ཚེ་དཔག་མེད་ཀྱི་རྣལ་འབྱོར་དང་བླ་མ་རྒྱུད་པའི་གསོལ་འདེབས།
ཚེ་དཔག་མེད་ཀྱི་རྣལ་འབྱོར་དང་བླ་མ་བརྒྱུད་པའི་གསོལ་འདེབས་བཞུགས།
གང་གི་མཚན་བརྗོད་དྲན་པས་ཀྱང་། །འཆི་བདག་བདུད་ཀྱི་དཔུང་བཅོམ་ནས། །འཆི་མེད་ཚེ་ཡི་དཔལ་སྟེར་བ། །ཚེ་དཔག་མེད་ལ་ཕྱག་འཚལ་བསྟོད། །འདིར་བདག་ཉིད་ཀྱིས་ཉམས་སུ་ལེན་པའི་རིམ་པ་ལྟར་ཚེ་དཔག་མེད་ཀྱི་རྣལ་འབྱོར་རྒྱུན་འཁྱེར་དུ་བྱེད་པ་ནི། སྐྱབས་སེམས་སོགས་སྔོན་དུ་བཏང་ནས། རང་ཉིད་སྐད་ཅིག་གིས་རྒྱལ་བ་ཚེ་དཔག་མེད་ཞལ་གཅིག་ཕྱག་གཉིས་པར་གྱུར། རང་གི་ཐུགས་ཀའི་ཧྲཱིཿཡིག་ལས་འོད་ཟེར་འཕྲོས་པས། བདེ་བ་ཅན་ནས་མགོན་པོ་ཚེ་དཔག་མེད་ཡབ་སྲས་ཁོར་དང་བཅས་པ་སྤྱན་དྲངས། ༀ་ཨ་པ་ར་མི་ཏ་ཨཱ་ཡུརྫྙཱ་ན་ས་པཱ་རི་ཝ་ར་ཨེ་ཧྱ་ཧི། མདུན་གྱི་ནམ་མཁར་རྨ་བྱས་གཏེགས་པའི་རིན་པོ་ཆེའི་ཁྲིའི་སྟེང་དུ་པདྨ་དང་ཟླ་བའི་གདན་ལ་རྒྱལ་བ་ཚེ་དཔག་མེད་སྐུ་མདོག་དམར་པོ་ཞལ་གཅིག་ཕྱག་གཉིས་པ། མཉམ་བཞག་གི་ཕྱག་རྒྱའི་སྟེང་ན་འཆི་མེད་ཚེའི་བདུད་རྩིས་གང་བའི་བུམ་པ་བསྣམས་པ། དབུ་རྒྱན་ལ་སོགས་པ་རིན་པོ་ཆེའི་རྒྱན་སྣ་ཚོགས་བས་བརྒྱན་ཅིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། མཚན་དཔེས་སྤྲས་པའི་སྐུ་ལས་འོད་ཟེར་གྱི་ཚོགས་དཔག་ཏུ་མེད་པ་འཕྲོ་བ། དེའི་གཡས་སུ་སྤྱན་རས་གཟིགས། གཡོན་དུ་མཐུ་ཆེན་ཐོབ་པ། དེའི་མཐའ་སྐོར་དུ་རྒྱལ་བ་སྲས་བཅས་ཐམས་ཅད་ཀྱིིས་བསྐོར་ནས་བཞུགས་པར་གྱུར། བསླུ་མེད་མཆོག་གསུམ་འདུས་པའི་ངོ་བོ་ཉིད། །ངན་འགྲོའི་འཇིགས་ལས་སྒྲོལ་བའི་དཔའ་བོ་མཆོག །དག་པའི་ཞིང་དུ་འདྲེན་པའི་ཐུགས་རྗེ་ཅན། །མགོན་པོ་འོད་དཔག་མེད་ལ་ཕྱག་འཚལ་ལོ། །བརྩེ་བའི་གཏེར་ཆེན་རྗེ་བཙུན་སྤྱན་རས་གཟིགས། །མཐུ་སྟོབས་ནུས་པའི་མངའ་བདག་མཐུ་ཆེན་ཐོབ། །འཁོར་ཚོགས་རྒྱལ་བ་སྲས་བཅས་ཐམས་ཅད་ལ། །བདག་ཅག་སྒོ་གསུམ་གུས་པས་ཕྱག་འཚལ་ལོ། །ཆུ་གཉིས་ཉེར་སྤྱོད་རོལ་མོ་འདོད་ཡོན་ལྔ། །རབ་འབྱམས་ཞིང་ན་མཆིས་པའི་མཆོད་ཚོགས་དང་། །བདག་ལུས་ལོངས་སྤྱོད་དགེ་ཚོགས་མཎྜལ་བཅས། །ཐུགས་རྗེ་ཆེ་ལྡན་ཁྱེད་རྣམས་མཉེས་ཕྱིར་འབུལ། །ཐོགས་མེད་ནས་བསགས་སྡིག་ལྟུང་ཐམས་ཅད་དང་། །ཚེ་མཐར་ཕྱིན་དང་བདེ་ལྡན་ཞིང་མཆོག་ཏུ། །སྐྱེ་ལ་བར་དུ་གཅོད་པའི་ཉེས་པ་ཀུན། །ནོངས་ཤིང་འགྱོད་པའི་ཡིད་ཀྱིས་སོ་སོར་བཤགས། །རང་གཞན་སྐྱེ་འཕགས་ཀུན་གྱིས་ལེགས་བསྐྲུན་པའི། །རྣམ་དཀར་དགེ་ཚོགས་རྣམས་ལ་རྗེས་ཡི་རང་། །མ་ལུས་ཕྱོགས་བཅུར་བཞུགས་པའི་རྒྱལ་བ་ལ། །ཆོས་ཀྱི་འཁོར་ལོ་དམ་པ་བསྐོར་བར་བསྐུལ། །དེ་དག་སེམས་ཅན་ཀུན་གྱི་དོན་གྱི་ཕྱིར། །བསྐལ་བརྒྱར་མྱ་ངན་མི་འདའ་གསོལ་བ་འདེབས། །འདིས་མཚོན་ལེགས་ཚོགས་ཇི་སྙེད་མཆིས་པ་ཀུན། །བདེ་ལྡན་ཞིང་སྐྱེ་སངས་རྒྱས་ཐོབ་ཕྱིར་བསྔོ། །ཞེས་ཡན་ལག་བདུན་པ་བྱ། ཅུང་ཟད་སྤྲོ་ན། བདེ་གཤེགས་པའམ། ཉི་གཞོན་འཆར་ཀ་མ་གཉིས་གང་རུང་བརྗོོད་པའི་མཐར། སྐྱབས་གནས་ཀུན་འདུས་ཀྱི་ངོ་བོ་རྒྱལ་བ་ཚེ་དཔག་མེད་དང་། མགོན་པོ་སྤྱན་རས་གཟིགས་དབང་ཕྱུག །མཐུ་ཆེན་ཐོབ་སོགས་འཁོར་དང་བཅས་པ་ཐམས་ཅད་ལ་གསོལ་བ་འདེབས་སོ། །ཞེས་ལན་གསུམ་སོགས་དང་། དེ་དང་སྦྲེལ་ནས་བདག་ལ་མཆི་མེད་ཚེའི་རིག་འཛིན་སྩལ་དུ་གསོལ། འདི་ནས་ཤི་འཕོས་མ་ཐག་ཏུ་བདེ་བ་ཅན་གྱི་ཞིང་དུ་སྐྱེ་བར་འགྱུར་བར་བྱིན་གྱིས་རློབ་ཏུ་གསོལ་ཞེས་གསོལ་འདེབས་ཅི་ནུས་བྱས་པའི་མཇུག་ཏུ། སྐྱབས་གནས་ཐམས་ཅད་ཀྱི་སྐུའི་ཆ་དང་ཚེ་དཔག་མེད་ཀྱི་ཕྱག་གི་བུམ་པ་ལས་འཆི་མེད་ཚེའི་བདུད་རྩིའི་རྒྱུན་བྱུང་ནས་རང་གི་ལུས་ཀྱི་ཆ་རྣམས་ལ་ཐིམ་པར་གྱུར་ཞེས་བརྗོད་ཅིང་བསམ། མཐར་སྐྱབས་གནས་རྣམས་རང་གི་སྙིང་གར་ཐིམ་པས་རང་ཉིད་རྒྱལ་བ་ཚེ་དཔག་མེད་ཞལ་གཅིག་ཕྱག་གཉིས་པའི་སྐུར་གྱུར་པའི་ཐུགས་ཀའི་ཧྲཱིཿལས་འོད་ཟེར་འཕྲོས་པས། སྲིན་ཞིའི་ཚེ་དཔལ་བསོད་ནམས་ཐམས་ཅད་འོད་དང་བདུད་རྩི་ཁ་དོག་སྣ་ཚོགས་པ་དང་བཀྲ་ཤིས་པའི་རྟགས་བརྒྱད་ཀྱི་རྣམ་པར་བཀུག་ནས་སྙིང་ཁའི་ཧྲཱིཿཡིག་སྔགས་ཕྲེང་དང་བཅས་པ་ལ་ཐིམ་པར་གྱུར་པར་བསམས་ལ། ༀ་ཨ་མ་ར་ཎཱི་ཛི་ཝནྟི་ཡེ་སྭཱཧཱ། བརྒྱ་རྩ་སོགས་ཅི་འགྲུབ་དང་། འདོད་ན་གཟུངས་རིང་ཀྱང་བཟླའོ། །མཐར་ཡིག་བརྒྱ འམ། ༀ་བཛྲ་སཏྭ་ཧཱུཾ། ལན་གསུམ་དང་། དགེ་བ་འདི་ཡིས་མྱུར་དུ་བདབ། །ཚེ་དཔག་མེད་མགོན་འགྲུབ་གྱུར་ནས། །ཞེས་སོགས་དང་། དུས་མིན་འཆི་བའི་མཚན་མ་མཐོང་བ་ནས། །ཞེས་སོགས་དང་། འདི་ནས་ཉིང་མཚམས་སྦྱར་མ་ཐག །ཞེས་སོགས་བསྔོ་སྨོན་ཅི་རིགས་བྱའོ།། །།ན་མོ་མཉྫུ་གྷོ་ཥ་ཡ། བསྐལ་བཟང་རྒྱལ་བའི་དབང་པོ་ཤཱཀྱའི་ཏོག །རྒྱལ་ཚབ་དམ་པ་མི་ཕམ་འཇམ་པའི་དབྱངས། །སྤྱན་རས་གཟིགས་དབང་ཕྱག་ན་རྡོ་རྗེ་སོགས། །སངས་རྒྱས་བྱང་སེམས་རྣམས་ལ་གསོལ་བ་འདེབས། །ཨིནྡྲ་བྷུ་ཏི་དཔལ་ལྡན་ས་ར་ཧ། །ལཱུ་ཧི་དྲིལ་བུ་པ་དང་ནག་པོ་སྤྱོད། །ཀླུ་སྒྲུབ་ཟླ་གྲགས་ཐོགས་མེད་སྐུ་མཆེད་སོགས། །འཕགས་ཡུལ་པཎ་གྲུབ་རྣམས་ལ་གསོལ་བ་འདེབས། །སྣང་བ་མཐའ་ཡས་དཔལ་ལྡན་མར་མེ་མཛད། །སྤྱན་རས་གཟིགས་དབང་འབྲོམ་སྟོན་ཐམས་ཅད་མཁྱེན། །སྲོལ་འཛིན་ཟླ་མེད་པུ་ཏོ་གླང་ཤར་སོགས། །བཀའ་གདམས་བརྒྱུད་པ་རྣམས་ལ་གསོལ་བ་འདེབས། །རྒྱལ་བ་གཉིས་པ་རྗེ་བཙུན་བློ་བཟང་གྲགས། །རིགས་པའི་དབང་ཕྱུག་རྒྱལ་ཚབ་ཐམས་ཅད་མཁྱེན། །མདོ་སྔགས་བསྟན་པའི་མངའ་བདག་མཁས་གྲུབ་རྗེ། །འདུལ་བ་འཛིན་པའི་ཞབས་ལ་གསོལ་བ་འདབས། །བློ་བཟང་ཆོས་ཀྱི་རྒྱལ་མཚན་འཛིན་པའི་མཆོག །ངག་གི་དབང་ཕྱུག་བློ་བཟང་རྒྱ་མཚོའི་སྡེ། །མཆོག་སྤྲུལ་བློ་བཟང་ཡེ་ཤེས་བསྟན་པའི་དཔལ། །བསྐལ་བཟང་རྒྱ་མཚོའི་ཞབས་ལ་གསོལ་བ་འདེབས། །པཎ་ཆེན་སྤྲུལ་སྐུ་དཔལ་ལྡན་ཡེ་ཤེས་དབང་། །རྡོ་རྗེ་འཛིན་པ་རྒྱལ་སྲས་པཎྜི་ཏ། གྲུབ་པའི་དབང་ཕྱུག་བློ་གྲོས་རྒྱ་མཚོ་སོགས། །བཤེས་གཉེན་དམ་པ་རྣམས་ལ་གསོལ་བ་འདེབས། །སྐྱེ་བ་ཀུན་ཏུ་ཞེས་སོགས་ཀྱང་བརྗོད་པར་བྱའོ། །ཚུལ་འདི་བསྐུལ་ཞིང་བསྒྲུབས་པའི་དགེས། །འཆི་མེད་ཚེ་ཡི་དཔལ་ཐོབ་ཅིང་། །བདེ་ལྡན་ཞིང་སྐྱེ་ཚེ་རབས་ཀུན། །དམ་པའི་མགོན་གྱིས་རྗེ་འཛིན་ཤོག། །།ཅེས་ཚེ་དཔག་མེད་ཀྱི་རྣལ་འབྱོར་དང་། བླ་མ་བརྒྱུད་པའི་གསོལ་འདེབས་མདོར་བསྡུས་པ་འདི་ནི་དད་དང་རྣམ་དཔྱོད་ལྡན་པའི་ཟམ་ཐང་མདོའི་དགེ་སློང་བློ་གྲོས་ཀུན་དགས་འདི་ལྟ་བུ་ཞིག་གྱིས་དང་ཉིད་ཀྱི་གསུང་འབུམ་གྱི་ནང་དུ་བག་ཆགས་ཙམ་འཇོག་ཕྱིར་ཁོ་བོ་རང་ཉིད་ཀྱི་ལག་གིས་པར་དུ་བརྐོ་བར་བྱའོ་ཞེས་བསྐུལ་བ་ལ་བརྟེན་ནས་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་ཅོ་ནེའི་དགོན་ཉིད་དུ་སྦྱར་བ་སྟེ་པར་གྱི་ཡི་གེ་བ་ནི་དགེ་སློང་གྲགས་པ་དཔལ་འབྱོར་རོ། །མངྒལཾ། །