རྟེན་འབྲེལ་བསྟོད་པའི་རྣམ་བཤད་རྟག་ཆད་ཀྱི་ཚ་གདུང་རྣམ་པར་སེལ་བར་བྱེད་པ་བླ་མའི་དགོངས་དོན་གསལ་བའི་ཟླ་བ།

རྟེན་འབྲེལ་བསྟོད་པའི་རྣམ་བཤད་རྟག་ཆད་ཀྱི་ཚ་གདུང་རྣམ་པར་སེལ་བར་བྱེད་པ་བླ་མའི་དགོངས་དོན་གསལ་བའི་ཟླ་བ་ཞེས་བྱ་བ་བཞུགས།

ན་མོ་གུ་རུ་མཉྫུ་གྷོ་ཥཱ་ཡ། ཚོགས་གཉིས་ས་འཛིན་མཐོན་པོའི་རྩེར་གནས་མཁྱེན་དང་བརྩེ་པའི་ལུས་སྟོབས་རྒྱས། །ཕུང་བྱུང་སྟོབས་བཅུ་མི་འཇིགས་རྣམ་བཞིའི་མཆེ་སྡེར་མི་བཟད་རབ་ཏུ་འབར། །ཆོས་ཀུན་གདོད་ནས་རང་བཞིན་སྟོང་པའི་རྟེན་འབྲེལ་ང་རོ་ཆེར་སྒྲོགས་པ། །ཟླ་མེད་སྟོན་པ་སྨྲ་བའི་སེང་གེའི་ཞབས་པད་བྱང་ཆུབ་བར་དུ་མཆོད། །ཆོས་དབྱིངས་ཆུ་གཏེར་འཇིང་ལ་རྟག་རོལ་ཞིང་། །རྟེན་འབྱུང་ཕུད་སྒྲ་དྲག་པོ་ཀུན་ནས་འབྱིན། །བླ་མེད་གདེངས་ཀ་མཆོག་གིས་ཉེར་མཛེས་པ། །ནཱ་གཱརྫུན་ཀླུ་ཡི་དབང་པོར་འདུད། །ཐབས་ཤེས་ཟུང་དུ་འབྲེལ་བའི་རླུང་ཤུགས་ཀྱིས། །བྱང་ཆུབ་སྤྱོད་པའི་མཁའ་ལ་རྣམ་པར་རྩེན། །ཐུབ་བསྟན་གླིང་བཞི་གསལ་མཛད་པདྨོའི་གཉེན། །ཀུན་མཁྱེན་ཙོང་ཁ་པ་ཡིས་དགེ་ལེགས་སྩོལ། །མགོན་དེའི་ཐུགས་གསང་ཤར་རིའི་རྩེ་མོ་ནས། །ལེགས་འཐོན་རྟེན་འབྲེལ་བསྟོད་ཚིག་འོད་དཀར་ཅན། །རྟག་ཆད་ལྟ་པའི་ཚ་གདུང་སེལ་བྱེད་འདིའི། །དགོངས་དོན་སྣང་བརྙན་རྣམ་བཤད་རྫིང་འདིར་གསལ། །དེ་ལ་འདིར་རྗེ་ཉིད་ཀྱིས་མཛད་པ་རྟེན་འབྲེལ་ལེགས་པར་བཤད་པའི་སྙིང་པོའི་ཚིག་དོན་ནི་གང་བཤད་པར་བྱ་བའི་ཆོས་སོ། །འདི་འཆད་པ་ལ་གཉིས། ཐུབ་པའི་དབང་པོ་ལ་རྟེན་འབྲེལ་གསུངས་པའི་སྒོ་ནས་བསྟོད་པ། རྩོམ་པའི་རྒྱུ་མཚན་དང་བསྔོ་བའོ། །དང་པོ་ལ་གསུམ། མཆོད་བརྗོད་ཀྱི་སྒོ་ནས་མདོར་བསྟན་པ། རྒྱས་པར་བཤད་པ། དོན་བསྡུ་བའོ།། དང་པོ་ནི། གང་ཞིག་གཟིགས་ཤིང་ཞེས་སོགས་ཤོ་ལོ་ཀ་གཅིག་གིས་སྟོན་ཏེ། དོན་ནི་རྟེན་འབྲེལ་གང་ཞིག་ཇི་ལྟ་བ་བཞིན་མངོན་སུམ་དུ་གཟིགས་ཤིང་། རང་གིས་ཇི་ལྟར་གཟིགས་པ་བཞིན་གསུངས་པ་ཡི་སྒོ་ནས། རིམ་པ་བཞིན་དུ་མཁྱེན་པ་བླ་ན་མེད་པ་དང་། སྟོན་པ་བླ་ན་མེད་པར་བཞག་ཅིང་། དེ་ལྟར་བཞག་པའི་རྒྱལ་བ་རྟེན་ཅིང་འབྲེལ་བར་འབྱུང་བ། གཟིགས་ཤིང་འདོམས་པ་དེ་ལ་གུས་པས་འདུད་དོ། །ཞེས་པ་སྟེ། རྐང་པ་དང་པོ་གཉིས་ཀྱིས་ཡོན་ཏན་དེ་དང་ལྡན་པའི་བསྟོད་ཡུལ་ངོས་བཟུང་ནས། ཕྱི་མ་གཉིས་ཀྱིས་ཡོན་ཏན་དེ་ལྡན་གྱི་སྟོན་པ་ལ་བསྟོད་པའོ། །གཉིས་པ་རྒྱས་པར་བཤད་པ་ལ་གཉིས། བསྟོད་པའི་རྒྱུ་མཚན་དང་། བསྟོད་པ་དངོས་སོ། །དང་པོ་ལ་གཉིས། རྟེན་འབྲེལ་ཤེས་པ་བསྟན་པའི་སྙིང་པོར་བསྟན་པ། རྟེན་འབྲེལ་གྱི་སྒོ་ནས་བསྟོད་པར་བསྔགས་པའོ། །དང་པོ་ནི། འཇིག་རྟེན་རྒུད་པ་སོགས་ཚིགས་སུ་བཅད་པ་གཉིས་གསུངས་ཏེ། དོན་ནི། འཇིག་རྟེན་ན་སྐྱེ་རྒ་ན་འཆི་སོགས་ཀྱི་རྒྱུ་ཆགས་སོགས་ཀྱི་རྒུད་པ་ཇི་སྙེད་ཡོད་པ། དེ་ཡི་རྩ་བ་མཐར་ཐུག་པ་ནི། ཆོས་དང་གང་ཟག་རང་བཞིན་གྱིས་གྲུབ་པར་འཛིན་པའི་བདེན་འཛིན་གྱི་མ་རིག་པ་ཡིན་པར་བཞག་སྟེ། རྟེན་འབྲེལ་གྱི་ཆོས་ཉིད་ཟབ་མོ་གང་ཞིག་མངོན་སུམ་དུ་མཐོང་བའི་སྟེ་རྟོགས་པས་མ་རིག་པ་དེ་ལྡོག་པར་འགྱུར་བས་ན། མ་རིགས་པ་དེ་སྤོང་བའི་ཐབས་སུ་རྒྱལ་བས་རྟེན་ཅིང་འབྲེལ་བར་འབྱུང་བ་གསུངས་པའོ། །འདིར་མ་རིག་པ་ནི། ང་དང་ང་ཡིའོ་སྙམ་པ་སོགས་གང་ཟག་དང་ཆོས་རང་བཞིན་གྱིས་གྲུབ་པར་འཛིན་པའི་བདག་འཛིན་ཞིག་ལ་འཇོག་ཅིང་དེ་འདྲ་བའི་མ་རིག་པ་དེ་ཉོན་མོངས་གཞན་རྣམས་ཀྱི་རྩ་བ་ཡིན་ཏེ། དབུ་མ་འཇུག་པ་ལ ས། ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་ཞེས་དང་། རྣམ་འགྲེལ་ལས། གཏི་མུག་ཉེས་པའི་རྩ་བ་སྟེ། །ཞེས་གསུངས་པའི་ཕྱིར་རོ། །སྤྱིར་མ་རིག་པ་ལ་ནི། ལས་འབྲས་ལ་རྨོངས་པའི་མ་རིག་པ་དང་། དེ་ཁོ་ན་ཉིད་ལ་རྨོངས་པའི་མ་རིག་པ་གཉིས་གསུངས་པའི་འདིར་ནི་ཕྱི་མ་ཡིན་ལ། དེ་ལའང་ཕྲ་རགས་གཉིས་ལས་ཕྲ་བ་ཡིན་ནོ། །མི་ཤེས་པ་ཁ་ཅིག་ཕྱི་ནང་གི་དངོས་པོ་ལ་ཆགས་པའི་སེར་སྣ་ལ་བདག་འཛིན་དུ་འདོད་པ་ནི་ཆེར་འཁྲུལ་ཏེ། དེ་ལ་བདག་འཛིན་དུ་ཐེག་པ་ཆེ་ཆུང་གི་ཚད་ལྡན་གྱི་གཞུང་གང་ལས་ཀྱང་མ་བཤད་པའི་ཕྱིར། རྐང་པ་ཕྱི་མར་འབྱུང་བར་གསུངས་ཞེས་པའང་ཡོད་དེ། རྟེན་འབྲེལ་ལ་ཐུན་མོང་བ་དང་། ཐུན་མོང་མ་ཡིན་པ་གཉིས་ལས། རང་གི་ཆ་ཤས་ལ་བརྟེན་ནས་གྲུབ་པ་ནི། ཐུན་མོང་བའི་རྟེན་འབྲེལ་གྱི་དོན་དང་། མིང་བརྡ་འམ་རྟོག་པ་ཙམ་གྱིས་བཞག་པའི་ལྟོས་གྲུབ་ནི། ཐུན་མོང་མ་ཡིན་པའི་རྟེན་འབྲེལ་གྱི་དོན་ཏེ་འདི་ལ་གྲུབ་མཐའི་འདོད་ཚུལ་གྱིས་ཕྱེ་ན་མང་ངོ་། རྟེན་འབྲེལ་གྱི་དོན་མཐོང་བས་ཆགས་སོགས་ལྡོག་པར་འགྱུར་པ་ཡིན་ཏེ། མགོན་པོ་ཀླུ་སྒྲུབ་ཀྱིས་རྩ་བ་ཤེས་རབ་ལས། མ་རིག་འགག་པར་འགྱུར་བ་ནི། །ཤེས་པས་དེ་ཉིད་བསྒོམ་པའོ། །ཞེས་དང་། ཟླ་བས་དབུ་མ་འཇུག་པར་ཡང་། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲ་བ་མཐའ་དག་གཅོད་པར་བྱེད། །ཅེས་གསུངས་པས་སོ། རྒྱུ་མཚན་དེ་ལྟར་ཡིན་པ་དེའི་ཚེ་ན། བློ་གྲོས་དང་ལྡན་པའི་མཁས་པ་ཡིས། རྟེན་ཅིང་འབྲེལ་བར་འབྱུང་བའི་དོན་རྟོགས་པའི་ལམ་དེ་ཉིད། མགོན་པོ་ཁྱོད་ཀྱི་བསྟན་པའི་གནད་དམ་སྙིང་པོ་མཐར་ཐུག་པ་ཉིད་དུ་ཚུལ་ཇི་ལྟ་བུར་ཁོང་དུ་ཆུད་པར་མི་འགྱུར་ཏེ། བསྟན་པའི་སྙིང་པོར་ཁོང་དུ་ཆུད་པར་འགྱུར་རོ། །དེ་ཡང་གོ་བདེ་བར་བྱས་ན། ཁ་ཅིག་ཤེས་སླ་བ་ཞིག་ལ་དེ་ཅིའི་ཆེད་ལ་མི་ཤེས་ཞེས་མ་ཡིན་དགག་བརྗོད་ནས་ཟློག་དོན་ལ་ཤེས་པར་འཕངས་པ་བཞིན་ཏེ། དེ་འདྲ་གཞན་ལའང་སྦྱར་བར་བྱའོ། །ཐུན་མོང་དང་ཐུན་མོང་མ་ཡིན་པའི་རྟེན་འབྲེལ་རྟོགས་པའི་ལམ་དེ་བསྟན་པའི་སྙིང་པོ་ཡིན་ཏེ། བཤེས་སྤྲིང་ལས། རྟེན་ཅིང་འབྲེལ་བར་འབྱུང་འདི་རྒྱལ་བ་ཡི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །ཞེས་གསུངས་པའི་ཕྱིར་རོ། །གཉིས་པ་ནི། མགོན་པོ་ཁྱེད་ལ་རྟེན་འབྲེལ་གསུངས་པའི་སྒོ་ནས་བསྟོད་རིགས་པའི་རྒྱུ་མཚན་གོང་དུ་བརྗོད་པ་དེ་ལྟ་ལགས་པ་སྟེ་ཡིན་ན། མགོན་པོ་ཁྱོད་ལ་བསྟོད་པའི་སྒོར་ཏེ་བསྟོད་པའི་གནས་སམ་ཐབས་ནི་མཁས་པ་སུ་ཞིག་གིས་བརྟེན་ནས་འབྱུང་བ་གསུང་བ་ལས་གཞན་དུ་ངོ་མཚར་ཆེ་བར་གྱུར་པ་ཅི་ཞིག་རྙེད་དེ་རྙེད་པར་མི་ནུས་སོ། །དེ་ཡང་རྟེན་འབྲེལ་གསུངས་པའི་སྒོ་ནས་བསྟོད་པ་ནི་བསྟོད་པ་གཞན་ལས་ཁྱད་པར་དུ་འཕགས་པའི་དོན་ཏེ། དེ་ལ་དགོངས་ནས། འཕགས་པས་རྩ་ཤེའི་མཆོད་བརྗོད་དུ། གང་གིས་རྟེན་ཅིང་ཞེས་སོགས་དང་། རིགས་པ་དྲུག་ཅུ་པར། གང་གིས་སྐྱེ་དང་། ཞེས་སོགས་ཀྱིས་སྟོན་པ་ལ་རྟེན་འབྲེལ་གསུངས་པའི་སྒོ་ནས་བསྟོད་པ་ཡིན་ནོ། །གཉིས་པ་བསྟོད་པ་དངོས་ལ་གཉིས། སྤྱིར་བསྟོད་པ་དང་། བྱེ་བྲག་ཏུ་བསྟོད་པའོ། །དང་པོ་ལ་གསུམ། སྟོན་པ་ཉིད་སྨྲ་བ་གཞན་ལས་ཁྱད་པར་ཞུགས་པར་བསྔགས་པ། རྟེན་འབྲེལ་གཟིགས་ཤིང་གསུངས་ཚུལ། དོན་བསྡུས་ཏེ་བསྟན་པའོ། །དང་པོ་ལ་གསུམ། རྟེན་འབྲེལ་གསུང་བ་ལེགས་འདོམས་ཀྱི་མཆོག་ཏུ་བསྟན་པ། དེ་ཉིད་སྤྲོས་པ་གཅོད་བྱེད་དུ་བསྟན་པ། རྟེན་འབྲེལ་སྟོན་པ་ཉིད་མཆོག་ཏུ་བསྔགས་པའོ། །དང་པོ་ནི། གང་གང་རྐྱེན་ལ་ཞེས་སོགས་རྐང་པ་བཞིས་སྟོན་ཏེ། སྟོན་པ་ཁྱོད་ཀྱི་ཞལ་ནས་ཆོས་གང་དང་གང་རང་གི་རྒྱུ་རྐྱེན་ལ་རག་ལས་པ་སྟེ་ལྟོས་ནས་འབྱུང་བ་གང་ཡིན་པ་དེ་དང་དེ་རང་བཞིན་གྱིས་གྲུབ་པས་སྟོང་ངོ་ཞེས་འཁོར་དབུས་གསུངས་པ་འདི་ལས་ལྷག་པར་ཡ་མཚན་པ་སྟེ་ངོ་མཚར་རྨད་དུ་བྱུང་པའི་ལེགས་འདོམས་ཀྱི་ཚུལ་ནི་གཞན་ཅི་ཞིག་ཡོད་དེ་མེད་དོ། །དེ་ནི་རང་བཞིན་གྱིས་སྟོང་བའི་སྟོང་ཉིད་སྟོན་པའི་གསུང་རབ་རྣམས་གསུང་རབ་གཞན་ལས་ཁྱད་པར་དུ་འཕགས་པར་སྟོན་པའོ། །ངོ་མཚར་དང་ཡ་མཚན་གྱི་སྒྲ། སྤྱིར་བསྔགས་པ་དང་སྨད་པ་སོགས་ལ་འཇུག་པ་ཡོད་ཀྱང་འདི་ནི་དང་པོའི་དབང་དུ་བྱས་པའོ། །བསྟོད་པ་འདི་ནི། མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལས་རག་ལས་གང་དེ་སྟོང་པར་བཤད། །གང་ཞིག་སྟོང་ཉིད་ཤེས་དེ་བག་ཡོད་ཡིན། །ཞེས་གསུངས་པའི་དགོངས་པའོ། །གཉིས་པ་ནི། གང་དུ་བཟུང་སོགས་ཚིགས་བཅད་གཅིག་གིས་སྟོན་ཏེ། དོན་ནི་རྒྱུ་ལས་འབྲས་བུ་འབྱུང་བར་མཐོང་པའི་ཚུལ་གྱིས་རྟེན་འབྲེལ་གང་དུ་བཟུང་བས་རྒྱུ་འབྲས་ལ་བདེན་གྲུབ་ཏུ་ཞེན་པའི་གྲུབ་མཐའ་ལ་མ་ཞུགས་པ་དང་ཞུགས་པའི་བྱེ་བྲག་ཏུ་སྨྲ་བ་སོགས་བྱིས་པ་དངོས་སྨྲ་བ་རྣམས་ནི། རྟག་པའི་མཐར་འཛིན་གྱི་འཆིང་བ་རང་རྒྱུད་ལ་གོམས་པ་ཤིན་ཏུ་བརྟན་པར་བྱེད་པའི་གནས་རྟེན་འབྲེལ་དེ་ནི་མཁས་པ་དབུ་མ་པ་རྣམས་ལ་མཐར་འཛིན་གྱི་སྤྲོས་པ་ཡི་དྲ་བ་མ་ལུས་པ་གཅོད་པའི་སྒོ་སྟེ་ཐབས་དམ་པ་ཡིན་ནོ། །སྤྲོས་པའི་ཐ་སྙད་ནི། སྤྱིར་ཀུན་རྫོབ་ཀྱི་སྤྲོས་པ། བདེན་གྲུབ་ཀྱི་སྤྲོས་པ། ཀུན་རྟོག་གི་སྤྲོས་པ་ཞེས་སོགས་ཡོད་ཀྱང་། འདིར་ཀུན་རྟོག་གྱི་སྤྲོས་པའོ། །དྲ་བ་ལ་དཔེའི་དྲ་བ་ནི་རྩ་སོགས་སྤར་སྤུར་འཆིང་བྱེད་ཀྱི་དྲ་བ་ལྟ་བུ་ཡིན་ལ། སྐབས་འདིར་བསྟན་པའི་བདེན་འཛིན་དེ་དྲ་བ་དང་འདྲ་ཆོས་སུ་དོན་གྱིས་བསྟན་ཏོ། །འོ་ན་དངོས་སྨྲ་བའི་མཁས་པ་དེ་དག་ཀྱང་བྱིས་པ་ཡིན་ནམ། མིན་ན་འདིར་བྱིས་པ་རྣམས་ཞེས་པ་ནི་མ་འབྲེལ་བར་འགྱུར་ལ། ཡིན་ན་སློབ་དཔོན་དབྱིག་གཉེན། ཕྱོགས་གླང་། ཆོས་གྲགས་སོགས་ཀྱང་བྱིས་པར་ཐལ་བར་འགྱུར་རོ། །ཞེ་ན་སྐྱོན་མེད་དེ། དེ་དག་ནི་འདིའི་དངོས་བསྟན་གྱི་བྱིས་པར་འདོད་དམ་མི་འདོད་ཇི་ལྟར་ཡང་། སྤྱིར་བྱིས་པ་ག་ལ་ཡིན། འོན་ཀྱང་མཁས་པ་དབུ་མ་པ་རྣམས་ལ་ལྟོས་ནས་རང་བཞིན་ཀྱིས་སྟོང་པའི་དོན་ཤེས་མི་ནུས་པའི་དངོས་སྨྲ་བ་རྣམས་བྱིས་པ་དང་ཆོས་མཚུངས་སུ་འཇོག་ཏུ་ཡོད་པ་ལ་དགོངས་སོ། །བསྡུ་ན་དངོས་སྨྲ་བས་རྒྱུ་ལས་འབྲས་བུ་འབྱུང་བར་བསམས་ནས་བདེན་གྲུབ་ཏུ་འཛིན་ལ། དབུ་མ་པས་ནི་རྒྱུ་ལ་འབྲས་བུ་ལྟོས་ནས་གྲུབ་ཅིང་འབྱུང་གི་མ་ལྟོས་པར་མི་འབྱུང་བའི་རྒྱུ་མཚན་གྱིས་དེ་རྣམས་རང་བཞིན་གྱིས་མ་གྲུབ་པར་བཞེད་པ་སྟེ། དེའི་རྩ་བ་ཤེས་རབ་ལས། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཞེད། །ཅེས་གསུངས་པའི་ཕྱིར་རོ། །དེ་ཡང་ཆ་ཤས་ཕན་ཚུན་བལྟོས་ནས་གྲུབ་པའི་རྟེན་འབྲེལ་གང་ཡིན་པ་དེ་ནི། གཞན་གྱི་དབང་གིས་གྲུབ་པར་ཡིན་གྱི་རང་དབང་གིས་མ་གྲུབ་སྟེ་དེའི་ཕྱིར་རང་བཞིན་གྱིས་སྟོང་ཞེས་པའི་དོན་ཡིན་ཏེ། བཞི་བརྒྱ་བ་ལས། འདི་ཀུན་རང་དབང་མེད་པ་སྟེ། །དེས་ན་བདག་ནི་ཡོད་མ་ཡིན། །ཞེས་གསུངས་པ་བཞིན་ནོ། །གསུམ་པ་ནི་བསྟན་འདི་སོགས་ཚིགས་བཅད་གཉིས་གསུངས་ཏེ། དེ་ལྟར་རང་བཞིན་གྱིས་སྟོང་པ་གསུངས་པའི་བསྟན་པ་བླ་ན་མེད་པའི་ཚུལ་འདི་ནི། ཐུབ་པ་ཁྱོད་ཀྱི་ལུགས་ཡིན་གྱི། དེ་ལས་གཞན་དུ་མུ་སྟེགས་བྱེད་ཀྱི་ལུགས་ལས་མ་མཐོང་བས་ན། རྒྱུ་མཚན་དེ་ཉིད་ཀྱི་སྒོ་ནས་སྟོན་པ་ཞེས་བྱ་བའི་སྒྲ་ནི་ཁྱོད་ཉིད་ལ་དངོས་མིང་དུ་འཇུག་པར་བྱེད་དེ། གཞན་ཝ་སྐྱེས་ཏེ་ཝ་ལ་ནི་སེང་གེ་ཞེས་པའི་སྒྲ་བཏགས་ནས་བརྗོད་པ་བཞིན་དུ། མུ་སྟེགས་ཅན་སེར་སྐྱ་དང་། རྐང་མིག་དང་། གཟེག་ཟན་སོགས་ཕྱི་རོལ་པའི་སྟོན་པ་དེ་དག་ལའང་རང་གི་རྗེས་འབྲང་རྣམས་ཀྱིས་སྟོན་པ་ཞེས་བརྗོད་པར་བྱེད་ཀྱང་དེ་ནི་གཅམ་པུའི་ཚིག་སྟེ་དོན་དང་མི་མཐུན་པའི་ངོ་བསྟོད་ཀྱིས་བརྗོད་པ་ཡིན་ནོ། །འང་ཞེས་པ་ནི་ཁྱོད་ལ་སྟོན་པ་ཟེར་པ་ཙམ་དུ་མ་ཟད། ཅིག་ཤོས་ལ་ཡང་སྟོན་པའི་སྒྲས་བརྗོད་པ་ཡོད་ཅེས་པའོ། །རྒྱུ་མཚན་དེས་ན་གོའུ་ཏ་མ་ཁྱོད་ཉིད་སྟོན་པ་དང་། སྐྱབས་དང་། སྨྲ་མཆོག་དང་། མགོ ན་བླ་ན་མེད་པ་ཡིན་གྱི། གཞན་ནི་དེ་ལྟར་མ་ཡིན་པའི་ཕྱིར་ན། རྟེན་ཅིང་འབྲེལ་བར་འབྱུང་བ་ལེགས་པར་གསུང་པའི་སྟོན་པ་དེ་ལ་བདག་ཕྱག་འཚལ་ལོ། །ཞེས་པའོ། །ཨེ་མའོ་ཞེས་པ་བཞི་ནི་ངོ་མཚར་རྨད་དུ་བྱུང་བའི་བསྔགས་ཚིག་གོ །གཉིས་པ་ལ་གསུམ། རང་བཞིན་གྱིས་སྟོང་པ་རྟེན་འབྱུང་གི་དོན་དུ་གསུངས་ཚུལ། དེ་མ་རྟོགས་ན་བསྟན་པའི་སྙིང་པོ་མི་རྟོགས་པར་བསྟན་པ། རྟོགས་ན་སྟོན་པ་ལ་ཚད་མས་དྲངས་པའི་དད་པ་ཁྱད་པར་ཅན་སྐྱེ་བར་བསྟན་པའོ། །དང་པོ་ལ་གཉིས། རྒྱས་པར་བཤད་པ་དང་། བསྡུས་ཏེ་བསྔགས་པའོ། །དང་པོ་ལ་གཉིས། རང་བཞིན་གྱིས་སྟོང་པ་རྟེན་འབྱུང་གི་དོན་དུ་མི་འདོད་པ་ཐུབ་པའི་བཞེད་པ་མ་ཡིན་པར་བསྟན་པ། སྟོང་པ་རྟེན་འབྲེལ་གྱི་དོན་དུ་འདོད་པ་ཐུབ་པའི་བཞེད་པར་བསྒྲུབས་པའོ། །ཚིག་ཚོགས་སྤོང་པའི་ཆེད་རྩ་བ་མ་དྲངས་པར་བཤད་ན། དང་པོའི་དོན་ནི། གཞན་ལ་ཕན་པར་མཛད་པ་ཁྱོད་ཀྱིས་གདུལ་བྱའི་འགྲོ་བ་ལ། སྨན་པ་སྟེ་ཕན་པའི་སླད་དུ་བཀའ་སྩལ་པའི་བསྟན་པའི་སྙིང་པོ་ནི་ཆོས་རྣམས་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་བསྟན་པ་དེ་ཉིད་ཡིན་ལ། སྟོང་ཉིད་དེ་ངེས་པར་བྱེད་པའི་རྒྱུ་མཚན་ཏེ་ཐབས་འགྲན་པའི་ཟླ་མེད་པ་ནི། རྟེན་ཅིང་འབྲེལ་བར་འབྱུང་པའི་རྟགས་ཀྱི་ཚུལ་འདི་ཉིད་ཡིན་ནོ། །འོན་ཀྱང་མྱུ་གུ་ཆོས་ཅན། བདེན་པར་མེད་དེ། རྟེན་འབྲེལ་ཡིན་པའི་ཕྱིར་ཞེས་པའི་རྟགས་སྦྱོར་ལ། ཁྱབ་པ་མེད་ཅེས་ཁྱབ་པ་འགལ་བའི་ལན་འདེབས་པའི་དངོས་སྨྲ་བ་དང་ནི་རྟགས་མ་གྲུབ་པར་མཐོང་བ་སྟེ་འདོད་པའི་ལན་འདེབས་པའི་མུ་སྟེགས་བྱེད་འདི་ཡིས་ནི་སྟོན་པ་ཁྱོད་ཀྱི་ལུགས་བླ་ན་མེད་པ་རྟེན་འབྱུང་གི་དོན་ཇི་ལྟར་ཁོང་དུ་ཆུད་པར་ནུས་ཏེ་ཁོང་དུ་ཆུད་མི་ནུས་སོ། །གཉིས་པ་ལ་གསུམ། རང་བཞིན་གྱིས་སྟོང་པ་ལ་བྱ་བྱེད་ཐམས་ཅད་འཐད་ཅིང་གཞན་དུ་མི་འཐད་པ། རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་གྱིས་སྟོང་པར་གྲུབ་པ། དེའི་སྒོ་ནས་སྟོན་པ་ཉིད་སྨྲ་བ་བླ་མེད་པར་བསྒྲུབས་པའོ། །དང་པོ་ལ་གསུམ། རང་བཞིན་གྱིས་སྟོང་པ་ལ་བྱ་བྱེད་འཐད་ཚུལ་དང་ཟློག་ཕྱོགས་ལ་མི་འཐད་པ་རྟེན་འབྲེལ་མཐོང་བ་ལ་བསྔགས་པའོ།། དང་པོ་ནི། སྟོན་པ་ཁྱོད་ནི་འདི་ལྟར་ནམ་ཞིག་གི་ཚེ་རང་བཞིན་གྱིས་སྟོང་པར་གྲུབ་པ། དེའི་སྒོ་ནས་སྟོན་པ་ཉིད་སྨྲ་བ་བླ་ན་མེད་པར་བསྒྲུབས་པའོ། །དང་པོ་ལ་གསུམ། རང་བཞིན་གྱིས་ནི་གྲུབ་པས་སྟོང་པ་ཡིན་པ་དང་། དེར་མ་ཟད་དེ་ལ་ནི་གནས་སྐབས་སུ་སོང་ཞིག་འདུག་ཅིག་སོགས། བླང་དོར་གྱི་ཚུལ་རྣམས་འཇོག་པར་བྱ་བྱེད་ཐམས་ཅད་ཐ་སྙད་ཙམ་དུ་འཐད་པའང་མི་འགལ་ཞིང་། ཆོས་མཐུན་པར་བཞེད་དོ། །དེ་ལྟར་ཡང་རྩ་ཤེས། ལས། གང་ལ་སྟོང་པ་ཉིད་རུང་པ། །དེ་ལ་ཐམས་ཅད་རུང་བར་འགྱུར། །ཞེས་གསུངས་སོ།། འདིས་ནི། ཆོས་ཐམས་ཅད་རང་བཞིན་གྱིས་གྲུབ་པ་རྡུལ་ཙམ་ཡང་མེད་ཀྱང་། ཀུན་རྫོབ་ཙམ་དུ་འཁོར་འདས་ཀྱི་རྣམ་གཞག་སྤྱི་དང་། ཁྱད་པར་དུ་སྤང་བླང་གི་རྣམ་གཞག་ཐམས་ཅད་འཐད་པ་ཙམ་དུ་མ་ཟད། ཤིན་ཏུ་རུང་བར་ཤེས་དགོས་པར་སྟོན་ནོ། །གཉིས་པ་ནི། གལ་ཏེ་སྔར་བཤད་པ་ལྟར་ཆོས་རྣམས་རང་བཞིན་གྱིས་སྟོང་པ་དེ་ལས་ལྡོག་པ་གལ་ཏེ་རང་བཞིན་གྱིས་གྲུབ་པར་མཐོང་པ་སྟེ་ཁས་ལེན་པར་བྱེད་ན། དེ་ནི་མི་འཐད་དེ་རང་བཞིན་གྱིས་སྟོང་པ་ལ་བྱ་བ་བྱེད་པ་ཐམས་ཅད་འཐད་པར་བཞག་ཏུ་མི་རུང་ཞིང་གནས་སྐབས་སུ་རྒྱུ་འབྲས་སོགས་ཀྱི་བྱ་བྱེད་འཐད་པ་དང་བཅས་པ་ལ་ནི་རང་བཞིན་གྱིས་གྲུབ་པས་སྟོང་པ་མེད་པར་འདོད་དགོས་པར་འགྱུར་བས་སོ། །དེ་ལྟར་འདོད་དུའང་མི་རུང་སྟེ་དེ་འདྲའི་གང་ཟག་དེ་རྟག་ཆད་ཀྱི་ལྟ་བའི་གནས་ཉམ་ང་བའི་གཡང་དུ་ལྷུང་བ་ཡིན་པར་སྟོན་པ་ཁྱོད་ཀྱིས་བཞེད་པའི་ཕྱིར་རོ། །འདིར་མཐོང་བ་ན་ཞེས་ནའི་སྒྲ་ཡོད་པས་དེ་ལྟར་བཤད་ཀྱི། ལ་ལར་ཅུང་ཟད་འདི་དང་མི་འདྲ་པའང་ཡོད་དོ། །རྗེའི་གསུང་འབུམ་དུ་བཅས་ལ་ཞེས་གནས་གཞིའི་སྒྲ་ཡོད་ལ། ཆོས་སྤྱོད་དུ་བཅས་པ་ཞེས་འབྱུང་ངོ་། དེ་ལྟར་ཡང་རྩ་ཤེ་ལ ས། གང་ལ་སྟོང་ཉིད་མི་རུང་པ། །དེ་ལ་ཐམས་ཅད་རུང་མི་འགྱུར། །ཞེས་གསུངས་སོ། །གསུམ་པ་ནི། གོང་དུ་བརྗོད་པའི་རྒྱུ་མཚན་དེའི་ཕྱིར་ན། སྟོན་པ་ཁྱོད་ཀྱི་བསྟན་པ་འདི་ལ་རྟེན་འབྱུང་གི་གནས་ལུགས་སམ་ཆོས་ཉིད་མཐོང་བ་ནི་ལེགས་པར་བསྔགས་སོ། །རང་བཞིན་གྱིས་སྟོང་པ་དང་དེའང་བྱ་བྱེད་འཐད་ཚུལ་ལེགས་པར་ཤེས་པ་ལ་བསྔགས་ཚུལ་ནི། མགོན་པོ་ཀླུ་སྒྲུབ་ཀྱིས། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་བསྟེན་པ་གང་། །ངོ་མཚར་བས་ཀྱང་འདི་ངོ་མཚར། །རྨད་བྱུང་བས་ཀྱང་འདི་རྨད་བྱུང་། །ཞེས་གསུངས་ཤིང་། མདོ་ལས་ཀྱང་། གང་གིས་རྟེན་ཅིང་འབྲེལ་བར་འབྱུང་བ་མཐོང་བ་དེས་ནི་ཆོས་མཐོང་ངོ་། །ཞེས་གསུངས་པ་རྣམས་སོ། །རྟེན་འབྲེལ་གྱི་གནས་ལུགས་དེ་ཡང་རྟེན་འབྲེལ་དེ་ཉིད་ཀུན་དུ་སྟེ་ཐ་སྙད་དུ་གཏན་མེད་པར་ལྟ་བ་དང་། རང་བཞིན་གྱིས་ནི་ཡོད་པར་ལྟ་བས་མཐོང་བ་མ་ཡིན་ཏེ། རྟེན་འབྱུང་གི་རིགས་པ་ལེགས་པར་ཤེས་པ་ཉིད་ཀྱིས་མཐོང་དགོས་པའི་ཕྱིར་རོ། །གཉིས་པ་ལ་གཉིས། གསུངས་ཚུལ་དང་། རྒོལ་བས་གླགས་མི་རྙེད་པར་བསྟན་པའོ། །དང་པོ་ལ་གསུམ། ལྟོས་ནས་གྲུབ་པ་རྟེན་འབྲེལ་གྱི་དོན་དུ་བསྟན་པ། རྟེན་འབྲེལ་ཡིན་པ་ཉིད་ཀྱིས་རང་བཞིན་གྱིས་སྟོང་པར་བསྟན་པ། རང་བཞིན་གྱིས་གྲུབ་ན་ཐོབ་བྱ་མྱང་འདས་སོགས་མི་རུང་བར་བསྟན་པའོ། །དང་པོ་ནི། རང་གི་གདགས་གཞི་ཆ་ཤས་ཚོགས་པ་ལ་བལྟོས་མེད་ཀྱི་ཆོས་ནི་དཔེར་ན་ནམ་མཁའི་མེ་ཏོག་བཞིན་དུ་གཞི་མ་གྲུབ་པའི་རྒྱུ་མཚན་དེས་ན། རང་གི་ཆ་ཤས་སོགས་ལ་མ་བརྟེན་པར་རང་དབང་ངམ་ཚུགས་ཐུབ་ཏུ་གྲུབ་པའི་ཆོས་ནི་ཡོད་པ་མ་ཡིན་ལ། གལ་ཏེ་མྱུ་གུ་ལྟ་བུ་ནི། རང་གི་ངོ་བོས་རང་དབང་དུ་གྲུབ་པ་ཞིག་ཡིན་ན། མྱུ་གུ་དེ་འགྲུབ་པར་བྱེད་པ། རང་གི་རྒྱུ་དང་རྐྱེན་ལ་ལྟོས་པ་འགལ་བར་འགྱུར་ཏེ། རང་དབང་ངམ་ངོ་བོས་གྲུབ་ན་བདེན་པར་གྲུབ་དགོས་ལ་བདེན་གྲུབ་ཡིན་ན། ལྟོས་མེད་དུ་གྲུབ་དགོས་པ་ལས་ལྟོས་མེད་དུ་གྲུབ་པ་མེད་པའི་ཕྱིར་རོ། །འདིས་མྱུ་གུ་སོགས་ནི་རང་གི་ངོ་བོས་མ་གྲུབ་སྟེ། གཞན་ལ་ལྟོས་ནས་གྲུབ་པའི་ཕྱིར་ཞེས་བསྟན་ཏོ། འདིར་བལྟོས་པ་ཞེས་འབྱུང་ཡང་། གསུང་འབུམ་ལ་ལར་བལྟོས་པར་ཞེས་འབྱུང་བ་ནི་བདེ་བར་མངོན་ཏེ། དེ་ལ་བལྟོས་པ་ཡིན་པར་འགལ་ཞེས་ཐོབ་བོ། འདི་ནི་རྩ་ཤེ་ལས། །རང་བཞིན་དག་ནི་བཅོས་མིན་དང་། །གཞན་ལ་བལྟོས་པ་མེད་པ་ཡིན། །ཞེས་གསུངས་པའི་དགོངས་པའོ། །གཉིས་པ་ནི། རྒྱུ་མཚན་སྔར་བཤད་པ་དེའི་ཕྱིར་ན། བརྟེན་ནས་འབྱུང་བ་ལས་མ་གཏོགས་པའི་ཆོས་འགའ་ཡང་ཡོད་པ་མ་ཡིན་ལ། དེ་མེད་པས་ན་སྟོན་པས་རང་བཞིན་གྱིས་ནི་སྟོང་པ་ལས་མ་གཏོགས་པའི་ཆོས་ནི་འགའ་ཡང་མེད་པར་གསུངས་སོ། །གསུང་འབུམ་ལས་འདས་ཚིག་གི་དོན་དུ་གསུངས་ཞེས་འབྱུང་བ་བཞིན་བྱས་ཀྱི། ཆོས་སྤྱོད་འདིར་གསུང་ཞེས་པ་ལྟར་ན་གསུང་ངོ་ཞེས་ཐོབ་པས་འདྲ་ཡང་ཅུང་ཟད་ཙམ་གྱི་ཁྱད་པར་ཡོད་དོ། །མ་གཏོགས་ཞེས་པ་ནི། དེར་མ་གཏོགས་ཞེས་པའི་དོན་ཡིན་ཀྱང་། ལས་ཞེས་དགར་ཚིག་འབྱུང་བ་ནི། དེ་ལས་གཞན་པའི་ཆོས་མེད་པའི་དོན་ནོ། །དེ་ལྟར་རྩ་ཤེ་ལས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་སོ། །གསུམ་པ་ནི། བདེན་པར་གྲུབ་པའི་རང་བཞིན་ཡིན་ན་དེ་ནི་ནམ་ཡང་ལྡོག་པ་མེད་པ་སྟེ་བསྒྱུར་མི་ནུས་པ་ཞིག་ཡོད་དགོས་པའི་ཕྱིར། གལ་ཏེ་ཆོས་རྣམས་ལས་རང་བཞིན་གྱིས་གྲུབ་པ་འགའ་ཞིག་ཡོད་ན་ནི། དེའིི་ཚེ་བྱ་བྱེད་མི་འཐད་པར་མ་ཟད་མྱ་ངན་ལས་འདས་པ་སྟེ་ཐར་པ་ཐོབ་པ་ཡོད་ཅེས་ཁས་ལེན་དུའང་མི་རུང་ཞིང་། མཐར་འཛིན་ཀུན་རྟོག་གི་སྤྲོས་པ་ཀུན་ཀྱང་ལྡོག་པ་མེད་པར་སྟོན་པ་ཁྱོད་ཀྱིས་གསུངས་སོ། །འདི་ཡང་བདེན་འཛིན་ནི་བདེན་པར་གྲུབ་ན་ནི་བསྒྱུར་མི་ནུས་པས་སྤོང་བར་ཡང་མི་འཐད་པའི་ཕྱིར། མྱང་འདས་ཀྱང་ཐོབ་མི་ནུས་སོ་ཞེས་པའོ། །ལྡོག་པ་མེད་ཅེས་པའི་དོན་ལ། བཟློག་པ་མེད་པའི་ཚིག་འབྱུང་བ་ནི་དོན་འདྲའོ། །འདི་ནི་རྩ་ཤེ་ལས། རང་བཞིན་གཞན་དུ་འགྱུར་བར་ནི། །ནམ་ཡང་འཐད་པར་མི་འགྱུར་རོ། །ཞེས་གསུངས་པའི་དགོངས་པའོ། །བདེན་པར་གྲུབ་པའི་རང་བཞིན་ཡིན་ན་གོང་དུ་དྲངས་པ་ལྟར་བཅོས་པ་མ་ཡིན་པ་དང་། གཞན་ལ་བལྟོས་པ་མ་ཡིན་པ་དང་། གཞན་དུ་མི་འགྱུར་པའི་ཁྱད་ཆོས་གསུམ་ཚང་དགོས་ཏེ། ཞིབ་པར་ནི་རྩ་ཤེའི་འགྲེལ་པ་སོགས་དབུ་མའི་གཞུང་ཆེ་བ་ནས་ཤེས་དགོས་སོ། །ཚིགས་བཅད་འདི་ལྟ་བུ་ནི། གོ་རིམ་བཟློག་སྟེ་བཤད་ན་འཆད་བ དེ་ཡང་། གཞན་ལ་གོ་སླ་བའི་ཆེད་དུ་མཐར་ཆགས་སུ་བཤད་ཅིང་འཆད་པར་ཡང་འགྱུར་རོ། །གཉིས་པ་ནི། རྒྱུ་མཚན་བཤད་མ་ཐག་པ་དེའི་ཕྱིར་སྟོན་པ་ཁྱོད་ཀྱིས་ཆོས་རྣམས་བདེན་པར་གྲུབ་པའི་རང་བཞིན་རྣམ་པར་བྲལ་ལོ་ཞེས་འཇིགས་པ་མེད་པའི་སེང་གེའི་སྒྲ་ཡིས་ཡང་དང་ཡང་དུ་མཁས་པའི་འཁོར་གྱི་ཚོགས་སུ་ལེགས་པར་གསུངས་པ་འདི་ལ་རྒོལ་པ་སུ་ཡིས་འགོང་བར་ནུས་ཏེ་འགོང་བར་མི་ནུས་སོ། །འགོང་མི་ནུས་པ་ནི། ཕས་རྒོལ་གྱིས་ཆོས་འཐུན་དུ་ཀླན་ཀ་མི་ནུས་པའི་དོན་ཏེ། དེ་ཡང་གསུངས་པ་དེའི་དོན་ལས་བརྒལ་བར་བྱས་ནས་གཞན་ལེགས་བར་འཆད་མི་ནུས་པའོ། །གསུམ་པ་ནི། ཆོས་གང་གི་སྟེང་དུ་འང་རང་བཞིན་གྱིས་གྲུབ་པ་འགའ་ཡང་མེད་པ་དང་། ཐ་སྙད་དུ་རྒྱུ་འདི་ལ་བརྟེན་ནས་འབྲས་བུ་འདི་འབྱུང་བ་ཡིན་ཞེས་བྱ་བ་ལ་སོགས་པའི་རྣམ་གཞག་ཐམས་ཅད་འཐད་ལྡན་དུ་འཇོག་པ་གཉིས་ནི་མི་འགལ་པར་མ་ཟད། གཅིག་གྲོགས་སུ་གཅིག་འགྲོ་བར་གསུངས་པས་ནི། ལྷན་ཅིག་འདུ་བ་ལྟ་སྨོས་ཀྱང་ཅི་དགོས་ཏེ་གཞི་གཅིག་ལ་འདུ་རུང་བར་ངེས་སོ། །དེ་ལྟར་ཡང་། མདོ་ལས། སྟོང་པ་ཉིད་གཟུགས་སོ། གཟུགས་ལས་སྟོང་པ་ཉིད་གཞན་མ་ཡིན། ཞེས་སོགས་དང་། རྩ་ཤེ་ལས། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ཉིད་རྒྱུར་བྱས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་དང་། འཇུག་པ་ལས། དངོས་རྙེད་ངོ་བོ་གཉིས་ནི་འཛིན་པར་འགྱུར། ཞེས་དང་དེ་བཞིན་དངོས་པོ་ཐམས་ཅད་སྟོང་ན་ཡང་། །སྟོང་ཉིད་དག་ལས་རབ་ཏུ་སྐྱེ་བར་འགྱུར། །ཞེས་གསུངས་པ་ལྟར་རོ། །མགོན་པོ་ཁྱོད་ཀྱིས། ཆོས་རྣམས་རྟེན་འབྲེལ་དང་ཁྱད་པར་འདུས་བྱས་ཐམས་ཅད་ནི། རང་གི་རྒྱུ་རྐྱེན་ལ་བརྟེན་ནས་འབྱུང་བའི་རྒྱུ་མཚན་གྱིས། བདག་དང་གཞན་དང་གཉིས་ཀ་དང་རྒྱུ་མེད་བཞི་པོ་གང་རུང་ལས་སྐྱེ་བར་འཛིན་པའི་མཐའ་འཛིན་ཀྱི་ལྟ་བ་མི་བརྟེན་ནོ། །ཞེས་ལེགས་པར་གསུངས་པ་འདི་ནི་མགོན་པོ་ཁྱོད་ཀྱི་སྨྲ་བ་ཉིད་བླ་ན་མེད་པར་འཇོག་པའི་རྒྱུ་དམ་པ་ཡིན་ནོ། །དེ་ཡང་རྩ་ཤེ་ལས། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པོ་དེ་ཉིད་ལ། །བརྟེན་ནས་འབྱུང་བར་མ་གཏོགས་པར། །འགྲུབ་པའི་རྒྱུ་ནི་མ་མཐོང་ངོ་། །ཞེས་གསུངས་པ་ལྟ་བུ་སྟེ། མཐར་འཛིན་ལ་རྟག་པའི་མཐར་འཛིན་དང་། ཆད་པའི་མཐར་འཛིན་གཉིས་ཡོད་ལ། མཐའ་བཞི་གང་རུང་ལས་སྐྱེ་བར་འཛིན་པ་དང་དངོས་པོ་རྣམས་རང་བཞིན་གྱིས་ཡོད་པར་འཛིན་པའི་རྟོག་པ་ནི། རྟག་པའི་མཐར་འཛིན་དང་། ཐ་སྙད་དུ་རྒྱུ་འབྲས་སོགས་བྱ་བྱེད་མི་འཐད་པར་འཛིན་པའི་རྟོག་པ་ནི་ཆད་པའི་མཐར་འཛི་ཡིན་ལ། མཐའ་ཞེས་པ་ནི་འཇིག་རྟེན་ན་གང་དུ་ལྷུང་ན་ཕུང་བར་འགྱུར་བའི་གཡང་ལ་མཐའ་ཞེས་བརྗོད་པ་ལྟར། འདིར་གང་དུ་བཟུང་ན་འཛིན་པ་པོ་ཕུང་བར་འགྱུར་བའི་གནས་ལ་མཐའ་དང་། དེར་འཛིན་པའི་རྟོག་པ་ནི་མཐར་འཛིན་ཅེས་བྱའོ། །གཉིས་པ་བསྡུས་ཏེ་བསྔགས་པ་ནི། ཕྱི་ནང་གི་རྒྱུ་འབྲས་ཀྱི་དངོས་པོ་འདི་ཀུན་ནི་དོན་དམ་དཔྱོད་བྱེད་ཀྱི་རིགས་པ་ཡང་དག་གིས་ཐ་སྙད་བཏགས་པའི་བཏགས་དོན་བཙལ་པའི་ཚེ་བཏགས་དོན་རྙེད་རྒྱུ་མེད་པས་ངོ་བོས་གྲུབ་པས་སྟོང་བར་ངེས་པ་དང་། རིགས་པ་དེས་མ་བརྟག་མ་དཔྱད་པར་ཀུན་རྫོབ་ཀྱི་ཐ་སྙད་ཙམ་དུ་རྒྱུ་འདི་ལས་འདིའི་འབྲས་བུ་འདི་འབྱུང་བ་ཡི་ངེས་པ་གཉིས་པོ་ཕན་ཚུན་དུ་འཇོག་མི་ཐུབ་པའི་གེགས་མེད་པར་ནི། གཅིག་གིས་ཅིག་ཤོས་ལ་ངེས་པ་ལྷག་པར་འདྲེན་ཐུབ་པའི་གྲོགས་བྱེད་པ་འདི་ལས་ལྷག་ངོ་མཚར་དུ་གྱུར་པ་དང་། འདི་ལས་ཆེས་རྨད་དུ་བྱུང་བ་གང་ཞིག་ཡོད་དེ་ཡོད་པ་མ་ཡིན་ནོ། །འདི་ནི་བྱང་ཆུབ་སེམས་འགྲེལ་ལས། ཆོས་རྣམས་སྟོང་པ་འདི་ཤེས་ན། །ཞེས་སོགས་སྔར་དྲངས་པའི་དགོངས་པའོ། །རྗེ་བླ་མས། དབུ་མའི་ལྟ་བའི་དཀའ་སའི་མཐར་ཐུག་པ་འདི་ཡིན་པར་གསུངས་ཏེ། ལམ་རིམ་ཆུང་བ་ལས། དཀའ་ས་ནི་རང་གི་ངོ་བོས་གྲུབ་པའི་རང་བཞིན་མ་ལུས་པར་ཁེགས་པ་དང་། རང་བཞིན་མེད་པའི་གང་ཟག་ལ་སོགས་པ་དེ་ཉིད་ལས་སོག་པ་པོ་དང་འབྲས་བུ་མྱོང་བ་པོ་ལ་སོགས་པར་འཇོག་པ་ལ་ངེས་པ་གཏིང་ནས་འདྲོངས་ཏེ། དེ་རྣམས་སུ་འཇོག་ཐུབ་པའི་གཉིས་ཚོགས་དེ་སྲིད་མཐའ་ཙམ་དུ་སོང་བས་དབུ་མའི་ལྟ་བ་ཤིན་ཏུ་རྙེད་པར་དཀའ་བ་ཡིན་ནོ། །ཞེས་དང་། དེ་ཁོ་ན་ཉིད་ལ་དཔྱོད་པའི་རིགས་པས་བཙལ་བ་ན། སྐྱེ་བ་དང་འཆི་འཕོ་བའི་གང་ཟག་ལ་སོགས་པ་དཔྱད་བཟོད་པ་རྡུལ་ཙམ་ཡང་མི་རྙེད་ཀྱང་། ཆོས་རྣམས་སྒྱུ་མ་ལྟ་བུ་ལ་དཀར་ནག་གི་འབྲས་བུ་འབྱུང་བར་གསུངས་པ་ལྟ་བུའི་གོ་བ་ཆགས་པར་དགོས་སོ། །ཞེས་གསུངས་པའི་ཕྱིར་རོ། །དེས་ན། ཐུབ་པ་ཁྱོད་ལ་བསྟོད་འོས་པའི་ཡོན་ཏན་དཔག་ཏུ་མེད་པ་ཡོད་ཀྱང་། ཁྱད་པར་རྟེན་འབྲེལ་གསུང་པའི་ཚུལ་འདིའི་སྒོ་ནས་ཁྱོད་ལ་བསྟོད་ན་ནི། ཆོས་དོན་དང་མཐུན་པར་བསྟོད་པར་འགྱུར་པ་ཡིན་གྱི། བསྟོད་པ་དེ་ལས་གཞན་དུ་ཡོན་ཏན་གཞན་གྱི་སྒོ་ནས་བསྟོད་པས་དེ་ཙམ་ཞིག་ཏུ་ལེགས་པར་བསྟོད་པར་འགྱུར་བ་མ་ཡིན་ནོ། །ཞེས་སོ། གཉིས་པ་ལ་བཞི། རྟེན་འབྲེལ་ཁས་བླངས་ནས་རང་བཞིན་གྱིས་སྟོང་པ་ཁས་མི་ལེན་པ་མི་འཐད་པར་བསྟན་པ། རང་སྡེ་དངོས་སྨྲ་བ་སོགས་བསྟན་པའི་སྙིང་པོ་ལས་ཕྱི་རོལ་ཏུ་གྱུར་པར་བསྟན་པ། རྟེན་འབྲེལ་དང་རང་བཞིན་གྱིས་གྲུབ་པ་ཅིག་ཅར་ཁས་ལེན་པ་འགལ་བར་བསྟན་པ། ཆོས་ཐམས་ཅད་རང་བཞིན་མེད་ཀྱང་སྒྱུ་མ་ལྟ་བུར་བསྟན་པའོ། །དང་པོ་ནི། ཡིད་ནི་མི་ཤེས་པའི་རྨོངས་པའི་དབང་དུ་སོང་བས་དེའི་བྲན་དུ་བཟུང་བ་ཡི་སྟོབས་སམ་མཐུས། མུ་སྟེགས་ཀྱི་རྒོལ་བ་གང་ཞིག་སྟོན་པ་ཁྱོད་དང་ཞེ་འགྲས་པ་དེ་ཡིས་ནི། ཁྱོད་ཀྱི་ཆོས་རྣམས་རང་བཞིན་གྱིས་མེད་དོ་ཞེས་བསྟན་པའི་སྒྲ་ཐོས་ནས་ཡིད་ལ་མི་བཟོད་པ་སྐྱེས་པར་གྱུར་པ་ལ་ངོ་མཚར་དུ་བརྩི་རྒྱུ་ཅི་ཡོད་དེ། དེ་ཉིད་རྨོངས་པའི་དབང་དུ་སོང་བ་དང་། དེའི་སྟོན་པའི་ལུགས་ཀྱང་ཡིན་པས་སོ། །འོ་ན་གང་ལ་བརྩི་ཞེ་ན། སྟོན་པ་ཁྱོད་ཀྱི་གསུང་གི་གཅེས་པའི་མཛོད་མཐར་ཐུག་པ་བརྟེན་ནས་འབྱུང་བ་སྟེ་རྟེན་འབྲེལ་ཁས་བླངས་ནས། ཡང་ཆོས་ཐམས་ཅད་རང་བཞིན་གྱིས་སྟོང་པ་ཉིད་དོ་ཞེས་བསྟན་པས། སྒྲའི་ང་རོ་མི་བཟོད་པའི་རང་སྡེ་དངོས་སྨྲ་བའི་སྐྱེ་བོ་འདི་ལ་ཁོ་བོ་བློ་བཟང་གྲགས་པའི་དཔལ་ངོ་མཚར་དུ་གྱུར་ཏེ། རྟ་ལ་ཞོན་བཞིན་དུ་རྟ་དེ་ཉིད་འཚོལ་བ་ལྟར་ཆོས་རྣམས་རང་བཞིན་གྱིས་སྟོང་པ་ཉིད་རྟེན་འབྲེལ་གྱི་དོན་ཡིན་པར་མ་རྟོགས་པའི་ཕྱིར་རོ། །གསུང་འབུམ་ལ་ལར། བརྟེན་ནས་འབྱུང་བ་ཞེས་གསུངས་པ་ལྟར་བཤད་ཀྱི། ཆོས་སྤྱོད་ཁ་ཅིག་ཏུ་འབྱུང་བར་ཞེས་ཡོད་དོ། །མཚར་བ་ནི། སྤྱིར་སྨད་པ། སྨོན་པ། བསྔགས་པ་རྣམས་ལ་འཇུག་ཀྱང་། འདིར་སྨད་པ་ལ་འཇུག་སྟེ་ཁྲེལ་བའི་དོན་ནོ། །འདི་ནི་མངོན་རྟོགས་རྒྱན་ལས། གཞན་གྱི་ཆོས་རྣམས་ཀྱང་ཡོད་ལ། ཤེས་བྱ་ལ་ཡང་སྟོན་པ་ཡིས། །སྒྲིབ་པ་ཟད་པར་བརྗོད་པ་གང་། །དེ་ལ་ཁོ་བོས་མཚར་དུ་བརྩིས། །ཞེས་གསུངས་པ་དང་ཕྱོགས་འདྲའོ། །གཉིས་པ་ནི། དངོས་པོ་རང་བཞིན་མེད་པའི་གནས་ལུགས་རྟོགས་པ་ལ་བཀྲི་བའི་སྒོ་སྟེ་ཐབས་བླ་ན་མེད་པ་རྟེན་འབྲེལ་ཡིན་ཀྱང་དངོས་སྨྲ་བས་རྟེན་ཅིང་འབྲེལ་འབྱུང་གི་མིང་ཙམ་ལ་ཞེན་པ་ཉིད་ཀྱིས་ནི། དངོས་པོ་རྣམས་རང་བཞིན་གྱིིས་གྲུབ་པ་ཉིད་དུ་འཛིན་པ་སྟེ་ཁས་ལེན་པར་བྱེད་ན། ད་ཀོ་སྟེ་ད་ནི་དངོས་སྨྲ་བའི་སྐྱེ་བོ་འདི་རྣམས་ནི། འཕགས་མཆོག་རྣམས་ཀྱིས་ལེགས་པར་བགྲོད་པའི་འཇུག་ངོགས་འགྲན་ཟླ་དང་བྲལ་བར་གྱུར་པ། སྟོན་པ་ཁྱོད་དགྱེས་པར་གྱུར་པའི་དངོས་པོ་རང་བཞིན་མེད་པར་རྟོགས་པའི་ལམ་བཟང་པོ་དེར་ཐབས་གཞན་གང་གིས་ནི་ཚུལ་ཇི་ལྟ་བུར་བཀྲི་བའམ་འཁྲིད་པར་བྱ་སྟེ་བཀྲི་པའི་ཐབས་ཁྱད་པར་ཅན་གཞན་མེད་དོ། །འདི་ནི་སྨན་ནད་གསོ་བའི་ཐབས་ཡིན་པ་ལ། མ་ཞུ་བར་ནད་བསྐྱེས་པ་ལྟ་བུར་སོང་པ་སྟེ། རྟེན་འབྲེལ་གྱི་དོན་རང་བཞིན་གྱིས་མེད་པའི་དོན་ཡིན་པ་ལ། རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་གྱིས་གྲུབ་པར་བཟུང་པའི་ཕྱིར་རོ། །སྤྱིར་དངོས་སྨྲ་བ་ནི། དངོས་པོ་བདེན་གྲུབ་ཏུ་འདོད་པ་ཐམས་ཅད་དང་། ཁྱད་པར་སྐབས་འདིར་རྒྱུ་ལ་བརྟེན་ནས་འབྲས་བུ་འབྱུང་བའི་རྒྱུ་མཚན་གྱིས་རང་བཞིན་གྱིས་གྲུབ་པར་འཛིན་པའི་བྱེ་བྲག་ཏུ་སྨྲ་བ། མདོ་སྡེ་པ། སེམས་ཙམ་པ་སྟེ་རང་སྡེ་དངོས་སྨྲ་བ་རྣམས་དང་། རང་རྒྱུད་པ་ཡང་དེའི་ཕྱོགས་སུ་ནི་བསྡུ་རུང་ངོ་། །དེས་ན་མིང་ཉིད་ཀྱིས་ནི་ཞེས་པའང་རྟེན་འབྲེལ་ཡིན་པའི་རྒྱུ་མཚན་གྱིས་རང་བཞིན་གྱིས་གྲུབ་པར་འཛིན་པའི་རང་སྡེ་གཙོ་ཆེའོ། །འཇུག་ངོགས་ནི་འཇུག་པའི་ལམ་མམ་གཞིའོ། །ཐབས་གང་གིས་ནི་བཀྲི་བར་བྱ། ཞེས་པས་རྟེན་འབྲེལ་ཡིན་པའི་རྒྱུ་མཚན་ལས་གཞན་རང་བཞིན་མེད་པའི་སྟོང་ཉིད་རྟོགས་པའི་ཐབས་སམ་རྟགས་ནི་དེ་དང་མཚུངས་པ་འམ་ལྷག་མེད་པར་སྟོན་པ་སྟེ་བསྔགས་པའོ། །གསུམ་པ་ནི། དངོས་པོར་སྨྲ་བ་ཁྱོད་ཀྱིས་རང་བཞིན་གྱིས་གྲུབ་པ་ཁས་ལེན་འདུག་ན། རང་བཞིན་གྱིས་གྲུབ་པ་ལ་རྐྱེན་གྱིས་གསར་དུ་བཅོས་པ་ནི་ཡོད་པ་མ་ཡིན་པ་དང་། རྐྱེན་གཞན་ལ་ལྟོས་པ་མེད་པ་ཞིག་དགོས་པ་དང་། རྟེན་འབྲེལ་ནི་གཞན་ལ་བལྟོས་ནས་གྲུབ་པ་དང་བཅོས་མ་ཞིག་ལ་འཇོག་པ་ཡིན་པས་གཉིས་ཀ་ཚུལ་ཇི་ལྟ་བུར་ན་གཞི་གཅིག་ལ་མི་འགལ་བར་གཞི་མཐུན་དུ་འདུ་བ་ཉིད་དུ་འགྱུར་ཏེ་གཞི་གཅིག་གི་སྟེང་དུ་མི་འགལ་བར་འཇོག་མི་རུང་ཞེས་པའོ། འདི་ནི་རྩ་ཤེ་ལས། རང་བཞིན་དག་ནི་བཅོས་མིན་དང་། །ཞེས་སོགས་དང་། རང་བཞིན་གཞན་དུ་འགྱུར་བ་ནི། །ནམ་ཡང་འཐད་པར་མི་འགྱུར་རོ། །ཞེས་གསུངས་པའི་དོན་ནོ། །འདུས་མ་བྱས་ཀྱི་ཆོས་རྣམས་རྒྱུ་རྐྱེན་གྱིས་བསྐྱེད་པའི་བཅོས་བ་མིན་ཀྱང་། རང་འདོགས་བྱེད་ཀྱི་རྟོག་པའི་དབང་གིས་བཅོས་པའམ་བཞག་པ་ཡིན་ཏེ། མདོ་ལས། དེ་དག་རྟོག་པའི་དབང་གིས་བཞག་པ་ཡིན། ཞེས་སོགས་དང་། བཞི་བརྒྱ་པའི་འགྲེལ་བ་ལས་ཀྱང་། རྟོག་པ་ཡོད་པ་ཁོ་ནས་ཡོད་པ་ཉིད་དང་ཞེས་གསུངས་པས་སོ། །བཞི་པ་ནི། རྒྱུ་མཚན་གོང་དུ་བཤད་པ་དེ་ལྟར་ཡིན་པ་དེའི་ཕྱིར་དཔེར་ན་སྒྱུ་མའི་རྟ་གླང་ནི་རྟ་གླང་དངོས་གནས་སུ་མ་གྲུབ་བཞིན་དུ་དེར་སྣང་བ་ལྟར་རྒྱུ་རྐྱེན་དང་ཆ་ཤས་དང་རྟོག་པ་ལ་བརྟེན་ནས་འབྱུང་བའི་ཆོས་གང་ཡིན་པ་འདི་རྣམས་ནི་རང་བཞིན་གྱིས་ནི་གདོད་མ་ནས་གྲུབ་པས་རྣམ་པར་དབེན་ཡང་རང་བཞིན་གྱིས་གྲུབ་པ་དེར་སྣང་བས་ན་རྟེན་འབྱུང་གི་ཆོས་འདི་ཀུན་སྟོན་པ་ཁྱོད་ཀྱིས་སྒྱུ་མ་ཇི་ལྟ་བ་དེ་བཞིན་དུ་རྫུན་པར་གསུངས་པ་ལགས་སོ། །དེ་ལ་གདོད་མ་ནས་ཞེས་པ་ནི་ཐོག་མ་ནས་དང་དབེན་པ་ནི་མེད་པ་སྟེ། དེ་ཡང་རང་བཞིན་གྱིས་མེད་པའི་དོན་ནོ། །དེར་སྣང་བ་ཞེས་པའི་དོན་ཡང་། སོ་སྐྱེའི་རྒྱུད་ཀྱི་རྟོག་པ་རྣམས་ལ། རྟེན་འབྲེལ་གྱི་ཆོས་ཀུན་རང་བཞིན་གྱིས་མེད་ཀྱང་གྲུབ་པར་སྣང་བའི་དོན་ཡིན་གྱི། སངས་རྒྱས་འཕགས་པ་ལ་ནི་དེ་ལྟར་མི་སྣང་ངོ་། །འོན་ཀྱང་གཞན་ལ་བདེན་གྲུབ་ཏུ་སྣང་བ་དེ། སངས་རྒྱས་ལ་སྣང་བ་ཡིན་ཏེ་སངས་རྒྱས་ལ་མི་སྣང་ན་མེད་པར་འགྱུར་པའི་ཕྱིར་རོ། །སོ་སྐྱེའི་རྟོག་པ་དང་རྟོག་མེད་ཀྱི་ཤེས་པ་ལ་གང་སྣང་ཐམས་ཅད་རང་ངོས་ནས་གྲུབ་པར་སྣང་བས། སོ་སྐྱེའི་ཤེས་པ་ཐམས་ཅད་འཁྲུལ་ཤེས་སུ་སྐབས་འདིར་ཁས་ལེན་ཡང་། གཟུགས་སྒྲ་སོགས་ཡུལ་ལྔའི་ཐ་སྙད་པའི་ངོ་བོ་ལ་ཚད་མར་སོང་བའི་ཤེས་པ་ནི་ཡོད་པར་འདོད་དགོས་སོ། །གསུམ་པ་ལ་གསུམ། གནས་ལུགས་བསྟན་པས་ངེས་ཤེས་སྐྱེ་ཚུལ། ཉེས་པའི་རྩ་བ་ལྡོག་པས་ངེས་ཤེས་སྐྱེ་ཚུལ། དོན་རྟོགས་ནས་ངེས་ཤེལ་སྐྱེ་ཚུལ་ལོ། །དང་པོ་ལ་གཉིས། དངོས་པོའི་གནས་ལུགས་བསྟན་པས་ཀླན་ཀ་མེད་པ། བརྟེན་འབྱུང་གི་ལམ་ལ་བརྟེན་ནས་གཞན་ལའང་ངེས་པ་སྟེར་ཚུལ་ལོ། །དང་པོ་ནི། སྟོན་པ་ཁྱོད་ཀྱིས་གསུང་རབ་གཞན་མང་པོ་ཞིག་ཇི་ལྟར་བསྟན་པ་ལ་ཕས་ཀྱིས་རྒོལ་བ་འགས་ཀྱང་ཆོས་མཐུན་དུ་གླགས་མི་རྙེད་པར་གསུངས་པ་ཡང་། ཡིད་ཆེས་སུ་རྟེན་འབྱུང་གི་ལམ་གསུང་པ་འདི་ཉིད་ཀྱིས་ནི་དཔགས་ནས་དེ་ཐམས་ཅད་ཀྱང་འཐད་པའི་གནས་སུ་ལེགས་པར་འཁུམས་པ་སྟེ་བསམས་སོ། དེའི་རྒྱུ་མཚན་ཅིའི་སླད་དུ་ཅེ་ན། ཡོད་དེ་རྟེན་འབྲེལ་འདི་བཤད་པས་མཐོང་བ་སྟེ་སོ་སྐྱེའི་མངོན་སུམ་གྱི་ཡུལ་དུ་གྱུར་པའི་མངོན་གྱུར་དང་། མ་མཐོང་བ་སྟེ་ལྐོག་གྱུར་གྱི་དངོས་པོ་ཇི་ལྟར་བསྟན་པ་ལ་རིམ་པ་བཞིན་དུ་རང་བཞིན་གྱིས་ཡོད་པར་སྒྲོ་འདོགས་པ་དང་། ཐ་སྙད་དུ་མེད་པར་སྐུར་འདེབས་ཀྱི་གོ་སྐབས་རྒྱང་རིང་དུ་མཛད་པའི་ཕྱིར་རོ། །ཆོས་མཐུན་དུ་གླགས་མི་རྙེད་པ་ནི། ཀླན་ཀ་ལྟར་སྣང་ཡོད་ཀྱང་ཚུལ་དང་མཐུན་པའི་ཀླན་ཀ་མེད་པའོ། །མཐོང་བ་མངོན་གྱུར་ནི། སོ་སྐྱེའི་མིག་ཤེས་ཚད་མ་སོགས་ཀྱི་ཡུལ་མངོན་སུམ་པ་ཀ་བུམ་ལྟ་བུ་དང་། མ་མཐོང་བ་ལྐོག་གྱུར་ལ་ཅུང་ཟད་ལྐོག་གྱུར་དང་། ཤིན་ཏུ་ལྐོག་གྱུར་གཉིས་ལས། དང་པོ་ནི། སྒྲ་མི་རྟག་པ་ལྟ་བུ་དང་། འཇིག་རྟེན་ཕ་རོལ་ལྟ་བུ་ཡིན་ལ། གཉིས་པ་ནི། སྦྱིན་པ་ལས་ལོངས་སྤྱོད་འབྱུང་བ་དང་། བཟོད་པ་ལས་རྣམ་སྨིན་གཟུགས་མཛེས་པ་སོགས་དང་། ལས་འབྲས་ཀྱི་འབྲེལ་བ་ཕྲ་ཞིང་ཕྲ་བ་རྣམས་སོ། །མངོན་གྱུར་ནི། ཚུར་མཐོང་གིས་མངོན་སུམ་ཚད་མས་ངེས་ནུས་ལ། ཅུང་ཟད་ལྐོག་གྱུར་ནི་རྟགས་ཡང་དག་ལ་མ་ལྟོས་པར་ཚད་མས་ངེས་མི་ནུས་པ་དང་། ཤིན་ཏུ་ལྐོག་གྱུར་ནི། དཔྱད་གསུམ་གྱིས་དག་པའི་ལུང་ལ་བརྟེན་ནས་ངེས་དགོས་ཀྱི། སྔ་མ་གཉིས་ལྟར་ངེས་མི་ནུས་སོ། །སྒྲོ་འདོགས་ནི། རང་བཞིན་གྱིས་མེད་པ་ལ་དེར་ཡོད་པར་བཟུང་ནས་སྒྲོ་འདོགས་པ་དང་། སྐུར་འདེབས་ནི་ཐ་སྙད་དུ་ཡོད་པ་ལ་དེར་མེད་པར་འཛིན་པ་ལྟ་བུ་རྣམས་སོ། །དེ་ཡང་ཚིག་གིས་ཡོད་དམ། མེད་ཅེས་བརྗོད་དགོས་པའི་ངེས་པ་མེད་དེ། སེམས་ཀྱི་འཛིན་ཚུལ་ལ་དེ་ལྟར་ཡོད་ན་དེས་འགྲུབ་པས་སོ། །གཉིས་པ་ནི། སྟོན་པ་ཁྱོད་ཀྱི་སྨྲ་བ་འགྲན་ཟླ་མེད་པར་མཐོང་པའི་རྒྱུ་མཚན་མཐར་ཐུག་པ་རྟེན་འབྱུང་གི་ལམ་འདི་ཉིད་ཀྱིས་ཏེ། འདི་ཉིད་ལ་དཔགས་ནས་སྟོན་པ་ཁྱོད་ཀྱི་གསུང་གཞན་ཡང་ལུང་ཚད་མར་གྱུར་པར་ངེས་པ་སྐྱེ་བ་ལགས་སོ། །དེ་ནི་བཞི་བརྒྱ་བ་ལས། སངས་རྒྱས་ཀྱིས་གསུངས་ལྐོག་གྱུར་ལ། །གང་ཞིག་ཐེ་ཚོམ་སྐྱེ་འགྱུར་པ། །དེ་ཡིས་སྟོང་པ་ཉིད་ཤེས་ནས། །འདི་ཉིད་ཁོ་ནས་ཡིད་ཆེས་བྱ། །ཞེས་གསུངས་པའི་དོན་ཏེ། རང་བཞིན་གྱིས་སྟོང་པ་རྟེན་འབྲེལ་གྱི་དོན་དུ་གསུངས་པའི་ཐུབ་པའི་གསུང་རབ་རང་གི་བསྟན་དོན་ལ་མི་བསླུ་བར་ངེས་པ་ལ་བརྟེན་ནས། ཟང་ཟིང་གི་སྦྱིན་པ་བཏང་བས་ལོངས་སྤྱོད་འབྱུང་བ་དང་། ཚུལ་ཁྲིམས་བསྲུངས་པས་མངོན་མཐོ་འགྲུབ་པར་སྟོན་པའི་གསུངས་གཞན་རྣམས་ཀྱང་ལུང་ཚད་མར་གོ་ནུས་པའི་དོན་ནོ། །ལུང་ཚད་མ་ཞེས་པ་ནི་ལུང་ཡང་དག་ཅེས་པ་སྟེ། བསྟན་བྱའི་དོན་ལ་མི་བསླུ་བའི་ལུང་ངོ་། འདིར་ལམ་འདི་ཉིད་ཀྱིས་ཞེས་འབྱུང་བ་ལྟར་བཤད་པ་ཡིན་གྱི། གསུང་འབུམ་དུ་ལམ་འདིས་ཉིད་ཀྱི་ཞེས་འབྱུང་བ་ལྟར་ན། ཉིད་ཀྱི་ཞེས་པ་ནི་སྟོན་པ་ལ་བྱེད་དགོས། གཉིས་པ་ནི། གནས་ལུགས་ཀྱི་དོན་ཇི་ལྟ་བ་བཞིན་གཟིགས་ནས་ལེགས་བར་གསུང་པའི་སྟོན་པ་ཁྱོད་ཀྱི་རྗེས་སུ་སློབ་པར་བྱེད་པའི་སློབ་པ་དགྲ་བཅོམ་ལ་ཆགས་སོགས་ཀྱི་ཀུན་འབྱུང་དང་དེས་དྲངས་པའི་སྡུག་བསྔལ་གྱི་རྒུད་པ་ཐམས་ཅད་རྒྱང་རིང་དུ་གྱུར་པ་སྟེ་སྤངས་པའི་རྒྱུ་མཚན་ཡོད་དེ། དེ་དག་གི་ཉེས་པ་ཀུན་གྱི་རྩ་བ་དངོས་པོ་རང་བཞིན་གྱིས་གྲུབ་པར་འཛིན་པའི་བདག་ལྟ་ལྷན་སྐྱེས་ལྡོག་པ་སྟེ་སྤངས་པའི་ཕྱིར་རོ། །དེ་ཡང་རིང་དུ་གྱུར་ཞེས་པ་ལྟར་བརྗོད་ལ་རྒྱལ་དབང་གི་དེར་འགྱུར་ཞེས་འབྱུང་བ་བཞིན་འགྱུར་ཚིག་ཐོབ་པར་བྱས་ན་དགྲ་བཅོམ་ཁོ་ན་ལ་བཤད་མི་དགོས་སོ། ཡང་སྟོན་པ་ཁྱོད་ཀྱི་བསྟན་པ་ལས་ཕྱིར་ཕྱོགས་པའི་མུ་སྟེགས་བྱེད་རྣམས་ཀྱིས། བདག་ཉིད་གྲོལ་བའི་ཆེད་ཡུན་རིང་པོའི་བར་དུ་དཀའ་ཐུབ་དྲག་པོས་ངལ་བ་བསྟེན་པར་བྱས་ཀྱང་། ཕྱི་ཕྱིར་སྟེ་སླར་ཡང་རིམ་གྱིས་ཆགས་སོགས་ཀྱི་སྐྱོན་རྣམས་ཁོ་བོ་ཅག་གི་རྒྱུད་སྟེང་དུ་ཤོག་ཅིག་ཅེས་བོས་པ་བཞིན་དུ་གྱུར་ནས་མི་གྲོལ་པའི་རྒྱུ་མཚན་ཡོད་དེ། དེ་དག་གི་རྒྱུད་ལ་སྐྱོན་གྱི་རྩ་བ་ལྷན་སྐྱེས་དང་ཀུན་བརྟགས་ཀྱི་བདག་ཏུ་ལྟ་བ་ཤིན་ཏུ་བརྟན་པོར་ཡོད་པའི་ཕྱིར་རོ། །ཨེ་མའོ་ཞེས་པ་ནི་ངོ་མཚར་ཆེ་བའོ། བླང་དོར་འབྱེད་ནུས་པའི་མཁས་པས་སྔར་བཤད་པ་ལྟར་ཉེས་པ་ལྡོག་མི་ལྡོག་གི་དབྱེ་བ་ཡོད་པ་འདི་གཉིས་ཀྱི་ཁྱད་པར་དེ་ལེགས་པར་ཁོང་དུ་ཆུད་པར་གྱུར་པ་དེའི་ཚེ། ཚིག་ཙམ་མ་ཡིན་པར་རྐང་གི་ཁོང་ནས་ཏེ་སྙིང་ཁོང་རུས་པའི་གཏིང་ནས་ནི་སྟོན་པ་ཁྱོད་ལ་ཅིའི་ཕྱིར་དུ་གུས་པར་མི་འགྱུར་ཏེ་གུས་དགོས་ཤིང་། མི་གུས་པའི་རྒྱུ་མཚན་མེད་པའི་ཕྱིར་ཞེས་པའོ། །དེ་ཡང་ཕྱོགས་ལྷུང་གིས་རང་གི་སྟོན་པ་མཆོག་དང་། གཞན་གྱི་སྟོན་པ་རྗེས་འབྲང་དང་བཅས་པ་ནི་དམན་པའོ་སྙམ་དུ་བཟུང་ནས་དད་པ་དང་མ་དད་པ་མི་བྱེད་པར། དེ་གཉིས་ཀྱིས་བཤད་པའི་གཞུང་གི་དོན་ལ། གཟུ་བོར་གནས་པའི་བློས་རིགས་པ་ཡང་དག་གིས་དཔྱད་པ་ན། རང་གི་སྟོན་པའི་གསུང་ནི་ལེགས་པར་བཤད་པ་དང་། ཅིག་ཤོས་དེ་ལས་ལྡོག་པར་ངེས་པའི་སྟོབས་ཀྱིས་གུས་མི་གུས་སྐྱེ་དགོས་པ་ཡིན་ཏེ། ལྷ་ལས་ཕུལ་བྱུང་གི་བསྟོད་པ་ལས། བདག་ནི་སངས་རྒྱས་ཕྱོགས་མི་འཛིན། །སེར་སྐྱ་སོགས་ལ་མི་སྡང་ཡང་། །གང་ཞིག་རིགས་པར་ལྡན་པའི་ཚིག །དེ་ཉིད་སྟོན་པར་ཡོངས་སུ་འཛིན། །ཞེས་དང་། མུ་སྟེགས་བྱེད་ཀྱི་གཞུང་ལུགས་ལ། །ཇི་ལྟར་ཇི་ལྟར་རྣམས་བསམས་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་ཡིད་ནི་དད་པར་གྱུར། །ཞེས་གསུངས་པ་བཞིན་ཏེ། ཚུལ་དེ་ལྟར་བྱ་དགོས་པར་སྔགས་རིམ་ཆེ་མོ་དང་། ཐར་ལམ་གསལ་བྱེད་ལས་ཀྱང་བཤད་དོ། །གསུམ་པ་ནི། སྟོན་པ་ཁྱོད་ཀྱི་གསུང་རབ་དུ་མའི་དོན་རྟོགས་པས་བདེ་བ་མཆོག་སྟེར་པ་ལྟ་ཅི་ཞིག་སྨོས། གསུང་གི་ཆ་ཤས་རེ་རེ་ཡི་དོན་ཙམ་ལའང་འོལ་སྤྱི་སྟེ་རགས་རིམ་ཙམ་གྱི་ངེས་པ་རྙེད་པ་དེ་ལའང་མཆོག་གི་བདེ་བ་སྟེར་བར་བྱེད་དོ། །མཆོག་གི་བདེ་བ་ནི་ངེས་ལེགས་ཀྱི་བདེ་བར་བྱས་ཀྱང་རུང་བར་སེམས་ལ། གནས་སྐབས་ཀྱི་དབང་དུ་བྱས་ཚེ་ཡིད་བདེ་བ་ལའང་གོ་བ་ལྟར་སྣང་ངོ་། ཀྱེ་ཧུད་ཅེས་པ་ནི་ཞུམ་ཞིང་ཡིད་འབྱུང་བའི་ཚིག་གོ །བདག་གི་བློ་གྲོས་ནི་མི་ཤེས་པའི་རྨོངས་པས་བཅོམ་སྟེ། ཇི་སྐད་སྨྲས་པ་འདི་འདྲ་བའི་ཡོན་ཏན་གྱི་ཕུང་པོ་ཆེན་པོའི་སྟོན་པ་ཁྱོད་ལ་སྔར་གྱི་དུས་རིང་པོ་ནས་སྐྱབས་སུ་སོང་བར་གྱུར་ཀྱང་ཁྱོད་ཀྱི་ཡོན་ཏན་མཐའ་དག་ལྟ་ཞོག །ཡོན་ཏན་གྱི་ཆ་ཤས་ཕྲ་མོ་ཙམ་ཡང་བདག་གིས་མ་འཚལ་ཏེ་ཤེས་པར་མ་གྱུར་ཏེ། མ་ཤེས་མོད། འོན་ཀྱང་སྟེ་དེ་ལྟ་ཡིན་ནའང་འཆི་བདག་གི་ཁར་ཕྱོགས་པའི་སྲོག་གི་རྒྱུན་ནི་མ་ནུབ་པར་གནས་པའི་དུས་འདི་ཉིད་ལ་སྟོན་པ་ཁྱོད་ལ་རིགས་པ་ཡང་དག་གི་སྒོ་ནས་ཅུང་ཟད་ཡིད་ཆེས་བརྙེད་པ་འདི་ཙམ་ཡང་བདག་ཉིད་སྐལ་བ་བཟང་པོ་ཞིག་གོ་སྙམ་བགྱིས་པ་སྟེ་བསམ་མོ། །འདི་རྗེ་ཉིད་ཁེངས་པ་སྐྱུངས་པའི་ཚུལ་གྱིས་གསུངས་པའོ། །མ་ནུབ་པར་ཞེས་འབྱུང་བ་དང་བསྟུན་པ་ཡིན་ལ། རྒྱལ་དབང་གི་དེར་བར་ཞེས་པའི་དོན་དུ་བཤད་དོ། །གསུམ་པ་དོན་བསྡུ་བ་ནི། འཆད་པའང་སྟོན་པའི་ནང་ནས་རྟེན་འབྲེལ་གྱི་དོན་ལེགས་པར་སྟོན་པ་དང་། ཤེས་རབ་ཀྱི་ནང་ནས་རྟེན་འབྲེལ་ཤེས་པའི་ཤེས་རབ་གཉིས་པོ་དེ་ཉིད། དཔེར་ན། འཇིག་རྟེན་དག་ན་རྒྱལ་བའི་དབང་པོ་སངས་རྒྱས་ཉིད་གཞན་ཀུན་ནས་ཁྱད་པར་དུ་འཕགས་པ་ཡིན་པ་དེ་བཞིན་དུ། དེ་གཉིས་ཀའང་གཞན་ལས་ཕུལ་དུ་བྱུང་བ་ལགས་པ་སྟེ་ཡིན་པར་སྟོན་པ་ཁྱོད་ཁོ་ནས་མཁྱེན་གྱི། ཕལ་པའམ་སྟོན་པ་གཞན་གྱིས་ཏེ་སེར་སྐྱ་སོགས་ཀྱིས་དེ་ལྟར་ཤེས་པ་མ་ཡིན་ནོ། ཆོས་སྤྱོད་འདི་དང་རྒྱལ་དབང་གི་དེར། ཕུལ་བྱུང་ལེགས་པར་ཞེས་འབྱུང་ཡང་གསུང་འབུམ་ཐོར་བུ་ལ་ལར་ལགས་པར་ཁྱོད་མཁྱེན་ཞེས་པ་ནི་བདེ་ཞིང་འཐད་པར་སེམས་ཏེ། ལགས་པ་ནི་ཡིན་ཞེས་པའི་དོན་ཡིན་པའི་ཕྱིར་རོ། །གཉིས་པ་རྟེན་འབྲེལ་གསུང་བའི་སྒོ་ནས་བྱེ་བྲག་ཏུ་བསྟོད་པ་ལ་གསུམ། རྟེན་འབྲེལ་གསུངས་པའི་དགོས་པ། ཐུབ་པའི་དགོངས་པ་རྟོགས་པར་བཞེད་པའི་ཐུགས་བསྐྱེད་ཚུལ། ཐུབ་པའི་དགོངས་པ་བཙལ་ཚུལ་དངོས་སོ། །དང་པོ་ལ་གསུམ། ཐར་པའི་ཆེད་དུ་ཆོས་བསྟན་ཚུལ། བསྟན་པའི་ཆོས་འཛིན་པར་གུས་ཚུལ། བསྟན་པ་ཉིད་ཀྱི་ཆེ་བ་བཤད་པའོ། །དང་པོ་ནི། སྟོན་པ་ཁྱོད་ཀྱིས་གསུང་རབ་ཇི་སྙེད་ཅིག་བཀའ་སྩལ་པ་ཐམས་ཅད་བརྗོད་བྱ་རྟེན་འབྲེལ་ཉིད་ལས་བརྩམས་ཏེ་འཇུག་ལ། དེ་ལྟར་འཇུག་པ་དེ་ཡང་གདུལ་བྱ་དེ་དག་གིས་ཐར་པ་མྱ་ངན་ལས་འདས་པ་ཐོབ་པར་འགྱུར་པའི་ཕྱིར་ཏེ་ཆེད་དུ་ཡིན་གྱི། གདུལ་བྱའི་ཉོན་མོངས་པ་ཞི་བར་འགྱུར་པའི་ཐབས་མ་ཡིན་པའི་མཛད་པ་སྟོན་པ་ཁྱོད་ལ་མེད་དོ། །འདི་ནི། སྤྱོད་འཇུག་ལས། ཡན་ལག་འདི་དག་ཐམས་ཅད་ཅན་ནི། །ཐུབ་པས་ཤེས་རབ་དོན་དུ་གསུངས། །དེ་ཡི་ཕྱིར་ན་སྡུག་བསྔལ་དག །ཞི་པར་འདོད་པས་ཤེས་རབ་བསྐྱེད། །ཅེས་དང་། ཇོ་བོས་ཀྱང་། ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་གསུངས་པ་ཐམས་ཅད་ཀྱང་། །ཆོས་ཉིད་ལ་ནི་གཞོལ་ཅིང་འབབ། །གསུངས་པའི་དགོངས་པའོ། །གསུང་འབུམ་ལ་ལར་ཞི་གྱུར་ཅེས་འདས་ཚིག་འབྱུང་ཡང་མི་འགལ་ལོ། །གཉིས་པ་ནི། ཀྱེ་མའོ་ཞེས་པ་ནི། སྤྱིར་སྨད་པ། སྨོན་པ། ཞུམ་པ། ངོ་མཚར་ཆེ་བ་རྣམས་ལ་འཇུག་པ་ལས་འདིར་ནི་ཕྱི་མའོ། །སྟོན་པ་ཁྱོད་ཀྱི་ལུང་གི་བསྟན་པ་ནི་གདུལ་བྱ་གང་གི་རྣ་བའི་ལམ་དུ་སོང་བའི་གདུལ་བྱ་དེ་དག་ཐམས་ཅད་ཞི་བ་མྱང་འདས་ཐོབ་པར་འགྱུར་པའི་ཕྱིར་ན། སྟོན་པ་ཁྱོད་ཀྱི་བསྟན་པ་འཛིན་པར་ནི་སུ་ཞིག་མི་གུས་ཏེ་གུས་རིགས་སོ། །འདིར་རྒྱལ་དབང་གི་དེར། ཁྱོད་ཀྱིས་བསྟན་པ་ཞེས་བྱེད་པའི་སྒྲ་འབྱུང་བ་ལྟར་ན། ལུང་གི་བསྟན་པ་ཞེས་པའི་དོན་མ་ཡིན་པར། ཆོས་བསྟན་ཞེས་པ་ལྟ་བུའི་དོན་ནོ། །གསུམ་པ་ནི། མུ་སྟེགས་ལ་སོགས་པ་ཕས་ཀྱི་རྒོལ་བ་མཐའ་དག་འཇོམས་པ་དང་ལྟག་འོག་སྟེ་གོང་འོག་འགལ་འདུས་སྟོང་པ་སྟེ་འགལ་འདུ་མེད་པ་དང་། སྐྱེ་རྒུའི་དགོས་པ་གནས་སྐབས་མཐར་ཐུག་གི་དོན་གཉིས་ཀྱི་འདོད་དོན་སྟེར་པར་བྱེད་པའི་ཁྱོད་ཀྱི་ཁྱད་ཆོས་གསུམ་ལྡན་གྱི་ལུགས་འདིར་ཁོ་བོ་བློ་བཟང་གྲགས་པའི་དཔལ་སྤྲོ་བ་ཆེས་ཆེར་འཕེལ་ལོ། །ལྟག་འོག་ཅེས་པ་ལ་གཉིས་ཏེ། གྲུབ་མཐའ་གོང་འོག་དང་། རང་ལུགས་གྱི་གྲུབ་མཐའི་འོག་མཇུག་ནས་བཤད་པ་གཉིས་ལས །དང་པོ་ནི། གྲུབ་མཐའ་བཞི་པོ་སོ་སོའི་གཞུང་ནས་བཤད་ཚུལ་མི་འདྲ་བ་ཡོད་ཀྱང་། དེ་ཐམས་ཅད་ཇི་སྐད་དུ། བསྟན་པ་ཐམས་ཅད་འགལ་མེད་རྟོགས་པ་དང་། ཞེས་པའི་ཚུལ་གྱིས་མི་འགལ་བར་ཤེས་དགོས་པ་དང་། ཕྱི་མ་ནི་ཁས་བླངས་སྔ་ཕྱི་མི་འགལ་བ་དང་། སྐབས་ཀྱི་དབྱེ་བས་ཀྱང་མི་འགལ་བ་སོགས་སུ་ཤེས་པའོ། །གཉིས་པ་ལ་གཉིིས། ཐུབ་པས་ནན་ཏན་གྱིས་བ སྒྲུབས་ཚུལ། དེ་རྟོགས་པར་བཞེད་པ་ཇི་ལྟར་འཁྲུངས་ཚུལ་ལོ། །དང་པོ་ནི། རྟེན་འབྲེལ་གྱི་ཆོས་ཟབ་མོ་འདི་བཙལ་བ་ཡི་ཕྱིར་ཏེ་ཆེད་དུ་སྟོན་པ་ཁྱོད་ཀྱིས་ནི་དུས་དང་གནས་སྐབས་ལ་ལར་རང་གི་སྐུ་སྟེ་ལུས་དང་། དུས་གཞན་དུ་སྲོག་དང་སྙིང་དུ་སྡུག་པའི་བུ་དང་ཆུང་མ་སོགས་གཉེན་དང་། ཟས་གོས་གནས་མལ་བཞོན་པ་སོགས་ལོངས་སྤྱོད་ཀྱི་ཚོགས་རྣམས། གྲངས་མེད་པའི་བསྐལ་པར་ལན་གཅིག་ཙམ་མ་ཡིན་པར་ཡང་དང་ཡང་དུ་བཏང་ངོ་། །དེ་ནི་འཛངས་བླུན་སོགས་ནས་བཤད་པ་ལྟར། ཆོས་ཚིགས་བཅད་རེ་རེའི་ཕྱིར་དུ་ལུས་ལ་ལྕགས་གཟེར་སྟོང་བཏབ་པ་དང་། མར་མེ་སྟོང་བཙུགས་པ་དང་། མེར་མཆོངས་པ་ལ་སོགས་པའོ། །གཉིས་པ་ནི། རྟེན་འབྲེལ་གྱི་ཆོས་གང་གི་ཡོན་ཏན་ནི། རྟོགས་པ་ཙམ་གྱིས་སྲིད་པའི་རྩ་བ་གཅོད་པ་དེ་མཐོང་བ་ཡི་སྟོབས་ཀྱིས། དཔེར་ན། ལྕགས་ཀྱུས་ཉ་ལ་སྟེ་དེས་ཉ་འདྲེན་པའམ། འགུགས་པ་ཇི་ལྟ་བ་དེ་བཞིན་དུ། སྟོན་པ་ཉིད་ཀྱི་ཐུགས་དྲངས་པ་སྟེ། འཕྲོག་པའི་རྟེན་འབྲེལ་གྱི་ཆོས་ཟབ་མོ་དེ་ནི་སྟོན་པ་ཁྱོད་ཉིད་ལས་དངོས་སུ་མ་ཐོས་པས་བདག་ནི་སྐལ་པ་ཞན་པ་སྟེ་དམན་པ་ཞིག་གོ་སྙམ་དུ་བསམས་སོ། །དེ་ལྟར་བསམས་པ་དེ་ཡི་མྱ་ངན་གྱི་ཤུགས་ཏེ་སྟོབས་ཀྱིས་ནི། དཔེར་ན། སྙིང་དུ་གཅེས་ཤིང་སྡུག་པའི་བུ་ཤི་བ་ལ། དེ་ཉིད་ཀྱི་མ་ཡི་ཡིད་རྗེས་སུ་སོང་བ་སྟེ་ཕྱོགས་པ་ཇི་ལྟ་བ་དེ་བཞིན་དུ། སྟོན་པ་ཁྱོད་དྲན་ནས་གུས་ཤིང་བསྟོད་པར་འདུན་པ་ལས་བདག་གི་ཡིད་ནི་གཏོང་བར་མི་བྱེད་ལགས་སོ། །ཉིད་ཀྱི་ཐུགས་དྲངས་ཞེས་པ་ནི་གོ་བདེ་བར་བྱེད་ན། ལྕགས་ཀྱུས་ཉ་འདྲེན་པ་དང་དྲངས་ནས་བྱ་བ་ལ་འཇུག་པ་དེ་བཞིན་དུ། རྟེན་འབྲེལ་རྟོགས་པའི་ཕན་ཡོན་མཐོང་ནས་སྟོན་པའི་ཐུགས་དྲངས་ཏེ། རྟེན་འབྲེལ་གྱི་ཆོས་འཚོལ་བ་ལ་སྔོན་འབད་པར་མཛད་ཅེས་པའོ། སྐལ་པ་གཞན་ཞེས་པ་ནི་མ་དག་གོ །ཡིད་གཏོང་པར་མི་བྱེད་པ་ནི། སྟོན་པ་ལ་གུས་ཤིང་བསྟོད་པའི་འདུན་པ་མི་འཇོག་པའོ། སྐབས་འདིར་ཤུགས་ཞེས་པ་ནི་སྟོབས་ཀྱིས་ཞེས་པའི་དོན་ཡིན་གྱི། དངོས་དང་ཤུགས་ཀྱི་ཟླས་ཕྱེ་པའི་ཤུགས་བསྟན་གྱི་དོན་མིན་ནོ། འོན་ཀྱང་ཞུགས་ཞེས་གསུངས་སྒྲོས་ཡོད་པ་ལྟར་ན། མྱ་ངན་གྱི་མེ་ཡིས་ཞེས་པ་སྟེ། ཞུགས་ཀྱི་སྒྲ་ནི་མེ་ལ་འཇུག་པས་སོ། །དེ་ལྟར་ཡིད་མྱ་ངན་གྱིས་གདུང་བའི་སྐབས་འདི་ལའང་སྟོན་པ་ཁྱོད་ཀྱི་གསུང་རབ་ཀྱི་ཚིག་དོན་ལ་བསམས་པ་ན། མཚན་སོ་གཉིས་དང་དཔེ་བྱད་བརྒྱད་ཅུའི་དཔལ་གྱི་རབ་ཏུ་འབར་ཞིང་། འོད་ཀྱི་དྲ་བས་ཡོངས་སུ་བསྐོར་བའི་སྟོན་པ་དེའི་གསུང་ཡན་ལག་དྲུག་ཅུ་དང་ལྡན་པའི་ཚངས་པའི་དབྱངས་ཀྱིས་ཆོས་ཚུལ་འདི་ནི་ཚུལ་འདི་ལྟར་གསུངས་སོ་སྙམ་དུ་བསམས་ཏེ། ཡིད་ལ་ཐུབ་པའི་དབང་པོ་ཁྱོད་ཀྱི་སྐུའི་གཟུགས་བརྙན་ཏེ་དོན་སྤྱི་ནི་ཤར་བ་ཙམ་ཡང་། ཚ་བ་ཡི་དྲོད་ཀྱིས་གདུངས་པ་ལ། ཤིན་ཏུ་བསིལ་བའི་ཟླ་ཟེར་ཕན་པའི་རྐྱེན་དུ་གྱུར་བ་བཞིན་དུ་བདག་གི་ཡིད་ལ་སྨན་པ་སྟེ་ཕན་པར་གྱུར་ཏེ། འདི་ལའང་ཞེས་པའི་འདི་ནི། རྟེན་འབྲེལ་གསུང་པའི་ཚུལ་འདི་ལའང་ཞེས་པ་ཞིག་ཀྱང་ཐོབ་པར་སེམས་ལ། འང་ནི་སྐབས་གཞན་དུ་མ་ཟད་ཅེས་པ་སྟེ་དེ་ལྟར་ན་འདི་ནི་ཞེས་པ་ནི་རྟེན་འབྲེལ་སྟོན་པའི་གསུང་རབ་གཙོ་ཆེའོ། །ཤར་བ་ཙམ་ཡང་ཞེས་པ་ནི། དངོས་སུ་མཐོང་བ་དང་ཐོས་ན་སྨན་པར་འགྱུར་པ་ལྟ་ཅི་སྨོས་པའོ། །གསུམ་པ་ལ་གསུམ། འཚོལ་པའི་རྒྱུ། བཙལ་པའི་ཚུལ། ཇི་ལྟར་རྙེད་པའོ། །དང་པོ་ནི། སྔར་བཤད་པ་དེ་ལྟར་ངོ་མཚར་རྨད་དུ་བྱུང་བ་ཡི་རྟེན་འབྲེལ་གྱི་རྣམ་པར་གཞག་པའི་ལུགས་བཟང་པོ་དེ་ཡང་མི་མཁས་ཤིར་མཁས་པར་རློམ་པའི་སྐྱེ་བོ་གྲུབ་མཐའ་སྨྲ་བ་འགའ་ཞིག་གིས་དཔེར་ན་བལ་པ་ཛ་བཞིན་དུ་རྣམ་པ་ཀུན་ཏུ་འཛིངས་པ་སྟེ་འཁྲུགས་པར་བྱས་སོ། །འདིར་ཕལ་པ་ཛ་ཞེས་འབྱུང་བ་ནི་མ་དག་པར་སེམས་ཏེ། གཞུང་འགའ་ཞིག་ལས་བལ་བ་ཛ་ཞེས་འབྱུང་ཞིང་། དེ་ཡང་གཡའ་སྤང་མཚམས་སུ་སྐྱེ་བའི་རྩྭ་ཟི་དུ་ཞེས་གྲགས་པ་ཞིག་ལ་བཤད་དོ། །གང་ལྟར་ཡང་ཕར་འཛིངས་ཚུར་འཛིངས་སུ་ཡོད་པའི་རྩྭའི་རིགས་ཞིག་སྟེ། རྩྭ་དེ་འཁྲུགས་ནས་ཡོད་པ་དེ་བཞིན་དུ་རྒྱ་བོད་ཀྱི་མཁས་རློམ་དུ་མས་གྲུབ་མཐའ་སོ་སོའི་ཁྱད་པར་དང་། མདོ་སྔགས་ཀྱི་དགོངས་པ་དྲང་ངེས་དོན་གྱི་དབྱེ་བ་ལེགས་པར་མ་ཕྱེད་པར་མ་བཤད་ལོག་བཤད་ཀྱིས་འཁྲུགས་པར་བྱས་པའོ། །གཉིས་པ་ནི། དེ་ལྟར་འཁྲུགས་པར་བྱས་པའི་ཚུལ་འདི། ཁོ་བོ་བློ་བཟང་གྲགས་པའི་དཔལ་གྱིས་རྣམ་དཔྱོད་ཀྱིས་ལེགས་པར་མཐོང་བས་རྐྱེན་བྱས་ནས་བདག་གིས་ནི་འབད་པ་དུ་མས་ཀླུ་སྒྲུབ་ཐོགས་མེད་སོགས་རྒྱལ་བའི་དགོངས་པ་འགྲེལ་པ་ལ་ཚད་མར་གྱུར་པའི་འཕགས་ཡུལ་གྱི་མཁས་པ་ཡི་གསུང་རབ་ནས་བཤད་པའི་རྗེས་སུ་འབྲངས་ནས་སྟོན་པ་ཁྱོད་ཀྱི་ནི་དགོངས་པ་ལན་ཅིག་མ་ཡིན་པར་ཡང་དང་དུ་བཙལ་ལོ། །མཁས་པའི་རྗེས་སུ་འབྲང་བ་དང་གསུང་རབ་ནས་བཤད་པའི་རྗེས་སུ་འབྲང་བ་གང་བྱས་ཀྱང་མི་འགལ་ལོ། །གསུམ་པ་ལ་གཉིས། ཚེགས་ཆུང་ངུས་མ་རྙེད་པ་དང་། བླ་མའི་དྲིན་གྱིས་རྙེད་པའོ། །དང་པོ་ནི། དེ་ལྟར་བཙལ་བ་དེའི་ཚེ་རང་དང་གཞན་གྱི་སྡེ་པ་ཡི་གཞུང་ལུགས་མང་པོ་དག་ལ་སྦྱངས་པ་ན། དེ་དག་གི་བཤད་ཚུལ་མི་མཐུན་པ་ལ་བརྟེན་ནས་ཕྱི་ཕྱིར་སླར་གང་མི་འཐད་ཅེས་བྱ་བ་ལ་སོགས་པའི་ཐེ་ཚོམ་གྱི་དྲི་བ་ཡིས་འཚོལ་བ་པོ་བདག་གི་ཡིད་ནི་ཀུན་ཏུ་སྟེ་རབ་ཏུ་གདུངས་སོ། །འདིར་རང་གི་སྡེ་བ་ནི་ནང་པ་སངས་རྒྱས་པ་དང་། གཞན་གྱི་སྡེ་བ་ནི་ཕྱི་རོལ་པའི་གྲུབ་མཐར་ཞུགས་པ་སྟེ། གཞུང་ཡང་དེ་གཉིས་ཀྱིས་བཤད་པའི་གཞུང་རྣམས་ལ་བྱེད་དགོས་པར་སེམས་སོ། འོན་ཀྱང་། རང་ངམ་གཞན་གྱི་གྲུབ་པའི་མཐའ། ཞེས་པའི་སྐབས་སུ་རང་སྔགས་དང་གཞན་ཕ་རོལ་ཏུ་ཕྱིན་པའི་གྲུབ་མཐའ་ལ་བཤད་པའང་ཡོད་དོ། །གཉིས་པ་ནི། སྟོན་པ་ཁྱོད་ཀྱི་བླ་ན་མེད་པའི་ཐེག་པའི་ཚུལ་ཏེ་ལུགས་སམ་རྣམ་གཞག་ལ་རང་བཞིན་གྱིས་ཡོད་པ་དང་། ཐ་སྙད་དུ་མེད་པའི་སྒྲོ་སྐུར་གྱི་མཐའ་སྤངས་ཏེ་རྒྱལ་བའི་དགོངས་པ་ཇི་ལྟ་བ་བཞིན་དུ་འགྲེལ་བར་སྟོན་པ་རང་ཉིད་ཀྱིས་འཇམ་དཔལ་རྩ་རྒྱུད་དང་ལང་ཀར་གཤེགས་པ་རྔ་བོ་ཆེའི་མདོ་སོགས་ལས་ལུང་བསྟན་པ་མགོན་པོ་ཀླུ་སྒྲུབ་ཀྱི་གཞུང་ལུགས་རྩ་བ་ཤེས་རབ་ལ་སོགས་པའི་ཀུན་དའི་ཚལ་རྣམས་ཀྱིས་ཚིག་དོན། འཁྲུལ་བའི་དྲི་མ་མེད་པའི་མཁྱེན་པའི་དཀྱིལ་འཁོར་རབ་ཏུ་རྒྱས་ཤིང་། རྒྱལ་བའི་གསུང་རབ་ཀྱི་ནམ་མཁའ་ལ་ཐོགས་པ་མེད་པར་རྒྱུ་བས་གདུལ་བྱའི་རྒྱུད་ཀྱི་རྟག་ཆད་ཀྱི་མཐར་འཛིན་གྱི་འཆིང་བ་འགྲོལ་བའི་སྙིང་གི་སྟེ་ཡིད་སྒྲིབ་བྱེད་ཀྱི་མུན་པ་སེལ་བར་བྱེད་ཅིང་། གཞུང་དོན་ལོག་པར་སྨྲ་པའི་མཁས་རློམ་རྒྱུ་སྐར་གྱི་ཚོགས་ཟིལ་གྱིས་གནོན་པར་མཛད་པ་དཔལ་ལྡན་ཟླ་བ་གྲགས་པའི་ལེགས་བཤད་དབུ་མ་འཇུག་པ་དང་། རྩ་བ་ཤེས་རབ་ཀྱི་འགྲེལ་པ་ཚིགས་གསལ་དང་། རིགས་པ་དྲུག་ཅུ་པའི་འགྲེལ་པ་ལ་སོགས་པ་རྣམས་ཀྱི་འོད་དཀར་གྱི་འཕྲེང་བས། ཆེས་ཆེར་གསལ་བར་བྱས་པའི་དོན་བླ་མ་འཇམ་པའི་དབྱངས་ལ་སོགས་པའི་དྲིན་གྱི་མཐུ་ལས་བློ་གྲོས་ཀྱིས་མཐོང་པའི་ཚེ། བློ་བཟང་གྲགས་པའི་དཔལ་བདག་གི་ཡིད་ཀྱིས་བདེ་བའི་ངལ་གསོ་ཐོབ་བོ། །འདི་དག་གོ་བདེ་བར་བྱས་ཚེ། དཔེ་དང་དཔེ་ཅན་སོ་སོར་བཤད་ན་ཀླུ་སྒྲུབ་ཀྱི་གསུང་དང་མེ་ཏོག་ཀུན་ད་སྦྱར། དཔལ་ལྡན་ཟླ་བའི་གསུང་དང་། ཟླ་བའི་འོད་ཟེར། གསུང་རབ་སྤྱི་དང་ཁྱད་པར་སྟོན་པའི་གསུང་དང་ནམ་མཁའ། མཐར་འཛིན་དང་མུན་པ། ལོག་པར་སྨྲ་བ་དང་རྒྱུ་སྐར་སྦྱར་བ་སྟེ། དེ་དག་གི་བྱེད་ལས་ཀྱང་དེས་གོ་བར་འགྱུར་རོ། །འདིར་བསྟན་པའི་བླ་མའི་གཙོ་བོ་ནི་འཇམ་པའི་དབྱངས་ཡིན་པར་སྐབས་སྟོབས་ཀྱིས་ཤེས་ལ། ཆོས་སྤྱོད་འདིར་ཡིད་ཀྱིས་ཞེས་བྱེད་སྒྲ་འབྱུང་ལ། གསུང་འབུམ་དང་རྒྱལ་དབང་གི་དེར་ཡིད་ཀྱི་ཞེས་དྲུག་པའི་སྒྲ་ཡོད་དོ། །དེའི་དང་པོ་ལྟར་ན་ཡིད་ཐོབ་པ་པོ་དང་། ངལ་གསོ་ནི་ཐོབ་བྱའོ། །ཕྱི་མ་ལྟར་ན། ཡིད་ཀྱིི་ངལ་གསོ་ཐོབ་བྱ་དང་། རྗེ་ཉིད་ཐོབ་པ་པོར་འཇོག་དགོས་ལ། དང་པོ་ལའང་རྗེ་བླ་མ་ཐོབ་པ་པོར་དོན་གྱིས་གོའོ། །གསུམ་པ་དོན་བསྡུ་བ་ནི། ཐུབ་པའི་དབང་པོའི་སྐུ་གསུང་ཐུགས་ཀྱི་མཛད་པ་ཀུན་ལས་གསུང་གི་ནི་མཛད་པ་མཆོག་ཡིན་ཞིང་། གསུང་གི་མཛད་པ་མཆོག་དེ་ཡང་ནི་རྟེན་འབྲེལ་གསུངས་པའི་ཚུལ་འདི་ཉིད་ཡིན་པའི་ཕྱིར་ན། བསྟན་པའི་གནད་མཐོང་བའི་མཁས་པ་ཡིས་རྟེན་འབྱུང་གསུངས་པའི་ཚུལ་འདི་ལས་སངས་རྒྱས་རྗེས་སུ་དྲན་པར་བྱོས་ཤིག་ཅེས་པའོ། །རྒྱལ་དབང་གི་དེར་ནི། བསྟོད་པའི་ཚུལ་འདི་ལས་ཞེས་འབྱུང་ངོ་། རྗེས་སུ་དྲན་པ་ནི་སངས་རྒྱས་ཀྱི་བཀའ་དྲིན་དྲན་པ་དང་སངས་རྒྱས་དྲན་པ་གང་ལ་སྦྱར་ཀྱང་རུང་བར་སྣང་ངོ་། གཉིས་པ་ལ་གཉིས། རྩོམ་པའི་རྒྱུ་མཚན་དང་། བསྔོ་བའོ། དང་པོ་ནི། ཐུབ་པ་ལ་དེ་ལྟར་བསྟོད་པའི་རྒྱུ་མཚན་གང་ཞེ་ན། ཡོད་དེ། སྟོན་པ་བླ་ན་མེད་པ་དེའི་རྗེས་སུ་རབ་ཏུ་བྱུང་བར་གྱུར་ཏེ་རྒྱལ་བའི་གསུང་རབ་ཀུན་ལ་སྦྱངས་པ་མི་དམན་ཞིང་། དོན་ཉམས་སུ་ལེན་པའི་རྣལ་འབྱོར་གྱི་སྦྱོད་པ་ལ་བརྩོན་པའི་དགེ་སློང་བློ་བཟང་གྲགས་པའི་དཔལ་ཞེས་བྱ་བ་ཞིག །དྲང་སྲོང་ཆེན་པོ་ཐུབ་དབང་དེ་ལ་དེ་ལྟར་གུས་སོ་ཞེས་ཤེས་པར་བྱ་བའི་ཆེད་ཡིན་པའི་ཕྱིར་རོ། །སྦྱངས་པ་ཇི་ལྟར་མཛད་པ་ནི། རྣམ་ཐར་རྣམས་དང་། རྗེ་ཉིད་ཀྱིས་མཛད་པའི་རྟོགས་བརྗོད་ལས་ཤེས་པར་བྱའོ། །སྤྱིར་དྲང་སྲོང་གི་སྒྲ་དོན་ནི། ཡིད་དྲང་པོར་སྲོང་པ་ལ་བཤད་ཅིང་། དེ་ལའང་འཇིག་རྟེན་པ་དང་འཇིག་རྟེན་ལས་འདས་པའི་དྲང་སྲོང་གཉིས་ཡོད་ལ། འདིར་ནི་སྟོན་དེའི་ཞེས་པའི་ཚིག་དང་འབྲེལ་བས་སྟོན་པ་ཉིད་ལ་གོའོ། །གཉིས་པ་ལ་གཉིས། བསྔོ་བ་དང་། སྨོན་ལམ་མོ། །དང་པོ་ནི། སྟོན་པ་བླ་ན་མེད་པའི་ཞེས་སོགས་རྐང་པ་བཞིས་སྟོན་ཏེ། དོན་ནི། སྟོན་པ་བླ་ན་མེད་པའི་ལུང་རྟོགས་ཀྱི་བསྟན་པ་དང་། ཐོས་བསམ་སྒོམ་གསུམ་གྱི་སྒོ་ནས་མཇལ་རྒྱུ་བྱུང་བ་འདི་འདྲ་བ་ནི། བླ་མའི་དྲིན་ཡིན་པས་ན། དགེ་བ་གཞན་དུ་མ་ཟད་བསྟོད་པ་འདི་བརྩམས་པ་ལས་བྱུང་བའི་དགེ་བ་འདི་ཡང་འགྲོ་བ་མ་ལུས་པ་ཐམས་ཅད། དགེ་བའི་བཤེས་གཉེན་དམ་པས་རྗེས་སུ་འཛིན་པའི་རྒྱུ་རུ་བསྔོའོ། །སྐབས་འདིའི་བླ་མ་ནི་བཤེས་གཉེན་སྤྱིའི་དབང་དུ་བྱས་པའོ། །རྒྱལ་བའི་བསྟན་པ་ནི། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །ཞེས་གསུངས་པ་ལྟར། ལུང་གི་བསྟན་པ་དང་། རྟོགས་པའི་བསྟན་པ་གཉིས་སུ་ངེས་ཤིང་། ལུང་གི་བསྟན་པ་ལ་ཐོས་བསམ་དང་། རྟོགས་པའི་བསྟན་པ་ལ་ཉམས་ལེན་བྱས་ན། སངས་རྒྱས་ཀྱི་བསྟན་པ་ལ་གནས་པ་དང་། དེ་འཛིན་པ་ཞེས་བྱའོ། །གཉིས་པ་ནི། ཕན་མཛད་དེའི་བསྟན་པའང་། ཞེས་སོགས་ཚིགས་སུ་བཅད་པ་བཞིས་སྟོན་ཏེ། འདི་ལ་བཞིའི་དང་པོ་ནི། འགྲོ་བ་ལ་གནས་སྐབས་དང་མཐར་ཐུག་གི་ཕན་པ་སྒྲུབ་པར་མཛད་པ་སྟོན་པ་དེ་ཡི་བསྟན་པའང་སྲིད་པའི་མཐར་ཐུག་པའི་བར་དུ་སྟེ་འཁོར་པའི་མཐའ་བར་དུ། བསྟན་པ་འདི་ལ་མ་གུས་པ་དང་། མ་རྟོགས་པ་དང་། ལོག་པར་རྟོག་པའི་སྐྱེ་བོའི་ངན་རྟོག་གི་རླུང་གི་ཤུགས་ཀྱིས་རྣམ་པར་མི་གཡོ་ཞིང་། བསྟན་པའི་ངང་ཚུལ་རྟེན་འབྲེལ་སྟོན་པ་ཉིད་བསྟན་པའི་སྙིང་པོར་ཤེས་པར་བྱས་ནས་དེས་དྲངས་པའི་དད་པས་སྟོན་པ་ལ་ཡིད་ཆེས་རྙེད་པས་རྟག་ཏུ་རང་རྒྱུད་གང་བར་ཤོག་ཅིག་ཅེས་པ་སྟེ། སྲིད་པའི་མཐར་ཞེས་པས་འཁོར་བའི་ཕྱི་མཐའ་སྟོངས་ཀྱི་བར་དུ་བསྟན་པ་གནས་པར་སྨོན་པ་ཡིན་ལ། དེ་ནི་བརྟག་པ་མཐའ་བཟུང་ཙམ་སྟེ །དཔེར་ན། ནམ་མཁའི་མཐར་ཐུག་གྱུར་པ་ཅི་ཙམ་པ། །ཞེས་གསུངས་པ་བཞིན་ནོ། །ངན་རྟོག་རླུང་དང་སྦྱར་བའི་ཤུགས་ཀྱིས། བསྟན་པ་ནི་མར་མེ་དང་སྦྱོར་བ་འཐོབ་སྟེ། དེ་ཡང་མཛོད་ལས། དེ་ཉིད་མ་མཐོང་རང་དགར་སྤྱོད་གྱུར་པའི། །ངན་རྟོག་རྣམས་ཀྱིས་བསྟན་པ་འདི་དཀྲུགས་སོ། །ཞེས་གསུངས་པ་དང་འདྲའོ། །ཡིད་ཆེས་རྙེད་པས་གང་བ་ནི། སྟོན་པ་ལ་རིགས་པ་ཡང་དག་གིས་ཡིད་ཆེས་ཐོབ་པ་ཙམ་དུ་མ་ཟད། དེ་དུས་རྒྱུན་དུ་གནས་ཤིང་འཕེལ་བར་སྨོན་པའོ། །འང་ནི་བསྔོ་བར་དེར་མ་ཟད་ཅེས་པའོ། །གཉིས་པ་ནི། བརྟེན་ནས་འབྱུང་བའི་དེ་ཉིད་དེ་རྟེན་འབྲེལ་གྱི་ཆོས་ཉིད་རང་བཞིན་གྱིས་སྟོང་པའི་དོན་གསལ་བ་སྟེ་བསྟན་ནས་རྒྱས་པར་མཛད་པའི་སྒོ་ནས་ཐུབ་པའི་ལུགས་བཟང་ལུང་རྟོགས་ཀྱི་བསྟན་པ་རྣམ་གཉིས་སྐྱེ་བ་ཐམས་ཅད་དུ་ལུས་དང་སྲོག་ཀྱང་བཏང་ནས་འཛིན་པ་ལ། དུས་རིང་པོར་ལྟ་ཅི། དུས་སྐད་ཅིག་ཙམ་ཡང་ལྷོད་པར་མ་གྱུར་ཅིག་ཅེས་པའོ། །གསུང་འབུམ་ལས་གསལ་མཛད་པས། ཞེས་འབྱུང་བ་ལྟར་བཤད་ཀྱི་འདིར་ས་སྒྲ་མེད་པ་ལྟར་ན། ལུགས་བཟང་ནི་རྟེན་འབྲེལ་གྱི་ཆོས་ཚུལ་གསལ་བ་ལ་གོ་བར་བྱའོ།། ཀྱང་ནི་རྐྱེན་ཕྲན་ཚེགས་ཀྱིས་གཏོང་བ་ལྟ་ཅི། ལུས་སྲོག་ལ་བབ་ཀྱང་དེ་བོར་ནས་བསྟན་པ་འཛིན་པའོ། །མི་ལྷོད་པ་ནི་བརྩོན་པ་མི་འདོར་པ་སྟེ། ལྷོད་པ་ཡང་དེའི་ཟློག་ཕྱོགས་སོ། །གསུམ་པ་ནི། འདྲེན་པ་མཆོག་སྟོན་པ་དེས་སྔར་བཤད་པ་ལྟར་ལུས་གཏོང་བ་སོགས་དཀའ་བ་དཔག་མེད་ཀྱི་སྒོ་ནས་ནན་ཏན་སྙིང་པོར་མཛད་ནས་བསྒྲུབས་པའི་བསྟན་པའི་སྙིང་པོ་རྟེན་འབྲེལ་གྱི་ཆོས་ཚུལ་རྣམ་པར་བཞག་པ་འདི། ཐབས་གང་འདྲ་བ་ཞིག་གིས་འཕེལ་བར་འགྱུར་སྙམ་པའི་རྣམ་པར་དཔྱོད་པས་ཉིན་དང་མཚན་གྱི་དུས་འདའ་བར་ཤོག་ཅིག་ཅེས་པའོ། །ནན་ཏན་སྙིང་པོར་མཛད་པ་ནི་བརྩོན་འགྲུས་དྲུག་པོའི་སྒོ་ནས་བསྒྲུབས་པའི་དོན་ནོ། །བཞི་པ་ནི་རང་གཞན་ལ་ཕན་པར་འདོད་པའི་ལྷག་བསམ་རྣམ་པར་དག་པས། ཐུབ་པས་བསྒྲུབས་པའི་བསྟན་པའི་སྙིང་པོ་འཛིན་པའི་ཚུལ་དེར་བརྩོན་པར་བྱེད་པའི་ཚེ་ན། ཚངས་པ་དང་། དབང་པོ་བརྒྱ་བྱིན་དང་འཇིག་རྟེན་སྐྱོང་བ་རྒྱལ་པོ་ཆེན་པོ་བཞི་དང་། དེར་མ་ཟད་མགོན་པོ་ལེགས་ལྡན་ནག་པོ་ལ་སོགས་པ་སྟེ་ཆོས་ཀྱི་རྒྱལ་པོ་རྣམ་ཐོས་སྲས་སོགས་ཆོས་སྐྱོང་སྲུང་མས་ཀྱང་གཡེལ་བ་མེད་པར་དུས་ཐུང་ངུ་ཙམ་མིན་པར་དུས་རྟག་ཏུ་གྲོགས་བྱེད་པར་ཤོག་ཅིག་ཅེས་པའོ། །ལེགས་ལྡན་ནག་པོ་ནི་སྐབས་འདིར་ཕྱག་དྲུག་པ་ལ་བྱེད་དགོས་པར་སེམས་ལ། གདུགས་དཀར་ལས། ལེགས་ལྡན་གསུམ་བཤད་པའི་ལེགས་ལྡན་ནག་པོ་ནི།  མགོན་པོ་བེང ་ཡིན་ཞེས་མཁས་གྲུབ་རིན་པོ་ཆེས་བཤད་དོ། །སྤྱིར་བསྔོ་བ་དང་སྨོན་ལམ་གཉིས་མི་འགལ་ཏེ། བསྔོ་རྒྱུའི་དགེ་བ་རྒྱུར་བྱས་ནས་རྫོགས་བྱང་ཐོབ་པར་སྨོན་པ་ནི་བསྔོ་བ་དང་སྨོན་ལམ་གཉིས་གར་འགྱུར་བའི་ཕྱིར་རོ། །མཛད་བྱང་ལ། ཅེས་སངས་རྒྱས་བཅོམ་ལྡན་འདས་ཞེས་སོགས་ཀྱི་དོན་ནི་སླའོ། །སྨྲས་པ། རྒྱལ་པའི་ཡེ་ཤེས་གཅིག་ཏུ་ཡོངས་བསྡུས་ཏེ། །མཁྱེན་པའི་ཐིག་ལེ་མཆོག་མར་རབ་གྲགས་པ། །བརྟན་པའི་འཁོར་ལོ་མི་ཡི་རྣམ་རོལ་དེས། །ཞབས་སེན་སླར་ཡང་བདག་གི་སྤྱི་བོར་ཞོག ཁྱོད་ཀྱི་ལེགས་བཤད་གསལ་པའི་ཉིན་མོར་བྱེད། །ཐུབ་བསྟན་བྱ་ལམ་ཡངས་པར་ཤར་པ་ན། །མཐའ་ཡས་གཞུང་ལུགས་པད་ཚལ་རྒོད་པ་དང་། །ལྷན་ཅིག་ཉེས་བཤད་ཀུན་ད་ཟུམ་སྙམ་གྱུར། ཁྱད་པར་རྟེན་ཅིང་འབྲེལ་བར་འབྱུང་པའི་ལམ། །ཇི་བཞིན་སྣང་བར་བྱས་ཚེ་རྟག་ཆད་ཀྱི། །གཅོང་རོང་ཁྲོད་ན་རྩེ་བའི་མེ་འཁྱེར ཀུན། །ཟིལ་མནན་ཐུབ་བསྟན་འཛིན་མ་ཅི་ཡང་གསལ། །ཚུལ་དེས་ཐུགས་དྲངས་ཐུབ་པ་ཆེན་པོ་ཉིད། །མཉེས་བྱེད་རྟེན་འབྲེལ་རྔ་གསང་ཆེར་བསྒྲགས་པས། །མཁས་མང་མདོངས་ལྡན་ཡོངས་ཀྱི་སྙིང་དབུས་སུ། །སིམ་པའི་དགའ་སྟོན་མཆོག་ཏུ་སྟེར་བར་མཛད། །རྗེ་བཙུན་བླ་མའི་དགོངས་པ་འཆད་པ་ལ། །ཞུགས་འདིར་གལ་ཏེ་ཉེས་པར་གྱུར་གང་འཆགས། །ཇི་བཞིན་བཤད་ལས་ཐོབ་པའི་དགེ་བ་ཡང་། །རྒྱལ་བའི་དམ་ཆོས་མ་ལུས་འཛིན་ཕྱིར་བསྔོ་། །ཅེས་པ་འདི་ནི་རྣམ་དཔྱོད་ཅན་དགེ་སློང་བློ་བཟང་ནོར་བུས་བསྐུལ་བའི་ངོར་ཅོ་ནེའི་སྔགས་མཚན་ཉིད་གཉིས་ཀྱི་བླ་མའི་གོ་སར་གནས་པ་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་བྲིས་པའི་རྒྱས་པ་ནས་དངོས་གཞི་ཙམ་ཟུར་དུ་ཕྱུང་སྟེ་པར་དུ་བཀོད་པའི་ཡི་གེ་པ་ནི་བཙུན་པ་བློ་བཟང་དར་རྒྱས་ཀྱིས་བྲིས་པའོ། །སརྦ་མངྒ་ལཾ།། ཤུ་བཾ།།