ཀ་ཁའི་འཕྲེང་བ་དང་སྦྱར་བའི་བྱ་དཀའི་སྒྲ་རྒྱན་ཟུང་ལྡན་བློ་གསལ་ཡིད་འཕྲོག
ཀ་ཁའི་འཕྲེང་བ་དང་སྦྱར་བའི་བྱ་དཀའི་སྒྲ་རྒྱན་ཟུང་ལྡན་བློ་གསལ་ཡིད་འཕྲོག་ཅེས་བྱ་བ་བཞུགས།
ན་མོ་མཉྫུ་གྷོ་ཥཱ་ཡ། མ་ལུས་ལུས་ཅན་འགྲོ་ལ་རྗེས་བརྩེ་བརྩེ་བས་དམ་པའི་ཆོས་ཚུལ་ཚུལ་བཞིན་སྟོན་མཛད་བླ་མ་དང་། །ཆོས་ཀུན་ཀུན་ནས་ཇི་བཞིན་ལེགས་མཁྱེན་མཁྱེན་བརྩེ་སྤངས་རྟོགས་ཡོངས་རྫོགས་རྫོགས་པའི་སངས་རྒྱས་བཅོམ་ལྡན་འདས། །བདེན་གཉིས་གཉིས་མེད་སྡུག་ཀུན་ཉེར་ཞི་ཞི་བ་ཉེས་པའི་སྐྱོན་བྲལ་བྲལ་བ་ལམ་བདེན་དམ་པའི་ཆོས། །ལེགས་ཚོགས་ཚོགས་གཉིས་ཉམས་སུ་ལེན་མཛད་མཛད་མཆོག་གཞན་ལས་ཁྱད་འཕགས་འཕགས་པའི་དགེ་འདུན་བཅས་ལ་འདུད། །ཀ་མ་ལ་དང་བསིལ་ཟེར་ཅན་སྟེང་གསལ་གསལ་མཚན་དཔེའི་དཔལ་འབར་འབར་བའི་འོད་ཀྱི་དྲ་བ་ཅན། ཁ་དོག་གཙོ་མའི་གསེར་གྱི་མདོག་ལྟར་ལྷང་ལྷང་ཆེས་གསལ་རབ་བརྗིད་བརྗིད་ཆགས་གསེར་གྱི་ལྷུན་པོ་བཞིན། །ག་ན་འདུག་སྟེ་བསྒྲིམས་ཞིང་འབད་པས་ཡང་ཡང་བལྟས་ཀྱང་ཡིད་ཀུན་ཀུན་ནས་འཕྲོག་བྱེད་དད་གུས་གཡོ། །ང་སོགས་ཐར་འདོད་གདུལ་བྱའི་ཚོགས་ལ་ཟབ་ཟབ་དམ་པའི་ཆོས་སྟོན་སྟོན་པ་ཤཱཀྱའི་གཙོ་དེར་འདུད། །ཅ་ཅོ་བྲལ་བའི་ལེགས་བཤད་བཟང་བཟང་འགྲོ་མང་དོན་དུ་དུ་མའི་ཐབས་གྱིས་སྟོན་མཛད་ཅིང་། །ཆ་ལུགས་ལོངས་སྤྲུལ་མ་ངེས་འཛུམ་འཛུམ་མཆུ་སྒྲོས་རབ་དམར་དམར་བའི་བིམ་པ་གཞོན་ནུ་བཞིན། །ཇ་སོགསབཟའ་བཏུང་བོར་ནས་ཡང་ཡང་ཁྱོད་ཉིད་རྟག་དྲན་དྲན་ནས་གསོལ་བ་འདེབས་བྱེད་ན། །ཉ་རྒྱས་ཟླ་འདྲའི་ཞལ་དཀྱིལ་མྱུར་མྱུར་སྟོན་ལ་ཐུགས་རྗེས་རྗེས་སུ་ཟུངས་ཤིག་མི་ཕམ་མགོན། །ཏ་ཐཱ་ག་ཏའི་འཁོར་ཚོགས་མང་མང་དབུས་ན་ཆེས་ཟབ་ཟབ་མོ་སྟོང་ཉིད་སྨྲ་བ་ལ། །ཐ་མའི་དུས་འདིར་རྒྱལ་བས་ངེས་ངེས་གཞན་ལས་ལྷག་ཅིང་ཀུན་མཁྱེན་མཁྱེན་རབ་དབང་ཕྱུག་ཅེས་བསྔགས་ཤིང་། །ད་ལྟར་འཇམ་པའི་དབྱངས་ཞེས་ཕྱོགས་ཕྱོགས་ཀུན་ལ་རབ་གྲགས་གྲགས་པས་ས་སྟེང་ཁྱབ་པ་དེ། །ན་རྒ་འཆི་ལ་ཐུག་ཀྱང་གུས་གུས་མི་གཏོང་རབ་མཆོད་མཆོད་སྤྲིན་རྒྱ་མཚོས་མཉེས་པར་བྱ། །པ་ར་མི་ཏའི་སྤྱོད་ཚུལ་དཀའ་དཀའ་ཀུན་ཀྱང་ལེགས་མཛད་མཛད་མཆོག་ཀུན་ནས་ཕུལ་བྱུང་ཞིང་། །ཕ་རོལ་རིགས་དྲུག་འགྲོ་ལ་ཡང་ཡང་ཉིན་དང་མཚན་དུ་དུ་མའི་སྤྱན་གྱིས་ལེགས་གཟིགས་ཏེ། །བ་སྤུའི་གྲངས་ཀྱི་སྤྲུལ་པ་མང་མང་སྤྲོས་ནས་དོན་སྒྲུབ་སྒྲུབ་ཚུལ་ཁྱད་པར་བསམ་མི་ཁྱབ། །མ་ཡིས་བུ་གཅིག་ལྟ་བུར་གཅེས་གཅེས་དགོངས་ནས་ཐུགས་བརྩེ་བརྩེ་བས་གཟིགས་མཛད་སྤྱན་རས་གཟིགས། །ཙ་ལ་མི་མངའི་སྐུ་མཆོག་གཏུམ་གཏུམ་ཁྲོས་པ་ཇི་བཞིན་བཞིན་ནི་རྣམ་པར་འགྱུར་བ་ཅན། །ཚ་ཟེར་རྒྱས་པའི་གདན་ལ་འགྱིང་འགྱིང་ཚུལ་བཞུགས་མ་ལུས་ལུས་མེད་སྡེ་བརྒྱད་ཚོགས་ཀྱི་རྗེ། །ཛ་ཡ་སྟོང་གི་བསྟན་པ་ཐམས་ཅད་ངེས་ངེས་ཁྱོད་ཀྱིས་ལེགས་སྲུང་སྲུང་བར་ཞལ་བཞེས་ས་གསུམ་གྱི། །ཝ་སྐྱེས་ལྟ་བུའི་གདོན་བགེགས་ངན་ངན་ཐལ་བར་རློག་བྱེད་བྱེད་པོ་གསང་བདག་རྡོ་རྗེ་འཛིན། །ཞ་ཡིག་ལྟ་བུར་སྒོར་མོར་འཁྱིལ་འཁྱིལ་ཟླ་གདན་སྟེང་ན་ན་ཆུང་གཞོན་ནུའི་འཇོ་སྒེག་ཅན། །ཟ་བྱེད་སྲིད་གསུམ་བདག་མོ་མཛེས་མཛེས་ལྷ་མོའི་སྐུར་སྤྲུལ་སྤྲུལ་པའི་གར་གྱི་རྣམ་རོལ་བ། །འ་ཅག་འདོད་ལྡན་ཡིད་དབང་བརྟན་བརྟན་དག་འཕྲོག་རབ་སྙན་སྙན་པའི་རྒྱུད་མང་སྦྲེང་བའི་ཚེ། །ཡ་མཚན་ཆེ་བའི་སྒྲ་སྙན་གང་གང་སྲིད་པ་དེ་ཀུན་ཀུན་ནས་སྒྲོག་མཛད་ཚངས་སྲས་མ། །ར་རིའི་དྲི་བྲལ་གང་སྐུ་ལྡེམ་ལྡེམ་གཡུ་ཡི་ལྗོན་བཞིན་བཞིན་འཛུམ་སྒེག་པའི་ཉམས་ལྡན་ཅིང་། །ལ་ལས་མཐོང་ན་སྔོན་མེད་དགའ་དགའི་དཔལ་སྟེར་ཅི་འདོད་འདོད་རྒུ་འབྱུང་བའི་ནོར་བུ་བཞིན། །ཤ་རུས་གཏིང་ནས་གཡོས་པའི་གུས་གུས་ངེས་པར་སྐྱེ་འགྱུར་འགྱུར་མེད་དད་པ་བརྟན་པོ་ཡིས། །ས་གསུམ་འགྲོ་བའི་སྡུག་བསྔལ་མྱོང་མྱོང་ཞི་མཛད་རྒྱལ་ཡུམ་ཡུམ་མཆོག་སྒྲོལ་མ་རྟག་ཏུ་མཆོད། །ཧ་ཅང་གདུང་བའི་དབྱངས་གྱིས་ལྷང་ལྷང་གསལ་བར་བསྟོད་ཚེ་ཚེ་དང་བསོད་ནམས་དཔལ་སྟེང་ཞིང་། །ཨ་ཙ་ལ་ཡི་དད་པས་ཡང་ཡང་གུས་མཆོད་གཟུངས་རིང་རིང་དུ་དད་ཅིང་བརྗོད་པའི་ཚེ། །ཚེ་ཡི་རིག་འཛིན་དངོས་གྲུབ་འདོད་འདོད་མྱུར་སྩོལ་སྡིག་ཀུན་ཀུན་ནས་སྦྱོང་མཛད་བཅོམ་ལྡན་མ། །མ་གཅིག་རྣམ་རྒྱལ་ཞབས་པད་དུང་དུང་ཡིད་ཀྱིས་བསྟེན་ན་ན་རྒ་འཆི་ལས་སྒྲོལ་བར་མཛོད། །གང་གིས་གང་བཏབ་སྨོན་འགྲུབ་བཟང་བཟང་རྣམ་དག་ཞིང་མཆོག་མཆོག་ཏུ་ལེགས་གྲུབ་འོད་དཔག་མེད། །སྙིགས་དུས་སྙིགས་མའི་འགྲོ་བ་མང་མང་དག་ལ་རབ་བརྩེ་བརྩེ་བས་དགོངས་མཛད་སྨན་གྱི་བླ། །ལས་ངན་ལས་སྒྲིབ་མ་ལུས་ངེས་ངེས་ཀུན་ནས་སྦྱོང་མཛད་མཛད་པ་ཕུལ་བྱུང་མི་འཁྲུགས་པ། །རྣམ་གསུམ་རྣམ་པ་ཀུན་དུ་མྱུར་མྱུར་བྱོན་ལ་ཐུགས་རྗེས་རྗེས་སུ་བཟུང་ནས་བྱིན་གྱིས་རློབས། །ཡང་གཅིག་དེང་དུས་སྔགས་ཆོག་ཤེས་པའི། །བློ་ལྡན་མང་དུ་འབྱུང་ཡང་སྲིད་ཀྱི། །ཨ་དོན་སྐྱེ་མེད་རྟོགས་པའི་མཁས་པ། །ཧ་ཅང་དེ་ཙམ་འབྱུང་བ་མ་ཡིན། །ས་སྟེང་གཞན་ལ་གནོད་འཚེ་ཆེ་ཞིང་། །ཤ་ཁྲག་ཆང་ལ་རྔམས་པའི་མི་ངན། །ལ་ལ་ཤི་ཚེ་དམྱལ་བ་ཡི་དྭགས། །ར་ལུག་ཕག་སོགས་དུད་འགྲོར་འགྱུར་ངེས། །ཡ་ཡོ་མེད་པའི་དད་པ་བརྟན་ལྡན། །འ་ཅག་དཀོན་མཆོག་རྟག་ཏུ་མཆོད་ཅིང་། །ཟ་བྱེད་གཤིན་རྗེ་གཤེད་སོགས་ཡི་དམ། །ཞྭ་ལྟར་སྤྱི་བོས་རྒྱུན་དུ་བསྟེན་རིགས། །ཝཱ་གི་ཤཱ་རིའི་སྒོམ་བཟླས་མཛད་ན། །ཛ་ཡའི་དགོངས་ཟབ་ཤེས་ནས་དེ་དོན། །ཚ་གྲང་སྡུག་བསྔལ་དང་བླངས་སྒོམ་ན། །ཙ་གོ་ར་ལྟར་ནགས་སུ་གནས་ལེགས། །མ་སོགས་སེམས་ཅན་ཀུན་དོན་བྱེད་ན། །བ་མོའི་མདོག་ལྟར་དཀར་བའི་སེམས་ཀྱིས། །ཕ་རོལ་གཞན་ལས་འཚེ་བ་སྤོོང་ལ། །པ་ར་མི་ཏའི་སྤྱོད་ཚུལ་སྒྲུབས་ཤིག །ན་རྒ་འཆི་བ་ངེས་པར་འོང་བས། །ད་ལྟ་ཆོས་ཞིག་མ་བསྒྲུབས་བསྡད་ན། །ཐ་ཆད་མ་རབས་ཉིད་དུ་འགྱུར་ཕྱིར། །ཏ་ཐཱ་ག་ཏས་སྨོད་པའི་གནས་སོ། །ཉ་ལྟར་དགོན་གྲོང་ཕྱོགས་གཞན་དག་ལ། །ཇ་ཆང་ཞིམ་པོ་བཏུང་བའི་ཆེད་དུ། །ཆ་ལུགས་མཛེས་མཛེས་ཙམ་ཞིག་བྱས་ནས། །ཅ་ཅོ་དོན་མེད་བརྗོད་བཞིན་མ་རྒྱུགས། །ང་རྒྱལ་མ་བྱེད་ཤེས་བྱ་རྒྱ་ཆེ། །ག་ན་འདུག་ཀྱང་རང་སེམས་བལྟ། ཁ་ཏོན་དགེ་སྦྱོར་རྣམ་པ་མང་དང་། །ཀ་དག་སྟོང་ཉིད་ཟབ་མོ་སྒོམས་ཤིག །ཀ་ཁའི་ཕྲེང་ལྡན་སྒྲ་རྒྱན་འདི་དག །ཉམས་མཚར་ཆེད་དུ་བཤད་སྒྲུབ་ཅེས་བྱས། །ལེགས་པར་སྦྱར་བའི་ཡི་གེ་པ་ནི། །གནས་བརྟན་བཀྲ་ཤིས་མིང་ཅན་ཉིད་དོ།། །། མངྒ་ལཾ། །