བྱམས་ཆོས་སྡེ་ལྔའི་བསྡུས་དོན་བྱམས་མགོན་དགྱེས་པའི་མཆོད་སྤྲིན།

བྱམས་ཆོས་སྡེ་ལྔའི་བསྡུས་དོན་བྱམས་མགོན་དགྱེས་པའི་མཆོད་སྤྲིན་ཞེས་བྱ་བ་བཞུགས།

ན་མོ་ཤཱཀྱ་མུ་ན་ཡེ། ཐུབ་པས་རང་གི་འཁོར་ལ་བརྟགས་པའི་ཚེ། ཁྱོད་དང་མཚུངས་པའི་རྒྱལ་སྲས་མ་གཟིགས་ནས། ཁྱོད་ནི་རྒྱལ་ཚབ་དམ་པར་དབང་བསྐུར་བ། །རྒྱལ་བ་གཉིས་པ་མི་ཕམ་མགོན་ལ་འདུད། །གང་ཚེ་རྒྱལ་བས་འོད་སྲུང་ཆེ་སོགས་ལ། །ཐེག་ཆེན་ཆོས་ཚུལ་འཛིན་པར་རབ་གཏད་ཀྱང་། །མ་ནུས་ཁྱོད་ལ་བཀའ་བབས་ཞལ་བཞེས་ཏེ། །སེངྒེའི་སྒྲ་ཆེན་ཕྱོགས་མཐར་བསྒྲགས་པར་མཛད། ཁྱོད་ཀྱིས་རྒྱལ་བའི་མཛད་འཕྲིན་ཁུར་བསྣམས་ནས། །དགོངས་འགྲེལ་བསྟན་བཅོས་ཆེན་པོ་ལྔ་ཉིད་ཀྱིས། །ཐུབ་བསྟན་རྒྱལ་མཚན་འཛིན་པའི་གྲགས་འབར་བ། །དེ་སླད་ཁྱོད་ཀྱི་དགོངས་པ་འགྲེལ་ལ་སྤྲོ། །དེ་ཡང་རྗེ་བཙུན་བྱམས་མགོན་གྱི་རྒྱལ་བའི་དགོངས་པ་འགྲེལ་བའི་ཆེད་དུ་རྒྱན་གཉིས། འབྱེད་གཉིས། རྒྱུད་བླ་མའི་བསྟན་བཅོས་དང་ལྔ་མཛད་ཅིང་། དེའི་དགོངས་པ་འགྲེལ་བའི་མཁས་པ་མང་དུ་བྱོན་ཡང་། རང་ཉིད་བྱམས་མགོན་གྱིས་རྗེས་སུ་འཛིན་པའི་རྟེན་འབྲེལ་དུ་མངོན་རྟོགས་རྒྱན་དང་རྒྱུད་བླའི་དགོངས་པ་འགྲེལ་པའི་བསྟན་བཅོས་སྔར་བྲིས་ཟིན་ཅིང་། འདིར་ཡང་ཐོག་མར་དེ་གཉིས་ཀྱི་བསྡུས་དོན་མཚོན་ཙམ་ཞིག་བརྗོད་ན། མངོན་རྟོགས་རྒྱན་ལས། རྣམ་པ་ཐམས་ཅད་མཁྱེན་ཉིད་ལམ། །སྟོན་པས་འདི་ལས་བཤད་པ་གང་། །ཞེས་ཡུམ་རྒྱས་འབྲིང་བསྡུས་གསུམ་གྱི་དོན་ཐམས་ཅད་འཆད་པར་བཞེད་ནས་དོན་བདུན་ཅུར་བསྡུས་ཏེ། མངོན་རྟོགས་རྒྱན་གྱི་སྐབས་དང་པོས་རྣམ་མཁྱེན་མཚོན་བྱེད་ཀྱི་ཆོས་བཅུ། གཉིས་པས་ལམ་ཤེས་མཚོན་བྱེད་ཀྱི་ཆོས་བཅུ་གཅིག །གསུམ་པས་གཞི་ཤེས་མཚོན་བྱེད་ཀྱི་ཆོས་དགུ །བཞི་པས་རྣམ་རྫོགས་སྦྱོར་བ་མཚོན་བྱེད་ཀྱི་ཆོས་བཅུ་གཅིག །ལྔ་པས་རྩེ་སྦྱོར་མཚོན་བྱེད་ཀྱི་ཆོས་བརྒྱད། དྲུག་པས་མཐར་གྱིས་སྦྱོར་བ་མཚོན་བྱེད་ཀྱི་ཆོས་བཅུ་གསུམ། བདུན་པས་སྐད་ཅིག་སྦྱོར་བ་མཚོན་བྱེད་ཀྱི་ཆོས་བཞི། སྐབས་བརྒྱད་པར་འབྲས་བུ་ཆོས་སྐུ་མཚོན་བྱེད་ཀྱི་ཆོས་བཞི་རྣམས་འཆད་དེ་ཡུམ་གྱི་མདོའི་དོན་ཐམས་ཅད་འདུས་སོ། །རྒྱུད་བླ་མ་ལ་ཚིག་རིང་ཐུང་སྣ་ཚོགས་ཤིག་ཡོད་ཅིང་། དེའི་ཐོག་མར་སངས་རྒྱས་ཆོས་ཚོགས་ཁམས་དང་བྱང་ཆུབ་དང་། །ཡོན་ཏན་སངས་རྒྱས་འཕྲིན་ལས་མཐའ་མ་སྟེ། །བསྟན་བཅོས་ཀུན་གྱི་ལུས་ནི་མདོར་བསྡུས་ན། །རྡོ་རྗེ་ཡི་ནི་གནས་བདུན་འདི་དག་གོ །ཞེས་འབྱུང་བ་ལྟར་སྐབས་བཞིའམ་ལྔར་ཡང་རུང་སྟེ། སྐབས་དང་པོས་དཀོན་མཆོག་གསུམ་དང་ཁམས་བདེ་གཤེགས་སྙིང་པོ། །གཉིས་པས་བྱང་ཆུབ། གསུམ་པས་ཡོན་ཏན། བཞི་པས་མཛད་པ་འཕྲིན་ལས་འཆད་ཅིང་། དེའི་ལྷག་མས་དེ་དག་གི་བསྔགས་པ། རྣམ་གྲངས་གཞན་གྱི་སྒོ་ནས་ཕན་ཡོན་བསྟན་པ། བསྟན་བཅོས་བརྩམས་ཚུལ། ཆོས་སྤོང་གི་ལས་སྤོང་བ། བསྟན་བཅོས་བརྩམས་པའ་ིདགེ་བ་བསྔོོ་བ། འཆད་ཚུལ་གྱིས་མཇུག་བསྡུས་ཏེ་བསྟན་ཏོ། །དེ་ཡང་སྦྱངས་གཞི་ཁམས་བདེ་གཤེགས་སྙིང་པོ་དང་སྦྱངས་པའི་འབྲས་བུ་དཀོན་མཆོག་གསུམ་ལེའུ་དང་པོས་བསྟན། སྦྱོང་བྱེད་ལ་གཞན་རྒྱུད་དང་རང་རྒྱུད་ཀྱི་དབང་དུ་བྱས་པའི་དང་པོ་ལ། བྱང་ཆུབ་དང་ཡོན་ཏན་དང་འཕྲིན་ལས་གསུམ་སྟེ། བྱང་ཆུབ་ཆེན་པོ་བརྙེས་པ་དེས་ཡོན་ཏན་དྲུག་ཅུ་རྩ་བཞི་ཐོབ་ནས་འཕྲིན་ལས་སུམ་ཅུ་རྩ་གཉིས་མཛད་པའི་སྒོ་ནས་གདུལ་བྱའི་རྒྱུད་ཀྱི་ཁམས་དྲི་བྲལ་དུ་བྱས་ནས་སྤྱོང་ཞིང་། དེ་ཡང་རིམ་པ་བཞིན་དུ་ལེའུ་གཉིས་པ་གསུམ་པ་བཞི་པ་རྣམས་ཀྱིས་བསྟན་ལ། ལྔ་པས་ནི་དེ་དག་གི་ཕན་ཡོན་འཆད་དོ། །མངོན་རྟོགས་རྒྱན་གྱི་ཐོག་མར་མཆོད་བརྗོད་ཡོད་ཅིང་། རྒྱུད་བླའི་མཇུག་ཏུ་བསྔོ་བ་སོགས་འབྱུང་བ་ལྟར་ན་བྱམས་ཆོས་ལྔ་པོ་འཇུག་པ་གཅིག་ཏུ་བརྩམས་ཤིང་། ཐོག་མར་མངོན་རྟོགས་རྒྱན་དང་། ཕྱི་མ་རྒྱུད་བླ་མར་སྣང་ངོ་། །འོན་ཀྱང་མངོན་རྟོགས་རྒྱན་དང་རྒྱུད་བླ་མ་གཉ ིས་ཀྱིས་དབུ་མའི་ལུགས་སྟོན་ཅིང་། མདོ་སྡེ་རྒྱན་དང་འབྱེད་རྣམ་པ་གཉིས་ཀྱིས་གཙོ་བོར་སེམས་ཙམ་པའི་ལུགས་ལྟར་འཆད་པར་མཛད་དོ། །དེས་ན་དབུ་སེམས་གཉིས་ཀྱི་ཐུན་མོང་བའི་ཐོག་མའི་སྲོལ་འབྱེད་ནི་རྗེ་བཙུན་ཉིད་ཡིན་པར་ངེས་སོ། །ད་ནི་མདོ་སྡེ་རྒྱན་དང་། འབྱེད་རྣམ་གཉིས་ཀྱི་བསྡུས་དོན་མཚོན་ཙམ་དང་། མདོ་སྡེ་རྒྱན་ནས་འབྱུང་བའི་ཕྱིན་དྲུག་གི་རྣམ་བཞག་ཅུང་ཟད་བཤད་པ་གསུམ་གྱི་དང་པོ་མདོ་སྡེ་རྒྱན་གྱི་གཞུང་ནི་རྒྱ་ཆེ་བས་བསྡུས་དོན་རྒྱས་ཙམ་ཞིག་བྱས་ན་ཡང་མང་དུ་འགྱུར་དོགས་པས་ཕྱོགས་ཙམ་ཞིག་བཤད་པར་བྱའོ། །འདིས་ནི་སེམས་ཙམ་པའི་ལུགས་གཙོ་བོར་བསྟན་ཀྱང་ཐེག་ཆེན་གྱི་བཀའ་སྤྱིའི་དགོངས་འགྲེལ་ཡིན་ཞིང་ཚིགས་བཅད་རིང་ཐུང་སྣ་ཚོགས་དང་བམ་པོ་གཉིས་སོ། །འདི་ལ་གཉིས། མདོར་བསྟན་པ་དང་། ཅུང་ཟད་ཕྱེ་སྟེ་བཤད་པའོ། །དང་པོ་ནི། ལེའུ་ཉེར་གཅིག་ཡོད་པའི་དང་པོས་སྤྱིར་བསྟན་ལ། གཉིས་པས་ཐེག་ཆེན་བཀར་སྒྲུབ། གསུམ་པས་སྐྱབས་འགྲོ །བཞི་པས་རིགས། ལྔ་པས་སེམས་བསྐྱེད། དྲུག་པས་སྒྲུབ་པ། བདུན་པས་དེ་ཁོ་ན་ཉིད། བརྒྱད་པས་མཐུ། དགུ་པས་ཡོངས་སུ་སྨིན་པ། བཅུ་པས་བྱང་ཆུབ། བཅུ་གཅིག་པས་མོས་པ། བཅུ་གཉིས་པས་ཡོངས་སུ་འཚོལ་བ༑ བཅུ་གསུམ་པས་བཤད་པ། བཅུ་བཞི་པས་སྒྲུབ་པ། བཅོ་ལྔ་པས་གདམས་ངག་རྗེས་སུ་བསྟན་པ། བཅུ་དྲུག་པས་ཐབས་དང་ལྡན་པ། བཅུ་བདུན་པས་ཕར་ཕྱིན། བཅོ་བརྒྱད་པས་མཆོད་པ་དང་བསྟེན་པ་དང་ཚད་མེད། བཅུ་དགུ་པས་བྱང་ཆུབ་ཀྱི་ཕྱོགས་དང་མཐུན་པ། ཉི་ཤུ་པས་ཡོན་ཏན། ཉེར་གཅིག་པས་སྤྱོད་པ་དང་མཐར་ཐུག་པའི་ཚུལ་རྣམས་བསྟན་ཏོ། །དེ་དག་ཐམས་ཅད་བསྡུ་ན་བཅུར་འདུ་བར་བཤད་པའི་དོན་ནི་མཚོན་ཙམ་ཞིག་བརྗོད་ན། རྒྱལ་སྲས་ཀྱི་སྤྱོད་པ་ཉམས་སུ་ལེན་པའི་གཞི། བླངས་པའི་རྟགས། རྟགས་དེ་ལྡན་གྱི་རབ་བྱུང་དང་ཁྱིམ་པའི་དབྱེ་བ། དེ་འདྲ་བའི་རྟེན་ལ་ལྷག་བསམ་འབྱུང་ཚུལ། དེ་ལ་བརྟེན་ནས་ཇི་ལྟར་གནས་པ། སྲིད་པར་སྐྱེ་བ་འཛིན་ཚུལ། བཟུང་ནས་གདུལ་བྱའི་དོན་བྱེད་ཚུལ། སྤྱོད་པ་འགྲུབ་ཚུལ། དེ་ལ་བརྟེན་ནས་མཐར་ཐུག་གི་ཡོན་ཏན་འགྲུབ་ཚུལ་སྟེ་བཅུའོ། །དང་པོ་བཞི་ནི་རིགས་ཀྱི་ལེའུ་ནས་ཡོན་ཏན་གྱི་ལེའུའི་བར་བཅུ་བདུན་གྱིས་འཆད་དེ་སོ་སོར་ཕྱེ་ན་མང་ངོ་། །གཉིས་པ་བླངས་པའི་རྟགས་ནི། བརྩེ་དང་སྙན་པར་སྨྲ་བ་དང་། །ཞེས་སོགས་ཚིགས་བཅད་གཉིས་ཀྱིས་འཆད། གསུམ་པ་རྟགས་དེ་ལྡན་ནི། བྱང་ཆུབ་སེམ་དཔའ་རྟག་ཏུ་ནི། །ཞེས་སོགས་ཚིགས་བཅད་གསུམ་གྱིས་འཆད། བཞི་པ་ལྷག་བསམ་ནི། ས་རྣམས་ཀུན་ལ་བརྟེན་པ་ཡི། །ཞེས་སོགས་ཚིགས་བཅད་ཕྱེད་དང་གཉིས་ཀྱིས་འཆད། དྲུག་པ་ཇི་ལྟར་གནས་པ་ནི། སེམས་ཅན་ཡོངས་སུ་འཛིན་པ་ནི། །ཞེས་སོགས་ཚིགས་བཅད་གཅིག་གིས་འཆད། བདུན་པ་སྐྱེ་བ་འཛིན་ཚུལ་ནི། བློ་ལྡན་རྣམས་ཀྱི་ལས་དང་ནི། །ཞེས་སོགས་ཚིགས་བཅད་གཅིག་གིས་འཆད། བརྒྱད་པ་དང་ལྔ་པ་ལྷན་ཅིག་ཏུ། མཚན་ཉིད་གང་ཟག་བསླབ་པ་དང་། །ཞེས་པ་ནས། སྒྲུབ་པའི་སྒོ་ནས་རྣམ་པ་བཞི། །ཞེས་པའི་བར་གྱིས་རྒྱས་པར་འཆད། དགུ་པ་སྤྱོད་པ་ནི། ལུས་ཅན་ཐེག་པ་ཆེན་པོ་དང་། །ཞེས་སོགས་ཚིགས་བཅད་ཕྱེད་དང་གཉིས་ཀྱིས་འཆད། བཅུ་པ་མཐར་ཐུག་ནི། སེམས་ཅན་རྣམས་ལ་བརྩེ་བ་ཅན། །ཞེས་པ་མན་གྱི་འཆད་པར་བྱེད་དོ། །གཉིས་པ་ལ་ལེའུ་སོ་སོའི་བསྡུས་དོན་རགས་ཙམ་ཞིག་ནི་གཟུགས་རྒྱན་རང་བཞིན་ཡོན་ཏན་ལྡན་པ་མེ་ལོང་ནང་སོང་ན། །ཞེས་སོགས་ཀྱིས་བཤད་བྱའི་དོན་ལ་རྟོགས་དཀའ་བ་དང་དེ་ལ་དགའ་བ་སྐྱེད་པ་དགོས་པ་དང་བཅས་པ་སྟོན། ལེའུ་གཉིས་པའི་ཐོག་མར། སྔར་ལུང་མ་བསྟན་ལྷན་ཅིག་འབྱུང་ཞེས་སོགས་ཀྱིས་ཉན་ཐོས་སྡེ་པ་ཁ་ཅིག་ཐེག་ཆེན་གྱི་མདོ་རྣམས་སངས་རྒྱས་ཀྱི་བཀའ་མ་ཡིན་པར་འདོད་པ་དེ་བཀག་ནས་ཐེག་པ་ཆེན་པོའི་མདོ་རྣམས་སངས་རྒྱས་ཀྱི་བཀར་སྒྲུབ་ཅིང་། ཐེག་པ་ཆེན་པོའི་ཆོས་རྣམས་དམན་པ་ལ་མོས་པའི་སྤྱོད་ཡུལ་མ་ཡིན་པར་བསྟན། ལེའུ་གསུམ་པར་ཀུན་ཏུ་འགྲོ་དང་ཁས་ལེན་ཞེས་སོགས་ཀྱིས་ཐེག་ཆེན་གྱི་སྐྱབས་འགྲོའི་ཁྱད་པར་ཕན་ཡོན་དང་བཅས་པ་བསྟན། ལེའུ་བཞི་པར་ཡོད་དང་མཆོག་དང་མཚན་ཉིད་ཞེས་སོགས་ཀྱིས་ནི་རིགས་དང་། རིགས་ཀྱི་རྟགས་དང་དབྱེ་བ་སོགས་རིགས་ཀྱི་ཁྱད་པར་རྣམས་རྒྱས་པར་བསྟན། ལེའུ་ལྔ་པར་སྤྲོ་བ་ཆེ་དང་རྩོམ་པ་ཆེ། །ཞེས་སོགས་ཀྱིས་ཐེག་ཆེན་སེམས་བསྐྱེད་ཀྱི་ངོ་བོ་དང་དབྱེ་བ་དང་ཕན་ཡོན་དང་རྒྱུ་དང་། དོན་དམ་སེམས་བསྐྱེད་དང་། སེམས་བསྐྱེད་ཉེར་གཉིས་ཀྱི་ཁྱད་པར་དང་། སེམས་བསྐྱེད་ཀྱི་བྱེད་ལས་རྣམས་བསྟན། ལེའུ་དྲུག་པར་གནས་རྩོམ་འབྲས་བུ་འབྱུང་བ་ཞེས་སོགས་ཀྱིས་སེམས་བསྐྱེད་ལ་བརྟེན་ནས་གཞན་དོན་ཁྱད་པར་ཅན་སྒྲུབ་ནུས་པར་བསྟན། ལེའུ་བདུན་པར་ཡོད་མིན་མེད་མིན་དེ་བཞིན་ཞེས་སོགས་ཀྱི་གཙོ་ཆེར་སེམས་ཙམ་པའི་ལུགས་ཀྱི་དོན་དམ་བདེན་པའི་ཁྱད་པར་བསྟན་ཅིང་། དོན་དམ་དེ་རྟོགས་དཀའ་ཞིང་མ་རྟོགས་ན་འཁོར་བར་འཁོར་བ་དང་། རྟོགས་ན་གྲོལ་བར་འགྱུར་བའི་ཚུལ་རྣམས་བསྟན། ལེའུ་བརྒྱད་པར་སྐྱེ་དང་ངག་སེམས་དག་དང་ཞེས་སོགས་ཀྱིས་བྱང་སེམས་ཀྱིས་རང་གཞན་གྱི་དོན་སྒྲུབ་ནུས་པའི་མཐུའི་ཁྱད་པར་རྣམས་བསྟན། ལེའུ་དགུ་པར་དགའ་དང་དད་དང་ཞེས་སོགས་ཀྱི་མཐུ་དེ་ལྟ་བུ་ཐོབ་ནས་གདུལ་བྱ་རྣམས་སྨིན་པར་བྱེད་པའི་ཁྱད་པར་བསྟན། ལེའུ་བ ཅུ་པར་དཀའ་སྤྱོད་དཔག་མེད་བརྒྱ་ཕྲག་དང་། །ཞེས་སོགས་མང་པོ་ཞིག་གིས་རྒྱུ་ཚོགས་དཔག་མེད་ཀྱིས་སངས་རྒྱས་འཐོབ་ཚུལ། སངས་རྒྱས་ཀྱི་ཡོན་ཏན་དང་འཕྲིན་ལས་ཀྱི་དཔེ། སྐྱབས་སུ་འོས་ཚུལ། འཕྲིན་ལས་མཛད་མི་མཛད་དཔེ་དང་བཅས་པ། འཕྲིན་ལས་འབད་མེད་ལྷུན་གྲུབ་ཏུ་མཛད་ཚུལ། སྐུ་བཞིའི་ཁྱད་པར། ཡེ་ཤེས་བཞིའི་དབྱེ་བ་དང་བྱེད་ལས་བཅས་བཤད། ལེའུ་བཅུ་གཅིག་པར་སྐྱེས་དང་མ་སྐྱེས་འཛིན་དང་ཞེས་སོགས་ཀྱི་མི་མོས་པའི་རྐྱེན་དང་མོས་པ་ཕན་ཡོན་དང་བཅས་བཤད། ལེའུ་བཅུ་གཉིས་པར་སྡེ་སྣོད་དག་ནི་གསུམ་མམ་གཉིས་ཀྱང་རུང་། །ཞེས་སོགས་ཀྱིས་སྡེ་སྣོད་གསུམ་གྱི་དབྱེ་བསྡུ་དང་འཇོག་ཚུལ། བདེན་གཉིས་ཀྱི་ངོ་བོ་དབྱེ་བ་སྒྲུབ་བྱེད། ཐེག་པ་གཅིག་དང་གསུམ་གྱི་ཁྱད་པར་སོགས་མང་པོ་ཞིག་བཤད། ལེའུ་བཅུ་གསུམ་པར་བརྟན་པ་རྗེས་ནི་སྲོག་དང་ཞེས་སོགས་ཀྱིས་སངས་རྒྱས་ཀྱིས་གདུལ་བྱ་ལ་ཆོས་སྟོན་པ་དང་ཐེ་ཚོམ་གཅོད་ཚུལ། དྲང་ངེས་ཀྱི་མདོའི་ཁྱད་པར་དང་དབྱེ་བ་སོགས་བཤད། ལེའུ་བཅུ་བཞི་པར་བློ་ལྡན་གཉིས་ལ་ལོག་ཉིད་དང་། །ཞེས་སོགས་ཀྱིས་བདག་མེད་གཉིས་ཀྱི་དབྱེ་བ། ལམ་གང་གིས་སྒྲིབ་གཉིས་སྤོང་ཚུལ་དང་། བྱང་སེམས་སེམས་ཅན་ལ་བྱམས་ཚུལ། སེམས་ཅན་གྱི་དོན་དུ་འཁོར་བར་འཇུག་ཚུལ་རྣམས་བཤད། ལེའུ་བཅོ་ལྔ་པར་བསྐལ་བ་གྲངས་མེད་ངེས་འབྱུང་ཞིང་ཞེས་སོགས་ཀྱིས་ཞི་གནས་དང་ལྷག་མཐོང་སྒོམ་ཚུལ། དེ་ལ་བརྟེན་ནས་སྦྱོར་ལམ་དང་མཐོང་སྒོམ་གྱི་ལམ་སྐྱེ་ཚུལ། ཚོགས་གཉིས་རྫོགས་ནས་འཚང་རྒྱ་ཚུལ་རྣམས་བཤད། ལེའུ་བཅུ་དྲུག་པར་ཇི་ལྟར་ན གས་ཚལ་དང་ནི་ཞེས་སོགས་ཀྱིས་སྦྱིན་སོགས་ཀྱི་ལས་གསུམ་དང་། སྒོ་གསུམ་གྱི་ལས་རྣམ་པར་དག་ཚུལ་དང་། དེས་ཐེག་དམན་གྱི་ལམ་ལས་ལྡོག་ཚུལ་བཤད། ལེའུ་བཅུ་བདུན་པར་གྲངས་དང་དེ་ཡི་མཚན་ཉིད་ཅེས་སོགས་ཀྱིས་ཕ་རོལ་ཏུ་ཕྱིན་པ་དྲུག་དང་བསྡུ་བཞིའི་ངོ་བོ་དབྱེ་བ་གྲངས་ངེས་སོགས་རྒྱས་པར་བཤད་དེ། ཕྱིན་དྲུག་མདོར་བསྡུས་ཤིག་འོག་ནས་འཆད་དོ། །ལེའུ་བཅོ་བརྒྱད་པར་རབ་དང་སེམས་དང་ལྡན་པ་ཡི། །ཞེས་སོགས་ཀྱིས་སངས་རྒྱས་ལ་མཆོད་པའི་ཚོགས་ཀྱིས་མཆོད་ཚུལ། དགེ་བའི་བཤེས་གཉེན་གྱི་མཚན་ཉིད་དང་བསྟེན་ཚུལ། ཉོན་མོངས་པའི་ཉེས་དམིགས། ཚད་མེད་བཞི་བསྒོམས་པའི་ཕན་ཡོན་རྣམས་བཤད་དོ། །ལེའུ་བཅུ་དགུ་པར་ངོ་ཚ་མི་མཐུན་ཕྱོགས་སྤངས་དང་། །ཞེས་སོགས་ཀྱིས་ཚུལ་མིན་ཡིད་བྱེད་སོགས་ཉོན་མོངས་རྣམས་སྤོང་དགོས་པའི་རྒྱུ་མཚན་དང་། བྱང་སེམས་ཀྱི་ཡོན་ཏན་གྱི་ཁྱད་པར་སྤྱིར་བསྟན་པ་དང་། དྲན་པ་ཉེར་བཞག་ལ་སོགས་པ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་དབྱེ་བ་དང་སྒོམ་ཚུལ་བྱེད་ལས་སོགས་མང་པོ་ཞིག་བཤད། ལེའུ་ཉི་ཤུ་པར་རང་གི་ལུས་དང་སྡོམ་པའི་ཕྱིར། །ཞེས་སོགས་ཀྱིས་བྱང་སེམས་ཀྱི་ཕྱིན་དྲུག་སོགས་ཀྱི་ཡོན་ཏན་དང་། བྱང་སེམས་རྣམས་ནི་སེམས་ཅན་གྱི་ཕ་དང་རྩ་ལག་དང་གྲོགས་པོ་དང་སློབ་དཔོན་དང་མཁན་པོ་སོགས་དང་འདྲ་བ་དང་། བྱང་སེམས་ཀྱི་ཡོན་ཏན་གཞན་དང་སེམས་ཅན་གྱི་དོན་སྒྲུབ་ཚུལ་གྱི་སྐོར་མང་དུ་བཤད། ལེའུ་ཉེར་གཅིག་པར་བརྩེ་དང་སྙན་པར་སྨྲ་བ་དང་། །ཞེས་སོགས་ཀྱིས་བྱང་ཆུབ་སེམས་དཔའ་ཁྱིམ་པར་གྱུར་ཡང་གཞན་དོན་མཛད་པ་དང་། རབ་ཏུ་བྱུང་ནས་གཞན་དོན་མཛད་ཚུལ་དང་། བྱང་སེམས་ཀྱི་སྤྱོད་པའི་སྐོར་གཞན་དང་། ས་བཅུའི་དབྱེ་བ་སྒྲ་དོན་དང་བཅས་པ་དང་། སངས་རྒྱས་ཀྱི་ཡོན་ཏན་དང་འཕྲིན་ལས་བརྗོད་ཅིང་ཕྱག་འཚལ་བ་དང་། མཛད་པ་རྒྱུན་མི་འཆད་པར་བསྟན་པའི་སྒོ་ནས་མཇུག་བསྡུས་སོ། །གཉིས་པ་གཞན་གཉིས་ཀྱི་བསྡུས་དོན་ལ། དབུས་མཐའ་རྣམ་འབྱེད་ཀྱིས་སེམས་ཙམ་པའི་ལུགས་ལྟར་མཚན་ཉིད་གསུམ་སོ་སོར་ཕྱེ་ནས་རྟག་ཆད་ཀྱི་མཐའ་གཉིས་དང་བྲལ་བའི་དབུ་མའི་ལམ་རྣམ་པར་འབྱེད་ཅིང་། ཀུན་བཏགས་བདེན་པར་གྲུབ་པ་བཀག་པའི་སྒོ་ནས་རྟག་མཐའ་དང་། གཞན་དབང་དང་ཡོངས་གྲུབ་གཉིས་སོ་སོ་ནས་བདེན་པར་གྲུབ་པར་བསྟན་པའི་སྒོ་ནས་ཆད་མཐའ་སེལ་ལོ། །འདི་ལ་ལེའུ་ལྔ་སྟེ་མཚན་ཉིད་ཀྱི་ལེའུ། སྒྲིབ་པའི་ལེའུ། དེ་ཁོ་ན་ཉིད་ཀྱི་ལེའུ། གཉེན་པོ་སྒོམ་པའི་ལེའུ། ཐེག་པ་བླ་ན་མེད་པའི་ལེའུའོ། །དེའི་དང་པོ་ནི་ཡང་དག་མ་ཡིན་ཀུན་རྟོག་ཡོད། །ཅེས་སོགས་ཀྱིས་འདི་ལུགས་ཀྱི་མཐའ་གཉིས་དང་བྲལ་བའི་དབུ་མའི་ལམ། རྟེན་འབྲེལ་ཡན་ལག་བཅུ་གཉིས་ཀྱི་བྱེད་ལས། སྟོང་ཉིད་ཀྱི་རྣམ་གྲངས། དེ་རྟོགས་ན་གྲོལ་བའི་ཚུལ་རྣམས་འཆད། ལེའུ་གཉིས་པར་ཁྱབ་དང་ཉི་ཚེ་ལྷག་པ་དང་། །ཞེས་སོགས་ཀྱིས་སྒྲིབ་པའི་སྐོར་དང་། སྒྲིབ་པ་རྣམས་བསྡུས་ན་ཤེས་སྒྲིབ་དང་ཉོན་སྒྲིབ་གཉིས་སུ་འདུ་བ་དང་། དེ་གཉིས་ལས་གྲོལ་ནས་འཚང་རྒྱ་བའི་ཚུལ་འཆད། ལེའུ་གསུམ་པར་བརྩེ་བ་མཚན་ཉིད་དེ་ཁོ་ན། །ཞེས་སོགས་ཀྱིས་གང་ཟག་དང་ཆོས་ཀྱི་བདག་མེད་པའི་དེ་ཁོ་ན་ཉིད་དང་། བདེན་བཞིའི་ངོ་བོ་དང་། མཚན་ཉིད་གསུམ་དང་། དོན་དམ་གྱི་དབྱེ་བ་དང་། དེ་ལ་འཇུག་ཚུལ་རྣམས་འཆད། །ལེའུ་བཞི་པར་གནས་ངན་ལེན་ཕྱིར་སྲེད་རྒྱུའི་ཕྱིར་ཞེས་སོགས་ཀྱིས་དྲན་པ་ཉེར་བཞག་སོགས་བྱང་ཕྱོགས་སོ་བདུན་དམིགས་པ་བྱེད་ལས་དང་བཅས་པ་འཆད། ལེའུ་ལྔ་པར་བླ་མེད་ཉིད་ནི་སྒྲུབ་པ་དང་ཞེས་སོགས་ཀྱིས་ཐེག་ཆེན་གྱི་ངོ་བོ་དང་ཁྱད་པར་དང་སྤྱོད་པའི་སྐོར་དང་། དོན་དམ་གྱི་ཁྱད་ཆོས་དང་། མཐའ་གཉིས་སེལ་ཚུལ་སོགས་འཆད་དོ། །༈ ཆོས་ཉིད་རྣམ་འབྱེད་ལ་ལེའུར་བཅད་པ་མེད་ཅིང་། དེ་ཉིད་ལས། འདི་དག་ཐམས་ཅད་མདོར་བསྡུས་ན། རྣམ་པ་གཉིས་སུ་ཤེས་བྱ་སྟེ། ཆོས་དང་དེ་བཞིན་ཆོས་ཉིད་ཀྱི། །ཐམས་ཅད་བསྡུས་པ་ཉིད་ཕྱིར་རོ། །དེ་ལ་ཆོས་ཀྱི་དབྱེ་བ་ནི། །འཁོར་བ་ཡིན་ཏེ་ཆོས་ཉིད་ཀྱིས། །རབ་ཏུ་ཕྱེ་བ་ཐེག་གསུམ་གྱི། །མྱ་ངན་ལས་ནི་འདས་པའོ། །ཞེས་མདོར་བསྟན་ནས་ལྷག་མ་རྣམས་ཀྱིས་རྒྱས་པར་འཆད་དོ། །དེ་ཡང་བསྟན་བཅོས་སྔ་མས་བསྟན་པའི་མཚན་ཉིད་གསུམ་གཞིར་བཞག་སྟེ། ཀུན་བཏགས་འཁྲུལ་བ་སྐྱེ་བའི་གཞི་གཞན་དབང་འཁོར་བ་འགྲུབ་པའི་ཆོས་དང་། གཞན་དབང་ཀུན་བཏགས་ཀྱིས་སྟོང་པའི་ཡོངས་གྲུབ་སྒྲིབ་གཉིས་གང་རུང་སྤངས་པའི་མྱང་འདས་དེ་ཆོས་ཀྱི་དེ་ཁོ་ན་ཉིད་མཐར་ཐུག་ཏུ་བསྟན་པའི་ཚུལ་གྱིས་འཆད་པར་མཛད་དོ། །དེ་དག་ཐམས་ཅད་ཀྱང་གདུལ་བྱ་འཁོར་བར་འཇུག་པའི་རྒྱུ་དང་། འཁོར་བའི་ངོ་བོ་དང་། དེ་ལས་གྲོལ་བའི་ཐབས་འབྲས་བུ་དང་བཅས་པ་སྟོན་པའི་དབང་དུ་མཛད་པ་སྟེ། འདིར་མཚོན་པ་ཙམ་ཞིག་བརྗོད་དོ། །གསུམ་པ་ཕྱིན་དྲུག་གི་རྣམ་བཞག་ལ། རྒྱལ་སྲས་ཀྱི་སྤྱོད་པ་རྣམས་རིགས་བསྡུས་ན་ཕྱིན་དྲུག་ཏུ་འདུ་བ་ཡིན་ཏེ། དེ་ཡང་མདོ་སྡེ་རྒྱན་ལས་གསུངས་པ་ལྟར་ཕྱིན་དྲུག་ཏུ་གྲངས་ངེས་པའི་ཕྱིར་ཏེ། མངོན་མཐོ་སྒྲུབ་པ་དང་། དོན་གཉིས་སྒྲུབ་པ་དང་། གཞན་དོན་རྫོགས་པར་སྒྲུབ་པ་དང་། བསླབ་གསུམ་སྒྲུབ་པ་དང་། ཐེག་ཆེན་ཐམས་ཅད་སྡུད་པ་དང་། ཐབས་ཀྱི་རྣམ་པ་ཐམས་ཅད་གྲུབ་པ་ལ་ལྟོས་པའི་དབང་དུ་མཛད་ན་ཕྱིན་དྲུག་ཏུ་ངེས་པའི་ཕྱིར། དང་པོ་གྲུབ་སྟེ། ཕྱིན་དྲུག་དང་ཁྱད་པར་དུ་སྦྱིན་པ་དང་ཚུལ་ཁྲིམས་ཀྱི་རྒྱུ་ལས་མངོན་མཐོ་ཕུན་སུམ་ཚོགས་པ་འབྱུང་བའི་ཕྱིར། གཉིས་པ་གྲུབ་སྟེ། གཞན་དོན་སྒྲུབ་པ་ལ་ཟང་ཟིང་གི་སྦྱིན་པས་ཕན་འདོགས་དགོས་ཤིང་། དེ་ལ་གཞན་གནོད་གཞི་དང་བཅས་པ་ལས་ལྡོག་པའི་ཚུལ་ཁྲིམས་དང་། གནོད་པ་ལ་བཟོད་པ་དགོས་ལ། རང་དོན་སྒྲུབ་པ་ལ་སེམས་རྩེ་གཅིག་པ་སྒྲུབ་པ་དང་། དེ་ལ་བརྩོན་འགྲུས་དགོས་ཤིང་། དེ་ལ་བརྟེན་ནས་སེམས་རྣམ་པར་གྲོལ་བར་འགྱུར་བའི་ཕྱིར། གསུམ་པ་གྲུབ་སྟེ། ཟང་ཟིང་བཏང་བས་ཕོངས་པ་སེལ། གཞན་ལ་མི་གནོད་པས་འཚེ་བ་མེད། གཞན་དོན་སྒྲུབ་པ་ལ་བརྩོན་པ། གཞན་ཡིད་འདུན་པ། ཐེ་ཚོམ་གཅོད་པ་རྣམས་འབྱུང་བ་ནི་ཕྱིན་དྲུག་གིས་བྱེད་པའི་ཕྱིར། བཞི་པ་གྲུབ་སྟེ། ཕར་ཕྱིན་དང་པོ་གསུམ་ཚུལ་ཁྲིམས་ཀྱི་བསླབ་པར་འདུ་ཞིང་། ཕྱི་མ་གཉིས་ནི་ཏིང་ངེ་འཛིན་དང་ཤེས་རབ་ཀྱི་བསླབ་པ་ཡིན་ལ། བརྩོན་འགྲུས་ནི་བསླབ་པ་གསུམ་ཆར་ལ་གཏོགས་པའི་ཕྱིར་ཏེ། མདོ་སྡེ་རྒྱན་ལས། བསླབ་གསུམ་དབང་དུ་མཛད་ནས་ནི།། རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །མཐའ་མ་གཉིས་ནི་རྣམ་པ་གཉིས། །ཞེས་གསུངས་པའི་ཕྱིར། ལྔ་པ་གྲུབ་སྟེ། ལོངས་སྤྱོད་ལ་མ་ཆགས་ཤིང་བསླབ་པ་ལ་གུས་པ། སྡུག་བསྔལ་ལ་མི་སྐྱོ་བ། དགེ་བ་ཀུན་ལ་སྤྲོ་བ། ལུས་སེམས་ལས་སུ་རུང་བས་ལྷག་མཐོང་འཕེལ་བ་རྣམས་ཕྱིན་དྲུག་ལས་འབྱུང་བའི་ཕྱིར། དྲུག་པ་གྲུབ་སྟེ། ཐོབ་ཟིན་གྱི་ལོངས་སྤྱོད་ལ་མ་ཆགས་པའི་ཐབས། མ་ཐོབ་པ་ཐོབ་འདོད་ཀྱི་གཡེང་བ་སྡོམ་པའི་ཐབས། སེམས་ཅན་མི་གཏོང་བའི་ཐབས། དགེ་བ་འཕེལ་བའི་ཐབས། སྒྲིབ་གཉིས་སྦྱོང་བའི་ཐབས་རྣམས་ནི་ཕྱིན་དྲུག་གིས་སྒྲུབ་པའི་ཕྱིར་རོ། །གོ་རིམ་ཡང་ངེས་པ་ཡིན་ཏེ། སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་རྣམས་འབྱུང་བའི་ཕྱིར། མཆོག་དམན་ཀྱང་གྲུབ་སྟེ། སྔ་མ་སྔ་མ་དམན་ཅིང་ཕྱི་མ་ཕྱི་མ་མཆོག་ཡིན་པའི་ཕྱིར། ཕྲ་རགས་ཀྱང་གྲུབ་སྟེ། སྔ་མ་སྔ་མ་རགས་ལ་ཕྱི་མ་ཕྱི་མ་ཕྲ་བའི་ཕྱིར། དེ་སྐད་དུའང་མདོ་སྡེ་རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་གསུངས་པའི་ཕྱིར། བྱང་སེམས་ཀྱི་ཕྱིན་དྲུག་རྣམས་ཆོས་བཞི་བཞི་དང་ལྡན་ཏེ། དེ་དག་ནི་རང་གི་མི་མཐུན་ཕྱོགས་སེར་སྣ་དང་ཚུལ་འཆལ་སོགས་ཉམས་པར་བྱེད་པ་དང་། གྲོགས་སྟོང་ཉིད་རྟོགས་པའི་ཤེས་རབ་ཀྱིས་ཟིན་པ་དང་། སྐབས་ཀྱི་འདོད་པའི་དོན་དེ་རྫོགས་པར་བྱེད་པ་དང་། སེམས་ཅན་སྨིན་ནས་གྲོལ་བར་བྱེད་པའི་ཁྱད་ཆོས་དང་ལྡན་པའི་ཕྱིར། དེ་ཉིད་ལས། སྦྱིན་པ་མི་མཐུན་ཕྱོགས་ཉམས་བྱེད། །རྣམ་པར་མི་རྟོགས་ཡེ་ཤེས་ལྡན། །ཞེས་སོགས་གསུངས་པའི་ཕྱིར། དེ་རྣམས་ཀྱིས་མི་མཐུན་ཕྱོགས་བདུན་བདུན་ཀྱང་ཟིལ་གྱི་གནོན་པར་བྱེད་དེ། སྦྱིན་པ་ལྟ་བུ་ལ་མཚོན་ན་སེར་སྣའི་སྒོ་ནས་མ་ཆགས། དེ་བཞིན་དུ་ལོངས་སྤྱོད་ཀྱི་སྒོ་ནས། ཕྱི་བཤོལ་གྱི་སྒོ་ནས། ཆོག་འཛིན་གྱི་སྒོ་ནས། ལན་ལ་རེ་བའི་སྒོ་ནས། རྣམ་སྨི ན་ལ་རེ་བའི་སྒོ་ནས། རྣམ་གཡེང་གི་སྒོ་ནས་མ་ཆགས་པའི་ཕྱིར་ཏེ། དེ་ཉིད་ལས། བྱང་ཆུབ་སེམས་དཔའི་སྦྱིན་པ་ནི། །མ་ཆགས་མི་ཆགས་ཆགས་པ་མེད། །ཆགས་པ་ཉིད་ཀྱང་མ་ཡིན་ཏེ། །མ་ཆགས་མི་ཆགས་ཆགས་པ་མེད། །ཞེས་གསུངས་ཤིང་གཞན་ལའང་སྦྱར་བའི་ཕྱིར། གཞན་ཡང་དབུ་མ་རིན་ཆེན་ཕྲེང་བ་ལས་ཀྱང་། སྦྱིན་པ་རང་དོན་ཡོངས་བཏང་བ། །ཚུལ་ཁྲིམས་གཞན་ཕན་བྱ་བའོ། །བཟོད་པ་ཁྲོ་བ་སྤངས་པ་སྟེ། །དཀར་པོའི་ཆོས་འཕེལ་བརྩོན་འགྲུས་སོ། །བསམ་གཏན་རྩེ་གཅིག་ཉོན་མོངས་མེད། །ཤེས་རབ་བདེན་དོན་གཏན་ལ་འབེབས། །ཞེས་གསུངས་སོ། །ཕྱིན་དྲུག་གི་ཁྱད་པར་ལ། དང་པོ་སྦྱིན་པ་ནི། གཏོང་བའི་སེམས་པས་ཀུན་ནས་བསླངས་པ འི་ལུས་ངག་སྦྱིན་པ་ལ་འཇུག་བཞིན་པའི་དུས་ཀྱི་སེམས་པ་ནི་སྦྱིན་པའི་ངོ་བོ་ཡིན་ལ། དེ་ཉིད་སེམས་བསྐྱེད་བསྔོ་བ་སྟོང་ཉིད་རྟོགས་པའི་ཤེས་རབ་གསུམ་གྱིས་ཟིན་པ་ན་སྦྱིན་པའི་ཕར་ཕྱིན་ཏུ་འགྱུར་རོ། །སྦྱིན་པ་ལ་དབྱེ་ན་ཆོས་ཀྱི་སྦྱིན་པ། ཟང་ཟིང་གི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་དང་གསུམ་མོ། །དང་པོ་ནི། གསུང་རབ་དགོངས་འགྲེལ་དང་བཅས་པའི་ཚིག་དོན་ཅི་རིགས་པ་རང་གིས་ཇི་ལྟར་ཤེས་པ་བཞིན་གཞན་ལ་སྟོན་པའོ། །གཉིས་པ་ནི། ཟང་ཟིང་གི་དངོས་པོ་གཞན་དང་ལུས་ལོངས་སྤྱོད་རྣམས་ཀྱང་གཞན་ལ་གཏོང་བའོ། །གསུམ་པ་ནི། གཞན་རྒྱལ་པོ་དང་མེ་ཆུ་མཚོན་ལ་སོགས་པའི་འཇིགས་པ་ལས་སྐྱོབ་པ་སྟེ། དེ་དག་ནི་རང་གིས་དངོས་སུ་བྱ་བ་དང་། དེ་ལྟར་བྱེད་པའི་བསམ་པ་སྦྱོང་བའོ། །སྦྱིན་པའི་སྐབས་ཀྱི་ཉམས་ལེན་ལ་ཕྱིན་དྲུག་ཀྱང་འབྱུང་སྟེ། སྦྱིན་པ་རང་ཉིད་དང་། ཉན་རང་ཡིད་བྱེད་སྤོང་བ་ལྟ་བུ་ཚུལ་ཁྲིམས་དང་། གཞན་གྱིས་གཤེ་ཞིང་མི་སྙན་པ་ཟེར་བ་ལ་མི་སྐྱོ་བའི་བཟོད་པ་དང་། དེ་ཉིད་ལ་བརྩོན་ཅིང་གོང་དུ་འཕེལ་བའི་ཕྱིར་འདུན་པ་བསྐྱེད་པའི་བརྩོན་འགྲུས་དང་། དགེ་བ་རྫོགས་བྱང་དུ་བསྔོ་བའི་སེམས་རྩེ་གཅིག་པ་ལྟ་བུའི་བསམ་གཏན་དང་། སྦྱིན་བྱ་སྦྱིན་བྱེད་ལེན་པ་པོའི་འཁོར་གསུམ་རང་བཞིན་མེད་ཅིང་སྒྱུ་མ་ལྟར་ཤེས་པའི་ཤེས་རབ་སྟེ་དྲུག་གོ །ཚུལ་འདི་ཕར་ཕྱིན་ལྷག་མ་ལྔ་ལ་ཡང་ཅི་རིགས་སུ་སྦྱར་བར་བྱ་བ་སྟེ། མངོན་རྟོགས་རྒྱན་ལས། དེ་དག་སོ་སོར་སྦྱིན་ལ་སོགས། །རྣམ་པ་དྲུག་ཏུ་བསྡུས་པ་ཡིས། །གོ་ཆའི་སྒྲུབ་པ་གང་ཡིན་ཏེ། །དྲུག་ཚན་དྲུག་གིས་ཇི་བཞིན་བཤད། །ཅེས་གསུངས་པའི་ཕྱིར་རོ། །གཉིས་པ་ཚུལ་ཁྲིམས་ནི། གཞན་གནོད་གཞི་དང་བཅས་པ་ལས་ཡིད་ཕྱིར་ལོག་པའི་སྤོང་བའི་སེམས་པ་ནི་ཚུལ་ཁྲིམས་ཀྱི་ངོ་བོ་ཡིན་ལ། དེ་ཉིད་སྔར་ལྟར་ཆོས་གསུམ་གྱིས་ཟིན་པ་ན་ཚུལ་ཁྲིམས་ཀྱི་ཕར་ཕྱིན་ཏུ་འགྱུར་རོ། །དབྱེ་ན་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་མོ། །དང་པོ་ནི། མི་དགེ་བ་བཅུ་ལ་སོགས་པ་བཅས་རང་གི་ཁ་ན་མ་ཐོ་བ་ཅི་རིགས་སྤོང་བའོ། །གཉིས་པ་ནི། ཚོགས་གསོག་པ་ལ་སོགས་པ་སྒོ་གསུམ་གྱི་དགེ་བའི་བྱ་བ་རྣམས་དང་། ཐོས་བསམ་སྒོམ་པ་ལ་འབད་པ། ཕྱིན་དྲུག་སོགས་ལ་འཇུག་པ། དགེ་བ་ལ་ཡི་རང་ཞིང་རྫོགས་བྱང་དུ་བསྔོ་བ་སོགས་སོ། །གསུམ་པ་སེམས་ཅན་དོན་བྱེད་ནི། བྱང་སེམས་ཀྱིས་སེམས་ཅན་ལ་ཐབས་སྣ་ཚོགས་ཀྱིས་ཕན་འདོགས་པ་སྟེ། སྡུག་བསྔལ་ཅན་གྱི་གྲོགས་བྱེད་པ། རྨོངས་པའི་དོན་བྱེད་པ། ཕན་འདོགས་པའི་དོན་བྱེད་པ། འཇིགས་པས་ཉེན་པའི་དོན་དང་། མྱ་ངན་གྱིས་གཟིར་བའི་དོན་དང་། ཕོངས་པའི་དོན་དང་། གནས་འཆའ་བྱེད་པའི་དོན་དང་། བློ་མཐུན་འདོད་པའི་དོན་དང་། ཡང་དག་པར་ཞུགས་པའི་དོན་དང་། ལོག་པར་ཞུགས་པའི་དོན་དང་། གཞན་འདུན་པར་བྱེད་པའི་སྒོ་ནས་གཞན་དོན་བྱེད་པ་སྟེ་དོན་བྱ་བ་བཅུ་གཅིག་གོ །གསུམ་པ་བཟོད་པ་ནི། གནོད་བྱེད་དང་སྡུག་བསྔལ་དང་དེའི་རྒྱུ་སོགས་ལ་མི་འཁྲུགས་ཤིང་ཆོས་ལ་མོས་པ་བརྟན་པའི་སེམས་པ་ནི་བཟོད་པའི་ངོ་བོ་དང་། དེ་ཡང་ཆོས་གསུམ་གྱིས་ཟིན་པའི་སྒོ་ནས་དེའི་ཕར་ཕྱིན་ཏུ་འགྱུར་རོ། །དབྱེ་ན་གནོད་པ་ལ་ཇི་མི་སྙམ་པ། སྡུག་བསྔལ་དང་ལེན། ཆོས་ལ་ངེས་སེམས་དང་གསུམ་མོ། །དང་པོ་ནི། གནོད་བྱེད་ཀྱི་གང་ཟག་ལ་མི་ཁྲོ་བའོ། །གཉིས་པ་ནི། སྡུག་བསྔལ་དང་དེའི་རྒྱུ་ཚེར་མ་ལྟ་བུ་སོགས་ལ་དམིགས་ནས་མི་ཁྲོ་བའོ། །གསུམ་པ་ནི། དད་པའི་ཡུལ་དཀོན་མཆོག །མངོན་དུ་བྱ་བའི་ཡུལ་བདག་མེད་གཉིས། བླང་དོར་གྱི་ཡུལ་ལས་འབྲས། སྒོམ་པའི་ཡུལ་བྱང་ཆུབ་དང་ཐོབ་བྱེད་ཀྱི་ལམ། ཐོས་བསམ་གྱི་ཡུལ་གསུང་རབ་ཡན་ལག་བཅུ་གཉིས་སོགས་ལ་མོས་ནས་སྦྱོང་བའོ། །བཞི་པ་བརྩོན་འགྲུས་ནི། དགེ་བ་བསྡུ་བ་དང་སེམས་ཅན་གྱི་དོན་དུ་སེམས་མངོན་པར་སྤྲོ་བ་ནི་བརྩོན་འགྲུས་ཡིན་ལ། དེ་ཆོས་གསུམ་གྱིས་ཟིན་པ་ན་དེའི་ཕར་ཕྱིན་ཏུ་འགྱུར་རོ། །དབྱེ་ན་གོ་ཆའི་བརྩོན་འགྲུས། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་བརྩོན་འགྲུས་དང་གསུམ་མོ། །དང་པོ་ནི། སེམས་ཅན་གྲངས་མེད་པ་ལྟ་ཅི། སེམས་ཅན་གཅིག་གི་དོན་དུ་ཡང་བསྐལ་བ་གྲངས་མེད་པར་དམྱལ་བར་གནས་ཏེ་སངས་རྒྱས་སྒྲུབ་དགོས་པ་བྱུང་ནའང་སྐྱོ་ངལ་མེད་པར་འཇུག་འདོད་ཀྱི་གོ་ཆ་བགོ་བའོ། །གཉིས་པ་ནི། ཕྱིན་དྲུག་རྫོགས་པར་བྱ་བ་དང་། ཚོགས་རྫོགས་པའི་ཆེད་དུ་བརྩོན་པའོ། །གསུམ་པ་ནི། སྔར་བཤད་པ་ལྟ་བུའི་དོན་བྱ་བ་བཅུ་གཅིག་གི་སྒོ་ནས་གཞན་དོན་བྱེད་པ་ལ་འབད་པའོ། །ལྔ་པ་བསམ་གཏན་ནི། དགེ་བའི་དམིགས་པ་ལ་མི་གཡེང་བའི་སེམས་རྩེ་གཅིག་པ་ནི་བསམ་གཏན་གྱི་ངོ་བོ་ཡིན་ལ། དེ་གོམས་པ་མཐར་ཕྱིན་པའམ་ཆོས་གསུམ་གྱིས་ཟིན་པའི་སྒོ་ནས་དེའི་ཕར་ཕྱིན་ཏུ་འགྱུར་རོ། །དབྱེ་ན་ལུས་སེམས་བདེར་གནས། ཡོན་ཏན་མངོན་གྲུབ་པ། སེམས་ཅན་དོན་བྱེད་ཀྱི་བསམ་གཏན་དང་གསུམ། དང་པོ་ནི། ལུས་སེམས་ཤིན་སྦྱངས་བསྐྱེད་པའི་བསམ་གཏན། གཉིས་པ་ནི། མངོན་ཤེས་དང་རྣམ་ཐར་ཟད་པར་སོགས་ཡོན་ཏན་སྒྲུབ་པའི་བསམ་གཏན། གསུམ་པ་ནི། དོན་བྱ་བ་བཅུ་གཅིག་གི་སྒོ་ནས་སེམས་ཅན་གྱི་དོན་སྒྲུབ་པའི་བསམ་གཏན་ནོ། །དྲུག་པ་ཤེས་རབ་ནི། བཏགས་པའི་དངོས་པོ་ཆོས་རབ་ཏུ་རྣམ་པར་འབྱེད་བྱེད་ནི་ཤེས་རབ་ཀྱི་ངོ་བོ་ཡིན་ལ། དེ་ཆོས་གསུམ་གྱིས་ཟིན་པ་དང་གོམས་པ་ཕུལ་དུ་ཕྱིན་པ་ན་ཤེས་རབ་ཀྱི་ཕར་ཕྱིན་ཏུ་འགྱུར་རོ། །དབྱེ་ན་དོན་དམ་རྟོགས་པའི་ཤེས་རབ། ཀུན་རྫོབ་རྟོགས་པའི་ཤེས་རབ། སེམས་ཅན་དོན་བྱེད་ཀྱི་ཤེས་རབ་དང་གསུམ། དང་པོ་ནི། སྟོང་ཉིད་རྟོགས་པའི་ཤེས་རབ་ཐམས་ཅད་དང་། གཉིས་པ་ནི། རིག་པའི་གནས ལྔའམ་ཅི་རིགས་ལ་མཁས་པའི་ཤེས་རབ། གསུམ་པ་ནི། སེམས་ཅན་གྱི་དོན་སྒྲུབ་ཚུལ་ལེགས་པར་ཤེས་པའི་ཤེས་རབ་བོ། །ཕར་ཕྱིན་དྲུག་པོ་སངས་རྒྱས་ཀྱི་ས་ཁོ་ན་ན་ཡོད་པར་བཞེད་པའི་ཚུལ་ཡོད་ཀྱང་། ཕ་རོལ་ཏུ་ཕྱིན་ཟིན་པ་ནི་སངས་རྒྱས་ཀྱི་ས་ན་ཡོད་ལ། ཕྱིན་པར་བྱེད་པ་ནི་སློབ་ལམ་ན་ཡོད་དེ་རྗེའི་དགོངས་པའོ། །ཕྱིན་དྲུག་ཉམས་སུ་བླངས་པའི་ཕན་ཡོན་ནི། མགོན་པོ་ཀླུ་སྒྲུབ་ཀྱིས་རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱི་བདེ། །བཟོད་པས་མདངས་ལྡན་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །སྙིང་བརྩེ་བས་ནི་དོན་ཀུན་འགྲུབ། །བདུན་པོ་འདི་དག་མ་ལུས་པར། །ཅིག་ཅར་ཕ་རོལ་ཕྱིན་པ་ཡིད། །ཡེ་ཤེས་བསམ་མི་ཁྱབ་པའི་ཡུལ། །འཇིག་རྟེན་མགོན་པོ་ཉིད་ཐོབ་འགྱུར། །ཞེས་པ་ལྟར་རོ། །ཕྱིན་དྲུག་གི་བྱེད་ལས་ཕན་ཡོན་དང་བཅས་པ་ནི། མདོ་སྡུད་པ་ལས། སྦྱིན་པས་སྡུག་བསྔལ་གྱུར་པའི་སེམས་ཅན་ཡོངས་སྨིན་བྱེད། ཁྲིམས་ཀྱིས་དུད་འགྲོའི་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་དེ་ཡི་དལ་འབྱོར་རྟག་ཏུ་རྙེད། །བཟོད་པས་གཟུགས་བཟང་དམ་པ་རྒྱ་ཆེན་ཐོབ་འགྱུར་ཏེ། །གསེར་མདོག་སྡུག་ཅིང་འགྲོ་བས་ལྟ་བའི་འོས་སུ་འགྱུར། །བརྩོན་འགྲུས་ཀྱིས་ནི་དཀར་པོའི་ཡོན་ཏན་འགྲིབ་མི་འགྱུར། །ཡེ་ཤེས་མཐའ་ཡས་རྒྱལ་བའི་བང་མཛོད་རྙེད་པར་འགྱུར། །བསམ་གཏན་གྱིས་ནི་འདོད་པའི་ཡོན་ཏན་སྨད་པ་འདོར། །རིག་དང་མངོན་པར་ཤེས་དང་ཏིང་འཛིན་མངོན་པར་སྒྲུབ། །ཤེས་རབ་ཀྱིས་ནི་ཆོས་ཀྱི་རང་བཞིན་ཡོངས་ཤེས་ནས། ཁམས་གསུམ་མ་ལུས་པ་ལས་ཡང་དག་འདའ་བར་འགྱུར། །མི་ཡི་ཁྱུ་མཆོག་འཁོར་ལོ་རིན་ཆེན་བསྐོར་བྱས་ནས། །སྡུག་བསྔལ་ཟད་པར་བྱ་ཕྱིར་འགྲོ་ལ་ཆོས་ཀྱང་སྟོན། །ཆོས་འདི་ཡོངས་རྫོགས་བྱས་ནས་བྱང་ཆུབ་སེམས་དཔའ་དེ། །ཡོངས་དག་ཞིང་དང་སེམས་ཅན་དག་པ་རྗེས་སུ་འཛིན། །སངས་རྒྱས་རྒྱུད་དང་ཆོས་ཀྱི་རྒྱུད་ཀྱང་ཡོངས་སུ་འཛིན། །དེ་བཞིན་དགེ་འདུན་རྒྱུད་དང་ཆོས་ཀུན་ཡོངས་སུ་འཛིན། །འགྲོ་བའི་ནད་གསོ་མཛད་པ་སྨན་པའི་མཆོག་གྱུར་པས། །ཤེས་རབ་བསྟན་པ་བྱང་ཆུབ་ལམ་ལྡན་འདི་གསུངས་ཏེ། །ཞེས་གསུངས་པའི་ཕྱིར་རོ། །ཐུབ་པའི་གསུང་རབ་མ་དྲོས་མཚོ་ཆེན་ལས། །འོངས་པའི་རྒྱལ་ཚབ་ལེགས་བཤད་གངྒཱའི་རྒྱུན། །ཆ་ཙམ་རྣམ་དཔྱོད་སོར་རྩེས་གུས་བླངས་ནས། །རོལ་འདོད་རྨད་བྱུང་དགའ་བའི་གར་གྱིས་བྲེལ། །འདིར་འབད་ལས་བྱུང་རྣམ་དཀར་ཅི་མཆིས་པ། །དུས་གསུམ་བསགས་པའི་དགེ་དང་ལྷན་ཅིག་ཏུ། །ཤི་འཕོས་བྱམས་པའི་དྲུང་དུ་བགྲོད་པ་དང་། །སྐྱེ་ཀུན་འབྲལ་མེད་རྗེས་སུ་འཛིན་ཕྱིར་བསྔོ། །ཅེས་བྱམས་ཆོས་སྡེ་ལྔའི་དགོངས་འགྲེལ་བསྡུས་དོན་བྱམས་མགོན་དགྱེས་པའི་མཆོད་སྤྲིན་ཞེས་བྱ་བ་འདི་ནི། ཅོ་ནེའི་སློབ་དཔོན་པ་ཤཱཀྱའི་དགེ་སློང་བཤད་སྒྲུབ་མིང་ཅན་གྱིས་དད་པས་སྦྱར་བའི་ཡི་གེ་པ་ནི་ཏཱ་ཡི་ལ་ལུང་བློ་བཟང་དོན་གྲུབ་བོ། །མངྒལཾ། །