རྣམ་ཐར་གསོལ་འདེབས།
རྣམ་ཐར་གསོལ་འདེབས་ཞེས་བྱ་བ་བཞུགས།
ན་མོ་མཉྫུ་གྷོ་ཥཱ་ཡ། དོན་གཉིས་མཐར་ཕྱིན་ཡང་དག་རྫོགས་སངས་རྒྱས། །བདེན་གཉིས་དབྱེར་མེད་འགོག་ལམ་དམ་པའི་ཆོས། །ཚོགས་གཉིས་ཟུང་འབྲེལ་ཉམས་ལེན་དགེ་འདུན་ཏེ། །སྐྱབས་གནས་དཀོན་མཆོག་གསུམ་ལ་གསོལ་བ་འདེབས། །གཞུང་ལུགས་མང་དུ་ཐོས་པའི་རྣམ་དཔྱོད་ཀྱིས། །བློ་བཟང་གྲགས་པའི་མདོ་སྔགས་ལུང་རྟོགས་བསྟན། །བཤད་དང་སྒྲུབ་པའི་ཚུལ་གྱིས་འཛིན་མཛད་པའི། །བཤེས་གཉེན་དམ་པའི་ཞབས་ལ༴ དེ་ཉིད་སྔོན་བསགས་ལེགས་པར་སྤྱད་པའི་མཐུས། །དལ་འབྱོར་རྟེན་རྙེད་ཆུང་ངུའི་དུས་ན་ཡང་། །རྩོལ་ཆེར་མེད་པར་ཡིག་ཀློག་འབྲི་འདོན་སོགས། །ཀུན་ལ་བྱང་བར་གྱུར་ལ༴ བསྟན་ལ་རབ་བྱུང་ཆོག་བསྒྲིགས་མང་བཟུང་ཞིང་། །བློ་གྲོས་གསལ་ལྡན་དཀར་རམ་བྱ་སྙམ་ཚེ། །མཚན་ཉིད་མཁས་པའི་བླ་ཆེན་འགས་བསྐུལ་ལྟར། །དབུས་སུ་འགྲོ་འདོད་ཤར་ལ༴ དེ་ཚེ་ཕ་མས་གནང་སྟེ་གྲོགས་བཟང་ལ། །བརྟེན་ནས་དབུས་ཕྱིན་ཆོས་གྲྭར་ཞུགས་པ་ན། །ཉིན་མཚན་ཀུན་ཏུ་འབད་རྩོལ་ཤུགས་དྲག་གིས། །གཞུང་མང་འཛིན་པར་མཛད་ལ༴ སེ་རའི་ཚོགས་ཆེན་དགེ་འདུན་སྡེ་དབུས་སུ། །ལན་འགའ་དབུ་མར་འདུལ་མཛོད་ཚོགས་ལང་དུས། །གཞན་དང་བརྒལ་བརྟགས་ལུང་དང་རིགས་པ་ཡིས། །ཕ་རོལ་དཔའ་སྐོང་མཛད་ལ༴ གྲྭ་སར་བཅུ་ཕྲག་ལོ་སྟེང་བླ་མ་ཉིད། །མཉེས་ནས་ལྷ་སར་མིང་གདགས་མཛད་གསུང་ལྟར། །བསྒྲུབས་ཚེ་མཁས་ཀུན་རིགས་ལུང་ཆར་ཕབ་ཀྱང་། །ཐོགས་མེད་ལན་འདེབས་མཛད་ལ༴ ཡིག་སྡེབ་སྙན་ངག་སྒྲ་རྩིས་གཞུང་མང་ལ། །སྦྱངས་ནས་རྒྱུད་དང་དགའ་ལྡན་འབྲས་སྤུངས་སུ། །མདོ་སྔགས་གཞུང་ལ་དམ་བཅའ་ལེགས་བཞག་པས། །མཁས་རྣམས་མགུ་བར་མཛད་ལ༴ བཤེས་གཉེན་དུ་མའི་ཞབས་པད་ཉེར་བསྟེན་ནས། །དབང་ལུང་མན་ངག་བདུད་རྩི་འཐུང་བྱས་ཤིང་། །རྒྱུད་གྲྭར་ཞུགས་ནས་སྔགས་ཀྱི་ཕྱོགས་དག་ལ། །ཐོས་བསམ་ཉམས་ལེན་མཛད་༴ ལས་སྲེད་སྨོན་ལམ་དབང་གིས་རང་ཡུལ་དུ། །འོངས་ནས་གཞུང་མང་དག་ལ་ཐོས་བསམ་དང་། །བཀའ་འགྱུར་ཆེན་མོ་ཚར་གཅིག་བསྒྲགས་གྱུར་པས། །བློ་གྲོས་གོང་འཕེལ་གྱུར་ལ༴ སྨོན་ལམ་ལེགས་སྤྱད་དག་པས་མཚམས་སྦྱར་ཏེ། །ཕྱོགས་འདིར་གསར་བཙུགས་འཆད་ཉན་བླ་མ་རུ། །དཔོན་གྱིས་བསྐོས་པས་ཐོག་མར་གྲྭ་ཚང་ལ། །ལན་མང་ཕན་གདགས་མཛད་ལ༴ དེ་ཚེ་ལོག་སྒྲུབ་རླུང་གིས་མི་གཡོ་བར། །ཀོའུ་ཤྲིའི་ཞབས་དང་ལྷན་ཅིག་འཆད་ཉན་དང་། །གྲྭ་ཁང་གསར་རྒྱགས་སྐོར་ལ་གྲོས་མཐུན་གྱིས། །ཕན་མང་ངེས་པར་སྒྲུབ་ལ༴ འོན་ཀྱང་གང་དག་གཟུ་བོར་མི་གནས་ཤིང་། །དྲིན་བཟོས་དབེན་པའི་བློ་ངོར་ཇི་ལྟར་ཡང་། །ཕྱོགས་འདིར་བསྟན་པའི་རྒྱུན་ལ་ཕན་བཏགས་པར། །ཀུན་གྱིས་དགའ་བར་མཛད་ལ༴ རང་དགོན་འདི་ཡི་མཁན་པོའི་གོ་ས་རུ། །ལན་གཉིས་བསྐོས་ཤིང་རྒྱུད་པ་གསར་བཙུགས་ལའང་། །སློབ་དཔོན་གྱུར་ཚེ་གསང་བདེ་འཇིགས་སོགས་ཀྱི། །འཆད་ཉན་དར་བར་མཛད་ལ༴ དད་ལྡན་མང་ལ་དབང་བསྐུར་རྒྱུད་བཤད་ཅིང་། །རྒྱལ་བསྟན་ཡུན་རིང་གནས་པའི་ཆ་རྐྱེན་དུ། །དགོངས་འགྲེལ་བསྟན་བཅོས་མདོ་སྔགས་པོ་ཏིའི་སྐོར། །བཅུ་ཕྲག་ལྷག་ཙམ་མཛད་ལ༴ དུས་ཀྱི་དབང་དང་ཀུན་རྟོག་རགས་སྟོབས་ཀྱིས། །ས་ལམ་རྟོགས་པ་མཐོན་པོ་མ་རྙེད་ཀྱང་། །ཉིན་མཚན་དག་ཏུ་ཁ་ཏོན་དགེ་སྦྱོར་ལ། །བརྩོན་པས་འཇུག་པར་མཛད་ལ༴ འོན་ཏེ་ལྟ་བའི་ཚུལ་ལ་རྟག་འབད་ཅིང་། །གཞན་ཕན་ལྷག་བསམ་སྙིང་རྗེའི་རི་རབ་ཁུར། །བྱང་ཆུབ་བར་དུ་འདོར་མེད་འཁྱེར་བྱེད་པའི། །དམ་བཅའ་རྒྱུན་དུ་མཛད་ལ༴ རིགས་གསུམ་མགོན་སོགས་ལྷག་པའི་ལྷ་མང་དང་། །གསང་བདེ་འཇིགས་ཀྱི་རྣལ་འབྱོར་ལ་འབད་ཀྱང་། །རྟོགས་པའི་དངོས་གྲུབ་རིང་ཡང་དེ་ཀུན་གྱི། །བྱིན་རླབས་ཞུགས་པར་མཛད་ལ་གསོལ་བ་འདེབས། །སྐྱབས་གནས་བླ་མ་མཆོག་གསུམ་ཡི་དམ་ལྷ། །དཔའ་བོ་མཁའ་འགྲོ་བསྟན་སྲུང་མཐུ་བྱིན་དང་། །རྟེན་འབྲེལ་མི་སླུ་དད་ཅིང་མོས་སྟོབས་ཀྱིས། །ཡོངས་འཛིན་ཚོགས་རྣམས་བསྐལ་བརྒྱར་ཞབས་བརྟན་ཤོག །སྐྱེ་བ་ཀུན་དུ་ཞེས་སོགས་བརྗོད་ཀྱང་མི་འགལ་ལོ། །ཅེས་པ་འདི་ནི་དད་དང་རྣམ་དཔྱོད་ལྡན་པའི་གུར་ཡགས་རི་ཁྲོད་པ་དགེ་སློང་འཇམ་དབྱངས་བརྩོན་འགྲུས་ཀྱིས་རྣམ་ཐར་གསོལ་འདེབས་འདི་ལྟ་བུ་ཞིག་དགོས་ཞེས་ནན་ཏན་དུ་བསྐུལ་བའི་ངོར། ཤཱཀ་བཙུན་བཤད་སྒྲུབ་མིང་ཅན་གྱིས་ངོ་མ་ཟློག་པར་གཡར་ཁྲལ་དུ་བགྱིས་པའོ། །མངྒ་ལཾ།། །།