཞི་བ་གྱ་ནོམ་ངེས་འབྱུང་བཞི། །ལམ་དང་སྒྲུབ་པ་རིག་པ་ངེས་འབྱིན་བཞི། །མི་རྟག་ལ་སོགས་བཅུ་དྲུག་ཅེས་སུ་གྲགས། །མ་རིག་འདུ་བྱེད་རྣམ་པར་ཤེས་པ་དང་། །མིང་གཟུགས་སྐྱེ་མཆེད་དྲུག་དང་རེག་ཚོར་བ། །སྲེད་དང་ལེན་པ་སྲིད་ལས་སྐྱེ་བ་དང་། །རྒ་ཤི་དང་བཅས་ཡན་ལག་བཅུ་གཉིས་སོ། །ས་འོག་ས་སྟེང་ས་བླ་འཇིག་རྟེན་གསུམ། །འདི་དག་ལ་ནི་སྲིད་གསུམ་ཅེས་སུའང་གྲག ། འདོད་ཁམས་གཟུགས་དང་གཟུགས་མེད་ཁམས་གསུམ་བརྗོད། །འཛམ་གླིང་ལུས་འཕགས་བ་ལང་སྤྱོད་དང་ནི། །སྒྲ་མི་སྙན་ཏེ་གླིང་བཞི་ཞེས་བྱ་ཞིང་། །ལུས་དང་ལུས་འཕགས་ལ་སོགས་གླིང་ཕྲན་བརྒྱད། །རི་རབ་མཐའ་སྐོར་གསེར་གྱི་རི་བདུན་ཏེ། །དེ་ཡང་གཉའ་ཤིང་འཛིན་དང་གཤོལ་མདའ་འཛིན། །སེང་ལྡེང་ཅན་དང་ལྟ་ན་སྡུག་རི་དང་། །རྟ་སྣ་ཅན་དང་རྣམ་འདུད་མུ་ཁྱུད་འཛིན། །གླིང་བཞི་ནས་ནི་ཚངས་པའི་འཇིག་རྟེན་བར། །ཕྱོགས་གཅིག་བསྡོམས་བྱས་སྟོང་དུ་ལོངས་པ་ལ། །སྟོང་ནི་དང་པོའོ་དེ་ཉིད་སྟོང་ལོངས་པར། །སྟོང་གཉིས་པ་སྟེ་འདི་ཡང་སྟོང་ལོངས་ཚེ། །སྟོང་གསུམ་སྟོང་གི་འཇིག་རྟེན་ཁམས་སུ་བཞག ཁོར་ཡུག་ལྕགས་རི་ཆེན་པོ་གཅིག་གིས་བསྐོར། །དེ་ནང་གླིང་བཞི་བྱེ་བ་ཕྲག་བརྒྱ་ཡོད། །དཔྱིད་དང་དབྱར་སྟོན་དགུན་ནི་དུས་བཞི་སྟེ། །ལོ་ལ་བྱི་བའི་ལོ་སོགས་བཅུ་གཉིས་འདོད། །རེ་རེར་འབྱུང་བའི་དབྱེ་བས་ལྔ་ལྔ་དང་། །རབ་བྱུང་ལ་སོགས་ལོ་འགྲོས་དྲུག་ཅུར་གྲག །སྨིན་དྲུག་ལ་སོགས་རྒྱུ་སྐར་ཉེར་བདུན་ཏེ། །མགོ་རྒྱལ་ལ་སོགས་ཉ་སྐར་བཅུ་གཉིས་དང་། །གཞུ་ཁྱིམ་ལ་སོགས་ཁྱིམ་ཡང་བཅུ་གཉིས་འདོད། །རྒྱལ་ཆེན་རིགས་བཞི་སུམ་ཅུ་རྩ་གསུམ་དང་། །འཐབ་བྲལ་དགའ་ལྡན་འཕྲུལ་དགའ་གཞན་འཕྲུལ་དབང་། །འདོད་ལྷ་རིགས་དྲུག་གནས་ཏེ་འདོད་ཁམས་སོ། །ཚངས་རིས་ཚངས་པ་འདུན་འདོན་ཚངས་ཆེན་གསུམ། །བསམ་གཏན་དང་པོའི་འོད་ཆུང་ཚད་མེད་འོད། །འོད་གསལ་གསུམ་ནི་བསམ་གཏན་གཉིས་པའི་གནས། །དགེ་ཆུང་ཚད་མེད་དགེ་དང་དགེ་རྒྱས་གསུམ། །བསམ་གཏན་གསུམ་པའོ་སྤྲིན་མེད་བསོད་ནམས་སྐྱེས། །འབྲས་བུ་ཆེ་དང་མི་ཆེ་མི་གདུང་བ། །ཤིན་ཏུ་མཐོང་དང་གྱ་ནོམ་འོག་མིན་བཅས། །རྣམ་པ་འདི་བརྒྱད་བསམ་གཏན་བཞི་བའི་གནས། །ནམ་མཁའ་མཐའ་ཡས་རྣམ་ཤེས་མཐའ་ཡས་དང་། །ཅུང་ཟད་མེད་དང་སྲིད་རྩེའི་གནས་སྐབས་ནི། །གཟུགས་མེད་ཁམས་ཏེ་སྐྱེ་མཆེད་མུ་བཞིའོ། །ཕྱོགས་བཞི་མཚམས་བཞི་སྟེང་འོག་ཕྱོགས་བཅུར་གྲགས། །ལྷ་དང་ལྷ་མིན་མི་དང་དུད་འགྲོ་དང་། །ཡི་དྭགས་དམྱལ་བ་པ་སྟེ་རིགས་དྲུག་འགྲོ། །ལྷ་མིན་ལྷ་དང་དུད་འགྲོར་བསྡུས་པ་ཡིས། །འགྲོ་བ་རྒྱུད་ལྔ་དག་ཏུའང་བཞེད་པ་ཡིན། །རིགས་དྲུག་སྟེང་དུ་སྲིད་པ་བར་མ་བསྣན། །འཇིག་རྟེན་བདུན་ཅེས་མཁས་པ་གཞན་གྱིས་བཤད། །མངལ་སྐྱེས་སྒོང་སྐྱེས་དྲོད་གཤེར་ལས་སྐྱེས་དང་། །རྫུས་ཏེ་སྐྱེས་བཅས་སྐྱེ་གནས་རྣམ་པ་བཞི། །མཐའ་འཁོབ་དབང་པོ་མ་ཚང་ལོག་ལྟ་ཅན། །རྒྱལ་བའི་བཀའ་མེད་པ་དང་ལྷ་ཚེ་རིང་། །ངན་སོང་གསུམ་བཅས་མི་ཁོམ་བརྒྱད་པོ་དང་། །བྲལ་བའི་ཁོམ་པ་དལ་བ་བརྒྱད་དུ་འདོད། །མི་ཡིན་དབུས་སྐྱེས་དབང་པོ་ཚང་བ་དང་། །ལས་མཐའ་མི་ལོག་གནས་དང་རང་འབྱོར་ལྔ། །སངས་རྒྱས་བྱོན་དང་ཆོས་གསུངས་བསྟན་པ་གནས། །དེ་རྗེས་འཇུག་དང་གཞན་ཕྱིར་སྙིང་བརྩེ་བ། །གཞན་འབྱོར་ལྔ་སྟེ་དལ་འབྱོར་ཆོས་བཅོ་བརྒྱད། །མཐུན་པའི་ཡུལ་གནས་སྐྱེས་བུ་དམ་པ་བསྟེན། །ལེགས་སྨོན་འགྲུབ་དང་སྔོན་གྱི་བསོད་ནམས་སྨིན། །འཁོར་ལོ་ཆེན་པོ་བཞི་ཞེས་རབ་ཏུ་གྲག །རིགས་གཟུགས་འབྱོར་དང་དབང་ཕྱུག་ཤེས་རབ་དང་། །ཚེ་རིང་ནད་མེད་མཐོ་རིས་ཡོན་ཏན་བདུན། །དད་དང་ཚུལ་ཁྲིམས་ཐོས་དང་གཏོང་བ་དང་། །ངོ་ཚ་ཤེས་དང་ཁྲེལ་ཡོད་ཤེས་རབ་སྟེ། །འཕགས་པའི་ནོར་བདུན་ཡིན་ཞེས་བརྗོད་པར་བྱ། །ཡང་སོས་ཐིག་ནག་བསྡུས་འཇོམས་ངུ་འབོད་དང་། །ངུ་འབོད་ཆེན་པོ་ཚ་བ་རབ་ཏུ་ཚ། །མནར་མེད་ཚ་བའི་དམྱལ་བ་བརྒྱད་དུ་འདོད། །ཆུ་བུར་ཅན་དང་ཆུ་བུར་བརྡོལ་བ་དང་། །སོ་ཐམ། མ་དང་ཀྱེ་ཧུད་ཨ་ཆུ་ཟེར། །ཨུཏྤལ་ལྟར་གས་པདྨ་ལྟར་གས་དང་། །པད་ཆེན་ལྟར་གས་གྲང་བའི་དམྱལ་བ་བརྒྱད། །ཉོན་མོངས་སེམས་ཅན་ལྟ་བ་སྙིགས་མ་དང་། །ཚེ་དང་དུས་ཀྱི་སྙིགས་མ་རྣམ་པ་ལྔ། །འགྱུར་བའི་སྡུག་བསྔལ་སྡུག་བསྔལ་གྱི་སྡུག་བསྔལ། །ཁྱབ་པ་འདུ་བྱེད་སྡུག་བསྔལ་གསུམ་དུ་འདོད། །ངེས་པ་མེད་དང་ངོམས་མི་ཤེས་པ་དང་། །ཡང་ཡང་འདོར་དང་ཉིང་མཚམས་སྦྱོར་བ་དང་། །མཐོ་དམན་འགྱུར་བ་གྲོགས་མེད་སྡུག་བསྔལ་དྲུག །སྐྱེ་རྒ་ན་འཆི་མི་སྡུག་ཕྲད་པ་དང་། །སྡུག་པ་དང་བྲལ་འདོད་པ་བཙལ་མ་རྙེད། །ཉེར་ལེན་ཕུང་འདི་སྡུག་བསྔལ་རྣམ་པ་བརྒྱད། །ངེས་པར་འཆི་བ་ནམ་འཆི་ཆ་མེད་པ། །འཆི་ཚེ་ཆོས་གཞན་མ་གཏོགས་མི་ཕན་པ། །རྩ་བ་གསུམ་སྟེ་རྒྱུ་མཚན་དགུ་བོ་ཡང་། །འཆི་བ་ངེས་པར་འོང་ཞིང་མི་བཟློག་དང་། །ཚེ་ལ་སྣོན་མེད་འབྲིད་བྱེད་བར་མ་ཆད། །གསོན་ཚེའང་ཆོས་སྒྲུབ་ལོང་མེད་རྒྱུ་མཚན་གསུམ། །དེས་ན་ངེས་པར་ཆོས་བྱར་ཐག་བཅད་གཅིག །འཛམ་གླིང་ཚེ་ལ་ངེས་པ་མེད་པ་དང་། །འཆི་རྐྱེན་མང་ཞིང་གསོན་རྐྱེན་ཆེས་ཉུང་བ། །ལུས་ནི་ཤིན་ཏུ་ཉམ་ཆུང་རྒྱུ་མཚན་གསུམ། །ད་ལྟ་ཉིད་ནས་ཆོས་བྱར་ཐག་བཅད་གཉིས། །འཆི་ཚེ་ཉེ་དུ་སོགས་ཀྱིས་མི་ཕན་དང་། །ལོངས་སྤྱོད་ཟས་གོས་སོགས་ཀྱིས་མི་ཕན་པ། །ལྷན་ཅིག་སྐྱེས་པའི་ལུས་འདིས་མི་ཕན་བཅས། །རྒྱུ་མཚན་གསུམ་སྟེ་དེས་ན་ཆོས་ཁོ་ན། །བྱ་བར་ཐག་བཅད་ཐག་བཅད་རྣམ་པ་གསུམ། ཁ་གསག་གཞོགས་སློང་ཐོབ་ཀྱིས་འཇལ་བ་དང་། །རྙེད་པས་རྙེད་འཚོལ་ཚུལ་ཆོས་ལོག་འཚོ་ལྔ། །རྙེད་དང་མ་རྙེད་གྲགས་དང་མ་གྲགས་དང་། །བསྟོད་སྨད་བདེ་སྡུག་འཇིག་རྟེན་ཆོས་བརྒྱད་དོ། །ཕ་དང་མ་དང་དགྲ་བཅོམ་གསོད་པ་དང་། །དགེ་འདུན་དབྱེན་བྱེད་སངས་རྒྱས་སྐུ་གཟུགས་ལ། །ངན་སེམས་ཁྲག་འབྱིན་མཚམས་མེད་ཆེན་པོ་ལྔ། །མར་གྱུར་དགྲ་བཅོམ་སུན་ཕྱུང་སློབ་པ་དང་། །བྱང་སེམས་ངེས་གནས་གསོད་དང་དགེ་འདུན་གྱི། །འདུ་བའི་སྒོ་འཕྲོག་མཆོད་རྟེན་འཇིགས་པ་ལྔ། །ཉེ་བའི་མཚམས་མེད་ཡིན་པར་རྒྱལ་བས་བཤད། །སྲོག་གཅོད་མ་བྱིན་ལེན་དང་ལོག་པར་གཡེམ། །ལུས་ཀྱི་ལས་གསུམ་བརྫུན་དང་ཕྲ་མ་དང་། །ཚིག་རྩུབ་ངག་ཀྱལ་བཞི་ནི་ངག་གི་ལས། །བརྣབ་སེམས་གནོད་སེམས་ལོག་ལྟ་ཡིད་ལས་གསུམ། །མི་དགེ་བཅུའོ་བཟློག་པ་དགེ་བ་བཅུ། །སངས་རྒྱས་བསྟན་བཤིག་དཀོན་མཆོག་དབུ་འཕང་དམན། །དགེ་འདུན་འདུ་སྒོ་འཕྲོག་དང་ཐེག་ཆེན་སྨོད། །བླ་མའི་སྐུ་བསྡོོ་རྡོ་རྗེ་སྤུན་དབྱེན་བྱེད། །སྒྲུབ་པར་བར་ཆད་བྱེད་དང་དམ་ཚིག་བྲལ། །སྙིང་རྗེ་མེད་དང་ལོག་པར་ལྟ་བ་ཅན། །རྣམ་པ་བཅུ་ནི་བསྒྲལ་བའི་ཞིང་བཅུར་བརྗོད། །དགྲ་བཅོམ་ཕྱིར་མི་འོང་དང་རྒྱུན་ཞུགས་ཀྱི། །ལྔ་བརྒྱ་ཕྲག་གསུམ་འབྲས་བུའི་དུས་ཞེས་གྲགས། །ཤེས་རབ་ཏིང་འཛིན་ཚུལ་ཁྲིམས་བསླབ་པའི་དུས། །གསུམ་ལ་སྒྲུབ་པའི་དུས་ཞེས་རབ་ཏུ་བརྗོད། །མངོན་པ་མདོ་སྡེ་འདུལ་བའི་དུས་གསུམ་པོར། །ལུང་གི་དུས་གསུམ་ལྔ་བརྒྱ་ཕྲག་དགུ་དང་། །རྟགས་ཙམ་འཛིན་པའི་དུས་ཀྱི་ལྔ་བརྒྱ་བ། །ཕྲག་གཅིག་དང་བཅས་ལྔ་བརྒྱ་ཕྲག་བཅུའོ། །ལུང་དང་རྟོགས་པའི་སངས་རྒྱས་བསྟན་པ་གཉིས། །སྐྱེས་བུ་ཆུང་འབྲིང་ཆེ་གསུམ་སྐྱེས་བུ་གསུམ། །རྫུ་འཕྲུལ་དང་ནི་ཐུགས་ཀུན་བརྗོད་པ་དང་། །རྗེས་སུ་བསྟན་པའི་ཆོ་འཕྲུལ་རྣམ་པ་གསུམ། །བདེན་བཞི་མཚན་ཉིད་མེད་དང་ལེགས་ཕྱེ་ཡི། །ཆོས་འཁོར་རིམ་པ་གསུམ་དུ་བཞེད་པ་ཡིན། །མངོན་སུམ་རྗེས་དཔག་ཚད་མ་རྣམ་པ་གཉིས། །དབང་པོའི་མངོན་སུམ་ཡིད་ཀྱི་མངོན་སུམ་དང་། །རྣལ་འབྱོར་མངོན་སུམ་རང་རིག་མངོན་སུམ་བཞི། །དཔྱད་ཤེས་ཡིད་དཔྱོད་ཐེ་ཚོམ་ལོག་ཤེས་ལྔ། །སྣང་ལ་མ་ངེས་པ་སྟེ་ཚད་མིན་ལྔ། །སེམས་པའི་ལས་དང་བསམ་པའི་ལས་རྣམ་གཉིས། །བསོད་ནམས་ལས་དང་བསོད་ནམས་མིན་པའི་ལས། །མི་གཡོའི་ལས་ཏེ་ལས་ནི་གསུམ་དུ་འདོད། །གཞན་ཡང་མཐོང་ཆོས་མྱོང་བའི་ལས་ཉིད་དང་། །སྐྱེ་གནས་མྱོང་དང་ལན་གྲངས་གཞན་མྱོང་འགྱུར། །མྱོང་བར་མ་ངེས་ལས་བཅས་ལས་རྣམ་བཞི། །ཚོར་བ་འདུ་ཤེས་སེམས་པ་རེག་པ་དང་། །ཡིད་ལས་བྱེད་བཅས་ཀུན་འགྲོ་ཞེས་པ་ལྔ། །འདུན་མོས་དྲན་ཏིང་ཤེས་རབ་ཡུལ་ངེས་ལྔ། །དད་དང་ངོ་ཚ་ཤེས་དང་ཁྲེལ་ཡོད་དང་། །བག་ཡོད་བཏང་སྙོམས་རྣམ་པར་མི་འཚེ་བ། །མ་ཆགས་ཞེ་སྡང་མེད་དང་གཏི་མུག་མེད། །བརྩོན་འགྲུས་ཤིན་སྦྱངས་དགེ་བ་བཅུ་གཅིག་གོ །འདོད་ཆགས་ཁོང་ཁྲོ་ང་རྒྱལ་མ་རིག་པ། །ལྟ་ངན་ཐེ་ཚོམ་ཉོན་མོངས་ཅན་དང་བཅས། །རྩ་ཉོན་དྲུག་གོ་ཕྱེ་ན་ལྟ་བ་ལྔ། །ལྟ་མིན་ལྔ་སྟེ་བཅུར་འདོད་དེ་ཡང་ནི། །ལྟ་བ་མ་གཏོགས་གཞན་རྣམས་ལྟ་མིན་ལྔ། །ལྟ་བ་ལ་ཡང་འཇིག་ལྟ་ལོག་ལྟ་དང་། །མཐར་ལྟ་ཚུལ་ཁྲིམས་བརྟུལ་ཞུགས་མཆོག་འཛིན་ལྟ། །ལྟ་བ་མཆོག་འཛིན་ལྟར་བཅས་ལྔ་ཡང་ཡོད། ཁྲོ་དང་འཁོན་འཛིན་འཆབ་དང་ཚིག་ཕྲག་དོག །སེར་སྣ་གཡོ་སྒྱུ་རྒྱགས་དང་རྣམ་འཚེ་དང་། ཁྲེལ་མེད་ངོ་ཚ་མེད་དང་མ་དད་རྒོད། །རྨུགས་དང་ལེ་ལོ་བག་མེད་བརྗེད་ངེས་དང་། །རྣམ་གཡེང་ཤེས་བཞིན་མ་ཡིན་ཉི་ཤུ་རྣམས། །ཉེ་བའི་ཉོན་མོངས་ཞེས་བྱར་མངོན་པར་བཤད། །འཇིག་ལྟ་ཚུལ་ཞུགས་མཆོག་འཛིན་ཐེ་ཚོམ་གསུམ། །ཀུན་ཏུ་སྦྱོར་བ་རྣམ་པ་གསུམ་ཞེས་བྱ། །དེ་སྟེང་འདོད་ལ་འདུན་དང་གནོད་སེམས་གཉིས། །བསྣན་པས་ཐ་མའི་ཆ་མཐུན་ཀུན་སྦྱོར་ལྔ། །གཟུགས་དང་གཟུགས་མེད་པས་བསྡུས་འདོད་ཆགས་གཉིས། །རྒོད་དང་ང་རྒྱལ་མ་རིག་རྣམ་ལྔ་ལ། །གོང་མའི་ཆ་མཐུན་ཀུན་སྦྱོར་ལྔ་ཞེས་བརྗོད། །གཉིད་འགྱོད་རྟོག་དཔྱོད་རྣམས་ནི་གཞན་འགྱུར་བཞི། །འདོད་ལ་འདུན་དང་གནོད་སེམས་གཉིད་རྨུགས་གཉིས། །འགྱོད་རྒོད་གཉིས་བསྡོམས་ཐེ་ཚོམ་སྒྲིབ་པ་ལྔ། །ཉོན་སྒྲིབ་ཤེས་སྒྲིབ་སྒྲིབ་པ་རྣམ་པ་གཉིས། །སྙོམས་འཇུག་སྒྲིབ་པ་དང་བཅས་སྒྲིབ་པ་གསུམ། །ལུས་ངག་ཡིད་གསུམ་སོ་སོའི་སྒྲིབ་པ་དང་། །ཐུན་མོང་སྒྲིབ་བཅས་བཞི་རུ་འདོད་པའང་ཡོད། །འདོད་དང་སྲེད་པ་མ་རིག་ཟག་པ་གསུམ། །གཙང་བདེ་རྟག་བདག་ལྟ་བ་ཕྱིན་ལོག་བཞི། །གཞན་ཡང་ཀུན་དཀྲིས་འཆིང་བ་ཟག་པ་སོགས། །རྣམ་གྲངས་དུ་མ་ཡོད་ཀྱང་འདིར་མ་བྲིས། །སེམས་ཅན་མར་ཤེས་དྲིན་དྲན་དྲིན་གཟོ་བ། །ཡིད་འོང་བྱམས་པ་སྙིང་རྗེ་ལྷག་བསམ་དྲུག །བྱང་ཆུབ་སེམས་བཅས་རྒྱུ་འབྲས་མན་ངག་བདུན། །ཀུན་རྫོབ་དོན་དམ་བྱང་ཆུབ་སེམས་མཆོག་གཉིས། །ཀུན་རྫོབ་ལ་ཡང་སྨོན་སེམས་འཇུག་སེམས་གཉིས། །བསོད་ནམས་ཡེ་ཤེས་ཚོགས་ནི་རྣམ་པ་གཉིས། །རང་དོན་གཞན་དོན་དག་ཀྱང་གཉིས་སུ་ངེས། །ཆོས་དང་གཟུགས་ཀྱི་སྐུ་ཡང་གཉིས་སུ་འདོད། །ཀླུ་སྒྲུབ་ཨཱཪྱ་དེ་བ་ཐོགས་མེད་དང་། །དབྱིག་གཉེན་ཕྱོགས་གླང་ཆོས་གྲགས་རྒྱན་དྲུག་སྟེ། །ཡོན་ཏན་འོད་དང་ཤཀ་འོད་མཆོག་གཉིས་སོ། །རྒྱུན་ཞུགས་ཕྱིར་འོང་ཕྱིར་མི་འོང་བ་དང་། །དགྲ་བཅོམ་བཞི་བོ་རེ་རེའི་ཞུགས་པ་དང་། །འབྲས་གནས་དབྱེ་བས་སྐྱེས་བུ་ཟུང་བཞིའམ། །སོ་སོར་བགྲང་བས་གང་ཟག་ཡ་བརྒྱད་དོ། །ཐེག་དམན་ཐེག་ཆེན་ཐེག་པ་ཆེ་ཆུང་གཉིས། །ཉན་ཐོས་རང་རྒྱལ་སངས་རྒྱས་ཐེག་པ་གསུམ། །བྱེ་བྲག་སྨྲ་བ་སེམས་ཙམ་མདོ་སྡེ་བ། །དབུ་མའི་གྲུབ་མཐའ་སྨྲ་བ་རྣམ་པ་བཞི། །གནས་བརྟན་སྡེ་དང་ཡོད་པར་སྨྲ་བའི་སྡེ། །མང་པོས་བཀུར་དང་དགེ་འདུན་ཕལ་ཆེན་པ། །བྱེ་བྲག་སྨྲ་བའི་སྡེ་བ་རྣམ་པ་བཞི། །འཁོར་ལོ་ནོར་བུ་ལ་སོགས་རིན་ཆེན་བདུན། །རལ་གྲི་པགས་པ་ནགས་ཚལ་གོས་དང་ལྷམ། ཁང་ཁྱིམ་མལ་ཆ་ཉེ་བའི་རིན་ཆེན་བདུན། །ཚུལ་ཁྲིམས་ཏིང་འཛིན་ཤེས་རབ་བསླབ་པ་གསུམ། །སོ་ཐར་བྱང་སེམས་གསང་སྔགས་སྡོམ་པ་གསུམ། །སྦྱིན་དང་སྙན་པར་སྨྲ་དང་དོན་མཐུན་དང་། །དོན་སྤྱོད་པ་སྟེ་བསྡུ་བའི་དངོས་པོ་བཞི། །བསགས་སྦྱངས་ལྷ་དང་གདོན་མཆོད་སྦྱོར་བ་བཞི། །ལྷ་དང་ཉོན་མོངས་འཆི་བདག་ཕུང་བདུད་བཞི། །མངོན་སངས་རྒྱས་དང་ཆོ་འཕྲུལ་ཆོས་འཁོར་དང་། །ལྷ་བབས་དུས་ནི་དུས་ཆེན་བཞི་ཞེས་བྱ། །ཁམས་ཟས་ཡིད་སེམས་རྣམ་ཤེས་ཟས་བཞིར་གྲགས། །སྒྲ་དང་གཏན་ཚིགས་བཟོ་དང་གསོ་བ་དང་། །ནང་དོན་རིག་པ་རིག་གནས་ཆེ་བ་ལྔ། །སྐར་རྩིས་མངོན་བརྗོད་སྡེབ་སྦྱོར་ཟློས་གར་དང་། །སྙན་ངག་དང་བཅས་རིག་གནས་ཆུང་བ་ལྔ། །མཆོད་སྦྱིན་སྲིད་སྲུང་ངེས་བརྗོད་སྙན་ངག་བཅས། །རིག་བྱེད་བཞིའོ་ཚངས་པའི་ཡི་གེ་སོགས། །ཡིག་རིགས་དྲུག་ཅུ་རྩ་བཞིར་གསུངས་པ་ཡིན། །ཕྱག་འཚལ་བ་དང་མཆོད་དང་སྡིག་པ་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །བརྟན་པར་བཞུགས་གསོལ་དགེ་བ་ཡོངས་བསྔོ་བ། །ཡན་ལག་བདུན་པའོ་སྡིག་པ་བཤགས་པ་དང་། །རྗེས་སུ་ཡི་རང་བསྐུལ་བའི་ཕུང་བོ་གསུམ། །གཞན་ལས་ལོག་པར་ངེས་དང་ཡང་དག་ངེས། །གང་དུའང་མ་ངེས་ཕུང་བོ་གསུམ་དུ་བཤད། །ཚུལ་ཁྲིམས་ཕུང་བོ་ཏིང་འཛིན་ཤེས་རབ་དང་། །རྣམ་པར་གྲོལ་དང་རྣམ་པར་གྲོལ་བ་ཡི། །ཡེ་ཤེས་གཟིགས་བཅས་ཟག་མེད་ཕུང་བོ་ལྔ། །རྒྱུ་རྐྱེན་དམིགས་རྐྱེན་བདག་བོའི་རྐྱེན་ཉིད་དང་། །དེ་མ་ཐག་རྐྱེན་རྐྱེན་ནི་རྣམ་པ་བཞི། །ཉེར་ལེན་ལྷན་ཅིག་བྱེད་པའི་རྒྱུ་རྣམ་གཉིས། །བྱེད་རྒྱུ་ལྷན་ཅིག་འབྱུང་དང་སྐལ་མཉམ་དང་། །མཚུངས་ལྡན་ཀུན་འགྲོ་རྣམ་སྨིན་རྒྱུ་བཅས་དྲུག །རྒྱུ་མཐུན་བདག་འབྲས་སྐྱེས་བུ་བྱེད་པའི་འབྲས། །རྣམ་སྨིན་འབྲས་བུ་བྲལ་འབྲས་འབྲས་བུ་ལྔ། །རྟེན་གྱི་སྟོབས་དང་རྣམ་པར་སུན་འབྱིན་སྟོབས། །ཉེས་ལས་སླར་ལྡོག་གཉེན་པོ་ཀུན་ཏུ་སྤྱོད། །སྟོབས་བཞི་ཡིན་ཏེ་འཕེན་པའི་སྟོབས་ལ་སོགས། །སྟོབས་ལྔ་བློ་སྦྱོང་གཞུང་ལས་བཤད་པ་མཐོང་། །ཡི་གེ་འབྲི་མཆོད་སྦྱིན་དང་ཁ་ཏོན་བྱེད། །ཉན་དང་ཀློག་ལེན་འཆད་དང་དེ་དོན་སེམས། །སྒོམ་པར་བྱེད་པ་ཆོས་སྤྱོད་རྣམ་པ་བཅུ། །འཕོ་བ་ལ་སོགས་མཛད་པ་བཅུ་གཉིས་སོ། །འདུལ་བ་མངོན་པ་མདོ་སྡེ་སྡེ་སྣོད་གསུམ། །མདོ་སྡེ་དབྱངས་བསྙད་ལུང་བསྟན་ཚིགས་བཅད་དང་། །ཆེད་བརྗོད་གླེང་གཞི་རྟོགས་བརྗོད་དེ་ལྟ་བྱུང་། །སྐྱེས་རབས་ཤིན་ཏུ་རྒྱས་དང་རྨད་དུ་བྱུང་། །གཏན་ལ་ཕབ་སྡེ་ཡན་ལག་བཅུ་གཉིས་སོ། །དགེ་སློང་ཕ་མ་དགེ་ཚུལ་ཕ་མ་དང་། །དགེ་བསྙེན་ཕ་མ་བསྙེན་གནས་དགེ་སློབ་མའིི། །སྡོམ་པ་དང་བཅས་སོ་ཐར་རིགས་བརྒྱད་དེ། །བསྙེན་གནས་མ་གཏོགས་རིགས་བདུན་བཞེད་པའང་ཡོད། །སྲོག་གཅོད་མ་བྱིན་ལེན་དང་ལོག་གཡེམ་དང་། །རྫུན་སྨྲ་ཆང་འཐུང་ལྔ་སྤངས་དགེ་བསྙེན་སྡོམ། །རྩ་བ་བཞི་སྟེང་ཆང་དང་གླུ་སོགས་དང་། ཁྲི་སྟན་ཆེ་མཐོ་ཕྱི་དྲོའི་ཁ་ཟས་སྤངས། །བསྙེན་གནས་ཡན་ལག་བརྒྱད་དུ་འདོད་པ་ཡིན། །རྩ་བཞི་ཆང་དང་གར་སོགས་ཕྲེང་སོགས་དང་། །མལ་སྟན་ཆེ་མཐོ་དུས་མིན་ཟས་ཟ་དང་། །གསེར་དངུལ་ལེན་སྤངས་དགེ་ཚུལ་སྡོམ་པ་བཅུ། །རྩ་བ་བཞི་དང་ལྷག་མ་བཅུ་གསུམ་དང་། །སྤང་ལྟུང་སུམ་ཅུ་ལྟུང་བྱེད་འབའ་ཞིག་པ། །དགུ་བཅུ་སོ་སོར་བཤགས་པར་བྱ་བ་བཞི། །ཉེས་བྱས་བརྒྱ་དང་བཅུ་གཉིས་སྤངས་པ་ཡི། །དགེ་སློང་སྡོམ་པ་ཉིས་བརྒྱ་ལྔ་བཅུ་གསུམ། །དགེ་སློང་མ་དང་དགེ་སློབ་མ་ལ་ཡང་། །གཞན་ནས་ཤེས་པར་བྱ་སྟེ་དེ་དག་ཀྱང་། །སྤང་བྱའི་གྲངས་ཀྱི་ལྡོག་པས་ཕྱེ་ནས་བཞག །ཕྱག་དར་ཁྲོད་པ་ཆོས་གོས་གསུམ་པ་དང་། །ཕྱིང་པ་བ་དང་བསོད་སྙོམས་སྟན་གཅིག་པ། །ཟས་ཕྱིས་མི་ལེན་དགོན་པ་ཤིང་དྲུང་བ། །བླ་གབ་མེད་དང་དུར་ཁྲོད་པ་དག་དང་། །གཞི་ཇི་བཞིན་དང་ཅོག་བུ་པ་དེ་རྣམས། །སྦྱངས་པའི་ཡོན་ཏན་བཅུ་གཉིས་ལྡན་པར་གྲགས། །གཟུགས་ཕུང་གང་ཟག་བདག་ཏུ་འཛིན་པ་དང་། །བདག་གི་ཡིན་དང་བདག་ལ་དེ་ལྡན་ཞེས། །དེ་ལ་བདག་གནས་ཞེས་བྱར་འཛིན་པ་སྟེ། །དེ་བཞིན་ཚོར་སོགས་བཞི་ལ་སྦྱར་བྱས་པ། །འཇིག་ཚོགས་ལྟ་བ་ཉི་ཤུ་ཞེས་སུ་བཤད། །དགག་བྱའི་བདག་ནི་ཕུང་དང་གཅིག་ཉིད་མིན། །རང་བཞིན་གྱིས་ཀྱང་ཐ་དད་ཡོད་མིན་ཞིང་། །ཕུང་བོ་རྣམས་དང་རང་བཞིན་གྱིས་མི་ལྡན། །ཕུང་བོར་རང་བཞིན་གྱིས་ནི་བརྟེན་མ་ཡིན། །ཕུང་རྣམས་དེ་ལའང་དེ་ལྟར་བརྟེན་པ་མིན། །ཕུང་བོའི་ཚོགས་པ་བདག་མིན་དབྱིབས་མ་ཡིན། །རྣམ་བདུན་རིགས་པར་དབུ་མའི་གཞུང་ནས་བཤད། །བདག་ལས་མི་སྐྱེ་གཞན་ལས་མི་སྐྱེ་དང་། །གཉིས་ལས་མི་སྐྱེ་རྒྱུ་མེད་དག་ལས་ཀྱང་། །སྐྱེ་བ་མེད་པ་མཐའ་བཞིའི་སྐྱེ་བ་བྲལ། །རང་བཞིན་ཡོད་པ་རྟག་པའི་མཐའ་ཉིད་དང་། །ཐ་སྙད་དུ་ཡང་མེད་པ་ཆད་པའི་མཐའ། །གཉིས་གར་བདེན་པར་གྲུབ་དང་གཉིས་མིན་པར། །བདེན་པར་གྲུབ་པ་བཞི་ནི་མཐའ་བཞི་རུ། །བཤད་པའང་ཡོད་དེ་ཅུང་ཟད་ཙམ་ཞིག་གིས། །འདོད་ཚུལ་ཐ་དད་ཉིད་དུ་བཞག་པའང་མཐོང་། །བདེན་གྲུབ་ཚུལ་ཤེས་དགག་བྱ་ངེས་པའི་གནད། །བདག་དེ་ཕུང་དང་གཅིག་ཏུ་མེད་པ་དང་། །ངོ་བོ་ཉིད་ཀྱིས་ཐ་དད་མིན་པ་དང་། །དེ་ནི་ཡོད་ན་ཕུང་དང་གཅིག་དུ་མ། །གང་རུང་ཡིན་དགོས་ངེས་པ་ཁྱབ་པ་སྟེ། །གནད་བཞིའི་དཔྱད་པ་ཞེས་པའི་ཐ་སྙད་མཛད། །ཚོགས་ལམ་སྦྱོར་ལམ་མཐོང་སྒོམ་མི་སློབ་ལམ། །ཉན་ཐོས་རང་རྒྱལ་ཐེག་ཆེན་གྱིས་ཕྱེ་ཚེ། །ལྔ་གསུམ་བཅོ་ལྔ་དག་ཏུ་འགྱུར་བ་ཡིན། །སྦྱོར་ལམ་དྲོད་རྩེ་བཟོད་པ་ཆོས་མཆོག་བཞི། །མཐོང་སྒོམ་གཉིས་ལ་མཉམ་རྗེས་གཉིས་གཉིས་དང་། །མཉམ་གཞག་ལ་ཡང་བར་ཆད་མེད་ལམ་དང་། །རྣམ་གྲོལ་ལམ་ཞེས་བྱ་བ་གཉིས་རེ་ཡོད། །དང་པོ་རབ་དགའ་གཉིས་པ་དྲི་མ་མེད། །གསུམ་པ་འོད་བྱེད་བཞི་བ་འོད་འཕྲོ་བ། །ལྔ་བ་སྦྱངས་དཀའ་དྲུག་པ་མངོན་དུ་གྱུར། །བདུན་པ་རིང་སོང་བརྒྱད་པ་མི་གཡོ་བ། །དགུ་བ་ལེགས་པའི་བློ་གྲོས་བཅུ་བ་ནི། །ཆོས་ཀྱི་སྤྲིན་ཏེ་བཅུ་གཅིག་ཀུན་ཏུ་འོད། །སངས་རྒྱས་སའོ་སྔ་མ་ས་བཅུར་འདོད། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཕྱིན་དྲུག་ཅེས་བརྗོད་དེ། །ཐབས་སྟོབས་སྨོན་ལམ་ཡེ་ཤེས་ཕར་ཕྱིན་བཅུ། །ཟང་ཟིང་ཆོས་དང་མི་འཇིགས་སྦྱིན་པ་གསུམ། །བྱམས་པ་དང་བཅས་བཞི་རུ་བཤད་པའང་ཡོད། །ཉེས་སྤྱོད་སྡོམ་དང་དགེ་བ་ཆོས་སྡུད་དང་། །སེམས་ཅན་དོན་བྱེད་ཚུལ་ཁྲིམས་རྣམ་པ་གསུམ། །སྡུག་བསྔལ་དང་ལེན་གནོད་པར་ཇི་མི་སྙམ། །ཆོས་ལ་ངེས་ཐོབ་བཟོད་པ་གསུམ་དུ་བཞེད། །གོ་ཆའི་བརྩོན་འགྲུས་དགེ་བ་ཆོས་སྡུད་དང་། །སེམས་ཅན་དོན་བྱེད་བརྩོན་འགྲུས་རྣམ་པ་གསུམ། །ཀུན་རྫོབ་དོན་དམ་ལ་དམིགས་བསམ་གཏན་གཉིས། །དེ་བཞིན་ཤེས་རབ་ལ་ཡང་ཕྱེ་བར་བྱ། །འདུས་བྱས་གང་ཡིན་ཀུན་རྫོབ་བདེན་པ་སྟེ། །འདུས་མ་བྱས་ལ་ཀུན་རྫོབ་དོན་དམ་གཉིས། །ཀུན་བཏགས་ཆོས་རྣམས་ཀུན་རྫོབ་བདེན་པ་སྟེ། །ཡོངས་གྲུབ་དོན་དམ་སྟོང་ཉིད་དོན་གཅིག་འདོད། །ནང་དང་ཕྱི་དང་ཕྱི་ནང་སྟོང་བ་ཉིད། །ཆེན་པོ་དོན་དམ་འདུས་བྱས་འདུས་མ་བྱས། །མཐའ་ལས་འདས་དང་ཐོག་མ་ཐ་མ་མེད། །དོར་བ་མེད་དང་རང་བཞིན་ཆོས་ཐམས་ཅད། །རང་གི་མཚན་ཉིད་མི་དམིགས་དངོས་པོ་མེད། །ངོ་བོ་ཉིད་དང་དངོས་པོ་མེད་པ་ཡི། །ངོ་བོ་ཉིད་དེ་རེ་རེའི་མཐར་སྟོང་ཉིད། །སྦྱར་བ་རྣམས་ནི་སྟོང་ཉིད་བཅོ་བརྒྱད་དོ། །ཕྱི་མ་གཉིས་པོ་མ་གཏོགས་བཅུ་དྲུག་ཉིད། །ནང་གི་ཆོས་རྣམས་བདེན་སྟོང་ནང་སྟོང་ཉིད། ཕྱི་ཡི་ཆོས་རྣམས་བདེན་སྟོང་ཕྱི་སྟོང་ཉིད། །དེ་བཞིན་ལྷག་མ་རྣམས་ཀྱང་ཤེས་པར་བྱ། །ལུས་དང་ཚོར་བ་སེམས་དང་ཆོས་བཞི་ཡི། །དྲན་པ་ཉེ་བར་གཞག་པ་རྣམ་པ་བཞི། །མི་དགེ་སྐྱེ་འགྱུར་མི་བསྐྱེད་ཡང་དག་སྤོང་། །མི་དགེ་སྐྱེས་ཟིན་སྤོང་དང་དགེ་བ་ཡང་། །མ་སྐྱེས་བསྐྱེད་དང་སྐྱེས་ཟིན་སྤེལ་བྱེད་པའི། །ཡང་དག་སྤོང་བ་བཞི་ཞེས་རབ་ཏུ་བཤད། །འདུན་དང་བརྩོན་འགྲུས་སེམས་པ་དཔྱོད་པ་ཡི། །རྫུ་འཕྲུལ་རྐང་བ་བཞིའོ་དད་པ་དང་། །བརྩོན་འགྲུས་དྲན་པ་ཏིང་འཛིན་ཤེས་རབ་ལྔ། །དབང་བོ་ལྔ་སྟེ་སྟོབས་ཀྱང་ལྔར་འབྱེད་དོ། །དྲན་པ་ཆོས་རབ་རྣམ་འབྱེད་བརྩོན་འགྲུས་དང་། །དགའ་བ་ཤིན་ཏུ་སྦྱངས་དང་ཏིང་འཛིན་དང་། །བཏང་སྙོམས་བྱང་ཆུབ་ཡན་ལག་བདུན་དུ་འདོད། །ཡང་དག་ལྟ་བ་རྟོག་པ་ངག་དང་ནི། །ལས་ཀྱི་མཐའ་དང་འཚོ་བ་རྩོལ་བ་དང་། །དྲན་པ་ཏིང་འཛིན་འཕགས་ལམ་ཡན་ལག་བརྒྱད། །དེ་དག་བྱང་ཕྱོགས་སོ་བདུན་ཅེས་སུ་གྲག །མེ་ལོང་ཡེ་ཤེས་མཉམ་ཉིད་སོར་རྟོག་དང་། །བྱ་གྲུབ་ཆོས་དབྱིངས་ཡེ་ཤེས་ཡེ་ཤེས་ལྔ། །ལྷ་ཡི་མིག་དང་སྔོན་གྱི་གནས་ཤེས་དང་། །ཟག་པ་ཟད་ཤེས་རིག་པ་གསུམ་དུ་འདོད། །སྟོང་བ་ཉིད་དང་མཚན་མ་མེད་པ་དང་། །སྨོན་པ་མེད་པ་རྣམ་ཐར་སྒོ་གསུམ་མོ། །གཟུགས་ཅན་གཟུགས་དང་གཟུགས་མེད་གཟུགས་ལ་ལྟ། །གེགས་སེལ་སྡུག་དང་འགོག་པའི་རྣམ་པར་ཐར། །གཟུགས་མེད་བཞི་ཡི་རྣམ་པར་ཐར་བཅས་བརྒྱད། །བསམ་གཏན་བཞི་དང་གཟུགས་མེད་རྣམ་བཞི་དང་། །འགོག་པའི་སྙོམས་འདུག་དང་བཅས་མཐར་གནས་དགུ། །ཤ་ཡི་སྤྱན་དང་ལྷ་དང་ཤེས་རབ་སྤྱན། །ཆོས་དང་སངས་རྒྱས་སྤྱན་བཅས་སྤྱན་ལྔའོ། །ལྷ་ཡི་མིག་གི་མངོན་པར་ཤེས་པ་དང་། །ལྷ་ཡི་རྣ་བ་གཞན་སེམས་ཤེས་པ་དང་། །སྔོན་གནས་རྗེས་དྲན་རྫུ་འཕྲུལ་ཟག་ཟད་ཀྱི། །མངོན་པར་ཤེས་པ་དང་བཅས་མངོན་ཤེས་དྲུག །སངས་རྒྱས་ཆོས་དང་དགེ་འདུན་ཚུལ་ཁྲིམས་དང་། །གཏོང་བ་ལྷ་དྲན་རྗེས་སུ་དྲན་པ་དྲུག །གནས་དང་གནས་མིན་མཁྱེན་དང་རྣམ་སྨིན་དང་། །མོས་པ་སྣ་ཚོགས་ཁམས་དང་དབང་བོའི་རིམ། །ཀུན་འགྲོའི་ལམ་དང་ཉོན་མོངས་རྣམ་བྱང་དང་། །སྔོན་གནས་རྗེས་དྲན་སྐྱེ་འཕོ་ཟག་པ་ཟད། །མཁྱེན་པའི་སྟོབས་བཅས་ཐུབ་པའི་སྟོབས་བཅུའོ། །སྤངས་པ་ཕུན་ཚོགས་རྟོགས་པ་ཕུན་ཚོགས་དང་། །བར་ཆད་ཆོས་དང་ངེས་པར་འབྱུང་བ་ལ། །དམ་བཅའི་འཇིགས་པ་མེད་པ་མི་འཇིགས་བཞི། །ཆོས་དང་དོན་དང་ངེས་པའི་ཚིག་ཉིད་དང་། །སྤོབས་པ་སོ་སོ་ཡང་དག་རིག་པ་བཞི། །འཁྲུལ་དང་ཅ་ཅོ་དྲན་པ་ཉམས་མི་མངའ། །མཉམ་པར་མ་བཞག་ཐ་དང་འདུ་ཤེས་དང་། །མ་བརྟགས་བཏང་སྙོམས་མེད་བཅས་སྤྱོད་པ་དྲུག །འདུན་པ་བརྩོན་འགྲུས་དྲན་དང་ཏིང་འཛིན་དང་། །ཤེས་རབ་རྣམ་གྲོལ་ཉམས་པ་མི་མངའ་བ། །རྟོགས་པ་མ་འདྲེས་དྲུག་དང་སྐུ་གསུང་ཐུགས། དབྱེ་བས་འཕྲིན་ལས་མ་འདྲེས་རྣམ་གསུམ་དང་། དུས་གསུམ་མཁྱེན་པའི་ཡེ་ཤེས་མ་འདྲེས་གསུམ། །ཕྱེ་བས་མ་འདྲེས་ཆོས་ནི་བཅོ་བརྒྱད་དོ། །ཚེ་དང་སེམས་དང་ཡོ་བྱད་ལས་ལ་དབང་། །སྐྱེ་བ་མོས་པ་སྨོན་ལམ་རྫུ་འཕྲུལ་དང་། །ཡེ་ཤེས་ཆོས་ལ་དབང་བ་དབང་བཅུའོ། །གཞན་ཡང་འབྱུང་བཞི་སྔོ་སེར་དཀར་དམར་དང་། ནམ་མཁའ་རྣམ་ཤེས་དབྱེ་བས་ཟད་པར་བཅུ། །ཟིལ་གནོན་ལ་སོགས་ལྷག་མ་ཤེས་པར་བྱ། །ཕྱག་ཞབས་འཁོར་ལོའི་མཚན་སོགས་མཚན་སོ་གཉིས། །སེན་མོ་ཟངས་མདོག་ལྟར་སོགས་དཔེ་བྱད་བཟང་། །བརྒྱད་ཅུའི་ཁྱད་པར་ཡུམ་གྱི་མདོ་ནས་བཤད། །གསུང་མཉེན་འཇམ་དང་ཡིད་དུ་འོང་བ་སོགས། །ཡན་ལག་དྲུག་ཅུ་རྩ་བཞི་གསུངས་པ་ནི། །གསང་བ་བསམ་གྱིས་མི་ཁྱབ་མདོ་ལས་གསལ། ཁྱད་པར་མངོན་པར་རྟོགས་པའི་རྒྱན་ཉིད་ནས། །ལེགས་པར་བཤད་པའི་ཉེར་མཁོ་འདི་ལྟ་སྟེ། །གཞི་ཤེས་ལམ་ཤེས་རྣམ་མཁྱེན་མཁྱེན་པ་གསུམ། །རྣམ་རྫོགས་སྦྱོར་དང་རྩེ་སྦྱོར་མཐར་གྱིས་སྦྱོར། །སྐད་ཅིག་སྦྱོར་བཅས་སྦྱོར་བ་རྣམ་པ་བཞི། །འབྲས་བུ་ཆོས་སྐུ་དང་བཅས་དངོས་པོ་བརྒྱད། །འབྲས་བུ་ཆོས་སྐུའི་ཚབ་ཏུ་སངས་རྒྱས་ཀྱི། །ཡེ་ཤེས་ཆོས་སྐུ་བསྣན་པས་མངོན་རྟོགས་བརྒྱད། །སེམས་བསྐྱེད་གདམས་ངག་ཐེག་ཆེན་སྦྱོར་ལམ་དང་། །དེ་རྟེན་རང་བཞིན་གནས་རིགས་དམིགས་པ་དང་། །ཆེད་དུ་བྱ་དང་གོ་སྒྲུབ་འཇུག་པའི་སྒྲུབ། །ཚོགས་སྒྲུབ་ངེས་འབྱུང་སྒྲུབ་ཅེས་རྣམ་མཁྱེན་ཉིད། །མཚོན་བྱེད་ཆོས་ནི་རྣམ་པ་བཅུ་རུ་བཞེད། །ལམ་ཤེས་ཡན་ལག་ཉན་ཐོས་རང་རྒྱལ་གྱི། །ལམ་ཉིད་ཤེས་པའི་ལམ་ཤེས་རྣམ་པ་གཉིས། །ཐེག་ཆེན་མཐོང་ལམ་སྒོམ་ལམ་བྱེད་པ་དང་། །མོས་པ་སྒོམ་ལམ་ཕན་ཡོན་བསྟོད་བཀུར་བསྔགས། །བསྔོ་བ་རྗེས་སུ་ཡི་རང་སྒྲུབ་པ་དང་། །རྣམ་དག་སྒོམ་ལམ་དང་བཅས་ལམ་ཤེས་ཀྱི། །མཚོན་བྱེད་ཆོས་ནི་བཅུ་གཅིག་རབ་ཏུ་བཤད། །ཤེས་པས་སྲིད་ལ་མི་གནས་ལམ་ཤེས་དང་། །སྙིང་རྗེས་ཞི་ལ་མི་གནས་ལམ་ཤེས་གཉིས། །འབྲས་ཡུམ་ལ་རིང་ཉེ་བའི་གཞི་ཤེས་དང་། །མི་མཐུན་ཕྱོགས་དང་གཉེན་པོའི་ཕྱོགས་གཞི་ཤེས། །གཞི་ཤེས་སྦྱོར་དང་སྦྱོར་བའི་མཉམ་ཉིད་དང་། །མཐོང་ལམ་བཅས་ཏེ་གཞི་ཤེས་མཚོན་བྱེད་དགུ །སྦྱོར་བའི་རྣམ་པ་སྦྱོར་བའི་ངོ་བོ་དང་། །དེ་ཡི་ཡོན་ཏན་སྐྱོན་དང་མཚན་ཉིད་བཅས། །ཐར་བ་ཆ་མཐུན་ངེས་འབྱེད་ཆ་མཐུན་དང་། །ཕྱིར་མི་ལྡོག་དང་སྲིད་ཞི་མཉམ་ཉིད་སྦྱོར། །ཞིང་དག་སྦྱོར་བ་ཐབས་མཁས་སྦྱོར་བར་བཅས། །རྣམ་རྫོགས་སྦྱོར་བ་མཚོན་བྱེད་ཆོས་བཅུ་གཅིག །དྲོད་རྩེ་བཟོད་པ་ཆོས་མཆོག་རྩེ་སྦྱོར་བཞི། །མཐོང་ལམ་སྒོམ་ལམ་བར་ཆད་མེད་རྩེ་སྦྱོར། །བསལ་བྱ་ལོག་སྒྲུབ་བརྒྱད་བཅས་རྩེ་སྦྱོར་མཚོན། །ཕྱིན་དྲུག་རྗེས་སུ་དྲན་པ་རྣམ་དྲུག་དང་། །དངོས་མེད་ངོ་བོ་ཉིད་ཀྱི་མཐར་གྱིས་སྦྱོར། །བཅུ་གསུམ་མཐར་གྱིས་སྦྱོར་བ་མཚོན་བྱེད་དོ། །རྣམ་པར་སྨིན་པ་མ་ཡིན་རྣམ་པར་སྨིན། །མཚན་ཉིད་མེད་དང་གཉིས་སུ་མེད་པ་ཡི། །སྐད་ཅིག་སྦྱོར་བ་མཚོན་བྱེད་རྣམ་པ་བཞི། །ངོ་བོ་ཉིད་སྐུ་ལོངས་སྐུ་སྤྲུལ་སྐུ་དང་། །ཡེ་ཤེས་ཆོས་སྐུ་འཕྲིན་ལས་བསྡོམས་བྱས་པ། །རྣམ་པ་བཞི་ནི་ཆོས་སྐུ་མཚོན་བྱེད་དེ། །མདོར་ན་དོན་ནི་བདུན་ཅུ་ཞེས་བྱར་བརྗོད། །དངོས་པོ་བརྒྱད་དུ་ཕྱེ་བ་རྒྱས་པ་སྟེ། །འབྲིང་དང་བསྡུས་པའི་དབང་དུ་བྱས་པའི་ཚེ། །མཁྱེན་གསུམ་གཅིག་བགྲང་སྦྱོར་བཞི་སོ་སོར་ཕྱེ། །འབྲས་བུ་ཆོས་སྐུ་དང་བཅས་དངོས་པོ་དྲུག །ཡང་ན་མཁྱེན་གསུམ་གཅིག་བསྡོམས་སྦྱོར་བཞི་ཡང་། །གཅིག་ཏུ་བགྲང་ནས་འབྲས་བུ་ཆོས་སྐུར་བཅས། །དངོས་པོ་གསུམ་དུ་རྣམ་པར་བཞག་པ་ཡིན། །མངོན་རྟོགས་རྒྱན་དང་རྒྱུད་བླ་མདོ་སྡེ་རྒྱན། །ཆོས་ཉིད་རྣམ་འབྱེད་དབུས་མཐའ་རྣམ་པར་འབྱེད། །བྱམས་ཆོས་སྡེ་ལྔ་ཞེས་ནི་ཀུན་ཏུ་གྲགས། །རྩ་བ་ཤེས་རབ་རིགས་པ་དྲུག་ཅུ་བ། །སྟོང་ཉིད་བདུན་ཅུ་ཞིབ་མོ་རྣམ་པར་འཐག །རྩོད་ཟློག་རིན་ཆེན་ཕྲེང་བ་རིགས་ཚོགས་དྲུག །ས་ཡི་དངོས་གཞི་རྣམ་གྲངས་བསྡུ་བ་དང་། །རྣམ་པར་བཤད་པའི་བསྡུ་བ་གཞི་བསྡུ་བ། །གཏན་ལ་ཕབ་པའི་བསྡུ་བ་ས་སྡེ་ལྔ། །ཚད་མ་རྣམ་འགྲེལ་རྣམ་ངེས་རིགས་ཐིགས་དང་། །གཏན་ཚིགས་རིགས་པ་རྩོད་རིགས་འབྲེལ་བ་བརྟག །རྒྱུད་གཞན་གྲུབ་ཅེས་ཚད་མ་སྡེ་བདུན་ཟེར། །དེ་དག་ཉེར་མཁོ་ཅི་རིགས་བྲིས་པ་སྟེ། །ཆོས་ཀྱི་རྣམ་གྲངས་ཕ་མཐའི་ཚད་བྲལ་ཕྱིར། །མཐའ་དག་སུ་ཞིག་གིས་ནི་བརྗོད་པར་ནུས། །རིགས་བརྒྱའི་ཁྱབ་བདག་རྡོ་རྗེ་འཆང་དབང་དང་། །དབྱེར་མེད་བླ་མ་རྣམས་ལ་ཕྱག་བཙལ་ནས། །གསང་སྔགས་གཞུང་ནས་འབྱུང་བའི་དོན་འགའ་ཞིག །མིང་གི་སྒོ་ནས་རྣམ་པར་བསྟན་པར་བྱ། །བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་ཉིད་དང་། །རྣལ་འབྱོར་བླ་མེད་རྒྱུད་སྡེ་རྣམ་པ་བཞི། །བླ་མེད་ལ་ཡང་ཕ་རྒྱུད་མ་རྒྱུད་གཉིས། །དང་པོ་སྦྱོར་བ་དཀྱིལ་འཁོར་རྒྱལ་མཆོག་དང་། །ལས་ཀྱི་རྒྱལ་པོ་མཆོག་སྟེ་ཏིང་འཛིན་གསུམ། །སྐད་ཅིག་གིས་བསྐྱེད་སྐད་ཅིག་དཀྲོངས་བསྐྱེད་དང་། །ས་བོན་ཕྱག་མཚན་ལས་ནི་སྐུ་རྫོགས་པར། །བསྐྱེད་པར་བྱེད་པ་ཆོ་ག་སུམ་བསྐྱེད་དོ། །སྟོང་བ་ཉིད་ལས་གདན་དང་ས་བོན་དང་། །ཕྱག་འཚལ་སྐུ་བསྐྱེད་མངོན་བྱང་ལྔ་བསྐྱེད་དེ། །གཞན་དུ་ཅུང་ཟད་མི་འདྲའི་ཁྱད་པར་ཡོད། །ཟབ་པ་བདག་མེད་རྟོགས་པའི་ལྟ་བ་དང་། །རྒྱ་ཆེ་བ་ནི་ལྷ་ཡི་འཁོར་ལོར་བཞེད། །གཉིས་ཀ་ཟུང་འབྲེལ་ཟབ་གསལ་གཉིས་མེད་དོ། །སྟོང་ཉིད་རྟོགས་པའི་ལྟ་བས་མ་ཟིན་པར། །ལྷ་ཡི་དཀྱིལ་འཁོར་སྒོམ་པ་མཚན་བཅས་ཏེ། །སྟོང་ཉིད་སྒོམ་པ་མཚན་མེད་རྣལ་འབྱོར་རོ། །ཕྱག་ཆེན་དམ་རྒྱ་ཆོས་རྒྱ་ལས་རྒྱ་བཞིར། །ཕྱག་རྒྱ་བཞི་ཤེས་བཤད་ཅིང་དེ་ཡང་ནི། །སྐུ་ནི་ཕྱག་ཆེན་གསུང་ཆོས་ཐུགས་དམ་ཚིག །འཕྲིན་ལས་ལས་ཀྱི་ཕྱག་རྒྱ་ཉིད་དུ་བཤད། །རྣལ་འབྱོར་རྒྱུད་མན་བདག་མདུན་བུམ་བསྐྱེད་ལས། །བསྐྱེད་རྫོགས་གཉིས་ཀྱི་རྣམ་པར་བཞག་པ་མེད། །བླ་མེད་ལ་ནི་བསྐྱེད་རྫོགས་རིམ་པ་གཉིས། །དབེན་གསུམ་སྒྱུ་ལུས་འོད་གསལ་ཟུང་འཇུག་ལ། །རིམ་པ་དྲུག་ཅེས་འཕགས་པ་ལྷ་ཡིས་བཤད། །ལུས་དབེན་ངག་དབེན་གཅིག་བསྡོམས་སེམས་དབེན་དང་། །སྒྱུ་ལུས་འོད་གསལ་ཟུང་འཇུག་རིམ་པ་ལྔར། །ཀླུ་སྒྲུབ་ཉིད་ཀྱིས་རིམ་ལྔ་ལས་ནི་བཤད། །སེམས་དབེན་སྒྱུ་ལུས་འོད་གསལ་ཟུང་འཇུག་ཅེས། །རིམ་པ་བཞི་རུ་དཔལ་ལྡན་ཟླ་བས་བཤད། །འོན་ཀྱང་དེ་དག་མི་འགལ་དབྱེ་བསྡུ་ཙམ། །སོར་སྡུད་བསམ་གཏན་སྲོག་རྩོལ་འཛིན་པ་དང་། །རྗེས་དྲན་ཏིང་འཛིན་ཡན་ལག་རྣམ་པ་དྲུག །སྔགས་དང་དམ་ཚིག་རྣལ་འབྱོར་དབྱིབས་དང་ནི། །རྣམ་དག་ཡེ་ཤེས་རྣལ་འབྱོར་རྣམ་པ་བཞི། །སྣང་མཆེད་ཐོབ་གསུམ་འོད་གསལ་བཅས་པ་བཞི། །འདི་བཞིར་སྟོང་བ་ཤིན་ཏུ་སྟོང་པ་དང་། །སྟོང་ཆེན་ཐམས་ཅད་སྟོང་བ་ཞེས་བྱར་བཤད། །རིགས་ལྔ་ཡུམ་བཞི་རྡོ་རྗེ་མ་ལྔ་དང་། །ཀུན་བཟང་བྱམས་པ་མ་གཏོགས་སེམས་དཔའ་དྲུག །རེ་རེར་རིགས་ལྔར་ཕྱེ་བས་ཀུན་བསྡོམས་ན། །དམ་པ་རིགས་བརྒྱ་ཉིད་དུ་འགྱུར་བ་སྟེ། །རྙིང་མའི་དམ་པ་རིགས་བརྒྱ་འདི་མ་ཡིན། །རྣམ་སྣང་ལ་སོགས་རིགས་ནི་རྣམ་ལྔ་ལ། །སྐུ་གསུང་ཐུགས་ཀྱི་རིགས་ནི་གསུམ་དུ་འདོད། །རྡོ་རྗེ་འཆང་དབང་གསང་ཆེན་རིགས་གཅིག་གོ །གཞན་ཡང་དབང་བཞི་བུམ་དབང་གསང་དབང་དང་། །ཤེས་རབ་ཡེ་ཤེས་ཚིག་དབང་རྣམ་བཞིའོ། །བསམ་གཏན་ལུས་དཀྱིལ་ཕྱི་ཡི་དཀྱིལ་འཁོར་གསུམ། །ཕྱི་དཀྱིལ་ལ་ཡང་རྡུལ་ཚོན་རས་བྲིས་གཉིས། །བླ་མར་སྨོད་སོགས་རྩ་ལྟུང་བཅུ་བཞིའོ། །ས་ཆུ་མེ་རླུང་རྩ་ཐིག་ཁམས་དྲུག་ལྡན། །ཤ་རུས་ལ་སོགས་དྲུག་ཏུ་བཞེད་པའང་ཡོད། །དབུ་མ་རོ་རྐྱང་རྩ་ནི་རྣམ་པ་གསུམ། །སྤྱི་བོ་མགྲིན་པ་སྙིང་ཁ་ལྟེ་བ་ཡི། །རྩ་འཁོར་བཞིའམ་ཡང་ན་གསང་གནས་དང་། །ནོར་བུའི་རྩ་འཁོར་ཞེས་བྱ་དྲུག་ཏུའང་འདོད། །སྲོག་འཛིན་ལ་སོགས་རླུང་ནི་རྣམ་པ་བཅུ། །ཆོས་ལོངས་སྤྲུལ་སྐུའི་བསྲེ་བ་རྣམ་པ་གསུམ། །སྤྲོས་བཅས་ལ་སོགས་སྤྱོད་པ་གསུམ་དུ་བཤད། །དྲང་དོན་ངེས་དོན་དགོངས་དང་དགོངས་མིན་དང་། །ཇི་བཞིན་སྒྲ་དང་ཇི་བཞིན་མིན་སྒྲ་སྟེ། །མཐའ་དྲུག་ཅེས་གྲགས་སྤྱི་དོན་ཡིག་དོན་དང་། །སྦས་དོན་མཐར་ཐུག་དོན་བཅས་ཚུལ་བཞིར་བཤད། །སྐུ་དང་གསུང་དང་ཐུགས་ཀྱི་དབང་ཕྱུག་གསུམ། །རྫུ་འཕྲུལ་ཀུན་འགྲོ་གནས་ཀྱི་དབང་ཕྱུག་དང་། །ཅི་འདོད་བསྐྱེད་དང་ཡོན་ཏན་དབང་ཕྱུག་བཅས། །དབང་ཕྱུག་བརྒྱད་དེ་ཕྲ་དང་རགས་པ་དང་། །ཡང་བ་ལ་སོགས་དབང་ཕྱུག་ཡོན་ཏན་བརྒྱད། །རིལ་བུ་མིག་སྨན་ས་བོག་རལ་གྲི་དང་། །ནམ་མཁར་འཕུར་དང་མི་སྣང་འཆི་བ་མེད། །ནད་ཀུན་འཇོམས་བཅས་གྲུབ་པ་ཆེན་པོ་བརྒྱད། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་དང་། །རང་བཞིན་མེད་དང་སྙིང་རྗེས་ཡོངས་གང་བ། །རྒྱུན་མི་འཆད་དང་འགོག་པ་མེད་པའི་སྐུ། ཁ་སྦྱོར་ཡན་ལག་བདུན་ཅེས་བྱ་བར་བཤད། །དེ་ལ་སོགས་པ་མང་དུ་ཡོད་མོད་ཀྱང་། །སྐབས་འདིར་རགས་པའི་རྣམ་གཞག་དེ་ཙམ་ཞིག །བརྗོད་པ་ཡིས་ནི་གཞན་དག་དཔག་བྱ་སྟེ། །མཐའ་དག་སྨྲ་བ་ནུས་མིན་སྐབས་ཀྱང་མིན། །དེ་དག་ཀུན་གྱི་དོན་ནི་གང་ཡིན་པར། །མ་རྟོགས་མིང་ཙམ་བཟུང་བ་ཉིད་ཀྱིས་ཀྱང་། །ཕན་པར་འགྱུར་སྲིད་འོན་ཏེ་ལ་ལ་དག །གྲངས་ཙམ་ཤེས་ངེས་མཁས་པར་རློམ་པར་མཚར། །རྐང་གྲངས་ཙམ་ཞིག་ཤེས་པ་དེ་ཡིས་ནི། །མཁས་པར་འགྱུར་ན་འདོན་ཆ་བྱང་བ་ཡི། །བྱིས་པ་དུ་མ་ཡོད་ཕྱིར་དེ་དག་ཀུན། །མཁས་པའི་གནས་སུ་འཇོག་ཏུ་རུང་ངམ་ཅི། ཁ་ཅིག་ཐོས་པའི་ཡོན་ཏན་དོན་མི་གཉེར། །གཞན་དག་ཅུང་ཟད་ཤེས་པས་རྒྱུད་ཁེངས་ནས། །ཤེས་བྱའི་མཐའ་ཡང་འདི་ཙམ་སྙམ་བྱེད་པ། །གང་དེ་བླུན་པོ་མིན་ལས་གཞན་ཅི་ཞིག །དེ་དག་ལ་ནི་ལྟོ་གོས་ཙམ་ཞིག་ལས། །ཇི་སྐད་བརྗོད་པའི་རྣམ་པར་བཞག་པ་འདི། །ཉེ་བར་མཁོ་བ་འགའ་ཡང་ཡོད་མིན་ཀྱང་། །གཟུར་གནས་དག་ལ་ཕན་སྲིད་སྙམ་ནས་བྲིས། །འོན་ཀྱང་མདོར་བསྡུས་མཚོན་ཕྱིར་ཚིགས་བཅད་དུ། །བསྒྲིགས་པས་ཞིབ་ཆ་གསལ་བར་མ་ཐོན་པའི། །མ་བཤད་ལོག་པར་བཤད་པའི་ཉེས་པ་གང་། །དམ་པ་རྣམས་ཀྱི་སྤྱན་སྔར་འགྱོད་ཅིང་འཆགས། །འདིར་འབད་ལས་བྱུང་དགེ་ཚོགས་གངྒཱའི་རྒྱུན། །ཇི་སྙེད་མཆིས་དེ་འགྲོ་བ་མཐའ་དག་གི །རྨོངས་པའི་དྲི་མ་འཁྲུད་དང་ལྷན་ཅིག་ཏུ། །ཀུན་མཁྱེན་རྒྱ་མཚོ་ཆེན་པོར་འཇུག་ཕྱིར་བསྔོ། །ཅེས་པ་འདི་ནི་གནས་བརྟན་ཤེས་རབ་བཀྲ་ཤིས་ཀྱིས་བསྐུལ་བའི་ངོར་སྔར་བྲིས་པ་ལ། དད་དང་རྣམ་དཔྱོད་ཟུང་དུ་འབྲེལ་བའི་དཀའ་བཅུ་བ་བློ་བཟང་བསམ་འགྲུབ་དང་། གནས་བརྟན་འཇམ་དབྱངས་སེང་གེ་གཉིས་ཀྱིས་གཞན་ལའང་ཕན་སྲིད་པར་བསམས་ཏེ། རང་གི་ཆོས་སྐལ་གྱི་ཕྱིར་ཡང་པར་དུ་བརྐོ་བར་བཞེད་པའི་ཚེ། ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་སྦྱར་བའོ།། །།དགེ་བའོ།། །།
དམ་ཆོས་འཛིན་པའི་སྨོན་ལམ་མཐུ་ལྡན་པས། །གསུང་རབ་དགོངས་དོན་འགྲེལ་ལ་ཆེས་མཁས་པ། །ཤིང་རྟ་ཆེན་པོའི་ཞབས་ལ་ཕྱག་འཚལ་ནས། །གཞུང་དོན་ཉེར་མཁོ་འཐོར་བུ་འདི་བཤད་བྱ། །འདིར་དགེ་སོགས་གསུམ་དང་། མཚན་ཉིད་གསུམ་དང་། སེམས་སེམས་བྱུང་གི་རྣམ་གཞག་བཤད་པ་གསུམ། དང་པོ་ལ། དགེ་མི་དགེ་ལུང་མ་བསྟན་གསུམ་ལས། དང་པོ་ལ། རང་འབྲས་རྣམ་སྨིན་གྱི་འབྲས་བུ་ཡིད་འོང་འབྱིན་རུང་དུ་ལུང་དུ་བསྟན་པའི་རིགས་གནས་ཀྱི་ཆོས། དགེ་བའི་མཚན་ཉིད། སྒྲས་བརྗོད་རིགས་ཀྱིས་དབྱེ་ན། དོན་དམ་པའི་དགེ་བ། ངོ་བོ་ཉིད་ཀྱི་དགེ་བ། ཀུན་སློང་གི་དགེ་བ། མཚུངས་ལྡན་གྱི་དགེ་བ་དང་བཞི། དང་པོ་ནི། ཐར་བ་ལྟ་བུ་སྟེ། དགེ་བའི་སྒྲར་བཏགས་པ་ཡིན་གྱི། དེ་དངོས་མིན་ནོ། །གཉིས་པ་ནི་དད་པ་ལྟ་བུ། གསུམ་པ་ནི་དད་པས་ཀུན་ནས་བསླངས་པའི་ལས་ལྟ་བུ། བཞི་བ་ནི་ལས་དེ་དང་མཚུངས་ལྡན་གྱི་སེམས་དང་སེམས་བྱུང་ལྟ་བུའོ། །སྲོག་གཅོད་སྤོང་བའི་ལས་སོགས་ལའང་དེས་མཚོན་ནས་ཤེས་དགོས་སོ། །གཉིས་པ་ལ། རང་འབྲས་རྣམ་སྨིན་གྱི་འབྲས་བུ་ཡིད་མི་འོང་འབྱིན་རུང་དུ་ལུང་དུ་བསྟན་པའི་རིགས་གནས་ཀྱི་ཆོས། མི་དགེ་བའི་མཚན་ཉིད། དེ་ལ་སྒྲས་བརྗོད་རིགས་ཀྱིས་དབྱེ་ན། དོན་དམ་པའི་མི་དགེ་བ། ངོ་བོ་ཉིད་ཀྱི་མི་དགེ་བ། ཀུན་སློང་གི་མི་དགེ་བ། མཚུངས་ལྡན་གྱི་མི་དགེ་བ་དང་བཞི། དང་པོ་ནི། འཁོར་བ་ལྟ་བ་སྟེ། མི་དགེ་བ་དངོས་མིན་ཡང་དེའི་སྒྲར་བཤད་པའོ། །གཉིས་པ་ནི། དཀོན་ཅོག་ལ་མ་དད་པ་ལྟ་བུ། གསུམ་པ་ནི། དེས་ཀུན་ནས་བསླངས་པའི་ལས་ལྟ་བུ། བཞི་པ་ནི། དེ་དང་མཚུངས་ལྡན་གྱི་སེམས་སེམས་བྱུང་ལྟ་བུའོ། །སྲོག་གཅོད་ཀྱི་ལས་སོགས་ལའང་དེས་མཚོན་པར་བྱའོ། །གསུམ་པ་ལ། རྣམ་སྨིན་གྱི་འབྲས་བུ་ཡིད་འོང་དང་ཡིད་མི་འོང་གང་རུང་འབྱིན་མི་ནུས་པའི་ཆོས། ལུང་མ་བསྟན་གྱི་མཚན་ཉིད། དབྱེ་ན། དོན་དམ་པའི་ལུང་མ་བསྟན་སོགས་བཞི་ལས། དང་པོ་ནི། སྟོང་ཉིད་ལྟ་བུ། །གཉིས་པ་ནི། ཕན་གནོད་གང་ཡང་མ་ཡིན་པའི་བྱིས་པའི་རྩེ་ལས་ལྟ་བུ། གསུམ་པ་ནི། དེ་ཀུན་ནས་སློང་བྱེད་ཀྱི་བསམ་པ་ལྟ་བུ། བཞི་བ་ནི་དེ་དང་མཚུངས་ལྡན་དུ་གྱུར་བའི་སེམས་སེམས་བྱུང་ལྟ་བུའོ། །གཞན་ཡང་། དེ་ལ་སྒྲིབ་ལུང་མ་བསྟན་དང་མ་སྒྲིབ་ལུང་མ་བསྟན་གཉིས་ཡོད་པའི་དང་པོ་ནི། གང་ཟག་གི་བདག་འཛིན་དང་བདེན་འཛིན་ཐམས་ཅད། གཉིས་པ་ནི་ནམ་མཁའ་སོགས་འདུས་མ་བྱས་རྣམས་སོ། །དེ་གསུམ་གྱི་དང་པོ་བླང་བྱ། བར་བ་དོར་བྱ། ཕྱི་མ་བཏང་སྙོམས་སུ་བཞག་བྱ་ཡིན་ནོ། །གཉིས་པ་དབུ་མ་པའི་ལུགས་ཀྱི་མཚན་ཉིད་གསུམ་གྱི་རྣམ་གཞག་མདོར་བསྡུས་ཞིག་འཆད་པ་ལ་གསུམ། ཀུན་བཏགས། གཞན་དབང་། ཡོངས་གྲུབ་བོ། །དང་པོ་ནི། རང་འཛིན་རྟོག་པས་སྒྲོ་བཏགས་ཙམ། ཀུན་བཏགས་ཀྱི་མཚན་ཉིད། དབྱེ་ན་གཉིས། རྣམ་གྲངས་པའི་ཀུན་བཏགས་དང་། མཚན་ཉིད་ཡོངས་ཆད་ཀྱི་ཀུན་བཏགས་སོ། །དང་པོ་ལ་གཉིས། ངོ་བོ་དང་ཁྱད་པར་ལ་ཀུན་བཏགས་པའི་ཀུན་བཏགས་དང་། དེ་ལས་གཞན་པའི་ཀུན་བཏགས་སོ། །དང་པོ་ནི། སྔོན་པོ་ལ་གཟུགས་སོ་ཞེས་བཏགས་པའི་བཏགས་ཆ་དེ་ངོ་བོ་དང་། སྔོན་པོ་འདི་ནི་སྐྱེའོ་འགག་གོ་མི་རྟག་གོ་མཛེས་སོ་ཞེས་སོགས་བཏགས་པའི་བཏགས་ཆ་དེ། ཁྱད་པར་ལ་ཀུན་བཏགས་པའི་ཀུན་བཏགས་ཏེ། དེ་བཞིན་དུ་ལྟོ་ལྡིར་བ་ལ་བུམ་པའོ་ཞེས་བཏགས་པའི་ཆ་དེ་ངོ་བོ་དང་། ཆེའོ་ཆུང་ངོ་ཞེས་སོགས་བཏགས་པའི་ཆ་དེ། ཁྱད་པར་ལ་ཀུན་བཏགས་པའི་ཀུན་བཏགས་ཡིན་ལ། ཆོས་ཐམས་ཅད་ལའང་དེས་མཚོན་པར་བྱར་ཡོད་དོ། །གཉིས་པ་ནི། ནམ་མཁའ། དངོས་མེད། རྟག་པ་ལ་སོགས་པ་ཡིན་ནོ། །ཆོས་གང་ཡིན་ཀྱང་དེ་དང་གཅིག །དེ་དང་ཐ་དད། དེའི་ལྡོག་པ་སོགས་ཀྱང་རྣམ་གྲངས་པའི་ཀུན་བཏགས་ཡིན་ནོ། །གཉིས་པ་མཚན་ཉིད་ཡོངས་ཆད་ཀྱི་ཀུན་བཏགས་ནི། གང་ཟག་གི་བདག་འཛིན་གྱིས་སྒྲོ་བཏགས་པ་ལྟར་གྱི་བདག་དང་། བདེན་འཛིན་གྱིས་སྒྲོ་བཏགས་པ་ལྟར་གྱི་བདེན་གྲུབ་དང་། སྒྲ་རྟག་པ་སོགས་མེད་པའི་རིགས་རྣམས་སོ། །གཉིས་པ་ནི། རང་གི་རྒྱུ་རྐྱེན་ལས་སྐྱེས་པ། གཞན་དབང་གི་མཚན་ཉིད། དབྱེ་ན། དག་མ་དག་གི་གཞན་དབང་གཉིས་སམ། གཟུགས་ཤེས་ལྡན་མིན་འདུ་བྱེད་གསུམ། གཞན་དབང་དང་། དངོས་པོ། མི་རྟག་པ། འདུས་བྱས། སྐྱེས་པ་རྣམས་དོན་གཅིག་ཅིང་གོ་སླ་བས་འདིར་མི་བརྗོད། གསུམ་པ་ནི། རྣམ་དག་ལམ་གྱི་དམིགས་པ་མཐར་ཐུག །ཡོངས་གྲུབ་ཀྱི་མཚན་ཉིད། དབྱེ་ན། སྟོང་ཉིད་བཅུ་དྲུག །སྟོང་ཉིད། ཡོངས་གྲུབ་དོན་གཅིག་ཡིན་པས་ན། གཟུགས་སོགས་ཀྱི་ཆོས་གང་ཡིན་ཀྱང་། རང་ཉིད་བདེན་པར་མེད་པ་དང་། དོན་དམ་པར་མེད་པ་སྟོང་ཉིད་ཡིན་པས་ཁྱབ་པ་ལྟར་ཡོངས་གྲུབ་ཡིན་པས་ཀྱང་ཁྱབ་བོ། །གཞན་ཡང་། གཟུགས་སོགས་གཞན་དབང་གི་ཆོས་རྣམས་ཀྱི་སྟེང་དུ་བདེན་པར་འཛིན་པའི་བདེན་འཛིན་གྱིས་ཇི་ལྟར་སྒྲོ་བཏགས་པའི་ཆ་རྣམས་ཀུན་བཏགས་ཡིན་ལ། དེས་བཏགས་པ་ལྟར་བདེན་པར་མ་གྲུབ་པ་ཡོངས་གྲུབ་ཏུ་འཇོག་པ་ཡིན་ནོ། །གསུམ་པ་སེམས་དང་སེམས་བྱུང་གི་ཁྱད་པར་བཤད་པ་ལ་གཉིས་ལས། དང་པོ་ནི། རང་གི་འཁོར་དུ་གྱུར་བའི་སེམས་བྱུང་དང་མཚུངས་ལྡན་དུ་གྱུར་བའི་གཙོ་བོ་རྣམ་རིག་དེ། གཙོ་སེམས་ཀྱི་མཚན་ཉིད། སེམས་དང་། རྣམ་ཤེས། རྣམ་རིག་རྣམས་དོན་གཅིག །དབྱེ་ན། མིག་གི་རྣམ་པར་ཤེས་པ་སོགས་རྣམ་ཤེས་ཚོགས་དྲུག་དང་། ཉོན་མོངས་ཅན་དང་། ཉོན་མོངས་ཅན་མ་ཡིན་པའི་སེམས་གཉིས་ཡོད། གཞན་ཡང་། གཙོ་སེམས་རྣམས་ནི། དོན་གྱི་ངོ་བོ་རིག་པའི་སྒོ་ནས་བཞག་ལ། སེམས་བྱུང་རྣམས་ནི། དོན་གྱི་ཁྱད་པར་རིག་པའི་སྒོ་ནས་བཞག་པ་ཡང་ཡིན་ཏེ། དབུས་མཐའ་ལས། དེ་ལ་དོན་དམ་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་དང་། དེའི་འགྲེལ་པར། དོན་གྱི་ངོ་བོ་ཙམ་རིག་པ་ནི་རྣམ་པར་ཤེས་པའོ། །དོན་གྱི་ཁྱད་པར་རིག་པ་ནི་སེམས་ལས་བྱུང་བ་རྣམས་ཏེ་ཚོར་བ་ལ་སོགས་པའོ། །ཞེས་གསུངས་པའི་ཕྱིར་རོ། །དེ་ཡང་ཡུལ་གྱི་གཙོ་བོའི་དབང་དུ་བྱས་ཤིང་སོ་སྐྱེའི་གཙོ་སེམས་ཀྱིས་ཡུལ་གྱི་ཁྱད་པར་མི་རྟོགས་པ་ནི་མ་ཡིན་ཏེ། དེའི་མིག་གི་རྣམ་པར་ཤེས་པས་ནི། སྔོན་པོའི་ངོ་བོ་དང་དེའི་ཁྱད་པར་མཛེས་མི་མཛེས་སོགས་ཀྱང་རྟོགས་ལ། མིག་གི་རྣམ་ཤེས་ཀྱི་འཁོར་དུ་གྱུར་བའི་སེམས་བྱུང་གིས་ཀྱང་སྔོན་པོ་དང་དེའི་ཁྱད་པར་གཉིས་ཀ་རྟོགས་པའི་ཕྱིར་ཏེ། དེའི་སྔོ་འཛིན་དབང་བོའི་མངོན་སུམ་གྱིས་དེ་ལྟར་མཐོང་བའི་ཕྱིར་ཏེ། རྣམ་འགྲེལ་ལས། དེ་ཕྱིར་དངོས་པོ་མཐོང་བ་ཡིས། །ཡོན་ཏན་མཐའ་དག་མཐོང་བ་ཉིད། །ཞེས་གསུངས་པའི་ཕྱིར་རོ། །གཉིས་པ་སེམས་བྱུང་བཤད་པ་ལ་གཉིས། མཚན་ཉིད་དང་། དབྱེ་བའོ། །རང་ཉིད་འཁོར་དུ་བྱེད་པའི་གཙོ་སེམས་ཀྱི་འཁོར་དུ་བྱུང་བའི་རིག་པ་དེ། སེམས་བྱུང་གི་མཚན་ཉིད། གཉིས་པ་དེ་ལ་སྡེ་ཚན་གྱིས་དབྱེ་ན། ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག །རྩ་ཉོན་དྲུག །ཉེ་ཉོན་ཉི་ཤུ། གཞན་འགྱུར་བཞི་སྟེ་སྡེ་ཚན་དྲུག་དང་། ཕྱེ་ན་སེམས་བྱུང་ང་གཅིག་ཡོད། དང་པོ་ཀུན་འགྲོ་ལ། གཙོ་སེམས་ཀུན་གྱི་འཁོར་དུ་འགྲོ་བའི་རིགས་གནས་ཀྱི་སེམས་བྱུང་དེ། ཀུན་འགྲོའི་མཚན་ཉིད་དམ་ངོ་བོ། དབྱེ་ན། ཚོར་བ། འདུ་ཤེས། སེམས་པ། རེག་པ། ཡིད་བྱེད་དང་ལྔའོ། །དང་པོ་ནི། སིམ་གདུང་བར་མ་གསུམ་གང་རུང་མྱོང་བའི་སྒོ་ནས་བཞག་པའི་སེམས་བྱུང་དེ། ཚོར་བའི་མཚན་ཉིད་དམ་ངོ་བོ། འོག་མ་ཕལ་ཆེར་ལའང་ཞིབ་ཆ་ཅུང་ཟད་བྱེད་ན་སྒོ་ནས་བཞག་པའི་ཞེས་སྦྱོར། དབྱེ་ན། ཚོར་བ་བདེ་སྡུག་བཏང་སྙོམས་གསུམ་མམ། མིག་གི་འདུས་ཏེ་རེག་པ་ལས་བྱུང་བའི་ཚོར་བ་སོགས་དྲུག གཉིས་པ་ལ། ཡུལ་གྱི་སྤུ་རིས་མི་འདྲ་བ་འཛིན་པའི་སེམས་བྱུང་དེ། འདུ་ཤེས་ཀྱི་ངོ་བོ། དབྱེ་ན། རྟོག་བཅས་ཀྱི་འདུ་ཤེས་དང་། རྟོག་མེད་ཀྱི་འདུ་ཤེས་གཉིས། གསུམ་པ་ནི། སེམས་ཡུལ་ལ་གཡོ་བར་བྱེད་པའི་སེམས་བྱུང་དེ། སེམས་པའི་ངོ་བོ། དབྱེ་ན། མིག་གི་རྣམ་པར་ཤེས་པའི་འཁོར་དུ་གྱུར་པའི་སེམས་པ་སོགས་དྲུག །བཞི་བ་ནི། ཡུལ་དབང་རྣམ་ཤེས་གསུམ་འདུས་པ་ལ་བརྟེན་ནས་ཡུལ་གྱི་འགྱུར་བ་ཡོངས་སུ་གཅོད་པའི་སེམས་བྱུང་དེ། རེག་པའི་ངོ་བོ། དབྱེ་ན། མིག་གི་འདུས་ཏེ་རེག་པ་སོགས་དྲུག ལྔ་བ་ནི། སེམས་ཀྱི་འཇུག་པ་ངེས་པའི་བདག་ཉིད་དུ་གྱུར་པའི་སེམས་བྱུང་དེ། ཡིད་བྱེད་ཀྱི་ངོ་བོ། དབྱེ་ན། ཚུལ་བཞིན་དང་། ཚུལ་བཞིན་མ་ཡིན་པའི་ཡིད་བྱེད་གཉིས་སོ། །སྡེ་ཚན་གཉིས་པ་ལ། ཡུལ་སོ་སོར་ངེས་པར་བྱེད་པའི་སྒོ་ནས་བཞག་པའི་སེམས་བྱུང་དེ། ཡུལ་ངེས་ཀྱི་མཚན་ཉིད་དམ་ངོ་བོ། དབྱེ་ན། འདུན་པ། མོས་པ། དྲན་པ། ཏིང་འཛིན། ཤེས་རབ་དང་ལྔའོ། །དང་པོ་ནི། ཡུལ་མ་འོངས་པ་འཐོབ་པ་དོན་དུ་གཉེར་བའི་སེམས་བྱུང་དེ། འདུན་པའི་མཚན་ཉིད་དམ་ངོ་བོ། །གཉིས་པ་ནི། ཇི་ལྟར་བསམས་པའི་དོན་བཞིན་དུ་འཛིན་པར་འདོད་པའི་སེམས་བྱུང་དེ། །མོས་པའི་ངོ་བོ། གསུམ་པ་ནི། དམིགས་རྣམ་མི་བརྗེད་པར་འཛིན་པའི་བདག་ཉིད་དུ་གྱུར་བའི་སེམས་བྱུང་དེ། དྲན་པའི་ངོ་བོ། བཞི་བ་ནི། དམིགས་པ་ལ་རྩེ་གཅིག་པས་ཕྱེ་བའི་སེམས་བྱུང་དེ། ཏིང་འཛིན་གྱི་ངོ་བོ། ལྔ་བ་ནི། དམིགས་པའི་ཆོས་རབ་ཏུ་རྣམ་པར་འབྱེད་པའི་སེམས་བྱུང་དེ། ཤེས་རབ་ཀྱི་ངོ་བོའོ། །སྡེ་ཚན་གསུམ་པ་ལ། མ་དད་པ་སོགས་གང་ཡང་རུང་བའི་གཉེན་པོར་གྱུར་པའི་སྒོ་ནས་བཞག་པའི་སེམས་པ་དེ། སེམས་བྱུང་དགེ་བའི་མཚན་ཉིད་དམ་ངོ་བོ། དབྱེ་ན། དད་པ་དང་། ངོ་ཚ་ཤེས་པ། ཁྲེལ་ཡོད་པ། བག་ཡོད། བཏང་སྙོམས། རྣམ་པར་མི་འཚེ་བ། འདོད་ཆགས་དང་ཞེ་སྡང་དང་གཏི་མུག་མེད་པའི་དགེ་བ་གསུམ་དང་། བརྩོན་འགྲུས། ཤིན་སྦྱངས་ཏེ་བཅུ་གཅིག་གོ །དང་པོ་ནི། ཡོན་ཏན་དང་ཡོན་ཏན་ཅན་སོགས་ཡུལ་ཁྱད་པར་ཅན་ལ་དགའ་བའི་སེམས་བྱུང་དེ། དད་པའི་མཚན་ཉིད་དམ་ངོ་བོ། གཉིས་པ་ནི། རང་རྒྱུ་མཚན་དུ་བྱས་ནས་ཁ་ན་མ་ཐོ་བ་ལ་འཛེམ་པའི་སེམས་བྱུང་དེ། ངོ་ཚ་ཤེས་པ། གསུམ་པ་ནི། གཞན་རྒྱུ་མཚན་དུ་བྱས་ནས་དེ་ལ་འཛེམ་པའི་སེམས་བྱུང་དེ། ཁྲེལ་ཡོད། བཞི་བ་ནི། ཁ་ན་མ་ཐོ་བ་ལ་སེམས་སྲུང་སྣང་བྱེད་པའི་སེམས་བྱུང་དེ། བག་ཡོད། ལྔ་བ་ནི། ཕྱོགས་རིས་སུ་མི་གཅོད་པའི་སེམས་བྱུང་དེ། བཏང་སྙོམས། དྲུག་པ་ནི། གཞན་ལ་ཐོ་འཚམ་པར་མི་བྱེད་པའི་སེམས་བྱུང་དེ། རྣམ་པར་མི་འཚེ་བ། བདུན་པ་ནི། ཟག་བཅས་ཀྱི་ཡོ་བྱད་སོགས་ལ་མ་ཆགས་པའི་སེམས་བྱུང་དེ། འདོད་ཆགས་མེད་པའི་དགེ་བ། བརྒྱད་པ་ནི། ཀུན་ནས་མནར་སེམས་མེད་པའི་སེམས་བྱུང་དེ། ཞེ་སྡང་མེད་པའི་དགེ་བ། དགུ་བ་ནི། ལས་འབྲས་རགས་པ་ལ་རྨོངས་པ་མེད་པའི་སེམས་བྱུང་དེ། གཏི་མུག་མེད་པའི་དགེ་བ། བཅུ་བ་ནི། དགེ་བའི་བྱ་བ་ལ་མངོན་པར་སྤྲོ་བའི་སེམས་བྱུང་དེ། བརྩོན་འགྲུས། བཅུ་གཅིག་པ་ནི། སེམས་ལས་སུ་རུང་བར་བྱེད་པའི་སེམས་བྱུང་དེ། འདིར་ཤིན་སྦྱངས་ཀྱི་ངོ་བོ་སྟེ། ལུས་ཤིན་སྦྱངས་ནི་དེ་མིན་ནོ། །སྡེ་ཚན་བཞི་བ་ལ། སྲིད་པའི་རྩ་བ་བྱེད་པའི་རིགས་གནས་ཀྱི་ཉོན་མོངས་དེ། རྩ་ཉོན་གྱི་མཚན་ཉིད་དམ་ངོ་བོ། །དབྱེ་ན། འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ་ཉོན་མོངས་ཅན། ལྟ་བ་ཉོན་མོངས་ཅན་ཏེ་ལྔའོ། །དང་པོ་ནི། ཟག་བཅས་ཀྱི་དངོས་པོ་ལ་ཀུན་ནས་སྲེད་པའི་སེམས་བྱུང་དེ། འདོད་ཆགས་ཀྱི་མཚན་ཉིད་དམ་ངོ་བོ། གཉིས་པ་ནི། ཀུན་ནས་མནར་སེམས་ཀྱི་གཞི་དང་བཅས་པའི་སེམས་བྱུང་དེ། ཁོང་ཁྲོ། གསུམ་པ་ནི། འཇིག་ལྟའི་དབང་གིས་སེམས་ཁེངས་པའི་རྣམ་པ་ཅན་དུ་གྱུར་པའི་སེམས་བྱུང་དེ། ང་རྒྱལ། བཞི་བ་ནི། རིག་པ་ཡེ་ཤེས་ཀྱི་འགལ་ཟླའི་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པ་དེ། མ་རིག་པ། ལྔ་བ་ནི། རང་ཡུལ་ལ་དོན་མི་འགྱུར་དུ་དོགས་པའི་སེམས་བྱུང་དེ། ཐེ་ཚོམ་ཉོན་མོངས་ཅན། དྲུག་པ་ནི། རང་ཡུལ་ལ་ཀུན་ཏུ་རྟོག་པའི་བདག་ཉིད་དུ་གྱུར་པའི་ཤེས་རབ་ཉོན་མོངས་ཅན་དེ། ལྟ་བ་ཉོན་མོངས་ཅན། འདི་ལ་དབྱེ་ན། འཇིག་ལྟ། མཐར་ལྟ། ལོག་ལྟ། ལྟ་བ་མཆོག་འཛིན་གྱི་ལྟ་བ། ཚུལ་ཞུགས་མཆོག་འཛིན་གྱི་ལྟ་བ་སྟེ་ལྔ། ཉེར་ལེན་གྱི་ཕུང་བོ་ལ་དམིགས་ནས་བདག་གམ་བདག་གིར་འཛིན་པའི་ཤེས་རབ་ཉོན་མོངས་ཅན་དེ། འཇིག་ལྟ། འཇིག་ལྟས་བཟུང་བ་ལྟར་གྱི་བདག་དེ་རྟག་ཆད་གང་རུང་དུ་འཛིན་པའི་ཤེས་རབ་ཉོན་མོངས་ཅན་དེ། མཐར་ལྟ། ལས་འབྲས་སོགས་ཡུལ་ཡོད་པའི་དོན་ལ་མེད་པར་ལྟ་བའི་ཤེས་རབ་ཉོན་མོངས་ཅན་དེ། ལོག་ལྟ། ལྟ་བ་དམན་པ་ལ་མཆོག་ཏུ་རློམ་ཞིང་མངོན་པར་ཞེན་ནས་འཛིན་པའི་ཤེས་རབ་ཉོན་མོངས་ཅན་དེ། ལྟ་བ་མཆོག་འཛིན། ཚུལ་ཁྲིམས་དང་བརྟུལ་ཞུགས་དམན་པ་ལ་མཆོག་ཏུ་འཛིན་པའི་ཤེས་རབ་ཉོན་མོངས་ཅན་དེ། ཚུལ་ཞུགས་མཆོག་འཛིན་ཏེ། སྔ་མ་ཆགས་སོགས་ལྔ་ལ་ལྟ་མིན་ལྔ་དང་། ཕྱི་མ་འདི་ལྔ་ལ་ལྟ་བ་ལྔ་ཞེས་གྲག་གོ །སྡེ་ཚན་ལྔ་བ་ལ། རྩ་ཉོན་དང་ཉེ་བར་གྱུར་པའི་ཉོན་མོངས་དེ། ཉེ་ཉོན་གྱི་མཚན་ཉིད་དམ་ངོ་བོ། དབྱེ་ན། དེར་གྱུར་པའི་ཁྲོ་བ་དང་། ཁོན་འཛིན། འཆབ་པ། འཚིག་པ། ཕྲག་དོག སེར་སྣ། གཡོ། རྒྱགས་པ། རྣམ་འཚེ། ངོ་ཚ་མེད་པ། ཁྲེལ་མེད་པ། རྨུགས་པ། རྒོད་པ། མ་དད་པ། ལེ་ལོ། བག་མེད། བརྗེད་ངས། ཤེས་བཞིན་མིན་པ། རྣམ་གཡེང་སྟེ་ཉི་ཤུའོ། །དང་པོ་ནི། གནོད་བྱེད་སོགས་ལ་ཡིད་འཁྲུགས་པའི་སེམས་བྱུང་བཏགས་ཡོད་དེ། ཁྲོ་བ། གཉིས་པ་ནི། སྔར་གྱི་གནོད་བྱེད་ལ་ཤ་གཉེར་བ་མི་གཏོང་བའི་སེམས་བྱུང་དེ། འཁོན་འཛིན། གསུམ་པ་ནི། ཁ་ན་མ་ཐོ་བ་ཟུར་གྱིས་སྦེད་པར་བྱེད་པའི་སེམས་བྱུང་དེ། འཆབ་པ། བཞི་བ་ནི། ཁྲོ་བ་སྔོན་དུ་འགྲོ་བའི་སྒོ་ནས་ཚིག་རྩུབ་འདྲེན་པར་བྱེད་པའི་སེམས་བྱུང་དེ། འཚིག་པ། ལྔ་བ་ནི། གཞན་གྱི་ཕུན་ཚོགས་ལ་ཡིད་འཁྲུགས་པའི་སེམས་བྱུང་དེ། ཕྲག་དོག །དྲུག་པ་ནི། ཟག་བཅས་ཀྱི་ཡོ་བྱད་སོགས་ལ་དམ་དུ་འཛིན་པའི་སེམས་བྱུང་དེ། སེར་སྣ། བདུན་པ་ནི། ཉེས་པ་འགའ་ཞིག་ཟུར་གྱིས་མི་མངོན་པར་གཞན་དུ་སྒྱུར་བའི་སེམས་བྱུང་དེ། སྒྱུ། བརྒྱད་པ་ནི། ཡོན་ཏན་ཁྱད་པར་གྱི་ཆོས་དེ་དང་མི་ལྡན་བཞིན་དུ་ལྡན་པ་ལྟར་སྟོན་པའི་སེམས་བྱུང་དེ། གཡོ། དགུ་བ་ནི། རང་གི་ཡོ་བྱད་སོགས་ལ་ཆགས་ཤིང་དྲེགས་པའི་སེམས་བྱུང་དེ། རྒྱགས་པ། བཅུ་བ་ནི། གཞན་ལ་ཐོ་འཚམ་པའི་སེམས་བྱུང་དེ། རྣམ་པར་འཚེ་བ། བཅུ་གཅིག་པ་ནི། རང་དང་ཆོས་གང་རུང་རྒྱུ་མཚན་དུ་བྱས་ནས་ཁ་ན་མ་ཐོ་བ་ལ་མི་འཛེམ་པའི་སེམས་བྱུང་དེ། ངོ་ཚ་མེད་པ། བཅུ་གཉིས་པ་ནི། གཞན་རྒྱུ་མཚན་དུ་བྱས་ནས་ཁ་ན་མ་ཐོ་བ་ལ་མི་འཛེམ་པའི་སེམས་བྱུང་དེ། ཁྲེལ་མེད་པ། བཅུ་གསུམ་པ་ནི། ལུས་སེམས་བློང་བློང་པོར་བྱེད་པའི་སེམས་བྱུང་དེ། རྨུགས་པ། བཅུ་བཞི་པ་ནི། སེམས་མ་ཞི་བར་བྱེད་པ་ཅན་གྱི་སེམས་བྱུང་དེ། རྒོད་པ། བཅོ་ལྔ་པ་ནི། ཡོན་ཏན་དང་ཡོན་ཏན་ཅན་སོགས་ལ་མི་གུས་པའི་སེམས་བྱུང་དེ། མ་དད་པ། བཅུ་དྲུག་པ་ནི། དགེ་བ་ལ་མི་སྤྲོ་བའི་སེམས་བྱུང་དེ། ལེ་ལོ། བཅུ་བདུན་པ་ནི། རང་དགར་སྤྱོད་པ་ཕྱིན་ཅི་ལོག་ཏུ་བྱེད་པའི་སེམས་བྱུང་དེ། བག་མེད། བཅོ་བརྒྱད་པ་ནི། དགེ་བའི་དམིགས་རྣམ་བརྗེད་པར་བྱེད་པའི་སེམས་བྱུང་དེ། བརྗེད་ངས། བཅུ་དགུ་པ་ནི། བྱ་བ་དེ་མི་ཤེས་པའམ་དྲན་པ་ཡེངས་ནས་འཇུག་པའི་སེམས་བྱུང་དེ། ཤེས་བཞིན་མ་ཡིན་པ། ཉི་ཤུ་བ་ནི། དགེ་བའི་དམིགས་པ་ལས་ཡིད་ཕྱིར་འཕྲོ་བར་བྱེད་པའི་སེམས་བྱུང་དེ། རྣམ་གཡེང་ངོ་། །སྡེ་ཚན་དྲུག་པ་ལ། དགེ་མི་དགེ་ལུང་མ་བསྟན་གསུམ་པོ་གང་དུ་ཡང་གཅིག་ཏུ་མ་ངེས་པར་འགྱུར་བར་སྲིད་པའི་རིགས་གནས་ཀྱི་སེམས་བྱུང་དེ། གཞན་འགྱུར་གྱི་མཚན་ཉིད་དམ་ངོ་བོ། དབྱེ་ན། གཉིད། འགྱོད་པ། རྟོག་པ། དཔྱོད་པ་སྟེ་བཞིའོ། །དང་པོ་ནི། ལུས་སེམས་ཀུན་ནས་སྡུད་པར་བྱེད་པའི་སེམས་བྱུང་དེ། གཉིད། གཉིས་པ་ནི། བྱས་ཟིན་པའི་དོན་ལ་ཡིད་འཕྱོ་བའི་སེམས་བྱུང་དེ། འགྱོད་པ། གསུམ་པ་ནི། ཡུལ་ལ་རྩིང་བའི་རྣམ་པ་ཅན་གྱི་སེམས་བྱུང་དེ། རྟོག་དཔྱོད་གཉིས་ཀྱི་ནང་ནས་རྟོག་པ། བཞི་པ་ནི། ཡུལ་ལ་ཞིབ་པའི་རྣམ་པས་འཇུག་པའི་སེམས་བྱུང་དེ། དེ་གཉིས་ཀྱི་ནང་ནས་དཔྱོད་པའོ། །དེ་དག་ནི་མངོན་པ་གོང་མའི་ལུགས་གཙོ་ཆེ་ལ། མངོན་པ་མཛོད་ལས། སེམས་ཀྱིས་མང་བཅུ། དགེ་བའི་ས་བ་བཅུ། ཉོན་མོངས་ཆེན་པོའི་ས་བ་དྲུག །མི་དགེ་བའི་ས་བ་གཉིས། ཉོན་མོངས་ཆུང་ངུའི་ས་བ་བཅུ། མ་ངེས་པའི་ས་བ་བརྒྱད་དེ་སྡེ་དྲུག་བཤད་པའི། དང་པོ་བཅུ་ནི། ཚོར་བ། འདུ་ཤེས། སེམས་པ། འདུན་པ། རེག་པ། བློ་གྲོས། དྲན་པ། ཡིད་བྱེད། མོས་པ། ཏིང་འཛིན་ནོ། །གཉིས་པ་བཅུ་ནི། དད་པ། བག་ཡོད། ཤིན་སྦྱངས། བཏང་སྙོམས། ངོ་ཚ་ཤེས་པ། ཁྲེལ་ཡོད། ཆགས་མེད། སྡང་མེད། མི་འཚེ་བ། བརྩོན་འགྲུས་སོ། །གསུམ་པ་དྲུག་ནི། རྨོངས་པ། བག་མེད། ལེ་ལོ། མ་དད་པ། རྨུགས་པ། རྒོད་པའོ། །བཞི་བ་གཉིས་ནི། ངོ་ཚ་མེད་པ་དང་། ཁྲེལ་མེད་པའོ། །ལྔ་བ་བཅུ་ནི། ཁྲོ་བ། འཁོན་འཛིན། གཡོ། ཕྲག་དོག འཚིག་པ། འཆབ་པ། སེར་སྣ། སྒྱུ། རྒྱགས་པ། རྣམ་པར་འཚེ་བའོ། །དྲུག་པ་བརྒྱད་ནི། འདོད་ཆགས། ཁོང་ཁྲོ། ང་རྒྱལ། ཐེ་ཚོམ་བཞི་དང་། རྟོག་དཔྱོད་གཉིད་འགྱོད་དེ་གཞན་འགྱུར་བཞིའོ། །སོ་སོར་ཕྱེ་ན་ཞེ་དྲུག །དེ་རྣམས་ཀྱི་ངོ་བོ་ཇི་ལྟ་བུ་ཡིན་པ་ནི། སྔར་བཤད་པ་དེས་ཤེས་སོ། །དེ་རྣམས་མངོན་པ་གོང་འོག་ནས་འབྱུང་བ་བཞིན་ཡིན་ཏེ། ལུང་ཕྲན་ཚེགས་སོགས་ནས་འབྱུང་བ་གཞན་ཡང་ཡོད་དོ། །ཅེས་པ་འདི་ཡང་། དཀའ་བཅུ་བློ་བཟང་བསམ་འགྲུབ་དང་། གནས་བརྟན་འཇམ་དབྱངས་སེང་གེ་རྣམ་པ་གཉིས་ཀྱིས་དད་པས་ཀུན་ནས་བསླངས་ཏེ། དཔེ་སྔ་མ་པར་དུ་བརྐོ་བར་བཞེད་པའི་ཚེ། བློ་གསར་གཞན་ལ་ཕན་པར་འགྱུར་སྲིད་སྙམ་ནས་ཞར་བྱུང་དུ་བཤད་སྒྲུབ་མིང་ཅན་གྱིས་མདོར་བསྡུས་ནས་སྦྱར་བ་སྟེ། ཉོན་མོངས་ཀྱི་མཚན་ཉིད་སྐྱེ་ཚུལ་སོགས་ཞིབ་ཆ་འདོན་ན། མངོན་པ་ཀུན་བཏུས་རྩ་འགྲེལ་དང་། མཛོད་རྩ་འགྲེལ་ལའང་བལྟ་བར་བྱའོ། །སྨྲས་པ། རྒྱལ་བས་གསུངས་པའི་ཆོས་ཚུལ་ཇི་སྙེད་པའི། །གྲངས་ཀྱི་ཕ་མཐའི་ཚད་ནི་ཇི་ཙམ་པ། །ཀུན་མཁྱེན་ཡེ་ཤེས་ཀྱིས་ཀྱང་གཞལ་མིན་ཕྱིར། །དེ་ཡི་བརྗོད་བྱ་དག་ཀྱང་ཚད་དང་བྲལ། །དེ་ཕྱིར་གསུང་རབ་རྒྱ་མཚོ་ཆེན་པོ་ལས། །ཆ་ཙམ་གཞན་ཕན་ཆེད་དུ་བཀོད་པ་ཉིད། །དད་པས་པར་དུ་བསྐྲུན་པའི་རབ་དཀར་དགེ །ཇི་སྙེད་མཆིས་གང་དེ་ཡང་འགྲོ་བ་ཀུན། །མཐའ་ཡས་གཞུང་ལུགས་ཆུ་གཏེར་ཆེར་ཞུགས་ཏེ། །མི་ཤེས་རྨོངས་པའི་དྲི་མ་ཀུན་བཀྲུས་ནས། །གཏན་བདེ་བླ་མེད་བྱང་ཆུབ་ཆེན་པོའི་སར། །བདེ་བླག་ཉིད་དུ་འཇུག་པའི་ཕྱིར་བསྔོའོ།། །།དགེའོ།། །།