མངོན་རྟོགས་རྒྱན་གྱི་སྐབས་བརྒྱད་པའི་ཊཱིཀྐ་དོན་གྱི་སྙིང་པོ་བསྡུས་པ།
མངོན་རྟོགས་རྒྱན་གྱི་སྐབས་བརྒྱད་པའི་ཊཱིཀྐ་དོན་གྱི་སྙིང་པོ་བསྡུས་པ་ཞེས་བྱ་བ་བཞུགས།
གསུམ་པ་ཆོས་སྐུ་རྒྱས་པར་བཤད་པ་ལ། སྐབས་འདིར་ཆོས་སྐུ་འཆད་པའི་རྒྱུ་མཚན་དང་། གཞུང་དོན་དངོས་བཤད་པ་གཉིས། དང་པོ་ནི། ཤེས་བྱ་ཆོས་ཅན། སྐད་ཅིག་སྦྱོར་བ་བཤད་ཟིན་པའི་རྗེས་སུ་འབྲས་བུ་ཆོས་སྐུ་འཆད་པའི་རྒྱུ་མཚན་ཡོད་དེ། སྐད་ཅིག་སྦྱོར་བ་སྒོམ་པའི་བྱང་སེམས་རྒྱུན་མཐའ་བ་དེས་སྐད་ཅིག་གཉིས་པའི་དུས་སུ་འབྲས་བུ་ཆོས་སྐུ་འཐོབ་པར་འགྱུར་བའི་རྒྱུ་མཚན་གྱིས་བཤད་པའི་ཕྱིར་ཏེ། དེ་ལྟར་ཡང་འགྲེལ་བ་ལས། སྐད་ཅིག་མ་ཅིག་པའི་མངོན་པར་རྟོགས་པ་བྱང་ཆུབ་པ་རྣམ་པར་བསྒོམས་པའི་སྐད་ཅིག་མ་གཉིས་པ་ལ་ཆོས་ཀྱི་སྐུར་མངོན་པར་བྱང་ཆུབ་པ་ཡིན་ཏེ། ཞེས་གསུངས་པའི་ཕྱིར། བྱང་སེམས་རྒྱུན་མཐའ་བ་གསར་དུ་སངས་རྒྱས་པའི་དུས་མཚམས་ཡོད་དེ། རྣམ་མཁྱེན་སྐད་ཅིག་དང་པོ་ཐོབ་པ་དང་། ཇི་ལྟ་བ་ལ་མཉམ་པར་བཞག་བཞིན་པའི་ངང་ནས་ཇི་སྙེད་པའི་ཆོས་ཐམས་ཅད་མངོན་སུམ་དུ་རྟོགས་པ་དང་། ཡང་དག་མཐའ་མངོན་དུ་བྱས་པ་དང་། མཚན་དཔེས་སྦྲས་པའི་ལུས་ཀྱི་རིགས་འདྲ་ཕྱི་མ་ལོངས་སྐུའི་ལུས་སུ་གནས་གྱུར་པ་དང་། ལོངས་སྐུ་དང་དངོས་རྒྱུ་ཚོགས་པ་ཚར་གཅིག་ལ་རག་ལས་པའི་ཚུལ་གྱིས་འབྲེལ་པ་གྲུབ་པའི་སྤྲུལ་སྐུ་གྲངས་མེད་ཐོབ་པ་དུས་མཉམ་པའི་ཕྱིར་རོ། །གཉིས་པ་གཞུང་དོན་དངོས་བཤད་པ་ལ། སྐུའི་རྣམ་གཞག་དང་། འཕྲིན་ལས་ཀྱི་རྣམ་གཞག་གཉིས། དང་པོ་ལ། ངོ་བོ་ཉིད་སྐུ། ཡེ་ཤེས་ཆོས་སྐུ། ལོངས་སྐུ། སྤྲུལ་སྐུའི་རྣམ་གཞག་བཤད་པ་དང་བཞི། དང་པོ་ནི། ཐུབ་པའི་ངོ་བོ་ཉིད་སྐུ་ནི། །ཞེས་པ་ནས། དེ་དག་རང་བཞིན་མཚན་ཉིད་ཅན། །ཞེས་པའི་བར་གསུངས། དོན་ནི། ཐུབ་པའི་ངོ་བོ་ཉིད་སྐུ་ནི། ཆོས་ཅན། ཁྱོད་ཁྱད་ཆོས་གསུམ་དང་ལྡན་པ་ཡིན་ཏེ། ཟག་པ་མེད་པའི་ཆོས་ཡེ་ཤེས་སྡེ་ཚན་ཉེར་ཅིག་པོ་གང་དག་རྫོགས་པར་ཐོབ་པར་གྱུར་པ་ལྡན་པའི་ཁྱད་པར། སྒྲིབ་གཉིས་རྣམ་པ་ཀུན་ཏུ་རྣམ་པར་དག་པ་བྲལ་བའི་ཁྱད་པར། ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་པོ་དེ་དག་རང་བཞིན་བདེན་པས་སྟོང་པའི་མཚན་ཉིད་ཅན་གྱི་ངོ་བོའི་ཁྱད་པར་ཏེ་ཁྱད་ཆོས་གསུམ་དང་ལྡན་པའི་དག་པ་གཉིས་ལྡན་གྱི་སྐུ་ཡིན་པའི་ཕྱིར། དབྱེ་ན་གཉིས་ཡོད་དེ། རང་བཞིན་རྣམ་དག་གི་ཆར་གྱུར་པའི་ངོ་བོ་ཉིད་སྐུ་དང་། གློ་བུར་རྣམ་དག་གི་ཆར་གྱུར་པའི་ངོ་བོ་ཉིད་སྐུ་གཉིས་ཡོད་པའི་ཕྱིར། སྐབས་འདིར་དེ་གཉིས་འགལ་བ་ཡིན་ཏེ། དང་པོ་དོན་དམ་བདེན་པ་དང་། ཕྱི་མ་ཀུན་རྫོབ་བདེན་པ་ཡིན་པའི་ཕྱིར་ཏེ། དང་པོ་ནི་སྟོང་གཞི་ཟག་མེད་ཀྱི་ཡེ་ཤེས་རྣམས་བདེན་པས་སྟོང་པའི་སྟོང་ཉིད་དང་། ཕྱི་མ་ནི་དེ་རྣམས་ཀྱི་དྲི་མ་སྤངས་པའི་ཆ་ལ་འཇོག་པའི་ཕྱིར་རོ། །གཉིས་པ་ཡེ་ཤེས་ཆོས་སྐུ་བཤད་པ་ལ། དངོས་དང་། བྱེ་བྲག་ཏུ་བཤད་པ་དང་། དེ་ལ་རྩོད་པ་སྤོང་པ་དང་གསུམ། དང་པོ་ནི། སངས་རྒྱས་འཕགས་པའི་རྒྱུད་ཀྱི་དྲན་པ་ཉེར་བཞག་ནས། འཕགས་ལམ་ཡན་ལག་བརྒྱད་ཀྱི་བར་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་དང་། བྱམས་སོགས་ཚད་མེད་པ་བཞི་དང་། གཟུགས་ཅན་གྱི་རྣམ་ཐར་གཉིས་སྡུག་པའི་རྣམ་ཐར་གཅིག གཟུགས་མེད་ཀྱི་རྣམ་ཐར་བཞི་འགོག་པའི་རྣཾ་པར་ཐར་པ་དང་བརྒྱད། བསམ་གཏན་བཞི་དང་གཟུགས་མེད་ཀྱི་དངོས་གཞིའི་སྙོམས་འཇུག་བཞི་འགོག་པའི་སྙོམས་འཇུག་གཅིག་སྟེ་མཐར་གྱིས་ནི་གནས་པའི་སྙོམས་པར་འཇུག་པ་དགུ་ཡི་བདག་ཉིད་དང་། ཟད་པར་ས་ཆུ་མེ་རླུང་སྔོན་པོ་སེར་པོ་དམར་པོ་དཀར་པོ་ནམ་མཁའ་རྣམ་ཤེས་ཀྱི་སྐྱེ་མཆེད་དེ་ཟད་པར་གྱི་སྐྱེ་མཆེད་བཅུ་ཡི་བདག་ཉིད་དང་། རྣལ་འབྱོར་པ་རང་ལུས་ལ་གཟུགས་ཀྱི་འདུ་ཤེས་བཞག་ནས་ཕྱི་རོལ་གྱི་གཟུགས་ཆེ་ཆུང་ལ་ལྟ་བ་གཉིས་དང་། གཟུགས་ཀྱི་འདུ་ཤེས་མ་བཞག་པར་གཟུགས་ཆེ་ཆུང་དུ་ལྟ་བ་གཉིས་ཏེ་བཞི་དང་། དེའི་འདུ་ཤེས་མ་བཞག་པར་སྔོ་སེར་དཀར་དམར་བཞི་ཟིལ་གྱིས་གནོན་པའི་ཟིལ་གནོན་གྱི་སྐྱེ་མཆེད་བཞིའི་རབ་ཏུ་དབྱེ་བས་རྣམ་པ་བརྒྱད་དང་། ཉོན་མོངས་མེད་པའི་ཏིང་ངེ་འཛིན་དང་། སྨོན་གནས་མཁྱེན་པ་དང་། མིག་གི་མངོན་ཤེས་སོགས་མངོན་ཤེས་དྲུག་དང་། ཆོས་དོན་ངེས་པའི་ཚིག་སྤོབས་པ་སོ་སོ་ཡང་དག་པར་རིག་པ་བཞི་དང་། རྟེན་དམིགས་པ་ཐུགས་ཡེ་ཤེས་ཏེ་རྣམ་པ་ཐམས་ཅད་དག་པ་བཞི་དང་། ཚེ་སེམས་ཡོ་བྱད་ལས་སྐྱེ་བ་མོས་པ་སྨོན་ལམ་རྫུ་འཕྲུལ་ཡེ་ཤེས་ཆོས་ལ་དབང་བ་སྟེ་དབང་བཅུ་དང་། གནས་དང་གནས་མ་ཡིན་པ་མཁྱེན་པ་ལ་སོགས་པའི་སྟོབས་བཅུ་དང་། མི་འཇིགས་པ་ནི་བཞི་དག་དང་། སྐུ་གསུང་ཐུགས་ཀྱི་སྤྱོད་པ་ཡོངས་སུ་དག་པའི་བསྲུང་བ་མེད་པ་རྣམ་པ་གསུམ་དང་། ཆོས་སྟོན་པའི་ཚེ་གདུལ་བྱས་ཉན་འདོད་པ་དང་མི་འདོད་པ་དང་དེ་གཉིས་ཀ་ལ་ཆགས་སྡང་མེད་པའི་དྲན་པ་ཉེ་བར་གཞག་པ་རྣམ་པ་གསུམ་དང་། སེམས་ཅན་འདུལ་བའི་འདུས་ལས་མི་འདའ་བའི་བསྙེལ་བ་མི་མངའ་བའི་ཆོས་ཉིད་དང་། སྒྲིབ་གཉིས་གྱི་བག་ཆགས་ཡང་དག་པར་བཅོམ་པ་དང་། སྐྱེ་བོ་མཐའ་དག་ལ་ཕན་པའི་ཐུགས་རྗེ་ཆེན་པོ་དང་། ཐུབ་པ་སངས་རྒྱས་བཅོམ་ལྡན་འདས་ཁོ་ནའི་མ་འདྲེས་པའི་ཆོས་བཅོ་བརྒྱད་མདོ་ལས་བཤད་པ་གང་ཡིན་པ་དང་། རྣམ་པ་ཐམས་ཅད་མཁྱེན་པ་ཉིད་དང་། དང་གི་སྒྲས་བསྟན་པའི་ལམ་ཤེས་དང་། གཞི་ཤེས་ཏེ་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་པོ་དེ་དག་ཆོས་ཅན། ཁྱོད་ལ་ཡེ་ཤེས་ཆོས་སྐུ་ཞེས་བརྗོད་པ་ཡིན་ཏེ། ཇི་ལྟ་ཇི་སྙེད་ཀྱི་ཤེས་བྱ་ཐམས་ཅད་མངོན་སུམ་དུ་རྟོགས་པའི་ཡེ་ཤེས་མཐར་ཐུག་ཡིན་པའི་ཕྱིར། འདིར་སློབ་དཔོན་འཕགས་པ་དང་སེང་བཟང་གཉིས་ཀྱིས་རྩ་བའི་དགོངས་པའི་འགྲེལ་ཚུལ་ལ་ཁྱད་པར་ཅུང་ཟད་ཡོད་དེ། འཕགས་པས་ཐུབ་པའི་ངོ་བོ་ཉིད་སྐུ་ནི་ཞེས་སོགས་རྐང་པ་བཞིས་ངོ་བོ་ཉིད་སྐུ་མདོར་བསྟན་ནས། བྱང་ཆུབ་ཕྱོགས་མཐུན་ཚད་མེད་དང་། །ནས། ཆོས་ཀྱི་སྐུ་ཞེས་བརྗོད་པ་ཡིན། །ཞེས་པའི་བར་གྱིས་ངོ་བོ་ཉིད་སྐུ་རྒྱས་པར་བཤད་པར་བཞེད་ལ། སློབ་དཔོན་སེང་གེ་བཟང་པོས་ཐུབ་པའི་ངོ་བོ་ཉིད་སྐུ་ནི། །ཞེས་སོགས་ཀྱིས་ངོ་བོ་ཉིད་སྐུ་གཙོ་བོར་བསྟན་ནས། བྱང་ཆུབ་ཕྱོགས་མཐུན་ཚད་མེད་དང་། ཞེས་སོགས་ཀྱིས་ཆོས་སྐུ་གཙོ་བོར་རྒྱས་པར་འཆད་པར་བཤད་པའི་ཕྱིར། དེ་ལྟར་བཤད་ཀྱང་དགོངས་པ་ནི་མི་འགལ་ཏེ། ཚིག་གི་འབྲེལ་ལྟར་ན་ནི། འཕགས་པ་བཞིན་འཆད་དགོས་ལ། དོན་གྱིས་ཐོབ་ཚུལ་ལ་སེང་གེ་བཟང་པོའི་བཞེད་པ་ལྟར་བྱས་པ་ལའང་དགོས་པ་ཁྱད་པར་ཅན་ཡོད་པའི་ཕྱིར། རྒྱས་བཤད་ཀྱི་སྐབས་འདིར་མ་ཟད་ལུས་རྣམ་བཞག་གི་སྐབས་ཀྱི་ཚིག་དོན་འཆད་ཚུལ་ལའང་ཅུང་ཟད་མི་འདྲ་བ་ཡོད་དེ་མི་འགལ་ལོ། །དེས་ན། ཆོས་ཀྱི་སྐུ་ཞེས་བརྗོད་པ་ཡིན། ཞེས་པ་འདི་འཕགས་པ་ལྟར་ན་ཆོས་ཉིད་སྐུ་ཞེས་བརྗོད་པ་ཡིན་ཞེས་ཐོབ་ལ། སེང་བཟང་ལྟར་ན་ཡེ་ཤེས་ཆོས་ཀྱི་སྐུ་ཞེས་བརྗོད། ཞེས་པ་ཞིག་དོན་གྱིས་ཐོབ་པ་ཡིན་ཏེ། སྔ་མས་དེ་ལྟར་ཐོབ་པ་ཡིན་ཀྱང་རྒྱ་སྐད་ལ་བདེ་བའི་དབང་གིས་ཆོས་ཉིད་སྐུ་ཞེས་མི་འབྱུང་བར་ཆོས་ཀྱི་སྐུ་ཞེས་འབྱུང་བར་བཞེད། ཕྱི་མས་ཚིག་སྡུད་ཀྱི་དབང་གིས་དེ་ལྟར་དུ་འབྱུང་བར་བཞེད་པའི་ཕྱིར་ཏེ། སྔ་མས་ཟག་མེད་ཡེ་ཤེས་སྡེ་ཚན་ཉེར་གཅིག་པོ་དེ་དག་བདེན་པས་སྟོང་བའི་ཆོས་ཉིད་ལ་ཆོས་ཉིད་ཀྱི་སྐུ་ཞེས་བརྗོད་པ་ཡིན་ཞེས་བཞེད་ལ། ཕྱི་མས་དེ་ལས་ལོགས་སུ་ཆོས་ཅན་ཟག་མེད་ཀྱི་ཡེ་ཤེས་དེ་རྣམས་ལ་ཡེ་ཤེས་ཆོས་ཀྱི་སྐུ་ཞེས་བརྗོད་པ་ཡིན་ཞེས་བརྗོད་པའི་ཕྱིར། གཉིས་པ་བྱེ་བྲག་ཏུ་བཤད་པ་ལ། ཉོན་མོངས་མེད་པའི་ཏིང་ངེ་འཛིན་དང་། སྨོན་གནས་མཁྱེན་པའི་ཏིང་ངེ་འཛིན་བཤད་པ་དང་གཉིས། དང་པོ་ནི། ཉན་ཐོས་ཉོན་མོངས་མེད་པའི་ལྟ། །ཞེས་སོགས་རྐང་པ་བཞི་གསུངས། དོན་ནི། རྒྱལ་བའི་ཉོན་མོངས་མེད་པའི་ཏིང་ངེ་འཛིན་དེ་ཆོས་ཅན། ཉན་རང་གི་ཉོན་མོངས་མེད་པའི་ཏིང་ངེ་འཛིན་ལས་ཁྱད་པར་དུ་འཕགས་པ་ཡིན་ཏེ། ཉན་ཐོས་སོགས་ཀྱི་ཉོན་མོངས་མེད་པའི་ཏིང་ངེ་འཛིན་ནི་རང་ལ་ལྟ་བའི་མི་ཡི་མི་དགེ་བའི་ཉོན་མོངས་ཀྱི་དམིགས་རྐྱེན་བྱེད་པ་ཡོངས་སུ་སྤོང་བ་ཙམ་ཉིད་ཡིན་ལ། ཁྱོད་ཀྱིས་རང་རྒྱུད་ལྡན་གྱི་རྒྱལ་བ་གྲོང་སོགས་སུ་བྱོན་པ་ལྟ་བའི་སྐྱེ་བོ་དེའི་ཉོན་མོངས་རྣམས་རྒྱུན་གཅོད་ནུས་པའི་བྱེད་ལས་དང་ལྡན་པའི་ཕྱིར་རོ། །གཉིས་པ་ནི། སངས་རྒྱས་སྨོན་གནས་མཁྱེན་པ་ཉིད། །ཞེས་སོགས་རྐང་པ་བཞི་གསུངས། སངས་རྒྱས་ཀྱི་སྨོན་གནས་མཁྱེན་པའི་ཏིང་ངེ་འཛིན་ནི་ཆོས་ཅན། ཉན་རང་གི་སྨོན་གནས་མཁྱེན་པ་ལས་ཁྱད་པར་དུ་འཕགས་ཏེ། འབད་རྩོལ་མེད་པར་ལྷུན་གྱིས་གྲུབ་པ་དང་། བདེན་འཛིན་གྱི་ཆགས་པ་སྤངས་པ་དང་། ཤེས་བྱ་ཐམས་ཅད་ལ་ཐོགས་པ་མེད་པ་དང་། དུས་རྒྱུན་མི་འཆད་པར་རྟག་ཏུ་གནས་པ་དང་། འདྲི་བ་ཀུན་གྱི་ལན་འདེབས་ནུས་པར་མདོ་ལས་བཞེད་པའི་ཕྱིར། གཉིས་པ་དེ་ལ་རྩོད་པ་སྤོང་བ་ལ། ཆོས་སྐུ་རྟག་པ་ལ་རྩོད་པ་སྤོང་པ། ཁྱབ་རྟག་གཉིས་ཀ་ལ་རྩོད་པ་སྤོང་པ་གཉིས། དང་པོ་ལ། རྩོད་པ་དང་ལན་ནོ། །དང་པོ་རྩ་བར་དངོས་སུ་མ་ཟིན་ཀྱང་འགྲེལ་བ་ལྟར་ན། སངས་རྒྱས་བཅོམ་ལྡན་འདས་ཆོས་ཅན། སེམས་ཅན་ལ་སྐུ་དངོས་སུ་སྣང་བའི་སྒོ་ནས་དོན་མཛད་མི་མཛད་ཀྱི་ཁྱད་པར་མི་འཐད་པར་ཐལ། དུས་རྟག་ཏུ་ཐུགས་རྗེ་ཆེན་པོའི་ངང་ལས་མ་གཡོས་པར་བཞུགས་པའི་ཕྱིར་ཞེས་རྩོད། གཉིས་པ་ལན་ལ་སྒྲུབ་ཕྱོགས་དང་། དགག་ཕྱོགས་ཀྱི་ལན་བཤད་པ་གཉིས། དང་པོ་ནི། རྒྱུ་ནི་ཡོངས་སུ་སྨིན་གྱུར་ནས། །ཞེས་སོགས་རྐང་པ་བཞི་གསུངས། སྟོན་པ་ཆོས་ཅན། རྟག་ཏུ་ཐུགས་རྗེ་ཆེན་པོ་དང་ལྡན་པ་ཡིན་ཡང་གཞན་ལ་སྐུ་དངོས་སུ་སྣང་མི་སྣང་གི་སྒོ་ནས་དོན་མཛད་པ་མི་འགལ་བར་ཐལ། ཁྱོད་ལ་དངོས་སུ་ཆོས་ཉན་པའི་རྒྱུ་ཚོགས་ནི་ཡོངས་སུ་སྨིན་པར་གྱུར་ནས་གདུལ་བྱ་གང་དང་གང་ལ་ཡུལ་གང་ལ་ནི་དུས་གང་གི་ཚེ་དངོས་སུ་ཆོས་དེ་སྟོན་པའི་བྱ་བ་ཕན་པར་གྱུར་པ་དེ་དང་དེ་ལ་སྐུ་དངོས་སུ་སྣང་བའི་སྒོ་ནས་དོན་མཛད་པ་ཡིན་གྱི། ཚོགས་མ་བསགས་མ་སྨིན་པའི་གདུལ་བྱ་ལ་དེ་ལྟར་སྣང་བའི་སྒོ་ནས་དོན་མི་མཛད་པའི་ཕྱིར་རོ། །གཉིས་པ་ནི། ལྷ་ཡི་རྒྱལ་པོས་ཆར་ཕབ་ཀྱང་། །ཞེས་སོགས་རྐང་པ་བཞི་གསུངས། སངས་རྒྱས་བཅོམ་ལྡན་འདས་རྣམས་ནི་ཆོས་ཅན། འཇིག་རྟེན་དུ་དངོས་སུ་བྱུང་བར་གྱུར་ཀྱང་སེམས་ཅན་ཁ་ཅིག་གིས་ཁྱོད་ལ་དངོས་སུ་ཆོས་ཉན་པ་ལ་སོགས་པའི་སྐལ་པ་བཟང་པོ་མི་མྱོང་བའི་རྒྱུ་མཚན་ཡོད་པར་ཐལ། དེ་དག་ཁྱོད་ལ་དངོས་སུ་ཆོས་ཉན་པ་སོགས་ཀྱི་སྐལ་པ་མེད་པས་སོ། །དཔེར་ན། ལྷ་ཡི་རྒྱལ་པོས་ཆར་ཕབ་ཀྱང་། རུལ་བ་ལ་སོགས་པའི་རྐྱེན་གྱིས་ས་བོན་མི་རུང་བར་གྱུར་པ་དེ་ལས་མྱུ་གུ་སྔོན་པོ་མི་འཁྲུངས་པ་ལྟར་རོ། །གཉིས་པ་ཁྱབ་རྟག་གཉིས་ཀ་ལ་རྩོད་པ་སྤོང་བ་ལ། དྲི་བ་དང་། ལན་གཉིས། དང་པོ་རྩ་བར་དངོས་སུ་མི་གསལ་ཡང་འགྲེལ་བ་ལྟར་ན། ཡེ་ཤེས་ཆོས་སྐུ་དེ་ཆོས་ཅན། ཁྱོད་ལ་ཁྱབ་པོ་ཞེས་བརྗོད་མི་རིགས་པར་ཐལ། ཁྱོད་སངས་རྒྱས་འཕགས་པ་ཉིད་ཀྱི་རྒྱུད་ཁོ་ན་ལ་ཡོད་པའི་རྟེན་ངེས་པའི་ཕྱིར། དེ་ཆོས་ཅན། ཁྱོད་ལ་རྟག་པ་ཞེས་ཀྱང་བརྗོད་མི་རིགས་པར་ཐལ། སྐད་ཅིག་རེ་རེ་ལ་སྐྱེ་ཞིང་འབྱུང་བའི་ཕྱིར་ཞེ་ན། གཉིས་པ། དེ་ལྟར་མཛད་པ་རྒྱ་ཆེའི་ཕྱིར། །ཞེས་སོགས་རྐང་པ་བཞི་གསུངས། སངས་རྒྱས་དེ་ཉིད་ཆོས་ཅན། ཁྱོད་ལ་ཁྱབ་པ་ཞེས་ངེས་པར་བརྗོད་པ་ཡིན་ཏེ། སྐལ་ལྡན་མཐའ་དག་ལ་མཛད་པ་འཕྲིན་ལས་འཇུག་པ་རྒྱ་ཆེ་བས་ན། དེ་ལྟར་དུ་བརྗོད་པའི་ཕྱིར། སངས་རྒྱས་དེ་ཆོས་ཅན། ཁྱོད་ལ་རྟག་པ་ཞེས་ཀྱང་བརྗོད་པ་ཡིན་ཏེ། རང་ཉིད་རྒྱུན་འཆད་པའི་ཟད་པ་མེད་པའི་ཕྱིར་རོ། །གཉིས་པ་ལོངས་སྐུ་བཤད་པ་ལ། མཚན་ཉིད་ཀྱི་སྒོ་ནས་མདོར་བསྟན་པ་དང་། ཡོན་ཏན་གྱི་སྒོ་ནས་རྒྱས་པར་བཤད་པ་གཉིས། དང་པོ་ནི། མཚན་ནི་སུམ་ཅུ་རྩ་གཉིས་དང་། །ཞེས་པ་ནས། ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་པའི་བར་གསུངས། འཆད་འགྱུར་ལྟར་མཚན་ནི་སུམ་ཅུ་རྩ་གཉིས་དང་དཔེ་བྱད་བརྒྱད་ཅུའི་བདག་ཉིད་ཅན་གྱི་གཟུགས་སྐུར་དངོས་སུ་བསྟན་པ་འདི་ཆོས་ཅན། ཐུབ་པའི་ལོངས་སྤྱོད་རྫོགས་སྐུར་བཞེད་པ་ཡིན་ཏེ། ཐེག་ཆེན་གྱི་ཆོས་ལ་ཉེ་བར་ལོངས་སྤྱོད་པ་ལ་སོགས་པ་ངེས་པ་ལྔ་ལྡན་གྱི་རབ་ཏུ་ཕྱེ་བའི་གཟུགས་སྐུ་མཐར་ཐུག་ཡིན་པའི་ཕྱིར་རོ། །གཉིས་པ་ཡོན་ཏན་གྱི་སྒོ་ནས་རྒྱས་པར་བཤད་པ་ལ། མཚན་དང་། དཔེ་བྱད་བཤད་པ་གཉིས། དང་པོ་ལ། དངོས་དང་། དེའི་རྒྱུ་བཤད་པ་གཉིས། དང་པོ་ནི། ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཞེས་པ་ནས། འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་པའི་བར་གསུངས། ཤེས་བྱ་ཆོས་ཅན། ལོངས་སྐུའི་མཚན་འདི་དག་སུམ་ཅུ་རྩ་གཉིས་སུ་གྲངས་ངེས་པ་ཡིན་ཏེ། དེ་ཡང་ལོངས་སྐུའི་ཕྱག་དང་ཞབས་གཉིས་འཁོར་ལོའི་མཚན་དང་ལྡན་པ་དང་། རུས་སྦལ་བཞིན་དུ་ཞབས་གནས་པ་དང་། ཕྱག་དང་ཞབས་ཀྱི་སོར་མོ་རྣམས་དྲ་བས་འབྲེལ་བ་དང་། ཕྱག་དང་ཞབས་བཅས་འཇམ་ཞིང་བཞོན་ཤ་ཆགས་པ་དང་། སྐུ་འདི་ཡི་ནི་ཕྱག་ཞབས་ཀྱི་རྒྱབ་བཞི་དང་ཕྲག་གོང་གཉིས་དང་ལྟག་པ་སྟེ་བདུན་པོ་དག་མཐོ་བ་དང་། སོར་མོ་རྣམས་རིང་བ་དང་། ཕྱག་ཞབས་ཀྱི་རྟིང་པ་ཡངས་པ་དང་། སྐུ་ཆེ་ཞིང་དྲང་བ་དང་། ཞབས་ཀྱི་ལོང་བུ་ཕྱིར་འབུར་བ་མི་མངོན་པ་དང་། སྐུའི་སྤུ་ནི་གྱེན་དུ་ཕྱོགས་པ་སྟེ་བཅུ་དང་། བྱིན་པ་རི་དགས་ཨེ་ན་ཡའི་བྱིན་པ་དང་འདྲ་བ་དང་། ཕྱག་རིང་ཞིང་མཛེས་པ་དང་། གསང་གནས་འདོམས་གྱི་སྦ་བ་སྦུབས་སུ་ནུབ་པའི་མཆོག་དང་ལྡན་པ་དང་། སྐུའི་ལྤགས་པ་གསེར་མདོག་མཆོག་དང་ལྡན་པ་དང་། ལྤགས་པ་འཇམ་ཞིང་སྲབ་པ་དང་། སྐུའི་སྤུ་ནི་རེ་རེ་ནས་གཡས་ཕྱོགས་སུ་ལེགས་པར་འཁྱིལ་ཞིང་འཁྲུངས་པ་དང་། ཞལ་མཛོད་སྤུས་བརྒྱན་པ་དང་། རོ་སྟོད་སེང་གེའི་སྟོད་དང་འདྲ་བ་དང་། སྐུ་འདི་ཡི་དཔུང་པའི་མགོ་ཟླུམ་པ་དང་། ཐལ་གོང་རྒྱས་པ་སྟེ་བཅུ་དང་། ལྗགས་འདི་ལ་རོ་མི་ཞིམ་པ་རོ་མཆོག་ཏུ་སྣང་བ་དང་། སྐུ་ནི་ཤིང་ནྱ་གྲོ་དྷ་ལྟར་འདོམ་གྱི་ཕན་ཚུན་གྱི་རྩེ་མོ་ནས་འཇམ་པའི་ཚད་ཅི་ཙམ་པ་ཞབས་ནས་སྤྱི་བོའི་བར་ཡང་དེ་ཙམ་དུ་མཉམ་པའི་ཆུ་ཞེང་གབ་པ་དང་། དབུ་གཙུག་ཏོར་དང་ལྡན་པ་དང་། ལྗགས་རིང་ཞིང་མཛེས་པ་དང་། གསུང་ཚངས་པའི་དབྱངས་ལྟ་བུ་དང་། འགྲམ་པ་སེངྒེའི་འགྲམ་པ་འདྲ་བ་དང་། ཚེམས་ཤིན་ཏུ་དཀར་བ་དང་། ཚེམས་མཉམ་པ་དང་། དེ་ཐག་བཟང་པ་དང་། དེ་གྲངས་ནི་བཞི་བཅུ་ཐམ་པ་ཚང་པ་སྟེ་བཅུ་དང་། སྤྱན་ནི་དཀར་ནག་གི་ཆ་མ་འདྲེས་པའི་མཐོན་མཐིང་ཅན་དང་། སྤྱན་གྱི་རྫི་མ་བ་མཆོག་སྟེ་ཁྱུ་མཆོག་གི་རྫི་མ་དང་འདྲ་བ་གཉིས་དང་བཅས་པ་སོ་གཉིས་ཡོད་པའི་ཕྱིར། གཉིས་པ་རྒྱུ་ནི། འདི་ལ་མཚན་ཉིད་གང་གང་གི །ཞེས་པ་ནས། མདོ་ལས་ཇི་སྐད་འབྱུང་བ་བཞིན། །ཞེས་པའི་བར་གསུངས། ལོངས་སྐུ་འདི་ལ་ནི། ཇི་སྐད་བཤད་པའི་མཚན་ནི་སོ་གཉིས་པོ་འདི་དག་ཡང་དག་པར་འགྲུབ་པའི་རྒྱུ་ཡོད་དེ། མཚན་སོ་གཉིས་པོ་གང་དག་གང་གི་སྒྲུབ་པར་བྱེད་པའི་རྒྱུ་གང་ཡིན་པ་དེ་དང་དེ་ནི་རབ་ཏུ་རྫོགས་པ་ལས་དེ་དག་འགྲུབ་པའི་ཕྱིར། རྒྱུ་དེ་དག་ཀྱང་ཡོད་དེ། ཡུམ་གྱི་མདོ་ལས་ཇི་སྐད་འབྱུང་བ་བཞིན་དུ། བླ་མ་སྐྱེལ་བ་དང་བསུ་བ་ལ་སོགས་བྱས་པས་ནི་ཕྱག་ཞབས་ཀྱི་འཁོར་ལོའི་མཚན་འགྲུབ་པའི་རྒྱུ་བྱེད་པ་དང་། སྡོམ་པ་ཡང་དག་པར་བླངས་པ་བརྟན་པས་ནི་ཞབས་རུས་སྦལ་བཞིན་དུ་གནས་པའི་རྒྱུ་བྱེད་པ་དང་། བསྡུ་བ་བཞི་བརྟེན་པས་ནི་སོར་མོ་རྣམས་དྲ་བས་འབྲེལ་བའི་རྒྱུ་བྱེད་པ་དང་། གྱ་ནོམ་པའི་དངོས་པོ་གཞན་ལ་སྦྱིན་པ་ནི་ཕྱག་ཞབས་གཞོན་ཤ་ཆགས་པ་སོགས་ཀྱི་རྒྱུ་དང་། གསད་པར་བྱ་བ་ལས་ཐར་བར་བྱེད་པ་ནི་རྒྱུ་ཆེ་ཞིང་དྲང་པའི་རྒྱུ་དང་། དགེ་བའི་ཆོས་ནི་ཡང་དག་པར་བླངས་པ་སྤེལ་པ་ལ་སོགས་པ་ནས། ཁོང་ཁྲོ་མེད་པ་ནི་བའི་རྫི་མ་ལྟ་བུའི་མཚན་སྒྲུབ་བྱེད་ཀྱི་རྒྱུ་ཡི་མཚན་ཉིད་དང་རང་བཞིན་གྱི་བར་སོ་གསུམ་ཡོད་པའི་ཕྱིར། མཚན་དཔེ་གསལ་རྫོགས་པར་ལྡན་པའི་གང་ཟག་ལ་ལོང་སྐུས་མ་ཁྱབ་སྟེ། མཆོག་གི་སྤྲུལ་སྐུ་ལའང་དེ་ཡོད་པའི་ཕྱིར། མཚན་དཔེ་དང་ལྡན་པའི་གང་ཟག་ལ་ནི་སངས་རྒྱས་ཀྱིས་ཀྱང་མ་ཁྱབ་སྟེ། འཁོར་སྒྱུར་དང་བྱང་སེམས་རྒྱུན་མཐའ་བ་ལ་དེ་ཡོད་པའི་ཕྱིར། དང་པོ་དེ་ལྟར་ཡིན་ཏེ། རིན་ཆེན་འཕྲེང་བ་ལས། འཁོར་ལོ་བསྒྱུར་བ་ཐམས་ཅད་ལ།། འདི་དག་ཡོད་པ་འདོད་མོད་ཀྱིས། །དག་དང་མཛེས་དང་གསལ་བ་ནི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པའི་ཕྱིར། གཉིས་པ་གང་རུང་སྟེ། རྒྱུན་མཐའ་བའི་མཚན་དཔེས་ལོངས་སྐུའི་མཚན་དཔེ་རྣམས་ཀྱི་དངོས་རྒྱུ་བྱེད་པའི་ཕྱིར། གཉིས་པ་དཔེ་བྱད་ནི། ཐུབ་པའི་སེན་མོ་ཟངས་མདོག་དང་། །ཞེས་པ་ནས། སངས་རྒྱས་དཔེེ་བྱད་བཟང་པོར་བཞེད། །ཅེས་པའི་བར་གསུངས། འཆད་འགྱུར་ལྟར་བརྒྱད་ཅུ་པོ་འདི་ཆོས་ཅན། སངས་རྒྱས་ཀྱི་དཔེ་བྱད་བཟང་པོར་བཞེེད་དེ། དེ་ཡང་ཐུབ་པའི་སེན་མོ་ཟངས་ཀྱི་མདོག་ལྟ་བུ་དང་། དེའི་མདོག་སྣུམ་པ་དང་། དེ་མཐོ་བ་དང་། སེར་མོ་རྣམས་ཟླུམ་པ་དང་། དེ་རྒྱས་པ་དང་། དེ་བྱིན་ཀྱིས་ཕྲ་བ་དང་། ལུས་ཀྱི་རྩ་མི་མངོན་པ་དང་། དེ་མདུད་པ་མེད་པ་དང་། ལོངས་བུ་མི་མངོན་པ་དང་། ཞབས་རིང་ཐུང་མཉམ་པ་སྟེ་བཅུ་དང་། སེདྒེའི་དང་། གླང་ཆེན་གྱི་དང་། བྱ་ངང་པའི་དང་། ཁྱུ་མཆོག་གི་སྟབས་སུ་གཤེགས་པ་དང་། གཡས་ཕྱོགས་སུ་གཤེགས་པ་དང་། མཛེས་པར་གཤེགས་པ་དང་། དྲང་བ་དང་། སྐུ་འཁྲིལ་བག་ཆགས་པ་འདྲ་བ་དང་། བྱི་དོར་བྱས་པ་དང་འདྲ་བ་དང་། སྦོམ་ཕྲ་སོགས་རིམ་པར་འཚམས་པ་སྟེ་བཅུ་དང་། སྐུ་གཙང་པ་དང་། འཇམ་པ་དང་། སྐུ་དག་པ་དང་། མཚན་ནི་ཆ་ཤས་ཡོངས་སུ་རྫོགས་པ་དང་། སྐུ་ཡི་རྒྱ་ཁྱོན་རྒྱ་ཆེ་པའི་ཁོ་ལག་ཡངས་ཤིང་བཟང་བ་དང་། གོམ་པ་ཆེ་ཆུང་མེད་པར་མཉམ་པ་དང་། སྤྱན་གཉིས་ནི་ར་རི་སོགས་མེད་པའི་དག་པ་དང་། སྐུ་ཤིན་ཏུ་གཞོན་ཤ་ཅན་ཉིད་དང་། སྐུ་ཞུམ་པ་མེད་པ་དང་། སྐུ་རྒྱས་པ་སྟེ་བཅུ་དང་། སྐུ་ཤིན་ཏུ་གྲིམ་པ་ཉིད་ཀྱི་ཁྱད་པར་དང་། ཡན་ལག་དང་ཉིང་ལག་ཚིགས་རིང་ཐུང་གི་ཆ་ཤས་ཤིན་ཏུ་རྣམ་པར་འཕྱེས་པ་སྟེ་རྣམ་པར་ཕྱེད་པ་དང་། གཟིགས་པ་གློ་བུར་གྱི་སྒྲིབ་པ་མེད་པར་དག་པ་དང་། སྐེད་སྐབས་མཚམས་ཀྱི་ཀུ་ཟླུམ་པ་དང་། དཀུ་སྐབས་ཕྱིན་པ་དང་། དཀུ་ཧ་ཅང་མི་རིད་བས་ཆ་སྙོམས་པ་དང་། ཕྱལ་ལམ་ལྟོ་བ་མཐོ་དམན་མེད་པར་ཕྱང་ངེ་བ་དང་། ལྟེ་བ་ནི་གཏིང་ཟབ་པ་དང་། ལྟེ་བ་རི་མོ་གཡས་ཕྱོགས་སུ་འཁྱིལ་པ་དང་། སྤྱོད་ལམ་ཀུན་ནས་ལྟ་ན་སྡུག་པ་སྟེ་བཅུ་དང་། ཀུན་སྦྱོད་གཙང་བ་དང་། སྐུ་ལ་ནི་རྨེ་བའི་གནག་བག་མེད་པ་དང་། ཕྱག་ནི་ཤིང་བལ་ལྟར་འཇམ་པ་དང་། ཕྱག་རིས་མདངས་ཡོད་པ་དང་། ཟབ་པ་དང་། རིང་བ་དང་། ཞལ་ནི་ཧ་ཅང་མི་རིང་པ་དང་། མཆུ་ནི་བིམ་པ་ལྟར་དམར་བ་དང་། ལྗགས་མཉེན་པ་དང་། དེ་སྲབ་པ་སྟེ་བཅུ་དང་། ལྗགས་དམར་བ་དང་། གསུང་འབྲུག་གི་སྒྲ་ལྟ་བུ་ཉིད་དང་། གསུང་སྙན་ཅིང་འཇམ་པ་དང་། མཆེ་བ་ཟླུམ་པ་དང་། དེ་རྣོ་བ་དང་། དེ་དཀར་བ་དང་། དེ་རིང་ཐུང་མཉམ་པ་དང་། དེ་བྱིན་གྱིས་ཕྲ་བ་དང་། ཤངས་གཟེངས་མཐོ་བ་དང་། དེ་སྣབས་སོགས་ཀྱི་མཆོག་ཏུ་དག་པ་དག་དང་ནི་བཅུ་དང་། སྤྱན་ཡངས་པ་དང་། རྫི་མ་སྟུགས་པ་དང་། སྤྱན་པདྨའི་འདབ་མ་རངས་པ་འདྲ་བ་དང་། སྨིན་ཚུགས་རིང་བ་དང་། སྨིན་མ་འཇམ་པ་དང་། དེ་སྣུམ་པ་དང་། དེའི་སྤུ་ནི་མཉམ་པ་དང་། ཕྱག་རིང་ཞིང་རྒྱས་པ་དང་། སྙན་རིང་ཐུང་སོགས་མཉམ་པ་དང་། སྙན་གྱི་དབང་པོ་ཉམས་པ་རྣམ་པར་སྤངས་པ་སྟེ་བཅུ་དང་། དཔྲལ་བ་ལེགས་པར་འབྱེས་པ་དང་། དེ་དབྱེས་ཆེ་བ་དང་། དབུ་རྒྱས་པ་དང་། དབུ་སྐྲ་བུང་བ་ལྟར་གནག་པ་དང་། སྟུགས་པ་དང་། དེ་འཇམ་པ་དང་། དེ་མ་འཛིངས་པ་དང་། དེ་མི་གཤོར་བ་དང་། དེ་དྲི་ཞིམ་པས་སྐྱེས་བུ་ཡི་ཡིད་ནི་འཕྲོག་པར་བྱེད་པ་དང་། ཕྱག་ཞབས་ཀྱི་མཐེ་བོང་ལ་དཔལ་གྱི་བེའུ་དང་། མཐིལ་ལ་བཀྲ་ཤིས་པའི་གཡུང་དྲུང་འཁྱིལ་པ་སྟེ་བཅུ་དང་བཅས་པའི་བརྒྱད་ཅུས་བརྒྱན་པའི་ཕྱིར་རོ། །བཞི་པ་མཆོག་གི་སྤྲུལ་སྐུ་བཤད་པ་ནི། གང་གིས་སྲིད་པ་ཇི་སྲིད་པས། །ཞེས་པ་ནས། ཐུབ་པའི་སྤྲུལ་སྐུ་རྒྱུན་མི་ཆད། །ཅེས་པའི་བར་གསུངས། སྟོན་པ་ཤཱཀྱ་ཐུབ་པ་ལ་སོགས་པའི་གཟུགས་ཀྱི་སྐུ་གང་གིས་རྒྱུན་མི་ཆད་པར་འཕྲིན་ལས་མཛད་པའི་ངེས་པ་ལྔ་དང་མི་ལྡན་པས་ཕྱེ་བའི་གཟུགས་སྐུ་དེ་ནི་ཆོས་ཅན། སྤྲུལ་སྐུ་ཡིན་ཏེ། དུས་སྲིད་པ་ཇི་སྲིད་བར་དག་མ་དག་གི་འགྲོ་བ་དུ་མ་ལ་དངོས་སུ་སྣང་བའི་སྒོ་ནས་མངོན་མཐོ་ངེས་ལེགས་ཀྱི་ཕན་པ་སྣ་ཚོགས་པ་དག་དུས་མཉམ་དུ་མཛད་པའི་གཟུགས་སྐུ་ཡིན་པའི་ཕྱིར། སྤྲུལ་སྐུའི་འཇོག་བྱེད་ཡོད་དེ། ངེས་པ་ལྔ་དང་མི་ལྡན་པས་རབ་ཏུ་ཕྱེ་བའི་གཟུགས་སྐུ་དེ། དེའི་འཇོག་བྱེད་ཡིན་པའི་ཕྱིར། དེ་ལ་དབྱེ་ན་གསུམ་ཡོད་དེ། བཟོ་བོ་སྤྲུལ་སྐུ། སྐྱེ་བ་སྤྲུལ་སྐུ། མཆོག་གི་སྤྲུལ་སྐུ་དང་གསུམ་ཡོད་པའི་ཕྱིར། དེ་གསུམ་པོའི་མཚན་གཞི་ཡོད་དེ། སྟོན་པས་བཟོ་བོ་བི་ཤྭ་ཀརྨའི་རྣཾ་པར་སྤྲུལ་པ་དེ་དང་པོ། དམ་པ་ཏོག་དཀར་དང་། དྲི་ཟའི་རྒྱལ་པོར་རབ་དགའི་རྣམ་པར་སྤྲུལ་པ་དེ་གཉིས་པ། སྟོན་པ་ཤཱཀྱ་ཐུབ་པ་ལྟ་བུ་གསུམ་པ་ཡིན་པའི་ཕྱིར། གཉིས་པ་མཛད་པ་འཕྲིན་ལས་བཤད་པ་ལ་གསུམ། མདོར་བསྟན་པ་དང་། རྒྱས་པར་བཤད་པ་དང་། དོན་བསྡུ་བའོ། །དང་པོ་ནི། །དེ་བཞིན་འཁོར་བ་ཇི་སྲིད་འདིའི། ལས་ནི་རྒྱུན་མི་ཆད་པར་འདོད། །ཅེས་གསུངས། འདི་ལ་ཚིག་དོན་དང་། མཐའ་དཔྱད་པ་གཉིས། དང་པོ་ནི། སྤྲུལ་པའི་སྐུ་དང་ཡེ་ཤེས་ཆོས་སྐུ་འདི་ཆོས་ཅན། ཁྱོད་གཉིས་རྒྱུན་མི་ཆད་པ་དེ་བཞིན་དུ་ཁྱོད་གཉིས་ཀྱི་འཕྲིན་ལས་ཀྱང་རྒྱུན་མི་ཆད་དུ་འདོད་དེ། འགྲོ་བའི་དོན་དུ་སྲིད་པ་ཇི་སྲིད་པར་འཇུག་པའི་རྒྱུ་ཚོགས་དང་ལྡན་པའི་ཕྱིར། གཉིས་པ་ལ། སངས་རྒྱས་ཀྱི་འཕྲིན་ལས་ཀྱི་མཚན་ཉིད་ཡོད་དེ། རང་རྒྱུ་ཡེ་ཤེས་ཆོས་སྐུའི་བདག་རྐྱེན་ལས་བྱུང་བའི་རྣམ་དཀར་གྱི་ཡོན་ཏན་དེ་དེའི་མཚན་ཉིད་ཡིན་པའི་ཕྱིར། དེ་ལ་ངོ་བོའི་སྒོ་ནས་གཉིས་ཡོད་དེ། བྱེད་པ་པོ་ལ་ཡོད་པའི་སངས་རྒྱས་ཀྱི་འཕྲིན་ལས་དང་། བྱ་བ་ཡུལ་ལ་ཡོད་པའི་དེ་གཉིས་ཡོད་པའི་ཕྱིར། དེ་གཉིས་ཀྱི་ཁྱད་པར་ཡོད་དེ། སངས་རྒྱས་ཀྱི་གདུལ་བྱ་མངོན་མཐོ་ངེས་ལེགས་ལ་འགོད་པའི་འཕྲིན་ལས་ནི་སངས་རྒྱས་རང་ཉིད་ལ་ཡོད་ཅིང་། དེ་ལ་བཀོད་པ་ནི་གདུལ་བྱའི་རྒྱུད་ལ་ཡོད་པའི་ཕྱིར། དཔེར་ན། སྟ་རེས་ཤིང་གཅོད་པའི་བྱེད་ལས་ནི་སྟ་རེ་ལ་ཡོད་ཅིང་། ཤིང་བཅད་པའི་བྱ་བ་ནི་ཤིང་ཉིད་ལ་ཡོད་པ་བཞིན་ནོ། །བྱ་བ་ཡུལ་ལ་ཡོད་པའི་འཕྲིན་ལས་ཡིན་ན་གདུལ་བྱའི་རྒྱུད་ལ་ཡོད་པས་མ་ཁྱབ་སྟེ། སངས་རྒྱས་ཀྱིས་སེམས་ཅན་གང་སངས་རྒྱས་ཀྱི་ས་ལ་བཀོད་པའི་ཚེ་བྱ་བའི་འཕྲིན་ལས་དེ་སངས་རྒྱས་ཀྱི་ས་ན་ཡོད་པའི་ཕྱིར། གཞུང་འདིའི་དངོས་བསྟན་གྱི་འཕྲིན་ལས་ནི་ལམ་ཞུགས་ཀྱི་དབང་དུ་མཛད་ཀྱང་། སྤྱིར་སངས་རྒྱས་ཀྱི་འཕྲིན་ལས་ནི་ལམ་མ་ཞུགས་ནའང་ཡོད་དེ། གདུལ་བྱའི་རྒྱུད་ལ་ལམ་དང་དགེ་སེམས་སྣ་གཅིག་སྐྱེས་པ་ཡང་སངས་རྒྱས་ཀྱི་འཕྲིན་ལས་སུ་བཤད་པའི་ཕྱིར། གང་ཟག་གཞན་དུ་མ་ཟད། ཕྱི་རོལ་བའི་རྒྱུད་ལའང་སངས་རྒྱས་ཀྱི་འཕྲིན་ལས་ཡོད་དེ། སངས་རྒྱས་ཀྱིས་དེའི་དོན་ཀྱང་མཛད་པའི་ཕྱིར། དེར་ཐལ། དེས་སེམས་ཅན་ཐམས་ཅད་ཀྱི་དོན་མཛད་པའི་ཕྱིར་རོ། །གཉིས་པ་ལ། ལམ་དང་ལམ་གྱི་འབྲས་བུ་ལ་འགོད་པ་གཉིས། དང་པོ་ནི། འགྲོ་རྣམས་ཞི་བའི་ལས་དང་ནི། །ཞེས་པ་ནས། ཐ་དད་ཡོངས་སུ་མི་ཤེས་དང་། །ཞེས་པའི་བར་གསུངས། འདིར་བསྟན་པའི་འཕྲིན་ལས་ཆོས་ཅན། ཁྱོད་ལ་ཉེར་དྲུག་ཡོད་དེ། འགྲོ་བ་རྣམས་ཐར་པ་དོན་གཉེར་གྱི་བསམ་པ་ཚོགས་ལམ་ལ་འགོད་པ་དང་། ཐོག་མ་དེ་བཞིན་དུ་སྦྱར་ཏེ་བསྡུ་བ་རྣམ་བཞིའི་ཚོགས་ལམ་ལ་འགོད་པ་དང་། ཀུན་ནས་ཉོན་མོངས་པའི་རྒྱུ་འབྲས་སྡུག་ཀུན་དང་བཅས་པ་དོར་བྱ་དང་རྣམ་པར་བྱང་བའི་རྒྱུ་འབྲས་བླང་བྱར་རྟོགས་པའི་ཚོགས་ལམ་ལ་འགོད་པའི་འཕྲིན་ལས་གསུམ་དང་། སེམས་ཅན་རྣམས་ཀྱི་དོན་དུ་གནས་ལུགས་ཇི་ལྟ་བ་བཞིན་གྱི་དོན་རྟོགས་པའི་སྦྱོར་ལམ་ལ་འགོད་པའི་དེ་དང་། སྦྱིན་སོགས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་སྦྱོར་ལམ་ལ་དང་། སངས་རྒྱས་སུ་བ གྲོད་པའི་ལམ་དགེ་བ་བཅུའི་སྦྱོར་ལམ་ལ་དང་། དོན་དམ་པར་རང་བཞིན་གྱིས་སྟོང་པ་ཉིད་སྒོམ་བྱུང་གིས་རྟོགས་པའི་སྦྱོར་ལམ་ལ་འགོད་པའི་འཕྲིན་ལས་བཞི་དང་། གཉིས་སྣང་གི་སྤྲོས་པ་ཐམས་ཅད་ཟད་པའི་སྟོང་ཉིད་མངོན་སུམ་དུ་རྟོགས་པའི་མཐོང་ལམ་ལ་འགོད་པའི་འཕྲིན་ལས་གཅིག་དང་། ཆོས་ཐམས་ཅད་བརྡ་ཙམ་གྱིས་བཏགས་པར་རྟོགས་པའི་ས་གཉིས་པའི་ཚུལ་ཁྲིམས་གྱི་ཉམས་ལེན་ལ་འགོད་པ་དང་། ཆོས་ཐམས་ཅད་དེ་ལྟར་རྟོགས་པའི་ས་གསུམ་པའི་བཟོད་པའི་ཉམས་ལེན་ལ་འགོད་པ་གཉིས་བསྡོམས་པས་གཅིག་དང་། ཆོས་ཐམས་ཅད་དོན་དམ་པར་དམིགས་པ་མེད་པར་རྟོགས་པའི་ས་བཞི་པ་ལྔ་པ་དྲུག་པ་གསུམ་ལ་འགོད་པའི་འཕྲིན་ལས་གཅིག་དང་། ལུས་ཅན་རྣམས་ནི་ཡོངས་སུ་སྨིན་པར་མཛད་པའི་ས་བདུན་པའི་ཐབས་མཁས་ལ་འགོད་པའི་འཕྲིན་ལས་གཅིག་དང་། ས་བརྒྱད་པའི་བྱང་ཆུབ་སེམས་དཔའི་ལམ་ཉན་རང་གི་ལམ་ཤེས་པའི་ལམ་ཤེས་ལ་འགོད་པ་དང་། བདེན་པར་མངོན་པར་ཞེན་པ་མངོན་འགྱུར་བ་བཟློག་པའི་ས་བརྒྱད་པ་ལ་དང་། སངས་རྒྱས་དཀོན་མཆོག་བཏགས་པ་པའི་བྱང་ཆུབ་ཐོབ་པའི་ས་བརྒྱད་པ་ལ་དང་། གང་དུ་འཚང་རྒྱ་བའི། སངས་རྒྱས་ཀྱི་ཞིང་རྣམ་པར་དག་པའི་ས་བརྒྱད་པ་ལ་འགོད་པ་སྟེ་བཞི་དང་། ཐེག་དམན་དུ་མི་ལྷུང་བར་འཚང་རྒྱ་བར་ངེས་པའི་ས་དགུ་པ་ལ་དང་། སེམས་ཅན་གྱི་དོན་ནི་ཚད་མེད་པ་སྒྲུབ་པའི་ས་དགུ་པ་ལ་འགོད་པ་གཉིས་དང་། དགེ་བའི་བཤེས་གཉེན་སངས་རྒྱས་ལ་བརྟེན་ནས་དེ་ལ་ཆོས་ཉན་པ་སོགས་ཀྱིས་ཡོན་ཏན་དང་། བྱང་ཆུབ་ཀྱི་ཡན་ལག་སྒྲུབ་པའི་ས་བཅུ་པ་ལ་དང་། ལས་ཕྲ་རགས་རྣམས་ནི་ཆུད་མི་ཟ་བར་རྟོགས་པའི་དེ་ལ་དང་། བདེན་བཞི་རྫོགས་པར་མངོན་སུམ་དུ་མཐོང་བའི་དེ་ལ་དང་། ཕུང་པོ་གཙང་བདེ་རྟག་པ་དག་ཏུ་འཛིན་པའི་ཕྱིན་ཅི་ལོག་ནི་སྤངས་པའི་དེ་ལ་དང་། ཕྱིན་ཅི་ལོག་བཞི་པོ་དེ་བསྐྱེད་པའི་གཞི་སྟེ་རྒྱུ་བདེན་འཛིན་མེད་པའི་ཚུལ་ལ་དང་། ཆོས་ཐམས་ཅད་བདེན་སྟོང་མཉམ་པ་ཉིད་དུ་རྟོགས་པའི་རྣམ་བྱང་རྫོགས་པའི་དེ་ལ་དང་། བྱང་ཆུབ་ཀྱི་རྒྱུ་ཚོགས་གཉིས་རྫོགས་པའི་དེ་ལ་དང་། འདུས་བྱས་འཁོར་བ་འདུས་མ་བྱས་མྱ་ངན་ལས་འདས་པ་ལ་དོན་དམ་པར་ཐ་དད་དུ་ཡོངས་སུ་མི་ཤེས་པར་མངོན་སུམ་དུ་རྟོགས་པའི་ས་བཅུ་པ་ལ་འགོད་པའི་འཕྲིན་ལས་དང་དགུ་སྟེ་དག་ས་ལ་འགོད་པའི་འཕྲིན་ལས་བཅོ་ལྔ་ཡོད་པའི་ཕྱིར། གཉིས་པ་ནི་། མྱ་ངན་འདས་ལ་འགོད་པ་སྟེ། །ཞེས་གསུངས། དོན་ནི། ཤེས་བྱ་ཆོས་ཅན། ལམ་གྱི་འབྲས་བུ་ལ་འགོད་པ་གཅིག་ཡོད་དེ། མཆོག་གི་སྤྲུལ་སྐུས་གདུལ་བྱ་རྣམས་མི་གནས་པའི་མྱ་ངན་ལས་འདས་པ་ལ་འགོད་པའི་འཕྲིན་ལས་ཡོད་པའི་ཕྱིིར། གསུམ་པ་དོན་བསྡུ་བ་ནི། ཆོས་ཀྱི་སྐུའི་འཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་གསུངས། དོན་ནི། ཤེས་བྱ་ཆོས་ཅན། འདིར་བསྟན་པའི་ཡེ་ཤེས་ཆོས་ཀྱི་སྐུ་ཡི་འཕྲིན་ལས་ནི་རྣམ་པ་ཉི་ཤུ་རྩ་བདུན་དུ་བཞེད་པ་ཡིན་ཏེ། གོང་དུ་བཤད་པ་ལྟར་ཚོགས་ལམ་ལ་གསུམ། སྦྱོར་ལམ་ལ་བཞི། མཐོང་ལམ་ལ་གཅིག ས་གཉིས་པ་དང་གསུམ་པ་ལ་གཅིག བཞི་པ་ལྔ་པ་དྲུག་པ་གསུམ་ལ་གཅིག །བདུན་པ་ལ་གཅིག །བརྒྱད་པ་ལ་བཞི། དགུ་པ་ལ་གཉིས། བཅུ་པ་ལ་དགུ །སངས་རྒྱས་ཀྱི་སར་གཅིག་སྟེ་ཉེར་བདུན་དུ་འགྱུར་པའི་ཕྱིར་རོ། །གསུམ་པ་བསྡུས་དོན་གཞན་ལ། དྲུག་ཏུ་བསྡུ་བ་དང་། གསུམ་དུ་བསྡུ་པ་གཉིས། དང་པོ་ནི། མཚན་ཉིད་དེ་ཡི་སྦྱོར་བ་དང་། །ཞེས་པ་ནས། དོན་བསྡུས་གཞན་ཏེ་རྣམ་པ་གསུམ། །ཅེས་པའི་བར་གསུངས། ཤེས་བྱ་ཆོས་ཅན། མངོན་རྟོགས་རྒྱན་གྱི་དོན་བརྒྱད་བསྟན་པ་ལས་དོན་བསྡུས་གཞན་རྣམ་པ་དྲུག་ཏུ་ཤེས་པར་བྱ་སྟེ། མཁྱེན་གསུམ་གྱི་ངོ་བོར་གྱུར་པའི་མཚན་ཉིད་དང་། མཁྱེན་གསུམ་དེ་ཡི་ཉམས་སུ་ལེན་བྱེད་རྣམ་རྫོགས་སྦྱོར་བ་དང་། རྣམ་རྫོགས་སྦྱོར་བ་དེ་རབ་ཏུ་གྱུར་པའི་རྩེ་སྦྱོར་བ་དང་། མཁྱེན་གསུམ་གྱི་དེ་ཡི་ཉམས་ལེན་གྱི་གོ་རིམ་མཐར་གྱིས་སྦྱོར་བ་དང་། མཁྱེན་གསུམ་དེ་ཡི་སྦྱོར་བ་མཐར་ཐུག་པའི་སྐད་ཅིག་སྦྱོར་བ་དང་། མཁྱེན་གསུམ་དེ་ཡི་རྣམ་སྨིན་གྱི་འབྲས་བུ་ཆོས་སྐུ་དང་ནི་དྲུག་ཏུ་ཤེས་པར་བྱ་བའི་ཕྱིར་རོ། །གཉིས་པ་དོན་གསུམ་དུ་བསྡུ་བ་ནི། ཡུལ་ནི་རྣམ་པ་གསུམ་པོ་རྒྱུ། །ཞེས་པ་ནས། །དོན་བསྡུས་གཞན་ཏེ་རྣམ་པ་གསུམ། །ཞེས་པའི་བར་གསུངས། མཁྱེན་པ་རྣམ་པ་གསུམ་པོ་ཆོས་ཅན། སྦྱོར་བའི་བསྒོམ་བྱའི་ཡུལ་ནི་ཡིན་ཏེ། དེའི་ཉམས་སུ་བླང་བྱ་ཡིན་པའི་ཕྱིར། སྦྱོར་བ་བཞི་ཡི་བདག་ཉིད་ཆོས་ཅན། མཐར་ཐུག་གི་མཁྱེན་གསུམ་དེའི་རྒྱུ་ཡིན་ཏེ། དེ་འཐོབ་བྱེད་གྱི་ཐབས་ཡིན་པའི་ཕྱིར། ཆོས་སྐུ་དང་འཕྲིན་ལས་ཆོས་ཅན། མཁྱེན་གསུམ་སྦྱོར་བའི་འབྲས་བུ་ཡིན་ཏེ། དེའི་སྟོབས་ཀྱིས་ཐོབ་པའི་ཐོབ་བྱ་ཡིན་པའི་ཕྱིར། ཤེས་བྱ་ཆོས་ཅན། འདིར་ཡུམ་གསུམ་གྱི་དོན་བསྡུས་སྔ་མ་ལས་དོན་བསྡུས་གཞན་རྣམ་པ་གསུམ་དུ་བསྟན་པ་ཡིན་ཏེ། ཡུལ་དང་རྒྱུ་དང་འབྲས་བུའི་རྣམ་པ་གསུམ་དུ་བསྡུས་ནས་བཤད་པའི་ཕྱིར་རོ། བསྡུས་དོན་དྲུག་དང་གསུམ་དུ་བྱས་པའི་ཚེ་རྒྱས་བཤད་ཀྱི་སྐབས་ཀྱང་དེ་དང་མཐུན་པར་དྲུག་དང་གསུམ་དུ་འབྱེད་དགོས་ཏེ། བསྡུས་དོན་བརྒྱད་དུ་ཕྱེ་བ་ལ་སྐབས་བརྒྱད་འབྱུང་བའི་ཕྱིར་རོ། །རྒྱལ་ཡུམ་ཤེས་རབ་ཕ་རོལ་ཕྱིན་པ་ཡི། །སྦས་དོན་མངོན་པར་རྟོགས་པའི་རིམ་པ་ཀུན། །ཇི་བཞིན་གསལ་མཛད་མི་ཕམ་མགོན་གྱི་གསུང། །བསྟན་བཅོས་ཆེན་པོ་འདི་ལས་གཞན་ན་གང་། །འདི་ཡི་ཚིག་འགྲེལ་མཐའ་དཔྱོད་དང་བཅས་པའི། །ཡིག་ཆ་རྒྱས་པ་སྔོན་དུ་བྲིས་པ་ལས། །ཚིག་འགྲེལ་འདི་ཉིད་ལོགས་སུ་བཀོལ་བྱས་ནས། །རང་དང་དད་ལྡན་གཞན་བཅས་སྤར་དུ་བསྒྲུབས། །གང་འདིའི་དགོངས་དོན་འགྲེལ་ལ་རང་ཉིད་ཀྱིས། །སྒོ་གསུམ་འབད་ལས་ཐོབ་པའི་དགེ་དེ་བདག །ཚེ་རབས་ཀུན་ཏུ་རྗེ་བཙུན་བྱམས་མགོན་གྱིས། །ཐུགས་རྗེས་འབྲལ་མེད་རྗེས་སུ་འཛིན་ཕྱིར་བསྔོ། །ཅེས་པ་འདི་ཡང་ཤཱཀྱའི་དགེ་སློང་གྲགས་པ་བཤད་སྒྲུབ་ཅེས་བྱ་བས་དད་པས་ཅོ་ནེའི་དགོན་ཉིད་དུ་སྦྱར་བ་སྟེ། བར་གྱི་ཡི་གེ་བ་ནི་དཀའ་བཅུ་འཇམ་དབྱངས་དོན་ཡོད་དོ། །མདྒ་ལཾ། །