བཀའ་བསྒོའི་རྣམ་གཞག།

བཀའ་བསྒོའི་རྣམ་གཞག་བཞུགས།

རྒྱལ་ཀུན་ཡབ་གཅིག་འཇམ་པའི་དབྱངས། །མ་རུངས་འདུལ་ཕྱིར་དྲག་པོའི་སྐུར། །མངོན་བསྟན་གཤིན་རྗེའི་གཤེད་ཉིད་ལ། །བཏུད་ནས་བཀའ་བསྒོའི་རྣམ་གཞག་བཤད། །འདི་ལ་གཉིས། བཀའ་སྒོའི་དོན་སྤྱིར་བསྟན་པ་དང་། བྱ་ཚུལ་བཤད་པ་གཉིས། དང་པོ་ནི། བཀའ་བསྒོ་ཞེས་པའི་དོན་ཇི་ལྟར་ཡིན་ཞེ་ན། དེ་ནི་དཔེར་ན་བླ་དཔོན་སོགས་ཆེ་བས་གཡོག་ལྟ་བུ་ཆུང་བ་ལ་བྱ་བ་འདི་དང་འདི་གྱིས། འདི་དང་འདི་མ་བྱེད་ཅེས་བསྒོས་ནས་དམ་བཅའ་ཁས་ལེན་དུ་འཇུག་པ་ལྟ་བུ་སྟེ། དེ་ལ་བླ་མས་སློང་མ་ལ་དམ་ཚིག་ཁས་ལེན་དུ་འཇུག་པའི་སྒོ་ནས་བཀའ་བསྒོ་བ་དང་། གསང་འདུས་ཀྱི་སྲུང་འཁོར་སྐབས་ཞེ་སྡང་རྡོ་རྗེས་གནོད་མཛེས་ལ་བགེགས་རྣམས་བཟུང་ལ་ཁུག་ཅིག་ཅེས་བཀའ་བསྒོ་བ་དང་། བདེ་མཆོག་གི་སྲུང་འཁོར་རྒྱས་པའི་སྐབས་གནོད་མཛེས་ཀྱིས་ཁྲོ་བཅུ་ལ་བཀའ་བསྒོས་ཏེ་འགེགས་ལ་ཕུར་བུ་གདབ་པ་དང་། འཇིགས་བྱེད་ཀྱི་ཕྱོགས་སྐྱོང་དགུག་བསྐྱེད་ཀྱིས་སྐབས་གཙོ་བོས་རང་ཉིད་ཀྱིས་སྤྲོས་པའི་གཤིན་རྗེ་གཤེད་ལ་བགེགས་བཟུང་ནས་དགུག་པ་དང་ཕུར་བུ་ཐོབ་ཅིག་ཅེས་པ་དང་། ལས་ཚོགས་དང་བསྐང་གསོ་དང་ཟོར་འཕེན་པ་ལྟ་བུའི་སྐབས་འགའ་ཞིག་ཏུ་གཙོ་བོས་ལས་གཤིན་སོགས་ཀྱི་ཆོས་སྐྱོང་ལ་བཀའ་བསྒོ་བ་དང་། གསང་འཇིགས་སོགས་ཀྱི་ས་ཆོག་ག་སྐབས་སུ་གཙོ་བོའི་ང་རྒྱལ་གྱིས། ལུས་ངག་སེམས་ལ་གནས་པ་ཡི། ཞེས་སོགས་ཀྱིས་བགེགས་ལ་བཀའ་བསྒོ་བ་དང་། རབ་གནས་དང་ཀུན་རིག་གི་སྲུང་འཁོར་དང་ལྷོ་སྒོ་སོགས་ཀྱི་སྔོན་དུ་ཧཱུཾ་མཛད་ཀྱི་ང་རྒྱལ་གྱིས་དཀྱིལ་འཁོར་ཆེན་པོའི་ས་གཞི་ལ་གནས་པའི། ཞེས་སོགས་ཀྱིས་བགེགས་ལ་བཀའ་བསྒོ་བ་དང། རྒྱུད་སྡེ་འོག་མ་གསུམ་གྱི་ས་ཆོག་གི་སྐབས་སུ་ཡང་ཧཱུཾ་མཛད་ཀྱི་ང་རྒྱལ་གྱིས་བགེགས་ལ་བཀའ་བསྒོ་བ་ལྟ་བུ་སོགས་མང་ངོ་། །ད་ལྟ་ནད་པ་ལ་བཀའ་བསྒོ་བྱེད་ཅེས་པ་ནི། ནད་པ་ཉིད་ལ་བཀའ་བསྒོ་བ་མིན་གྱི་ནད་པའི་ཆེད་དུ་ཆོས་སྐྱོང་སོགས་ལ་ནད་པ་འདིའི་གནོད་པ་ཟློག་པ་དང་ནད་ཞི་བ་དང་སྲུང་བར་གྱིས་ཤིག་ཅེས་བསྒོ་བ་ཡིན་ནོ། །འོན་ཀྱང་ནད་པ་ལ་བཀའ་བསྒོ་བྱེད་པའི་ཚེ་བླ་མ་ཡི་དམ་སོགས་སྤྱན་དྲངས་ནས་དེ་ལ་གསོལ་བ་བཏབ་སྟེ་ནད་གདོན་ཞི་བའི་ཆེད་དུ་བྱིན་རླབས་ཞུ་བ་ནི། བཀའ་བསྒོར་བཏགས་པ་ཙམ་དང་བཀའ་བསྒོའི་ཡན་ལག་ཡིན་གྱི། བཀའ་བསྒོ་དངོས་མིན་ཏེ། བཀའ་བསྒོ་ཞེས་པའི་སྒྲ་དེ་ན་སྔར་བཤད་པ་ལྟར། དངོས་པོའི་གནས་ཚོད་ལ་ཆེ་ཆུང་ཡོད་མེད་གང་ཡིན་ཀྱང་འཇིག་རྟེན་གྲགས་པ་དང་མཐུན་པར་ཆེ་བས་ཆུང་བ་ཞིག་ལ་འདི་ལྟར་གྱིས་ཤིག་ཅེས་བཀའ་བསྒོ་བ་ཡིན་གྱི། ཆུང་བས་ཆེ་བ་ལ་བཀའ་བསྒོ་ཞེས་པ་ནི་གྲགས་པ་དོན་མཐུན་ལ་མི་འཐད་དོ། །འོན་ཀྱང་ཚུལ་དེ་ལྟར་བྱར་རུང་བ་ནི་འཆད་པར་འགྱུར་རོ། །སྤྱིར་གསང་བདེ་འཇིགས་གསུམ་སོགས་དང་རིགས་གསུམ་མགོན་པོ་ལྟ་བུའི་ལྷ་ཁྱད་པར་ཅན་གྱི་ང་རྒྱལ་བཟུང་ནས་ཆོས་སྐྱོང་གང་འདོད་པ་དེ་སྤྱན་དྲངས་ཏེ། མདུན་གྱི་ནམ་མཁའ་འམ་ནད་པ་སོགས་ཀྱི་སྤྱི་བོར་བཞུགས་པར་མོས་ནས་བཀའ་བསྒོ་བྱེད་པ་འཐད་ཅིང་། གསང་བདེ་འཇིགས་གསུམ་སོགས་དཀྱིལ་འཁོར་བའི་ལྷའི་གཙོ་བོ་ཕན་ཚུན་དང་། འཇིགས་བྱེད་ཀྱི་ང་རྒྱལ་ལ་གནས་ནས་རྟ་མགྲིན་དང་འཇིགས་བྱེད་ལྟ་བུ་ལ་གསོལ་གདབ་དང་བྱིན་འབེབ་བྱ་བར་རུང་ཡང་། དེ་དག་ལ་བཀའ་བསྒོ་བྱེད་ན་ནི་ཅུང་མི་འབྲེལ་ཞིང་། ནད་པ་ཉིད་ལ་བཀའ་བསྒོ་བ་མིན་པ་ནི་བཤད་པ་ལྟར་རོ། །འཇིགས་བྱེད་རྟ་མགྲིན་ཕྱག་རྡོར་གྱི་ང་རྒྱལ་བཟུང་ནས་མགོན་ཆོས་ལྷ་མོ་རྣམ་སྲས་བེ་ཙེ་སོགས་ཀྱི་ཆོས་སྐྱོང་སྤྱན་དྲངས་ནས་ནད་གདོན་ཞི་བའི་བཀའ་བསྒོ་བ་ནི་ཤིན་དུ་རུང་ཞིང་། ཁྱད་པར་དུ་འཇིགས་བྱེད་ཀྱིས་ལས་གཤིན་སོགས་དང་། རྟ་མགྲིན་གྱིས་མགོན་པོ། ལྷ་མོ། བེག་ཙེ། ཐ་འོག་པ་དང་། ཕྱག་རྡོར་གྱིས་ང་རྒྱལ་གྱིས་རྣམ་སྲས་དང་། ཕྱོགས་སྐྱོང་བཅུ་ལྟ་བུ་ལ་བཀའ་བསྒོ་བྱས་ན་སྐབས་དང་འབྲེལ་ལོ། །ཡང་དཀྱིལ་འཁོར་གཙོ་བོའི་ང་རྒྱལ་གྱིས་རང་གི་ལས་བྱེད་པའི་ལྷ་ལ་ནད་གདོན་སོགས་ཞི་བའི་ཆེད་དུ་བཀའ་བསྒོ་བའང་རུང་སྟེ། མཚོན་ན་ཞེ་སྡང་རྡོ་རྗེའི་ང་རྒྱལ་གྱིས་བགེགས་མཐར་བྱེད་དང་། འཇིགས་བྱེད་ཀྱི་ང་རྒྱལ་གྱིས་རལ་གྲི་གཤིན་རྗེ་གཤེད་ལ་བཀའ་བསྒོ་ན་ནི་འབྲེལ་ཞིང་རུང་བར་སྣང་བའི་ཕྱིར་རོ། །གཉིས་པ་བྱ་ཚུལ་བཤད་པ་ལ་སྤྱི་དང་བྱེ་བྲག་གཉིས་ལས། དང་པོ་ནི། རང་ཉིད་ལྷག་པའི་ལྷ་གང་ཡིན་པ་དེར་སྐད་ཅིག་གིས་བསྐྱེད་ནས་ཐུགས་ཀའི་ཧཱུཾ་གི་འོད་ཟེར་གྱིས་བླ་མ་ཡི་དམ་སངས་རྒྱས་བྱང་སེམས་སོགས་སྤྱན་དྲངས་ཏེ། མདུན་གྱི་ནམ་མཁར་བཞུགས་པར་མོས་ནས་བསྲུང་བྱའི་ནད་གདོན་ཞི་བའི་གསོལ་གདབ་ལན་གསུམ་བྱས་པའི་མཐར་ནད་པ་སོགས་ལ་བསྟིམས་ནས་བྱིན་གྱིས་རློབ་པ་དང་། དེ་ནས་བསྲུང་བྱའི་སྤྱི་བོར་ཆོས་སྐྱོང་བསྐྱེད་ནས་དགུག་གཞུག་བྱས་ཀྱང་རུང་ཡང་། འཇུག་པ་བདེ་ཆེན་རང་གི་ཐུགས་ཀའི་ཧཱུཾ་གི་འོད་ཟེར་གྱིས་ཆོས་སྐྱོང་གང་འདོད་པ་དེ་སྤྱན་དྲངས་ནས་བསྲུང་བྱའི་སྟེང་ཕྱོགས་སམ་མགོར་བཞུགས་པར་བསམས་ཏེ། མངོན་རྟོགས་མདོར་བསྡུས་ཀྱིས་གསལ་གདབ་པའམ་བསྡུ་ན་མ་བྱས་ཀྱང་རུང་། དེ་ནས་ཆོས་སྐྱོང་དེའི་སྔགས་ལན་བདུན་ལ་སོགས་པ་ཅི་འགྲུབ་བརྗོད་དེ །བཀའ་བསྒོ་བ་དང་ཕྲེང་བ་བསྲུང་བྱའི་མགོ་དང་རྒྱབ་སོགས་ལ་བྱིན་རླབས་ཀྱི་ཚུལ་དུ་རྡེག་ཅིང་། དེ་ལྟ་བུའི་ཚུལ་དུ་ལན་གསུམ་བྱས་ནས་ཆོས་སྐྱོང་དེའི་སྔགས་བརྗོད་པ་དང་དེའི་སྐུ་ལས་རང་འདྲ་དུ་མ་བྱུང་ནས་བསྲུང་བྱའི་ལུས་ལ་ཞུགས་པས་ནད་གདོན་ཐམས་ཅད་བསྐྲད་པ་དང་ཞི་བར་གྱུར་པར་བསམས་ཤིང་། བྱིན་གྱིས་བརླབ་པའི་ཕྱིར་སྔགས་བརྗོད་ཅིང་ཆོས་སྐྱོང་གི་ཐུགས་རྒྱུད་བསྐུལ་བས་སྐུ་ལས་འོད་ཟེར་འཕྲོས་བསྲུང་བྱའི་ལུས་ཀྱི་ཆ་ཐམས་ཅད་ནས་ཞུགས་པས་ལུས་ཀྱི་ཕྱི་ནང་བར་གསུམ་ཐམས་ཅད་གང་། ནད་གདོན་སྡིག་སྒྲིབ་ཐམས་ཅད་ལུས་ཀྱི་ཆ་ཐམས་ཅད་རྡོ་རྗེའི་རང་བཞིན་དུ་གྱུར་པ། དེ་ནས་ཕུ་བཏབ་པས་འོད་དུ་ཞུ་ནས་བསྲུང་བྱ་ལ་ཐིམ་པས་བསྲུང་བྱའི་སྒོ་གསུམ་དང་ཆོས་སྐྱོང་གི་སྐུ་གསུང་ཐུགས་དབྱེར་མི་ཕྱེད་པའི་སྲུང་བར་གྱུར། ཅེས་བརྗོད་ཅིང་བསམ། ཡང་ན། དང་པོར་ཆོས་སྐྱོང་སྤྱན་དྲངས་ནས་བསྲུང་བྱའི་སྤྱི་བོར་བཞུགས་པར་མོས་ནས་གནས་གསུམ་བྱིན་གྱིས་བརླབས་ཏེ། དེ་ནས་བླ་མ་ཡི་དམ་སོགས་ནམ་མཁར་སྤྱན་དྲངས་ནས་གསོལ་གདབ་སོགས་བྱས་རྗེས་ཆོས་སྐྱོང་བསྐྱེད་ནས་སྙིང་པོ་བཟླ་བ་སོགས་སྔར་བཞིན་བྱས་པའི་མཐར་བསྟིམ། དེ་ནས་སླར་འོད་ཟེར་གྱིས་ནམ་མཁའ་བཞུགས་པའི་སྐྱ བས་གནས་ཐམས་ཅད་སྤྱན་དྲངས་ནས་འོད་ཀྱི་རྣམ་པར་བསྟིམ་ཡང་རུང་ངོ་། །དེ་ནི་ཅུང་ཟད་རྒྱས་པ་ཡིན་ལ། བསྡུས་པ་ལ་ནི་ཆོས་སྐྱོང་སྤྱན་དྲངས་ནས་བཀའ་བསྒོ་ལན་གསུམ་བྱས་ནས་བསྟིམ་པས་ཀྱང་འཐུས་ཤིང་། དེར་མ་ཟད་རང་འཇིགས་བྱེད་དུ་བསྐྱེད་ནས་གཞན་སྤྱན་འདྲེན་གཞན་མེད་པར་བླ་མ་ཡི་དམ་སོགས་བྱིན་རླབས་ཞུ་ཞིང་གཏང་བ་ཙམ་ལ་བཀའ་བསྒོའི་ཐ་སྙད་བྱས་པའང་འདུག་སྟེ་མི་འཐད་པ་མི་སྣང་ངོ། །མཐར་བགེགས་བསྐྲད་པར་འདོད་ན་ལས་སྔགས་གང་ཡིན་པ་དག་ཨ་མྲྀ་ཏའམ་ཁྲོས་ནུའི་སྔགས་ཀྱི་མཇུག་ཏེ་སུམྦྷའི་སྔགས་ལན་གསུམ་མམ་གཅིག་བརྗོད་དེ། རྒྱལ་བ་སྲས་བཅས་བདེན་པའི་བྱིན་རླབས་དང་། །འཇམ་དཔལ་གཤིན་རྗེ་གཤེད་ཀྱི་མཐུ་བྱིན་གྱིས། །ཞེས་སོགས་སམ། །རྟ་མགྲིན་ཡིན་ན། རྟ་མགྲིན་དབང་གི་རྒྱལ་བའི་མཐུ་བྱིན་གྱིས། ཞེས་པ་ལྟ་བུ་ཡི་དམ་གང་ཡིན་པ་དེ་དང་དེར་བསྒྱུར་ནས། གནོད་པ་མ་བྱེད་ཅིང་།རཀྵ་རཀྵ་ཡེ་སྭཱ་ཧཱ་ཞེས་བརྗོད་ཅིང་བསྲུང་བར་བྱའོ། །གཉིས་པ་ལ། འཇིགས་བྱེད་དང་ལས་གཤིན་ལ་བརྟེན་པའི་བཀའ་བསྒོ་རྒྱས་པའི་ཕྱོགས་གཅིག་ནི། རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པ། ནས། སྐུར་བཞེངས་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་ལྷོ་ཕྱོགས་རིམ་པ་བདུན་གྱི་ས་འོག་ནས་ལས་ཀྱི་གཤིན་རྗེ་ཡབ་ཡུམ་སྤྱན་དྲངས། གླིང་གི་མཆོག་གྱུར་འཛམ་གླིང་ལྷོ་ཡི་ཕྱོགས། །ནས། གཤེགས་སུ་གསོལ། །ཡ་མ་རཱ་ཛ་ཨཱ་ཀརཥ་ཡ་ཛ་ཛ་ཛཿ བསྲུང་བྱའོ་སྤྱི་བོར་བྱོན་ནས་བཞུགས་པར་གྱུར། གསལ་འདེབས་ན། བསྲུང་བྱའི་སྤྱི་བོར་སྣ་ཚོགས་པདྨ་དང་ཉི་མ་དང་མ་ཧེའི་གདན་ལ་ལས་ཀྱི་གཤིན་རྗེ་ནག་པོ་མ་ཧེ་རབ་ཏུ་ཁྲོས་པའི་གདོང་པ་ཅན། གཡས་ཐོད་དབྱུགས་འཕྱར་ཞིང་། གཡོན་ཞགས་པ་དང་བཅས་ཏེ་བསྡིགས་མཛུབ་མཛད་པ། དབུ་སྐྲ་ཁམ་སེར་གྱེན་དུ་བརྫེས་ཤིང་། ལིང་ག་དམར་པོ་གྱེན་དུ་བསྒྲེང་བ། དེའི་གཡོན་ཏུ་ཙ་མུ་ཎྜི་ནག་མོ་གཡས་རྩེ་གསུམ་དང་། གཡོན་ཐོད་ཁྲག་འཛིན་པ་ཟུང་གཅིག་ཏུ་གྱུར། དེའི་སྤྱི་བོར་ༀ །མགྲིན་པར་ཨཱཿ ཐུགས་ཀར་ཧཱུཾ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ཆེན་པོའི་ལྷ་ཚོགས་ལ་བླ་མ་ཡི་དམ་སངས་རྒྱས་བྱང་སེམས་ཉན་རང་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་མདུན་གྱི་ནམ་མཁའ་སྤྱན་དྲངས། ན་མོ་ཡ་མཱནྟ་ཀ་སརྦ་གུ་རུ་བུངྔྷ་བོ་ངྷི་ས་ཏྭ་ས་པཱ་རི་ཝཱ་ར་བྷྱཿ མཆོད་དོ། །སྐྱབས་སུ་མཆིའོ། །ན་མོ། །རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་བྱིན་གྱིས་རློབས་ཤིག །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་༴། ཉན་རང་འཕགས་པའི་ཚོགས་ཐམས་ཅད་ཀྱིས་༴། ཡི་དམ་རྒྱལ་པའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་ཐམས་ཅད་ཀྱིས༴། དཔའ་བོ་དང་རྣལ་འབྱོར་མ་ཐམས་ཅད་ཀྱིས༴ །ཆོས་སྐྱོང་སྲུང་མའི་ཚོགས་ཐམས་ཅད་ཀྱིས་༴། ཁྱད་པར་དུ་ཡང་བཅོམ་ལྡན་འདས་དཔའ་རྡོ་རྗེ་འཇིགས་བྱེད་ཀྱི་ལྷ་ཚོགས་འཁོར་དང་བཅས་པ་ཐམས་ཅད་ཀྱིས་༴། ཆོས་ཀྱི་རྒྱལ་པོ་ཡབ་ཡུམ་འཁོར་དང་བཅས་པ་རྣམས་ཀྱིས༴། ཁྱེད་རྣམས་ཀྱིས་བསྲུང་བྱ་འདི་རྣམས་སམ། འདིའི་ནད་གདོན་བར་ཆད་ཐམསཅད་ཉེ་བར་ཞི་བར་བྱིན་གྱིས་རློབས་ཤིག །ཅེས་ལན་གསུམ་མམ། སྤྲོ་ན་སྟེང་གདོན་གཟའ་དང་དང་རྒྱུ་སྐར། འོག་གདོན་ཀླུ་དང་ས་བདག བར་གདོན་རྒྱལ་པོའི་གནོད་པ་དང་། ཐབ་འཁྱམས་གདོན་འཁྱམས་རྒྱལ་འགོང་ལ་སོགས་པའི་མི་མ་ཡིན་གྱི་གནོད་པ་དང་འབྱུང་བ་འཁྲུགས་པའི་ནད་ཐམས་ཅད་ཞི་བར་མཛད་དུ་གསོལ། གཞན་ཡང་བགེགས་རིགས་སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། ནད་རིགས་བཞི་བརྒྱ་རྩ་བཞི། བྱིས་པའི་གདོན་ཆེན་བཅོ་ལྔ་ལ་སོགས་པའི་གནོད་པ་དང་། ལོ་སྐེག ཟླ་སྐེག ཞག་སྐེག དུས་སྐེག ན་སྐེག །འཆི་སྐེག་ལ་སོགས་པའི་ཉེ་བར་འཚེ་བ་ཐམས་ཅད་ཞི་བར་མཛད་དུ་གསོལ། དེ་དག་ལས་སྲུང་དུ་གསོལ། བསྐྱབ་ཏུ་གསོལ། ཚེ་དང་བསོད་ནམས་དཔལ་འབྱོར་སོགས་རྒྱས་པར་མཛོད་ཅིང་། རྩ་སྔགས་བརྗོད་དེ། རྒྱས་བསྡུས་གང་རིགས་ལན་གསུམ་བྱ། དེ་ནས་ཆོས་རྒྱལ་ཡབ་ཡུམ་གཉིས་ཀྱི་སྔགས་ལན་བདུན་ནམ་གསུམ་རེ་བརྗོད་དེ། ཆོས་ཀྱི་རྒྱལ་པོ་ཡབ་ཡུམ་ཁྱེད་ཀྱིས་བསྲུང་བྱ་འདི་དག་ལ་གནོད་ཅིང་འཚེ་བར་བྱེད་པའི་ནད་གདོན་བགེགས་བར་དུ་གཅོད་པ་ཐམས་ཅད་ཉེ་བར་ཞི་བར་བྱིན་གྱིས་རློབས་ཤིག དེ་དག་ལས་སྲུང་དུ་གསོལ། བསྐྱབ་ཏུ་གསོལ། རཀྵ་རཀྵ་ཡེ་སྭཱ་ཧཱ། ཞེས་པ་ལན་གསུམ་མམ་། རྒྱས་པར་ནི་སྔར་ལྟར་བྱའོ། །ཡང་སྔགས་གཉིས་བརྗོད་དེ། ཆོས་ཀྱི་རྒྱལ་པོ་ཡབ་ཡུམ་གྱི་ཐུགས་ཀ་ནས་ཆོས་རྒྱལ་ཡབ་ཡུམ་དུ་མ་བྱུང་སྟེ་བསྲུང་བྱའི་ལུས་ཀྱི་ཆ་ཐམས་ཅད་ནས་ཞུགས། ནད་གདོན་ཐམས་ཅད་བསྐྲད་ཅིང་ཞི་བར་བྱས། སྔགས་བརྗོད་པས་ཆོས་རྒྱལ་ཡམ་ཡུམ་གྱི་ཐུགས་ཀ་ནས་འོད་ཟེར་འཕྲོས། བསྲུང་བྱའི་ལུས་ལ་ཕོག་པས་ལུས་ཀྱི་ཕྱི་ནང་ཐམས་ཅད་འོད་ཟེར་གྱིས་གང་། སྡིག་སྒྲིབ་ནད་གདོན་ཐམས་ཅད་སྦྱངས། ལུས་ཐམས་ཅད་རྡོ་རྗེའི་རང་བཞིན་དུ་གྱུར་ཕུ་བཏབ་པས་ཆོས་སྐྱོང་འོད་དུ་ཞུ་ནས་བསྲུང་བྱའི་སྤྱི་བོ་ནས་ལུས་ལ་ཐིམ་པས་བསྲུང་བྱའི་ལུས་ངག་ཡིད་གསུམ་དང་ཆོས་རྒྱལ་ཡབ་ཡུམ་གྱི་སྐུ་གསུང་ཐུགས་དབྱེར་མེད་དུ་གྱུར་པའི་སྒོ་ནས་སྲུང་ཞིང་བྱིན་གྱིས་བརླབས་པར་གྱུར་ཅེས་བརྗོད་ཅིང་བསམ། དེ་ནས་ཐུགས་ཀའི་ཧཱུཾ་ལས་འོད་ཟེར་འཕྲོས། ནམ་མཁར་བཞུགས་པའི་རྒྱལ་སྲས་བཅས་སྤྱན་དྲངས། འོད་ཀྱི་རྣམ་པར་གྱུར་ནས་བསྲུང་བྱའི་ལུས་ལ་ཐིམ་པས་བྱིན་གྱིས་བརླབས། ལུས་ཐམས་ཅད་རྡོ་རྗེའི་རང་བཞིན་ལས་གྲུབ་པའི་བསྲུང་བ་ཆེན་པོར་གྱུར་ཅེས་བརྗོད་ཅིང་། རྒྱལ་བ་སྲས་བཅས་བདེན་པའི་ཞེས་སོགས་སྔར་ལྟར་བྱ། བགེགས་བསྐྲད་པར་འདོད་ན་ཐོག་མར་ཡང་རུང་ཞིང་། འདི་བྱེད་ན་ལས་སྔགས་སམ། ཁཏྒ་བྷྲྀ་ཀ་དང་། བཛྲ་ཨ་མྲྀ་ཏའི་མཇུག་ཏུ་སུམྦྷུ་ནི་ལན་གསུམ་མམ་གཅིག་བརྗོད་ཅིང་། ཡུངས་དཀར་གྱིས་བྲབ་ཅིང་གུ་གུལ་གྱིས་བདུག་ཀྱང་ལེགས་ཤིང་། དེ་ནས་རྒྱལ་བ་སྲས་བཅས་སོགས་བརྗོད་དེ་བདེན་བྱིན་གྱིས་བསྲུང་བ་བྱའོ། །མགོན་པོའི་བཀའ་བསྒོ་བྱེད་ན། ཐུགས་ཀའི་ཧཱུཾ་གི་འོད་ཟེར་གྱིས་ཤར་ལྷོ་བསིལ་བའི་ཚལ་ནས་ཡེ་ཤེས་ཀྱི་མགོན་པོ་སྦྱན་དྲངས་ནས་བསྲུང་བྱའི་སྤྱི་བོའི་ནམ་མཁར་རམ་སྤྱི་བོར་བཞུགས་པར་བསམས་ནས་གསལ་འདེབས་པའམ་མིན་ཡང་རུང་ཞིང་། ཆོས་རྒྱལ་གྱི་དོད་ལ་ཡེ་ཤེས་ཀྱི་མགོན་པོ་འཁོར་དང་བཅས་པ་ཞེས་བསྒྱུར་བ་དང་། རྒྱས་པར་ནི་མགོན་པོའི་བླ་བརྒྱུད་ཀྱི་མཚན་དང་། མགོན་པོའི་སྔགས་བརྗོད་ཅིང་ན་མོ་བུ་དྡྷ་ཡ། ན་མོ་གུ་རུ་ཧེ། ཞེས་པ་ནས། འདུགས་འདི་ཉིད་དུ་བྱིན་གྱིས་རློབས་ཤིག་ཅེས་པའི་བར་ལན་གསུམ་བརྗོད་ཅིང་གཞན་སྔར་ལྟར་ལ། འོན་ཀྱང་རྒྱས་པ་ལ་སྐྱབས་ཡུལ་དུ་བླ་མ་སངས་རྒྱས་བྱང་སེམས་སོགས་སྤྱན་འདྲེན་ཅིང། བསྡུས་པ་ལ་དགོས་པའི་ངེས་པ་མེད་དོ། དེ་བཞིན་དུ་ལྷ་མོ། རྣམ་སྲས། བེག་ཙེ་སོགས་ཆོས་སྐྱོང་གང་འདོད་པ་དེ་སྤྱན་དྲངས་ནས། རང་རང་གི་སྔགས་དང་མཚན་བརྗོད་ཅིང་བྱིན་རློབ་བྱེད་པ་སོགས་རིགས་འགྲོས་ཀྱིས་བསྒྱུར་རུང་ངོ། །གཞན་ཡང་དམ་པ་ཁ་ཅིག་གི་གསུང་འབུམ་ལས་འཇིགས་བྱེད། ཆོས་རྒྱལ། རྟ་མགྲིན་གསུམ་གྱི་སྒོ་ནས་བཀའ་བསྒོ་བྱེད་ཚུལ་ཞིག་བཤད་པ་འདིར་བཀོད་ན། དང་པོ་འཇིགས་བྱེད་ཀྱི་བཀའ་བསྒོ་ནི། རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པའི་སྐུར་བཞེངས་པར་གྱུར། དེ་ནས། ཧྲིཿཥྚཱིཿས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་སློབ་མ་རྣམས་སམ་སློབ་མའི་སྤྱིར་བོར་སྣ་ཚོགས་པདྨ་དང་ཟླ་བ་དང་ཉི་མའི་གདན་ལ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག ཞལ་དགུ ཕྱག་སོ་བཞི། ཞབས་བཅུ་དྲུག་པ་ཕྱག་མཚན་རྒྱན་ལ་སོགས་པ་ཡོངས་སུ་རྫོགས་པར་གྱུར། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། བསྒོམ་པ་དང་འདྲ་བའི་གཤིན་རྗེ་གཤེད་ཀྱི་ཡེ་ཤེས་པ་སངས་རྒྱས་བྱང་སེམས་ཉན་རང་ཆོས་སྐྱོང་སྲུང་མའི་ཚོགས་གྱིས་བསྐོར་བ་སྤྱན་དྲངས། ཛཿཧཱུཾ་བཾ་ཧོཿདམ་ཚིག་པ་དང་གཉིས་སུ་མེད་པར་གྱུར། ༀ་ཡ་མཱནྟ་ཀ་ཨ་རྒྷཾ་ནས། ཤབྟ་པྲ་ཏཱི་ཙྪ་སྭཱ་ཧཱ། གཟུགས་མཆོག་མཆོག་ཏུ་སོགས་ཀྱིས་བསྟོད་ཅིང་། རྒྱལ་བ་རྡོ་རྗེ་འཆང་ཆེན་པོས་བྱིན་གྱིས་རློབས་ཤིག །ཡེ་ཤེས་ཀྱི་མཁས་འགྲོ་མས་བྱིན་གྱིས་རློབས་ཤིག །ཅེས་པ་ནས། དྲིན་ཅན་རྩ་བའི་བླ་མས་བྱིན་གྱིས་རློབས་ཤིག ། ཕྱོགས་བཅུ་དུས་གསུམ་དཔལ་ལྡན་བླ་མ་དམ་པ་རྣམས་ཀྱིས། ཡི་དམ་དཀྱིལ་འཁོར་ལྷ་ཚོགས་རྣམས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་༴། དཔའ་བོ་དང་དཔའ་མོ་རྣལ་འབྱོར་མ་རྣམས། ཆོས་སྐྱོང་སྲུང་མ་རྣམས་ཀྱིས་བྱིན་གྱིས་རློབས་ཤིག །རྡོ་རྗེ་སློབ་མ་འདི་རྣམས་སམ་བསྲུང་བྱ་འདི་དཔལ་རྡོ་རྗེ་འཇིགས་བྱེད་ཆེན་པོའི་ལྷ་ཚོགས་ལ་གཉེར་དུ་གཏད་པ་ཡིན་པས། སློབ་མ་འདི་རྣམས་སམ་འདི་ལ་ཉིན་མཚན་དུས་དྲུག་ཏུ་གཡེལ་བ་མེད་པར་གཟིགས་ནས་སྟེང་གདོན་གཟའ་དང་རྒྱུ་སྐར། བར་གདོན་བཙན་དང་རྒྱལ་འགོང་། འོག་གདོན་ཀླུ་དང་ས་བདག་ལ་སོགས་པ་གདོན་བགེགས་འབྱུང་པོ་མི་མ་ཡིན་གྱི་གནོད་པ། ས་ཆུ་མེ་རླུང་འཁྲུགས་པ་སོགས་འབྱུང་པོའི་གནོད་པ། རླུང་མཁྲིས་བད་ཀན་འདུས་པ་སོགས་ནང་གི་འབྱུང་བའི་གནོད་པ་ཐམས་ཅད་ལས་སྲུང་བར་མཛོད། སྐྱབས་པར་མཛོད། སྤ་བར་མཛོད། ཚེ་བསོད་རྒྱས་ཤིང་ལུས་སེམས་བདེ་བར་མཛོད། ༀ་ཡ་མཱནྟ་ཀ་ཧཱུཾ་ཕཊ། ༀ་ཧཱུཾཿཥྚཱི་དང་། རྩ་སྔགས་བརྗོད། རྡོ་རྗེ་འཇིགས་བྱེད་འོད་དུ་ཞུ་ནས་སློབ་མའི་སྤྱི་བོ་ནས་ཐིམ་པས་ཡི་དམ་ཀྱི་སྐུ་གསུང་ཐུགས་དང་བསྲུང་བྱའི་སྒོ་གསུམ་དབྱེར་མེད་དུ་གྱུར་པའི་སྤྱི་བོར་ༀ། ནས། ཧཱུཾ་གེས་མཚན་པར་གྱུར་པའི་ཧཱུཾ་ལས་འོད་ཟེར་འཕྲོས། བསྲུང་བྱའི་ཤ་སྐྱི་ལྤགས་མཚམས་ཐམས་ཅད་འོད་ཟེར་ལས་གྲུབ་པའི་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་གཏམས། ཕྱི་ནང་གི་གནོད་པ་གང་གིས་མི་ཚུགས་པའི་སྲུང་བ་ཆེན་པོར་བྱིན་གྱིས་བརླབས་པར་གྱུར། བླ་མ་དཀོན་མཆོག་གསུམ་གྱི་བྱིན་རླབས་དང་། འཇམ་དཔལ་གཤིན་རྗེ་གཤེད་ཀྱི་མཐུ་སྟོབས་ཀྱིས་ནས། གནོད་པ་མ་བྱེད་ཅིང་། རཀྵ་རཀྵ་སྭཱ་ཧཱ། ཞེས་བརྗོད་པར་བཤད། སྤྱིར་འཇིགས་བྱེད་རང་གིས་རང་ལ་བཀའ་བསྒོ་བ་ཅུང་མི་འབྲེལ་བ་ནི་སྔར་བཤད་ཟིན་པ་ལྟར་ཡིན་ཡང་། འདིར་ནི་འཇིགས་བྱེད་ཀྱི་ང་རྒྱལ་གྱིས་བླ་མ་ཡི་དམ་སོགས་ལ་བྱིན་རླབས་ཞུ་བ་དང་། འཇིགས་བྱེད་ཉིད་ལ་སློབ་མའམ་བསྲུང་བྱ་གཏད་ནས་སྲུང་སྐྱོབ་བྱེད་པར་བསྐུལ་ལ་བཀའ་བསྒོ་བའི་ཐ་སྙད་མཛད་པ་ཙམ་ཡིན་པས་མི་འགལ་བར་སེམས་སོ། །གཉིས་པ་ཆོས་རྒྱལ་གྱི་བཀའ་བསྒོ་ནི། རང་འཇིགས་བྱེད་དུ་བསྐྱེད་ནས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། ལྷོ་ཕྱོགས་རིམ་པ་བདུན་གྱི་ས་འོག་ནས་དམ་ཅན་གཤིན་རྗེའི་རྒྱལ་པོ་འཁོར་དང་བཅས་པ་སྐད་ཅིག་གིས་མདུན་གྱི་ནམ་མཁའ་སྦྱན་དྲངས། ༀ་ཀྵ་ལ་རཱུ་པ་ས་པཱ་རི་ཝ་ར་ཨརྒྷ་སོགས་ཀྱིས་མཆོད། འཇམ་དཔལ་བཀའ་ཉན་མས་བསྟོད་ལ །དམ་ཅན་ཆོས་ཀྱི་རྒྱལ་པོ་འཁོར་དང་བཅས་པ་དགོངས་སུ་གསོལ། ཁྱེད་རྣམས་ཀྱིས་རྒྱལ་བ་རྡོ་རྗེ་འཆང་། རྗེ་བཙུན་འཇམ་པའི་དབྱངས། གྲུབ་ཆེན་དཔའ་བོ་རྡོ་རྗེ། ཆོས་ཀྱི་རྒྱལ་པོ་ཙོང་ཁ་བ་ཆེན་པོ་ཡབ་སྲས་ལ་སོགས་པའི་རྩ་བ་རྒྱུད་ཀྱི་བླ་མ་དམ་པ་རྣམས་ཀྱིས་བཀའ་བསྒོས། དམ་ཚིག་གཉེར་དུ་གཏད། རང་གིས་ཁས་བླངས་པ་རྣམས་ཐུགས་ཀྱིས་དགོངས་པར་མཛོད་ལ། བདག་གི་རྡོ་རྗེ་སློབ་མའི་འདི་ཁྱོད་རྣམས་ལ་གཉེར་དུ་གཏད་པ་ཡིན་པས། དེ་ནས་བྱང་ཆུབ་མ་ཐོབ་ཀྱི་བར་དུ་ལུས་དང་གྲིབ་མ་བཞིན་དུ་མི་འབྲལ་བར་ཉིན་གསུམ་གྱི་བྱ་ར། མཚན་གསུམ་གྱི་མེལ་ཚེ་མཛད་ནས་ཕྱི་ནང་གི་བར་ཆད་མི་མཐུན་པའི་ཕྱོགས་ཐམས་ཅད་དང་། ཁྱད་པར་དུ་སྟེང་གདོན་གཟའ་དང་རྒྱུ་སྐར། འོག་གདོན་ཀླུ་དང་ས་བདག བར་གདོན་བཙན་དང་རྒྱལ་འགོང་སོགས་མི་མ་ཡིན་གྱི་གནོད་པ་དང་། འབྱུང་བ་འཁྲུགས་པའི་ནད་དང་གནོད་པ་ཐམས་ཅད་ལས་སྲུང་བར་མཛོད། སྐྱོབ་བར་མཛོད། སྤ་བར་མཛོད། ཚེ་དང་བསོད་ནམས་དཔལ་འབྱོར་སོགས་ལེགས་ཚོགས་ཐམས་ཅད་རྒྱས་པར་མཛོད་ཅིག །ༀ་ཀཱ་ལ་རཱུ་བ་ཧཱུཾ་ཕཊ། ལན་གསུམ་སོགས་བརྗོད་པས། ཐུགས་རྒྱུད་བསྐུལ་བས་ཆོས་ཀྱི་རྒྱལ་པོའི་ཐུགས་ཀ་ནས་འོད་ཟེར་འཕྲོས། བསྲུང་བྱའི་སྐྱེ་བོ་ནས་ཐིམ་པས་ལུས་ཀྱི་ནང་ཐམས་ཅད་ཁྱབ། སྡིག་སྒྲིབ་ནད་གདོན་བར་ཆད་ཐམས་ཅད་སྦྱངས། ཆོས་སྐྱོང་འོད་དུ་ཞུ་ནས་བསྲུང་བྱའི་སྤྱི་བོ་ནས་ཐིམ་པར་གྱུར། འོན་ཀྱང་འཇིག་རྟེན་པའི་ལྷ་འགའ་ཞིག་ལུས་ལ་བསྟིམ་མི་རུང་བས་དཔྱད། བླ་མ་དཀོན་མཆོག་གསུམ་གྱི་བྱིན་རླབས་དང་། །དམ་ཅན་ཆོས་ཀྱི་རྒྱལ་པོའི་མཐུ་སྟོབས་ཀྱིས། །ཞེས་སོགས་བྱའོ། །འདི་ལ་བཀའ་བསྒོའི་དོན་ཚང་ངོ་། །གསུམ་པ་རྟ་མགྲིན་གྱི་བཀའ་བསྒོ་ནི། རང་ཉིད་རྟ་མགྲིན་གསང་སྒྲུབ་སོགས་རྟ་མགྲིན་གང་མོས་སུ་བསྒོམས་ནས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་རང་བཞིན་གྱི་གནས་ནས་དཔལ་རྟ་མགྲིན་གྱི་ལྷ་ཚོགས་མདུན་གྱི་ནམ་མཁར་སྤྱན་དྲངས །ཕྱག་འཚལ་ཕྱི་ནང་མཆོད་ཚོགས་འབུལ། །སྡིག་བཤགས་དགེ་ལ་རྗེས་ཡི་རངས། །ཆོས་འཁོར་བསྐོར་ཞིང་རྟག་བཞུགས་གསོལ། །དགེ་ཀུན་སངས་རྒྱས་ཐོབ་ཕྱིར་བསྔོ། །ཕྱོགས་བཅུ་ན་བཞུགས་པའི་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱིས་བྱིན་ཀྱིས་རློབས་ཤིག །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱིས༴། །སངས་རྒྱས་དང་བྱང་ཆུབ་སེམས་དཔའ་རྣམས། །དཔའ་པོ་དང་རྣལ་འབྱོར་མ་རྣམས༴། །ཆོས་སྐྱོང་སྲུང་མ་ཐམས་ཅད༴། ཁྱད་པར་དུ་ཡང་དཔལ་རྟ་མགྲིན་གྱི་ལྷ་ཚོགས་རྣམས་ཀྱིས་བྱིན་གྱིས་རློབས་ཤིག ཁྱེད་རྣམས་ལ་མཁྱེན་བརྩེ་ནུས་གསུམ་བསམས་གྱིས་མི་ཁྱབ་པ་མངའ་བས། སློབ་མའམ་བསྲུང་བྱའི་དེ་རྗེས་སུ་བཟུང་ནས་ཕྱི་ནང་གི་འགལ་རྐྱེན་བར་ཆད་མི་མཐུན་པའི་ཕྱོགས་ཐམས་ཅད་ལས་སྲུང་བར་མཛོད། སྐྱོབ་བར་མཛོད། སྦ་བར་མཛོད། ཚེ་བསོད་དཔལ་འབྱོར་སྙན་གྲགས་ལ་སོགས་པའི་ལེགས་ཚོགས་ཐམས་ཅད་འཕེལ་ཞིང་རྒྱས་པར་མཛད་དུ་གསོལ། རྟ་མགྲིན་གྱི་སྔགས་ལན་གསུམ་མམ་བདུན་བརྗོད། དཔལ་རྟ་མགྲིན་གྱི་ཐུགས་ཀ་ནས་འོད་ཟེར་གྱི་ཚོགས་འཕྲོས་ནས་བསྲུང་བྱ་ལ་ཕོག་པས་ལུས་ཀྱི་ཕྱི་ནང་ཐམས་ཅད་ཁྱབ། །སྡིག་སྒྲིབ་ནད་གདོན་ཐམས་ཅད་སྦྱངས། །ཤ་སྤྱི་ལྤགས་མཚམས་ཐམས་ཅད་འོད་ཟེར་ལས་གྲུབ་པའི་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་གྱུར་ནས། གདོན་བགེགས་སོགས་གནོད་བྱེད་གང་གིས་ཀྱང་མ་ཚུགས་པའི་སྲུང་བ་ཆེན་པོས་བྱིན་གྱིས་བརླབས། དཔལ་རྟ་མགྲིན་གྱི་ལྷ་ཚོགས་འོད་དུ་ཞུ་ནས་བསྲུང་བྱའི་ལུས་ལ་ཐིམ་པར་གྱུར། བླ་མ་དཀོན་མཆོག་སོགས་དང་། པདྨ་དབང་གི་རྒྱལ་པོའི་མཐུ་སྟོབས་ཀྱིས། ཞེས་པ་ནས། མ་བྱེད་ཅིང། །རཀྵ་རཀྵ་ཡེ་སྭཱ་ཧཱ། ཞེས་བརྗོད་པར་བྱའོ། །འདི་ཡང་རྟ་མགྲིན་ལ་བྱིན་རླབས་ཞུ་ཞིང་གསོལ་གདབ་བྱེད་པ་ལ་བཀའ་བསྒོའི་ཐ་སྙད་བྱས་པ་སྟེ། གཞན་དུ་ན་རྟ་མགྲིན་རང་གིས་རང་ལ་བཀའ་བསྒོ་བ་མི་ལེགས་པ་ནི་སྔར་ལྟར་རོ། །དེ་ལྟ་བུ་ལ་སོགས་པ་བཀའ་བསྒོ་ལ་དངོས་བཏགས་ཡོད་པའི་ཤེས་པར་བྱ་ཞིང་། གཞན་ལ་ཕན་ན་ནི་དངོས་བཏགས་ལ་ཁྱད་པར་ཆེན་པོ་མི་སྣང་ངོ། །ཆོས་སྐྱོང་ལ་བཀའ་བསྒོ་བ་ནི་རང་ཉིད་འཇིགས་བྱེད་ལྟ་བུའི་ཡི་དམ་ཁྱད་པར་ཅན་གྱི་བསྙེན་གྲངས་མཐར་ཕྱིན་པའམ། མིན་ཡང་བསྙེན་པ་དགའ་རབ་སོང་བ་དང་། ལྷའི་ང་རྒྱལ་བརྟན་པོ་མ་བྱུང་ཡང་ཅུང་ཟད་འཛིན་ཤེས་ན་ལེགས་ཀྱི། སྔོན་དུ་བསྙེན་པ་གང་ཡང་མ་བྱས་ཤིང་ལྷའི་ང་རྒྱལ་འཛིན་མི་ཤེས་ན་ནི་ཆོས་སྐྱོང་ལ་བཀའ་བསྒོས་ནས་བསྐུལ་དཀའ་བས། དེ་ལས་ནི་གསོལ་གདབ་བྱིན་རླབས་ཞུ་བའི་བཀའ་བསྒོ་བཏགས་པ་བ་བྱས་ན་ལེགས་པར་སེམས་སོ། །གྲུབ་པ་ཐོབ་པའི་གང་ཟག་གི་བཀའ་བསྒོས་ན་ནད་གདོན་ཆེན་པོ་ཡང་ཞི་ནུས་མོད། དེ་ལྟ་བུ་མིན་པས་ནད་གདོན་ཕྲ་མོ་འགའ་ཞིག་མ་གཏོགས། ཆེན་པོ་ཞི་བར་བྱེད་ནུས་པ་དཀའ་ཡང་དགོས་པ་ཡོད་དོ། །བཀའ་བསྒོ་ཁྱད་པར་ཅན་ལ་ནི་མཁས་པའི་ཡོན་ཏན་ཡོད་ཙམ་གྱིས་མི་ཆོག་གི །ཆོས་སྐྱོང་སོགས་མཐུ་བོ་ཆེ་རྣམས་ལ་བཀའ་བསྒོ་ན་ནི་སྒོམ་བཟླས་ཀྱི་ནུས་པ་ཅུང་ཟད་ཐོན་དགོས་ལ། གསོལ་འདེབས་དང་བྱིན་རླབས་ཞུ་བའི་བཀའ་བསྒོ་བཏགས་པ་བ་ལ་ནི་དད་མོས་ཆེན་པོ་ཡོད་པས་ཀྱང་འགྲུབ་བོ། །དེ་ལྟར་ན་བཀའ་བསྒོ་ལ་བྱེད་ཚུལ་དང་རྒྱས་བསྡུས་མི་འདྲ་བ་མང་དུ་འབྱུང་བར་ཤེས་པར་བྱའོ། །བཀའ་རམ་གསར་བུ་འགའ་ཞིག་དང་། ནད་པ་སོགས་ལའང་ཕན་གདགས་ཕྱིར། བཀའ་བསྒོ་སྤྱི་དང་བྱེ་བྲག་གི །རྒྱས་བསྡུས་རྣམ་གཞག་ཅུང་ཟད་བཤད། ཅེས་པ་འདི་ཡང་། ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་ལག་དལ་ལས་དོན་གཉེར་ཅན་འགའ་རེར་ཕན་འདོད་ཀྱི་བསམ་པས་ཅོ་ནེའི་དགོན་ཉིད་དུ་སྦྱར་བ་སྟེ། པར་གྱི་ཡི་གེ་པ་ནི་རིག་གནས་དུ་མ་ལ་བློ་རྒྱས་པའི་དཀའ་ཆེན་བློ་བཟང་དབང་ཕྱུག་གོ། །།མངྒ་ལཾ།།