ཀུན་རིག་གི་བདག་མདུན་བུམ་གསུམ་གྱི་མཇུག་ཏུ་ཇི་ལྟར་བྱ་བའི་ཕྱག་ལེན་ཐུན་མོང་མ་ཡིན་པ།
ཀུན་རིག་གི་བདག་མདུན་བུམ་གསུམ་གྱི་མཇུག་ཏུ་ཇི་ལྟར་བྱ་བའི་ཕྱག་ལེན་ཐུན་མོང་མ་ཡིན་པ་བཞུགས།
གང་གི་ཆོ་གའི་ཚུལ་ལྟ་ཅི། གཟུངས་དང་མཚན་ཙམ་བརྗོད་པས་ཀྱང་། ངན་སོང་སྡུག་བསྔལ་ཞི་མཛད་པ། །རྣམ་སྣང་ལྷ་ཚོགས་རྣམས་ལ་འདུད། །ཕ་མེས་ཕོར་བ་གཙང་འཛིན་གྱི། །དཔེ་ཚུལ་ཙམ་ཞིག་མི་འཛིན་པར། །མཁས་པའི་སྲོལ་བཞིན་ཤེས་འདོད་ལ། །ཆོ་གའི་ཟུར་རྒྱན་བཤད་པར་བྱ། །དེ་ཡང་མདུན་བསྐྱེད་ཀྱི་མཇུག་ཏུ་བདག་བུམ་གཉིས་ཀྱི་གཤེགས་གསོལ་དང་མདུན་བསྐྱེད་ལ་བརྟན་བཞུགས་མཛད་པའི་ཚུལ་ད་ལྟ་ཕྱག་ལེན་དུ་དར་བ་བཞིན་ཏེ་འདིར་མི་བརྗོད་ཀྱང་། བདག་མདུན་བུམ་གསུམ་སོ་སོའི་མཇུག་ཏུ་ཇི་ལྟར་བྱ་བའི་ཚུལ་ཙམ་མཁས་པའི་བཞེད་པ་བཞིན་བཤད་པར་བྱའོ། །འདི་ལ་གསུམ། བདག་བསྐྱེད་དང་། བུམ་བསྐྱེད་དང་། མདུན་བསྐྱེད་ཀྱི་མཇུག་ཏུ་ཇི་ལྟར་བྱ་བའི་ཚུལ་ལོ། །དང་པོ་ནི། འདུལ་འཛིན་བའི་བཞེད་པ་ལྟར། བདག་བསྐྱེད་ཀྱི་བསྙེན་པའི་མཇུག་ཏུ་ཡིག་བརྒྱ་དང་མཆོད་བསྟོད་བྱས་རྗེས་སུ། བདག་གི་དགེ་བའི་ལས་རྣམ་འདི་དག་གིས། །ཞེས་སོགས་གཅིག་གི་མཐར། མ་རྙེད་ཞེས་སོགས་ཀྱིས་བཟོད་གསོལ་བྱས་ཏེ་མཆོད་ཡོན་ཕུལ་རྗེས། ༀ་ཁྱོད་ཀྱིས་སེམས་ཅན་དོན་ཀུན་མཛད། ཅེས་སོགས་ཚིགས་བཅད་གཅིག་དང་སེམས་མ་རྡོ་རྗེ་མའི་ཕྱག་རྒྱ་སྤྱི་བོ་ནས་གྱེན་དུ་བཀྲོལ་ཏེ། ༀ་བཛྲ་ས་ཏྭ་བཛྲ་མུཿཡེ་ཤེས་པ་རང་བཞིན་གྱི་གནས་སུ་གཤེགས། རྡོ་རྗེ་བསྡུ་བའི་ཕྱག་རྒྱ་དང་། ༀ་བཛྲ་ས་མ་ཛཿདམ་ཚིག་པ་རྟེན་བརྟེན་པའི་དཀྱིལ་འཁོར་རང་ཉིད་ལ་ཐིམ་པར་གྱུར་པར་བསམས་ལ། རང་ཉིད་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་ཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པའི་སྐུར་བཞེངས་པར་གྱུར། ༀ་སརྦ་བིད་ༀ་ནས། སརྦ་བིད་ཧཱུཾ་ཞེས་གནས་གསུམ་བྱིན་གྱིས་བརླབས། བྱང་ཕྱོགས་སེམས་དཔའི་ཕྱག་རྒྱ་དང་གཙུག་ཏོར་གྱི་ཕྱག་རྒྱ་འདིར་མ་བྱས་ཀྱང་ཆོག་གོ །དེས་ན་བདག་བསྐྱེད་ཀྱི་མཇུག་ཏུ་བསྡུ་ཚུལ་དེ་ལྟར་དགོས་པ་ཆོ་གའི་དགོངས་པ་ཡིན་པས་ལེགས་ཤིང་། དེར་མ་ཟད་ཆོ་ག་གཞན་གྱི་རིགས་འགྲོས་སྦྱར་ནའང་འཐད་བའི་ཕྱིར་ད་ལྟ་མཇུག་གི་བར་རང་དགར་འཇོག་པ་འདི་ཅུང་མི་ལེགས་སོ། །གཉིས་པ་བུམ་བསྐྱེད་ནི། ད་ལྟའི་ཕྱག་ལེན་དུ་ཆོ་ག་རྫོགས་པའི་བར་འཇོག་པ་འདི། སྤྱིར་འཐད་མི་འཐད་པ་བརྟག་པར་བྱ་སྟེ། བུ་སྟོན་དང་འདུལ་འཛིན་པའི་ཆོ་གར་བུམ་པ་བསྒྲུབས་ནས་གཤེགས་གསོལ་དང་འོད་ཞུ་གང་ཡང་མི་མཛད་པར་བཏང་སྙོམས་སུ་བཞག་པ་ལྟར་སྣང་ཞིང་། མཁས་པ་འགའ་ཞིག་གིས་ཚུལ་འདི་མི་ལེགས་ཏེ། དེ་ལྟར་འཇོག་པ་ནི་མཁས་གྲུབ་རྗེའི་གསུང་འབུམ་ཐོར་བུ་ལས་རྡུལ་ཚོན་གྱི་དཀྱིལ་འཁོར་མ་གཤེགས་པར་བསྡུས་པ་དང་འདྲ་བས་དོན་མ་ཡིན་པ་ཆེན་པོ་བསྐྱེད་པའི་ལག་ལེན་དང་ཞེས་བཀག་ཅིང་། མདུན་བསྐྱེད་མ་ཡིན་པར་བདག་བུམ་གཉིས་ལྟ་བུ་ལ་ཕྱག་རྒྱ་བཞིས་རྒྱས་བཏབ་ནས་མཐར་དམ་རྒྱ་མ་བཀྲོལ་ན་ལྷ་བཙོན་དུ་བཟུང་བ་ལྟ་བུའི་ཉེས་པར་འགྱུར་བའི་ཕྱིར་ཞེས་གསུངས་ནས། བུམ་བསྐྱེད་ཀྱི་མཇུག་ཏུ་དམ་རྒྱ་བཀྲོལ་ཏེ་འོད་ཞུ་བྱ་བར་བཤད་དོ། །འོན་ཀྱང་འདུལ་འཛིན་པའི་ཊིཀ་ཆེན་ལས། རྣལ་འབྱོར་རྒྱུད་མན་ཆད་དུ་བུམ་པའི་ལྷ་བཞུ་བར་མ་བཤད་ཅེས་འབྱུང་ཡང་འདི་དྲང་དོན་དུ་འགྲེལ་ཏེ། ཚེ་དཔག་མེད་དང་རྣམ་འཇོམས་སོགས་བྱ་རྒྱུད་ཀྱི་ཆོ་ག་དུ་མར་བུམ་ལྷ་བཞུ་བར་བཤད་ཅིང་། རྣལ་འབྱོར་རྒྱུད་ཀྱི་འཇམ་དཔལ་གསང་ལྡན་གྱི་དཀྱིལ་ཆོག་སློབ་དཔོན་བྱང་ཆུབ་མཆོག་གིས་མཛད་པ་ལས་བུམ་པའི་ལྷ་བཞུ་བར་བཤད་པ་ལྟར་མཁས་གྲུབ་རྗེས་ཀྱང་གསུངས་ལ། སྨྲྀ་ཏིས་བསྒྱུར་བའི་ཀུན་སྙིང་གི་ཆོ་ག་ལས་ཀྱང་། དེ་ནས་ལྷ་འོད་ཞུ་བྱས་ཏེ། བྱང་ཆུབ་ཡེ་ཤེས་ཆུ་རུ་གྱུར། །ཞེས་འབྱུང་ངོ་། །འོད་ཞུ་བྱེད་པའི་དུས་ནི། གསང་བདེ་འཇིགས་གསུམ་སོགས་ཆོ་ག་གཞན་གྱི་རིགས་པ་སྦྱར་ན་ནི་བུམ་པའི་མཇུག་ཉིད་དུ་འཐད་ལ། འོད་ཞུ་མི་བྱེད་པར་གཤེགས་ན་ཡང་སྐབས་དེ་ཉིད་དུ་རིགས་སོ། །ཅིས་ཀྱང་ཆོ་གའི་མཇུག་ཏུ་བྱེད་ན་ནི་འོད་ཞུ་བྱེད་དམ་མི་བྱེད་ན་དམ་ཚིག་པ་རང་ཉིད་ལ་ཐིམ་པར་བསམ་དགོས་སོ། །དམ་རྒྱ་བཀྲོ་ཚུལ་ལ་རྒྱས་བསྡུས་གཉིས་ལས། རྡུལ་ཚོན་གྱི་དཀྱིལ་འཁོར་བསྡུ་བའི་ཚེ་ལྷ་རེ་རེ་དང་སྦྱར་བའི་དམ་རྒྱ་བཀྲོ་ཚུལ་རྒྱས་པ་དེ་བྱ་དགོས་ཤིང་བདག་བསྐྱེད་ལ་བསྡུས་པས་ཆོག་པ་ཆོ་གའི་དགོངས་པ་ཡིན་པ་ལྟར་བུམ་བསྐྱེད་ལ་ཡང་འདྲའོ། །དེ་ཡང་བུམ་བསྐྱེད་ཀྱི་མཇུག་ཏུ་མཆོད་བསྟོད་བྱས་རྗེས་སྔར་ལྟར་བདག་གི་དགེ་བའི་ལས་རྣམས་ཞེས་སོགས་ཀྱི་མཇུག་ཏུ། མ་རྙེད་ཅེས་སོགས་ཀྱི་བཟོད་གསོལ་བྱས་ནས་མཆོད་ཡོན་ཕུལ་ཏེ། ༀ་ཁྱེད་ཀྱི་སེམས་ཅན་ཞེས་སོགས་ཀྱི་མཐར། ༀ་བཛྲ་ས་ཏྭ་བཛྲ་མུཿ བུམ་ལྷའི་ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་བུམ་པའི་ཆུ་དང་རོ་གཅིག་ཏུ་གྱུར་ཅེས་བརྗོད་ཅིང་བསམ། དེ་ལས་བསྡུ་ན། མཆོད་བསྟོད་ཀྱི་མཇུག་དེ་མ་ཐག །ༀ་ཁྱོད་ཀྱིས་སེམས་ཅན་ཞེས་སོགས་མན་ཆད་ཙམ་གྱིས་ཀྱང་ཆོག་གོ །མདུན་བསྐྱེད་ཀྱི་མཐར་རས་བྲིས་ལ་བཟོད་གསོལ་དང་བརྟན་བཞུགས་བྱས་པའི་འཇུག་དེར། གནས་གསུམ་བྱིན་གྱིས་བརླབས་དང་བྱང་ཕྱོགས་ཀྱི་སེམས་དཔའ་བཞིའི་སྔགས་བརྗོད་པ་དང་སེམས་དཔའི་གཙུག་ཏོར་གྱི་ཕྱག་རྒྱ་འཆིང་བ་སོགས་སྤྱི་ལྟར་བྱའོ། །འདི་ན་ཀུན་རིག་ཆོ་ག་ཡི། །བདག་མདུན་བུམ་བསྐྱེད་སོ་སོའི་མཐར། །བསྡུ་ཚུལ་ཇི་ལྟར་བྱ་བའི་རིམ། །མཁས་པའི་བཞེས་ཚུལ་མདོར་བསྡུས་བཤད། །ཅེས་པ་འདི་ནི་ཆོ་གའི་འདོད་ཆའི་ཁྱད་པར་ལ་བློ་བྱང་བའི་གནས་བརྟན་དགེ་འདུན་བཟང་པོས་རང་གཞན་ལ་ཕན་འདོད་ཀྱི་བསམ་པས་བསྐུལ་བ་ལྟར་བཤད་སྒྲུབ་མིང་ཅན་གྱིས་སྦྱར་བ་ཡི་གེ་བ་ནི་དགེ་སློང་ངག་དབང་བཀྲ་ཤིས་སོ།། །།