འཕགས་པ་འདའ་ཀ་ཡེ་ཤེས་དང་འདུ་ཤེས་བཅུ་གཅིག་བསྟན་པའི་མདོ་གཉིས་ཀྱི་འགྲེལ་བ།

འཕགས་པ་འདའ་ཀ་ཡེ་ཤེས་དང་འདུ་ཤེས་བཅུ་གཅིག་བསྟན་པའི་མདོ་གཉིས་ཀྱི་འགྲེལ་བ་བཞུགས།

ན་མོ་མཉྫུ་གྷོ་ཥཱ་ཡ། གསེར་མངལ་ཅན་དང་མགྲིན་སྔོན་མིག་སྟོང་ལྡན། །པད་དཀར་མིག་དང་པདྨོའི་གཉེན་ལ་སོགས། །སྲིད་ན་དྲེགས་པའི་གྲགས་ལྡན་ཀུན་གྱིས་ཀྱང་། །ཞབས་པད་གཙུག་བསྟེན་ཐུབ་པའི་དབང་བོར་འདུད། །འདིར་སྟོན་པ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་བྱང་ཆུབ་སེམས་དཔའ་དང་། དགེ་སློང་དག་ལ་འཆི་བའི་དུས་སུ་འདུ་ཤེས་བསྒོམ་ཚུལ་གྱི་གཞུང་གཉིས་གསུངས་ཤིང་། དེ་ཡང་འཕགས་པ་འདའ་ཀ་ཡེ་ཤེས་དང་། འདུ་ཤེས་བཅུ་གཅིག་བསྟན་པའི་མདོའོ། །དང་པོ་ནི། གཙོ་ཆེར་བྱང་ཆུབ་སེམས་དཔའི་དབང་དུ་མཛད་ཀྱང་གཞན་གྱིས་ཀྱང་ཉམས་སུ་བླང་བར་བྱ་སྟེ། །དེ་ཡང་འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་འོག་མིན་ལྷའི་རྒྱལ་བོའི་ཁང་བཟང་ན་བཞུགས་ཏེ་འཁོར་ཐམས་ཅད་ལ་ཆོས་སྟོན་པ་དང་ཞེས་པ་ནི་གླེང་གཞིའོ། །དུས་ནི་བཅོམ་ལྡན་འདས་ཡུམ་ཆེན་ལྷར་སྐྱེས་པ་བདེན་པ་ལ་འགོད་པའི་ཆེད་དུ་སུམ་ཅུ་རྩ་གསུམ་གྱི་ལྷའི་གནས་སུ་བྱོན་པའི་ཚེ་ཡིན་པར་འགའ་ཞིག་ལས་བཤད་ཅིང་། གཞུང་འདིས་བསྟན་པའི་འོག་མིན་ནི་གཟུགས་ཁམས་གནས་རིགས་བཅུ་བདུན་ནང་གི་ལྟག་མ་དེའམ། དེའི་གོང་ན་འོག་མིན་སྟུགས་པོ་བཀོད་པ་ཞེས་བྱ་ཞིག་ཡོད་པར་བཤད་པ་དེ་གཉིས་གང་ཡིན་འདིར་མི་གསལ་ཡང་། འདིའི་རྒྱ་འགྲེལ་གཉིས་ཀྱི་གཅིག་ལས། སྟོན་པ་ནི་ལོངས་སྤྱོད་རྫོགས་པའི་སྐུ་དང་། འཁོར་བྱང་ཆུབ་སེམས་དཔའ་འབབ་ཞིག་ཡིན་ཞེས་འབྱུང་བ་ལྟར་ན་ནི་ཕྱི་མར་སྣང་ལ། གཅིག་ལས་ནི་འོག་མིན་སྟུགས་པོ་བཀོད་པར་གསལ་བར་བཤད་དོ། །ཞུ་བ་པོ་ནི་འཕགས་པ་ནམ་མཁའི་སྙིང་པོ་སྟེ། དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དོན་གང་ཞིག་ཇི་ལྟར་ཞུས་པ་ནི། བཅོམ་ལྡན་འདས་ཞེས་བོས་ནས། བྱང་ཆུབ་སེམས་དཔའ་ནམ་འཆི་ཀ་མའི་ཚེ་སེམས་ཇི་ལྟར་བལྟ་བར་བགྱི་ཞེས་སྤྱིར་བསྡུས་ནས་ཞུས་སོ། །ཞུས་པའི་ལན་ལ་བཅོམ་ལྡན་འདས་ཀྱིས་ནམ་མཁའི་སྙིང་བོ་ཞེས་བོས་ནས་བྱང་ཆུབ་སེམས་དཔའ་ནམ་འཆི་བའི་ཚེ། འདའ་ཀ་ཡེ་ཤེས་བསྒོམ་པར་བྱའོ་མིང་གི་སྒོ་ནས་བསྡུས་ཏེ་བསྟན་ནས། དེ་ལ་འདའ་ཀ་ཡེ་ཤེས་ཞེས་བྱ་བ་ནི་ཞེས་སོགས་ཀྱིས་རྒྱས་པར་བཤད་ཅིང་། བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ་ཞེས་སོགས་ཀྱིས་སླར་དོན་བསྡུས་ནས་གསུངས་སོ། །རྒྱས་བཤད་ཀྱི་དོན་ལ་བཞི་སྟེ། ཆོས་ཐམས་ཅད་རང་བཞིན་གྱིས་སྟོང་པར་བསྒོམ་པ། དེ་ལྟ་ནའང་སེམས་ཅན་ཐམས་ཅད་ལ་དམིགས་པའི་སྙིང་རྗེ་ཆེན་པོ་བསྒོམ་པ། འདོད་པའི་དངོས་པོ་ལ་མི་ཆགས་པར་བསྒོམ་པ། སེམས་ཀྱི་རང་བཞིན་ཤེས་པའི་ཡེ་ཤེས་སངས་རྒྱས་འབྱུང་བར་བཤད་པའོ། །དང་པོ་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པས་ན་དངོས་པོ་མེད་པའི་འདུ་ཤེས་བསྒོམ་པར་བྱའོ་ཞེས་པ་སྟེ། འདིའི་དོན་རྒྱས་པར་འཆད་ན་དབུ་མའི་ལུང་དང་རིགས་པས་ཕུང་སོགས་ཀྱི་ཆོས་རྣམས་རང་བཞིན་མེད་པའི་ཚུལ་གཏན་ལ་འབེབ་དགོས་པར་སྣང་ཡང་འདིར་བསྡུས་པ་ཞིག་འཆད་པ་ཡིན་པས་སྣོད་བཅུད་ཀྱི་ཆོས་ཐམས་ཅད་བརྟེན་ནས་འབྱུང་བ་དང་རྟེན་ནས་བཏགས་པ་ཡིན་པའི་ཕྱིར་བཏགས་དོན་བཙལ་ན་མི་རྙེད་པའི་རང་བཞིན་གྱིས་གྲུབ་པས་རྣམ་པར་དག་ལ། དེ་ལྟར་རྣམ་པར་དག་པས་ཆོས་ཐམས་ཅད་བདེན་པར་གྲུབ་པའི་དངོས་པོ་མེད་པར་རྟོགས་པའི་འདུ་ཤེས་ཏེ་ཡེ་ཤེས་རབ་ཏུ་བསྒོམ་པར་བྱའོ་ཞེས་སོ། །མདོར་ན་འདིས་བདེན་པར་གྲུབ་པའི་ཆོས་རྡུལ་ཙམ་ཡང་མེད་པར་བཤད་ནས་སྟོང་ཉིད་བསྒོམ་པར་བསྟན་ཏོ། །དེ་ཡང་སེམས་ལ་སོགས་པ་བརྟེན་ནས་འབྱུང་བའི་ཆོས་རྣམས་གདོད་མ་ནས་རང་བཞིན་གྱིས་མ་སྐྱེས་པའི་སྟོང་བར་བཤད་པ་ཡིན་ཏེ། །མ་དྲོས་པས་ཞུས་པས་མདོ་ལས། །གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་བར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་དང་། འཇུག་པ་ལས། གདོད་ནས་ཞི་ཞིང་སྐྱེ་བྲལ་རང་བཞིན་གྱིས། ཞེས་གསུངས་པ་ལྟར་རོ། །གཉིས་པ་ནི། ཆོས་ཐམས་ཅད་བྱང་ཆུབ་ཀྱི་སེམས་སུ་འདུ་པས་ན་སྙིང་རྗེ་ཆེན་པོའི་འདུ་ཤེས་རབ་ཏུ་བསྒོམ་པར་བྱའོ་ཞེས་པ་སྟེ། སེམས་ལ་སོགས་པའི་ཆོས་རྣམས་སྔར་བཤད་པ་ལྟར་རང་བཞིན་གྱིས་མེད་ཀྱང་། ཐ་སྙད་དུ་བྱ་བྱེད་ཀྱི་རྣམ་གཞག་ཐམས་ཅད་འཐད་པས། བྱང་ཆུབ་སེམས་དཔའ་འཆི་བའི་དུས་ཀྱི་མཚོན་ཏེ། ཐེག་ཆེན་གྱི་དཀར་ཆོས་ཐམས་ཅད་ཀྱི་རྩ་བ་སྙིང་རྗེས་དྲངས་པའི་བྱང་ཆུབ་ཀྱི་སེམས་སུ་འདུ་བ་སྟེ་རག་ལས་པས་སེམས་དེ་བསྐྱེད་པ་དང་། རང་བཞིན་མེད་པར་རྟོགས་པའི་ལྟ་བས་ཟིན་པའི་སྒོ་ནས་སེམས་ཅན་རྣམས་སྡུག་བསྔལ་ཐམས་ཅད་ལས་སྐྱོབ་པར་འདོད་པའི་དམིགས་མེད་ཀྱི་སྙིང་རྗེ་ཆེན་པོའི་འདུ་ཤེས་བསྒོམ་པར་བྱའོ་ཞེས་པ་ནི། སྟོང་ཉིད་སྙིང་རྗེའི་སྙིང་པོ་ཞེས་པ་དེ་བསྒོམ་པར་བཤད་པའོ། །གསུམ་པ་ནི། ཆོས་ཐམས་ཅད་རང་བཞིན་གྱིས་མི་དམིགས་ཤིང་འོད་གསལ་བས་ན་དངོས་པོ་ཅི་ལ་ཡང་མི་ཆགས་པའི་འདུ་ཤེས་བསྒོམས་པར་བྱའོ་ཞེས་པ་སྟེ། སེམས་ལ་སོགས་པ་ཆོས་ཐམས་ཅད་སྔར་བཤད་པ་ལྟར་རང་བཞིན་གྱིས་གྲུབ་པ་རྡུལ་ཙམ་མི་དམིགས་ཤིང་ནམ་མཁའ་གཡའ་དག་པ་ལྟར་སྟོང་སང་འོད་གསལ་བའོ། །དཔེར་ན། ནམ་མཁའ་ཐོགས་བཅས་བཀག་ཙམ་གྱི་སྟོང་ཆ་ལ་འཛག་པ་ལྟར་སེམས་སོགས་ཆོས་ཐམས་ཅད་རང་བཞིན་གྱིས་སྟོང་པ་དེ་དག་དགག་བྱ་རང་བཞིན་གྱིས་གྲུབ་པ་རྣམ་པར་བཅད་ཙམ་ལ་འཇོག་གོ །རྒྱུ་མཚན་དེའི་ཕྱིར་ན་སེམས་དང་ཡོ་བྱད་ལ་སོགས་པའི་ཆོས་ཀྱི་དངོས་པོ་ཅི་ལ་ཡང་བདེན་ཞེན་གྱིས་ཆགས་པའི་འདུ་ཤེས་སྤངས་ནས་ཆགས་མེད་བདེན་སྟོང་གི་འདུ་ཤེས་བསྒོམ་པར་བྱའོ། །འདིར་སྟོང་ཉིད་བསྒོམ་པའི་དབང་དུ་བྱས་ནས་དེ་ལྟར་བཤད་ཀྱི། འདིའི་རྒྱ་འགྲེལ་ཞིག་ཏུ་དངོས་པོ་ཐམས་ཅད་མི་རྟག་པས་ན་ཅི་ལ་ཡང་མི་ཆགས་པའི་འདུ་ཤེས་རབ་ཏུ་བསྒོམ་པར་བྱའོ་ཞེས་འབྱུང་བ་ལྟར་ན་སྤྱིར་འདུས་བྱས་ཐམས་ཅད་མི་རྟག་ཅིང་ཁྱད་པར་དུ་རང་ལ་དབང་དང་རང་གིས་བསགས་པའི་ཡོ་བྱད་ཀྱི་དངོས་པོ་རྣམས་མི་རྟག་ཅིང་འཛད་པའི་ཆོས་ཅན་ཡིན་པའི་ཕྱིར་ཆགས་ཞེན་མི་བྱ་བར་བཤད་པ་ལྟར་ཡང་རུང་སྟེ། འོན་ཀྱང་གཞུང་འདིའི་དངོས་བསྟན་ནི་སྔ་མ་ལྟར་རོ་སྙམ་མོ། །བཞི་པ་ནི། སེམས་རྟོགས་ན་ཡེ་ཤེས་ཡིན་པས་ན་སངས་རྒྱས་གཞན་དུ་མི་བཙལ་བའི་འདུ་ཤེས་བསྒོམ་པར་བྱའོ་ཞེས་པ་སྟེ། སེམས་རྟོགས་ན་ཡེ་ཤེས་ཡིན་པས་ན་ཞེས་པ་འདི་ལ་དོན་འཆད་ཚུལ་མི་འདྲ་བ་འགའ་རེ་མཐོང་སྟེ། སྔ་མ་ཁ་ཅིག་རང་གི་སེམས་ཀྱི་ངོ་བོ་གསལ་ཞིང་རིག་པ་ཙམ་མཐོང་བ་བཤད་པ་དང་། ཁ་ཅིག སེམས་དུས་སྐད་ཅིག་གཉིས་པར་མི་སྡོད་པའི་སྐྱེ་འགག་བྱེད་ཚུལ་མཐོང་བ་ལ་འདོད་པ་དང་། ཁ་ཅིག སེམས་རང་ཡལ་དུ་སོང་བའི་སྟོང་པའི་ངོ་བོ་མཐོང་བ་དང་། ཁ་ཅིག་སེམས་ཁ་དོག་དང་དབྱིབས་སུ་མ་གྲུབ་པར་མཐོང་བ་དང་། ཁ་ཅིག་ཕྱི་རོལ་གྱི་དོན་ནི་མེད་ཀྱི་སྣང་བ་ཐམས་ཅད་སེམས་ཀྱི་བདག་ཉིད་དུ་མཐོང་བར་འདོད་པ་དང་། གཞན་དག་སེམས་རང་བཞིན་གྱིས་སྟོང་པར་མཐོང་བ་ལ་འདོད་པ་སོགས་མང་དུ་སྣང་ཡང་། གཙོ་བོ་ནི་ཕྱི་མ་ལྟར་ཡིན་ཏེ། འདུས་པའི་རྩ་རྒྱུད་ལས། རང་སེམས་གདོད་ནས་མ་སྐྱེས་པ། །སྟོང་བ་ཉིད་ཀྱི་རང་བཞིན་ནོ། །ཞེས་དང་། བརྒྱད་སྟོང་བ་ལས། སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་ནི་འོད་གསལ་བའོ། །ཞེས་པའི་དོན་པཎ་ཆེན་རིན་པོ་ཆེའི་ཕྱག་ཆེན་འགྲེལ་བར། སེམས་ལ་རང་བཞིན་གྱིས་གྲུབ་པའི་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའི་སྟོང་པ་ཉིད་དོ་ཞེས་གསུངས་ཤིང་། དཀོན་མཆོག་བརྩེགས་པ་ལས། འོད་སྲུངས་སེམས་ནི་ཡོངས་སུ་བཙལ་ན་མི་རྙེད་དོ་ཞེས་སོགས་དང་། རྗེ་མར་པས། གཞི་ཆོས་ཉིད་སྐྱེ་བ་མེད་པ་རྟོགས། སེམས་སྟོང་པ་ཉིད་ལ་སྦར་ཟིན་བྱས། ཞེས་སོགས་ལྟ་བུ་མང་ངོ་། །དེ་ལྟ་སེམས་རང་བཞིན་གྱིས་སྟོང་པར་རྟོགས་ནས་དྲི་མ་དག་པའི་སེམས་ཀྱི་རྒྱུན་ལས་འབྲས་བུ་སངས་རྒྱས་ཀྱི་ཡེེ་ཤེས་ཐོབ་པར་འགྱུར་བ་ཡིན་གྱི། རང་གིས་སེམས་ལ་མ་བལྟོས་པར་ཐོབ་རྒྱུའི་སངས་རྒྱས་ཞིག་གཞན་ལས་ལོགས་སུ་བཙལ་ཀྱང་མི་རྙེད་དོ། །དེ་ལྟར་ཡང་ལང་དཀར་གཤེགས་པ་ལས། རྟོག་པ་སྤངས་པའི་སེམས་ཉིད་ནི། །ཡིད་ཀྱི་རྣམ་ཤེས་བཟློག་པ་སྟེ། །ཆོས་རྣམས་ཐམས་ཅད་ཤེས་པའི་ཕྱིར། །སེམས་ནི་སངས་རྒྱས་ཞེས་ངས་འཆད། །ཅེས་གསུངས་ཤིང་། འོག་ཏུ་སེམས་ནི་ཡེ་ཤེས་འབྱུང་བའི་རྒྱུ། །སངས་རྒྱས་གཞན་དུ་མ་འཚོལ་ཅིག །ཅེས་འབྱུང་བ་ལས་གསལ་ལོ། །དེ་ནས་འཇུག་བསྡུ་ནི། བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ་ཞེས་མཚམས་སྦྱར་ནས། སྔར་རྒྱས་པར་བཤད་པའི་དོན་བཞི་བསྡུས་ཏེ་འཆད་པ་ནི། ཆོས་རྣམས་རང་བཞིན་རྣམ་དག་པས། །དངོས་པོ་མེད་པའི་འདུ་ཤེས་བསྒོམ། །བྱང་ཆུབ་སེམས་དང་རབ་ལྡན་པས། །སྙིང་རྗེ་ཆེན་པོའི་འདུ་ཤེས་བསྒོམ། །རང་བཞིན་མི་དམིགས་འོད་གསལ་བས། །དངོས་པོ་ཅི་ལའང་མི་ཆགས་བསྒོམ། །སེམས་ནི་ཡེ་ཤེས་འབྱུང་བའི་རྒྱུ། །སངས་རྒྱས་གཞན་དུ་མ་འཚོལ་ཅིག །ཞེས་གསུངས་ཏེ་དོན་ནི་སྔར་བཤད་པ་ལྟར་རོ། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་བ་དང་། ཞེས་པ་ནས། མངོན་པར་བསྟོད་དོ། །ཞེས་པའི་བར་ཏེ་སླའོ། །ཆོས་བཞི་བོ་འདི་དག་ནི་བྱང་སེམས་ཀྱི་འཆི་བའི་དུས་སུ་བསྒོམས་ན་ལྷག་པར་ཕན་ཆེ་བ་ལ་དགོངས་པ་སྟེ། གཞན་དུ་ན་གསོན་པའི་དུས་ཀྱི་ཉམས་ལེན་གྱི་གཙོ་བོར་སྣང་ངོ་། །འདའ་ཀ་ཡེ་ཤེས་ཞེས་པ་ནི་སྔར་ལྟར་ཆོས་ཐམས་ཅད་རང་བཞིན་མེད་པར་རྟོགས་པའི་ཡེ་ཤེས་ལ་དེའི་ཐ་སྙད་མཛད་པར་བཤད་དོ། །ཡང་ན་འདའ་ཀ་ནི་འཆི་ཁ་མའི་དུས་ཀྱི་ཉམས་སུ་ལེན་རྒྱུའི་ཡེ་ཤེས་སྔར་བཤད་པ་བཞི་བརྗོད་སྦྱར་སྟོན་པ་ལ་བྱའོ། །༈ གཉིས་པ་འདུ་ཤེས་བཅུ་གཅིག་བསྟན་པའི་མདོའི་དོན་འཆད་པ་ལ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་ཀྱི་ཤིང་སཱ་ལ་ཟུང་གི་ཚལ་ར་བ་ན་བཞུགས་ཏེ། ཞེས་པ་ནི་གནས་སྟོན་པ་སྟེ། རྩྭ་མཆོག་གྲོང་དུ་གྱང་ཀྱི་ཀུན་དགའ་ར་བ་ཤིང་སཱ་ལའི་སྡོང་པོ་གཉིས་ཡོད་པའི་ཚལ་ན་བཅོམ་ལྡན་འདས་བཞུགས་ཤིང་མྱ་ངན་ལས་འདའ་བའི་ཚུལ་སྟོན་པར་བཞེད་པའི་དུས་ཀྱི་ཚེ། དགེ་སློང་མང་པོ་འདུས་པ་རྣམས་ལ་བཀའ་སྩལ་པ། དགེ་སློང་དག་ཅེས་བོས་ནས་ཁྱེད་ཅག་རྣམས་གང་ནམ་འཆི་བའི་དུས་ཀྱི་ཚེ་འདུ་ཤེས་བཅུ་གཅིག་པོ་འདི་དག་བསྒོམས་པ་མངོན་དུ་བྱའོ་ཞེས་མདོར་བསྟན་ནས། དེ་ཉིད་རྒྱས་པར་འཆད་པ་ལ་བཅུ་གཅིག་པོ་གང་ཡིན་ཞེ་ན། འདི་ལ་མ་ཆགས་པའི་འདུ་ཤེས་དང་ཞེས་པ་ནས། མྱ་ངན་ལས་འདས་པ་ནི་ཞི་བའོ་སྙམ་པའི་འདུ་ཤེས་མངོན་དུ་བྱའོ། །ཞེས་པའི་བར་གསུངས་ཏེ། དོན་བསྡུས་དེ་བཤད་ན་བཅུ་པོ་འདི་ལ་དང་པོ་ཟང་ཟིང་གི་དངོས་པོ་རྣམས་དང་རང་གི་ཡོ་བྱད་ལམ་ཆགས་པའི་འདུ་ཤེས་དང་། གཉིས་པ་སེམས་ཅན་ཐམས་ཅད་ལ་དམིགས་ནས་དེ་རྣམས་བདེ་བ་དང་ལྡན་པར་གྱུར་ཅིག །ལྡན་ན་ཅི་མ་རུང་། བདེ་བ་དང་ལྡན་པར་བྱའོ་སྙམ་པའི་བྱམས་པ་དང་། གསུམ་པ་གཞན་དང་འཁོན་འཛིན་བྱུང་བ་ཡོད་ན་ནི་འཁོར་དུ་འཛིན་པའི་སེམས་ཐམས་ཅད་ཡོངས་སུ་འདོར་བའི་འདུ་ཤེས་དང་། བཞི་པ་སྔར་མི་དགེ་བ་བཅུ་དང་རྩ་བཞིའི་ལྟུང་བ་བྱུང་སྟེ་ཚུལ་ཁྲིམས་འཆལ་བར་གྱུར་པའི་ཉེས་པ་ཡོད་ན་དེ་ཐམས་ཅད་དཀོན་མཆོག་གི་དྲུང་དུ་བཤགས་པ་དང་བཤགས་པར་བྱའོ་སྙམ་པའི་འདུ་ཤེས་དང་། ལྔ་པ་དགེ་བ་བཅུ་དང་རྩ་བ་བཞི་སྤོང་བ་ལ་སོགས་པའི་སྡོམ་པའི་ཚུལ་ཁྲིམས་ཐམས་ཅད་ད་ལྟ་ཡང་དག་པར་བླངས་ནས་བསྲུང་བར་བྱའོ་སྙམ་པའི་འདུ་ཤེས་དང་། དྲུག་པ་མཚམས་མེད་དང་རྩ་ལྷུང་ལ་སོགས་པ་ཉེས་པ་ཆེ་བ་དག་ལ་ཡང་བའི་འདུ་ཤེས་དང་། བདུན་པ་དགེ་རྩ་ཆུང་ངུ་ཞིག་བྱས་པ་དག་ལའང་འབྲས་བུ་ཆེ་བར་འབྱུང་བའི་འདུ་ཤེས་དང་། བརྒྱད་པ་འཇིག་རྟེན་ཕ་རོལ་དག་ལ་ཅི་ལྟར་འགྱུར་སྙམ་ནས་སྐྲགས་པའི་འཇིགས་པ་མེད་པ་དང་། དགུ་བ་བདག་ལྟ་ཅི་འདུས་བྱས་ཀྱི་ཆོས་ཐམས་ཅད་ཀྱང་འཇིག་པ་འགྱུར་བའི་མི་རྟག་པའོ་སྙམ་པའི་འདུ་ཤེས་དང་། བཅུ་པ་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་ཀྱང་རང་དབང་གིས་གྲུབ་པའི་བདག་མེད་པའོ་སྙམ་པའི་འདུ་ཤེས་དང་། བཅུ་གཅིག་པ་ཉོན་མོངས་སྤངས་པའི་ཐར་བ་མྱ་ངན་ལས་འདས་པའི་གོ་འཕང་ནི་ཉེར་འཚེ་བྲལ་བའི་ཞི་བའོ། །སྙམ་པའི་འདུ་ཤེས་བསྒོམ་པ་མངོན་དུ་བྱའོ་ཞེས་པའོ། །གོང་དུ་འཆི་བའི་དུས་སུ་ཉེས་པ་ཆེན་པོ་ལ་ཆུང་བ་དང་ཡང་བའི་འདུ་ཤེས་དང་། དགེ་རྩ་ཆུང་ངུ་ལའང་ཆེ་བའི་འདུ་ཤེས་འཇོག་པར་གསུངས་པ་འདི་ལྟ་བུ་རང་ཅག་གིས་ཇི་ལྟ་བ་བཞིན་ཤེས་དཀའ་ཡང་། སངས་རྒྱས་ཀྱི་མཁྱེན་པ་ཚད་མར་བྱེད་དགོས་པས་གནད་ཆེ་བར་ཟུངས་ཤིག །འདི་རྣམས་དགེ་སློང་དུ་མ་ཟད་གང་ཟག་གཞན་གྱིས་ཀྱང་འཆི་བའི་དུས་སམ། དེའི་སྔོན་ནས་ཀྱང་ཉམས་སུ་བླང་ན་ཕན་ཡོན་ཤིན་ཏུ་ཆེ་སྟེ། བཅུ་པོ་འདིའི་ནང་དུ་ཐེག་པ་ཆེ་ཆུང་གཉིས་ཀྱི་ལམ་གྱི་སྙིང་པོའམ་གནད་མང་པོ་ཞིག་འདུས་པའི་ཕྱིར་རོ། །འདི་དག་ནི་འཆི་བའི་དུས་ཀྱི་གདམས་ངག་ཏུ་བཅོམ་ལྡན་འདས་ཀྱིས་གསུངས་པས་དེའི་ཚེ་དྲན་དགོས་ལ། འདི་ནང་གི་བྱམས་པ་བསྒོམ་པ་དང་། ཉེས་པ་བཤགས་པ་དང་། འདུས་བྱས་ཐམས་ཅད་མི་རྟག་པར་ལྟ་བ་དང་། ཆོས་ཐམས་ཅད་བདག་མེད་པར་ལྟ་བ་དང་། མྱ་ངན་ལས་འདས་པ་ཞི་བར་ལྟ་བ་རྣམས་ནི་དུས་རྒྱུན་ཏུ་བསྒོམ་དགོས་པའོ། །རྒྱལ་བས་བྱང་ཆུབ་སེམས་དཔའ་དང་། །དགེ་སློང་དག་ལ་འཆི་བའི་ཚེ། །ཉེར་མཁོ་ཕན་པའི་གདམས་ངག་མཆོག །དམ་ཆོས་སྙིང་པོ་འདི་གཉིས་བསྟན། །ཚུལ་འདི་མན་ངག་སྙིང་པོ་རུ། །མཐོང་བའི་དད་པས་ཡིད་དྲངས་ཏེ། །དགོངས་དོན་འགྲེལ་བ་ཉུང་ངུ་ཟུང་། །བཤད་སྒྲུབ་བདག་གིས་དད་པས་སྦྱར། །དེ་ལས་བྱུང་བའི་རྣམ་དཀར་དགེས། །ནམ་ཞིག་འཆི་འཕོའི་དུས་ཀྱི་ཚེ། །ལམ་བཟང་འདི་རྣམས་དྲན་བཞིན་དུ། །ཤི་འཕོས་དག་ཞིང་སྐྱེ་བ་དང་། མྱུར་དུ་སངས་རྒྱས་ཐོབ་གྱུར་ཅིག །ཅེས་པའི་བར་གྱི་ཡི་གེ་པ་ནི། དད་སྟོབས་ཕུན་སུམ་ཚོགས་པའི་དགེ་སློང་བློ་གྲོས་ཀུན་དགའ་འོ། །།།ཤུབཾ