ཁ་འབར་མའི་མདོས་ཆེན་མ་མོའི་གདོན་སོགས་གནོད་པ་ཀུན་སེལ།
ཁ་འབར་མའི་མདོས་ཆེན་མ་མོའི་གདོན་སོགས་གནོད་པ་ཀུན་སེལ་ཞེས་བྱ་བ་བཞུགས།
ན་མོ་མཉྫུ་གྷོ་ཥཱ་ཡ། དང་པོར་ཐུགས་བསྐྱེད་བར་དུ་ཚོགས་བསགས་མཐར། །མངོན་སངས་རྒྱས་ནས་ཐེག་གསུམ་གདུལ་བྱ་ལ། །ཆོས་འཁོར་བསྐོར་མཛད་ཐུབ་དབང་ལ་བཏུད་ནས། །དེ་གསུང་ཁ་འབར་མ་ཡི་མདོས་ཆོག་བྲི། །འདི་ལ་གཉིས། བཅའ་ཐབས་དང་། ཆོ་གའི་རིམ་པའོ། །དང་པོ་ནི། ས་སྟེགས་སམ། རས་ཤོག་ལྟ་བུ་ཡང་རུང་སྟེ། དབུས་ནས་སོར་བཞིས་ཟླུམ་བསྐོར་ལྟེ་བ་དང་། དེའི་ཕྱིར་སོར་བཞིས་ཟླུམ་པོར་བསྐོར་བ་ལ་པད་འདབ་བརྒྱད། དེའི་ཕྱིར་སོར་བཞིས་བསྐོར་བ་ལ་པད་འདབ་བཅུ་དྲུག །དེའི་ཕྱིར་སོར་བཞིས་བསྐོར་བ་ལ་པད་འདབ་སོ་གཉིས། དེའི་ཕྱི་རོལ་ཏུ་གྲུ་བཞི་སྒོ་བཞི། ནང་གི་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སུ་མཉྫི་སོགས་ཀྱི་སྟེར་དུ་སྟོན་པའི་སྐུ། ནང་གི་འདབ་མ་བརྒྱད་ལ་སེམས་དཔའ་བརྒྱད། བར་གྱི་འདབ་མ་བཅུ་དྲུག་ལ་ཉན་ཐོས་བཅུ་དྲུག་དང་། ཕྱིའི་འདབ་མ་སོ་གཉིས་ལ་རང་རྒྱལ་སོ་གཉིས་ཀྱི་ཚོན་སྤུངས་རྣམས་དགོད། ཁྱམས་སུ་ཕྱོགས་སྐྱོང་བཅུ་དང་སྒོ་བཞིར་རྒྱལ་ཆེན་བཞིའི་ཚོན་སྤུངས་འགོད་ཅིང་། དེ་རྣམས་ཁ་དོག་ལྗང་བསྒྱུར་བྱ། མདུན་དུ་དཀར་གསུམ་མངར་གསུམ་སོགས་དང་འབུལ་གཏོར། ཆུ་གཉིས་ཉེར་སྤྱོད་སོགས་ཀྱི་མཆོད་པ་དུ་མས་མཐའ་བསྐོར་བའམ་ཅི་འབྱོར་བཤམས་ཞིང་ཡང་ན་གདུགས་སོགས་ཀྱི་རྣམ་པའང་བྱའོ། །དེའི་མདུན་གྱི་ཤར་ངོས་སུ་ཆོས་འབྱུང་ཕྱི་ནག་ལ་ནང་དམར་བ། རྩེ་མོ་ཕྱིར་བསྟན་པ་བྲིས་པའི་དབུས་སུ་ལྕགས་ཐབ་སམ། དཀར་གོང་གི་སྒྱེད་པུའི་ཁར་ཟངས་གཞོང་སོགས་ཀྱི་ནང་དུ་རྩམ་ཕྱེ་སོགས་ལས་ཁ་འབར་མའི་གཟུགས་ཁྲུ་གང་ལས་མི་ཆུང་བ་མདོག་མི་སྡུག་ཅིང་འཇིགས་སུ་རུང་བ། ལྟོ་བ་ཆེ་བ། ཡན་ལག་ཕྲ་བ། ལག་པ་གཉིས་སྦར་མོ་གདངས་པ། ལུང་ཐང་གི་མིག །མགྲོན་བུའི་སོ། ཟེར་མོ་དང་བལ་ནག་གི་སྐྲ། མུ་ཏིག་གི་ཀླད་པ། དུང་གི་རུས་པ། ཤ་ཞོ་ཤའི་སྙིང་བྱ་ཞིང་མ་འཛོམས་ན་དེའི་དོད་ཙམ་བྱ། རྐང་པ་གཉིས་ཙོག་པུའི་ཚུལ་གྱིས་རེ་ལྡེའི་སྒྱེ་ཆུང་ནས་ཆན་གྱིས་རྒྱངས་པའི་འབོལ་ལ་གནས་པ། དཔྲལ་པར་གཡུ། སྐེད་པར་བྱང་མིག་དགུ་དང་ཤོ་དཀར་ནག་གི་རྒྱན་འདོགས། དེའི་ཕྲག་པ་གཡས་པར་ཕོ་ཤིང་སྟག་པ་ལ་ལོ་གྲངས་ཀྱི་ཁྲམ་བྱས་པ་འཛུག་ཅིང་། གཡོན་པར་མོ་ཤིང་གླང་མ་ལ་གོས་དར་གྱི་རས་མ་བཏགས་པ་འཛུག །ལུས་ལ་གོས་དང་དར་ཚོན་སྣ་ལྔས་བརྒྱན། མདུན་དུ་ཡོན་བདག་གམ་ནད་པའི་གླུད་རང་གི་ཆ་བྱད་ཅན་དང་མཐར་ངར་མི་བརྒྱ་རྩ། གཏོར་ཆུང་བརྒྱ་རྩ། སྣ་ཚོགས་པའི་གཟུགས་འགྲོས་བརྒྱ་རྩ་བརྒྱད་སོགས་ཀྱིས་བསྐོར། གཞན་ཡང་ཆངས་བུ། མཐེབ་ཀྱུ། ཟན་རིལ་བརྒྱ་རྩ་བརྒྱད་རེ་དང་། འོ་མའི་མཆོད་ཡོན་དང་། ནས་ཆན་རྣམས་ཀྱང་སྟ་གོན་བྱ། བདུན་དུ་ཞབས་བསིལ། མེ་ཏོག་ལ་སོགས་པའི་ཉེར་སྤྱོད་ལྔ་རྣམས་དང་། གཞི་བདག་གི་གཏོར་མ་དང་ཆ་གསུམ་གྱི་གཏོར་མ། བརྒྱ་རྩའི་ཟན་རིལ་རྣམས་ཀྱང་བཤམས། གླུད་རྫོངས་ཀྱི་ཆས་འབྲུ་སྣ། དར་སྣ། སྨན་སྣ། རིན་པོ་ཆེ་སྣ་ཚོགས་སམ་ཅི་འགྲུབ། གྲུབ་ན་རྣམ་འཇོམས་ཀྱི་བུམ་ཆོ ག་དང་གཏོར་མ་བརྒྱ་རྩ་གཏོང་མཁན་ལོགས་སུ་བྱ། མདུན་དུ་གཏོར་མཐེབ་ལྔར་རིམ་པར་ནས་ཆན། འོ་མ། ཆངས་བུ། མཐེབ་ཀྱུ་ཟན་རིལ་རྣམས་བཤམས་ལ་ཆབ་བྲན་ནས་བསྔོ། གཞུང་ནས་འབྱུང་བའི་བདེན་སྟོབས་བརྗོད་པ་དང་མཉམ་དུ་གཏོར་མ་དེ་རྣམས་ཟངས་གཞོང་སོགས་ཀྱི་སྣོད་དུ་བླུག་ཅིང་རོལ་མོའི་སྒྲ་བྱ། ཡང་གཏོར་མཐེབ་རྣམས་ཆུས་བཤལ་ཏེ་གཏོར་རྫས་རྣམས་གོང་ལྟར་བཤམས་ནས་སྔར་བཞིན་བརྒྱ་དང་བརྒྱད་བསྔོ། དེ་ཡང་ང་བཞིའི་བར་ཁ་འབར་མ་ཁ་ཚུར་བལྟ་བ་ལ་མགྲོན་གྱི་ཚུལ་དུ་བསྔོ་ཞིང་། ང་བཞི་སོང་བ་དང་ཁ་ཕར་བསྒྱུར་ཏེ་ལག་པ་གཉིས་སུ་ཆང་བུ་རེ་འཇོག་ཅིང་། ང་ལྔ་མན་ང་བཞིས་རྫོངས་ཀྱི་ཚུལ་དུ་བྱས་ནས་སྟེར། ཕྱིར་སྐྱེ་བའི་དུས་སུ་རྣམ་འཇོམས་ཀྱི་བུམ་ཆུ་མཐོར་བས་སྣ་དྲངས། སྤོས་ཕོར་གསེར་སྐྱེམས་རོལ་མོ་སོགས་དང་བཅས་པ་ཆོ་གའི་གཞུང་ལྟར་བྱའོ། །གཉིས་པ་ཆོ་གའི་རིམ་པ་ལ་གཉིས། བདག་བསྐྱེད་དང་། མདུན་བསྐྱེད་དོ། །དང་པོ་ནི། པཎ་ཆེན་རིན་པོ་ཆེའི་ཆོ་ག་སོགས་ལས་བདག་མདུན་གཉིས་འཇུག་པ་གཅིག་གིས་མཛད་འདུག་ཀྱང་། བློ་ཆུང་བདག་གིས་དེ་གཉིས་ཅིག་ཅར་དུ་བློས་འཆུན་དཀའ་བར་མཐོང་བས་འདིར་བདག་མདུན་སོ་སོར་བྱ་བའི་རིམ་པ་ལྟར་བཤད་པར་བྱ་སྟེ། དེ་ཡང་བདག་བསྐྱེད་ལ་གཙོ་རྐྱང་གིས་ཆོག་ཅིང་། ལྷ་དྲུག་བསྐྱེད་ཀྱི་དབང་དུ་བྱས་ན། སྐྱབས་འགྲོ་སེམས་བསྐྱེད་ཚད་མེད་བཞི་སྒོམ་པ་སྔོན་དུ་བཏང་ནས། སྭ་བྷཱ་ཝས་སྟོང་པར་སྦྱངས། དེ་ལྟར་བདག་གི་དེ་ཁོ་ན་ཉིད་དོན་དམ་པར་སྤྲོས་པ་ཐམས་ཅད་དང་བྲལ་བ་ཇི་ལྟར་ཡིན་པ་དེ་བཞིན་དུ་ལྷའི་དེ་ཁོ་ན་ཉིད་ཀྱང་དེ་བཞིན་ཡིན་པས། དེ་གཉིས་ཆུ་དང་འོ་མ་འདྲེས་པ་བཞིན་དུ་རྣམ་པར་མི་རྟོག་པའི་སྣང་བའི་སྒོ་དེ་ཉིད་དུ་བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པར་གྱུར། སྟོང་བའི་ངང་ལས་ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ ཧཱ་ཞེས་པའི་སྔགས་ཀྱི་གདངས་ཀྱི་རྣམ་པ་ནམ་མཁའ་ལ་གྲགས་པར་གྱུར། བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པའི་རྣམ་པ་ཅན་གྱི་རང་གི་སེམས་ཟླ་བའི་དཀྱིལ་འཁོར་དུ་གྱུར་པའི་སྟེང་དུ། སྔགས་ཀྱི་གདངས་ཀྱི་རྣམ་པ་ནམ་མཁའ་ལ་གྲགས་པ་དེ་ཉིད་ཤིན་ཏུ་ཡོངས་སུ་དག་པའི་དངུལ་ཆུ་གསེར་གྱི་བྱེ་མ་ལ་ཞེན་པ་ལྟར་ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ཡོོངས་སུ་གྱུར་པ་ལས་བདུད་རྩིས་གང་བའི་ལྷུང་བཟེད་གྱི་སྟེང་དུ་ༀ་མུ་ནེ་ནས། སྭཱཧཱ་ཞེས་པས་མཚན་པར་གྱུར། ཟླ་བ་ཕྱག་མཚན་སྔགས་དང་བཅས་པ་ལས་འོད་ཟེར་སྣ་ཚོགས་བྱུང་བའི་རྩེ་མོ་ལས་ཤཱཀྱའི་རྒྱལ་པོའི་ལྷའི་གཟུགས་དཔག་ཏུ་མེད་པ་བྱུང་ནས་ནམ་མཁའི་དབྱིངས་ཐམས་ཅད་ཁྱབ་པར་བྱས། རྒྱལ་བ་ཐམས་ཅད་ལ་མཆོད་པའི་སྤྲིན་ཆེན་པོ་སྤྲུལ་པས་ལགས་པར་མཆོད། གཞན་ཡང་སྤྲིན་ཆེན་པོ་སྤྲུལ་པ་ལས་བདུད་རྩིའི་ཆར་རྒྱུན་བབས་པས་དམྱལ་བ་ལ་སོགས་པའི་འགྲོ་བ་ཐམས་ཅད་ཀྱི་སྡུག་བསྔལ་གྱི་མེ་རྣམས་ཞི་ཞིང་དེ་རྣམས་ཚིམ་པར་བྱས་ནས། ལྷའི་སྐུ་དང་བཅས་པའི་འོད་ཟེར་སླར་ལོག །རང་གི་སེམས་ཟླ་བའི་དཀྱིལ་འཁོར་ཕྱག་མཚན་སྔགས་དང་བཅས་པ་ལ་བཞུགས་པ་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་པ། གཡས་ས་གནོན་དང་གཡོན་མཉམ་བཞག་གི་ཕྱག་རྒྱས་བདུད་རྩིས་གང་བའི་ལྷུང་བཟེད་བསྣམས་པ། ཚངས་པར་སྤྱོད་པའི་ཆ་ལུགས་ཅན། ན་བཟའ་ཆོས་གོས་རྣམ་གསུམ་གསོལ་ཞིང་མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། འོད་ཀྱི་ཕུང་པོ་འཕྲོ་བའི་དབུས་ན་བྱང་ཆུབ་ཀྱི་ཤིང་ལ་སྐུ་རྒྱབ་བརྟེན་པས་སེངྒེའི་ཁྲིའི་སྟེང་དུ་པདྨ་དང ཟླ་བའི་གདན་ལ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྤྱི་བོར་ༀ་དཀར་པོ། མགྲིན་པར་ཨཱཿདམར་པོ། ཐུགས་དཀར་ཧཱུཾ་སྔོན་པོས་མཚན་པར་གྱུར། ༀ་སརྦ་ཏ་ཐཱ་ག་ཏ་ཨུཏྦྷ་ཝ་ཡེ་སྭཱཧཱ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་བཅོམ་ལྡན་འདས་ཤཱཀྱ་ཐུབ་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་སྤྱན་དྲངས། མ་ལུས་སེམས་ཅན་ཞེས་སོགས་གཅིག་གི་མཐར། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། མཆོད་པ་ཨམྲྀ་ཏས་བསངས། སཱབྷཱ་ཝས་སྦྱངས། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་འོད་དུ་ཞུ་བ་ལས་བྱུང་བའི་མཆོད་ཡོན། ནས། རོལ་མོ་རྣམས་དྭངས་ཤིང་ཐོགས་མེད་པ་ཟག་པ་མེད་པའི་བདེ་བ་ཁྱད་པར་ཅན་སྟེར་བའི་ནུས་པ་ཅན་དུ་གྱུར། ༀ་ཨརྒྷཾ་ཨཱཿཧཱུཾ་ནས། ཤཔྟ་ཨཱཿཧཱུཾ་གིས་བྱིན་གྱིས་བརླབས་ལ། ༀ་ཤཱཀྱ་མུ་ནེ་ཨརྒྷཾ་ནས། ཤཔྟ་པྲ་ཏཱིཙྪ་ཧཱུཾ་སྭཱཧཱའི་བར་གྱིས་མཆོད་དེ། ཐབས་མཁས་ཐུགས་རྗེ་སོགས་ཤོ་ལོ་ཀ་གཅིག་གིས་བསྟོད། དེ་ནས། ༀ་མུ་ནེ་སོགས་ཀྱི་སྔགས་ཅི་འགྲུབ་བཟླ་ཞིང་ཡིག་བརྒྱ་བརྗོད་དེ་མཆོད་བསྟོད་མདོར་བསྡུས་བྱའོ། །གཉིས་པ་མདུན་བསྐྱེད་ལ་གཉིས། འཇིག་རྟེན་ལས་འདས་པ་དང་། འཇིག་རྟེན་པའི་མགྲོན་བསྐྱེད་ཚུལ་ལོ། །དང་པོ་ནི། མཆོད་པ་བྱིན་གྱིས་བརླབས་ནས། སྒྲུབ་གཞི་ཨམྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་མདུན་གྱི་གནས་སུ་སྣ་ཚོགས་པདྨ་འདབ་མ་རིམ་པ་གསུམ་པ་ལྟེ་བ་དང་བཅས་པ། ལྟེ་བའི་སྟེང་ཁར་ཟླ་བའི་དཀྱིལ་འཁོར། དེ་ལྟར་བདག་གི་དེ་ཁོ་ན་ཉིད་དོན་དམ་པར་སྤྲོས་པ་ཐམས་ཅད་དང་བྲལ་བ་ཇི་ལྟར་ཡིན་པ་དེ་བཞིན་དུ་ཞེས་པ་ནས། ཡོངས་སུ་གྱུར་པ་ལས་བཅོམ་ལྡན་འདས་ཤཱཀྱ་ཐུབ་པ་ནས། རྡོ་རྗེའི་སྐྱིལ་ཀྲུང་གིས་བཞུགས་པ། ཡང་ན། སྟོང་པའི་ངང་ལས་སྣ་ཚོགས་པདྨ་དང་ཟླ་བའི་གདན་ལ་བཅོམ་ལྡན་འདས་ཞེས་སོགས་བྱས་ཀྱང་ཆོག་ཅིང་། གང་བྱེད་ཀྱང་། རིམ་པ་དང་པོ་ལ་མདུན་ནས་རིམ་པ་བཞིན་དུ། ཕྱག་ན་རྡོ་རྗེ། སྤྱན་རས་གཟིགས། འཇམ་དཔལ། ནམ་མཁའི་སྙིང་པོ། སའི་སྙིང་པོ། སྒྲིབ་སེལ། ཀུན་བཟང་། བྱམས་པ་སྟེ་ཉེ་བའི་སྲས་ཆེན་བརྒྱད་དང་། རིམ་པ་གཉིས་པ་ལ་རིམ་པ་བཞིན་དུ་རབ་འབྱོར། ཀོའུ་དེ་ནྱ། འོད་སྲུང་ཆེན་པོ། ཤཱ་རིའི་བུ། མོའུ་འགལ་གྱི་བུ། མ་འགགས་བ། ཀུན་དགའ་བོ། །ཉེ་བར་འཁོར། ཀ་ཏ་ཡ་ན། བ་ཀུ་ལ། རྟ་ཐུལ། མིང་ཆེན། དགའ་བོ། སྒྲ་གཅན་འཛིན། གང་པོ། འཆར་ག་སྟེ་ཉན་ཐོས་ཆེན་པོ་བཅུ་དྲུག་དང་། རིམ་པ་གསུམ་པ་ལ་གདུང་བ་སེལ་བ་ལ་སོགས་པ་རང་རྒྱལ་སོ་གཉིས། དེའི་ཕྱི་རོལ་ཏུ་ཕྱོགས་སྐྱོང་བཅུ། སྒོ་བཞིར་རྒྱལ་པོ་ཆེན་པོ་བཞི་དང་བཅས་པར་གྱུར། དེ་ཐམས་ཅད་ཀྱི་སྤྱི་བོར་ༀ་དཀར་པོ་ནས། ཐུགས་ཀར་ཧཱུཾ་སྔོན་པོས་མཚན་པར་གྱུར། ༀ་སརྦ་ཏ་ཐཱ་ག་ཏ་སོགས་ཀྱི་སྔགས་ལན་དྲུག་གམ་གཅིག །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་རྒྱལ་བ་ཤཱཀྱ་ཐུབ་པ་ལ། ཉེ་བའི་སྲས་ཆེན་བརྒྱད་དང་། ཉན་ཐོས་ཆེན་པོ་བཅུ་དྲུག །རང་རྒྱལ་ཆེན་པོ་སོ་གཉིས་ལ་སོགས་པ་རྒྱལ་སྲས་ཉན་རང་འཕགས་ཚོགས་ཐམས་ཅད་དང་། ཕྱོགས་སྐྱོང་བཅུ་དང་རྒྱལ་ཆེན་བཞི་ལ་སོགས་པའི་འཇིག་རྟེན་སྐྱོང་བ་འཁོར་དང་བཅས་པ་ཐམས་ཅད་གནས་འདིར་སྤྱན་དྲངས། སྤོས་སོགས་དང་བཅས། མ་ལུས་སེམས་ཅན་སོགས་ཚིགས་བཅད་ཀྱི་འཕྲོར། ཧཱུཾ། ཕྱོགས་བཅུའི་འཇིག་རྟེན་ཁམས་བཞུགས་པའི། །སངས་རྒྱས་བྱང་ཆུབ་སེམས་དཔའ་དང་། །འཕགས་པ་ཉན་ཐོས་རང་རྒྱལ་རྣམས། །མཆོད་པའི་གནས་འདིར་གཤེགས་སུ་གསོལ། ཚངས་པ་དང་ནི་བརྒྱ་བྱིན་དང་། །རྒྱལ་པོ་ཆེན་པོ་སྡེ་བཞི་དང་། །འཇིག་རྟེན་སྐྱོང་བ་རྣམ་པ་བཅུ། །འཁོར་བཅས་མཆོད་པའི་གནས་འདིར་བྱོན། །ལྷ་ཀླུ་གནོད་སྦྱིན་འབྱུང་པོ་དང་། །ནམ་མཁའ་ལྡིང་དང་དྲི་ཟ་དང་། །རླུང་ལྷ་དང་ནི་ལུས་སྲུལ་པོ། །གཤིན་རྗེ་དང་ནི་སྲིན་པོ་དང་། །མཁའ་འགྲོ་དང་ནི་རོ་ལངས་དང་། །ལྟོ་འཕྱེ་ཆེ་དང་གྲུལ་བུམ་དང་། །གཟའ་དང་རྒྱུ་སྐར་མཁའ་རྒྱུ་དང་། །གདོན་རིགས་སྟོང་ཕྲག་བརྒྱད་ཅུ་རྣམས། །བདེ་བར་གཤེགས་པའི་བཀའ་ཉན་ཕྱིར། །མཆོད་པའི་གནས་འདིར་མྱུར་དུ་བྱོན། །བདག་གིས་དགའ་སྟོན་ཆེར་བགྱིད་ཀྱི། །ཞི་བའི་སེམས་ཀྱིས་འཁོད་པར་གྱིས། །ཨེ་ཧྱེ་ཧི། ཛཿཛཿཛཿཧཱུཾ་བཾ་ཧོཿ དམ་ཚིག་པ་སོ་སོ་དང་གཉིས་སུ་མེད་པར་གྱུར། པདྨ་ཀ་མ་ལ་ཡེ་སྟཱཾ། འདིར་ཆོ་ག་སྔ་མ་དག་ལས་མགྲོན་རྣམས་སྤྱན་དྲངས་ནས་བསྐྱེད་པའི་དམ་ཚིག་པ་ལ་བསྟིམ་ཚུལ་མི་གསལ་ཡང་། བསྟིམས་ན་ལེགས་པར་སེམས་ཏེ་གཞན་དུ་ན་དམ་ཚིག་པ་བསྐྱེད་པ་ལ་དགོས་པ་མི་སྣང་བས་སོ། །སྤྱན་དྲངས་ནས་ནམ་མཁར་བཞུགས་པར་བྱེད་པའང་མི་འཐད་དེ། དམ་ཚིག་བསྐྱེད་པའི་ཕྱིར་རོ། །དེ་ནས་མཆོད་པ་སྔར་བྱིན་གྱིས་མ་བརླབས་ན་འདིར་བྱིན་བརླབས་བྱ་སྟེ། དེ་ཡང་སྔར་ལྟར་ལ་འདོད་ཡོན་སོགས་ཀྱང་བྱིན་བརླབ་བྱའོ། །དེ་ནས། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་རྣམས། །ཐུབ་དབང་འཁོར་དང་བཅས་ལ་འབུལ། །བཞེས་ནས་དངོས་གྲུབ་སྩལ་དུ་གསོལ། །ༀ་ཤཱཀྱ་མུ་ནེ་ས་པཱ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ་ནས། ཤཔྟ་པྲ་ཏཱི་ཙྪ་དང་། སྤཪྴ་པྲ་ཏཱིཙྪ་ཧཱུཾ་སྭཱཧཱ། འཁོར་ལོ་ནོར་བུ་བཙུན་མོ་སོགས། །རྒྱལ་སྲིད་རིན་ཆེན་སྣ་བདུན་དང་། །གདུགས་དང་རྒྱལ་མཚན་དཔལ་བེའུ་སོགས། །བཀྲ་ཤིས་རྟགས་བརྒྱད་དག་ཀྱང་འབུལ། །གླིང་བཞི་ཉི་ཟླ་རི་རབ་དང་། །བདག་གི་ལུས་དང་ལོངས་སྤྱོད་སོགས། །ཇི་སྙེད་མཆོད་པའི་ཚོགས་མཆིས་པ། །ཀུན་ཀྱང་ཁྱེད་ལ་དབུལ་བར་བགྱི། །སྤྲོ་ན། མེ་ཏོག་དམ་པ་ཞེས་པ་ནས། བྱང་ཆུབ་ཆེན་པོར་བསྔོ། དེ་ནས། གང་ཚེ་རྐང་གཉིས་སོགས་སམ། མགོན་པོ་ཐུགས་རྗེ་ཆེ་ལྡན་པ། །ཞེས་སོགས་ཅི་རིགས་ཀྱིས་བསྟོད་ལ། །ཐུབ་པའི་སྙིང་པོ་ཅི་འགྲུབ་བཟླས་ནས་ཡིག་བརྒྱ་བརྗོད། འདས་གཏོར་ཨ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བྷཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་འོད་དུ་ཞུ་བ་ལས་བྱུང་བའི་གཏོར་མ་ཕུལ་དུ་བྱུང་བའི་ལྷ་རྫས་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུཾ། ལན་གསུམ་གྱིས་བྱིན་གྱིས་བརླབས་ལ། མགྲོན་རྣམས་ཀྱི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ༀ་སརྦ་ཏ་ཐཱ་ག་ཏ་ས་པཱ་རི་ཝ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི། ལན་བདུན་གྱིས་ཕུལ་ལ། སྔགས་ཀྱི་མཐར་ཨརྒྷཾ་སོགས་སྦྱར་ནས་མཆོད་དེ། ཐབས་མཁས་ཐུགས་རྗེ་མ་དང་། ཕྱག་བྱར་འོས་པ་ཞེས་སོགས་ཀྱིས་བསྟོད། ཁྱོད་ལ་མཆོད་ཅིང་གསོལ་བ་བཏབ་པའི་མཐུས། །ཞེས་སོགས་ཀྱང་བརྗོད། བསྐང་གསོ་བྱེད་པ་དང་འབྲེལ་དགོས་པའི་ངེས་པ་མེད་ཀྱང་བྱེད་ན་ཆོ་ག་འདིའི་སྔོན་དུ་བྱས་ནས་གཏོར་འབུལ་སྐབས་འདིར་རུང་ཙམ་སྟེ། བསྐུལ་བཞག་ནས་བསྟོད་པ་ཡན་རྫོགས་པར་བྱའོ། །ཆ་གསུམ་ཡང་གཏོང་། གཉིས་པ་འཇིག་རྟེན་པའི་མགྲོན་ལ་གསུམ། བསྐྱེད་ཅིང་སྤྱན་དྲངས་ནས་མཆོད་པ། འཕྲིན་ལས་བཅོལ་བ། རྫོངས་པའི་ཚུལ་ལོ། །དང་པོ་ནི། ༀ་སྭ་བྷཱ་ཝས་ཁ་འབར་མའི་གཟུགས་སྟོང་པ་ཉིད་དུ་གྱུར། སྟོང་པའི་ངང་ལས་པྲེཾ་ལས་ཡི་དྭགས་ཀྱི་རྒྱལ་མོ་ཁ་ལ་མེ་འབར་མ་མདོག་ནག་མོ། མི་སྡུག་ཅིང་འཇིགས་སུ་རུང་བ། ཁ་ཆེར་གདངས་ཤིང་མཆེ་བ་གཙིགས་པ། ཁ་རླངས་ཀྱིས་ནད་དང་དལ་ཡམས་སྤྲིན་ལྟར་འཐིབས་པ། མིག་དམར་ཞིང་སྐྲ་འཛིངས་པ། ལྟོ་བ་རྫིང་བུ་ལྟར་ཆེ་ཞིང་ཡན་ལག་ཤིན་ཏུ་ཕྲ་བ། སྦར་མོ་གདངས་ནས་སྐྱེ་འགྲོའི་སྲོག་ལ་རྔམས་པའི་ཚུལ་ཅན། ནད་བདག་རིམས་བདག་ལ་སོགས་པའི་འབྱུང་པོ་བྱེ་བའི་འཁོར་དང་བཅས་པར་གྱུར། སྤྱན་འདྲེན་པ་ནི། བྷྱོ་འདི་ནས་བྱང་ཕྱོགས་ཕ་རོལ་ན། །རི་རབ་ཆེན་པོའི་བྱང་ཕྱོགས་ཀྱི། །གླིང་བར་མུན་པའི་འཇིག་རྟེན་ན། །བ་ཚ་ཚ་སྒོའི་འགྲམ་ཕུག་གི །བགེགས་ཀྱི་རྒྱལ་མོ་གཤེགས་སུ་གསོལ། །སྔོན་ཚེ་ཐུབ་པའི་སྦྱན་སྔར་དམ་བཅས་བཞིན། །དམ་ལས་མ་འདའ་མཆོད་གཏོར་འདི་རྣམས་ནི། །ཇི་སྲིད་གྲུབ་པར་བདག་གིས་ཁྱེད་མཆོད་པས། །དེ་སྲིད་བཅོལ་པའི་འཕྲིན་ལས་སྒྲུབ་པར་མཛོད། །པྲེཾ་ཡཾ་ཛཿ ཨངྐུ་ཛཤཿ ཛཿཧཱུཾ་བཾ་ཧོཿ རང་གི་གཟུགས་དང་གཉིས་སུ་མེད་པར་གྱུར། ༀ་པྲེ་ཏ་རཱ་ཛེ་ས་པཱ་རི་ཝ་ར་པུཥྤེ་ནས། ཤཔྟ་པྲ་ཏཱིཙྪ་ཧཱུཾ་སྭཱཧཱའི་བར་གྱིས་མཆོད། རཾ་ལས་སྐྱེས་པའི་མེ་འབར་བའི་གུར་གྱི་ནང་དུ་ཆུད་པར་གྱུར། དེ་ནས་ཆངས་བུ་སོགས་ཨཾ་མྲྀ་ཏས་བསངས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་འོད་དུ་ཞུ་བ་ལས་བྱུང་བའི་གཏོར་རྫས་རྣམས་ཁ་དོག་དྲི་རོ་རེག་བྱའི་ནུས་པ་ཕུན་སུམ་ཚོགས་པ་རྒྱ་ནམ་མཁའི་ཁྱོན་དང་མཉམ་པའི་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུཾ། ལན་གསུམ། ན་མཿས་མནྟ་བུདྡྷ་ནཱཾ། ན་མཿསརྦ་ཏ་ཐ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུཾ། ཞེས་པ་བདུན་ནམ་ཉེར་གཅིག་རེས་བསྔོ། དེ་བཞིན་གཤེགས་པ་རིན་ཆེན་མང་ལ་ཕྱག་འཚལ་ལོ། །གཟུགས་མཛེས་དམ་པ་ལ་ཕྱག་འཚལ་ལོ། །སྐུ་འབྱམས་བཟླས་ལ་ཕྱག་འཚལ་ལོ། །ཐུགས་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །སྐབས་འདིར་ཆོ་ག་སྔ་མ་ལས་བདེན་སྟོབས་བརྗོད་ཚུལ་རྒྱས་བསྡུས་གཉིས་གསུངས་ཤིང་དེ་གཉིས་གདམ་ཁ་ཅན་དུ་བཤད་ཀྱང་། འདིར་དེ་གཉིས་ཀྱི་དོན་ཕྱོགས་གཅིག་ཏུ་བསྡུས་ནས་འཇུག་པ་བདེ་བར་བརྗོད་པར་བྱ་སྟེ། དེ་ཡང་། འདི་ལྟར་སངས་རྒྱས་བཅོམ་ལྡན་འདས་རྣམས་ནི་ཆོས་གཟུགས་ཀྱི་སྐུ་གཉིས་བརྙེས་པ་མཐར་ཕྱིན་ཅིང་། སྟོབས་བཅུ་དང་མི་འཇིགས་པ་ལ་སོགས་པའི་ཡོན་ཏན་ཐམས་ཅད་ཡོངས་སུ་རྫོགས་པ་དང་། སྒྲིབ་པ་ཐམས་ཅད་དང་བྲལ་ཞིང་བསྙེངས་པ་མི་མངའ་བས་བདུད་དང་ཕས་ཀྱི་རྒོལ་བ་ཐམས་ཅད་འཇོམས་པར་མཛད་པའི་མཐུ་ཐོགས་པ་མེད་པ་ལྡན་ཅིང་སེམས་ཅན་ཐམས་ཅད་ཀྱི་མགོན་སྐྱབས་དམ་པར་གྱུར་བའི་བདེན་པ་དང་། དམ་པའི་ཆོས་ནི་ཐོག་ཐ་བར་དགེ་ཞིང་མི་མཐུན་ཕྱོགས་ཐམས་ཅད་རབ་ཏུ་འཇོམས་པའི་བདེན་པ་དང་། གཞན་ཡང་གསང་སྔགས་རིག་སྔགས་གཟུངས་སྔགས་སོགས་ཀྱི་བདེན་པ་དང་། དཔལ་ཕྱག་ན་རྡོ་རྗེ་ལ་སོགས་པ་འཕགས་པ་ཉེ་བའི་སྲས་ཆེན་བརྒྱད་ཀྱི་བདེན་པ་དང་། འཕགས་པ་རབ་འབྱོར་ལ་སོགས་པ་ཉན་ཐོས་ཆེན་པོ་བཅུ་དྲུག་གི་བདེན་པ་དང་། འཕགས་པ་གདུང་བ་སེལ་བ་ལ་སོགས་པ་རང་རྒྱལ་ཆེན་པོ་སོ་གཉིས་དང་འཕགས་པའི་དགེ་འདུན་ཐམས་ཅད་ཀྱི་བདེན་པ་དང་། མདོར་ན་དཀོན་མཆོག་གསུམ་གྱི་བདེན་པ་དང་། རྟེན་འབྲེལ་བསླུ་བ་མེད་པའི་བདེན་པ་དང་། བདག་གི་བསམ་པ་རྣམ་པར་དག་པའི་སྟོབས་ཀྱིས། བདག་དང་སྦྱིན་པའི་བདག་པོ་འཁོར་དང་བཅས་པ་ཐམས་ཅད་ལ་གནོད་པའི་ནད་རིགས་བཞི་བརྒྱ་རྩ་བཞི། བགེགས་རིགས་སྟོང་ཕྲག་བརྒྱད་ཅུ་གདོན་རིགས་སུམ་བརྒྱ་དྲུག་ཅུ། བྱིས་པའི་གདོན་ཆེན་བཅོ་ལྔ། རྨི་ལྟས་མཚན་མ་ངན་པ་དང་བཀྲ་མི་ཤིས་པ་དང་དུས་མ་ཡིན་པ་འཆི་བ་ལ་སོགས་པའི་མི་མཐུན་པའི་ཕྱོགས་ཐམས་ཅད་ཞི་བར་གྱུར་ཅིག །ཁྱད་པར་དུ་ཡང་སྦྱིན་བདག་གི་ནད་ཐམས་ཅད་ཞི་བར་གྱུར་ཅིག །ཞི་བར་མཛད་དུ་གསོལ། ཚེ་དང་བསོད་ནམས་ཐམས་ཅད་རྒྱས་པར་གྱུར་ཅིག །རྒྱས་པར་མཛད་དུ་གསོལ། དེ་ལྟར་བ རྒྱ་རྩ་བརྒྱད་བྱ་ཞིང་། བསྔོ་ཐེངས་རེ་ལ་བདེན་སྟོབས་རྒྱས་པ་ལ་མ་ལྕོགས་ན། ཐོག་ཐ་བར་གསུམ་ལ་རྒྱས་པ་དང་། གཞན་རྣམས་ལ་ནི། དཀོན་མཆོག་གསུམ་གྱི་བདེན་པ་དང་། འདི་ལྟར་མཆོད་སྦྱིན་བགྱིས་པའི་མཐུས་སྦྱིན་པའི་བདག་པོའི་ནད་གདོན་བར་ཆད་ཐམས་ཅད་ཉེ་བར་ཞི་བར་གྱུར་ཅིག །ཅེས་སམ། ཡང་ན། བདག་གི་བསམ་པའི་སྟོབས་ཞེས་སོགས་བརྗོད། སྐང་གསོ་དང་འབྲེལ་ན་ཆོས་སྐྱོང་གི་བསྐུལ་བ་སྐབས་འདིར་བྱའོ། །དེ་ནས་རོལ་མོའི་དབྱངས་དང་བཅས་པས་བསྐུལ་བ་ནི། ཧཱུཾ་ཉོན་ཅིག་མ་ལུས་བགེགས་ཀྱི་ཚོགས། །བདག་གིས་དེ་རིང་ཁྱོད་མཆོད་ཀྱིས། །སོང་ཞིག་མ་འདུག་བགེགས་ཀྱི་ཚོགས། །ཕྱིན་ཆད་འདི་ལྟར་མ་བྱེད་ཅིག །ཁྱོད་ཀྱི་སྟོབས་དང་རྩལ་མཐོང་ན། ཁྱོད་ཀྱིས་ཕན་གནོད་བྱེད་པར་ནུས། ཁྱོད་ནི་ལྷ་ཡི་སྤྲུལ་པ་སྟེ། ཁྱོད་ཀྱིས་ཕན་གནོད་མི་ནུས་མེད། །སྔོན་ཆད་མཆོད་སྦྱིན་མ་ཐོབ་པས། །དེ་རིང་བདག་གིས་ཁྱོད་མཆོད་ཀྱིས། །མེ་ཏོག་སྤོས་དང་མར་མེ་དང་། །དྲི་ཆབ་ཞལ་ཟས་འདི་བསྣམས་ལ། །བགེགས་ཀྱི་རྒྱལ་མོ་འགྲོ་བར་བགྱིས། །སྔོན་ཆད་ལན་ཆགས་ཡོད་ན་ཡང་། །མཆོད་སྦྱིན་འདི་ཡིས་བྲལ་བར་བགྱིས། །དཀོན་མཆོག་གསུམ་གྱི་བཀའ་བཅག་དང་། །དམ་ཚིག་ཉམས་པའི་ཉེས་པ་ཡིས། །གནོད་པར་གྱུར་ན་མ་ལེགས་ཀྱིས། །བགེགས་ཆེན་ཁྱོད་ནི་ད་སོང་ཞིག །རྡོ་རྗེ་ཆེན་པོ་མཆོག་འཛིན་པའི། །མགོན་པོ་ཆེན་པོས་བྱིན་རློབས་ལ། །བློ་ངན་གང་ཞིག་འདའ་བྱེད་པ། །རྡོ་རྗེ་འཛིན་པས་མྱུར་དུ་སྤོང་། །སྤངས་པའི་སེམས་ཅན་ཆེན་པོ་དེ། །ཇི་སྲིད་འཁོར་བའི་སྤྱོད་ཡུལ་དུ། །ངན་སོང་གསུམ་དུ་ཡང་དང་ཡང་། །ཤིན་ཏུ་མི་བཟད་ཆོ་ངེ་འདེབས། །བདག་ཉིད་ཆེན་པོའི་སངས་རྒྱས་བཀའ། །ཚིག་ལས་འདས་ན་རྡུལ་བཞིན་བརླག །དེ་བས་དམ་ཚིག་འདའ་མ་བྱེད། །དེ་ནས་རང་ཉིད་འཇིགས་བྱེད་དམ། ཧཱུཾ་མཛད་དུ་བསྒྱུར་ནས། ཧཱུཾ། མཚོན་ཆས་མི་འཇིགས་གང་ཡང་མེད། །འཚོ་བའི་སྲོག་ལ་ཀུན་ཀྱང་འཛེམ། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ཞེས་བརྗོད་དེ་རྡོ་རྗེ་སོགས་ཀྱིས་གཟུགས་བརྙན་དེ་ལ་ཚད་ཚད་བྱ། དེ་ནས་ལག་ཏུ་རྡོ་རྗེ་བཟུང་ནས། ཧཱུཾ། དམ་ཚིག་འདི་ལས་འདའ་མ་བྱེད། །གལ་ཏེ་དམ་ཚིག་འདས་གྱུར་ན། །ཨ་ཛ་ཀ་ཡི་དོག་པ་ལྟར། །མགོ་པོ་ཚལ་པ་བདུན་དུ་འགས། །ཞེས་བརྗོད་དེ་དྲི་ཆུས་གནས་གསུམ་དུ་ཐིག་ལེ་བྱ། ཡང་རྡོ་རྗེ་སྤྱི་བོར་བཞག་ལ། དེ་ནས་ཡང་གཟུགས་དེ་ཁ་ཕྱིར་བསྟན་ནས། ཧཱུཾ། བགེགས་ཀྱི་ཚོགས་རྣམས་ད་ཆོས་ཤིག །འཇིག་རྟེན་གཙོ་མོ་ཆོས་ཙམ་ན། །རི་རབ་ཆེན་པོ་ལྡེམས་སེ་ལྡེམས། །རྒྱ་མཚོ་ཆེན་པོ་དཀྱིལ་ལི་ལི། །འགྲོ་དྲུག་ཀུན་ཀྱང་ཤ་ར་ར། དར་ཚོན་སྣ་ལྔ་པུ་རུ་རུ། །གླུད་བདག་ཆེན་པོ་ཆས་ཙམ་ན། །འཇིག་རྟེན་སྲུང་མ་ཐམས་ཅད་ཀྱང་། །ཕྱི་ཡི་སྐྱེལ་མ་ཉིལ་ལི་ལི། །མུན་པའི་ན་བུན་འཐིབས་སེ་འཐིབས། །མདོས་བདག་ཆེན་མོ་ཆས་ཙམ་ན། །བརྗེད་བྱེད་ཡི་དྭགས་དྲི་ཟའི་ཚོགས། །གཏོར་ལེན་མང་པོ་ཧྲུགས་སེ་ཧྲུགས། །དམག་དཔོན་ཆེན་མོ་ཆས་ཙམ་ན། །པི་ཝང་གླིང་བུ་སེངས་སེ་སེངས། །བདུད་བཙན་དྲག་བྱེད་འཁོར་བཅས་ཀུན། །གླུ་གར་བྲོ་བརྡུང་ཆེམས་སེ་ཆེམས། །འབྱུང་པོ་འབུམ་གྱི་ཡུམ་གཅིག་མོ། །ཡི་དྭགས་བྱེ་བའི་འཁོར་གྱིས་བསྐོར། །མཆོད་སྦྱིན་གཏོར་མ་འདི་ཁྱེར་ལ། །རང་རང་གནས་སུ་ད་སོང་ཞིག །སྔོན་ཚེ་ཤཱཀྱ་ཐུབ་པ་ཡི། །སྤྱན་སྔར་ཁས་བླངས་དམ་བཅས་བཞིན། །དཀོན་མཆོག་གསུམ་གྱི་བཀའ་མ་བཅག །དམ་པའི་བདེན་ཚིག་བསུན་མ་འབྱིན། །ཡོན་བདག་རྒྱུ་སྦྱོར་ཆུད་མ་སོན། །རྟེན་འབྲེལ་ཚོགས་པའི་ཐབས་མ་བསླུ། །གལ་ཏེ་བཀའ་ལས་འདས་གྱུར་ན། །སྙིང་ལ་ནད་གསོ་མེ་བཞིན་འབར། །མགོ་ལུས་དུམ་བུ་སྟོང་དུ་འགྲོ །དེ་ནས་དམ་ཚིག་ཐུབ་པར་སྲུངས། །རྣལ་འབྱོར་བདག་གི་བཀའ་མ་བཅག །རྒྱུ་སྦྱོར་ཡོན་གྱི་བདག་པོ་ལ། །བཟུང་བ་ཐོངས་ལ་བཅིངས་པ་ཁྲོལ། །བསྡམས་པ་གློད་ལ་མནན་པ་ཐེག །གནོད་པ་ཐམས་ཅད་མྱུར་དུ་སོལ། །གལ་ཏེ་དེ་ལྟར་མི་བྱེད་ན། །གཏོར་མ་འདི་ནི་གཉེན་པོ་ཡིན། །ནད་དང་མཚོན་གྱིས་བརླག་པར་བྱེད། །དེ་ནས་ཕྱི་རོལ་ཏུ་སྐྱེལ་སར་སླེབས་པ་ན་གསེར་སྐྱེམས་མཆོད་ཅིང་། གཟུགས་དེ་ཁ་བུག་གམ་ཁ་ཕྱིར་བསྟན་ནས་བཞག་ལ། ཧཱུཾ་སྐྱུར་རོ་རྒྱ་མཚོའི་གཏིང་དུ་བསྐྱུར། མནན་ནོ་རི་རབ་འོག་ཏུ་མནན། །འདི་ནས་དཔག་ཚད་ལྔ་བརྒྱ་ན། །གཤིན་རྗེའི་རྒྱལ་པོ་ཆོས་འཆད་ཀྱི། །དེ་ཡི་དྲུང་དུ་ཆོས་ཉོན་ཅིག །བྱང་ཆུབ་སེམས་ནི་མ་སྐྱེས་བར། །སྟེང་གི་ཕྱོགས་སུ་མ་འབྱུང་ཞིག །ནམ་ཞིག་བྱང་ཆུབ་སེམས་སྐྱེས་ན། །དཀོན་མཆོག་གསུམ་པོ་བསྟེན་མཛོད་དང་། །ཐུགས་རྗེ་ཆེན་པོས་གཟུང་བར་འགྱུར། །ཅེས་བརྗོད་ཅིང་ཁ་བུག་ཏུ་བཞག་ལ། བཟློག་པ་བྱ། འགའ་ཞིག་ནི་གོང་དུ་བཤད་ཟིན་ཏོ། །དེ་ནས་ནང་དུ་འོངས་ཏེ་ལྷ་ལ་མཆོད་པ་སྔར་བཞིན་རྒྱས་བསྡུས་ཅི་རིགས་ཀྱིས་ཕུལ་ནས་བསྟོད་པ་བྱ། ཡིག་བརྒྱ་བརྗོད་ཅིང་། མ་རྙེད་ཅེས་སོགས་བཟོད་གསོལ་རྒྱས་བསྡུས་གང་རུང་དང་། གཙོ་བོ་ལ་འདིར་ནི་རྟེན་དང་ལྷན་ཅིག་ཏུ། །ཞེས་སོགས་ཀྱིས་བརྟན་བཞུགས་དང་། འཁོར་རྣམས་ལ་ནི། ༀ་ཁྱོད་ཀྱིས་སེམས་ཅན་དོན་ཀུན་མཛད། །ཞེས་སོགས་ཀྱི་འཇུག་ཏུ། མགྲོན་གཞན་རྣམས་རང་གནས་སུ་གཤེགས་པར་གྱུར། ཞེས་བརྗོད་དེ་བཀྲ་ཤིས་བྱའོ། །སྙིགས་དུས་མ་རུང་སྐྱེ་བོ་རྣམས། །རྐུ་འཕྲོག་སྲོག་གཅོད་ལ་སོགས་པ། །ངན་སོང་དུ་མ་ལ་ཞུགས་པས། །མ་མོ་མཁའ་འགྲོ་ཁྲོས་ཤིང་འཁྲུགས། །དེ་ཚེ་ནད་ཡམས་དལ་ཡམས་ཀྱི། །གནོད་པ་རང་གཞན་དུ་མ་ལ། །ཆར་ལྟར་བབས་ཏེ་མི་འདོད་པའི། །སྡུག་བསྔལ་སྣ་ཚོགས་སྟེར་བར་བྱེད། །དེ་ཕྱིར་སྟོན་པས་ཆོས་ཚུལ་འདི། །གནོད་པ་ཀུན་དང་མ་མོ་ཡི། །གདོན་ཀུན་བཟློག་ཕྱིར་གསུངས་པས་ན། །ཆོ་ག་འདི་ཉིད་བསྟན་པར་རིགས། །འདིར་འབད་དགེ་བ་ཀུནྡའི་གཉེན། །གང་ཞིག་ཐོབ་དེས་འགྲོ་བ་ཀུན། །ནད་གདོན་སྡུག་བསྔལ་མུན་སྟུགས་ལས། །རྒྱལ་ནས་ཕན་བདེའི་ལམ་གསལ་ཤོག །ཅེས་ཁ་འབར་མའི་མདོས་ཀྱི་རིམ་པ་ཇི་ལྟར་བྱ་བའི་ཚུལ་འདི་ནི། ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་དམ་པ་སྔ་མ་དག་གི་ཕྱག་སྲོལ་ལ་ཅུང་ཟད་རེ་ཁ་བསྐང་བའི་སྒོ་ནས་གཞན་རེ་གཉིས་ལ་ཕན་ཐོགས་སྲིད་སྙམ་ནས་ཅོ་ནེའི་དགོན་ཉིད་དུ་སྦྱར་བ་སྟེ། པར་གྱི་ཡི་གེ་པ་ནི་ཏཱ་ཡི་ལ་ལུང་གི་བློ་བཟང་དོན་གྲུབ་བོ། །སརྦ་མངྒ་ལཾ། །