བདེ་བ་ཅན་གྱི་ཞིང་གི་སྒོ་འབྱེད་སྨོན་ལམ།
བདེ་བ་ཅན་གྱི་ཞིང་གི་སྒོ་འབྱེད་སྨོན་ལམ་བཞུགས།
ན་མོ་ཨཱརྱ་ས་མནྷ་བྷ་དྲ་ཡེ། བླ་མ་མཆོག་གསུམ་ཡི་དམ་ལྷ། །སངས་རྒྱས་བྱང་སེམས་ཉན་རང་འཕགས། །དྲང་སྲོང་བདེན་ཚིག་གྲུབ་རྣམས་ཀྱིས། །སྨོན་ལམ་འགྲུབ་པའི་དཔང་པོ་མཛོད། །བདག་ནི་སྐྱེ་ཞིང་སྐྱེ་བ་རུ། །ངན་འགྲོར་ནམ་ཡང་མི་ལྟུང་ཞིང་། །རྟག་ཏུ་དལ་འབྱོར་ཚང་བ་ཡི། །ལུས་རྟེན་ཁྱད་འཕགས་ཐོབ་གྱུར་ཅིག །སྐྱེས་མ་ཐག་ནས་སྲིད་འབྱོར་ལ། །མ་ཆགས་ངེས་འབྱུང་བསམ་པ་ཡིས། །རབ་བྱུང་ཐར་པ་དོན་གཉེར་བའི། །རྟེན་བཟང་རྣམ་དག་རྙེད་གྱུར་ཅིག །གང་དུ་སྐྱེས་ཀྱང་རིགས་གཟུགས་འབྱོར། །དབང་ཕྱུག་ཤེས་རབ་ཚེ་རིང་ཞིང་། །ནད་མེད་བདེ་བ་མཐོ་རིས་ཀྱི། །ཡོན་ཏན་བདུན་དང་ལྡན་གྱུར་ཅིག །རྟག་ཏུ་དད་དང་ཐོས་པ་དང་། ཁྲེལ་ཡོད་ངོ་ཚ་ཤེས་པ་དང་། །གཏོང་དང་ཚུལ་ཁྲིམས་བློ་གྲོས་ཀྱི། །འཕགས་ནོར་བདུན་དང་ལྡན་པར་ཤོག །བྱམས་དང་སྙིང་རྗེ་ཆེན་པོ་ཡིས། །ཡིད་དྲངས་བྱང་ཆུབ་སེམས་བསྐྱེད་དེ། །ཕྱིན་དྲུག་བསྡུ་བ་བཞི་ལ་སོགས། །རྒྱལ་སྲས་སྤྱོད་པ་མཐར་ཕྱིན་ཤོག །བདག་ནི་ནམ་ཞིག་འཆི་འཕོའི་ཚེ། །འོད་དཔག་མེད་མགོན་འཁོར་བཅས་ཀྱི། །ཞལ་མཐོང་ཚུར་ཤོག་བདེ་ལྡན་དུ། །འདོང་ཞེས་གསུང་གིས་དབུགས་དབྱུང་ཤོག །དེ་ཚེ་སྟོན་པ་འཁོར་བཅས་ཀྱི། །རྫུ་འཕྲུལ་མཐུ་རྗེ་ལ་བརྟེན་ནས། །སྐར་མདའ་འཕངས་ལྟར་ཐོག་མེད་དུ། །བདེ་བ་ཅན་དུ་སྐྱེ་བར་ཤོག །ཞིང་དེར་པདྨའི་སྦུབས་ཉིད་དུ། །བརྫུས་ཏེ་སྐྱེས་ནས་དེ་མ་ཐག །མྱུར་ཐོན་རྒྱལ་བ་འཁོར་བཅས་རྣམས། །མཐོང་ནས་ཆོས་ཉན་མཆོད་པར་ཤོག །དག་པའི་ཞིང་དུ་སྐྱེས་གྱུར་ནས། །སྙིང་རྗེས་མ་དག་ཞིང་རྣམས་སུ། །བསམ་བཞིན་སྐྱེ་བཟུང་འགྲོ་འདྲེན་པར། །སྤྱན་རས་གཟིགས་དབང་ལྟར་གྱུར་ཅིག །རྒྱལ་བ་ཚེ་དཔག་མེད་ཉིད་ཀྱིས། །ཚེ་རབས་ཀུན་ཏུ་རྗེས་འཛིན་ཅིང་། །འཆི་མེད་རིག་འཛིན་སྩོལ་བ་དང་། །སྒྲིབ་བྱང་སངས་རྒྱས་ཉིད་གྱུར་ཅིག །རྒྱལ་བ་སྲས་བཅས་བྱིན་རླབས་དང་། །རྟེན་འབྲེལ་མི་བསླུའི་བདེན་སྟོབས་ཀྱིས། །ཇི་ལྟར་སྨོན་པའི་དོན་ཐམས་ཅད། །རེ་བ་བཞིན་དུ་འགྲུབ་གྱུར་ཅིག། །།ཅེས་པའི་སྨོན་ལམ་མདོར་བསྡུས་འདི་ཡང་། བློ་བཟང་དོན་གྲུབ་ཀྱི་སླར་བསྐུལ་བ་ལྟར་བཤད་སྒྲུབ་མིང་ཅན་གྱིས་སྦྱར་བ་སྟེ། འདི་དང་སྔ་མ་གཉིས་ཀྱི་པར་ཡིག་པ་དང་པར་དུ་བརྐོ་བ་པོ་ཡང་བསྐུལ་བ་པོ་ཉིད་དོ། །མངྒ་ལཾ། །