འཇིགས་གསང་གཉིས་ལ་བརྟེན་ནས་བུམ་ཆོག་བྱེད་ཚུལ།
འཇིགས་གསང་གཉིས་ལ་བརྟེན་ནས་བུམ་ཆོག་བྱེད་ཚུལ་བཞུགས།
ན་མོ་བཛྲ་བྷཻ་ར་ཝ་ཡེ། འཇལ་དཔལ་ཞི་ཁྲོ་དུས་ཀྱི་མཐར། །ངུར་སྨྲིག་གར་ཀྱིས་རྣམ་རོལ་བ། །རྒྱལ་བ་གཉིས་པའི་ཞབས་བཏུད་ནས། །འཇིགས་བྱེད་བུམ་བསྐྱེད་མདོར་བསྡུས་བྲི། །འདིར་འཇིགས་བྱེད་བཅུ་གསུམ་མ་ལ་བརྟེན་ནས་ལྷོ་སྒོའི་ཆོ་ག་བྱེད་མཁན་མང་དུ་སྣང་ཡང་། བུམ་བསྐྱེད་མཛད་པའི་སྲོལ་མ་དར་འདུག་པས། དེ་ལ་བུམ་བསྐྱེད་ཆོ་གའི་གཞུང་བཞིན་བྱེད་པ་བྱུང་ན་ལེགས་མོད། མིན་ཀྱང་བུམ་ཆོག་བསྡུས་པ་བྱེད་ཚུལ་ལ་ལྷ་ལྔ་ཙམ་བསྐྱེད་པ་དང་། ལྷ་བཅུ་གསུམ་མདོར་བསྡུས་ནས་བསྐྱེད་པའི་ཚུལ་གཉིས་ལས། སྔ་མ་ནི་མཁས་པའི་སྲོལ་ལྟར་བདག་གིས་གཞན་དུ་བྲིས་ཟིན་ལ། འདིར་ཕྱི་མའི་དབང་དུ་བྱས་ནས་བརྗོད་པར་བྱ་སྟེ། བུམ་པ་མཆོད་པ་དང་བཅས་སྟ་གོན་བྱས་ནས་མདུན་དུ་སྟེགས་ཀྱི་ཁར་བཞག་སྟེ། ཧྲཱིཿཥྩིཿས་བསངས། སྭ་བྷཱ་ཝ་ནས། ཧཾ། བུམ་པ་སྟོང་པ་ཉིད་དུ་གྱུར། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ་དཀར་པོ། ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ་ལ་སོགས་པའི་མཚན་ཉིད་ཐམས་ཅད་དང་ལྡན་པར་གྱུར། ༀ་ཏཱཔྟེ་ཏཱཔྟེ་མ་ཧཱ་ཏཱཔྟེ་སྭཱཧཱ། ལྷའི་ཆུ་བོ་གངྒཱ་དང་བུམ་པའི་ཆུ་དབྱེར་མི་ཕྱེད་པར་གྱུར། རྣམ་རྒྱལ་བུམ་པའི་ནང་གི་དབུས་དང་ཕྱོགས་གཞན་གསུམ་དང་། དེའི་ཕྱི་རོལ་གྱི་ཕྱོགས་བཞིར་སྣ་ཚོགས་པདྨ་དང་ཉི་མའི་གདན། ནང་གི་ཤར་དང་མཚམས་བཞི་དང་། ཕྱིའི་མཚམས་བཞིར་སྣ་ཚོགས་པདྨ་དང་ཟླ་བའི་གདན་ཟུང་རེ་རེ། གདན་དེ་རྣམས་ཀྱི་སྟེང་དུ་དབུས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ནང་གི་ཤར་དུ་ཀྵེ་ལས་འཁོར་ལོ་ཀྵེས་མཚན་པ། ཞེས་པ་ནས། དེའི་ཕྱི་རོལ་གྱི་ཤར་དུ་ཡ་ལས་ཐོ་བ་ཡས་མཚན་པ། ནས། ནང་གི་ཤར་ལྷོར་ཛཿལས་འཁོར་ལོ་ཛཿས་མཚན་པ། ནས། ཕྱིའི་མཚམས་བཞིར་ཎ་ཡོ་ནི་རཱའི་ཡི་གེ་བཞི་རྣམས་འོད་ཟེར་འཕྲོ་ཞིང་འདུ་བ་ཕྱག་འཚན་ས་བོན་གྱིས་མཚན་པ་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་སྐུར་ཡོངས་རྫོགས་པར་གྱུར་པ་ནི། དབུས་ཀྱི་གདན་ལ་དཔལ་རྡོ་རྗེ་འཇིགས་བྱེད་ཆེན་པོ་ཞེས་པ་ནས། གཡོན་བརྐྱངས་པའི་སྟབས་ཀྱིས་བཞུགས་པ་ཡུམ་དང་བཅས་པའི་སྐུར་བཞེངས་པར་གྱུར། ནང་གི་ཤར་དུ་གཏི་མུག་གཤིན་རྗེ་གཤེས་ཡབ་ཡུམ། ལྷོར་སེར་སྣ་གཤིན་རྗེ་གཤེད་ཡབ་ཡུམ། ཞེས་པ་ནས། དེའི་ཕྱི་རོལ་གྱི་ཤར་དུ་ཐོ་བ་གཤིན་རྗེ་གཤེད་ཡབ་ཡུམ། ནས། ནང་གི་ཤར་ལྷོར་ཙ་རྩི་ཀ་ཡབ་ཡུམ། ནས། ཕྱིའི་མཚམས་བཞིར་མིའི་ཐོད་པ་བདུད་རྩིས་གང་བ་བཞིར་གྱུར། རྒྱས་པར་འདོད་ན་ལྷ་ཐམས་ཅད་ཀྱི་སྐྱེད་ཆོག་གཞུང་བཞིན་བྱའོ། །གཙོ་འཁོར་ཐམས་ཅད་ཀྱི་མིག་གཉིས་སུ་ཀྵི། ཞེས་པ་ནས། ཐུགས་ཀར་ཧཱུཾ་གིས་མཚན་པར་གྱུར། ༀ་ཧྲཱིཿ ཧ་བྷོ་ནས། ཀུ་རུ་སྭཱ་ཧཱ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་ཡེ་ཤེས་པའི་དཀྱིལ་འཁོར་སྤྱན་དྲངས། ༀ་ཧྲཱིཿ ཥྚཱིཿབི་ཀྲྀ་ནས། ཧཱུཾ་ཕཊ། ༀ་མུངྒ་ག་ར་ཛཿ ནས། ཁངྒ་ཧོཿ སླར་ཡང་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་དབང་གི་ལྷ་རྣམས་སྦྱན་དྲངས། ཁྱེད་རྣམས་ཀྱིས་འདི་ལ་མངོན་པར་དབང་བསྐུལ་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་སྤྲོས་པའི་ལྷ་མོ་ཙ་ཙི་ཀ་ལ་སོགས་པས་བུམ་པའི་ཆུས་སྦྱི་བོ་ནས་དབང་བསྐུར། ལུས་ཐམས་ཅད་གང་། དྲི་མ་ཐམས་ཅད་དག །ཆུའི་ལྷག་མ་སྤྱི་གཙུག་ཏུ་གནས་པ་ཡོོངས་སུ་གྱུར་པ་ལས་གཙོ་བོའི་རྩ་ཞལ་གྱི་དབུ་ལ་མི་བསྐྱོད་པ་ཞེས་པ་ནས། དབང་གི་ལྷ་རྣམས་ཀྱང་དེ་ཉིད་ལ་ཐིམ་པར་གྱུར། སྤྲོ་ན་དཀྱུས་ལྟར་བྱའོ། །མཆོད་པ་བསངས་སྦྱངས་བསྐྱེད་ནས། ༀ་ཡ་མཱནྟ་ཀ་ས་པཱ་རི་ཝ་ར་ཨརྒྷཾ་ནས། ཤཔྟ་པྲ་ཏཱིཙྪ་སྭཱཧཱའི་བར་གྱིས་མཆོད་ཅིང་། ནང་མཆོད་ཀྱང་འབུལ། གཉིས་མེད་ཐུབ་མོང་མ་ཡིན་ཞེས་སོགས་སམ། ཡང་ན་གཟུགས་མཆོག་མའི་མཇུག་ཏུ་གཤིན་རྗེ་གཤེད་པོ་རབ་འཇིགས་པ། ཞེས་པ་ནས། ཕྱག་ན་རལ་གྲི་ཕྱག་འཚལ་བསྟོད། ཞེས་པའམ། བསྡུ་ན་གཟུགས་མཆོག་མ་ཙམ་གྱིས་བསྟོད་ལ། རང་གི་ཐུགས་ཀ་ནས་འོད་ཟེར་འཕྲོས་པས་བུམ་པའི་ལྷ་རྣམས་ཀྱི་ཐུགས་རྒྱུད་བསྐུལ། སྐུའི་ཆ་ནས་བདུད་རྩིའི་རྒྱུན་བབས་པས་བུམ་པ་གང་བར་གྱུར་བར་བསམས་ལ། སྔགས་ཅི་འགྲུབ་དང་ཡི་གེ་གསུམ་ལན་ཉེར་གཅིག་གམ་བདུན་དང་། ཁཊྒ་དྷྲིག་གིས་བསངས་པར་འདོད་ན། དེ་ཉིད་སླར་ལན་བདུན་སོགས་བཟླ། མཐར་ཡིག་བརྒྱ་ལན་གསུམ། སླར་ཡང་ༀ་ཧྲཱིཿཥྚཱིཿཧ་ཞེས་སོགས་ཀྱིས་མཆོད་ཅིང་། ནང་མཆོད་འབུལ་ཚུལ་རྒྱས་པའམ། བསྡུ་ན་ཡ་མཱནྟ་ཀ་ས་པཱ་རི་ཝ་ར་ༀ་ཨཱཿཧཱུཾ་གིས་ཕུལ། བསྟོད་པ་སྔར་བཞིན་རྒྱས་བསྡུས་ཅི་རིགས་བྱས་ནས། བུམ་པའི་ལྷ་རྣམས་ཆགས་པ་ཆེན་པོའི་མེས་ཞུ་ནས་བུམ་པའི་ཆུ་དང་རོ་གཅིག་ཏུ་གྱུར་ཞེས་བརྗོད་ཅིང་བསམ་མོ།། །། མངྒ་ལཾ། །