བསྟན་རྩིས་འཕྲོས་དོན་དང་བཅས་པ།
བསྟན་རྩིས་འཕྲོས་དོན་དང་བཅས་པ་བཞུགས།
ན་མོ་ཤྲཱིཿཀཱ་ལ་ཙཀྲ་ཡེ། །དང་པོར་ཐུགས་བསྐྱེད་བར་དུ་ཚོགས་གཉིས་བསགས། །ཐ་མར་མངོན་སངས་རྒྱས་ཏེ་གདུལ་བྱ་ལ། །ཆོས་ཀྱི་འཁོར་ལོ་བསྐོར་ནས་དོན་མཛད་པའི། །ཟླ་མེད་སྟོན་པ་དེ་ལ་མགོས་ཕྱག་འཚལ། །འདིར་བསྟན་རྩིས་འཕྲོས་དོན་དང་བཅས་པ་འགའ་ཞིག་བསྡུས་ནས་བརྗོད་པར་བྱ་སྟེ། དེ་ཡང་སྤྱིར་དམ་པ་གོང་མ་རྣམས་ཀྱིས་མཛད་པའི་བསྟན་རྩིས་མཐུན་མི་མཐུན་མང་དུ་སྣང་ཡང་། །འཁྲུལ་མེད་ཕུག་ལུགས་འཛིན་པའི་མཁས་བ་དག་གི་བཞེད་པ། བཻ་དཀར་དུ་བཤད་པ་ལྟར་བརྗོད་ན། བདག་ཅག་གི་སྟོན་པ་དེ་ནི་ས་ལུག་གི་ཆུ་སྟོད་ཟླ་བ་ཧོར་ཟླ་དྲུག་པའི་ཚེས་བཅོ་ལྔ་ལ་ལྷུམས་སུ་ཞུགས། དེའི་ཕྱི་ལོ་ལྕགས་སྤྲེལ་ས་ག་ཟླ་བ་ཧོར་ཟླ་བཞི་པའི་ཚེས་བདུན་ལ་སྐུ་བལྟམས། དེ་ནས་བཟུང་སྟེ་དགུང་ལོ་ཉེར་དགུའི་ངོ་མཐོང་ཙམ་དུ་ཁབ་ཏུ་བཞུགས། རབ་ཏུ་བྱུང་ནས་དཀའ་སྤྱད་ལོ་དྲུག་མཛད། དགུང་ལོ་སོ་ལྔ་པ་ཤིང་རྟ་ས་ག་ཟླ་བའི་ཚེས་བཅོ་ལྔའི་མཚན་གྱི་སྨད་ཆ་ལ་གསར་དུ་སངས་རྒྱས་པའི་ཚུལ་བསྟན། ལོ་དེ་ཀའི་ཆུ་སྟོད་ཟླ་བ་ཧོར་ཟླ་དྲུག་པའི་ཚེས་བཞི་ལ་བདེན་བཞིའི་ཆོས་འཁོར་བསྐོར། དེ་ནས་ལོ་ཉེར་གཅིག་སོང་བའི་ཤིང་ཡོས་ཧོར་ཟླ་དང་པོའི་ཡར་ངོ་ལ་ཆོ་འཕྲུལ་ཆེན་པོ་བསྟན། དེ་ནས་དགུང་ལོ་གྱ་གཅིག་པ་ལྕགས་འབྲུག་གི་ནག་ཟླའི་བཅོ་ལྔ་ལ་དུས་ཀྱི་འཁོར་ལོའི་རྒྱུད་གསུངས་ནས་དེའི་ས་ག་ཟླ་བའི་བཅོ་ལྔའི་མཚན་གྱི་གུང་ཐུན་ལ་མྱ་ངན་འདའ་བའི་ཚུལ་བསྟན་ཏེ། དེ་ཡང་སྟོན་པའི་བསྟན་པ་ལྔ་བརྒྱ་པ་ཕྲག་བཅུར་གནས་པར་བཤད་པའི་ལྔ་བརྒྱ་པ་ཕྲག་དང་པོ་ལ་དགྲ་བཅོམ། གཉིས་པ་ལ་ཕྱིར་མི་འོང་། གསུམ་པ་ལ་རྒྱུན་ཞུགས་ཀྱི་འབྲས་བུ་ཐོབ་པ་མང་དུ་འབྱུང་བས་དེ་གསུམ་ལ་འབྲས་བུའི་དུས་དང་། དེ་ནས་ལྔ་བརྒྱ་པ་ཕྲག་བཞི་པ་ལ་ཤེས་རབ་དང་། ལྔ་པ་ཏིང་ངེ་འཛིན་དང་དྲུག་པ་ལ་ཚུལ་ཁྲིམས་ཀྱི་བསླབ་པ་འཛིན་པ་མང་དུ་འབྱུང་བས་དེ་གསུམ་ལ་སྒྲུབ་པའི་དུས་དང་། དེ་ནས་ལྔ་བརྒྱ་པ་ཕྲག་བདུན་པ་བརྒྱད་པ་དགུ་པ་གསུམ་ལ་རིམ་པ་བཞིན་དུ་མངོན་པ་མདོ་སྡེ་འདུལ་པའི་སྡེ་སྣོད་འཛིན་པ་མང་དུ་འབྱུང་བས་དེ་གསུམ་ལ་ལུང་གི་དུས་དང་། ལྔ་བརྒྱ་པ་ཕྲག་བཅུ་པ་ལ་ལྟ་སྤྱོད་རྣམ་དག་མེད་པར་རྟགས་ཙམ་འཛིན་པ་མང་དུ་འབྱུང་བས་དེ་ལ་རྟགས་ཙམ་འཛིན་པའི་དུས་ཞེས་ཐ་སྙད་བྱས་པའི་དུས་བཅུ་ལས། ད་ལྟ་རབ་བྱུང་བཅུ་གཉིས་པའི་མེ་ཡོས་ནས་ལོ་ང་གཉིས་པ་ས་རྟ་འདི། ཡན་ལ་ལྔ་བརྒྱ་པ་ཕྲག་ལྔ་རྫོགས་ནས་དྲུག་པ་ཚུལ་ཁྲིམས་ཀྱི་ལེའུའི་སྟེང་ནས་ལོ་བརྒྱ་དང་བཅོ་བརྒྱད་འདས་ཏེ་བཅུ་དགུ་པའི་ཐོག་ཏུ་སླེབས་སོ། །སྟོན་པ་འཁྲུངས་ནས་ཀཽའུ་ཤྲཱི་ཡེས་སྐུ་གཤེགས་པའི་ས་རྟ་འདིའི་བར་ལོ་ཉིས་སྟོང་བདུན་བརྒྱ་སོང་། སྟོན་པ་འདས་ནས་ས་རྟ་འདིའི་བར་ལོ་ཉིས་སྟོང་དྲུག་བརྒྱ་དང་བཅུ་དགུ་སོང་། སྟོན་པ་འདས་ནས་ལོ་སྟོང་ལྔ་བརྒྱ་དང་དགུ་ནས་རྒྱལ་པོ་སྲོང་བཙན་འཁྲུངས་ཤིང་། འཁྲུངས་ལོ་དེ་ནས་ས་རྟ་འདིའི་བར་ལོ་སྟོང་དང་བརྒྱ་དང་བཅུ་སོང་། སྟོན་པ་གཤེགས་ནས་ལོ་སྟོང་བརྒྱད་བརྒྱ་རེ་གཉིས་ནས་ཇོ་བོ་རྗེ་འཁྲུངས་ཤིང་། དེ་ནས་ས་རྟའི་དེའི་བར་ལོ་བདུན་བརྒྱ་དང་ང་བདུན་སོང་། །སྟོན་པ་འདས་ནས་ལོ་ཉིས་སྟོང་དང་ཉིས་བརྒྱ་སོ་བདུན་ནས་རྗེ་རིན་པོ་ཆེ་འཁྲུངས་ཤིང་། །དེ་ནས་ས་རྟ་འདིའི་བར་ལོ་སུམ་བརྒྱ་དང་གྱ་གཉིས་སོང་ཞིང་། རྗེ་ལོ་རེ་གསུམ་བཞུགས་ཏེ་སྐུ་གཤེགས་ནས་ས་རྟ་འདིའི་བར་ལོ་སུམ་བརྒྱ་དང་བཅུ་དགུ་སོང་། རྗེ་དགུང་ལོ་ང་གསུམ་པ་ས་གླང་ལོར་དགའ་ལྡན་བཏབ། རྗེ་དགུང་ལོ་དྲུག་ཅུ་པ་མེ་སྦྲེལ་ལོར་འབྲས་སྤུངས་བཏབ། རྗེ་དགུང་ལོ་རེ་གསུམ་པ་ས་ཕག་ལ་སེ་ར་བཏབ་ཅིང་ལོ་འདིའི་བཅུ་པའི་ཉི་ཤུ་རྩ་ལྔ་ལ་རྗེ་དགའ་ལྡན་དུ་གཤེགས། རྗེ་གཤེགས་ནས་ལོ་ཉེར་དགུ་པ་མེ་ཡོས་ལོར་བཀྲ་ཤིས་ལྷུན་པོ་བཏབ། ཅོ་ནེ་དགོན་འདི་འཇམ་དབྱངས་གཙང་པ་གདུང་བདུན་བྱོན་པའི་རྗེས་ཡེ་ཤེས་བཟང་པོའི་དུས་སུ་བཏབ་འདུག་པས། ལོ་ཚིགས་ཞིབ་ཏུ་ངེས་དཀའ་ཡང་རྗེ་འདས་ནས་ལོ་དྲུག་ཅུ་བསྐོར་སོང་བའི་ཚེ་བཏབ་པར་ནི་ངེས་སོ། །ཅོ་ནི་དགོན་འདིའི་མཚན་ཉིད་གྲྭ་ཚང་ཤིང་རྟ་ས་ག་ཟླ་བའི་ཚེས་བདུན་སྟོན་པ་སྐུ་བལྟམས་པའི་དུས་ཆེན་ལ་བཙུགས་ཤིང་། དེ་ནས་ས་རྟ་འདིའི་བར་ལོ་ཉེར་ལྔ་སོང་། རྒྱུད་པ་གྲྭ་ཚང་ས་བྱ་ལོའི་སྣྲོན་ཟླ་བའི་ཡར་ཚེས་ལ་བཙུགས་ཤིང་། དེ་ནས་ས་རྟ་འདིའི་བར་ལོ་བཅུ་སོང་ངོ་། །དེ་དག་ནི་བསྟན་རྩིས་སྤྱི་དང་བྱེ་བྲག་གི་སྙིང་པོ་རྣམ་པར་དག་པའི་དོན་བསྡུས་པའོ། །དེ་ནས་དཔལ་དུས་ཀྱི་འཁོར་ལོའི་ལུགས་ཀྱི་འཇིག་རྟེན་གྱི་ཁམས་དང་། དེའི་དབྱིབས་ཚད་སོགས་འགའ་ཞིག་གཞན་དུ་བཤད་ཟིན་ཀྱང། འདིར་ཡང་ཅུང་ཟད་བརྗོད་ན། རླུང་དཀྱིལ་གྱི་ཞེང་དུ་དཔག་ཚད་བཞི་འབུམ། དེའི་སྟེང་དུ་མེ་དཀྱིལ་གྱི་ཞེང་ལ་སུམ་འབུམ། དེ་སྟེང་ཆུ་དཀྱིལ་གྱི་ཞེང་ལ་ཉིས་འབུམ། དེ་སྟེང་ས་དཀྱིལ་གྱི་ཞེང་ལ་འབུམ་ཕྲག་གཅིག་སྟེ། དེ་སོ་སོའི་དཔངས་ལ་དཔག་ཚད་ལྔ་ཁྲི་རེ་དང་། དེ་སོ་སོའི་སྟེང་མ་ལས་འོག་མ་དཔག་ཚད་ལྔ་ཁྲི་རེ་ཕྱིར་འཕགས་སོ། །བཞི་ཀའང་ཟླུམ་པོ་སྟེང་མ་ལས་འོག་མ་རྒྱ་ཆེ་བས་རླུང་མཐར་འབུམ་ཕྲག་བཅུ་གཉིས། མེ་མཐར་དགུ་འབུམ། ཆུ་མཐར་དྲུག་འབུམ། ས་མཐའ་སུམ་འབུམ་མོ། ས་དཀྱིལ་གྱི་དབུས་སུ་ལྷུན་པོ་དཔངས་སུ་དཔག་ཚད་འབུམ་ཕྲག་གཅིག ལྷུན་པོའི་ཚངས་ཐིག་ནས་དེའི་རྩ་བའི་མཐའི་བར་ཕྱོགས་དེར་དཔག་ཚད་སྟོང་ཕྲག་བརྒྱད་རེ། དེ་ནས་ལྷུན་པོའི་ཁོར་ཡུག་ལ་སྟོང་ཕྲག་གཅིག །བསིལ་རིའི་སྟེང་གི་ཐད་ལྷུན་པོའི་ཞེང་ལ་ལྔ་ཁྲི། བསིལ་རིའི་མཐའ་ནས་ལྷུན་པོའི་ཁ་ཁྱེར་གྱི་ཁོངས་སུ་དཔག་ཚད་སྟོང་ཕྲག་བཅུ་དྲུག་ཡོད་པ་ལ་ཆ་མཉམ་བཅོ་བརྒྱད་དུ་བྱས་པའི་ཆ་རེ་ལ་གླིང་དྲུག་མཚོ་དྲུག་རི་དྲུག་སྤེལ་ཏེ་གནས་པ་དང་། བསིལ་རི་ནས་ལྷོར་དཔག་ཚད་སྟོང་ཕྲག་ཕྱེད་དང་བཅུ་གསུམ་དོར་ཞིང་། ཆུ་མཐའ་ནས་བྱང་དུ་དཔག་ཚད་སྟོང་ཕྲག་ཕྱེད་དང་བཅུ་གསུམ་དོར་བའི་དབུས་ན་དཔག་ཚད་སྟོང་ཕྲག་ལྔ་བཅུ་ཡོད་པའི་ས་ཁྱོན་གྱི་ནམ་མཁའ་ཟླུཾ་པོ་ནི་སྐར་ཁྱིམ་རྣམས་རྒྱུ་བའི་ལམ་སྟེ། དེ་ཡང་ལྷུན་པོའི་ཚངས་ཐིག་གི་བར་རྣམས་ཆ་མཉམ་གསུམ་གསུམ་དུ་བཅད་པའི་ཕྱོགས་རེར་གཉིས་གཉིས་དང་ཟུར་དུ་རེ་རེ་དང་བཅས་པའི་དུམ་བུ་བཅུ་གཉིས་དང་། ཡང་ཕྱོགས་རེ་རེར་དུམ་བུ་གསུམ་གསུམ་དུ་བྱས་པའི་བཅུ་གཉིས་ཏེ། ངོས་གཉིས་དང་ངོས་གསུམ་མ་གཉིས་སུ་བྱར་ཡོད་དོ། །ངོས་གསུམ་མ་འདི་ལ་ཕྱོགས་རེ་མའི་ཐ་སྙད་བྱེད་པ་ན་དབུས་མ་ཕྱོགས་དང་གཞན་གཉིས་ཟུར་དུ་གནས་པས་ཟུར་གཉིས་མ་ཡིན་ལ། ཕྱོགས་གཉིས་མ་ལ་ཡར་ངོ་སྔོན་འགྲོ་དང་། ཕྱོགས་རེ་མ་ལ་མར་ངོ་སྔོན་འགྲོ་འོང་ངོ། ཁྱིམ་བཅུ་གཉིས་པོ་རེ་རེར་ཡང་ཉི་མ་ལྷོ་བྱང་དུ་བགྲོད་པའི་ཆ་དུམ་བུ་དྲུག་རེ་ཡོད་ལ། དུམ་བུ་བཅུ་གཉིས་པོ་དེ་ཁྱིམ་བཅུ་གཉིས་སུ་བྱས་པའི་ཁྱིམ་རེ་རེ་ལ་ཆ་སུམ་ཅུ་རེར་བགོས་པ་ནི་ཁྱིམ་ཟླ་རེའི་ཞག་གྲངས་སོ། །ཉི་མ་རླུང་འགྲོས་ཀྱིས་གཡས་བསྐོར་ཡིན་ཀྱང་། ཁྱིམ་དེ་རྣམས་ལ་ནི་གཡོན་སྐོར་དུ་རང་འགྲོས་ཀྱིས་སྤྱོད་པ་ཡིན་ནོ། །དེ་ཡང་རྒྱུ་སྐར་རེ་རེའི་སའི་ཁྱོན་ལ་རྐང་པ་བཞི་རེར་བྱས་པའི་རྒྱུ་སྐང་གཉིས་དང་གཅིག་གི་རྐང་པའི་བཞི་ཆ་བཅས་རྐང་པ་དགུ་རེ་ནི་ཁྱིམ་རེའི་ཁྱོན་ཚད་དེ། རྐང་པ་རེར་ཡུལ་གྱི་ཆུ་ཚོད་བཅོ་ལྔ་རེ་དང་། ཁྱིམ་རེ་རེ་ལ་ཡུལ་གྱི་ཆུ་ཚོད་བརྒྱ་དང་སོ་ལྔ་རེ་ཡོད་པ་དེ་ནི་མདའ་ཡོན་ཟླ་བའི་གོ་དོན་ནོ། ཁྱིམ་རེའི་རྒྱུ་སྐར་གང་ཡིན་པ་ནི། སྣྲུབས་སྐར་ནས་བཟུང་ཆུ་སྨད་བཞི་ཆ་གཞུ། །ཆུ་སྨད་བཞི་གསུམ་མཚན་ཕྱེད་ཆུ་སྲིན་ཁྱིམ། །མོན་ཕྱེད་ནས་བཟུང་ཁྲུམས་སྟོད་བཞི་གསུམ་བུམ། ཁྲུམས་སྟོད་རྐང་གསུམ་ནམ་གྲུ་རྫོགས་པར་ཉ། །ཐ་སྐར་ནས་བཟུང་སྨིན་དྲུག་བཞི་ཆ་ལུག ། མགོ་ཕྱེད་གླང་དང་ནབས་སོའི་བར་གསུམ་འཁྲིག །སྐག་རྫོགས་ཀརྚ་དབོ་ཡི་བཞི་ཆ་སེང་། །ནག་ཕྱེད་བུ་མོ་ས་གའི་བཞི་གསུམ་སྲང་། །ས་གའི་བཞི་ཆ་སྣྲོན་རྫོགས་སྡིག་པའི་ཁྱིམ། །ཞེས་གསུངས་པ་ལྟར་རོ། ཁྱིམ་དེ་རྣམས་ལ་ཉི་མས་གཡོན་དུ་རང་འགྲོས་ཀྱིས་རྫོགས་པར་འཁོར་བའི་ཚད་ལ་ཁྱིམ་ལོ་གཅིག་ཏུ་འཇོག་ཅིང་། མདོར་ན་ཁྱིམ་བཅུ་གཉིས་ལ་ཆ་སུམ་ཅུ་རེར་ཕྱེ་བ་ལ་ཁྱིམ་ཞག་རེ་དང་སུམ་ཅུ་བསྡོམས་པ་ལ་ཁྱིམ་ཟླ་རེ་དང་། དེ་བཅུ་གཉིས་ལ་ཁྱིམ་ལོ་རེ་སྟེ་ཚད་ནི་འཆད་པ་ལྟར་རོ། །ཉིན་ཞག་གི་ངོ་བོ་ནི་ནམ་ལངས་ལག་པའི་རི་མོ་མཐོང་བ་ནས་ཞག་ཕྱི་མའི་ནམ་ལངས་ཀྱི་བར་འཇོག་ལ། ཚད་ནི་ཆུ་ཚོད་དྲུག་ཅུ་རེར་ངེས་སོ། །ཚེས་ཞག་ནི་ཡང་ངོ་མར་ངོ་ལ་ཟླ་བ་འཕེལ་འགྲིབ་བྱེད་པའི་ཡུན་ཚད་ལ་འཇོག་ཅིང་། ཡར་ངོ་ལ་འཕེལ་ཆ་བཅོ་ལྔ་དང་མར་ངོ་ལ་འགྲིབ་ཆ་བཅོ་ལྔ་སྟེ། ཆ་རེ་རེ་རྫོགས་པའི་ཡུན་ལ་ཚེས་ཞག་རེའོ། །ཚད་ནི་ཆུ་ཚོད་ང་དགུ་སོགས་འཆད་པ་ལྟར་རོ། །རྒྱུ་སྐར་ཉི་མ་ཟླ་བ་གསུམ་ལ་མགྱོགས་བུལ་ཡོད་དེ། ཉི་མ་ནི་ཉིན་ཞག་རེ་ལ་རྒྱུ་སྐར་གྱིས་སྐར་ཁོང་རེའི་ཆ་དྲུག་ཅུ་ལས་ཆ་བཞི་རེ་ཕྱིར་ལུས་ཤིང་། ཟླ་བ་ནི་ཉིན་ཞག་རེ་རེ་ལ་སྐར་ཁོང་རེ་རེ་ཕྱིར་ལུས་པར་འགྱུར་བའི་ཕྱིར་རོ། །དབྱར་དགུན་ཉི་མ་རིང་ཐུང་དུ་འགྱུར་བའི་རྒྱུ་མཚན་ཡོད་དེ། སྟོན་དཔྱིད་ཉིན་མཚན་མཉམ་པའི་དུས་སུ་ཤར་གླིང་དབུས་མའི་ཚངས་ཐིག་ནས་ཤར་ཏེ། ནུབ་གླིང་དབུས་མའི་ཚངས་ཐིག་གི་ཐད་ནས་ནུབ་པ་ཡིན་ཀྱང་། དབྱར་ཉི་རིང་བ་མཐར་ཐུག་གི་ཚེ་ཉི་མ་མཐོ་རུ་སོང་སྟེ་ས་ནས་དཔག་ཚད་བརྒྱད་ཁྲི་དྲུག་སྟོང་གི་སྟེང་ནས་འཆར་པས། ཤར་གླིང་དབུས་མའི་ཚངས་ཐིག་ལས་ཤར་དུ་དུས་ཀྱི་ཆུ་ཚོད་ཕྱེད་གསུམ་གྱི་ལམ་ནས་ཤར་ཏེ་ནུབ་གླིང་དབུས་མའི་ཚངས་ཐིག་གི་ཐོག་ཏུ་དེ་མཚུངས་སུ་ནུབ་པར་འགྱུར་བས་འཆར་ཕྱི་ལ་ནུབ་པ་སྔ་བའི་དབང་གིས་ཡིན་པའི་ཕྱིར་རོ། །དེ་ནི་ཉིན་ཞག་གཅིག་ལའང་འབྱུང་སྟེ། གླིང་གང་དུ་དབྱར་ཉི་རིང་བའི་སར་མཐོ་ལ་དགུན་ཉི་ཐུང་བའི་སར་དམའ་ཞིང་ཉིན་མཚན་མཉམ་པའི་སར་དེའི་བར་ཙམ་ན་རྒྱུ་བའི་ཕྱིར་རོ། །གླིང་གང་དང་ཡུལ་གང་དུ་ཡིན་ཀྱང་ཉིན་མཚན་མཉམ་པའི་དུས་སུ་ཉིན་མཚན་གཉིས་སོ་སོ་ལ་ཆུ་ཚོད་སུམ་ཅུ་རེར་ངེས་ཀྱང་། དབྱར་དགུན་གྱི་ཉི་མ་རིང་ཐུང་མི་འདྲ་སྟེ། ཡུལ་དྲུག་གི་གངས་ལྡན་དུ་ཉི་མ་རིང་བའི་སྐབས་ཉིན་མོ་ཆུ་ཚོད་སོ་དྲུག་དང་མཚན་མོ་ཐུང་བའི་ཚེ་ཆུ་ཚོད་ཉེར་བཞི་ཡིན་ཞིང་། ཀེ་ལ་ཤ་དང་རྒྱ་ནག་དང་ལི་དང་བོད་དང་འཕགས་ཡུལ་རྣམས་ལའང་ཁྱད་པར་ཡོད་པས། བོད་ཡུལ་འདིར་ཉིན་མ་རིང་བ་མཐར་ཐུག་གི་ཚེ་ཉིན་མོ་ཆུ་ཚོད་སོ་གསུམ་དང་། ཆུ་སྲང་སུམ་ཅུ། །༣༣་༣༠ མཚན་མོ་ཆུ་ཚོད་ཉེར་དྲུག་དང་ཆུ་སྲང་སུམ་ཅུ་༢༦་༣༠ དགུན་ཉི་ཐུང་བ་མཐར་ཐུག་གི་ཚེ་ཉིན་མོ་ཆུ་ཚོད་ཉེར་དྲུག་དང་ཆུ་སྲང་སུམ་ཅུ། ༢༦་༣༠ མཚན་མོ་ཆུ་ཚོད་སོ་གསུམ་དང་ཆུ་སྲང་སུམ་ཅུའོ། །༣༣་༣༠ ཁྱིམ་ལོ་གཅིག་ལ་ཁྱིམ་ཞག་གི་དབང་གིས་སྟོན་དཔྱིད་ཉིན་མཚན་མཉམ་པ་སུམ་བརྒྱ་དྲུག་ཅུ། དབྱར་དགུན་ཉི་མ་ལྡོག་པ་སུམ་བརྒྱ་དྲུག་ཅུ་དང་། ཁྱིམ་ལོ་གཅིག་ལ་ཉིན་ཞག་གི་དབང་གིས་མཉམ་ལྡོག་བཞི་པོ་སུམ་བརྒྱ་རེ་ལྔ་རེ་ཁོར་ཡུག་ཏུ་བྱས་ནས་འོང་སྟེ། མཚོན་ན་གླིང་འདིར་ཞག་གཅིག་ལ་དབྱར་ཉི་ལྡོག་པའི་ཚེ་དེའི་ཐད་ཀྱི་བྱང་དུ་དགུན་ཉི་ལྡོག་ཅིང་། ཤར་དུ་སྟོན་ཉིན་མཚན་མཉམ་པ་དང་ནུབ་ཏུ་དཔྱིད་ཉིན་མཚན་མཉམ་བ་རྣམས་ཞག་རེ་ལ་འཁོར་ཡུག་ཏུ་བྱས་ནས་དུས་བཞི་གཡས་བསྐོར་དུ་འབྱུང་བ་བཞིན་ནོ། །དུས་བཞི་གཡས་བསྐོར་དུ་འོངས་ཏེ། གླིང་འདིར་དབྱར་ཤར་དུ་སྟོན་བྱང་དུ་དགུན་ནུབ་ཏུ་དཔྱིད་ཡོད་པ་རྣམས་ནི་གཡས་བསྐོར་དུ་རིམ་གྱིས་འཁོར་བའི་ཕྱིར་རོ། །འཕགས་ཡུལ་གྱི་ཚངས་ཐིག་ཏུ་ཉི་མ་ལྡོག་སྔོན་ཞག་ཉེར་གསུམ་ཙམ་སོང་བ་ན་བོད་ཡུལ་དབུས་སུ་ཉི་མ་ལྡོག་པར་བཤད་པས། །དེ་ནས་ཞག་གསུམ་ཙམ་ན་མདོ་སྨད་གྱི་ཡུལ་འདིར་ཉི་མ་ལྡོག་ཅིང་། །དེ་ནས་ཞག་ཕྱེད་གཉིས་ཙམ་ན་རྒྱ་ནག་གི་ཡུལ་ཆེན་པོར་ཉིན་ལྡོག་འབྱུང་བར་མངོན་ཏེ། །དེ་དག་ནི་རང་རང་གནས་པའི་ཡུལ་དེའི་ཐད་ཀྱི་སའི་ཆ་ནས་ལྡོག་པའི་དབང་དུ་བྱས་པའོ། །མཉམ་ལྡོག་མི་འགྱུར་པའི་གཟེར་བཞི་པོ་སོ་སོའི་བར་ལ་ཁྱིམ་ཟླ་གསུམ་གསུམ་འགྲོ་བར་ངེས་པས་དབྱར་དགུན་གྱི་བགྲོད་པ་གཉིས་མཐར་ཐུག་གི་བར་ལ་ནི་ཁྱིམ་ཟླ་དྲུག་རེའོ། །ལོ་སྔ་མའི་དགུན་ཉི་ལྡོག་པ་ནས་ལོ་ཕྱི་མའི་དགུན་ཉི་ལྡོག་པའི་བར་ཁྱིམ་ལོ་གཅིག་གམ། ཁྱིམ་ཞག་སུམ་བརྒྱ་དྲུག་ཅུར་ངེས་ཀྱང་། ཉིན་ཞག་སུམ་བརྒྱ་རེ་ལྔ་རྗེས་འབྲང་དང་བཅས་པ་དང་། ཚེས་ཞག་སུམ་བརྒྱ་དོན་གཅིག་རྗེས་འབྲང་དང་བཅས་པ་འཆད་པ་བཞིན་འགྲོའོ། །དེ་ལྟར་ན་ལོ་སྔ་མའི་དགུན་ཉི་ལྡོག་པའི་ཞག་དེ་ནས་ཚེས་ཞག་བཅུ་གཅིག་རྗེས་འབྲང་བཅས་སོང་བ་ན་ལོ་རྗེས་མའི་དགུན་ཉི་ལྡོག་ཅིང་། །དབྱར་ཉི་ལྡོག་པ་ལའང་འདྲ་སྟེ་འོན་ཀྱང་ཟླ་བཤོལ་བཏོན་མ་ཐག་ཡིན་ན་ཞིབ་ཆ་དབྱེར་ཡོད་དོ། །འཕགས་ཡུལ་གྱི་སའི་ཚངས་ཐིག་ཏུ་ཧོར་ཟླ་བཅུ་གཉིས་པ་ལ་ཉི་ལྡོག་འབྱུང་ཡང་། བོད་དང་ཡུལ་འདིར་ཧོར་ཟླ་བཅུ་གཅིག་པའི་ནང་དུ་འབྱུང་བ་གཙོ་ཆེའོ། །ཟླ་བཤོལ་གྱི་དབང་གིས་བཅུ་གཅིག་པ་དང་བཅུ་གཉིས་པའི་ཚེས་འགོ་ལའང་ཉི་ལྡོག་འབྱུང་སྲིད་དོ། །རགས་རྩིས་ཧོར་ཟླ་བཅུ་གཅིག་པ་གཞུའི་ཁྱིམ་དང་། བཅུ་གཉིས་པ་ནས་བཅུ་པའི་བར་རིམ་པ་བཞིན་ཆུ་སྲིན་དང་བུམ་པ་དང་ཉ་དང་ལུག་དང་གླང་དང་འཁྲིག་པ་དང་ཀརྐ་ཊ་དང་སེང་གེ་དང་བུ་མོ་དང་སྲང་དང་སྡིག་པའི་ཁྱིམ་ཏུ་འཇོག་སྟེ། ཞིབ་ན་གཞུ་ཁྱིམ་གྱི་འགོ་ཧོར་ཟླ་བཅུ་པ་ནས་འཛུག་པའང་ཡོད་དོ། །ལྡོག་མཉ མ་བཞི་པོ་ཁྱིམ་གྱི་དབང་དུ་བྱས་ན་ལྔ་པ་མཁྲིག་པའི་ཁྱིམ་དུ་དབྱར་ཉི་དང་བཅུ་གཅིག་པ་གཞུའི་ཁྱིམ་དུ་དགུན་ཉི་ལྡོག གཉིས་པ་ཉའི་ཁྱིམ་དུ་དཔྱིད་མཉམ་དང་བརྒྱད་པ་བུ་མོའི་ཁྱིམ་དུ་སྟོན་མཉམ་འོང་ངོ་། ཁྱིམ་ཞག་རེའི་མཉམ་ལྡོག་གི་སའི་ཆ་རེ་རེར་ཡང་དཔག་ཚད་སྟོང་དང་བཞི་བཅུ་ལྷག་ཙམ་རེ་ཡོད། །ཉི་མའི་རྒྱུ་ལཾ་ཟླུཾ་པོའི་ཚད་དཔག་ཚད་བདུན་ཁྲི་ལྔ་སྟོང་པོ་ལ་ཁྱིམ་ཞག་གི་གྲངས་ཀྱིས་བགོས་པས་དེ་ལྟར་འབྱུང་བའི་ཕྱིར་རོ། །ལོ་དེ་ལ་རྣམ་གྲངས་ཀྱི་སྒོ་ནས་ཚེས་ལོ་དང་ཉིན་ཞག་གི་ལོ་དང་། ཁྱིམ་ལོ་དང་གསུམ་ཡོད་ཅིང་། །དེ་དག་གི་བར་ཁྱད་དམ་རིང་ཐུང་གི་ཁྱད་པར་ཡོད་དེ། ལོ་གསུམ་པོ་དེ་སྔ་མ་ལས་ཕྱི་མ་རིང་པའི་ཕྱིར་ཏེ། ཁྱིམ་ལོ་གཅིག་སོང་བའི་ཚེ་ཉིན་ཞག་གི་ལོ་གཅིག་དང་དེའི་སྟེང་དུ་ཉིན་ཞག་ལྔ་རྗེས་འབྲང་དང་བཅས་པ་སོང་ཞིང་། ཁྱིམ་ལོ་གཅིག་གི་ཚེ་ཚེས་ལོ་གཅིག་དང་ཚེས་ཞག་བཅུ་གཅིག་རྗེས་འབྲང་དང་བཅས་པ་སོང་པའི་ཕྱིར་ཏེ། སྤྱིར་ལོ་གསུམ་པོ་དེ་གང་འཇོག་ཀྱང་རང་རང་གི་ཞག་སུམ་བརྒྱ་དྲུག་ཅུ་རེར་འཇོག་པ་ཡིན་པས། ཁྱིམ་ལོ་གཅིག་ཁྱིམ་ཞག་སུམ་བརྒྱ་དྲུག་ཅུ་ཙམ་ཡོད་ཀྱང་། དེ་ལ་ཉིན་ཞག་སུམ་བརྒྱ་དྲུག་ཅུ་རྩ་ལྔ་དང་། ཆུ་ཚོད་བཅུ་དྲུག ཆུ་སྲང་བཅུ་བཞི། དབུགས་གཅིག རི་མཁའ་རིའི་ཆ་ཉིས་བརྒྱ་ཉེར་གཅིག་ཡོད། དེ་ལ་ཚེས་ཞག་སུམ་བརྒྱ་དོན་གཅིག ཆུ་ཚོད་བཞི། ཆུ་སྲང་སོ་དྲུག དབུགས་ལྔ། འདོད་ཆ་བདུན། ཡོད་པའི་ཕྱིར་ཏེ། རྒྱུ་མཚན་ནི་ཁྱིམ་ཞག་ལས་ཉིན་ཞག་ཐུང་། ཉིན་ཞག་ལས་ཚེས་ཞག་ཐུང་པའི་དབང་གིས་ཡིན་པའི་ཕྱིར་ཏེ། ཁྱིམ་ཞག་གཅིག་ལ་ཆུ་ཚོད་དྲུག་ཅུ་དང་ཆུ་སྲང་གཉིས། དབུགས་བཞི། རི་མཁའ་རིའི་ཆ་བརྒྱ་རེ་བརྒྱད་མདའ་རོའི་ཆ་ལྔ་བཅུ་རྣམས་ཡོད་ལ། ཉིན་ཞག་ལ་ནི་ཆུ་ཚོད་དྲུག་ཅུར་ངེས་ཤིང་། ཚེས་ཞག་གཅིག་ལ་ཆུ་ཚོད་ང་དགུ ཆུ་སྲང་གསུམ། དབུགས་བཞི། ཆ་ཤས་བཅུ་དྲུག་ཙམ་ཡོད་པའི་ཕྱིར་ཏེ། དེའི་དབང་གིས་ཚེས་ཞག་ལས་ཁྱིམ་ཞག་ཆུ་ཚོད་གཅིག ཆུ་སྲང་ཞེ་དགུ དབུགས་སྟོང་པ། རི་མཁའ་རིའི་ཆ་བརྒྱ་དང་ང་གཉིས་ཀྱིས་རིང་ཞིང་ཚེས་ཞག་ལས་ཉིན་ཞག་ཆུ་སྲང་ང་དྲུག་དང་། དབུགས་གཅིག རི་མཁའ་རིའི་ཆ་དྲུག་བརྒྱ་གོ་གཅིག འདིས་རིང་བའི་ཕྱིར་རོ། །མིའི་དབུགས་ཁུག་པ་དྲུག་ལ་ཆུ་སྲང་གཅིག ཆུ་སྲང་དྲུག་ཅུ་ལ་ཆུ་ཚོད་གཅིག ཆུ་ཚོད་དྲུག་ཅུའི་ཡུན་ལ་ཉིན་ཞག་གཅིག་ལ་དབུགས་ཉིས་ཁྲིི་ཆིག་སྟོང་དྲུག་བརྒྱའོ། །ཚེས་ཞག་ལས་ཁྱིམ་ཞག་རིང་བའི་དབང་གིས་ཚེས་ཞག་དང་ཚེས་ཟླ་ལྷག་པོ་འདོན་པ་ཡིན་ཏེ། ཁྱིམ་ཞག་ཕྱེད་བཅས་སོ་གཉིས་ན་ཚེས་ཞག་གཅིག་ལྷག་པོ་འབྱུང་ལ་དེ་བསགས་པས་ཁྱིམ་ཟླ་ཕྱེད་བཅས་སོ་གཉིས་ནས་ཚེས་ཟླ་གཅིག་ལྷག་པོ་འབྱུང་སྟེ་ཟླ་བཤོལ་འདོན་ཚུལ་དངོས་ཡིན་པའི་ཕྱིར། དོན་ལ་ཁྱིམ་ལོ་གཉིས་དང་ཟླ་བ་ཕྱེད་དགུ་ན་ཟླ་ལྷག་རེ་འདོན་པ་ཡིན་པས། ཟླ་བཤོལ་མ་བཏོན་བར་དུ་ཚེས་ལོ་གཙོ་ཆེ་ཡང་། ཟླ་བཤོལ་འདོན་པ་ནི་ཁྱིམ་ལོའི་དབང་དུ་སོང་བའོ། །དེས་ན་ཞག་ལ་ཉིན་ཞག་དབང་བ ཙན། །ཟླ་བ་ལ་ཚེས་ཟླ་དབང་བཙན་ཞིང་། ལོ་ལ་ཁྱིམ་ལོ་དབང་བཙན་པ་ཡིན་ཏེ། ཉི་མས་ལྷོ་བྱང་གི་བགྲོད་པ་གཉིས་རྫོགས་པ་ནི་ཁྱིམ་ལོ་ལ་ཡོད་ཀྱིས་ལོ་གཞན་གཉིས་ལ་མེད་པའི་ཕྱིར་རོ། །ཟླ་བཤོལ་བཏོན་ནས་ལོ་བཤོལ་སྒེར་དུ་འདོན་རྒྱུ་མེད་ཀྱང་། ཁྱིམ་ལོ་ཕྱེད་བཅས་སོ་གཉིས་སོང་བ་ན་ཚེས་ཟླ་བཅུ་གཉིས་ཀྱི་ཟླ་བཤོལ་འབྱུང་བས་བཅུ་གཉིས་པོ་དེ་དག་ཚེས་ལོ་གཅིག་གི་གྲངས་ཡིན་ལ། རིགས་པ་དེས་ཁྱིམ་ལོ་དྲུག་ཅུ་རྩ་ལྔ་སོང་བ་ན་ཟླ་བཤོལ་ཉེར་བཞི་འཐོན་པས། ཚེས་ལོ་གཉིས་ཀྱི་གྲངས་ཚང་བས་འདི་གཉིས་ལོ་དྲུག་ཅུ་རྩ་ལྔའི་སྟེང་དུ་བསྣན་ན་ཚེས་ལོ་དྲུག་ཅུ་རྩ་བདུན་སོང་བ་སྟེ། གཞན་ལའང་རིགས་པ་སྦྱོར་རོ། །རྣམ་གྲངས་ལ་ཁྱིམ་ལོ་རེ་ལ་ཉིན་ཞིག་གི་ལོ་གཅིག་དང་ཞག་ལྔ་རྗེས་འབྲང་དང་བཅས་པ་འབྱུང་བས་ཞག་ལྔ་པོ་དེ་བསགས་པ་ཁྱིམ་ལོ་རེ་དགུ་ན་ཉིན་ཞག་གི་ལོ་གཅིག་གི་གྲངས་ཀྱི་ཟླ་བཤོལ་འབྱུང་ཡང་ད་ལྟ་ལག་ལེན་ལ་ནི་ལོགས་སུ་མི་བྱེད་དོ། །རགས་རྩིས་ཉིན་ཞག་གི་ཟླ་བ་གཉིས་རེ་ན་ཚེས་ཞག་རེ་ལྷག་པས། ཉིན་ཞག་གི་ཟླ་བ་བཅུ་གཉིས་རྫོགས་པ་ན་ཚེས་ཞག་དྲུག་ལྷག་སྟེ། དེ་ལྟར་ཉིན་ཞག་གི་ལོ་དྲུག་ཅུ་ལྷག་ཙ་ན་ཚེས་ལོ་གཅིག་གི་གྲངས་ཀྱི་ཟླ་བཤོལ་འོང་ངོ་། །འདི་ནི་ཉིན་ལོ་གཅིག་ལ་ཚེས་ལོ་གཅིག་དང་དེའི་སྟེང་དུ་ཚེས་ཞག་དྲུག་མ་ལོངས་ཙམ་ཞིག་ལྷག་པོ་འབྱུང་བ་དེ་བསགས་པས་ཉིན་ལོ་རེ་གསུམ་ན་ཚེས་ལོ་གཅིག་གི་གྲངས་ཀྱི་ཟླ་བཤོལ་འབྱུང་བ་དང་དོན་འདྲའོ། །ཞག་མི་ཐུབ་འདོར་བ་ཡང་འདིའི་སྒོ་ནས་ཡིན་ཏེ། ཚེས་ཞག་གི་ཟླ་བ་གཉིས་རེ་སོང་པའི་ཚེ་ཉིན་ཞག་ང་དགུ་ལས་མ་སོང་ཡང་། དེའི་ཚེ་ཚེས་ཟླ་དབང་བཙན་པར་སོང་ནས། ཉིན་ཞག་གཅིག་མ་ལོངས་པ་ན་གནམ་གང་ཆད་པར་འཇོག་དགོས་པའི་ཕྱིར་རོ། །ཡང་ས་རིས་ཀྱི་སྐབས་ཟླ་དག་གི་འདས་ལོ་ལ་བརྟེན་ནས་ཟླ་བ་ལྷག་པོ་ཅི་ཙམ་སོང་བ་ནི་གསལ་བར་ཤེས་ཏེ། ཟླ་དག་གནས་གཉིས་སུ་བྱས་པའི་གནས་འོག་མ་ལ་རེ་ལྔས་བགོས་པའི་ནོར་ནི་དེའི་བར་གྱི་འདས་ལོ་ལ་ཟླ་བཤོལ་ཅི་ཙམ་སོང་བའི་གྲངས་ཡིན་པའི་ཕྱིར་ཏེ། དཔེར་ན། རབ་བྱུང་བཅུ་གཉིས་པའི་མེ་ཡོས་ནས་ལོ་ང་གཉིས་སོང་བའི་ས་རྟ་འདིའི་བར་ལ་མདའ་རོས་དགོས་པའི་ཐོབ་ནོར་ལ་ཟླ་བཤོལ་བཅུ་དགུ་བྱུང་བར་ཤེས་པ་བཞིན་ནོ། །ཡང་ས་རིས་ཀྱི་སྐབས་སུ་ཞག་ལ་ཆད་ལྷག་འབྱུང་བ་ནི་ཞག་མི་ཐུབ་དང་ཟླ་རྐང་གི་ལོངས་སྤྱོད་འཕེལ་འགྲིབ་ཀྱི་དབང་གིས་ཡིན་ཏེ། སྤྱིར་ཚེས་ཞག་ལ་ཆུ་ཚོད་ང་དགུ་ལྷག་ཙམ་ལས་མེད་ཀྱང་། རྐང་པའི་ལོངས་སྤྱོད་འཕེལ་བ་ན་ཚེས་ལ་ཆུ་ཚོད་རེ་བཞི་ལྷག་ཙམ་འོངས་ལ་རྐང་པ་འགྲིབ་པའི་དུས་སུ་ཚེས་ལ་ཆུ་ཚོད་ང་བཞི་ཅུང་མེད་པ་རེ་འོང་སྟེ། དེའི་སྟོབས་ཀྱིས་རགས་པ་ལོ་གཅིག་ལ་ཆད་པ་བཅུ་གཅིག་གམ་བཅུ་གཉིས་ཙམ་འོངས་ཤིང་། ལྷག་པ་ལྔའམ་དྲུག་ལས་མེད་དེ། རྐང་པའི་དབང་གིས་བྱུང་བའི་ཆད་ལྷག་རྣམས་ཁ་འགྲིག་ནས་ཆད་པའི་ཞག་གྲངས་དྲུག་ཙམ་མང་བ་ནི་ཞག་མི་ཐུབ་པ་སྟེ་གནམ་གང་ཆད་པའི་དོན་ནོ། །ཆད་ལྷག་འོང་བའི་དུས་ནི་ཉིན་ཞག་གིས་ཚེས་ཞག་གསུམ་གྱི་ངོ་མཐོང་མ་མཐོང་འདྲའི། དེས་ཚེས་ཞག་རིལ་པོ་གཅིག་དང་ཚེས་ཞག་ཕྱི་མའི་ངོ་ཡང་མཐོང་བ་དེའི་ཚེ་གཟའ་གཅིག་ལན་གཉིས་ཤར་བ་ན་ཆུ་ཚོད་མང་བའི་ཚེས་དེ་ཆད་པ་བཞག་ལ། ཡང་ཚེས་ཞག་གཅིག་གིས་ཉིན་ཞག་གསུམ་གྱི་ངོ་མཐོང་བ་འོང་ཡང་མཐོང་མ་མཐོང་འདྲའི། །དེས་ཉིན་ཞག་གོང་མའི་ངོ་མཐོང་ཞིང་འོག་མ་རིལ་པོ་དང་འགྲོགས་པ་ནམ་བྱུང་བ་དེའི་ཚེ། རེས་གཟའ་མཆོངས་ཏེ་ཆུ་ཚོད་ཉུང་བའི་ཚེས་དེ་ལྷག་པར་འཇོག་པ་ཡིན་ནོ། །ཡང་མཛོད་ལས། ནམ་ཕྱེད་ཉི་མ་ནུབ་པ་དང་། །ཉི་མ་ཕྱེད་དང་འཆར་དུས་གཅིག །ཅེས་གསུངས་པ་ལྟར་གླིང་བཞིར་ཉི་མ་འཆར་ནུབ་བྱེད་ཀྱི་ཚུལ་གྱི་ཁྱད་པར་ཡོད་དེ། སྒྲ་མི་སྙན་དུ་ནམ་ཕྱེད་པ་དང་། ལུས་འཕགས་པོར་ཉི་མ་ནུབ་པ་དང་། འཛམ་བུའི་གླིང་ཉི་མ་ཕྱེད་པ་དང་། བ་ལང་སྤྱོད་དུ་ཉི་མ་འཆར་བ་རྣམས་དུས་མཉམ་པའི་ཕྱིར་རོ། །དེ་བཞིན་དུ་ཞག་རེ་རེ་ལའང་གླིང་གཞན་དུ་འཁོར་ནས་འོངས་ཏེ། གླིང་གང་དུ་ནམ་ཕྱེད་པ་དེའི་ཐད་ཀྱི་རྒྱབ་ཏུ་ཉིན་ཕྱེད། གླིང་གང་དུ་ཉི་མ་ནུབ་པ་དེའི་ཐད་རྒྱབ་ཏུ་ཉི་མ་འཆར་བར་འགྱུར་བའི་ཕྱིར་རོ། །ཡང་ཟླ་བ་ནི་རགས་རྩིས་ལྷག་ཆད་མེད་པའི་ཚེས་གཅིག་གི་ནམ་ལངས་དུས་སུ་ཟོར་པའི་ལྟག་པ་ལྟར་ཉི་མ་དང་ཉེ་བ་ནས་འཆར་ཞིང་། སྲོད་ལ་ཉི་མ་ནུབ་པའི་རྗེས་སུ་ནུབ་ཀྱི་རི་རྩེར་ནུབ། ཚེས་བརྒྱད་གྱི་མུན་རུབ་དུས་སུ་ཡར་འཕེལ་བའི་ཟླ་བ་ཕྱེད་པ་ཅན་ནམ་མཁའི་དཀྱིལ་ཐད་དུ་གནས་ཤིང་ནམ་ཕྱེད་ཀྱི་དུས་སུ་ནུབ་རིའི་རྩེར་ནུབ། བཅོ་ལྔའི་ཚེ་མུན་རུབ་པ་དང་མཉམ་དུ་ཉ་གང་པའི་ཚུལ་གྱིས་ཤར་ནས་ཕྱི་མའི་ནམ་ལངས་དུས་སུ་ནུབ་རིའི་རྩེར་ནུབ། ཉེར་གཉིས་ཀྱི་ནམ་ཕྱེད་ནས་མར་འགྲིབ་ཀྱི་ཕྱེད་པ་ཅན་དུ་འཆར་ཞིང་ཉེར་གསུམ་གྱི་ནམ་ལངས་དུས་སུ་ནམ་མཁའི་དཀྱིལ་ཐད་དང་། ཉིན་ཕྱེད་ནས་ནུབ་རིའི་རྩེར་ནུབ། ཉེར་དགུའམ་གནམ་གང་གི་ཚེ་མཐའ་ནས་ཅུང་ཟད་ལུས་པའི་ཚུལ་གྱིས་ཉི་མ་དང་ཉེ་བར་ཤར་ཏེ། དེའི་སྔོན་ནམ་དུས་མཉམ་དུ་ནུབ་ཀྱི་རེ་རྩེར་ནུབ་སྟེ་རགས་པའོ། །ཟླ་བའི་ཆ་ལས་འཕེལ་འགྲིབ་འོང་བ་ནི། ཟླ་བ་ཉི་མ་དང་ཉེ་རུ་འགྲོ་བའི་ཚེ་དཀར་ཆ་འགྲིབ་ལ། རིང་དུ་འགྲོ་བའི་དུས་སུ་དཀར་ཆ་འཕེལ་བའོ། །ཉི་ཟླ་གཉིས་ལྷོ་བྱང་དུ་བགྲོད་པ་རེས་མོས་སུ་བྱེད་པ་ཡིན་ཏེ། དེ་གཉིས་ལས་གཅིག་ལྷོར་འགྲོ་བའི་ཚེ་གཅིག་བྱང་དུ་འགྲོད་པ་དང་གཅིག་བྱང་དུ་བགྲོད་པའི་ཚེ་གཅིག་ལྷོར་བགྲོད་པར་བྱེད་པའི་ཕྱིར་རོ། །ཟླ་བ་བཅུ་གཉིས་ལ་ཉ་སྐར་བཅུ་གཉིས་ཡོད་དེ། ཆད་ལྷག་མེད་པའི་ཚེ་བཅུ་གཅིག་པའི་བཅོ་ལྔ་ལ་ཟླ་བ་སྐར་མ་མགོ་དང་འགྲོགས་ནས་འཆར། དེ་བཞིན་དུ་བཅུ་གཉིས་པའི་བཅོ་ལྔ་ལ་རྒྱལ་དང་། ཧོར་ཟླ་དང་པོའི་བཅོ་ལྔ་ལ་མཆུ་དང་། གཉིས་པའི་བཅོ་ལྔ་ལ་དབོ་དང་། གསུམ་པའི་བཅོ་ལྔ་ལ་ནག་པ་དང་། བཞི་པའི་བཅོ་ལྔ་ལ་ས་ག་དང་། ལྔ་བའི་བཅོ་ལྔ་ལ་སྣྲོན་དང་། དྲུག་པའི་བཅོ་ལྔ་ལ་ཆུ་སྟོད་དང་། བདུན་པའི་བཅོ་ལྔ་ལ་གྲོ་བཞིན་དང་། བརྒྱད་པའི་བཅོ་ལྔ་ལ་ཁྲུམས་སྟོད་དང་། དགུ་པའི་བཅོ་ལྔ་ལ་ཐ་སྐར་དང་། བཅུ་པའི་བཅོ་ལྔ་ལ་སྨིན་དྲུག་དང་འགྲོགས་ནས་འཆར་བའི་ཕྱིར། ཉ་སྐར་དེ་དག་ལ་ལོ་འགོ་འཛིན་པའི་ཚུལ་ཡོད་དེ། ཧོར་རྒྱལ་པོའི་ལུགས་དང་གསོ་བ་རིག་པ་དང་ད་ལྟའི་རྒྱ་རྩིས་པའི་ལུགས་ལ་ཧོར་ཟླ་དང་པོ་མཆུ་ཟླ་བ་ནས་ལོ་འགོ་འཛིན། མདོ་སྡེ་གསེར་འོད་དམ་པ་དང་དུས་འཁོར་བས་ཧོར་ཟླ་གསུམ་བ་ནག་པ་ཟླ་བ་ནས་ལོ་འགོ་དང་། འདུལ་བ་དང་མངོན་པའི་ལུགས་ལ་ཧོར་ཟླ་བ་བཅུ་པ་སྨིན་དྲུག་ཟླ་པའི་བཅུ་དྲུག་ནས་ལོ་འགོ་དང་། ཁྱུང་དང་བཻ་དཀར་དང་ཕུག་ལུགས་ཧོར་ཟླ་བཅུ་གཅིག་པ་མགོ་ཟླ་བ་ནས་ལོ་འགོ་དང་། རྒྱུད་མཁའ་འགྲོ་རྒྱ་མཚོ་དང་རྒྱ་རྩིས་ཁ་ཅིག་ཧོར་ཟླ་བཅུ་གཉིས་པ་རྒྱལ་ཟླ་བ་ནས་ལོ་འགོ་འཛིན་པའི་ཕྱིར་རོ། །དེ་དག་ནི་དཔྱོད་པའི་སྒོ་མཚོན་ཙམ་བསྟན་པ་ཡིན་ནོ། །དུས་ཀྱི་འཁོར་ལོའི་ལུགས་ཇི་བཞིན། །བསྟན་རྩིས་ཞག་གསུམ་དཀའ་གནད་བཅས། །བློ་ལྡན་གཞན་ལ་ཕན་འདོད་དང་། །རང་གི་བརྗེད་ཐོར་བསམས་ནས་བྲིས། །ཞེས་པ་འདིའང་བཤད་སྒྲུབ་མིང་ཅན་གྱིས་ཅོ་ནེ་དགོན་ཉིད་ནས་བྲིས་སོ།། །།མདྒལཾ།།