དམ་ཚིག་རྡོ་རྗེའི་སྒོམ་བཟླས་དང་ཟ་བྱེད་མཁའ་འགྲོའི་སྦྱིན་སྲེག་བྱ་ཚུལ་གཉིས་ཀ
དམ་ཚིག་རྡོ་རྗེའི་སྒོམ་བཟླས་དང་ཟ་བྱེད་མཁའ་འགྲོའི་སྦྱིན་སྲེག་བྱ་ཚུལ་གཉིས་ཀ་ཞུགས།
ན་མོ་མཉྫུ་གྷོ་ཥཱ་ཡ། རྒྱལ་ཀུན་ཡེ་ཤེས་ཕུང་པོ་གཅིག་བསྡུས་ནས། །ངུར་སྨྲིག་གར་གྱིས་རྣམ་རོལ་བླ་མ་མཆོག །རྒྱལ་བའི་གདུང་འཚོབ་རྗེ་བཙུན་ཙོང་ཁ་པའི། །ཞབས་པད་བྱང་ཆུབ་བར་དུ་སྙིང་དབུས་བསྟེན། །གང་དེའི་མན་ངག་ཡིག་ཆུང་ཟུར་གསལ་ནས། །འབྱུང་བའི་སྡིག་སྒྲིབ་སྦྱོང་ཐབས་ཟླ་མེད་པ། །དམ་ཚིག་རྡོ་རྗེའི་སྒོམ་བཟླས་མཚོན་ཙམ་དང་། །ཟ་བྱེད་མཁའ་འགྲོའི་སྦྱིན་སྲེག་བྱ་ཚུལ་འཆད། །དེ་ལ་གཉིས་ཀྱི་དང་པོ་དམ་ཚིག་རྡོ་རྗེའི་སྒོམ་བཟླས་ནི། སྐྱབས་སེམས་མདོར་བསྡུས་སྔོན་དུ་བཏང་ནས། གསང་འདུས་ཀྱི་རྣལ་འབྱོར་བས་ནི་དེའི་ངང་ནས་བྱ་ལ། གཞན་རང་ཡི་དམ་དུ་གསལ་བའི་ཐུགས་ཀར་ཞེས་འབྱུང་བ་ལྟར་ན། ཡི་དམ་གང་བྱེད་པ་དེའི་ང་རྒྱལ་ལ་གནས་བཞིན་པའི་ཐུགས་ཀར་བསྐྱེད་དགོས་ཤིང་། དེ་ཡང་སྐད་ཅིག་གིས་ལྷ་དེར་བསྐྱེད་ཀྱང་ཆོག་གོ ། འདིར་རང་ཐ་མལ་དུ་གནས་པའི་སྙིང་ཀར་བསྐྱེད་ཀྱང་མི་འགལ་ཞིང་ཁྱད་ཆེ་བར་མངོན་ཏེ་དཔྱད། གང་ལྟར་ནའང་། རང་གི་ཐུགས་ཀར་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ། ཧ་ལས་རལ་གྲིའི་འཆང་བཟུང་ལ་ཧས་མཚན་པ། དེ་ཡོངས་སུ་གྱུར་པ་ལས། དམ་ཚིག་རྡོ་རྗེ་སྐུ་མདོག་ལྗང་ཁུ་ལྗང་ནག་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། གཡས་འོག་མ་གཉིས་རྡོ་རྗེ་དང་རལ་གྲི །གཡོན་འོག་མ་གཉིས་རིན་པོ་ཆེ་དང་པདྨ་འཛིན་པ། མཚན་དཔེས་སྤྲས་ཤིང་། རིན་པོ་ཆེའི་དབུ་རྒྱན་ལ་སོགས་པ་རིན་པོ་ཆེའི་རྒྱན་སྣ་ཚོགས་པས་སྤྲས་པ་དར་གྱི་སྟོད་གཡོགས་དང་སྨད་གཡོགས་གསོལ་ཞིང་། འོད་ཀྱི་ཕུང་པོའི་དབུས་ན་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། རང་བཞིན་གྱི་གནས་ནས་དམ་ཚིག་རྡོ་རྗེའི་ཡེ་ཤེས་པ་སྤྱན་དྲངས། ༀ་བཛྲ་ཨརྒྷཾ་ནས་ཤཔྟ་པྲ་ཏཱིཙྪ་ཧཱུཾ་སྭཱཧཱའི་བར་གྱིས་མཆོད་ཅིང་། བསྟོད་པ་མེད་ཀྱང་ཆོག་པར་སྣང་ཡང་། སྤྲོ་ན། དོན་ཡོད་རྡོ་རྗེ་རྫོགས་སངས་རྒྱས་སོགས་ཚིགས་བཅད་གཅིག་གིས་བསྟོད། ཛཿཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས། པཉྩ་ཀཱུ་ལས་མཆོད་དམ་མིན་ཡང་རུང་སྟེ། ཁྱེད་རྣམས་ཀྱིས་མངོན་པར་དབང་བསྐུར་དུ་གསོལ། ཞེས་པ་ནས། ཡབ་ལ་མི་བསྐྱོད་པ་དང་ཡུམ་ལ་དོན་གྲུབ་ཀྱིས་དབུ་བརྒྱན་པར་གྱུར་པར་བསམ། དམ་ཚིག་རྡོ་རྗེའི་ཐུགས་ཀར་སྣ་ཚོགས་རྡོ་རྗེའི་ལྟེ་བར་ཧ་ཡིག་སྔགས་འཕྲེང་དང་བཅས་པ་ལས་བདུད་རྩིའི་རྒྱུན་བྱུང་སྟེ། སྣ་ཚོགས་རྡོ་རྗེའི་རྭའི་བུ་ག་རྣམས་ནས་ཞུགས་ཤིང་ཐོན། ལུས་ཀྱི་ནང་གང་། སྡིག་ལྟུང་ཐམས་ཅད་དེད་ནས་དབང་པོའི་སྒོ་དང་བ་སྤུའི་བུ་ག་ནས་ནག་ཉིལ་གྱི་ཕྱིར་ཐོན་པས་ལུས་ཤེལ་གོང་ལྟར་དག་པར་གྱུར་པར་བསམས་ལ། དེ་ལྟ་བུའི་དམིགས་པ་དང་བཅས་ཏེ། ༀ་ཨཱཿཔྲཛྙཱ་དྷྲིཀ་ཧ་ཧཱུཾ། ཞེས་བརྒྱ་སོགས་ཅི་འགྲུབ་བཟླས་པའི་མཐར། བདག་ནི་མི་ཤེས་རྨོངས་པ་ཡིས། །ཞེས་སོགས་ཐམས་ཅད་དམ། བླ་མ་མགོན་པོས་སྐྱབས་མཛོད་ཅིག །དམ་ཚིག་རྡོ་རྗེའི་ཞལ་ནས་ཁྱེད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་ཞིང་དག་གོ་ཞེས་གསུངས་ནས། རང་གི་སྙིང་ཀར་ཐིམ་པས་བྱིན་གྱིས་བརླབས་པར་གྱུར་ཅེས་བྱའོ། །འབབ་པའི་བདུད་རྩི་དེ་ཉིད་ངོ་བོ་དམ་ཚིག་རྡོ་རྗེའི་ཐུགས་གཉིས་སུ་མེད་པའི་ཡེ་ཤེས་ཡིན་པར་མོས་པ་ནི་གནད་ཆེ། འདི་ནི་རྗེ་ནས་བརྒྱུད་པའི་གསེར་ཆོས་སུ་གསུངས་ཏེ། སྡིག་ལྟུང་སྦྱོང་བའི་ཐབས་བླ་ན་མེད་པའོ།། །།